Read More...

Nga Rama Duro, ne Duro Ramen. Ftesa e Trump në Bordin e Paqes rrëzoi shpresat e rrëmbimit të kryeministrit nga ‘Deltat Amerikane’, por për Berishën ka ende shpresë, u tha demokratëve se me apo pa Tramp, Rama po bie vetë.

“Asgjë nuk e shpëton atë nga rrokullima e madhe. Këtë mund t’u them. Ai është në procesin e rrokullimës së madhe”, tha Berisha.

Pra Rama po bie, por kur iken? Berisha nuk e ka një përgjigje tani, demokratët do duhet të presin fundjavën e radhës.

“Asnjë përgjigje përveç asaj që do i japin shqiptarët më 24 janar. Kjo është përgjigja ime,” – u shpreh ai.

Lapaj ishte betuar se do e rrëzonte Ramën të shtunën e kaluar, Berisha ka zënë radhë ta rrëzojë këtë të shtunë.

Cdo protestë ka të njëjtin refren, vetëm se Berisha këtë të hëneë pranoi përfundimisht, se në Shqipëri nuk ka më RamaDuro por thjesht

“Ky është thjesht Edi Rama” – tha ai.

Ambasadorët e Bashkimit Europian arritën të dielën një marrëveshje për të rritur përpjekjet për të bindur presidentin ameirkan Donald Trump që të mos vendosë tarifa, ndërsa përgatiten gjithahstu masa hakmarrëse nëse ai nuk heq dorë nga goditja ekonomike.

Ushëheqësit e unionit do të diskutojnë opsionet në një samit që mbahet të enjten. Një ngë kundërmasat që konsiderohet është një paketë tarifash mbi 93 miliardë euro të importeve amerikane që mund të hyjnë automatikisht në fuqi më 6 shkurt pas një pezullimi gjashtëmujor.

Masa tjetër është edhe më ekstreme, deri tani e papërdorur ndonjëherë. “Instrumenti Anti-Detyrim”, i cili mund të kufizojë aksesin në tenderët publikë, investimet ose aktivitetin bankar ose të kufizojë tregtinë e shërbimeve, në të cilat SHBA kanë një suficit me bllokun, duke përfshirë shërbimet dixhitale.

Një burim pranë Presidentit francez Emmanuel Macron tha se ai po nxit aktivizimin e këtij mekanizmi.  Megjithatë paketa e tarifave duket se ka marrë mbështetje më të gjerë si një përgjigje e parë sesa masat anti-detyrim.

Presidenti i Këshillit Evropian, Antonio Costa, i cili kryeson samitet e bllokut, tha në një postim në rrjetet sociale se konsultimet e tij me anëtarët e unionit kishin treguar angazhimin e tyre të fortë për të mbështetur Danimarkën dhe Groenlandën dhe gatishmërinë për t’u mbrojtur kundër çdo forme ndëshkimi.

Donald Trump u zotua të zbatojë tarifa prej 10%, të cilat më vonë mund të rriten në 25%, ndaj Danimarkës, Suedisë, Francës, Gjermanisë, Holandës dhe Finlandës, së bashku me Britaninë dhe Norvegjinë, derisa SHBA t’u lejohet  të blejnë Groenlandën./abcnews.al

Viti 2026 ka nisur i magjishëm në DigitAlb, që si asnjëherë më parë e askush në botë sjell paketën më të plotë sportive. Kampionatet më elitare dhe komepticionet më të rëndësishëm në kontinent vijnë ditë pas dite në shtëpitë e të gjithë shqiptarëve me një maratonë transmetimi që nuk ndal për asnjë moment, në 15 kanale të dedikuara për sportin. Premier League, La Liga, Serie A, Ligue 1, Bundesliga, Eredivise, gjashtë ligat më të magjishme të futbollit në botë ndërtojnë vetëm kopertinën e një pakete e cila sjell gjithçka për këdo, e kudo në botë me Aplikacionin DigitAlb, krahas paketave tokësore dhe satelitore.

Champions League bashkohet përsëri me Europa dhe Conference League, duke ndërtuar mozaikun më të madh të futbollit europian, me përballjet me emblematike dhe sfidat e gjigantëve të futbollit ndërkombëtar.

Kombëtarja e Shqipërisë dhe Përfaqësuesja e Kosovës kanë patur e do të kenë gjithnjë në rrugën e tyre DigitAlb, që udhëton çdo herë me ekipet kombit, në realizimin e ëndrrave për të shkuar sa më larg. Pa dyshim dhe ekipet më elitare Kombëtare vijnë gjithmonë në rrugëtimin e tyre në Ligën e Kombeve dhe kualifikueset europiane.

Për të kompletuar buqetën futbollistike, DigitAlb sjell edhe Superligën e Turqisë, atë të Greqisë, kampionatin arab të Cristiano Ronaldos, elitën e futbollit zviceran, pa harruar dhe Championshipin anglez. Të gjitha Kupat e Anglisë, Spanjës, Italisë, Francës, Holandës, Gjermanisë, Turqisë e Arabisë janë po ashtu pjesë e kësaj panorame të paimagjinueshme më parë.

Por, krahas futbollit që mbetet dashura më e madhe shiqptarëve, DigitAlb ka menduar dhe për të pasionuarit e Formula 1, që sjell ekskluzivisht emocionet garave me makina. Nuk do të mungojnë as eventet më të rëndësishëm të tenisit, emocionet e NBA, garat e Moto GP, sfidat e mëdha të UFC, por dhe duelet e boksierëve shqiptarë në misionin e tyre ndërkombëtar.

Për të gjithë abonimiet Premium 12 Mujore, vijon oferta e pabesueshme me zbritje deri në 35%. DigitAlb, ju pret në cdo pikë shtje të autorizuar, kudo në Shqipëri dhe jashtë saj, si dhe në çdo kohë,  në faqen zyrtare www.digitalb.al.

U duk si një nga ato mbrëmjet e mallkuara. Milani bëri shumë, madje më shumë sesa duhej, por fitorja në “San Siro” ndaj Leçes mbeti larg derisa trajneri Alegri bëri një lëvizje.

Në fushë u hodh sulmuesi gjerman, Niklas Fylkrug, dhe gjigandi prej gati 1.9 metrash shtatlartësi, çliroi të vetët dhe rreth 75 000 tifozë në impiantin e famshëm të Lombardisë.

Ylli I marrë hua nga Uest Hemi bëri atë që duhet të bëjë një numër 9, ndërsa la pas vjedhjen e shtëpisë me vlerë rreth 500 000 euro.

Sfida e Serisë A ndaj Leçes, që kishte titullar Ylber Ramadanin, do të mbahet mend edhe për debutimin si titullar në shtëpi të Ardon Jasharit, shqiptarit të Zvicrës, që u mor me luftë të madhe në verë, kundrejt një shpenzimi që do të shkojë deri në 39 milionë euro.

Ylli me origjinë nga Maqedonia nuk zhgënjeu dhe ishte një nga më të mirët në fushë, për 87 minuta derisa u zëvendësua nga Luka Modriç.

Kamera e klubit nuk mund të mos e kishte pas ndeshjes.

“Mendoj se çdo ndeshje është e vështirë në këtë ligë. E tillë ishte edhe kjo, por mendoj se e merituam fitoren. Mendoj se duhej të kishim fituar më thellë, por në fund të fundit kjo nuk ka rëndësi. I lumtur për Niklasin që shënoi golin e parë, I lumtur për ekipin. Le të vazhdojmë kështu. Jam krenar të vesh këtë fanelë, dhe kjo ishte ndeshja ime e parë si titullar në “San Siro”. Dua vetëm të ndihmoj  ekipin me stilin tim, dhe shpresoj të vazhdoj kështu. I lumtur për fitoren. Le të vazhdojmë kështu”.

Suksesi bëri që Milani të jetë tërësisht në garë për titull në Serinë A, duke mos lejuar arratisje të rivalit zikaltër. “Shiko çfarë nënte, – thërret “La Gazeta delo Sport”, – gjermani hyn dhe palos Leçen. Me kokë Fylkrug, Milani kthehet në -3 nga Interi!”

“Në maksimum, – është titulli I “Il Korriere delo Sportit”, që bën lojë fjalësh me emrin e trajnerit Masimiliano Alegri, – një finale prej Milanim mendon Fylkrug. Interi kapet sërish, është në -3!”

Inter kryeson Serinë A me 49 pikë, Milan e ndjek me 46, ndërsa Napoli  e Roma janë diçka më prapa./abcnews.al

Rëndësinë në ekip e ka të madhe. Amir Rrahmani do të jetë një mungesë e rëndësishme për Napolin, që luan këtë të martë në fushën e FC Kopenhagenit në Champions.

Kampionia e Italisë do të ketë një duel për jetë a vdekje, sepse ndodhet në vendin e 23-të, me pikë të barabarta me danezët, pra kjo është një nga finalet se kush do të kualifikohet në plej of.
Duke qenë se sfida e fundit në grup në këtë konkurrim është në stadiumin “Maradona” ndaj Çelsit, nuk mund të bëhen gabime në Danimarkë.

Gjithsesi, Rrahmani është i dëmtuar, dhe është e sigurt që nuk luan këtë mesjavë, ashtu si edhe Politano, ndërsa nuk dihet nëse do të jenë gati për duelin e radhës në Serinë A, ndaj Juventusit në Torino.

Kapiteni I Kosovës pra do të jetë në garë me kohën për të kaluar dëmtimin, në kohën që trajneri Antonio Konte ka probleme tepër të mëdha. Janë gati 10 futbollistë që nuk përgjigjen në apel në Champions, ndërsa për Juven më shumë shpresë ka që të kthehen dy, Neresh dhe Anguisa.

Rrahmani ka pasur probleme me dëmtimet edhe më herët këtë sezon duke humbur 7 ndeshje radhazi në kampionat nga mesi i gushtit deri në 1 nëntor. Kur ai nuk luan, dëmi është i madh sepse flitet për një titullar standard që për napolitanët luan prej gati gjashtë vitesh dhe ka qenë gjithmonë shumë i rëndësishëm.

Kapiteni dardan ka gjithsej 194 ndeshje për Napolin, ndërsa në Serinë A ka mbërritur në 196, pasi ka veshur edhe fanelën e Veronës. Në Champions ka luajtur 17 herë duke shënuar një gol të vetëm, por që nuk harrohet.

Në 12 mars të vitit 2024, mbrojtësi shqiptar nga Kosova realizoi në ndeshjen e luksit ndaj Barcelonës në “Kamp Nou”, edhe pse katalanasit triumfuan 3-1 në ndeshjen e dytë të të tetave të finaleve, dhe u kualifikuan për në çerekfinale.

Mediat ruse shkruajnë për lëvizje frenetike. Një nga temat është e ardhmja e Mirlind Dakut, një biznes ku përfshihet vetë klubi I tij, Rubin, klube të tjerë në Europë apo kudo tjetër, agjentë, gazetarë, vetë futbollisti dhe familja e tij.

Pra, ku do të vazhdojë të luajë sulmuesi i kombëtares shqiptare?

Flitet se agjentët e tij, mes të cilëve besohet edhe babai, Feimi, ia kanë propozuar kartonin klubeve gjermanë.

Po sipas mediave dhe faqeve në Telegram kanal, tre prej tyre kanë shfaqur interes, dhe konkretisht Hamburgu, Mainci dhe Augsburgu.

Flitet për 3 klube të Bundesligës, veçse nuk dihet nëse ata do të bien dakord me kërkesat e klubit rus të Rubinit.

Dihet mirë se në Kazan duan rreth 10 milionë euro për të lënë të lirë Dakun, dhe pozitat e drejtuesve janë të forta sepse ylli kuqezi ka kontratë deri në 2029.

Hamburgu prej 7 vitesh nuk nxjerr nga xhepi më shumë se 2.5 deri në 3 milionë euro për të marrë një lojtar, ndaj nuk dihet nëse do të pranojë të shpenzojë kaq shumë për një sulmues të Shqipërisë që luan në Rusi.

Hera e fundit që u pranua një transferim relativisht I rëndësishëm ishte në 2017 kur u mor greku Papadopulos për 6.5 milionë euro.

Mainci është më ndryshe sepse është klub I Bundesligës prej disa sezonesh dhe verën e kaluar pagoi 10 milionë euro për sulmuesin Holerbah të Unionit të Berlinit.

Augsburgu ka pranuar të nxjerrë nga llogaritë bankare 7 milionë euro vitin e kaluar për mesfushorin Rider dhe 5 milionë për mbrojtësin Macima.

Natyrisht, Rubin mund të pranojë edhe më pak duke pasur parasysh se e mori Dakun vetëm për 1.2 milionë euro në 2023 nga Osijeku i Kroacisë.

Mbetet të shihet vazhdimi, ndërsa sulmuesi I Shqipërisë gjithmonë ka shprehur dëshirën për të luajtur në Europën Perëndimor./abcnews.al

Superlativat kanë mbaruar me kohë. Për Ernest Muçin janë thënë të gjitha, ndërsa ka mbetur që të krahasohet me atë që cilësohej “zjarrfikësi” i Realit të Madridit, Sergio Ramos.

Ylli kuqezi shënoi sërish në sekondat shtesë duke I dhënë ekipit fitoren, pra është “engjëlli” i minutës së fundit për Trabzonsporin, ashtu siç bënte mbrojtësi i famshëm spanjoll.

Suksesi në Koxhaelispor ishte 2-1 dhe skuadra e lojtarit të kombëtares shqiptare forcoi pozitat në vendin e tretë në renditjen e Superligës së Turqisë, duke qenë 5 pikë prapa Gallatasarajit kampion e kryesues, pra ende me shpresë për titullin.

Për më tepër, goli ishte tepër i bukur.

Si “engjëll” i çasteve të fundit, Muçi u shfaq në 24 nëntor të vitit të kaluar, kur realizoi rrjetën e fitores 4-3 në minutën e 10-të shtesë, pra në minutën e 100-të të sfidës.

Edhe ai ishte një realizim i veçantë.

Gjithsesi, talenti shqiptar ka treguar në vetëm dy muaj se çfarë klasi ka në këmbët e tij.

Kush e harron goditjen e dënimit ndaj Konjasporit, gjithnjë në kampionat, në fitoren 3-1 në shtëpi.

Ai u shpall goli I javës, e padyshim që është në garë për të qenë numri 1 i sezonit.

Po ashtu, realizimin e dytë në Gëztepe në fitoren 2-1, kur ia doli ta tundte rrjetën dy herë.

E veçantë edhe goditja në Kupën e Turqisë, vetëm pak ditë më parë në suksesin kundër Istanbulsporit.

Pra, “engjëlli” Arnaut Ernest Muçi po habit vendin e madh edhe me golat e shkëlqyer, edhe me gjakftohtësinë e jashtëzakonshme për të fituar në sirenë.

Besohet se trajneri i Kombëtares, Silvinjo, ika mbajtur shënim të gjitha këto.

I pati të gjitha. Kupa e Kombeve të Afrikës ka dhënë shumë finale, veçse kjo e mbrëmjes së fundit do të mbahet mend gjatë.

Senegali ia doli të shpallej kampion I kontinentit pas fitores 1-0 ndaj Marokut vendas, dhe në betejën e Rabatit u shënua një gol, u humb një penallti në mënyrë dramatike, u shpërdoruan raste e u luajt fort, si dhe pati një braktisje të fushës që zgjati 17 minuta, por që pati fund të lumtur.

Dy ekipet më të mirë të Afrikës në renditjen e FIFA-s bënë gjithçka për ta fituar trofeun, edhe pse vetëm njëri do t’ia dilte në fund.

Maroku që luante në shtëpi, në prani të mbi 66 500 tifozëve, u përpoq shumë për të kënaqur popullin e tij, por të mbiquajturit “Luanët e Terangës” I mbijetuan gjithçkaje dhe mund të thuhet se e merituan.

Ishte një duel “luanësh”, pasi edhe marokenët janë “luanët e Atlasit”.

Të dyja skuadrat patën raste dhe u dallua sidomos portieri I Marokut, Bono, që mohoi edhe ndonjë gol të sigurt.

Momenti më dramatik ishte ai I braktisjes së fushës pikërisht nga senegalezët, kur arbitri akordoi penallti për kundërshtarin në fundin e kohës shtesë të pjesës së dytë.

U deshën 17 minuta që ndeshja të rifillonte dhe Sadio Mane u tregua si kapiten I vërtetë, edhe pse shiritin e mban mbrojtësi Kulibali.

Ish-sulmuesi I Liverpulit ktheu në terren shokët, pasi ata u nxitën të largoheshin nga trajneri Pape Çau, I cili besohet se do të marrë një ndëshkim të ashpër nga FIFA dhe Konfederata Afrikane e Futbollit.

Kjo ndoshta ndikoi dhe ylli I Marokut dhe I Realit, Brahim Diaz, gaboi në “panenkën” e tij. Senegalit iu anulua edhe një gol më herët, e ndoshta edhe kjo mund të ketë ndikuar në vendimin e përkohshëm për të braktisur ndeshjen.

Finalja u vendos në nisje të dy kohëve shtesë nga 30 minuta. Kaluan vetëm 4 minuta dhe Pape Geje shënoi një gol të shkëlqyer, pas të cilit nuk pati ndryshim rezultati.Senegali ngriti lart trofeun, që është I dyti në histori pas atij të vitit 2021./abcnews.al

Italia është shprehur e gatshme të ndërmjetësojë midis SHBA-së dhe Evropës. Kryeministrja italiane Giorgia Meloni konsiderohet nga udhëheqësit evropianë si një person që ka marrëdhënie të mirë me Trumpin.

Ministri i Jashtëm Antonio Tajani tha: “Unë besoj se Italia, për shkak të natyrës së saj, kapacitetit të saj për ndërmjetësim dhe aftësisë së saj për të folur me të gjithë, mund të luajë një rol pozitiv për gjetjen e marrëveshjeve.” Ai shtoi se Kryeministrja Giorgia Meloni është “në dialog me Shtetet e Bashkuara, por edhe me evropianët”.

Tajani vazhdoi: “Nuk ka absolutisht asnjë nevojë për luftëra tregtare apo konflikte. Ne kemi nevojë për dialog dhe duhet të gjejmë zgjidhje që nuk e dëmtojnë askënd.”

Meloni: “I thashë Trumpit çfarë mendoja”
Kryeministrja italiane Giorgia Meloni i quajti tarifat doganoretë shpallura nga Presidenti i SHBA-së Donald Trump si “gabim”. Ajo tha se kishte folur me Trumpin “dhe i kishte thënë mendimin e saj”.

Në të njëjtën kohë Meloni u përpoq të qetësonte tensionet midis SHBA-së dhe Evropës. Kishte “një problem me komunikimin dhe mirëkuptimin”, tha ajo. “Nga perspektiva e SHBA-së mesazhi nga përtej Atlantikut nuk kishte qenë i qartë”.

Sytë nga Davosi
Një mundësi për bisedime për krizën mund të ofrojë edhe Forumi Ekonomik Botëror në Davos. Donald Trump pritet të shkojë atje të mërkurën. Edhe kancelari Merz do të jetë në Davos. Sekretari i Përgjithshëm i NATO-s, Mark Rutte, deklaroi pas një bisede telefonike me Trumpin: “Ne do të vazhdojmë të punojmë në këtë drejtim” dhe gëzohet për takimin me Trumpin në Davos.

Italia, një nga anëtaret themeluese të NATO-s, nuk dërgoi në Groenlandë asnjë trupë në misionin e zbulimit të udhëhequr nga Danimarka. Në mision krahas Danimarkës morën pjesë shtatë vende të tjera evropiane: Norvegjia, Suedia, Franca, Gjermania, Britania e Madhe, Holanda dhe Finlanda./DW

ABC News siguron dosjen hetimore të arratisjes së Altin Ndocit, nga spitali i Durrësit, shoqërimi i të cilit sic thuhet në dosje është vlerësuar me risk standard nga komisioni i vlerësimit të burgut.

Sipas materialit zyrtar, shoqërimi i të paraburgosurit nga IEVP Durrës drejt Spitalit Rajonal ishte planifikuar nga strukturat përkatëse (shërbimi shëndetësor, policia e burgjeve, sektori social dhe ligjor), me itinerar vajtje–ardhje brenda së njëjtës ditë. Transporti u krye me autoambulancën e IEVP-së, tip FIAT, me targa AB 141 OU.

Fillimisht, Altin Ndoci u dërgua në pavionin e Infektivit, ku ai shfaqi ankesa për dhimbje dhe u shoqërua në një dhomë izolimi në katin e tretë, e përshtatur me zgara hekuri. Për sigurinë e tij ishin caktuar punonjësit e Policisë së Burgjeve Sali Ferrollari dhe Fation Baçi, ndërsa një pjesë e grupit shoqërues ishte larguar.

Gjatë kohës së pritjes për trajtim mjekësor, mjekët rekomanduan mjekim dhe rikontroll pas dy orësh. Ndërkohë, i paraburgosuri ka kërkuar disa herë të shoqërohej në tualet, ku sipas raportit është dërguar rreth katër herë.

Ngjarja ka agravuar në momentin kur, sapo është hapur zgara e dhomës për ta shoqëruar sërish në tualet, Altin Ndoci ka goditur me grusht në kraharor punonjësin e policisë Fation Baçi. Si pasojë, Baçi është rrëzuar mbi kolegun e tij Sali Ferrollari dhe të dy kanë përfunduar në tokë.

I paraburgosuri ka përfituar nga situata dhe është larguar me vrap nëpër korridoret e spitalit. Dy efektivët kanë tentuar ta ndjekin, por gjatë ndjekjes Fation Baçi ka rrëshqitur në shkallë. Pavarësisht kësaj, ndjekja ka vazhduar deri në dalje të spitalit.

Në dalje kryesore, punonjësi i policisë ka qëlluar një herë me armë shërbimi në tokë për ta frikësuar dhe detyruar të dorëzohej, por i arratisuri ka vijuar largimin. Banorë të zonës kanë deklaruar se ai është larguar në drejtim të kodrave me një automjet të zi me targa AA 700 RS.

Tentativat për të njoftuar numrin 129 kanë rezultuar pa përgjigje, ndërsa më pas është njoftuar Shërbimi i Informacionit në IEVP Durrës.

Nga hetimet paraprake rezulton se procedura e përgatitjes së dokumentacionit shëndetësor për vizitën në spital, e kryer nga infermieri dhe përgjegjësja e sektorit shëndetësor në IEVP Durrës, ka qenë në kundërshtim me Ligjin nr. 81/2020 dhe VKMsë nr. 209, pasi vizita mjekësore ishte planifikuar pa u kryer më parë kontrolli mjekësor i detyrueshëm brenda institucionit të vuajtjes së dënimit.

Me tone të ashpra i është drejtuar kryeministri Rama kryebashkiakëve sa i takon Paketës së Maleve, për të cilën tha se ka ende bashki që nuk kanë përmbyllur fazën e parë të kësaj nisme.

Ndërsa shpalosi ambicien për 1 mijë investime, Rama tha se nuk do të ketë asnjë rikandidim nëse nuk do të plotësohet kjo ambicie.

“Nuk mundet dot të rrini e të prisni vetëm nga buxheti i shtetit, duhet të kaloni në një fazë tjetër sidomos disa bashki që i kanë të gjitha mundësitë. Bëmë një takim për Paketën e Maleve, sot jot ë gjitha bashkitë e kanë kryer fazën e parë. Është e papranueshme.

Cili duhet të jetë objektivi? Ditë e parë që u shpall në ëebsite kishte mbi 700 interesime nga shqiptarë jashtë atdheut, është instrument i sigurtë për të tërhequr cdo shqiptar nga jashtë. Si ka mundësi që nuk ka mbaruar ende faza e parë. C’është kjo shkencë e madhe për të përcaktuar hartën. Megjithatë i kam kërkuar drejtores së Agjencisë Kombëtare të Planifikimit të jetë në dispozicion të secilës bashki për harta për cfarëdo që keni nevojë. Dhe i kam kërkuar ministrit Demo të vendoset një target për cdo bashkie.

Ambicia është 1 mijë investime nga kjo paketë. Nuk do të ketë asnjë rikandidim nëse nuk do jetë arritur targeti i këtij projekti. Është plotësisht e mundshme por ama 1 mijë investime nëse marrim një shifër më modesten të mundshme për secilin nga këto investime, prej 50 mijë eurosh që është shumë e ulët, mendoni c’i ndodh ekonomisë në tre vjet. Kështu që, fokusoheni dhe merreni shumë seriozisht. Kuptojeni se është një celësh për të tërhequr njerëz aty ku duket se nuk ka njerëz.

Një element tjetër është të bëjmë një hap për të rritur cilësinë e planifikimit dhe projektimit, për këtë agjencia e re do ketë mision të vetin të asistojë bashkitë në planifikim dhe të krijohet një kanal më i shpejtë ndërveprimi.” tha Rama.

Në mbledhjen me kryebashkiakët Rama tha se ka mbështetur propozimin e ministrit Demo për të vënë në mbështetje të zhvillimit rural, një fond prej 20 milionë eurosh të sigurara nga Emiratet e Bashkuara.

“Një tjetër element që ndikon në këto situata emergjencash është niveli i rezistëncës së infrastrukturës mbrojtësve, kam parasysh kanalet e kullimit, argjinaturat, hidrovoret. Analiza tregon se ka pika ku rezistenca është më e dobët, për këtë arsye duhet të vendosim me shumë saktësi piketat për të forcuar më tej infrastrukturën mbrojtëse dhe nga ana tjetër për të adresuar të gjitha ato aspekte që kanë të bëjnë me fuqizimin e ndërveprimit mes pushteteve.

Demo ka propozuar dhe ka gjetur mbështetje është që me një fond të siguruar nga miqtë tanë të cmuar të Emirateve të Bashkuara prej 20 mln eurosh në mbështetje të zhvillimit rural të blejmë një sasi domethënëse mjetesh që vendosen në shërbim të kullimit, pastrimit të kanaleve kulluese dhe të funksionojnë sipas nevojave të bashkive.

E kemi një shembull në Dibër, ka funksionuar më së mirë, është koha të rrisim kapacitetin, sipas qarqeve dhe kështu kjo flotë përqëndron më shumë forca ku ka më shumë emergjenca ose në ditët e punës normale do të jetë një forcë e shtuar për të gjitha bashkitë sipas sasisë së kanaleve për t’u pastruar dhe mirëmbajtur sipas nevojës për të adresuar edhe problemin e argjinaturave. Është ministri që do e cojë përpara këtë projekt” u shpreh Rama.

Bashki më të forta, më funksionale më të qëndrueshmë, nën këtë moto kryeminsitri Edi Rama mblodhi këtë të shtunë në një takim krerët e bashkive në vend.

“Meqë është takimi I parë I vitit dhe shihemi sy më sy të gjithë ju uroj një vit të mbarë familjarisht dhe profesionalisht patjetër politikisht të gjithë bashkë. Jemi këtu në vijim të takimeve të organizuara për të celur vitin, duke diskutuar për sfidat e për të vënë disa piketa dhe për të përcaktuar cështjet kryesore me të cilat do të duhet të merremi bashkarisht. Viti nisi me një situatë tejet të vështirë atmosferike preku një pjesë jot ë vogël të territorit dhe që na përballi me sfidën e emegjencës në kushtet që emergjencat po bëhen sistematike dhe po marrin një profil tjetër si rezultat I ndryshimeve klimatike. Kemi më shumë thatësirë e zjarre dhe më shumë befasira në aspektin e atmosferën ku krijohen vorbulla si ajo e ditëvë të para të vitit që sipas ekspertëve janë vorbulla që mund të trajtohen me gjuhën e përditshme si ngërce në qarkullimin e flukseve të ajrit dhe krijojnë përqëndrime dhe reshje shiu e borë me intensitet të lartë. Në këto kushte nuk ka shumë për të bërë por patjetër që ka elementë të kësaj situate që lidhen me njeriun dhe pamë se si kjo situatë u ndërlikua ndër të tjera edhe nga papërgjegjshmëria rrënshqethëse e shumë kujt ndër ne që si qytetar I kësaj Republike apo si vizitorë shqipfolës, se nuk hedhin turistët mbetje plastike në rrugë e konsideron këtë vend si një landfill kudo ku ndodhet. Dhe gjithë kjo sasi e madhe që hidhet rrugëve ku këtu hyn edhe mungesa e menaxhimit të mbetjeve në territoret rurale mblidhet dhe falë erës vjen e bllokon pika kyce të rrjetit të kullimit sic ndodhi në Shkozet, Gjirokastër, në disa pika të tjera.” Tha Rama.

Drejtori i CIA-s, John Ratcliffe, u takua të enjten në Karakas me presidenten e përkohshme të Venezuelës, Delcy Rodríguez, “me urdhër të presidentit Trump”, bëri të ditur një zyrtar amerikan.

Takimi dyorësh synoi ndërtimin e besimit dhe të kanaleve të komunikimit pas sekuestrimit nga SHBA-ja të ish-presidentit të Venezuelës, Nicolás Maduro, gati dy javë më parë.

Sipas zyrtarit amerikan, Ratcliffe dhe Rodríguez diskutuan mundësitë për bashkëpunim ekonomik dhe theksuan se “Venezuela nuk mund të jetë më një strehë e sigurt për armiqtë e Amerikës”.

Takimi u zhvillua në të njëjtën ditë kur Rodríguez mbajti fjalimin e saj të parë për gjendjen e kombit që nga marrja e detyrës si presidente e përkohshme, ku njoftoi reforma në industrinë e naftës për të lejuar më shumë investime të huaja — një largim nga politikat e ndjekura nga Maduro. Në fjalimin drejtuar kombit, Rodríguez tha se nuk kishte frikë të përballej me SHBA-në “diplomatikisht përmes dialogut politik”, duke shtuar se Venezuela duhet të mbrojë “dinjitetin dhe nderin” e saj.

Presidenti Donald Trump ka deklaruar se kompanitë amerikane të naftës do të hyjnë në Venezuelë dhe do të gjenerojnë fitime që do të shkojnë si për popullin venezuelian, ashtu edhe për SHBA-në, ndërsa një zyrtar i lartë ka thënë se SHBA-ja do të kontrollojë “pa afat” shitjet e naftës venezueliane të sanksionuar.

Trump u ka kërkuar kompanive të naftës të investojnë të paktën 100 miliardë dollarë (75 miliardë paund) në Venezuelë, por një drejtues ekzekutiv tha javën e kaluar se vendi aktualisht është “i painvestueshëm”.

Rodríguez, ish-zëvendëspresidente, u betua më 5 janar pasi forcat amerikane sekuestruan Maduron dhe bashkëshorten e tij, Cilia Flores, në një operacion në Karakas. Ata ndodhen tani në paraburgim në Nju Jork, ku janë deklaruar të pafajshëm për akuza të trafikut të drogës dhe vepra të tjera penale.

Zyrtari amerikan e përshkroi takimin mes Rodríguez dhe Ratcliffe si “historik”, duke shtuar se Ratcliffe ishte zyrtari i parë në nivel kabineti që udhëtoi në Venezuelë.

Takimi u zhvillua gjithashtu në të njëjtën ditë kur Trump u takua në Uashington me lideren e opozitës, María Corina Machado, e cila i dorëzoi presidentit amerikan medaljen e saj fituese të Çmimit Nobel për Paqen.

Në fjalimin për gjendjen e kombit, Rodríguez u tha venezuelianëve se ishte “shumë e vështirë” të dorëzohej raporti vjetor i Maduron, duke shtuar se të dy kishin punuar së bashku për fjalimin deri gjashtë orë para sekuestrimit të tij më 3 janar.

Duke vënë në dukje se SHBA-ja është një fuqi bërthamore, presidentja e përkohshme tha se nuk kishte frikë të angazhohej në diplomaci, duke theksuar: “Duhet të shkojmë së bashku si venezuelianë për të mbrojtur sovranitetin, pavarësinë, integritetin territorial dhe gjithashtu për të mbrojtur dinjitetin dhe nderin tonë”.

Ajo shtoi se, nëse do t’i duhej të udhëtonte në Uashington për t’u takuar me Trumpin, do ta bënte “duke ecur me këmbët e mia, jo e tërhequr zvarrë”. Rodríguez paralajmëroi se “e gjithë Venezuela është e kërcënuar” dhe bëri thirrje për unitet kombëtar për të “zhvilluar betejën diplomatike”./abcnews.al

Barometri i sigurisë për vitin 2025 tregon një përmirësim të ndjeshëm të sigurisë publike në vendin tonë, si në rrugë ashtu edhe në luftën kundër krimit. Në raport tregohet një vlersim në rritje për Policinë e shtetit sipas sondazhit te kryer nga qendra Agenda.

Në raport, perceptimi për Policinë e Shtetit mbetet kryesisht pozitiv, ku 70.1% e qytetarëve kanë vlersim pozitiv dhe 20.9% shprehen të pakënaqur.

Sipas Barometrit të Sigurisë së Jetës dhe Punës së Policisë për vitin 2025, të hartuar nga Eduard Zaloshnja, vdekjet rrugore janë ulur me 43.5%, si dhe ka patur reduktim të vrasjeve të qëllimshme.

“Këtu kam bërë një përmbledhje të vdekjeve rrugore dhe nga krimi për 15 vitet e fundit, dhe shifrat flasin vetë. Këtë vit që mbyllëm kemi patur 153 vdekje rrugore më pak se sa në vitin 2010. Shofim vrasjet e qëllimshme, 41 vdekje nga vrasjet e qëllimshmë patëm këtë vit, 109 kanë qenë në 2010. Pra, një reduktim me mbi 60%” u shpreh Zaloshnja

Ky raport tregon se vendi ynë  ka tregues më të mirë sigurie se një dekadë më parë, si në aspektin e kriminalitetit ashtu edhe të aksidenteve rrugurore./abcnews.al

Gjykata Themelore në Prishtinë i ka caktuar masën e paraburgimit prej një muaji ndaj S.R., i cili u arrestua një ditë më parë nën dyshimet për sulm ndaj pjesëtarëve të misionit paqeruajtës të NATO-s në Kosovë, KFOR, dhe të Policisë së Kosovës më 2023.

Gjykata tha se vendimi për paraburgim ishte masë adekuate për shkak të rrezikut se nëse i pandehuri do të lihej në liri, ai do të mund të arratisej, pasi që ka edhe nënshtetësi të Serbisë dhe “në këtë mënyrë do të jetë i pakapshëm për organet e drejtësisë”. Po ashtu, duke argumentuar masën e paraburgimit, Gjykata tha se nëse S.R. do të lihej në liri ai do të mund të asgjësojë apo ndryshojë provat dhe të pengojë hetimet.

Sipas njoftimit, S.R. dyshohet se më 29 maj të vitit 2023, nga ora 06:00 deri në orët e mbrëmjes, në perimetrin e Komunës së Zveçanit, në koordinim me të dyshuar tjerë serbë nga Kosova dhe Serbia, përmes dhunës kanë tentuar që të “pengojnë vendosjen e rendit kushtetues të Republikës së Kosovës në komunat veriore të vendit” dhe përkundër urdhrave të KFOR-it për shpërndarjen e qetë të turmës, ai dhe të tjerët kanë ushtruar dhunë ndaj tyre. Sipas Gjykatës Themelore, i pandehuri dhe serbët e tjerë kanë përdorur mjete të forta, mjete shpërthyese të improvizuara dhe armë zjarri, “nga të cilat janë lënduar të paktën 30 pjesëtarë të forcave paqeruajtëse të KFOR-it, tre nga ta nga predhat e armëve të zjarrit, si dhe duke shkaktuar dëme materiale të konsiderueshme në automjetet e KFOR-it, Policisë së Kosovë, si dhe në veturat e gazetarëve të cilët kanë mbuluar ngjarjet e kësaj dite, të cilat përfshijnë djegien e plotë të disa automjeteve ose dëmtimin fizik në masë të madhe”.

S.R. ka të drejtë që të ankohet për këtë vendim në Gjykatën e Apelit.

Ai u arrestua të mërkurën gjatë një aksioni të prokurorëve dhe hetuesve policorë nga Drejtoria për Krime të Rënda dhe Krim të Organizuar.

“Në vendbanimin e të dyshuarit është zbatuar urdhër kontrolli, ku janë gjetur prova materiale që do të shërbejnë gjatë procedurës penale”, u tha në njoftimin e Prokurorisë Speciale të Kosovës të publikuar më 14 janar.

Ai dyshohet për disa vepra penale, sikurse bashkim për veprimtari kundërkushtetuese, rrezikim të personave nën mbrojtje ndërkombëtare, pjesëmarrje në turmë që kryen vepër penale dhe huliganizëm, si dhe sulm ndaj personit zyrtar.

Më shumë se 90 pjesëtarë të KFOR-it kishin pësuar lëndime – disa prej tyre lëndime të rënda – pas përleshjes me protestuesit serbë në maj të vitit 2023 në Zveçan. Të lënduar kishte edhe në anën e protestuesve.

Dhuna në Zveçan shpërtheu pasi serbët lokalë kundërshtuan hyrjen e kryetarëve të rinj shqiptarë në ndërtesat komunale në Zveçan, Leposaviq dhe Zubin Potok – komuna në veri të Kosovës, të banuara me shumicë serbe – pas zgjedhjeve lokale të mbajtura më herët po atë vit, që u bojkotuan nga serbët lokalë.

Për ngjarjet në Zveçan, janë arrestuar dhe akuzuar dhjetëra persona, dhe disa janë dënuar me burgim pas marrëveshjeve me prokurorinë për pranimin e fajësisë.

Për dhunën në Zveçan, Kosova e ka fajësuar Serbinë, duke thënë se pas dhunës qëndruan “grupe kriminale të afërta me presidentin e Serbisë, Aleksandar Vuçiq.

Por, Beogradi e ka hedhur poshtë këtë akuzë, duke thënë se Qeveria e Kosovës po synonte që të shtynte serbët “drejt një konflikti të ri me NATO-n”.

NATO-ja vazhdimisht ka kërkuar që autorët e dhunës të mbahen përgjegjës./rel

Read More...

Kryetari i Grupit Parlamentar të Partisë Socialiste, Taulant Balla në mbledhjen e parë të grupit për vitin 2026 theksoi se prioriteti strategjik i mazhorancës është mbyllja e negociatave për anëtarësimin e Shqipërisë në BE deri në fund të vitit 2027 dhe finalizimi i procesit të anëtarësimit deri në vitin 2030, duke kërkuar angazhim maksimal të deputetëve në miratimin e ligjeve të integrimit dhe rritjen e disiplinës parlamentare.

– Angazhimi i 83 deputetëve të mazhorancës për përmbushjen e këtyre objektivave gjatë 40 muajve në vijim.

– Nevoja për ditë të gjata pune në komisione dhe seanca plenare për shkak të numrit të madh të ligjeve që lidhen me integrimin europian.

– Zbatimi i procedurës së përshpejtuar për ligjet që lidhen me përafrimin e legjislacionit me BE-në.

– Nevoja për ndryshime në Rregulloren e Kuvendit për rritjen e efektivitetit të kontrollit parlamentar.

– Përgjegjësia e Kuvendit për kontrollin e zbatimit të vendimeve të GjEDNJ lidhur me ngjarjet e 21 Janarit.

– Domosdoshmëria e përfundimit të Reformës Zgjedhore dhe Reformës Administrative Territoriale përpara zgjedhjeve vendore 2027.

– Reforma Zgjedhore:

– Adresimi i rekomandimeve të OSBE/ODIHR.
– Depolitizimi i administratës zgjedhore.
– Nxjerrja më e shpejtë e rezultatit zgjedhor.
– Diskutimi për numërimin në qendrat e votimit.

– Gatishmëria për bashkëpunim me opozitën për Reformën Zgjedhore dhe Reforma të tjera.

– Miratimi i Ligjit organik për funksionimin dhe organizimin e Kuvendit të Shqipërisë.

Balla ndër të tjera vuri theksin edhe te forcimi i rolit kontrollues të Kuvendit, pavarësia e institucioneve të pavarura, lufta kundër dezinformimit dhe respektimi strikt i rregullores parlamentare, me fokus të qartë te shqetësimet reale të qytetarëve dhe rruga europiane e vendit.

Fjala e plotë e Kryetarit të Grupit Parlamentar të PS, Taulant Balla:
Grupi Parlamentar i Partisë Socialiste të Shqipërisë e nis këtë sesion parlamentar, në këtë vit të ri politik, me bindjen dhe angazhimin e palëkundur se misioni ynë kombëtar i bashkimit të plotë me Europën s’ka qenë kurrë më i qartë dhe më afër.
Detyra e secilit prej 83 mandateve tona në këtë sallë s’ka qenë kurrë më e qartë dhe më konkrete sesa sot, nesër dhe për çdo ditë në 40 muajt në vijim, deri në ditën kur do t’i kërkojmë popullit shqiptar mandatin tonë të pestë qeverisës, diku në mes të pranverës 2029.
Përgjatë kësaj kohe, tre janë objektivat dhe sfidat tona për Shqipërinë 2030:
1. Të mbyllim negociatat për anëtarësim në Bashkimin Europian në fund të vitit 2027;
2. Të mundësojmë ratifikimin në 27 parlamentet e vendeve anëtare të Vendimit të Këshillit Europian për anëtarësimin e Shqipërisë në BE gjatë vitit 2028, mundësisht para zgjedhjeve për Parlamentin Europian – maj 2029;
3. Të ngremë deri më 28 Nëntor 2030 flamurin tonë kuqezi në oborrin e familjes së bashkuar europiane.
Siç e shikoni, objektivat tona janë të qarta dhe fakti që në agjendën tonë europiane tanimë e numërojmë me ditë, besoj do t’i bëjë edhe të tjerët, në atë pjesë që u ka mbetur të ulur në një pjesë të krahut të djathtë të sallës së seancave plenare, të kuptojnë qartë se ne nuk kemi asnjë ditë për të humbur.
Në kuadër të këtyre objektivave, ne po përcaktojmë në këtë mbledhje të zgjeruar sot edhe kalendarin tonë politik të detyrave që na takojnë, në përmbushje të këtyre objektivave që kryetari Rama i tha në fillim të mbledhjes dhe unë i përmblodha në fillim të fjalës sime.
Për shkak të numrit të madh të ligjeve që lidhen me procesin e përafrimit të legjislacionit apo përmbushjen e kushteve për anëtarësim, duhet të jemi gati për ditë të gjata pune në komisione dhe në seanca plenare pune.
Kjo kërkon një angazhim më të madh të çdo anëtari të Grupit tonë Parlamentar dhe, kur them angazhim më të madh, performancën dhe korrektesën në pjesëmarrje të sesionit të parë duhet ta shohin të gjithë si një moment reflektimi për sesionin që nisim dhe në viim. Të dhënat për secilin do të jenë në raportin që do të paraqesë Sekretari i Grupit.
Në dhjetor, Kuvendi miratoi ndryshimet në ligjin “Për rolin e Kuvendit në procesin e integrimit të RSH në BE”, ku thelbi i ndryshimeve ishte pikërisht ajo që kryetari Rama na kërkoi, parashikimi i procedurës së përshpejtuar për shqyrtimin dhe miratimin e ligjeve që synojnë përafrimin e legjislacionit dhe përmbushjen e kritereve/detyrimeve të anëtarësimit. Gjatë sesionit të parë kemi shqyrtuar dhe miratuar 9 ligje me objekt përafrimin e legjislacionit tonë kombëtar me acquis të Bashkimit Europian. Ndërsa sot që flasim janë në proces një numër i madh projektligjesh.
Ndryshimet në ligjin “Për rolin e Kuvendit në procesin e integrimit të RSH në BE” na detyrojnë të ndërmarrim sapo të rikthehemi ditën e hënë edhe ndryshime në Rregulloren e Kuvendit, ku, siç edhe e kemi thënë publikisht, duhet të përmirësojmë dhe rrisim efektivitetin e kontrollit parlamentar, ndërsa lidhur me procesin e raportimit në Kuvend të institucioneve, agjencive etj., duhet të zbatojmë të njëjtat mekanizma dhe procedura si në praktikat dhe eksperiencat më të mira në vendet e BE-së. Raportimet nuk duhet të jenë formale, na duhet qasje e re, krejtësisht.

Legjislatura aktuale arriti të zhbllokojë brenda sesionit të vet të parë ngërçin e trashëguar nga legjislatura e kaluar për zgjedhjen e Avokatit të Popullit, në një proces model, ku edhe sipas traditës parlamentare shumica votoi një kandidaturë të propozuar ekskluzivisht nga opozita. Lidhur me procesin e zgjedhjes së Komisionerit të ri kundër Diskriminimit, për shkak të mbarimit të afateve pa kandidatë të mbështetur, komisioni përgjegjës do të rihapë menjëherë procesin, për ta zgjidhur edhe këtë ngërç sa më parë. Kemi përgjegjësinë, duke reflektuar edhe mbi gjetjet dhe rekomandimet e Raportit të Progresit nga Komisioni Europian, të mbështesim pavarësinë e këtyre institucioneve, me drejtues profesionistë.
Të mërkurën e ardhshme bëhen 15 vite nga tragjedia dhe krimi shtetëror i 21 Janarit, ndërsa presim nga drejtësia, veçanërisht nga Prokuroria e Posaçme, zbatimin e vendimeve të GJEDNJ-së dhe Gjykatës së Lartë të Republikës së Shqipërisë, lidhur me plot aspekte të asaj ngjarjeje kriminale. Ne nuk kemi hyrë asnjëherë në meritën apo përmbajtjen e dosjeve penale, por Kuvendi i Shqipërisë ka përgjegjësi në kontrollin e zbatimit të vendimeve të GJEDNJ-së bashkë me ministrinë e drejtësis siç na e kujtoi Njazi Jaho.
Zonja dhe zotërinj deputetë,
Në një nga të dielat mes 15 prillit – 15 majit 2027, Shqipëria do të mbajë zgjedhjet e radhës vendore.Të hënën Kuvendi i Shqipërisë fillon sesionin e tij të dytë të kësaj legjislature; në vjeshtë, Presidenti i Republikës do të dekretojë edhe datën e Zgjedhjeve Vendore 2027.
E pra, një detyrë tjetër kryesore dhe e përbashkët me opozitën, nëse ata duan të përfshihen, përgjatë këtij sesioni të dytë të kësaj legjislature deri në fund të korrikut, duhet të jetë finalizimi i Reformës Zgjedhore.
Komisioni i Posaçëm i Reformës Zgjedhore duhet të adresojë rekomandimet e OSBE/ODIHR-it, ku përparësi të veçantë në vlerësimin tonë sikurse e ka thënë kryetar i Rama në asamble, ka depolitizimi i plotë i administratës zgjedhore. Duhet të marrë fund kjo qasje e papranueshme për një vend anëtar të BE-së: partitë votohen, partitë numërojnë dhe votat e tyre.
Gjithashtu, të gjithë ia themi njëri-tjetrit majtas-djathtas, në ato netët pafund të numërimit në pallatet e sportit apo palestrat e shkollave, dhe me deputetët e opozitës e bejmë këtë bisedë sa herë kemi zgjedhje. Dhe këtu duhet ta ripërsërisim me zë të lartë nevojën e nxjerrjes së rezultatit të zgjedhjeve në një kohë më të shkurtër, pse jo, të mos kryhet numërimi në qendrat e votimit.
Fakti është se, qoftë për komisionet zgjedhore partiake, qoftë për vonesën në nxjerrjen e rezultatit zgjedhor, koha nuk pret më as për zgjedhjet vendore 2027.
Reforma zgjedhore, sa i përket Kodit Zgjedhor, kërkon të paktën 84 vota në Kuvend. Por ne e kemi bërë publike ambicjen tonë për një reformë më të thellë, e cila të përfshijë edhe zvogëlimin e numrit të deputetëve të Kuvendit të Shqipërisë në të paktën 101 deputetë.
Ndërsa jemi të gatshëm të diskutojmë edhe propozime të tjera të natyrës kushtetuese për Kuvendin e Shqipërisë, si vend anëtar i BE-së.
Reforma e fundit administrative-territoriale u miratua nga Kuvendi i Shqipërisë më 31 korrik 2014, vetëm me votat e shumicës dhe të një pjese të opozitës që pranoi të bashkëpunonte.
Pas tre mandatesh, në zgjedhjet vendore 2027 duhet të shkojmë me ndarjen e re administrative-territoriale. Prandaj, komisioni i posaçëm parlamentar i Reformës Administrative Territoriale duhet të sjellë për votim brenda kësaj legjislature ndarjen e re, e cila të udhëhiqet nga nevoja e thellimit të reformës aktuale, duke reflektuar dhe ndryshimet shumë domethënëse të këtyre viteve, që nga demografia por edhe te teknologjia, me fokus kryesor gjithmonë mirëpërgatitjen e nivelit tonë vendor për Shqipërinë 2030 në Bashkimin Europian, ku duhet të kemi pa asnjë mëdyshje një cilësi të re të proceseve të qeverisjes vendore.
Komisioni i kësaj reforme, i referohem komisioneve të posaçme, duhet të punojë me të njëjtin intensitet si komisionet e përhershme, duke intensifikuar konsultimet publike. Duhet ta bëjmp të qarte sot se formulën e bashkëdrejtimit të këtij komisioni dhe të Komisionit të Posaçëm të Reformës Zgjedhore e kemi miratuar me dakordësi. Por, në asnjë rast, nuk kemi dhënë dakordësi për të mos bërë asgjë.

Ne jemi gati t’ju dëgjojmë në respekt të atyre që ju kanë zgjedhur, por ne nuk do të jemi asnjëherë të gatshëm të presim këdo qoftë, as edhe një minutë, nëse nuk doni të punojmë së bashku, qoftë për këto dy reforma, qoftë për reforma të tjera. Nuk kemi asnjë ditë për të humbur.
Nga e hëna, 19 janar, dita e parë e këtij sesioni të dytë të legjislaturëse së 11-të , deri në të enjten e fundit të korrikut 2026, duhet të fillojë dhe të mbarojë diskutimi dhe miratimi i Ligjit organik për funksionimin dhe organizimin e Kuvendit, siç e tha dhe kryetari i kuvendit dhe ai i partisë.
E përsëris, pas 35 vitesh, pas 10 legjislaturave dhe 1 136 njerëzve të zgjedhur deputetë në vitet e jetës demokratike, që Kuvendi i Shqipërisë miraton e nxjerr ligje për të gjithë, por nuk e ka ende ligjin e vet. Nuk ka pavarësinë e vet financiare, nuk ka status të deputetëve të vet siç i ka hije një vendi anëtar të BE, nuk i referohem ofiqeve por një statusi për të kryer funksionet.
Në seancën e fundit të legjislaturës së kaluar, Kuvendi ka miratuar “Strategjinë Kombëtare kundër Ndërhyrjeve të Huaja dhe Dezinformimit 2025–2030”, pas një pune për t’u lavdëruar të Komisionit të Posaçëm. Është me shumë rëndësi që çdo komision i përhershëm i Kuvendit të kthehet në instrument në duart e qytetarëve për të kuptuar të vërtetat, gjysmë të vërtetat dhe gënjeshtrat me bisht që serviren si të vërteta çdo vit.
Në sesionin e kaluar u arrit një ndryshim i shumëpritur, i shumëdiskutuar, i komisioneve të përhershme parlamentare. Besoj se na mjaftuan këto 3 muaj për të na dhënë të drejtë në nevojën e kësaj ndarjeje të re, por mbi të gjitha për komisionet e reja të ngritura, si rrjedhojë e kësaj faze sfiduese të Shqipërisë në prag të anëtarësimit në Bashkimin Europian.
Komisionet që erdhën me fusha të reja mbulimi i kanë dhënë mundësinë e munguar ndër vite Kuvendit të jetë më efektiv në monitorimin post-legislacion. Është mbresëlënës numri i konsiderueshëm i peticioneve/ankesave të qytetarëve të mbërritura në komisionin e përhershëm përkatës. Ndërsa ngritja e Komisionit për Kulturën, Turizmin dhe Diasporën na imponon një marrëdhënie më të fortë për të qenë syri dhe veshi i shqiptarëve në çdo cep të globit. Por kjo nuk duhet të mbetet thjesht te emri i komisionit por në një punë shumë më aktive.
Na duhet të bëjmë disa ndryshime në përbërjen e komisioneve, me qëllim shmangien e përplasjeve të orareve për anëtarë të caktuar, të cilët e kanë të pamundur të jenë njëkohësisht në dy komisione.
Duhet të ngremë edhe nënkomisionet e pangritura ende që ka qenë dhe objektivi im si kryetar grupi, për të garantuar një punë reale dhe profilizim të deputetëve për çështje dhe fusha të caktuara. Në këtë sesion të ri duhet që edhe Këshilli i Integrimit Europian të luajë rolin e vet të ngarkuar nga ligji i posaçëm. Edhe administrata e Kuvendit duhet të jetë më shumë mbështetëse për deputetët në këto çështje.
Duke reflektuar mbi të shkuarën e afërt të punës së Kuvendit të Shqipërisë,
Rekomandimi kryesor dhe kërkesa ime e parë për çdo anëtar të Grupit tonë Parlamentar është pjesëmarrja e rregullt dhe aktive në seanca, komisione dhe mbledhje grupi.
Diskutimet duhet të jenë komunikim me njerëzit, duke e shfrytëzuar më mirë avantazhin e sotëm të komunikimit përmes rrjeteve sociale.
Së treti, duhet një pjesëmarrje më aktive e ministrave në mbledhjet e Grupit Parlamentar, për të informuar, sqaruar dhe pajisur trupën tonë kuvendore me armët e të vërtetave kundër makinerisë së shpifjeve, baltës dhe dezinformimit keqdashës.
Edhe gjatë sesionit të kaluar, në sallën e Kuvendit, kemi konsumuar pafund politikë, për luftëra pakuptim interesash partiake të palës tjetër,por ata nuk kuptojnë që për ne më të rëndësishëm janë njerëzi.
Seanca e fundit e dhjetorit ishte një rikthim, një déjà-vu.
Prandaj, i vetmi ilaç mbetet zbatimi strikt i Rregullores së Kuvendit. Kush kujton se duhet ta mbajmë mirë me Saliun e ka shumë gabim. Ne duhet ta mbajmë mirë me Shqipërinë dhe shqiptarët nuk e pranojnë dot atë pamje në Kuvend.
Nga ajo sallë, njerëzit presin tjetër gjë.
Është e vërtetë që kjo sallë është aula e debatit politik, por detyra jonë kryesore është që debati të fokusohet tek anëtarësimi në BE, te detyra, kritetet, pasaporta europiane dhe jo te shterpësia politike.
Detyra jonë është, si në çdo parlament të vendeve anëtare të Bashkimit Europian, të diskutojmë mbi alternativat dhe projektet.
Mbi çdo projekt apo propozim tonin, të shumicës, pakica mund të ketë idetë apo alternativën e vet. Ne vijmë me një propozim konkret,ata mund të kenë propozimin apo idenë e tyre.
Zonjat dhe zotërinjtë e opozitës,
Mos humbisni kohë kot me thirrje dhe përbetime revolucionesh që nuk kanë për të ndodhur kurrë.
Mos humbisni kohë kot as me “shtrimin e tapetit” të alibisë për humbjen e radhës.
Jemi të gatshëm të bashkëpunojmë me ata për çështje të rëndësishme, për t’i dhënë Shqipërisë një Kod të ri Zgjedhor sipas standardeve më të mira zgjedhore, ndarje administrative-territoriale funksionale dhe gjithçka tjetër.
Por ata duhet ta fiksojnë mirë në mendje: vëmendja jonë është te Pasaporta Europiane për çdo qytetar shqiptar, brenda kësaj dekade.
Ne e dimë që rezultatin zgjedhor apo fitoren nuk e vendos asgjë tjetër, përveç vullnetit të zgjedhësve.
Të jesh në opozitë do të thotë të bësh pjesë në një institucion serioz.
Vëmendja jonë janë njerëzit; me ju jemi gati të punojmë së bashku për çfarë por siç e tha kryetari Rama,ne nuk kemi jo ditë por as orë për të humbur.
Ka qenë një ndër sesionet më intensive.

Në prag të 15 vjetorit të 21 janarit, kreu i grupit parlamentar socialist Taulant Balla i bëri thirrje Prokurorisë së Posacme të zbatojë vendimet e Gjykatës së Lartë dhe Strasburgut për hetimin e krimit shtetëror të 21 janarit 2011, ku katër protestues u vranë në Bulevard në protestën kundër qeverisë Berisha.

“Të mërkurën e ardhshme bëhen 15 vite nga tragjedia dhe krimi shtetëror i 21 Janarit, ndërsa presim nga drejtësia, veçanërisht nga Prokuroria e Posaçme, zbatimin e vendimeve të GJEDNJ-së dhe Gjykatës së Lartë të Republikës së Shqipërisë, lidhur me plot aspekte të asaj ngjarjeje kriminale.

Ne nuk kemi hyrë asnjëherë në meritën apo përmbajtjen e dosjeve penale, por Kuvendi i Shqipërisë ka përgjegjësi në kontrollin e zbatimit të vendimeve të GJEDNJ-së bashkë me ministrinë e drejtësis siç na e kujtoi Njazi Jaho.”u shpreh Balla.