Thun ka shënuar fitore të madhe në udhëtim te Baseli, në kuadër të xhiros së 22-të në Superligën e Zvicrës.

Thun arkëtoi pikët e plota me rezultat të ngushtë 1-2, sfidë ku luajtën plot katër shqiptarë.

Bertone pas vetëm 15 minutave lojë e zhbllokoi epërsinë me një gol të bukur për të kaluar Thun në epërsi.

Megjithatë, Baseli që luajti pa Xherdan Shaqirin e suspenduar arriti ta barazojë përmes Schmid.

Sidoqoftë, ishte i inkuadruari Valmir Matoshi që e vulosi fitoren me një vollej të fuqishme pas një gabimi të mbrojtjes vendase (79’) – VIDEO.

Ndërkohë, qendërmesfushori ka të drejtë ta përfaqësojë Kosovën pasi ka luajtur vetëm për grupmoshën U21 të Zvicrës./Telegrafi

Portieri i Luganos Amir Shaipi mund të largohet para se të mbyllet afati kalimtar dimëror, pasi ka marrë një ofertë zyrtare.

“Gardiani” e ka rifituar vendin e titullarit te Lugano, megjithatë ka refuzuar rinovimin e kontratës kësisoj pritet të bëhet me skuadër të re, qoftë tani ose në verë.

“Blick” raporton se një ofertë zyrtare tashmë ka mbërritur te klubi zviceran, megjithatë nuk është bërë me dije emri i klubit që ka shprehur interesim për portierin.

Pas një paraqitje të shkëlqyer ndaj Grasshoppers, Shaipi është pyetur nëse ishte ndeshja e fundit në fanellën e Luganos, sidoqoftë refuzoi t’i komentojë thashethemet.

“Vërtetë nuk e di, ju dini më shumë për mua. Unë luaj dhe përpiqem të jap maksimumin në fushë. Nuk di për asgjë tjetër”, deklaroi ai për “Blick”.

Ndërkohë, te Lugano trajneri Mattia Croci-Torti deklaroi se pret që Shaipi të qëndrojë deri në fundin e sezonit.

“Amiri ka qenë shumë i mirë kohët e fundit dhe është normale që ka interesim për të nga klubet e tjera. Por, është lojtar i Luganos dhe jam i kënaqur me të. Besoj se do të qëndrojë deri në fundin e sezonit”, shtoi ky i fundit.

Mbetet të shihet nëse klubi që ka shprehur interesim për Shaipin do ta kompletojë marrëveshjen me Luganon, ku kanë mbetur më pak se 48 orë para se të mbyllet afati kalimtar dimëror./Telegrafi

Flaka Loxha ka fituar një tjetër medalje për Kosovën në European Open të xhudos, që po mbahet në Sofje të Bullgarisë.

Në kategorinë deri në 57 kilogramë, Loxha triumfoi në luftën për medaljen e bronztë ndaj francezes Maelenn Cotard.

Xhudistja kosovare siguroi fitoren me mbërthim, përkatësisht me teknikën “osaekomi”, duke konfirmuar paraqitjen e saj të mirë në këtë turne.

Flaka e mbylli garën me tri fitore dhe një disfatë, duke u ngjitur meritorisht në podium.

Me këtë sukses, Kosova ka arritur të fitojë tri medalje të bronzta në European Open në Sofje. Përveç Flaka Loxhës, medalje të bronztë siguruan edhe Erza Muminoviq dhe Fationa Kasapi, duke e bërë këtë turne mjaft të suksesshëm për xhudon kosovare.

Në të njëjtën kohë për të bronztë luftoi edhe Laurinë Gashi. Ajo megjithatë u mposht nga Sita Kadamboeva e Uzbekistanit. Kësisoj, kjo e fundit e mbylli si vend i pestë./Telegrafi

Manchester United ka shënuar fitore edhe në derbin ndaj Fulhamit, në kuadër të xhiros së 24-të në Ligën Premier.

“Djajtë e Kuq” morën fitoren e tretë radhazi në kampionatin anglez, për të regjistruar triumf në shtëpi me rezultat 3-2.

Casemiro me një supergol nga distanca e kaloi Man Unitedin në epërsi pas 19 minutave lojë.

Ndërsa, ishte Mathues Cunha që mori një asistim nga Casemiro dhe me një finalizim fantastik e dyfishoi epërsinë (56’).

Fulham e gjeti rrugën drejtë rrjetës përmes Jorge Cuenca, mirëpo VAR-i e anuloi për pozitë jashtë loje (65’).

Mysafirët nisën këndelljen përmes Raul Jimenez që shënoi nga penalltia (85’) pas një ndërhyrje të Harry Maguire brenda zonës.

Pas kësaj, Kevin realizoi një eurogol nga distanca, për ta dërguar topin në korner të portës (90+1’).

Sidoqoftë, Unitedi vetëm tre minuta më vonë – Benjamin Sesko doli në skenë për të shënuar nga afërsia pas asistimit të Fernandes (90+4’).

Kësisoj, United rikthehet në pozitën e katërt me 41 pikë ndërsa Fulham bie në vendin e tetë me 34 sosh./Telegrafi

Xhudistja Erza Muminoviq ka fituar medaljen e bronztë në turneun ndërkombëtar “Sofia European Open 2026”, që po mbahet në Sofje.

Në ndeshjen për medaljen e bronztë, Muminoviq triumfoi me Yuko ndaj xhudistes Ulbusin Khakimova nga Uzbekistani, duke siguruar kështu një tjetër sukses të rëndësishëm në arenën ndërkombëtare.

Garën e nisi pa luftë në xhiron e parë, ndërsa në raundin e dytë mposhti me Yuko francezen Anais Perrot. Në çerekfinale, xhudistja kosovare ishte bindëse duke fituar me Ippon ndaj Fotimakhon Tursunboeva nga Uzbekistani. Rrugëtimi i saj u ndal në gjysmëfinale, ku u mposht me Ippon nga Laziza Haydarova, po ashtu nga Uzbekistani.

Sukseset e Kosovës në Sofje mund të vazhdojnë edhe më tej, pasi për medalje të bronztë në kategorinë deri në 52 kilogramë janë ende në garë Fationa Kasapi dhe Laurinë Gashi. Ndërkohë, në kategorinë deri në 57 kilogramë, Flaka Loxha po ashtu do të luftojë për vendin e tretë.

Edhe në konkurrencën e meshkujve ka shpresa për medalje, pasi Shpati Zekaj, në kategorinë deri në 100 kilogramë, është ende në garë për ta fituar medaljen e bronztë./Telegrafi

Sipas një raporti të “L’Equipe”, Juventusi ka bërë një qasje zyrtare për të nënshkruar me Karim Benzeman nga Al-Ittihad.

Sulmuesi francez e ka bërë të qartë se dëshiron të largohet nga klubi i Ligës Profesionale Saudite para përfundimit të afatit kalimtar.

38-vjeçari refuzoi të luajë në ndeshjen e fundit të Al-Ittihad kundër Al Fateh, pasi mbeti i pakënaqur nga përpjekja më e fundit e klubit saudit për t’i zgjatur kontratën. Ky zhvillim ka shtuar edhe më shumë spekulimet rreth së ardhmes së tij.

Teksa kërkojnë të përforcojnë repartin ofensiv përpara mbylljes së merkatos, Juventusi ka pyetur për disponueshmërinë e ish-sulmuesit të Real Madridit.

Edhe pse disa klube saudite janë gjithashtu të interesuara për shërbimet e tij, gazetari Sacha Tavolieri raporton se prioriteti i fituesit të Topit të Artë është rikthimi në Evropë, me Francën si destinacionin e preferuar.

Negociatat mes Juventusit dhe Benzemas janë ende shumë të hershme ndërsa nuk dihet nëse “Zonja e Vjetër” do të arrijë ta mbyllë këtë marrëveshje brenda 48 orëve./Telegrafi

Mbrojtësi Ibrahima Konate ishte një ndër golashënuesit në fitoren 4-1 të Liverpoolit kundër Newcastle Unitedit.

Francezi shënoi me kokë golin e fitores, ndërsa ia dedikoi babait, që i ndërroi jetë para dy javëve, derisa assesi s’arriti t’i mbajë lotët.

Pas ndeshjes, Konate e ka pranuar se ka kaluar këto javë shumë të vështira, megjithatë gjeti forcën për t’u kthyer në fushë vetëm për ta ndihmuar skuadrën angleze.

“Jam shumë i lumtur dhe nuk di si ta përshkruaj atë që po ndiej tani. Ishte një moment shumë i vështirë për mua dhe familjen time gjatë dy javëve të fundit”.

“Por kjo është pjesë e jetës dhe është shumë e vështirë për t’u pranuar… kemi disa lojtarë të lënduar, trajneri më tha të merrja kohën time, por mendova se ishte e rëndësishme për mua të vija, sepse doja ta ndihmoja ekipin në një moment vendimtar për ne”, deklaroi ai.

Ndërkohë, Liverpooli mori një fitore tepër të rëndësishme për t’u ngjitur në pozitën e pestë në tabelë.

Sa i përket Konate, ende nuk dihet nëse do të rinovojë kontratën apo të largohet falas në verën e vitit 2026./Telegrafi

Napoli duhet ta forcojë dhe zgjerojë skuadrën nëse dëshiron të garojë seriozisht në disa fronte njëkohësisht, kështu vlerëson trajneri Antonio Conte.

Kampionët në fuqi të Serie A u eliminuan nga Liga e Kampionëve në mesjavë, pasi u mposhtën 3–2 në shtëpi nga Chelsea.

Skuadra e Contes reagoi shpejt në kampionat, duke mposhtur Fiorentinën 2–1 në “Diego Armando Maradona”, falë golave të Antonio Vergaras dhe Miguel Gutierrezit.

Megjithatë, fitorja u zbeh nga një lajm i keq, pasi Giovanni Di Lorenzo pësoi një lëndim serioz në gju në mes të pjesës së parë, duke shkaktuar shqetësim të madh në stafin teknik.

Conte ka vuajtur mungesën e disa lojtarëve kyç gjatë pjesës më të madhe të sezonit. Romelu Lukaku sapo është rikthyer nga lëndimi, ndërsa Kevin De Bruyne mbetet një nga emrat e mëdhenj që ende mungojnë.

Trajneri italian nuk e fshehu pakënaqësinë e tij me mënyrën se si klubi ka planifikuar ndërtimin e skuadrës, duke theksuar se numri i lojtarëve nuk është i mjaftueshëm për të përballuar një kalendar kaq të ngarkuar.

“Nuk ka shumë për të thënë, është ndeshje pas ndeshjeje, pa pushim. Jemi të detyruar të përdorim lojtarë që do të duhej të pushonin, por nuk munden, dhe kjo çon në këto situata”, tha Conte për DAZN.

“Unë vetë e kam këputur ligamentin e kryqëzuar. E di çfarë do të thotë, është një lëndim traumatik. Të gjitha këto ndeshje i shkatërrojnë lojtarët dhe po e vrasin futbollin”.

“Tani ka kufizime për numrin e lojtarëve që mund të kesh në skuadër, dhe e jona është edhe më e vogël sepse nuk kemi shumë lojtarë nga akademia, ndërsa ata që i kemi duan të huazohen për të luajtur më rregullisht”.

“Nëse duhet të luajmë 60 ndeshje në vit, na duhet një skuadër më e madhe; përndryshe, është vetëvrasje”.

I pyetur për gjendjen e Di Lorenzos, Conte u shpreh me tone të zymta.

“Ndjesia është se ka pësuar dëmtime serioze në gju dhe bëhet fjalë për ligamentin e kryqëzuar. Është shumë keq. Ju e dini mirë se çfarë do të thotë Di Lorenzo për ne”.

“Njerëzit thonë se unë ankohem, por ne nuk po ankohemi aspak, duke marrë parasysh se kjo është një seri e pafund lëndimesh. Dhe nuk janë vetëm muskulore, janë lëndime serioze”.

“Po ia dalim të mbulojmë boshllëqet sepse këta djem po bëjnë gjëra të jashtëzakonshme. Edhe një herë, nuk kishte shumë alternativa në stol”./Telegrafi

Barcelona ka arkëtuar pikët e plota në përballjen ndaj Elche, e vlefshme për xhiron e 22-të në La Liga.

Katalunasit zhvilluan një tjetër sfidë fantastike, ku dominuan plotësisht dhe triumfuan me rezultat 1-3.

Lamine Yamal pas vetëm gjashtë minutave lojë kaloi Barcelonën në epërsi duke dribluar edhe portierin pas asistimit të Dani Olmos (6’).

Elche u këndell përmes Rodriguez nga një kundërzbritje e shpejtë (29’).

Sidoqoftë, ishte Ferran Torres që nuk dështoi në portën e zbrazur pas asistimit të De Jong për ta rikthyer epërsinë (40’).

Ndërkohë, i inkuadruari Marcus Rashford me një gol të bukur e vulosi fitoren (72’).

Barcelona me këtë fitore mbledhë 55 pikë në krye të La Liga-s, kurse Elche zë pozitën e 12-të me 24 sosh./Telegrafi

Liverpooli ka shënuar fitore të rëndësishme në shtëpi në derbin ndaj Newcastle Utd.

Edhe pse në disavantazh prej 0-1, “Reds” e përmbysën në 4-1 për t’i marrë pikët e plota midis “Anfield”.

Newcastle kaloi në epërsi falë Anthony Gordon, i cili shënoi një gol fantastik për ta zhbllokuar rezultatin (36’).

Sidoqoftë, pesë minuta më vonë, Hugo Ekitike u asistua nga Florian Wirtz dhe shënoi nga afërsia për ta barazuar rezultatin (41’).

I njëjti dy minuta më vonë realizoi një gol të bukur për ta përmbysur epërsinë (43’).

Ndërkohë, fitoren e vulosi Wirtz me një goditje të saktë pas asistimit të Mo Salah (67’).

Krejt në fund në skenë doli edhe mbrojtësi Ibrahima Konate që shënoi me kokë për epilogun përfundimtar 4-1 (90+3').

Liverpooli me këtë fitore ngjitët në pozitën e pestë me 39 pikë ndërsa Newcastle zë vendin e 10-të me 33 sosh./Telegrafi

Portieri Amir Shaipi ka zhvilluar një tjetër paraqitje të shkëlqyer për Luganon, këtë herë në barazimin ndaj Grasshoppers.

Sfida përfundoi me rezultat 1-1, por mund të thuhet se Lugano e mori një pikë vetëm falë pritjeve të jashtëzakonshme të portierit të Kosovës.

Sidoqoftë, një tjetër futbollist me prejardhje nga Kosova la mbresa në këtë sfidë. Bëhet fjalë për mesfushorin Samuel Krasniqi, i cili edhe shënoi golin e barazimit.

Pas asistimit të Asp, Krasniqi e ruajti topin nga dy mbrojtës dhe me një goditje të fuqishme e mposhti Shaipin (85’).

Për ta parë golin: VIDEO

Ky ishte goli i parë i Krasniqit në Superligën e Zvicrës, ndërsa ka të regjistruar edhe një asistim. Kujtojmë, lojtari ka të drejtë ta përfaqësojë Kosovën, qoftë grupmoshën U21 pasi ka luajtur vetëm për Zvicrën U19./Telegrafi

Liverpooli është në kërkim të një anësori të ri dhe po përgatitet për largimin e Mohamed Salahut. Pikërisht për këtë arsye, klubi nga “Anfield” kishte shfaqur interes për Antoine Semenyo, por reprezentuesi i Ganës vendosi të bashkohej me Manchester Cityn.

Pas këtij zhvillimi, drejtuesit e Liverpoolit kanë zhvendosur vëmendjen te një tjetër anësor, këtë herë nga Barcelona. Megjithatë, ata nuk janë të vetmit që po e ndjekin situatën e lojtarit, pasi edhe Manchester United është futur seriozisht në garë.

“Djajtë e Kuq” pritet të ndahen me Marcus Rashfordin në verë, pas periudhës së tij mbresëlënëse te “Camp Nou”, dhe kjo i ka shtyrë drejtuesit e klubit të kërkojnë një zëvendësues në krahë. Si pasojë, Manchester United është gati të rivalizojë Liverpoolin për nënshkrimin e anësorit të Barcelonës, Raphinha, përpara afatit kalimtar të verës.

Reprezentuesi brazilian u largua nga Leeds United në korrik të vitit 2022 për t’u bashkuar me Barcelonën, në një marrëveshje që kapte vlerën rreth 55 milionë funte.

Në këtë sezon, Raphinha ka regjistruar nëntë gola dhe tri asistime në 18 paraqitje në të gjitha garat. Ai ka shënuar në dy ndeshje radhazi ndaj Real Oviedos dhe FC Copenhagenit, gjë që ka ringjallur interesimin nga Liga Premier.

Sipas raportimeve të “El Nacional”, si Manchester United ashtu edhe Liverpool janë të gatshëm ta testojnë vendosmërinë e Barcelonës. Dy gjigantët anglezë thuhet se janë të përgatitur të ofrojnë rreth 95 milionë euro, afërsisht 82 milionë paund, për të arritur një marrëveshje gjatë verës.

Ndërkohë, interesim të fortë ka shfaqur edhe klubi saudit Al-Hilal. Megjithatë, sipas të njëjtave burime, Raphinha e ka refuzuar kategorikisht një transferim drejt Lindjes së Mesme. Ai e ka bërë të qartë se prioriteti i tij është të qëndrojë në Evropë.

Në rast se arrihet një marrëveshje, braziliani do të përfitonte një rritje të ndjeshme të pagës, duke mundur të fitojë rreth 22 milionë euro neto në sezon./Telegrafi

Pasi e mposhtën Real Madridin me rezultat 4–2 dhe siguruan kualifikimin për në “playoff”-in e Ligës së Kampionëve, Benfica është shortuar sërish për t’u përballur me gjigantët spanjollë në këtë fazë të kompeticionit.

Duke reaguar ndaj shortit, ish-trajneri i Real Madridit, Jose Mourinho, i cili aktualisht drejton Benfican, u shpreh se zgjedhjet ishin shumë të kufizuara.

“Kishim vetëm dy opsione, Real Madridin ose Interin. Nuk kishim shumë zgjedhje. Ne shortuam mbretin”.

Mourinho tregoi edhe një episod pas ndeshjes së fundit mes dy skuadrave, duke theksuar madhështinë e klubit madrilen.

“Një ditë më parë, kur një lojtar i Real Madridit më ofroi fanellën e tij pas ndeshjes, unë me shaka ua tregova lojtarëve të mi stemën që kishin në fanellë, 15 të tilla. Ata janë mbretërit. Me gjithçka që kjo nënkupton”.

“Nuk është vetëm historia. Do të luajmë kundër, ndoshta, pretendentit më të madh për ta fituar këtë kompeticion”, shtoi Mourinho.

Një eliminim ndaj Benficas në fazën “playoff” do të përbënte një dështim monumental për Real Madridin, duke pasur parasysh statusin dhe ambiciet e klubit në Ligën e Kampionëve./Telegrafi

GO+Peja ka shënuar fitore shumë të thellë ndaj Rahoveci 029 me rezultat 92-60, në një ndeshje ku vendasit e diktuan ritmin nga fillimi deri në fund dhe e mbyllën takimin me epërsi +32.

GO+Peja e nisi ndeshjen me energji të lartë, duke marrë kontrollin e rezultatit që në minutat e para dhe duke e shtuar vazhdimisht diferencën përmes tranzicionit dhe realizimeve nga distanca. Rahoveci 029 pati vështirësi të krijojë seri pikësh dhe në shumë momente u ndal nga mbrojtja agresive e pejanëve, të cilët i shfrytëzuan gabimet për pikë të shpejta.

Në pjesën e dytë, GO+Peja e menaxhoi epërsinë me qetësi dhe e rriti edhe më shumë avantazhin, duke mos lejuar kthim në lojë. Çereku i fundit shërbeu vetëm për administrim të rezultatit, teksa GO+Peja vazhdoi të ruajë intensitetin dhe e mbylli ndeshjen bindshëm 92-60.

Te GO+Peja, më efikasi ishte O. Williams me 21 pikë dhe 7 asistime, ndërsa u mbështet fuqishëm nga M. Mala me 13 pikë dhe 5 asistime, si dhe C. Edwards me 12 pikë, 9 kërcime dhe 3 vjedhje. Kontribut të rëndësishëm dha edhe T. Green me 10 pikë, 6 kërcime dhe 3 bllokada, ndërsa nga banka u veçuan S. Llapi me 9 pikë e 8 kërcime, dhe L. Routt me 9 pikë.

Te Rahoveci 029, më i dalluari ishte A. Thomas me 17 pikë, ndërsa K. Pullian kontribuoi me 13 pikë dhe 5 asistime. Megjithatë, mysafirët patën probleme serioze në realizim, sidomos nga distanca, ku përfunduan me vetëm 6/35 për tri pikë.

Në statistikat ekipore, GO+Peja ishte dukshëm më e saktë me 52% nga loja (33/63), realizoi 10 treshe nga 21 tentime (47%), dhe dominoi në lojën brenda me 44 pikë në zonë. Rahoveci 029, në anën tjetër, realizoi vetëm 30% nga loja (22/72) dhe nuk arriti të mbajë hapin në asnjë segment të ndeshjes.

Kjo fitore e thellë i jep GO+Pejës momentum të rëndësishëm për ndeshjet e ardhshme, ndërsa Rahoveci 029 do të kërkojë reagim dhe riorganizim pas kësaj humbjeje të rëndë./Telegrafi

Pas një fillimi relativisht të baraspeshuar, Bashkimi e rriti intensitetin në pjesën e dytë të çerekut të dytë dhe në vazhdimësi arriti të krijojë epërsi të qëndrueshme.

Në pushimin mes pjesëve, vendasit hynë me avantazh të qartë, ndërsa në çerekun e tretë e thelluan edhe më shumë diferencën, duke e mbyllur atë pjesë me rezultat 65-42.

Në çerekun e katërt, Bashkimi vazhdoi me lojë të organizuar në të dyja fazat e lojës, duke mos i dhënë mundësi Sigal Prishtinës të afrohet në rezultat. Diferenca maksimale arriti në +28, ndërsa ndeshja u mbyll me shifrat përfundimtare 84-63.

Te Bashkimi, më efikasi ishte S. Shorter me 24 pikë (9/14 nga loja), ndërsa I. Nwamu zhvilloi paraqitje shumë efikase me 21 pikë (9/12 nga loja). Kontribut të rëndësishëm dhanë edhe L. Zeqiri me 11 pikë, D. Lake me 8 pikë dhe 7 kërcime, si dhe M. Armstead me 7 pikë dhe 3 asistime. Nga banka u veçua T. Bickerstaff me 4 pikë dhe 6 kërcime.

Te Sigal Prishtina, më të dalluarit ishin K. Dukes me 17 pikë dhe E. Clarance gjithashtu me 17 pikë dhe 5 asistime, ndërsa V. Kakruki kontribuoi me 7 pikë. Megjithatë, mysafirët patën vështirësi në realizim nga distanca, duke përfunduar ndeshjen me vetëm 4/24 për tri pikë.

Në statistikat ekipore, Bashkimi realizoi 50% nga loja (31/62) dhe përfitoi nga gabimet e kundërshtarit me 18 pikë nga topat e humbur, ndërsa dominoi edhe në pikët nga tranzicioni dhe rastet e dyta. Sigal Prishtina, pavarësisht përpjekjeve, nuk arriti ta mbajë ritmin ofensiv dhe mbeti prapa gjatë gjithë pjesës së dytë.

Me këtë fitore, Bashkimi e konfirmon formën e mirë para ndeshjeve të radhës, ndërsa Sigal Prishtina do të kërkojë reagim në takimet në vijim.

Bashkimi ka shënuar fitore si vendas ndaj Sigal Prishtinës me rezultat 84-63, në një ndeshje ku vendasit dominuan nga çereku i parë e tutje dhe nuk e lëshuan kontrollin deri në fund./Telegrafi

Bayern Munichu është ndalur në një barazim në udhëtim te Hamburgu, në kuadër të xhiros së 20-të në Bundesliga.

“Bavarezzët” edhe pse dominuan nuk arritën t’i merrnin pikët e plota, me epilogun përfundimtar që rezultoi të jetë 2-2.

Fabio Vieira u tregua i saktë nga pika e bardhë për të zhbllokuar rezultatin (34’).

Sidoqoftë, Harry Kane shënoi pas asistimit të Joshua Kimmich për ta barazuar shpejtë rezultatin (42’).

Bayerni e përmbysi epërsinë përmes Serge Gnabry, sidoqoftë goli u anulua për pozitë jashtë loje.

Megjithatë, në fillimin e pjesës së dytë – Michael Olise e gjeti Luis Diaz, i cili nuk gaboi përballë portierit për ta përmbysur Hamburgun (46’).

Pas kësaj Hamburgu nisi të sulmojë më shumë dhe e gjeti golin e barazimit përmes Luka Vuskovic, i cili shënoi me kokë (53’).

Bayerni e mori krejtësisht lojën në dorë por assesi s’arriti ta thyente më mbrojtjen vendase. Kësisoj, ata shkojnë në kuotën e 51 pikëve ndërsa Hamburgu qëndron në vendin e 13-të me 19 sosh./Telegrafi

Chelsea me rikthim ka arritur t’i fitojë pikët e plota në përballjen londineze ndaj West Ham Unitedit.

“Blutë” ishin në disavantazh prej dy golave, por arritën ta përmbysnin në 3-2 për t’i gëzuar tifozët midis “Stamford Bridge”.

Jarrod Bowen kaloi West Hamin në epërsi pas vetëm shtatë minutave lojë për të shënuar nga afërsia.

Ndërsa, ishte Summerville që dyfishoi epërsinë pas asistimit të Wan-Bissaka (36’).

Megjithatë, në pjesën e dytë Chelsea zhvilloi krejtësisht lojë tjetër. Joao Pedro fillimisht me një goditje të fuqishme e ngushtoi epërsinë (58’).

Ndërsa, ishte Marc Cucurella që shënoi me kokë nga afërsia për ta barazuar rezultatin (70’).

Fitoren e Chelseas krejt në kohën shtesë e vulosi mesfushori Enzo Fernandez, i cili me një goditje të lehtë e la të shtangur portierin mysafir (90+2’).

Chelsea me këtë fitore ngjitët në pozitën e katërt me 40 pikë kurse West Ham qëndron në vendin e 18-të me 20 sosh./Telegrafi

Besiktas arriti fitore të rëndësishme në shtëpi ndaj Konyasporit, megjithatë situata nuk shkoi mirë për mesfushorin Kristjan Asllani.

Ylli shqiptar iu bashkua skuadrës turke të premten mbrëma, ndërsa debutoi qysh sot ndaj Konyasporit, debutim që duhet harruar sa më parë.

Vetëm pesë minuta pas inkuadrimit, Asllani shkaku i një ndërhyrje të rëndë u përjashtua direkt me karton të kuq (82’).

Sidoqoftë, e mira është që Besiktas në fund i mori pikët e plota, përndryshe turqit mund ta shihni edhe ‘fajtor’ për ndonjë humbje të mundshme.

Vlen të ceket se në minutën e 68-të u inkuadrua Milot Rashica, por nuk arriti ta gjejë portën pavarësisht tentimeve.

Besiktas renditet në pozitën e pestë në tabelë me 36 pikë, 10 më pak se lideri Galatasaray./Telegrafi

Trajneri i Real Madridit, Alvaro Arbeloa, deklaroi me vendosmëri se Jude Bellingham, Vinicius Junior dhe Federico Valverde gëzojnë “besimin e plotë” të tij, pavarësisht kritikave të forta që kanë rënë mbi këta tre lojtarë javët e fundit.

Treshja e yjeve nuk arriti të ketë ndikim në humbjen zhgënjyese 4–2 ndaj Benficas në Ligën e Kampionëve, një rezultat që rriti edhe më shumë presionin dhe vëmendjen mbi individët në dhomat e zhveshjes së Real Madridit. As Kylian Mbappe dhe Thibaut Courtois nuk i shpëtuan kritikave, pavarësisht se bënë gjithçka për ta mbajtur skuadrën në lojë.

Pas mbrëmjes zhgënjyese në Lisbonë, në kryeqytetin spanjoll nisën të qarkullojnë zëra për rotacione në formacion apo edhe për uljen në stol të disa emrave të mëdhenj. Megjithatë, Arbeloa i hodhi poshtë këto ide pa hezitim.

“E kuptoj debatin në futboll. Por unë gjithmonë dua t’i kem lojtarët më të mirë në fushë. Sa më shumë minuta të luajnë për mua, në dispozicion të ekipit, aq më mirë. Këta janë lojtarë që mund ta vendosin një ndeshje në çdo moment. Do të ketë njerëz që nuk janë tifozë të Madridit dhe që nuk i duan ata në fushë. Imagjinoj se tifozët e Real Madridit duan që lojtarët e tyre më të mirë të jenë gjithmonë të gatshëm dhe në fushë”.

“Pesë lojtarët që përmendët janë futbollistë që, në nivel botëror, mund të jenë në top 10. Ata kanë besimin tim të plotë. Nuk është besimi im ai që i vendos në fushë, por paraqitjet e tyre”, përfundoi Arbeloa.

Një nga pikat më të forta të Arbeloas si trajner i ri i Real Madridit është mbështetja e hapur që ai u jep çdo lojtari me fanellën e bardhë. Spanjolli e ka bërë prioritet të rikthejë besimin te një skuadër që po vuante dhe rezultatet u panë pothuajse menjëherë.

Pas një debutimi ku një formacion i rotuar nuk arriti të mposhtte Albaceten e kategorisë së dytë, lojtarët kryesorë u rikthyen në ekip dhe Real Madridi regjistroi tri fitore radhazi. Gjatë kësaj serie, “Los Blancos” shënuan 10 gola dhe pësuan vetëm një.

Gjigantët spanjollë dukeshin sikur kishin rifituar vetëbesimin, veçanërisht Vinicius Jr, marrëdhënia e tensionuar e të cilit me Xabi Alonson kishte ndikuar jo vetëm gjysmën e parë të sezonit të tij, por edhe gjithë ekipin. Megjithatë, një humbje e rëndë e riktheu Real Madridin me këmbë në tokë.

Kritikat ndaj emrave të mëdhenj të klubit nuk janë pa bazë, sidomos për brazilianin, i cili ka vetëm dy gola në 22 paraqitjet e fundit. Pikëpyetje ka edhe për rolin e Valverdes në skuadër, veçanërisht pasi Trent Alexander-Arnold të rikthehet në krahun e djathtë; uruguaiani u shfaq dukshëm i dobët pas rikthimit në mesfushë në finalen e Superkupës së Spanjës.

Mbështetja publike dhe private ndaj lojtarëve ndihmon në rikthimin e unitetit në një dhomë zhveshjeje të përçarë, por nuk i shërben yjeve që po zhgënjejnë në fushë. Real Madridit i duhet një ndjenjë më e fortë përgjegjësie nëse synon të arrijë potencialin maksimal dhe të rifitojë mbështetjen e plotë të tifozëve.

Përveç vështirësive në fushë dhe përplasjes publike me Alonson, negociatat e ngecura për rinovimin e kontratës së Vinicius Jr kanë hedhur hije mbi sezonin 2025–26. Sulmuesi i krahut nisi bisedimet për zgjatjen e kontratës, e cila skadon në qershor 2027, që në janar të vitit të kaluar, por përparimi ka qenë minimal.

Vinicius Jr i është përkushtuar së ardhmes së tij Real Madridit — por me çfarë kostoje?

Mendohet se Vinicius Jr po kërkon një pagë historike prej 30 milionë eurosh në sezon, një shifër që klubi më herët nuk ishte i gatshëm ta pranonte. Megjithatë, tensionet në negociata dhe fishkëllimat e forta nga tifozët e Real Madridit nuk e kanë lëkundur besnikërinë e 25-vjeçarit ndaj klubit.

“Dua të qëndroj këtu për një kohë shumë të gjatë. Flitet shumë edhe për rinovimin e kontratës sime, sepse më ka mbetur edhe një vit. Ne jemi shumë të qetë për këtë çështje. Unë i besoj Florentino Perezit dhe ai më beson mua. Kemi një marrëdhënie shumë të mirë dhe gjithçka do ta zgjidhim në momentin e duhur. Nuk kemi asnjë nxitim”, deklaroi Vinicius Jr pas fitores 6–1 ndaj Monacos.

Megjithatë, me çdo paraqitje ku numri 7 nuk bind, kërkesat e tij financiare duken gjithnjë e më të vështira për t’u justifikuar, sidomos nëse do të thotë të paguhet më shumë se Mbappe, i cili pothuajse i vetëm mban peshën e golave të skuadrës.

Nëse Vinicius Jr nuk arrin të rikthehet në formë në katër muajt e ardhshëm, ai mund ta gjejë veten me shumë pak leverdi në bisedimet për kontratën me Real Madridin, pavarësisht se sa shpesh Arbeloa e lavdëron publikisht./Telegrafi

Atletja olimpike Sha'Carri Richardson i është lutur një oficeri policie që “të bashkëpunonte me të” gjatë një ndalese për tejkalim shpejtësie, duke thënë: “Po ju lutem, po ju përgjërohem”, sipas pamjeve nga kamera trupore të siguruara nga Fox News Digital.

Pamjet tregojnë kampionen olimpike duke iu lutur oficerit që të mos e arrestonte, pasi ishte kapur duke drejtuar makinën në mënyrë të rrezikshme.

Rreshteri Gerald McDaniels, i cili po lëvizte në korsinë qendrore, vuri re se Richardson po ndizte dritat e gjata ndaj makinës përpara saj dhe raportoi se Aston Martini i saj kishte arritur shpejtësinë 104 milje në orë në “State Road 429”, pranë Stoneybrook Parkway në Winter Garden, Florida. Për ta kapur, oficeri u detyrua të arrinte shpejtësi deri në 110 milje në orë.

“Do ta hiqja atë buzëqeshje nga fytyra jote”, i tha rreshteri Richardsonit sapo iu afrua dritares së pasagjerit. “Je ndaluar për shpejtësi të rrezikshme dhe të tepruar”.

Richardson u justifikua duke thënë se goma e pasme kishte presion 29 dhe se telefoni i kishte rrëshqitur, duke ndërruar mënyrën e funksionimit të makinës dhe duke shkaktuar rritjen e shpejtësisë. Ky shpjegim nuk e bindi McDanielsin.

“Po vozitje me 104 milje në orë në një zonë me kufi 65, me pajisje jo të rregullta, duke u ndezur njerëzve dritat që të largoheshin nga korsia, duke ndjekur shumë afër, duke përdorur çdo korsi për t’i kaluar të gjithë, duke më prerë rrugën, duke kaluar një makinë nga shpatulla e brendshme me dritat e emergjencës të ndezura. Do të shkosh në burg për shpejtësi të rrezikshme dhe të tepruar”, deklaroi oficeri.

Richardson u përgjigj se nuk e dinte që po ecte me aq shpejtësi, ndërsa rreshteri ia ktheu shkurt:

“Kjo është arsyeja pse të kanë dhënë një shpejtësimatës.”

“Unë jam një qytetare që respekton ligjin, zotëri”, tha Richardson, e cila vitin e kaluar ishte arrestuar për një incident me të dashurin e saj, atletin olimpik Christian Coleman, ishte nxjerrë nga një avion në vitin 2023 dhe ishte përjashtuar nga Lojërat Olimpike të Tokios për shkak të një testi pozitiv për marihuanë.

Pas disa shkëmbimeve fjalësh, vendimi i oficerit mbeti përfundimtar dhe realiteti u bë i pashmangshëm për Richardsonin, e cila këmbënguli se nuk kishte “asnjë qëllim” për të shkelur ligjin.

“Ju lutem, zotëri. Nuk po e bëja qëllimisht shpejtësinë. Ju lutem, zotëri. Po ju përgjërohem”, tha ajo.

“Ju lutem, mos më çoni në burg. Do të bëj gjithçka. Ju lutem, zotëri. Ju premtoj, nuk dua të shkoj në burg, jam këtu”.

Sha'Carri Richardson ka fituar medaljen e artë olimpike në stafetën 4x100 metra në Lojërat Olimpike Paris 2024 dhe triumfoi në garën e 100 metrave në Kampionatin Botëror 2023 në Budapest./Telegrafi