Në prag të zgjedhjeve të parakohshme për legjislaturën e 10-të të Kuvendit të Kosovës, misioni i OSBE-së në Kosovë, me mbështetje financiare nga Ambasada e Francës, ka nisur një seri punëtorish në pesë rajonet e vendit, me synim forcimin e kontakteve me gratë votuese dhe rritjen e pjesëmarrjes së tyre në procesin zgjedhor.
Në njoftimin e OSBE-së thuhet se, pavarësisht legjislacionit për barazi gjinore dhe kuotave zgjedhore në fuqi, gratë në Kosovë vazhdojnë të jenë të nën-përfaqësuara në proceset e vendimmarrjes politike.
“Punëtoritë do të fokusohen në identifikimin e arsyeve pse ky hendek vazhdon të ekzistojë, në vlerësimin e efektshmërisë së mekanizmave ligjorë dhe institucionalë aktualë, si dhe në shqyrtimin e rolit të institucioneve zgjedhore, partive politike, mediave dhe shoqërisë civile në avancimin e barazisë gjinore në politikë dhe në jetën publike”, thuhet në njoftim.
Punëtoria do të mbahet në Prishtinë, më 22 dhjetor, në orën 10:00, dhe do të hapet nga kryesuesi i Komisionit Qendror të Zgjedhjeve, Kreshnik Radoniqi, si dhe Kryesuesi i Panelit Zgjedhor për Ankesa dhe Parashtresa, Zenel Leku.
Pas hapjes, do të zhvillohen panele diskutimi në nivel të lartë me pjesëmarrjen e ambasadorëve, përfaqësuesve të shoqërisë civile dhe mediave.
TIRANË, 16 dhjetor /ATSH/ Ambasadori i Bashkimit Evropian, Silvio Gonzato, mori pjesë sot në prezantimin e studimit të Profilit të Barazisë Gjinore të Shqipërisë, një analizë e përditësuar mbi situatën e grave dhe burrave, vajzave dhe djemve në vend.
Gjatë fjalës së tij, ambasadori theksoi se gjinia dhe barazia ndërmjet burrave dhe grave, është një element thelbësor i anëtarësimit të Shqipërisë në Bashkimin Evropian.
Sipas Gonzatos, rëndësia e politikave të bazuara tek të dhënat është mënyra e duhur sesi vendi duhet të qaset drejt anëtarësimit në BE.
“Studimi konfirmon se kemi rëndësinë e hapave të mëtejshme që do të merren, që lufta kundër diskriminimit ndaj grupeve të brishta apo të cenueshme, të vijojë. Flitet gjithashtu për rëndësinë e strehëve për viktimat e dhunës me bazë gjinore. Nuk mund të mohohet fakti, se gjinia dhe barazia ndërmjet burrave dhe grave, është një element thelbësor i anëtarësimit në BE, gjendet në nenin 2 të Traktatit për Themelimin e BE-së, por edhe në nenin 23 të Kapitullit të të Drejtave Themelore, ku flitet për të siguruar barazinë ndërmjet gjinive në përgjithësi, por edhe në paga. Si dhe gjendet mosdiskriminimi në nenin 21 të Kartës që është pjesë integrale e traktateve. Kur të bëheni pjesë e BE-së, duhet që këto parime të mos jenë vetëm në letër, por edhe të zbatuara. Në nenin 21 ndalohet diskriminimi mbi çdo bazë, përfshirë dhe orientimin seksual”, tha Gonzato.
Gjithashtu Gonzato theksoi se “duhet të zgjerohet mbrojtja ligjore, psiko-sociale”.
“Kjo ka të bëjë dhe me faktin se, viktimat e dhunës të kenë mundësi të kalojnë në një jetë normale, pra të kenë pavarësi ekonomike, e cila është skajshmërisht e rëndësishme që të kthehesh në realitet. Do të thotë t’u kthejmë drejtësinë, atyre personave të cilëve u ishte mohuar”, tha ai.
Gonzato shtoi më tej se studimi është i mirë për faktin se ndihmon që të “evoluojmë në mënyrën e duhur edhe si i shikojmë konceptet për dhunën”.
“Sepse dhuna, për shembull, është një grua që rrihet nga burri në shtëpi, pa e marr vesh të tjerët, jo jo, është edhe dhuna digjitale, e cila është bërë shumë shkatërruese, dëmtuese dhe dëmton gratë në mënyrë madhore dhe jo vetëm gratë. Kjo duhet parë dhe duhen gjetur mekanizmat mbrojtëse. Një nga parimet thelbësore edhe në punën e BE-së është liria e fjalës, liria e medias etj, por ka dhe llogaridhënie dhe përgjegjësi. Secili prej nesh duhet të ushtrojë përgjegjshmëri dhe llogaridhënie në fund të fundit, pra në rast se ke një farë anonimiteti online, duhet të mbash përgjegjësi për veprimet që bën dhe si shprehesh ndaj të tjerëve”, tha ai.
Gonzato nënvizoi se është e rëndësishme që të diskutohet për barazinë gjinore bazuar tek të dhënat.
TIRANË, 16 dhjetor/ATSH/ Ministrja e Shëndetësisë dhe Mirëqenies Sociale, Evis Sala, deklaroi sot se të dhënat e sakta dhe të mirëhartuara janë thelbësore për të marrë masa konkrete dhe për të ndërtuar politika efektive.
Në aktivitetin e organizuar nga Ministria e Shëndetësisë dhe Mirëqenies Sociale, UN Women dhe Zyra e Bashkimit Evropian në vendin tonë, ku u prezantua Profili i Barazisë Gjinore të Shqipërisë, një analizë e përditësuar mbi situatën e grave dhe burrave, vajzave dhe djemve në vend, ishte i pranishëm edhe ambasadori Silvio Gonzato.
Ministrja Sala u shpreh se Profili i Barazisë Gjinore të Shqipërisë përbën një bazë shumë të mirë për punën që duhet të vijojë në këtë drejtim.
Sipas saj, pavarësisht përmirësimit të legjislacionit dhe politikave publike ndër vite, sfidat strukturore në fushën e barazisë gjinore mbeten dhe kërkojnë një punë të vazhdueshme.
Sala ndau edhe përvojën e saj personale në krye të detyrës, duke theksuar se dy nga sfidat e para me të cilat u përball ishin debati publik mbi çështjen e onkologjisë dhe ai mbi ligjin “Për barazinë gjinore”.
“Në rastin e ligjit “Për barazinë gjinore” ka pasur një dozë të konsiderueshme keqinformimi dhe keqkomunikimi”, tha Sala.
Ministrja vuri në dukje se barazia ekonomike është një nga shtyllat kryesore që ndikon drejtpërdrejt në barazinë gjinore në përgjithësi.
Sala ndau disa të dhëna të dala nga studimi, sipas të cilave një në katër gra në Shqipëri është jashtë fuqisë punëtore për shkak të angazhimeve familjare, krahasuar me vetëm 2% për burrat. Gratë kanë dy herë më pak gjasa se burrat të jenë të punësuara, ndërsa 21% e grave janë të vetëpunësuara, çka pasqyron një hendek të thellë gjinor. Po ashtu, gratë kanë dy herë më shumë gjasa se burrat të punojnë pa pagesë.
Ministrja Sala bëri të ditur se 31% e bizneseve në Shqipëri janë në pronësi dhe drejtohen zyrtarisht nga gratë.
Një vëmendje të veçantë, ministrja ia kushtoi dhunës digjitale ndaj grave në politikë dhe qeverisje. Ajo e cilësoi këtë fenomen si shumë shqetësues, duke theksuar se, ndonëse dhuna fizike është e tmerrshme, dhuna digjitale ka pasoja edhe më shkatërruese për shkak të përmasës dhe ndikimit të saj.
“Dhuna digjitale është një sfidë personale për mua dhe meriton një vëmendje të veçantë institucionale. Atë që kam përjetuar është dhuna digjitale e grave në politike dhe qeverisje. Një element që jo vetëm që është shqetësues në përgjithësi dhe duhet të jetë shqetësues, por edhe sepse nëse dhuna fizike ka një fytyrë, një njeri, dhuna digjitale ka një botë shkatërruese akoma më të madhe”, u shpreh Sala.
Ministrja nënvizoi se pabarazia gjinore nuk është një fenomen vetëm shqiptar, por kjo nuk e justifikon mosadresimin e saj në Shqipëri.
“Edhe unë gjatë karrierës sime e kam jetuar pabarazinë gjinore. Nuk është vetëm në Shqipëri. Jam dorëzuar? Jo! Barazia gjinore është një proces i vazhdueshëm që kërkon angazhim të përbashkët dhe të qëndrueshëm”, deklaroi Sala.
Prezantohet profili i Barazisë Gjinore të Shqipërisë, Foto; Andrin Hoxha
1 nga 16
Silvio Gonzato - Ambasador i BE në Tiranë, Foto; Andrin Hoxha
Agjencia për Ndihmë Juridike Falas ka njoftuar se, në bashkëpunim me Njësinë për Antidiskriminim dhe Barazi Gjinore, ka vendosur zyrën mobile të ndihmës juridike në Komunën e Obiliqit.
Zyra do të jetë e hapur çdo ditë pune, nga ora 08:30 deri në 15:00, në Sheshin “Aziz Zhilivoda”, duke filluar nga data 10 dhjetor 2025 deri më 9 janar 2026.
Kjo zyrë mobile do të ofrojë shërbime falas të ndihmës juridike për kategori të caktuara të qytetarëve, përfshirë:
personat me asistencë sociale dhe kategori të tjera sociale,
pensionistët,
personat e papunësuar,
familjet me të ardhura nën pagën minimale,
nënat vetushqyese,
viktimat e dhunës në familje dhe dhunës me bazë gjinore,
gazetarët dhe kategori të tjera të përcaktuara sipas mandatit të Agjencisë.
Shërbimet përfshijnë këshilla juridike, informim, asistencë teknike, përgatitje të shkresave dhe përfaqësim në gjykatë, përmes avokatëve të kontraktuar e të financuar nga Agjencia. Ndihma mbulohet në procedura penale, civile, kundërvajtëse, administrative, si dhe në konteste familjare, martesore, të punës, pronësore, pensionale e sociale. /Telegrafi/
Ballkani duket se po përballet me sfida në miratimin dhe implementimin e ligjeve për barazi gjinore. Shqipëria ka bërë përparim teksa e miratoi rishikimin e ligjit gjatë muajit nëntor. Mali i Zi dhe Kosova e kanë miratuar prej kohësh, ndërsa Maqedonia e Veriut dhe Serbia po pengohen nga dezinformimi dhe dogma fetare.
Në të gjitha vendet e Ballkanit, propaganda konservatore ka përdorur narrativën e frikës për të ndaluar ligjet progresive në mbrojtjen e të drejtave të njeriut sikurse janë ato për barazinë gjinore. Aktivistët theksojnë se pa edukim publik dhe fushata informuese, ligjet mbeten letra pa fuqi reale.
Në Shqipëri ligji për barazinë gjinore u miratua në Kuvend më 6 nëntor, pavarësisht fushatës dizinformuese dhe linçuese që u nxit nga grupe konservatore. Ky ligj njeh për herë të parë punën e papaguar të grave, synon përfaqësimin 50% të tyre në politikë dhe kërkon barazi gjinore në sektorin publik e privat.
Megjithatë, fushata të ndryshme online nxitën keqinterpretime të ligjit, duke e lidhur me çështje si ndryshimi i gjinisë apo martesat mes së njëjtës gjini – gjëra që nuk përfshihen në ligj dhe të sqaruara nga Citizens.al në raportime të mëparshme.
Maqedonia e Veriut dhe Serbia: Hapa pas në rrugën drejt barazisë
Në Maqedoninë e Veriut, projektligji për barazinë gjinore u refuzua në vitin 2023. Shkak u bë presioni nga komuniteti fetar dhe protestat e organizuara, që duket se buruan njësoj si në Shqipëri nga një fushatë dizinformimi.
Aktivistja Rita Behadini tregoi për Citizens.al se projektligji ishte i guximshëm dhe progresiv, por ai u lidh prej një fushate dizinformuese me ligjin “Për evidentimin në Librat Amzë” – gjendjes civile. Kjo fushatë i bëri njësh të dy projektligjet dhe “e shiti” sikur ligji për barazinë gjinore u mundësonte personave transgjinorë të ndryshonin gjininë, edhe pse realisht kjo nuk kishin lidhje.
“Me qeverinë aktuale, e cila duket goxha anti-gjinore, nuk besoj se do të ketë nismë të re për miratimin e ligjit për barazinë gjinore, sepse ata janë goxha tradicionalë, sidomos kur bëhet fjala për koncepte progresive apo koncepte si ‘LGBT’,” theksoi Behadini.
Sipas Ritës qëndrimi i Kryepeshkopatës së Ohrit dhe protestat që u mbajtën në Shkup për këto nisma ligjore ndikuan në vendimin kundër ligjit për barazinë gjinore.
“Në të gjithë procesin ka pasur dizinformata, njësoj si në Shqipëri, duke pretenduar që ligji kishte të bënte me transgjinorët ose martesat e së njëjtës gjini, gjë e cila nuk ka qenë e vërtetë,” shtoi Behadini.
Në Serbi, situata duket ndryshe. Ligji për barazinë gjinore qe miratuar në vitin 2021, por tre vite më pas u pezullua nga Gjykata Kushtetuese.
Vendimi u mor në korrik 2024, pas kundërshtimeve për përkufizimin e gjinisë dhe përdorimin e gjuhës së ndjeshme gjinore edhe në mbrojtjen e viktimave nga dhuna apo diskriminimi. Protestat e grupeve konservatore dhe marshimet e organizuara nga partia nacionaliste e djathë Dveri, “Family Walk,” e shtuan presionin.
“Nuk ka asnjë shpjegim pse Gjykata Kushtetuese e mori vendimin tri vite më vonë, kur kundërshtimet janë regjistruar që në 2021. Më e keqja është se nuk ka asnjë afat se për sa kohë ky ligj do të qëndroj i pezulluar” – analizon për Citizens Andijana Covic, nga organizata për të drejtat e grave “FemPlatz”.
Covic përmbyll se ky pezullim vë në pikëpyetje të gjitha konventat që Serbia aderon prej vitesh, si punë e vazhdueshme edhe drejt integrimit në familjen evropiane.
Mali i Zi dhe Kosova: Ligji ekziston, por sfida mbetet zbatimi
Mali i Zi miratoi ligjin për barazinë gjinore në vitin 2007, duke e ndryshuar disa herë për t’u përafruar me direktivat e Bashkimit Evropian, sidomos pas vitit 2015.
Maia Raicevic nga Qendra për të Drejtat e Grave në Podgoricë, tha për Citizens.al se para ndryshimeve nuk kishte protesta të hapura, por më së shumti kundërshti të heshtur, tallje dhe minimizim të çështjeve të grave.
Por rishikimet e ligjit, sipas saj, më tepër se prej një vullneti të gjerë politik, u shtynë përpara falë aktivizmit këmbëngulës të grupeve feministe. Rishikimet futën konceptin e integrimit gjinor në institucione, inkuroajoi përfaqësimin e grave në vendimmarrje dhe krijoi bazën për politika kundër diskriminimit dhe dhunës me bazë gjinore.
“Ligji hapi dyer, por nëse shoqëria kalon përmes tyre, është çështje tjetër,” theksoi Raicevic, duke nënkuptuar se normat patriarkale mbeten të rrënjosura në shoqërinë malazeze.
Pavarësisht miratimit, ajo analizon se normat patriarkale janë ende thellësisht të rrënjosura në familje, shkolla, politikë, madje edhe tek vetë gratë. Për Raicevic ky ligj është një hap i rëndësishëm, por jo fitore.
Ngjashëm, Kosova, në vitin 2015, miratoi paketën e ligjeve për të drejtat e njeriut, paketë e cila krahas ligjit për Avokatin e Popullit, ligjit për Mbrojtjen nga Diskriminimi, pati të përfshirë edhe ligjin për Barazi gjinore. Por sfida është zbatimi i tyre në praktikë.
Aktivistja feministe Valmira Rashiti tregoi për Citizens.al se këto ligje ndalojnë diskriminimin “e drejtpërdrejtë apo të tërthortë” për shkak të gjinisë dhe identitetit gjinor në të gjitha fushat: punësim, shërbime, qasje institucionale, shërbime sociale etj.
Rashiti thotë se në bazë të këtyre ligjeve janë hartuar edhe padi ndaj ngacmimeve seksuale, gjuhës së urrejtjes, dhunës në familje, denigrimit për shkak të identitetit gjinor, apo orientimit seksual.
Sipas saj shtysë e madhe për miratimin e paketës ligjore në fjalë ka qenë procesi i anëtarësimit të Kosovës në BE, i cili kërkon harmonizimin e legjislacionit.
“Tani që e djathta po duket të ketë marrë hov edhe në nivel të BE-së, mbetet të shihet nëse mbrojtja e identitetit gjinor dhe orientimit seksual do të vazhdojë të jetë prioritet i legjislacionit kosovar, karshi reformave institucionale,” përmbylli Rashiti.
Pavarësisht të dhënave të reja që tregojnë se barazia e plotë gjinore në vendimmarrje është ende larg realitetit, Spanja dhe Irlanda kanë bërë përparimin më të madh në 10 vitet e fundit, shkruan euronews.
Pozicionet e pabarabarta të pushtetit janë ende pengesa më e madhe për arritjen e barazisë gjinore në Bashkimin Evropian, pavarësisht hapave të rëndësishëm të bërë në këtë fushë gjatë dekadës së fundit, sipas Indeksit të Barazisë Gjinore 2025 të EIGE-së, transmeton Telegrafi.
Në të gjithë BE-në, rezultatet për kategorinë e pushtetit, e cila mat barazinë e burrave dhe grave në pozicione vendimmarrëse në sferat politike, ekonomike dhe sociale, variojnë nga një maksimum prej 80.3 pikësh në Suedi në 12.9 pikë në Hungari.
Indeksi i Barazisë Gjinore i jep BE-së dhe shteteve anëtare një rezultat nga 0 në 100. Një rezultat prej 100 do të thoshte se një vend ka arritur barazi të plotë midis grave dhe burrave.
Gjatë dekadës së fundit, Spanja, Irlanda, Franca dhe Italia kanë bërë përparim të konsiderueshëm në ngushtimin e boshllëqeve gjinore në pozicionet e vendimmarrjes.
Ku në spektrin politik trajtohen gratë në mënyrë më të pabarabartë?
Gratë janë përgjithësisht në pakicë në parlamente dhe qeveri në të gjitha nivelet, në kompanitë më të mëdha dhe në institucionet sociale.
Në vitin 2024, pjesa mesatare e anëtarëve të parlamenteve kombëtare në të gjitha shtetet anëtare të BE-së ishte 67% burra dhe 33% gra.
Vitin e kaluar, gratë ishin gjithashtu të nën-përfaqësuara me gjysmën midis anëtarëve të bordeve në kompanitë më të mëdha të kuotuara në BE: 34% e anëtarëve të bordeve ishin gra, krahasuar me 66% që ishin burra.
Gratë përballen me vështirësi në sigurimin e fondeve të fushatës dhe shpesh kanë më pak ndikim në përzgjedhjen e kandidatëve sesa kolegët e tyre meshkuj, sipas hulumtimit.
Gjatë zgjedhjeve të Parlamentit Evropian, 10 vende të BE-së vendosën kuota gjinore për kandidatët, me eurodeputetet femra që arritën nivelin e kuotës në Spanjë, Francë dhe Kroaci.
Stereotipet gjinore, dhuna dhe diskriminimi i dekurajojnë më tej gratë nga hyrja ose qëndrimi në poste publike, duke minuar përfaqësimin demokratik dhe progresin.
Midis 2,600 politikaneve femra të zgjedhura në nivel lokal të anketuara në 31 vende evropiane, pothuajse një e treta e tyre raportuan se kishin përjetuar dhunë gjatë karrierës së tyre politike.
Kur u pyetën për ndikimin e dhunës në rolet dhe jetën e tyre, gratë e zgjedhura në nivel lokal dhe rajonal raportuan pasoja të gjera: ndjenjën e pasigurisë (41%), efektet negative në jetën e tyre private (30%), autocensurë në një konflikt politik (21%) dhe tërheqje nga jeta publike (12%).
"Stereotipet gjinore janë veçanërisht të rëndësishme për fushën e pushtetit, pasi ato ndihmojnë në formësimin e perceptimeve publike se kush konsiderohet i përshtatshëm për të mbajtur poste politike ose për të përmbushur role të caktuara në shoqëri", vunë në dukje autorët e Indeksit të Pabarazisë Gjinore.
Në shumicën e shteteve anëtare, burrat kanë më shumë gjasa sesa gratë të bien dakord me pohimin se burrat në jetën politike janë më ambiciozë sesa gratë.
Hendeku më i madh gjinor midis atyre që bien dakord shihet midis të anketuarve të moshës midis 15 dhe 24 vjeç, me 48% të burrave të rinj që bien dakord, ndërsa vetëm 34% e grave të reja e mbështesin këtë ide.
Në BE, 17% e grave dhe 22% e burrave besojnë se gratë nuk kanë cilësitë dhe aftësitë e nevojshme për të mbushur pozicione përgjegjësie në politikë.
Mbështetja për këtë deklaratë ndryshon shumë në të gjithë BE-në, me 49% të të anketuarve në Hungari që pajtohen me të dhe vetëm 2% në Holandë. /Telegrafi/
Në një hapësirë që dikur i përkiste diktatorit Enver Hoxha, vajza dhe gra nga komunitetet rome, egjiptiane, LGBT dhe me aftësi të kufizuara ndanë historitë e tyre të dhunës, mbijetesës dhe rezistencës.
Vila e diktatorit, dikur simbol i frikës dhe pushtetit absolut, u shndërrua për një ditë, të premten, në një hapësirë rrëfimi për historitë e luftës së grave për një jetë të pranuar dhe trajtuar me dinjitet.
Ato u mblodhën fillimisht në ish-kinemanë private të diktatorit, ku u shfaq dokumentari i realizuar nga Citizens.al: “Rrënjët e Rezistencës”, një dokumentar që pasqyron lëvizjen feministë në Shqipëri pas viteve ’90 dhe përpjekjet për të sfiduar patriarkatin për një të ardhme më të mirë.
Gjatë shfaqjes së dokumentarit “Rrënjët e Rezistencës”/Citizens.al
Rrëfime që thyejnë heshtjen
Romina Sefa, drejtuese e Qendrës për Advokim Social, gjithashtu një prej organizatoreve të eventit, nënvizoi domosdoshmërinë e një hapësire të sigurt ku vazjat dhe gratë të flasin lirshëm për shqetësimet dhe vështirësitë e tyre.
“Pavarësisht sfidave, ne ia kemi dalë”, tha ajo, duke kujtuar se ky duhet të jetë mesazhi kryesor në diskutime.
Akullin e theu Doliana Velia, një grua me aftësi të kufizuar në shikim që foli për jetën me një shqisë të munguar që në lindje dhe paragjykimet shoqërore.
Ajo theksoi se mentaliteti dhe mungesa e infrastrukturës e kufizojnë pavarësinë e njerëzve me aftësi të kufizuara shumë më tepër se vetë aftësia.
“Të lindësh me një shqisë që nuk ekziston, është njësoj si t’ju them a ju mungon të fluturuarit? Jo, nuk ju mungon, ju duket qesharake, sepse nuk e keni provuar”, paralelizoi Doliana.
Sipas saj, besimi i prindërve për ta trajtuar si një person jo ndryshe nga të tjerët e ka ndihmuar të jetë sot një grua e pavarur.
“Ne nuk duhet a pranojmë mëshirën nga askush, le ti përkasim një komuniteti të caktuar, le të kemi një diferencë fizike apo shqisore, ne duhet të jetojmë me dinjitet”, ndau Doliana me vajzat dhe gratë e tjera.
Ajo theksoi se mentaliteti dhe mungesa e infrastrukturës e kufizojnë pavarësinë e njerëzve me aftësi të kufizuara shumë më tepër se vetë aftësia.
“Të shembim strukturat. Së pari në mendjen tonë dhe pastaj te ata që na rrethojnë”, theksoi Doliana, sipas së cilës të jesh grua me aftësi të kufizuar në Shqipëri është sfidë e dyfishtë.
Doliana ndau raste ku gratë me aftësi të kufizuara mbeten të izoluara, të pambrojtura dhe shpesh pa mundësi të denoncojnë edhe dhunën që pësojnë.
Për këtë ajo tregoi për raste ku për shkak të pagesës së ulët që marrin, ndihmësi personal qëllon të jetë familjar i tyre, njëherësh edhe person i dhunshëm.
“Për shkak të kufizimit fizik nuk mundet të shkojë as për ta denoncuar rastin. Ka njerëz që janë të privuar edhe nga kjo lloj lirie”, theksoi Doliana.
Një rast i tillë ishte ai i një vajze të dhunuar nga nëna e saj, e cila ishte edhe kujdestarja ligjore.
“Lajmëronim policinë ne, sepse i kishin hequr edhe telefonin dhe kur i shkoi policia i tha: ‘Po ti nuk ke turp që këta po të mbajnë me bukë dhe ti i turpëron?”, rrëfeu ajo, duke vënë në pah dështimin institucional.
Nga shtëpia e humbur, tek sipërmarrja e parë
Vjollca, një grua rome, tregoi për dhunën dhe padrejtësinë strukturore që e la pa shtëpi, pa mbështetje dhe pa mundësi për t’u qasur në shërbime dhe përkrahje shtetërore. Historia e saj tregoi njëherësh edhe për forcën e jashtëzakonshme që ka një gruaje e pakicës rome për t’ia dalë në realitetin shqiptar.
E gjendur përballë humbjes së bashkëshortit, me dy fëmijë, ajo përjetoi dhunë nga të afërmit e tij, të cilët synuan ta nxirrnin nga shtëpia. Kjo ndodhi kur hasi në kërkesën: “Për 15 ditë, liro shtëpinë!”.
Për një vit Vjollca nuk përfitoi as ndihmën ekonomike, sepse, sikurse tregoi ajo, i vinte turp të firmoste pasi nuk dinte të lexonte dhe shkruante.
Kjo e shtyu të arsimonte fëmijët e saj, duke i larguar nga cikli i turpit dhe varfërisë.
“Nuk dua që edhe fëmijët e mi të kenë turp në të ardhmen dhe i çova në shkollë. Sot kam dy fëmijë të edukuar,” tregoi ajo me krenari.
Pas tre vitesh procese gjyqësore, Vjollca arriti të siguronte një dhomë në shtëpinë ku jetonte me bashkëshortin.
“Kur fitova [gjyqin] filluan të më thërrisnin ‘gabele’, sepse njerëzit e burrit nuk janë romë,” rrëfeu ajo një tjetër aspekt diskriminues nga historia e saj.
Një thes me rroba të përdorura, që iu dha për ta shitur, e futi Vjollcën në tregun informal të punës. Pavarësisht kësaj, ajo ia doli të ndërtonte një ekonomi familjare të mjaftueshme sa për të shkolluar fëmijët.
“Kam vetëm tre vitet e fundit të siguruara”, tregoi ajo duke nënvizuar se kjo ishte mundësuar falë mbështetjes nga programet sociale.
Gjatë diskutimit në kuadër të 16 Ditët e Aktivizmit kundër Dhunës me Bazë Gjinore/Citizens.al
Gra që sfidojnë dhunën
Elisabeta, ndau me të pranishmit kalvarin që ju desh të kalonte si gjyshe për të shpëtuar vajzën dhe mbesën e saj nga një cikël dhune, të ushtruar nga dhëndri.
E martuar jashtë vendit, vajza ishte izoluar dhe dhunuar vazhdimisht. E pa-arsimuar, qe detyruar të luftojë ndaj një sistemi që e kishte bërë vajzën “pronë ligjore” të babait.
Por, me këmbëngulje të vazhdueshme, vajza e Elisabetës ia doli të njoftonte policinë, gjeti strehë derisa mbylli të gjitha dokumentet për të kthyer sigurinë dhe përkatësinë ligjore mbi mbesën.
Njëjtë si Elisabeta, edhe Miranda ndau një histori jetësore të rëndë: një martesë me dhunë dhe një bashkëshort të alkoolizuar, që kishte krijuar një ambient të pasigurt edhe për vajzën e tyre.
“Një nxënëse ekselente” tregoi ajo, “e cila edhe përmes traumave që kalonte gjente kohë të studionte”.
Ky takim i kryer në “16 Ditët e Aktivizmit kundër Dhunës me Bazë Gjinore” solli një akt simbolik rivendosjeje: zëra të heshtur, histori të lëna mënjanë, dhimbje të padëgjuara, në dritën e një vile që dikur nuk do ti ftonte kurrë e që për dekada ka simbolizuar pushtetin, frikën dhe privilegjin.
Deputeti Tritan Shehu, përmes një postimi në rrjetet sociale, akuzon Presidentin Bajram Begaj se ka lejuar në mënyrë të heshtur hyrjen në fuqi të ligjit të ri që lidhet me barazinë gjinore dhe identitetin gjinor. Sipas Shehut, ky ligj pranon deformimin e jetës dhe familjes dhe vë në dyshim ekzistencën e shoqërisë sonë. Ai argumenton […]
TIRANË, 6 dhjetor/ATSH/ Ministrja e Punëve të Brendshme Albana Koçiu u shpreh sot se lufta kundër dhunës digjitale është një betejë e përbashkët që fitohet përmes ndërgjegjësimit, edukimit, respektit e gjuhës që zgjedhim në hapësirën digjitale.
Për ministren Koçiu, “16 ditët e aktivizmit kundër dhunës me bazë gjinore janë absolutisht momenti më i mirë për të kuptuar një të vërtetë shumë të thjesht, që dhuna nuk luftohet dot vetëm”.
“Dhuna në rrjet nuk është ‘shaka’, është një fenomen që dëmton jetë dhe duhet trajtuar e ndëshkuar si i tillë, ndaj po forcojmë mekanizmat mbrojtës në Kodin e ri Penal, nga bullizmi online te përndjekja dhe dhuna psikologjike”, u shpreh ministrja Koçiu.
Por as ligji më i mirë, sipas saj, “nuk mjafton pa ndryshuar kultura”.
“Dhuna digjitale ushqehet nga gjuha që përdorim dhe ajo që tolerojmë online. Duhet ta ritheksoj se kjo nuk është një nga ato beteja që shteti mund ta fitojë i vetëm apo thjesht dhe vetëm përmes rritjes së policimit online”, u shpreh Koçiu.
Sipas Koçiut, “nëse duam ta luftojmë seriozisht nuk mjafton të shtojmë procedimet penale apo të përmirësojmë ligjet. Duhet të ndryshojmë kulturën, gjuhën, sjelljen”.
Në këtë drejtim, Koçiu bëri të ditur se Ministria e Punëve të Brendshme në bashkëpunim edhe me Ministrinë e Arsimit ka dizenjuar programe ndërgjegjësimi dhe sensibilizimi në shkolla, mes tyre edhe për sigurinë në rrjet apo për të njohur të rinjtë me shkeljet që mund të përbëjnë vepra penale.
Ligji i shumëdebatuar për “Barazinë Gjinore” do të hyjë në fuqi pa dekretin e Presidentit, Bajram Begaj. Kjo për shkak se afati kushtetues që Begaj të firmoste ka mbaruar, duke bërë që kreu i shtetit ta kalojë në heshtje ligjin në fjalë. Ligji u miratua në seancën e 6 nëntorit me 77 vota pro dhe […]
Dhuna në internet, gjuha e urrejtjes, presionet nga moshatarët dhe rreziqet për shëndetin mendorë, janë disa nga sfidat me të cilat ballafaqohen të rinjtë. Qendra për hulumtime, dhe krijim politikash po punon me të rinjtë e 9 komunave në vend, me qëllim rritjen e vetëdijes, dhe parandalimin e këtyre dukurive.
“Të rinjtë sot përballen me më shumë probleme, prej asaj se sa janë të varur nga përdorimi i teknologjisë, e ajo ndikon te mënyra e tyre e komunikimit, ku nuk munden ta shprehin ndjenjat dhe emocionet. Më pas ajo ndikon se çfarë raporte krijojnë mes vete edhe me miqtë, por edhe me partnerët e tyre. Më tej se si i pranojnë ata që janë ndryshe nga ta, por edhe fenomenet sociale të alkoolizmit dhe përdorimit të drogës”, deklaroi Marija Ristevska, Qendra për hulumtime.
Edhe përfaqësues të Ministrisë, pajtohen se këto programe, përmes përfshirjes aktive të të rinjve, mund të ndihmojnë të rinjtë të mësojnë të sillen pa dhunë dhe të njohin stereotipet e dëmshme.
“Jemi dëshmitarë se të rinjtë sot ballafaqohen me shumë sfida, dhuna online, gjuha e urrejtjes, presione nga moshatarët, rreziqet e shëndetit mendor, modele toksike të të qenit mashkull apo femër. Prandaj na nevojiten qasje që në mënyrë direkte i kyçin të rinjtë si pjesëmarrës aktiv”, tha Mirjana Zllatanova, Përfaqësuese e Ministrisë së Arsimit.
Ambasadorja Holandeze bëri thirrje që Institucionet vendimmarrëse të mbështesin shoqërinë civile në këto përpjekje dhe t’i përfshijnë ato në plan programin e shkollave.
“Do të doja ta shfrytëzoja këtë mundësi, dhe momentin e strategjisë së re dhe t’i lus ata që marrin mendime, t’a mbështesin shoqërinë civile në këto përpjekje, t’i përshëndesin rezultatet dhe t’i përfshijnë ato në plan programin e shkollave”, u shpreh Ozlem Xhanel, Ambasadore e Holandës në Shkup.
Ambasadorja holandeze tha se në këtë mënyrë në agjendën kombëtare mund të vendosen vlerat evropiane, të drejtat e njeriut dhe veçanërisht barazia gjinore. /Alsat.mk
TIRANË, 2 dhjetor/ATSH/ Në konferencën “Gratë në qendër: Forcimi i medias me qasje përfshirëse në Shqipëri”, organizuar nga SCiDEV dhe AWA me mbështetjen e Bashkimit Europian, u prezantuan gjetjet e projektit “Thyejmë kallëpet, formësojmë të ardhmen”, që synon transformimin e praktikave mediatike në drejtim të raportimit me perspektivë gjinore, rritjes së rolit të grave në media dhe forcimit të sigurisë së gazetarëve
Kryetarja e Komisioni për Drejtat e Njeriut dhe Mjetet e Informimit Publik, deputetja e Partisë Demokratike, Jorida Tabaku, në fjalën e saj theksoi se barazia gjinore nuk duhet parë si një element dekorativ, por si thelbin e një sistemi të drejtë dhe funksional.
Ajo ndau qëndrimin e saj mbi rolin e medias në fuqizimin e grave, sfidat me të cilat ato përballen dhe domosdoshmërinë për të ndërtuar një shoqëri ku çdo grua ka zë dhe hapësirë për t’u dëgjuar.
Tabaku u ndal edhe te nevoja për të forcuar mbrojtjen e gazetarëve, duke bërë të ditur se ka propozuar ndryshime në Kodin Penal që synojnë të luftojnë paditë SLAPP, të cilat përdoren për të frenuar raportimin e lirë dhe kritik.
Sipas saj, demokracia nuk mund të ekzistojë pa media të pavarur dhe të mbrojtur.
“Kam propozuar ndryshime të reja në Kodin Penal për të mbrojtur gazetarët dhe për të luftuar paditë SLAPP, sepse demokracia nuk ekziston pa media të lirë”, theksoi ajo.
Duke vënë në pah rolin e grave në media, sipërmarrje, bujqësi, arsim dhe emigracion, Tabaku deklaroi se ato përbëjnë një forcë të rëndësishme për zhvillimin e vendit.
Ajo theksoi se shoqëria u detyrohet grave një sistem më të drejtë, më transparent dhe mundësi të barabarta për të ndërtuar të ardhmen e tyre.
Kryetarja e Autoritetit të Mediave Audiovizive, Armela Krasniqi, solli një përmbledhje të të dhënave të tre viteve të fundit të balancës gjinore në tregun audioviziv, një treg dinamik dhe përgjithësisht i balancuar, ndryshe nga fushatat zgjedhore, ku dominimi i burrave, si në zgjedhjet e 11 majit, ka qenë i dukshëm.
Në një sesion të veçantë me gazetarë dhe ekspertë të fushës, ambasadori i Bashkimit Europian në Shqipëri, Silvio Gonzato, theksoi se mediet shqiptare duhet të pasqyrojnë më mirë diversitetin shoqëror dhe të rrisin përfaqësimin e grave në hapësirën publike.
Ai u shpreh se niveli aktual i përfaqësimit nuk është i mjaftueshëm dhe se pak është bërë për të adresuar sfida si diskriminimi, mungesa e zërit të barabartë dhe dhuna online ndaj grave dhe vajzave.
Gonzato nënvizoi se rritja e rolit të grave në media kërkon angazhim të strukturave mediatike për të krijuar më shumë mundësi dhe hapësira për gazetaret dhe profesionistet, ndërsa theksoi rëndësinë e transparencës dhe dialogut të hapur mes redaksive, gazetarëve dhe institucioneve për ruajtjen e pavarësisë së medias dhe rritjen e standardeve profesionale.
Ai ritheksoi mbështetjen e BE-së për Shqipërinë në mbrojtjen e fjalës së lirë dhe fuqizimin e grave në media, duke e konsideruar këtë një gur themeli për një shoqëri demokratike dhe të barabartë.
“Evropa qëndron përkrah Shqipërisë për të patur një fjalë të lirë, për të mbështetur gratë në media dhe të rritet dhe forcohet përfaqësia e tyre në media. Një dimension i rëndësishëm është edhe transparenca dhe një dialog i hapur për editorët, gazetarët dhe pavarësinë e medias”, tha Gonzato.
Prezantimi i gazetares së France 24, Annette Young, solli përvojën e saj të gjatë në median ndërkombëtare, duke dhënë një perspektivë të gjerë mbi zhvillimin e rolit të grave në këtë sektor.
Nga 25 nëntori deri më 10 dhjetor, bota bashkohet në një kauzë që prek themelet e çdo shoqërie: zhdukjen e dhunës me bazë gjinore
Miradije Statovci Psikologe Klinike
“16 ditët e Aktivizmit Kundër Dhunës me Bazë Gjinore”, nuk janë thjesht një periudhë ndërgjegjësimi; janë thirrja universale për mbrojtjen e dinjitetit njerëzor, për ndërgjegjësim kolektiv dhe për veprim të qartë kundër çdo forme abuzimi ndaj grave dhe vajzave
Si psikologe klinike dhe drejtuese e Klinikës Galaxy, kam parë nga afër histori që nuk e lejojnë shpirtin të heshtë. Gra që vijnë me buzëqeshje të lodhur, me ankth që u rëndon në kraharor dhe me sy që mbajnë brenda tyre më shumë histori sesa mund t’i thotë fjala. Shumë prej tyre e kanë duruar dhunën për vite të tëra, jo sepse nuk e dinë se po lëndohen, por sepse u është mësuar të besojnë se “ashtu është jeta”, se “kështu ruhet familja”, apo se “nuk kanë ku të shkojnë”. Të tjera nuk kanë pasur askënd që ua beson dhimbjen.
Dhunë nuk është vetëm grushti. Dhunë është fjala që të zvogëlon, kontrolli që të merr frymën, poshtërimi që të zbërthen vetëbesimin, izolimi që të shkëput nga familja, puna dhe jeta. Dhunë është kur viktima fajësohet për plagën, ndërsa abuzuesi justifikohet. Dhe ajo që e bën dhunën edhe më të rrezikshme është normalizimi i saj - momenti kur viktima fillon të besojë se meriton dhunën, se nuk ka të drejtë të kërkojë ndihmë, apo se askush nuk do t’i qëndrojë pranë.
Në punën time e shoh përditë se si dhuna nuk përcaktohet nga statusi, arsimi apo mosha. Ajo hyn në çdo derë, prek çdo familje, lë gjurmë në shëndetin mendor, në funksionin social, në zhvillimin e fëmijëve dhe shtrihet në gjenerata. Prandaj flasim. Sepse heshtja është aleate e dhunës. Heshtja i mbron abuzuesit, e dobëson viktimën dhe e dëmton shoqërinë. Flasim që të pranojmë realitetin, të edukojmë djem e vajza në frymën e respektit, të ndërtojmë institucione që reagojnë me përgjegjësi dhe të krijojmë rrjete mbështetjeje që nuk e lënë askënd vetëm.
Në klinikë takoj gra që kanë vetëm një kërkesë: të dëgjohen pa paragjykim. Disa janë në fazat e para të kontrollit emocional, të tjera kanë kaluar vite në cikle dhune. Disa kërkojnë vetëm një konsultë, të tjera kanë nevojë për një rrugëtim më të gjatë. Por të gjitha ndajnë një të vërtetë të përbashkët: dëshirën për të jetuar një jetë të denjë dhe të lirë.
Mesazhi im për çdo grua është i qartë: nuk je vetëm, nuk je fajtore, nuk je e dobët dhe nuk e meriton dhunën. Ke të drejtë të jetosh pa frikë, dhe ka profesionistë, institucione dhe gra që e kanë kaluar këtë rrugë dhe sot jetojnë të fuqizuara. Hapi i parë është të kërkosh ndihmë.
Ndërsa mesazhi im për shoqërinë është edhe më i drejtpërdrejtë: nëse duam të ndërtojmë një të ardhme më të sigurt për fëmijët tanë, së pari duhet të ndërtojmë një vend të sigurt për nënat, motrat, mësueset, koleget - për çdo grua. Sepse një shoqëri që nuk i mbron gratë, nuk ka të ardhme. /Telegrafi/
A mendoni se çdo burrë dhe grua duhet të gëzojnë të drejta të barabarta? Nëse përgjigjja është “Po!”, atëherë ju jeni për barazi gjinore.
Por pse ky koncept ka krijuar kaq shumë paragjykime dhe shqetësim së fundmi?
Në të vërtetë, diskutimi dhe miratimi i ligjit për barazinë gjinore u shoqërua me dizinformim dhe keqinterpretime të padrejta në Shqipëri.
U spekulua shumë se ky ligj ndryshonte gjininë, apo ligjëronte martesat e të njëjtit seks, nisur nga fakti se ishte një ligj që u përkrah nga komuniteti LGBT. Por Citizens ka shpjeguar disa herë se si qëndron e vërteta.
Së fundmi, disa fletpalosje të shpërndara në një shkollë 9-vjeçare në Tiranë nga punonjësit e shërbimit psiko-social kanë kthyer sërish të njëjtat spekulime.
Por, le ta analizojmë së bashku se çfarë përmbanin në të vërtetë këto fletëpalosje, të cilat alarmuan prindërit dhe grupet që evokojnë mbrojtjen e familjes tradicionale.
Në fletën e parë lexohet qartë: “Luftoni stereotipet, duke përfshirë edhe tuajin!”
Koncepti se gjinia është konstrukt social nuk është shpikur nga shërbimi psiko-social i shkollave 9-vjeçare në Tiranë. Ky shpjegim njihet nga kuadri rregullator i strukturave ndërkombëtare perëndimore, si Bashkimi Evropian, apo dhe Organizata e Kombeve të Bashkuara.
Më tej, fletëpalosja shpjegon gjithashtu se “turpi ndaj trupit është sjellje e mësuar”.
Të gjithë jemi të vetëdijshëm se komentet, bullizimi dhe presioni mbi mënyrën se si dukemi ndikojnë në zhvillimin tonë, në mënyrën se si e shohim veten dhe se si i qasemi shoqërisë. Ndaj kjo pikë është më se e nevojshme për t’u diskutuar në mjediset shkollore.
“Të dëgjojmë dhe mësojmë nga fëmijët tanë,” ishte mesazhi në një fletëpalosje tjetër. A nuk ishte filmi “Adolescence” ai që u vlerësua gjerësisht nga kritika pasi tronditi botëkuptimin prindëror në mbarë botën, duke treguar se sa pak i kuptojnë prindërit fëmijët e tyre në ditët e sotme?!
“Përqafoni modele të ndryshme!” është një tjetër mesazh i shpërndarë.
Çfarë do të thotë kjo? Do të thotë të pranojmë tjetrin pavarësisht ngjyrës, gjinisë apo etnisë. Në një botë që po globalizohet gjithnjë e më shumë, ku jemi ne ata që emigrojmë, por po ashtu presim punonjës dhe turistë nga e gjithë bota, a nuk duhet ta mirëkuptojmë dhe përqafojmë diversitetin?
Prandaj, njohja e fëmijëve me të ndryshmen nga vetja është hapi i parë drejt një bashkëjetese të suksesshme në komunitet.
Një tjetër mesazh i fletëpalosjes është ndarja e punëve të kujdesit. Gratë dhe vajzat, për shkak të marrjes përsipër të shumë detyrave në shtëpi si pastrimi, gatimi etj. humbasin ose përgjysmojnë mundësitë e tyre për edukim, karrierë dhe punësim, krahasuar me djemtë dhe burrat. Barazia gjinore synon pikërisht një ndarje të barabartë të detyrave dhe kontributeve familjare.
Dhe, së fundi, “Të fuqizojmë fëmijët të flasin hapur”. Shpesh gratë dhe vajzat kanë më pak hapësirë në sferën publike për shkak të mbivendosjes së burrave në fusha të rëndësishme të jetës si politika, media etj. Ky pasazh inkurajues u jep mundësi prindërve që të rrisin fëmijë në kushte dhe hapësira më të barabarta, pavarësisht gjinisë, për një shoqëri me shanse të barabarta.
Shpërndarja e një broshure nga shërbimi psiko-social i shkollës 9-vjeçare “Lidhja e Prizrenit” në Tiranë ka ndezur një debat të madh publik, duke krijuar një shqetësim të thellë jo vetëm mes prindërve, por në të gjithë opinionin shoqëror. Një material informues, i shpërndarë në grupet WhatsApp të prindërve me synimin zyrtar për “luftimin e stereotipeve gjinore”, ishte për familjarët një hyrje e papritur, e paqartë dhe e rrezikshme në një temë tepër të ndjeshme për moshat e ulëta. Pa transparencë, pa njoftim, pa konsultim, pa maturi institucionale.
Prindërit reaguan fort. Dikush u shpreh:
“Po fillojmë t’iu mësojmë fëmijëve që femrat mund të duken si burra dhe burrat si femra. Nëse ne lëvizim diskutimin e gjinisë nga biologjia, pra po hoqëm këtë që është bazë shkencore, konteksti social pas 50 vitesh mund të jetë ndryshe nga sot. Çfarë do të thotë, që do ndryshojmë prapë konceptin e gjinisë?”.
Të tjerë u shprehën të tronditur se si një fëmijë 6-vjeçar mund të përballojë një informacion të tillë:
“Duhej të na kishin njoftuar. Çfarë është kjo? A është zyrtare? A është e qëllimshme? Si t’ia shpjegoj unë? Ai është shumë i vogël”.
Përballë kësaj vale shqetësimi, psikologia e shkollës Irma Koçi u mundua të zbusë situatën, duke sqaruar se materiali nuk është trajtuar në klasa me nxënësit dhe se synon vetëm të udhëzojë prindërit për një rritje pa stereotipe. Sipas saj, keqinterpretimi vjen edhe nga fakti se prindërit kanë nivele të ndryshme kulturore e sociale. Megjithatë, ajo pranoi se fëmijët janë shumë të vegjël për tema të ngarkuara dhe se situata kërkon kujdes të posaçëm.
Por, pse pikërisht një material që prek çështje të gjinisë dhe identitetit gjinor shpërndahet pa strukturë, pa udhëzim qendror, pa hyrë më parë në fuqi ligji që e përcakton këtë fushë? Cilët janë ata që e miratojnë këtë qasje? Pse ndodh një veprim kaq i nxituar kur ligji për barazinë gjinore ende nuk është botuar në Fletoren Zyrtare dhe pret firmën e Presidentit? Kujt i intereson që debati t’i paraprijë ligjit dhe jo ligji t’i paraprijë debatit publik?
Kundërshtitë përshkuan edhe studiot televizive.
Teologu Kaon Serjani paralajmëroi “përplasje të pashmangshme mes prindërve dhe kurrikulave të reja”, duke shtuar se broshura është “e paligjshme para se ligji të hyjë në fuqi” dhe se kërkon nga prindërit të “bëhen me ne”, siç shprehet edhe teksti. Për të, kjo është një lëvizje e rrezikshme që shkëput gjininë nga biologjia dhe fut një ideologji të re në familjet shqiptare.
Analisti Arjan Curri e quajti broshurën “nxitim të papranueshëm”, një material që “i konsideron prindërit budallenj” dhe i ofendon. Ai paralajmëroi se nëse bie në duart e fëmijëve “do ishte kundër ligjeve të BE-së” dhe shtoi një paralajmërim të hidhur: “Do jetë tepër vonë kur fëmija të vijë dhe të thotë ‘O ba, unë ndihem gocë edhe pse jam çun’”.
Nga ana tjetër, psikologia Irida Rustemi mbrojti qasjen duke thënë se prindërit duhet të përshtaten me shoqërinë moderne dhe të kuptojnë identitetin që fëmija zgjedh për veten. Sipas saj, kjo qasje është ndërgjegjësuese dhe synon largimin e dhunës dhe diskriminimit, ndërsa rolet gjinore nuk duhet të jenë të ngurta. Ajo shpjegoi se identiteti gjinor fillon të formohet “që në moshën 0-3 vjeç”.
Në këtë pikë, Shqipëria gjendet para një dileme thellësisht shoqërore. Kurrikula gjinore nuk është një çështje që mund të futet tinëzisht në WhatsApp. Është një ndërhyrje e drejtpërdrejtë në familje, në formimin e fëmijëve, në identitetin e brezit që po rritet. Dhe asnjëherë më parë nuk kemi pasur një ndërhyrje kaq të menjëhershme, të paqartë dhe të pakontrolluar në një temë kaq delikate.
Rreziku nuk qëndron vetëm te përmbajtja, por edhe tek mënyra. Në mungesë transparence, e imponuar, në tentativë për indoktrinim.
Kush po merr vendime për fëmijët tanë? Kush ka vendosur se prindërit nuk duhen konsultuar?
Një letër e hedhur nuk na ndryshon as gjininë, as familjen, as mënyrën si rrisim fëmijët tanë. Ajo ndryshon vetëm diçka: Na kujton sa i rëndësishëm është zëri ynë dhe sa shpejt duhet të reagojmë sa herë dikush tenton të marrë vendime në emrin tonë.
Shërbimi psiko-social në shkollën 9-vjeçare “Lidhja e Prizrenit” në Tiranë ka shpërndarë një material informues në lidhje me luftimin e stereotipeve, gjë e cila ka shqetësuar prindërit, që një pjesë e tyre mendon se po deformon konceptin e gjinisë. “Po fillojmë t’iu mësojmë fëmijëve që femrat mund të duken si burra dhe burrat si femra. […]
TIRANË, 17 nëntor /ATSH/ Kryetari i Partisë Demokratike, Sali Berisha, kritikoi sot parlamentin për miratimin e ligjit “Për barazinë gjinore”, të cilin e cilësoi si kërcënim ndaj familjes dhe traditës shqiptare
Berisha deklaroi sot në protestën para Kryeministrisë, se atë ligj shqiptarët nuk do ta pranojnë kurrë.
Berisha u shpreh se ky ligj është kërcënim ndaj unitetit kombëtar.
“Ai ligj është shpërbërja e familjes. Po u shpërbë familja, Shqipëria shpërbëhet, kombi shpërbëhet, zhduket, siç janë zhdukur kombet në histori. Ndaj dhe ne sot këtu jemi të betuar se atë ligj nuk do ta pranojmë kurrë.”
Ai vuri në pah rëndësinë e familjes shqiptare si institucion themelor.
“Familja shqiptare do mbetet institucioni më i shenjtë i çdo shqiptari. Familja shqiptare do mbetet institucioni më i shenjtë i kombit shqiptar dhe Shqipërisë. Kjo familje, këtë komb e ka sjellë gjer ditën e sotme nga lashtësia”, tha Berisha, duke shtuar se, “kjo familje do mbrohet me çdo çmim. Do mbrohet me çdo çmim. Do mbrohet me çdo çmim”.
Gjithashtu Berisha e cilësoi foltoren e protestës së sotme si “platforma e një bashkimi më të madh se kurrë rreth vlerave më të shenjta, votës së lirë dhe familjes”.
Ai falënderoi pjesëmarrësit për përkushtimin e tyre gjatë katër viteve të fundit.
“Edhe një herë, nderimin më të madh për ju, burra dhe gra që keni katër vite të angazhuar në çdo betejë, të angazhuar në beteja ndër më të vështirat, por që i fituat, triumfuat mbi çdo të keqe, mbi çdo forcë, mbi çdo armik të pluralizmit politik në Shqipëri dhe qëndroni sot si dëshmitarë, si misionarë të vendosur për të rikthyer në Shqipëri votën e lirë”, u shpreh ai.
Ai bëri thirrje për bashkim të shqiptarëve rreth kësaj kauze.
“Të gjithë ju dhe ata të cilët nuk janë sot me ne për një arsye apo një tjetër, sepse nuk kanë pasur mundësi të vijnë, e keni për detyrë të ulemi me çdo shqiptar. Platforma parlamentaro-qytetare është platformë e qytetarëve shqiptarë, demokratë, pa parti, por edhe e socialistëve që e duan familjen, që e duan Shqipërinë, që e duan vendin”, tha Berisha.
Berisha theksoi se, “kjo platformë është platforma e një bashkimi më të madh se kurrë të shqiptarëve rreth vlerave më të shenjta të tyre, rreth votës së lirë, rreth familjes”.
Ish- ministri dhe deputeti Genc Pollo ka reaguar pas një shkrimi të publikuar nga Albert Nikolla, ish-zëvendësministër në një nga qeveritë e Edi Ramës, i cili ka kritikuar mënyrën se si është hartuar ligji “Për barazinë gjinore”. Në shkrimin e tij Nikolla ka bërë thirrje që ligji të kthehet për rishqyrtim në Kuvend, duke kërkuar […]
TIRANË, 15 nëntor/ATSH/ Kryetari i Partisë Demokratike, Sali Berisha deklaroi sot se ligji për barazinë gjinore instalon censurën ndaj PD do të kërkojë referendum për abrogimin e tij.
Në një komunikim online me qytetarë, Berisha u shpreh se ligji konsolidon një diktaturë të shëmtuar.
“Ky ligj nuk shkonfiguron vetëm familjen, që është gjëja më e rëndë që mund t’i ndodhë një personi dhe kombi. Por ky ligj instalon censurën. Ky ligj, njëlloj si në diktaturën komuniste, kërkon që i akuzuari të provojë se po akuzohet pa fakte dhe kot dhe jo ai që akuzon të paraqesë faktet”, u shpreh Berisha.
Kjo, sipas tij, “është njëlloj si në kohën e Partisë së Punës që të akuzonin si armik dhe duhet të provoje që nuk ishe armik”.
“Ligjin do e çojmë në Gjykatë Kushtetuese, por mos prisni ndonjë gjë se Gjykata Kushtetuese ka faktuar se është në kontroll, në tërësi jo në çdo akt. Ne do bëjmë gjithçka që ta zbërthejmë, ta qartësojmë para çdo qytetari këtë ligj dhe të kërkojmë referendum për abrogimin e tij”, shtoi ai.
Qytetarë dhe aktivistë janë mbledhur paraditen e sotme në një protestë kundër ndryshimeve ligjore që prekin konceptin e familjes dhe edukimin gjinor në shkolla. Me pankarta në duar ata janë mbledhur në Sheshin Skënderbej në një marshim paqësor, teksa kanë shprehur kundërshtinë e tyre në lidhje ligjin. Teologu Sokol Kondakçiu, në fjalën e tij para […]
Login
