TIRANË, 1 shkurt /ATSh/ Ministri i Drejtësisë, Besfort Lamallari, përshëndeti vendimin e Këshillit të Lartë Gjyqësor për miratimin e 41 vendeve vakante për ndihmës ligjorë në gjykatat e shkallës së parë dhe të apelit.

Lamallai theksoi se ky është një hap konkret që i shërben drejtpërdrejt uljes së stokut të dosjeve dhe përshpejtimit të dhënies së drejtësisë.

Sipas ministrit Lamallarit, ky vendim i shërben drejtpërdrejt uljes së stokut të dosjeve dhe përshpejtimit të procesit të dhënies së drejtësisë, një nga problematikat më të ndjeshme me të cilat përballet sot sistemi gjyqësor në vend.

“E shtrova nevojën e kësaj ndërhyrjeje edhe në takimin e së hënës për nisjen e vitit të ri gjyqësor. Shtimi i kapaciteteve dhe forcimi i burimeve njerëzore në sistemin tonë të drejtësisë nuk është thjesht një masë administrative, por një zgjedhje politike në funksion të qytetarëve, për një drejtësi më efikase, më të shpejtë dhe më të besueshme. Sigurisht edhe me standarde të panegociueshme demokratike njësoj si në vendet e Bashkimit Evropian”, theksoi Lamallari.

Këshilli i Lartë Gjyqësor, pas analizimit të situatës së sistemit gjyqësor dhe mundësive që ka Shkolla e Magjistraturës, miratoi numrin prej 10 kandidatë për magjistratë, profili gjyqtar dhe 6 kandidatë për ndihmës ligjorë në Gjykatat e Apelit dhe 35 kandidatë për ndihmës ligjorë në Gjykatat e Shkallës së Parë që do të pranohen në programin e formimit fillestar në Shkollën e Magjistraturës, për vitin akademik 2026-2027.

/m.q/j.p/

The post Lamallari: Miratimi i 41 vendeve vakante nga KLGJ, hap pozitiv për uljen e stokut të dosjeve appeared first on Agjencia Telegrafike Shqiptare.

TIRANË, 1 shkurt /ATSh/ Shkodra po shfaqet si një destinacion në rritje për turistët dhe bizneset e qirave afatshkurtra.

Kryetari i bashkisë së Shkodrës, Benet Beci, teksa ndau të dhënat e një raporti të publikuar nga revista “Monitor”, theksoi se këto të dhëna tregojnë një rrugëtim të qartë drejt suksesit për qytetin.

“Shkodra, “yll i ri në ngjitje”, kështu e ka titulluar Revista Monitor seksionin për Shkodrën në analizën e të dhënave të Airbnb mbi apartamentet me qira afatshkurtër.

“Një numër turistësh në rritje, të ardhura të kënaqshme dhe një dyfishim i njësive të disponueshme brenda vetëm një viti. Paralelisht rritja e numrit të bizneseve aktive e bën panoramën edhe më inkurajuese për ekonominë lokale në Shkodër”, shkruan Beci duke iu referuar shifrave të publikuara nga revista.

Beci shkruan se “këto të dhëna mund të mos i përshtaten narrativës së ndonjë deputeti të opozitës që flet për “mbyllje masive” biznesesh në Shkodër, por ky nuk është problemi ynë”.

Beci shtoi se faktet janë kokëforta pasi Shkodra sapo e ka nisur rrugëtimin e saj drejt suksesit dhe ka të gjitha arsyet për të besuar se do të shkojë atje ku i takon.

/m.q/j.p/

The post Beci: Shkodra, “yll i ri në ngjitje” në turizmin e qirave afatshkurtra appeared first on Agjencia Telegrafike Shqiptare.

TIRANË, 1 shkurt /ATSh/ Policia e Elbasanit njoftoi sot se në aksin rrugor Librazhd – Qafë Thanë, në vendin e quajtur Dragostunjë, si pasojë e rrëshqitjes së një masivi dheu dhe gurësh nga mali, qarkullimi i automjeteve është bllokuar plotësisht në të dyja drejtimet.

Policia bëri të ditur më tej se shërbimet e Policisë Rrugore ndodhen në këtë zonë dhe po bashkëpunojnë me firmën kontraktore të mirëmbajtjes së rrugëve për pastrimin në një kohë sa më të shpejtë të aksit rrugor me qëllim fillimin e lëvizjes së automjeteve.

Policia Rrugore e Elbasanit apelon për të gjithë që duan të udhëtojnë në drejtim të Korçës dhe anasjelltas të shmangin lëvizjen deri në një njoftim të dytë  për hapjen e rrugës.

/m.q/j.p/

The post Rrëshqitje gurësh në Dragostunjë, bllokohet qarkullimi në aksin Librazhd-Qafë Thanë appeared first on Agjencia Telegrafike Shqiptare.

TIRANË, 1 shkurt /ATSh/ Gjykata e Posaçme kundër Korrupsionit dhe Krimit të Organizuar, rrëzoi sot kërkesën e kryetarit të bashkisë së Tiranës, Erion Veliaj, për zëvendësimin e masës së sigurisë “arrest me burg”.

Kërkesa e Veliajt u shqyrtua sot nga gjyqtarja Etleva Deda dhe i pranishëm gjatë seancës ishte vetë kryebashkiaku.

Pas përfundimit të seancës, avokati Sokrat Gjermeni u shpreh se kryebashkiaku kërkoi detyrim paraqitje pesë herë në javë, madje edhe ofrimin e një shume monetare si garanci për lirimin, por kjo nuk u pranua nga gjykata.

“Kemi kërkuar që të caktohet një masë më e butë jo e “arrestit me burg” të cilën gjykata nuk e ka pranuar si kërkesë dhe e ka rrëzuar. Ishte dhe Veliaj. Ai ka deklaruar të njëjtat gjëra që janë parashtruar në kërkesë nuk ka dalë përtej aspekteve ligjore dhe si përfundim gjykata ka rrëzuar kërkesat”, tha avokati.

“U kërkuan disa masa, detyrim paraqitje, garanci pasurore, ndalim i daljes jashtë shtetit, të gjitha masat që janë të përshtatshme për të mbarvajtur hetimin që personi mos të largohet. Duke qenë se u rrëzua kërkesa nuk u shqyrtua opsioni i garancisë”, vijoi ai.

Sipas tij, prokuroria mbajti qëndrimin që masa e arrestit me burg duhet të vazhdojë pasi provat mund të manipulohen.

“Prokuroria mbajti qëndrimin se masa duhet të vazhdojë, sepse pavarësisht se kanë mbaruar hetimet provat përsëri mund të manipulohen. Kjo ishte logjika e prokurorisë për të cilën ne nuk jemi dakord sepse edhe një vendim njehsues i Gjykatës së Lartë thotë që provat sidomos ato shkresore, janë të tilla që nuk mund të ndryshohen, ndryshe nga provat e gjalla, që janë me dëshmitarët, por që edhe kjo logjikë nuk qëndron pasi vetë dëshmitarët nuk do të mund të ndryshojnë dëshmitë e tyre pasi edhe kjo përbën vepër penale për ta”, tha Gjermeni.

Kërkesa për ndryshimin e masës erdhi pas përfundimit të hetimit ndaj Veliajt dhe dërgimit të dosjes në gjykatë. Sipas SPAK, ndaj Veliajt rendojnë 13 akuza, të tilla si korrupsion pasiv në 9 raste, pastrim parash, mosdeklarim pasurie, shpërdorim detyre dhe futja e sendeve në burg. Po ashtu për gjykim është dërguar edhe bashkëshortja e tij Ajola Xoxa. Veliaj ndodhet në qeli prej pothuajse një viti. Ai u arrestua më 10 shkurt të vitit 2025.

/m.q/j.p/

The post GJKKO rrëzon kërkesën e Veliajt për zëvendësimin e masës “arrest me burg” appeared first on Agjencia Telegrafike Shqiptare.

TIRANË, 1 shkurt /ATSh/ Një grup kriminal i cili shiste armë zjarri në Tiranë, të trafikuara nga Kosova, është goditur nga policia e Tiranës.

Policia bëri të ditur se pas një hetimi dymujor u finalizua operacioni “Lockdown”. Sipas policisë “në kuadër të operacionit bazuar në informacionet e siguruara nga hetimi për disa shtetas që dyshohej se trafikonin armë zjarri, kryesisht nga Kosova në Tiranë, me qëllim shitjen, janë vënë në pranga shtetasit:Gloris Nezaj, Rezarto Rumi, Kelvin Caushi dhe Ardjan Caushi, banues në Tiranë”.

“Nga hetimet dyshohet se këta shtetas, pasi siguronin armë zjarri kryesisht nga Kosova, i sillnin ato në Tiranë dhe më pas modifikoheshin dhe magazinoheshin në Selitë”, njoftoi policia.

Gjatë kontrollit në ambientit e përshtatur, banesave të tyre,  policia sekuestroi 8 armë zjarri (5 pistoleta dhe 3 automatikë), pjesë të ndryshme armësh, një armë gjahu, krehra dhe municion luftarak, 3 radio si ato të policisë, jelek multifunksion dhe 9 celularë.

Nën drejtimin e Prokurorisë punohet për identifikimin dhe kapjen e personave të tjerë të përfshirë në këtë veprimtari kriminale.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

/m.q/j.p/

The post Trafik me armë zjarri nga Kosova në Tiranë, katër të arrestuar appeared first on Agjencia Telegrafike Shqiptare.

TIRANË, 1 shkurt /ATSh/ Mirëqënia shëndetësore e ndërlidhur me bukurinë fizike tashmë ka tërhequr vëmendjen prej vitesh edhe të qytetarëve shqiptarë, shumë prej të cilëve i drejtohen klinikave për ndërhyrje estetike por edhe që përmirësojnë të ndjerit mirë me veten.

Një prej këtyre klinikave është edhe Repeat Clinic, pjesë integrale e Repeat Group.

Sipas drejtuesve dhe sipërmarrësve të qendrës, klinika po konsolidohet si një nga qendrat më të avancuara të Wellness-it dhe mjekësisë rigjeneruese në vend, duke ofruar një qasje të integruar ndaj shëndetit, bukurisë dhe jetëgjatësisë.

Të ftuar në podkastin “Flasim” me kryeministrin Edi Rama, përfaqësues të klinikës treguan se Repeat është është themeluar në qershor të vitit 2017 me një filozofi të fortë për jetesën e shëndetshme.

“Klinika mjekësore Repeat është pjesë integrale e Repeat Group. Repeat Grup është themeluar rreth një dekadë në qershor 2017. Ka lindur si biznes me një filozofi shumë të fortë për jetën e shëndetshme. Ka nisur fillimisht me aktivitetin fizik, më pas me ushqimin e shëndetshëm, klinika është hapur në tetor të 2018 dhe më pas është finalizuar me shkollën e parë të instruktorëve.

“Repeat-përsëritje, nuk është vendosur pa arsye, ka të bëjë me disiplinën dhe qëndrueshmërinë. Kujdesi ndaj vetes nuk është destinacion, por është një proces dhe le të themi se është procesi më i rëndësishëm jetësor në jetën e njeriut”, tha përfaqësueja e klinikës.

Në Repeat Clinic ofrohen shërbime të avancuara të mjekësisë rigjeneruese, trajtime medikale dhe plane të personalizuara që synojnë përmirësimin estetik. Kirurgia plastike Vilma Tafilaj thekson se qasja e klinikës është gjithëpërfshirëse.

“Për mua është familje, nuk është vetëm klinikë dhe çdo person që vjen tek ne trajtohet njësoj, që jo vetëm të bësh një trajtim bukurie por të dalësh dhe te ndihesh më mirë me veten tënde. Unë kam 3 vite që jam prezentë, vendosa që të nis punë aty me një frymë inovative me dëshirën e madhe për të mësuar dhe për t’u përmirësuar çdo ditë”, u shpreh mjekja.

“Është një qendër Wallness-i, që nga ana e mjekësisë rigjeneruese nga ana e pjesë së trajtimeve më të avancuara, të trajtimeve medikale, mundohemi ta kapim shëndetin në të gjitha gradët, që jo vetëm të dukemi bukur nga jashtë por ta rikthejmë moshën tonë  mbrapsht, ta rikthejmë moshën tonë”, tha Tafilaj.

Sipas saj, vizioni afatgjatë është edhe më ambicioz.

“E mira e një plani të ardhshëm do ishte të bënim një spital për të rigjeneruar trupin tënd, pra të zgjasim jetën tonë dhe të rikthejmë pas moshën biologjike”, tha Tafilaj.

Ndërkohë, zhvillimi i klinikave të jetëgjatësisë po shihet edhe si një mundësi për turizmin shëndetësor në Shqipëri.

“E vërteta është se këto klinika të jetëgjatësisë kanë filluar bëhen gjithnjë e më prezente sidomos si komponent i destinacioneve turistike, sepse duke qenë prezentë ne destinacione turistike kanë kapacitetin që të krijojnë turizëm për 12 muaj dhe në Shqipëri ne kemi vende kaq të bukura, që janë shumë të bukura dhe në dimër, por nuk mund të bësh turizëm kur nuk ka një ofertë për mënyrën si do të kalosh ditët. Kështu që kjo do të ishte fantastike”, u shpreh Rama.

Në Repeat është bashkuar edhe një mjek italian, i cili prej tetë muajsh jeton dhe punon në Tiranë. Mjeku theksoi se fokusi i tij në Repeat lidhet me mikrobiomën dhe ushqyerjen e saktë.

“Kam ardhur këtu 8 muaj më parë. Cilësia e jetesës për mendimin tim në Tiranës është e lartë. Ndoshta, ose të paktën ajo që unë perceptoj në Tiranë, ka një energji shumë të madhe, njerëz me shumë entuziazëm, dëshirë për të punuar, dëshirë për t’u angazhuar, shumë sipërmarrës edhe të rinj. Pra një ambient që më tërhoqi dhe ku vendosa që të qëndroj. Unë erdha dhe fillova të punoj në grupin e spitaleve amerikane.

“Filluam një projekt të bukur. Unë jam marrë më kirurgji bariatrike, pra me pacientë obezë dhe kam qenë shumë pranë, nga ana kulturore me gjithçka që lidhet me ushqimin. Deri në 10 vitet e fundit jam fokusuar shumë tek mikrobioma e zorrëve. Ajo që bëj unë në REPEAT, lidhet pikërisht më mikrobiomën dhe më ushqyerjen e saktë, probiotikë dhe gjithë aktivitetin që synon gjendjen e mirë të shëndetit të trupit tonë, sepse mikrobiota lidhet me të gjitha funksionet e trupit dhe me sëmundjet metabolike, kardiologjike, imunitare, tumorale që shfaqen gjatë jetës”, tha mjeku italian.

Sipas tij, edhe kultura shëndetësore e pacientëve shqiptarë ka ndryshuar ndjeshëm.

“Kur vjen një pacient i informuar, që studion që kërkon shpjegime, rritet edhe kultura mjekësore. Dhe këtu ndjehet që ka ardhur momenti, edhe në kirurgji edhe në mjekësi”, tha doktori italian.

Sipërmarrësja theksoi se “është rritur numri i njerëzve që investon në cilësinë e jetës. Kujdesi ndaj vetës nuk është më luks, është domosdoshmëri, dhe shqiptarët e kanë kuptuar këtë”.

/m.q/j.p/

The post Shqiptarët po rrisin investimin në cilësinë e jetës appeared first on Agjencia Telegrafike Shqiptare.

TIRANË, 1 shkurt /ATSh/ Buxheti i mbrojtjes për vitin 2026 ka tejkaluar objektivin bazë të shpenzimeve, duke kaluar nivelin 2% të Prodhimit të Brendshëm Bruto, që do të thotë ka kaluar mbi pragun standard të përcaktuar nga NATO për vendet anëtare.

Kështu deklaroi kryeministri Edi Rama gjatë podkastit “Flasim”, teksa teksa renditi disa prej zhvillimeve kryesore të javës mes të cilave edhe deklarimet për buxhetin nga ana e ministrit të Mbrojtjes, Pirro Vengu.

Sipas Ramës, ky nivel shpenzimesh nuk përfaqëson thjesht një shifër që është më e lartë se sa pragu, por tregon një qasje proaktive ndaj detyrimeve të vendit, jo vetëm ndërkombëtarisht, por edhe për të zhvilluar një industri të re të mbrojtjes.

“Ministri i Mbrojtjes bëri me dije në një konferencë gjatë kësaj jave shumë detaje lidhur me buxhetin e mbrojtjes për vitin 2026, i cili e ka tejkaluar objektivin bazë të shpenzimeve për mbrojtjen, duke shkuar mbi 2% të prodhimit të brendshëm bruto, pra mbi atë pragun standard të NATO-s, që është edhe pragu standard për të gjitha vendet anëtare”, u shpreh Rama.

Ky nivel shpenzimesh tregon sipas tij, qasje proaktive edhe për të zhvilluar një industri të re të mbrojtjes.

Rama nënvizoi se buxheti i vitit 2026 përfaqëson investimin më serioz historikisht në sektorin e mbrojtjes dhe shënon fillimin e një kthese strategjike afatgjatë, e cila synon ndërtimin e kapaciteteve ushtarake dhe industriale në vend.

“Është buxheti me investimin më serioz në mbrojtje historikisht dhe këto përmasa financimi, struktura e financimit, flasin për fillimin e një kthese strategjike afatgjatë, që nuk kufizohet më në blerje pajisjesh apo thjesht në modernizim përmes blerjeve, por synon ndërtimin e kapaciteteve të qëndrueshme ushtarake dhe industriale këtu në vend dhe kjo qasje lidhet me një bazë vendore të industrisë së mbrojtjes, lidhet me investime në prodhim, jo vetëm për nevojat e brendshme, por edhe për eksport, lidhet transferim teknologjie dhe mirëmbajtje dhe lidhet në instancë të fundit me atë domosdoshmëri të prekshme, që tanimë mund ta adresojmë, sepse i kemi krijuar mundësitë”, tha Rama

Kreu i qeverisë shtoi se “është një Shqipëri tjetër me fuqi të tjera për të bërë të mundur që në sektorin e mbrojtjes shteti, jo thjesht të shpenzojë, pra, jo vetëm të shpenzojë, por edhe të fitojë dhe duke fituar të riinvestojë. Dhe duke investuar dhe riinvestuar, të rrisë edhe mundësitë për punësim cilësor të mirëpaguar”.

/m.q/j.p/

The post Rama: Buxheti për mbrojtjen këtë vit, mbi pragun standard të përcaktuar nga NATO appeared first on Agjencia Telegrafike Shqiptare.

TIRANË, 1 shkurt /ATSh/ Këtë javë u shpallën dëmshpërblimet për 15 bashki të prekura nga zjarret gjatë verës së kaluar, për periudhën 15 qershor – 15 shtator, përmes Agjencisë Kombëtare të Mbrojtjes Civile.

Kryeministri Edi Rama, gjatë podkastit “Flasim”, tha se bashkitë përfituese shtrihen nga veriu në jug të vendit, përfshirë Malësinë e Madhe, Krujën, Rrogozhinën, Peqinin, Tepelenën, Delvinën, Hasin, Kukësin, Dibrën, Kamzën, Librazhdin, Gramshin, Maliqin, Finiqin dhe Dropullin.

“Të gjitha këto territore të prekura nga zjarret kanë tanimë në dispozicion masën e përcaktuar të dëmshpërblimeve sipas dëmeve”, tha Rama.

Rama theksoi se procesi i vlerësimit dhe shpërndarjes së dëmshpërblimeve është realizuar përmes një pune të detajuar institucionale, duke garantuar që ndihma financiare të shkojë tek qytetarët e dëmtuar.

“Është bërë një punë shumë e detajuar dhe është krijuar më e rëndësishmja, e gjithë korniza për të bërë të mundur që dëmshpërblimi të shkojë aty ku duhet dhe cilido që është dëmtuar të marrë atë që i takon”, tha Rama.

/m.q/j.p/

The post Rama: Ndihmë financiare për qytetarët e dëmtuar nga zjarret e verës në 15 bashki appeared first on Agjencia Telegrafike Shqiptare.

TIRANË, 1 shkurt /ATSh/ Kryeministri Edi Rama në podkastin “Flasim” renditi disa prej zhvillimeve kryesore të javës, ku u ndal fillimisht te vizita e tij zyrtare në Izrael, ku ishte i ftuar nderi në seancën plenare të parlamentit izraelit, Knesset. Sipas tij, kjo ftesë përfaqësonte një vlerësim të madh për Shqipërinë dhe historinë e saj, veçanërisht për rolin e shqiptarëve në ndihmën ndaj hebrenjve.

Rama e cilësoi nder të rrallë ftesën si i ftuar nderi në seancën plenare të Parlamentit të Izraelit, Knesset ndërsa theksoi se kjo ftesë mbart një peshë të jashtëzakonshme politike dhe historike, në këndvështrimin e ligjvënësve të atij vendi.

“Në Jeruzalem, ishte Shqipëria që u vendos në piedestalin e respektit dhe përtej emocionit të madh personal, akoma edhe më i fortë ishte një emocion kombëtar, sepse ajo ftesë ishte një vlerësim i madh për Shqipërinë, për historinë e saj dhe për mënyrën se si gjyshërit tanë ditën të sillen kur historia vuri në provë njerëzimin dhe për natyrisht atë që Shqipëria është sot në arenën ndërkombëtare”, tha Rama.

Rama theksoi se fjala e tij në Knesset, ishte “fjala e një populli në fakt, që nuk dorëzoi askënd dikur dhe që sot, nga zemra e Izraelit, mundi të flasë me qartësi për dinjitet njerëzor, për kujtesë paqeje dhe për përgjegjësi në një botë të trazuar, ku feja duhet të jetë melhem dhe jo helm mes popujve dhe në gjirin e popujve”.

Rama përmendi gjithashtu edhe krijimin e Dhomës së Tregtisë Shqiptaro-Izraelite, si një hap konkret drejt forcimit të bashkëpunimit ekonomik mes dy vendeve.

“Në Izrael, ne hodhëm edhe një hap konkret drejt së ardhmes me themelimin e Dhomës së Tregtisë Shqiptaro-Izraelite, një instrument i ri bashkëpunimi që hap rrugë të reja për të ardhmen e përbashkët”, tha Rama.

Në përfundim, Rama e cilësoi vizitën si një gur themeli për marrëdhëniet mes dy vendeve, duke vlerësuar Izraelin për zhvillimin dhe ekspertizën në fusha kyçe.

“Kjo vizitë në thellësine e vet kishte një përmbajtje të atillë që i shërben, jo vetëm arsyeve pse u bë, por i shërben edhe të nesërmes, si një gur themeli për të ecur së bashku si një rrugë, ku ka plot arsye të paktën për ne nga ana jonë që t’i referohemi Izraelit, si një vend me zhvillim të jashtëzakonshëm, si një vend me ekspertizë të jashtëzakonshme, si një vend me realitete të jashtëzakonshme në fushën e teknologjisë, në fushën e bujqësisë, në fushën e sigurisë padiskutim dhe për të gjitha këto arsye unë jam vërtet krenar për atë që u bë në javën që lamë pas”, tha Rama.

/m.q/j.p/

The post Rama: Vizita në Izrael, gur themeli për marrëdhëniet mes dy vendeve appeared first on Agjencia Telegrafike Shqiptare.

TIRANË, 30 janar /ATSh/ Këshilli i Lartë Gjyqësor (KLGj), vendosi sot mos të nisë procedurën e verifikimit të statusit të gjyqtares Irena Gjoka, gjyqtare pranë Gjykatës së Posaçme të Shkallës së Parë të Korrupsionit dhe Krimit të Organizuar (GjKKO).

Më gjashtë vota kundër, anëtarët e Këshillit të Lartë Gjyqësor rrëzuan relacionin e përgatitur nga katër anëtarë të KLGj-së, pas materialit të dërguar nga Prokuroria e Përgjithshme në lidhje dënimin e Gjokës në Greqi për falsifikim dokumentesh.

Këshilli i Lartë Gjyqësor nuk pranoi ta merrte në shqyrtim çështjen me argumentin se dosja duhet t’i kalojë Inspektoratit të Lartë të Drejtësisë.

Media raportoi se Ridvan Hado, anëtar i KLGj-së, teksa po shpjegonte votën kundër u shpreh se këshilli ka rol aktiv vetëm në rastin kur shkaku i pazgjidhshmërisë, i papajtueshmërisë, ka lindur para fitimit të statutit.

“Në raste e tjera kur pazgjidhshmëria ka lindur pas fitimit të statusit, duhet t’i dërgohet ILD. Kështu kemi vepruar edhe në raste të tjera. Nuk kemi kushtet që ta marrim ne direkt, duhet t’ia dërgojmë ILD-së. Prandaj jam kundër relacionit”, tha Hado.

Prokuroria e Përgjithshme nisi verifikimin për gjyqtaren Irena Gjoka pas një shkrimi të publikuar në mediet greke se është dënuar në vendin fqinj për falsifikim dokumentesh.

Irena Gjoka ështe edhe gjyqtarja paraprake e dosjes “Partizani”, në të cilën është marrë i pandehur ish-kryeministri Sali Berisha.

/m.q/j.p/

The post KLGJ nuk pranon nisjen e procedurave për verifikimin e statusit të gjyqtares Irena Gjoka appeared first on Agjencia Telegrafike Shqiptare.

TIRANË, 30 janar /ATSh/ Ministri i Drejtësisë, Besfort Lamallari, tha sot se duhet të merren masa konkrete që vepra të lehta mos të ndiqen në kushtet e paraburgimit.

Gjatë një konferencë për gazetarët, ministri theksoi se veprat e lehta dhe me parrezikshmëri shoqërore që mund të dënohen deri në 3 vite, propozohen të mos ndiqen në kushte paraburgimi, në bazë të rastit.

Lamallari shtoi më tej se për veprat e mesme që kanë rrezikshmëri jo të theksuar, por duan vëmendje, propozohet rreth 1 vit paraburgim dhe për veprat e rënda rreth 2 vite.

“Tryeza e djeshme ishte një mundësi e shkëlqyer për të bërë bashkë të gjithë aktorët në vend. Një diskutim shumë informues dhe konstruktiv nga prezantimet që u bënë dhe janë përgatitur rekomandimet, ku me të drejtë thuhet që ka ardhur koha që Shqipëria të përfaqësojë plotësisht standardet e kërkuara nga Gjykata Evropiane e të Drejtave të Njeriut, po ashtu të zbatueshme në nivel të vendeve anëtare të Këshillit të Evropës, atyre që ne duam t’u përafrohemi, ku erdhën me masa konkrete për pragun që duhet të zbatohet për masa të caktuara, duke i ndarë në vepra të lehta e të rënda, pasi nuk ka kuptim që veprat e lehta të ndiqen në kushte paraburgimi, përkundrazi ata janë kosto humane, financiare, njerëzore dhe nuk përbëjnë kurrfarë rreziku që mund të citohet apriori në vendimet e gjykatave, për të njohur këtë kërkesë të prokurorisë, për futjen në paraburgim të personave, për veprat e lehta dhe me parrezikshmëri shoqërore.

“Ata vijnë me një propozim konkret që për veprat e dënueshme deri në 3 vite mos të aplikohet, duke e parë rast pas rasti dhe kjo kërkon një analizë të theksuar se cilat janë veprat që mund të dënohen deri në 3 vite, por për nga natyra mund të përjashtohen nga ky rishikim dhe nga ana tjetër ata prekën me të drejtë, kufijtë deri ku mund të aplikohet masa e paraburgimit për një person, si për 1 vit maksimumi për vepra të mesme që ato i klasifikuan, pra të një rrezikshmërie jo e theksuar, por që kërkon vëmendjen e autoriteteve, apo deri në 2 vite për veprat e rënda. Kjo nënkupton një përgjegjësi të shtuar edhe për organet e drejtësisë që të kryejnë veprime hetimore dhe në kohën më të shpejtë të mundshme, pasi drejtësia e vonuar është drejtësi e mohuar”,  tha Lamallari.

Ministri i Drejtësisë, deklaroi se propozimet për paraburgimin, vijnë për shkak se ka një numër shumë të lartë njerëzish, të cilët ndodhen të paraburgosur dhe ende presin një vendim fajësie.

/m.q/j.p/

The post Lamallari: Veprat penale të dënueshme deri në 3 vite të mos ndiqen në paraburgim appeared first on Agjencia Telegrafike Shqiptare.

TIRANË, 30 janar /ATSh/ Kryetari i Partisë Demokratike, Sali Berisha, gjatë konferencës me gazetarët ditën e sotme njoftoi datën e re të protestës kombëtare që do të zhvillojë opozita.

Berisha tha se më datën 10 shkurt, në orën 17:00, në Tiranë do të zhvillohet protestë masive, duke e cilësuar revoltën qytetare si të vetmen rrugë për largimin e qeverisë së kryeministrit Edi Rama duke ftuar qytetarët të bashkohen me opozitën.

“Revolta dhe vetëm revolta është përgjigja e merituar e sovranit ndaj këtij grupi që nuk ka ligj, kushtetutë e as moral. Revolta dhe vetëm revolta është rruga e daljes, e përmbysjes së diktaturave autokratike, njëlloj si në vendet e tjera”, tha Berisha.

Gjatë fjalës së tij, Berisha akuzoi qeverinë për korrupsion, vjedhje dhe kapje të shtetit, duke e quajtur atë një organizatë kriminale dhe duke kërkuar krijimin e një qeverie teknike dhe zhvillimin e zgjedhjeve të ndershme.

Berisha deklaroi se opozita mbështet iniciativën e një grupi intelektualësh për bashkimin e forcave opozitare.

“PD ka mbështetur plotësisht iniciativën e këtij grupi intelektualësh të cilët janë të përkushtuar për bashkimin e të gjitha forcave politike opozitare dhe faktorëve të tjerë në betejë, kundër qeverisë”, u shpreh Berisha.

Berisha përjashtoi çdo bashkëpunim me mazhorancën, duke e lidhur atë me mbrojtjen e aferave korruptive dhe bllokimin e drejtësisë.

Në reagim ndaj deklaratave të raportuesit të Parlamentit Evropian për Shqipërinë, Andreas Schieder, Berisha u shpreh se BE duhet të kërkojë respektimin e standardeve evropiane, veçanërisht dorëheqjen dhe heqjen e imunitetit të zyrtarëve të lartë kur përballen me hetime penale, duke e cilësuar këtë si standard etik dhe moral të domosdoshëm në një shtet ligjor.

/m.q/j.p/r.e/

The post Berisha: Revolta qytetare e vetmja rrugë për largimin e qeverisë, protestë më 10 shkurt appeared first on Agjencia Telegrafike Shqiptare.

TIRANË, 30 janar /ATSh/ Pasuritë e përfituara nga aktivitete kriminale po kthehen në shërbim të komunitetit dhe arsimit profesional. Në Shkollën e Mesme Profesionale në Kamzë, më e madhja në vend, janë pajisur 7 klasa me bazën e nevojshme materiale, duke krijuar kushte më të mira për procesin mësimor.

Ministrja e Punëve të Brendshme, Albana Koçiu, ministrja e Ekonomisë dhe Inovacionit, Delina Ibrahimaj, kryeadministratorja e AAPSK, Risena Xhaja, së bashku me kryetarin e bashkisë Kamzë, Rakip Suli dhe drejtues të arsimit profesional vizituan klasat e pajisura me logjistikën e nevojshme për zhvillimin e praktikës profesionale.

Duke u ndalur te burimi i këtyre pajisjeve, ministrja theksoi rëndësinë e përdorimit të aseteve të sekuestruara në funksion të interesit publik.

“Po bëjmë të mundur që të gjithë pasuritë edhe asetet që janë vendosur në formë kriminale apo për shkak të korrupsionit, pra aktiviteteve të paligjshme, të gjithë këto pasuri tashmë po kthehen në dobi të komunitetit, në dobi të qytetarëve, të atyre që kanë më shumë nevojë dhe në dobi të shoqërisë”, nënvizoi Koçiu.

Ministrja e Ekonomisë dhe Inovacionit, Delina Ibrahimaj pohoi se sot çdo gjë po shkon drejt inovacionit, ndaj duhen krijuar sa më shumë kapacitete në këtë sektor.

“Fokusi ynë është që shkollat profesionale t’i përmirësojmë, jo vetëm në drejtim të cilësisë së mësimdhënies e të shkollimit, por edhe në drejtim të ambienteve e të pajisjeve, të laboratorëve, pasi pa këto të fundit, sado i mirë të jetë edukimi apo cilësia e mësuesve, nuk arrihen dot rezultate. Ne jemi përqendruar në strukturat e mësimdhënies, laboratorët, por edhe konviktet, pasi ka raste që nxënës apo studentë që duan të ndjekin arsimin profesional nuk kanë pranë qendrave të banimit shkolla, por do bëjmë që konviktet të jenë me kushte të mira. IT sot është çelësi i suksesit për çdo të ri e të re. Nuk ka asnjë institucion publik apo privat, që të mos ketë nevojë për këtë sektor”, u shpreh Ibrahimaj.

Ajo nënvizoi se këto rezultate janë fryt i një përpjekjeje të përbashkët institucionale, falë bashkëpunimit të ngushtë mes institucioneve ligjzbatuese. Bashkëpunimi pozitiv mes Ministrisë së Punëve të Brendshme, SPAK, BKH dhe prokurorive ka mundësuar administrimin e shpejtë dhe efikas të pasurive të vendosura në mënyrë të paligjshme, si dhe ndërtimin e bazës së nevojshme ligjore, duke garantuar që iniciativa të tilla të shtohen në të ardhmen.

Në vijim, Koçiu theksoi se fokusi do të jetë mbështetja e pushtetit vendor dhe shtresave në nevojë, përmes përdorimit social të këtyre aseteve.

“Ne do të mbështesim pushtetin vendor, duke ofruar mundësi, hapësira, edhe për strehim social, edhe për qendra sociale e rezidenciale, për shërbime sociale për shtresa në nevojë e sigurisht edhe për fëmijët e të rinjtë. Prandaj zgjodhëm shkollën profesionale këtu në Kamëz, që është një model për nga mënyra se si funksionon në fakt, për ta mirëpajisur me qëllim që ju të vazhdoni të aftësoheni akoma më shumë”, theksoi Koçiu.

Në përfundim, ministrja e Punëve të Brendshme përcolli një mesazh të qartë kundër kriminalitetit dhe korrupsionit.

“Unë doja të jepja një mesazh të fortë për të gjithë ata që zgjedhin të merren me aktivitete kriminale e që mendojnë se nëpërmjet tyre do të pasurohen, tashmë nuk mund ta bëjnë këtë”, apeloi ajo.

Përveç humbjes së lirisë, pasuritë e përfituara në mënyrë të paligjshme nuk do të gëzohen nga autorët, por do t’i kthehen shoqërisë dhe komunitetit. Duke iu drejtuar nxënësve, Ministrja uroi suksese dhe shprehu kënaqësinë që këto investime po përkthehen në motivim dhe mundësi reale për të rinjtë, duke i inkurajuar ata që në të ardhmen t’i shohim edhe si pjesë të administratës publike.

/m.q/j.p/

The post Koçiu: Investime në shkollën profesionale në Kamzë nga asetet e sekuestruara kriminale appeared first on Agjencia Telegrafike Shqiptare.

TIRANË, 30 janar /ATSh-Marseda Qefalia/ Qeveria shqiptare ka parashikuar një masterplan me qëllim rritjen e sigurisë në institucionet e drejtësisë, përmes përmirësimit dhe modernizimit të infrastrukturës gjyqësore. Investimet synojnë krijimin e një mjedisi më të sigurt për zhvillimin e proceseve gjyqësore si dhe rritjen e standardeve të aksesit në godinat e gjyqësorit.

Kështu bëri të ditur ministri i Drejtësisë, Besfort Lamallari, i pyetur nga Agjencia Telegrafike Shqiptare (ATSh) gjatë një konference për shtyp, në lidhje me përmirësimin e infrastrukturës gjyqësore për të rritur sigurinë në gjykata.

“Siç e ka lançuar dhe kryeministri, qeveria shqiptare ka vizionin e qartë dhe angazhimin e plotë për të vijuar me masterplanin e godinave të gjyqësorit, ku përfshihen jo vetëm gjykatat, por edhe prokuroritë”, tha Lamallari.

Lamallari nënvizoi se Ministria e Drejtësisë ka udhëhequr procesin e mbledhjes së informacionit nga gjykatat dhe prokuroritë në të gjithë vendin, duke evidentuar problematikat aktuale, përfshirë sigurinë e objekteve dhe mungesën e hapësirave të përshtatshme për ushtrimin e detyrës.

“Ministria e Drejtësisë ka kryesuar punën për mbledhjen e informacionit të disponueshëm nga gjykata dhe prokuroritë në të gjithë vendin, si në kuptim të gjendjes aktuale, ku përfshihet dhe siguria dhe hapësirat e pamjaftueshme për ushtrimin e detyrës, por edhe pritshmëritë e tyre për nevojat si në kuptim të hapësirave fikse, si për stafet që punojnë aty, për gjyqtarë, prokurorët, stafet ndihmës dhe ato për arkivimin e dosjeve”, u shpreh ai.

Lamallari theksoi gjithashtu se po shqyrtohen modele të suksesshme ndërkombëtare, kryesisht nga Italia dhe vende të tjera evropiane, ku funksionojnë të ashtuquajturat “parqe të drejtësisë”, ku institucionet e drejtësisë janë të përqendruara në një hapësirë të përbashkët.

“Por, nga ana tjetër, duke parë edhe modele të ndryshme që ekzistojnë kryesisht në Itali, por edhe në vende të tjera, të parqeve të drejtësisë, ku bëhen bashkë të gjitha këto institucione, të cilat në fund të ditës, jo vetëm është e lehtë dhe më praktike, në kuptim të përditshmërisë të punës të gjyqtarëve dhe prokurorëve të cilët e ushtrojnë aktivitetin në një ambient të përbashkët, por edhe të aksesit në drejtësi për qytetarët. Nuk ka kuptim që një qytetar i cili i nënshtrohet një procesi gjyqësor të shkojë sa në prokuroi, më pas të bëjë disa kilometra për të shkuar në gjykatë”, tha ai.

Megjithatë, Ministri i Drejtësisë theksoi se bëhet fjalë për një reformë masive, e cila do të zbatohet për herë të parë në Shqipëri dhe kërkon financim dhe kohën e nevojshme që të jetë sa më e koordinuar.

“Por duhet të jemi realistë që kjo është një reformë masive, që do të implementohet për herë të parë në Shqipëri dhe kërkon jo vetëm mbështetje të fortë financiare, për të cilën qeveria shqiptare është angazhuar, por kërkon edhe kohën e nevojshme, në mënyrë që të jetë sa më e koordinuar, duke prioritizuar këtu ato gjykata dhe prokurori që janë në gjendje më emergjente për ndërhyrje.

/m.q/j.p/r.e/

The post Lamallari për ATSh: Masterplan për përmirësimin e godinave të gjyqësorit, rritje e sigurisë appeared first on Agjencia Telegrafike Shqiptare.

TIRANË, 30 janar /ATSh/ Policia e Shtetit, nëpërmjet Drejtorisë së Hetimit të Krimit Kibernetik, informoi sot qytetarët në lidhje me raste të mashtrimeve online që kanë të bëjnë me oferta të rreme për kredi.

Sipas policisë “janë evidentuar raste kur persona të panjohur, përmes faqeve të dyshimta në internet, rrjeteve sociale apo mesazheve elektronike, paraqiten si përfaqësues të institucioneve financiare dhe i nxisin qytetarët të aplikojnë online për kredi, me qëllim përfitimin monetar në mënyrë mashtruese”.

Policia nënvizon se këto oferta janë mashtruese dhe synojnë përvetësimin e të dhënave personale dhe financiare të qytetarëve.

Policia e Shtetit këshillon qytetarët që “të tregojnë kujdes të shtuar dhe të mos dërgojnë para, të dhëna bankare apo dokumente personale te persona të paidentifikuar apo faqe interneti të pasigurta; Përpara se të aplikojnë për kredi pranë institucioneve financiare, të verifikojnë gjithmonë informacionin; Të komunikojnë drejtpërdrejt me personelin bankar, duke përdorur vetëm kontaktet zyrtare të publikuara në faqet zyrtare të bankave përkatëse, veçanërisht në rastet kur nuk kanë mundësi të paraqiten fizikisht në degët bankare”.

Gjithashtu policia fton qytetarët që çdo rast të dyshuar për mashtrim ta denoncojnë menjëherë pranë Policisë së Shtetit, me qëllim parandalimin dhe hetimin e këtyre veprave penale.

/m.q/j.p/

The post Policia apel qytetarëve: Kujdes me mashtrimet online, oferta të rreme për të marrë kredi appeared first on Agjencia Telegrafike Shqiptare.

TIRANË, 29 janar /ATSh/ Ministri i Drejtësisë, Besfort Lamallari thirri sot një konferencë të nivelit të lartë me temë “E drejta për liri dhe siguri personale – nga Strasburgu te zbatimi në nivel kombëtar”, me fokus të veçantë adresimin e problemit të paraburgimit.

Pjesëmarrës në këtë takim ishte edhe Gianluca Esposito, drejtor i përgjithshëm për të Drejtat e Njeriut dhe Sundimin e Ligjit, Këshilli i Evropës, si dhe Nicola Lettieri, zëvendësprokuror i përgjithshëm në Gjykatën e Lartë të Kasacionit të Italisë dhe Theo Byl – gjyqtar në Gjykatën e Apelit të Antwerp në Belgjikë. Në fjalën e tij, ministri i Drejtësisë tha se çështja e paraburgimit përbën një nga sfidat më të ndjeshme dhe më domethënëse për vendin tonë.

“Të dhënat flasin qartë: përdorimi i tepruar i masës së paraburgimit nuk është vetëm një problem statistikor, por një problem thelbësor i të drejtave të njeriut, i prezumimit të pafajësisë dhe i proporcionalitetit të ndërhyrjes së shtetit. Për fat të keq, Shqipëria vazhdon të mbajë një nga përqindjet më të larta të paraburgimit në Europë. Aktualisht, rreth 58% e personave në institucionet penitenciare janë të paraburgosur dhe kohëzgjatja mesatare e qëndrimit të tyre në paraburgim llogaritet në 253 ditë, krahasuar me 155 ditë në vendet evropiane, apo 63% më e lartë! Pra, mbi gjysma e personave që ndodhen në burgjet tona janë ende pa një vendim të formës së prerë, për më tepër, për një kohë shumë herë më të gjatë se ajo e zbatueshme në vendet e Bashkimit Evropian. Ndërkohë, në Bashkimin Evropian mesatarisht vetëm 1 në çdo 5 persona në sistemin penitenciar është i paraburgosur”, tha ministri Lamallari.

Në vijim, ministri i Drejtësisë u shpreh se Shqipëria, si vend kandidat për anëtarësim në Bashkimin Evropian, duhet të ndahet njëherë e mirë nga mendësia dhe politika e ashpër penale, e trashëguar nga e shkuara dhe të afrohet me atë të familjes në të cilën synojmë të aderojmë së shpejti.

“Tema e kësaj konference na fton të bëjmë pikërisht këtë, dhe koha më e mirë është tani: Kodi i Ri Penal do duhet të reflektojë marzhet e dënimit të zbatueshme në Bashkimin Evropian për të njëjtat vepra penale; Kodi i Procedurës Penale, do duhet ndryshuar për të garantuar qartë dhe pa ekuivok të njëjtat garanci procedurale për lirinë dhe sigurinë e personit, sipas standardeve të Konventës Evropiane për të Drejtat e Njeriut dhe vendimet e Gjykatës Evropiane për të Drejtat e Njeriut”, deklaroi Ministri i Drejtësisë.

Në vijim Lamallari theksoi se bashkëpunimi ynë me Këshillin e Evropës dhe partnerët ndërkombëtarë është thelbësor në këtë rrugë. Jurisprudenca e Strasburgut nuk duhet parë si kritikë nga jashtë, por si udhërrëfyes për përmirësim të brendshëm.

Ndërkohë që dy magjistratët e pranishëm në takim, falë njohjes shumë të mirë të gjendjes në Shqipëri, kanë përgatitur për llogari të Këshillit të Europës dy raporte mjaft të vlefshme, me gjetje dhe rekomandime për Kodin Penal dhe Kodin e Procedurës Penale në Shqipëri, dokumente të cilat janë vënë në dispozicion të të gjithë pjesëmarrësve në këtë takim.

/m.q/j.p/r.e/

The post Lamallari: Të ndahemi nga mendësia dhe politika e ashpër penale appeared first on Agjencia Telegrafike Shqiptare.

TIRANË, 29 janar /ATSh/ Në mbledhjen e Konferencës së Kryetarëve, Partia Socialiste ftoi opozitën që të marrë pjesë në Komisionin e Posaçëm të Reformës Territoriale.

Gjatë diskutimeve, kreu i grupit parlamentar në Partinë Socialiste, Taulant Balla, tha se mbledhja e radhës së komisionit të thirret ditën e hënë dhe nëse opozita nuk merr pjesë në seancë, mazhoranca do të gjejë mekanizmat për të vijuar punën e komisionit.

“Mbledhja e radhës së Komisionit të thirret ditën e hënë. Nëse opozita bojkoton edhe mbledhjen e ditës së hënë, atëherë në seancë do vendosim mekanizmin zhbllokues. Reforma do të bëhet doni apo nuk doni ju”, tha Balla.

Nga ana tjetër, kreu i grupit parlamentar në Partinë Demokratike, Gazment Bardhi, tha se nuk është bojkotuar mbledhja, pasi në dy data që kanë qenë për mbledhje, nuk kanë qenë anëtarët e opozitës sepse kanë pasur angazhime të tjera.

“Ne ju themi se duhen procese konsensuale, hajdeni të gjejmë mekanizma dialogu, nën frymën e rekomandimeve të BE-së. Ju thoni: jo! Hajdeni këtu, flisni kot, ne do të bëjmë çfarë të duam. Për çfarë ju duhet opozita në tryezë? Për të shitur ju fasadën sikur çdo gjë funksionon normalisht”, u shpreh Bardhi.

“Nuk është asgjë normale. Ju e dini këtë dhe çdo mik i yni ndërkombëtar e di. Në gjithë sjelljen tuaj keni bërë të kundërtën e asaj që keni thënë publikisht për konsensus dhe konstruktivitet. Ju nuk keni qëllim qytetarët, por hartën elektorale. E bëtë këtë në vitin 2014 dhe e pamë se çfarë bëtë, duke shkatërruar pushtetin vendor dhe duke dëmtuar qytetarët”, tha Bardhi.

Mazhoranca ka propozuar ndryshimin e përbërjes së Komisionit të Posaçëm Parlamentar për Reformën Administrativo – Territoriale, që të marrë shumicën e numrit të anëtarëve.

/m.q/j.p/

The post Balla propozon mbledhjen e komisionit për Reformën Territoriale të hënën, Bardhi: Opozita ju duhet për fasadë appeared first on Agjencia Telegrafike Shqiptare.

TIRANË, 29 janar /ATSh/ Ministrja për Punët e Brendshme, Albana Koçiu, ndodhet në Maqedoninë e Veriut, nga ku zhvilloi një takim me zëvendëskryeministrin Bekim Sali.

Sipas Koçiut, vizita vjen në një moment kur rajoni ka më shumë se kurrë nevojë për bashkëpunim të mençur dhe veprim konkret.

Koçiu theksoi se gjatë takimit u diskutua për “projekte që nuk mbeten në letër, por që prekin drejtpërdrejt jetën e njerëzve: nga zhvillimi ekonomik te lidhjet mes komuniteteve dhe ndërtimi i partneriteteve afatgjata përtej kufijve formalë”.

“Shqiptarët në Maqedoninë e Veriut janë një forcë lidhëse e pazëvendësueshme dhe një garanci reale për stabilitet, dialog dhe orientim evropian. Rruga jonë është e përbashkët dhe e ardhmja ndërtohet me besim, bashkëpunim dhe vizion”, theksoi Koçiu.

Gjithashtu, Koçiu u takua në Tetovë me kryetarin e Bashkimit Demokratik për Integrim, Ali Ahmeti, të cilin e cilëson si “mik i vjetër dhe një zë që gjithmonë e ka Shqipërinë në zemër”.

“Një figurë që e njeh nga përvoja personale peshën e historisë dhe çmimin e identitetit tonë kombëtar”, theksoi Koçiu.

Koçiu nënvizoi se zhvilluan një bisedë të hapur “për vizionin që na bashkon, për përgjegjësinë që kemi ndaj shqiptarëve kudo që jetojnë dhe për nevojën që lidhjet mes nesh të mbeten të forta, të sinqerta dhe të qëndrueshme”.

“Mirënjohje Aliut për urtësinë dhe qëndrueshmërinë duke mbetur gjithmonë një pikë orientimi në forcimin e marrëdhënieve mes Shqipërisë dhe Maqedonisë së Veriut”, shkruan Koçiu.

Koçiu ishte e shoqëruar në këtë vizitë edhe nga drejtori i Përgjithshëm i Policisë së Shtetit, Ilir Proda.

1 nga 9

/m.q/j.p/

The post Koçiu në Maqedoninë e Veriut, takime me zëvendëskryeministrin Sali dhe kreun e BDI-së appeared first on Agjencia Telegrafike Shqiptare.

TIRANË, 29 janar /ATSh/ Kryetari i Partisë Demokratike, Sali Berisha, në konferencë për shtyp pas vizitës në Strasburg u shpreh se situata në vend që e cilësoi katastrofale, do rregullohet vetëm me protestat qytetare.

Berisha paralajmëroi protestë tjetër kombëtare pas asaj të 24 janarit.

Kreu i PD-së deklaroi se opozita është e vendosur që të përballet “dhëmb për dhëmb” me këtë regjim.

“Jehona e protestës ishte e fuqishme. Pritej nga miqtë tanë protesta e dytë, po me aq insistim sa ç’pritet nga të gjithë opozitarët shqiptarë. Qytetarët do flasin shumë shpejt dhe ne do informojmë për protestën më të fuqishme që ka njohur Tirana dhe Shqipëria në ditët në vijim”, tha ai.

Berisha ftoi qytetarët dhe opozitën që të vazhdojnë “këtë betejë gjer në fitoren tone”. Sipas tij, shpresa e vetme është opozita.

I pyetur në lidhje me imunitetin e deputetes Belinda Balluku, Berisha tha se “Edi Rama po tërheq zvarrë dhe poshtëron Gjykatën Kushtetuese”.

Sipas Berishës, Gjykata Kushtetuese nuk duhet të shqyrtonte çështje pa kaluar në Apel dhe në Gjykatën e Lartë.

Ai shtoi se “vetëm protesta është rruga e vetme, shpresa e vetme që shqiptarët t’i japin narkodiktatorit atë që i dhanë dikur diktaturës së parë”.

“Prandaj dhe do flasin qytetarët. Është koha e qytetarëve tani, nuk ka asnjë surprizë”.

Berisha tha se Rama duhet të japë dorëheqjen e të largohet menjëherë nga qeveria.

“Të japë dorëheqjen dhe të krijojë qeveri teknike për të bërë zgjedhje dhe të mos bllokohet drejtësia”, përfundoi kreu i Partisë Demokratike. /m.q/j.p/

The post Berisha: Protestë e dytë kombëtare, koha të flasin qytetarët appeared first on Agjencia Telegrafike Shqiptare.

TIRANË, 29 janar /ATSh/ Në Komisionin për Çështjet e Brendshme dhe të Mbrojtjes, deputeti i Partisë Demokratike, Isuf Çelaj, ngriti shqetësimin në lidhje me sjelljen e policisë gjatë protestës së opozitës më 24 janar.

Çelaj theksoi se qëndrimi i “forcave të policisë ndaj protestës së opozitës, ka qenë jo korrekt dhe joproporcional me shkallën e veprimit të protestuesve”.

Deputeti demokrat kërkoi nga kryetari i komisionit, Bledi Çuçi, që të mbajë qëndrim në lidhje me fjalët e përdorura nga kryetari i grupit parlamentar të PS-së në parlament, sipas tij, të papërshtatshme.

“Ata janë njerëz që dalin aty për të protestuar kundër korrupsionit tuaj në këto 13 vite, kundër moszbatimit të ligjit, kundër shpopullimit, kundër diskriminimit, kundër varfërisë. Dalin për të luftuar ndryshimin dhe sjelljen e Shqipërisë në binarët e ligjit. Arrestuan fëmijë 10-vjeçarë dhe ministrja del dhe thotë se qëlloi me gurë policinë”, tha ai.

Shqetësimit të deputetit demokrat iu përgjigj ministri i Shtetit për Marrëdhëniet me Parlamentin, Toni Gogu, i cili deklaroi se qëndrimi i qeverisë është i qartë dhe i pandryshuar, respekton protestën si një të drejtë kushtetuese.

“Një sqarim për sa i përket insinuatës që ju ngritët ose ankesës që ngritët me të drejtë në fillim të kësaj seance për sa i përket protestës dhe protestuesve. Dua t’ju them që qeveria shqiptare respekton pafundësisht protestën është e drejtë kushtetuese.”

Ministri rikujtoi ngjarjet e 21 janarit dhe përkujtimin çdo vit të  4 dëshmorëve të atdheut.

“Nga ana tjetër ju e keni parë që si forcë politike në çdo janar të nderojmë protestues të paqtë që janë vrarë me duar në xhepa në mes të bulevardit dhe, duke pritur që drejtësia shqiptare të vendosë atë të drejtë të mohuar për shumë vite dhe që është një plagë që rrjedh ende gjak atje. Në nivel personal, ju e dini që unë i përkas një tradite fetare që protestën e ka gjenezën e vet”, tha ministri i Shtetit, në përgjigje të deklaratave të opozitës.

Në vijim të diskutimeve në Komision, Ministri i Shtetit për Marrëdhëniet me Parlamentin iu përgjigj edhe aludimeve për keqmenaxhim dhe korrupsion, duke theksuar se Shqipëria ka kaluar në një fazë tjetër falë reformës në drejtësi dhe vullnetit politik.

“Nuk është që nuk ka pasur abuzime në 2013, por sot për shkak të këtij vullneti politik dhe për shkak të asaj reforme në drejtësi, ne mund të parandalojmë përmes administrimit, gjë që po ndodh,” deklaroi ministri.

Sipas tij, projektet e financuara nga Bashkimi Europian dhe instrumentet IPA po shërbejnë jo vetëm për zhvillim, por edhe për forcimin e kapaciteteve administrative, duke ndihmuar në ndarjen e keqfunksionimit nga korrupsioni.

Ministri akuzoi opozitën se po e politizon debatin dhe se çdo problem përpiqet ta etiketojë si korrupsion.

“Ju duket e gjitha korrupsion, sepse në forcën tuaj politike e keni të ngjizur korrupsionin nuk po ndaheni dot nga ajo që e keni vetë. Ju e dini vetë se keni bërë disa komisione kuvende që përpiqeni ta gjeni, kush korruptoi, kallëzime keni dhe ato kallëzimet që i bëni njëri-tjetrin për korrupsion” tha ministri.

Në përmbyllje, ministri bëri thirrje që diskutimi të mos politizohet dhe të mbetet në nivel teknik, veçanërisht sa i përket çështjeve të bashkëpunimit rajonal dhe integrimit europian.

/m.q/j.p/

The post Çelaj: Veprimet e policisë jo korrekte me qytetarët, Gogu: Respektojmë protestën si të drejtë kushtetuese appeared first on Agjencia Telegrafike Shqiptare.