TIRANË, 23 dhjetor/ATSH/ Në Tiranë u zhvillua sot ceremonia e nderimit me Medalje Ari të 190 nxënësve të shkollave të të gjithë vendit, që kanë përfunduar me rezultate të shkëlqyera ciklin e arsimit të mesëm të lartë.

Në ceremoninë e organizuar në Kryeministri, gjatë së cilës u dhanë medaljet nga Kryeministri Edi Rama dhe ministrja e Arsimit, Mirela Kumbaro.

Në fjalën e saj ministrja Kumbaro tha se “jeni 190 nxënës ekselentë nga i gjithë vendi, që keni shkëlqyer me rezultatet tuaja të gjimnazit e të Maturës Shtetërore. Jeni këtu sepse nuk jeni dorëzuar! Dhe për këtë arsye, sot nuk kam ndërmend t’ju mësoj asgjë. As nuk do të guxoja, sepse më të mirëve nuk mund t’u japim leksione, por vetëm besim”.

“Medalja e Artë që merrni sot është një simbol i karakterit, sepse është dëshmia më e mirë dhe prova e qartë se suksesi nuk të vjen nga rastësia, por nga zgjedhjet e përditshme dhe ju më mirë se kushdo e dini, por nëse ma lejoni, unë do t’ju kërkoja që këtë t’ua tregonit sa më shumë prej bashkëmoshatarëve tuaj apo vëllezërve e motrave më të vegjël”, tha Kumbaro.

Ministrja Kumbaro tha se “suksesi juaj i vërtetë do të matet me ndikimin që do të keni tek të tjerët, se si do ta përdorni gjeniun brenda jush për të ndërtuar, për të përmirësuar jetën e të tjerëve, për t’i bërë gjërat edhe më mirë. Kjo medalje që ju do të merrni sot është një kujtesë e fortë se sukseset nuk kanë ardhur tek ju, por keni shkuar ju pas çdo suksesi të arritur deri më sot”.

Kumbaro ndau gjithashtu me nxënësit një lexim nga autorja Maya Angelou.

“Je shumatorja e gjithçkaje që ke parë, dëgjuar, ngrënë, nuhatur, të është thënë apo ke harruar – të gjitha janë aty. Çdo gjë ndikon te secili prej nesh, dhe për këtë arsye përpiqem të sigurohem që përvojat e mia të jenë sa më të mira”, citoi Kumbaro autoren Maya Angelou.

/k.s/a.f/

The post Medalje Ari për 190 nxënës ekselentë appeared first on Agjencia Telegrafike Shqiptare.

TIRANË, 20 dhjetor/ATSH/ Ministrja e Arsimit, Mirela Kumbaro mori pjesë në ceremoninë e organizuar me rastin e 20-vjetorit të themelimit të Universitetit “Aleksandër Moisiu” në Durrës.

Në fjalën e saj përshëndetëse, Kumbaro, vuri theksin te roli i universiteteve si motorë zhvillimi dhe domosdoshmëria e profilizimit dhe ndërkombëtarizimit të arsimit të lartë shqiptar.

“Universitetet nuk janë ishuj. Ato marrin identitet nga territori dhe i japin territorit vizion. Universiteti ‘Aleksandër Moisiu’ është shembull i një rritjeje të përbashkët me qytetin e Durrësit dhe me ekonominë e tij”, u shpreh ministrja.

Kumbaro theksoi se viti 2026 do të jetë viti me buxhetin më të lartë historik për arsimin, ndërsa për arsimin e lartë dhe kërkimin shkencor janë parashikuar 185 milionë euro, duke përfshirë edhe të ardhurat e vetë universiteteve publike.

“UAMD hyn në një fazë të re zhvillimi me buxhetin më të lartë historik për arsimin në 2026, me investime konkrete në Fakultetin e Studimeve Profesionale, me projektimin e kampusit të ri universitar përmes një konkursi ndërkombëtar dhe me një strategji të qartë profilizimi përmes ndërkombëtarizimit 2025–2030”, tha Kumbaro.

Rektori i UAMD-së, Prof. Dr. Shkëlqim Fortuzi, u ndal te rrugëtimi 20-vjeçar i universitetit, zgjerimi i programeve të studimit dhe projektet strategjike në proces, duke theksuar vizionin për një universitet modern, të hapur dhe konkurrues në hapësirën europiane të arsimit të lartë.

Ceremonia shërbeu si moment reflektimi për arritjet, por edhe si pikënisje për fazën e re të zhvillimit të Universitetit “Aleksandër Moisiu” në shërbim të studentëve, qytetit të Durrësit dhe vendit.

/k.s/a.f/

The post Kumbaro: Universitetet t’i përgjigjen tregut dhe të hapen drejt Europës appeared first on Agjencia Telegrafike Shqiptare.

TIRANË, 18 dhjetor /ATSH/ Regjistri shtetëror i Diasporës, është shtuar sot me 44 mësues të rinj, duke konsoliduar një trupë arsimtarësh prej 134 mësuesish në shkollat shqipe.

Ministrja e Arsimit, Mirela Kumbaro, tha se këta mësues kanë rol të jashtëzakonshëm jo vetëm në mësimin e shqipes, por si urë lidhëse mes kulturash, rrënjësh, përcjelljen e trashëgimisë ndër breza dhe në ndërtimin e një komuniteti shqiptar të qëndrueshëm e aktiv kudo në botë.

Ruajtja dhe transmetimi i gjuhës shqipe dhe e kulturës shqiptare tek brezat e rinj në diasporë është thelbësore për forcimin e identitetit kombëtar, lidhjen me rrënjët kulturore dhe ndërtimin e një komuniteti shqiptar të qëndrueshëm e aktiv kudo në botë.

Në këtë proces, roli i mësuesve është i pazëvendësueshëm, pasi ata janë ura që lidh traditën, gjuhën dhe vlerat shqiptare me brezat e ardhshëm.

Ky regjistër përmban listën e mësuesve, të cilët kanë të drejtë të japin mësim për programin e gjuhës shqipe e të kulturës shqiptare në diasporë.

/e.i/r.e/a.f/

The post Shtohet me 44 mësues të rinj regjistri shtetëror i Diasporës appeared first on Agjencia Telegrafike Shqiptare.

TIRANË, 16 dhjetor /ATSH/ E ngarkuara me Punë e Shteteve të Bashkuara të Amerikës në vendin tonë, Nancy VanHorn zhvilloi sot një takim me ministren e Arsimit, Mirela Kumbaro.

Gjatë takimit, siç edhe njoftoi përmes një postimi në rrjetet sociale Ambasada amerikane, VanHorn diskutoi me Kumbaron “mbi mënyrat e shumta se si Ambasada e Shteteve të Bashkuara mund të ndajë ekselencën dhe ekspertizën amerikane me Shqipërinë”.

“Nga partneritetet afatgjata me Korpusin e Paqes dhe Akademinë e Sigurisë, te kurrikulat e reja në fushën e sigurisë kibernetike dhe kriminologjisë, programet tona po zhvillohen vazhdimisht për të forcuar bashkëpunimin mes Shteteve të Bashkuara dhe Shqipërisë mbi qëllimet e përbashkëta”, njoftoi Ambasada amerikane në Tiranë.

1 nga 4

/m.q/r.e/a.f/

The post Ekspertizë amerikane për kurrikulat e reja në sigurinë kibernetike dhe kriminologji appeared first on Agjencia Telegrafike Shqiptare.

Ambasada e Amerikës në Tiranë thotë se e Ngarkuara me Punë, Nancy VanHorn, ka zhvilluar një takim me Ministren e Arsimit, Mirela Kumbaro, ku është diskutuar mbi mënyrat e shumta të bashkëpunimit mes dy vendeve. Sipas njoftimit të publikuar në rrjetet sociale, biseda është fokusuar në ndarjen e ekselencës dhe ekspertizës amerikane me Shqipërinë, përmes programeve dhe partneriteteve të ndryshme.

Source

TIRANË, 16 dhjetor/ATSH/ Ministrja e Arsimit, Mirela Kumbaro zhvilloi një takim këshillues me përfaqësues të Këshillit Kombëtar të Prindërve me qëllim forcimin e mekanizmave të komunikimit mes institucioneve arsimore dhe prindërve.

Gjatë fjalës së saj, ministrja Kumbaro u shpreh se sa më të mëdha të jenë përpjekjet e përbashkëta për të përmirësuar këtë komunikim, aq më e lartë do të jetë mirëqenia e fëmijëve dhe aq më e madhe do të jetë siguria e tyre.

“Ky është fillimi i një zinxhiri takimesh, që e gjithë skuadra e Ministrisë së Arsimit, deri në qelizë duhet të intensifikojë me prindërit, për sa i përket rolit të jashtëzakonshëm si prind, por edhe roli që ka komunikimi me institucionet arsimore. Është detyra jonë, por edhe ju si prindër mund të na mbështesni për të gjetur bashkë të tjera rrugë, mënyra se si mund ta ndërtojmë këtë komunikim, në mënyrë që ashtu siç bëjmë me trajnimin e mësuesve, kurrikulat e reja, rishikimin e proceseve, përmirësimin e kushteve nëpër shkolla, ta forcojmë atë edhe me prindërit në nivel rajonal, deri në nivel shkollash”, theksoi Kumbaro.

Ministrja Kumbaro u shpreh se “është e rëndësishme të ndërtojmë një komunitet aktorësh të ndërgjegjësuar se sa i rëndësishëm është ky komunikim, që fëmijët të jenë të rrethuar prej tij dhe të flasim të njëjtën gjuhë. Ditën që mësuesi dhe prindi do flasin të njëjtën gjuhë, është dita kur fëmijët do të jenë në duart më të sigurta”.

Ministrja e Arsimit ka marrë pjesë në disa tryeza për sigurinë e fëmijëve, mbrojtjen nga dhuna online, certifikimin e oficerëve të rinj të sigurisë, ku vazhdimisht ka theksuar rëndësinë e komuniteteve të ndërgjegjësuara të prindërve me qëllim që incidentet dhe rastet e dhunës të mundet të parandalohen.

1 nga 2

/k.s/j.p/

The post Kumbaro: Forcim i mekanizmave të komunikimit mes institucioneve arsimore dhe prindërve appeared first on Agjencia Telegrafike Shqiptare.

TIRANË, 15 dhjetor /ATSH/ Kryetarja e komanduar e Bashkisë së Tiranës, Anuela Ristani, tha sot se fëmijët janë në qendër të politikave të Bashkisë së Kryeqytetit.

E pranishme në ceremoninë e zhvilluar sot në Tiranë, ku Shkolla e Drejtorëve certifikoi 334 kandidatë për drejtues shkollash, të cilët iu nënshtruan programit të trajnimit përgatitor, ajo u shpreh se Bashkia e Kryeqytetit i vlerëson fëmijët si një aset të çmuar për të ardhmen.

Ristani, evidentoi investimet në infrastrukturë gjatë dhjetë viteve të fundit të realizuara nga Bashkia e Tiranës, për të ofruar standarde edukimi për fëmijët të krahasueshme me çdo qytet tjetër evropian.

Ristani tha se Bashkia e Tiranës i ka kushtuar rëndësi infrastrukturës, por edhe mirërritjes së fëmijëve, duke krijuar kushtet që ata të jenë qytetarë të denjë të së ardhmes, si një një aset i rëndësishëm i shoqërisë.

“Ne i vëmë fëmijët të parët, i vëmë në shtëpitë tona, në kulturën tonë, në mjediset tona, në buxhetin tonë në fund të ditës dhe kjo do të reflektojë jo vetëm në investimet, ato që janë të rënda, por edhe në investimet e buta, pra në infrastrukturën e butë, atë të edukimit, jo vetëm në kushtet në të cilat operojnë kopshtet apo çerdhet tona, pra i gjithë sistemi i arsimit parashkollor por edhe mënyrën se si qasemi ndaj arsimit parashkollor, mënyrën se si sillemi me fëmijët, ambientin që u krijojmë atyre”, tha ajo.

Në ceremoni morën pjesë dhe mbajtën fjalë përshëndetëse ministrja e Arsimit, Mirela Kumbaro, bashkëdrejtuesi i AADF, Martin Mata, si dhe drejtuesja e Shkollës së Drejtorëve, Jola Kepi.

Në përfundim të aktivitetit, u ndanë edhe çmime për pjesëmarrësit me rezultatet më të larta në procesin e certifikimit.

/e.xh/a.f/

The post Ristani: Tirana, standarde edukimi të krahasueshme me qytetet evropiane appeared first on Agjencia Telegrafike Shqiptare.

TIRANË, 12 dhjetor /ATSH/ – Ministrja e Arsimit, Mirela Kumbaro, vizitoi shkollën “Osman Myderizi” në Tiranë, ku i shprehu mirënjohjen mësuese Mimoza Tolës, e cila pas 4 dekadash përfundon rrugëtimin në arsim për të hyrë në pension.

Kryeministri Edi Rama ndau në rrjetet sociale momente nga vizita, duke theksuar se pas rritjes së merituar të pagave dhe skemës së re të pensioneve, mësuesit që hyjnë në këtë cikël do të përfitojnë pensione më dinjitoze, ndërsa rritja progresive do të vazhdojë edhe në vitin 2026.

Gjatë vizitës, ministrja Kumbaro u shpreh: “Tola do të mbetet mësuesja e dashur e letërsisë, autorja e tregimeve dhe teksteve të këngëve për fëmijë. Ju falënderoj për kontributin që keni dhënë gjatë 39 viteve në arsim. Profesioni i mësuesit është një nga ato ku njeriu nuk harrohet dhe lë gjurmë të qëndrueshme.”

Mimoza Tola nisi karrierën e saj në vitin 1986 si mësuese e gjuhës dhe letërsisë shqipe në Maqellarë të Dibrës, për të vijuar më pas në shkollën “Nazmi Rushiti” në Peshkopi dhe “Demir Gashi”. Që nga viti 1995 ka dhënë mësim në shkollën 9-vjeçare “Osman Myderizi”, duke edukuar breza nxënësish. Ajo ka një krijimtari letrare të pasur, me poezi dhe prozë për fëmijë dhe të rritur, duke nisur që nga periudha studentore.

/k.s/r.e/a.f/

The post Vizitë në “Osman Myderizi”, nderohet mësuesja Tola appeared first on Agjencia Telegrafike Shqiptare.

TIRANË, 9 dhjetor /ATSH/ Drejtuesi i Autoritetit Kombëtar për Sigurinë Kibernetike, Igli Tafa u shpreh sot se është i nevojshëm një kuadër të ri ligjor ndaj të gjitha masave që duhet të merren mbi kërcënimet online ndaj fëmijëve.

Tafa e bëri këtë deklaratë gjatë tryezës së zhvilluar me temë “Mbrojtja e Fëmijëve Online” organizuar nga Autoriteti Kombëtar për Sigurinë Kibernetike.

Në këtë tryezë e pranishme ishte edhe ministrja e Arsimit, Mirela Kumbaro, e cila tha se MA ka nxjerrë urdhrin i cili ndalon përdorimin e telefonëve celularë gjatë orarit të mësimit, ndërsa bëhet një punë e vazhdueshme që ky urdhër të vijojë të zbatohet.

“Ministria e Arsimit këtë shtator ka nxjerrë një udhëzim i cili ndalon futjen e celularëve në klasë, në të gjitha shkollat e Shqipërisë. Nga ky shtator, janë ndërtuar nëpër klasa kutitë e vogla dhe mësuesit dhe drejtorët e shkollës janë përgjegjës që të gjithë nxënësit që nxënësit t’i fusin celularët në mëngjes në ato kuti dhe i marrin kur dalin. Është tentuar disa herë, por këtë vit është bërë taksative, po zbatohet me rreptësi dhe nuk po them që u zgjidh, por vazhdojmë rregullisht t’iu kërkojmë mësuesve dhe drejtorëve ta zbatojnë me rreptësi. Nga ana tjetër, fëmija në shkollë kalon nga 4-6 orë dhe po marrim një tjetër iniciativë që ta zgjasim kohën e qëndrimit të tij në shkollë për të ekuilibruar atë hapësirë të kohës me një program më të madh që e kemi quajtur program passhkollor duke futur dhe aktivitete të tjera, si programi “Art dhe Zeje””, tha ministrja Kumbaro.

Më tej, në diskutimin e saj, ministrja e Arsimit nënvizoi se është futur përdorimi i teknologjisë në shkolla që në klasat fillore dhe mësuesit trajnohen intensivisht, për të krijuar një ekuilibër të shëndetshëm mes përdorimit të saj, por edhe aktiviteteve kreative, edukative dhe socializuese, ndërsa bashkëpunimi me prindërit është kyç në arritjen e një suksesi të përbashkët.

“Ne kemi futur lëndën e TIK (teknologji informacioni dhe komunikimi), kemi futur SmartLab-et, ndërsa brenda dy viteve të ardhshme do të pajisim një mijë shkolla me SmartLabe, me laboratorë inteligjentë që për klasat fillore deri tek gjimnazistët, me të gjithë tabelat inteligjente dhe 5500 laptopë me të cilët do të pajisen 5500 mësues të gjimnazeve, është një investim i madh teknologjik që shoqërohet me gjithë kurrikulën dhe një paketë trajnimi shumë intensiv nga Agjencia e Sigurimit të Cilësisë së Arsimit Parauniversitar për mësuesit”, tha Kumbaro.

“Por mësuesit dhe shkollat, pa prindërit nuk mund të kenë sukses. Dhe me prindërit nuk funksionon as me urdhra, as me detyrim, as me ligj. Vetëm me komunikim. Ne nuk do të kemi asnjë betejë të fituar po nuk u ndërgjegjësuam të gjithë dhe ky ndërgjegjësim u ngjan rrathëve të ujit. Nëpër shkolla kemi futur TIK-un, por po fusim edhe “Art dhe Zeje”, që fëmijët të bëjnë sa më shumë aktivitete me duart e tyre, por në një mënyrë sa më atraktive. Ministria e Arsimit është në ndërtim të të gjitha mundësive për të ecur paralelisht me bashkëjetesën pa kushte dhe të domosdoshme me teknologjinë e cila është e sotmja dhe e ardhmja, por sa më shumë të jetë e mundur edhe me mbajtjen e kontakteve me disa aktivitete të tjera që janë edukative, por edhe njerëzore”, përfundoi ministrja Kumbaro.

Nga ana tjetër, drejtori i përgjithshëm Autoritetit Kombëtar për Sigurinë Kibernetike, Igli Tafa, u shpreh se është shumë i nevojshëm koordinimi institucional që do t’i shërbejë një kuadri të ri ligjor në Kodin e Ri Penal ndaj kërcënimeve online.

“Bota online, aq e nevojshme dhe e domosdoshme për të gjitha transformimet digjitale të ekonomisë së vendit, bëhet njëkohësisht edhe një ambient i rrezikshëm në raste të caktuara për fëmijët tanë. Sot jemi dëshmitarë që fëmijët tanë përballen me bullizmin online, shantazhimin online, por edhe me një teknologji tashmë të re siç është “Deep Fake”. E kemi shumë të nevojshëm mbledhjen, organizimin dhe koordinimin për atë që do të çojë në një kuadër të ri ligjor ndaj të gjitha masave që duhet të merren mbi kërcënimet online ndaj fëmijëve duke bërë bashkë të gjithë aktorët”, u shpreh ai.

1 nga 2

/e.i/r.e/a.f/

The post Tafa: Nevojitet kuadër i ri ligjor ndaj kërcënimeve online për fëmijët appeared first on Agjencia Telegrafike Shqiptare.

Ministrja e Arsimit, Mirela Kumbaro, dhe Ministri i Mbrojtjes, Piro Vëngu, vizituan kampusin e ri të Akademisë së Forcave të Armatosura, një investim modern prej 7 600 m² që ofron kushte bashkëkohore për formimin e profesionisteve të ardhshëm të FA.

Kampusi i ri përfshin klasa të teknologjisë së lartë, auditorë, laboratorë, poligon stërvitor, pishinë, ambiente sportive dhe hapësira funksionale të standardeve të NATO-s, duke krijuar një mjedis të kompletuar akademik dhe profesional.

Gjatë vizitës, ministrja Kumbaro theksoi se ky projekt, edhe pse nuk është pjesë direkte e buxhetit të Ministrisë së Arsimit, mbetet një investim publik në arsim, siç janë buxhetet e arsimit profesional, të Shkollës së Magjistraturës, apo të ardhurat e vetë universiteteve.
“Është një investim fantastik për një ndër degët tona të studimit që po merr më shumë e gjithnjë rëndësi, ndërsa uniformën ushtarake e kemi në kryefjalë të tavolinave ndërkombëtare, edhe për ccështje të sigurisë. Është një investim gjithashtu që i shtohet paketës së madhe të investimeve në arsim, aq më tepër që shikojmë që ka një kërkesë në rritje dhe duhet të zgjerojmë ofertën.
Modeli i masterit të kombinuar në marinë, aviacion dhe inxhinieri në Universitetin e Vlorës, është një iniciativë që krijon rrjetëzim të universiteteve dhe për të parë mundësitë e ndërkombëtarizimit për të siguruar jetëgjatësi dhe cilësi të arsimit të lartë”, u shpreh ministrja Kumbaro.

Nga ana e tij, ministri Vengu nënvizoi rolin e kampusit të ri si qendër ekselence në formimin ushtarak dhe akademik, duke theksuar se standardet e reja infrastrukturore dhe pedagogjike do të përgatisin kuadro të afta për misione kombëtare dhe ndërkombëtare.

“Jemi në kushtet kur 80 përqind e punës ka mbaruar dhe në një situatë ku kemi një numër shumë të madh regjistrimesh. Këtë vit kemi pasur një numër rekord: 1630 aplikime për vetëm 80 vende. Në muajin shkurt do të jetë gati për të nisur programet bachelor dhe master, sepse përvecc një akademie ushtarke të mirëfilltë përgatit edhe profesionistë të inxhinierisë apo ekonomisë që i shërbejnë kryqëzimit të jetës civile me aktivitetin e forcave të armatosura. Do të kemi një ofertë akademike e cila përveç kurseve akademike, do të ketë edhe kurse të specialiteteve, sicc është masteri në sigurinë kibernetike që po bëhet gjithnjë e më atraktiv, por për të mbështetur edhe sektorë të tjerë shtetërorë që kanë nevojë për kapacitete”, tha ministri Vengu.

Më tej në fjalën e tij, ministri Vengu shpjegoi se studentët e kësaj akademie trajtohen me pagesë gjatë periudhës së studimeve dhe kanë mundësinë e specializimit në akademi prestigjoze të Europës dhe Shteteve të Bashkuara.
Ky investim konsolidon rolin e FA në edukimin e sigurisë kombëtare dhe vendos një standard të ri për arsimimin ushtarak në Shqipëri, si pjesë e vizionit të integrimit euroatlantik dhe modernizimit të institucioneve të mbrojtjes.

Ministrja e Arsimit, Mirela Kumbaro, dhe Ministri i Mbrojtjes, Piro Vengu, vizituan kampusin e ri të Akademisë së Forcave të Armatosura, një investim modern prej 7,600 m² që ofron kushte bashkëkohore për formimin e profesionistëve të ardhshëm të FA. Kampusi përfshin klasa me teknologji të lartë, auditorë, laboratorë, poligon stërvitor, pishinë, ambiente sportive dhe hapësira funksionale sipas…

Source

TIRANË, 1 dhjetor/ATSH/ Platforma e-Albania vë në dispozicion një shërbim të ri elektronik, i cili u mundëson studentëve dhe ish-studentëve të informohen dhe të verifikojnë online, në kohë reale, numrin e tyre të matrikullimit. Ky numër unik është i domosdoshëm për një sërë procesesh administrative dhe akademike.

Përmes shërbimit “Informacion mbi statusin e numrit të matrikullimit”, përdoruesit mund të kontrollojnë lehtësisht nëse numri i tyre është aktiv, në proces verifikimi apo është refuzuar.

Shërbimi i ri synon të rrisë transparencën dhe të thjeshtojë procedurat, duke shmangur paraqitjet fizike pranë institucioneve arsimore.

Numri i matrikullimit shërben si element kyç për verifikimin e statusit të studentit, aplikimet për punë, proceset pranë universiteteve dhe saktësimin e të dhënave akademike.

Falë këtij shërbimi elektronik, studentët përfitojnë akses të menjëhershëm në informacionin e tyre personal akademik, duke kursyer kohë dhe duke lehtësuar komunikimin me institucionet.

Shërbimi mund të aksesohet përmes portalit zyrtar të e-Albania, në seksionin dedikuar të arsimit. /j.p/

The post Shërbim i ri në e-Albania për verifikimin online të numrit të matrikullimit appeared first on Agjencia Telegrafike Shqiptare.

TIRANË, 29 nëntor /ATSH/ Nxënësit e Dibrës sollën një performancë të mrekullueshme me rastin e festave kombëtare, duke krijuar një kolazh emocionesh, traditash dhe arti që ngrohu publikun.

Ministrja e Arsimit, Mirela Kumbaro vlerësoi talentin dhe përkushtimin e tyre, duke e cilësuar aktivitetin si një dëshmi të gjallë të trashëgimisë kulturore shqiptare.

Përmes programit “Art dhe Zeje”, fëmijët rikrijuan motive tradicionale, veshje popullore dhe simbole kombëtare, duke i dhënë jetë ritmeve dhe ngjyrave që na identifikojnë si popull.

Performanca u shoqërua me emocion dhe kreativitet, duke treguar se kultura dhe tradita shqiptare vazhdojnë të rriten çdo ditë në duart e brezit të ri.

Vlora i bashkohet festimeve të Nëntorit me performancat e nxënësve, Kumbaro: Art që bashkon komunitetin

Edhe Vlora iu bashkua festimeve të Nëntorit me një atmosferë të gjallë e plot emocione, falë performancave të nxënësve të shkollave të qytetit.

Ministrja e Arsimit, Mirela Kumbaro, ndau pamje nga aktiviteti, duke theksuar se fëmijët sollën një tjetër shembull të bukur të programit “Art dhe Zeje”, i cili bashkon komunitetin dhe mbush zemrat me krenari.

“Nuk kishte si t’i mungonte Vlora festimeve të Nëntorit”, shkroi Kumbaro, duke vlerësuar kreativitetin dhe energjinë e nxënësve që interpretuan motive tradicionale, këngë dhe elemente të kulturës shqiptare.

“Nxënësit e shkollave të Vlorës sollën atmosferën e bukur të festave kombëtare, një tjetër shembull i bukur i ‘Art dhe Zeje’ që bashkon komunitetin dhe mbush zemrat me krenari”, shtoi Kumbaro.

/gj.m/r.e/

The post Nxënësit e shkollave shkëlqejnë me performancë festive për festat kombëtare appeared first on Agjencia Telegrafike Shqiptare.

TIRANË, 26 nëntor/ATSH/ Pas tërmetit të 26 nëntorit 2019 shumë shkolla dhe kopshte, të cilat u dëmtuan u rindërtuan ose rikonstruktuan me standarde bashkëkohore, më të sigurta dhe më moderne.

Ministrja e Arsimit, Mirela Kumbaro ndau në rrjetet sociale pamje nga këto shkolla të rindërtuara falë punës së Ministrisë së Arsimit, bashkive dhe mbështetjes së Bashkimit Europian përmes programit EU4Schools të zbatuar nga UNDP.

“26 nëntori 2019 është një ditë që mbetet në kujtesën e gjithë Shqipërisë, kur tërmeti i asaj nate la pas dhimbje dhe dëme të mëdha, mes tyre edhe institucione arsimore të dëmtuara ose të shkatërruara”, theksoi Kumbaro.

Ministrja Kumbaro u shpreh se “këto investime nuk janë thjesht ndërtesa të reja, por garanci për të ardhmen, hapësira dinjitoze për nxënësit dhe mësuesit që sot mësojnë në kushte të njëjta me shkollat e vendeve të BE-së”.

Në buxhetin 2026 në fondin e investimeve për përmirësimin e infrastrukturës së shkollave janë parashikuar 18,3 milionë euro.

/k.s/r.e/

The post Kumbaro: Në gjashtë vite u rindërtuan shkolla dhe kopshte më të sigurta dhe më moderne appeared first on Agjencia Telegrafike Shqiptare.

Studiuesi Auron Tare, ka komentuar ditën e sotme abuzimet e ndërtimeve në bregdetin e jugut e veçanërisht në Gjirin e Manastirit, ku me lejen e Mirela Kumbaros u hap rruga për ndërtimin e “Resort Manastirit”, brenda zonës së Mbrojtur të Parkut të Butrintit. Tare thotë se autoritetet nuk duhet ta lejonin ndërtimin pasi aty ka […]

The post Abuzimet në Gjirin e Manastirit/ Tare: Duhen futur njerëz në burg për “Pikën e Voçkël” të Kumbaros appeared first on BoldNews.al.

TIRANË, 26 nëntor /ATSH/ Kryetari i Komisionit të Edukimit, Shkencës dhe Sportit, Luçiano Boçi, propozoi sot që ministrja e Arsimit, Mirela Kumbaro, të thërritet në një seancë dëgjimore në komision, në lidhje me një lajm të publikuar në medie për një broshure e cila u është shpërndarë fëmijëve në shkollën “Lidhja e Prizrenit” për konceptin e gjinisë.

Sipas denoncimit të prindërve, përmes kësaj broshure fëmijëve iu shpjegohet se gjinia nuk ka të bëjë me dallimet biologjike midis gjinive, por si një konstrukt social.

“Një shqetësim i pasqyruar dje në media lidhur me një ngjarje që ka ndodhur në shkollën “Lidhja e Prizrenit” në raport me efektet që do të ketë ligji i miratuar në Kuvend për barazinë gjinore. Shqetësimi ynë si opozitë është që ky ligj përmbys strukturën edukuese në Shqipëri ndikon në programe kurrikula dhe më pas efektet do t’i japë dhe në tekstet. Ngjarja e parë ka ndodhur, është shpërndarë një broshurë në këtë shkollë, ku relativizohet koncepti binar i gjinisë dhe ka pasur një reagim të fortë të prindërve ndaj kësaj broshure e cila është justifikuar nga psikologia si hedhja e një informacioni promovues”, parashtroi Boçi.

“Prindërit nuk e pranojnë, por rreziku është tek porta. Ligji heq konspektin binar të mbështetur mbi biologjinë. Nuk do të jetë reagimi i parë nëse ky ligj do të fillojë të aplikohet. Aq më tepër që ligji akoma nuk është dekretuar. Po çorientojnë nxënësit fëmijët të cilët pikëpyetjen më të madhe e kanë se kush janë ata më veten e tyre”, tha Boçi.

Boçi propozoi që për të pasur dijeni në raport me efektet që do të ketë ky ligj në shkolla, të thirret në seancë dëgjimore ministren e Arsimit.

“Propozoj marrë shkas dhe nga kjo ngjarje, për të folur edhe për situatën në arsimin parauniveristar por edhe për arsimin universitar, vendosim një datë me konsensus që ministrja të vijë dhe të paraqitet dhe për të dhënë shpjegime”, tha Boçi.

Por deputetët e mazhorancës theksuan se fillimisht duhet marrë informacion i saktë në lidhje me atë se çfarë ka ndodhur.

“Edhe ne e kemi ndjekur lajmin, por akoma është i paqartë si lajm në lidhje me kush e ka përgatitur broshurën, në çfarë procedure është shpërndarë, sepse sipas prononcimit të psikologes thuhet se materiali ka qenë pjesë e programit të mëparshëm dhe nuk ka lidhje me ligjin e miratuar të barazisë gjinore”, u shpreh deputetja Evis Kushi, ish-ministre e Arsimit.

“Ne propozojmë të marrim një informacion me shkrim urgjent sot në mënyrë që të kemi më shuëm detaje në lidhje me ngjarjen dhe nëse do të jetë e nevojshme edhe një seancë dëgjimore do ta zhvillojmë. Nuk jam e qartë nëse ka lidhje me ligjin. Ta ezaurojmë këtë çështje me një kërkesë urgjente për informacion dhe nga informacioni që do të marrim ta shqyrtojmë nëse duhet të vijë në komision apo jo”, u shpreh Evis  Kushi.

Deputetja Ogerta Manastirliu, po ashtu ish-ministre e Arsimit, shtoi se “ne sot nuk jemi në dijeni nëse kanë ndodhur ndryshime të kurrikulave zyrtare apo ndryshim të tjera që më pas do të sjellin këto efekte. Nuk mund të bëhemi pjesë e fake news apo informacioneve jo të sakta apo edhe informacioneve gjysmë të vërteta”.

Gjatë mbledhjes u ra dakord për të bërë një kërkesë për informacion.

/m.q/j.p/

The post Boçi: Seancë dëgjimore me Kumbaron për efektet e ligjit për barazinë gjinore në shkolla appeared first on Agjencia Telegrafike Shqiptare.

TIRANË, 26 nëntor /ATSH/ Ministrja e Arsimit Mirela Kumbaro, zhvilloi një vizitë zyrtare në kampusin e Universitetit të Teknologjisë së Compiègne (UTC), ku u prit nga Presidentja e këtij universiteti, Prof. Claire Rossi. Vizita vjen në kuadër të marrëveshjeve mes qeverisë shqiptare dhe asaj franceze për forcimin e bashkëpunimit akademik dhe teknologjik mes dy vendeve.

Ministrja Kumbaro vlerësoi partneritetin strategjik mes UTC dhe Universitetit Politeknik të Tiranës, ku përveç programeve master, tashmë janë hapur programet e reja të studimit Bachelor me diplomë të dyfishe në Inxhinieri Kompjuterike dhe Elektronikë, duke ofruar standarde evropiane për studentët shqiptarë dhe të huaj që studiojnë në Shqipëri.

Kumbaro theksoi se bashkëpunimi me UTC, një prej universiteteve më prestigjioze të Francës, është një kontribut thelbësor për ndërtimin e ekosistemit të inovacionit në vend, duke përfshirë edhe projektin e ri të Liceut Franko-Shqiptar të Shkencave dhe Inovacionit në Korçë, një tjetër projekt i rëndësishëm që nis falë mbështetjes franceze.

“Falë marrëveshjes mes dy qeverive dhe punës së përbashkët të ekipeve të Ministrisë së Arsimit, Ambasadës Franceze, UPT dhe UTC, tashmë në Shqipëri është krijuar Kampusi përbashkët me selinë e Universitetit të Kompienjit, duke u dhënë mundësi studentëve shqiptarë të ndjekin programe bachelor, master dhe doktoratë, në Inxhinieri Informatike dhe në Inteligjencë Artificiale, me leksione të përbashkëta nga profesorë francezë dhe shqiptarë, të përfitojnë mobilitete akademike në të dy universitetet dhe të diplomohen me dy diploma të vlefshme të njohura nga të dy vendet në Shqipëri dhe në Francë”, u shpreh Kumbaro.

Gjatë vizitës, ministrja pati edhe një takim me një grup studentësh shqiptarë që studiojnë aktualisht në Universitetin Teknologjik të Compiegne falë këtij bashkëpunimi, të cilët ndanë përvojat e tyre, projektet kërkimore dhe mundësitë e integrimit në tregun shqiptar dhe ndërkombëtar të punës.

Ministrja e Arsimit Mirela Kumbaro, vizitë zyrtare në kampusin e Universitetit të Teknologjisë ...

1 nga 3

/e.i/j.p/

The post Kumbaro në Universitetin e Teknologjisë në Francë: Programe të përbashkëta studimi dhe kampus francez në Tiranë appeared first on Agjencia Telegrafike Shqiptare.

TIRANË, 25 nëntor /ATSH/ Ministrja e Arsimit, Mirela Kumbaro gjatë vizitës në Universitetin Teknologjik të Compiègne (Francë) u takua profesor Dritan Naçe dhe me studentët shqiptarë që vijnë nga Universiteti Politeknik i Tiranës që studiojnë në UTC për Inteligjencë Artificiale dhe sektorë të tjerë brenda IA në master apo doktoraturë.

Në një video të publikuar në rrjetet sociale, Kumbaro theksoi se “falë një projekti të përbashkët që prej disa vitesh UPT bën me Universitetin Teknologjik të Compiègne, tashmë me një kampus të përbashkët në Tiranë ku po shtohen studentët nga një vit në tjetrin dhe ku do të përfitojnë dy diploma: qoftë atë të Universitetit Politeknik në Tiranë, qoftë atë të Universitetit të Compiègne për t’u aftësuar më shumë, për të lidhur më shumë marrëdhënie dhe për të qenë gati për atë që e kemi quajtur të gjithë bashkë “tregu europian””.

“Më vjen shumë mirë që pjesa më e madhe e tyre më pyesin se cilat janë mundësitë e integrimit në Shqipëri dhe në Tiranë. Inteligjenca Artificiale tani në Shqipëri ka edhe një Ministre të dedikuar, Diella, kështu që nuk ka më dyshim për frymën dhe filozofinë dhe prioritetin që ne i japim këtij sektori”, theksoi Kumbaro.

Ministrja Kumbaro u shpreh se “digjitalizimi dhe Inteligjenca Artificiale nuk janë më e ardhmja, por realiteti i ri i arsimit, administratës dhe sipërmarrjes”.

Ministrja e Arsimit, Mirela Kumbaro gjatë vizitës në kampusin e Universitetit Teknologjik të Compiègne (Francë) u prit edhe nga presidentja e institucionit, Claire Rossi.

/k.s/r.e/

The post Kumbaro: Digjitalizimi dhe Inteligjenca Artificiale realitet i ri i arsimit appeared first on Agjencia Telegrafike Shqiptare.

TIRANË, 25 nëntor/ATSH/ Ministrja e Arsimit, Mirela Kumbaro zhvilloi ditët e fundit një vizitë në kampusin e Universitetit të Teknologjisë së Compiègne (Francë), ku u prit nga presidentja e institucionit, Claire Rossi.

Në një postim në rrjetet sociale, Kumbaro tha se “partneriteti mes Universitetit të Compiègne dhe dhe Universitetit Politeknik të Tiranës po merr formë konkrete dhe afatgjatë jo vetëm në studime, por edhe në krijimin e inkubatorëve të startup-eve”.

Kumbaro u shpreh se “falë marrëveshjes mes dy qeverive dhe punës së përbashkët të ekipeve të Ministrisë së Arsimit, Ambasadës Franceze, UPT dhe UTC, tashmë në Shqipëri është krijuar Kampusi i përbashkët me selinë e Universitetit të Compiègne”.

“Ky kampus i jep mundësi studentëve shqiptarë të ndjekin programe bachelor, master dhe doktoratë, në Inxhinieri Informatike dhe në Inteligjencë Artificiale, me leksione të përbashkëta nga profesorë francezë dhe shqiptarë, të përfitojnë mobilitete akademike në të dy universitetet dhe të diplomohen me dy diploma të vlefshme të njohura nga të dy vendet në Shqipëri dhe në Francë”, nënvizoi Kumbaro.

Ministrja Kumbaro u shpreh se “ndërkombëtarizimi i Arsimit të Lartë është një nga prioritetet e këtij mandati në arsim, që synojmë ta zgjerojmë në fushat prioritare të zhvillimit”.

Hapja e Kampusit të Universitetit të Teknologjisë së Compiègne të Francës në UPT është një nga arritjet më të mëdha në arsimin e lartë shqiptar. Një program është hapur në UPT është Bachelor në Inxhinieri Kompjuterike dhe një në Sisteme Elektronike. Mësimi  zhvillohet në UPT me profesorë shqiptarë dhe francezë. Në fund studentët do të marrin dy diploma, një të UPT dhe një diplomë franceze të UTC. Ndërsa në vitin e tretë është hapur një program i ri Bachelor në Inxhinieri Mekatronike. E reja e këtyre diplomave të dyfishta është që mësimi bëhet në Shqipëri.

1 nga 7

/k.s/r.e/

The post Kumbaro: Partneriteti me Universitetin e Teknologjisë së Compiègne, hap drejt ndërkombëtarizimit të UPT appeared first on Agjencia Telegrafike Shqiptare.

TIRANË, 24 nëntor /ATSH/ Gjirokastra mirëpriti “Chess Fest 2025”, me kampionate ekipore, konkurs për nxënës, Rapid, Blitz dhe shumë aktivitete të tjera. Nga data 16 deri më 23 nëntor qyteti i gurtë përjetoi një javë magjike me mjeshtra, talente dhe atmosferë të jashtëzakonshme.

Festivali i Shahut 2025 për një javë me radhë riktheu magjinë e sportit të mendjes në qytetin e gurtë. Qyteti mikpriti rreth 200 shahistë nga Shqipëria, Kosova, Mali i Zi e më gjerë, në një program të pasur aktivitetesh sportive, ku spikati veçanërisht pjesëmarrja e fëmijëve dhe të rinjve.

“Vazhdojmë të kontribuojmë në zhvillimin e sportit, duke mbështetur edhe shahun, me synimin e përbashkët për ta rikthyer Gjirokastrën mes qyteteve elitë të sportit shqiptar”, u shpreh kryebashkiaku i qytetit Flamur Golemi.

Nga turnetë për ekipe, te garat për nxënësit, Rapid, Blitz dhe shumë aktivitete të tjera, kjo javë solli në një skenë të vetme mjeshtërinë e lojës së mendjes dhe talentet e reja që rriten nëpër shkolla.

Shahistët e vegjël janë pjesë e së njëjtës frymë që mbështeten me programet “Art & Zeje” dhe Sportin në Shkolla, aty ku formohen pasionet e brezit të ri.

Gjatë ditëve të aktivitetit sportiv “Gjirokastra Chess Fest”, Federata Shqiptare e Shahut në bashkëpunim me Qendrën Kulturore të Fëmijëve organizoi një konkurs të veçantë shahu për nxënësit e shkollave të qytetit.

Nën udhëheqjen dhe pasionin e mjeshtrit të shahut Kristaq Andoni, fëmijët u njohën më nga afër me vlerat, rëndësinë dhe përfitimet që sjell ushtrimi i këtij sporti të mendjes. Atmosfera entuziaste dhe pjesëmarrja e lartë treguan sa i dashur dhe frymëzues është shahu për fëmijët.

Në zemër të qytetit të gurit, lojërat, rivaliteti dhe pasioni i sportistëve krijuan një festival të vërtetë emocionesh.

“Shahistët e vegjël të shkollave të Gjirokastrës dhuruan emocione të bukura, gjatë ditëve të aktivitetit “Gjirokastra Chess Fest”, një ngjarje frymëzuese që e bën edhe më të dashur këtë sport për qytetin, sinkronizim fantastik mes Federatës Shqiptare të Shahut, Qendrës Kulturore të Fëmijëve dhe mjeshtrit Kristaq Andoni”, u shpreh për aktivitetin ministrja e Arsimit, Mirela Kumbaro.

The post Festivali i Shahut në Gjirokastër, 200 pjesëmarrës nga Shqipëria, Kosova, Mali i Zi appeared first on Agjencia Telegrafike Shqiptare.