Mesfushori francez me famë botërore, N'Golo Kante, i transferuar nga Al Ittihad, ka mbërritur në Stamboll për t’u bashkuar me Fenerbahçen.

Lojtari, një nga nënshkrimet më të rëndësishme të klubit verdhë-blu gjatë afatit të dimrit, zbarkoi në aeropirtin ‘Sabiha Gokçen” me një aeroplan privat nga Arabia Saudite. Ai u shoqërua nga anëtarët e Bordit të Fenerbahçes.

Mijëra tifozë të Fenerbahçes prisnin në dalje të terminalit për të përshëndetur yllin francez me flakadan dhe brohoritje.

Për shkak të interesit të madh, autoritetet kishin marrë masa të gjera sigurie.

Pas uljes së avionit, Kante përshëndeti turmën që e priste para se të hipte në një makinë private të siguruar nga klubi dhe të nisej për në hotel.

Prania e tij krijoi një atmosferë të jashtëzakonshme në terminal dhe tregoi pritjen e madhe që i bëhet në Stamboll.

Fenerbahçe njoftoi se negociatat me mesfushorin francez përfunduan me sukses dhe është arritur një marrëveshje 2.5-vjeçare.

Kante, i cili ka fituar tituj të nivelit të lartë në karrierë, përfshirë Kupën e Botës, Ligën e Kampionëve dhe tituj në Ligën Premier, pritet të nisë stërvitjen me ekipin pas kryerjes së kontrolleve mjekësore. /Telegrafi/

Lojtarët e Barcelonës u kualifikuan për në gjysmëfinalet e Kupës së Mbretit, duke fituar 2-1 ndaj Albacetes të martën në mbrëmje.

Katalanasit e menaxhuan ndeshjen në një mënyrë relativisht rutinore, por një detaj i pazakontë tërhoqi vëmendjen e spektatorëve.

Portieri i Barcelonës, Joan Garcia, kapi topin, por më pas, duke e mbajtur në duar, shkoi drejt vijës së fundit për të kontrolluar shokun e skuadrës, Ronald Araujo, i cili ishte shtrirë.

Për fat të mirë të Barcelonës, nga ajo goditje nga këndi nuk solli asgjë, kështu që gabimi nuk pati pasoja serioze për rezultatin. Megjithatë, situata shkaktoi habi në tribuna dhe u komentua gjerësisht edhe në rrjetet sociale.

Pas ndeshjes, portieri foli edhe për rikthimin e Araújos në ekip: “Jemi të gjithë shumë të lumtur për Araújon. Që kur është rikthyer, ai ka luajtur shumë mirë dhe ka treguar dëshirë dhe pasion të madh. Ne donim që ai të ishte përsëri standard në ndeshjet e mëdha, sepse kemi shumë nevojë për të. Jemi gjithashtu të lumtur që ai shënoi një gol – e dimë sa shumë do të thotë për të”, deklaroi Garcia.

Barcelona do të mësojë emrin e kundërshtarit të saj në gjysmëfinale pas shortit, ndërsa vazhdon luftën për një trofe të ri në garën vendase. /Telegrafi/

Sulmuesi brazilian Endrick ka bërë një hap të guximshëm dhe shumë të zgjuar në karrierën e tij, duke u larguar në huazim nga Real Madridi te Olympique Lyon.

Në Francë, 19-vjeçari po tregon gjithë potencialin që nuk arriti ta shfaqte në Madrid, duke realizuar katër gola në katër paraqitje.

Periudha e tij te Real Madridi ishte e vështirë. Edhe pse Carlo Ancelotti i kishte premtuar minuta dhe gradualisht po e inkuadronte në skuadër, situata ndryshoi me ardhjen e Xabi Alonsos, nën drejtimin e të cilit Endrick pothuajse u zhduk nga fusha.

Shansin e tij e mori vetëm në fund të vitit, në një moment kur Alonso po luftonte për të ruajtur postin, por braziliani vendosi se karriera e tij kishte nevojë për një drejtim tjetër dhe më shumë minuta loje.

Huazimi te Lyon, po del të jetë i qëlluar

Huazimi te Lyon deri në fund të sezonit po rezulton vendim i qëlluar. Endrick është shfaqur i vendosur, i uritur për gola dhe katër realizimet në katër ndeshje flasin qartë për talentin dhe instinktin e tij si sulmues.

Përkundër faktit se prej kohësh është milioner, Endrick mbetet besnik ndaj parimeve të futbollit dhe disiplinës profesionale. Mediat braziliane raportojnë se ai bën një jetë shumë të qetë në Francë, plotësisht të fokusuar në futboll.

“Ai ka një përqendrim të jashtëzakonshëm. Jeton rreth 20 minuta larg qendrës stërvitore të Lyonit, ka një kuzhinier personal dhe e kalon kohën e lirë vetëm me gruan dhe qentë e tij”, shkruajnë mediat braziliane.

Sipas tyre, Endrick del nga shtëpia vetëm për angazhimet e klubit dhe është rrallë ta shohësh në publik, çka tregon përkushtimin maksimal ndaj karrierës.

Hapi i radhës

Lyon është i kënaqur me paraqitjet e tij dhe tashmë po përflitet mundësia e qëndrimit edhe sezonin e ardhshëm, por aktualisht plani mbetet rikthimi i tij te Real Madridi gjatë verës.

E ardhmja e Endrick në “Santiago Bernabeu” do të varet shumë edhe nga trajneri i ri i madrilenëve. Pas përvojës jo të mirë me Ancelottin dhe sidomos me Xabi Alonson, braziliani nuk pritet të marrë vendime të nxituara.

Real Madridi i pagoi Palmeiras rreth 50 milionë euro për shërbimet e tij dhe pavarësisht vështirësive fillestare, Endrick mbetet një nga talentet më të mëdha të brezit të ri – qoftë për Madridin, qoftë për një karrierë madhështore diku tjetër. /Telegrafi/

Sipas Sky Sports, zyrtarë të lartë të Ligës Profesionale Saudite presin që Cristiano Ronaldo t’i japë fund “grevës” dhe të rikthehet në aksion këtë javë.

Ronaldo mungoi në fitoren 1-0 të Al Nassr ndaj Al Riyadh, por tani pritet të luajë të premten kundër Al Ittihadit, pasi besohet se ka shprehur qëndrimin e tij lidhur me situatën e krijuar.

Portugezi, i cili të enjten mbush 41 vjeç, nuk ishte parë pranë qendrës stërvitore të Al Nassr, ndërsa disa raportime pretendonin se ai ishte kthyer në Portugali përpara ditëlindjes.

Megjithatë, këto raportime nuk rezultuan të sakta, pasi Ronaldo është rikthyer sot në stërvitje, gjë që e ka konfirmuar vetë përmes një fotografie të publikuar në rrjetet sociale, ku ka vendosur dy zemra me ngjyrat e klubit.

Sipas mediave, Ronaldo ishte i pakënaqur me investitorët kryesorë të futbollit në Arabinë Saudite, pasi rivali kryesor, Al Hilal, arriti ta transferojë Karim Benzeman nga Al Ittihad, një lëvizje që, sipas tij, prish balancat e kampionatit.

Cristiano Ronaldo mbetet ndër golashënuesit më të mirë të Ligës Profesionale Saudite, me 17 gola në 18 paraqitje, ndërsa synimi i tij i madh vazhdon të jetë arritja e shifrës historike prej 1000 golash në karrierë. /Telegrafi/

Meriton Korenica po vazhdon në pranverë nga aty ku e ka lënë, duke shënuar gola dhe duke i dhënë fitore skuadrës së tij, Cluj.

Në përballjen e sotme ndaj UTA Arad si mysafir, Cluj fitoi me rezultat 1-0, falë golit të Meriton Korenicës, i cili erdhi në pjesën e dytë, përkatësisht në minutën e 68-të.

Mesfushorit kosovar i erdhi një pasim i bukur në zonë dhe me një goditje të saktë i dha epërsinë Clujit, rezultat që doli të jetë edhe përfundimtar.

- YouTube www.youtube.com

Korenica, sipas SofaScore, u vlerësua me notën 7.7, duke qenë lojtari më i mirë i ndeshjes.

Gjatë takimit, përveç golit, ai krijoi edhe dy raste të mëdha, kishte 95 për qind të pasimeve të sakta, ndërsa dërgoi edhe katër goditje drejt portës.

Cluj, me këtë fitore, ngjitet në vendin e shtatë me 38 pikë, ndërsa Korenica ka gjetur rrjetën në tri ndeshjet e fundit me fanellën e klubit rumun. /Telegrafi/

Lideri i Superligës së Kosovës, Ballkani, ka vazhduar me përfocime për stinoin pranveror, duke ofruar në skuadër sulmuesin Gambian, Ebrima Gaye.

Sulmuesi ka bërë karrierë në vendlindjen e tij dhe në Senegal, ndërsa pas Toni Domgjonit, bëhet përforcimi i dytë i tri herë kampionit në këtë afat kalimtar.

“Ebrima Gaye është përforcimi më i ri i Ballkanit, duke ardhur për të shtuar forcë dhe konkurrencë në repartin ofensiv të ekipit. Sulmuesi nga Gambia transferohet nga BST Galaxy, ku gjatë këtij sezoni është paraqitur në formë të mirë”.

“Gaye ka eksperiencë edhe në arenën ndërkombëtare, me paraqitje për përfaqësuesen e Gambisë, ndërsa gjatë karrierës së tij, ai ka luajtur edhe në Senegal”.

”Mirë se erdhe te Ballkani, të urojmë suksese Ebrima Gaye!”, thuhet në njoftimin e klubit.

Superliga e Kosovës nis në fundjavë sezonin pranveror, xhiroja e 19-të premton spektakël

Ballkani e nis pranverën nga pozita e parë me 33 pikë, tri më shumë se Prishtina që është ndjekësi I parë. /Telegrafi/

Kreshnik Hajrizi dhe Benjamin Kololli realizuan nga një gol për Sionin, por skuadra e tyre u eliminua nga Kupa e Zvicrës, pasi u mposht 4-3 nga Grasshopperi pas vazhdimeve, në një ndeshje dramatike.

Sioni e nisi ndeshjen fuqishëm, duke kaluar në epërsi 2:0 falë golave të futbollistëve kosovarë. Hajrizi hapi rezultatin që në minutën e 7-të, ndërsa Kololli dyfishoi avantazhin në minutën e 72-të.

Megjithatë, Grasshopperi arriti të rikthehet dhe ta dërgojë ndeshjen në vazhdime, ku në fund siguroi fitoren 4:3 dhe kalimin në gjysmëfinale të Kupës së Zvicrës.

Në minutën e 120-të, Hajrizi u ndëshkua me karton të kuq, duke e mbyllur ndeshjen me përjashtim për Sionin.

Te Sioni u aktivizua edhe Donat Rrudhani, i cili u inkuadrua në minutën e 73-të, por u zëvendësua në minutën e 90-të.

Nga ana tjetër, për Grasshopperin luajti Samuel Krasniqi deri në minutën e 101-të, ndërsa Amir Abrashi u aktivizua nga minuta e 111-të. Ismajl Beka dhe portieri i Kosovës U21, Laurent Sheji, mbetën në bankën rezervë. /Telegrafi/

Vëllai i një krimineli famëkeq shqiptar është dënuar me burg pas përfshirjes në një tentativë të organizuar vjedhjeje me thyerje, e cila i shkaktoi “shqetësim të madh emocional” futbollistit profesionist Scott Hogan dhe bashkëshortes së tij shtatzënë.

Ngjarja ndodhi rreth orës 23:30 në shtëpinë luksoze të Hoganit në Cheshire, ku sulmuesi u zgjua nga një dritë pishtari që depërtonte në dhomën e gjumit, pasi hajdutët ishin ngjitur deri në katin e parë të banesës.

Hogan, 33 vjeç, ish-lojtar i Aston Villas dhe Brentfordit, i cili ka zhvilluar 12 ndeshje me Kombëtaren e Irlandës, tentoi të ndiqte autorët, por ata arritën të largoheshin nga vendngjarja.

Policia arrestoi më vonë Denis Pukën (28 vjeç) dhe Erisjan Laskën (29 vjeç), të cilët pranuan se kishin planifikuar një seri bastisjesh ndaj pronave luksoze në zona të izoluara.

Hajdutët Denis Pukën (28 vjeç) dhe Erisjan Laskën (29 vjeç)

Denis Puka është vëllai i Dorian Pukës, një emër i njohur për autoritetet britanike, i cili ishte burgosur dhe deportuar dy herë më parë për vepra të ngjashme, përpara se të rikthehej ilegalisht në Mbretërinë e Bashkuar.

Në deklaratën e tij para gjykatës, Scott Hogan tha se ngjarja i kishte shkaktuar “dëm të madh psikologjik” familjes së tij, duke e lënë të frikësuar për sigurinë e bashkëshortes dhe fëmijëve, sidomos gjatë kohës kur ai është larg shtëpisë për shkak të karrierës.

Ai shtoi se ishte detyruar të shpenzonte mijëra euro për një sistem të ri sigurie, duke e cilësuar situatën si “një makth për çdo prind” dhe tepër dekurajuese për dikë që ka punuar fort për të ndërtuar jetën e tij.

Scott Hogan

Gjykata e Kurorës në Chester u informua se banda kishte përdorur maska, mjete profesionale, radio komunikimi dhe makina me targa të klonuara, ndërsa kishte arritur të vidhte vetëm dy ora luksoze, një Rolex dhe një Omega.

Të dy të pandehurit pranuan fajësinë për komplot për të kryer shtatë vjedhje me thyerje brenda dy ditësh dhe u dënuan me nga katër vjet e tetë muaj burg, ndërsa gjyqtari Steven Everett i cilësoi veprimet e tyre si “të neveritshme dhe të përçmueshme”.

Scott Hogan dhe bashkëshortja e tij

Denis Puka do të përballet gjithashtu me procedura deportimi pas përfundimit të dënimit, ndërsa policia britanike theksoi se rasti dëshmon vendosmërinë e autoriteteve për të ndjekur dhe ndëshkuar krimin e organizuar, pavarësisht përpjekjeve për t’iu shmangur drejtësisë.

Presidenti i FIFA-s, Gianni Infantino, është përballur me kritika të forta nga zyrtarët ukrainas dhe drejtuesit e futbollit, pasi shprehu dëshirën e tij për të hequr ndalimin e Rusisë nga garat ndërkombëtare.

Në një intervistë të hënën, Infantino tha se FIFA “nuk duhet të ndalojë kurrë asnjë vend të luajë futboll për shkak të veprimeve të udhëheqësve të tyre politikë” dhe se pezullimi aktual “nuk ka arritur asgjë, thjesht ka krijuar më shumë frustrim dhe urrejtje”.

Ai shtoi se lejimi i djemve dhe vajzave ruse për të luajtur në Evropë "mund të ndihmojë" situatën.

Infantino deklaroi se Rusia duhet të kthehet të luajë futboll – ukrainasit e quajnë deklaratën “degjenerim total” dhe "të papërgjegjshëm” telegrafi.com

Ministri i Jashtëm i Ukrainës, Andrii Sybiha, reagoi në mediat sociale, duke e quajtur Infantinon një “degjenerim moral” dhe duke vënë në dukje se “679 vajza dhe djem ukrainas nuk do të jenë kurrë në gjendje të luajnë futboll - Rusia i vrau”, ndërsa akuzoi presidentin e FIFA-s se po injoron luftën e vazhdueshme të Rusisë.

Ministrja e sportit e Ukrainës, Matvii Bidnyi, i përshkroi komentet e Infantinos si “të papërgjegjshme — për të mos thënë infantile”, duke theksuar vdekjen e atletëve të rinj ukrainas, siç është nxënësja e klasës së 10-të Illia Perezhogin, e vrarë nga një raketë ruse ndërsa luante futboll në Mariupol, dhe lojtarja e futsalit Viktoriia Kotliarova, e vrarë me nënën e saj gjatë bombardimeve në Kiev në dhjetor 2023.

Shoqata Ukrainase e Futbollit i kërkoi FIFA-s të mos ndryshojë qëndrimin e saj ndërsa lufta vazhdon, duke deklaruar se pezullimi është një "metodë efektive presioni kundër agresorit".

Drejtori ekzekutiv i Shakhtar Donetsk, Sergei Palkin, e quajti propozimin një “shkëputje të plotë nga realiteti” pas katër vitesh lufte, duke vënë në pikëpyetje pse Infantino nuk e ka vizituar kurrë Ukrainën për të parë shkatërrimin nga afër.

telegrafi.com

Komentet vijnë në mes të përjashtimit të Rusisë që nga pushtimi i plotë i vitit 2022, një ndalim fillimisht i nxitur nga presioni i kombeve evropiane, përfshirë Poloninë, Suedinë dhe Anglinë, të cilat refuzuan të luanin kundër Rusisë në kualifikueset e Kupës së Botës. /Telegrafi/

Arsenal ka mposhtur Chelsean me rezultat 1-0 në ndeshjen e dytë gjysmëfinale të EFL Cup, të zhvilluar në një atmosferë të tensionuar dhe me shumë duele fizike. “Topçinjtë” ishin ata që festuan në fund, edhe falë fitores 3-2 nga ndeshja e parë, duke kaluar kështu në finale me rezultat të përgjithshëm 4-2.

Takimi nisi me kujdes nga të dyja skuadrat, me Arsenalin që administroi avantazhin e krijuar në përballjen e parë, ndërsa Chelsea kërkoi hapësira për të rihapur kualifikimin.

Rasti më i mirë i pjesës së parë erdhi në minutën e 18-të, kur Piero Hincapié provoi nga distanca, por portieri Robert Sánchez reagoi sigurt.

Pjesa e dytë solli më shumë intensitet dhe ndërhyrje të ashpra. Momenti më i diskutueshëm i ndeshjes erdhi në minutën e 84-të, kur Gabriel Martinelli u rrëzua në zonë pas një kontakti me mbrojtjen e Chelseat.

Fillimisht gjyqtari nuk sinjalizoi penallti, ndërsa pas rishikimit me VAR, vendimi i tij u konfirmua, duke shkaktuar reagime në tribuna.

Të dy trajnerët tentuan të ndryshojnë rrjedhën e lojës me zëvendësime, por rezultati mbeti i pandryshuar deri në kohën shtesë.

Ishte Kai Havertz që përfitoi nga një asistim i Declan Rice për të shënuar për 1-0 në minutën e gashtë të kohës shtesë.

Arsenal tani pret në finale fituesin e ndeshjes Newcastle - Man City, me qytetarët që janë më të avantazhuar fal fitore 2-0 në ndeshjen e parë. /Telegrafi/

Pep Guardiola ka shprehur një “trishtim dhe mërzitje” të përzier me ironi ndaj politikës financiare të klubit të tij, Manchester City, duke theksuar se skuadra e tij është vetëm e shtata në Ligën Premier për sa i përket investimeve neto gjatë pesë viteve të fundit.

Duke folur në një konferencë për shtyp para ndeshjes së kthimit në Carabao Cup kundër Newcastle, trajneri spanjoll u referua statistikave të fundit.

“Ndjehem pak i trishtuar dhe i mërzitur sepse në shpenzimet neto gjatë pesë viteve të fundit ne jemi të shtatët në Ligën Premier. Këto janë fakte, jo opinione”, deklaroi ai.

Faktet që fjalin

Sipas të dhënave, Manchester City ka një investim neto prej afro 459 milionë euro për periudhën 2021-2026. Kjo i vendos “Qytetarët” pas gjashtë konkurrentëve të tjerë. Manchester United është i pari me 783 milionë euro, që përcillet nga Arsenali me 770 milionë euro.

Chelsea është i treti me 755 milionë euro, ndërsa pas tyre vjen Tottenham Hotspur me 666 milionë euro. I pesti është Newcastle United me 492 milionë euro. Para Man Cityt është edhe Liverpooli me shpenzime prej 487 milionë euro.

Statistika duket paradoksale, duke pasur parasysh reputacionin e Man Cityt si një fuqi financiare. Megjithatë, sekreti qëndron në menaxhimin e tregut.

Edhe pse klubi nga Manchester ka shpenzuar mbi 1.1 miliardë euro në transferime gjatë kësaj periudhe (duke u renditur i dyti pas Chelseat), ata ka gjeneruar të ardhur mbresëlënëse prej afro 640 milionë euro nga shitja e lojtarëve – siç ishte rasti me Julián Álvarez te Atlético Madrid – pa komprometuar asetet thelbësore të ekipit.

“Të shitësh me mend” është art

Ndryshe nga disa konkurrentë, Man City ka kthyer shitjen e lojtarëve në një art. Kjo ka lejuar klubin të mbajë shpenzimet neto në një nivel relativisht të ulët, duke i dhënë Guardiolës një arsenal konkurrues pa ndryshuar thelbin e skuadrës.

Trajneri, megjithatë, duket se e përdor këtë statistikë për të theksuar një mesazh nën ironi.

Duke iu referuar gjashtë skuadrave që kanë shpenzuar më shumë, Guardiola tha: “Por, ashtu siç fitonim në të kaluarën sepse shpenzonim shumë, tani gjashtë ekipe duhet të fitojnë Ligën Premier, Ligën e Kampionëve dhe FA Cup, sepse kanë shpenzuar më shumë në pesë vitet e fundit. (...) Paçin fat gjashtë ekipet që na kanë tejkaluar në shpenzimet neto gjatë pesë viteve të fundit!”.

Konteksti i transferimeve

Deklaratat e Guardiolës vijnë në një moment kur Manchester City po dëshmon përsëri aktivitet në tregun e dimrit. Ata janë shpenzuesit më të mëdhenj në Ligën Premier gjatë afatit janar, duke forcuar skuadrën me blerje si Marc Ghéhi dhe Antoine Semenyo.

Ky veprim tregon një strategji të qëndrueshme: të investosh në pikat kyçe duke ruajtur ekuilibrin financiar.

Megjithë “pakënaqësinë” e deklaruar, Guardiola duket se e çmon menaxhimin e klubit që ka krijuar një model të qëndrueshëm suksesi.

Mesazhi i tij mund të interpretohet si një mënyrë elegante për të ridrejtuar diskutimin publik drejt “fakteve” financiare, duke u larguar nga narativat e zakonshme që e paraqesin Man Cityn si një “makineri” të pafund financiare. Në fund të ditës, për trajnerin, suksesi matet me trofe, jo me shifra neto në bilanc. /Telegrafi/

Mbrojtësi i Kombëtares së Kosovës, Andi Hoti, ka bërë zyrtarisht kalimin në Eintracht Braunschweig, duke i bashkuar skuadrës gjermane nga Magdeburgu.

Sipas raportimeve, ai ka nënshkruar një kontratë katër vjeçare, të vlefshme deri më 30 qershor 2028, dhe do të veshë fanellën me numrin 4. Megjithatë, ky transferim ka krijuar jo pak probleme mes dy klubesh rivale në Bundesliga 2.

Sipas gazetës gjermane “Bild”, Dynamo Dresden ishte i gatshëm të ofronte rreth 250 mijë euro për Hotin, por Magdeburgu preferoi ta shiste te Braunschweigu, duke e konsideruar Dresdenin një kundërshtar më të rrezikshëm në luftën për mbijetesë në ligën e dytë.

“Bild” raporton se ky vendim ka çuar në një çarje të marrëdhënieve ndërmjet Magdeburgut dhe Dynamo Dresden.

“Dynamo nuk ka më nevojë të përpiqet të afrojë lojtarë të Magdeburgut, sepse marrëdhënia tani është prishur në mënyrë të pakthyeshme,” shkruan gazeta.

Të tre skuadrat – Braunschweig, Magdeburg dhe Dynamo Dresden – po luftojnë aktualisht për të shmangur rënien në kategorinë e tretë të futbollit gjerman.

Nga Emërllahu e Krasniqi te pretendenti ukrainas, te Sahiti në Izreal - lëvizje e Dardanëve në afatin e janarit

Andi Hoti, 22 vjeç, ka një ndeshje me ekipin A të Kosovës dhe 15 ndeshje me ekipin U21. /Telegrafi/

Problemet shëndetësore të trajnerit 80-vjeçar të ekipit kombëtar rumun të futbollit, Mircea Lucescu, janë më serioze nga sa dukej në fillim. Në fillim të javës, ai u shtrua me urgjencë në Spitalin Universitar në Bukuresht, ku ndodhet nën mbikëqyrje mjekësore 24-orëshe.

Për shkak të gjendjes së tij, Federata Rumune e Futbollit mund të detyrohet të kërkojë një zëvendësim për një ndeshje vendimtare të fazës eliminatore në mars.

Rumania luan kundër Turqisë në gjysmëfinalet e fazës eliminatore të Kupës së Botës. Fituesi do të luajë në finale me fituesin e ndeshjes midis Sllovakisë dhe Kosovës.

Rumunët do të ndjekin kualifikimin e tyre të parë në Kupën e Botës që nga viti 1998, kur u eliminuan në raundin e 16-të nga Kroacia.

"Duke pasur parasysh informacionin që është shfaqur në media ditët e fundit, dhe veçanërisht sot, Federata Rumune e Futbollit dëshiron të sqarojë disa gjëra. Trajneri i ekipit kombëtar rumun, z. Mircea Lucescu, është shtruar në spital për mbikëqyrje mjekësore dhe po merr terapi me antibiotikë për një infeksion nënlëkuror. Shërimi i tij po ecën mirë”.

“Federata Rumune e Futbollit dhe Mircea Lucescu falënderojnë të gjithë për interesin dhe mesazhet e mbështetjes dhe kërkojnë respekt për të drejtën e privatësisë”, thuhet në një deklaratë të publikuar në faqen e internetit të federatës.

Mircea Lucescu në këtë deklaratë e ka thënë fjalën e tij, duke thënë që të qëndrojnë të qetë fansat rumun.

"Jam mirë, nuk ka arsye për t'u shqetësuar. Ju lutem qëndroni të qetë, pati shumë ekzagjerime. Është thjesht një terapi që duhet ta bëj nën mbikëqyrje", deklaroi ai.

Mjekët skeptikë për paraqtijen e tij në mars

Pavarësisht tonit qetësues të deklaratës zyrtare, burime mjekësore konfirmuan për GSP.ro se gjendja e trajnerit rumun është serioze.

Nuk bëhet fjalë për një ndërlikim të ftohjes, e cila shkaktoi daljen e tij nga spitali javën e kaluar, por për një sëmundje komplekse, kronike dhe afatgjatë.

"Gjendja e Mircea Lucescu është serioze, ai është nën mbikëqyrje të vazhdueshme", thanë burime mjekësore për mediat rumune.

Ky është shtrimi i tretë në spital i Lucescut brenda muajit të kaluar. Të hënën, ai u shtrua përsëri me urgjencë në Spitalin Universitar të Bukureshtit, këtë herë në departamentin e kardiologjisë, ku po kujdeset një nga kardiologët më të mirë të Rumanisë, Dr. Cristian Udroiu.

Edhe pse ai është në gjendje të qëndrueshme dhe po ndjek ndeshjet e lojtarëve për ndeshjet e ardhshme nga dhoma e tij e spitalit nëpërmjet laptopit dhe tabletit, mjekët janë skeptikë se ai do të jetë në gjendje të shërohet plotësisht në më pak se dy muaj për të udhëhequr ekipin kombëtar nga stoli në Stamboll. /Telegrafi/

Sipas gazetarit argjentinas Gaston Edul, kapiteni i Tottenham, Cristian Romero, do të largohet nga klubi në verën e këtij viti.

27-vjeçari ka shprehur shpesh dhe publikisht pakënaqësinë e tij ndaj drejtuesve të klubit dhe duket i vendosur të largohet nga Londra Veriore.

Klubet nga La Liga, Barcelona dhe Real Madridi dhe disa liga të tjera kanë shfaqur interes për kampionin e botës.

Romero u bashkua me Tottenham si huazim nga Atalanta në verën e vitit 2021, ndërsa 12 muaj më vonë klubi e bleu përfundimisht.

Që atëherë, ai ka luajtur 151 ndeshje për Tottenham, duke shënuar 13 gola, përfshirë gjashtë këtë sezon – shifra më e lartë personale në karrierë. /Telegrafi/

Portieri Agron Kolaj, do ta vazhdojë pjesën e mbetur të sezonit te SC Gjilani.

Ai është huazuar nga Prishtina, ku këtë sezon kishte mbetur si portier i dytë, pas Altin Gjokajt.

“Sport Club Gjilani dhe FC Prishtina kanë arritur marrëveshje për huazimin e Agron Kolajt. 24 vjeçari vjen nga kryeqyteti si një vlerë e shtuar për ekipin në pjesën e dytë kampionale”.

“Kolaj më parë ka mbrojtur edhe ngjyrat e Besës nga Peja, ekip me të cilën debutoi në elitën e futbollit kosovar dhe pas transferimit te Prishtina arriti në shifrën e 54 paraqitjeve zyrtare në kampionat”.

“SC Gjilani i uron mirëseardhje Agron Kolajt dhe shpreh besimin se kontributi i tij do të jetë i rëndësishëm për skuadrën në vazhdim të sezonit”, thuhet në njoftim.

Gjilani e nis stinorin pranveror nga vendi i gjashtë me 26 pikë. /Telegrafi/

Paris Saint-Germain nuk veproi shumë në afatin kalimtar gjatë dimrit, pasi fokusi kryesor i klubit është të mbajë bashkë bërthamën e skuadrës.

Drejtori sportiv Luis Campos dhe presidenti Nasser Al-Khelaifi janë përqendruar në rinovimin e kontratave të lojtarëve, por negociatat nuk po shkojnë gjithmonë sipas planit.

Njëri nga lojtarët kryesorë është fituesi aktual i Topit të Artë, 28-vjeçari Ousmane Dembélé. Por negociatat për rinovimin e kontratës po hasin pengesa.

Oferta e PSG dhe kërkesat e lojtarit

PSG i ka ofruar Dembele një pagë prej 30 milionë eurosh në sezon, por lojtari kërkon pothuajse dyfishin. Kontributi i tij për skuadrën ka qenë vendimtar, sidomos në fitimin e Ligës së Kampionëve, dhe Luis Enrique ka punuar shumë për t’i ndihmuar të bëhet lojtari më i mirë dhe të fitojë Topin e Artë. Megjithatë, çështjet financiare duket se kanë krijuar tension.

Dembele ka kontratë deri në vitin 2028. PSG e filloi rinovimin e kontratës herët, për të mos u gjetur në situata të vështira.

Por oferta e klubit u refuzua dhe agjenti i lojtarit kërkoi kushtet gati dyfish më të larta.

Kjo situatë nuk është e panjohur, pasi edhe Barcelona, më parë nuk mundi t’i kënaqte kërkesat financiare të Dembele.

Mesazhi i presidentit Al-Khelaifi

Presidenti i PSG-së, Nasser Al-Khelaifi, theksoi: "Kemi një kufi pagash, siç dihet. Ekipi dhe klubi janë më të rëndësishëm. Ousmane është një legjendë e klubit. E dua Ousmane si person dhe si lojtar".

Fjala e tij nuk ishte vetëm për Dembele dhe agjentin e tij, por edhe një paralajmërim për të tjerët: pavarësisht madhështisë suaj, skuadra vjen e para.

Kjo filozofi u ilustrua edhe me rastin e Gianluigi Donnarumma gjatë verës, kur PSG nuk pranoi kërkesat e agjentëve për më shumë para dhe përfshirje të bonuseve, duke e transferuar më pas lojtarin te Manchester City.

Ndryshimi i politikës së PSG-së

Që nga viti 2022, kur Luis Campos erdhi në klub, PSG ka ndjekur një kurs të ri.

Përpara kësaj, yjet merrnin paga të larta dhe privilegje, si rasti i Neymarit me 222 milionë euro për klauzolën e largimit. Por eksperiencat treguan se paratë nuk garantojnë sukses ndërkombëtar dhe shpesh ndikojnë negativisht te motivimi i lojtarëve.

Saga e Kylian Mbappé ishte momenti vendimtar. PSG përpiqej ta mbante Mbappen, por negociatat përfunduan në dështim dhe largimin e tij falas.

Campos, duke sjellë Enrique në Paris, ka vendosur një filozofi të qartë: yjet nuk do të favorizohen më automatikisht, por duhet të përputhen me sistemin dhe objektivat e ekipit. Kontratat përfshijnë tashmë klauzola që lidhen me performancën dhe minutat e luajtura — kush nuk pranon, largohet.

"Kam 59 vjet, jam në futboll profesionist që nga mosha 18 vjeç. E them qartë: skuadra është më e rëndësishme se çdo lojtar individ. Dhe klubi është më i rëndësishëm se skuadra. Yjet nuk fitojnë trofe vetëm. Ata mund të fitojnë një ndeshje ose dy, por për të fituar trofe, duhet të ketë harmonizim", deklaronte Campos.

PSG ka përqendruar vëmendjen tek lojtarët e rinj dhe akademia, duke promovuar të rinj si Warren Zaire-Emery, Senny Mayulu, Quentin Ndjantou dhe Ibrahim MBaye në ekipin e parë.

Edhe pse shpenzimet vazhdojnë, ato janë më të strukturuara dhe përforcojnë pozicione specifike.

Dembele, tani duhet të zgjedhë

Ousmane Dembele tani përballet me një zgjedhje të qartë: ose pranon kushtet e klubit, ose largohet. Nuk do të bëhen përjashtime, madje as për fituesin e Topit të Artë.

PSG ka treguar se mund të jetojë pa çdo lojtar dhe, në disa raste, madje të bëhet më i fortë pa të. /Telegrafi/

Cristiano Ronaldo , i cili po i afrohet ditëlindjes së 41-të, thuhet se nuk është i lumtur në Al Nassr dhe mund të largohet nga klubi i Ligës Profesionale Saudite që në qershor.

Sipas gazetës portugeze Record, sulmuesi ndihet i keqtrajtuar nga Fondi i Investimeve Publike (PIF), i cili zotëron Al Nassr së bashku me Al Hilal, Al Ittihad dhe Al Ahli.

Ronaldo beson se PIF po bllokon transferimet kyçe të Al Nassr për të penguar shanset e tyre për titull, pavarësisht se skuadra është vetëm një pikë prapa liderëve të ligës, Al Hilal.

Ai përmendi shembuj të tillë si transferimi i Karim Benzemas nga Al Ittihad në Al Hilal dhe nënshkrimi i sulmuesit të ri Georges Ilenikhena nga Monaco nga Al Ittihad, ndërsa Al Nassr shtoi vetëm mesfushorin irakian Abdulkareem nga Al Zaëraa në afatin kalimtar.

Në shenjë proteste, ai refuzoi të luante në fitoren e fundit 1-0 të Al Nassr ndaj Al Riyadh në ligë.

Sipas Fabrizio Romanos, Ronaldo pasi e bojoktoi ndeshjen dje (e hënë), sot ai nuk ka dal në stërvitje.

Kontrata e tij përfshin një klauzolë lirimi prej 50 milionë eurosh që mund të lehtësojë një largim, me destinacione të mundshme që përfshijnë Major League Soccer (MLS) ose një rikthim në Evropë.

Ronaldo, i cili ka luajtur një rol të madh në ngritjen e profilit global të futbollit saudit dhe shërben si ambasador për Kupën e Botës 2034 në Arabinë Saudite, mendon se meriton më shumë respekt dhe mbështetje. /Telegrafi/

Gjatë afatit kalimtar dimëror, Juventusi zhvilloi disa bisedime për afrimin e një sulmuesi të ri, por në fund mbeti pa përforcim në qendër të sulmit.

Trajneri Luciano Spalletti, pas fitores 3-0 ndaj Napolit, pranoi se skuadra kishte nevojë për një profil ndryshe nga Jonathan David dhe Lois Openda – një sulmues që mban topin dhe krijon hapësira për repartin ofensiv.

Pavarësisht kërkesës për një qendërsulmues, bardhezinjtë përfunduan afatin duke afruar anësorin Jeremie Boga dhe mbrojtësin e djathtë Emil Holm. Një sulmues i ri nuk u sigurua, pavarësisht përpjekjeve në disa fronte.

Mateta, objektivi i parë që dështoi

Emri i parë në listë ishte Jean-Philippe Mateta i Crystal Palace. Juventusi synonte një huazim me opsion blerjeje që mund të bëhej i detyrueshëm, por klubi anglez kërkonte vetëm transferim të përhershëm.

Mospajtimi për formulën e marrëveshjes bëri që bisedimet të dështojnë. Ai pastaj dështoi edhe t'i kalojë testet mjekësore te Milani.

En-Nesyri dhe refuzimi i lojtarit

Alternativa e radhës ishte Youssef En-Nesyri i Fenerbahçes. Edhe pse Juventusi arriti marrëveshje me klubin turk, sulmuesi maroken nuk pranoi të largohej me huazim, duke bllokuar transferimin.

Ai donte një transferim të përhershëm hap që Juventusi nuk ishte i gatshëm ta merrte.

Icardi dhe pista që nuk u konkretizua

Kontaktet me Galatasarayn për Mauro Icardin nuk hynë kurrë në një fazë serioze. Ideja u diskutua, por pa hapa konkretë drejt një marrëveshjeje.

Ai mbetet te gjiganti turk, edhe pse Spalletti ishte gati ta ofronte, pasi kishte punuar me të te Interi.

Kolo Muani, shpresa e fundit

Randal Kolo Muani ishte emri i fundit i diskutuar. Juventusi shpresonte ta rikthente në Torino, por Tottenham refuzoi të ndërpriste huazimin e sulmuesit nga PSG, duke mbyllur përfundimisht këtë pistë.

Ai kishte shkëlqyer te Juventusi dhe gjatë verës u punua shumë për të, por shuma e kërkuar nga PSG ishte e lartë për Zonjën e Vjetër.

Aktualisht, Jonathan David dhe Lois Openda janë të vetmit sulmues qendrorë në dispozicion të Spallettit. Dusan Vlahovic pritet të rikthehet nga lëndimi brenda një muaji, përpara largimit të tij të mundshëm nga Juventusi në fund të kontratës në qershor. /Telegrafi/

Afati kalimtar i janarit solli disa lëvizje të rëndësishme për futbollistët kosovarë, të cilët ndryshuan ambient për të gjetur më shumë hapësirë, stabilitet apo një hap të ri në karrierë.

Ilir Krasniqi dhe Lindon Emërllahu u bashkuan me Polissya, duke hapur një kapitull të ri pas largimit nga Kolosi, përkatësisht Cluj.

Në Turqi u mbyll aventura e Visar Bekajt, i cili u rikthye në Shqipëri te Tirana, ndërsa Emir Sahiti la Hamburgun për t’iu bashkuar Maccabi Tel Avivit.

Në Gjermani, Andi Hoti kaloi nga Magdeburgu te Eintracht Braunschweig, ndërsa Doni Arifi bëri hapin e madh nga KUPS drejt Greuther Fürth.

Florent Hasani vazhdoi karrierën në Turqi, duke kaluar nga Boluspor te Amedspor, kurse Indrit Mavraj u transferua nga Bari te Lechia Gdańsk.

Ndërkohë, Mirlind Kryeziu mbeti pa ekip pas largimit nga Winterthur, ndërsa Ardit Tahiri u rikthye te Kolos pas aventurës me Llapin. Këto lëvizje konfirmojnë praninë e vazhdueshme të lojtarëve kosovarë në tregun ndërkombëtar të transferimeve

Ilir Krasniqi - Nga Kolosi te Polissya

Lindon Emërllahu – Nga Cluj te Polissya

Visar Bekaj – Hatayspor - Tirana

Andi Hoti - Nga Magdeburgu te Eintracht Braunschweigu

Mirlind Kryeziu – Pa ekip te Winterthur

Doni Arifi - Nga KUPS te Greuther Fürth

Emir Sahiti – Nga Hambur te Maccabi Tel Aviv

Florent Hasani – Nga Boluspor te Amedspor

Indrit Mavraj – Nga Bari te Lechia Gdansk

Ardit Tahiri – Nga Llapi te Kolos

/Telegrafi/

Drejtori sportiv i Union Berlin, Horst Heldt, ka konfirmuar se Raheem Sterling (31) i është ofruar klubit gjerman, por transferimi i ish-sulmuesit të Chelseat nuk është marrë seriozisht në konsideratë për shkak të kërkesave shumë të larta financiare.

Sterling është aktualisht lojtar i lirë, pasi arriti një marrëveshje për ndërprerjen e kontratës me Chelsean, raportojnë mediat britanike.

Ish-reprezentuesi anglez është në kërkim të një klubi të ri pas largimit nga "Stamford Bridge", i konfirmuar javën e kaluar. Në sezonet e fundit, Sterling ka pasur vështirësi për të siguruar minuta të rregullta.

Në sezonin 2023/24 ai zhvilloi 31 paraqitje në Ligën Premier, ndërsa sezonin 2024/25 e kaloi si i huazuar te Arsenali. Megjithatë, nën drejtimin e Mikel Artetës, ai nuk arriti të bindë plotësisht, duke luajtur 17 ndeshje në kampionat, por duke qenë titullar vetëm 7 herë.

Pas rikthimit te Chelsea, Sterling u përjashtua nga skuadra e parë dhe u vendos në grupin e lojtarëve jashtë planeve të klubit.

Oferta për Union Berlin, por pa shanse reale

Union Berlin konfirmoi se emri i Sterling u propozua, por klubi nuk e shqyrtoi ofertën. Anësori anglez thuhet se fitonte mbi 300 mijë funte në javë te Chelsea, një shifër jashtë realitetit financiar të Unionit, i cili aktualisht renditet i nënti në Bundesligë.

Heldt deklaroi shkurt: “Më duhej të fërkoja sytë. Oferta nuk dukej serioze dhe nuk e morëm më tej”.

Sterling, 31 vjeç, me 82 paraqitje për Kombëtaren e Anglisë, shpreson të gjejë së shpejti një klub të ri dhe të mbyllë karrierën e tij me dinjitetin që i takon një lojtari me CV kaq të pasur. /Telegrafi/