Policia e Kosovës ka njoftuar se më 4 shkurt 2026, rreth orës 08:35, në Rahovec është raportuar një rast i hetimit të vdekjes.

Sipas njoftimit 24-orësh të Policisë, një mashkull kosovar është gjetur pa shenja jete në shtëpinë e tij.

Në vendin e ngjarjes kanë dalë njësitë kompetente policore, ndërsa me vendim të prokurorit të shtetit, trupi i pajetë i viktimës është dërguar në Institutin e Mjekësisë Ligjore për obduksion.

Rasti është duke u trajtuar nga organet e hetuesisë për sqarimin e plotë të rrethanave të vdekjes. /Telegrafi/

Ekzekutimi i pagës minimale po bëhet problem për disa kompani në Kosovë, duke nxitur shqetësimet e para edhe në sektorin publik përmes kontraktorëve privatë.

Në fund të vitit 2025, kryeministri në detyrë i Kosovës, Albin Kurti, vendosi që paga minimale, nga 1 janari 2026, të rritet nga 350 euro në 425, ndërsa nga 1 korriku të jetë 500 euro.

Megjithatë, ky vendim nuk është zbatuar në rastin e stafit teknik në Qendrën Kryesore të Mjekësisë Familjare në Klinë, ku punëtorët janë paguar nën pagën minimale të përcaktuar me vendim qeveritar.

Kjo situatë ka nxitur reagimin e Federatës Sindikale të Punëtorëve Teknik të Sektorit Privat të Kosovës. Në një intervistë për Telegrafin, kryetari i Sindikatës së Pavarur të Sektorit Privat, Jusuf Azemi, ka deklaruar se kompania e kontraktuar nga QKMF-ja në Klinë nuk i ka ekzekutuar mjetet financiare në përputhje me legjislacionin në fuqi.

“Paramendoni, derisa flasim për raportin punëdhënës-punëmarrës dhe për rritje më të madhe të pagave të punëtorëve, në rastin konkret jemi në një situatë ku pronari i kompanisë, së bashku me kontraktuesit e tyre, nuk janë treguar të sinqertë dhe së paku ta bëjnë pagesën e pagës minimale”, ka thënë Azemi.

Ai ka theksuar se kjo situatë është pasojë e neglizhencës ose e mungesës së interesimit institucional për garantimin e të drejtave ligjore të punëtorëve.

“Kjo është bërë për shkak të neglizhencës ose në njëfarë forme mosinteresimit që këtyre punëtorëve së paku t’u garantohen kushtet që u garantohen me ligj dhe me vendimin e kryeministrit të Kosovës. Kjo është diçka shumë e keqe, sepse këta punëtorë në fund të janarit, gjegjësisht në fillim të shkurtit, kanë marrë pagë 325 euro, ndërsa sipas vendimit të kryeministrit në detyrë, këta punëtorë është dashur të marrin 395 euro”, ka shtuar ai.

Sipas Azemit, paga minimale duhet të aplikohet vetëm në rrethana të jashtëzakonshme, siç janë rastet kur një kompani është në prag të falimentimit ose kur shteti përballet me fatkeqësi të mëdha natyrore.

“Paramendojeni këto paga shumë të ulëta, por edhe ato nuk po jepen. Ne themi që paga minimale, në kushte normale, nuk guxon të jepet në raste konkrete. Paga minimale mund të jepet vetëm atëherë kur një kompani shkon drejt falimentimit ose kur një shtet përballet me ndonjë fatkeqësi të madhe, përndryshe, në kushte normale, paga duhet të jetë më e lartë sesa minimumi i përcaktuar”, ka deklaruar Azemi.

Ai ka fajësuar edhe Drejtorinë e Shëndetësisë në Klinë për mosadresimin e këtij problemi.

“Pronari i kompanisë është dashur ta bëjë kalkulimin dhe t’ua paraqesë institucioneve përkatëse mjetet financiare, në këtë rast Drejtorisë së Shëndetësisë së Klinës, por këta të fundit nuk janë marrë me këtë problem, duke menduar se kjo çështje do të kalojë në heshtje”, ka përfunduar Azemi.

Telegrafi ka kontaktuar edhe drejtorin e Shëndetësisë në Klinë, Agron Bacaj, por deri në momentin e publikimit të këtij lajmi nuk ka marrë përgjigje. /Telegrafi/

Inspektorati Policor i Kosovës (IPK) ka rekomanduar Policisë së Kosovës suspendimin e një zyrtari policor të angazhuar në Stacionin Policor të Fushë Kosovës.

Hetuesit e Departamentit të Hetimeve të IPK-së po zhvillojnë hetime ndaj zyrtarit policor për veprën penale “Sulm”.

Pas konsultimeve me prokurorinë përkatëse, rasti do të trajtohet në procedurë të rregullt.

Sipas njoftimit të IPK-së, incidenti raportohet të ketë ndodhur pas mesnatës në Fushë Kosovë, ndërsa zyrtari policor i përfshirë në rast ka qenë jashtë detyrës zyrtare në momentin e ngjarjes.

Hetuesit e IPK-së, në konsultim të vazhdueshëm me prokurorin përgjegjës, pritet të ndërmarrin veprime të mëtejshme hetimore për të sqaruar plotësisht rrethanat e incidentit. /Telegrafi/

Kryetari i Komunës së Junikut, Ruzhdi Shehu, ka pritur sot në një takim deputetin më të ri të Kuvendit të Kosovës, Ukë Ibrahim Rugova.

Në një postim në Facebook, Shehu ka theksuar rëndësinë e vizitës, duke kujtuar lidhjen historike të deputetit me Junikun.

“Uka është djali i presidentit historik Dr. Ibrahim Rugova, i cili është jo vetëm arkitekt i Pavarësisë së Kosovës, por edhe ideator dhe themelues i Komunës së Junikut”, ka shkruar Shehu.

Ai gjithashtu ka bërë të ditur se gjatë takimit deputeti Ukë Rugova ka konfirmuar angazhimin e tij për të qenë zëri i qytetarëve të Junikut në Kuvendin e Kosovës.

“Uka e ka konfirmuar që do të jetë zëri i junikasve në Kuvendin e Kosovës, si dhe do të ofroj kontributin e tij pa rezervë në shërbim të Komunës së Junikut”, ka theksuar Shehu.

Në përfundim të postimit, kryetari i Junikut ka falënderuar deputetin për vizitën dhe mbështetjen e vazhdueshme për komunitetin lokal.

“Faleminderit deputetit Ukë Rugova për vizitën dhe përkrahjen e tij për Junikun”, ka përfunduar Shehu. /Telegrafi/

Prokuroria Themelore në Ferizaj ka njoftuar se ka kërkuar nga Gjykata Themelore caktimin e masës së paraburgimit për të pandehurin F.H., për shkak të dyshimit për kryerjen e veprës penale “Blerja, posedimi, shpërndarja dhe shitja e pa autorizuar e narkotikëve, substancave psikotrope dhe analoge”, sipas Kodit Penal të Republikës së Kosovës.

Sipas Prokurorisë, më 03 shkurt 2026, rreth orës 19:14, në rrugën “Brahim Ademi” në Ferizaj, pranë rrethit të FSK-së, i pandehuri dyshohet se ka poseduar pa autorizim substanca narkotike me qëllim shitjeje ose shpërndarjeje. Gjatë kontrollit të automjetit “Renault Clio” nga hetuesit e Drejtorisë për Hetimin e Trafikimit me Narkotikë (DHTN) në Ferizaj, në kroskotin e pasagjerit u gjet një qese najloni me substancë të dyshuar narkotike, e llojit marihuanë, me peshë 206.90 gram.

Pas këtij kontrolli, DHTN-Ferizaj në bashkëpunim me DHTN-Prizren kryen një kontroll-bastisje në shtëpinë e babait të të dyshuarit në Prizren. Gjatë kontrollit u gjetën dy qese najloni me substancë të dyshuar narkotike të llojit marihuanë, me peshë 8.15 gram, të cilat ishin të vendosura në dhomën e të dyshuarit dhe u sekuestruan nga policia.

Nga këto veprime, i pandehuri dyshohet se ka kryer veprën penale sipas nenit 267 paragrafi 2, lidhur me paragrafin 1 të Kodit Penal të Republikës së Kosovës.

Prokuroria thekson se F.H., që nga data 03 shkurt 2026, ndodhet nën masën e ndalimit 48-orësh, sipas vendimit të Prokurorit të Shtetit, deri në përfundimin e procedurave të mëtejshme ligjore. /Telegrafi/

NPL “Kastrioti” ka vazhduar me aktivitete intensive të operativës për pastrimin dhe mirëmbajtjen e hapësirave publike në territorin e komunës. Punëtorët e ndërmarrjes janë angazhuar në grumbullimin e mbeturinave, pastrimin e shesheve, parqeve, rrugëve dhe hapësirave të tjera publike në Obiliq, duke kontribuar në ruajtjen e pastërtisë, rendit dhe mjedisit të shëndetshëm për qytetarët.

“Në bazë të planit tonë operativ, punëtorët e operativës angazhohen çdo ditë për të siguruar një ambient të pastër dhe të shëndetshëm, duke grumbulluar mbeturinat dhe duke pastruar sipërfaqet publike në përputhje me standardet e përcaktuara”, thuhet në njoftimin e NPL “Kastrioti”.

Ndërmarrja i bën thirrje qytetarëve që të kontribuojnë në ruajtjen e pastërtisë duke mos hedhur mbeturina në hapësira publike dhe duke respektuar mjedisin përreth, pasi vetëm me bashkëpunim mund të sigurohet një ambient më i pastër dhe më i shëndetshëm për të gjithë.

Aktivitetet e kryera gjatë ditëve të fundit përfshijnë:

• Sheshi "Dëshmorët e Kombit"
• "Brezi i Gjelbër"
• Rruga "Hasan Prishtina"
• Parkingu i qytetit
• Parku te Hashant
• Parku te Palojt
• Parku nën Hekurudh
• Pastrimi te Biblioteka

NPL “Kastrioti” vijon me punën e përditshme për të garantuar pastërti dhe rend në hapësirat publike të komunës. /Telegrafi/

Komuna e Shtimes ka bërë hapin drejt një investimi të rëndësishëm në infrastrukturën sportive, me planin për ndërtimin e Qendrës Nacionale të Hendbollit në qytet.

Kryetari i Komunës, Qemajl Aliu, ka pritur në takim Presidentin e Federatës së Hendbollit të Kosovës, Edi Kolgeci, dhe anëtarin e Bordit të FHK-së, Isak Osmani, ku u diskutua mbi zhvillimin e sportit dhe perspektivën e hendbollit në vend.

Projekti parashikohet të realizohet në kuadër të përgatitjeve për Lojërat Mesdhetare “Prishtina 2030”.

Kryetari Aliu theksoi gatishmërinë e komunës për bashkëpunim dhe mbështetje në realizimin e projektit, duke e konsideruar si një vlerë të shtuar për të rinjtë, komunitetin lokal dhe sportin kosovar në përgjithësi.

“Me z. Edi Kolgeci zhvilluam bisedë të frytshme, të hapur dhe konstruktive lidhur me mundësinë e ndërtimit të Qendrës Nacionale të Hendbollit në qytetin e Shtimes, në kuadër të Lojërave Mesdhetare 2030. Shpreha gatishmërinë dhe interesimin për bashkëpunim dhe kontribut konkret në zhvillimin e infrastrukturës sportive, duke besuar se ky projekt përbën vlerë të shtuar për komunën tonë, të rinjtë, komunitetin dhe sportin kosovar në tërësi”, tha Aliu.

Nga ana e tij, Presidenti i FHK-së, Edi Kolgeci, vlerësoi vizitën në Shtime si shumë pozitive dhe falënderoi kryetarin Aliu për mbështetjen në avancimin e projektit.

Ai theksoi se lokacioni i paraparë ofron kushte të favorshme për aktivitete të ndryshme sportive dhe se priten takime të tjera me institucionet qendrore për të përshpejtuar realizimin e projektit dhe fillimin sa më të shpejtë të punimeve. /Telegrafi/

Gjykata Themelore në Mitrovicë, Departamenti i Përgjithshëm – Divizioni Penal, me gjyqtare të vetme gjykuese Shqipe Sejdiu, ka shpallur aktgjykim dënues ndaj të pandehurit M.F., duke i shqiptuar dënim me burgim në kohëzgjatje prej dy vitesh.

Sipas njoftimit të gjykatës, aktgjykimi është shpallur më 3 shkurt 2026 përmes video-incizimit, pasi i pandehuri ndodhet në Qendrën e Paraburgimit në Mitrovicë.

M.F. është shpallur fajtor për kryerjen e veprës penale “Kanosja” nga neni 181 paragrafi 2, lidhur me paragrafin 4 të Kodit Penal të Republikës së Kosovës, sipas aktakuzës së Prokurorisë Themelore në Mitrovicë të datës 5 gusht 2024.

Ngjarja ka ndodhur më 3 qershor 2024, në banesën e përbashkët familjare në Mitrovicë, ku i pandehuri, nën ndikimin e alkoolit, ka kanosur seriozisht vajzën e tij, e cilësuar si viktimë e ndjeshme, duke i shkaktuar frikë dhe ankth për jetën dhe sigurinë e saj.

Po ashtu, në të njëjtën datë, kohë dhe vend, i pandehuri, nën ndikimin e alkoolit, me dashje dhe përmes fjalëve dhe veprimeve kërcënuese, ka kanosur edhe bashkëshorten e tij, duke i shkaktuar frikë dhe pasiguri për jetën e saj. /Telegrafi/

Agjencia e Regjistrimit Civil (ARC) e Ministrisë së Punëve të Brendshme ka mbajtur sot në Prishtinë një sesion informues me përfaqësuesit e zyrave të gjendjes civile nga 38 komunat e Republikës së Kosovës, lidhur me zbatimin e Ligjit për të Huajt dhe Ligjit për Automjete.

Sipas njoftimit të MPB-së, takimi kishte për qëllim informimin dhe koordinimin ndërinstitucional, si dhe diskutimin e çështjeve praktike që ndërlidhen me kompetencat e gjendjes civile, veçanërisht procedurat për shtetasit e huaj dhe zbatimin e dispozitave ligjore në praktikë.

Gjatë sesionit, Shefja e Kabinetit në MPB, Jeta Tela, theksoi se përputhja e kornizës ligjore dhe institucionale të Kosovës me standardet e Bashkimit Evropian, përfshirë Ligjin për të Huajt dhe Ligjin për Automjete, lidhet drejtpërdrejt me përmbushjen e obligimeve që rrjedhin nga Marrëveshja për Stabilizim-Asociim dhe proceset e tjera integruese. Ajo vlerësoi se zbatimi i ligjeve në mënyrë transparente dhe pa diskriminim është thelbësor për përmbushjen e pritshmërive pas liberalizimit të vizave dhe për avancimin e Kosovës drejt anëtarësimit në BE.

Po ashtu, u theksua roli i rëndësishëm që kanë zyrat e gjendjes civile në të gjitha komunat për zbatimin korrekt të obligimeve ligjore që burojnë nga këto dy ligje. Në këtë kontekst, u nënvizua nevoja për bashkëpunim të vazhdueshëm me Ministrinë e Punëve të Brendshme dhe institucionet e tjera relevante, për shkëmbim të informatave dhe adresim të sfidave që mund të paraqiten gjatë punës në terren.

Nga MPB u bë e ditur se ky sesion informues është pjesë e një fushate intensive, përmes së cilës synohet përfshirja e të gjithë akterëve relevantë dhe sigurimi që informacionet të arrijnë te qytetarët, shtetasit e huaj dhe vizitorët, përmes formave të ndryshme të komunikimit.

Fushata informuese, sipas njoftimit, do të vazhdojë deri më 15 mars 2026, me qëllim të lehtësimit të qasjes në informata dhe sigurimit të respektimit të legjislacionit në fuqi. /Telegrafi/

Komuna e Drenasit ka përfunduar instalimin e sistemeve fotovoltaike në dy shkolla të mesme, në kuadër të investimeve për promovimin e energjisë së pastër dhe të qëndrueshme.

Sipas njoftimit zyrtar, panelet diellore janë instaluar në Shkollën e Mesme “Gjergj Kastrioti – Skënderbeu”, me kapacitet prej 14.26 kWp, si dhe në Shkollën e Mesme “Fehmi Lladrovci”, me kapacitet prej 17.36 kWp.

Këto investime janë realizuar në bashkëpunim me Fondacionet e Shoqërisë së Hapur – Ballkani Perëndimor (OSF-WB), bazuar në Memorandumin e Bashkëpunimit për Avancimin e Tranzicionit të Energjisë Komunale, të nënshkruar më herët ndërmjet palëve.

Nga Komuna e Drenasit bëhet e ditur se ky projekt synon prodhimin e energjisë së pastër, uljen e kostove të energjisë elektrike dhe promovimin e qëndrueshmërisë mjedisore në institucionet arsimore.

Po ashtu, theksohet se Komuna e Drenasit mbetet e përkushtuar në zbatimin e projekteve që ndikojnë drejtpërdrejt në mirëqenien e qytetarëve dhe në mbrojtjen e mjedisit. /Telegrafi/

Kryetari i Komunës së Prizrenit, Shaqir Totaj, ka njoftuar se ekipet e ndërmarrjes “Eko Regjioni” kanë realizuar sot një aksion pastrimi dhe krasitjeje të drunjve dhe shkurreve në disa pjesë të qytetit.

Sipas Totajt, aksioni është zhvilluar në lagjet “Ortakoll” dhe “Jeta e Re”, si dhe përgjatë rrugës “Wesley Clark”, me synim përmirësimin e mjedisit dhe të hapësirave publike.

“Ekipet e Eko Regjionit realizuan sot aksion pastrimi dhe krasitjeje të drunjve e shkurreve në lagjet ‘Ortakoll’ dhe ‘Jeta e Re’, si dhe në rrugën ‘Wesley Clark’ në Prizren, me qëllim përmirësimin e mjedisit dhe hapësirave publike”, ka deklaruar Totaj.

Ai ka bërë të ditur se ky proces nuk do të ndalet vetëm në këto zona, por do të vazhdojë edhe në pjesë të tjera të qytetit.

“Ky proces do të vazhdojë edhe në pjesët e tjera të qytetit”, ka theksuar kryetari i Prizrenit.

Komuna e Prizrenit ka bërë të ditur se aksione të tilla janë pjesë e angazhimeve të vazhdueshme për mirëmbajtjen e pastërtisë dhe rregullimin e hapësirave publike në qytet. /Telegrafi/

Policia e Kosovës ka arrestuar tre persona të dyshuar për vepra penale që lidhen me narkotikë, në Mitrovicën e Jugut.

Sipas njoftimit zyrtar, njësitet policore të Stacionit Policor Jugu në Mitrovicë, në bashkëpunim me hetuesit e Drejtorisë për Hetimin e Trafikimit me Narkotikë, gjatë natës së 4 shkurtit 2026 kanë realizuar arrestimin e tre personave të dyshuar për veprën penale “blerje, posedim, shpërndarje dhe shitje e paautorizuar e narkotikëve, substancave psikotrope dhe analoge”.

Arrestimi i të dyshuarve është kryer në dy lokacione të ndryshme në Mitrovicë.

Gjatë kontrollit, tek të dyshuarit janë gjetur dhe sekuestruar 47 qese me substancë të dyshuar narkotike, me peshë të përgjithshme prej 40.84 gramësh.

Me aktvendim të prokurorit kompetent, tre të dyshuarve u është caktuar masa e ndalimit policor, ndërsa hetimet lidhur me rastin janë duke vazhduar nga njësia përkatëse e Drejtorisë për Hetimin e Trafikimit me Narkotikë. /Telegrafi/

Një grua ka pësuar lëndime trupore në vendin e punës, në objektin e Universitetit të Gjakovës.

Rastin e ka konfirmuar për Telegrafin zëdhënësja e Policisë për rajonin e Gjakovës, Vlera Krasniqi, e cila bëri të ditur se incidenti ka ndodhur në rrugën “Normalja e Gjakovës”.

“Sot rreth orës 10:15 është raportuar për një lëndim në vendin e punës në rrugën ‘Normalja e Gjakovës’, në objektin e Universitetit, përkatësisht Fakulteti i Edukimit”, ka deklaruar Krasniqi.

Sipas saj, lëndimi dyshohet se është shkaktuar si pasojë e rrëzimit të një orendie të brendshme.

“Personi i lënduar, femër e moshës madhore, ka pranuar trajtim mjekësor”, ka shtuar ajo.

Policia ka bërë të ditur se njësitë relevante ndodhen në vendngjarje dhe janë duke ndërmarrë të gjithë hapat e nevojshëm lidhur me këtë rast. /Telegrafi/

Kryeshefi Ekzekutiv i KRM Pastrimit, Petrit Reçica, ka bërë të ditur se ekipet e ndërmarrjes kanë nisur largimin e mbeturinave inerte dhe vëllimore që, sipas tij, po hidhen padrejtësisht në kontejnerët e amvisërisë, në lagje dhe në hapësira publike në të gjitha zonat e Prishtinës.

“Po i largojmë mbeturinat inerte dhe vëllimore që po hidhen padrejtësisht në kontejnerët e amvisërisë, në lagje dhe në hapësira publike në të gjitha lagjet e Prishtinës,” ka shkruar Reçica.

Ai ka dërguar një mesazh paralajmërues për qytetarët dhe bizneset që hedhin mbeturina në mënyrë të paligjshme, duke theksuar se këto veprime përbëjnë shkelje ligjore.

“Të hedhësh mbetje si copa sfungjeri, lëkure, tekstili, apo mbetje nga restorante peshku dhe kasapë mishi në kontejnerët e dedikuar për amvisëri është shkelje e ligjit dhe së shpejti do të dënohen me gjobë,” ka theksuar ai.

Reçica ka shtuar se hedhja e pakontrolluar e këtyre mbeturinave ka pasoja direkte në mjedis.

“Këto veprime dëmtojnë mjedisin,” ka deklaruar Kryeshefi Ekzekutiv i KRM Pastrimit.

Në fund, ai ka falënderuar punëtorët e ndërmarrjes dhe partnerët për angazhimin e tyre të përditshëm në terren.

“Falënderim i veçantë për punëtorët e KRM Pastrimi, të cilët çdo ditë po punojnë për ta mbajtur qytetin të pastër. Po ashtu, falënderoj partnerët tanë nga Gjelbër dhe NPB për bashkëpunimin dhe mbështetjen në terren,” ka përfunduar Reçica. /Telegrafi/

Komunat e Kosovës kanë nisur vlerësimin e dëmeve të shkaktuara nga vërshimet që goditën vendin në fillim të vitit 2026. Edhe pse nuk disponojnë kapacitete buxhetore për të përballuar plotësisht kompensimin e dëmeve, komunat kanë filluar të bëjnë vlerësimet në terren.

Telegrafi raportoi më parë për problematikën e kompensimit të dëmeve nga vërshimet, ku Malisheva, Rahoveci dhe Drenasi theksuan se që nga viti 2016 dëmet nuk janë paguar plotësisht.

Sipas të dhënave të Asociacionit të Komunave të Kosovës (AKK), Peja prinë me numrin më të madh të kërkesave për kompensim nga qytetarët dhe bizneset, me gjithsej 420 aplikime.

Pa fond emergjent dhe pa reagim nga Ministria e Financave, komunat të pafuqishme për kompensimin e dëmeve

“Komunat e prekura nga vërshimet e fundit kanë pranuar një numër të madh kërkesash për kompensim dëmesh nga qytetarët, bizneset dhe fermerët”, njofton AKK.

Numri i aplikimeve sipas komunave

Nga raportimet paraprake rezulton se janë evidentuar rreth 3,000 kërkesa për kompensim dëmesh, ndërsa ky numër pritet të rritet, pasi procesi i pranimit dhe vlerësimit të aplikimeve nuk ka përfunduar ende në shumicën e komunave. Komunat më të prekura sipas numrit të aplikimeve janë:

• Peja – rreth 420 kërkesa
• Gjakova – 334 kërkesa
• Skenderaj – 320 kërkesa
• Fushë Kosova dhe Drenasi – mbi 300 kërkesa secila
• Klinë – 270 kërkesa
• Malisheva – 225 kërkesa
• Mitrovica – 230 kërkesa
• Lipjani – 176 kërkesa
• Rahoveci – 142 kërkesa
• Prizreni – rreth 140–150 kërkesa
• Suhareka – mbi 100 kërkesa
• Ferizaj – 20 kërkesa
• Prishtina – 20–30 kërkesa

Komuna e Mamushës ka raportuar se nuk ka pasur kërkesa për kompensim, pasi dëmet kanë qenë minimale dhe kryesisht në fusha të hapura.

Vlerësimi financiar paraprak

Vetëm disa komuna kanë ofruar vlerësime financiare paraprake. Sipas këtyre të dhënave:

• Peja – rreth 800,000 euro
• Rahoveci – rreth 800,000 euro
• Suhareka – rreth 200,000 euro
• Ferizaj – rreth 110,000 euro

Nga këto raporte, vlera e përgjithshme arrin afërsisht 1.9 milion euro, por ky është vetëm një vlerësim i pjesshëm, pasi shumica e komunave janë ende në fazën e verifikimit dhe vlerësimit të detajuar të dëmeve.

Procesi ende në zhvillim dhe thirrja për mbështetje

Shumë komuna kanë raportuar vetëm numrin e aplikimeve, pa dhënë vlerën financiare, pasi komisionet komunale vazhdojnë punën në terren. Kërkesat përfshijnë dëme në ekonomi familjare, bujqësi, biznese private dhe infrastrukturë publike.

Asociacioni i Komunave të Kosovës vlerëson se komunat nuk kanë kapacitete buxhetore për të përballuar këtë barrë financiare dhe apelon tek Qeveria e Kosovës për të krijuar mekanizma emergjentë financiarë dhe një fond të posaçëm për kompensimin e dëmeve. Pa mbështetje konkrete nga niveli qendror, mijëra familje dhe biznese mund të mbeten pa ndihmën e nevojshme për rikuperim.

AKK do të vazhdojë të mbledhë të dhëna të përditësuara nga të gjitha komunat dhe do t’i dorëzojë ato tek institucionet qendrore për një reagim sa më të shpejtë dhe të koordinuar. /Telegrafi/

Fondacioni për të Drejtat e Kafshëve njofton se sezoni i gjuetisë në Kosovë ka përfunduar zyrtarisht nga data 2 shkurt, duke ndaluar çdo formë të gjuetisë pas kësaj date.

Fondacioni apelon tek të gjithë qytetarët që të jenë vigjilentë dhe të raportojnë çdo aktivitet gjuetie që vërejnë, qoftë drejtpërdrejt në terren, përmes fotografive, videove apo postimeve në rrjetet sociale. Të gjitha raportimet do të trajtohen me anonimitet të plotë.

Sipas ligjit, gjuetia jashtë sezonit të lejuar konsiderohet vepër penale.

Fondacioni ka njoftuar se do të raportojë çdo rast të gjuetisë së paligjshme, si në terren ashtu edhe online, duke bashkëpunuar me autoritetet përkatëse.

“Mbrojtja e jetës së egër është përgjegjësi e përbashkët. Nëse hasni në gjueti të paligjshme, raportoni në Polici, Prokurori apo tek organizata jonë në info@animalrights-rks.org”, njofton Fondacioni. /Telegrafi/

Kryetari i Degës së Lidhjes Demokratike të Kosovës në Mitrovicë, Gëzim Plakolli, ka bërë të ditur se LDK-ja ka marrë vendim për dalje nga koalicioni qeverisës në këtë komunë, për shkak të, siç thuhet, mosrespektimit të marrëveshjes për bashkëqeverisje nga kryetari i komunës.

Në një deklaratë publike të shpërndarë në rrjetin social Facebook, Plakolli ka theksuar se vendimi është marrë pas shpërfilljes së vazhdueshme të propozimeve zyrtare të Degës së LDK-së në Mitrovicë.

“Lidhja Demokratike e Kosovës, Dega në Mitrovicë njofton opinionin publik se, për shkak të mosrespektimit të marrëveshjes për bashkëqeverisje dhe shpërfilljes së propozimeve zyrtare të Degës së LDK-së, ka marrë vendim për dalje nga koalicioni qeverisës”, thuhet në deklaratë.

Koalicioni me LDK-në në Mitrovicë, Peci: Me 3% nuk punon as iPhone

Sipas Plakollit, shkak kryesor për këtë vendim është emërimi i Drejtorit të Drejtorisë për Kulturë, Rini dhe Sport, i cili, sipas tij, është bërë pa konsultim dhe në kundërshtim me dakordimet e mëhershme.

“Emërimi i Drejtorit të Drejtorisë për Kulturë, Rini dhe Sport, i realizuar në mënyrë të njëanshme dhe pa asnjë paralajmërim nga Kryetari Peci, është në kundërshtim të plotë me dakordimet paraprake si dhe me propozimet e miratuara nga organet e LDK-së në Mitrovicë”, ka deklaruar Plakolli.

Ai ka sqaruar se ky emërim nuk përfaqëson qëndrimin e LDK-së dhe as të Degës së saj në Mitrovicë. “Për këtë arsye, sqarojmë se ky emërim nuk e përfaqëson LDK-në dhe as Degën e saj në Mitrovicë”, theksohet më tej.

Në fund të deklaratës, Plakolli ka bërë të ditur se vendimi për dalje nga koalicioni është i detyrueshëm për të gjithë përfaqësuesit e partisë në nivel lokal. “Ky vendim është obligativ për të gjithë anëtarët e LDK-së në Mitrovicë, përfshirë edhe delegatët e LDK-së në Kuvendin Komunal të Mitrovicës”, thuhet në deklaratë.

Kujtojmë se Peci i kishte ofruar LDK-së Kryesuesin e Kuvendit dhe dy drejtori, derisa kishin mosmarrëveshje në emërimin e njërit nga drejtorët - gjë që shkaktoi prishje të koalicionit. /Telegrafi/

Koalicioni mes Lëvizjes Vetëvendosje dhe Lidhjes Demokratike të Kosovës në Komunën e Mitrovicës aktualisht është në një fazë të brishtë, pasi nuk ka marrëveshje për ndarjen e drejtorive – më saktë emrat se kush do të drejtojë ato.

Ndonëse LDK ka marrë kryesimin e Kuvendit Komunal, po ashtu do t’i ketë edhe dy drejtori, mungon marrëveshja se kush do të jetë në krye të tyre.

Nga raportimet e fundit, bëhet e ditur se LDK ka vendosur të largohet nga koalicioni më LVV-në në Mitrovicë.

Raportimi për prishje koalicioni LVV-LDK në Mitrovicë, deklarohet Peci

Në lidhje me këtë situatë, Telegrafi ka kontaktuar me kryetarin e Komunës së Mitrovicës, Faton Peci, i cili ka thënë se është i gatshëm për bashkëpunim

“Ne jemi të hapur për bashkëpunim edhe me LDK për çka jemi treguar tepër gjeneroz”, tha ai.

"Nëse z. Plakolli me 3% ka ambicie sa për nënkryetar e mandej drejtor e krejt ndërmarrjet komunale, unë i bëj me dije se me 3% jo qe nuk mundesh me marrë në drejtim institucionet kryesore, po me 3% as iPhone nuk punon", shtoi Peci.

Janë paralajmëruar që gjatë kësaj jave do të zhvillohen takime mes dy partive, për të finalizuar ndarjen e drejtorive, ndërsa Telegrafi do të vazhdojë të ju mbajë të informuar për zhvillimet e fundit në Komunën e Mitrovicës. /Telegrafi/

Pediatria, si një nga fushat më të ndjeshme të mjekësisë, vazhdon të jetë prioritet në Spitalin e Përgjithshëm “Dr. Sami Haxhibeqiri” në Mitrovicë, për shkak të lidhjes së drejtpërdrejtë me shëndetin dhe mirëqenien e fëmijëve.

Sipas njoftimit të spitalit, objekti i ri dhe hapësirat moderne të Repartit të Pediatrisë kanë krijuar kushte optimale për punën e stafit mjekësor.

Ky investim ka lehtësuar proceset e punës për mjekët specialistë dhe infermierët, si dhe ka ndikuar në rritjen e vëllimit dhe cilësisë së shërbimeve shëndetësore për pacientët më të vegjël.

Gjatë vitit 2025, përkushtimi i stafit është reflektuar edhe në numrin e lartë të shërbimeve të ofruara. Në këtë repart janë hospitalizuar gjithsej 1,167 fëmijë, të cilët kanë marrë trajtim spitalor për shqetësime të ndryshme shëndetësore, ndërsa janë realizuar 40,174 vizita ambulantore pediatrike.

Reparti i Pediatrisë mbetet pikë kyçe e referimit për rajonin e Mitrovicës dhe vazhdon të jetë adresa kryesore për trajtimin dhe shërimin e fëmijëve, duke garantuar shërbime profesionale dhe cilësore në fushën e shëndetësisë pediatrike. /Telegrafi/

Kompania Rajonale e Ujësjellësit “Prishtina” ka njoftuar konsumatorët që kanë detyrime të papaguara për shërbimet e ujit dhe kanalizimit që t’i kryejnë pagesat brenda afatit të përcaktuar, për të shmangur masat ndëshkuese.

Sipas njoftimit të publikuar në Facebook, bazuar në të dhënat e faturimit, një numër konsumatorësh rezultojnë me borxhe të papaguara për shërbimet e ujësjellësit dhe kanalizimit. KRU Prishtina ka bërë të ditur se afati i fundit për realizimin e pagesave është fundi i muajit shkurt 2026.

Pagesat mund të realizohen në sportelet e Kompanisë Rajonale të Ujësjellësit “Prishtina” SH.A, përmes bankave komerciale, institucioneve mikrofinanciare dhe Postës së Kosovës, si dhe online përmes platformës elektronike.

Kompania ka paralajmëruar se mosrealizimi i pagesës brenda afatit të caktuar mund të rezultojë me ndërprerjen e shërbimit të furnizimit me ujë dhe dërgimin e lëndëve për trajtim te përmbaruesit privat.

Nga KRU Prishtina theksohet se pagesa e rregullt e shërbimeve ndihmon në sigurimin e furnizimit të qëndrueshëm me ujë të pastër dhe në ofrimin e shërbimeve cilësore për të gjithë qytetarët. /Telegrafi/