ANKARA, 10 tetor /ATSH-DPA/- Turqia do të ofrojë mbështetje ushtarake në Rripin e Gazës pas marrëveshjes së arritur midis Izraelit dhe Hamasit, tha sot Ministria Turke e Mbrojtjes.

Presidenti turk, Recep Tayyip Erdogan deklaroi dje se vendi i tij dëshironte të merrte pjesë në rindërtimin e Rripit të Gazës dhe në një “task forcë”.

Një task forcë ndërkombëtare me ekspertë nga Izraeli, SHBA-ja, Egjipti, Katari, Turqia dhe Kryqi i Kuq do të kërkojnë eshtrat e pengjeve të vdekura në Gaza.

Turqia ishte e përfshirë në negociatat indirekte midis Izraelit dhe grupit islamist palestinez “Hamas” në Egjipt. //a.i/

The post ANKARA – Turqia ofron mbështetje ushtarake në Gaza appeared first on Agjencia Telegrafike Shqiptare.

TIRANË, 2 tetor /ATSH/ Ministria e Drejtësisë organizoi sot në Korçë tryezën e radhës për konsultimin publik të Kodit të ri Penal.

Ministria e Drejtësisë dhe Grupi i Punës i ngritur enkas për këtë proces dëgjuan opinionet dhe qëndrimet e gjyqtarëve, prokurorëve, avokatëve, noterëve dhe përmbaruesve gjyqësorë.

“Kontributi i tyre ka një vlerë të çmuar në përmirësimin e draftit, i cili i paraprin finalizimit të një dokumenti solid e të gjithëpranuar”, njoftoi Ministria e Drejtësisë, përmes një postimi në rrjetet sociale.

Sipas MD-së “jemi në rrugë të mbarë për një Kod Penal modern, që adreson të gjitha shqetësimet e aktorëve kryesorë, të shoqërisë në tërësi e të këtij stadi ku ndodhet Shqipëria sot.

“E po kështu një Kod Penal që do t’i rezistojë kohës, si dhe do të jetë në përputhje me standardet e Brukselit”.

Për draftin e Kodit të ri Penal janë parashikuar që të zhvillohen rreth 25 tryeza konsultimi publik.

Drafti i parë i Kodit të ri Penal u paraqit më 25 korrik, pas një pune voluminoze disavjeçare nga një grup ekspertësh i udhëhequr nga drejtori i Shkollës së Magjistraturës, prof. Arben Rakipi.

Drafti u hodh për konsultim nga Ministria e Drejtësisë me aktorët e sistemit të drejtësisë, partnerët ndërkombëtarë, universitetet, shoqërinë civile, mediet dhe qeverinë si pjesë e angazhimeve të anëtarësimit në Bashkimin Europian dhe një domosdoshmëri për forcimin e Shtetit të së Drejtës.

/m.q/r.e/

The post Kodi i ri Penal, zhvillohet tryeza e radhës konsultuese në Korçë appeared first on Agjencia Telegrafike Shqiptare.

TIRANË, 2 tetor /ATSH/ Dhjetëra-mijëra qytetarë kanë përfituar nga shërbimi “Gjurmo Dokumentin”, i cili u mundëson atyre të ndjekin në kohë reale ecurinë e dokumenteve të identifikimit, nga momenti i aplikimit deri tek tërheqja në çdo vend në çdo kohë.

Kështu bëri të ditur përmes një postimi në rrjetet sociale ministrja për Punët e Brendshme Albana Koçiu, e cila thekson se “prej muajit shtator, përgjigjja më e shpejtë dhe më e sigurt vjen nga shërbimi “Gjurmo Dokumentin””.

Ministrja bëri të ditur se përmes kodit unik të aplikimit, qytetarët mund të kontrollojnë online nëse dokumenti i tyre është pranuar, është në prodhim apo nëse është gati për t’u tërhequr në zyrat e aplikimit ose në Drejtoritë Vendore të Policisë së Shtetit.

“Vetëm gjatë muajit të parë, dhjetëra-mijëra qytetarë kanë përfituar nga ky shërbim, duke ndjekur hap pas hapi dokumentin e tyre biometrik”, shkruan ministrja.

Ministria e Brendshme njoftoi se që nga momenti i prezantimit ky shërbim është përdorur nga 80% e aplikuesve.

Ky shërbim synon të garantojë informim të menjëhershëm, marrjen në kohë të dokumenteve dhe lehtësim të procedurave, duke rritur transparencën dhe besimin në proces.

/m.q/r.e/

The post Koçiu: Mijëra qytetarë kanë përfituar nga shërbimi “Gjurmo Dokumentin” në muajin e parë appeared first on Agjencia Telegrafike Shqiptare.

KISHINEV, 28 shtator /ATSH-DPA/- Presidentja moldave Maia Sandu i bëri thirrje sot të gjithë qytetarëve të votojnë për të mbrojtur vendin ku zgjedhjet parlamentare po mbahen të dielën mes frikës së ndërhyrjes së Kremlinit.

“Moldavia, shtëpia jonë e dashur, është në rrezik dhe ka nevojë për ndihmën e secilit prej jush. Ju mund ta shpëtoni atë sot me votën tuaj”, tha ajo.

Ajo u bëri thirrje njerëzve të mos shesin votat e tyre, duke paralajmëruar vazhdimisht për rrezikun e ndikimit të Moskës.

Moldavia, e cila ashtu si Ukraina fqinje është kandidate për anëtarësim në BE, ka qenë prej kohësh e ndarë midis një kursi pro-perëndimor dhe Rusisë.

“Le të mos lejojmë asnjë të shesë të ardhmen tonë”, tha Sandu, duke iu referuar forcave pro-ruse që shpresojnë të fitojnë ndikim në parlament. //a.i/

The post MOLDAVI – Sandu bën thirrje për rrezikun e ndikimit të Moskës në zgjedhje appeared first on Agjencia Telegrafike Shqiptare.

TIRANË, 26 shtator/ATSH/ Në bibliotekën e Kryeministrisë u organizua sot takimi letrar me gazetarin, përkthyesin dhe studiuesin Ben Andoni, i cili prezantoi librin e tij “Shqipëria prej letrave”, në kuadër të ciklit “Personazhe në fokus”.

Të pranishëm në takim ishin botues, gazetarë, historianë, miq të Andonit si dhe nxënës të shkollës “Ismail Qemali”, të cilët bashkëbiseduan me autorin.

Alda Bardhyli, drejtore e Qendrës Kombëtare të Librit dhe Leximit, vlerësoi kontributin e Ben Andonit në disa fusha e sidomos kontributin e tij të vazhdueshëm në diskursin publik.

“Kur flasim për kulturë, është shumë e rëndësishme që kultura të jetë aktive. Kohët në të cilat jetojmë sot kanë nevojë për kulturë të vazhdueshme, për njerëz që kontribuojnë në mënyrë të vazhdueshme, duke mos u stepur, duke mos hezituar dhe duke dhënë më të mirën për të cilën shoqëria ka nevojë, dhe Beni e jep këtë përmes zërit të tij, një zë që vjen nga librat dhe autorët që ai përkthen, nga dituria e madhe që rrjedh nga këto lexime, u shpreh Alda Bardhyli.

E ftuar të fliste mbi librin “Shqipëria prej letrave”, historiania Nevila Nika, vlerësoi rolin e letrave si pasqyrë e kohës.

“Sot jemi në epokën kur letra nuk shkruan më njeri dhe kjo është një fatkeqësi shumë e madhe, pasi në botën digjitale mund t’i korrigjojmë sa herë të duam. Por edhe pika dhe presja kanë rëndësinë e vet”, Nevila Nika, e cila vijoi fjalën e saj duke sjellë detaje interesante nga letrat (korrespondencën) që gjendet në arkivat shqiptare.

Botuesja Irena Toçi vlerësoi punën e bërë nga Ben Andoni falë së cilës cilit kanë ardhur në shqip shkrimtarët më të mirë të Serbisë, duke hapur një dritare të jashtëzakonshme në kulturën shqiptare për të njohur kulturën serbe.

Toçi përmendi faktin se, thuajse të gjithë autorët e përkthyer prej tij nga serbishtja janë ftuar në Tiranë nëpërmjet ndërmjetësimit të Ben Andonit.

“Ben Andoni është një njeri me tone të ulëta në përgjithësi, por kontributet e tij në shoqërinë tonë janë të shumëfishta dhe ai është i përgjegjshëm për rolin që ka se përndryshe nuk do të kishte treguar përgjegjësinë që ka treguar në çdo fushë ku ka kontribuar, të paktën në 25 vite gjatë të cilave ne kemi bashkëpunuar”, u shpreh botuesja Irena Toçi.

Vetë autori për të cilin u organizua ky takim letrar, përmendi sfidat me të cilat e përball përkthimi, paragjykimin e përkthimit nga serbishtja, qasjen nacionaliste të shkrimtarëve si dhe dialektet e ndryshme me të cilat përballet gjatë përkthimit. /j.p/

Takim letrar ne COD. Fotot nga Andrin Hoxha.

1 nga 10

The post Prezantohet libri “Shqipëria prej letrave”, takim letrar me gazetarin e përkthyesin Ben Andoni appeared first on Agjencia Telegrafike Shqiptare.

UASHINGTON, 26 shtator  /ATSH-DPA/ – Presidenti amerikan Donald Trump, ka deklaruar se ndeshjet e “Kupës së Botës 2026” mund të zhvendosen në qytete të tjera nëse ndonjë prej atyre të përzgjedhura vlerësohet si e pasigurt.

Duke folur mbrëmë në Shtëpinë e Bardhë, Trump tha se e njëjta qasje do të zbatohet edhe për “Lojërat Olimpike” të vitit 2028 në Los Anxhelos.

“Pres që ‘Kupa e Botës’ të jetë shumë e sigurt”,  tha ai. “Por nëse mendoj se nuk është e tillë, do ta zhvendosim në një qytet tjetër. Nëse mendoj se nuk është e sigurt, do ta largojmë nga ai qytet”.

Presidenti  Trump shtoi se shpreson që një situatë e tillë të mos ndodhë. Ai ka folur vazhdimisht për rritjen e krimit në qytetet që qeverisen nga demokratët.

Shtetet e Bashkuara do të jenë bashkë-organizatore të turneut me 48 ekipe, së bashku me Meksikën dhe Kanadanë.

Njëmbëdhjetë qytetet amerikane pritëse janë: Seattle, San Francisco, Atlanta, Boston, Dallas, Houston, Los Angeles, Kansas City, Miami, New York/New Jersey dhe Philadelphia.

Trump ka dërguar Gardën Kombëtare në Los Angeles dhe Uashington për të parandaluar kriminalitetin, dhe ka thënë se do ta dërgojë gjithashtu në Memphis, e ndoshta edhe në Çikago.

Megjithatë, ka dyshime nëse qeveria amerikane ka kompetenca për të ndryshuar qytetet pritëse të Kupës së Botës, e cila organizohet nga FIFA, për shkak të kontratave të nënshkruara. /Ad.Ab./

The post SHBA – Trump: Ndeshjet e Botërorit 2026 do zhvendosen nëse qytetet nuk garantojnë siguri appeared first on Agjencia Telegrafike Shqiptare.

NJU JORK, 24 shtator /ATSH-DPA/ – Presidenti Volodymyr Zelensky u bëri thirrje mbrëmë anëtarëve të Këshillit të Sigurimit të OKB-së që të shtojnë përpjekjet ndërkombëtare për forcimin e mbrojtjes ajrore të Ukrainës ndaj sulmeve ruse.

“Sot, me Britaninë, me Francën dhe tashmë me më shumë se 40 vende të koalicionit tonë të gatshëm, po ndërtojmë një arkitekturë të re sigurie”, tha Zelensky. “Ne besojmë te Shtetet e Bashkuara të Amerikës, e kemi mbështtejent  kryesore”.

Ai argumentoi se duhet të vendosen garanci sigurie që Rusia “nuk mund t’i kalojë”, duke përmendur mbrojtjen ajrore si shembullin më të qartë.

“Nëse do të mund të forconim qiellin tonë me një sistem të përbashkët për të rrëzuar raketat dhe dronët rusë, kjo do ta detyronte Rusinë të ndalonte sulmet nga ajri”, theksoi ai.

Këshilli i Sigurimit u mblodh në një takim urgjent për luftën në Ukrainë. Zelensky tha se është i detyruar të bëjë thirrje të përsëritura për mbështetje, ndërsa vëmendja globale ndaj konfliktit, i cili ka më shumë se tre vjet që vazhdon, po zbehet. /Ad.Ab./

The post NJU JORK – Zelensky u bën thirrje partnerëve të OKB-së të forcojnë mbrojtjen ajrore të Ukrainës appeared first on Agjencia Telegrafike Shqiptare.

TIRANË, 21 shtator /ATSH/ Policia e Tiranës ka finalizuar një operacioni të koduar “Metoda”, duke goditur një rast të trafikimit të armëve të zjarrit nga Shqipëria drejt Anglisë.

Si rezultat i informacioneve të marra në rrugë operative për një rast trafikimi të armëve të zjarrit, nga disa shtetas nga Shkodra, shërbimet e Komisariatit të Policisë Nr. 3, në bashkëpunim me DVP Shkodër, kanë organizuar dhe finalizuar operacionin policor të koduar “Metoda”.

Në vendin e quajtur “Bulevardi i ri”, në Tiranë, shërbimet e Komisariatit të Policisë Nr. 3 Tiranë, kanë ushtruar kontroll në një kamion që dyshohej se disa shtetas kishin fshehur një armë zjarri për ta trafikuar. Nga kontrolli në brendësi të një televizori, shërbimet e Policisë gjetën dhe sekuestruan armën e zjarrit me silenciator, të ndarë në pjesë.

Në vijim të operacionit në bashkëpunim me Drejtorinë Vendore të Policisë Shkodër u arrestuan shtetasit J. S., 26 vjeç, dhe S. M., 20 vjeç, si dhe u shpall në kërkim shtetasi R. A., 20 vjeç, të tre banues në Shkodër.

Këta shtetas, në bashkëpunim me njëri-tjetrin, kanë tentuar të trafikojnë një armë zjarri me silenciator, me destinacion Anglinë, nëpërmjet kamionit të një shtetasi i cili nuk kishte dijeni për armën që ndodhej në brendësi të televizorit.

Vijojnë hetimet, nën drejtimin e Prokurorisë, për dokumentimin e plotë të veprimtarisë kriminale të këtyre shtetasve pas dyshohet se kanë trafikuar dhe armë të tjera si dhe për identifikimin e kapjen e të tjerëve të përfshirë.

Materialet procedurale i kaluan Prokurorisë, për veprime të mëtejshme.

/gj.m/r.e/

The post Goditet një rast i trafikimit të armëve të zjarrit nga Shqipëria drejt Anglisë appeared first on Agjencia Telegrafike Shqiptare.

BERLIN, 20 shtator /ATSH– DPA/ – Rritja e shkeljeve të hapësirës ajrore nga Rusia në krahun lindor dhe juglindor të NATO-s ka nxitur aleatët të mbështeten në një sistem turk të avancuar të mbikëqyrjes ajrore për operacione afatshkurtër dhe monitorim të drejtpërdrejtë.

Polonia dhe Rumania, kohët e fundit kanë regjistruar një valë depërtimesh nga dronët ushtarakë rusë, do të pajisen me system “Multispectral Extended Range Optical Sight (MEROPS” dhe do të trajnohen për përdorimin e tij.

Ky sistem mund të instalohet në helikopterë dhe dronë, dhe ka aftësinë të zbulojë objektet armike edhe përmes reve, pluhurit apo kushteve të tjera të vështira atmosferike.

Sipas informacioneve, trajnimi mbi MEROPS do të organizohet me mbështetjen e Ukrainës, me synimin që të fillojë që nga java e ardhshme. Qëllimi është që vendet e prekura të kenë kapacitete të menjëhershme monitorimi ajror, duke forcuar kështu krahun lindor dhe jug-lindor të aleancës.

Sistemi MEROPS u prezantua për herë të parë në publik në vitin 2022 dhe është projektuar për të ofruar mbikëqyrje optike me shumë spektra, duke i dhënë NATO-s një mjet të sofistikuar për të identifikuar dhe ndjekur aktivitete armike në kufijtë e saj.

Në një kohë kur tensionet me Rusinë po rriten dhe depërtimet ajrore po bëhen më të shpeshta, përdorimi i këtij sistemi turk pritet të rrisë ndjeshëm sigurinë dhe gatishmërinë e aleatëve të NATO-s në rajon. /Ad.Ab./

The post BERLIN – NATO përdor sistemin turk të mbikëqyrjes pas depërtimeve ruse appeared first on Agjencia Telegrafike Shqiptare.

UASHINGTON, 19 shtator /ATSH-DPA/- Shtetet e Bashkuara të Amerikës dhe Britania e Madhe kryen sot manovrën e parë të koordinuar satelitore në orbitë – ndërsa shefat e Mbrojtjes e përshkruan atë si “një hap të madh përpara” në bashkëpunimin hapësinor.

Midis 4 dhe 12 shtatorit, një satelit amerikan u ripozicionua për të inspektuar një satelit britanik për të konfirmuar se po funksiononte siç duhet.

Testi ishte pjesë e “Operacionit Mbrojtësi Olimpik”, një manovër e përbashkët ushtarake – që synon të sigurojë që satelitët aleatë të monitorohen dhe mbrohen.

“Ky operacion ishte i pari i këtij lloji për Komandën Hapësinore të BM-së dhe përfaqëson një rritje të konsiderueshme të aftësisë operacionale”, tha zëvendësmarshalli Paul Tedman, kreu i Komandës Hapësinore të Britanisë së Madhe.

“I ekzekutuar me ekspertizë me Komandën Hapësinore të SHBA-së, nuk mund të isha më i kënaqur ose krenar për progresin e shpejtë që po bëjmë me aleatët tanë”, shtoi ai.

“Tani, me aleatët tanë, po kryejmë operacione të avancuara orbitale për të mbrojtur interesat tona të përbashkëta kombëtare dhe ushtarake në hapësirë”, tha ai.

Zyrtarët thanë se suksesi i ushtrimit tregoi aftësinë e të dy vendeve për të punuar së bashku në orbitë, ku satelitët janë gjithnjë e më të rëndësishëm për komunikimet, navigimin dhe mbrojtjen.

Gjeneral-lejtnant Douglas Schiess, i Forcës Hapësinore të SHBA-së, tha se veprimi i përbashkët vërtetoi ndërveprimin që është themelor për mbrojtjen kolektive.

Britania e Madhe ishte një nga vendet e para që iu bashkua “Operacionit Mbrojtësi Olimpik” të udhëhequr nga SHBA-ja, i cili synon të përgatisë aleatët për operacione të përbashkëta në rast të një konflikti në hapësirë. //a.i/

The post UASHINGTON – Operacioni i parë i përbashkët satelitor SHBA-BM në orbitë appeared first on Agjencia Telegrafike Shqiptare.

PRISHTINË, 15 shtator/ATSH/ Shteteve të Bashkuara i duhet një partner në Kosovë i cili e kupton nevojën për t’i shmangur veprimet destabilizuese, ta avancojë stabilitetin rajonal dhe t’i mbrojë të drejtat e të gjithë qytetarëve të Kosovës, tha një zëdhënës i Ambasadës amerikane në Prishtinë.

Zëdhënësi e tha këtë të hënën për Radion Evropa e Lirë, pak ditë pasi SHBA-ja e pezulloi për kohë të pacaktuar dialogun e planifikuar strategjik me Kosovën, për shkak të shqetësimeve lidhur me veprimet e Qeverisë në detyrë të udhëhequr nga kryeministri Albin Kurti.

Ai tha se e ngarkuara me punë në Ambasadën amerikane, Anu Prattipati, mban takime të rregullta me Kurtin dhe se “ne ia kemi shprehur drejtpërdrejt kryeministrit shqetësimet tona në këto takime, dhe e kemi bërë plotësisht të qartë qëndrimin e Qeverisë së Shteteve të Bashkuara”.

Ambasada amerikane nuk ka shpjeguar se cilat kanë qenë veprimet e kryeministrit në detyrë Kurti që çuan në vendimin e saj për ta pezulluar pa afat dialogun e planifikuar strategjik.

Të hënën, zëdhënësi theksoi se SHBA-ja “do të vazhdojë t’i vlerësojë veprimet e Qeverisë në detyrë”, duke mos dashur të japë më shumë hollësi.

“Ne dëshirojmë të ecim përpara me Qeverinë në detyrë, por na nevojitet një partner që e kupton domosdoshmërinë për të shmangur veprimet destabilizuese dhe që është i përkushtuar të avancojë stabilitetin rajonal dhe të mbrojë të drejtat e të gjithë qytetarëve të Kosovës”, theksoi zëdhënësi.

Javën e kaluar, Qeveria në detyrë i hodhi poshtë kritikat e SHBA-së që çuan në pezullimin e dialogut të planifikuar strategjik, duke thënë se “veprimet tona, të ligjshme dhe kushtetuese, përgjatë gjithë kohës kanë qenë në shërbim të eliminimit të vatrave të destabilitetit me qëllim garantimin e stabilitetit të qëndrueshëm dhe afatgjatë”.

Dialogu strategjik është një proces që Departamenti amerikan i Shtetit në shumicën e rasteve zhvillon me vende të ndryshme të botës me synim avancimin e marrëdhënieve bilaterale.

Ky proces përfshin diskutime të nivelit të lartë mes dy vendeve që zhvillohen ose në Uashington, ose në vendin përkatës, mbi një gamë të gjerë temash si mbrojtja, siguria, mjedisi, energjia, bashkëpunimi ekonomik, etj.

Gjykata Kushtetuese vendosi masë të përkohshme përmes së cilës ua ndaloi deputetëve të zgjedhur të Kuvendit të ndërmarrin veprime deri më 30 shtator, si dhe ua ndaloi zhvillimin e ndonjë procedure për formimin e Qeverisë së re.

Kushtetuesja dhe bashkësia ndërkombëtare e kanë dënuar trysninë e Kurtit dhe partisë së tij ndaj gjykatës më të lartë të vendit. /rel/

The post Ambasada amerikane në Kosovë: Na duhet partner që e kupton nevojën për t’i shmangur veprimet destabilizuese appeared first on Agjencia Telegrafike Shqiptare.

MADRID, 12 shtator /ATSH/ – Spanja ka shprehur zhgënjim për mungesën e fuqisë për të ndaluar “gjenocidin” e Izraelit në Gazë, ndërsa kryeministri spanjoll, Pedro Sanchez tha se mungesa e armëve bërthamore, transportuesve të avionëve dhe rezervave të mëdha të naftës në vend – kufizonte aftësinë e vendit për të ndaluar atë që qeveria e tij e quan një “gjenocid”, sipas “adncronos”.

“Spanja nuk ka bomba bërthamore, transportues aeroplanësh apo rezerva të mëdha nafte. Ne të vetëm nuk mund ta ndalojmë ofensivën izraelite. Por kjo nuk do të thotë që nuk do të përpiqemi, sepse disa kauza ia vlejnë të luftohen, edhe nëse fitorja nuk është tërësisht në duart tona”, tha Sanchez në një konferencë për shtyp ku u njoftuan sanksionet e reja kundër Izraelit.

“Pasi ka kauza për të cilat ia vlen të luftojmë, edhe nëse fitorja e tyre nuk është vetëm në duart tona”, shtoi ai.

Tensionet kanë filluar të rriten midis Spanjës dhe Izraelit.

Kryeministri spanjoll, Pedro Sanchez njoftoi një sërë masash për t’i dhënë fund gjenocidit në Gaza.

Në një deklaratë, kryeministri spanjoll tha se qeveria e tij kishte vendosur të bënte një hap të ri përpara dhe të zbatonte menjëherë nëntë masa shtesë për t’i dhënë fund gjenocidit në Gazë, për të ndjekur penalisht ata që janë përgjegjës dhe për të mbështetur popullsinë palestineze.

Masat përfshijnë një embargo për shitjen e armëve në Izrael dhe një ndalim për anijet që transportojnë karburant të destinuar për IDF-në, që mbërrijnë në portet e vendit.

Për më tepër, Madridi do të ndalojë hyrjen në hapësirën e saj ajrore të të gjithë avionëve nga shtetet që transportojnë materiale mbrojtëse të destinuara për Izraelin.

Masa e katërt përfshin një ndalim për hyrjen në territorin spanjoll të të gjithë personave që marrin pjesë drejtpërdrejt në gjenocid, shkelje të të drejtave të njeriut dhe krime lufte në Gaza.

Qeveria spanjolle gjithashtu do të ndalojë importin e produkteve nga vendbanimet e paligjshme në Gazë dhe Bregun Perëndimor, me qëllim luftimin e këtyre pushtimeve.//a.i/

The post MADRID – Sanchez: Spanja nuk ka bomba bërthamore, por nuk do të ndalet së kundërshtuari “gjenocidin” e Izraelit appeared first on Agjencia Telegrafike Shqiptare.

PRISHTINË, 11 shtator/ATSH/ Kryenegociatori i Kosovës për dialogun me Serbinë, Besnik Bislimi, gjendet në Bruksel, është konfirmuar për Radion Evropa e Lirë nga Qeveria në detyrë e Kosovës.

“Mbi detajet, formatet, takimet dhe temat e diskutimit, do të informoheni në përfundim të tyre”, tha për Radion Evropa e Lirë, Klisman Kadiu, shef i kabinetit të Bislimit.

Serbia, ndërkaq, raportohet se në Bruksel ka dërguar kryenegociatorin e saj, Petar Petkoviq.

Bislimi dhe Petkoviq, nën ndërmjetësimin e emisarit evropian për dialogun, Peter Sorensen, po zhvillojnë takim të përbashkët, pasi paraprakisht kryenegociatorët kanë zhvilluar takime të ndara me ndërmjetësin evropian, raportoi agjencia serbe e lajmeve, Tanjug.

Rundi i ri i dialogut në nivel të kryenegociatorëve vjen pasi ndërmjetësi evropian për dialogun Kosovë-Serbi, Peter Sorensen, qëndroi në Kosovë dhe Serbi në muajin gusht.

Kosova dhe Serbia arritën Marrëveshjen e Ohrit më 2023. Edhe pse marrëveshja nuk është nënshkruar, Bashkimi Evropian këmbëngul se ajo është obligative për të dyja palët.

Marrëveshja prej 11 nenesh, ndër tjerash, parasheh një nivel të vetëmenaxhimit për komunitetin serb në Kosovë, njohje të ndërsjellë të simboleve shtetërore, që Serbia të mos bllokojë anëtarësimin e Kosovës në organizata ndërkombëtare, dhe kërkon nga Prishtina dhe Beogradi që t’i zbatojnë, po ashtu, të gjitha marrëveshjet e mëhershme të arritura gjatë dialogut.

Ndërkaq, presidenti i Serbisë, Aleksandar Vuçiq, deklaroi pas takimit me Sorensenin në Beograd se është thelbësore që dialogu me Kosovën të “kthehet tek obligimi” për formimin e Asociacionit të komunave me shumicë serbe, si dhe te mbrojtja e të drejtave të serbëve.

Ndonëse takime të nivelit të kryenegociatorëve janë mbajtur, në Bruksel nuk është zhvilluar asnjë takim i nivelit të lartë që nga shtatori i vitit 2023. Ai takim, ishte zhvilluar disa ditë para se një grup i serbëve të armatosur të sulmonte Policinë e Kosovës në Banjskë të Zveçanit, duke vrarë një rreshter.

Për këtë ngjarje, Kosova fajëson Serbinë, por Beogradi mohon se ka gisht në të.

Më 10 qershor, pas një takimi mes kryenegociatorëve, Sorensen paralajmëroi se po bëheshin përgatitje për një takim të ri të nivelit të lartë. /rel/

The post Normalizimi i marrëdhënieve, Bislimi dhe Petkoviç në Bruksel appeared first on Agjencia Telegrafike Shqiptare.

TIRANË, 6 shtator /ATSH/ Anëtarja e Këshillit Bashkiak të Durrësit nga Partia e Lirisë, Anisa Ibraj, reagoi sot ndaj atyre që i cilësoi vonesa në sistemimin e familjeve të prekura nga tërmeti i 26 nëntorit 2019.

Sipas saj, një vit pas hedhjes së goglave të shortit për banesat, qindra familje vijojnë të mbeten pa strehë, ndërsa 996 apartamente të ndërtuara në Spitallë me fondet e dhuruara nga Emiratet e Bashkuara Arabe qëndrojnë ende bosh.

“Në Spitallë, 996 apartamente të ndërtuara me fondet e qeverisë së Emirateve të Bashkuara Arabe vazhdojnë të qëndrojnë bosh. Autoritetet lokale dhe qendrore justifikohen prej një viti me instalimin e matësve të OSHEE, ndërsa banorët presin pa asnjë afat e pa asnjë përgjegjësi nga askush”, tha ajo.

Ibraj theksoi se, “Partia e Lirisë denoncon me forcë këtë skandal dhe i kërkon institucioneve shtetërore: të dorëzojnë menjëherë çelësat e apartamenteve në Spitallë për familjet që presin prej vitesh, të rikthejnë menjëherë bonusin e qirasë për ata që ende nuk kanë përfituar strehimin e premtuar dhe të mbajnë përgjegjësi penale e politike për mashtrimet, vonesat dhe vuajtjet e shkaktuara mbi qytetarët”.

/gj.m/j.p/

The post PL: Qindra familje të prekura nga tërmeti në Durrës vijojnë të mbeten pa strehë appeared first on Agjencia Telegrafike Shqiptare.

TIRANË, 25 gusht /ATSH/ Mesfushori shqiptar Kristjan Asllani është prezantuar tek Torino në Itali.

Klubi italian e ka marrë 23-vjeçarin e Kombëtares në huazim nga Interi për një sezon, me të drejtë për blerje përfundimtare në bazë të performancës.

Edhe pse vizitat mjekësore për Asllanin u kryen katër ditë më parë, një vonesë në dokumentacion ka bërë që prezantimi i tij zyrtar të bëhet vetëm sot.

Interi pret sot në Milano pikërisht Torinon, por as Asllani e as mbrojtësi tjetër i Kombëtares, Ardian Ismajli nuk do jenë të gatshëm për torinezët.

Kristjan Asllani u largua tre vitesh nga Interi. Torino ka paguar 1.5 milionë euro te Interi për huazimin një vjeçar, ndërsa pas këtij sezoni ka të drejtë për blerjen e mesfushorit në bazë të performancës për 12.5 milionë euro, për një kontratë finale 3-vjeçare.

/gj.m/j.p/

The post Kristjan Asllani prezantohet te Torino appeared first on Agjencia Telegrafike Shqiptare.

UASHINGTON, 22 gusht /ATSH-DPA/  – Sentimenti i konsumatorëve në SHBA është përkeqësuar papritur në muajin gusht, sipas të dhënave paraprake të publikuara sot nga Universiteti i Miçiganit.

Indeksi i sentimentit të konsumatorëve ra në 58.6 në gusht, nga 61.7 në korrik. Ekonomistët kishin parashikuar një rritje të lehtë në 62.

“Së shumti kjo rënie lidhet me shqetësimet në rritje për inflacionin,” tha drejtoresha e sondazhit të konsumatorëve, Joanne Hsu. “Kushtet e blerjes për mallrat e qëndrueshme ranë me 14%, duke arritur nivelin më të ulët në një vit, për shkak të çmimeve të larta.”

Ajo shtoi se konsumatorët nuk presin më skenarin më të keq për ekonominë si në prill, kur u shpallën dhe më pas u pezulluan tarifat reciproke. Megjithatë, ata ende presin që si inflacioni ashtu edhe papunësia të përkeqësohen në të ardhmen.

Raporti tregoi se indeksi i kushteve aktuale ekonomike ra në 60.9 në gusht nga 68 në korrik, ndërsa indeksi i pritshmërive të konsumatorëve ra lehtë në 57.2 nga 57.7.

Sa i përket inflacionit, pritshmëritë për një vit përpara u rritën në 4.9% në gusht nga 4.5% në korrik, duke reflektuar rritje në grupet demografike dhe për të gjitha përkatësitë politike.

Pritshmëritë për inflacionin afatgjatë gjithashtu u rritën ndjeshëm në 3.9% në gusht nga 3.4% në korrik, pas tre muajve me rënie të njëpasnjëshme. /Ad.Ab./

The post SHBA -Sentimenti i konsumatorëve në SHBA bie në gusht appeared first on Agjencia Telegrafike Shqiptare.

TIRANË, 31 korrik/ATSH/- Sot është afati përfundimtar për të gjitha subjektet tregtare të vendosura pranë akseve kombëtare që të zhvendosen vetë nga hapësira që kanë zaptuar dhe që është kthyer në rrezik për sigurinë rrugore.

Pas këtij afati parashikohen ndëshkime për të gjitha subjektet të cilat kanë refuzuar zbatimin e këtij vendimi për largimin vullnetarisht të çdo lloj materiali që ndodhet më pak se 20 m nga aksi i rrugës.

Zv.kryeministrja, njëherësh ministre e Infrastrukturës dhe Energjisë, Belinda Balluku thekson se siguria rrugore është prioritet. “Subjektet tregtare të lirojnë sipërfaqet pranë akseve kombëtare të cilat janë kthyer në rrezik për sigurinë rrugore”, apelon ajo.

Sipas saj, kjo është një reformë e thellë përsa i përket ligjshmërisë në territorin e Republikës së Shqipërisë. “Është shtrirë kudo duke nisur nga tendat që ndodhen Brenda zonave të banuara të qyteteve apo nga parkingjet që janë bërë në zonën që i përket gjithë banorëve të një pallati dhe duke shkuar deri në pjesët e akseve kombëtare të shtrira nga veriu në jug”, deklaron zv.kryeministrja duke shtuar se e gjithë kjo reformë do të shkojë deri në përfundim të saj duke liruar çdo centimetër hapësirë.

Ajo shton se Qeveria shqiptare është më e angazhuar se kurrë.

“Të gjitha trupat tanë janë në terren. Ne kërkojmë bashkëpunimin e qytetarëve pasi shumë indicie vijnë nga mesazhet e tyre të cilat në shumicën e rasteve rezultojnë që janë të sakta dhe të drejta. Kështu që , ju nxisim që të vazhdoni dhe të denonconi çdo rast shkelje të hapësirave publike apo edhe të sigurisë rrugore”, nënvizon zv.kryeministrja Balluku.

The post Balluku: Sot afati i fundit për subjektet për të liruar sipërfaqet pranë akseve kombëtare appeared first on Agjencia Telegrafike Shqiptare.

TIRANË, 30 korrik /ATSH/ Ministrja e Arsimit dhe Sportit, Ogerta Manastirliu zhvilloi sot një diskutim në EduLab, me rektorin e Universitetit “Aleksandër Moisiu” në Durrës, prof. dr. Shkëlqim Fortuzi dhe tri studente të ciklit master.

Ministrja Manastirliu tha se Universiteti “Aleksandër Moisiu” i Durrësit po kthehet në një pikë referimi për arsimin e lartë, duke u fokusuar në përgatitjen e të rinjve për tregun e punës dhe në ndërtimin e urave të qëndrueshme të bashkëpunimit mes studentëve dhe sipërmarrjes”.

Manastirliu u ndal edhe te një prej programeve të hapura në bashkëpunim me Universitetin “La Sapienza” të Romës, ndërsa foli edhe për risitë që sjell ky vit akademik me hapjen e programeve të reja bachelor dhe master në fushat e biznesit, turizmit dhe teknologjisë digjitale, në bashkëpunim me universitete prestigjioze evropiane.

“Universiteti “Aleksandër Moisiu” është një universitet ku studentët kanë ardhur në rritje, ndërsa interesi është shtuar. Edhe ju jeni adaptuar duke riorganizuar me programet e reja falë një bashkëpunimi me Universitetin “La Sapienza” në Romë”, u shpreh Manastirliu.

Gjithashtu, rektori i këtij universiteti, prof. dr. Shkëlqim Fortuzi tha se institucioni arsimor që ai drejton është fokusuar që studentët t’i afrojë sa më shumë me tregun e punës.

“Një mundësi e shkëlqyer për studentët, jo vetëm që një pjesë të studimeve të tyre të ciklit master ta zhvillojnë në “La Sapienza”, por çdo ditë e më shumë ne kemi programe të përbashkëta studimi me universitete evropiane. Po punojmë fort që të nxisim mobilitetet nëpërmjet programeve Erasmus+, për të motivuar stafin akademik, kërkuesit shkencorë, studentët tanë për të qenë pjesë e programeve Horizont Evropa”, vijoi Manastirliu.

Tri studentet e ciklit master pranë këtij universiteti, ndanë gjithashtu vlerësimet e tyre duke e konsideruar një risi qasjen e diplomave të dyfishta në Universitetin “Aleksandër Moisiu”, ndërsa thanë se një pjesë të studimeve të tyre i kanë zhvilluar në “La Sapienza” në Romë.

/e.i/r.e/

The post Manastirliu: Universiteti “Aleksandër Moisiu” Durrës, pikë referimi për arsimin e lartë appeared first on Agjencia Telegrafike Shqiptare.

EDINBURG, 28 korrik /ATSH-DPA/- Presidenti i SHBA-së Donald Trump ka lënë të kuptohet se afati i ri për presidentin rus, Vladimir Putin që të ulet në tryezën e negociatave për të miratuar armëpushimin në Ukrainë do të jetë midis 10 dhe 12 ditëve.

Presidenti i SHBA-së njoftoi më herët gjatë një takimi me kryeministrin britanik, Keir Starmer në Skoci – se do të shkurtonte afatin 50-ditor për Rusinë – për të rënë dakord për një armëpushim me Ukrainën.

I pyetur nga gazetarët se sa kohë do të caktohej afati i ri, Trump tha: “Do të vendos një afat të ri prej rreth 10 ose 12 ditësh nga sot”.

“Nuk ka arsye për të pritur”, theksoi ai.

Përpjekjet për të siguruar një armëpushim në Ukrainë pritet të jenë në fokus të takimit Trump-Starmer , duke përfshirë situatën në Gazë dhe progresin në zbatimin e marrëveshjes tregtare BM-SHBA. //a.i/

The post SKOCI – Trump: Putin ka afat deri në 12 ditë për të negociuar armëpushimin në Ukrainë appeared first on Agjencia Telegrafike Shqiptare.

NOTINGHEM, 23 korrik /ATSH/ – Përveç higjienës, mjekësisë, arsimit, verës, rendit publik, ujitjes, rrugëve, sistemit të ujit të pijshëm dhe shëndetit publik, romakët prodhuan gjithashtu një numër të madh mbishkrimesh, shkruhet sot në gazetën “The Guardian”, duke ju refeuar një botimi në revisten “Nature”.

Të kuptuarit e këtyre teksteve të lashta është një sfidë për studiuesit, por një mjet i ri i inteligjencës artificiale nga “Google DeepMind” synon ta lehtësojë këtë proces.

I quajtur “Aeneas”, sipas heroit mitik trojan,  programi parashikon se ku dhe kur janë bërë mbishkrimet dhe jep sugjerime për fjalët që mungojnë.

Historianët që e testuan thanë se ky mjet u transformoi punën, duke i ndihmuar të identifikonin mbishkrime të ngjashme me ato që po studionin,  një hap kyç për vendosjen e tyre në kontekst ,  dhe duke sugjeruar fjalë për të plotësuar boshllëqet në artefaktet e dëmtuara nga koha.

“Aeneas ndihmon historianët të interpretojnë, atribuojnë dhe rikonstruktojnë tekstet e fragmentuara latine”, tha dr. Thea Sommerschield nga Universiteti i Nottingham. “Ky ishte qëllimi madhor që vendosëm të realizonim”.

Mbishkrimet janë ndër burimet më të rëndësishme për jetën në botën antike, që nga dekretet e perandorëve, grafitet politike, poezitë e dashurisë, regjistrat tregtarë dhe deri te epitafet në varre. Studiuesit vlerësojnë se çdo vit zbulohen rreth 1 500 mbishkrime të reja.

“Sipas tyre, janë vetë njerëzit e lashtë që flasin,nga të gjitha shtresat shoqërore”, tha Sommerschield. “Nuk është vetëm historia e shkruar nga fitimtarët”.

“Por problemi qëndron në faktin se këto tekste janë shpesh të copëzuara ose aq të dëmtuara nga koha sa që pjesë të tyre janë të palexueshme. Shumë objekte me mbishkrime janë shpërndarë ndër vite dhe origjina e tyre është e pasigurt”, shtoi ai

Ekipi i Google, i udhëhequr nga Yannis Assael, bashkëpunoi me historianë për të krijuar një mjet të Inteligjencës artificiale që ndihmon në kërkime. Programi u trajnua me një bazë të dhënash prej afro 200 000 mbishkrimesh të njohura, me gjithsej 16 milionë karaktere.

“Aeneas” merr tekstin, dhe në disa raste imazhet,  nga mbishkrimi që po studiohet dhe e krahason me mbishkrimet ekzistuese nga shekulli i 7 p.e.s. deri në shekullin e 8-të e.s. Inteligjenca Artificiale nuk kërkon vetëm fjalë të ngjashme, por lidh mbishkrime përmes lidhjeve historike më të thella.

Duke u bazuar në trajnimin me këtë koleksion të pasur, “Aeneas” mund të caktojë një tekst studimi në një nga 62 provincat romake dhe të parashikojë kohën kur është shkruar me një saktësi brenda 13 vitesh. Gjithashtu sugjeron fjalë për të plotësuar boshllëqet, megjithëse kjo veçori është testuar vetëm me tekste të njohura ku disa fjalë janë fshehur qëllimisht.

Në një test, “Aeneas” analizoi mbishkrimin madhështor Res Gestae Divi Augusti të gdhendur në monumente të ndryshme të Perandorisë Romake, që përshkruan arritjet e perandorit August. Inteligjenca artificiale sugjeroi dy periudha të mundshme për tekstin,  dekada e parë para erës sonë ose periudha 10-20 e.s, pikërisht si debatet mes historianëve.

Në një rast tjetër, “Aeneas” analizoi mbishkrimet mbi një altar votiv në Mogontiacum (Mainz, Gjermani) dhe zbuloi përmes ngjashmërive të hollësishme gjuhësore se ai ishte ndikuar nga një altar më i vjetër në të njëjtin rajon. “Ishin momente mahnitëse për ne,” tha Sommerschield.

Detajet janë botuar në revistën “Nature”, dhe “Aeneas” është tashmë i disponueshëm  online për studiuesit.

Në një bashkëpunim, 23 historianë përdorën “Aeneas” për të analizuar mbishkrime latine dhe në 90% të rasteve, konteksti i ofruar nga inteligenca artificiale u konsiderua i dobishëm.

“Ky mjet ka potencial të jetë transformues”, tha Mary Beard, profesore e klasikes në Universitetin e Kembrixhit.

Profesor Jonathan Prag nga Universiteti i Oksfordit shtoi se Aeneas mund të përdoret për të rianalizuar mbishkrimet ekzistuese për të përmirësuar interpretimin. “Më parë, kjo kërkonte një njohuri të jashtëzakonshme personale ose një bibliotekë gjigante,” tha ai. “Por sigurisht, duhet ta përdorësh atë në mënyrë kritike”. /Ad.Ab./

The post “NATURE” – Google nxjerr një mjet të IA-së që plotëson fjalët e munguara në mbishkrimet romake appeared first on Agjencia Telegrafike Shqiptare.