Gazeta gjermane Frankfurter Allgemeine Zeitung ka shkruar në numrin e të mërkurës për presidenten e Kosovës, Vjosa Osmani, duke vënë në qendër të vëmendjes një analizë politike lidhur me ambicien e saj për të fituar një mandat të dytë si presidente.

Gazetari i FAZ, Michael Martens, ka raportuar se Osmani po shikon të demonstrojë afërsinë me familjen presidenciale të Shteteve të Bashkuara për të siguruar rizgjedhjen e saj në postin më të lartë të shtetit.

Sipas shkrimit, presidentja e Kosovës ka përdorur lidhjet me ish-presidentin amerikan Donald Trump dhe familjen e tij për të fuqizuar profilin e saj ndërkombëtar.

“Por, kalkulimi i saj mund të dështojë – edhe pse ajo arriti që Kosovën ta bëjë një nga shtetet që së fundmi në Davos iu bashkuan ‘Bordit të Paqes’ enigmatik të Donald Trumpit”, shkruan FAZ. “Osmani u shfaq në Zvicër me krenari krah presidentit amerikan dhe që atëherë flet për arritjen e madhe që, sipas saj, përfaqëson fakti se vendi i saj u bë anëtare themeluese e këtij formacioni”.

Reagon këshilltari i Osmanit ndaj gazetarit të FAZ-it: Presidentja po shqyrton veprimet ligjore në Gjermani

Pas publikimit të artikullit, Presidenca e Kosovës ka reaguar zyrtarisht. Këshilltari i presidentes, Rinor Nuhiu, ka njoftuar se po shqyrtohen masa ligjore ndaj gazetarit Michael Martens për shkrimin e tij të publikuar të mërkurën.

Sipas Nuhiut, artikulli pretendon se Osmani po përdor “kartën amerikane” për të siguruar një mandat të dytë, një pretendim që Presidenca e konsideron të papërshtatshëm dhe të pasaktë.

Ndërkaq, vetë gazetari Michael Martens ka reaguar përmes rrjetit social X, duke treguar se qëndron pas raportimit të tij dhe se shkrimi pasqyron një analizë politike dhe jo një sulm personal ndaj presidentes Osmani.

Osmani sërish në fokusin e kritikave nga gazetari i FAZ-it: Po shfaqet si “kandidatja e Trumpit” për të siguruar mandatin e dytë

Ai thekson se si gazetar me përvojë ka trajtuar çështje të ndjeshme ndërkombëtare dhe ka raportuar për figura të fuqishme pa u paditur ndonjëherë.

“Mësoj e mësoj. Jam në gazetari prej 30 vitesh, kam jetuar dhe punuar në vende të vështira si Rusia, Afganistani apo Turqia, duke shkruar për oligarkët rusë, kriminelët e luftës serbë, kontrabandistët malazezë të cigareve, rebelët kurdë, krerët e luftës në Afganistan, pa u paditur kurrë. Por tani…", u shpreh Martens./Telegrafi.

Pas zgjedhjeve të 28 dhjetorit, tashmë pritet formimi i institucioneve, ku pastaj Kosova duhet të zgjedhë edhe presidentin ose presidenten e re.

Presidentja aktuale, Vjosa Osmani, ka konfirmuar publikisht se synon të kandidojë për një mandat të dytë. Mandati i saj aktual përfundon në prill të këtij viti.

Në rrjetet sociale dhe në diskursin publik kanë qarkulluar disa emra si kandidatë të mundshëm, por deri tani nuk ka asnjë konfirmim zyrtar.

Mes spekulimeve më të shpeshta është edhe familja Jashari.

Lulzim Jashari, djali i komandantit legjendar Adem Jashari, është përmendur dhe i janë shpërndarë edhe foto në rrjetet sociale, por i njëjti deri më tani nuk ka dhënë asnjë deklaratë për kandidaturën e mundshme.

Edhe Lumir Abdixhiku, kryetar i LDK-së, përmendet si kandidat potencial, por as ai personalisht e as partia që udhëheq nuk kanë konfirmuar diçka zyrtare.

Ai ka theksuar rëndësinë e komunikimit brenda spektrit të gjerë politik dhe u shpreh i gatshëm të bashkëbisedojë me të gjitha partitë për çështjen e zgjedhjes së një presidenti konsensual të Kosovës, duke sqaruar se dialogu nuk nënkupton “pazare politike”.

Nga ana tjetër, Ramush Haradinaj diskutohet si kandidat i mundshëm konsensual i opozitës.

Sipas Pal Lekajt, nënkryetarit të Aleancës për Ardhmërinë e Kosovës, Haradinaj është në komunikim me kryetarët e PDK-së dhe LDK-së, por ende nuk ka vendim përfundimtar dhe nuk dihet se sa kanë avancuar bisedimet.

Në anën tjetër profesori i Fakultetit Juridik, Kolë Krasniqi, ka bërë të ditur se është propozuar si kandidat për President të Republikës së Kosovës.

Ai në një postim në Facebook ka deklaruar se Republika e Kosovës ka nevojë për institucione që gëzojnë besim.

Profesori Kolë Krasniqi thotë se është propozuar për president të Kosovës

Në rast se presidenti nuk zgjidhet brenda afatit kushtetues, Kosova mund të shkojë drejt zgjedhjeve të reja, por partitë politike kanë theksuar se duhet të ketë diskutime paraprake për të ruajtur stabilitetin institucional.

Komisioni Qendror i Zgjedhjeve ka shpallur rezultatet finale, dhe së shpejti pritet krijimi i institucioneve të reja – Kuvendi dhe qeveria. Pas formimit të tyre, rendi i ditës do të përfshijë edhe zgjedhjen e presidentit të ri për një mandat pesëvjeçar./Telegrafi/

Presidentja e Republikës së Kosovës, Vjosa Osmani ka takuar sot shefin e Misionit të OSBE-së në Kosovë, ambasadorin Gerard McGurk, me të cilin diskutoi për zhvillimet e fundit politike dhe institucionale në Kosovë.

Sipas një njoftimi për media bëhet e ditur se gjatë takimit u diskutua për procesin e zgjedhjeve parlamentare të 28 dhjetorit, ndaj në këtë kontekst, Osmani theksoi rëndësinë e konstituimit sa më të shpejtë të institucioneve.

“Tutje, Presidentja Osmani dhe ambasadori McGurk diskutuan edhe rëndësinë e bashkëpunimit të vazhdueshëm midis institucioneve të Kosovës dhe OSBE-së në funksion të forcimit të demokracisë dhe sundimit të ligjit”, thuhet në njoftim. /Telegrafi/

Kosova tashmë është bërë pjesë e Bordit të Paqes, pas nënshkrimit të një marrëveshjeje të rëndësishme nga presidentja e vendit, Vjosa Osmani.

Marrëveshja u nënshkrua në Davos, në prani të presidentit të Shteteve të Bashkuara të Amerikës, Donald Trump, duke shënuar një moment domethënës për rolin e Kosovës në arenën ndërkombëtare.

Ajo që ra veçanërisht në sy gjatë kësaj ngjarjeje ishte edhe shtrëngimi i duarve mes presidentes Osmani dhe presidentit Trump, në mesin e shumë përfaqësuesve dhe liderëve nga shtete të ndryshme të botës, edhe pas përfundimit të ceremonisë së nënshkrimit.

Një tjetër detaj interesant i kësaj ngjarjeje ishte fakti se Vjosa Osmani ishte e vetmja grua në mesin e liderëve botërorë të pranishëm, duke e bërë përfaqësimin e Kosovës edhe më të veçantë dhe simbolik në një tryezë të dominuar nga figura mashkullore. /Telegrafi/

Presidentja e vendit, Vjosa Osmani në praninë e presidentit të SHBA-së, Donald Trump ka nënshkruar marrëveshjen për pjesëmarrjen në Bordin e Paqes në Davos.

Osmani u pa duke shkëmbyer edhe një bisedë të shkurtë me presidentin Trump, ku më pas nënshkroi marrëveshjen e cila u prit me duartrokitje nga të pranishmit e tjerë.

Por, çka është Bordi i Paqes?

Administrata e presidentit të SHBA-së, Donald Trump, ka kontaktuar figura të ndryshme anembanë botës për t'u bërë pjesë e të ashtuquajturit "Bordi i Paqes" dhe në entitete të lidhura me të, të cilat synojnë të mbikëqyrin qeverisjen dhe rindërtimin në Gazën e pasluftës.

Shtëpia e Bardhë tha se do të ketë një bord kryesor, të kryesuar nga vetë Trump, një komitet palestinez teknokratësh, të cilët synojnë të qeverisin territorin e shkatërruar nga lufta, dhe një "bord ekzekutiv" të dytë që duket se është projektuar të ketë një rol më këshillues. /Telegrafi/

Kryetari i Aleancës për Ardhmërinë e Kosovës (AAK), Ramush Haradinaj ka uruar presidenten Vjosa Osmani pas ftesës që mori nga presidenti, Donald Trump për të marrë pjesë në Bordin e Paqes në SHBA.

Haradinaj përmes një postimi në rrjetin social në Facebook ka shkruar: “Është lajm i mirë ftesa e Presidentit Trump drejtuar Presidentes së Republikës së Kosovës, Vjosa Osmani, veçanërisht në këto kohë tejet kritike për sigurinë globale. Pjesëmarrja e Kosovës dhe e Shqipërisë në Bordin e Paqes, si pjesëtare të një strukture ku marrin pjesë liderët e botës demokratike në përpjekje për ndërtimin dhe ruajtjen e paqes, nën udhëheqjen e Shteteve të Bashkuara dhe Presidentit Trump, është një dritare shprese për ne”.

Trump fton Kosovën në Bordin e Paqes, presidentja Osmani publikon letrën e presidentit amerikan

Sipas tij, kjo pjesëmarrje përforcon rolin e Kosovës si një faktor konstruktiv i paqes dhe stabilitetit rajonal dhe global.

“Si dhe krijon mundësi konkrete për riforcimin e partneritetit strategjik me SHBA-në, i cili ka qenë dhe mbetet shtylla kryesore e sigurisë, shtetndërtimit dhe orientimit euroatlantik të Kosovës. Rikthimi i Kosovës si një partner i besueshëm dhe serioz i Shteteve të Bashkuara është jetik jo vetëm për garantimin e sigurisë kombëtare, por edhe për avancimin e interesave tona shtetërore, përfshirë integrimin euroatlantik, zhvillimin ekonomik dhe forcimin e pozitës ndërkombëtare të vendit”, ka shkruar Haradinaj. /Telegrafi/

Veprimtari i njohur i komunitetit shqiptaro-amerikan në Shtetet e Bashkuara të Amerikës, Harry Bajraktari ka ndalë publikisht në mbështetje të Vjosa Osmani, si presidente e vendit edhe për mandat.

Bajraktari, i cili ishte përfolur në publik si kandidat i mundshëm për president të Kosovës, përmes një video në Facebook u ka bërë thirrje deputetëve, të pozitës dhe opozitës që të votojnë Osmanin edhe për një mandant.

“Për 5 vite presidentja Vjosa Osmani ka punuar ngushtë me komunitetin shqiptaro- amerikanë dhe me miqtë tanë në Uashington.

Punën që kemi nisur së bashku nuk duhet të ndalet, objektivi është i qartë, anëtarësimi i Kosovës në NATO, prandaj unë e përkrahu fuqishëm edhe një mandat të dytë për presidenten Osmani.

Për pesë vjet presidentja Osmani ka përfaqësuar Kosovën me dinjitet dhe ka forcuar lidhjen me SHBA. Tani më shumë se kurrë nga duhet institucione të forta, koordinim me aleatë dhe lidership që e njeh procesin.

Kosova nuk fiton asgjë nga përçarjet, bllokadat apo zgjedhjet e reja. U bëj thirrje deputetëve, pozitë e opozitë votojeni presidenten Osmani për mandat të dytë në krye të shtetit”, thotë Bajraktari. /Telegrafi/

Presidentja e Republikës së Kosovës, Vjosa Osmani ka filluar një lloj parafushate në rrjetet e saj sociale, ku po promovon punën e saj pesëvjeçare. Kjo vjen në një kohë kur në opinion po flitet se emri i saj mund të propozohet edhe për një mandat të dytë në krye të shtetit.

Sipas analistëve politikë, Osmani përmes kësaj qasjeje po ushtron presion publik medial ndaj kryeministrit në detyrë, Albin Kurti, për një rikandidim të mundshëm, duke synuar që para opinionit publik të dëshmojë se zgjedhja e saj është e duhura për vendin.

Analisti politik, Artan Muhaxhiri, ka thënë për KosovaPress se pozita e presidentes aktuale është e vështirë për shkak të ndryshimeve në kontekstin politik krahasuar me vitin 2021, kur ajo u zgjodh për herë të parë.

Sipas tij, çdo gjë do të varet nga lideri i Lëvizjes Vetëvendosje, subjektit që i fitoi bindshëm zgjedhjet e 28 dhjetorit.

Kjo, për faktin se Osmani e Kurti nuk ishin gjithmonë në linjë të njëjtë karshi zhvillimeve në vend dhe atyre ndërkombëtare.

“Presidentja Osmani është në pozitë shumë të vështirë sepse i gjithë konteksti politik ka ndryshuar në raport me vitin 2021, kur është zgjedhur për herë të parë dhe tash varet nga shumë faktorë të tjerë të cilët nuk janë në dorën e saj.. Çdo gjë do të varet nga Kurti sepse 51 përqindëshi ia jep këtë mundësi dhe deri në momentin e fundit as vet presidentja Osmani, nuk do ta ketë të qartë nëse do të rikandidohet sërish nga Kurti apo jo..

Presidentja Osmani në nivelin vendor ka qenë plotësisht në binarët e njëjtë me Kurtin gjatë mandatit tij, mirëpo në arenën ndërkombëtare ka pasur disa suksese, ka pasur një dallim me Kurtin sepse ka qenë më e pranueshme dhe më bashkëpunuese me faktorin ndërkombëtarë, me SHBA-të dhe vendet e fuqishme të BE-së. Disa punë janë meritë e saj, por gjithsesi besoj që është e qartë sesa ka qenë ndikimi i saj real politik”, ka thënë Muhaxhiri.

Sipas tij, kjo parafushatë e presidentes, përveç presionit publik medial ndaj Kurtit, synon edhe krijimin e një arsyetimi në rast se ajo nuk rikandidohet, në mënyrë që të mbahet mend si lidere e suksesshme.

“Është duke dashur që të bëj një presion publik medial ndaj Kurtit por edhe nëse eventualisht nuk rikandidohet atëherë të ketë një lloj arsyetimi për atë se nuk ka qenë arsyeja e mos punës saj, mos suksesit saj, por ka qenë në rrethana tjera të cilat janë diktuar nga Kurti dhe gjithsesi është një dëshirë e saj që mandati i saj të mbahet mend me suksese, sipas perspektivës së saj, por gjithsesi vendimin më realist e japin qytetarët dhe kjo nuk varet kryesisht nga fushata mediale e presidentes”, ka shtuar ai.

Ndërkohë, analisti tjetër politik, Dorajet Imeri, ka vlerësuar se komunikimi i Osmanit me publikun është i pritshëm, por nuk është vendimtar për procesin e zgjedhjes së presidentit.

Për tepër, Imeri thotë se një pjesë e punëve që po prezanton Osmani në rrjete sociale nuk janë të saj.

Ai ka shtruar edhe pyetjen se pse presidentja Osmani nuk flet me LDK-në në vend të parafushatës, për të ofruar ofertën dhe qëndrimet e saj për të qenë e para e vendit, edhe për në mandat.

“Është e pritshme, në përpjekjen e saj për të krijuar në opinion të përgjithshëm që zgjedhja e saj është e duhura, e nevojshme. Nuk parashihet me ligj që të ketë një periudhë fushate për kandidatët për president. Gjithsesi kjo nuk e ndalon që të komunikoj me publikun, kjo nuk mund të ndryshoj sjelljen e partive sepse nuk varen detyrimisht nga opinioni publik i krijuar në një moment të caktuar, së paku jo tek rasti i presidentit, mund ti kushtoj pastaj me votë...

Një pjesë e punëve që po prezanton Osmani nuk janë të saj, por nuk do të thotë që si ka bërë mirë si angazhim që ka pasur profesionalisht... Pyetja që shtrohet këtu është se pse Osmani nuk flet me LDK-në dhe besoj se do të ishte më mirë prej saj që të ftonte kreun e LDK-së, për të ofruar qëndrimet e saj dhe ofertën e saj për të qenë e para e vendit në kuptimin e komunikimit me partitë që duhet ta votojnë Osmanin”, ka thënë Imeri.

Presidentja Osmani ka disa ditë që po publikon video përmbledhëse të takimeve zyrtare gjatë mandatit pesëvjeçar të saj. Ajo ka publikuar fjalimin e saj në Këshillin e Sigurimit të OKB-së përballë presidentit të Serbisë, Aleksandar Vuçiq.

Më pas edhe një video midis ushtrisë amerikane në akademinë e në Ëest Point, si edhe në Parlamentin Evropian, e poashtu edhe vizitën e presidentin e SHBA-së Donald Trump, në seli të NATO-s dhe plot vizita të tjera. Të gjitha këto, me mbishkrimin “Kur Kosova flet me dinjitet, bota dëgjon. Zëri i Kosovës po fuqizohet çdo ditë. Shpërndaje edhe ti, që ta dëgjojnë të gjithë”.

Osmani më 4 prill të vitit 2021, ishte zgjedhur për një mandat pesëvjeçar. Sipas Kushtetutës, zgjedhja e presidentit të ri duhet të bëhet jo më vonë se 30 ditë para përfundimit të mandatit të presidentit aktual.

Nëse deri më 5 mars nuk zgjidhet presidenti i ri, vendi shkon në zgjedhje të jashtëzakonshme brenda 45 ditësh. /KP/

Zgjedhja e Presidentes apo Presidentit të ri të Kosovës, sipas analistit të politikave Agron Demi, nuk pritet të shoqërohet me bllokadë institucionale, pavarësisht debateve politike që mund të zhvillohen.

Sipas tij, bazë për këtë është vendimi i Gjykata Kushtetuese e Kosovës në rastin e Behgjet Pacollit, i cili përcakton qartë obligimin e deputetëve për të marrë pjesë në procesin e votimit.

“Deputetët janë të obliguar me marrë pjesë në votim. Edhe nëse nuk arrihet zgjedhja në dy rundet e para, në rundin e tretë Presidenti zgjidhet me 61 vota, por deputetët duhet të jenë të pranishëm”, u shpreh Demi në “Përballje Podcast”, shkruan Telegrafi.

Ai theksoi se partitë politike nuk kanë më hapësirë për manovra apo bllokada të qëllimshme, pasi përvoja e kaluar ka treguar se zvarritjet institucionale nuk u kanë sjellë përfitime politike.

“Bllokada disamujore, edhe pse realisht përgjegjësia ishte kryesisht e partisë në pushtet, në perceptimin publik përfundimisht nuk e dëmtoi Vetëvendosjen”, tha Demi, duke shtuar se kjo parti ka arritur ta menaxhojë narrativën politike në favor të saj.

Sipas analistit, një raund i ri zgjedhjesh parlamentare nuk do t’u konvenonte as partive opozitare.

Ai përmendi se Lidhja Demokratike e Kosovës pritet të hyjë në procese të brendshme zgjedhore, ndërsa një lidership i ri nuk do të rrezikonte përballjen me zgjedhje të reja brenda pak muajsh.

- YouTube www.youtube.com

Një situatë e ngjashme, sipas tij, vlen edhe për Partinë Demokratike të Kosovës dhe AAK-në, të cilat nuk kanë interes të futen sërish në një cikël zgjedhor të shpejtë.

Demi foli edhe për faktorë të jashtëm që mund të ndikojnë në kalkulimet politike, përfshirë vendimet e mundshme nga Haga për ish-krerët e UÇK-së dhe PDK-së.

Në përmbyllje, Demi theksoi se rezultatet e zgjedhjeve të fundit dhe pjesëmarrja e mërgatës kanë treguar se Vetëvendosje, veçanërisht lideri i saj Albin Kurti, ka qenë disa hapa përpara në menaxhimin e skenarëve politikë.

“Edhe zvarritjet institucionale, në fund, janë shndërruar në avantazh elektoral për partinë në pushtet”, tha ai, duke shtuar se dalja më e ulët në votime në disa raste ka ndikuar drejtpërdrejt në rezultatin final.

Për qytetarët, viti 2026 nuk është debat politik, por një pyetje e drejtpërdrejtë, a do të ketë punë, mirëqenie, shërbime më të mira dhe stabilitet institucional?

Pas një bllokade njëvjeçare, Kosova po hyn më në fund në një fazë të re politike. Zgjedhjet u përmbyllën pa incidente dhe me publikim rekord të rezultateve preliminare nga KQZ-ja, një tregues i funksionimit demokratik dhe stabilitetit institucional.

Sipas rezultateve, qytetarët i dhanë Albin Kurtit edhe një mandat tjetër. Me 56 deputetë të siguruar nga LVV dhe partnerët e saj, formimi i Qeverisë Kurti 3 duket çështje kohe. Por fitorja në zgjedhje nuk e zëvendëson përgjegjësinë e qeverisjes. Përkundrazi, viti 2026 do të jetë test politik dhe institucional.

Pesë sfida do ta përcaktojnë jo vetëm punën e Qeverisë Kurti 3, por edhe besimin e qytetarëve në politikë dhe qeverisje.

Buxheti 2026 dhe ekonomia

Sfida kryesore mbetet ekonomia. Miratimi i Buxhetit 2026 duhet të jetë urgjent, i qëndrueshëm dhe zhvillimor. Pa investime kapitale, mbështetje për sektorin privat dhe menaxhim të kujdesshëm fiskal, çdo reformë tjetër mbetet e kufizuar.

Përveç menaxhimit fiskal, qeveria duhet të adresojë çmimet e larta të energjisë, inflacionin dhe presionin mbi buxhetin e familjeve. Nevojitet mbështetje institucionale e qëndrueshme për bizneset dhe qytetarët, për të shmangur rritje të mëtejshme të çmimeve dhe pasoja të thella sociale.

Zgjedhja e Presidentit – testi real

Në pranverën e vitit 2026 pritet zgjedhja e Presidentit/es. Ky proces nuk duhet ta fusë vendin në krizë politike apo ta çojë drejt zgjedhjeve të reja. Kërkohet kompromis dhe pjekuri institucionale.

Deri tash, presidentja Vjosa Osmani ka shprehur gatishmërinë e saj për një mandat të dytë. A do të ndodhë kjo apo do të kemi një figurë tjetër në krye të institucionit, do ta tregojë koha e afërt.

Kjo situatë do të jetë testi real për Qeverinë Kurti 3 dhe për qëndrimet që do të mbajnë subjektet kryesore politike – PDK, LDK dhe AAK në Kuvendin e Kosovës.

Kuvendi dhe agjenda legjislative

Pas bllokadave të gjata, Kuvendi duhet të funksionojë. Para deputetëve janë ligje dhe marrëveshje kyçe, përfshirë marrëveshjet financiare me Bankën Botërore, projektet për shëndetësi dhe arsim, si dhe shqyrtimi i parë i Buxhetit 2026.

Foto: Ridvan Slivova

Këto vendime përcaktojnë zhvillimin ekonomik dhe raportet ndërkombëtare të Kosovës. Çdo bllokadë e re do të ishte jo vetëm dështim politik, por edhe kosto direkte për qytetarët.

Politika e jashtme dhe partnerët

Raportet me Bashkimin Evropian dhe ruajtja e aleancës me Shtetet e Bashkuara të Amerikës mbeten sfida serioze. Kosova ka nevojë për diplomaci më proaktive dhe më pak konfrontim që çon në izolim.

Izolimi diplomatik nuk është veprim i mençur, por rrezik strategjik për një shtet të vogël. Njohjet e reja dhe anëtarësimi në organizata dhe institucione ndërkombëtare mbeten prioritet kyç. Dialogu me Serbinë do të jetë në fokus, por edhe në varësi të situatës politike në Serbi.

Qeverisja e brendshme

Arsimi, shëndetësia dhe administrata publike mbeten test për çdo qeveri, e sidomos për një qeveri me mandat të dytë apo të tretë. Qytetarët presin rezultate konkrete, jo justifikime politike.

Zgjedhjet përfunduan. Tani nuk ka më arsyetime, as fajësime. Viti 2026 do të tregojë nëse mandati i ri do të mbahet mend për qeverisje, apo për një tjetër shans të humbur./Telegrafi/.

Në ditën e fundit të vitit, Presidentja e Republikës së Kosovës, Vjosa Osmani, ka qëndruar për vizitë në repartin e hemato-onkologjisë në Klinikën e Pediatrisë, ku janë duke u trajtuar fëmijë me sëmundje të rënda, për të cilët ajo përcolli mesazhe mbështetjeje dhe solidariteti.

Gjatë kësaj vizite, Osmani u takua nga afër me fëmijët dhe prindërit e tyre, duke vlerësuar forcën dhe përkushtimin që ata po tregojnë në përballje me sfida të mëdha shëndetësore. Ajo theksoi se guximi i fëmijëve dhe dashuria e familjarëve përbëjnë shembull frymëzimi për shoqërinë.

Presidentja vuri në dukje se, ndonëse koha në ambiente të tilla duket se ecën më ngadalë, shpresa mbetet gjithmonë e gjallë dhe e fortë.

“Uroj që viti që vjen të sjellë shëndet, shërim, gëzim dhe mrekulli të vogla e të mëdha për këta fëmijë të jashtëzakonshëm dhe për familjet e tyre”, deklaroi Osmani.

Në një postim në rrjetet sociale, Presidentja përshkroi vizitën si një përvojë të veçantë, duke theksuar se repartet e tilla dëshmojnë se shpresa dhe dashuria janë forca të pazëvendësueshme në procesin e shërimit.

Ajo falënderoi gjithashtu stafin mjekësor për punën dhe përkushtimin e vazhdueshëm në kujdesin ndaj fëmijëve. /Telegrafi/

Presidentja e Kosovës, Vjosa Osmani, ka bërë të ditur se vendi ka hyrë në një “tempo të re” sa i përket sigurimit të njohjeve të reja ndërkombëtare dhe se në pjesën e parë të vitit 2026 priten “lajme të mira” për vendin në këtë drejtim.

“Jemi shumë afër që të arrijmë 2/3 e shteteve anëtare të Organizatës së Kombeve të Bashkuara”, ka thënë Osmani.

Presidentja ka refuzuar të përmendë emrat e shteteve mosnjohëse me të cilat Kosova ka kontakte, duke shpjeguar se një publikim i tillë mund të pengohet nga Serbia.

“Në fakt, ne në këtë vit kishim katër njohje, të cilat janë rezultat i një pune dhe i një angazhimi të vazhdueshëm. Dhe tani është krijuar një tempo e re, një tempo e re njohjesh, natyrisht e cila nuk do të ndalet, ka shumë shtete që janë afër marrjes së vendimit. Por, mos të harrojmë që gjithnjë i dëmton interesat e Kosovës, nëqoftëse flasim për këto shtete publikisht. Dhe dua t’ju bëj thirrje edhe njerëzve të tjerë, qoftë edhe brenda institucioneve dhe jashtë tyre, që mos t’i bëjnë publike emrat e shteteve që po punojnë, sepse kjo pastaj po e nxit Serbinë dhe shtetet e tjera që të angazhohen, shpeshherë edhe me mjete jashtë diplomacisë dhe me mjete të ndryshme presioni, për të bllokuar këtë proces të pakthyeshëm për Kosovën”, shtoi ajo për indeksonline.

Bahamas u bë shteti i 121-të që e njohu Republikën e Kosovës si shtet të pavarur dhe sovran.

Presidentja e Republikës së Kosovës, Vjosa Osmani, gjatë qëndrimit në Bruksel është takuar me Presidentin e Këshillit të Bashkimit Evropian, António Costa.

Sipas një postimi në rrjetin social në Facebook ka shkruar se në Bruksel u mirëprit nga presidenti i Këshillit të Bashkimit Evropian, Antonio Costa.

"Mirëpresim vendimin e BE-së për heqjen e pjesshme të masave, përderisa shpresojmë e punojmë që, sa më parë, ato të hiqen në tërësi. Republika e Kosovës ka dëshmuar konstruktivitet, bashkëpunim e përputhshmëri të plotë me politikën e jashtme e të sigurisë të Bashkimit Evropian. Në takim potencova se Kosova ka përmbushur të gjitha kushtet e përcaktuara nga vetë BE, sado që ato ishin të padrejta, prandaj nuk ka asnjë arsye që të pengohet e shtyhet heqja e masave të tjera të mbetura. Në anën tjetër, shpresojmë që sa më parë, të kemi përkrahjen e të gjitha shteteve anëtare që edhe Kosova, bazuar në merita, të marrë statusin e kandidatit për anëtarësim në Bashkimin Evropian", ka shkruar Osmani. /Telegrafi/

Pas vizitës që ia bëri sot presidentja e vendit, Vjosa Osmani ish bashkpartiakut të saj Faton Peci i cili tashmë udhëheq më Komunën e Mitrovicës, ka reaguar ish-deputeti Avdullah Hoti.

Hoti përmes një postimi në rrjetin social në Facebook ka shkruar se kur Presidentja zgjedh kë të urojë sipas afërsisë partiake “Zyra e Presidentit shndërrohet në zyrë politike”.

Ai tha se shkuarja në Mitrovicë për ta uruar ish-bashkëthemeluesin e partisë është shkelje e hapur e rolit kushtetues.

“Kjo Presidente nuk përfaqëson unitet, por favorizime dhe përçarje”, ka shkruar ndër të tjera Hoti. /Telegrafi/

Presidentja e vendit, Vjosa Osmani ka zhvilluar një takim me homologun e saj nga Shqipëria, Bajram Begaj.

Osmani përmes një postimi në rrjetin social në Facebook ka shkruar se në këtë takim kanë biseduar për bashkëpunimin të pandalshëm dhe nevojën që Kosova dhe Shqipëria të jenë gjithmonë pranë njëra-tjetrës.

“Në një takim të ngrohtë fundvitit, sot pata kënaqësinë ta pres Presidentin e Shqipërisë, Bajram Begaj, me të cilin biseduam për bashkëpunimin tonë të pandalshëm dhe nevojën që Kosova dhe Shqipëria të jenë gjithmonë pranë njëra-tjetrës. Në prag të festave të fundvitit, i përcolla urimet më të përzemërta, me dëshirën që viti që vjen të sjellë edhe më shumë afërsi, më shumë bashkëpunim dhe hapa të suksesshëm drejt Bashkimit Evropian për dy shtetet tona”, ka shkruar Osmani. /Telegrafi/

Në Kosovë s’ka pasur dhe nuk do të ketë asnjëherë qeveri anti-amerikane, tha presidentja e vendit Vjosa Osmani.

Sipas saj, në Kosovë ka pasur dhe do të ketë gjithnjë qeveri më proamerikane që mund të gjejë dikush.

Megjithatë, ajo tha se secila qeveri i ka metodat, strategjitë dhe mënyrën sesi punon me partnerët.

E para e vendit, tha se ajo ka një bashkëpunim të ngushtë me SHBA-në, pasi e sheh si partner ekzistencial në zhvillimin dhe mbrojtjen e lirisë dhe pavarësisë së Kosovës.

Këtë koment ajo e dha pasi u pyet nga mediat të hënën për deklaratën e ish diplomatit amerikan, Philip Reeker, i cili ditë më parë tha se Kosova ka nevojë për një qeveri e cila mund të bashkëpunojë me Shtetet e Bashkuara të Amerikës.

Osmani të hënën priti në takim edhe dy kongresistë amerikan, Mike Turner dhe Donald Norcross.

“Në Kosovë nuk ka pasur dhe as nuk do të ketë asnjëherë qeveri anti-amerikane. Në Kosovë ka pasur dhe do të ketë gjithnjë edhe në të ardhmen qeveri më proamerikane që mund të gjejë dikush. Ne e kemi popullin më pro amerikan në botë dhe secila qeveri e Kosovës që vjen është nga ky popull. Ne nuk mund të kemi dallime mes popullit që krijon qeveri apo votuesit që krijon qeveri dhe qeverisë, përderisa secila qeveri i ka metodat, strategjitë dhe mënyrën sesi punon me partnerët. Për atë sesi kanë punuar dhe si do të punojnë në të ardhmen unë iu sugjeroj të adresoni pyetjet në qeveri. Sa i përket punës sime si presidente mund t’iu siguroj se kam pasur dhe vazhdoj të kem një bashkëpunim të ngushtë me SHBA-në pasi i shoh si partner ekzistencial në zhvillimin e Kosovës dhe mbrojtjen e lirisë dhe pavarësisë sonë si dhe tejkalimin e sfidave të sigurisë që ballafaqohemi”, theksoi ajo. /KP/

Presidentja e Kosovës, Vjosa Osmani ka pritur në takim ministrin e Punëve të Jashtme të Gjermanisë, Johann Wadephul.

Takimi ndërmjet tyre është duke u mbajtur në presidencës.

Pas Osmanit, ministri gjerman do të zhvillojë një takim edhe me kryeministrin në detyrë, Albin Kurti./Telegrafi/

Presidentja Vjosa Osmani ka deklaruar se rrëmbimi i shtetasit të Kosovës, Millan Vukashinoviq, nga autoritetet serbe, ka ndodhur brenda territorit të Kosovës.

Ajo e cilësoi këtë si krim dhe provokim të rëndë nga Serbia.

Sipas të parës së vendit, edhe po të kishte ndodhur rrëmbimi brenda territorit të Serbisë, përsëri ky do të ishte provokim i rëndë dhe cenim i stabilitetit të Kosovës.

Më 1 nëntor 2025, Policia e Kosovës kishte njoftuar se ka pranuar një informacion se në zonën e Leposaviqit, një person (M. V.), shtetas i Republikës së Kosovës (i nacionalitetit serb), dyshohet se është plagosur dhe është rrëmbyer brenda territorit të Republikës së Kosovës nga xhandarmëria serbe.

“Sipas të dhënave kadastrale, ajo është pjesë e territorit të Republikës së Kosovës. Sa i përket hetimit që po e bëjnë institucionet tona në bashkëpunim me institucionet e sigurisë të shteteve aleate, ne ende po presim konkluzionin final. Megjithatë, sa i përket informatave të deritanishme të institucioneve të sigurisë, ju keni parë deklarimet e Policisë së Kosovës, por edhe të institucioneve të tjera të sigurisë, se e kanë të njëjtin konkluzion se ka qenë brenda territorit të Kosovës. Mirëpo përtej kësaj, pavarësisht se ku ka ndodhur, kjo është krim, provokim i rëndë dhe tentim vrasje nga institucionet shtetërore të Serbisë ndaj një qytetari të Kosovës. Kjo, sikur të kishte ndodhur brenda territorit të Serbisë gjë që nuk është e vërtetë përsëri do të ishte provokim i rëndë dhe në kundërshtim me synimet për paqe dhe stabilitet afatgjatë në rajonin tonë, gjë të cilën Serbia e rrezikon vazhdimisht”, tha ajo.

E para e vendit tha se që nga momenti i incidentit, ajo ka qenë në kontakt të vazhdueshëm me përfaqësuesit e QUINT-it dhe me institucionet vendore për ta ndjekur rastin nga afër, përcjell Kosovapress.

“Si presidente jam në komunikim me përfaqësuesit e shteteve të QUINT-it, por edhe me përfaqësues të tjerë në lidhje me këtë që ka ndodhur – me këtë shkelje të rëndë nga ana e Serbisë. Po ashtu, përfaqësuesi ynë në Beograd, ambasadori Jashari, ka tentuar ta vizitojë të plagosurin, por nuk është lejuar nga ana e spitalit. Informatat që i kemi janë se ai është në gjendje të rëndë shëndetësore. Përveç kësaj, institucionet tona shtetërore janë në komunikim edhe me familjen e të plagosurit, qytetarit tonë, si dhe me të gjithë dëshmitarët,” përfundoi ajo.

Këto komente ajo i bëri pas pjesëmarrjes në forumin e EULEX-it në bashkëpunim me Shoqatën e Grave në Policinë e Kosovës, me temën “Nga rezoluta në veprim: 25 vjet nga kur gratë transformojnë paqen dhe sigurinë e Kosovës”. /Telegrafi/

Në Ditën e Përkujtimit të Mbretërisë së Bashkuar, Presidentja e Republikës së Kosovës, Vjosa Osmani, së bashku me ambasadorin britanik Jonathan Hargreaves dhe përfaqësues vendorë e ndërkombëtarë, bën homazhe për t'i nderuar pjesëtarët e Forcave të Armatosura Britanike që humbën jetën gjatë shërbimit me forcat e NATO-s në Kosovë (KFOR).

Në njoftimin e presidnces thuhet se "Katërmbëdhjetë ushtarët britanikë që sakrifikuan jetën gjatë misionit në Kosovë, u vlerësuan si urë e fortë lidhjeje dhe dëshmi e miqësisë së përhershme ndërmjet Kosovës dhe Mbretërisë së Bashkuar".

Tutje, thuhet se presidentja Osmani theksoi se ata do të nderohen në çdo përvjetor, si kujtesë e rrugës së vështirë drejt lirisë dhe gjithashtu në shenjë falënderimi për rolin vendimtar të Mbretërisë së Bashkuar, në rrugën tonë drejt lirisë, pavarësisë dhe shtetndërtimit. /Telegrafi/

Presidentja e Republikës së Kosovës, Vjosa Osmani, e shoqëruar nga bashkëshorti i saj Prindon Sadriu, ka kryer sot obligimin e saj qytetar duke votuar në Fakultetin Teknik në Prishtinë.

Pas votimit, presidentja u prononcua para mediave, duke theksuar rëndësinë e kësaj dite zgjedhore dhe pjesëmarrjes së qytetarëve në procesin demokratik.

“Dita e sotme është po aq e rëndësishme sa raundi i parë. Qytetarët jo vetëm vendosin se kush do t’i udhëheqë për një të ardhme më të mirë për fëmijët tanë dhe për komunat ku ata jetojnë. Rrjedhimisht, shpresoj që secili nga qytetarët me të drejtë vote do ta shfrytëzojë këtë të drejtë dhe do të dalë sot në votime”, deklaroi Osmani.

Ajo theksoi se Kosova gëzon një demokraci të fortë elektorale, duke vlerësuar lart përkushtimin e qytetarëve dhe integritetin e proceseve zgjedhore.

“Kosova ka demokracinë më të fortë elektorale në rajon, dhe kjo është për shkak të pjesëmarrjes së qytetarëve tanë në votime, për shkak të rregullsisë së proceseve zgjedhore dhe sepse gjithnjë organizojmë zgjedhje të lira e demokratike. Jam besimplotë se edhe dita e sotme do të jetë e tillë”, u shpreh Presidentja.

Osmani përfundoi duke ftuar të gjithë qytetarët që të ushtrojnë të drejtën e tyre kushtetuese për të vendosur për komunën ku jetojnë. /Telegrafi/