PRISHTINË, 17 shkurt/ATSH/- Mijëra qytetarë nga të gjitha trojet shqiptare janë mbledhur sot në sheshin “Skënderbeu” në Prishtinës në mbështetje të ish-krerëve të Ushtrisë Çlirimtare të Kosovës të cilët po mbahen të paraburgosur në Hagë nga nëntori i 2020,  Hashim Thaçi, Kadri Veseli, Jakup Krasniqi e Rexhep Selimi.

Me pankartat në duar “Liria ka Emër”, “Historia nuk mund të rishkruhet”, “Liri në emër të popullit” shqiptarët kërkuan drejtësi për ish-udhëheqësit e Ushtrisë Çlirimtare të Kosovës.

Në protestën “Drejtësi, jo politik” e organizuar nga “Liria ka Emër” kanë marrë pjesë edhe krerët e shtetit. E pranishme ishte presidentja e Kosovës, Vjosa Osmani, kreu i BDI-së, Ali Ahmeti dhe kreut të Grupit të PS, Taulant Balla.

Balla vazhdimisht ka bërë thirrje për mbështetje dhe ka ngritur zërin kundër padrejtësisë historike që po bëhet në Dhomat e Specializuara për Kosovën në Hagë.

Pak ditë më parë, Balla ishte edhe nismëtari i kërkesës që Kuvendi i Shqipërisë të hartonte dhe votonte një rezolutë zyrtare në mbrojtje të ish-komandantëve të UÇK-së, e cila u miratua të enjten e kaluar nga e majta dhe e djathta së bashku me 92 vota pro.

Ndërsa familjarët e ish-krerëve të Ushtrisë Çlirimtare të Kosovës po ndjekin nga Haga marshin “Drejtësi, Jo Politikë”. Vëllezërit dhe nipat e Thaçit, djali i Jakup Krasniqit dhe familjarë të tjerë po e ndjekin drejtpërdrejt nga televizioni bashkë në Hagë këtë protestë në Prishtinë.

Përfaqësuesi i nismës “Liria ka Emër”, Ismail Tasholli tha gjatë fjalës së tij në këtë tubim se “qytetarët duan drejtësi dhe jo politikë dhe sot në këtë ditë ne dërgojmë një mesazh të veçantë për ata që gjenden në Hagë, Hashim Thaçi, Kadri Veseli, Jakup Krasniqi, Rexhep Selimi dhe të tjerë… Ju nuk jeni vetëm, pas jush qëndron një komb i tërë. Pas jush qëndron sakrifica, liria jonë”.

Tasholli nënvizoi se nëse drejtësia devijon nga parimet e barazisë, atëherë nuk mund të quhet më e tillë. “Drejtësia nuk mund të jetë selektive apo e dirigjuar, por transparante dhe e drejtë për të gjithë”, u shpreh ai duke shtuar se “ky është fillimi, nuk do të ndalemi kurrë”.

“UÇK nuk lindi për të marr tokën e vet. Lindi për ta mbrojtur shtëpinë e vet. Nuk lindin për dominim, por për liri. Kjo është e vërteta historike që nuk mund të relativizohet kurrë. Thirrjet tona për drejtësi e jo politikë nuk janë kundër askujt. Janë për dinjitetin kolektiv. Ne nuk mund të pranojmë që proceset që zhvillohen në emër të popullit të Kosovës të përdoren për të barazuar agresorin me viktimën apo për të mjegulluar karakterin çlirimtar të luftës sonë. Nëse drejtësia devijon nga parimet e pabarazisë dhe paanshmërisë dhe kur gjyqi në Hagë thirret edhe vepron në emër të popullit të Kosovës ne këtu drejt i themi qartë jo në emrin tonë, jo në emrin tonë”, tha ai.

Në protestë e ka marrë fjalën edhe e mbijetuara e dhunës seksuale gjatë luftës, Vasfije Krasniqi-Goodman.

Ajo tha se “Hashim Thaçi, Kadri Veseli, Jakup Krasniqi dhe Rexhep Selimi duhet të lirohen. Ata e mbrojtën popullin e vet si gjithë Ushtria Çlirimtare e Kosovës”.

“Nëse doni me ditë se çfarë i bashkon shqiptarët, është cenimi i lirisë dhe padrejtësia. Faleminderit të gjithë juve që i shërbyet atdheut kur më së shumti kishte nevojë”, u shpreh ajo.

Muhamer Ibrahimi, ish-luftëtari i UÇK-së tha se “kur unë dizajnova flamurin dhe u ngrit më 17 shkurt 2008, nuk pash vetëm një simbol të shtetit, pash fytyrat e atyre që nuk jetuan dhe nuk u kthyen ta shohin atë ditë”.

Ai tha se në atë flamur pa sakrificën, dhimbjen dhe krenarinë kombëtare.

Ibrahimi tha para pjesëmarrësve në këtë tubim se “po kërkojmë që historia jonë që të mos rishkruhet dhe të mos shtrembërohet”.

“UÇK ishte mburojë për fëmijë, gra e pleq. Ishte mburojë për pragun e shtëpisë, ishte përgjigja e fundit e një populli që kanosej me zhdukje. E sot kur e shoh këtë det njerëzish, e di që ata në Hagë nuk janë vetëm. Pas tyre qëndron populli”, u shpreh ish-luftëtari i UÇK-së.

Një ndër luftëtaret e para të UÇK-së, Shqipe Krasniqi, ka theksuar se gjykimi i ish-krerëve të UÇK-së në Hagë po prek drejtpërdrejt kujtesën dhe sakrificën e luftës për liri.

Ajo deklaroi se në Ditën e Pavarësisë qytetarët nuk janë mbledhur vetëm për festë, por për të kujtuar çmimin e madh të lirisë dhe për të mbështetur bashkëluftëtarët që po përballen me drejtësinë ndërkombëtare.

“Jam njëra nga mijëra gra që kanë pa luftën me sytë e tyre. Jam rritur në një kohë kur të qenit shqiptare në Kosovë nënkuptonte të jetoje me frikë, kufizime, me padrejtësi të përditshme. Kam parë prindër të larguar nga puna, profesor të përjashtuar, studentë të ndjekur, familje të tëra të poshtëruara vetëm pse ishin shqiptarë. Kam parë baballarë të përulur, nëna që qanin fshehurazi që fëmijët të mos ua shihnin lotët. Kam parë rininë tonë të rritet pa të drejta, por gjithmonë me krenari. Por, mbi të gjitha kam parë gruan shqiptare, nëna që ndanin kafshatën me fëmijët e tyre, duke pa motra që bëheshin edhe nëna, baballarë, kur në shtëpitë e tyre mbeteshin pa burra. Kam parë gra që përcillnin bijtë në luftë me zemër të copëtuar, por me kokën lartë, ato nuk kishin uniformë, por, kishin forcë, ato nuk mbanin armë, por mbanin gjallë shpresën. Ato nuk dolën në histori me tituj, por historia nuk do të ekzistonte pa to. Pikërisht atëherë, edhe unë e kam kuptuar se heshtja është dorëzim dhe ky popull nuk di të dorëzohet”, ka theksuar Krasniqi.

Ajo tha se padrejtësia ndaj ish-udhëheqësve të luftës i dhemb gjithë shoqërisë, pasi sipas saj, cenon sakrificën e bërë për çlirimin e vendit.

Sipas Krasniqit, ballafaqimi me drejtësinë është pjesë e shtetndërtimit, por drejtësia duhet të jetë e pavarur dhe e bazuar në faktet dhe rrethanat e kohës së luftës.

Çlirim Haziri, djali i Xhavit Hazirit tha se nuk do të lejojnë që sakrifica të barazohet me faj dhe se nuk do t’i lënë vetëm heronjtë në Hagë.

“Ata që luftuan për këtë tokë, nuk kërkuan pushtet, por kërkuan liri dhe liria nuk vjen në bankën e turpit. Lufta e UÇK-së, ishte luftë për mbijetesë dinjitet të kombit”, deklaroi Haziri.

The post Mijëra shqiptarë bëhen bashkë në Prishtinë në mbështetje të ish-krerëve të UÇK-së appeared first on Agjencia Telegrafike Shqiptare.

PRISHTINË, 17 shkurt/ATSH/ Kuvendi Komunal i Mitrovicës së Jugut ka mbajtur sot një seancë solemne me rastin e 18-vjetorit të shpalljes së Pavarësisë së Kosovës, ku u vlerësua lart sakrifica shekullore e popullit shqiptar për liri dhe shtetësi.

Kryetari i komunës, Faton Peci, tha se 17 Shkurti përfaqëson sublimimin e sakrificës gjithëpopullore ndër shekuj dhe jetëzimin e aspiratës shqiptare për liri.

Ai theksoi se luftërat e popullit shqiptar asnjëherë nuk kanë qenë pushtuese, por vetëm çlirimtare, duke nderuar luftëtarët, dëshmorët dhe viktimat civile që u flijuan për lirinë e Kosovës.

“Asnjëherë aspirata jonë si popull nuk ka qenë pushtuese, luftërat ndër shekuj kanë qenë vetëm për të përjetësuar lirinë. Ne kujtojmë me përulësi çdo qytetar që ka dhënë angazhim dhe kontribut për Kosovën e pavarur. Sot i përkulemi çdo luftëtari, nderojmë secilën viktimë civile – gra e fëmijë, pleq e plaka – të cilët u sakrifikuan dhe thirrën ndërgjegjen ndërkombëtare për lirinë e Kosovës. Ne sot duhet të jemi më të bashkuar se kurrë sepse angazhimi, përpjekja, mundi, djersa dhe gjaku i rënë ndër shekuj nuk kanë pasur ngjyrim politik”, tha ai.

Kryesuesi i Kuvendit Komunal, Safet Kamberi, vlerësoi se Pavarësia e Kosovës është rezultat i një përpjekjeje të përbashkët të veprimit politik dhe sakrificës së armatosur, duke përmendur figurat e presidentit historik Ibrahim Rugova dhe komandantit Adem Jashari si simbole të shtetformimit dhe qëndresës kombëtare.

Në emër të PDK-së, asamblisti Shkëlqim Ibrahimi përmendi figurat kryesore të procesit të çlirimit dhe shtetformimit, duke theksuar se ish-krerët e UÇK-së po përballen me një proces të padrejtë gjyqësor në Hagë.

Ai tha se lufta e UÇK-së ishte e drejtë dhe e pastër dhe se e vërteta do të triumfojë.

Seanca solemne u përmbyll me thirrje për unitet, përkushtim ndaj vlerave të shtetit dhe nderim të përhershëm për sakrificën e dëshmorëve dhe martirëve të lirisë. /KosovaPress/

The post Mitrovica e Jugut seancë solemne për 18-vjetorin e Pavarësisë: Lufta e UÇK-së ishte e drejtë appeared first on Agjencia Telegrafike Shqiptare.

PRISHTINË, 17 shkurt/ATSH/- Kryeministri Albin Kurti tha gjatë ceremonisë se parakalimit të Forcës së Sigurisë së Kosovës (FSK) dhe Policisë se në këtë ditë feste nuk i mbyllin sytë para padrejtësive që po kalojnë krerët e UÇK-së në Hagë.

Kurti shprehu besimin në drejtësi, por nuk pranojnë që ta rishkruajnë historinë  e vendit.

Ai theksoi se Kosova lindi si shtet nga rezistenca paqësore, lufta çlirimtare dhe ndërhyrja ndërkombëtare.

“Por, liria e Kosovës nuk filloi atë ditë para 18 vitesh. Liria e Kosovës është ngjizur shumë më herët me përpjekjet e pareshtur ndër breza me qëndresë dhe me luftën e drejtë të UÇK-së e cila bashkë me bombardimet e NATO-s kundër Jugosllavisë së Millosheviçit, i dha fund një regjimi shtypës dhe i hapi rrugë shtetësisë sonë. Sot, përkulemi para dëshmorëve të kombit dhe të rënëve për lirinë tonë”, tha Kurti.

Ai shtoi se ata nuk janë vetëm pjesë e historisë, ata janë themelet e Republikës.

“Në këtë ditë feste nuk i mbyllim sytë para padrejtësive, disa nga drejtuesit e luftës tonë çlirimtare po vazhdojnë të mbahen në paraburgime të stërzgjatura në Hagë në procese gjyqësore jo transparente dhe krerët të pashembullta për praktikat e drejtësisë ndërkombëtare. Ne besojmë në drejtësi, por nuk pranojmë ta revidojmë dhe rishkruajmë historinë. Lufta e UÇK-së ishte luftë e kulluar çlirimtare dhe antikolonialiste, një luftë e drejtë e popullit të okupuar dhe të shtypur nën aparteitit dhe kjo është një e vërtetë që nuk mund të ndryshohet”, tha ai.

Kreu i ekzekutivit u ndal edhe te investimet që janë bërë në ushtri. Ai tha se Forca e Sigurisë së Kosovës është ushtri e gatshme për të mbrojtur sovranitetin dhe integritetin territorial.

“Kosova e vitit 2026 është një shtet më i fortë dhe më i sigurt se kurdo më parë gjatë këtyre 18 viteve të pavarësisë. Kjo fal angazhimit të secilit zyrtar institucional e qytetar patriot me vendime të duhura dhe me investimet konkrete. Në vitet e fundit shpenzimet për ushtrinë janë shumëfishuar numri i pjesëtarëve të FSK është dyfishuar me rekrutimin e gjeneratave të reja të kadetëve të ushtarëve mes tyre edhe numri i pjesëtarëve gra që tashmë është prioritet i shpallur shtetëror për FSK. Investimi për blerje dhe pajisjeve është mbi 450 milionë euro investime këto të drejtpërdrejta në armatim modern, mjete ushtarake, municion të mjaftueshëm dhe sisteme të komunikimit… FSK sot po zhvillohet si një ushtri profesionale dhe e ndërveprueshme me aleatët tanë, e  gatshme për të mbrojtur sovranitetin tonë shtetëror integritetin tonë territorial  dhe jetën e qytetarëve të Kosovës”, tha Kryeministri i Kosovës.

Kurti deklaroi se parada e sotme nuk është demonstrim force përballë dikujt, por dëshmi e modernizimit dhe pjekurisë së shtetit.

“Parada e sotme është dëshmi e aftësisë sonë për të mbrojtur vetën dhe për të kontribuar në paqen rajonale dhe botërore… Mesazhi jonë është i qartë Kosova është e lirë dhe do të jetë, Kosova është demokratike dhe do të jetë, Kosova është sovrane dhe do të jetë”, u shpreh Kurti.

Parakalimin e trupave të Forcës së Sigurisë së Kosovës dhe Policisë e ndoqën nga afër përfaqësues të trupit diplomatik dhe përfaqësues institucional vendor./KosovaPress/

The post Kurti: Nuk pranojmë të rishkruajmë historinë, lufta e UÇK-së ishte çlirimtare appeared first on Agjencia Telegrafike Shqiptare.

PRISHTINË, 17 shkurt/ATSH/- Ambasadori i Gjermanisë në Kosovë, Rainer Rudolph përcolli mesazhin e urimit në 18-vjetorin e Pavarësisë së Kosovës.

“Nga Berlini në Prishtinë – festojmë së bashku”, shprehet diplomati gjerman.

Ai thekson se “Gjermania dhe Kosova ndajnë një partneritet të fortë të bazuar në demokraci dhe respekt. Afërsisht 600,000 kosovarë në Gjermani mbajnë lidhjen tonë të gjallë çdo ditë”.

Ambasadori Rudolph thekson se në moshën 18-vjeçare, Kosova qëndron si një histori suksesi.

“Të shkojmë drejt kapitullit tjetër! Gëzuar Ditën e Pavarësisë!”, shprehet ambasadori gjerman.

The post Ambasadori gjerman: Kosova 18-vjeçare, histori suksesi appeared first on Agjencia Telegrafike Shqiptare.

PRISHTINË, 17 shkurt/ATSH/- Kryeministri i Kosovës, Albin Kurti në mbledhjen solemne të Qeverisë së Kosovës për 18-vjetorin e Kosovës, tha se në këtë ditë feste dhe reflektimi, nuk mund të mos kujtohen se përfaqësuesit që morën pjesë në shpalljen e pavarësisë së Republikës, sot mbahen padrejtësisht në Hagë.

Kurti thekson se kontributi i secilit prej tyre për lirinë dhe pavarësinë e vendit është i çmuar dhe historia do të jetë ajo e cila do ta bëjë gjykimin e drejtë.

“Nderojmë qëndresën dhe sakrificën e popullit, nderojmë heronjtë dhe veprimtarët e rënë ndër shekuj, rezistencën paqësore dhe kryengritjet e armatosura pas Luftës së Dytë Botërore, që kulmuan me luftën e Ushtrisë Çlirimtare të Kosovës. Sot pavarësia jonë mbush 18 vjet. Mbase një moshë e re për shtetin, por një kapitull i rëndësishëm në rrugëtimin tonë të gjatë si popull. Vërtet shteti, pavarësia dhe kushtetuta jonë është e re, por gjuha, kultura dhe populli ynë janë të lashtë. Secili qytetar pavarësisht gjuhës apo etnisë, fesë apo prejardhjes, është i barabartë para ligjit”, tha ai.

Ai kujtoi se ish-krerët e UÇK-ë po mbahen padrejtësisht në Hagë.

“Në këto 18 vite kemi arritur shumë si shtet dhe si shoqëri. Nga ditët e para të njohjeve ndërkombëtare, të cilat tani numërojnë 121 sosh, e deri te konsolidimi i institucioneve demokratike dhe sundimit të ligjit. Nga ndërtimi i një ekonomie të qëndrueshme e në rritje, te forcimi i ushtrisë sonë dhe i kapaciteteve mbrojtëse. Nga fitoret ndërkombëtare në sport, art e kulturë, te pjesëmarrja në forume botërore. Nga lëvizja e lirë pa viza, te hapat konkretë drejt integrimit evropian, përfshirë aplikimin në Bashkimin Evropian dhe në Këshillin e Evropës, të cilat janë arritje që na bëjnë krenarë të gjithë. Në këtë ditë feste dhe reflektimi, nuk mund të mos kujtoj se përfaqësuesit që morën pjesë në shpalljen e pavarësisë së republikës sonë, sot mbahen padrejtësisht në Hagë. Kontributi i secilit prej tyre për lirinë dhe pavarësinë është i çmuar dhe historia do të jetë ajo e cila do ta bëjë gjykimin e drejtë”, shtoi Kurti. /KosovaPress/

The post Kurti: Përfaqësuesit e shpalljes së pavarësisë sot po mbahen padrejtësisht në Hagë appeared first on Agjencia Telegrafike Shqiptare.

TIRANË, 17 shkurt/ATSH/- Sekretari amerikan i Shtetit, Marco Rubio ka uruar sot 18-vjetorin e Pavarësisë së Kosovës.

Në mesazhin e publikuar në faqen zyrtare të Departamentit të Shtetit, Rubio shkruan se: “Shtetet e Bashkuara mbeten të palëkundura në mbështetjen për sovranitetin dhe integritetin territorial të Kosovës, dhe mezi presim të zgjerojmë lidhjet ekonomike që do të rrisin prosperitetin e të dy kombeve tona”.

Rubio vlerëson mbështetjen e Kosovës për përpjekjet e SHBA-së për t’u përballur me sfidat globale.

Ai thekson se mirëpresim udhëheqjen e saj si Anëtare Themeluese e Bordit të Paqes.

“Ndërsa Kosova shënon këtë përvjetor të rëndësishëm, mezi presim një bashkëpunim edhe më të fortë në vitet në vijim. Shtetet e Bashkuara qëndrojnë me Kosovën ndërsa ajo vazhdon të ndërtojë një të ardhme të sigurt dhe të begatë”, shprehet Rubio.

The post Rubio: Shtetet e Bashkuara mbeten të palëkundura në mbështetje të Kosovës appeared first on Agjencia Telegrafike Shqiptare.

PRISHTINË, 17 shkurt/ATSH/- Presidentja e Kosovës, Vjosa Osmani ka uruar qytetarët për 18-vjetorin e pavarësisë.

Gjatë homazheve të zhvilluar sot te Monumenti i të Pagjeturve në sheshin “Ibrahim Rugova” në Prishtinë, Osmani tha se shumë breza sakrifikuan jetën e tyre që sot qytetarët e saj e gëzojnë lirinë.

“I uroj të gjithë qytetarët e Republikës së Kosovës për 18-vjetorin e Pavarësisë së shtetit tonë sovran dhe të pavarur. Është një ditë ku të gjithë bëhemi bashkë. Në radhë të parë për të festuar këtë përvjetor të shtetit tonë të ri, i cili tashmë po hyn në moshë të pjekurisë, dhe në të njëjtën kohë bëhemi bashkë për të përkujtuar të gjithë ata që sakrifikuan gjithçka që ne sot ta gëzojmë shtetin. Natyrisht që sakrifica për të arritur deri këtu ka qenë shekullore”, theksoi ajo.

Kryetarja e Shtetit tha se “shpeshherë ne fokusohemi te vitet e fundit, 80-ta e 90-ta, por në fakt kanë qenë breza të tërë që kanë dhënë gjithçka në mënyrë që ne sot ta gëzojmë shtetin e pavarur të Kosovës”.

“Shprehim respektin më të thellë për rrugën dhe kontributin e presidentit tonë historik, atit themeltar dhe arkitektit të pavarësisë së Kosovës, Ibrahim Rugova, mbi sakrificën e familjes Jashari, në krye me komandantin Adem Jashari, për mijëra dëshmorë, heronj të UÇK-së, për të gjithë ata që dhanë jetën, dhanë mundin dhe bënë sakrificë në mënyrë që të gjithë së bashku t’i gëzohemi shtetit tonë. Natyrisht që është kjo sakrificë që ka trasuar rrugën tonë përpara, për forcimin e shtetit tonë drejt rrugës euroatlantike, në këtë familje ku ne gjithmonë e kemi pasur vendin”, tha presidentja Osmani.

The post Osmani: 18 vjet pavarësi, shtet e dinjitet. Së bashku për Kosovën tonë appeared first on Agjencia Telegrafike Shqiptare.

PRISHTINË, 16 shkurt/ATSH/ Libri “Kur heshtja flet” i ish-diplomatit, Ahmet Shala që u promovua sot në Prishrtinë i kushtohet gjykimit në Hagë ndaj ish-drejtuesve të UÇK-së dhe padrejtësive me të cilat ata janë përballur gjatë këtij procesit prej mëse pesë vitesh.

Në ceremoninë e promovimit merrnin pjesë Presidentja e Kosovës, Vjosa Osmani, Kryeministri Edi Rama, ministri i Mbrojtjes i Kosovës, Ejup Maqedonci, kreu i BDI-së, Ali Ahmeti dhe shumë të ftuar të tjerë.

Autori Ahmet Shala tha se librin e shkroi si një qytetar, që ka parë, ka dëgjuar, ka përjetuar vetë dhimbjen që nuk shuhet – drejtësinë e vonuar.

“Ky libër nuk lindi për të qenë thjeshtë një botim, lindi si nevojë e shpirtit tim, si një ndjenjë e thellë gjatë e ndrydhur dhe si një zë që shpërtheu fare spontanisht. Nuk shkrova si akademik, por si një njeri i thjeshtë i këtij vendi. Shkrova si një qytetar, qe ka parë, ka dëgjuar dhe ka përjetuar vetë dhimbjen që nuk shuhet, drejtësinë e vonuar. Flasin ata qe sot prehen në parajsë. Janë aty ku nuk duhet të ishin, heshtja i ka rënduar më shumë se çdo fjalë, heshtja jonë. Historia e Kosovës nuk ndahet në kapituj, sikurse historitë e botës. Është një e vetme, e pashkëputur”, u shpreh Shala.

Ndërsa, presidentja e Kosovës Vjosa Osmani, tha se historia e vendit duhet të mbrohet në çdo vend e kohë dhe për ta mbrojtur duhet të shkruhet, siç ka bërë Ahmet Shala.

“Liria ishte më e shtrenjtë sesa vetë jeta. Këtë histori e të vërtetë ne duhet ta mbrojmë me krenari në çdo kohë e vend, kudo në botë, sepse UÇK-ja është ideali më i fuqishëm i ndërtuar nga shqiptarët ndër shekuj. Për ta mbrojtur të vërtetën ne duhet ta shkruajmë atë. Historia nuk flet domosdo gjithmonë me zë të lartë. Ai na sjellë përballë të vërtetën e Hagës, takimet me ish-udhëheqësit e UÇK-së dhe vizitat duke kthyer heshtjen në zë të fuqishëm. Ky libër trajton jo vetëm rrëfimin personal të Shalës, por edhe gjykimin e padrejtë që po bëhet ndaj vetë proceseve tona jetike. Në libër përshkruhen pasojat e luftës nga masakra të shumta, plagë që koha nuk i shëron”, tha presidentja Osmani.

Ministri i Mbrojtjes i Kosovës, Ejup Maqedonci, tha se karakteri i luftës së UÇK-së ishin arsye pse vendet që përfaqësojnë vlerat demokratike mbështetën luftën e drejtë të popullit tonë për liri.

“Është një libër që synon të ruajë historinë tonë nga tentativa për ta rishkruar atë. Jam i bindur se asnjë proces gjyqësor dhe asnjë tentativë për të dënuar muk do arrijë të bëj dhe as të ndryshojë natyrën e luftës sonë. Do të mbetet humane, e drejtë dhe e pastër, kurse karakteri i luftës sonë do të mbetet gjithmonë çlirimtare. Karakteri i luftës sonë ishin arsyej pse vendet që përfaqësojnë vlerat demokratike mbështetën luftën e drejtë të popullit tonë për liri. Qëndrojmë me shpresë se do t’i kemi së shpejti drejtuesit e UÇK-SË në mesin tonë”, shtoi Maqedonci.

Kryetari i BDI-së në Maqedoni të Veriut, Ali Ahmeti tha se do të veprohet guximshëm për të vërtetën.

“Ti kishe përnetuar me humbjen e njerëzve më të dashur të gjakut tënd dhe flisje po ashtu me dhembshuri edhe për familjet e të rënëve të Kosovës dhe familjet e çlirimtarëve që padrejtësisht janë në pranga vetëm e vetëm se luftuan për liri dhe dinjitet të kombit që ata i takonin.. Të gjithë e dimë se këtu po bëhet një gjyq i padrejtë, akuza për vepra të pabëra vetëm e vetëm se ishin atdhetarë çlirimtarë dhe organizatorë për rezistencë e luftë. Ne nuk do thyhemi, ashtu siç nuk thyhen edhe familjet e shokëve tanë, bashkëluftëtarëve tanë, të cilët gjenden në Hagë. Ne do të veprojmë, guximshëm për të vërtetën”, shtoi ai. /Kosovapress/

The post Libri “Kur heshtja flet”, për padrejtësitë e gjykimit ndaj ish-drejtuesve të UÇK-së në Hagë appeared first on Agjencia Telegrafike Shqiptare.

TIRANË, 14 shkurt/ATSH/- Një delegacion prej nëntë anëtarësh të Parlamentit Evropian do të zhvillojnë një vizitë zyrtare në Tiranë dhe Podgoricë në kuadër të procesit të integrimit të dy vendeve në BE.

Në njoftimin zyrtar publikuar në faqen e Parlamentit Evropian bëhet me dije se Komitetit për Punët e Jashtme (AFET) do të vizitojë Podgoricën dhe Tiranën nga 16 deri më 18 shkurt, i kryesuar nga Kryetari i Komitetit, David McAllister (PPE, Gjermani).

Vizita do t’u mundësojë eurodeputetëve të vlerësojnë gjendjen aktuale të negociatave të pranimit dhe prioritetet e reformave të pazgjidhura në secilin vend dhe të riafirmojnë angazhimin e Parlamentit për t’i mbështetur ata në rrugën e tyre evropiane.

Gjatë vizitës, anëtarët e AFET do të bëjnë një vlerësim të negociatave në vazhdim dhe do të angazhohen me qeveritë dhe parlamentet në Mal të Zi dhe Shqipëri se si mund t’i përmbushin më së miri objektivat e tyre ambicioze dhe të adresojnë reformat e pazgjidhura, veçanërisht në grupin “themele”.

Eurodeputetët do të takohen gjithashtu me ambasadorët e shteteve anëtare të BE-së, si dhe përfaqësues të shoqërisë civile. Vizita do të kontribuojë gjithashtu në punën e Komitetit mbi raportet e ardhshme të vendit për Malin e Zi dhe Shqipërinë.

Mali i Zi dhe Shqipëria janë pararojë në procesin e anëtarësimit. Mali i Zi ka mbyllur përkohësisht 13 kapituj negociues ndërsa Shqipëria ka hapur të gjithë kapitujt e negociatave dhe është në pritje për mbylljen e tyre.

The post McAllister dhe 8 eurodeputetë javën e ardhshme në Tiranë, mbështetje për integrimin në BE appeared first on Agjencia Telegrafike Shqiptare.

PRISHTINË, 14 shkurt/ ATSH/ Në kuadër të aktiviteteve për shënimin e Ditës së Pavarësisë së Kosovës, po mbahet edicioni i 18-të i garës tradicionale “Kupa e Pavarësisë”, një nga ngjarjet më të rëndësishme në kalendarin e sportit të shenjëtarisë në vend.

Kjo garë e organizuar nga Federata e Shenjëtarisë Sportive e Kosovës, ka mbledhur rreth 60 sportistë nga Kosova, Shqipëria dhe Maqedonia e Veriut.

Presidenti i Federatës së Shenjëtarisë në Kosovë (FSHK-së), Gëzim Hazrolli tha për KosovaPress, se gara “Kupa e Pavarësisë” është e fokusuar në disiplinat pushkë standarde dhe pistoletë standarde.

Hazrolli shtoi se kjo garë mbledh të gjithë sportistët më cilësorë të kategorisë absolute të ndarë në gjini. Ai thotë se gara organizohet nga Federata e Shenjëtarisë së Kosovës, ndërsa sportistët pjesëmarrës shpërblehen me medalje.

Ndërsa, presidenti i Federatës Shqiptare të Qitjes Sportive në Shqipëri, Stefan Rrufa, për KosovaPress tha se kjo garë tashmë është bërë traditë.

Drilon Ibrahimi, sportist edhe në garat e Lojërave Olimpike në Japoni, tha se është një emocion i veçantë marrja pjesë me garën Kupa e Pavarësisë, duke qenë se realizohet për ndër të ditës së Pavarësisë.

Ai në këtë sport luan në kategorinë e senior me pushkë standarde dhe nga gara “Kupa e Pavarësisë” pret të thyej edhe rekordin personal.

“Përgatitja si çdo sport duhet përgatitje ekstreme, sidomos para garave e kemi kur e shtojmë intensitetin e ushtrimeve për të marrë rezultate më të larta por edhe pas garës për të mos pasur rënie në rezultat…06:46… Unë jam me pushkë standarde në kategorinë senior, pra kategoria më e lartë…07:30.. Në këtë garë pres të kem rezultatin më të mirë që e kam pas ndonjëherë, të thyej edhe rekordin personal”, shtoi ai.

Në këtë edicion të 18-të të Garës “Kupa e Pavarësisë”, të ftuar kryesorë janë Federata e Qitjes Sportive e Maqedonisë së Veriut dhe Federata Shqiptare e Qitjes.

“Kupa Pavarësia” është një nga aktivitetet më të rëndësishme vjetore në kalendarin e FSHSK-së, duke mbledhur sportistë dhe klube nga mbarë vendi.

Ky aktivitet synon promovimin e profesionalizmit, korrektësisë sportive dhe zhvillimin e vazhdueshëm të sportit të shenjëtarisë në Kosovë.

The post “Kupa e Pavarësisë” mbledh 60 sportistë nga Kosova, Shqipëria dhe Maqedonia e Veriut appeared first on Agjencia Telegrafike Shqiptare.

PRISHTINË, 14 shkurt/ATSH/- Në Çikago, për nder të 18-vjetorit të Pavarësisë së Kosovës, në mënyrë solemne është ngritur flamuri i Kosovës përkrah flamurit të Shteteve të Bashkuara të Amerikës (SHBA) dhe atij të qytetit të Çikagos.

Në këtë ceremoni morën pjesë përfaqësues të Konsullatës së Kosovës, komuniteti shqiptar dhe bashkatdhetarë të shumtë në Çikago.

Drejtuesi i Konsullatës, Drilon Zogaj, dhe Sekretari i Parë, Fatmir Rrahmanaj, falënderuan drejtuesit e Albanian Community of Illinois dhe Shoqata Dardania për përkushtimin e tyre të vazhdueshëm ndaj Kosovës dhe bashkatdhetarëve në Illinois.

The post Flamuri i Kosovës ngrihet në Çikago në 18 vjetorin e Pavarësisë appeared first on Agjencia Telegrafike Shqiptare.

TIRANË, 14 shkurt/ATSH/- Zëvendëssekretarja e Përgjithshme e NATO-s, Radmila Shekerinska i është përgjigjur interesit të medieve lidhur me bashkëpunimin mes Kosovës, Shqipërisë dhe Kroacisë si dhe paralajmërimin për mbajtjen e një stërvitjeje të përbashkët mes tre vendeve.

Në një intervistë për agjencinë Beta në Bruksel ku dhe u mbajt takimi i Ministrave të Mbrojtjes të vendeve anëtare të NATO-s, Shekerinska tha se “Shqipëria dhe Kroacia nuk janë vetëm aleatë të besueshëm dhe të vlefshëm brenda Aleancës. Ato janë gjithashtu kontribuese të rëndësishme për paqen dhe stabilitetin në rajon. Ato janë të pranishme në KFOR, por në përgjithësi janë shumë të përqendruara në mbështetjen e kësaj agjende në rajon”.

Shekerinska shtoi se NATO nuk ka marrë pjesë në diskutime apo konsultime për deklaratën e nënshkruar nga Prishtina, Tirana dhe Zagrebi, por anëtarësimi në Aleancë nuk i parandalon shtetet që të kenë marrëveshje shtesë të mbrojtjes me palë të treta.

“Ajo që shohim në përgjithësi është se, sigurisht, situata gjeopolitike globale ka ndikuar edhe në rajon. Ju shihni më shumë stërvitje, më shumë investime në mbrojtje dhe siguri, por ne gjithmonë i ftojmë aleatët dhe partnerët të angazhohen gjithashtu në dialogun politik dhe zgjidhjen e çështjeve të mbetura në rajon. Prania jonë në Ballkanin Perëndimor synon të mbështesë këtë lloj dialogu politik”, tha zëvendëssekretarja e Përgjithshme e NATO-s.

Shqipëria, Kroacia dhe Kosova kanë nënshkruar marsin e vitit të kaluar në Tiranë një deklaratë për bashkëpunim në fushën e sigurisë dhe mbrojtjes. “Deklarata e Përbashkët e Bashkëpunimit në fushën e Mbrojtjes” u firmos nga ministri i Mbrojtjes i Shqipërisë, Pirro Vengu, zëvendëskryeministri dhe ministri i Mbrojtjes i Kroacisë, Ivan Anušić, dhe ministri i Mbrojtjes i Kosovës, Ejup Maqedonci.

Bashkëpunimi synon forcimin e aftësive mbrojtëse të tri vendeve, zhvillimin e industrisë dhe teknologjisë së Mbrojtjes, si dhe përmirësimin e ndërveprimit ushtarak në rajon. Ky zhvillim strategjik pasqyron aleancën e ngushtë mes tri shteteve, të lidhura nga historia, sakrificat për liri dhe një vizion i përbashkët për një të ardhme të sigurt. Gjithashtu, Shqipëria dhe Kroacia do të punojnë ngushtësisht për unifikimin e qëndrimeve politike në mbështetje të aspiratave të qytetarëve të Kosovës për integrim të plotë në strukturat rajonale dhe euroatlantike.

Zyrtarët e mbrojtjes të këtyre tri shteteve janë takuar dy herë gjatë këtij muaji për zbatimin e kësaj Deklarate dhe kanë paralajmëruar se gjatë këtij viti do të zhvillojnë një stërvitje të përbashkët.

The post NATO për bashkëpunimin Shqipëri-Kroaci-Kosovë: Mbështesim dialogun për zgjidhjen e çështjeve të mbetura në rajon appeared first on Agjencia Telegrafike Shqiptare.

PRISHTINË, 14 shkurt/ATSH Ambasada e Kosovës në Uashington bën të ditur se kryetarja e Kryeqendrës së Shteteve të Bashkuara të Amerikës (SHBA), Muriel Bowser, ka vendosur që të shpall 17 Shkurtin, ditën e Pavarësisë së Kosovës, si datë zyrtare në Uashington.

Ambasada e Kosovës bën të ditur se në vendimin e saj, Bowser thotë se kjo është si rezultat i përparimit të madh që Kosova ka shënuar për mbrojtjen e ligjit, të drejtave të njeriut dhe forcimit të saj ndërkombëtar që nga viti 2008.

Ambasada e Republikës së Kosovës në Uashington ka falendëruar Muriel Bowser në një reagim në platformën “X”.

“Faleminderit kryetarja Bowser që njohët zyrtarisht 17 shkurtin si Ditën e Pavarësisë së Kosovës në Uashington, D.C.”, thuhet në reagimin e Ambasadës.

Kosova kremton këtë të martë, më 17 shkurt  18-vjetorin e Pavarësisë.

The post Uashingtoni shpall si datë zyrtare 17 Shkurtin, Ditën e Pavarësisë së Kosovës appeared first on Agjencia Telegrafike Shqiptare.

TIRANË, 14 shkurt/ATSH/- Pas 12 viteve në një kamp në Siri sot është bërë e mundur riatdhesimi në Shqipëri i Eva Dumanit.

Ministria për Europën dhe Punët e Jashtme informoi sot se “falë koordinimit dhe bashkëveprimit midis disa institucioneve të shtetit shqiptar, përfshirë MEPJ përmes përfaqësisë diplomatike të vendit në Turqi, është realizuar me sukses operacioni për kthimin në Shqipëri të shtetases E.D, e cila gjendej prej disa vitesh në një kamp të Sirisë”.

Në përgjigje të interesit të medieve, MEPJ sqaron se “operacioni i shtrirë në kohë u mundësua me mbështetjen e partnerëve tanë, në veçanti me kontributin e autoriteteve turke të cilat i falenderojmë për bashkëpunimin në këtë rast sensitiv”.

MEPJ rikonfirmon gatishmërinë dhe vullnetin për t’iu përgjigjur në çdo rast, nevojave apo situatave që ndikojnë shtetasit shqiptarë kudo që ata ndodhen përtej kufijve.

The post MEPJ: Riatdhesohet në Shqipëri Eva Dumani, prej 12 vitesh ndodhej në një kamp në Siri appeared first on Agjencia Telegrafike Shqiptare.

TIRANË, 13 shkurt/ATSH/ Korridori 8, me pikënisje në kompleksin portual Durrës – Porto Romano dhe dalje në Detin e Zi është përfshirë zyrtarisht në planet dhe infrastrukturën kritike ushtarake të NATO, duke u njohur si korridor sigurie për mbrojtjen kolektive të Aleancës.

Kryetari i Kuvendit, Niko Peleshi ka reaguar sot lidhur vendimin e marrë një ditë më parë në Ministerialin e Ministrave të Mbrojtjes të vendeve anëtare të NATO-s, të mbajtur në Bruksel, ku merrte pjesë edhe ministri i Mbrojtjes Pirro Vengu.

Peleshi thekson se “përfshirja zyrtare e Korridorit VIII në infrastrukturën kritike ushtarake të NATO-s shënon një arritje strategjike që e vendos Shqipërinë në qendër të arkitekturës së sigurisë euroatlantike”.

Kryeparlamentari nënvizon se ky zhvillim “forcon rolin e Shqipërisë si urë lidhëse në rajon dhe dëshmon se investimet afatgjata në siguri dhe infrastrukturë po e konsolidojnë vendin tonë si një partner kyç të Aleancës”.

Ky zhvillim e pozicionon Shqipërinë në një nyje strategjike të arkitekturës së sigurisë euroatlantike dhe e vendos vendin në qendër të planeve rajonale dhe infrastrukturave, ku NATO do të përqendrohet në vitet në vijim.

Ndërkohë, kanë nisur edhe përgatitjet për Samitin e NATO-s që do të mbahet në Tiranë në vitin 2027, në bashkëpunim me palën turke dhe Sekretariatin e Aleancës në Bruksel.

The post Peleshi: Vendimi i NATO-s për Korridorin 8, e vendos Shqipërinë në qendër të arkitekturës së sigurisë euroatlantike appeared first on Agjencia Telegrafike Shqiptare.

TIRANË, 13 shkurt/ATSH/- Bashkëpunimi ushtarak mes Kroacisë, Kosovës dhe Shqipërisë nuk paraqet asnjë kërcënim për askënd dhe se synimi i tij është stabiliteti i rajonit, ka deklaruar të enjten ministri i Mbrojtjes i Kroacisë, Ivan Anushiq.

“Shqipëria është anëtare e NATO-s dhe kandidate për BE, Kosova synon anëtarësimin në BE dhe NATO, Kroacia është anëtare e BE-së dhe NATO-s, dhe për këtë arsye interesat tona janë të përbashkëta. Ne kemi interes stabilitetin e këtij rajoni të Evropës, e jo destabilizimin”, ka thënë Anushiq për agjencinë e lajmeve “Beta”.

Ai ka theksuar se Kroacia dëshiron t’i ndihmojë Shqipërisë dhe Kosovës në rrugën e tyre drejt anëtarësimit në BE, përkatësisht në BE dhe NATO, “njëjtë sikur që janë të gatshëm të ndihmojnë edhe Serbinë”.

“Kroacia dëshiron t’i ndihmojë Shqipërisë dhe Kosovës në rrugën e tyre drejt anëtarësimit në BE, përkatësisht në BE dhe NATO, ashtu siç jemi të gatshëm ta bëjmë edhe për Serbinë, nëse vendos të ndjekë rrugën evropiane apo atë të NATO-s… Nuk kemi qenë kurrë kërcënim për askënd, e veçanërisht jo Kroacia, dhe as nuk e planifikojmë të jemi. Anëtarësimi ynë në NATO dhe BE na obligon dhe ne as mundemi, as duam të veprojmë ndryshe”, tha më tej ministri kroat i Mbrojtjes”, theksoi ministri kroat, i cili sot mori pjesë në takimin e ministrave të mbrojtjes të NATO-s në Bruksel. /Kosovapress/

The post Anushiq: Bashkëpunimi ushtarak Kroaci-Kosovë-Shqipëri s’është kërcënim, synon stabilitetin e rajonit appeared first on Agjencia Telegrafike Shqiptare.

TIRANË, 13 shkurt/ATSH/- Drejtoria e Përgjithshme e Tatimeve bën të ditur se ka krijuar një shërbim elektronik, përmes të cilit çdo qytetar mund të verifikojë nëse ka detyrim për të plotësuar deklaratën vjetor të ardhurave individuale, të njohur si DIVA.

Tax Test është shërbimi i thjeshtë në përdorim dhe është i organizuar sipas një pyetësori që i përgjigjet në kohë reale çdo individi (rezidentë apo jorezidentë), në përputhje me të ardhurat e tij.

“Sqarojmë individët se nuk është e nevojshme të vendoset emri i përdoruesit apo fjalëkalimi, dhe se informacioni nuk përmban të dhëna konfidencial, por dhe është i ndërtuar në bazë të disa pyetjeve shumë të thjeshta, që japin informacionin e nevojshëm nëse individi plotëson ose jo kriteret për të qenë subjekt deklarimi për DIVA 2025”, thuhet në njoftimin zyrtar të Tatimeve.

Administrata Tatimore bën me dije se afati i deklarimit dhe pagesës së DIVA 2025, sipas ligjit të ri, është data 31 mars 2026.

Subjekt deklarimi për vitin 2025 janë ata individë që kanë realizuar të ardhura bruto 1.200.000 lekë ose më shumë nga të gjitha burimet, jo vetëm nga paga dhe kanë qenë në më shumë se 1 marrëdhënie punësimi gjatë të paktën 1 muaji;

Gjithashtu, DIVA duhet plotësuar edhe nga ata të cilët gjatë vitit 2025 kanë realizuar të ardhura më shumë se 50.000 lekë, për të cilat nuk është mbajtur tatim (shembull: Qiradhënie për individë të paregjistruar, si: Qira ditore apo nga platformat Booking, AirBnB etj).

“Edhe nëse nuk keni detyrim ligjor për deklarim, por plotësoni kushtet për të përfituar rimbursim për fëmijët në ngarkim dhe për shpenzimet arsimore, duhet të dorëzoni DIVA 2025 për të përfituar nga këto zbritje”, sqaron Drejtoria e Tatimeve.

The post Tatimet: Verifikoni nëse duhet ta plotësoni deklaratën e të ardhurave vjetore përmes shërbimit të ri, Tax Test appeared first on Agjencia Telegrafike Shqiptare.

TIRANË, 12 shkurt/ATSH/- Banorët e Rrjollit dhe ato të Durrësit kanë protestuar sot para Kuvendit për pronat e tyre duke kundërshtuar ndërtimin e një resorti turistik në Velipojë di dhe projektin TID për jetëzimin e bulevardit historik ‘Edidamn” në Durrës.

Qytetarët u bënë thirrje deputetëve që ti mbështesin në këtë kauzë në mbrojtje të pronave të tyre.

Një prej protestuesve tha se “ ne kemi ardhur për një të drejtë që sot e kërkojmë në Kuvend dhe nesër do e kërkojmë edhe te institucionet e tjera. Ne kemi vendosur që të protestojmë në mënyrë demokratike. Do të shfrytëzojmë të gjitha mundësitë që ne kemi dhe na i ka dhënë ligji. Në të kundër nuk do të rrimë duarkryq. Nuk kemi rrugëzgjidhje tjetër, o vdekje, o liri”.

Protestës së qytetarëve iu bashkuan edhe deputetët Agron Shehaj dhe Redi Muçi. Shehaj tha se padrejtësia me pronat është padrejtësi amë e madhe që u është bërë qytetarëve në këto 35 vjet.

”Kjo është një çështje në fakt politike sepse pronat nuk i vjedh vetëm oligarku, por oligarkët me klasën politike të korruptuar politike që kemi në Parlament. Askush nuk ua vjedh dot pronat pa lejen e tyre, janë ortakë. Heshtja e tyre tregon që po i vjedhin bashkë”, tha ai duke iu premtuar qytetarëve që do të jenë krah tyre për të protestuar për pronat e tyre.

Ndërsa banorët e Durrësit të cilët protestojnë për projektin TID për jetëzimin e bulevardit historik ‘Edidamn’, kërkojnë nga bashkia Durrës vlerësim të saktë të pronës së tyre ose sigurimin e një banese si dhe kundërshtojnë bonusin e qirasë që është parashikuar paraprakisht nga bashkia.

The post Qytetarët e Velipojës dhe Durrësit protestë para Kuvendit në mbrojtje të pronave të tyre appeared first on Agjencia Telegrafike Shqiptare.

TIRANË, 11 shkurt/ATSH/ Kryeministri Edi Rama ka reaguar sot lidhur me aktet e dhunës ndaj punonjësve të Policisë së Shtetit gjatë protestës së djeshme të opozitës përballë Kryeministrisë dhe Parlamentit ku u hodhën molotovë, fishekzjarre dhe shishe me lëndë të dyshuar djegëse benzinë.

Përmes një postimi në rrjetet sociale, Rama ka publikuar foto të sekuestrimit të 22 molotovë të pashpërthyer dhe 3 shishe me lëndë të dyshuar djegëse benzinë. “Këto janë bombat artizanale me të cilat janë sulmuar dhe  djegur e plagosur mbrëmë punonjësit e policisë, nga e vetmja parti politike në botën demokratike që ushtron dhunë dhe e dyta në historinë e botës së tërë – pas asaj të famëkeqit Robert Mugabhe të Zimbabves – që i shkon mbrapa një tetëdhjetë e kusur vjeçari të damkosur e të lajthitur”, shprehet Rama.

Kreu i Ekzekutivit uroi që “drejtësia të bëjë drejtësi për policët e plagosur dhe të ndëshkojë pa ngurrim bartësit e këtyre armëve me kapacitet vdekjeprurës”.

“Sa për fatin politik të këtij cikli të ri jashtënxjerrjesh në bulevard, ai do të shkruhet si zakonisht në zgjedhjet e vitit të ardhshëm me një disfatë ende më shembullore se sa të mëparshmet, ndërkohë që ne do të vazhdojmë pa u ndalur  rrugën drejt Shqipërisë 2030 në Bashkimin Europian”, deklaron kryeministri Rama.

The post Rama për protestën e PD-së: E vetmja parti në botë që ushtron dhunë, të bëhet drejtësi për efektivët e plagosur appeared first on Agjencia Telegrafike Shqiptare.

TIRANË, 11 shkurt/ATSH/- Kreu i Partisë Demokratike, Sali Berisha ka bërë të ditur hapat e radhës të aksionit opozitar për “rrëzimin e narkokracisë, krijimin e një qeverie teknike dhe mbajtjen e zgjedhjeve të lira”.

Në një prononcim për mediet mesnatën e mbrëmshme, Berisha tha se protesta e radhës është në datën 20 shkurt, dita që lidhet me rrëzimin e bustit të diktatorit Enver Hoxha në vitin 1991.

“Kjo kryengritje nuk ndërpritet, kjo është kryengritja paqësore që ka për mision çlirimin e Shqipërisë nga narkodiktatura dhe nuk ka gjë në botë që mund ta pengojë, pa realizuar misionin. Skenari do të jetë, skenar i njerëzve të pamposhtur ”, tha ai.

Berisha tha se gjatë protestës së djeshme “u përdorën plumba gome dhe kanë goditur protestuesin në ballë, që përbën një rrezik për jetën. Do të thotë se protestuesi Ilir Tusha, një i ri, është goditur nga snajper pa asnjë lloj motivi. Deputeti Bledion Nallbati me hematomë të ndjeshme nga goditja me shkop në kokë”.

Për këto akte, kreu i PD-së, akuzoi oficerin e lartë të Policisë së Shtetit, Sokol Bizhga. “Në krye të operacionit ka qenë krimineli i damkosur Sokol Bizhga. Mashtroi, ka lëshuar komunikatën, 14 policë. Shkova unë, asnjë polic. Mjekët më thanë që nuk ka asnjë polic, as të plagosur as të paplagosur. Sollën 5 policë dhe policët kishin ikur vetë se i kishin sjellë me detyrim aty, për statistikë”, u shpreh Berisha për mediet.

The post Berisha: Do vazhdojmë kryengritjen për krijimin e një qeverie teknike dhe zgjedhje të lira appeared first on Agjencia Telegrafike Shqiptare.