Kryetari i Komunës së Junikut, Ruzhdi Shehu, ka vizituar punimet që po zhvillohen në rrugët “Shyt Idrizi” dhe “Ali Salihu”, në lagjen Berishë, duke theksuar se këto segmente janë pjesë kyçe e projektit për ndërtimin e Rrugës Unazore.

“Nuk ka vikend kur bëhet fjalë për transformimin e Junikut tonë. Sot isha në terren për të parë nga afër ecurinë e punimeve në rrugët ‘Shyt Idrizi’ dhe ‘Ali Salihu’, të cilat janë hallka të rëndësishme që po na çojnë drejt finalizimit të projektit madhor – ndërtimit të Rrugës Unazore”, ka deklaruar Shehu.

Ai ka theksuar se institucionet komunale janë të vendosura që punimet të vazhdojnë pa ndërprerje deri në përfundimin e plotë të projektit.

“Jemi të vendosur që të mos ndalemi asnjë ditë derisa të përfundojmë çdo detaj. Unaza e qytetit po bëhet realitet”, ka shtuar kryetari i Junikut.

Sipas Komunës së Junikut, realizimi i Rrugës Unazore do të ndikojë në përmirësimin e qarkullimit rrugor, lehtësimin e trafikut dhe zhvillimin urban të qytetit, ndërsa punimet pritet të vazhdojnë edhe në ditët në vijim. /Telegrafi/

Kryetari i Komunës së Junikut, Ruzhdi Shehu, ka dhënë sot betimin zyrtar për të nisur mandatin e tij të dytë në krye të komunës. Ceremonia solemne u mbajt në sallën e Kuvendit Komunal, në prani të përfaqësuesve institucionalë, të ftuarve dhe qytetarëve.

Shehu rifitoi drejtimin e komunës në raundin e balotazhit, duke siguruar besimin e shumicës së votuesve. Bashkë me të, edhe anëtarët e rinj të Asamblesë Komunale dhanë betimin, duke zyrtarizuar fillimin e mandatit të tyre si përfaqësues të Kuvendit.

Në fjalën e tij, kryetari Shehu u zotua për vazhdimësi në punë, transparencë dhe llogaridhënie. Ai theksoi se mandatin e dytë do ta udhëheqë në shërbim të interesit publik dhe zhvillimit të qëndrueshëm të komunës.

“Do të vazhdojmë të punojmë me përkushtim për Junikun, duke ruajtur vlerat tona dhe sjellë zhvillim të qëndrueshëm për të gjithë qytetarët”, deklaroi Shehu.

Ceremonia u përmbyll me një koktej rasti, duke krijuar atmosferë festive për nisjen e kapitullit të ri qeverisës në Komunën e Junikut. /Telegrafi/

Në komunën e Junikut, kandidati i Lidhjes Demokratike të Kosovës (LDK), Ruzhdi Shehu, ka siguruar fitore të qartë ndaj rivalit nga Aleanca për Ardhmërinë e Kosovës (AAK), Agron Kuçi në ruandin e dytë të zgjedhjeve lokale.

Sipas rezultateve preliminare të publikuara nga KQZ pas numërimit të 100% të vendvotimeve , Shehu ka marrë 55.92% të votave, që përkthehet në 1,426 vota, ndërsa Kuçi ka fituar 44.08%, ose 1,124 vota.

Në këtë mënyrë, LDK ka arritur të ruajë epërsinë në Junik, duke siguruar një fitore të qetë dhe të pastër, me një pjesëmarrje prej 52.57% nga gjithsej 4,851 votues të regjistruar.

Rezultatet e publikuara përfshijnë vetëm votat e rregullta në vendvotime dhe nuk përfshijnë ende ato me kushte apo për personat me nevoja të veçanta. /Telegrafi/

telegrafi.com

Komisioni Qendror i Zgjedhjeve është duke publikuar votat me postë.

Nga rezultatet e deri tanishme, edhe komuna e Junikut do të jetë në balotazh.

Për dallim nga votat nga vendvotimet dhe ato me post, votat me kusht dhe të personave me nevoja të veçanta ende s’janë numëruar.

Rezultatet në Junik (votat në vendvotime në Kosovë + votat me post):

Ruzhdi Shehu (LDK) 1,770 vota apo 48.86 %

Agron Kuçi (AAK) 1,413 vota apo 38.99 %

Jetmir Tofaj (VV) 423 vota apo 11.68 %

Fatos Shala (PDK) 16 vota

Lidhja Demokratike e Kosovës (LDK) dega në Junik ka reaguar lidhur me deklaratat e përfaqësuesve të AAK-së pas zgjedhjeve lokale të 12 tetorit 2025.

Sipas LDK-së, zgjedhjet në Junik janë zhvilluar pa incidente dhe në mënyrë të rregullt, dhe rezultatet preliminare tregojnë se LDK është partia e parë, duke pritur numërimin e votave të diasporës, votave me kusht dhe të personave me nevoja të veçanta.

Komunikata thekson se AAK po zhvillon një fushatë shpifëse për të justifikuar humbjen e tyre në Junik, duke akuzuar rritjen e numrit të votuesve dhe pjesëmarrjen e personave me mbiemra “të panjohur” në zgjedhje.

LDK sqaron se ndryshimi i numrit të votuesve është një proces normal, i mbështetur nga Agjencia e Regjistrimit Civil dhe KQZ, dhe se qytetarët kanë të drejtë të përditësojnë vendbanimet e tyre sipas ligjit.

Për më tepër, LDK thekson se akuzat për mbiemrat “të huaj” janë të pabazuara, duke përmendur se shumë prej tyre janë banorë të vendosur në Junik që nga paslufta dhe se edhe familjarët e kandidatëve të AAK-së kanë mbiemra atipik.

Po ashtu, PZAP ka refuzuar ankesën e AAK-së si të palejuar, duke konfirmuar ligjshmërinë e procesit zgjedhor.

LDK i bën thirrje qytetarëve të mos ndikohen nga provokimet dhe shpifjet e AAK-së dhe nënvizon se pas certifikimit të rezultateve nga KQZ, LDK do të shpallet fituese në Junik pa balotazh.

Kandidati i Lidhjes Demokratike të Kosovës për kryetar të Komunës së Junikut, Ruzhdi Shehu, ka dërguar një mesazh falënderimi dhe bashkimi për qytetarët e kësaj komune në prag të zgjedhjeve lokale.

Në një shkrim të tij, Shehu ka shprehur mirënjohje për mbështetjen e madhe që, sipas tij, e ka konfirmuar fitoren e LDK-së në Junik që në raundin e parë.

“Të dashur bashkëvendas, e dashur mërgatë e Junikut, gjithë jetën time i kam shërbyer Junikut me nder dhe përkushtim. Mirëpo për mua nuk ka krenari më të madhe sesa kur shoh bashkëvendasit e mi kaq të bashkuar rreth vizionit të LDK-së për Junikun,” ka shkruar Shehu.

Ai ka bërë të ditur se mbi 700 qytetarë morën pjesë në koktelin e falënderimit të organizuar nga dega e LDK-së në Junik, duke e quajtur këtë pjesëmarrje “konfirmim të fitores pa balotazh”.

“Për mua është emocion i veçantë kur e shoh që Juniku njëzëri e konfirmon fitoren e LDK-së. Faleminderit 113 herë për përkrahjen tuaj kaq të madhe. Përherë dhe gjithë jetën do të jem në shërbimin tuaj, me faqe të bardhë dhe zemër të hapur për Junikun tonë,” ka shtuar ai.

Në fund, Shehu ka ftuar qytetarët që pas përfundimit të procesit zgjedhor të bashkohen në një festë të madhe për fitoren e Lidhjes Demokratike të Kosovës në Junik.

Kryetari i Komunës së Junikut, Ruzhdi Shehu, ka njoftuar se dega e Lidhjes Demokratike të Kosovës (LDK) dhe ajo e Partisë Demokratike të Kosovës (PDK) në Junik kanë nënshkruar një marrëveshje për bashkëpunim politik dhe bashkëqeverisje për mandatin 2025–2029.

Përmes një postimi në “Facebook”, Shehu ka bërë të ditur se kandidati i PDK-së për kryetar të Junikut është tërhequr nga gara dhe ka vendosur ta mbështesë zyrtarisht atë si kandidat të LDK-së për kryetar komune.

Sipas marrëveshjes, strukturat e PDK-së dhe elektorati i saj do të mobilizohen për të mbështetur kandidatin e LDK-së në zgjedhjet lokale të 12 tetorit.

“Shehu e ka cilësuar këtë marrëveshje si një hap të guximshëm dhe në dobi të qytetarëve të Junikut. ‘Ky bashkim është shembulli më i mirë se si politika mund të shërbejë si urë bashkimi, jo ndarjeje’, ka shkruar ai, duke shtuar se kjo është politikë e së ardhmes – bashkë për qytetarët e Junikut.”

Në postimin e tij, Shehu ka falënderuar strukturat e PDK-së për “aktin e përgjegjshëm dhe të guximshëm” dhe ka theksuar se ky bashkim e bën të pashmangshme fitoren e LDK-së pa balotazh.

Në fund, ai ka ftuar edhe kundëkandidatët tjerë që të tërhiqen nga gara dhe të bashkohen me vizionin e përbashkët për zhvillimin, mirëqenien dhe dinjitetin e Junikut.

“Të dielën, le ta vulosim këtë bashkim historik me votën tonë. Juniku do të ecë përpara më fuqishëm se kurrë”, ka përfunduar Shehu.

Kryetari i Junikut, Ruzhdi Shehu, ka njoftuar qytetarët për një paketë të re të subvencioneve që Komuna e Junikut do të ofrojë gjatë mandatit të tij të dytë.

Në një komunikim të drejtpërdrejtë me banorët, Shehu theksoi se komuna është e qytetarëve dhe duhet të qëndrojë pranë tyre në çdo moment.

Skema e subvencioneve përfshin:

300 euro për çdo nënë lehonë për të mbështetur lindjet;

400 euro për mbulimin e shpenzimeve të procedurave të varrimit;

Mbështetje për shërbimet e pacientëve me sëmundje kronike;

Subvencionim për fermerët me pajisje moderne bujqësore;

Ofrimin e bursave për nxënës dhe studentë;

Mbështetje për organizatat joqeveritare dhe sportistët lokalë.

Kryetari Shehu gjithashtu njoftoi se në zgjedhjet e fundit Komuna e Junikut ka arritur të fitojë +4 komuna pa nevojën për balotazh.

Kryetari i Junikut, Ruzhdi Shehu, ka organizuar sot takimin përmbyllës me gratë dhe vajzat e Junikut në kuadër të fushatës për zgjedhjet komunale 2025. Në këtë takim morën pjesë mbi 200 pjesëmarrëse nga Juniku, të cilat janë votuese në komunën e tyre.

Shehu falënderoi gratë për përkrahjen e madhe dhe theksoi rolin e tyre kyç në shoqëri.

“Gruaja është shtylla e shoqërisë, potenciali dhe fuqia më e madhe që e kemi. Prandaj në mandatin tonë të dytë do të vazhdojmë me shumë projekte që në fokus do të kenë përkrahjen e rolit të gruas dhe fuqizimin e saj në vendimarrjen e Komunës së Junikut”, tha kryetari Shehu.

Ai gjithashtu shprehu mirënjohjen për pjesëmarrjen masive dhe rikujtoi përkushtimin e tij për vijimin e zhvillimit të komunës pa balotazh. “Urime të gjithve. Vazhdojmë +4 pa balotazh”, përfundoi Shehu.

Takimi është pjesë e fushatës për zgjedhjet komunale të 12 tetorit, ku Shehu synon një mandat të dytë në krye të Junikut.

Kryetari i Komunës së Junikut, Ruzhdi Shehu, ka njoftuar për përfundimin e punimeve në rrugën e bjeshkës, ndërsa ka paralajmëruar investimin e radhës në vlerë prej 500 mijë eurosh për shtrirjen e rrjetit të energjisë elektrike në zonën e bjeshkëve të Gjeravicës.

Shehu ka bërë të ditur se ky projekt është pjesë e planit të zhvillimit të turizmit dhe ekonomisë lokale, duke krijuar kushte të reja për jetesë dhe aktivitete ekonomike në zonat malore.

“Rrugën e bjeshkës e përfunduam. Po ashtu edhe Master-Plani për bjeshkët është përfunduar. Tani me radhë do të investojmë rreth gjysmë milion euro për rrjetin elektrik në bjeshkë. Në këtë mënyrë po krijohen parakushtet për zhvillimin e turizmit dhe ekonomisë në përgjithësi përmes bjeshkëve të Gjeravicës”, ka deklaruar Shehu.

Ai ka rikujtuar edhe projektet për ndriçim publik, duke thënë se gjatë mandatit të parë u vendos ndriçimi SMART për herë të parë në Junik, ndërsa në këtë mandat do të investohen mbi 200 mijë euro për ta përfunduar atë në të gjitha lagjet e qytetit.

“Urime Junik. Vazhdojmë +4 pa balotazh”, ka shtuar kryetari Shehu.

Kryetari i Komunës së Junikut, Ruzhdi Shehu, ka bërë të ditur se gjatë mandatit të dytë të tij, rinia dhe sporti do të vazhdojnë të jenë ndër prioritetet kryesore të qeverisjes lokale.

Në një postim në rrjetet sociale, Shehu ka njoftuar se komuna do të investojë rreth 130 mijë euro për ndërtimin e një fushe të hapur sportive në SHFMU “Edmond Hoxha” në Junik, projekt ky që do të realizohet sipas standardeve moderne dhe profesionale.

Po ashtu, Shehu ka paralajmëruar ndërtimin e një fushe tjetër sportive dhe një këndi lojërash për fëmijë në lagjen Berishë, me vlerë prej rreth 60 mijë eurosh.

“Këto hapësira do të jenë vendtakime të dashura për të rinjtë dhe fëmijët tanë. Të rinjtë janë prioriteti ynë, jo vetëm me fjalë, por me projekte konkrete, me ndershmëri dhe duar të pastra,” ka theksuar ai.

Kreu i Junikut ka përmbyllur mesazhin e tij me një thirrje për mbështetje në zgjedhjet e 12 tetorit, duke u shprehur i bindur në “fitoren pa balotazh”.

Kandidati për kryetar të Komunës së Junikut nga radhët e Lidhjes Demokratike të Kosovës (LDK), Ruzhdi Shehu, ka njoftuar se në mandatin e tij të dytë planifikon ndërtimin e një palestre të mbyllur sportive në këtë komunë.

Përmes një postimi publik në rrjetet sociale, Shehu ka bërë të ditur se projekti tashmë është përgatitur në detaje dhe në mandatin e ardhshëm do të kalojë në fazën e implementimit.

Sipas tij, investimi kap vlerën mbi 300 mijë euro dhe synon të ofrojë kushte moderne për rininë dhe sportistët e Junikut.

"Të dashur junikas, në mandatin e dytë do të ndërtojmë palestrën e mbyllur sportive. Për këtë projekt do të investojmë mbi 300,000 euro sepse rinia dhe sportistët e Junikut e meritojnë një palestër me standardet e fundit ndërkombëtare", ka deklaruar Shehu.

Ai ka shtuar se ky projekt është dëshmi e përkushtimit të tij ndaj zhvillimit të infrastrukturës sportive në komunë, duke e mbyllur mesazhin e tij me moton “Vazhdojmë +4 pa balotazh”. /Telegrafi/

Kandidati i LDK-së për kryetar të Junikut, Ruzhdi Shehu, ka falënderuar dhe njëkohësisht ka bërë thirrje për mobilizim të mërgatës junikase në prag të zgjedhjeve të 12 tetorit.

Në një postim në rrjetet sociale, ai ka bërë të ditur se deri tani kanë votuar me postë rreth 700 prej 1407 votuesve të regjistruar nga mërgata, duke theksuar se ky kontribut është vendimtar për të ardhmen e komunës.

“Mërgata është gjysma e zemrës së Junikut, prandaj vota juaj është e domosdoshme për të vendosur mbi fatin e Junikut në 4 vitet e ardhshme. Lusim të gjithë mërgimtarët që ende nuk kanë votuar të shfrytëzojnë votën e tyre. Vetëm kështu mund të konfirmojmë fitoren tonë më 12 tetor pa balotazh”, ka shkruar Shehu.

Ai gjithashtu ka ftuar të gjithë ata që nuk kanë arritur të regjistrohen për votim me postë, që më 12 tetor të udhëtojnë drejt Junikut për të marrë pjesë në procesin zgjedhor.

Sipas tij, mobilizimi i mërgatës është vendimtar për ta siguruar fitoren e LDK-së në këtë komunë.

Kandidati i LDK-së për kryetar të komunës së Junikut, Ruzhdi Shehu, ka bërë një premtim të ri për qytetarët, duke paralajmëruar ndërtimin e pishinës së parë gjysmë olimpike në këtë komunë.

Shehu ka theksuar se projekti, i cili pritet të kushtojë rreth 500 mijë euro, do të realizohet gjatë mandatit të dytë të tij, nëse fiton zgjedhjet e 12 tetorit.

“Ky projekt do të realizohet në përputhje me standardet e fundit ndërkombëtare. Urime të gjithëve. Pak ditë na ndajnë nga fitorja e 12 tetorit, në mënyrë që të kompletojmë transformimin e Junikut. Vazhdojmë +4 pa balotazh”, ka shkruar ai.

Pas reshjeve të borës, edhe kryetari i Komunës së Junikut, Ruzhdi Shehu ka bërë të ditur që komuna menjëherë ka mobilizuar ekipet në terren për të pastruar rrugën Junik-Gjeravicë.

Shehu përmes një postimi në rrjetin social në Facebook ka shkruar se kjo rrugë tashmë e kalueshme, duke bërë thirrje që qytetarët të kenë kujdes gjatë vozitjes.

“Bora e parë e këtij viti tanimë ka filluar që të mbuloj bjeshkët e Gjeravicës. Komuna e Junikut menjëherë ka mobilizuar ekipet e saj në terren për të pastruar rrugën Junik-Gjeravicë e cila tashmë është e kalueshme plotësisht. Megjithatë ju bëjmë apel të gjithëve për kujdes të shtuar gjatë vozitjes”, ka shkruar Shehu. /Telegrafi/

Kryetari i Komunës së Junikut, Ruzhdi Shehu, ka paralajmëruar një nga projektet më madhore që do të realizohet në këtë mandat – ndërtimin e sheshit “Edmond Hoxha” në qendër të qytetit.

Në një komunikim me qytetarët, Shehu tha se më 12 tetor Juniku do të festojë fitoren, ndërsa një ditë më pas do të nisë puna e palodhshme për zhvillimin e komunës.

“Një nga projektet e para dhe kryesore që do të realizojmë është ndërtimi i sheshit ‘Edmond Hoxha’ në qendër të Junikut me vlerë të investimit rreth 5 milionë euro. Projektin e detajuar e kemi të gatshëm dhe tanimë kemi siguruar edhe mjetet e nevojshme financiare për të realizuar këtë projekt”, u shpreh Shehu.

Ai ka uruar qytetarët e Junikut, duke theksuar se bashkë do të vazhdojnë me projekte zhvillimore dhe investime të mëdha për komunën.

Kryetari i Komunës së Junikut, Ruzhdi Shehu, ka njoftuar se projekti për asfaltimin e pothuajse të gjitha rrugëve lokale dhe rrugicave ka arritur në fazën përfundimtare, duke premtuar se shumë shpejt qyteti do të ketë infrastrukturë të plotë rrugore.

“Gjatë ditëve në vijim do të përfundohen edhe rrugët e mbetura dhe përfundimisht në Junik të gjitha rrugët lokale dhe rrugicat do të jenë të asfaltuara. Infrastruktura rrugore është parakusht për lëvizjen e njerëzve dhe mallërave, por edhe për zhvillimin ekonomik e social”, tha Shehu.

Ai shtoi se këto punë është dashur të realizoheshin shumë vite më parë, por gjatë mandatit të tij të parë ky projekt i rëndësishëm për junikasit po finalizohet.

Duke iu referuar kundërshtarëve politikë, Shehu tha se ndërsa “të tjerët po bëhen bashkë për të shkëmbyer përvoja dhe për të krijuar front të përbashkët kundër LDK-së në Junik”, ai dhe ekipi i tij do të vazhdojnë të punojnë me “ndershmëri dhe duar të pastra” për transformimin e qytetit.

“12 tetori do të jetë festë e madhe, sepse junikasit nuk do të tolerojnë interesat personale të disa individëve të dominojnë ndaj interesit të përgjithshëm të Junikut,” përfundoi Shehu.

Qendra Kryesore e Mjekësisë Familjare në Junik ka nisur punën me shërbim 24 orë në ditë, 7 ditë në javë, duke ofruar kujdes shëndetësor të pandërprerë për qytetarët.

Kryetari i Komunës së Junikut, Ruzhdi Shehu, ka bërë të ditur se tashmë QKMF-ja është e pajisur me staf profesional dhe mjete moderne, përfshirë edhe aparaturën e rentgenit, e cila deri më tani nuk ka qenë pjesë e shërbimeve shëndetësore në këtë institucion.

“QKMF në Junik sot funksionon 24/7 me staf profesional dhe pajisje profesionale duke përfshirë edhe rentgenin i cili nuk ka ekzistuar fare në QKMF. Atë që të tjerët e premtuan tri mandate, ne e realizuam në vitin e parë të mandatit tonë”, u shpreh kryetari Shehu.

Ai shtoi se ky është vetëm fillimi i projekteve që synojnë përmirësimin e shërbimeve shëndetësore dhe se puna do të vazhdojë me iniciativa të tjera në të mirë të qytetarëve të Junikut.

Kryetari i Komunës së Junikut, Ruzhdi Shehu, ka njoftuar se në mbledhjen e jashtëzakonshme të Kuvendit Komunal, e cila u mbajt sot, nuk është arritur të miratohet buxheti i komunës për vitin 2026.

Shehu ka bërë të ditur se arsyeja e mosmiratimit ishte mungesa e asambleistëve të Aleancës për Ardhmërinë e Kosovës (AAK) dhe Lëvizjes Vetëvendosje (VV), çka pamundësoi arritjen e kuorumit.

“Sot Kuvendi Komunal i Junikut ka mbajtur mbledhje të jashtëzakonshme ku pikë e vetme e rendit të ditës ka qenë miratimi i buxhetit të Junikut për vitin 2026. Asambleistët nga partitë AAK dhe VV nuk kanë qenë prezent në këtë mbledhje. Për pasojë nuk ka pasur kuorum dhe nuk është miratuar buxheti i Komunës për vitin 2026”, ka deklaruar Shehu.

Ai e cilësoi këtë veprim si paradoksal, duke thënë se këto parti publikisht japin premtime të mëdha elektorale, por në praktikë nuk kontribuojnë në realizimin e projekteve në komunë.

Në fund të deklaratës, Shehu shprehu bindjen se LDK do të shënojë fitore të madhe në zgjedhjet lokale të 12 tetorit, duke shtuar se nuk pret të ketë balotazh.

Kryetari dhe kandidati aktual i LDK-së për Junikun, Ruzhdi Shehu, ka njoftuar për përfundimin e një prej projekteve të rëndësishme infrastrukturore në komunë.

"Rruga Gaxherr–Bajraktar dhe unza e brendshme, që përfshin disa rrugë në lagjet Berisha, Qendër, Gacafer dhe Krasniq, tashmë janë ndërtuar dhe të gatshme për përdorim. Ky investim pritet të përmirësojë qarkullimin, lidhshmërinë mes lagjeve dhe kushtet e jetesës për banorët".

Shehu thekson se përmirësimi i infrastrukturës do të vazhdojë, duke mbështetur zhvillimin ekonomik dhe social të Junikut dhe duke sjellë përfitime për të gjithë komunitetin.