Kryetari i Partisë Demokratike të Kosovës dhe kandidati për Kryeministër, Bedri Hamza, ka publikuar sot një video-mesazh drejtuar qytetarëve, ku thekson se zgjedhjet e 28 dhjetorit paraqesin një moment vendimtar për drejtimin e vendit.

“Në këtë datë, ne, qytetarët e këtij vendi, jemi përballë një vendimi të qartë: ta vazhdojmë rrugën mbrapa, me kaos, pasiguri dhe ndarje; apo ta ndryshojmë kahjen dhe të ecim përpara, me stabilitet, zhvillim dhe shpresë”, shprehet Hamza në video.

Ai nënvizon se zgjedhja e tij është e qartë dhe e lidhur drejtpërdrejt me të ardhmen e vendit:

“Unë zgjedh të ecim përpara. Për familjet tona. Për fëmijët tanë. Për Kosovën”.

Në përmbyllje të mesazhit, kandidati për Kryeministër fton qytetarët në bashkim rreth vizionit të tij politik: “Të gjithë bashkë. Përpara!”.

Videoja është pjesë e komunikimit zgjedhor të PDK-së në prag të zgjedhjeve të 28 dhjetorit, ku Hamza synon të paraqesë një alternativë të bazuar në stabilitet, zhvillim dhe shpresë për Kosovën.

Aleanca për Ardhmërinë e Kosovës ka hapur sonte zyrtarisht fushatën për zgjedhjet e jashtëzakonshme parlamentare që do të mbahen më 28 dhjetor.

Gjatë evenimentit në kryeqytet, kandidati për deputet nga radhët e kësaj partie, Lahi Brahimaj, shkroi në Facebook se “fitore e madhe po na pret”, duke iu referuar listës së AAK-së, ku numri për votim është 129.

Brahimaj theksoi përkushtimin e partisë për të qëndruar pranë qytetarëve dhe për të realizuar objektivat e programit qeverisës.

Kryetari i AAK-së, Ramush Haradinaj, gjatë hapjes së fushatës shpalosi pikat kryesore të programit, duke përqendruar vëmendjen te rritja e pagave dhe pensioneve, mbështetja për sektorin privat dhe kthimi i investimeve në vend. Ai theksoi gjithashtu fuqizimin e grave në biznes dhe punësim, si dhe sigurimin e një politike fiskale më të favorshme për zhvillimin ekonomik.

“Shtylla e dytë e programit tonë është rritja ekonomike. Do të aktivizojmë potencialin që ka Kosova për zhvillim dhe kthimin e investimeve në vend, mbështetje për bizneset e reja dhe gratë në punësim”, tha Haradinaj.

Sa i përket sigurisë, kryetari i AAK-së deklaroi se Kosova do të vazhdojë të konsolidojë kapacitetet e saj, duke përfshirë ushtrinë dhe policinë, dhe se rruga drejt anëtarësimit në NATO mbetet prioritet i partisë.

Në postimin e tij në Facebook, Brahimaj bëri thirrje që qytetarët më 28 dhjetor të votojnë për listën e AAK-së, duke theksuar se partia do të vazhdojë të qëndrojë pranë familjeve, pensionistëve dhe të gjithë qytetarëve që kontribuojnë për zhvillimin e vendit.

Ish-kryetari i Prishtinës, Shpend Ahmeti, ka reaguar pas tentativës së Lëvizjes Vetëvendosje për të mundësuar që diaspora të votojë edhe jashtë ambasadave dhe konsullatave – kërkesë e cila u refuzua nga Paneli për Ankesa dhe Parashtresa (PZAP).

Në një postim në Facebook, Ahmeti tha se e drejta e votës për diasporën është e padiskutueshme, por mënyra e organizimit të votimit është e përcaktuar qartë në ligjin që është miratuar gjatë qeverisjes së Albin Kurtit.

“E drejta e votës është e garantuar për çdo shtetas të Republikës së Kosovës të moshës madhore – kudo që jeton. E drejta ndryshon nga mundësia që përcaktohet edhe nga kredibiliteti i procesit”, shkroi Ahmeti.

Ai theksoi se qëllimi i çdo rregullimi zgjedhor është të sigurojë një proces të besueshëm dhe të menaxhuar mirë.

“Askush s’mundet me ma mohu të drejtën e votës, por është në interesin e secilit që vota ime apo e juaja të shkojë aty ku e keni pas njet,” tha ai, duke shtuar se votimi në pika të organizuara me komisionerë, vëzhgues dhe procedura të qarta garanton integritetin e procesit.

Ahmeti kujtoi se Kuvendi gjatë qeverisë Kurti ka miratuar ligjin që mundëson votimin fizik të diasporës në ambasada dhe konsullata – për ta lehtësuar procesin, por edhe për ta bërë atë më të sigurt.

“Me këtë ligj po hyjmë në këtë zgjedhje dhe s’ka mundësi ndryshimi – NUK KA. Për zgjedhjet tjera mund të bëjmë diskutim e ndryshime,” shkroi ai.

Sipas Ahmetit, të gjitha diskutimet e partive për “dashurinë ndaj diasporës” janë thjesht pjesë e fushatës elektorale.

“Çfarëdo diskutimi se kush e don ma shumë diasporën është veç fushatë dhe s’ka kurrfarë baze në mundësi ligjore e në dashni,” ka theksuar ai.

Në fund, ai u bëri thirrje partive politike që të flasin për mënyrën se si do të qeverisin pas zgjedhjeve dhe si do t’ua lehtësojnë jetën qytetarëve, përfshirë diasporën.

“E tash – a po tregoni se si keni me formu qeveri e si keni me përmirësu jetën qytetarëve? Shumë e dhimbshme në çka po synohet me fitu vota,” shkroi Ahmeti./Telegrafi/

Më 28 dhjetor, vendi do të mbajë zgjedhje të jashtëzakonshme parlamentare. Në prag të këtyre zgjedhjeve, subjektet politike kanë filluar të bëjnë publike edhe aderime të reja.

Së fundmi është përfolur se Lidhjes Demokratike të Kosovës mund t’i bashkohen disa analistë politikë, si Visar Ymeri, Rrahman Paçarizi, e Ermal Sadiku, por Telegrafi nuk ka arritur deri tani të ketë ndonjë konfirmim nga ana e tyre.

Emri i analistit Agon Maliqit u përmendë në media, por një gjë e tillë u mohua nga ai.

"Angazhimi im publik dhe bindjet e mia politike gjithmonë kanë qenë transparente, shpesh ndoshta më shumë se sa që duhet. Prandaj si përgjigje ndaj një lajmi të publikuar mbi aderim në parti politike në këto zgjedhje (konkretisht në LDK) them: jo, nuk e kam në plan", ka shkruar ai në Facebook.

LDK ka thirrur një konferencë për media në orën 14:00, ndërsa mbetet e paqartë nëse gjatë saj do të bëhet publik ndonjë aderim i ri.

/Telegrafi/

Komisioni Qendror i Zgjedhjeve njofton se ka filluar periudha e aplikimit për regjistrimin e votuesve jashtë Kosovës për votim në zgjedhjet e parakohshme për Kuvendin e Kosovës, të cilat do të mbahen më 28 dhjetor 2025.

Gjatë kësaj periudhe 11 ditore (26 nëntor – 6 dhjetor 2025), të gjithë shtetasit e Kosovës që jetojnë jashtë vendit mund të aplikojnë për t’u regjistruar si votues jashtë Kosovës, përmes (1) platformës elektronike https://diaspora.kqz-ks.org ose përmes (2) postës duke dërguar aplikimin në kutinë postare të KQZ-në në Kosovë.

Në momentin e regjistrimit votuesit mund të përcaktohen individualisht për mënyrën e votimit:

1. të votojë fizikisht në njërën nga përfaqësitë diplomatike të Republikës së Kosovës;
2. duke dërguar fletëvotimin përmes postës në kutinë postare të KQZ në Kosovë; apo
3. duke dërguar fletëvotimin përmes postës në një nga kutitë postare të hapura nga KQZ jashtë Kosovës.

Në rast të plotësimit të numrit maksimal të votuesve në përfaqësi diplomatike, sipas parimit të kohës së aplikimit, aplikuesi do të udhëzohet për regjistrim për mënyrat e tjera të votimit përmes postës.

KQZ sqaron se kjo periudhë e regjistrimit vlen vetëm për shtetasit që duan të regjistrohen për të votuar jashtë Kosovës, ndërkaq për të votuar në vendvotimin e tyre në Kosovë nuk kanë nevojë të regjistrohen si votues jashtë vendit.

Shtetasit e Kosovës që regjistrohen për të votuar jashtë Kosovës, do të largohen nga Lista Votuese brenda Kosovës, e cila shpërndahet në vendvotime në ditën e zgjedhjeve. Pra, një shtetas që regjistrohet për të votuar jashtë Kosovës, do ta gjejë emrin e tij për votim vetëm në Listën Votuese jashtë Kosovës.

Ndërkohë, shtetasit e Kosovës, që jetojnë jashtë vendit dhe që nuk regjistrohen për të votuar nga jashtë Kosovës, ndodhen në Listën e Votuesve brenda Kosovës e cila shpërndahet në vendvotime në ditën e zgjedhjeve.

Çdo qytetarë i Kosovës me të drejtë vote, si brenda dhe jashtë vendit, përmes platformës elektronike: https://qv.kqz-ks.org mund ta kontrollojë adresën e Qendrës së Votimit ku është i caktuar të votojë.

Komisioni Qendror i Zgjedhjeve inkurajon të gjithë shtetasit e Kosovës që jetojnë jashtë vendit që të shfrytëzojnë të drejtën e tyre kushtetuese për t’u bërë pjesë e procesit zgjedhor në Republikën e Kosovës, fillimisht duke u regjistruar si votues jashtë Kosovës dhe më vonë duke votuar.

Sekretari për organizim dhe zgjedhje në Partisë Demokratike të Kosovës, Betim Gjoshi, e ka quajtur lajm të mirë nga Komisioni Qendror i Zgjedhjeve, integritetin e votimit të mërgatës.

Sipas Gjoshit, më nuk do të ketë manipulime të votave nga diaspora.

"Lajm i mirë nga KQZ për integritetin e votimit të mërgatës. Bashkëatdhetarëve që do të regjistrohen për votim përmes postës do t'iu dërgohen fletëvotimet origjinale në shtëpitë dhe banesat e tyre. Mjeshtrit e manipulimeve nga Vetëvendosje deshtën që ky proces të mos ketë integritet, por të manipulohet lehtësisht duke dërguar fletëvotime me e-maila që nuk dihet në adresë të kujt do të shkojnë", ka deklaruar ai.

Zgjedhjet e jashtëzakonshme parlamentare do të mbahen më 28 dhjetor./Telegrafi/

Rastet e dyshuara për blerje votash dhe për ndikim në procesin e votimit po shqyrtohen edhe nga institucionet e drejtësisë, e një i tillë së fundmi është duke u trajtuar në gjykatën e Prizrenit.

Sipas avokatit Arber Jashari ky veprim në përgjithësi mund të kushtoj deri në 5 vite burgim.

120 euro për një votë.

Ky është rasti për të cilin Prokuroria në Prizren ka ngritur aktakuzë në gjykatë, ku Y.Rr. dhe B.K. akuzohen për ndërhyrje në procesin e votimit.

Ani pse, ky nuk është rasti i parë që raportohet gjatë periudhave zgjedhore.

Por a vlen i njejtë dënimi si për kryerësin e veprës ashtu edhe për ndërmjetësuesin?

“Kodi penal i Republikës së Kosovës ka paraparë 11 vepra kundër të drejtave të votimit ashtu i ka quajtur ose vepra penale kundër integritetit zgjedhor ku dhënia dhe marrja e ryshfetit është një nga veprat penale e sanksionuar sipas kodit penal të Republikës së Kosovës dhe nënkupton që secili që premton, ofron ose jep ndonjë dhuratë të pa merituar ose ndonjë favor të dikujt me qellim që ky ta votojë një person ta caktuar atëherë ai mund të dënohet deri në 5 vite burgim por edhe personi i cili e ka lujt rolin e ndërmjetësit edhe ai mund të dënohet deri në 5 vite burgim”, deklaroi avokati Arbër Jashari në Tëvë1.

Avokati thotë që në Kosovë tani më është krijuar një traditë sa i përket këtyre veprave penale.

“Qysh në ditën e zgjedhjeve kemi një mobilizim të jashtëzakonshëm të prokurorisë për ta rujt integritetin e zgjedhjeve dhe në Kosovë janë denu njerzit që kanë abuzu me të drejtat e votimit e kjo në mënyrë më masive ka ndodh në vitin 2010-2014, ndërsa viteve të fundit apo zgjedhjeve të fundit është reduktu në masë shumë të madhe janë denu disa individ por kanë qenë raste të izoluara dhe nuk është që kanë bë një shqetësim”.

Sipas policisë së Kosovës vetëm për raundin e dytë të zgjedhjeve për kryetar të komunave, ishin angazhuar rreth 80 prokurorë dhe staf mbështetës të sistemit prokurorial.

Po ashtu, Policia e Kosovës kishte hartuar një plan operativ për mbarëvajtjen e gjithë procesit zgjedhor.

Komisioni Qendror i Zgjedhjeve ka miratuar afatet kohore të aktiviteteve për zgjedhjet e parakohshme për Kuvendin e Kosovës, të cilat do të zhvillohen më 28 dhjetor 2025.

KQZ u ka dhënë afat partive që nga 24 nëntori e deri më 30 nëntor të deklarojnë koalicionet.

Sipas vendimit të sotëm të KQZ-së, procesi zgjedhor do të zhvillohet sipas këtyre afateve kryesore:

Vendimi për kufizimin e shpenzimeve të fushatës: deri më 24 nëntor 2025.

Deklarimi i partive politike për mos-pjesëmarrje në zgjedhje: 24–30 nëntor 2025.

Deklarimi për pjesëmarrje përmes koalicioneve: 24–30 nëntor 2025.

Aplikimi për certifikim të subjekteve politike: 24–30 nëntor 2025.

Dorëzimi i listave të kandidatëve: 24 nëntor – 7 dhjetor 2025.

Tërheqja e shortit për renditjen në fletëvotim: 8 dhjetor 2025.

Emërimi i Komisioneve Komunale të Zgjedhjeve: 26 nëntor 2025.

Publikimi i listës së Qendrave të Votimit: 25 nëntor 2025.

Miratimi dhe publikimi i Qendrave Komunale të Numërimit: 25 nëntor 2025.

Ndërrimi i Qendrës së Votimit: 26 nëntor – 6 dhjetor 2025.

Kundërshtimet dhe konfirmimet për listën votuese: 26 nëntor – 6 dhjetor 2025.

Regjistrimi i votuesve jashtë Kosovës: 26 nëntor – 6 dhjetor 2025.

Certifikimi i listës votuese brenda dhe jashtë vendit: 10 dhjetor 2025.

Votimi përmes postës: 12–27 dhjetor 2025.

Fushata zgjedhore për subjektet e certifikuara: 17 dhjetor – 28 dhjetor 2025, ora 06:59.

Regjistrimi i votuesve me nevoja të veçanta: 11–21 dhjetor 2025.

Emërimi i Këshillave të Vendvotimeve në Kosovë dhe në përfaqësitë diplomatike: deri më 16 dhjetor 2025.

Aplikimi për akreditimin e vëzhguesve: 5–20 dhjetor 2025.

KQZ theksoi se të gjitha procedurat do të ndiqen sipas ligjit dhe se institucionet zgjedhore tashmë kanë filluar përgatitjet për organizimin e procesit të 28 dhjetorit.

Ish-deputeti i Lidhjes Demokratike të Kosovës (LDK), Paris Guri, ka komentuar vendimin e presidentes, Vjosa Osmani, që zgjedhjet e jashtëzakonshme parlamentare të mbahen më 28 dhjetor.

Ai tha se ky vendim është i vonuar dhe i motivuar nga kalkulime politike të Lëvizjes Vetëvendosje (LVV), të cilat, sipas tij, janë koordinuar edhe me presidenten.

Në FIVE të TV Dukagjinit, Guri deklaroi se shpërbërja e Kuvendit ishte “lajm i mirë”, por theksoi se vendi i humbi edhe 15 ditë të tjera për shkak të tentimit për ta zgjedhur Glauk Konjufcën kryeministër.

“Shpërbërja Kuvendit është lajm i mirë, mbase është pak i vonuar se Kosova i ka humbur edhe 15 ditë të tjera. Gjatë kësaj kohe është thënë prej eksponentëve të LVV-së që Kosova po humb kohë, në bllokadë, mirëpo i humbën vendit edhe 15 ditë të tjera përmes mandatimit të Glauk Konjufcës. E siç duket marrëveshja mes Vjosa Osmanit për mandatimin e Konjufcës, ka qenë kjo që e kemi thënë gjithmonë që të tentohet të realizohet, që zgjedhjet të mbahen me 28 dhjetor. 28 dhjetori nuk është ndonjë fatkeqësi, si LDK nuk e shohim problematik.

Sepse LDK-ja edhe në zgjedhjet e 12 tetori e 9 nëntorit ka dal partia e parë. Kështu që ne jemi jashtëzakonisht optimist sa i përket rezultatit të mërgatës. Edhe nuk i frikësohemi mërgatës…”, ka thënë Guri.

Ndonëse kritik ndaj procedurës që çoi në këtë datë, Guri tha se LDK nuk e sheh 28 dhjetorin si sfidë.

Guri kritikoi VV-në që, sipas tij, pret “shpëtim prej mërgatës”.

“Është perëndimi politik i partive, kur ato e vërejnë edhe vetë ë kanë humb besimi i qytetarëve për ta votuar atë parti politike, edhe presin shpëtim prej mërgatës. Ata po harrojnë që ata të mërgatës kanë familjarë në Kosovë, kanë familjarë q paguajnë fatura të energjisë elektrike, kanë familjare që kur shkon në market është shtrenjtuar shporta e konsumatorit. Ata të mërgatës e kanë sensin çka po ndodh me Kosovën…”, ka shtuar Guri.

Ai shtoi se qytetarët në diasporë e dinë situatën ekonomike në vend, nga shtrenjtimi i jetesës deri te faturat e energjisë elektrike, pasi që këto i prekin drejtpërdrejt familjet e tyre.

Sipas Gurit, shtyrja e zgjedhjeve deri më 28 dhjetor i vonon të gjitha proceset institucionale, nga konstituimi i Kuvendit e deri te votimi i qeverisë së re.

“Është perëndimi politik i një partie kur e vëren dhe vetë që e ka humb besimin te qytetarët që jetojnë në Kosovë. Dhe kërkon shpëtimin prej diasporës, duke u koordinuar me presidenten për ta ndërruar datën e zgjedhjeve me28 dhjetor. E kjo duke i kontribuar në një vonesave të krijimit të institucioneve, sa më larg që shkon data e zgjedhjeve aq më shumë shtyhet procesi i konstituimit të Kuvendit, votimi të qeverisë së re. Krejt kanë qenë kalkulime të LVV-së, që fatkeqësisht kanë qenë të koordinuara me presidenten Osmani”, ka thënë Guri.

Kryesia e Aleancës për Ardhmërinë e Kosovës (AAK) është mbledhur sot me pjesëmarrjen e kryetarëve të degëve, ku janë diskutuar dy çështje kryesore: zhvillimet politike në vend dhe përgatitjet për proceset e ardhshme politike, përfshirë zgjedhjet parlamentare.

Kryetari i AAK-së, Ramush Haradinaj, ka deklaruar se partia e tij do të garojë e vetme në zgjedhjet e ardhshme, pa hyrë në asnjë koalicion parazgjedhor.

“Do të garojmë të vetëm në zgjedhje, pa koalicione. Mbetemi të hapur për zyrtarë e qytetarë që dëshirojnë të kandidojnë në listën tonë”, ka theksuar Haradinaj.

Ai njoftoi se është arritur pajtueshmëri që lista e kandidatëve për deputetë të përfaqësojë gjerësisht të gjitha komunat e Kosovës.
“Kemi disa komuna ku të gjithë dëshirojnë të garojnë, por jemi dakorduar që lista të shpërndahet në gjithë vendin me kuota afërsisht të barabarta, edhe pse votat nuk janë të shpërndara njësoj”, tha ai.

Haradinaj shtoi se deget do të kenë rol më të drejtpërdrejtë në identifikimin e kandidatëve për deputetë.
“Kandidatët që janë treguar të suksesshëm në mbledhjen e votave për asamble do të kenë hapësirë në listat tona”, përfundoi ai./Telegrafi/

Aleanca për Ardhmërinë e Kosovës (AAK), ka reaguar pas dyshimeve për manipulime në procesin zgjedhor në Junik.

Deputeti i kësaj partie Daut Haradinaj bëri të ditur se në këtë komunë kanë votuar edhe qytetarë të komunave tjera, duke kërkuar hetim nga Prokuroria.

Lidhur me këto pretendime, Telegrafi ka pyetur Prokurorinë Themelore në Pejë nëse ka ndërmarrë ndonjë veprim hetimor.

Zëdhënësi i kësaj prokurorie, Shkodran Nikçi ka bërë të ditur se kryeprokurorja e Prokurorisë Themelore të Pejës ka ndërmarrë veprime zyrtare.

“Me të pranuar informatat lidhur me pretendimet se kanë votuar persona që nuk janë banorë të komunës se Junikut, Kryeprokurorja e Prokurorisë Themelore të Pejës, znj Lumturije Vuçetaj ka përpiluar shënim zyrtar dhe ka autorizuar prokurorin nga Departamenti i Krimeve të Rënda për ndërmarrjen e te gjitha veprimeve të nevojshme”, ka thënë Nikçi për Telegrafin.

Ndryshe edhe anëtari i Komisionit Qendror të Zgjedhjeve nga radhët e AAK-së, Muharrem Nitaj, ka reaguar për këtë rast.

Sipas Nitajt, bëhet fjalë për qindra raste që “nuk mund të arsyetohen me asnjë kriter”, ndërsa disa komuna tashmë e kanë ngritur alarmin për këtë dukuri.

“Rasti më eklatant duket të jetë komuna e vogël e Junikut. Kandidati për kryetar i kësaj komune, Agron Kuqi, në një ankesë drejtuar KQZ-së, flet për rritje të pazakontë të numrit të votuesve nga persona që nuk kanë as adresë, as mbiemër, as vende pune e as ndonjë lidhje tjetër me këtë komunë”, ka shkruar Nitaj. /Telegrafi/

KQZ ka publikuar raportin financiar të fushatës zgjedhore të Lëvizjes Vetëvendosje për periudhën 16 gusht 2024 deri më 9 shkurt 2025, ku janë përfshirë të gjitha të hyrat dhe shpenzimet gjatë fushatës.

Sipas raportit të audituar LVV ka pasur të hyra gjatë fushatës në vlerë prej 1 milion e 112 mijë e 143 euro.

Shpenzimet e fushatë zgjedhore për zgjedhjet e 9 shkurtit kapën vlerën e 1 milion e 702 mijë e 036 euro, prej tyre më së shumti janë shpenzuar në reklama, reprezentacion dhe konferenca ku figurojnë 1 milion e 182 mijë e 518 euro.

199 mijë e 816 euro janë shpenzime të transportit, 36 mijë e 969 euro përfshijnë pagat dhe kompensimet.

Për spotet televizive dhe në radio LVV ka shpenzuar 212 mijë e 011 euro ku 4 mijë e 720 euro figurojnë si borxh në raport.

Në stendat e afishmit dhe reklamimet në gazeta janë shpenzuar 281 mijë e 198 euro ku borxh janë ende 155 mijë e 976 euro.

Konkretisht, LVV ka shpenzuar 589,892.81 euro më shumë sesa ka pasur në dispozicion nga të hyrat zyrtare.

Raporti tregon gjithashtu se subjekti politik ka bërë pagesa të mëdha mbi 5,000 euro, ku totali kap shumën prej 909 mijë e 622 euro, prej të cilave 212 mijë e 500 euro janë paguar gjoba në Panelin Zgjedhor për Ankesa dhe Parashtresa (PZAP).

Raporti përmban edhe detaje nga donacionet kryesisht individuale.

Lista e donatorëve për LVV-në përfshin emra nga komuna të ndryshme të Kosovës.

Ky raport i detajuar është pjesë e kërkesave të financimit transparent të fushatave zgjedhore dhe është dorëzuar për auditim si pjesë e përmbushjes së obligimeve ligjore nga subjektet politike në Kosovë.

Raportin e plotë e gjeni KËTU. /Telegrafi/

Komisioni Qendror i Zgjedhjeve ka publikuar raportin financiar të Partisë Demokratike të Kosovës për periudhën e fushatës zgjedhore të zgjedhjeve të parakohshme parlamentare të 9 shkurtit 2025.

Sipas raportit, PDK ka realizuar shpenzime totale prej 934,749.39 eurosh, nga të cilat më shumë se gjysma janë dedikuar për reklama, reprezentacion dhe konferenca, me vlerë mbi 459 mijë euro.

Në këtë kategori përfshihen pagesat për spote televizive, hapësira reklamuese në media, ushqim gjatë aktiviteteve dhe qiraja e ambienteve të fushatës. Vetëm për spotet televizive janë shpenzuar 99,234.50 euro, ndërsa për reklamimet në gazeta dhe stenda afishuese 90,461.76 euro.

Një shumë tjetër e konsiderueshme, 475,548.48 euro, është raportuar si shpenzime të përgjithshme, ku përfshihet edhe një zë prej 144,500 euro për “gjoba dhe ndëshkime”.

Në raportin e KQZ-së figurojnë edhe pagesat mbi 5,000 euro, ku përfshihen kontrata me media dhe kompani marketingu si:

Koperativa Agency LLC – 31,860 euro për video-produksione

BH Pro zë Media shpk – 29,500 euro për sponsorizim postimesh në rrjete sociale

Klan Kosova, RTV Dukagjini, TV T7, Tëvë1, Kanal10 dhe Paparaci.com – gjithsej mbi 50 mijë euro për reklama dhe shërbime mediatike

Në fund të periudhës, PDK ka raportuar 865.59 euro para në bankë dhe në arkë, ndërsa borxhi i mbetur i evidentuar arrin në 437 mijë euro.

Raporti është pjesë e publikimit të KQZ-së për transparencë financiare të partive gjatë fushatës zgjedhore të 9 shkurtit.

Raportin e plotë mund ta lexoni KËTU.

TIRANË, 7 tetor /ATSH/ Komisioneri Shtetëror i Zgjedhjeve, Ilirjan Celibashi raportoi sot për veprimtarinë e Komisionit Qendror të Zgjedhjeve për vitin 2024 në mbledhjen e përbashkët të Komisionit për Çështjet Ligjore dhe Administratën Publike me Komisionin për Nismat Qytetare, Bashkëpunimin dhe Mbikëqyrjen Institucionale.

Deputeti i Partisë Demokratike, Oerd Bylykbashi, nënkryetar i komisionit të Ligjeve, tha se “raporti paraprak për zgjedhjet parlamentare të 2025, është raporti paraprak më i rëndë i dalë ndonjëherë në 25 vitet e fundit”.

Duke iu referuar zgjedhjeve të 11 majit, Bylykbashi tha se ODIHR ka nxjerrë përfundimin se problemi më i madh që vendos është bërja bashkë e shtetit me partinë politike në pushtet.

“Nuk janë pretendime nga palët, është konkluzion i ODIHR. Ka qenë në krye të rekomandimeve prioritare, abuzimi total i burimeve shtetërore nga qeveria. Konkluzioni i ODIHR është që qeveria përfitoi nga avantazhi i të qenit në pushtet. Kjo ka ardhur duke u përkeqësuar nga zgjedhjet në zgjedhje”, tha Bylykbashi.

Sipas Bylykbashit, “ne kemi vënë në reformën e fundit të vitit 2020, një numër rregullash të forta që asnjë vend tjetër nuk i ka, ku përpiqemi të frenojmë invazionin e shtetit në zgjedhje. Por, sipas tij, në proceset zgjedhore këto janë injoruar totalisht.

Bylykbashi tha se “kemi denoncuar inaktivitietin e KQZ-së për të parandaluar në mënyrë efikase këtë invazion të shtetit”.

Sa i takon votimit me postë, Bylykbashi tha se ishte një “dështim katastrofik, me mijëra raste të evidentuara ku nuk u ka shkuar zarfi”.

Vetë Celibashi, duke iu përgjigjur deputetit të PD-së , tha se në raportin e monitorimit të zgjedhjeve “ka vlerësime pozitive”.

“Në kuadër të atyre masave që mori KQZ besoj se i kemi ushtruar ato kompetenca të dhëna nga ligji, kemi shqyrtuar të gjitha ankimet, denoncime edhe që lidheshin me sjelljen e funksionarëve publikë të qeverisë. Janë ato vendime që janë si nga KAS dhe Kolegji Zgjedhor”, tha Celibashi.

Komisioneri shtoi se “bashkëpunim i KQZ me SPAK dhe Prokurorisë së Përgjithshme ka qenë një sukses, mendoj se ka kontribuar në mënyrë pozitive. Impakti ka qenë pozitiv dhe ka vend për ta përmirësuar këtë mekanizëm”.

“Falë edhe jush ose opozitës, ne kemi arritur të eliminojmë një gamë të madhe problemesh në procesin e votimit. Shifrat tregojnë se procesi i identifikimit të votuesve në qendrat e votimit është mjaft solid dhe me integritet”, tha Celibashi.

Celibashi shtoi se “votimi elektronik duhet të zgjerohet dhe më tej”.

Sa i takon votimit nga jashtë, sipas Celibashit “ishte një sukses me gjithë problematikat”.

/m.q/j.p/

The post Bylykbashi: KQZ, inaktive për të parandaluar invazionin e shtetit në zgjedhje appeared first on Agjencia Telegrafike Shqiptare.

Njohësi i çështjeve politike, Melazim Koci, ka deklaruar se nuk beson që kryeministri në detyrë, Albin Kurti, ka numrat e nevojshëm për formimin e Qeverisë.

Në një intervistë për Telegrafin, Koci shtoi se Kurti madje nuk po bën as përpjekje për të siguruar votat që do t’i mundësojnë krijimin e Qeverisë.

"Jo zotëri Kurti besoj nuk i ka numrat për Qeverinë dhe as që është duke bërë përpjekje për t'i siguruar. Nëse e keni hetuar, këto ditë nuk ka pasur asnjë përpjekje, as përpjekjen më të vogël për të siguruar shumicën dhe unë këtë e kuptoj, si interesim i zotit Kurti për të shkuar në zgjedhje tjera të jashtëzakonshme. Pra, do të thotë synon zgjedhjet me me bindjen që do të fitojë numër më të madh të mandateve në Parlament dhe se Qeverinë do ta bëjë më lehtë, por unë nuk besoj që kjo është llogari e qëlluar", theksoi ai.

- YouTube www.youtube.com

Sipas Kocit, edhe rezultatet e zgjedhjeve të ardhshme do të jenë pak a shumë të ngjashme me ato të shkurtit 2025.

"Rezultati i zgjedhjeve të ardhshme të jashtëzakonshme, kurdo që ato do të mbahen, në fund të këtij viti, ose në fillim i vitit të ardhshëm rezultati do të jetë pak a shumë aty ku ka qenë në shkurt të këtij viti. Dhe përpjekja e zotit Kurti ose të tjerëve, nëse u do t'ju jepet rasti opozitës, të bëjnë Qeverinë, për të blerë kohë, nuk mendoj që do t'i favorizojë", theksoi ai.

Koci tha se beson që do të ketë rënie të daljes në zgjedhje të përgjithshme për shkak të për shkak të nervozës që është krijuar me zhagitjen e formimit të institucioneve.

Si përfundim, Koci u shpreh se përqindja e subjekteve politike do të mbetet e njëjtë sikurse në shkurt të këtij viti.

Ndryshe, Kosova ka mbajtur zgjedhjet parlamentare në shkurt të këtij viti, por ende nuk është formuar një qeveri e re si rezultat i këtyre zgjedhjeve të mbajtura më 9 shkurt.

Gjykata Kushtetuese, më 5 shtator, ka vendosur një masë të përkohshme që do të jetë në fuqi deri më 30 shtator.

Me këtë vendim, deputetëve të sapozgjedhur të Kuvendit të Kosovës u ndalohet të ndërmarrin veprime apo të procedojnë drejt formimit të qeverisë së re. Masa erdhi pas ankesës së Listës Serbe lidhur me votimin për nënkryetarin serb të Kuvendit. /Telegrafi/

Ndërsa Komisioni Qendror i Zgjedhjeve (KQZ) po shtyn për përmbylljen e numërimit brenda afatit zyrtar – mesnata e 15 majit – rezultati i partive të reja tashmë është qartësuar për mandatet që do të mbajnë në katër vitet e ardhshme të qeverisjes.

Deri tani, në shkallë kombëtare, “Lëvizja Bashkë” ka siguruar një mandat me rreth 20 mijë vota (1.44%); Partia “Mundësia” ka fituar dy mandate me rreth 43 mijë vota (3%); ndërsa Koalicioni “Nisma-Shqipëria Bëhet” (3.9%) po lufton për një mandat të dytë në Fier me rreth 50 mijë vota të grumbulluara.

Partitë e tjera si “Koalicioni Euroatlantik” (1.33%), “Koalicioni Djathtas për Zhvillim” (0.39%), Aleanca Kombëtare Shqiptare (0.22%), Lëvizja Atdheu (0.15%) dhe Aleanca Demokracia e Re (0.07%) nuk kanë fituar asnjë mandat.

Partia Socialiste fitoi thellë me 83 mandate (52.33%) duke lënë prapa koalicionin e Partisë Demokratike “Aleanca për Shqipërinë Madhështore” me 50 mandate (33.74%).

Pas tyre, me numrin më të lartë të mandateve vjen Partia Socialdemokrate (3.19%), e cila konfirmoi tre mandate – dy në Shkodër dhe një në Tiranë – ngjashëm si në zgjedhjet e shkuara.

Lista e mbyllur, vetëm në letër

Risia e këtyre zgjedhjeve është zhvlerësimi i listave të mbyllura dhe kalimi i mandateve kandidatëve më të votuar, një praktikë e vendosur si parim mes koalicionit “Nisma-Shqipëria Bëhet”, “Koalicionit Euroatlantik” (edhe pse nuk siguruan mandate), por deri diku dhe PSD-së.

Sipas rezultateve dhe renditjes në listat e mbyllura, Ana Dajko (Tiranë, Nisma-Shqipëria Bëhet), Sabina Jorgo (Shkodër, PSD) dhe Albana Pëllumbi (Tiranë, PSD) kanë fituar mandatin e deputetit – këta të fundit krah Tom Doshit, i listuar i pari në Shkodër.

Mirëpo Dajko, Jorgo dhe Pëllumbi – dhe pjesa vijuese në listën e mbyllur të partive përkatëse – duket se do t’ia lënë mandatet më të votuarve në listat e hapura.

Drejtuesi i “Nismës Thurje”, Endri Shabani, konfirmoi për Citizens se përmes një marrëveshjeje të brendshme, kandidati me më shumë vota në koalicionin me “Shqipëria Bëhet” të Adriatik Lapajt, do të marrë mandatin, pavarësisht renditjes në listë.

Aktualisht më i votuari në listën e parapëlqyer është Lapaj (mbi 3,400 vota). Pas tij vjen Shabani (mbi 1,900 vota). Mirëpo nëse “Shqipëria Bëhet” do ta mbyllë procesin me vetëm një mandat të siguruar, deputet do të bëhet Shabani.

“Adriatiku, si angazhim personal, ka thënë publikisht dhe privatisht, në çdo takim me ne, si aleatë, që nëse [koalicioni] do të ketë vetëm një mandat, do të tërhiqet. Nëse ruhet ky trend, unë do të jem përfaqësuesi për Tiranën në Kuvend,” tha Shabani.

Citizens.al iu drejtua Lapajt për një koment lidhur me mandatin e Tiranës, por ai tha se nuk mund të komentonte pa u mbyllur procesi.

Me këtë parim, në Fier, nëse “Nisma-Shqipëria Bëhet” siguron mandatin e dytë, ai do t’i kalojë Azmer Duleviçit, i cili ka marrë mbi 1050 vota dhe jo Lefter Thomës, i pari në listë.

Edhe PSD duket se ka vendosur të ndjekë këtë logjikë. Burime të Citizens.al thanë se nga kjo parti në Tiranë, deputet do të bëhet më i votuari në listën e hapur dhe jo Albana Pëllumbi – e listuara në krye të listës së mbyllur. Aktualisht më i votuari nga PSD në Tiranë është Tedi Mula, i cili ka marrë mbi 2,100 vota.

Nëse ky parim ndiqet edhe në Shkodër – duke marrë të mirëqenë se nuk do të aplikohet për kryetarin Tom Doshi – ai që mund ta marrë mandatin pritet të jetë Besnik Brahimi, i cili ka marrë mbi 3,400 vota.

Ky parim, edhe pse duket se vlerëson demokracinë, shkel kuotën gjinore, pasi u heq të drejtën për t’u përfaqësuar në parlament tre grave.

Presioni ndaj partive të reja

Sipas Redi Muçit, i cili pritet të marrë mandatin e vetëm parlamentar nga Lëvizja Bashkë, zgjedhjet e 11 majit u karakterizuan nga “influenca masive” dhe presioni i të ashtuquajturve “patronazhistë të votës” – një strukturë brenda PS-së e denoncuar që gjatë zgjedhjeve të vitit 2021.

Ai pohon se kandidatë të Lëvizjes Bashkë janë përballur me presion për t’u tërhequr nga listat zgjedhore.

“Por sidoqoftë […] jemi të kënaqur që kemi hyrë në parlament dhe nga ky moment, nga ky hap i parë, thjesht do ndërtojmë mbi këtë,” theksoi Muçi.

Për kandidaten e Koalicionit Euroatlantik në qarkun e Elbasanit, Mirela Karabina, gara ishte e pabarabartë. Ajo tha se votuesit ishin frikësuar, ndërsa maxhoranca përdori administratën dhe mësuesit për qëllime elektorale.

“[Qytetarët] janë të frikësuar, përderisa nuk dilnin dot një foto [me mua], edhe pse u thosha që nuk është e thënë se do të votonin për ne,” shpjegon Karabina.

“Elbasani po vdes ngadalë, ndotja kancerogjene dhe sëmundjet janë në rritje. Nuk e di kur do të zgjohet vota popullore,” tha Karabina sipas së cilës partia në pushtet, PS-ja, kishte prapa edhe sipërmarrës të fuqishëm me fonde për fushatën.

Sfida e opozitës në parlamentin e ri

Erald Kapri, i cili pritet të marrë mandatin e deputetit për partinë “Mundësia” shprehet i kënaqur me rezultatin, ndonëse priste më shumë.

Partia e themeluar nga Agron Shehaj, ish-deputet i PD-së njëherësh edhe ish-kandidat për kreun e saj, grumbulloi mbi 20 mijë vota në Tiranë, duke marrë mundësinë e dy mandateve në parlament, një numër i kënaqshëm në raport me rezultatin që morën dhe partitë e tjera të reja, por që sidoqoftë është i pamjaftueshëm për të krijuar një grup parlamentar.

Përballë një “supermaxhorance” me 83 mandate, opozita duket e brishtë për të gjetur instrumentat që do të mund ta pengonin PS-në për të ndërhyrë në ligjet apo reformat që kërkojnë shumicë të cilësuar.

Nisur nga kjo, Kapri theksoi se sfida e parë për opozitën e re do të jetë “mbrojtja e institucioneve të drejtësisë”.

“Ne dyshojmë që një nga shtysat e Ramës në legjislaturën e ardhshme do të jetë kufizimi i rolit të SPAK. Kjo do jetë një sfidë e madhe për opozitën, që të ruaj pavarësinë e institucioneve të drejtësisë” citoi ai.

“Mesazhi me mbi 200 mijë vota për partitë e reja është i qartë: qytetarët kërkojnë ndryshim,” përfundoi Kapri.

The post Zgjedhjet 2025: Kush do t’i marrë mandatet e partive të vogla? appeared first on Citizens.al.

Komisioni Qendror Zgjedhor (KQZ) sot mori vendim për shkatërrimin e materialit zgjedhor nga zgjedhjet për Kuvendin e Kosovës, të cilat janë mbajtur më 9 shkurt 2025, duke përfshirë fletëvotimet, listat e votuesve, formularët e rezultateve të subjekteve dhe të kandidatëve.

Ndërkaq, materialet që janë pjesë e hetimit nga organet ligjzbatuese do të ruhen deri në përfundim të procedurave përkatëse.

“KQZ mori vendim për shkatërrimin e materialit zgjedhor nga zgjedhjet për Kuvendin e Kosovës, të cilat janë mbajtur më 9 shkurt 2025. Sipas vendimit të KQZ-së, në mesin e materialeve që do t’i nënshtrohen shkatërrimit janë fletëvotimet, listat e votuesve, formularët e rezultateve të subjekteve dhe të kandidatëve, e të tjera. Materialet që janë pjesë e hetimit nga organet ligjzbatuese do të ruhen deri në përfundim të procedurave përkatëse”, thuhet në njoftim.

KQZ gjithashtu mori vendim për organizimin e një punëtorie në bashkëpunim me Komisionin e Venecias në javën e fundit të muajit qershor të këtij viti.

“Komisioni i Venecias ofron asistencë para ose pas zgjedhjeve gjatë të cilave merr pjesë në misione vëzhgimi të Asamblesë Paramentare të Këshillit të Evropës (PACE) dhe qëllimi i kësaj punëtorie është që të ndihmojë analizën paszgjedhore dhe të kontribuojë në forcimin e integritetit dhe funksionalitetit të proceseve zgjedhore në Kosovë”, thuhet në njoftim.

Tutje sipas njoftimit në pikën tjetër të rendit të ditës, KQZ mori vendim për pagesën e reth 130 personave të angazhuar si staf në Qendrat e Votimit në përfaqësitë diplomatike dhe stafit të angazhuar në tërheqjen e dërgesave postare në Zgjedhjet për Kuvendin e Kosovës, të mbajtura më 9 shkurt 2025. Sipas vendimit,

Në vazhdim të mbledhjes, KQZ mori vendim për plotësimin dhe ndryshimin e dy akteve nënligjore: Rregullores Zgjedhore nr. 03/2024 krijimi, konfirmimi dhe kudnërshtimi i listës votuese dhe Rregullores Zgjedhore nr. 10/2024 për fletëvotimet dhe broshurat.

Në përfundim të rendit të ditës, KQZ miratoi kërkesën për zëvendësimin e anëtarit të Kuvendit Komunal në Fushë Kosovë.

“Artan Asllani ka dhënë dorëheqje nga kjo pozitë, pasi është zgjedhur deputet i Kuvendit të Kosovës dhe në vend të tij emërohet kandidati i radhës, Qerim Gara”, thuhet ndër të tjera në njoftim. /Telegrafi/

The post ​KQZ-ja mori vendim për asgjësimin e materialit zgjedhor të nëntë shkurtit appeared first on Telegrafi.

Presidentja e Republikës së Kosovës, Vjosa Osmani, priti sot në takim shefen e Misionit për Vëzhgimin e Zgjedhjeve nga Bashkimi Evropian, eurodeputeten Nathalie Loiseau, e cila i dorëzoi raportin përfundimtar të këtij misioni lidhur me zgjedhjet parlamentare të vitit 2025.

Sipas një njoftimi për media bëhet e ditur se Osmani falënderoi eurodeputeten dhe të gjithë anëtarët e misionit për angazhimin dhe profesionalizmin e treguar gjatë gjithë procesit zgjedhor.

Ajo theksoi se prezenca e këtij misioni, me kërkesë të saj, dëshmon përkushtimin e Republikës së Kosovës për transparencë, llogaridhënie, sundim të ligjit dhe përmbushjen e standardeve më të larta demokratike.

Osmani theksoi se zgjedhjet parlamentare të vitit 2025 ishin një dëshmi e pjekurisë politike dhe qytetare në Kosovë, duke theksuar se edhe ky proces zgjedhor, i zhvilluar në mënyrë të qetë dhe të rregullt, konfirmoi se demokracia në Kosovë është e gjallë, e qëndrueshme dhe në përparim të vazhdueshëm.

“Nga ana e saj, Shefja e Misionit për Vëzhgimin e Zgjedhjeve Loiseau e përgëzoi Osmanin për angazhimin e Republikës së Kosovës në mbrojtje të vlerave demokratike dhe për organizimin paqësor të zgjedhjeve. Ajo vlerësoi pjekurinë e treguar nga qytetarët e Kosovës, si dhe bashkëpunimin e plotë të ofruar ndaj misionit vëzhgues. Presidentja dhe Shefja e Misionit Loiseau po ashtu diskutuan për rekomandimet e raportit për përmirësimin e mëtejmë të proceseve demokratike në vend”, thuhet në njoftim. /Telegrafi/

 

The post Misioni Vëzhgues i BE-së dorëzon raportin për zgjedhjet 2025, Osmani: Demokracia në vend është në përparim të vazhdueshëm appeared first on Telegrafi.

Ka përfunduar numërimi i votave në Qarkun e Korçës, ku partia Socialiste ka kryesuar me një diferencë votash prej 20,812.

Sipas rezultateve të publikuara nga KQZ, Partia Socialiste ka marr në këtë qark 57213 vota pra 54,33% të totalit duke siguruar 6 mandate. Partia Demokratike ka marr 36405 vota, pra 34,57% të cilat përkthehen në 4 mandate.

Rezultatet totale sipas qyteteve:

Pustec

PS: 1054

PD-ASHM: 458

Kolonjë

PS: 3733

PD-ASHM: 1664

Devoll

PS: 7082

PD-ASHM: 5870

Pogradec

PS: 14,178

PD-ASHM: 8776

Korçë

PS: 20,372

PD: 13,745

Maliq

PS: 10,698

PD-ASHM: 5792

LEXONI GJITHASHTU:

• Përfundon numërimi i votave në Dibër: PS ruan epërsinë, ndarja e mandateve
• Refuzohet kutia e votimit të burgut në Durrës, i kalon për verifikim KQZ-së

The post Mbyllet numërimi i votave në Korçë, PS fiton me diferencë 20 mijë vota appeared first on Euronews Albania.

Në 11 maj shqiptarët ju drejtuan kutive të votimit për të zgjedhur qeverinë e cila do të drejtojë vendin në 4 vitet e ardhshme. Gjithsej në të gjithë Shqipërinë janë 5225 kuti për votat brenda vendit, teksa kujtojmë se këtë vit ka votuar edhe diaspora.

Ndërkohë që procesi i numërimit të votave vijon deri më tani në votat e ardhura nga diaspora kryeson bindshëm Partia Socialiste.

Sipas të dhënave të KQZ-së janë numëruar deri më tani 38806 zarfa nga 194889 që janë gjithsej.

Nga këto në rang vendi Partia Socialiste ka marr 21305 vota, (55,30%), Partia Demokratike-Aleanca për Shqipërinë Madhështore ka marr 10951vota (28,42%).

Rezultatet e partive të tjera janë si më poshtë:

Lëvizja Bashkë 934 vota 2,42%

Lëvizja Atdheu (LA) 49 vota 0,13%

Partia Koalicioni Euroatlantik (KEA) 248 vota 0,64 %

Koalicioni Nisma Shqipëria Bëhet (NISMA-SHB) 3161 vota 8,20 %

Partia Aleanca Kombëtare Shqiptare (AKSH) 227 vota 0,59%

Partia Aleanca Demokracia e RE (ADR) 16 vota 0,04%

Koalicioni Djathtas për Zhvillim (DZH) 100 vota 0,26%

Partia Mundësia (MUNDËSIA) 1176 vota 3,05%

Partia Socialdemokrate (PSD) 361 vota 0,94 %

Rezultatet në kohë reale në faqen e Euronews Albania (Kliko këtu)

LEXONI GJITHASHTU:

• Zgjedhjet 2025/ PS drejt mandatit të katërt të qeverisjes, si paraqiten rezultatet
• “PS mori shumicën e votave edhe nga të burgosurit”, gazetarja raporton nga Peqini

The post PS kryeson bindshëm votat e diasporës, si paraqiten rezultatet për partitë e tjera appeared first on Euronews Albania.