TIRANË, 9 janar/ATSH/ Prindërit dhe kujdestarët ligjorë me të ardhura të ulëta dhe të mesme do të mund të përfitojnë këtë vit kompensim ushqimor dhe arsimor për fëmijët në ngarkim, përmes deklaratës vjetore të të ardhurave personale DIVA 2025.

Skema synon të lehtësojë barrën financiare të familjeve, duke ofruar zbritje nga baza tatimore për numrin e fëmijëve dhe shpenzimet e kryera për arsimimin e tyre.

Përfitimi u takon atyre deklarojnë në DIVA 2025 fëmijët në ngarkim dhe shpenzimet arsimore përkatëse, ndërsa kushti kryesor mbetet që të ardhurat e tatueshme vjetore të mos tejkalojnë 1,2 milionë lekë.

Sipas Drejtorisë së Përgjithshme të Tatimeve, për çdo fëmijë nën moshën 18 vjeç aplikohet një zbritje tatimore që korrespondon me shumën prej 48 mijë lekësh, ndërsa për shpenzimet arsimore të fëmijëve në ngarkim parashikohet një zbritje totale deri në 100 mijë lekë.

Kërkesa për përfitimin e këtij kompensimi bëhet vetëm një herë dhe paraqitet nga anëtari i familjes që ka të ardhurat më të larta vjetore, ndërkohë që autoritetet sqarojnë se e drejta për përfitim mbetet edhe në rastet kur individi nuk ka detyrim ligjor për të dorëzuar deklaratën DIVA 2025.

Procesi i rimbursimit realizohet përmes sistemit e-Filing, pas dorëzimit të deklaratës, kur nga përllogaritjet rezulton mbipagesë.

Më pas, aplikuesi duhet të paraqesë një kërkesë për rimbursim në modulin “Çështjet e mia- Pyetje e Përgjithshme”, duke bashkëlidhur dokumentet e nevojshme, përfshirë të dhënat e llogarisë bankare personale, certifikatën familjare dhe dokumentacionin justifikues për shpenzimet arsimore, si kontratat me institucionet përkatëse dhe faturat e pagesave, përfshirë edhe ato për kurset e gjuhëve të huaja.

1 nga 3

/r.e/

The post Prindërit me të ardhura deri në 1,2 milionë lekë përfitojnë kompensim për fëmijët përmes DIVA 2025 appeared first on Agjencia Telegrafike Shqiptare.

Këngëtarja e njohur shqiptare dhe tashmë deputetja e rizgjedhur, Edona Llalloshi, ka reaguar për herë të parë publikisht pas rezultatit të zgjedhjeve të 28 dhjetorit, ku qytetarët i besuan edhe një mandat tjetër në Kuvendin e Kosovës.

Përmes një videoje të publikuar në Instagram, Llalloshi ka falënderuar votuesit për mbështetjen e dhënë, duke e cilësuar këtë besim jo vetëm si nder personal, por si një përgjegjësi të madhe morale dhe institucionale.

Në këto zgjedhje, Edona Llalloshi ka marrë gjithsej 44,259 vota, me ç’rast ka siguruar një ulëse në Kuvend, duke u renditur si emri i 18-të më i votuar në radhët e Lëvizjes Vetëvendosje, parti e cila në total ka siguruar 57 deputetë.

Në mbishkrimin e videos, ajo shkroi:

“Të dashur qytetarë të vendit tim, të dashur bashkëatdhetarë,
Ju falënderoj me mirënjohje të thellë për besimin që ma dhatë. Ky besim nuk është vetëm një nder personal, por, mbi të gjitha, një përgjegjësi e madhe morale dhe institucionale ndaj jush dhe ndaj Republikës sonë.
Çdo votë e juaja është zë, shpresë dhe kërkesë për përfaqësim të ndershëm, për drejtësi, barazi dhe dinjitet. Angazhimi im si deputete do të udhëhiqet nga besimi dhe përkushtimi për një shoqëri më të drejtë, më të barabartë dhe më prosperuese.
Ju siguroj se do ta ushtroj këtë mandat me integritet, përgjegjësi dhe transparencë, duke mos harruar asnjëherë se pushteti buron nga qytetari dhe i shërben vetëm atij.
Faleminderit për mbështetjen dhe për besimin tuaj.
Me respekt dhe përulësi,
Edona Llalloshi”.

Reagimi i saj është pritur me komente pozitive nga ndjekësit, të cilët i kanë uruar suksese në mandatin e radhës, duke theksuar rëndësinë e përfaqësimit dinjitoz në Kuvend. /Telegrafi/

OSLO, 7 janar /ATSH-AFP/ – Viti 2025 ka qenë viti më i nxehtë i regjistruar ndonjëherë në Norvegji, me një verë të shënuar nga një valë e fortë të nxehti dhe një fillimdimri të vonuar e jashtëzakonisht të butë, njoftoi sot Instituti Meteorologjik Norvegjez.

Si një tjetër tregues i çrregullimeve klimatike të shkaktuara nga aktivitetet njerëzore, termometri arriti në 4,0 gradë Celcius më 22 dhjetor në Longyearbyen, kryeqendra e arkipelagut të Svalbardit në zemër të Arktikut, më shumë se në Sevilje (3,0 gradë Celcius)  apo Ankara (1,0 gradë Celsius) në të njëjtën ditë.

“Është një vit rekord”, deklaroi klimatologu Hans Olav Hygen nga Instituti Meteorologjik Norvegjez.

“Shumë zona të Norvegjisë përjetuan një verë jashtëzakonisht të nxehtë, me një valë të fortë të nxehti në korrik. Kjo, sigurisht, ndikon në bilancin e gjithë vitit. Për më tepër, para Krishtlindjeve pamë një fund vjeshte dhe një fillim dimri relativisht të butë”, shtoi ai.

Në shkallë kombëtare, temperaturat mesatare vitin e kaluar rezultuan 1,6 gradë Celcius mbi normalen (mesatarja e periudhës 1991–2020) dhe 2,8 gradë Celcius mbi nivelet e periudhës paraIndustriale (1871–1900), sipas Institutit./ /Ad.Ab./ a.jor.

The post METEO – 2025-a viti më i nxehtë i regjistruar ndonjëherë në Norvegji appeared first on Agjencia Telegrafike Shqiptare.

Pas përfundimit të votave të personave me nevoja të veçanta, është mbyllur edhe numërimi i votave me kusht.

Sipas KQZ-së, Lëvizja Vetëvendosje (VV) ka marrë 50.98% të këtyre votave, Partia Demokratike e Kosovës (PDK) 19.75%, Lidhja Demokratike e Kosovës (LDK) 10.79% dhe Aleanca për Ardhmërinë e Kosovës (AAK) 5.88%.

Numri total i vendvotimeve ka qenë 57, ndërsa rreth 10 mijë qytetarë kanë dhënë votën e tyre.

Nga VV, më të votuarit janë:

Albin Kurti – 4,181 vota

Glauk Konjufca – 3,328 vota

Albulena Haxhiu – 1,786 vota

Hekuran Murati – 1,717 vota

Hajrulla Çeko – 1,570 vota

Nga PDK, më të votuarit janë:

Bedri Hamza – 1,627 vota

Arian Tahiri – 774 vota

Përparim Gruda – 734 vota

Uran Ismaili – 681 vota

Vlora Çitaku – 534 vota

Nga LDK, më të votuarit janë:

Lumir Abdixhiku – 684 vota

Hykmete Bajrami – 533 vota

Doarsa Kica Xhelili – 390 vota

Ukë Rugova – 382 vota

Avdullah Hoti – 381 vota

Nga AAK, më të votuarit janë:

Ramush Haradinaj – 479 vota

Besnik Tahiri – 294 vota

Daut Haradinaj – 293 vota

Bekë Berisha – 242 vota

Agim Çeku – 226 vota

Sinjali – aty ku e vërteta flet para lajmit!

/GazetaSinjali/

The post Numërimi i votave me kusht përfundon, këta janë më të votuarit nëpër parti appeared first on Sinjali.

Numërimi i votave të votuesve me nevoja të veçanta ka përfunduar, ndërsa deri në orën 22:00 të 6 janarit janë numëruar gjithsej 37 kuti votimi.

Sipas rezultateve, Lëvizja Vetëvendosje ka marrë 36.96 për qind të votave të personave me nevoja të veçanta, Partia Demokratike e Kosovës 26.14 për qind, Lidhja Demokratike e Kosovës 12.30 për qind dhe Aleanca për Ardhmërinë e Kosovës 7.13 për qind.

Sinjali – aty ku e vërteta flet para lajmit!

/GazetaSinjali/

The post Përfundon numërimi i votave të personave me nevoja të veçanta, LVV merr mbi 36 për qind appeared first on Sinjali.

Komisioni Qendror i Zgjedhjeve po vazhdon me publikimin e rezultateve nga numërimi i votave me kusht në kuadër të zgjedhjeve të parakohshme për Kuvendin e Republikës së Kosovës 2025.

Procesi është drejt fundit, pasi tashmë janë procesuar rreth 90% të votave.

Sipas rezultateve të përditësuara, Lëvizja Vetëvendosje mbetet e para me mbi 50% të votave me kusht, e ndjekur nga Partia Demokratike e Kosovës me 20.20%, ndërsa e treta është Lidhja Demokratike e Kosovës me 10.51%.

Sinjali – aty ku e vërteta flet para lajmit!

/GazetaSinjali/

The post Numërohen mbi 90% e votave me kusht: Kryeson VV-ja me 50%, PDK mbi 20 për qind e LDK 10% appeared first on Sinjali.

Aktori australian, Jacob Elordi, fitoi çmimin për 'Aktorin më të Mirë Mbështetës' në Critics Choice Awards, duke i dhënë atij çmimin e parë të madh për aktrim në karrierën e tij.

Ai e fitoi çmimin për rolin e tij në filmin "Frankenstein" me regji nga Guillermo del Toro.

Ceremonia u mbajt dje në Santa Monica të Kalifornisë dhe në fjalimin e tij të pranimit të çmimit ai theksoi se nuk e priste të fitonte dhe falënderoi veçanërisht regjisorin e filmit.

- YouTube www.youtube.com

Ai theksoi se bashkëpunimi me Guillermo del Toro i përmbushi ëndrrat që kishte që në moshën 11 vjeç.

Në kategorinë e 'Aktorit më të Mirë Mbështetës', Elordi u nominua së bashku me Benicio del Toro ("One Battle After Another"), Paul Mescal ("Hamnet"), Sean Penn ("One Battle After Another"), Adam Sandler ("Jay Kelly") dhe Stellan Skarsgard ("Sentimental Value").

Filmi "Frankenstein" bazohet në romanin me të njëjtin emër nga Mary Shelley.

Në të, Elordi portretizon përbindëshin ikonik të krijuar nga Victor Frankenstein, luajtur nga Oscar Isaac.

Krijesa fillimisht konceptohet si një eksperiment inteligjent, por kur nuk arrin të përmbushë pritjet e krijuesit të saj, ajo mbetet e humbur në një botë të panjohur për të. /Telegrafi/

Në Critics Choice Awards 2026, momenti më i komentuar i mbrëmjes ndodhi kur Timothee Chalamet u shpall Aktori më i Mirë për rolin e tij në “Marty Supreme” dhe shpërtheu në lot duke i shprehur dashurinë Kylie Jenner.

Në të njëjtën kohë, fytyra e ftohtë dhe serioze e Michael B. Jordanit tërhoqi menjëherë vëmendjen e publikut, duke u kthyer në një nga momentet virale të natës.

Kontrasti mes emocioneve të Chalamet dhe reagimit të Jordan u bë menjëherë objekt memesh dhe komentesh në rrjetet sociale.

Chalamet e mbylli fjalimin duke thënë: “Dhe së fundmi, faleminderit partneres sime prej tre vitesh. Faleminderit për fondacionin tonë”, ndërsa Jenner iu përgjigj publikisht: “Të dua”.

Në fund, “Marty Supreme” nuk fitoi çmimin kryesor, që shkoi për filmin “One Battle After Another” të Leonardo DiCaprio-s, por momenti emocional i Chalamet dhe kontrasti me Jordan mbeti më i diskutuar. /Telegrafi/

- YouTube www.youtube.com

Në Qendrën e Numërimit të Rezultateve (QNR) tashmë janë numëruar rreth 80% të votave me postë për zgjedhjet e jashtëzakonshme parlamentare të 28 dhjetorit.

Sipas përditësimeve nga Komisioni Qendror i Zgjedhjeve, Vetëvendosje vazhdon të jetë e para me mbi 70%, e ndjekur nga LDK me 10.64%, ndërsa e treta është Partia Demokratike e Kosovës me 8.33%.

Ndërkohë, bazuar në rezultatet e përmbledhura nga KQZ, VV ka marrë 50.52% apo 462,487 vota, ndërsa e dyta është PDK me 20.48% dhe 187,455 vota.

Sinjali – aty ku e vërteta flet para lajmit!

/GazetaSinjali/

The post Gati 80% e votave me postë të numëruara – VV vazhdon të prijë, LDK e dyta appeared first on Sinjali.

TIRANË, 5 janar/ATSH/ Administrata Doganore ka mbyllur vitin 2025 me të ardhura në vlerën 240 miliardë lekë, ose rreth 2,5 miliardë euro. Krahasuar me një vit më parë, janë mbledhur rreth 10 miliardë lekë më shumë, duke shënuar një rritje prej 4,3%.

Gjatë vitit 2025, sipas raportit të publikuar nga Drejtoria e Përgjithshme e Doganave, forcimi i lekut ndaj valutave të huaja ka ndikuar negativisht në të ardhurat, duke sjellë një humbje prej rreth 9,5 miliardë lekësh. Nëse ky efekt nuk do të kishte ndodhur, rritja reale e të ardhurave do të ishte rreth 19,5 miliardë lekë, ose 10% më shumë se një vit më parë.

Në raport me planin vjetor, të ardhurat u realizuan në masën 98%. Por duke marrë parasysh ndikimin e kursit të këmbimit, rezulton se realisht janë mbledhur rreth 5 miliardë lekë më shumë se plani, ose 103,3% e tij.

Sipas Administratës Doganore, këto rezultate janë arritur falë menaxhimit më të mirë, kontrolleve më të forta në dogana dhe masave për të luftuar evazionin fiskal, të cilat kanë ndihmuar në rritjen e mbledhjes së të ardhurave.

Viti 2025 solli gjithashtu rritje të ndjeshme të të ardhurave nga mallrat e akcizës. zhdoganimi i karburanteve arriti në rreth 760 mijë tonë, ose 75 mijë tonë më shumë se një vit më parë. Zhdoganimi i cigareve arriti në 3450 tonë, duke kaluar planin dhe duke u rritur me 250 tonë krahasuar me vitin 2024.

Po ashtu, u shënua rritje edhe në zhdoganimin e kafesë me rreth 500 tonë dhe të birrës me rreth 1 mijë tonë më shumë se një vit më parë.

/a.f/r.e/

The post Doganat arkëtuan 240 miliardë lekë në 2025-ën, rritje e të ardhurave nga karburantet dhe akcizat appeared first on Agjencia Telegrafike Shqiptare.

Owen Cooper, 16-vjeçar, shkëlqen si aktori më i ri ndonjëherë që fiton një çmim Critics Choice, duke ndarë skenën me Timothee Chalamet dhe Jacob Elordi, dhe duke marrë një përqafim nga Stephen Graham.

Aktori i ri nga Warrington arriti të bëhet ylli i serialit të Stephen Graham, “Adolescence”, që ka mesatarisht rreth 45 milionë shikime në muaj.

Cooper u shpall aktori më i ri fitues i një Critics Choice, duke e vërtetuar edhe një herë talentin e tij pas fitores në Emmy në vitin 2025.

Gjatë ceremonisë, Owen u përqafoi nga kolegët e tij Elordi dhe Graham, ndërsa Chalamet dhe Kylie Jenner ishin pranë tavolinës për të ndjekur shpalljen e fituesve.

Seriali fitoi gjithashtu çmimin për “Serialin më të Mirë të Limituar”, ndërsa Graham dhe Erin Doherty triumfuan në kategoritë e tyre.

Cooper lexoi një fjalim të shkruar me dorë: “Faleminderit kritikëve dhe të gjithëve pas skenave që e bënë të mundur këtë natë.

Viti që kaloi ka qenë një vorbull e vërtetë për mua dhe familjen time. Na ka ndryshuar jetën përgjithmonë”.

Ai triumfoi mbi konkurrentë të fuqishëm si Wagner Moura, Nick Offerman, Michael Peña, Ashley Walters dhe Ramy Youssef, duke e vendosur emrin e tij ndër yjet më premtues të Hollywood-it. /Telegrafi/

Në garën për mandatin e fundit të deputetit në Partinë Demokratike të Kosovës, rezulton një dallim prej rreth 200 votash mes Bekim Haxhiut dhe Hajdar Beqës.

Sipas rezultateve të përmbledhura nga Komisioni Qendror i Zgjedhjeve (KQZ), Bekim Haxhiu ka siguruar 20,392 vota, që përbëjnë rreth 95.76% të votave të numëruara deri tani. Ndërkaq, Hajdar Beqa ka mbledhur 20,192 vota.

Kjo është përplasja për ulësen e 20-të, ndërsa tri ulëset pas saj janë rezervuar për kandidatët gra, sipas kuotës gjinore, që do të shërbejnë për të siguruar përfaqësim të barabartë në Kuvendin e Kosovës.

Në këto ulëse, janë projektuar të sigurojnë vendin Blerta Deliu-Kodra, Ariana Musliu-Shoshi dhe Arbnora Salihu.

Sinjali – aty ku e vërteta flet para lajmit!

/GazetaSinjali/

The post PDK: Haxhiu dhe Beqa luftojnë për mandat, 200 vota dallim në rezultatin e fundit appeared first on Sinjali.

Komisioni Qendror i Zgjedhjeve (KQZ) ka numëruar mbi 70% të votave me postë nga zgjedhjet e 28 dhjetorit.

Sipas përditësimit të fundit, në Qendrën e Numërimit dhe Rezultateve QNR, deri më tani janë procesuar 13 mijë e 917 vota, përkatësisht 67 nga gjithsej 92 kuti të votimit.

Në këto rezultate prin Lëvizja Vetëvendosje me 72.56 për qind të votave, apo gjithsej 13,917 vota.

Në vendin e dytë renditet Lidhja Demokratike e Kosovës me 10.62% ose 2,036 vota ndërsa Partia Demokratike e Kosovës zë vendin e tretë me  8.19% që përfaqësojnë 1,571 vota.

Aleanca për Ardhmërinë e Kosovës renditet e katërta me 4.73% apo 908 vota.

Sinjali – aty ku e vërteta flet para lajmit!

/GazetaSinjali/

The post Procesi drejt fundit, numërohen mbi 70% e votave me postë appeared first on Sinjali.

Seriali i Netflix Adolescence ka shënuar një tjetër sukses të madh në sezonin e çmimeve, duke fituar katër çmime në Critics Choice Awards, të mbajtura të dielën mbrëma në Los Angeles.

Pas triumfit me tetë çmime Emmy në vitin 2025, produksioni u shpall edhe Seriali më i Mirë i Limituar, duke konfirmuar vlerësimin e lartë nga kritika.

Në qendër të vëmendjes ishte aktori 16-vjeçar Owen Cooper, i cili u shpall Aktori më i Mirë Mbështetës, duke u renditur mes fituesve më të rinj në historinë e këtij çmimi. Ndërkohë, Stephen Graham fitoi çmimin për Aktorin më të Mirë, ndërsa Erin Doherty u vlerësua si Aktorja më e Mirë Mbështetëse për interpretimet e tyre në serial, shkruan DailyMail.

Adolescence rrëfen historinë e një djali të akuzuar për vrasje, duke trajtuar ndikimin e kulturës “incel” në internet.

Me rreth 45 milionë shikime mujore, seriali është kthyer në një nga prodhimet më të ndjekura dhe më të diskutuara globalisht, veçanërisht për mesazhin e tij social.

Gjatë fjalimit të pranimit, Owen Cooper u shpreh: “Faleminderit kritikëve dhe të gjithëve pas skenave që e bënë të mundur këtë natë. Viti që kaloi ka qenë një vorbull e vërtetë për mua dhe familjen time dhe na ka ndryshuar jetën përgjithmonë”.

Fitorja e tij vjen pas konkurrencës së fortë me emra të njohur të televizionit.

Edhe Stephen Graham, duke marrë çmimin e tij, theksoi vlerat njerëzore të projektit: “Të gjithë jemi të barabartë. Ky ishte etosi që e udhëhoqi këtë prodhim”, tha ai, duke shtuar një mesazh prekës për prindërit që të përqafojnë dhe duan fëmijët e tyre. /Telegrafi/

Kosova ka përmbyllur vitin 2025 duke siguruar katër njohje të reja ndërkombëtare. Kenia, Sudani, Siria dhe Bahamet kanë njohur pavarësinë e vendit, një zhvillim që është mirëpritur në përgjithësi nga spektri politik dhe njohësit e marrëdhënieve ndërkombëtare. Megjithatë, këto arritje po shoqërohen edhe me kritika ndaj Ministrisë së Punëve të Jashtme për mungesën e anëtarësimeve në organizata ndërkombëtare dhe për, siç thuhet, regres në raportet bilaterale me vendet aleate.

Madje edhe njohjet e reja nuk konsiderohen direkt si sukses i drejtpërdrejtë i diplomacisë kosovare, pasi sipas tyre kanë ardhur kryesisht si pasojë e zhvillimeve gjeopolitike globale. Në Ministrinë e Punëve të Jashtme dhe Diasporës, nuk kthyen përgjigje për KosovaPress, në lidhje me angazhimin e tyre për vitin 2025.

Anëtari i kryesisë së PDK-së, Artan Behrami, ka kritikuar ashpër Qeverinë Kurti dhe drejtimin e diplomacisë së vendit. Sipas tij, politika e jashtme e Kosovës është “suspenduar”.

“Qeveria Kurti, edhe zonja Donika Gërvalla bashkë me presidenten, e kanë suspenduar politikën e jashtme. E kanë suspenduar fushatën për njohje të Kosovës. E kanë suspenduar aspiratat e Kosovës për anëtarësim në organizatat ndërkombëtare. Ministria e Punëve të Jashtme është boshatisur nga diplomatët me përvojë që kanë pasur trashëgimi në njohje dhe anëtarësim. Janë larguar mbi tridhjetë diplomatë karriere dhe diplomatë të cilët kanë pasur suksese të prekshme. Në vend të tyre, ministria, misionet diplomatike dhe ambasadat janë mbushur me militantë të cilët i shërbejnë jo interesit nacional të Kosovës, por interesave të LVV-së”, thotë ai.

Edhe nga Lidhja Demokratike e Kosovës janë shprehur kritika për mungesë të rezultateve konkrete në diplomaci. Anëtarja e kryesisë së LDK-së, Jehona Lushaku, ka vlerësuar se nuk ka pasur intensifikim të veprimeve diplomatike gjatë qeverisjes aktuale.

“Diplomacia dhe raporti i Kosovës bilateral me shtetet e ndryshme të botës ndërtohet me seriozitet të hatashëm, ku ke edhe shkëmbim të ambasadorëve dhe përfaqësive, pastaj bën lobim për çështje të cilat janë në interes. Ne nuk kemi parë një intensifikim të këtyre veprimeve diplomatike. S’kemi parë anëtarësime të reja të Kosovës në organizata ndërkombëtare, ndërkohë ka pasur njohje simbolike për të cilat edhe kemi aplauduar. Duhet thënë që Kosova ka potencial të jashtëzakonshëm për të ndërtuar raporte dhe për t’i mirëmbajtur miqësitë, të cilat nuk janë bërë gjatë qeverisjes Kurti. Kosova ka humbur pozicionin e vet, ka humbur aleancat e veta, s’ka pasur intensifikim ose nënshkrim të marrëveshjeve bilaterale me shtetet mike. Po ashtu, s’ka pasur koordinim për shumë politika, ku do të duhej që Kosova të përfitonte nga situatat e caktuara politike. Për këtë mendoj që ka shumëçka për t’u përmirësuar dhe Kosova e ka humbur pozicionin e saj, për çka do të na kushtojë për vitet e ardhshme”, deklaron ai.

Ndërkohë, profesori i marrëdhënieve ndërkombëtare, Dritëro Arifi, vlerëson se politika e jashtme e Kosovës duhet parë në një konteksti më të gjerë dhe si reflektim i politikës së brendshme.

Sipas tij, njohjet e fundit nuk mund të quhen sukses i drejtpërdrejtë i diplomacisë kosovare, pasi kanë ardhur kryesisht si pasojë e zhvillimeve gjeopolitike globale.

“Në politikën e jashtme gjithmonë ekziston një teori që thotë se politika e jashtme është reflektim i politikës së brendshme. Edhe po të kishte qenë Bill Gates dhe Elon Musk ministër i jashtëm, nuk do të mund ta rregullonte politikën e jashtme të Kosovës, pasi ajo lidhet me politikat dhe vendimmarrjen e brendshme, e cila reflekton më pas në politikën e jashtme. Nuk mund ta quaj sukses, pasi njohjet kanë ardhur si pasojë e ndryshimeve gjeopolitike në botë. Duhet kuptuar se normalisht shteti i Kosovës ka merita, por personat shumë pak. Duhet një koherencë e gjatë e punës që të vijë deri te një njohje. Duhet të ndryshojnë rrethanat te një vend për të na njohur. Njohja nga Siria nuk ka ardhur sepse kemi lobuar fuqishëm, por ka ardhur si rrjedhojë e ndryshimeve brenda Sirisë dhe raporteve Siri–SHBA. Më pas involvimi i Turqisë, Arabisë Saudite dhe disa faktorëve të tjerë kanë ndikuar që të arrihet kjo çështje”, thotë ai.

Kosova para katër njohjeve të reja në vitin 2025, njohjen e fundit e ka pasur në vitin 2020 nga Izraeli, e cila erdhi si rezultat i Marrëveshjes së Uashingtonit ndërmjet Kosovës dhe Serbisë.

Kosova gjatë viteve 2023–2024, ka kaluar dy faza për anëtarësim në Këshillin e Evropës, mirëpo nuk u përfshi në agjendë në mbledhjen e ministrave të punëve të jashtme të KiE-së, ku vendoset për anëtarësim.

Krahas kësaj, aplikimi i vitit 2022 për marrjen e statusit të vendit kandidat për anëtarësim në Bashkimin Evropian nuk është shqyrtuar ende./KosovaPress

TIRANË, 3 janar /ATSH/ Shkodra e mbylli vitin 2025 si Qyteti Europian i Sportit.

Gjatë vitit 2025 Shkodra u shndërrua në një arenë të gjallë sportive: me mbi 20 aktivitete sportive, më shumë se 2600 sportistë pjesëmarrës dhe mbi 14 000 tifozë, qyteti konfirmoi rolin e tij si identitet kombëtar i sportit.

“Nga aktivitetet kombëtare tek ato evropiane, Shkodra dëshmoi se sporti nuk është thjesht event, por mënyrë jetese, një binom i pandarë i qytetit, i komunitetit dhe i vizionit për të ardhmen. Shkodra, qyteti që jeton me sportin”, shprehet kryebashkiaku i Shkodrës, Benet Beci.

Ndërkohë, Korça është shpallur zyrtarisht “Qyteti Europian i Sportit 2026”.

Në Parlamentin Europian në Bruksel, ACES Europe i akordoi Korçës, në muajin dhjetor, titullin prestigjioz European City of Sport 2026, duke e renditur mes 21 qyteteve më të vlerësuara në Europë.

Ky vlerësim historik nderon traditën sportive të Korçës dhe angazhimin e saj për zhvillimin e komunitetit, infrastrukturës dhe aktiviteteve sportive.

Pas Tiranës, Vlorës dhe Shkodrës, Korça bëhet qyteti i katërt shqiptar i certifikuar nga ACES Europe. Kjo shënon një arritje të madhe dhe një mundësi e jashtëzakonshme për promovimin ndërkombëtar të sportit, turizmit dhe kulturës së qytetit juglindor.

The post Qyteti Evropian i Sportit, nga Shkodra 2025 te Korça 2026 appeared first on Agjencia Telegrafike Shqiptare.

Viti 2025 po shënon hapa të jashtëzakonshëm në shkencë dhe teknologji, duke ngritur njëkohësisht shpresë, kuriozitet dhe debate.

Nga përpjekjet për të rikthyer specie të zhdukura, te inteligjenca artificiale që “lexon” emocionet e kafshëve dhe robotët që mund të bëjnë sport apo kujdesen për të moshuarit, kufijtë mes shkencës dhe fantashkencës po bëhen gjithnjë e më të paqarte.

Një kompani amerikane e bioteknologjisë, Colossal Biosciences, pretendon se ka krijuar tre ujqër të ashtuquajtur “dire wolves”, një specie e zhdukur prej më shumë se 10 mijë vitesh. Sipas kompanisë, ADN-ja e gjetur në fosile është përdorur për të modifikuar ujkun gri modern.

Pamjet e publikuara tregojnë këlyshë të vegjël, të quajtur Romulus dhe Remus, që ulërijnë dhe ushqehen me biberon. Por komuniteti shkencor mbetet skeptik.

“Nuk mund të rikrijosh plotësisht një specie të zhdukur. ADN-ja degradohet me kalimin e mijëra viteve. A kemi një ujk gri pak të modifikuar? Po. A është ujk i zhdukur? Jo”, shprehet Corey Bradshaw, profesor i ekologjisë globale.

Ekspertët thone se kjo është më shuumë një eksperiment gjenetik sesa ringjallje e vërtetë e një specieje.

E njëjta kompani ka bërë bujë edhe me krijimin e ashtuquajturve “minj leshtorë”, të modifikuar gjenetikisht për të pasur qime të gjata, si hap i parë drejt rikrijimit të mamuthit. Sipas Colossal, kjo është vetëm faza fillestare e një projekti ambicioz.

Në Britani, një startup i quajtur Better Dairy po synon të ndryshojë industrinë ushqimore duke prodhuar djathë dhe kos pa qumësht lope. Produktet krijohen në laborator, me ndikim shumë më të ulët në mjedis.

Sipërmarrësit thonë se shija është identike.

Në Londër, studiuesit e King’s College kanë zhvilluar një trajtim revolucionar dentar duke përdorur keratinë, proteinë që gjendet në flokë dhe lesh.

“Keratinën e nxjerrim nga leshi i deles. Ideja është që smalti i dhëmbëve, si shtresë mbrojtëse, mund të forcohet dhe riparohet.”, shprehet Dr. Sherif Elsharkawy.

Produktet e para, si pasta apo xhel dentar, mund të dalin në treg brenda pak vitesh.

Një student dizajni në Londër ka krijuar papuçe nga pluhuri i shtëpisë, duke ricikluar mbetjet e fshesës me korrent në material të ndjeshëm si felt.

Ndërkohë, në Mançester, një grup muzikor përdor kërpudha dhe bimë për të prodhuar muzikë. Sensorët përkthejnë sinjalet elektrike biologjike në nota muzikore, një bashkim i natyrës dhe teknologjisë.

Në Britani, sistemi IntelliPig përdor kamera dhe inteligjencë artificiale për të analizuar fytyrën e derrave, duke identifikuar stresin apo shqetësimet shëndetësore. Studiuesit thonë se kjo mund të revolucionarizojë mirëqenien e kafshëve në ferma.

Në Kanada, një robot AI i quajtur Kia mirëpret studentët në universitet, bisedon, debaton dhe ndërvepron në kohë reale.

Ndërsa në Japoni, roboti Moflin, një shoqërues artificial, sillet si një kafshë shtëpiake dhe krijon lidhje të ngushtë me pronarin.

Nga droidët e Star Wars të ekspozuar në Kaliforni, te lojërat botërore të robotëve humanoidë në Kinë, ku robotët luajnë futboll dhe vrapojnë, teknologjia po avancon me shpejtësi.

Në Japoni, roboti AIREC po zhvillohet për të ndihmuar të moshuarit, ndërsa në Stanford, roboti OceanOneK eksploron thellësitë e oqeanit.

Në Itali, për herë të parë, një robot humanoid ka fluturuar me jetpack.

Dronë ultra të shpejtë në Hong Kong, dronë që transportojnë oksigjen dhe mbeturina në Everest, dhe një makinë elektrike britanike që mund të ecë përmbys, janë disa nga risitë më të pazakonta të vitit.

Ndërkohë, shkencëtarët në Oksford kanë krijuar një suplement ushqimor që ndihmon në shpëtimin e bletëve.

Në fushën e shëndetit, inteligjenca artificiale po ndihmon mjekët të zbulojnë çrregullimet në tru që shkaktojnë epilepsi, duke hapur rrugën për kura të reja.

Shkencëtarët që përdorin teleskopin James Webb thonë se kanë gjetur shenjat më të forta deri tani të mundësisë së jetës jashtë sistemit tonë diellor.

Në atmosferën e planetit K2-18 b janë zbuluar gazra që në Tokë prodhohen vetëm nga organizma të gjallë.

“Kemi gjetur prova të forta për molekula që lidhen me jetën biologjike. Është evidenca më e fortë deri më sot për jetë jashtë Tokës.”, shprehet Prof. Nikku Madhusudhan.

Nga ADN-ja e lashtë, te inteligjenca artificiale. A jemi gati për të ardhmen që po ndërtojmë, është një pyetje që mbetet për të gjithë ne.

Fituesi i edicionit të dytë të Big Brother VIP Kosova, Lumbardh Salihu, nuk ka arritur të sigurojë një ulëse në Kuvendi i Kosovës në zgjedhjet e fundit parlamentare.

Salihu garoi në këto zgjedhje si kandidat i Lidhjes Demokratike të Kosovës, me numrin rendor 77 në listën zgjedhore të kësaj partie. Megjithatë, ai nuk arriti të marrë votat e nevojshme për t’u përfshirë në mesin e 15 deputetëve që LDK-ja ka siguruar në këtë legjislaturë.

Sipas rezultateve të deritanishme, ish-futbollisti nga Vitia ka marrë gjithsej 3,469 vota, duke u renditur i 68-ti në listën e LDK-së për nga numri i votave. Ky rezultat e lë atë larg pragut të nevojshëm për të fituar një mandat deputeti.

Rezultati i Lumbardhit në zgjedhjet parlamentare 2025 (Foto: KQZ)

Kjo nuk është hera e parë që Lumbardh Salihu tenton të hyjë në Kuvend, pasi edhe në zgjedhjet e kaluara ai nuk kishte arritur të siguronte mbështetjen e mjaftueshme për të fituar një ulëse parlamentare.

Nga ana tjetër, Lidhja Demokratike e Kosovës pritet që në këtë legjislaturë të ketë vetëm 15 deputetë, çka përfaqëson një nga rezultatet më të dobëta të saj në zgjedhjet parlamentare, në krahasim me historikun e kësaj partie.

Lumbardh Salihu dhe kryetari aktual i LDK-së, Lumir Abdixhiku (Foto: Lumbardh Salihu/Facebook)

Rezultati i Lumbardh Salihut tregon edhe një herë se popullariteti televiziv nuk përkthehet domosdoshmërisht në mbështetje elektorale, ndërsa gara për vota mbetet e varur nga struktura partiake dhe besimi i drejtpërdrejtë i qytetarëve. /Telegrafi/

Aktorja e njohur kosovare Adriana Matoshi ka arritur të rizgjidhet deputete në Kuvendin e Kosovës, duke siguruar kështu mandatin e saj të tretë radhazi nga radhët e Lëvizja Vetëvendosje.

Matoshi, e cila garoi për herë të tretë për një ulëse në Kuvend, ka arritur të fitojë besimin e elektoratit edhe në këtë legjislaturë, duke marrë deri më tani 32,214 vota, një rezultat dukshëm më i lartë krahasuar me zgjedhjet e kaluara.

Sipas të dhënave preliminare, aktorja ka siguruar 12,614 vota më shumë sesa në zgjedhjet e fundit, duke shënuar një rritje të konsiderueshme të mbështetjes elektorale dhe duke forcuar pozicionin e saj brenda listës së Vetëvendosjes.

Procesi i numërimit të votave është drejt përfundimit, ndërsa ende po vazhdon përfshirja e votave me postë, atyre nga përfaqësitë diplomatike dhe votave të personave me nevoja të veçanta. Megjithatë, rezultati i deritanishëm e bën të sigurt mandatin e Adriana Matoshit në përbërjen e re parlamentare.

Sipas rezultateve aktuale, Lëvizja Vetëvendosje pritet të ketë 56 deputetë në Kuvend, ndërsa Adriana Matoshi renditet aktualisht si e 21-ta më e votuara në listën e kësaj partie.

Adriana Matoshi e 21-ta më e votuara në Listën e Vetëvendosjes (Foto: Kerol.li)

Me këtë rezultat, ajo ka arritur të lërë prapa disa figura të njohura politike, përfshirë ministren e Ekonomisë Artane Rizvanolli, ministren e Arsimit Arbërie Nagavci, ministren e Industrisë Rozeta Hajdari, si dhe ish-kryeparlamentarin Dimal Basha.

Rizgjedhja e Adriana Matoshit konfirmon vazhdimësinë e saj në jetën politike të vendit, duke e bërë atë një nga figurat publike që ka arritur të ndërtojë një urë të qëndrueshme mes artit dhe politikës. Me rritjen e numrit të votave dhe me një mandat të tretë të siguruar, pritet që ajo të mbetet një zë aktiv në Kuvend edhe gjatë kësaj legjislature. /Telegrafi/

Këngëtarja e njohur shqiptare Adelina Thaqi Meta ka shënuar një hap të rëndësishëm në karrierën e saj publike, duke arritur që për herë të parë të sigurojë një ulëse në Kuvendin e Kosovës.

Adelina Thaqi Meta hyri për herë të parë në garën për deputete në zgjedhjet parlamentare të 28 dhjetorit, duke kandiduar nga radhët e Lidhja Demokratike e Kosovës. Edhe pse për LDK-në këto zgjedhje nuk rezultuan me një performancë të lartë elektorale, duke siguruar gjithsej vetëm 15 deputetë, Adelina arriti të jetë një prej tyre, falë mbështetjes direkte të votuesve.

Me 16,826 vota, interpretuesja e hitit "Sonte" arriti të renditet si e 13-ta më e votuara brenda listës së LDK-së, duke tejkaluar dy kandidatë meshkuj dhe duke hyrë në Kuvend pa u mbështetur në kuotën gjinore. Një rezultat që e bën mandatin e saj politik të padiskutueshëm nga ana numerike.

Lista e 15 deputetëve më të votuar të LDK-së deri më tani (Foto: Kerol.li)

Ky sukses merr edhe më shumë peshë po të merret parasysh fakti se kjo ishte hera e parë që Adelina Thaqi Meta garonte për një post deputeti. Angazhimi i saj politik ka qenë i lidhur prej vitesh me LDK-në, parti në të cilën bashkëshorti i saj ka qenë aktivist për një kohë të gjatë, ndërsa kandidatura e saj shënon një kalim të drejtpërdrejtë nga skena artistike në përfaqësim institucional.

Krahas Adelina Thaçi Metës, nga radhët e LDK-së në Kuvendin e Kosovës do të jenë edhe deputetet: Hykmete Bajrami, Doarsa Kica Xhelili, Jehona Lushaku Sadriu dhe Janina Ymeri.

Lista e kandidatëve më të votuar të LDK-së kryesohet nga Lumir Abdixhiku me 83,685 vota, ndërsa Adelina Thaçi Meta zë vendin e 13-të, duke lënë pas Ermal Sadiku dhe Fadil Hadergjonaj për nga numri i votave. /Telegrafi/