27 vjet më parë, në fshatin Reçak të Shtimes, ndodhi një nga krimet më të rënda gjatë luftës në Kosovë, ku 45 civilë shqiptarë u masakruan mizorisht nga forcat paramilitare serbe.

Masakra u bë e njohur për opinionin ndërkombëtar falë reagimit të menjëhershëm të shefit të Misionit Verifikues të OSBE-së në Kosovë, William Walker.

Walker pa nga afër trupat e pajetë të civilëve dhe ngriti alarmin për krime të rënda kundër njerëzimit që po kryheshin ndaj shqiptarëve në Kosovë.

Rreth tre dekada më vonë, në Akademinë Përkujtimore të Masakrës së Reçakut, Walker deklaroi se, nëse dikush do t’i kishte thënë para 27 vitesh se Kosova do të ishte e lirë, ai nuk do ta kishte besuar.

“27 vite më parë kam vizituar Reçakun për herë të parë dhe për 27 vjet jam intervistuar. Unë fola për atë që kishte ndodhur dhe që pash atë ditë. Dua të them ca fjalë për ata që meritojnë falënderime që kanë ndodhur pas masakrës. Kam dëgjuar fjalë për UÇK-në, dhe prodhuan atë që jetojmë sot. Nuk e kam menduar që do të kishte një Republikë të Pavarur. Po të më thoshte dikush që pas kaq vitesh do të isha para një vendi të pavarur do të thosha ‘je i çmendur’. Aq shumë ka ndryshuar për 27 vite. Një grup njerëzish që mendoj që gëzojnë respekt, janë ata që kanë ardhur me mua që të shërbejnë në Kosovë nga mbi 30 vende anëtare të OSBE-së. Ata erdhën pa mbrojtje, ne nuk kishim armë përkundër rrezikut që kishte këtu. Asnjëherë s’kam pasur frikë sa herë kam ardhur me misionin. Ishin disa kosovarë që ishin aty për të më mbrojtur mua”, tha ai.

Ambasadori Walker theksoi se ishte Reçaku që i tregoi botës të vërtetën e Kosovës.

“Shpesh më pyesin pse ti Walker flet vetëm për Reçakun, ka pas dhe gjëra të tjera të ndodhur. U vra dhe familja Jashari, por askush s’mund të tregonte se çka ndodhi atje, por Reçaku brenda natës i mblodhi verifikuesit, gjeneralin britanik...”, ka thënë ai. /Telegrafi/

Komuna e Shtimes ka njoftuar se më 15 janar do të zbatohet një regjim i veçantë i qarkullimit rrugor, me rastin e përvjetorit të Masakrës së Reçakut dhe aktiviteteve përkujtimore që do të zhvillohen gjatë kësaj dite.

Sipas njoftimit zyrtar, ky vendim është marrë në kuadër të takimeve koordinuese për organizimin e “Ditëve të Reçakut”, të zhvilluara me Policinë e Kosovës, dhe bazuar në masat e sigurisë të prezantuara nga autoritetet policore.

Rrugëtimi i organizuar do të zhvillohet në një drejtim. Ai do të nisë nga qyteti i Shtimes përmes rrugës “Tahir Sinani”, duke vazhduar drejt rrugës së Prizrenit. Hyrja në fshatin Reçak do të bëhet përmes rrugës “Lidhja e Prizrenit” (nga enti special), e cila do të shërbejë vetëm për hyrje, ndërsa qarkullimi do të jetë njëkahor deri te Memoriali në Reçak.

Pas përfundimit të homazheve, kthimi do të realizohet po ashtu në një drejtim, përmes rrugës “15 Janari”, duke vazhduar në rrugën “William Walker” deri në dalje. Qytetarët do të kenë mundësi të shfrytëzojnë edhe rrugën unazore (rrugën e re) për t’u kthyer drejt Shtëpisë së Kulturës në qytetin e Shtimes.

Nga Komuna e Shtimes sqarojnë se rrugët “William Walker” dhe “15 Janari” nuk do të shfrytëzohen për hyrje, por vetëm për dalje. Gjithashtu, do të ketë mbyllje në hyrje të rrugës “William Walker”, si dhe në afërsi të rrugës “Qorr Ilazi” nga drejtimi i fshatit Petrovë, e cila do të shërbejë vetëm për dalje.

Sa i përket parkimit, parkingu pranë Memorialit në Reçak do të jetë i dedikuar vetëm për krerët e shtetit, ambasadorë, delegacione të larta dhe familjarë të martirëve, veçanërisht për personat me nevoja të veçanta për shkak të moshës. Parkim shtesë do të sigurohet në oborret e familjarëve në fshatin Reçak, në oborrin e shkollës në Çestë të Reçakut, si dhe pranë Shtëpisë së Kulturës në Shtime, ku parkimi do të jetë i rregulluar gjatë mbajtjes së Akademisë Përkujtimore. Hapësirat përreth Bibliotekës do të jenë gjithashtu në dispozicion për pjesëmarrësit.

Komuna e Shtimes u ka bërë thirrje qytetarëve që të respektojnë udhëzimet e zyrtarëve policorë dhe shenjëzimin rrugor, në mënyrë që aktivitetet përkujtimore të zhvillohen me dinjitet dhe pa pengesa. /Telegrafi/

Komuna e Shtimes ka njoftuar se e enjtja, 15 janar 2026, do të jetë ditë pushimi për të gjitha bizneset që operojnë në territorin e komunës, në shenjë nderimi dhe respekti për sakrificën e martirëve dhe dëshmorëve të rënë në Masakrën e Reçakut.

Sipas njoftimit zyrtar të Drejtorisë për Shërbime Publike, vendimi është marrë në bazë të rregullores komunale në fuqi dhe ka për qëllim shënimin e Ditës Përkujtimore të Masakrës së Reçakut, e cila ka rëndësi të veçantë historike dhe kombëtare.

Në këtë ditë, të gjitha subjektet afariste obligohen të jenë të mbyllura, përveç disa veprimtarive esenciale. Lejohet të punojnë vetëm furrat e bukës, barnatoret farmaceutike, pikat e shitjes së karburanteve dhe sektori i gastronomisë.

Nga Komuna e Shtimes bëhet e ditur se për kujdestari janë caktuar disa biznese të veçanta, të cilat do të ofrojnë shërbime për qytetarët gjatë kësaj dite pushimi.

Autoritetet komunale kanë bërë thirrje për respektimin e këtij vendimi, duke theksuar se mbyllja e bizneseve më 15 janar është një shprehje respekti dhe përkujtimi për viktimat e Masakrës së Reçakut. /Telegrafi/

Pas reshjeve të borës që përfshinë komunën gjatë natës, kompania e mirëmbajtjes së rrugëve ka nisur punën që në orët e hershme të mëngjesit për të siguruar qarkullim të rregullt dhe të sigurt.

Kryetari i Shtimes, Qemajl Aliu, njoftoi për qytetarët se mirëmbajtja e rrugëve do të vijojë gjatë gjithë ditës.

“Pas reshjeve të mbrëmshme të borës, kompania e mirëmbajtjes është në terren që nga orët e hershme të mëngjesit dhe ka filluar pastrimin e rrugëve”, tha ai.

Aliu apeloi edhe tek qytetarët për kujdes të shtuar gjatë lëvizjes në rrugë: “Ju bëjmë thirrje për kujdes të shtuar në rrugë, veçanërisht gjatë vozitjes, duke iu përshtatur kushteve atmosferike”.

Qytetarët u rikujtuan se puna e ekipeve të mirëmbajtjes do të vazhdojë me kapacitete të plota, për të minimizuar rreziqet dhe vështirësitë në qarkullim. /Telegrafi/

Një veprim shembullor qytetar është shënuar pasditen e 4 janarit 2026 në Shtime, ku një qytetar ka dorëzuar në polici një portofol të humbur që përmbante dokumente personale dhe para.

Sipas njoftimit zyrtar të Policisë, rreth orës 17:00 në stacionin policor është paraqitur qytetari A. Rama, i cili ka raportuar se kishte gjetur një portofol të humbur në oborrin e Qendrës së Mjekësisë Familjare në Shtime.

Në prani të zyrtarëve policorë është bërë kontrollimi i portofolit, ku janë gjetur një patentë shoferi, një letërnjoftim, një kartelë bankare, si dhe para në vlerë prej 90.65 euro.

Pas verifikimeve të nevojshme, policia ka identifikuar pronarin e portofolit, H. D., i cili është njoftuar dhe është paraqitur në stacionin policor për ta marrë portofolin e tij.

Drejtoria Rajonale e Policisë në Ferizaj ka falënderuar qytetarin A. Rama për veprimin e tij shembullor, ndershmërinë dhe bashkëpunimin me Policinë e Kosovës, duke e vlerësuar këtë rast si një shembull pozitiv të qytetarisë dhe përgjegjësisë shoqërore. /Telegrafi/

Një qytetar nga Shtimja gjen para dhe i dorëzon në polici telegrafi.com

Eksperti i ekonomisë, Dorian Teliti, ka nxjerrë në pah 10 dështimet kryesore të qeverisë gjatë vitit 2025. Në një postim në rrjete sociale, ai shprehet se vitin që lamë pas e karakterizuan varfëria në rritje, pensione të pamjaftueshme, inflacion që e goditi rëndë qytetarin e zakonshëm, emigracion ekonomik i pandalur dhe një shtet që zgjodhi […]

The post 10 dështimet kryesore të qeverisë Rama në vitin që shkoi appeared first on BoldNews.al.

Policia e Kosovës ka bërë të ditur ka arrestuar një person në Shtime pasi dyshohet se kanosi dhe sulmoi fizikisht djalin e tij.

Rasti ka ndodhur të martën në Shtime, në ora 15:30.

“Është arrestuar i dyshuari mashkull kosovar, pasi që i njëjti ka kanosur dhe sulmuar fizikisht djalin e tij”, thuhet në raportin policor.

Viktima ka pranuar tretman mjekësor, ndërkaq nga i dyshuari është konfiskuar një pushkë gjuetie me katër fishekë.

Me vendim të prokurorit, pas intervistimit i dyshuari dërgohet në mbajtje. /Telegrafi/

Drejtoria për Shëndetësi dhe Mirëqenie Sociale në Komunën e Shtimes ka bërë të ditur orarin zyrtar të kujdestarisë së barnatoreve që do të ofrojnë shërbime gjatë natës në qytetin e Shtimes.

Sipas njoftimit, orari i kujdestarisë së natës do të jetë nga ora 20:00 deri në 08:00, ndërsa ky shërbim do të realizohet në bashkëpunim me barnatoret private, me qëllim të garantimit të qasjes së qytetarëve në barna dhe shërbime farmaceutike edhe gjatë orëve të vona të natës.

Nga Komuna e Shtimes bëhet e ditur se ky organizim është ndërmarrë për të përmbushur nevojat shëndetësore të qytetarëve dhe për të siguruar shërbime të vazhdueshme farmaceutike, veçanërisht gjatë festave të fundvitit.

Drejtoria për Shëndetësi dhe Mirëqenie Sociale u bën thirrje qytetarëve që, për nevoja urgjente, t’i referohen orarit të publikuar dhe të shfrytëzojnë shërbimet e barnatoreve kujdestare në përputhje me datat e përcaktuara. /Telegrafi/

Policia e Kosovës ka publikuar raportin 24-orësh lidhur me zhvillimet gjatë procesit të Zgjedhjeve të Jashtëzakonshme Parlamentare, ku janë evidentuar disa shkelje të ligjit lidhur me fshehtësinë dhe integritetin e votës.

Në Drenas, rreth orës 14:30, është raportuar se një i dyshuar mashkull kosovar ka kryer veprën e cenimit të fshehtësisë së votimit. Rasti është duke u trajtuar në procedurë të rregullt me urdhër të prokurorit.

Në Gjilan, një rast pengimi i procesit zgjedhor dhe cenimi i fshehtësisë së votimit u regjistrua rreth orës 11:08, raporton.

I dyshuari mashkull, pasi e kishte plotësuar fletëvotimin, e ekspozoi atë para se ta depozitonte në kutinë e votimit. Pas intervistimit, ai u lirua në procedurë të rregullt me vendim të prokurorit.

Në Ranillug, gjatë datave 26-27 dhjetor, një e dyshuar femër kosovare u arrestua për dyshimin se kishte ushtruar ndikim mbi votuesit e partive të tjera. Pas marrjes në pyetje, ajo u lirua po ashtu në procedurë të rregullt.

Policia ka raportuar gjithashtu disa incidente të asgjësimit të dokumenteve të votimit. Në Shtime, rreth orës 16:25, një i dyshuar mashkull gris fletëvotimin e tij dhe të një votueseje tjetër. Rasti po trajtohet në përputhje me urdhër të prokurorit.

Në Prizren dhe Suharekë janë regjistruar ngjarje të ngjashme: një i dyshuar gris fletëvotimin, ndërsa një tjetër fotografoi votën e tij dhe e publikoi në rrjetet sociale; të dy rastet janë në procedurë të rregullt.

Një incident tjetër u regjistrua në Pejë rreth orës 20:00, ku u raportua se një fletëvotim kishte vulën e ndryshme nga fletëvotimet e tjera të KQZ-së.

Rasti, i cili ka përfshirë falsifikim të mundshëm të rezultateve të votimit, është nën hetim nga prokuroria, ndërsa fletëvotimi është sekuestruar. /Telegrafi/

Stadiumi i Qytetit në Shtime ka marrë një pamje tërësisht të re, pas përfundimit të projektit të rindërtimit me vlerë rreth 2.5 milionë euro, të financuar nga Qeveria e Kosovës. Projekti është realizuar brenda një periudhe prej një viti e gjysmë dhe ka sjellë modernizimin e plotë të infrastrukturës sportive.

Në ceremoninë e përurimit morën pjesë Kryeministri i Republikës së Kosovës, Albin Kurti, Ministri i Kulturës, Rinisë dhe Sportit, Hajrullah Çeku, kryetari i Komunës së Shtimes, Qemajl Aliu, si dhe përfaqësues institucionalë, sportdashës dhe qytetarë.

Kryeministri Kurti theksoi rëndësinë e këtij investimi për zhvillimin e sportit dhe për komunitetin lokal.

“Me rreth 2.5 milionë euro investim dhe për një periudhë njëvjeçare e gjysmë, është krijuar një stadium që u shërben sportistëve, shikuesve dhe futbolldashësve të të gjitha moshave. Uroj që ky stadium të shfrytëzohet sa më shumë dhe klubit futbollistik ‘Vjosa’ i dëshirojmë suksese të vazhdueshme”, tha Kurti.

Ministri i Kulturës, Rinisë dhe Sportit, Hajrullah Çeku, vlerësoi se stadiumi tashmë i plotëson standardet për zhvillimin e ndeshjeve zyrtare profesionale.

“Këtu është arritur standardi i kërkuar për zhvillimin e ndeshjeve profesionale. Ky stadium i transformuar i shërben futbollistëve dhe publikut dhe është pjesë e angazhimit tonë për investime të vazhdueshme në sport, gjithandej Kosovës”, deklaroi Çeku.

Kryetari i Komunës së Shtimes, Qemajl Aliu, e cilësoi rindërtimin e stadiumit si investimin më të madh të realizuar ndonjëherë në këtë komunë.

“Ky projekt i jep dinjitet sportit lokal dhe hap perspektiva të reja për të rinjtë tanë. Punimet, që kanë nisur në mars të vitit 2024 dhe kanë përfunduar para vitit 2026, përfshijnë ndërtimin e tribunave të reja me 1,205 ulëse, zhveshtoreve dhe objekteve përcjellëse. Ne besojmë në talentin e sportistëve tanë dhe investojmë për ta”, tha Aliu, duke falënderuar Qeverinë për mbështetjen.

Rindërtimi i stadiumit në Shtime është pjesë e investimeve publike për avancimin e infrastrukturës sportive në Kosovë dhe pritet të shërbejë për klubin futbollistik “Vjosa”, si dhe për organizimin e aktiviteteve të tjera sportive. /Telegrafi/

Kryetari i Komunës së Shtimes, Qemajl Aliu, ka mbajtur sot takimin e dytë publik me qytetarë, ku ka prezantuar raportin për punët, projektet dhe investimet e realizuara gjatë gjashtëmujorit të dytë të vitit 2025.

Gjatë adresimit të tij, kryetari Aliu ka paraqitur projektet e përfunduara dhe ato në zhvillim në sektorë të rëndësishëm si infrastruktura, arsimi, shëndetësia, mirëqenia sociale dhe shërbimet publike. Ai theksoi se buxheti i Komunës së Shtimes për vitin 2025 ka qenë mbi 11 milionë euro, duke mundësuar realizimin e projekteve me ndikim të drejtpërdrejtë në përmirësimin e jetës së qytetarëve.

“Kjo ishte një periudhë e mbushur me angazhim të vazhdueshëm dhe rezultate konkrete që kanë zgjidhur probleme dhe kanë lehtësuar jetën e qytetarëve tanë. Ky ishte gjashtëmujori i fundit i kapitullit të punës në mandatin e parë, ndërsa mandati i ri na gjen me përgjegjësi edhe më të madhe dhe me shumë punë përpara”, ka deklaruar kryetari Aliu.

Në fushën e arsimit, ai njoftoi për rritjen e subvencioneve, funksionalizimin e katër çerdheve ku aktualisht përfitojnë rreth 250 fëmijë, si dhe investime pothuajse në të gjitha shkollat e komunës. Po ashtu, gjatë këtij viti janë ndarë 120 bursa për studentët nga Komuna e Shtimes.

Sa i përket infrastrukturës, kryetari Aliu veçoi projektet e kanalizimeve atmosferike, ndriçimit publik, realizimin e projektit të unazës së brendshme, si dhe ndërtimin dhe rivitalizimin e shumë rrugëve lokale, përfshirë rrugët e reja të Malësisë në fshatrat Topillë, Rancë dhe Devetak.

Një nga projektet më të rëndësishme, sipas tij, është rrënimi i objektit përpara ndërtesës së komunës, që do të hapë rrugë për realizimin e projektit të sheshit të qytetit dhe ndërtimin e parkingut nëntokësor.

Kryetari Aliu foli gjithashtu për investimet në shëndetësi dhe mirëqenie sociale, duke përmendur vazhdimin e punimeve për ndërtimin e objektit të ri të Qendrës Kryesore të Mjekësisë Familjare, ndërtimin e entit special, objektit të administratës komunale dhe rregullimin e shtratit të lumit, projekte këto me vlera milionëshe.

Në fushën e kulturës, rinisë dhe sportit, ai theksoi investimet në sallat sportive, subvencionimin e botuesve të rinj, organizimin e festivalit tradicional “FolkFest”, mbajtjen për herë të parë të festivalit për fëmijë në Shtime, si dhe themelimin e Korit të Qytetit, krahas aktiviteteve të tjera kulturore.

Po ashtu, kryetari njoftoi për fillimin e punimeve për ndërtimin e Varrezave të Dëshmorëve në Shtime, projekt ky me vlerë rreth gjysmë milioni euro.

Në përmbyllje, kryetari Qemajl Aliu ka ritheksuar përkushtimin e tij dhe të qeverisjes komunale për vazhdimin e punës në shërbim të qytetarëve dhe për përmirësimin e vazhdueshëm të cilësisë së jetës në Komunën e Shtimes. /Telegrafi/

Një ngjarje tragjike ka ndodhur në Shtime, ku një paciente femër, e cila ishte e shtruar në Qendrën Integruese Rehabilituese për të sëmurët kronik psikiatrik, ka ndërruar jetë pas një përkeqësimi të papritur të gjendjes shëndetësore.

Ajo është dërguar me urgjencë në Qendrën e Mjekësisë Familjare (QKMF) të Shtimes, ku është konstatuar vdekja.

Lidhur me këtë rast, është njoftuar prokurori dhe trupi i pajetë i paciente është lirohet familjarëve për t'u kujdesur për ceremoni mortore.

Hetimet janë duke u zhvilluar për të sqaruar rrethanat e vdekjes ./Telegrafi/

Kandidati për deputet nga LVV, Glauk Konjufca, shoqëruar nga kryetari Qemajl Aliu, ka takuar të rinjtë e vullnetarët e Shtimes.

Ai ka theksuar se angazhimi i përbashkët duhet të vazhdojë për të vazhduar përpara rrugën e nisur të Lëvizjes Vetëvendosje.

Ndërsa në Podujevë, bashkë me kryetarin Shpejtim Bulliqi, ka takuar vullnetarët atje, duke vlerësuar vullnetin e përkushtimin e tyre për fitoren e 28 dhjetorit.

Shkolla “Bajram Curri” në Mollopolc po kalon një proces të rinovimit të plotë, falë bashkëpunimit mes komunës së Shtimes dhe LMT-KFOR-it Turk.

Kryetari i komunës, Qemjal Aliu, vizitoi dje punimet së bashku me ekipin e KFOR-it, duke vlerësuar përkushtimin dhe mbështetjen për këtë investim.

Projektin përbëjnë rregullimi i nyjeve sanitare, renovimi i sallës së arsimtarëve, përmirësimi i banjove, lyerja e mureve dhe vendosja e dyerve të reja.

Sipas kryetarit Aliu, ky investim synon përmirësimin e kushteve për nxënësit dhe stafin arsimor, duke krijuar një ambient më të sigurt dhe të përshtatshëm për mësim.

“Vlerësojmë mbështetjen e KFOR-it Turk për këtë investim që përmirëson kushtet për nxënësit dhe stafin arsimor. Vazhdojmë me punë të mira”, shkroi kryetari Aliu./Telegrafi/

Kryetari i Komunës së Shtimes, Qemajl Aliu, ka bërë të ditur se faza e fundit e asfaltimit të rrugëve në këtë komunë është drejt përfundimit, para përkeqësimit të kushteve atmosferike.

Në një njoftim të publikuar në Facebook, Aliu theksoi se punimet po realizohen me qëllim të lehtësimit të qarkullimit për qytetarët dhe përmirësimit të infrastrukturës rrugore.

“Faza e fundit e asfaltimit të rrugëve po përfundon para përkeqësimit të motit, për qarkullim më të lehtë për qytetarët”, ka shkruar Aliu, duke shtuar se Komuna e Shtimes do të vazhdojë me realizimin e projekteve infrastrukturore.

Ai theksoi se angazhimi i komunës për investime në infrastrukturë nuk do të ndalet, me synimin për krijimin e kushteve më të mira për jetesë dhe lëvizje të qytetarëve. /Telegrafi/

Qendra Kryesore e Mjekësisë Familjare “Dr. Vezir Bajrami” në Shtime ka njoftuar se gjatë muajit dhjetor do të ofrohen shërbime mjekësore falas nga një mjek specialist nga Gjermania.

Sipas njoftimit zyrtar, mjeku shqiptar që vepron në Gjermani, Dr. Metush Qorrolli, do të qëndrojë për vizita mjekësore më 26 dhe 30 dhjetor, duke filluar nga ora 14:00. Trajtimet do të jenë pa pagesë dhe do të fokusohen në probleme ortopedike, si dhe në dhimbje akute dhe kronike.

Në kuadër të këtyre vizitave do të trajtohen dhimbjet e shtyllës kurrizore, përfshirë herniet diskale dhe ngushtimin e kanalit spinal, dhimbjet e nyjeve si pasojë e artrozave, si dhe dhimbjet e kokës, përfshirë migrenën, dhimbjet tensionuese dhe neuralgjinë trigeminale. Po ashtu, do të ofrohet trajtim për dhimbje kronike neuropatike, osteoporozë, fibromialgji, dhimbje të shkaktuara nga sëmundjet malinje, si dhe sëmundje të rralla të eshtrave.

Nga QKMF në Shtime bëhet e ditur se caktimi i terminit është i obligueshëm dhe se përparësi do të kenë rastet sociale. Qytetarët e interesuar mund të caktojnë termin te kryeinfermierja e Mjekësisë Familjare, në katin e dytë të QKMF-së, çdo ditë nga ora 08:00 deri në 15:30.

Numri i pacientëve që do të mund të përfitojnë nga këto shërbime është i kufizuar. /Telegrafi/

Komuna e Shtimes ka nisur dekorimin e rrugëve kryesore dhe hapësirave publike në kuadër të përgatitjeve për festat e fundvitit.

Punimet po realizohen nga kompania kontraktuese e angazhuar nga komuna.

Përmes vendosjes së ndriçimit dhe elementeve dekorative, synohet krijimi i një atmosfere më festive dhe atraktive për qytetarët gjatë kësaj periudhe.

Nga komuna kanë bërë të ditur se dekorimet do të shtrihen në disa pjesë të qytetit, me qëllim që Shtimja të marrë një pamje më të gjallë dhe më mikpritëse për festat që po afrojnë. /Telegrafi/

Policia e Kosovës ka organizuar sot pasdite operacionin policor të koduar ku gjatë bastisjes në një shtëpi në Shtime, ka gjetur dhe sekuestruar një armë e llojit Ekol, një karikator, tri boca ajri, 295 rruaza metalike, kalibër 4.5 milimetra.

Personi i dyshuar Rr.B. (33) është njoftuar për arsyen e kontrollit dhe ka pranuar se mbante një armë të llojit Ekol me bocë ajri, si dhe municion rruaza metalike.

I dyshuari është shoqëruar në stacionin policor në Shtime dhe pas intervistimit, me vendim të prokurorit të shtetit, është iniciuar rasti penal mbajtje në pronësi, kontroll ose përdorim të armës apo mjetit të rrezikshëm. Rasti vazhdon të trajtohet në procedurë të rregullt hetimore.

Policia e Ferizajt apelon te qytetarët që të bashkëpunojnë me policinë, duke raportuar çdo aktivitet të dyshuar që mund të cenojë sigurinë publike.

Policia Rajonale e Ferizajt ka publikuar statistikat mujore të komunikacionit për nëntorin 2025, të cilat tregojnë një ulje të përgjithshme të aksidenteve, por njëkohësisht një rritje të numrit të gjobave të shqiptuara për shkelje të rregullave të trafikut.

Sipas të dhënave zyrtare, në rajonin e Ferizajt – që përfshin komunat Ferizaj, Kaçanik, Shtime, Shtërpcë dhe Hani i Elezit – janë raportuar gjithsej 141 aksidente, nga të cilat: 59 aksidente me lëndime, ku kanë mbetur të plagosur 83 persona, 82 aksidente me dëme materiale, përcjell Telegrafi.

Në krahasim me nëntorin e vitit 2024, kur ishin raportuar 153 aksidente, prej tyre edhe një me fatalitet, statistikat e këtij viti paraqesin një ulje prej -7.80% të numrit total të aksidenteve.

Nga ana tjetër, shifrat për gjoba tregojnë trend të kundërt. Gjatë nëntorit 2025, policia ka shqiptuar: 6,340 gjoba për kundërvajtje, 140 masa mbrojtëse të heqjes së patentë-shoferit, për shkak të shkeljeve të rënda.

Krahasuar me nëntorin 2024, kur ishin shqiptuar 5,063 gjoba, numri i tyre ka shënuar një rritje prej 25.2% këtë vit.

Policia e Ferizajt ka bërë thirrje për kujdes të shtuar nga të gjithë pjesëmarrësit në trafik, me qëllim të uljes së riskut të aksidenteve dhe rritjes së sigurisë në rrugë. /Telegrafi/

Në ambientet e Shtëpisë së Kulturës u shfaq sot premiera e dramës shkollore “Flamur n’Stuhi”, e realizuar nga nxënësit e IAAP Shtime nën udhëheqjen artistike të Florie Jahiri Ademaj dhe Skender Asllani, ndërsa koreografia u përgatit nga Selatin Rizani.

Shfaqja u ndoq nga një numër i madh pjesëmarrësish, mes tyre edhe zyrtarë komunalë: Lulzim Sahiti, shef i sektorit të arsimit; Tringa Xhelili, zyrtare në DKA; si dhe Labinot Rexha, drejtor i IAAP Shtime.

Nxënësit sollën një interpretim të përkushtuar dhe emocional, duke krijuar një atmosferë mbresëlënëse që u shpërblye me duartrokitje të gjata nga publiku. Me energji, talent d he disiplinë, ata arritën të sjellin në skenë një rrëfim të fuqishëm dhe aktual, përcjell Telegrafi.

Drama trajtoi një prej kapitujve më të rëndësishëm të historisë shqiptare: festat e Nëntorit dhe epokën e lavdishme të Ushtrisë Çlirimtare të Kosovës.

Përmes skenave artistike, u përcollën mesazhe të forta për sakrificën, lirinë dhe krenarinë kombëtare, duke e shndërruar shfaqjen në një udhëtim emocional për publikun. /Telegrafi/