TIRANË, 31 janar/ATSH/ Ambasadorja e Francës në Shqipëri, Catherine Suard, mori pjesë sot në Forumin e Dialogut “Edhe disa hapa drejt BE-së” ku theksoi se Franca e mbështet integrimin e Shqipërisë në Bashkimin Europian.
Në fjalën e saj ambasadorja Suard tha se “në rrugëtimin drejt BE askush nuk mund të dyshojë sepse Shqipëria ka kryer hapa gjigantë, nga reforma e drejtësisë tek digjitalizmi i shërbimeve nga forcimi i institucioneve tek modernizimi i ekonomisë, nga mbrojtja e qytetarëve tek mbrojtja e natyrës, nga angazhimi sai përket stabilitetit dhe sigurisë tek harmonizimi me politikën e jashtme”.
Sipas saj, arritjet e Shqipërisë në konvergimin e saj europian janë të konsiderueshme.
“Janë këto arritje që na japin besim të gjithëve sepse vendet anëtare kanë vendosur të hapin të gjithë kapitujt e negociatave që përshkojnë këtë rrugë. Pikërisht për këtë besim Presidenti i Republikës franceze Emannuel Macron erdhi të dëshmojë gjatë dy vizitave të tij të fundit në Shqipëri. Këto vizita i dhanë marrëdhënies tonë dypalëshe një ritëm të pandërprerë, një ritëm të ngjashëm me atë të Shqipërisë drejt BE-së”, tha Suard duke shtuar se Shqipëria nuk ecën vetëm drejt Europës ajo e përshpejton, apo më saktësisht e shtrin hapin.
Në fakt vijoi Suard, reformat e ndërmarra janë hapa të mëdhenj strategjikë që e transformojnë me thellësi fizionominë e Shqipërisë duke e bërë më afër, më familjare, më të përputhshme, më të lidhur dhe më të integruar me Europën tonë.
“Franca e mbështet këtë dinamikë integrimi gradual dhe meritën e saj transformuese në mënyrë që ky transformim të jetë efketiv duhet të zbatohet në mënyrë të vendosur në çdo etapë. Franca synon ta mbështesë këtë dinamikë sepse duke kontribuar në të ne do të zhvillojmë interesa të përbashkëta. Pikërisht për këtë ne kemi nënshkruar një marrëveshje ndër qeveritare në 2024 zbatimi i të cilës duhet ët vazhdojë sërish”, tha Suard.
Duke folur për hapat e fundit që kanë mbetur për t’u hedhur, Suard tha se “të gjithë kilometrat e fundit janë më të vështirë dhe më entuziazmuesit. Rrugëtimi i anëtarësimit për integrimin në BE nuk bën përjashtim dhe ne po arrijmë në momentin ku rruga po bëhet më e vështirë, aty ku çdo hap matet nga indikatorët e saktë.
Sipas saj, këto piketa nuk janë vonesa, por janë pika ngulitje të integrimit të ardhshëm të Shqipërisë.
“Është garancia e kësaj pakthyeshmërie që e bën Shqipërinë një partner që Franca dhe Europa mund të mbështeten”, tha Suard.
TIRANË, 28 janar/ATSH/ Drejtoria e Përgjithshme e Doganave po merr pjesë në Konferencën dhe Ekspozitën Teknologjike 2026 të Organizatës Botërore të Doganave (WCO), e cila nisi sot nën temën “Fleksibiliteti Doganor në një Botë Komplekse: Sigurimi dhe Lehtësimi i Tregtisë përmes Inovacionit”.
Ky eveniment treditor, që mbledh mbi 1500 pjesëmarrës nga më shumë se 100 vende, është një platformë ndërkombëtare për shkëmbimin e praktikave më të mira, promovimin e inovacionit teknologjik dhe forcimin e bashkëpunimit mes administratave doganore dhe sektorit privat.
Gjatë konferencës, u theksua roli i teknologjive inteligjente, bashkëpunimit publik-privat dhe përmirësimit të sigurisë së zinxhirëve të furnizimit, si faktorë kyç për një doganë moderne dhe efikase. Takimi synon rritjen e aftësisë së doganave për t’u përshtatur me rreziqet në ndryshim dhe për të lehtësuar tregtinë ndërkufitare në mënyrë të sigurt dhe të shpejtë.
Ceremoninë e hapjes e drejtuan sekretari i përgjithshëm i WCO, Ian Saunders, dhe personalitete të larta të Emirateve të Bashkuara, përfshirë Ali Mohammed Hammad Al Shamsi, kryetar i Autoritetit Federal të Identitetit, Shtetësisë, Doganave dhe Sigurisë së Portit, si dhe Ahmed Abdullah bin Lahij Al Falasi, drejtor i përgjithshëm i Doganave dhe Sigurisë së Portit.
Pjesëmarrja e Drejtorisë së Përgjithshme të Doganave në këtë konferencë synon të forcojë shkëmbimin e eksperiencave ndërkombëtare, të njohë trendet më të fundit teknologjike dhe të përmirësojë kapacitetin e saj për të menaxhuar me efikasitet flukset e tregtisë ndërkombëtare.
TIRANË, 28 janar/ATSH/ Ministri i Shtetit për Pushtetin Vendor, Ervin Demo tha sot se procesi i integrimit sjell shumë sfida edhe për bashkitë.
Në një konferencë për shtyp lidhur me politikat konkrete, investimet strategjike dhe nismat ligjore, nga Paketa e Maleve dhe Granti i Performancës te digjitalizimi për bashki më transparente dhe më pranë qytetarëve, Demo u ndal tek procesi i negociatave dhe sfidat që paraqet për njësitë e pushtetit vendor.
“Agjenda ambicioze që ne kemi që deri në 2027 do të përmbyllim kapitujt në vetvete do të sjellë një dallgë të madhe rregullative, e cila duhet përkthyer në standarde të reja në nivel vendor dhe patjetër me përgjegjësi të reja”, u shpreh Demo.
Ministri Demo vuri në dukje se “qeveria qendrore është këtu për të mbështetur bashkitë aty ku duhet edhe me financat, të cilat janë të domosdoshme për të arritur këto standarde”.
Por, vijoi Demo, Akademia e Pushtetit Lokal dhe nisma të tjera janë pararojë një përgatitje që ne po bëjmë që kur kjo dallgë të vijë bashkitë të jenë gati që të ballafaqohen me këto sfida dhe patjetër të arrijnë që të përthithin jo thjesht përgjegjësitë, por të jenë gati nesër që të jenë konkurruese sa i përket financimit që do të vijë momentin që ne jemi pjesë e BE-së.
Demo u shpreh se “kemi nxjerrë mësime të qarta nga të gjitha vendet që kanë aderuar në BE në vitet e para qartazi është konstatuar një mungesë kapaciteti sidomos në nivel vendor të përthithjes së fondeve që vijnë nga mbështetja financuar nga fondet e kohezionit që është kapitulli 22 nga BE”.
Kjo, vijoi Demo, përgjithësisht ka të bëjë me parapërgatitjen që këto institucione duhet të kenë.
“Duket sikur ka shumë kohë përpara, por më besoni procesi është shumë kompleks, vetvetiu bashkitë kanë karakteristikat e tyre, të cilat e bëjnë ndonjëherë procesin edhe më kompleks. Sfidat e burimeve njerëzore janë aty, ne jemi të gjithë të ndërgjegjshëm ndaj mundohemi që me instrumentet e rinj që kemi duke garantuar nëpërmjet Akademisë së Pushtetit Lokal, fuqizimin e burimeve njerëzore dhe përgatitjet e tyre më të mira për sfidat siç mund të jetë procesi i integrimit dhe jo vetëm, por patjetër granti i performancës do të bëjë të mundur transformmin institucional që bashkitë të jenë gati për atë çfarë ne presim”, tha Demo.
TIRANË, 26 janar /ATSH-Gjergji Mima/ Ministri i Mbrojtjes, Pirro Vengu deklaroi sot, në një konferencë për shtyp, se Shqipëria do të vijojë rritjen e angazhimit të saj në misionet paqeruajtëse ndërkombëtare të NATO-s, Bashkimit Evropian dhe Kombeve të Bashkuara.
I pyetur nga ATSH lidhur me situatën politike dhe nëse Shqipëria ka në plan të rrisë praninë e trupave në misionet paqeruajtëse të NATO-s, Vengu tha se angazhimi ndërkombëtar i vendit ka ardhur vazhdimisht në rritje.
“Angazhimi ndërkombëtar në të gjitha misionet, qoftë të NATO-s, BE-së apo Kombeve të Bashkuara, ka ardhur në rritje dhe do të vazhdojmë ta rrisim. Kjo lidhet edhe me vlerësimin e NATO-s për misionin në KFOR, ku kërkohen forca shtesë. Si një prej kontribuuesve kryesorë në KFOR, edhe Shqipëria do të shtojë forca, këtë vit konkretisht me komponentin ajror, ndërkohë që tradicionalisht kemi qenë të angazhuar me komponentin tokësor”, u shpreh Vengu.
Ministri theksoi se veprimi i forcave shqiptare realizohet gjithmonë në partneritet me vende shumë herë më të fuqishme, brenda strukturave të të cilave operojnë forcat tona, element që, sipas tij, duhet marrë parasysh.
Po ashtu, Vengu nënvizoi se Shqipëria dislokon forca në ato misione ku mund të sjellë një vlerë të shtuar.
“Forca e Armatosur ka një specialitet specifik, siç është komponenti EOD në Letoni, pasi Shqipëria ka kapacitete të konsoliduara në demontimin, çminimin dhe eliminimin e rrezikut nga mjetet plasëse në fushëbetejë. Këtë kapacitet do të vazhdojmë ta ofrojmë për Aleancën”, tha ai.
Sa i përket rreziqeve biologjike dhe kimike, ministri bëri të ditur se po ndërtohen kapacitete të reja për përballimin e tyre, të cilat do t’i japin Shqipërisë mundësinë të kontribuojë edhe në misione të tjera të NATO-s.
Vengu vuri në dukje se misionet ndërkombëtare janë gjithashtu një teatër i rëndësishëm stërvitor për Forcat e Armatosura.
“Ato janë një instrument diplomatik për vendin, në procesin e linjëzimit me BE-në dhe NATO-n, por njëkohësisht janë edhe mundësi konkrete për rekrutët, ekspertët dhe oficerët tanë që të stërviten në kushte reale, shpeshherë me një shkallë të caktuar rrezikshmërie”, tha ai.
Sipas ministrit, angazhimi në misione sjell një përfitim të dyfishtë, ndaj synimi është që rotacionet të bëhen më të shpeshta, në mënyrë që një numër sa më i madh personeli aktiv të ketë mundësi të ekspozohet, të specializohet dhe të stërvitet në kushte reale operacionale.
Ministri i Mbrojtjes Pirro Vengu në konferencë për shtyp , foto: Andrin Hoxha
TIRANË, 26 janar/ATSH/ Ministri i Mbrojtjes, Pirro Vengu tha sot se Shqipëria është duke përgatitur edhe rishikimin strategjik të mbrojtjes.
Në një konferencë për shtyp mbi punën për rritjen e kapaciteteve të Forcave të Armatosura, emergjencave civile dhe industrisë së mbrojtjes, si prioritete të buxhetit të Mbrojtjes 2026, Vengu tha se aktualiteti në të cilën jetojmë dikton qartë se mbrojtja dhe siguria nuk janë më koncepte abstrakte, as tema të nivelit të dytë.
“Në debate ato janë kthyer në terma të një rëndësie parësore dhe në thelbin e sovranitetit dhe dinjitetit të një kombi”, u shpreh ministri i Mbrojtjes ndërsa vuri në dukje se zhvillimet gjeopolitike, tensionet rajonale, kërcënimet hibride dëshmojnë çdo ditë se paqja e stabilitetit nuk janë të dhëna njëherë e përgjithmonë, por përkundrazi këkojnë inevstime përgatitje të vazhdueshme dhe të përditshme.
Dinamikat ndërkombëtare, vijoi Vengu, nuk premtojnë paqe të qëndrueshme, por përballje të menaxhuar midis fuqive të mëdha.
“Shqipëria është duke përgatitur edhe rishikimin strategjik të mbrojtjes. Në tërësi të gjitha këto rishikime evidentojnë një fragmentim të rendit ndërkombëtar dhe konkurrencën e përhershme që strukturon një lloj lufte të re të ftohtë. E përmend këtë sepse Europa juglindore pavarësisht se nuk është epiqendra e rivalitetit të ri global nuk është as një periferi e padukshme. Është një teatër dytësor jo për tanke, por për narrativa, dezinformim dhe ndërhyrje hibride. Nuk mund të mos jetë një fushëbetejë tankesh, por është fushëbeteje perceptimesh, influencash konkurruese nga palë të treta dhe në një rajon ku kemi ende plagë të pambyllura padyshim që përbën një problematikë të re”, tha Vengu.
Ministri Vengu u shpreh se “mbrojtja civile, kibernetike, veprimtaria prodhuese, infrastruktura kritike, zinxhirët e furnizimit, komunikimi strategjik janë pjesë e sigurisë kombëtare dhe në këtë kontekst Shqipëria ndërton sot politikën e saj të mbrojtjes”.
Më tej, Vengu u ndal në disa elemente sfida e shtylla të aktiviteteve në 2026 duke nisur me elementet buxhetorë që sipas tij, “vijnë si përgjigje ndaj këtij realiteti të ri”.
Vengu tha se buxheti 2026 nuk është një buxhet rutinë në shumë aspekte është një mekanizëm për të ndërtuar kapacitete reale për të zhvilluar industrinë për të forcuar sovranitetin digjital dhe për të garantuar një Shqipëri si një aleate e qëndrueshme në NATO.
“Këtë vit buxheti arrin vlerën 2.12 të PBB-së dhe nëse e krahasojmë me 2025 kemi një rritje domethënëse prej 12%”, theksoi ai.
Ministri Vengu theksoi se “shtylla e parë e artikulimit të kësaj përpjekjeje të madhe buxhetore, të cilën e kemi kërkuar pranë sovranit është kapitali njerëzor si themeli i forcës tonë. Është themeli i çdo ushtrie moderne dhe për këtë arsye do të vijojmë politikën afatgjatë të rritjes së pagave në mënyrë të qenësishme me synim që deri në vitin 2029 të arrijmë mesataren e NATO-s. Rritja parashikon një rritje progresive 60-70% për pagat bazë dhe 30% për nivelet më të lartë të komandimit”.
“Paralelisht me këtë përpjekje në kuadër të rritjes së pagave synojmë gjithashtu rritjen me 30% të komponentit aktiv më shumë forca aktive, më shumë forca profesionale”, tha Vengu.
Ministri i Mbrojtjes Pirro Vengu konferencë për shtyp, foto: Andrin Hoxha
TIRANË, 25 janar /ATSH/ Kryetari i Partisë Demokratike, Sali Berisha, deklaroi sot një konferencë se protesta e mbrëmshme e PD-së ishte protesta e ndërgjegjes.
Berisha theksoi se protestuesit, pjesëmarrës nga Tirana dhe qytete të tjera të vendit, dolën në rrugë për më shumë se tre orë, duke shprehur revoltën e tyre kundër qeverisjes aktuale.
“Dje për tre orë kryengritësit guximtarë morën në dorë Tiranën, bulevardin, sheshet e saj. Në një protestë të fuqishme qindra mijëra qytetarë nga Tirana dhe mbarë Shqipëria u përballën me guxim të jashtëzakonshëm për më shumë se tre orë”, tha Berisha.
Kreu i PD shprehu nderim të madh të gjithë atyre qytetarëve djemve, vajzave, burrave dhe grave, të moshuar, që nga Tirana dhe mbarë Shqipëria protestuan në mënyrën më të vendosur.
Berisha theksoi se, protesta e tyre nuk kishte lidhje me ndërtesat, as dhe institucionet kushtetuese.
“Dje regjimi u trondit nga themelet. Dje qytetarët triumfuan në rrugë dhe sheshet e Tiranës. U bënë zëri i ndërgjegjes se njerëzve të ndershëm, të cilët nuk pajtohen kurrë me një qeveri me lidhje të tmerrshme me drogën dhe krimin. Nuk pajtohen kurrë me një qeveri që nuk del nga vullneti i tyre, por nga farsa elektorale. Nuk pajtohen kurrë me një qeveri që vjedh 97% të taksave të tyre dhe të çmendurisht të gjitha pasuritë publike”, tha Berisha.
Kreu i PD u shpreh se, dje protestuesit ishin vetë ndërgjegja e kombit në betejë.
“Ata u përcollën mesazh çdo shqiptari se nuk po luftojmë për veten tonë, se nuk po luftojmë për Sali Berishën, se nuk po luftojmë për Partinë Demokratike, as dhe parti të tjera, se po luftojmë për ndërgjegjen e njeriut, për dinjitetin njerëzor, për interesin kombëtar”, theksoi Berisha.
“Po luftojmë dhe për ju që po na ndiqni në televizione, po luftojmë dhe për ju që mund të mos u pëlqejë protesta. Në fakt, po luftojmë dhe do luftojmë për çdo shqiptar. Kjo është veçantia e kësaj proteste. Kjo është protesta e ndërgjegjes dhe nuk ka asgjë më të fuqishme, nuk ka asgjë më të pathyeshme, nuk ka asgjë më të pamposhtur se sa ajo që buron nga ndërgjegja e njeriut”, tha Berisha.
TIRANË, 23 janar/ATSH/ Ministrja e Ekonomisë dhe Inovacionit, Delina Ibrahimaj deklaroi sot se “Prodhimi Brendshëm Bruto për 3 mujorin e tretë të 2025 u rrit me 3.75%, një normë rritëse e cila është ndjeshëm më e lartë se mesatarja e BE-së, por më e lartë edhe sesa edhe mesatarja e rajonit në të cilin ne jetojmë”.
Në një konferencë për shtyp lidhur me analizën për të dhënat më të fundit ekonomike , Ibrahimaj tha se “kjo është shifër një domethënëse pasi tregon që ekonomia gjatë viteve të fundit të periudhës post pandemisë ka pasur një stabilitet në rritje dhe është luhatur nga 3.5 deri në 4%. Ndërkohë që po jetojmë në një situatë gjeopolitike, e cila ka qartësira dhe në fakt treguesit kryesorë makroekonomikë të Europës tregojnë për këtë situatë të paqartë”.
Ibrahimaj vuri në dukje se “një element kyç i stabilitetit makro- ekonomik janë çmimet. Treguesi i çmimeve të inflacionit përgjatë vitit 2025 është rritur me 2.2%, një normë e cila është brenda kufirit, apo targetit prej 3% të Bankës së Shqipërisë që tregon se çmimet janë rritur në linjë me potencialin që ka ekonomia shqiptare, pra janë rritur në mënyrë të shëndetshme”.
Sa i takon inflacionit në vendet e BE-së, Ibrahimaj tha se “ka qenë i ngjashëm me inflacionin më vend. Mesatarja e inflacionit në vendet e BE për 2025 ka qenë 2.3%, ndërsa elementi kryesor, i cili më së shumti diskutohet dhe të cilin më së shumti ne e kemi në vëmendje në hartimin e politikave tona, inflacioni i çmimeve të ushqimeve për vitin 2025 është rritur me 2.6%, lehtshëm më lartë se inflacioni i të gjithë shportës së mallrave të konsumit”.
Ministrja e Ekonomisë dhe Inovacionit, Delina Ibrahimaj në konferencë për mediet - Foto: Andrin...
1 nga 8
Ministrja e Ekonomisë dhe Inovacionit, Delina Ibrahimaj - Foto: Andrin Hoxha
TIRANË, 20 janar/ATSH/ Ministrja e Shtetit dhe Kryenegociatorja, Majlinda Dhuka prezantoi sot paketën prej 12 nismash ligjore, të cilat i ka në shqyrtim Kuvendi i Shqipërisë.
“Këto nisma lidhen me forcimin e shtetit të së drejtës, sundimin e ligjit, luftën kundër krimit dhe krimit të organizuar, zbatimin më të mirë të reformës në drejtësi dhe në fund dhe jo për nga rëndësia, mbrojtjen nga diskriminimi, mbështetjen për familjen, gratë, për të miturit etj., ndryshe, të drejtat e njeriut dhe drejtësia shoqërore. Duke provuar që vendi e ka vullnetin social politik dhe aftësinë institucionale për t’i mbrojtur shtetasit e vet, për t’i ofruar shërbime më të mira të standardit europian gjithnjë e më të krahasueshme me ato të qytetarëve të një vendi anëtar të BE-së”, theksoi Dhuka, në një konferencë të përbashkët për shtyp me Adea Pirdenin, ministre Shteti për Administratën Publike dhe Antikorrupsionin dhe Toni Gogun, ministër Shteti për Marrëdhëniet me Parlamentin.
Sipas saj, kjo paketë prej 12 nismash ligjore të rëndësishme ka në përmbajtjen e saj 6 projektligje, të cilat i janë propozuar Kuvendit nga Këshilli i Ministrave dhe 6 projektligje të cilat janë iniciuar nga Kuvendi i Shqipërisë.
Kryenegociatorja Dhuka vuri në dukje se “e veçanta e kësaj pakete është se ajo garanton progres në lidhje me standardin europian dhe praktikën më të mirë të vendeve anëtare në 3 grupe çështjesh të rëndësishme. Së pari, në luftën krimit dhe krimit të organizuar; së dyti, në lidhje me barazinë dhe drejtësinë sociale, mbrojtjen e familjes, të nënës dhe të të miturve; së treti, në masat për parandalimin e korrupsionit”.
Më tej Dhuka u shpreh se “së bashku me dy kolegët e mi ne do t’i prezantojmë më me hollësi këto nisma të rëndësishme të transformimit europian. Kjo paketë në zemrën e saj ka një numër përafrimesh me ligjin europian të ligjit shqiptar, duke filluar nga shtatë direktiva në ndryshimet e Kodit Penal, në dy direktiva në projektligjin “Për mbrojtjen nga dhuna”, apo në rregulloren e përafruar plotësisht në projektligjin “Për importin dhe eksportin e armëve”, që garanton parandalimin e trafikut të armëve në Shqipëri”.
“Kjo paketë sjell një numër risish. Për herë të parë përmes kësaj pakete Shqipëria do të dekriminalizojë plotësisht veprën penale të shpifjes ndaj gazetarëve, duke rritur mbrojtjen ndaj gazetarëve në misionin e tyre të rëndësishëm për fjalën e lirë dhe për lirinë e shprehjes në Shqipëri, duke u garantuar në të njëjtën kohë një mbrojtje të re nga kanosja për shkak të detyrës”, tha Dhuka.
“Një numër vendesh të BE e kanë ende të kriminalizuar shpifjen, përfshirë edhe gazetarët për shkak se ekzistojnë edhe sfida të mëdha në lidhje me dezinformimin për shkak të epokës digjitale në të cilën jetojmë. Por Shqipëria mendon se realizimi i këtij ndryshimi është një investim i rëndësishëm në demokraci dhe lirinë e shprehjes dhe në forcimin e rolit të madh që kanë gazetarët në këtë drejtim”, theksoi Dhuka.
Kryenegociatorja Dhuka u shpreh se “një risi tjetër e rëndësishme është që pas shumë vitesh Shqipëria më në fund do të ketë një ligj që rregullon aktivitetin e lobimit, për të rregulluar me kujdes ndërhyrjet në vendimmarrjen publike”.
Sipas saj, pas 31 vitesh, Shqipëria do të ketë një ligj të ri për donacionet dhe sponsorizimin.
“Ligji ekzistues për sponsorizimin është i vitit 1994. Me ligjin e ri afrojmë praktikën pranë praktikës dhe standardit europian. Njëherësh do të krijohet një regjistër për lobimin, ku gazetarët, qytetarët, të interesuarit kanë informacion dhe njëkohësisht një regjistër për sponsorizimin dhe donacionet si përpjekje e jona për të rritur dimensionet e nismës “Shqipëria transparente” – që ministrja për antikorrupsionin e ka prezantuar edhe më herët – dhe për të treguar se nisma është e gjallë dhe përmirësime të vazhduara i bëhen përpjekjes sonë për transparencë”, tha Dhuka.
Dhuka shprehu falënderime për gazetarët pasi sipas saj një sondazh ka treguar se 70% e qytetarëve shqiptarë janë të informuar për çështjet e negociatave me BE, në sajë të detyrës së gazetarëve.
TIRANË, 20 janar/ATSH/ Ministrja e Shtetit dhe Kryenegociatorja, Majlinda Dhuka deklaroi sot se në vitin 2027 Shqipëria duhet t’i ketë plotësuar të gjitha kushtet për mbylljen e negociatave me Bashkimin Europian.
Në një konferencë të përbashkët për shtyp me Adea Pirdenin, ministre Shteti për Administratën Publike dhe Antikorrupsionin dhe Toni Gogun, ministër Shteti për Marrëdhëniet me Parlamentin, lidhur me fazën e re të negociatave me Bashkimin Europian dhe angazhimin politik e qytetar për t’ia dalë mbanë, Dhuka tha se “në këtë bashkëbisedim do t’i informojmë qytetarët shqiptarë mbi çfarë pret Shqipëria në 2026 sa i përket aspiratës europiane, negociatave dhe përgatitjes për anëtarësim në BE”.
“Në 2025-ën Shqipëria i çeli negociatat për 33 kapituj. Në 17 nëntor çelëm negociatat për 5-së kapitujt e fundit. Viti 2026 është veçanërisht i rëndësishëm dhe një gur kilometrik në rrugën e vendit drejt anëtarësimit në BE. Në 2026 Shqipëria do të kalojë, dhe po punon intensivisht për këtë, për t’u futur në fazën e mbylljes së negociatave për anëtarësim me një numër të mirë fushash nga këto 33 kapituj dhe me aspiratën e madhe që në vitin 2027 t’i kemi arritur të gjitha përgatitjet ose siç njihet në gjuhën e negociatave, kushtet për mbylljen e negociatave”, nënvizoi Dhuka.
Kryenegociatorja Dhuka theksoi se “kjo është një punë jashtëzakonisht komplekse, por edhe shumë pozitive sa i përket transformimit europian të vendit që nga shteti, ekonomia, shërbimet për qytetarët, heqja e barrierave midis Shqipërisë dhe BE-së siç bëmë gjatë 2025 ku Shqipëria u fut në zonën e pagesave euro, e njohur si SEPA, që na mundësoi të bëjmë veprime bankare nga Shqipëria drejt vendeve të BE-së me tarifa shumë të reduktuara dhe në një kohë të shkurtër”.
Midis çeljes së negociatave dhe mbylljes, vijoi Dhuka, Shqipëria duhet të japë një test aftësie si në pikëpamje të vullnetit politik për reforma europiane, ashtu edhe të aftësisë së institucioneve të veta, aftësisë teknike dhe zbatuese të standardit europian praktikisht në shërbime dhe jetën e qytetarëve.
“Për këtë Shqipëria duhet të përgatitet me një numër reformash dhe përmirësimesh që ka në zemër standardin europian që buron si nga ligji europian i njohur si acquis i BE-së, ashtu edhe nga praktikat më të mira të vendeve anëtare apo udhëzimet e gjykatave europiane. Ky test aftësie në gjuhën e negociatave njihet si përmbushja e kushteve të ndërmjetme, atij progresi që qëndron midis çeljes së negociatave dhe mbylljes së tyre”, tha Dhuka.
Dhuka u shpreh se “fusha në të cilën Shqipëria duhet të japë këtë test aftësie në zemër të të cilit është edhe aftësia e institucioneve, por edhe vullneti politik i të gjitha forcave politike në Shqipëri është shteti i së drejtës dhe sundimi i ligjit”.
TIRANË, 18 janar/ATSH/ Kryeministri Edi Rama nënvizoi sot rëndësinë e rishikimit të ligjit të arsimit të lartë në funksion të ndërkombëtarizimit të universiteteve.
Gjatë podkastit “Flasim”, Kryeministri vlerësoi rëndësinë e mbledhjes së Konferencës së Rektorëve gjatë javës që lamë pas, të cilën e cilësoi si një takim të rëndësishëm për vazhdimin e përpjekjes së përbashkët mes qeverisë dhe universitetit, botës akademike, në funksion të rritjes së cilësisë së arsimit të lartë.
“Ky diskutim i hapur është zhvilluar në funksion të ndërkombëtarizimit të arsimit tonë të lartë dhe në funksion të racionalizimit të burimeve dhe potencialeve në arsimin tonë të lartë”, tha Rama.
Kryeministri bëri të ditur se në këtë takim ka paraqitur sfidat mbi të cilat duhet të vendosen piketat e reja, duke filluar nga një rishikim i ligjit “Për arsimin e lartë”.
“Ka ardhur koha, pasi tanimë është krijuar një eksperiencë. Ligji na mundësoi një përmbysje të madhe, por sot është e qartë që, mbi bazën e eksperiencës dhe, natyrisht, të sfidave të reja, ligji duhet të rishikohet dhe këtë gjë do ta bëjmë së bashku, pa diskutim, me universitetet. Nga ligji, pra, deri te rritja e përpjekjeve për të shtuar zinxhirin që tanimë ka filluar të shtrihet në territor, të ndërkombëtarizimit përmes partneriteteve të ngushta me universitete të njohura në Evropë dhe botë dhe përmes programeve të përbashkëta”, u shpreh Rama.
Po ashtu, Kryeministri theksoi se “një aspekt tjetër është edhe qasja ndaj financimit. Për këto do të flasim më hollësisht në takimin që ne mbajmë rregullisht si një këshill i përbashkët, po themi joformal, por shumë efikas, mes qeverisë dhe përfaqësuesve të universiteteve, ku këtë radhë do të jenë ftuar të gjithë përfaqësuesit, pa dallim të universiteteve publike dhe atyre private, ose më saktë, universiteteve publike me financim shtetëror dhe universiteteve publike me financim privat”.
TIRANË, 17 janar /ATSH/ Ministri i Bujqësisë dhe Zhvillimit Rural, Andis Salla, mori pjesë sot në Konferencën e Ministrave të Bujqësisë, të zhvilluar në kuadër të Forumit Global për Bujqësinë dhe Ushqimin (GFFA) 2026, me pjesëmarrjen e 61 ministrave të bujqësisë dhe 14 përfaqësuesve të lartë të organizatave ndërkombëtare.
Konferenca u fokusua në dialogun agro-politik mbi temën e këtij viti “Uji. Korrjet. E ardhmja jonë.”, duke vënë theksin në rëndësinë e sigurisë ujore për garantimin e sigurisë ushqimore dhe zhvillimin e qëndrueshëm të sektorit bujqësor.
Gjatë punimeve të konferencës u miratua Komunikata Përfundimtare e GFFA 2026, e cila riafirmon mesazhin se pa ujë nuk ka ushqim dhe pa siguri ujore nuk mund të ketë siguri ushqimore.
Ministri Salla theksoi se Shqipëria mbështet plotësisht këtë angazhim dhe qasjen që e sheh bujqësinë si pjesë të zgjidhjes globale, përmes përdorimit të ujitjes inteligjente, zbatimit të praktikave që ruajnë tokën dhe burimet ujore, reduktimit të ndotjes dhe zhvillimit të bioekonomisë blu.
Pjesëmarrja e Shqipërisë në GFFA 2026 vlerësohet si një mundësi për forcimin e bashkëpunimit ndërkombëtar dhe shkëmbimin e praktikave më të mira në fushën e bujqësisë dhe ushqimit.
TIRANË, 15 janar/ATSh/ Ministrja për Europën dhe Punët e Jashtme, Elisa Spiropali deklaroi sot nga Kievi se “drejtësia për viktimat, mbajtja e përgjegjësisë për agresorin dhe rivendosja e plotë e sovranitetit, unitetit dhe integritetit territorial të Ukrainës nuk janë të negociueshme”.
Në konferencën e përbashkët për shtyp në Kiev me homologun ukrainas, Sybiha, kryediplomatja shqiptare u shpreh se këto janë parakushte për paqen.
“Prej gati katër vitesh, Ukraina po përballet me një luftë të pajustifikuar dhe të paprovokuar agresioni, shkaktuar nga Federata Ruse, e cila vazhdon të sjellë shkatërrim, vuajtje dhe humbje. Gjithsesi, nuk ia ka dalë të mposhtë vullnetin dhe shpirtin e popullit ukrainas”, u shpreh ajo.
Spiropali theksoi se “ndërsa dimri ashpërsohet, Ukraina po përballet sërish së fundmi me sulme brutale dhe të qëllimshme të Rusisë ndaj sistemeve energjetike, instalimeve të ngrohjes dhe infrastrukturës tjetër kritike”.
Kjo, sipas saj, ka detyruar miliona ukrainas të luftojnë për përditshmërinë e tyre ekzistenciale, për të pasur shtëpi të ngrohta, spitale funksionale dhe shërbime thelbësore operative.
“Këto sulme janë të paprovokuara, të pajustifikuara dhe të kryera në shpërfillje të hapur të së drejtës ndërkombëtare dhe dinjitetit njerëzor, duke rrezikuar qëllimisht jetën e civilëve dhe duke goditur infrastrukturën kritike. Goditjet masive, përfshirë përdorimin e raportuar të një rakete balistike me rreze të ndërmjetme, përfaqësojnë një përshkallëzim shumë më të rrezikshëm dhe të papërgjegjshëm”, u shpreh Spiropali.
Ato, sipas saj, “synojnë jo vetëm të terrorizojnë dhe të thyejnë shpirtin e popullit ukrainas, por edhe të dërgojnë një mesazh kërcënues përtej kufijve të Ukrainës”.
Spiropali theksoi se veprime të tilla rrezikojnë sigurinë e të gjithë rajonit dhe vazhdojnë të minojnë stabilitetin global.
“Shqipëria i dënon këto krime pa asnjë rezervë. Nuk mund të ketë asnjë justifikim, asnjë paqartësi përballë një agresioni kaq brutal. Ata që janë përgjegjës për këto mizori, duhet mbajnë përgjegjësi të plotë. Mosndëshkimi nuk është opsion”, shtoi ajo.
Kryediplomatja shqiptare nënvizoi se Shqipëria ka qenë një mbështetëse e qëndrueshme dhe e palëkundur e Ukrainës që nga fillimi i agresionit të paprovokuar të Rusisë.
“Ne jemi rreshtuar plotësisht me sanksionet dhe masat kufizuese të BE-së, si edhe me ato të organizatave të tjera ndërkombëtare, kemi mbështetur integrimin evropian të Ukrainës dhe kemi përkrahur të gjitha nismat për pezullimin e Rusisë nga organizatat ndërkombëtare. Në mbështetjen tonë, nuk jemi kushtëzuar nga përmasat e dimensionit tonë gjeografik, por nga qartësia e qëllimeve, vlerave, kontributeve dhe veprimeve tona”, u shpreh Spiropali.
Si çdo komb tjetër demokratik dhe i qytetëruar që e çmon paqen, Spiropali theksoi se “ne dëshirojmë që vuajtjet të marrin fund dhe të nisë rindërtimi, në mënyrë që fëmijët të mund të flenë pa frikë”.
“Por, për ta arritur këtë, është thelbësore një paqe e drejtë dhe e qëndrueshme. Shqipëria mirëpret përpjekjet ndërmjetësuese të Shteteve të Bashkuara dhe presidentit Trump, të Bashkimit Evropian dhe të gjithë partnerëve që sinqerisht kërkojnë një zgjidhje që nderon sakrificat e jashtëzakonshme të Ukrainës. Çdo nismë që na afron realisht drejt përfundimit të kësaj lufte meriton angazhimin tonë”, theksoi ajo.
Gjithsesi, Spiropali theksoi se “një paqe e drejtë do të thotë garanci reale sigurie”.
“Një paqe e drejtë do të thotë kthimi në shtëpi i fëmijëve të rrëmbyer, kthimi i të burgosurve, hetimi dhe ndjekja penale e krimeve të luftës dhe mbajtja e përgjegjësisë nga ana e agresorit. Me sytë nga e ardhmja, besoj se është po aq e rëndësishme të shohim përtej fushëbetejës. Të fillojmë që tani të projektojmë të ardhmen e Ukrainës. Kjo e ardhme përcaktohet nga perspektiva jonë e përbashkët si anëtarë të ardhshëm të familjes evropiane”, theksoi ajo.
Nga ana tjetër, Spiropali siguroi se Shqipëria do ta mbështesë këtë vizion. “Ne do ta mbështesim pa asnjë hezitim rrugën evropiane të Ukrainës në çdo forum shumëpalësh dhe jemi të gatshëm të ndajmë përvojën tonë, përfshirë punën teknike të negociatave dhe reformave”, u shpreh ajo.
“Sot zhvilluam diskutime të sinqerta dhe konstruktive edhe sa i takon mënyrave për të avancuar marrëdhëniet tona dypalëshe dhe për të harmonizuar më tej lidhjet tona të forta politike me një bashkëpunim më të fuqishëm në shumë fusha. Bashkërisht ramë dakord që, pavarësisht vështirësive, të përqendrohemi në mundësitë për tregti dhe investime, edhe në rrethana të jashtëzakonshme; Kontakte më të thella ndërmjet komuniteteve të biznesit; Bashkëpunim në sektorë ku Shqipëria dhe Ukraina mund të krijojnë vlerë të shtuar, si energjia, infrastruktura, turizmi, bujqësia dhe teknologjia”, theksoi Spiropali.
Po ashtu, ajo theksoi se do të inkurajohen kontakte më të ngushta mes njerëzve dhe do të thellohet bashkëpunimi në kulturë, arsim, shkencë dhe ruajtjen e trashëgimisë kulturore.
Në këtë drejtim, Spiropali vlerësoi shumë rolin e konsoliduar prej vitesh të komunitetit të diasporës shqiptare në Ukrainë, e cila shërben si një urë e rëndësishme për forcimin e lidhjeve mes dy vendeve tona.
“Diskutuam edhe për gatishmërinë e Shqipërisë për të kontribuar në projektet e pasluftës dhe në rindërtim, në koordinim me partnerët dhe organizatat ndërkombëtare. Ukraina po shkruan një nga historitë e mëdha të kohës sonë, një histori rezistence, dinjiteti dhe refuzimi për t’u dorëzuar përballë tiranisë. Shqipëria është krenare të jetë pjesë e kësaj historie, si një mike që zgjodhi të qëndrojë në krahun tuaj në momentet vendimtare. Dhe do të vazhdojmë të jemi, për sa kohë të kërkohet, sepse nuk mund të jesh neutral mes zjarrit dhe zjarrfikëses. Nuk ka terren të mesëm moral mes një kombi që lufton për mbijetesën e tij dhe një lufte perandorake që synon ta fshijë atë nga ekzistenca”, u shpreh Spiropali.
TIRANË, 15 janar/ATSh-Maela Marini/ Ministri i Jashtëm i Ukrainës, Andrii Sybiha u shpreh sot se Shqipëria mbetet partner kyç në rajon dhe shumë aktiv në formatin Ukrainë-Europa Juglindore.
Në një konferencë të përbashkët për shtyp në Kiev me homologen shqiptare, Elisa Spiropali, ministri Sybiha vlerësoi mbështetjen e palëkundur të Shqipërisë ndaj Ukrainës.
Ai kujtoi se një vit më parë Shqipëria hapi ambasadën e saj në Ukrainë dhe kjo është ambasada e parë dhe e vetme që është hapur pas fillimit të invazionit masiv rus.
Ky sipas tij, është një tregues i mbështetjes, solidaritetit dhe besimit të cilin Ukraina e vlerëson shumë.
“Sot diskutuam një gamë të gjerë çështjesh mbi bashkëpunimin dypalësh, mbi rrugën tonë të përbashkët drejt anëtarësimit në BE. Shqipëria mbetet partneri ynë kyç në këtë rajon dhe një partner shumë aktiv në formatin Ukrainë-Europa Juglindore”, u shpreh ai.
Sybiha informoi për situatën në fushë betejë si dhe për pasojat që po përjeton Ukraina pas goditjeve në sektorin energjetik. “Ndajmë të njëjtën bindje se Moska duhet të detyrohet drejt paqes përmes rritjes së presionit”, u shpreh ai.
Ai vlerësoi gjithashtu Shqipërinë për mbështetjen e saj të palëkundur në kundërshtimin e agresionit rus, si dhe kryeministrin Edi Rama për qëndrimin e tij të fortë gjatë mbledhjes së Këshillit të Sigurimit.
“Ju falënderojmë gjithashtu për pjesëmarrjen tuaj në Koalicionin e Vullnetmirëve, për përpjekjet për kthimin e fëmijëve ukrainas dhe për angazhimin për rikthimin e një paqeje të drejtë në vendin tonë”, u shpreh ai.
Ministri Sybiha u shpreh se Ukraina mbështet vendosjen e sanksioneve ndaj Rusisë dhe regjimin e vizave për qytetarët e e saj.
“Do t’i kushtojmë vëmendje mbajtjes së përgjegjësisë që ka Rusia, ngritjes së një tribunali special për krimin e agresionit, si dhe të mekanizmave të tjerë të drejtësisë në bashkëpunim me Shqipërinë. Ukraina dhe Shqipëria janë të bashkuara nga vlerat tona të përbashkëta europiane dhe jemi partnerë në këtë rrugë drejt anëtarësimit në BE”, u shpreh ai.
Ndaj, ministri Sybiha siguroi se do të vazhdohet me këmbimin e përvojave dhe forcimin e bashkëpunimit dypalësh.
“Kemi një potencial të madh për t’iu kundërvënë kërcënimeve hibride të Rusisë, veçanërisht në rajonin e Ballkanit Perëndimor. Jam dakord të vazhdojmë dialogun tonë politik dhe bashkëpunimin në fushat e sigurisë, fushën humanitare dhe atë ekonomike, përfshirë edhe formatin Ukrainë-Europa Juglindore. Ne vlerësojmë komunitetin shqiptar në Ukrainë që jeton më së shumti në Odesa dhe ju falënderojmë për mikpritjen e bashkatdhetarëve tanë që u larguan drejt vendit tuaj pas agresionit rus, si dhe për lehtësimin e përpjekjeve për riatdhesimin e fëmijëve tanë ukrainas. Do të vazhdojmë të forcojmë lidhjet mes Ukrainës dhe Shqipërisë”, u shpreh ai.
TIRANË, 12 janar /ATSH/ Kryetari i Partisë Demokratike, Sali Berisha, zhvilloi sot një konferencë për gazetarët, ku foli mbi strategjinë e opozitës dhe situatën politike në vend.
Berisha theksoi se objektivi kryesor i opozitës është largimi i kryeministrit Edi Rama nga pushteti dhe shprehu besim se ky qëllim do të realizohet falë mbështetjes së qytetarëve dhe bashkëpunimit me faktorë të tjerë të shoqërisë shqiptare.
“Strategjia e opozitës është largimi i tij një minutë e më parë nga pushteti. Opozita është e sigurtë që do të realizojë objektivin e saj. Kjo është dhe ka besim të madh tek guximi, ka besim të madh tek trimëria, ndershmëria e qytetarëve shqiptarë. Ka besim të madh se përkrah opozitës shqiptare, së bashku me opozitën shqiptare, do bashkëveprojnë dhe bashkëpunojnë shumë e shumë faktorë të tjerë rëndësishëm në shoqërinë shqiptare, që duan ta përzënë 1 minutë e më parë, këtë të keqe të madhe, këtë organizatë kriminale që udhëhiqet nga Edi Rama”, u shpreh Berisha.
Ai gjithashtu foli mbi mbështetjen ndërkombëtare në luftën kundër korrupsionit, duke përmendur se shtatë rezoluta ndërkombëtare kanë ndikim të rëndësishëm mbi qeverisjen aktuale dhe ofrojnë mbështetje për opozitën.
“Betejën kundër korrupsionit e mbështet e gjithë bota demokratike”, tha ai, duke shtuar se, rezolutat ndërkombëtare ndikojnë në mënyrë të konsiderueshme në situatën politike dhe ofrojnë mbështetje për opozitën shqiptare
Berisha nënvizoi gjithashtu se largimi i kryeministrit nuk do të ndodhë përmes institucioneve të drejtësisë, por përmes pjesëmarrjes aktive të qytetarëve në protesta paqësore.
“Nuk ka asnjë diskutim që Edi Rama bën gjithçka, dhe jo bën, por do të bllokojë drejtësinë. Do të përdorë 83 mandatet e tij të krimit, kundër drejtësisë. Dhe këtu ndaj themi ne, fjalën e vetme e kanë qytetarët shqiptarë”, u shpreh Berisha.
“Ne kemi theksuar dhe theksojmë, Edi Ramën nuk do ta heqë drejtësia. Edi Ramë nuk do ta heqin ‘Deltat’, atë do ta heqin qytetarët shqiptarë me protestat e tyre. Nuk kemi asnjë lloj dyshimi në këtë qëndrim, në këtë mendim”, përfundoi Berisha.
Bombardimi amerikan i Venezuelës dhe kapja e presidentit Nicolás Maduro shënojnë një moment të paprecedentë në historinë moderne të Amerikës Latine, duke qenë sulmi i parë i drejtpërdrejtë ushtarak i Shteteve të Bashkuara ndaj një vendi të Amerikës së Jugut.
Presidenti Donald Trump në një konferencë për shtyp pas operacionit, deklaroi se “dominimi amerikan në hemisferën perëndimore nuk do të vihet kurrë më në dyshim”, duke e paraqitur ndërhyrjen si një demonstrim force dhe rikthim të ndikimit amerikan në rajon.
Veprimi vjen pas një historie dy shekullore ndërhyrjesh amerikane në Amerikën Qendrore, Jugore dhe Karaibe, që kanë përfshirë presion ekonomik, operacione të fshehta dhe pushtime ushtarake. Megjithatë, ndryshe nga e kaluara, operacionet e hapura ushtarake amerikane kanë qenë tradicionalisht të kufizuara në Karaibe dhe Amerikën Qendrore.
Sipas ekspertëve të marrëdhënieve ndërkombëtare, sulmi ndaj Venezuelës sinjalizon një ndryshim të madh në politikën e jashtme dhe të mbrojtjes së SHBA-së, në përputhje me strategjinë e re të sigurisë kombëtare të administratës Trump, e cila parashikon zgjerimin e pranisë ushtarake amerikane në rajon. Kjo qasje shihet si një version modern i doktrinës Monroe të vitit 1823, e njohur për parimin “Amerika për amerikanët”.
Në të kaluarën, veprimet e fshehta të SHBA-së kanë ndihmuar në rrëzimin e qeverive të zgjedhura demokratikisht dhe në vendosjen e diktaturave ushtarake në vende si Brazili, Kili dhe Argjentina. Ndërhyrja më e ngjashme me situatën aktuale mbetet pushtimi i Panamasë në vitin 1989, kur trupat amerikane kapën diktatorin Manuel Noriega.
Analistët paralajmërojnë se ndërhyrjet amerikane në rajon rrallë sjellin paqe dhe stabilitet afatgjatë. “Ndërhyrjet pothuajse gjithmonë krijojnë probleme të trashëgimisë politike dhe shoqërore që zgjasin për dekada”, theksojnë ekspertët.
Për Venezuelën, mbetet ende e paqartë se çfarë do të ndodhë pas largimit të Maduros. Presidenti Trump ka deklaruar se SHBA do të mbikëqyrë vendin deri në realizimin e një “tranzicioni të duhur”, një proces që pritet të ketë ndikim të thellë jo vetëm për Venezuelën, por për të gjithë rajonin.
TIRANË, 30 dhjetor /ATSH/ Kryeministri Edi Rama deklaroi sot se reforma në drejtësi është një realitet i pakthyeshëm, por pranoi se sistemi i drejtësisë në Shqipëri vijon të ketë probleme serioze, të cilat kërkojnë reflektim dhe ndërhyrje.
Duke iu përgjigjur pyetjeve të gazetarëve në konferencën e fundvitit të mbajtur në Kryeministri, Rama u shpreh se ligjet e reformës janë miratuar dhe funksionojnë, por kjo nuk do të thotë se drejtësia është pa probleme.
“Ligjet e reformës në drejtësi janë aty, reforma në drejtësi është aty. Por që drejtësia në Shqipëri ka probleme të mëdha, kjo nuk diskutohet”, u shpreh Kryeministri.
Ai theksoi se reforma ka vetëm dhjetë vite që është në zbatim dhe se kjo periudhë është shumë e shkurtër në raport me historinë e institucioneve shtetërore.
“Reforma 10 vjet ka, ndryshimet 10 vjet kanë. 10 vjet janë një hiç asgjë në historinë e një shteti dhe në historinë e një pushteti. E kam thënë dhe herë tjetër, pushteti ekzekutiv ka më shumë se 100 vjet, por pushteti ekzekutiv në Shqipëri nuk është i pakritikueshëm. Si mund të jenë të pakritikueshëm protagonistët e një pushteti që ka vetëm 10 vjet. Janë të kritikueshëm që çke me atë punë. Dhe kritikat janë të gjitha konstruktive”, tha Rama.
Ndërkohë, shtoi Rama, “çfarë i takon atyre, i takon atyre, nuk na takon ne, çfarë na takon ne nuk i takon atyre”.
Rama theksoi se, për paraburgimin sigurisht që ka nevojë për ndërhyrje.
“Shiheni çfarë thotë Këshilli i Evropës që është për definicion institucioni më i madh ndërkombëtar për liritë dhe të drejtat e njeriut. E pranoni ju këtë, ju duket bukur ju kjo, që Shqipëria të jetë e fundit fare në listë dhe të ketë vetëm Rusinë mbrapa për brutalitet dhe vrazhdësi?!”, iu drejtua Rama gazetarëve.
Duke përmendur rastin e një vrasjeje në burgun e Peqinit, kur një prokuror futi në burg të gjithë rojat e burgut, Rama u shpreh se, “mentalitetet e vjetra, sëmundjet e vjetra pak gjë duan dhe zgjohen kur vjen puna tek mënyra si veprojnë shtetet që nuk janë akoma të konsoliduara”.
Por, shtoi Rama, “një gjë është e sigurt, ne nuk prekim thelbin në asnjë rast dhe për asnjë arsye. Thelbi është që ne jemi këtu për ta garantuar këtë proces, procesin e luftës së pavarur nga pushteti ekzekutiv kundër korrupsionit dhe krimit të organizuar”.
“Shpresoj që lufta kundër korrupsionit të sofisitikohet dhe të luftohet korrupsioni, jo prerja e pemëve, duke e kapur veshin mbrapsht, të futet në statistikë. Pra duhet balancim, kjo është pak, por është e sigurt”, tha Rama.
TIRANË, 30 dhjetor /ATSH/ Kryetari i Partisë Demokratike, Sali Berisha zhvilloi sot një konferencë për mediet, ku bëri një bilanc të vitit 2025, duke e cilësuar atë si një vit të shënuar nga problematika serioze në funksionimin e institucioneve dhe proceseve demokratike në vend.
Në fjalën e tij, Berisha u shpreh se kryeministri Edi Rama ka bllokuar kërkesat e prokurorisë për pezullimin dhe heqjen e imunitetit të zëvendëskryeministres Belinda Balluku.
Berisha tha se vendimi për të mos lejuar vijimin e procedurave ligjore përbën, sipas tij, një precedent të rrezikshëm dhe një provokim ndaj qytetarëve që paguajnë taksa dhe kërkojnë transparencë nga institucionet.
“Edi Rama në një vendim antikushtetues, antiligjor, në një provokacion të ulët për çdo shqiptar, në një provokacion të padëgjuar ndonjëherë, bllokoi kërkesat e prokurorisë me gjykatës të padenjë, të cilët shkelmojnë Kushtetutën njëlloj sikur të ishin organizatë partie”, tha Berisha.
“Dhe tani nga zyra e tij, deklaron se 16 mijë faqet e sjella nga prokuroria nuk kanë asgjë për Ballukun, prandaj kthejini mbrapsht se nuk hiqet imuniteti i saj”, u shpreh Berisha.
Ai deklaroi se viti 2025 është shoqëruar edhe me reagime dhe qëndrime ndërkombëtare, përmes rezolutave të miratuara nga forca politike të qendrës së djathtë dhe të djathta në nivel europian dhe ndërkombëtar, të cilat, sipas tij, kanë kritikuar qeverinë shqiptare për funksionimin e demokracisë dhe proceset zgjedhore.
Sipas Berishës, këto qëndrime janë reflektuar edhe në institucione si Kongresi i SHBA-së, Parlamenti Europian, Asambleja Parlamentare e Këshillit të Europës dhe Asambleja Parlamentare e OSBE-së.
Berisha tha se gjatë këtij viti qytetarët shqiptarë janë përballur me vështirësi të mëdha ekonomike dhe sipas tij, me abuzime të shumta nga ana e qeverisë.
Ai deklaroi se proceset zgjedhore janë shoqëruar me parregullsi dhe se janë cenuar standardet demokratike, duke e cilësuar vitin që po mbyllet si një periudhë me tensione të forta politike.
Berisha tha se Partia Demokratike do të vijojë denoncimet dhe angazhimin e saj për forcimin e shtetit ligjor dhe të standardeve demokratike në vend.
Në përfundim, kreu i Partisë Demokratike uroi qytetarët për Vitin e Ri, duke shprehur dëshirën që viti i ardhshëm të sjellë, sipas tij, më shumë energji, angazhim dhe ndryshim për vendin.
Berisha gjithashtu u premtoi shqiptarëve në 2026-ën rrëzimin e qeverisë dhe zgjedhje të reja.
“Premtoj rrëzimin e këtij regjimi, qeverinë teknike dhe zgjedhje të reja”, tha Berisha.
Kreu i LVV-së, Albin Kurti, shpalli fitoren në zgjedhjet e 28 dhjetorit dhe tha se kjo është fitorja “më e madhe në historinë e vendit”.
“Më 9 shkurt fitoi LVV-ja me partnerët, më 28 dhjetor fitoi populli i Kosovës dhe Republika”, tha Kurti.
Kurti tha se partia e tij është në rrugë që të tejkalojë rezultatin e 14 shkurtit 2021, kur kishte fituar 50.2 për qind.
Sipas tij, rezultati zgjedhor i së dielës kërkon që duhet të ecet përpara pa vonesa.
“Sa më parë që certifikohen [rezultatet], aq më shpejt na duhet të krijojmë institucionet dhe të vazhdojmë me punën e mirë”, tha Kurti.
Legjislaturën e re, Kurti tha se e pret Plani i Rritjes i BE-së në vlerë prej 880 milionë eurosh dhe tri marrëveshje me Bankën Botërore, që në total tha se arrijnë vlerën e mbi 1 miliard eurove.
“Ftoj nga tash partitë opozitare për bashkëpunim në Kuvend për marrëveshjet ndërkombëtare” dhe për projektligje të tjera”, tha ai.
Kurti u pyet edhe për çështjen e presidentit. Ai tha se është herët të flitet për çështjen e zgjedhjes së presidentit të ri, duke theksuar se “sonte do të festojmë”, por shtoi se me opozitën duhet të trajtohet kjo çështje, por edhe me presidenten aktuale, Vjosa Osmani, të cilës i skadon mandati në mars.
Ai u pyet nëse do të negociojë me partitë opozitare për presidentin dhe që propozimin për president ta bëjnë ato, Kurti tha:
“Ta negocioni dhe t’ua jepni atyre janë dy gjëra të ndryshme. Nuk mund të përdoren si sinonime, aq më pak në të njëjtën fjali. Natyrisht që duhet ta bisedojmë me opozitën këtë çështje. Por, paraprakisht duhet të diskutojmë për marrëveshjet ndërkombëtare. Ai do të jetë një test i rëndësishëm për bashkëpunimin qeveri-opozitë në katërvjeçarin e ardhshëm. Po e rikthesoj, fillimisht duhet të presim certifikimin e rezultateve”. /REL/
TIRANË, 24 dhjetor/ATSH/ Ekonomia shqiptare ka vijuar rritjen e qëndrueshme gjatë vitit 2025, duke reflektuar performancë pozitive në shumicën e sektorëve kryesorë dhe një interes të shtuar të investitorëve vendas e të huaj.
Ministrja e Ekonomisë dhe Inovacionit, Delina Ibrahimaj, prezantoi sot gjatë një konference në medie treguesit më të fundit ekonomikë, si dhe pritshmëritë për vitin 2026, me fokus rritjen ekonomike, inovacionin dhe përafrimin me standardet europiane.
Duke iu referuar raportit të publikuar nga INSTAT, ministrja informoi se Prodhimi i Brendshëm Bruto (PBB) në tremujorin e tretë të vitit 2025 u rrit me 3,75%, një nivel që sipas saj, është brenda parashikimeve të qeverisë dhe dukshëm më i lartë se mesatarja e Bashkimit Europian prej 1,6%, si edhe mbi mesataren e vendeve të Ballkanit Perëndimor prej 3,4%.
Në nivel nëntëmujor, ministrja tha se rritja ekonomike arriti 3,73%, ndërsa pritshmëritë janë që në fund të vitit 2025 rritja të përmbushë objektivin prej 3,9%.
Ministrja renditi edhe sektorët kontribues në rritje.
“Analiza sipas sektorëve tregon se ekonomia është mbështetur kryesisht nga shërbimet dhe investimet publike e private. Ndërtimi shënoi një rritje prej 4,75%, ndërsa tregtia, transporti dhe akomodimi, sektorë të lidhur ngushtë me turizmin, u rritën me 2,62%”, tha ajo.
Më tej, ministrja shtoi se sektori i informacionit dhe komunikacionit vijoi të forcojë rolin e tij në ekonomi, me një rritje të ndjeshme prej 10,4%, ndërsa aktivitetet e pasurive të paluajtshme u rritën me 10,55%.
Një kontribut të rëndësishëm dhanë edhe administrata publike, arsimi dhe shëndetësia, të cilat së bashku kontribuuan me 1,68 pikë përqindje në rritjen ekonomike prej 3,75%, duke reflektuar efektet pozitive të investimeve dhe rritjes së pagave në këta sektorë.
Nga ana tjetër, ministrja informoi se bujqësia, pyjet dhe peshkimi shënuan një rënie prej 1,73%, ndërsa industria në tërësi u ngadalësua me 4,75%, e ndikuar kryesisht nga industria nxjerrëse dhe ajo përpunuese e tekstileve.
Ministrja Ibrahimaj e cilësoi turizmin si motori i rritjes ekonomike.
“Turizmi vijon të mbetet një nga motorët kryesorë të ekonomisë shqiptare. Për 11-mujorin e vitit 2025, hyrjet e shtetasve të huaj arritën në rreth 12 milionë, me rritje të vazhdueshme krahasuar me vitet e mëparshme. Netqëndrimet u rritën nga viti në vit, ndërsa një turist që viziton Shqipërinë qëndron mesatarisht 9 ditë”, tha Ibrahimaj.
Akomodimi, hotelet dhe restorantet shtoi Ibrahimaj, shënuan rritje prej 16% në terma nominalë dhe 3,43% në terma realë.
Ndër të tjera ministrja nënvizoi se në nivel nëntëmujor, shërbimet sollën në ekonomi 6,5 miliardë euro, me rritje 14%, ndërsa shërbimet e udhëtimit gjeneruan 4,4 miliardë euro të ardhura.
Duke u ndalur në treguesit e konsumit, ministrja shpjegoi se konsumi i familjeve u rrit me 1,25%, duke reflektuar stabilitet dhe inflacion të kontrolluar, nën objektivin e Bankës së Shqipërisë.
Nga ana tjetër, vijoi Ibrahimaj, kemi një përmirësim të pozicionit të jashtëm të ekonomisë.
“Importet neto dhe eksportet neto janë rritur respektivisht eksportet me 12.55 5% ndërsa importet me 5.47%. Kjo do të thotë që pra përmirësimi i pozicionit të jashtëm dhe rezultati pozitiv për për tremujorin e tretë të vitit i cili ka rezultuar me sufiçit prej 658 miliard eurosh, do të thotë që në Shqipëri është gjeneruar më shumë valutë sa më parë. Në nivel nëntë mujor jemi gjithashtu në sufiçit rreth 50 miliard euro. Sufiçiti në nivel munjor. ë ndodh për herë të parë nëntë mujor pasi në mujorin e katërt të vitit të kaluar në nivelin nëntëmujor neve vijonim të ishim me një defiçit. Megjithatë sa i takon tregtisë së mallrave defiçiti i mallrave është i ndikuar nga rritja kryesisht nga rritja e importeve të energjisë dhe nga rënia e eksporteve të metaleve bazë. Ndërkohë që në total siç e shpjegova dhe më parë eksportet e shërbimeve janë ditur dhe kanë dhënë një kon kontribut të madh pozitiv duke i dhënë peshën kryesore në pozicionin e jashtëm të ekonomisë shqiptare, shërbimeve dhe turizmi”, deklaroi ministrja
Po ashtu sipas saj, investimet shënuan rritje prej 4,78% në tremujorin e tretë, duke treguar besim të qëndrueshëm në ekonominë shqiptare.
“Investimet e huaja direkte për nëntëmujorin e vitit 2025 arritën në 1,2 miliardë euro, me rritje prej 51 milionë euro krahasuar me një vit më parë. Sektorët kryesorë përfituese janë pasuritë e paluajtshme me 31%, ndërmjetësimi financiar me 16%, hidrokarburet, energjetika dhe komunikacioni”, u shpreh ministrja.
Në tregun e punës, ministrja bëri të ditur se papunësia zbriti në 8,1%, ndërsa paga bruto mesatare arriti në 83,300 lekë, me rritje 7,25% krahasuar me të njëjtën periudhë të vitit 2024.
Ministrja Ibrahimaj theksoi se të dhënat flasin për një ekonomi të qëndrueshme, me tregues makroekonomikë të fortë dhe perspektivë pozitive edhe për vitin 2026.
Ajo nënvizoi se, pavarësisht pasigurive globale, ekonomia shqiptare ka treguar rezistencë, ndërsa raporti i fundit i FMN-së konfirmon stabilitetin dhe rritjen e qëndrueshme të vendit.
“Nga ana tjetër sot është publikuar gjithashtu dhe raporti i Fondit Monetar Ndërkombëtar, i cili gjithashtu nënvizon një rritje ekonomike të qëndrueshme të ekonomisë shqiptare dhe tregues makroekonomik të fortë dhe të qëndrueshëm. Si risk kryesor për ekonominë jo vetëm shqiptare, por të rajonit theksohet paqëndrueshmëria e situatës globale dhe risqet që mund të vijnë nga kërkesa e huaj, të cilat për tremujorin e tretë të vitit nuk janë materializuar”, deklaroi ministrja.
Konferencë për mediet e Ministres së Ekonomisë dhe Inovacionit, Delina Ibrahimaj, Foto: Andrin ...
1 nga 7
Delina Ibrahimaj - Ministre e Ekonomisë dhe Inovacionit, Foto: Andrin Hoxha
TIRANË, 16 dhjetor/ATSH/ Kryetari i Partisë Demokratike, Sali Berisha reagoi sot lidhur me lëshimin e tetë masave të sigurisë nga Struktura e Posaçme Kundër Korrupsionit dhe Krimit të organizuar për tenderat e organizuar nga Agjencia Kombëtare e Shoqërisë së Infomacionit (AKSHI).
Gjatë një konference për media, Berisha u shpreh se bëhet fjalë për një skemë të gjerë korrupsioni dhe kriminaliteti të organizuar në Agjencinë Kombëtare të Shoqërisë së Informacionit (AKSHI).
Berisha deklaroi se janë lëshuar “mandate arresti kallp”, pasi personat kryesorë të përfshirë, si Ergys Agasi dhe Ermal Beqiri, janë larguar prej javësh nga Shqipëria, ndërsa figurat kyçe nuk janë hetuar.
Berisha pretendoi se përmes tenderave sekretë, shumica dërrmuese e fondeve publike janë përqendruar në dy kompani të lidhura familjarisht, në shkelje të ligjit.
Kreu i PD-së theksoi gjithashtu raste pengmarrjesh dhe dhune ndaj personave që kishin dijeni për aferat, duke përmendur emra konkretë dhe duke kërkuar reagim nga institucionet dhe shoqëria civile.
Ai theksoi se PD ka dorëzuar dosje me denoncime, por pa hetimin e figurave kryesore, procesi mbetet i paplotë.
Por, Berisha theksoi se nuk ka ndonjë shpresë të madhe se do të bëhet hetim i plotë i kësaj ngjarje.
Login
