TIRANË, 23 korrik /ATSH/ – Bashkia e Vlorës u ka bërë apel qytetarëve dhe turistëve që kanë zgjedhur të vizitojnë qytetin bregdetar të tregojnë kujdes të shtuar gjatë lëvizjes, pasi kushtet atmosferike pritet të përkeqësohen në orët në vijim.

Sipas parashikimeve, gjatë orëve të mbrëmjes së sotme, si edhe gjatë ditës së premte, në qytetin e Vlorës priten reshje shiu, erëra të forta dhe stuhi lokale.

Autoritetet u bëjnë thirrje banorëve të shmangin lëvizjet e panevojshme, të mos qëndrojnë pranë pemëve apo strukturave të pasigurta dhe të tregojnë kujdes maksimal në zonat bregdetare, veçanërisht në plazhe dhe në det.

Sipas njoftimit të Bashkisë së Vlorës, territori i bashkisë mund të ndikohet nga reshje intensive, stuhi lokale dhe erëra të forta, të cilat mund të sjellin ndryshime të menjëhershme të kushteve atmosferike.

Gjithashtu, Bashkia e Vlorës u ka rikujtuar qytetarëve të mos ndezin zjarre në ambiente të hapura, pyje, kullota apo pranë bimësisë së thatë, pasi temperaturat e larta dhe era favorizojnë përhapjen e shpejtë të flakëve.

Qytetarëve u kërkohet të njoftojnë shërbimet e emergjencës për çdo situatë që mund të paraqesë rrezik.

/a.f/

The post Bashkia e Vlorës apel për kujdes, priten reshje shiu dhe erëra të forta appeared first on Agjencia Telegrafike Shqiptare.

TIRANË, 22 korrik/ATSH/ Këshilli i Ministrave miratoi sot shpronësimin për interes publik, të pronarëve të pasurive të paluajtshme, që preken nga realizimi i projektit për ndërtimin e  godinës së parkimit nëntokësor dhe i parkut çlodhës, në Vlorë.

Vlera e përgjtihshme e kompensimit të pronarëve arrin në 7 228 689 lekë dhe përballohet nga buxheti i shtetit.

Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të shpronësimit është brenda 3 muajve nga data e hyrjes në fuqi të tij.

Pronarët do të kompensohen për efekt shpronësimi, pasi të kenë paraqitur dokumentacionin justifikues për likuidim pranë Agjencisë Shtetërore për Shpronësimin, e cila ngarkohet për likuidimin e pronarëve.

Ndërkohë Agjencia Shtetërore e Kadastrës pezullon të gjitha transaksionet me pasuritë e shpronësuara deri në momentin e realizimit të procesit të hedhjes së gjurmës së projektit mbi hartën kadastrale dhe regjistrimit të aktit të kalimit të pronësisë në favor të shtetit, në përgjegjësi administrimi të Fondit Shqiptar të Zhvillimit, për pasuritë e shpronësuara.

/m.m/a.f/

The post 7.2 milionë lekë për kompensimin e pronarëve që preken nga projekti i parkut në Vlorë appeared first on Agjencia Telegrafike Shqiptare.

TIRANË, 21 korrik/ATSH/ Kryetari i grupit parlamentar të Partisë Socialiste, Taulant Balla, gjatë prezantimit të disa ndryshimeve në ligjin për “Turizmin” në Komisionin për Kulturën, Turizmin dhe Diasporën, publikoi një dokument i cili tregon se vendimet për zhvillimet në zonën e Vlorës janë miratuar nga qeveria e drejtuar nga Sali Berisha.

Balla deklaroi se vendimi për gjurmën e Aeroportit të Vlorës, si edhe ai që përcakton Nartën dhe Zvërnecin si zona me potencial për zhvillim turistik, mban firmën e Sali Berishës në cilësinë e kryetarit të KRRTRSH-së në vitin 2009.

“Po ju bëj publike se kush i ka firmosur vendimet për aeroportin e Vlorës edhe për zonën ndërtimore zhvillimore turistike në Zvërnec. Personi quhet Sali Berisha. Ja ku e keni,” u shpreh Balla.

/m.m/

The post Balla: Vendimet për Aeroportin e Vlorës dhe Zvërnecin i firmosi Sali Berisha appeared first on Agjencia Telegrafike Shqiptare.

TIRANË, 21 korrik /ATSH/ Punimet për zgjerimin e shëtitores bregdetare “Lungomare 4” në zonën e Plazhit të Vjetër në Vlorë po shkojnë drejt përfundimit.

Kryeministri Edi Rama bëri me dije lajmin, ndërsa në një postim në rrjetet sociale ndau pamje nga ky investim në qytetin bregdetar.

Ky projekt është një tjetër investim i rëndësishëm për qytetin turistik, i cili synon të shtrijë standardet moderne të infrastrukturës dhe të japë një impuls të ri zhvillimit urban.

Ndërhyrja në këtë zonë, do të ndikojë drejtpërdrejt në përmirësimin e hapësirave publike dhe në rritjen e cilësisë së jetesës për qytetarët, si dhe në forcimin e potencialit turistik të Vlorës.

Lungomare që nisi në qytetin e Vlorës, tashmë është zgjatur edhe në drejtim të Orikumit duke sjellë hapësira rekreative për pushuesit.

“Lungomare 4” është vazhdimi i shëtitores ekzistuese në krahun perëndimor, me një gjatësi fillestare prej rreth 500 metrash linear.

Projekti parashikon ndërtimin e një promenade me gjerësi rreth 7 metra, si dhe një piste biçikletash prej 2 metrash, duke krijuar një hapësirë funksionale dhe të integruar për këmbësorët dhe përdoruesit e biçikletave.

/e.i/j.p/

The post Drejt përfundimit punimet për Lungomare 4 në Plazhin e Vjetër të Vlorës appeared first on Agjencia Telegrafike Shqiptare.

TIRANË, 20 korrik /ATSH/ Një vatër zjarri është aktivizuar pasditen e sotme në zonën e Ujit të Ftohtë, mbi tunelin e Vlorës, duke përfshirë një sipërfaqe me shkurre dhe bimësi.

Sipas medieve, për shkak të temperaturave të larta dhe erës, flakët po përhapen me shpejtësi, duke iu afruar zonës së banuar dhe duke krijuar rrezik për qytetarët dhe banesat pranë.

Në vendngjarje po ndërhynë shërbimet zjarrfikëse, në bashkëpunim me forcat e Policisë, të cilat po punojnë për izolimin e vatrës së zjarrit dhe mbrojtjen e banesave.

Operacioni për shuarjen e plotë të flakëve vijon, ndërsa autoritetet po monitorojnë situatën dhe po marrin masat e nevojshme për të parandaluar përhapjen e mëtejshme të zjarrit dhe eliminimin e çdo rreziku për zonën e banuar.

Vijon…

/e.i/a.f/

The post Zjarr në zonën e Ujit të Ftohtë në Vlorë, ndërhyrje për izolimin e flakëve appeared first on Agjencia Telegrafike Shqiptare.

TIRANË, 19 korrik /ATSH/ Kryeministri Edi Rama ka marrë pjesë në homazhet e zhvilluara për gazetarin Enrik Mehmeti, në teatrin “Petro Marko” në Vlorë.

Pas daljes nga ambientet e teatrit, Rama në dalje i ka shprehur gazetarëve ngushëllime për humbjen e kolegut Enrik Mehmetit.

Gazetari Enrik Mehmeti u nda nga jeta pasditen e së shtunës, në moshën 40-vjeçare, pas një aksidenti me motor në zonën e Porto Novës, në Zvërnec.

Mehmeti ishte një nga zërat më të njohur të raportimit nga qarku i Vlorës. Për vite me radhë ai solli në ekranin e News24 zhvillimet më të rëndësishme të jugut të vendit, nga kronika e zezë dhe operacionet policore, te çështjet sociale, politike dhe turistike.

Kolegët e kanë përshkruar gazetarin si një profesionist të përkushtuar, i njohur për praninë e tij në terren, raportimet e drejtpërdrejta dhe përpjekjen për të sjellë informacion të verifikuar edhe në situata të vështira.

Familjarë, miq dhe kolegë do t’i japin sot lamtumirën e fundit gazetarit Enrik Mehmeti.

/gj.m/

The post Rama në homazhet për gazetarin Enrik Mehmeti në Vlorë appeared first on Agjencia Telegrafike Shqiptare.

The post Arrestohet 43-vjeçari që organizoi transportin e emigrantëve në ishullin e Sazanit appeared first on Agjencia Telegrafike Shqiptare.

TIRANË, 18 korrik/ATSH/ Ministria e Turizmit, Kulturës dhe Sportit organizoi dëgjesën publike në kuadër të projektit  për restaurimin dhe muzealizimin e Muzeut Kombëtar të Pavarësisë në Vlorë.

Grupi i projektimit dhe ekipi përgjegjës për linjën muzeore prezantuan konceptin e parë arkitektonik, muzeologjik dhe identitetin vizual të këtij institucioni me rëndësi të veçantë kombëtare.

Gjithashtu është zhvilluar një konsultim i hapur me institucionet, ekspertët dhe aktorët e interesit, me synim mbledhjen e komenteve dhe rekomandimeve që do të kontribuojnë në përmirësimin e zgjidhjeve të propozuara për këtë objekt ndër më të rëndësishmit e trashëgimisë sonë kombëtare.

Ky projekt përfaqëson një hap të rëndësishëm për ruajtjen, promovimin dhe rivlerësimin e historisë së Pavarësisë, duke forcuar njëkohësisht rolin e Vlorës si destinacion i turizmit kulturor dhe historik.

Ekspertëve të trashëgimisë kulturore, historianëve dhe grupeve të interesit, diskutimet u përqendruan te vlerat historike dhe simbolike që mbart ky objekt për Vlorën dhe gjithë Shqipërinë, si edhe te ndërhyrjet restauruese dhe konservuese të nevojshme në godinën historike.

Ministri i Turizmit, Kulturës dhe Sportit, Blendi Gonxhja ka bërë me dije se projekti parashikon rikonceptimin e linjës muzeore, pasurimin e mënyrës së interpretimit të fondit muzeor dhe zhvillimin e elementeve të digjitalizimit, si dhe identitetit vizual, branding-ut dhe souvenir-eve të muzeut.

Ai shton se koncepti i ri arkitektonik propozon gjithashtu ndërtimin e një volumi të ri me hapësira multifunksionale, të menduara për aktivitete kulturore, edukative dhe ekspozuese.

Gonxhja shton se ky proces konsultimi përbën një hap të rëndësishëm drejt krijimit të një muzeu modern, që ruan autenticitetin e vendit ku u hodhën themelet e shtetit shqiptar dhe e afron historinë e Pavarësisë me brezat e sotëm dhe të ardhshëm.

Ministri gjithashtu bën me dije se pas reflektimit të sugjerimeve dhe finalizimit të detajeve nga grupi i projektimit, do të zhvillohet edhe një dëgjesë e dytë publike për prezantimin e projektit të përfunduar.

The post Prezantohet projekti për restaurimin e Muzeut të Pavarësisë në Vlorë, Gonxhja: Koncept i ri arkitektonik me hapësira multifunksionale appeared first on Agjencia Telegrafike Shqiptare.

TIRANË, 14 korrik /ATSH/ Policia Kufitare e Vlorës vijon kontrollet përgjatë vijës bregdetare për garantimin e sigurisë detare, duke ndëshkuar dy drejtues mjetesh lundruese që rrezikuan pushuesit duke lundruar pranë brigjeve.

Sipas njoftimit të Policisë së Shtetit, pas një denoncimi për një gomone që lundronte në afërsi të bregut në plazhin e Potamit, shërbimet e Drejtorisë Vendore për Kufirin dhe Migracionin (DVKM) Vlorë lokalizuan mjetin në plazhin e Drimadhes, duke e ndaluar dhe bllokuar.  Drejtuesi i tij, shtetasi H. L., u ndëshkua me gjobë administrative prej 500 mijë lekësh.

Gjatë patrullimeve në zonën e quajtur “Plazhi i Hidrovorit”, efektivët konstatuan një tjetër gomone që lëvizte në afërsi të bregut. Mjeti u ndalua dhe u bllokua, ndërsa drejtuesi, shtetasi E. Sh., u gjobit me 510 mijë lekë. Nga verifikimet rezultoi gjithashtu se ai nuk dispononte në bord dokumentacionin e kërkuar nga ligji.

Policia bën të ditur se patrullimet do të vijojnë në të gjithë hapësirën detare të qarkut Vlorë, me synim parandalimin e shkeljeve që cenojnë sigurinë e pushuesve.

Policia e Shtetit u bën thirrje qytetarëve, pushuesve dhe vizitorëve të denoncojnë çdo rast paligjshmërie që rrezikon sigurinë detare, duke garantuar reagim të menjëhershëm dhe në përputhje me ligjin.

/gj.m/j.p

The post Rrezikuan pushuesit, Policia Kufitare bllokon dy gomone në Vlorë appeared first on Agjencia Telegrafike Shqiptare.

TIRANË, 12 korrik/ATSH/ Për katër ditë me radhë, nga 9 deri më 12 korrik, në Zvërnec të Vlorës u zhvillua Sundance Festival, një aktivitet kushtuar muzikës, natyrës dhe turizmit, i cili mblodhi mijëra pjesëmarrës nga Shqipëria dhe vende të ndryshme të botës.

Kryeministri Edi Rama ndau sot pamje nga ky festival, ku morën pjesë mbi 50 DJ ndërkombëtarë dhe lokalë.

“Katër ditë muzikë, natyrë dhe energji unike në Zvërnec. Sundance Festival ka bërë bashkë rreth 15 mijë pjesëmarrës nga Shqipëria dhe vende të ndryshme të botës, duke e kthyer bregdetin e Vlorës në një nga destinacionet më të veçanta të verës”, shkruan Rama.

I organizuar mes lagunës, pyllit dhe bregdetit të Zvërnecit, festivali synon të ndërthurë muzikën, natyrën dhe turizmin, duke tërhequr vizitorë nga vende të ndryshme të botës dhe duke promovuar Shqipërinë si një destinacion për turizmin e eventeve.

Ky aktivitetet veror synon të ndërthurë muzikën, turizmin dhe promovimin e bukurive natyrore të zonës së Zvërnecit, duke tërhequr vizitorë vendas dhe të huaj.

/k.s/

The post Sundance Festival, Rama: Rreth 15 mijë pjesëmarrës e kthyen bregdetin e Vlorës në një nga destinacionet e verës appeared first on Agjencia Telegrafike Shqiptare.

TIRANË, 12 korrik/ATSH/ Policia e Vlorës finalizoi me sukses operacionin policor të koduar “WEST”, në kuadër të të cilit u arrestuan në flagrancë 5 shtetas.

Si rezultat i administrimit të menjëhershëm të informacioneve të siguruara në rrugë operative, lidhur me disa shtetas që transportonin lëndë të ndryshme narkotike me qëllim shitjen e tyre në qytetin e Vlorës, u arrestuan në flagrancë 5 shtetas, nga të cilët 2 janë shtetas italianë.

Konkretisht Policia arrestoi shtetasit N. K., 20 vjeç, banues në Lezhë; R. H., 20 vjeç, banues në Lezhë; M. M., 23 vjeç, banues në Lezhë; C. L., 42 vjeç, banues në Romë, Itali, dhe C. S., 37 vjeç, banues në Palermo, Itali.

Në kuadër të operacionit u sekuestruan 700 doza të lëndëve narkotike të llojeve “Tusi”, “Ketaminë”, “MDMA”, “Kokainë”, “Ekstazi” dhe “Kanabis”.

Këta shtetas u konstatuan në zonën e Zvërnecit dhe, gjatë kontrollit fizik të tyre, të automjetit që përdornin, si dhe të banesës ku qëndronin, në lagjen “Uji i Ftohtë”, Vlorë, shërbimet e Policisë gjetën dhe sekuestruan, në cilësinë e provës materiale, 700 doza lëndësh narkotike të llojeve të ndryshme, gati për shitje, një shumë parash të dyshuara si të përfituara nga veprimtaria kriminale, si dhe 8 aparate celularë.

Nga hetimet paraprake dyshohet se këta shtetas i shisnin lëndët narkotike në plazhe dhe lokale.

Materialet procedurale iu referuan Prokurorisë, për veprime të mëtejshme, për veprën penale “Prodhimi dhe shitja e narkotikëve”, e kryer në bashkëpunim.

/m.m/r.e/

The post Operacion antidrogë në Vlorë, sekuestrohen 700 doza lëndë narkotike appeared first on Agjencia Telegrafike Shqiptare.

TIRANË, 12 korrik/ATSH/ Bruno është i pandalshëm ndërsa flet për procesin e prodhimit të vajit të ullirit ekstra të virgjër në fabrikën e tij “Musai Olive Oil”. E vendosur mes kodrave me ullinj të Panajasë, fabrika prodhon vaj cilësor që ka marrë vlerësime ndërkombëtare edhe pse me kapacitete relativisht jo të mëdha.

Krijuar prej më shumë se 30 vjetësh, fabrika “Musai Olive Oil” është një nga prodhuesit më të njohur dhe më të vlerësuar të vajit të ullirit ekstra të virgjër në Shqipëri. E vendosur në zonën e Skrofotinës në Vlorë, kjo sipërmarrje familjare është shndërruar në një model suksesi të bujqësisë shqiptare.

Bruno i cili vijon plot pasion traditën e të atit dhe drejton ndërmarrjen e krijuar prej tij shpjegon se fabrika përpunon kryesisht ullirin e varietetit “Kalinjot”, i njohur për nivelin e lartë të polifenoleve (antioksidantë natyrorë) dhe aromën e pasur. Vaji i tyre është i certifikuar biologjik nga institucione të njohura ndërkombëtare ndërsa fabrika përdor teknologji moderne suedeze/italiane të linjës Alfa-Laval, duke aplikuar rreptësisht procesin e shtypjes në të ftohtë (cold pressing) për të ruajtur të gjitha vlerat ushqyese.

“Musai Olive Oil” ka fituar mbi 20 medalje ari në panaire ndërkombëtare të vajit të ullirit.

Bruno shpjegon se sekreti i një vaji ulliri cilësor është përpunimi i ullinjve të freskët, të sapombledhur në fazën kur janë ende jeshilë.

Ai thotë se ullinjtë grumbullohen nga rreth 1000 fermerë të zonës, ndërsa po ashtu ka nevojë për krahë pune gjatë sezonit të mbledhjes së ullinjve. Bruno thotë se dita e punës në mbledhjen e ullinjve shkon deri në 40 euro, ndërsa reflekton se fabrikat e tjera të prodhimit të ullirit nuk kanë kuptuar rolin e specialistëve.

Sipas tij, ulliri përpunohet pa teknolog ushqimor, duke i humbur cilësinë produktit. Mes shumë sekretesh të punës së tij, Bruno i përgjigjet edhe kërshërisë se si dallon një vaj ulliri cilësor. Dhe nëse nuk e dini, vaji i ullirit mund të mos ketë datë skadence, por i ruajtur në kushte të mira, vlerat e tij qëndrojnë të atilla vetëm për një vit.

Ndërkaq, mes kaq shumë angazhimesh, pjesë e rëndësishme e biznesit mbeten turet degustues nga turistët e huaj të cilët e vlerësojnë vajin ekstra të virgjër përmes shijes dhe aromës. Bruno thotë se Vlora ka det, por ka edhe kulinari, ka vajin e ullirit, ka verën e shumë gjëra të tjera që janë mbështetëse për një sezon turistik të plotë.

Turet e degustimit nga turistët e huaj bashkojnë fabrikën e vajit me kantinën “Balaj” që ndodhet pak më larg në zonën e Mifolit. Kjo është kantina e parë shqiptare që i është bashkuar “Raisin”, platformës më të madhe globale për verërat natyrale.

Themeluesi dhe verëbërësi, Artan Balaj, u rikthye në vendlindje në vitin 2007 pasi punoi për 10 vite në vreshtarinë e rajoneve të famshme italiane si Toskana dhe Friuli.

Artani ka preferuar që kantinën e tij ta mbajë modeste për nga kapacitetet, duke e fokusuar vëmendjen tek cilësia dhe ruajtja e varieteteve autoktone.

Ai prodhon verë pa kimikate duke u bazuar tërësisht në tetë hektarët e vrashtave që zotëron familja e tij, ndërsa kantinën e ka ndërtuar në një vend interesant, tunel historik brenda një shkëmbi, që daton që prej vitit 1920.

Kantina ndjek një rrugëtim të rreptë ekologjik. Fermentimi i verës bëhet në mënyrë spontane me maja indigjene (të egra), verërat lihen të pafiltruara dhe nuk u shtohen sulfite në asnjë stad të prodhimit.

Vreshtat gjenden në kodrat e Risilit (afër Mifolit), midis lumit Shushicë dhe detit Adriatik, vetëm 10 km larg lagunës së Nartës. Ky pozicion i jep rrushit ndikim të lartë kripësie dhe klime mesdhetare.

Pjesa përpara kantinës është rregulluar si restorant, ku mund të hahet mirë për ata që e dinë si vend dhe të degustohet verë nga dhjetë etiketa që Artani prodhon në kantinë.

Vera prodhohet nga gjashtë varietete rrushi dhe Artani thotë se preferon të mos e përziejë rrushin e vreshtave të tij. Është biznes familjar ku punojnë tre persona dhe në sezon vjeljeje e prodhimi angazhohen banorë të zonës. Artani tregon se në fund të kantinës ka edhe bankën gjenetike që përdoret për të ruajtur varietetet autoktone si dhe për të përshtatur varietetet e tjera me kushtet e zonës së Vlorës.

Edhe në kantinën e tij, guidat turistike sjellin turistë të huaj për degustim vere. Vetë Artani ka shumë gjëra për t’u treguar në lidhje me pasionin për vreshtat, verën dhe traditën vlonjate.

Kështu, bizneset familjare të Brunos dhe Artanit nuk sjellin të ardhura vetëm për ata dhe komunitetin, por edhe shpërndajnë shijet e Shqipërisë nëpër botë përmes turistëve të huaj që rikthehen në Vlorë edhe për vajin e ullirit dhe verën.

Vaji i ullirit dhe vera, shijet autentike të Vlorës në fabrikën Musai Olive Oil dhe Kantinën Ba...

1 nga 28

/r.e/

The post Vaji i ullirit dhe vera, shijet autentike që mbështesin turizmin në Vlorë appeared first on Agjencia Telegrafike Shqiptare.

TIRANË, 11 korrik /ATSH/ Policia Kufitare e Vlorës ndëshkoi ditën e sotme me gjobë disa të rinj që duke lëvizur me mjete lundruese në afërsi të bregut, rrezikuan pushuesit.

Policia Kufitare e Vlorës vendosi gjoba në masën prej 500.000 dhe 510.000 lekë të rinj, si dhe u bllokon mjetet lundruese.

Sipas njoftimit të Policisë së Shtetit, shërbimet e Drejtorisë Vendore për Kufirin dhe Migracionin Vlorë, në bashkëpunim me Njësinë Policore Detare dhe Drejtorinë Vendore të Policisë Fier, evidentuan drejtuesin e një mjeti lundrues tip Jet Ski, i cili kishte lundruar pranë bregut në plazhin e Semanit, duke rrezikuar sigurinë e pushuesve.

Drejtuesi i mjetit, shtetasi E. D., u ndëshkua me masë administrative prej 500 mijë lekësh të rinj, ndërsa mjeti lundrues u bllokua administrativisht.

Po ashtu, gjatë patrullimeve në afërsi të Zvërnecit, në zonën e plazhit të Hidrovorit, Policia Kufitare konstatoi një gomone që lëvizte në mënyrë të paligjshme brenda perimetrit të sigurisë, pranë zonës ku pushonin qytetarët.

Nga verifikimet rezultoi se drejtuesi i mjetit, shtetasi J. H., nuk dispononte dokumentacionin përkatës të mjetit lundrues. Për këtë shkelje ndaj tij u vendos një masë administrative prej 510 mijë lekësh të rinj, si dhe u bllokua administrativisht gomonia.

Policia e Shtetit u bën apel të gjithë përdoruesve të mjeteve lundruese dhe subjekteve që operojnë me to të respektojnë rregullat e lundrimit dhe perimetrat e sigurisë, duke theksuar se çdo shkelje që cenon jetën dhe sigurinë e pushuesve do të ndëshkohet menjëherë në përputhje me ligjin.

/e.i/ /a.g/

The post Policia Kufitare e Vlorës, gjoba dhe bllokime të mjeteve lundruese për shkelësit e ligjit appeared first on Agjencia Telegrafike Shqiptare.

TIRANË, 3 korrik /ATSH/ Policia e Vlorës finalizoi sot operacionin e koduar “Rrjetet”, në kuadër të të cilit u arrestuan dy shtetas të shumëkërkuar, të dyshuar për veprën penale të mashtrimit kompjuterik, si dhe një person tjetër për përkrahje të autorit të krimit.

Sipas njoftimit të Policisë, operacioni u zhvillua nga Drejtoria Vendore e Policisë Vlorë, me mbështetjen e Drejtorisë së Përgjithshme të Policisë së Shtetit, pas ndjekjes me metoda proaktive të veprimtarisë kriminale.

Gjatë operacionit, në zonën e Drimadhës, u kapën shtetasit G. P., 29 vjeç, dhe Xh. H., 31 vjeç, të shpallur në kërkim nga Gjykata e Tiranës, ndaj të cilëve ishte caktuar masa e sigurisë “Arrest në burg”, si të dyshuar për veprën penale “Mashtrimi kompjuterik”.

Sipas Policisë, dy të arrestuarit dyshohet se kanë përfituar shuma të mëdha monetare nëpërmjet skemave mashtruese të call center-ave.

Gjatë kontrollit në vilën ku qëndronin, shërbimet e Policisë sekuestruan një armë zjarri pistoletë dhe një sasi lënde narkotike, e dyshuar cannabis sativa.

Po ashtu, në momentin e arrestimit të tyre u vu në pranga në flagrancë edhe shtetasi R. R., 28 vjeç, banues në Tiranë, i dyshuar për veprën penale “Përkrahja e autorit të krimit”.

Materialet procedurale i janë referuar Prokurorisë për veprime të mëtejshme.

/gj.m/r.e/

The post Operacioni “Rrjetet” në Vlorë, arrestohen dy të kërkuarit për mashtrim kompjuterik appeared first on Agjencia Telegrafike Shqiptare.

TIRANË, 1 korrik/ATSH/ Vlora është bërë bashkia e parë në Shqipëri që nënshkruan Paktin Ndërbashkiak për Punësimin, duke shënuar një hap të rëndësishëm drejt forcimit të bashkëpunimit ndërmjet bashkive, institucioneve kombëtare dhe sektorit privat për promovimin e punësimit, lehtësimin e lëvizshmërisë së brendshme të fuqisë punëtore dhe mbështetjen e zhvillimit ekonomik vendor.

Nënshkrimi u bë në kuadër të Forumit të tretë të Komunitetit dhe Biznesit për Migracionin dhe Diasporën, organizuar nga IOM në Shqipëri me mbështetjen e Qeverisë së Mbretërisë së Bashkuar. Forumi mblodhi përfaqësues të institucioneve qendrore dhe vendore, bashkive, bizneseve, shoqërisë civile dhe komuniteteve lokale për të diskutuar zgjidhje konkrete për adresimin e nevojave të tregut të punës përmes partneriteteve më të forta në nivel vendor.

Pakti Ndërbashkiak për Punësimin krijon një mekanizëm të strukturuar bashkëpunimi ndërmjet bashkive, Agjencisë Kombëtare të Punësimit dhe Aftësive (AKPA), institucioneve të arsimit dhe formimit profesional, si dhe përfaqësuesve të sektorit privat.

Nëpërmjet këtij mekanizmi, bashkitë angazhohen të bashkëpunojnë për të përputhur më mirë punëkërkuesit me mundësitë e punësimit, për të lehtësuar lëvizshmërinë e brendshme të fuqisë punëtore, për të forcuar koordinimin mbi informacionin e tregut të punës dhe për të përmirësuar aksesin në shërbimet e punësimit, veçanërisht për gratë, të rinjtë, migrantët e rikthyer dhe grupet e tjera në nevojë.

Vlora është bashkia e parë pritëse që nënshkruan zyrtarisht këtë Pakt, duke nisur një proces që synon të zgjerohet gradualisht në të gjithë vendin. Në kuadër të projektit, Pakti do të nënshkruhet fillimisht nga shtatë bashkitë pilote: Vlora, Kamza, Tirana, Saranda, Kukësi, Dibra dhe Shkodra, me synimin afatgjatë për ta shtrirë këtë model bashkëpunimi në të gjitha bashkitë e Shqipërisë.

Gjatë ceremonisë së nënshkrimit, drejtoresha e IOM në Shqipëri, Alma Jani theksoi rëndësinë e krijimit të urave të bashkëpunimit ndërmjet bashkive që ofrojnë mundësi punësimi dhe atyre që përballen me nivele më të larta papunësie.

“Qarku i Vlorës po përjeton një rritje të ndjeshme të kërkesës për fuqi punëtore, veçanërisht në sektorët e hotelerisë, turizmit dhe bujqësisë, ndërsa shumë bashki të tjera në Shqipëri kanë qytetarë që janë në kërkim të mundësive të punësimit. Afrimi i këtyre dy realiteteve është pikërisht thelbi i këtij projekti. Pakti Ndërbashkiak për Punësimin është shumë më tepër sesa një marrëveshje formale; ai është një mekanizëm praktik që forcon koordinimin ndërmjet bashkive, institucioneve kombëtare dhe sektorit privat për të krijuar më shumë mundësi punësimi dhe për të lehtësuar lëvizshmërinë e brendshme të fuqisë punëtore”, tha Jani.

Nënkryetarja e bashkisë Vlorë, Irena Toshkallari e cilësoi Paktin si formalizimin e një bashkëpunimi që tashmë ka nisur të japë rezultate konkrete.

“Ky Pakt formalizon bashkëpunimin ndërmjet bashkive dhe institucioneve përgjegjëse për të menaxhuar më mirë lëvizshmërinë e brendshme të fuqisë punëtore. Nëse një biznes në Vlorë ka nevojë për punonjës, falë këtij bashkëpunimi ne mund të lidhemi me bashki të tjera nëpërmjet një mekanizmi të standardizuar referimi. Kjo krijon mundësi të reja punësimi për qytetarët, ndërkohë që ndihmon bizneset të plotësojnë nevojat e tyre për fuqi punëtore”, tha ajo.

Pakti parashikon gjithashtu forcimin e strukturave të dedikuara në bashki për migracionin dhe disaporën, përmirësimin e koordinimit me AKPA-n dhe aktorë të tjerë vendorë, zhvillimin e analizave të rregullta të tregut të punës, organizimin e panaireve të përbashkëta të punës dhe zbatimin e mekanizmave të standardizuar të referimit për të mbështetur qytetarët gjatë gjithë procesit të punësimit.

Nënshkrimi i Paktit ndërtohet mbi dy vite bashkëpunimi ndërmjet IOM, bashkive dhe institucioneve kombëtare në kuadër të projektit “Forcimi i Kapaciteteve Institucionale Vendore për Migracionin në Shqipëri”. Përmes angazhimit të komuniteteve, forcimit të kapaciteteve institucionale dhe ndërtimit të partneriteteve vendore, projekti synon të forcojë qeverisjen e migracionit duke promovuar njëkohësisht mundësi punësimi dhe zhvillim të qëndrueshëm në nivel lokal.

Projekti zbatohet nga IOM në Shqipëri, me mbështetjen e qeverisë së Mbretërisë së Bashkuar.

/m.m/r.e/a.f/

The post Vlora bëhet bashkia e parë që nënshkruan paktin ndërbashkiak për punësimin appeared first on Agjencia Telegrafike Shqiptare.

TIRANË, 1 korrik/ATSH/ Bashkia e Vlorës u bë bashkia e parë në vend që nënshkroi paktin ndërinstitucional për punësimin, në kuadër të Forumit të tretë të Komunitetit dhe Biznesit për Migracionin dhe Diasporën, zhvilluar përgjatë dy ditëve në qytetin bregdetar në organizimin e IOM.

Pakti synon të ofrojë mundësi konkrete punësimi për individët duke koordinuar ofertën dhe kërkesën mes bashkive pritëse si Vlora ku sezoni turistik krijon vende të reja pune dhe bashkive dërguese kryesisht në veri apo verlindje të vendit që mundësojnë ofertat për individë të papunë.

Po ashtu, pakti ofron mundësi për emigrantët e kthyer në vend sikundër edhe ata të brendshëm që lëvizin për punë nga njëra bashki në tjetrën.

Në nënshkrimin e paktit ishin të pranishëm nënkryetarja e bashkisë së Vlorës, Irena Toshkollari, Alma Jani, drejtuese e Zyrës IOM në Shqipëri, si dhe përfaqësues nga institucionet qendrore dhe vendore, sektori privat, komunitetet lokale dhe diaspora.

Pas nënshkrimit të paktit, të pranishmit diskutuan mbi veprimet konkrete për qeverisjen e migracionit të brendshëm dhe angazhimin e diasporës për zhvillimin e qëndrueshëm të komuniteteve.

Projekti përfshin shtatë bashki pilot me të cilat IOM synon të nënshkruajë paktet ndërinstitucionale për punësim.

Forumi i tretë në këtë kuadër, pas Dibrës dhe Kukësit, solli së bashku aktorë të rëndësishëm nga institucionet publike, sektori privat dhe komunitetet lokale.

Diskutimet u përqendruan në koordinimin e punës për të nxitur punësimin nëpërmjet migracionit të brendshëm, për rritje të qëndrueshme të ekonomive lokale dhe për të ndihmuar edhe bizneset të gjejnë forcë punëtore.

Në Vlorë, sezoni po arrin pikun dhe përfaqësues të bizneseve të pranishëm në forum konfirmuan kërkesën e lartë për forcë punëtore, trendi i së cilës tashmë po orientohet drejt punonjësve të huaj.

Sipas tyre, shqiptarët janë në numra më të lartë të punësuar por numri i të huajve po rritet vit pas viti. Ndërkohë, u vu në dukje se koordinimi përmes bashkive i punësimit për individët që kërkojnë punë rezulton mjaft i rëndësishëm në proces.

Konsulentët lokalë të IOM në bashki shërbejnë si katalizatorë të këtij procesi duke ndërmjetësuar rastet konkrete me zyrat e punës, bizneset dhe aktorë të tjerë lokalë të formimit profesional.

Rezultatet e dy forumeve të parë kanë shërbyer si bazë e fortë për vazhdimin e dialogut dhe veprimeve të përbashkëta, duke nxitur angazhimin komunitar dhe institucional për një qeverisje më efektive të migracionit.

Forumi doli me objektivin për takime periodike në fillim dhe fund të sezonit turistik ku bizneset dhe institucionet lokale të diskutojnë nevojat e tregut të punës dhe ndajnë praktikat e mira për rezultate konkrete.

The post Bashkia e Vlorës nënshkruan paktin ndërinstitucional për punësim appeared first on Agjencia Telegrafike Shqiptare.

TIRANË, 30 qershor /ATSH/ Ministri i Bujqësisë dhe Zhvillimit Rural, Andis Salla, së bashku me kryetaren e bashkisë Vlorë, Brunilda Mersini, inspektuan sot Markatën e Peshkut në Vlorë, ku u finalizua kalimi i saj në pronësi të Bashkisë Vlorë, duke i hapur rrugë vënies në funksion të një infrastrukture moderne në shërbim të sektorit të peshkimit.

Gjatë vizitës, Salla e cilësoi këtë investim si një hap të rëndësishëm për modernizimin e peshkimit, formalizimin e tregut dhe zhvillimin e ekonomisë blu, duke theksuar se markata do të krijojë kushte bashkëkohore për grumbullimin, ruajtjen, përpunimin dhe tregtimin e produkteve të peshkimit sipas standardeve të Bashkimit Europian.

E integruar me Portin e Peshkimit dhe Portin e Ri Tregtar të Vlorës, Markata e Peshkut shtrihet në një sipërfaqe prej 1300 m² dhe përfshin 15 dhoma frigoriferike. Ajo do të funksionojë sipas standardeve të Bashkimit Europian, duke garantuar siguri ushqimore, formalizimin e tregut, rritjen e kapaciteteve të grumbullimit dhe ruajtjes së produkteve, si dhe krijimin e kushteve për eksport të drejtpërdrejtë drejt tregut europian.

Gjatë inspektimit, ministri Salla bëri të ditur se investimi prej 1,5 milionë eurosh, i financuar nga Ministria e Bujqësisë dhe Zhvillimit Rural, synon të modernizojë të gjithë zinxhirin e sektorit të peshkimit.

“Është një investim që Ministria e Bujqësisë ka financuar me 1.5 milionë euro për të siguruar mbarëvajtjen e sektorit të peshkimit, për ta sjellë në një ambient të sigurt, për ta magazinuar në dhoma frigoriferike dhe për eksport, sepse ne do të marrim edhe certifikatën për eksport”, u shpreh Salla.

Ministri theksoi se me vënien në funksion të kësaj markate, peshkatarët nuk do të kenë më nevojë të investojnë individualisht në ambiente magazinimi apo certifikime, pasi e gjithë infrastruktura e nevojshme do të ofrohet në një qendër të vetme.

“Të gjithë peshkatarët nuk do të kenë më nevojë të kenë një ambient të tyre për të siguruar një sipërfaqe të caktuar apo certifikime. Të gjitha produktet e tyre do t’i sjellin këtu. Kemi 15 dhoma frigoriferike për çdo biznes dhe sektor. Është një ambient i ri ku 28 anije peshkimi do të kenë mundësinë të depozitojnë produktet e tyre dhe më pas t’i eksportojnë ose t’i tregtojnë në tregun vendas”, deklaroi ai.

Sipas ministrit Salla, investimi krijon kushte moderne për ruajtjen, përpunimin dhe tregtimin e produkteve të peshkimit, duke rritur konkurrueshmërinë e sektorit dhe duke përmbushur standardet e kërkuara për eksport.

1 nga 2

/gj.m/r.e/

The post Salla: Markata e Peshkut në Vlorë, investim për modernizimin e peshkimit dhe zhvillimin e ekonomisë blu appeared first on Agjencia Telegrafike Shqiptare.

TIRANË, 30 qershor /ATSH/ Në bazën e Pashalimanit në Vlorë, ku i pranishëm ishte edhe kryeministri Edi Rama, u nënshkrua sot Memorandumi i Bashkëpunimit mes gjigandit italian të industrisë detare Fincantieri, kompanisë shtetërore KAYO dhe shkollës Industriale “Pavarësia” në Vlorë, me synim zhvillimin e praktikave profesionale dhe mundësi punësimi në fushën e ndërtimit dhe industrisë detare.

Drejtori ekzekutiv i Fincantieri-t, Pierroberto Folgiero, theksoi në fjalën e tij se pjesa më e rëndësishme nuk ka të bëjë vetëm me pjesën e kantierit të ndërtimit, por edhe me burimet njerëzore.

Folgiero deklaroi se suksesi i industrisë së ndërtimit të anijeve varet mbi të gjitha nga kapitali njerëzor, duke theksuar se kompania synon të investojë në formimin e profesionistëve.

“Fincantieri nuk është thjesht një ndërtues anijesh por është një orkestrues i njerëzve të talentuar. Pra pa njerëzit nuk ka industri dhe nuk ka sukses. Ne kemi 230 vite histori ku kemi ndërtuar mijëra anije, kemi 18 punishte që nga SHBA deri ën Vietnam për ndërtimin e anijeve. Kemi 9 miliard euro të ardhura, pra jemi trashëgimia e industrisë nga njëra anë, por nuk do të jemi këtu për 10 vitet e ardhshme nëse nuk tërheqim njerëz të talentuar për të punuar në punishtet tona të anijeve”, tha ai.

Sipas Folgiero-s, ndërtimi i anijeve mbetet një industri ku faktori njerëzor është vendimtar, ndërsa çdo euro e investuar në këtë sektor gjeneron të paktën katërfishin e vlerës në ekonomi.

Ai bëri të ditur se synimi është krijimi gradual i një ekosistemi që nis nga kapitali njerëzor dhe shtrihet në zhvillimin ekonomik e social përmes ndërtimit të anijeve.

“Ndërtimi i anijeve para çdo gjëje tjetër është një punë që bëhet nga njerëzit. Çdo euro e investuar në ndërtimin e anijeve, më pas shumëzohet me të paktën 4 herë. Jemi këtu për të krijuar në mënyrë progresive, një ekosistem i cili fillon nga kapitali njerëzor, por gjithashtu përkthehet në një set up më të gjerë ekonomik dhe ekosistem social së bashku me kantieret e ndërtimit. Do të kemi të paktën 500 njerëz, por shikojmë mundësinë për krijimin e konkurrencës, pasi na duhen profesione të ndryshme, si elektricist, mekanik, inxhinierë dhe njerëz me aftësi të larta dhe profesionistë, kjo është ajo që po kërkojmë”, tha Folgiero.

Folgiero theksoi se memorandumi i nënshkruar me KAYO dhe shkollën “Pavarësia” synon bashkëpunimin në përgatitjen e nxënësve dhe vazhdimin e mbështetjes edhe pas diplomimit të tyre.

“Ajo që po nënshkruajmë sot është në memorandum mirëkuptimi mes Fincantierit, KAYO dhe shkollës suaj shkollës “Pavarësia” të Vlorës. Dhe kjo bëhet që të jemi sa më efektiv të jetë e mundur në mënyrë të menjëhershme. Kemi idenë si të bashkëpunojmë me shkollën, por edhe pas diplomimit të studentëve. Do të vijojmë bashkëpunimin në 2026 që të jemi në gjendje gatishmërie në 2027”, u shpreh ai.

Në të njëjtën kohë, drejtori ekzekutiv i Fincantieri-t njoftoi se kompania planifikon të ndërtojë 10 mjete lundruese gjatë periudhës 2026–2030.

“Mendojmë të ndërtojmë 10 mjete lundruese në periudhën 2026-2030 dhe kemi projekte të qarta, do të jenë anije deri ne 80 metra.  Duam të rritemi më tej dhe të zgjerohemi më shumë në çdo lloj mundësie të mundur. Ky është projekti”, tha Folgiero.

/m.q/a.f/

The post KAYO marrëveshje me Fincantieri për industrinë detare, Folgiero: 500 vende pune, deri në 2030 do ndërtojmë 10 mjete lundruese appeared first on Agjencia Telegrafike Shqiptare.

TIRANË, 29 qershor/ATSH/ Kompleksi sportiv publik në Lungomaren e Vlorës vijon të jetë një nga hapësirat më të frekuentuara nga qytetarët dhe vizitorët, duke ofruar ambiente moderne për aktivitete sportive dhe rekreative buzë detit.

Kryeministri Edi Rama ndau sot ne rrjetet sociale pamje nga ky kompleks, i cili përfshin fusha multifunksionale për futboll, basketboll dhe tenis, si dhe kënde fitnesi në natyrë.

Kompleksi është pjesë e projektit të transformimit të Lungomares, i cili synoi krijimin e hapësirave publike për sport, shëtitje dhe argëtim përgjatë vijës bregdetare të Vlorës.

Krahas fushave sportive, zona ofron edhe shëtitore, ambiente pushimi dhe ndriçim modern, duke e bërë atë funksionale edhe gjatë orëve të mbrëmjes.

Hapësira sportive është kthyer në një pikë të rëndësishme për promovimin e aktiviteteve fizike në qytet dhe një nga destinacionet më të frekuentuara të Lungomares, veçanërisht gjatë sezonit turistik.

/m.m/a.f/

The post Kompleksi sportiv në Lungomaren e Vlorës, pikë referimi për qytetarët appeared first on Agjencia Telegrafike Shqiptare.

TIRANË, 25 qershor /ATSH/ Kryeministri Edi Rama deklaroi sot se Vlora vijon të transformohet përmes investimeve në hapësirat publike dhe infrastrukturën turistike, në funksion të zhvillimit urban dhe rritjes së cilësisë së shërbimeve për qytetarët dhe vizitorët.

Përmes një postimi në rrjetet sociale, Rama publikoi pamje nga Radhima, ku po zhvillohet projekti “Lungomare 4”, duke e cilësuar atë pjesë të transformimit të mëtejshëm të vijës bregdetare të Vlorës.

“Në ndërkohë Vlora vazhdon të zhvillohet me hapësira publike të denja për Shqipërinë 2030 në BE dhe kjo është një copëz e transformimit të Radhimës, ku po merr jetë Lungomare 4 e po rritet numri i hoteleve të një niveli më të mirë”, u shpreh Rama.

Radhima dhe zona bregdetare e Vlorës kanë njohur vitet e fundit një rritje të investimeve në sektorin e turizmit, hotelerisë dhe shërbimeve, duke u kthyer në një nga destinacionet më të frekuentuara të Rivierës shqiptare.

Projekti “Lungomare 4” është pjesë e investimeve për zgjerimin dhe modernizimin e shëtitores bregdetare, me synimin për të krijuar më shumë hapësira rekreative dhe lehtësira për banorët dhe vizitorët.

“Lungomare 4” është vazhdimi i shëtitores ekzistuese në krahun perëndimor, me një gjatësi fillestare prej rreth 500 metrash linearë.

Projekti parashikon ndërtimin e një promenade me gjerësi rreth 7 metra, si dhe një piste biçikletash prej 2 metrash, duke krijuar një hapësirë funksionale dhe të integruar për këmbësorët dhe përdoruesit e biçikletave.

/gj.m/r.e/a.f/

The post Rama: Radhima po transformohet, “Lungomare 4” po merr jetë appeared first on Agjencia Telegrafike Shqiptare.