TIRANË, 9 shkurt/ATSH/ Nga Programi Kombëtar i Praktikave të Punës deri tani kanë përfituar 1600 të rinj, nga të cilët 600 vetëm vitin e kaluar.

Ministri i Turizmit, Kulturës dhe Sportit, Blendi Gonxhja publikoi dëshmitë e praktikantëve të thirrjes së 10-të të Programit Kombëtar të Praktikave të Punës nga Agjencia Kombëtare e Rinisë, ku ata ndajnë përvojat dhe arritjet gjatë kësaj periudhe të rëndësishme në rrugëtimin e tyre profesional.

“Këta të rinj kanë pasur mundësinë të fitojnë eksperiencë konkrete në institucionet publike, të zhvillojnë aftësitë e tyre dhe të afrohen më pranë tregut të punës, duke ndërtuar besim në potencialin e tyre dhe në shërbimin ndaj vendit”, tha Gonxhja.

Ministri Gonxhja tha se “Programi Kombëtar i praktikave të Punës u vërtetua një sukses.

“Këtë herë shoqërohet me një pagesë për çdo të ri praktikant. Mbi 1/3 e atyre që aplikuan dhe zhvilluan praktikën pranë ministrive, enteve të varësisë të administratës shqiptare janë duke lidhur marrëveshjet e tyre të para të punës. Është një eksperiencë e vyer për ta, por edhe një prurje shumë e rëndësishme për vetë shtetin”, u shpreh Gonxhja.

Gonxhja inkurajoi të rinjtë që jo vetëm të besojnë në mundësitë që vijnë për t’u punësuar përmes administratës, por në përgjithësi për programet e praktikave, për stazhet dhe eksperiencën që mund të marrin në punë, në jetën reale që patjetër, sipas tij, do t’u kthehet në një avantazh në ecurinë e tyre në jetë.

Ndërsa ministrja e Shtetit për Administratën Publike dhe Antikorrupsionin, Adea Pirdeni tha se 1600 të rinj të talentuar plot ide dhe energji nga auditoret e universiteteve sot në zyrat e institucioneve tona publike janë vlera e vërtetë e Programit Kombëtar të Praktikave të Punës.

“Çdo i ri dhe e re e shikon këtë nismë si një mundësi karriere, por në të njëjtën kohë e shtyn administratën publike të rritet dhe zhvillohet bashkë me ta”, tha Pirdeni.

Elvana Çela praktikante në drejtorinë e Prokurimeve në Ministrinë e Turizmit, Kulturës dhe Sportit, tha se “kam arritur të përvetësoj njohuritë e mia juridike, por edhe të marr edhe njohuri të reja në fushën e prokurimeve publike”.

Çela i bëri apel të rinjve që duan nisin karrierën e tyre profesionale të mos ngurrojnë të marrin pjesë në thirrjen e ardhshme të Programit Kombëtar të Praktikave të Punës.

Joldi Kariqi, praktikant në Institutin Kombëtar të Trashëgimisë Kulturore tha se “gjatë praktikave kombëtare të punës kam mundësinë të njoh nga afër funksionimin e institucionit publik IKTK, këtë gjë dhe të përvetësoj në aftësi profesionale dhe praktike. Gjatë kësaj praktike 3-mujore kisha mundësinë të njoh nga afër shpëtimin e objekteve arkeologjike nënujore dhe nëntokësore”.

Hajre Dedej praktikante në Arkivin Qendror Shtetëror të Filmit u shpreh se “po zhvilloj praktikën në studion e  audiovizuales  ku kam mësuar më tepër për procesin e montazhit, skanimit dhe digjitalizimit të filamve, por edhe një proces që është tejet interesant ai i restaurimit”.

Ajo tha se “do t’ia sugjeroja studentëve që të aplikojnë në thirrjet e ardhshme duke qenë se është një mundësi për t’u rritur dhe mësuar profesionalisht”.

Gjatë vitit 2025 u ofruan 1401 praktika, ku 600 të rinj u përfshinë në institucione publike. Ndërkohë 600 praktikantë kanë marrë kompensim financiar prej 10 000 lekë/muaj për 3 muaj, një vlerë prej 2,6 milionë lekë më shumë buxhet për vitin 2025.

Gjithashtu gjatë 2025 janë kryer 6 cikle trajnimesh me ASPA (aftësi digjitale, etikë, financa, administratë). Nga 600 të rinj, rreth 250 prej tyre do të përfitojnë kontratë pune 1-vjeçare në institucionet përkatëse, ndërsa 1600 persona janë punësuar gjatë këtyre 9 viteve.

/k.s/j.p/

The post Programi i Praktikave të Punës, Gonxhja: Eksperiencë e vyer për të rinjtë, prurje për shtetin appeared first on Agjencia Telegrafike Shqiptare.

TIRANË, 8 shkurt/ATSH/ Drejtori i përgjithshëm i Policisë së Shtetit, Drejtues Madhor Ilir Proda, shprehu sot vlerësimin për Drejtorinë Vendore të Policisë Tiranë, për operacionet e  suksesshme që po zhvillon në goditjen e trafikimit të armëve të zjarrit nga Kosova drejt Shqipërisë, si dhe të veprimtarisë kriminale të shitjes dhe mbajtjes së tyre pa leje në territorin e Tiranës.

Në një reagim në kuadër të operacionit “Barriera” ku u sekuestruan 12 pistoleta “Glock” me municion luftarak dhe u arrestua në flagrancë një 27‑vjeçar nga Kosova, Proda tha se “ky operacion si dhe operacionet dhe goditjet e realizuara përgjatë vitit 2025 dhe në fillim të këtij viti, janë dëshmi e një pune të mirorganizuar, profesionale, hetimore dhe operacionale, e strukturave të DVP Tiranë”.

Gjithashtu, vijoi Proda, konfirmojnë marrëdhënie shumë të mira bashkëpunimi ndërinstitucional, veçanërisht me Prokurorinë e Tiranës dhe partnerët ligjzbatues, si dhe bashkëpunimin shumë të mirë mes Policisë së Shtetit dhe Policisë së Kosovës, në funksion të parandalimit dhe goditjes së armëmbajtjes pa leje, trafikimit të lëndëve narkotike dhe çdo paligjshmërie tjetër.

Proda tha se armët e zjarrit janë mjeti kryesor për kryerjen e veprave penale dhe përbëjnë një rrezik të drejtpërdrejtë për jetën e qytetarëve dhe sigurinë publike.

“Parandalimi dhe goditja e tyre mbetet një prioritet absolut i Policisë së Shtetit, në shërbim të rendit, ligjit dhe qytetarëve. Sjell në vëmendjen tuaj se gjatë vitit 2026, goditja pa kompromis e armëmbajtjes pa leje, trafikimit të armëve dhe çdo forme tjetër të veprimtarisë kriminale të lidhur me to, do të jetë një nga fokuset kryesore të punës së Policisë së Shtetit në të gjitha qarqet e vendit”, nënvizoi Proda.

Proda inkurajoi forcat e policisë që të vazhdojnë punën me vendosmëri, profesionalizëm dhe përkushtim maksimal, në shërbim të ligjit dhe sigurisë së qytetarëve.

/k.s/r.e/

The post Proda: Goditja pa kompromis e armëmbajtjes pa leje, në fokus të Policisë së Shtetit appeared first on Agjencia Telegrafike Shqiptare.

TIRANË, 8 shkurt/ATSH/ Ministri i Turizmit, Kulturës dhe Sportit, Blendi Gonxhja informoi sot se Memoriali i Fishtës do të kthehet në një qendër ndërkombëtare arti.

Në një reagim lidhur me një kronikë televizive për këtë memorial, Gonxhja tha se “Memoriali i Gjergj Fishtës në Lezhë po përgatitet të kthehet në një qendër multifunksionale kreative të përmasave ndërkombëtare. Një bashkëpunim strategjik mes Muzeut Kombëtar të Fotografisë “Marubi” dhe një prej shkollave më prestigjioze të fotografisë në Francë (ESPN), falë përkrahjes nga partnerë evropianë, do të sjellë nga kjo pranverë një frymë të re në zemër të trashëgimisë sonë”.

Sipas Gonxhes, ky projekt ambicioz i mbështetur nga Ministria e Turizmit, Kulturës dhe Sportit do ta shndërrojë këtë hapësirë në një pikëtakim për ekologjinë, shkrimin dhe fotografinë.

Ky destinacion i ri kulturor do të përfshijë rezidenca artistike dhe shkëmbime, ku artistë e studentë francezë dhe shqiptarë do të bashkëpunojnë në programe trajnimi dhe kërkimi shkencor. Itinerari i Gjurmëve Fishtjane është si një rrugëtim hulumtues që lidh historinë e Fishtës me arkivën e jashtëzakonshme të Muzeut Kombëtar të Fotografisë “Marubi”.

“Në bashkëpunim me Bashkinë Lezhë dhe institucione ndërkombëtare, por edhe me promotorët lokalë e agroturizmat e zonës, ky projekt do të kthejë edhe vëmendjen e turistëve drejt bukurive dhe shijeve unike të itenerareve historike të Lezhës. Me mbylljen këtë janar të proceseve të kolaudimit, regjistrimit dhe kalimit në administrim, në mars pritet të nisë zbatimi dhe jetësimi i projektit”, theksoi Gonxhja.

Shtëpia-muze dhe Memoriali i at Gjergj Fishtës ndodhen në fshatin Fishtë (Lezhë), në vendlindjen e poetit, atdhetarit dhe figurës madhore të kulturës shqiptare, at Gjergj Fishta, autor i veprës epike “Lahuta e Malcis”.

Shtëpia-muze ruan objekte personale, dorëshkrime dhe dokumente të rëndësishme që pasqyrojnë jetën dhe veprën e Fishtës, duke shërbyer si një qendër reflektimi për letërsinë dhe identitetin kombëtar.

Memoriali i at Gjergj Fishtës, i ndërtuar mbi truallin e kullës ku ai lindi, është pjesë e projektit “Gjurmë Fishtane” dhe përfshin 12 pika pelegrinazhi që rrëfejnë historinë, kontributin dhe ndikimin e tij në kulturën shqiptare.

/k.s/r.e/

The post Gonxhja: Memoriali i Fishtës do të kthehet në një qendër ndërkombëtare arti appeared first on Agjencia Telegrafike Shqiptare.

TIRANË, 8 shkurt/ATSH/ Policia e Shtetit informoi sot se shtetasi K.C., 55 vjeç, me profesion avokat, është përfshirë në qytetin e Vlorës një konflikt me dy persona ende të paidentifikuar.

Sipas Policisë konflikti nisi rreth orës 13:30, në rrugën Transballkanike, pranë një karburanti, gjatë kohës që do të furnizonte automjetin.

Policia sqaron se paraprakisht dyshohet se ka të bëjë me pozicionimin e automjetit në pikën e furnizimit dhe bllokimin e mjeteve të tjera, është përshkallëzuar, dhe dy personat ende të paidentifikuar e kanë goditur fizikisht shtetasin K.C., i cili po merr ndihmë mjekësore në spital.

Nga veprimet e para hetimore është bërë e mundur identifikimi i automjetit me të cilin janë larguar dy shtetasit.

Grupi hetimor, nën drejtimin e Prokurorisë, po punon për zbardhjen e plotë të rrethanave të ngjarjes, si dhe për identifikimin dhe kapjen e autorëve.

/k.s/r.e/

The post Përfshihet në konflikt një avokat, po merr ndihmë mjekësore në spitalin e Vlorës appeared first on Agjencia Telegrafike Shqiptare.

TIRANË, 8 shkurt/ATSH/ Xhamia e Ballies ngrihet madhështore në qendër të qytetit të Elbasanit, aty ku ka pasur gjithmonë vendin e saj historik, duke u kthyer sot në një nga simbolet më përfaqësuese të qytetit.

E ndërtuar fillimisht nga Hasan Balliu në vitet 1608–1609, ajo ishte ndër objektet më të vjetra të kultit në Elbasan, deri sa u shkatërrua në vitin 1967 gjatë regjimit komunist.

Pas shumë dekadash mungese, Xhamia e Ballies u ringrit sërish dhe u inaugurua në vitin 2022, duke ruajtur frymën e origjinalit, por duke u sjellë në një formë moderne dhe inovative.

Sot ajo konsiderohet një nga objektet më të veçanta të arkitekturës fetare dhe është vlerësuar ndërkombëtarisht, duke u shpallur fituese e Çmimit Ndërkombëtar 2025 për Arkitekturën më të Bukur Fetare nga ArchDaily.

Objekti ka një sipërfaqe rreth 1900 metra katrorë dhe përbëhet nga katër kate. Përveç hapësirave të faljes, xhamia përfshin salla konferencash, ambiente për abdes, zyra të stafit të Myftinisë Elbasan, si edhe hapësira të dedikuara veçmas për gratë dhe burrat.

Kapaciteti i saj arrin rreth 1500 besimtarë në ambientet e brendshme, ndërsa disponon edhe hapësira të jashtme për frekuentim të lartë në ditë të veçanta.

Xhamia e Ballies shquhet për një dizajn inovativ që ndërthur mjeshtërisht traditën islame me elemente moderne arkitekturore, duke krijuar një hapësirë unike dhe frymëzuese për besimtarët dhe vizitorët. Arkitektura e saj përfaqëson një qasje bashkëkohore në ndërtimin e objekteve të kultit, duke ruajtur identitetin kulturor dhe historik të qytetit, por njëkohësisht duke iu përshtatur estetikës moderne.

E njohur ndryshe edhe si “Xhamia Blu” për bukurinë dhe madhështinë që ka pasur dikur, ajo ka qenë dhe mbetet një pikë referimi për Elbasanin. Minarja e vjetër, e njohur për modelimin e saj dekorativ origjinal, ka qenë një nga elementët më tërheqës të objektit historik, ndërsa sot xhamia e rindërtuar sjell një harmoni të balancuar mes klasikes dhe modernes.

Xhamia e Ballies shquhet për një dizajn inovativ që kombinon mjeshtërisht traditën islame me elemente moderne, duke krijuar një hapësirë unike dhe frymëzuese për besimtarët dhe vizitorët. Arkitektura e saj përfaqëson një qasje të re dhe të avancuar në ndërtimin e objekteve të kultit, duke ruajtur identitetin dhe vlerat kulturore, por edhe duke u përshtatur me kërkesat dhe estetikën bashkëkohore.

Sot, Xhamia e Ballies mirëpret vizitorë nga e gjithë bota dhe qëndron e lartësuar në zemër të Elbasanit, jo vetëm si vend kulti, por edhe si identitet historik, kulturor dhe arkitektonik i qytetit.

/k.s/a.f/r.e/

The post Xhamia e Ballies, simbol historik dhe arkitekturor i Elbasanit appeared first on Agjencia Telegrafike Shqiptare.

TIRANË, 6 shkurt/ATSh/ Drejtoresha e përgjithshme e Radio Televizionit Shqiptar, Eni Vasili, ka firmosur marrëveshjen e bashkëpunimit mes RTSh-së dhe RAI-t, me qëllim forcimin e bashkëpunimit ndërkombëtar në fushën e medias publike.

Marrëveshja u nënshkrua sot në ambientet e RAI në Romë dhe përfaqëson një hap të rëndësishëm në forcimin e marrëdhënieve institucionale mes dy transmetuesve publikë.

Lajmi u bë i ditur nga drejtoresha e përgjithshme e RTSH, Eni Vasili përmes një postimi në rrjetet sociale, ku ajo thekson se ky partneritet krijon mundësi konkrete për shkëmbimin e filmave dhe serialeve më të mira italiane, zhvillimin e programeve të trajnimit për stafet, si dhe shkëmbimin e praktikave më të mira profesionale.

“Kjo marrëveshje shënon një hap të rëndësishëm në forcimin e marrëdhënieve institucionale dhe bashkëpunimit ndërkombëtar në median publike. Kjo marrëveshje krijon mundësi për shkëmbimin e filmave dhe serialeve më të mira italiane, zhvillimin e programeve të trajnimit, si dhe shkëmbimin e praktikave më të mira profesionale, me synim rritjen e kapaciteteve të stafit dhe përmirësimin e standardeve profesionale”, theksoi Vasili.

Një element i rëndësishëm i marrëveshjes lidhet edhe me procesin e digjitalizimit të arkivës së RTSh-së, si pjesë e përpjekjeve të vazhdueshme për ruajtjen dhe modernizimin e trashëgimisë audiovizive shqiptare.

“Ky partneritet përfaqëson një angazhim afatgjatë për cilësi, modernizim dhe standarde europiane, në shërbim të publikut shqiptar”, tha Vasili.

/k.s/r.e/a.f/

The post RTSH dhe RAI marrëveshje bashkëpunimi, Vasili: Hap drejt standardeve europiane të medias appeared first on Agjencia Telegrafike Shqiptare.

TIRANË, 6 shkurt/ATSH/ Në kuadër të vizitës zyrtare në Katar, ministrja e Ekonomisë dhe Inovacionit, Delina Ibrahimaj zhvilloi një takim me kryeministrin dhe ministrin e Punëve të Jashtme të Katarit, sheikh Mohammed bin Abdulrahman bin Jassim Al-Thani.

Gjatë takimit Ibrahimaj dhe Bin Jassim Al-Thani diskutuan mbi forcimin e marrëdhënieve mes Shqipërisë dhe Katarit. U vlerësuan iniciativat e përbashkëta dhe u shqyrtuan mundësitë për projekte të reja në fushat e ekonomisë, inovacionit dhe teknologjisë.

“Në takim folëm edhe mbi zgjerimin e bashkëpunimit ekonomik dhe identifikimin e mundësive konkrete për investime, veçanërisht në fushën e inovacionit, teknologjisë dhe zhvillimit të qëndrueshëm”, theksoi Ibrahimaj.

Ministrja Ibrahimaj tha se “ky takim rikonfirmon vullnetin e përbashkët për ta çuar më tej partneritetin mes dy vendeve tona, me fokus rezultate konkrete dhe bashkëpunim afatgjatë”.

Në kuadër të World Governments Summit që u zhvillua në Dubai nga 3-5 shkurt Ibrahimaj ishte pjesë e panelit “Delivering Impact: GovTech for the Benefit of People and Businesses”, ku ndau përvojën dhe qasjen e Shqipërisë ndaj përdorimit të GovTech për ndikim real te qytetarët dhe bizneset.

/k.s/a.f/r.e/

The post Ibrahimaj takon kryeministrin e Katarit, në fokus investimet në inovacion dhe teknologji appeared first on Agjencia Telegrafike Shqiptare.

TIRANË, 6 shkurt/ATSH/ Shqipëria dhe Franca kanë miratuar marrëveshjen mbi bashkëprodhimin kinematografik.

Ministri i Turizmit, Kulturës dhe Sportit, Blendi Gonxhja tha sot se “kjo marrëveshje synon nxitjen dhe lehtësimin e bashkëprodhimeve kinematografike ndërmjet subjekteve prodhuese të të dy vendeve”.

Sipas tij, kjo marrëveshje përcakton kushtet e pranimit të veprave në status bashkëprodhimi, përqindjet e kontributit financiar, si dhe kërkesat për pjesëmarrje artistike dhe teknike.

“Veprat e pranuara konsiderohen vepra kombëtare në të dy vendet dhe përfitojnë të njëjtat avantazhe ligjore dhe financiare si prodhimet përkatëse kombëtare”, theksoi Gonxhja.

Marrëveshja, e cila do të nënshkruhet së shpejti, parashikon procedura miratimi, lehtësi administrative, rregulla për prezantimin e bashkëprodhimit dhe krijimin e një komisioni të përbashkët për monitorimin e zbatimit të saj.

/k.s/r.e/a.f/

The post Shqipëri-Francë, miratohet marrëveshja mbi bashkëprodhimin kinematografik appeared first on Agjencia Telegrafike Shqiptare.

TIRANË, 6 shkurt/ATSH/ Banorët e fshatit Rrjoll të Velipojës bllokuan sot punimet për ndërtimin e një resorti turistik në Baks-Rrjoll.

Prej pesë ditësh banorët po protestojnë për ndërtimin e resortit, duke pretenduar se tokat ku po realizohet investimi janë pronë e tyre dhe se po cenohen pa një proces të rregullt ligjor.

Ndërkohë që një proces gjyqësor për pronësinë e truallit është ende në shqyrtim në Gjykatën e Apelit në Tiranë.

Banorët shprehen se e kanë me letra tokën dhe nuk do ta lejojnë të ndërtohet resorti në këtë zonë.

Ditën e djeshme banorët protestuan para Prokurorisë së Posaçme Kundër Korrupsionit dhe Krimit të Organizuar ku bënë thirrje për drejtësi, duke theksuar se SPAK është i vetmi institucion në të cilin kanë besim se do ta zgjidhë këtë çështje. Ndërsa në ditët e mëparshme banorët kanë bllokuar edhe aksin rrugor Velipojë–Shëngjin.

Projekti parashikon ndërtimin e një kompleksi turistik me një sipërfaqe rreth 146 hektarë në zonën e Rrjollit (Shkodër), i cili konsiderohet si një nga investimet më të mëdha turistike në vend.

/k.s/a.f/r.e/

The post Vijon protesta e banorëve kundër ndërtimit të resortit turistik në Baks-Rrjoll appeared first on Agjencia Telegrafike Shqiptare.

TIRANË, 6 shkurt/ATSH/ Gjatë periudhës janar–dhjetor 2025 shërbimet doganore të ofruara përmes platformës “e-Albania” kanë shënuar një rritje të qëndrueshme, duke reflektuar përparimin e procesit të digjitalizimit dhe rritjen e përdorimit të shërbimeve online nga bizneset dhe qytetarët.

“Në këtë periudhë janë regjistruar 2 355 aplikime online, çka përfaqëson një rritje prej 12% krahasuar me vitin 2024, kur u regjistruan 2100 aplikime”, theksohet në njoftimin për shtyp të Doganës Shqiptare.

Sipas Doganës, ky tregues dëshmon besimin në rritje ndaj shërbimeve elektronike dhe eficiencën e tyre në lehtësimin e procedurave doganore.

“Paralelisht, gjatë vitit 2025 janë përditësuar në sistem 13014 autorizime për regjime të posaçme, duke shënuar një rritje prej 1,16% në raport me vitin 2024, kur numri i autorizimeve ishte 12864. Ky proces ka kontribuar në përmirësimin e administrimit dhe monitorimit të regjimeve doganore, si dhe në rritjen e transparencës procedurale”, thuhet në njoftim.

Drejtoria e Përgjithshme e Doganave vijon angazhimin për ofrimin e shërbimeve më të shpejta, më transparente dhe më efikase, përmes zgjerimit dhe përmirësimit të shërbimeve digjitale, në funksion të lehtësimit të ndërveprimit me biznesin dhe qytetarët.

/k.s/r.e/a.f/

The post Digjitalizimi i shërbimeve doganore, 2355 aplikime online në 2025-ën appeared first on Agjencia Telegrafike Shqiptare.

TIRANË, 5 shkurt/ATSH/ Ministrja e Shëndetësisë dhe Mirëqenies Sociale, Evis Sala mori pjesë sot në forumin “Kontrolli i kancereve në Shqipëri: Parandalim, Depistim dhe Kujdes ndaj pacientit”, organizuar në kuadër të Ditës Botërore të Kancerit.

Në fjalën e saj, Sala tha se “kanceri është një sfidë e përbashkët e gjithë shoqërisë dhe si i tillë, kërkon një qasje multidimensionale, por të mirëkoordinuar. Po punojmë për ngritjen e një ekosistemi që përfshin disa elemente thelbësore, një ndër to është depistimi e parandalimi, një shembull i mirë këtu është kanceri i qafës së mitrës, ku këtë vit kemi zgjeruar fashën e depistimit nga 40-50 vjeç në 35-55 vjeç, si dhe kemi filluar vaksinimin kundër HPV për vajzat dhe djemtë”, nënvizoi Sala.

Ministrja Sala e vuri theksin edhe tek krijimi i Institutit Kombëtar të Onkologjisë dhe i Rrjetit Kombëtar të Kancerit.

“Kjo do të sjellë disa risi si ngritjen e një Institucioni Kërkimor-Shkencor sipas modeleve europiane. Gjatë këtyre muajve (jo më larg se dje në INT Milano) kam takuar mjekë shqiptarë të rinj që punojnë në institucione europiane të ekselencës dhe kanë dëshirën për të kontribuar në këtë reformë historike. Madje disa janë bërë pjesë e grupeve të ndryshme të punës dhe së bashku me mjekët shumë të mirë që kemi në Shqipëri po punojmë intensivisht për të çuar përpara këtë projekt të rëndësishëm. Për fat të mirë, aseti ynë kryesor është kapitali njerëzor”, theksoi Sala.

Sipas saj, Rrjeti Kombëtar i Kancerit do të mundësojë ofrimin e shërbimit onkologjik afër pacientit, me të njëjtat protokolle trajtimi si në Tiranë, nëpërmjet një modeli “Hub and Spoke”.

Më tej Sala u ndal te plotësimi i mungesave të barnave onkologjike dhe zgjerimi i listës së barnave të rimbursueshme.

“Nëpërmjet një procesi transparent e rigoroz, në përputhje me kuadrin ligjor në fuqi, kemi arritur të ekonomizojmë koston e barnave, përfshi ato të rimbursueshme. Kjo na mundëson zgjerimin e listës së barnave të rimbursueshme, mbi të gjitha ato onkologjike, duke ruajtur cilësinë e barnave”, shtoi ministrja.

Ministrja Sala foli edhe për përmirësimin e kapaciteteve të trajtimit me radioterapi.

“Kjo ka qenë një problematikë e vazhdueshme e shërbimit onkologjik. Falë një bashkëpunimi të shkëlqyer me Agjencinë Atomike, shumë shpejt do të kemi 3 akseleratorë linearë funksionalë dhe sigurisht po punojmë të sjellim sa më shpejt aparatin e ri modern të brakiterapisë”, tha Sala.

Duke falënderuar të gjithë ata që kanë punuar intensivisht për të vendosur në jetë këtë reformë të rëndësishme në fushën e onkologjisë, Sala u shpreh se “forca lëvizëse e reformave thelbësore është puna në skuadër, me një fokus të qartë: pacienti në qendër”.

Forumi “Kontrolli i Kancereve në Shqipëri: Parandalim, Depistim”- Foto: Andrin Hoxha

1 nga 12

/k.s/r.e/a.f/

The post Lufta ndaj kancerit, Sala: Së shpejti, tre akseleratorë linearë dhe aparat i ri për brakiterapinë appeared first on Agjencia Telegrafike Shqiptare.

TIRANË, 5 shkurt/ATSH/ Deputetja e Partisë Demokratike, Ina Zhupa prezantoi sot në Komisionin për Çështjet Ligjore dhe Administratën Publike nismën e saj për një shtesë në ligjin “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë”.

Në fjalën e saj, Zhupa tha se “me këtë shtesë kemi mundësi që t’i barazojmë mësuesit e diplomuar para procesit të Bolonjës para ligjit mos t’i diskriminojmë, të garantojmë sigurinë juridike, meritokracinë dhe të vlerësojmë përvojën e tyre arsimore”.

Duke sqaruar kontekstin pse është e nevojshme kjo shtesë në ligj dhe çfarë parashikon, Zhupa tha se “në qershor të 2024 qeveria shqiptare ish-ministrja e Arsimit, Ogerta Manastirliu ka nxjerrë një VKM me të cilën hiqen pagesat e kategorisë së mësuesve që ishin diplomuar para Procesit të Bolonjës duke i hequr rreth 50 mijë lekë të vjetra secilit me justifikimin që nuk kishin arsim të lartë dhe arsim master sipas kërkesave që kishte sistemi i Bolonjës”.

“Në atë kohë kam qenë kryetare e Komisionit të Edukimit dhe kemi zhvilluar dëgjesa me Sindikatën e Bashkuar të Arsimit shqiptar dhe ministren Manastirliu për t’i kërkuar tërheqjen nga kjo VKM, që i hiqte një të drejtë të fituar mësuesve shqiptarë që deri në ato momente njiheshin njëlloj si kolegët e tyre, edhe pse kishin mbaruar institutet e dikurshme para sistemit të Bolonjës, por njiheshin si të diplomuar me arsimin e lartë dhe me master 60 apo 90 kredite”, nënvizoi Zhupa.

Sipas saj, justifikimi në komision ka qenë që është një barazi me nëpunësit e administratës publike dhe nuk e morën parasysh kërkesën e mësuesve.

“Më pas është vazhduar me protesta me dëgjesa dhe është vajtur në Gjykatën Kushtetuese, ku palë ka Sindikata e Bashkuar e Arsimit Shqiptare dhe Këshilli i Ministrave. Qeveria ka qenë në GJK kundër mësuesve për të përfituar këtë pagesë të kategorisë që e kishin pasur deri në 2024 pavarësisht që sistemi i Bolonjës kishte hyrë më përpara në Shqipëri, pra e kishin përfituar”.

Zhupa u shpreh se “ligji i Arsimit Parauniveristar ua jep këtë të drejtë mësuesve dhe sot që ne flasim thotë që “Mësuesit për këtë pagë në nenin 71 pika 6 e tij do të njihen si me arsim të lartë si dhe me arsim master profesional 60 apo 90 kredite”. Pavarësisht se ua jepte ligji i Arsimit Parauniversitar ua hiqte VKM, ky ishte konflikti që shkuan në Gjykatë Kushteutese, pra një VKM që nuk ishte në përputhje me ligjin. Gjykata Kushtetuese u nda katër me katër, siç di të bëjë më mirë për të mos marrë vendim, por në diskutimet kushtetuese dhe në qëndrimet që mbajti GJK në sugjerimet e saj ishte që ju do të duhet të kërkoni ndryshimin e Ligjit të Arsimit të Lartë ku edhe në këtë ligj të klasifikoheni e të njiheni si me arsim të lartë dhe master profesional 60 apo 90 kredite në kohën që ka përfunduar”, sqaroi Zhupa.

Nisur nga kjo, shtoi Zhupa, me një bashkëpunim me Sindikatën e Arsimit, me juristët e tyre dhe tanët, kam depozituar këtë nismë ligjore që parashikon vetëm një ndryshim në ligjin “Për arsimin e lartë”.

“Në ligj do të shtohet pika me përmbajtje: personat e diplomuar në programe studimi të përfunduar para përshtatjes së tyre sipas parimeve të procesit të Bolonjës trajtohen nga ana administrative dhe financiare sipas nivelit të diplomës që kanë pasur para hyrjes në fuqi të këtij ligji. Kjo përfshin diplomat e programeve 3-vjeçare (6 semestra), të cilat do të njihen si diploma bachelor, si dhe diplomat profesionale 60 apo 90 kredite, të cilat vazhdojnë të njihen dhe trajtohen si diploma të nivelit të dytë për qëllime klasifikimi pagese dhe avancimi në karrierë”, theksoi Zhupa.

Zhupa bëri të ditur se “si rezultat i asaj VKM dhe ndaj kemi ardhur këtu sot, 11 172 mësues të arsimit parauniversitar u privuan nga trajtimi financiar dhe avancimi në karrierë, të cilët deri në ato momente e kishin njësoj me kolegët e tyre. Japin të njëjtat lëndë, në të njëjtin cikël me të njëjtët nxënës siç e kanë dhënë para VKM dhe pas VKM”.

“Ky ndryshim synon të rregullojë këtë situatë t’i vendosë mësuesit në kushte të barabarta pavarësisht kohës se kur janë diplomuar dhe të ketë mundësi që asnjë qeveri nesër mos ta ndryshojë me një VKM trajtimin financiar të mësuesve. Kjo VKM u cenon edhe për pensionin, pasi pagesa më e ulët e viteve të fundit para pensionit ndikon edhe në masën e pensionit që do marrin ata, sepse do të vendosin bazën mbi të cilat do të ngrihet pensioni i tyre”, tha Zhupa.

Kryetari i Komisionit, Ulsi Manja tha se “si komision mbetemi të hapur dhe të vëmendshëm në trajtimin këtij problemi. Jemi vënë në dijeni nga Ministria e Arsimit dhe qeveria që ka një grup pune që është ngritur dhe ka filluar punën për të riparë ligjin “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë”. Në kuadrin e atyre ndryshimeve që po punohen nga ky grup pune për t’u ndryshuar në këtë ligj në mënyrë organike do të duhet të trajtohet edhe kjo nismë”.

Pas debateve, mazhoranca me 9 vota rrëzoi nismën e propozuar nga deputetja e PD.

/k.s/r.e/a.f/

The post Komisioni i Ligjeve rrëzon nismën e Zhupës për një shtesë në ligjin “Për arsimin e lartë” appeared first on Agjencia Telegrafike Shqiptare.

TIRANË, 5 shkurt/ATSH/ Banorët e fshatit Rrjoll të Velipojës po protestojnë sot para Prokurorisë së Posaçme Kundër Korrupsionit dhe Krimit të Organizuar (SPAK), kundër ndërtimit të një resorti turistik në Baks-Rrjoll.

Ata pretendojnë se projekti po realizohet në tokën që u përket ligjërisht, ndërkohë që një proces gjyqësor për pronësinë e truallit është ende në shqyrtim në Gjykatën e Apelit në Tiranë.

Banorët bënë thirrje për drejtësi, duke theksuar se SPAK është i vetmi institucion në të cilin kanë besim se do ta zgjidhë këtë çështje.

Sipas tyre, institucionet përgjegjëse nuk kanë dhënë sqarime të qarta lidhur me statusin e tokave dhe procedurat e miratimit të projektit.

Banorët kundërshtojnë projektin, duke pretenduar se tokat ku po realizohet investimi janë pronë e tyre dhe se po cenohen pa një proces të rregullt ligjor.

Po ashtu, banorët shprehin shqetësimin se sipërmarrësi ka nisur punimet, edhe pse palët janë në proces gjyqësor.

Pas paraqitjes në SPAK, avokati përfaqësues i banorëve, Ndue Pjetra tha se Prokuroria e Posaçme nuk ka marrë ende përgjegjësinë për çështjen e kallëzuar prej tyre.

“Nëse brenda tri ditësh nuk do të ketë sekuestrim të dosjes dhe pezullim të punimeve, do të jemi sërish këtu”, u shpreh Pjetra.

“Ne kemi akuzë dhe për ndërtim pa leje. Ne jemi në pritje të dy verdikteve që parashikon ligji, pasi ai ka marrë forcërisht pronën dhe ka nisur ndërtimin. Kërkojmë ndërhyrjen për ndalimin e punimeve, por s’ka reagim”, u shpreh avokati.

Në shenjë proteste në ditët e mëparshme banorët kanë bllokuar edhe aksin rrugor Velipojë–Shëngjin.

Projekti parashikon ndërtimin e një kompleksi turistik me një sipërfaqe rreth 146 hektarë në zonën e Rrjollit (Shkodër), i cili konsiderohet si një nga investimet më të mëdha turistike në vend.

Protesta para SPAK

1 nga 4

/k.s/a.f/r.e/

The post Projekti për resort turistik në Baks-Rrjoll, banorët protestë para SPAK appeared first on Agjencia Telegrafike Shqiptare.

TIRANË, 5 shkurt/ATSH/ Ministrja e Shëndetësisë dhe Mirëqenies Sociale, Evis Sala gjatë vizitës në Institutin Kombëtar të Tumoreve në Milano u takua me presidentin Gustavo Galmozzi.

Gjatë takimit Sala dhe Gustavo diskutuan për ngritjen e Institutit të Tumoreve në Shqipëri.

“Diskutuam për bashkëpunimin konkret për mbështetjen e ngritjes së Institutit të Tumoreve në Shqipëri si një qendër për ndërtimin e kapaciteteve, trajtimin multidisiplinar të kancerit, kërkimin shkencor dhe hartimin e politikave onkologjike të bazuara në evidenca”, theksoi Sala, në një postim në rrjetet sociale.

Ministrja Sala u shpreh se ky partneritet strategjik është i përafruar me standardet europiane, me fokus forcimin institucional dhe zhvillimin e qëndrueshëm të sistemit të kontrollit të kancerit.

Shqipëria po hedh hapa konkretë drejt modernizimit të shërbimit onkologjik, duke synuar standarde europiane në trajtimin e sëmundjeve tumorale.

Gjithashtu Shqipëria dhe Italia do të zgjerojnë bashkëpunimin në forcimin e kapaciteteve, përmirësimin e protokolleve të trajtimit dhe për asistencë në trajtimin e rasteve që kërkojnë kujdes më të specializuar.

/k.s/r.e/a.f/

The post Sala: Bashkëpunim me Italinë për ngritjen e Institutit të Tumoreve në Shqipëri appeared first on Agjencia Telegrafike Shqiptare.

TIRANË, 4 shkurt/ATSH/ Kryetarja e bashkisë së Vlorës, Brunilda Mersini, zhvilloi sot një takim me punonjësit e sektorit të pastrimit, pas ankesave dhe protestave të njëpasnjëshme për kushtet e punës, vonesat në paga dhe mosdhënien e antidotës, një ndihmë mujore ekonomike.

Takimi u zhvillua në ambientet e ndërmarrjes së pastrimit, ku punonjësit paraqitën shqetësimet e tyre dhe kërkuan zgjidhje konkrete.

Pas takimit me punonjësit kryebashkiakja Mersini tha për mediet se bashkia është e angazhuar për të gjetur një zgjidhje sa më të shpejtë dhe të drejtë për problematikat e ngritura.

“Punëtorët ditën e djeshme kanë pasur një ankesë në zyrën e pagave, sepse nuk ka kaluar një fond i quajtur “Fondi i kompensimit”, që ata e marrin në vlerë monetare të disa zërave të kompensimit. Ekonomistja e pagave u dha shpjegim ditën e djeshme punonjësve që Thesari ka pasur probleme me sistemin dhe ka qenë pengesë e pagesës drejt bankës. Sot sistemi ka kaluar, sipas informacioneve nga Zyra e Thesarit, dhe punonjësit brenda orës 1 do të jenë në bankë për të tërhequr pagesën”, theksoi Mersini.

Sipas saj, prioritet mbetet respektimi i të drejtave të punonjësve dhe garantimi i një shërbimi dinjitoz për qytetin.

Mersini foli edhe për shqetësimet e lidhura kundër bashkimit të ndërmarrjes së gjelbërimit me atë të pastrimit.

“Në kuadër të shkrirjes së dy ndërmarrjeve, ndërmarrja e Pastrimit dhe gjelbërimit do të jetë një dhe çdo rajon do të ketë një numër të lartë punonjësish, është gati 30-35 punëtorë në një rajon. Pra rajoni do të menaxhohet nga mbikëqyrësit me 35 punëtorë dhe jo siç ka qenë me dy punëtorë. Me përfundimin e afatit për ndërtimin e ujësjellësit, që zyrtarisht kanë njoftuar ta përfundojnë në maj, projekt që menaxhohet nga Ndërmarrja e Ujësjellës -Kanalizimeve do të fillojmë me asfaltimin e rrugëve duke krijuar edhe spotet brenda një infrastrukture. Rrugët duke qenë të dëmtuara tërheqja e kazanëve dhe makinave teknologjike ka vështirësitë e veta”, sqaroi Mersini.

/k.s/a.f/

The post Mersini: Bashkia e angazhuar për zgjidhjen e problematikave të punonjësve të pastrimit appeared first on Agjencia Telegrafike Shqiptare.

TIRANË, 4 shkurt/ATSH/ Ministri i Turizmit, Kulturës dhe Sportit, Blendi Gonxhja tha sot se 600 praktikantë përfituan nga Programi Kombëtar i Praktikave të Punës në vitin 2025.

Në takimin përmbyllës të thirrjes së 10-të të Programit Kombëtar të Praktikave të Punës, Gonxhja tha se “shpesh dëgjojmë se Evropa është “atje jashtë”, diku ku duhet të ikësh për ta gjetur. Por e vërteta është se Evropa që ne duam nuk është një destinacion gjeografik, është një standard jetese që po e ndërtojmë këtu, bashkë. Për vite me radhë, administrata publike është parë si një “kafaz burokratik”, një mjedis statik, i ngadaltë dhe shpeshherë i shkëputur nga aspiratat e qytetarëve”.

Por sot, vijoi Gonxhja, ky imazh i përket të shkuarës.

“Ju jeni dëshmia e këtij transformimi rrënjësor. Sot shteti nuk flet nga lart, por ecën krah për krah me të rinjtë dhe ju fton të bashkoheni e të kontribuoni për vendin. Prania juaj sot thyen barrierat e kohës, sfidon status quo-në dhe sheh meritokracinë si të vetmen matëse të suksesit. Ju nuk jeni thjesht punonjës të rinj, por arkitektët e një administrate moderne, transparente dhe në shërbim të plotë të realitetit që na rrethon. Jeni ata që do ta bëni shtetin të vrapojë me shpejtësinë e ambicies suaj. Përmes Programit Kombëtar të Praktikave të Punës, nuk po hyjnë thjesht emra të rinj në listëpagesa, po hyn një mendësi e re: 600 praktikantë përfituan nga ky program në vitin 2025 duke zgjedhur të japin kontributin e tyre real”, nënvizoi Gonxhja.

Ministri Gonxhja u shpreh se “për herë të parë në vitin 2025, puna juaj u çmua financiarisht, si certifikata e parë e dinjitetit, një mesazh i qartë se dija juaj ka vlerë dhe shteti e respekton atë që në hapin e parë. Dhe mbi të gjitha, janë 250 kontrata të para pune që vërtetojnë se në këtë program, rruga nga bankat e shkollës te mundësitë e punësimit konkret kalojnë vetëm përmes meritës”.

“Shqipëria e re ka nevojë për mendjen, zemrën dhe energjinë tuaj pa komplekse për ta kthyer Shqipërinë 2030 në stacionin më të rëndësishëm të rajonit në të gjitha dimensionet: ekonomike, turistike, kulturore, sportive”, tha Gonxhja.

Gjatë vitit 2025 u ofruan 1401 praktika, ku 600 të rinj u përfshinë në institucione publike. Ndërkohë 600 praktikantë kanë marrë kompensim financiar prej 10 000 lekë/muaj për 3 muaj, një vlerë prej 2,6 milionë lekë më shumë buxhet për vitin 2025.

Gjithashtu gjatë 2025 janë kryer 6 cikle trajnimesh me ASPA (aftësi digjitale, etikë, financa, administratë). Nga 600 të rinj, rreth 250 prej tyre do të përfitojnë kontratë pune 1-vjeçare në institucionet përkatëse, ndërsa 1600 persona janë punësuar gjatë këtyre 9 viteve.

/k.s/r.e/a.f/

The post Gonxhja: 600 të rinj përfituan nga Programi i Praktikave të Punës appeared first on Agjencia Telegrafike Shqiptare.

TIRANË, 4 shkurt/ATSH/ Kryeministri Edi Rama mori pjesë sot në takimin përmbyllës të thirrjes së 10-të të Programit Kombëtar të Praktikave të Punës për studentët e ekselencës, i cili prej 10 vitesh po kthen përvojën në punësim.

Në fjalën e tij, kryeministri Rama theksoi se “ky program ka punësuar në mënyrë përfundimtare në administratën e shtetit rreth 1600 persona. Po të kesh parasysh që administrata publike në vetvete është një trupë jo shumë e madhe, këto numra nuk janë pak, por ajo që i bën këto numra më të rëndësishëm akoma është se janë 1600 burime njerëzore cilësore që kanë potencialin të zhvillohen vijimësisht dhe që kanë kapacitetin potencial që të jenë nesër drejtuesit e sektorëve, departamenteve, drejtorive dhe kështu me radhë”.

Kjo praktikë, vijoi Rama, ka qenë një urë e ngritur si fillim në universitet për t’iu dhënë mundësinë më të mirëve që të kenë një sallë pritje ku  aktivisht të vetofrohen si punonjës të rinj të shtetit.

Kreu i qeverisë u shpreh se “nga ana tjetër besoj që tani kemi kapërcyer edhe një ngërç përmes këtij programi, atë të eksperiencës që faktikisht i ka penguar në të shkuarën shumë vajza e djem që të fitojnë konkurset e Shërbimit Civil për shkak të mungesës së eksperiencës”.

“Që të hyje në administratën publike duhet të kishe eksperiencë, po të mos hyje nuk kishe ku e krijoje eksperiencën. Në njëfarë mënyre programi e ka garantuar këtë tranzicion”, tha Rama.

Më tej kryeministri Rama i uroi suksese atyre që kanë fituar mundësinë për të pasur një kontratë njëvjeçare pune dhe për të vazhduar të synojnë të përfshihen përfundimisht në administratën publike.

“Ndërkohë që të tjerëve që nuk e kanë fituar këtë mundësi nuk duhet të ligështohen, të humbasin besimin dhe nuk duhet të dorëzohen. Ministri Gonxhja tha se ky është proces i cili kalon përmes meritës, por pa dashur të them që gjithçka në këtë proces shkon fjollë sepse me siguri si çdo proces tjetër ka edhe ky ato defektet e veta, që ne përpiqemi t’i adresojmë vit pas viti”, tha Rama.

Kryeministri u shpreh se “dua t’u them atyre që se kanë fituar këtë mundësi të mos ndihen të përjashtuar dhe absolutisht të mos mendojnë që janë më pak të zotë, thjesht në një moment të caktuar nuk kanë mundur të jenë dukshëm më të mirë sesa të tjerët që ia kanë dalë”.

/k.s/a.f/r.e/

The post Rama: 1600 të punësuar në administratë nga Programi i Praktikave të Punës appeared first on Agjencia Telegrafike Shqiptare.

TIRANË, 4 shkurt/ATSh/ Deputetja e Partisë Demokratike Jorida Tabaku, së bashku me deputetë të tjerë të opozitës, ndodhet në Shtetet e Bashkuara të Amerikës (ShBA), ku po zhvillon një seri takimesh me anëtarë të Kongresit amerikan.

Ata u takuan me kongresmenët Keith Self, Jeff Sessions, John Moolenaar dhe Robert Aderholt, me të cilët u diskutuan çështje kyçe që lidhen me demokracinë, ekonominë dhe sigurinë në Shqipëri dhe rajon.

Në një video të publikuar në rrjetet sociale, Tabaku thekson se në qendër të bisedave kanë qenë tre shqetësime kryesore.

Së pari, ndikimi i grupeve kriminale në politikë dhe në proceset zgjedhore, duke nënvizuar se lufta reale kundër krimit të organizuar është parakusht për funksionimin e shtetit ligjor dhe për zgjedhje të lira e të ndershme.

Së dyti, Tabaku ka ngritur problematikën e klimës së biznesit, duke theksuar se mungesa e institucioneve të forta dhe zbatimi selektiv i ligjit e bëjnë Shqipërinë pak tërheqëse për investitorët europianë dhe amerikanë. Pa sundim të ligjit dhe garanci institucionale, investimet serioze dhe afatgjata shmangin vendin.

Së treti, Tabaku ka vënë theksin tek siguria e investimeve kritike dhe e infrastrukturës strategjike, duke e lidhur analizën dhe kontrollin e investimeve të huaja me forcimin e ekonomisë dhe të sigurisë kombëtare.

Sipas saj, ekonomia nuk është vetëm çështje zhvillimi, por edhe një element thelbësor i sigurisë.

Deputetja e PD-së ka rikujtuar se këto çështje janë reflektuar edhe në nismat e saj parlamentare, përfshirë propozimin për analizën e investimeve të huaja, i cili është refuzuar nga qeveria.

Sipas Tabakut, kjo nismë nuk është politike, por një nevojë e ngutshme për të frenuar investime që mund të dëmtojnë interesin publik, konkurrencën e ndershme dhe sigurinë e vendit.

Vizita në ShBA dhe takimet me kongresmenë amerikanë, sipas saj, synojnë forcimin e bashkëpunimit me partnerin strategjik dhe ndërkombëtarizimin e shqetësimeve reale mbi demokracinë, ekonominë dhe sundimin e ligjit në Shqipëri.

/k.s/a.f/r.e/

The post Tabaku në SHBA: Në fokus të takimeve lufta kundër krimit, klima e biznesit dhe siguria e investimeve appeared first on Agjencia Telegrafike Shqiptare.

TIRANË, 4 shkurt/ATSH/ Kryeministri Edi Rama deklaroi sot se gjyqtarët kërkojnë 37 milionë euro plus nga buxheti i shtetit, para të cilat duhet të hiqen nga diku tjetër.

Në një komunikim për mediat për deklaratën e Shoqatës Kombëtare të Gjyqtarëve, lidhur me shqetësimin e ngritur nga kreu i qeverisë për kërkesën për rritjen e pagave të gjyqtarëve, Rama tha se “ju, zotërinj kërkoni 37 milionë euro plus, nga buxheti i shtetit për t’i rritur vetes pagat. Kjo është e vërteta që nuk e luan topi dhe që ta dinë shqiptarët se çfarë kërkoni ju dhe për çfarë jemi ne në gjyq me ju, në Gjykatën Kushtetuese, shqiptarët duhet të dinë që ju kërkoni që për gjyqtarin e Shkallës së Parë, paga të shkojë nga 3360 euro në 5300 euro”.

“Ju kërkoni që për gjyqtarin e Apelit paga të shkojë nga 3480 europ që është sot aktualisht, 3480 euro, në 5500 euro. Ju kërkoni që paga në Gjykatën e Lartë të shkojë 5800 euro dhe ju kërkoni që pagat e prokurorëve të SPAK-ut të cilët, edhe një herë tjetër për SPAK-un, e veçoj sepse nuk i është bashkuar dhe respekte, nuk i është bashkuar kësaj përpjekjeje absurde, nuk ka firmosur për të qenë palë në Gjykatën Kushtetuese për ta çuar pagën e vet 9800 euro”, nënvizoi Rama.

Ndërkohë, vijoi Kryeministri, që sot aktualisht pagat e gjyqtarëve dhe prokurorëve të SPAK janë rreth 6 500 euro.

“Pra 3000 euro doni ju t’i rrisni pagat vetes në muaj me një vendim gjykate. Ku jeni ju këtu? Ça kërkoni ju? Dhe ndërkohë ajo që e bën dhe më serioze këtë situatë, është se pagat tuaja janë paga më të larta, goxha më të larta se në rajon; se në Maqedoninë e Veriut, se në Malin e zi dhe janë paga të barabarta me gjykatësit në një vend të BE siç është Greqia. Sot që flasim aktualisht, ju i keni pagat sa në Greqi dhe ju doni t’i rrisni me nga 2000, me nga 3000 euro në muaj. Në emër të çfarë? Ju thoni në emër të ligjit dhe të kushtetutës?! Kjo është e pavërtetë!”, tha Rama.

Kreu i qeverisë u shpreh se “nuk ka ligj dhe nuk ka kushtetutë që ju jep juve këtë të drejtë dhe nuk është shkruar as gjëkundi dhe kur ju thoni “ne nuk mund të heshtim përballë përbaltjes kryeministrore”, për çfarë përbaltje e keni ju fjalën? Për cilën përbaltje? Për cilën përbaltje kryeministrore publike dhe mediatike tërësisht histerike, si guxoni ju të vendosni etiketime të tilla duke qenë arbitra, duke qenë përfaqësues të një pushteti i cili duhet të heshtë në publik dhe duhet të japë vendime në sallën e gjyqit midis palësh dhe palë në gjyq jemi të gjithë përveç jush”.

“Ju jeni ata që gjykoni për të gjithë dhe duhet të garantoni barazinë përpara ligjit të të gjithëve. Dhe ndërkohë juve me këtë tentativë në Gjykatën Kushtetuese doni të jeni ligji. Kjo është e vërteta dhe nuk synon, siç thoni ju, qëndrimi im të ndezë kundërshtitë në opinionin publik për një vendimmarrje dhe proces kushtetues që duhet të zhvillohet në sallën e gjyqit, për të cilin dikush prej jush në emër të shoqatës, atje në gjykatë siç e përmenda në prononcimin tim tha “edhe ne të zgjuar jemi, thamë ta kalojmë këtë kur të tjerët se kishin mendjen dhe e kishin mendjen tek fushata, tek zgjedhjet”. Ashtu hë? Çfarë do me thënë kjo? Dhe si arrini ju në pikën që të sulmoni publikisht qeverinë, të sulmoni publikisht kreun e Këshillit të Ministrave, të sulmoni publikisht mediat dhe t’i akuzoni të gjithë për histeri. Kush jeni ju? Për çfarë histerie e keni fjalën? Më shikoni mua të axhituar? Jam shumë i axhituar se 37 milionë euro që kërkoni ju plus nga buxheti i shtetit janë para që duhet të hiqen nga diku tjetër dhe juve merrni përsipër atje në sallën e gjyqit të jepni gjykime politike”, nënvizoi Rama.

Ju , shtoi Rama, merrni përsipër atje në sallën e gjyqit të jepni gjykime për qeverinë a thua se qeveria është një palë tjetër, jo në aspektin kushtetues, por në aspektin politik.

“Ju merrni përsipër të flisni për abuzime etj, ndërkohë që duhet të garantoni në sallat e gjyqit paanësi, pavarësi dhe paanësi, por kjo është një temë tjetër”, tha Rama.

/k.s/a.f/

The post Rama: Gjyqtarët kërkojnë 37 milionë euro plus nga buxheti i shtetit, të cilat duhet të hiqen nga diku tjetër appeared first on Agjencia Telegrafike Shqiptare.

The post “Youth Frost Fest”, gara dhe argëtim në pistën e skive në Dardhë appeared first on Agjencia Telegrafike Shqiptare.