Sekretari i Mbrojtjes i Shteteve të Bashkuara, Pete Hegseth, tha të enjten se ushtria amerikane do të jetë e përgatitur për të zbatuar çfarëdo që vendos presidenti Donald Trump rreth Iranit për t’u siguruar që Teherani të mos e arrijë aftësinë për të prodhuar armë bërthamore.
“Ata nuk duhet t’i ndjekin kapacitetet bërthamore. Ne do të jemi të përgatitur për të zbatuar çfarëdo që presidenti pret nga Departamenti i Luftës” – tha sekretari Hegseth, duke iu referuar Departamentit të Mbrojtjes me emrin e ri por jozyrtar, që i është vënë nga administrata e Trumpit, raporton agjencia e lajmeve “Reuters”.
Zyrtarët amerikanë thonë se presidenti është duke i shqyrtuar opsionet, por ende nuk ka marrë vendim për ta sulmuar Iranin.
Tensionet mes Uashingtonit e Teheranit u rritën pas shtypjes së përgjakshme të protestave në mbarë Iranin nga autoritetet e këtij vendi në javët e fundit.
Trumpi në mënyrë të përsëritur ka kërcënuar me ndërhyrje, nëse Irani do të vazhdonte që të vriste protestues, por protestat gjithëkombëtare për vështirësitë ekonomike dhe shtypjen politike tashmë janë dobësuar.
Kreu i Shtëpisë së Bardhë ka thënë se vendi i tij do të veprojë, nëse Irani e vazhdon programin bërthamor pas sulmeve ajrore të qershorit nga forcat izraelite e amerikane ndaj qendrave kyçe bërthamore.
Qendra Kombëtare për Menaxhim Kufitar, ka njofutar se është normalizuar qarkullimi i kamionëve në hyrje-dalje të Kosovës dhe Maqedonisë së Veriut.
“Ju njoftojmë se prej orës 20:00 është normalizuar qarkullimi i kamionëve si në hyrje dhe dalje në Republikën e Maqedonisë së Veriut”, thuhet në njoftim.
Pikat kufitare ishin bllokuar për shkak të futjes së sistemit të ri të hapjes dhe daljes (EES) të Bashkimit Evropian ndaj shoferëve të kamionëve të gjashtë shteteve të Balkanit Perëndimor, këta të fundit kanë shfaqur pakënaqësi.
Policia serbe ka realizuar konfiskimin më të madh të drogës në historinë e vendit, duke zbuluar pesë tonë marihuanë dhe katër armë automatike në fshatin Konjuh, afër Krushevcit.
Droga ishte ruajtur në një sasi të madhe kutish, ndërsa armët përfshijnë një pushkë automatike të modifikuar AK dhe dy pushkë “Kalashnikov” Zastava AB2.
Ky operacion ka pasur rëndësi të madhe për luftën kundër krimit të organizuar në Serbi.
Dy ekspertë të Agjencisë së Kosovës për Forenzikë, Fejsal Lutfiu dhe Lutfi Raci, kanë kaluar me sukses testin ndërkombëtar “Firearms Examination 2025-5262”.
Suksesi i tyre konfirmon nivelin e lartë profesional dhe përputhshmërinë me standardet ndërkombëtare në ekzaminimin e armëve të zjarrit.
Ky rezultat thekson angazhimin e Agjencisë për zhvillimin e kapaciteteve profesionale dhe forcimin e besueshmërisë ndërkombëtare.
Keqpërdorimet me vota në pothuajse secilën komunë të Kosovës kanë rezultuar me aksione policore dhe dhjetëra persona të arrestuar, ndërsa hetimet lidhur me këto raste po vazhdojnë ende.
Në të njëjtën kohë, procesi i rinumërimit të votave ka kaluar shifrën e 92 për qindshit në nivel vendi, duke bërë që një numri të madh kandidatësh t’u hiqen apo t’u shtohen vota.
Por, kush janë ‘kampionët’ nga tri partitë më të mëdha (LVV, PDK, LDK) për minus vota?
Nga Lëvizja Vetëvendosje, kandidati që aktualisht kryeson listën me më së shumti vota të humbura është Taulant Kelmendi, ish-kandidat për kryetar të Pejës.
Sipas përditësimit të fundit të Komisionit Qendror të Zgjedhjeve (KQZ), ai ka humbur 925 vota.
Në Partinë Demokratike të Kosovës (PDK), rekordin e votave minus e mban Ferat Paçarizi, të cilit i janë hequr plot 6.754 vota.
Ndërkaq, në Lidhjen Demokratike të Kosovës (LDK), kandidati me më së shumti vota të humbura është Xhavit Uka, me gjithsej 1.637 vota minus.
Marina e Shteteve të Bashkuara ka dërguar një luftanije shtesë në Lindjen e Mesme, ka bërë të ditur një zyrtar amerikan për agjencinë Reuters të enjten, në mes të rritjes së tensioneve mes SHBA-së dhe Iranit.
Zyrtari, i cili ka folur në kushte anonimiteti, ka deklaruar se luftanija USS Delbert D. Black është futur në rajon gjatë 48 orëve të fundit. Me këtë zhvillim, numri i anijeve luftarake amerikane në Lindjen e Mesme ka shkuar në gjashtë, ndërsa në rajon ndodhen edhe një aeroplanmbajtëse dhe tri anije të tjera më të vogla luftarake.
Vendosja e anijeve luftarake amerikane nga rajoni i Azi-Paqësorit ka nisur në fillim të këtij muaji, në kohën kur tensionet mes Iranit dhe Shteteve të Bashkuara u përshkallëzuan pas shtypjes së protestave në mbarë Iranin.
Presidenti amerikan Donald Trump ka deklaruar të enjten e kaluar se Shtetet e Bashkuara kishin një “armadë” që po shkonte drejt Iranit, por ka shtuar se shpresonte që ajo të mos duhej të përdorej.
Trump ka kërcënuar vazhdimisht me ndërhyrje nëse Irani do të vazhdonte vrasjet e protestuesve, megjithatë protestat në të gjithë vendin janë zbutur që nga ajo kohë.
Bullgaria ka dërguar një kontingjent të ri ushtarak në Komandën Rajonale të KFOR-it-Perëndim në Kosovë. Formacioni prej 97 ushtarësh, i komanduar nga Kapiteni Georgi Valkanov, do të shërbejë për një periudhë gjashtëmujore.
Ceremonia u zhvillua në Pleven dhe u shënua me një bekim fetar dhe fjalë inkurajuese nga autoritetet bullgare.
Kontingjenti do të vendoset në Kampin Villaggio Italia, pranë Pejës, dhe do të kryejë detyra të ndryshme në mbështetje të misionit paqeruajtës të NATO-s.
Administrata e presidentit Donald Trump të ShBA-së do të presë zyrtarë të lartë të mbrojtjes dhe të inteligjencës nga Arabia Saudite dhe Izraeli për bisedime veç e veç rreth Iranit këtë javë në Uashington, kur kreu i Shtëpisë së Bardhë po i shqyrton sulmet ushtarake, sipas dy personave të afërt me çështjen.
Shefi i inteligjencës ushtarake të Izraelit, Gjeneral Shlomi Binder, zhvilloi bisedime rreth Iranit me zyrtarë të lartë të Pentagonit, CIA-s dhe Shtëpisë së Bardhë të martën dhe të mërkurën, tha një burim i afërt me çështjen. Mediumi amerikan, “Axios”, raportoi se ai ndau të dhëna të inteligjencës rreth caqeve të mundshme iraniane, raporton agjencia e lajmeve “Reuters”.
Ministri i Mbrojtjes i Arabisë Saudite, Khalid bin Salman, ishte gjithashtu në Uashington për takime me zyrtarë amerikanë ku në fokus ishte Irani, sipas një burimi tjetër, i afërt me diskutimet. Sauditët dhe vendet e tjera të Gjirit Persik janë përpjekur që ta depërshkallëzojnë situatën dhe të parandalojnë një luftë më të gjerë.
Princi saudit, Mohammed bin Salman, i ka thënë presidentit iranian, Masoud Pezeshkian, se Riadi nuk do të lejojë që hapësira ajrore ose territori saudit të përdoret për veprime ushtarake kundër Teheranit, raportoi këtë javë agjencia shtetërore e lajmeve, SPA.
Shtëpia e Bardhë nuk iu përgjigj menjëherë një kërkese për koment.
Njëri nga burimet dhe një zyrtar amerikan thanë se Trumpi ende nuk ka marrë një vendim përfundimtar për veprimet e mëtejshme, përfshirë atë nëse do ta zgjedhë opsionin ushtarak apo jo.
Autoritetet turke kanë arrestuar gjashtë persona, duke përfshirë një shtetas iranian, për akuza spiunazhi ushtarak dhe politik për Iranin.
Ata akuzohen për mbledhjen e informacionit mbi bazat ushtarake dhe përfshirjen në aktivitete spiunazhi për Iranin, duke përfshirë monitorimin e bazës ajrore të NATO-s në Turqi.
Banori i shtëpisë më të famshme në vend, Limi, duket se ka marrë një vendim të prerë në raportin e tij me Albën.
Pas gjithë situatave të tensionuara dhe zhvillimeve të fundit mes tyre, ai ka lënë të kuptohet se kjo marrëdhënie po shkon drejt një fundi përfundimtar.
Gjatë një bisede brenda shtëpisë, Limi u shpreh hapur se ndaj Albës do të vendosë “bllok përgjithmonë”, një deklaratë që ka ngjallur menjëherë reagime të shumta, si te banorët e tjerë, ashtu edhe te publiku jashtë shtëpisë.
Ky qëndrim i fortë i Limit vjen pas një periudhe të gjatë përplasjesh, keqkuptimesh dhe emocionesh të forta mes dyshes, të cilat kanë qenë shpesh në qendër të vëmendjes gjatë këtij edicioni.
Megjithatë, mbetet për t’u parë nëse ky vendim do të jetë i pakthyeshëm apo nëse situata mes tyre mund të marrë një tjetër rrjedhë në ditët në vijim.
Mbi 18 mijë persona janë paraqitur gjatë një jave në dyert e mjekëve të familjes dhe urgjencave spitalore në të gjithë vendin, si pasojë e gripit dhe virozave stinore.
Specialistët e Institutit të Shëndetit Publik (ISHP) konfirmojnë se gripi ka arritur tashmë pikun e tij.
Shumica e pacientëve po trajtohen në banesë, ndërsa një pjesë kanë pasur nevojë për shtrim në spital.
Laboratori i Virologjisë në ISHP ka identifikuar deri më tani disa viruse gripale qarkulluese.
Sipas parashikimeve, kurba e infektimeve me grip pritet të vijojë në rritje edhe në javët në vijim.
Ekspertët apelojnë për kujdes të shtuar, veçanërisht për fëmijët, të moshuarit, personat me sëmundje kronike dhe gratë shtatzëna.
Ata rekomandojnë vaksinimin si një nga mënyrat më efektive për të parandaluar format e rënda të gripit dhe rastet fatale./Euronews Albania
Fut ka shënuar fitore të rëndësishme në kuadër të “IEM Krakow” që po zhvillohet në Poloni, për ta eliminuar skuadrën braziliane Legacy.
Fut edhe pse s’ishte favorit, fitoi me rezultat 0-2 në mape, ku dominoi plotësisht nga fillimi.
Fillimisht në “de_dust2”, Fut fitoi me rezultat 13-7, sfidë ku dominuan si “t-site”, pasi morën plot shtatë raunde, ku Legacy arriti vetëm një sosh meqenëse “pjesa e parë” kishte përfunduar me rezutlat 6-6.
Dymtro “dem0n” Myrosnychenko ishte i pandalshëm me plot 22 eliminime.
Ndërkohë, në “de_ancient”, Fut shënoi një përmbysje pasi humbën pjesën e parë me rezultat 8-4, por në fund triumfuan 10-13. Pas “dem0n” me 23 eliminime, shqiptari Aulon “krabeni” Fazlija e ndihmoi me 22 sosh.
Kësisoj, Fut shënon një fitore të madhe drejt fazës tjetër ndërsa të premten i duhet të mposhtë humbësin e përballjes Liquid – G2 për t’u kualifikuar tutje./Telegrafi
Një shpërthim i fuqishëm ka ndodhur në një rafineri në Turqi.
Sipas mediave, deri më tani nuk ka raportime për të lënduar, ndërsa personeli është evakuuar në mënyrë të sigurt.
Ende nuk është sqaruar se në cilën pjesë të rafinerisë ndodhi shpërthimi. Të gjithë punonjësit brenda ambienteve u evakuuan menjëherë sipas procedurave të sigurisë, ndërsa banorët e zonave përreth u njoftuan për rrezikun e mundshëm dhe u këshilluan të qëndrojnë larg.
Forcat e sigurisë kanë izoluar zonën, duke ndaluar qarkullimin e qytetarëve dhe automjeteve, ndërsa ambulancat qëndrojnë në gatishmëri. Operacionet e shuarjes po vazhdojnë, dhe ekipet pritet të qëndrojnë në vendngjarje gjatë gjithë natës.
Shkaqet e zjarrit mbeten të panjohura, ndërsa një hetim teknik i detajuar pritet të nisë së shpejti. Nuk ka njoftime zyrtare mbi viktimat, dhe vlerësimet fillestare tregojnë se nuk ka persona të lënduar.
Drejtuesit e kompanisë dhe autoritetet lokale pritet të japin përditësime gjatë orëve në vijim.
Banorët e zonës shprehin shqetësim për mundësinë e rrjedhjeve të gazit dhe shpërthimeve të tjera, por autoritetet sigurojnë se janë marrë të gjitha masat për sigurinë publike dhe se situata po monitorohet nga afër. /Telegrafi/
Gazeta britanike “The Telegraph” i ka kushtuar një artikull të gjatë bizneseve që Ivanka Trump dhe bashkëshorti i saj Jared Kushner po përpiqen të vënë në vijë në Mesdhe, duke u shfaqur gjithnjë e më shumë si figura kyçe të biznesit global, duke ndjekur nga afër filozofinë e famshme të Donald Trump për “artin e marrëveshjes”. Ndërsa presidenti amerikan u tërhoq nga përpjekja për të aneksuar Groenlandën, vajza e tij po bënte një lëvizje të madhe në Mesdhe: sigurimin e një marrëveshjeje për zhvillimin e ishullit të Sazanit në Shqipëri.
Ivanka Trump, 44 vjeç, dhe Jared Kushner, përmes kompanisë së tyre investuese Atlantic Incubation Partners LLC, kanë arritur një marrëveshje me qeverinë shqiptare për ta kthyer Sazanin, një ishull i pabanuar dhe ish-bazë ushtarake shkruan “The Telegraph”, në një resort luksoz turistik. Vlera e investimit përllogaritet rreth 1 miliard paund (1.4 miliardë dollarë), duke e shndërruar projektin në një nga investimet më të mëdha të huaja në Shqipëri.
Atlantic Incubation Partners lidhet me Affinity Partners, fond privat investimesh i themeluar nga Kushner pas largimit të Donald Trump nga Shtëpia e Bardhë në vitin 2020, fond i cili ka tërhequr miliarda dollarë, përfshirë edhe fonde nga Arabia Saudite. Sipas Forbes, pasuria e përbashkët e çiftit Trump-Kushner vlerësohet rreth 1.1 miliardë dollarë, duke i renditur ata si anëtarët e dytë më të pasur të familjes Trump, pas vetë presidentit.
Ivanka Trump vizitoi Shqipërinë për disa ditë, e shoqëruar nga kryeministri Edi Rama, i cili e ka përqafuar hapur vizionin e investimit luksoz. Rama e ka cilësuar këtë projekt si një mundësi strategjike për zhvillimin e turizmit elitar, duke deklaruar se “Shqipëria ka nevojë për super-luksozin ashtu si shkretëtira ka nevojë për ujë”.
Komiteti Shqiptar i Investimeve Strategjike i dha dritën jeshile projektit më 30 dhjetor 2024, pak javë pas fitores së Donald Trump në zgjedhjet presidenciale. Plani parashikon ndërtimin e një hoteli luksoz, vilave private dhe infrastrukturës së nevojshme në një ishull që aktualisht nuk ka burime uji të pijshëm. Projekti pritet të hapë rreth 1000 vende pune.
Megjithatë, marrëveshja ka ngjallur polemika, shkruan “The Telegraph”, përcjell A2. Deputetë të opozitës kanë ngritur shqetësime për mungesë transparence dhe tenderim të hapur, ndërsa organizatat mjedisore kanë reaguar ashpër, duke theksuar se Sazani dhe zona e Zvërnecit kanë status të mbrojtur për shkak të vlerave të tyre ekologjike. Dhjetëra grupe i kanë kërkuar qeverisë shqiptare pezullimin e projektit.
Në të njëjtën kohë, aktivitetet e Kushnerit shtrihen edhe në Serbi dhe Lindjen e Mesme, duke ngritur pyetje në Uashington për konflikte të mundshme interesi, për shkak të rolit të tij jozyrtar si këshilltar i Donald Trump.
Pavarësisht kritikave, Ivanka Trump u shpreh entuziaste për vizitën e saj, duke e quajtur Shqipërinë “magjike”. Me Donald Trump në Shtëpinë e Bardhë dhe me ndikimin e tyre në rritje, duket se Ivanka Trump dhe Jared Kushner do të vazhdojnë të luajnë një rol të rëndësishëm në ndërthurjen e politikës, biznesit dhe diplomacisë globale. (A2 CNN)
Presidentja e Kosovës, Vjosa Osmani, ka deklaruar se marrëveshja e nënshkruar në Davos për anëtarësimin e Kosovës në “Bordin e Paqes” do të procedohet për ratifikim në Kuvendin e Kosovës, menjëherë pas konstituimit të tij, duke theksuar se asnjë obligim nuk do të merret pa miratimin e Kuvendit dhe se nuk është kërkuar asnjë kontribut financiar i detyrueshëm nga Kosova.
Në “Përballje Podcast” me kryeredaktorin e Telegrafit, Muhamet Hajrullau, Osmani tha se rreshtimi i Kosovës me Shtetet e Bashkuara të Amerikës është i padiskutueshëm.
Presidentja theksoi se Kosova nuk ka asnjë hezitim politik ndaj kësaj nisme, duke kujtuar rolin vendimtar të SHBA-ve në lirinë dhe shtet-ndërtimin e Kosovës.
Presidentja deklaroi se procedura për ratifikimin e marrëveshjes do të nisë sapo Kuvendi të konstituohet dhe se synohet një unifikim i plotë politik rreth kësaj iniciative.
“Natyrisht, unë kam vendosur që në momentin që konstituohet Kuvendi, sepse fatkeqësisht akoma s'e kemi, por me shpresën që sa më parë do ta kemi si institucion funksional menjëherë do ta procedojë këtë marrëveshje për ratifikim në Kuvend, se besoj që duhet të ketë legjitimitet sa më të plotë dhe një lloj unifikim që as nuk dyshoj se do ta kemi total të skenës politike në Republikën e Kosovës rreth kësaj iniciative”, deklaroi Osmani shkruan Telegrafi.
Ajo paralajmëroi krijimin e një platforme nacionale gjithëpërfshirëse për të përcaktuar kontributin e Kosovës në këtë organizatë.
“Planifikoj që menjëherë pas ratifikimit ta krijojmë një platformë nacionale ku secili do të bashkohet rreth saj për të determinuar çdo lloj kontributi që Kosova mund ta japë… planifikojmë që t'i ftojmë shoqërinë civile, pastaj edhe mediat edhe shumë organizata të tjera të cilat kanë ndërtuar një përvojë më shumë se njëzet e gjashtë vjeçare në ndërtim të paqes”, u shpreh presidentja në “Përballje Podcast”.
Osmani theksoi se Kosova ka përvojë unike për të kontribuuar në proceset e paqes dhe ndërtimit të institucioneve pas konfliktit.
“Kosova vërtet ka si të kontribuojë me përvojën e saj, me kontributin e saj, me rreshtimin e saj politik me energjinë e saj do të thoja që rrallëherë mund ta gjeni te shumë shtete të tjera”, u shpreh ajo.
Sa i përket obligimeve financiare, Presidentja Osmani tha se nuk ka kërkesë për kontribute të detyrueshme.
“Po e përsëris, nuk është kërkuar kontribut financiar nga Republika e Kosovës. Karta e Bordit të Paqes potencon që kontributet financiare janë vullnetare, pra varet vullnetarisht nga shtetet se a dëshirojnë të kontribuojnë dhe sa dëshirojnë të kontribuojnë”, tha Osmani.
Osmani shtoi se Kosova tashmë ka dhënë kontribut humanitar për Gazën dhe se mundësitë për ndihmë nuk kufizohen vetëm në aspektin financiar.
“Republika e Kosovës nëpërmjet donacionit të Qeverisë së Republikës ka ndarë mbështetje humanitare për popullatën në Gaza, por ka edhe shumë mundësi të tjera, nëpërmjet ekspertizës që e kemi ndërtuar, që ne të ndihmojmë”, deklaroi presidentja.
Në fund, Osmani tha se anëtarësimi në këtë organizatë i jep Kosovës zë të barabartë në diskutimet për çështje globale dhe gjeopolitike.
“Në një organizatë ndërkombëtare, ku do të flitet për shumë konflikte globale, ku do të flitet për shumë tema të rëndësishme gjeopolitike, Kosova do ta ketë zërin e saj të barabartë dhe kjo ka shumë rëndësi”, tha ajo.
Ajo e quajti këtë përzgjedhje si një mundësi historike për Kosovën që duhet shfrytëzuar me mençuri.
“Fakti që Shtetet e Bashkuara të Amerikës ia kanë bërë Kosovës këtë nder të jashtëzakonshëm… atëherë kjo është një mundësi që ne duhet ta shfrytëzojmë në mënyrën më të mençur të mundshme për interesat tona, për interes të paqes, por edhe duke dhënë kontribut për aq sa kemi kapacitet dhe kemi mundësi”, u shpreh Osmani. /Telegrafi/
Ferizaj ka bërë të ditur sot përforcimin e radhës në repartin ofensiv, duke zyrtarizuar huazimin e sulmuesit portugez Ruben Silva-Richards nga Estoril, një nga skuadrat elitare të Superligës së Portugalisë.
Ky lëvizje tregon qartë ambicien e klubit për të ngritur nivelin e skuadrës dhe për të synuar objektiva të mëdha në këtë edicion.
Sulmuesi 23-vjeçar, i cili vjen me reputacion të mirë dhe potencial të lartë, është përshkruar si një lojtar me cilësi teknike të spikatur dhe mentalitet fitues, karakteristika që pritet të jenë shtysë e madhe për repartin ofensiv të Ferizajt.
Njoftimi i plotë i Ferizajt:
Klubi ynë zyrtarizon huazimin e sulmuesit portugez Ruben Silva-Richards nga Estoril, skuadër elitare e Superligës së Portugalisë.
Një përforcim në repartin ofensiv dhe një sinjal i qartë i ambicieve tona në këtë edicion. Cilësi dhe mentalitet fitues vijnë për t’u vënë në shërbim të fanellës sonë.
Ruben Silva-Richards tashmë i është bashkuar skuadrës në fazën përgatitore në Antalya, ku ka nisur menjëherë punën me stafin teknik.
Mirë se vjen, Ruben Silva-Richards! Gati për sfida të mëdha!
Një zyrtar amerikan i tha Reuters të enjten se Marina Amerikane ka dërguar një anije luftarake shtesë në Lindjen e Mesme.
Dhe ky hap vjen mes një grumbullimi të madh ushtarak në rajon dhe tensioneve në rritje me Iranin.
Zyrtari, i cili foli në kushte anonimiteti, tha se USS Delbert D. Black kishte hyrë në rajon në 48 orët e fundit.
Kjo e çon numrin e shkatërruesve në Lindjen e Mesme në gjashtë, së bashku me një aeroplanmbajtëse dhe tre anije të tjera luftarake bregdetare, shkruajnë mediat e huaja, përcjell Telegrafi.
Anija luftarake shtesë në rajon u raportua për herë të parë nga CBS News.
Tensionet midis Iranit dhe Shteteve të Bashkuara janë rritur ndjeshëm pas shtypjes së dhunshme nga Teherani të protestave antiqeveritare në fillim të këtij muaji, të cilat grupet e të drejtave të njeriut thonë se lanë mijëra të vdekur.
Presidenti i SHBA-së, Donald Trump ka kërcënuar të ndërhyjë për të mbështetur protestuesit dhe ka paralajmëruar se koha po mbaron për një marrëveshje bërthamore me Iranin, duke thënë se një dështim për të arritur një marrëveshje do të shkaktonte një sulm të madh të SHBA-së.
Në anën tjetër, Irani të enjten u zotua për një "përgjigje shkatërruese" ndaj çdo sulmi.
Ndërkohë, presidenti i SHBA-së Donald Trump paralajmëroi të mërkurën se një “armadë masive” po shkon drejt Iranit dhe se “sulmi i ardhshëm” i Uashingtonit do të ishte “shumë më i keq” sesa bombardimi i Amerikës ndaj objekteve bërthamore dhe ushtarake të Iranit qershorin e kaluar.
“Ashtu si me Venezuelën”, SHBA-të “janë të gatshme dhe të afta të përmbushin me shpejtësi misionin e tyre, me shpejtësi dhe dhunë, nëse është e nevojshme”, shkroi Trump në platformën e tij Truth Social.
CNN raportoi gjithashtu herët të enjten në mëngjes se Trump po shqyrton “një sulm të ri të madh” ndaj udhëheqësve, institucioneve qeveritare dhe centraleve bërthamore të Iranit.
Raporti, i cili citoi zyrtarë të paidentifikuar, tha se Trump nuk kishte marrë ende një vendim përfundimtar nëse do të niste një sulm. /Telegrafi/
Me një ceremoni solemne të enjten në qytetin e Plevenit, Bullgaria dërgoi një kontingjent të ri ushtarak në Komandën Rajonale të KFOR-it-Perëndim (RC-Ë) në Kosovë.
Formacioni, i komanduar nga Kapiteni Georgi Valkanov, përbëhet nga 97 pjesëtarë të forcave të armatosura bullgare.
Në ceremoninë e zhvilluar morën pjesë zëvendësministri i Mbrojtjes Radoslav Iliev, zëvendësshefi i Mbrojtjes gjeneral-lejtënant Krasimir Kanev, komandanti i Forcave Tokësore gjeneralmajor Deyan Deshkov, zëvendëskomandanti i Komandës së Forcave të Përbashkëta kundëradmirali Galin Manev, si dhe përfaqësues të autoriteteve lokale dhe shtetërore.
Në fillim të ceremonisë, Kanev shqyrtoi trupat, ndërsa Ati Krasimir Krastev nga Kisha e Trinisë së Shenjtë në Pleven kryesoi një bekim për shëndet dhe sukses në mision.
“Shërbimi i paqes është shërbim i Zotit”, tha prifti gjatë fjalës së tij.
Në fjalën e tij, zëvendësministri Iliev theksoi rëndësinë e misionit: “Pjesëmarrja në operacionin e NATO-s në Kosovë është një detyrë shumë e përgjegjshme me rëndësi për sigurinë dhe paqen në rajonin e Ballkanit Perëndimor. Misioni juaj është të siguroni, garantoni dhe demonstroni aftësitë e Aleancës për të ruajtur sigurinë dhe rendin në rajon”.
Gjeneral-lejtënant Kanev shtoi se përvoja e fituar në misione ndërkombëtare do të jetë e vlefshme jo vetëm për detyrat në Kosovë, por edhe për karrierën e pjesëtarëve të kontingjentit.
“Në kontekstin e ndryshimeve gjithnjë e më dinamike në peizazhin politik dhe ekonomik global, përvoja në ruajtjen e paqes dhe stabilitetit bëhet gjithnjë e më e rëndësishme”, theksoi ai.
Ceremonia përfundoi me një marshim solemn të kontingjentit përmes Sheshit Vazrazhdane. Kontingjenti do të vendoset në Kampin Villaggio Italia, pranë Pejës, në pjesën perëndimore të Kosovës.
Gjatë gjashtë muajve të ardhshëm, personeli ushtarak bullgar do të kryejë detyrat e tij si pjesë e elementit të mbështetjes kombëtare, duke përfshirë pozicione në selinë e Komandës Rajonale të KFOR-it-Perëndim dhe si kompani manovrimi me seksion logjistik dhe njësi mjekësore brenda batalionit shumëkombësh të misionit paqeruajtës të NATO-s.
Ministri i Punëve të Brendshme, Pançe Toshkovski tha sot se nuk do të lejoj kurrë që siguria të rrezikohet në asnjë qytet në Maqedoni me emërime, shkarkime, largime ose ndonjë riorganizim tjetër të strukturave të brendshme të MPB-së.
Duke iu përgjigjur pyetjeve të deputetëve, Toshkovski theksoi se në dy vitet e fundit, siguria e qytetarëve ka qenë shumë e favorshme, veçanërisht nëse merren parasysh shifrat totale të krimit të cilat, siç përmendi, “janë më të mirat në 20 vitet e fundit”. Ministri informoi gjithashtu se MPB-ja deri te qeveria ende nuk ka dorëzuar sistematizimin e ri.
“Stacionet policore në Dibër, Strumicë, Shtip, Saraj, Ilinden do të punojnë sipas ligjit dhe sistematizimit. Një sistematizim i ri ende nuk i është propozuar Qeverisë nga MPB-ja dhe Qeveria nuk ka miratuar një sistematizim të ri për punën e MPB-së. Kur të përgatitet një sistematizim i ri nga shërbimet e MPB-së, ai do t’i propozohet Qeverisë dhe kur ajo ta miratojë, ne do të vazhdojmë ta implementojmë. Gjithçka që kemi bërë në 1.5-2 vitet e fundit tregon se siguria e qytetarëve është përmirësuar ndjeshëm në krahasim me më parë, veçanërisht nëse merren parasysh shifrat për kriminalitetin total. Shifrat janë më të mirat në 20 vitet e fundit”, theksoi Toshkovski.
Sulmuesi Meriton Korenica pritet që të largohet nga CFR Cluj brenda këtij afati dimëror, ndërsa thuhet se agjentët e tij po negociojnë me skuadrën e Superligës Turke, Konyaspor.
Lojtari me prejardhje nga Rahoveci deri vonë ishte në negociata me DC United, por duket se skuadra amerikane nuk do t’i plotësojë kërkesat e rumunëve prej 4.5 milionë dollarë për ta liruar kosovarin.
Megjithatë, tani në “radarin” e Korenicës është edhe skuadra turke. Sipas asaj që raporton “Ajansspor”, 29-vjeçari i është ofruar Konyasporit, klub ky që po kërkon një anësor të ri.
Konyaspori e vlerëson lartë Korenicën edhe për faktin se mund të luajë në disa pozita të ndryshme, gjë që mund t’i hyjë në përdorim trajnerit në rast mungesash.
Korenica e njeh mjaftë mirë futbollin turk, meqenëse për gjashtë muaj ka qenë pjesë e Manisas, aty ku shënoi një gol në 11 paraqitje.
Këtë edicion, ylli kosovar ka qenë ndër më të mirët për Clujin, ku shënoi shtatë gola si dhe dhuroi gjashtë asistime në 31 paraqitje.
Një afrim i tillë mund t’i ndihmojë shumë Konyasporit, skuadër kjo që po lufton për mbijetesë në elitën e futbollit turk, pasi zënë pozitën e 13-të me 19 pikë, vetëm tre më shumë se Eyuspori./Telegrafi
Login
