Gjatë një interviste për “News 24”, deputeti i Partisë demokratike, Klevis Balliu, u shpreh se zv/kryeministrja Belinda Balluku, do të ketë çështje të tjera penale përveç atyre që është marrë tashmë e pandehur dhe me masë sigurie pezullim nga detyra, bllokim pasaporte e ndalim të daljes jashtë shtetit, të vendosura nga GJKKO me kërkesë të SPAK.
Balliu nënvizoi se një prej dosjeve është edhe ajo e rrugës Korçë-Ersekë, që përveç skandalit financiar me 12 mln euro kilometri, ka edhe atë të sigurisë ku shembet sa herë bie shi dhe është pa kolauduar ende.
Gjithashtu, ligjvënësi demokrat tha se ndaj Ballukut do të shtohen dosjet penale, përveç tunelit të Llogarasë dhe Unazës së Madhe, pasi Partia Demokratike ndaj saj ka bërë edhe denoncimin për disa rrugë, ente energjetike dhe koncesione.
“Belinda Balluku do të ketë edhe çështje të tjera nën hetim. Ka të tjera denoncime, që i kemi bërë ne, PD. Do të jetë edhe rruga Korçë-Ersekë, që e kemi denoncuar më parë. Tenderi i abuzimit me miliona euro, e çfarë rruge, ra shi dhe u shemb menjëherë. Sa herë bie shi, prishet rruga, dhe do ndodhi hataja atje, sepse është pa kolauduar dhe ka ndërruar projekti. Një rrugë që e nisi PD me 12 mln euro në total, por tani e ka çuar në 12 mln euro kilometri”, tha Balliu.
Por ai theksoi se të gjitha hetimet që nisin nga SPAK për abuzimet qeveritare janë denoncime të selisë blu.
Balliu shtoi se lufta kundër korrupsioni dhe kësaj qeverie do të vijonte, psi edhe kryeministri Edi Rama është i përfshirë në aferë, e jo vetëm balluku.
“Nuk ka denoncim të PD-së që nuk ka rezultuar i vërtetë. Demokratët janë penalizuar, janë hequr nga puna dhe arrestuar për denoncimet që janë bërë. Dhe të gjitha këto çështje e arrestime janë bërë për shkak të luftës që demokratët kanë bërë me këtë qeveri”, u shpreh ai.
Ligjvënësi apeloi për rrëzimin e kësaj qeverie duke u bashkuar të gjithë qytetarët shqiptarë, teksa shprehet se tani situata ka ndryshuar dhe korrupsioni ka dalë sheshit.
“Tashmë korrupsioni ka dalë sheshit. Ka zero vlerë se çfarë ore hyn dhe del Balluku, për sa kohë ajo nuk është në burg. Për akuza të njëjta, personazhe të tilla, dhe më pak të rëndësishme, kanë përfunduar në burg. Nëse Balluku meriton një ditë burg, një vit meriton Rama. Belinda Balluku nuk i njihte turqit, por Rama. Atë e çoi Rama atje. 7 orë takim në kryeministri, ka qenë kërcënim nga ana e Ballukut që “unë të marr me vete, se s’jam Veliaj”. Nëse Rama nuk jep dorëheqje, është detyrë kombëtare nxjerrja e tij me hir apo pahir nga ajo zyrë. Ndaj i ftojmë qytetarët sot që ditën e hënë të vinë në protestë. Situata tani ka ndryshuar. Balluku nuk mund ta bënte këtë vetëm. Është e pasinqertë që të them se fajin dhe vjedhjet i ka kryer Balluku, por vetë Rama. I kam thënë Ballukut që të shkojë të bëhet ‘pentito’. Burimet thonë se ka rreth 60 sms të Ramës me Berberin”, tha ai mes të tjerash.
Në fund deputeti demokrat siguroi mbështetësit se nuk do tradhtoheshin në kauzën e nisur, duke vënë në dukje se për shkak të denoncimeve të përsëritura shumë prej demokratëve janë arrestuar, larguar nga puna apo penalizuar.
“Nuk e tradhtojmë as kauzën e as demokratët, por do duhet të bashkohemi sepse nuk bëhet vetëm. Nuk them se kemi qenë engjëj në kohën që kemi qeverisur, por këta shikoni, e bëjnë kilometrin me 12 mln euro, kur ne e kishim të njëjtën rrugë me një fond total 12 mln euro”, përfundoi ai.
The post Klevis Balliu: Belinda Balluku do ketë çështje të tjera, në radhë rruga Korçë-Ersekë, 12 mln euro kilometri, sa herë që bie shi, shembet appeared first on Albeu.com.
Login
