TIRANË, 22 shkurt /ATSh/ Presidenti Bajram Begaj ka përfunduar vizitën e tij dyditore në Jordani, ku ishte ftuar nga mbreti Abdullah II. Në një mesazh falënderimi në rrjetin social X, Presidenti Begaj e cilësoi këtë vizitë si një shenjë të miqësisë së qëndrueshme dhe bashkëpunimit të fortë mes Shqipërisë dhe Jordanisë.

Kreu i Shtetit deklaroi se “Shqipëria dhe Jordania ndajnë vlera të përbashkëta të paqes, stabilitetit dhe bashkëjetesës fetare”.

Presidenti Bajram Begaj nisi ditën e djeshme një vizitë shtetërore dyditore në Jordani me ftesë të Madhërisë së Tij, Mbretit Abdullah II.

Vizita me një agjendë takimesh të rëndësishme me autoritetet e larta të Mbretërisë Hashemite të Jordanisë, ngriti në një nivel tjetër marrëdhëniet mes dy vendeve.

Takimet dhe vizitat e ndërsjella të nivelit të lartë, deri më tani, kanë dëshmuar vullnet për forcimin e partneritetit dhe avancimin e agjendës së përbashkët të bashkëpunimit.

/e.i/j.p/

The post Begaj: Shqipëria dhe Jordania ndajnë vlera të përbashkëta paqeje dhe stabiliteti appeared first on Agjencia Telegrafike Shqiptare.

TIRANË, 22 shkurt /ATSh/ Kryeministri Edi Rama publikoi sot fotoalbumin me momentet kryesore të aktiviteteve gjatë javës.

Kryeministri Edi Rama mori pjesë të enjten në mbledhjen inauguruese të Bordit të Paqes, e zhvilluar në ambientet e Institutit Amerikan të Paqes “Donald J. Trump” në Uashington D.C., me praninë e drejtuesve të shteteve, qeverive dhe përfaqësuesve të lartë ndërkombëtarë.

Në këtë takim, u firmos zyrtarisht Bordi i Paqes nga 50 shtete pjesëmarrëse, mes tyre edhe Shqipëria dhe Kosova. Rama publikoi momente gjatë mbledhjes së Bordit të Paqes, nga fjalimi i tij, te takimi me Jared Kushner dhe presidenten e Kosovës, Vjosa Osmani.

Kreu i Qeverisë zhvilloi në 17 shkurt edhe një vizitë zyrtare në Kosovë, në kuadër të 18-vjetorit të pavarësisë së saj. Rama u prit nga presidentja e Kosovës Vjosa Osmani, me të cilën zhvilloi një takim kokë më kokë. Gjatë qëndrimit në Prishtinë, kryeministri Rama, pas takimit me presidenten Osmani, u takua edhe me kryeministrin Albin Kurti.

Njëherësh, Kryeministri Rama mori pjesë në promovimin e librit “Kur heshtja flet” të autorit Ahmet Shala, si dhe mbajti një leksion të hapur me të rinjtë e Universitetit “Hasan Prishtina” dhe nxënësit e gjimnazit “Sami Frashëri”.

Gjatë qëndrimit në Uashtington, kreu i Ekzekutivit, Edi Rama mori pjesë edhe në punimet e tryezës e Këshillit të Atlantikut në Uashington. Rama theksoi se në këtë takim pati një interes të lartë për Shqipërinë dhe profilin e saj ndërkombëtar.

/e.i/j.p/

The post Rama ndan fotoalbumin e javës appeared first on Agjencia Telegrafike Shqiptare.

TIRANË, 22 shkurt /ATSh/ E diela në Krastë solli një tjetër hap konkret drejt gjelbërimit të qytetit, ku dhjetëra të rinj, qytetarë, përfaqësues institucionesh dhe biznesesh iu bashkuan një aksioni të madh pyllëzimi për t’i shtuar mushkërive të qytetit edhe 2,500 fidanë të rinj pishe.

Në një atmosferë plot energji dhe optimizëm pjesëmarrësit kontribuuan për ta bërë Krastën edhe më të gjelbër dhe më të bukur për të gjithë. Me këtë nismë, numri i fidanëve të mbjellë gjatë dy viteve të fundit në këtë zonë arrin në 35,000.

I pranishëm në këtë aktivitet i cili u iniciua nga Ervin Skënderi, ishte edhe kryebashkiaku i Elbasanit, Gledian Llatja, i cili vlerësoi angazhimin e të rinjve dhe bashkëpunimin mes institucioneve dhe komunitetit për mbrojtjen e mjedisit. Sipas tij, mbjellja e pemëve në Krastë është një investim i drejtpërdrejtë për të ardhmen dhe përmirësimin e cilësisë së jetës në qytet.

Në këtë nismë morën pjesë edhe kryetarja e Këshillit të Qarkut, Ermira Urupi, deputetja Aulona Bylykbashi dhe prefekti Ilir Bejtja, si dhe përfaqësues të Prefekturës, Këshillit të Qarkut, Repartit Zjarrfikës, Policisë Bashkiake, Drejtorisë së Mjedisit, Agjencisë së Zonave të Mbrojtura, bizneseve vendase dhe shumë qytetarë.

Një rol të veçantë patën edhe të rinjtë e Këshillit Rinor, të cilët, si gjithmonë, ishin në vijën e parë kur bëhet fjalë për një mjedis më të gjelbër për të gjithë.

Krasta po rritet bashkë me qytetin, më e gjelbër, më e bukur dhe më pranë komunitetit.

/e.i/j.p/

The post Mbillen 2500 fidanë të rinj në Krastë, Llatja: Përmirësim i cilësisë së jetës në qytet appeared first on Agjencia Telegrafike Shqiptare.

TIRANË, 22 shkurt /ATSh/ Teuta triumfoi me rezultatin 0-1 ndaj Tiranës, në ndeshjen e vlefshme për Superioren. Takimi u vendos nga një gol i Maçollit, i realizuar në minutën e 87-të.

Ndeshja u luajt në stadiumin “Selman Stërmasi”, ku pjesa e parë u përqendrua në lojën e Tiranës, që iu afrua golit disa herë, me rastin e Tabekout.

Në fraksionin e dytë, skuadra e Teutës iu afrua golit me Maçollin që u ndal nga tranversa dhe Arifin që gaboi përballë portierit.

Në minutën e 83-të, Lleshi ndali një top me dorë dhe u akordua penallti me VAR. Nga 11 metërshi Maçolli nuk gaboi, duke i dhënë avantazhin dhe fitoren Teutës, që ngjitet në kuotën e 33 pikëve në vendin e gjashtë.

/e.i/j.p/

The post Teuta fiton 1-0 ndaj Tiranës në stadiumin “Selman Stërmasi” appeared first on Agjencia Telegrafike Shqiptare.

TIRANË, 22 shkurt /ATSh/ Parku Kombëtar Divjakë-Karavasta është kthyer në një destinacion të turizmit të vrojtimit të shpendëve dhe jo vetëm, ku dominojnë më shumë flamingot, zogjtë me qafën e hollë dhe të harkuar dhe me këmbët e hijshme.

Kryeministri Edi Rama përcolli sot në rrjetet sociale pamje të flamingove mbi lagunën Divjakë-Karavasta, duke e etiketuar si një spektakël të biodiversitetit tonë.

Rama tha se “ky park kombëtar mbetet një nga strehat më të rëndësishme për shpendët ujorë në Mesdhe, ku çdo sezon sjell ngjyra në një ekuilibër natyror unik”.

Flamingot janë shpendë që migrojnë në vendet e ngrohta dhe parapëlqejnë ujëra të kripura dhe të cekëta, ku gjejnë ushqimin e tyre të zgjedhur. Në vendin tonë habitati i këtij lloji është Laguna e Nartës, Karavastasë, por edhe liqeni i Pogradecit.

Laguna e Karavastasë radhitet në lagunat me rëndësi të madhe si zonë e rëndësishme për llojet shtegtare dhe si habitat i mbi 20,000 shpendëve dimërues.

Kjo lagunë është njëherësh e njohur edhe për koloninë e madhe të pelikanit kaçurrel, e vetmja pikë folenizimi bregdetar të Shqipërisë.

Ndalimi i gjuetisë për një periudhë të caktuar ka sjellë shtimin e dukshëm të kolonisë së pelikanëve, por edhe të flamingove, të cilat ishin tepër të rralla.

/e.i/j.p./

The post Flamingot, spektakël i biodiversitetit në lagunën e Divjakë–Karavastasë appeared first on Agjencia Telegrafike Shqiptare.

TIRANË, 22 shkurt /ATSh/ Kombëtarja shqiptare për vajza është gati për rrugëtimin e ri në kualifikueset e Kupës së Botës “Brazil 2027”. Shqipëria ndodhet në grupin B4 të Ligës B së bashku me Çekinë, Uellsin dhe Malin e Zi.

Trajneri i skuadrës, Armir Grima ka ftuar 24 futbolliste për dy ndeshjet e para të muajit mars kundër Malit të Zi dhe Çekisë.

Në këtë grumbullim të skuadrës rikthehen pas disa kohësh tre futbollistet Gresa Berisha, Marinela Mema dhe Endrina Elezaj. Po ashtu, edhe dy lojtaret e ekipeve kombëtare të moshave, Xhesika Ndoj dhe Adela Valeria Qose janë ftuar nga trajneri Grima për këto ndeshje të rëndësishme.

Grumbullimi zyrtar i skuadrës nis të martën, më 24 shkurt në qytetin e Shkodrës. Kombëtarja do të luajë ndeshjen e parë ndaj Malit të Zi më 3 mars në ora 14:00.

Takimi i dytë është më 7 mars ndaj Çekisë në stadiumin “Loro Boriçi” në Shkodër, në orën 18:00.

Pas përfundimit të ndeshjeve kualifikuese, do të nisë faza Play-off. Kombëtarja e vajzave mund të kualifikohet në këtë fazë nëse renditet në vendin e I, II ose të III-të të grupit B.

/e.i/j.p/

The post Botërori 2027 për vajza, trajneri Grima publikon listën e lojtareve për ndeshjet ndaj Malit të Zi dhe Çekisë appeared first on Agjencia Telegrafike Shqiptare.

TIRANË, 22 shkurt /ATSh/ Kryetari i Partisë Demokratike, Sali Berisha, përmes një videomesazhi, deklaroi se gjatë vizitës në Uashington, Edi Ramës iu refuzuan të gjitha takimet zyrtare, përveç një takimi me një OJQ me dyer të mbyllura.

Sipas Berishës, Rama nuk ka ndërmarrë asnjë hap diplomatik për të mbështetur ish-drejtuesit e UÇK që përballen me procese në Hagë, të cilat ai i lidhi me ndikimin e Aleksandër Vuçiç.

“Dua të garantoj çdo shqiptar, se diplomacia e megafonit nuk i shërben zgjidhjes së problemeve, aq më tepër kur atë e përdor një vend si Shqipëria. Diplomacia e megafonit, për dramën e madhe që po luhet në Hagë kundër ish-udhëheqësve politikë të Luftës Çlirimtare dhe të Kosovës, është në vlerësimin tim, aspak e dobishme”, u shpreh Berisha.

Sipas tij, Kryeministri Rama nuk ka ndërmarrë me diplomacinë konvencionale asnjë edhe një hap të vetëm në ndihmë të luftëtarëve të UÇK-së, drejtuesve të luftës, që ndodhen sot me akuza të fabrikuara nga alfa tek omega.

Berisha akuzoi gjithashtu Ramën për përdorimin e UNESCO-s si pretekst për projekte në Durrës që dëmtojnë pronarët legjitimë.

“Asgjë nuk ka të bëjë me UNESCO-n ajo. Ka të bëjë me baronët e drogës që duan të investojnë kullat e tyre aty ku do rrënohen shtëpitë”, u shpreh Berisha.

/e.i/j.p/

The post Berisha: Asnjë hap diplomatik për të mbështetur ish-drejtuesit e UÇK në Uashington appeared first on Agjencia Telegrafike Shqiptare.

TIRANË, 20 shkurt /ATSh/ Ministrja e Punëve të Brendshme, Albana Koçiu reagoi sërish në lidhje me protestën e opozitës që u përshkallëzua në hedhje të lëndëve piroteknike dhe molotovëve edhe në drejtim të xhamisë në Namazgjasë në kryeqytet.

Në momentet e përplasjes mes protestuesve dhe efektivëve të policisë, brenda xhamisë kishte besimtarë që kryenin ritualet fetare të muajit të Ramazanit.

Koçiu u shpreh se “sot kryeqyteti u nda në dy realitete që nuk kanë asgjë të përbashkët”.

“Nga njëra anë, përulësia e besimtarëve që kërkojnë paqe; nga ana tjetër, banda e çadrave dhe e molotovit që me maska në fytyrë nxisin dhunë. Ndërkohë që dëgjohet lutja, ulërijnë britmat për shkatërrim. Është një kontrast që të lë pa fjalë: Lutja përballë mallkimit. Qytetaria përballë vandalizmit”, tha Koçiu.

Ministrja Koçiu deklaroi se “përballë kësaj marrëzie që djeg qytetin për hallin e karriges së një njeriu, duke u kërkuar ndjesë besimtarëve që ishin aty në ritualin e lutjeve e u përballën me situatën e gazit lotsjellës, mbetet të themi vetëm një fjali: Fali Zot, se nuk dinë ç’bëjnë”!

/e.i/j.p/

The post Koçiu: Besimtarët në lutje dhe banda e molotovit, dy realitete që nuk kanë asgjë të përbashkët appeared first on Agjencia Telegrafike Shqiptare.

TIRANË, 19 shkurt /ATSh/ Kryetari i grupit parlamentar të Partisë Socialiste, Taulant Balla komentoi fillimin e protestës së thirrur nga opozita përpara Kryeministrisë.

Balla shkroi se “ja sheshi, ja mejdani, ja dhe grupi kriminal që mbulohet me çadra (edhe pse nuk bie shi) gati për molotovët e një plaku të rrjedhur” ndërsa përcolli pamjet e protestuesve me çadra që i drejtohen Kryeministrisë.

Protesta e sotme e opozitës u shoqërua me hedhje fishekzjarresh dhe molotovë në drejtim të Kryeministrisë ndërsa Policia nuk mori përsipër sigurinë për shkak të paralajmërimeve për dhunë.

/e.i/j.p/

The post Balla: Grupi kriminal që mbulohet me çadra, gati për molotovë appeared first on Agjencia Telegrafike Shqiptare.

TIRANË, 19 shkurt /ATSh/ Ministrja e Punëve të Brendshme, Albana Koçiu dënoi mbrëmjen e sotme çdo inkurajim aktesh dhune nga drejtues të opozitës ndërsa mbështetës të PD-së qëlluan me fishekzjarre e molotovë në drejtim të Kryeministrisë gjatë protestës.

Koçiu u bëri thirrje organizatorëve të protestës që t’u bëjnë apel simpatizantëve që të shmangin aktet e dhunës dhe të mbajnë të miturit larg çdo akti që do të rrezikonte jetën e tyre dhe qytetarëve.

“Dhuna nuk është zgjidhje! Dhuna është shfaqje e dëshpërimit nga ata që në vend të alternativës krijojnë skena që rrezikojnë jetën e qytetarëve, policëve e gazetarëve”, tha Koçiu.

Ministrja Koçiu vijoi duke theksuar se “ata të rinj e të mitur që përfshihen në akte dhune nuk janë as heronj e as trima, por janë të keqpërdorurit e atyre që në mënyrë patologjike vijojnë të mbështeten te dhuna, pa mundur të ndërtojnë alternativë tjetër veç shkatërrimit”.

Reagimi i ministres Koçiu vjen gjatë zhvillimit të protestës së katërt kombëtare të PD-së dhe aleatëve të saj.

/e.i/j.p/

The post Koçiu: Dënojmë inkurajimin e akteve të dhunës nga drejtues të opozitës appeared first on Agjencia Telegrafike Shqiptare.

TIRANË, 19 shkurt /ATSh/ Partia Demokratike dhe aleatët e saj mbajnë sot protestën e katërt kombëtare në bulevardin “Dëshmorët e Kombit”, përballë godinës së Kryeministrisë me kërkesën për largimin e qeverisë.

Mbështetësit e opozitës u mblodhën fillimisht tek selia e Partisë Demokratike, ndërsa të tjerë u bashkuan përgjatë segmenteve rrugore.

Berisha iu drejtua protestës së bashku me drejtues të tjerë të PD dhe aleatët por edhe me protestues që zgjodhën ta shoqërojnë pas qëndrimit rreth 30 minuta në selinë e PD-së, ndërsa protestuesit ishin mbledhur në shesh.

Tubimi u hap me himnin kombëtar, ndërsa fjalën e parë e mbajti aktorja Rajmonda Bulku, e cila ka qenë pjesë e ngjarjeve të dhjetorit ’90.

Nga podiumi i protestës kombëtare të thirrur nga PD dhe aleatët e saj, Bulku  u shpreh se dita e sotme kujton momentin historik të 20 shkurtit të vitit 1991, kur u rrëzua busti i diktatorit Enver Hoxha.

“Ne ishim bashkëngjitur me grevën historike të studentëve tanë. Nuk patëm frikë. Luftuam kundër një ushtrie që nuk duhet harruar që ishte Partia Komuniste. Kishim një frymë, të gjithë bashkë, hoqëm frikën, morëm guximin sepse deshëm lirinë, deshëm të rrëzonim sistemin më të egër komunist. Atë frymë të sjellim këtu sot, atë dëshirë për të jetuar bukur në Shqipërinë tonë të bukur. Ta bëjmë për jetët tona për fëmijët dhe nipërit tanë, që ata të kenë mundësi të jetojnë më mirë. Të punësohen këtu dhe të mos ikin, të mos braktisin këtë vend të bekuar”, tha Bulku.

Nga podiumi i protestës, pedagogu Ermal Hasimja bëri thirrje për bashkim qytetar në funksion të zgjedhjeve të lira dhe një drejtësie të pavarur.

Në fjalën e tij, Hasimja ndau edhe një rrëfim personal, duke kujtuar momentet kur, tre dekada më parë, në moshën 15-vjeçare, së bashku me të atin kishte zbritur në të njëjtin shesh që gjendej sot, bulevardin “Dëshmorët e Kombit”, mes frikës dhe pasigurisë, por të mbështetur te shpresa për një të ardhme më të mirë.
“Ajo që na mbajti ishte shpresa, një shpresë që gjatë këtyre viteve është tentuar të zbehet”, u shpreh ai.
Ai theksoi se sot vendi ka nevojë më shumë se kurrë për frymë bashkimi, duke kërkuar drejtësi të pavarur dhe zgjedhje të lira, ku qytetarët të vendosin vetë për të ardhmen e tyre.
Sipas tij, ndryshimi nuk vjen nga pasiviteti, por kërkon angazhim dhe sakrificë nga të gjithë, veçanërisht nga intelektualët.

Deputetja e PD-së, Jorida Tabaku nga podiumi i protestës së katërt kombëtare të opozitës, tha se rrëzimi i monumentit të diktatorit 35 viteve të parë ishte çasti i kthesës së madhe, ishte fundi i një diktature të pamëshirshme që ishte instaluar në çdo qelizë të shoqërisë.

Tabaku tha se “35 vite më pas jemi në shesh përballë një autokrati të lindur, ku pakica sundon mbi shumicën, duke plaçkitur Shqipërinë”.

“Kjo nuk është një betejë partiake, por për Shqipërinë e qytetarëve, jo të klientëve, për ekonominë e punës dhe jo të favoreve, për drejtësinë e barabartë. Brenda forcës sonë ka pasur edhe gjëra që na kanë ndarë, por gjërat që na ndajnë nuk janë më të forta se ato që na bashkojnë”, përfundoi Tabaku.

Policia mori masa për bllokimin e disa rrugëve si rruga pranë bashkisë së Tiranës, rrethrrotullimi tek “Zogu i Zi”, tek sheshi “Wilson”, tek “Pallati me Shigjeta”, si dhe kryqëzimi tek Rruga e Elbasanit, pranë xhamisë së “Namazgjasë”.

Policia e Tiranës në një njoftim për mediet u shpreh sot se nuk merr përsipër zhvillimin e tubimit. Sipas policisë, ka informacione se mund të ketë veprime të dhunshme në protestën e sotme.

PD kërkon krijimin e një qeverie teknike dhe zhvillimin e zgjedhjeve të lira.

Në protestën e tretë kombëtare të PD të organizuar në 10 shkurt, pati përshkallëzim të situatës, ku protestuesit hodhën fishekzjarrë dhe molotov në drejtim të godinës së Kryeministrisë. Sipas njoftimit të Policisë, 21 persona u arrestuan, ndërsa 19 efektivë policie mbetën të plagosur.

vijon….

1 nga 13

/e.i/j.p/

The post PD, protestë përballë Kryeministrisë appeared first on Agjencia Telegrafike Shqiptare.

TIRANË, 19 shkurt /ATSh/ E Ngarkuara me Punë e Shteteve të Bashkuara të Amerikës, Nancy VanHorn mbajti fjalën e rastit në nisjen e Komitetit të të Rinjve, Sipërmarrjes dhe Inovacionit të Dhomës Amerikane.

Ky komitet themelohet në vitin e 250-vjetorit të Shteteve të Bashkuara të Amerikës, një vend i themeluar nga novatorë, sipërmarrës dhe njerëz të gatshëm për të hapur një shteg të ri.

Van Horn në nisje të fjalës vuri në dukje se kjo është një platformë e re që do të lidhë sipërmarrësit e rinj shqiptarë me ekspertizën amerikane në biznes.

“Dhe Presidenti Donald Trump e ndërtoi karrierën e tij mbi një parim të thjeshtë: pengesat janë thjesht sfida për t’u kapërcyer. Siç ai ka thënë: “Nëse ke një mur betoni përpara, kalo përmes tij, kalo sipër tij ose përreth tij”, u shpreh VanHorn.

E Ngarkuara me Punë e ShBA-ve, theksoi se kjo është ajo për të cilën shërben ky komitet – t’i kthejë pengesat në mundësi.

“Idetë kanë nevojë për mundësi dhe ne mund ta bëjmë këtë përmes zgjuarsisë, integritetit dhe një shpirti të pathyeshëm. Ky komitet do të lidhë sipërmarrësit në zhvillim me drejtues të konsoliduar”, vijoi ajo.

“Dhe po shoh shumë prej tyre këtu sonte në Shqipëri. Do të ndajë ekspertizë, do të hapë dyert drejt tregut amerikan dhe do t’i ndihmojë të rinjtë shqiptarë të kenë sukses pikërisht këtu, në Shqipëri. Dhe siç ju thatë, Këndi Amerikan është vendi i përkryer për këtë nisje. Prej 22 vitesh, ka qenë një qendër e kulturës dhe risive amerikane në Shqipëri – nga inteligjenca artificiale te siguria kibernetike e deri te dizajni i lojërave”, tha ajo.

VanHorn cilësoi se me këtë komitet nis një lidhje të drejtpërdrejtë me drejtues biznesi që veprojnë sipas mënyrës amerikane të të bërit biznes.

“Dhe kjo sepse kur konkurrenca është e ndershme dhe suksesi bazohet në meritë, sipërmarrësit lulëzojnë dhe ndërtojnë biznese që zgjasin. Dhe faleminderit Dhomës Amerikane të Tregtisë për vizionin dhe udhëheqjen tuaj; Dhoma Amerikane ka qenë një partner i palëkundur. Dhe ky komitet do të nxisë bashkëpunimin me brezin e ardhshëm të Shqipërisë”, theksoi VanHorn, ndërsa u kërkoi të rinjve që ta bëjnë këtë komitet një katalizator për të ardhmen ekonomike të Shqipërisë.

/e.i/j.p/

The post Themelohet Komiteti i të Rinjve, Sipërmarrjes dhe Inovacionit të Dhomës Amerikane, VanHorn: Katalizator për të ardhmen ekonomike të Shqipërisë appeared first on Agjencia Telegrafike Shqiptare.

TIRANË, 19 shkurt /ATSh/ Deputetja e Partisë Demokratike, Jorida Tabaku prezantoi sot në Kuvend projektligjin “Për akcizat në Republikën e Shqipërisë”, të ndryshuar”.

Tabaku tha se “po prodhohen produkte shqiptare që nuk shiten dot në tregjet shqiptare apo jashtë vendit prej një modeli ekonomik të dështuar”.

“Modeli ekonomik sot familjeve shqiptare është duke u marrë frymën. Nga ky model sot në tre sektorët kryesorë të bujqësisë, të prodhimit fason që kanë mbajtur eksportet, por edhe të produkteve të tjera që mund të konsiderohen artizanale ka rënie në eksporte, rënie në punësim. Të dhënat e fundit të prezantuara nga INSTAT, tregojnë për një nivel rekord të rënies së eksporteve që janë tkurrur me 4.5%, energjia ka rënë 2.9%, tekstilet kanë rënë me 5.8%, ushqimet me 2%”, tha Tabaku.

Sipas Tabakut, kjo tregon që produktet shqiptare nuk po shiten më.

“Kjo tregon që produktet shqiptare qoftë prej politikës së gabuar të taksave, zhvlerësimit të euros, edhe prej faktit që një pjesë e madhe e politikave të qeverisë është e orientuar në sektorë të veçantë me ligje speciale në mbështetje për biznese të mëdha, në ulje taksash për hotele me pesë yje, ndërkohë që produkte shqiptare i lënë që të hidhen rrugëve”, vijoi Tabaku.

Deputetja e PD-së, nënvizoi se për 11 vite është dëgjuar një propagandë për produktet Made in Albania, duke rënë në retorikë patriotike.

“Patriotizmi matet me faturën e akcizës që i çon biznesit në fund të muajit. Në vitin 2022 kjo qeveri bëri një akt, asgjësuan fashën mbrojtëse për prodhuesit e vegjël për produktin që kam prezantuar sot që është birra artizanale e prodhuesve të vegjël që janë 9 në total në Shqipëri”, vijoi ajo.

“U vendos që një punishte artizanale që punëson pesë persona të paguajë të njëjtën akcizë si një gjigant që prodhon miliona litra. Kjo është pabarazi ulëritëse. Direktivat e BE-së që janë kushtetuta sa i përket taksave, thotë qartë, se shtetet anëtarë duhet të aplikojnë norma të reduktuara deri në 50% për prodhuesit e vegjël dhe të pavarur”, theksoi Tabaku, ndërsa shtoi se Shqipëria është i vetmi vend me taksë doganore për lëndët e para në kufirin 5-15%.

“Zero e ka Kosova, Shqipëria sot nuk po prodhon më, nuk eksporton më, Shqipëria sot nuk po i mban produktet Made in Albania, e pastaj mburren për bujqësinë, turizmin që janë të dyja duke u shteruar. Bujqësia pak kohë më parë kishte 20% të produktit të brendshëm bruto, është ulur në 16%, ndërsa produktet e fshatit hidhen në rrugë”, tha Tabaku.

/e.i/j.p/

The post Tabaku: Nivel rekord i rënies së eksporteve, të mbrojmë prodhimin vendas appeared first on Agjencia Telegrafike Shqiptare.

TIRANË, 19 shkurt /ATSh/ Ministri i Turizmit, Kulturës dhe Sportit, Blendi Gonxhja deklaroi sot gjatë seancës plenare në Parlament, se lidhur me projektin TID që pritet të zhvillohet në Durrës nuk ka pasur nxitim në asnjë prej procedurave ligjore që kanë qenë të lidhura me dëgjesat dhe projektimin.

Në përgjigje të akuzave të deputetit demokrat Igli Cara, i cili u shpreh “se ky projekt ka vite që ka nisur, por në këtë marrëveshje kanë munguar aktorët kryesorë që janë mbi 200 familje që kanë pronat në zonë”, Gonxhja tha se këto akuza shkojnë në një nivel pandjeshmërie ndaj interesit publik dhe komunitetit atje.

“Janë bërë të gjitha hapat sa i takon dëgjesave, ka qenë një proces i gjatë, i ngadaltë sepse ka qenë i kujdesshëm. Nuk ka pasur asnjë nxitim në asnjë prej procedurave ligjore që kanë qenë të lidhura me dëgjesat dhe projektimin. Ka pasur një vlerësim të kujdesshëm të të gjithë aspektit historik, të aspektit të interesit të komunitetit dhe gjithë aspektit të interesit privat në rastin e godinave, bizneseve, disa hoteleve”, tha Gonxhja.

Ministri Gonxhja tha se është vlerësuar shumë kujdesshëm interesi i përgjithshëm i vendit.

“Ky nuk është një projekt që lidhet vetëm me Durrësin, por me portet e Shqipërisë nga Adriatiku dhe me një prej atyre qendrave që ne shumë shpejt mendojmë ta kemi në listën e UNESCO-s pas një dosjeje të plotë që do duam të kemi për një aplikim të ri për këtë amfiteatër por edhe zonën përreth tij”, u shpreh ministri.

“Nga kjo pikëpamje është e pavend, megjithëse ne këtu bëjmë politikë, përfaqësojmë shumë votues, shumë prej nesh nga krahu që unë i përkas përfaqësojmë edhe më shumë votues. Tentativa për të folur politikisht dhe në një formë për të garantuar popullaritet shumë të lartë na tërheq, por nuk është e lejueshme që të ngatërrohen nocione dhe të përzihen të vërteta në këtë formë të pakujdesshme”, theksoi ai.

Sipas Gonxhes, TID vjen nga përpjekja për të pasur një menaxhim të integruar të një zone që ka një potencial të lartë zhvillimi turistik, ndërsa BIDI, është një formë tjetër ku punohet për të pasur një aktivizim ekonomik, në një zonë e cila do të ketë në vetë të parë interesin e konsumatorit dhe subjekteve tregtare.

“Të dy këto koncepte, janë në thelb disa forma menaxhimi të integruar që të gjitha të ardhurat, të gjitha ato mundësi që krijohen nga një anëtarësim në këtë lloj nukli ekonomik që krijohet riinvestohen për mirëmbajtjen, përmirësimin e vazhdueshëm, për gjithë ndërhyrjet dhe gjithë zëvendësimin e shpeshtë të pajisjeve, të ritrajtimit të atyre objekteve që janë në këto zona që kanë një amortizim shumë të lartë”, pohoi Gonxhja.

Ministri Gonxhja deklaroi se “qytetarët e Durrësit, komuniteti që lidhet me këtë zonë historike duhet të jetë i qetë që të gjitha procedurat po bëhen.  Është ngritur një grup i posaçëm pune për të bërë një rivlerësim të të gjitha hapave, pikëpyetjeve të banorëve në mënyrë që të përditësohen nëse ka momente vlerësimi apo përditësim të akteve nënligjore”.

/e.i/j.p/

The post Gonxhja: Projekti TID, potencial për zhvillimin turistik dhe ekonomik të Durrësit appeared first on Agjencia Telegrafike Shqiptare.

TIRANË, 19 shkurt /ATSh/ Autoriteti Rrugor Shqiptar njofton se në aksin Librazhd-Pogradec, në vendin e quajtur Arrat e Gurrës, është konstatuar se çarjet e vjetra dhe të reja që ishin shfaqur në këtë zonë janë thelluar akoma më shumë, duke paraqitur një situatë të pasigurt për përdoruesit e rrugës.

Në këto kushte, Autoriteti Rrugor Shqiptar ka ndërmarrë menjëherë masat paraprake emergjente për parandalimin e aksidenteve të mundshme.

ARrSh informon se duke filluar që sot, në koordinim dhe me Policinë e Shtetit, do të ketë kufizim të lëvizjes me një korsi në vendin e rrëshqitjes, duke vendosur semafor për disiplinimin e trafikut.

Në vijim, do të merren masa për realizimin e një korsie tjetër provizore në të majtë të trupit të rrugës, për të siguruar qarkullimin e mjeteve me dy sense.

ARrSh kërkon mirëkuptimin e drejtuesve të mjeteve si dhe të banorëve të zonës, për këtë ndërhyrje në rrugë dhe kufizimin e lëvizjes në këtë segment, por që vlerësohet e domosdoshme për sigurinë rrugore.

/e.i/j.p/

The post Aksi Librazhd-Pogradec, lëvizje me një korsi për shkak të dëmtimit të rrugës tek “Arrat e Gurrës” appeared first on Agjencia Telegrafike Shqiptare.

TIRANË, 19 shkurt /ATSh/ Ministrja për Evropën dhe Punët e Jashtme, Elisa Spiropali u shpreh sot në seancën parlamentare në Kuvend, se projektligji për shërbimin e jashtëm në Republikën e Shqipërisë rregullon fushën e kompetencave mes institucioneve të këtij shërbimi.

Në përgjigje të deputetit të partisë “Mundësia”, Erald Kapri, i cili u shpreh në Kuvend se ky projektligj është paraqitur si reformë e thellë, por sipas tij, 90% e emërimeve në diplomacinë shqiptare janë nepotike, Spiropali tha se ky ligj rregullon mandatin e kreut të misionit diplomatik edhe të postit konsullor, si edhe të personelit diplomatik.

Sipas Spiropalit, projektligji për shërbimin diplomatik forcon kriteret profesionale dhe ato për diplomatët e karrierës bazuar në nivelet e tyre akademike.

“Për herë të parë fusim konceptin e krijimit të akademisë diplomatike si institucion varësie që do të merret me rritjen profesionale të diplomatëve brenda ministrisë së jashtme. Ky ligj përcakton më qartë përfshirjen e misioneve diplomatike dhe konsullore jashtë karrierës diplomatike. Vetëm 25% e diplomatëve janë jashtë sistemit të karrierës, pra diplomatë jo të karrierës. Projektligji mundëson pranimin në shërbimin e jashtëm të shtetasve me përvojë në organizatat e jashtme, siguron verifikimin e pastërtisë së personelit të jashtëm, për bashkëpunëtorët, për ata që nuk marrin dot certifikatë sigurie”, tha Spiropali.

Ministrja Spiropali deklaroi se kjo krijon një situatë shumë më racionale edhe në çështjen e gradave që jepen në shërbimin diplomatik dhe forcon kriteret dhe afatet.

“Prezantohet për herë të parë edhe komisioni i apelimit që jep mundësinë për të shqyrtuar ankesat, mundëson vijimësinë e statusit të diplomatit etj. Do të ketë kompensim financiar për poste konsullore, shërbime diplomatike në kushte të vështira. Ne sot nuk e kemi këtë mundësi që t’i trajtojmë diplomatët tanë”, deklaroi Spiropali. /e.i/j.p/

The post Spiropali: Forcojmë kriteret profesionale në shërbimin diplomatik appeared first on Agjencia Telegrafike Shqiptare.

TIRANË, 18 shkurt /ATSh/ Zëvendësministrja e Transportit dhe Mobilitetit në Republikën e Maqedonisë së Veriut, Kaltrina Zekolli tha se ndërtimi i Korridorit VIII sjellë më shumë zhvillim ekonomik në rajon.

Si pjesë e diskutimit të panelit III, “Dimensioni gjeopolitik i Korridorit VIII”, në ministerialin që po mbahet sot në Tiranë, Zekolli tha se “si qeveri jemi shumë të angazhuar në rezultate konkrete pozitive për ecurinë dhe zhvillimin e këtij projekti strategjik me përmasa gjeopolitike, i cili nuk është vetëm një rrugë, një hekurudhë, por një arterie e cila do të kontribuojë në zhvillimin ekonomik, në bashkëpunimin e rajonit për ndërtimin e urave lidhëse në tërheqjen e investitorëve rajonalë dhe ata ndërkombëtarë”.

“Maqedonia e Veriut ka një pozicion shumë të mirë në këtë korridor, ndërtimi i të cilit do të sjellë vetëm zhvillim më të madh në të gjitha aspektet. Në Maqedoninë e Veriut janë bërë hapa shumë të mëdha në aspektin e ndërtimit të rrugëve duke punuar me intensitet të plotë, me mijëra makineri dhe në çdo segment po punohet edhe aktualisht”, tha Zekolli.

Sipas saj, “autostrada që lidh Maqedoninë me fqinjët po zhvillohet deri në Strugë, ndërsa në aspektin e hekurudhave, puna ka ecur para duke nënshkruar me fqinjin bullgar një marrëveshje ndërqeveritare për një tunel të përbashkët që do të jetë linjë e re hekurudhore”.

“Kjo ka kaluar dhe në Kuvend dhe tregon se infrastruktura që zhvillojmë në Maqedoni duhet të jetë në harmonizim me rrjetin evropian të zhvillimit, ku nuk ndërtojmë vetëm rrugë, por plotësojmë të gjitha standardet”, tha Zekolli.

/e.i/a.f/r.e/

The post Zekolli: Korridori VIII, arterie që ndikon në zhvillimin ekonomik të rajonit appeared first on Agjencia Telegrafike Shqiptare.

TIRANË, 18 shkurt /ATSh/ 444 studentë të ekselencës dhe të programeve prioritare kombëtare do të mbështeten financiarisht nga Ministria e Arsimit dhe Agjencia Kombëtare e Financimit të Arsimit të Arsimit të Lartë përmes përjashtimit nga tarifat e studimit dhe njëkohësisht me pagën minimale prej 50 mijë lekë në muaj, për vitin akademik 2025-2026.

Ministrja e Arsimit Mirela Kumbaro, në aktivitetin ku studentët përfitues u pajisën me kontratat e lidhura mes tyre, Agjencisë Kombëtare të Financimit të Arsimit të Lartë dhe institucioneve të arsimit të lartë, me pjesëmarrjen e kryetarit të Konferencës së Rektorëve, Artan Hoxha, u shpreh viti akademik 2025–2026 shënon kulmin e kësaj politike: 444 studentë përfitojnë nga skema, ndërsa mbështetja mujore arrin në 50,000 lekë për secilin.

“E institucionalizuar për herë të parë në vitin 2022, kjo skemë është shndërruar në një instrument të konsoliduar të politikave të arsimit të lartë. Rritja progresive e numrit të përfituesve dhe e fondit financiar dëshmon për një angazhim të qëndrueshëm për të mbështetur të rinjtë dhe për të rritur cilësinë akademike në universitete.
Viti akademik 2025–2026 shënon kulmin e kësaj politike: 444 studentë përfitojnë nga skema, ndërsa mbështetja mujore arrin në 50,000 lekë për secilin. Janë lidhur kontratat mes AKFAL dhe studentëve, dhe sot ju do të merrni kontratat. Nga këta, 166 janë studentë ekselentë dhe 278 ndjekin programe prioritare, duke reflektuar një orientim të qartë drejt fushave kyçe për zhvillimin ekonomik dhe teknologjik të vendit”, tha ministrja Kumbaro.

Duke folur më tej për shpërndarjen sipas universiteteve, ministrja e Arsimit tha se: “Universiteti Bujqësor i Tiranës ka numrin më të lartë të studentëve në degë prioritare. 125 studentë nga UBT janë duke ndjekur degë prioritare dhe po mbështeten nga skema. Ndërsa universiteti i Mjekësisë ka numrin më të lartë të studentëve të shkëlqyer, 125 studentë.”

Nga ana tjetër, kryetari i Konferencës së Rektorëve, Artan Hoxha tha se: “Pakti për universitetin ka rezonuar në një mbështetje financiare për studentët në tërësi. Ne si universitete publike kemi bërë politikat tona duke i mbajtur të njëjta apo ulur tarifat e studimit, për të lehtësuar kostot e jetesës së studentëve. Gjithashtu, studentët që vijnë me nota të larta, nga nota 9 deri në 10, kanë një mbështetje financiare si dhe përjashtim nga tarifa e studimit. Bursat studentore për studentët e ekselencës dhe ata që studiojnë në programe me interes kombëtar, mbulohen 100% nga buxheti i shtetit për t’u dhënë mundësi këtyre studentëve të performojnë më mirë”.

Thirrja për mbështetjen financiare për studentët ekselentë dhe të programeve prioritatre, mbulohet nga buxheti i Ministrisë së Arsimit për arsimin e lartë, i cili në vitin 2026 është 185 milionë euro, më i larti në vlerë nominale. Përmes këtij buxheti, mbulohen gjithashtu bursat për 12 mijë studentë nga shtresat sociale në nevojë, sigurohet përjashtim ose reduktim i tarifave për 41 mijë studentë të Institucioneve publike të arsimit të lartë, si dhe mbështetet e skema kreditimit studentor, përmes së cilës qeveria mbulon deri në 5% të normës së interesit të kredisë.

/e.i/r.e/

The post Kumbaro: Përjashtim nga tarifat e studimit dhe pagë 50 mijë lekë në muaj për 444 studentët e ekselencës appeared first on Agjencia Telegrafike Shqiptare.

TIRANË, 18 shkurt /ATSh/ Gjykata Kundër Krimit të Organizuar dhe Korrupsionit shpalli sot fajtor shtetasit Gazmend Peposhi dhe Kalosh Peposhi, të akuzuar për veprën penale “Korrupsioni aktiv në zgjedhje”, kryer në bashkëpunim.

Për shtetasin Kalosh Peposhi, gjykata vendosi dënimin me 1 vit, 7 muaj e 15 ditë burgim, i cili pas uljes me 1/3 për shkak të gjykimit të shkurtuar, u reduktua në 1 vit e 1 muaj burgim.

Në njoftimin e GJKKO thuhet se “duke qenë se koha e qëndrimit në paraburgim rezultoi më e gjatë se masa e dënimit, gjykata urdhëroi lirimin e menjëhershëm të tij, nëse nuk mbahet për ndonjë shkak tjetër. Po ashtu, ndaj tij u hoq masa e sigurimit “arrest në burg””.

Ndërsa për Gazmend Peposhin, gjykata caktoi dënimin me 1 vit e 9 muaj burgim, i cili pas aplikimit të gjykimit të shkurtuar u ul në 1 vit e 2 muaj burgim.

SPAK vendosi që Gazmend Peposhi të vuajë dënimin në një burg të sigurisë së zakonshme, duke filluar nga dita e ekzekutimit të vendimit.

/e.i/r.e/a.f/

The post Korrupsion aktiv në zgjedhje, GJKKO shpall fajtorë dy persona appeared first on Agjencia Telegrafike Shqiptare.

TIRANË, 18 shkurt /ATSh/ Prefektura e Shkodrës, në një përditësim të situatës së krijuar për shkak të motit të keq, bën me dije se ditën e sotme situata e emergjencave civile paraqitet e qëndrueshme dhe në përmirësim.

Sipas njoftimit, në territorin e bashkisë Shkodër, situata paraqitet e stabilizuar, duke shfaqur një tendencë të lehtë në ulje të nivelit të ujërave.

Prefektura Shkodër informon se në Obot vijon të ketë prezencë uji, kryesisht në sipërfaqe tokash bujqësore me tendencë rënie. Aksi rrugor që lidh fshatin Obot me rrugën kryesore paraqet nivel uji rreth 40–45 cm.

Prefektura e Shkodrës njofton se në mbështetje të situatës, në zonë janë vendosur në gatishmëri mjete të kalueshmërisë së lartë të cilët do të ndërhyjnë sipas nevojave. Deri në këto momente nuk raportohen banesa të rrethuara nga uji.

Sipas të dhënave të Drejtorisë së Ujitjes dhe Kullimit Lezhë, nivelet e ujit në pikat monitoruese vijojnë të jenë nën kuotat kritike. Niveli i liqenit është regjistruar në kuotën 7,9 m ndërsa niveli i lumit Drin është në kuotën 7,7 m, me tendencë rënieje krahasuar me orët e mëparshme.

Nuk raportohen problematika në funksionimin e kanaleve kulluese, argjinaturave mbrojtëse dhe digës së rezervuarit të Shtodrit.

Ndërsa, në aksin Bogë – Theth, reshjet kanë pushuar dhe rruga është pastruar dhe zgjeruar deri në zonën e Qafë Thore, pranë tunelit të parë. Mjetet dhe specialistët janë në gatishmëri për ndërhyrje në rast nevoje.

Në territorin e Bashkia Vau i Dejës, Bashkia Malësi e Madhe, Bashkia Pukë dhe Bashkia Fushë-Arrëz situata paraqitet e qëndrueshme dhe nën kontroll. Nuk raportohen problematika apo situata emergjente.

Prefektura e qarkut Shkodër, në bashkëpunim me strukturat përgjegjëse, vijon të jetë në terren, duke monitoruar në mënyrë të vazhdueshme situatën.

/e.i/r.e/a.f/

The post Oboti vijon nën ujë nga moti i keq, aksi Bogë-Theth i pastruar deri në Qafë Thore appeared first on Agjencia Telegrafike Shqiptare.