Mallorca po luan ndaj Athletic Bilbaos në një ndeshje që i përket javës së 20-të në La Liga.

Vendasit kaluan në epërsi qysh në minutën e pestë, ku autor i këtij goli ishte sulmuesi kosovar Vedat Muriqi, i cili realizoi në minutën e pestë për rezultatin 1-0 pas asistimit nga Sergi Darder.

Për Muriqin ky ishte goli i tij i 12-të deri më tani këtë sezon në La Liga, duke konfirmuar kështu formën spektakolare nëpër të cilën po kalon.

Megjithatë, i shpejtë ishte reagimi i mysafirëve, të cilët vetëm tre minuta më vonë ia dolën të barazojnë shifrat në 1-1 me anë të Unai Gomez.

Mallorca po kalon në një formë jo aq të mirë pasi nuk ka asnjë fitore në tri takimet e fundit në kampionat.

Një fitore eventuale sot do të ishte një hap i madh për t’u larguar edhe më shumë nga zona e cila çon në kategorinë e dytë të futbollit spanjoll./Telegrafi/

Real Madridi ka shënuar fitore me rezultat 2-0 në shtëpi ndaj Levantes në kuadër të javës së 20-të në elitën e futbollit spanjoll.

Kjo ndeshje u përcoll me një atmosferë tejet armiqësore për lojtarët e ‘Los Blancos’, pas fishkëllimave të shumta nga tifozët në stadium.

Disfata në finale e Superkupës së Spanjës ndaj Barcelonës dhe eliminimi nga Kupa e Mbretit bëri që tifozët të shpërthejnë në protesta.

Të gjithë lojtarët e Real Madridit u fishkëllyen nga tifozët në përjashtim të Mbappes ku cak i tyre kryesor u duk se ishte Jude Bellingham dhe Vinicius Junior.

Megjithatë, kjo nuk mjaftoi pasi një pjesë e konsiderueshme e stadiumit nisi të kërkojë edhe dorëheqjen e Florentino Perez.

Brohoritja zgjati pak, por ishte qartësisht e dëgjueshme dhe aspak e izoluar, pasi shumë tifozë iu bashkuan.

Pas përfundimit të pjesës së parë, teksa skuadrat po drejtoheshin drejt tunelit, thirrjet kundër presidentit të Real Madridit u rikthyen, kësaj here me dukshëm më shumë zëra sesa në minutën e pestë./Telegrafi/

Real Madridi ka shënuar fitore me rezultat 2-0 në shtëpi ndaj Levantes në kuadër të javës së 20-të në elitën e futbollit spanjoll.

Pjesa e parë u karakterizua nga lojë e kujdesshme dhe ndërhyrje të forta, me të dyja skuadrat që patën vështirësi të krijonin raste të pastra. Levante rrezikoi në minutën e 42-të, kur Pablo Martinez ekzekutoi një goditje të rrezikshme nga distanca, por topi kaloi shumë pranë shtyllës së djathtë.

Në pjesën e dytë, Real Madridi rriti presionin dhe në minutën e 56-të fitoi një penallti, pas një ndërhyrjeje të palejuar nga Dela.

Vendimi u konfirmua edhe pas rishikimit nga VAR-i, ndërsa Kylian Mbappé u tregua i saktë nga pika e bardhë në minutën e 58-të, duke mposhtur portierin Matheë Ryan për rezultatin 1-0.

Pas golit, madrilenët vazhduan të dominojnë dhe në minutën e 65-të dyfishuan epërsinë. Pas një goditjeje këndi të ekzekutuar në mënyrë perfekte nga Arda Guler, Raul Asencio u ngrit më lart se të gjithë në zonë dhe me kokë e dërgoi topin në rrjetë për 2-0.

Real Madridi ishte pranë golit të tretë në disa raste. Në minutën e 76-të, Franco Mastantuono goditi fuqishëm nga distanca, por topi u ndal nga traversa.

Vetëm dy minuta më pas, Jude Bellingham ishte shumë pranë golit, por portieri Matheë Ryan bëri një pritje spektakolare ndaj goditjes me kokë të anglezit.

Edhe Levante pati momentet e saj, me Ivan Romero që në minutën e 71-të lëshoi një goditje të rrezikshme nga skaji i zonës, por topi kaloi pak mbi traversë.

Në fund, Real Madridi menaxhoi qetësisht avantazhin dhe siguroi fitoren 2-0, duke treguar efikasitet në momentet vendimtare dhe kontroll të plotë në pjesën e dytë./Telegrafi/

Chelsea raportohet se është gati ta mbështesë trajnerin e ri, Liam Rosenior, duke realizuar deri në tre përforcime gjatë afatit kalimtar të janarit.

“Blutë” synojnë të forcohen në disa reparte, si një shenjë e qartë mbështetjeje për trajnerin e tyre, i cili këtë muaj zëvendësoi Enzo Marescan në stolin e Stamford Bridge.

Sipas një raporti nga The Telegraph, Chelsea dëshiron t’i japë Roseniorit mjetet e nevojshme për ta riformuar skuadrën sipas vizionit të tij.

Thuhet se klubi nga perëndimi i Londrës po i jep përparësi transferimit të një mbrojtësi qendror, diçka që ishte planifikuar edhe nën drejtimin e Marescas, por Chelsea humbi garën ndaj Real Madridit për nënshkrimin e Dean Huijsen verën e kaluar.

Chelsea besohet gjithashtu se po monitoron objektiva në mesfushë dhe në sulm në prag të afatit kalimtar veror, megjithatë bashkëpronarët Todd Boehly dhe Clearlake Capital janë të gatshëm të veprojnë edhe në tregun e dimrit, nëse paraqiten mundësitë e duhura.

Një nga lojtarët që Chelsea po e ndjek me vëmendje të veçantë është mbrojtësi shumë i vlerësuar i Rennes, Jeremy Jacquet.

Gazetari italian Fabrizio Romano raporton se dy klubet kanë zhvilluar bisedime gjatë 24 orëve të fundit.

Ndërsa Jacquet mbetet objektivi kryesor i Chelseat për përforcimin e mbrojtjes, Daily Mail shkruan se klubi ka përgatitur edhe një listë alternative në rast se nuk arrihet marrëveshje me Rennes këtë muaj.

Sipas raportit, Chelsea është gjithashtu admirues i Jacobo Ramon, 21 vjeç, i cili aktualisht luan për Como të drejtuar nga Cesc Fabregas në Serie A, si dhe i mbrojtësit të Bournemouth, Marcos Senesi, 28 vjeç, i cili mund të jetë i disponueshëm për një çmim të ulët për shkak se kontrata e tij skadon në verë./Telegrafi/

Manchester City tashmë ka identifikuar objektivin e radhës për një transferim të madh financiar, teksa po finalizon marrëveshjen për mbrojtësin e Crystal Palace, Marc Guehi, për të cilin Pep Guardiola është një admirues i madh.

City ka rënë dakord të paguajë një shumë fillestare prej 20 milionë eurosh për shërbimet e Guehit, i cili më herët ishte lidhur fort me një transferim te Liverpool, por marrëveshja dështoi në ditën e fundit të afatit kalimtar.

Besohen se bisedimet për nënshkrimin e reprezentuesit anglez janë në fazë shumë të avancuar, ndërsa trajneri i Palace, Oliver Glasner, ka konfirmuar se mbrojtësi është “në fazat përfundimtare” të transferimit dhe nuk do të aktivizohet në ndeshjen ndaj Sunderlandit të shtunën.

Me ardhjen e Guehit, shpenzimet e Manchester Cityt do të shkojnë në rreth 450 milionë euro gjatë 12 muajve të fundit.

Megjithatë, “Qytetarët” tashmë po planifikojnë transferimin e radhës madhor. Sipas një raporti të TeamTalk, klubi nga Manchesteri synon të nënshkruajë tre objektiva kyç nga Liga Premier për vitin 2026.

Antoine Semenyo, i cili iu bashkua skuadrës së Pep Guardiolës nga Bournemouth këtë muaj në një marrëveshje prej 64 milionë eurosh, thuhet se ishte pjesë e këtij plani, së bashku me Marc Guehi dhe mesfushorin e Nottingham Forest, Elliot Anderson.

Që nga transferimi i tij te Forest nga Newcastle në vitin 2024, Anderson është shndërruar në një nga lojtarët më të spikatur të Ligës Premier.

Në muajin gusht, ai u shpërblye me ftesën e parë në kombëtaren A të Anglisë, ndërsa deri tani ka zhvilluar gjashtë ndeshje nën drejtimin e Thomas Tuchel, i cili pritet t’i japë mundësi edhe në Kupën e Botës këtë verë.

23-vjeçari ka zgjuar interesimin e disa klubeve të mëdha së fundmi, përfshirë Manchester United, Bayern Munich dhe Chelsea.

Ai është lavdëruar publikisht edhe nga disa trajnerë me emër, përfshirë Pep Guardiola, i cili beson se Anderson është një “përshtatje ideale” për sistemin e tij taktik, pasi mund të luajë si organizator i thellë i lojës apo si mesfushor box-to-box në rolin e numrit 8./Telegrafi/

Trajneri i Barcelonës, Hansi Flick, është shprehur i kënaqur me ndikimin që ka pasur Marcus Rashford, i huazuar nga Manchester United, por ka theksuar se vendimi përfundimtar për një transferim të përhershëm i takon drejtorit sportiv Deco dhe drejtuesve të klubit.

“Paraqitjet e tij kanë qenë të mira deri më tani, por kjo është diçka që duhet ta menaxhojmë së bashku me Decon dhe klubin. Ende kemi mjaft kohë përpara, muaj të tërë,” ka deklaruar Flick.

“Marcus është një lojtar i nivelit të lartë dhe ne e kuptojmë situatën e tij. Ne jemi Barça dhe jemi një nga klubet më të mira në botë”.

Trajneri gjerman bëri edhe një krahasim me filozofinë e klubit ndaj lojtarëve të rinj nga La Masia.

“Është njësoj si ajo që them për lojtarët e La Masias. Ne u japim mundësinë të luajnë dhe u besojmë atyre”.

“Nëse dëshiron të luash për Barçën, ne do të jemi 100 për qind pas teje. Këtë dua ta shoh edhe nga lojtarët e tjerë”, përfundoi ai.

Kujtojmë se Barcelona do të zhvillojë ndeshjen e saj të radhës të dielën, ku do të luajë si mysafire e Real Sociedadit./Telegrafi/

Barcelona pritet të humbasë mesfushorin e talentuar Dro Fernandez, i cili do të largohet nga klubi gjatë këtij afati kalimtar.

Adoleshenti spanjollo-filipinas kishte nisur të bëjë përparim me ekipin e parë të Barcelonës këtë sezon, por ka vendosur ta vazhdojë karrierën diku tjetër.

Sipas Sport dhe Mundo Deportivo, Dro do të largohet nga klubi në janar, pasi i ka komunikuar drejtuesve se do të aktivizojë klauzolën e lirimit prej 6 milionë eurosh.

18-vjeçari iu bashkua akademisë së Barcelonës tre vite më parë dhe, ndonëse katalanasit do të përfitojnë financiarisht nga ky transferim, humbja e tij përfaqëson edhe një kosto të konsiderueshme sportive për të ardhmen.

Dro kishte nisur të stërvitej me ekipin e parë gjatë fazës përgatitore, ndërsa trajneri Hansi Flick u impresionua mjaftueshëm për ta përfshirë në turneun parasezonal në Japoni dhe Korenë e Jugut.

Nga të gjithë talentët e La Masias që morën pjesë në këtë turne, ai ishte lojtari që grumbulloi më shumë minuta, duke shënuar edhe gol.

Flick ishte i interesuar t’i jepte vazhdimisht hapësira, dhe megjithëse ka kaluar më shumë kohë me ekipin U19 sesa me Barça Atlètic, ai ka regjistruar pesë paraqitje me ekipin e parë këtë sezon.

Në këto paraqitje përfshihen edhe dy ndeshje si titullar ndaj Olympiakos dhe Real Sociedad, duke dhënë një asist në ndeshjen e parë.

Drejtori sportiv Deco kishte tentuar të rinovonte kontratën e tij, e cila skadon pas vetëm 18 muajsh, por disa klube kanë shprehur gatishmëri për të aktivizuar klauzolën e lirimit.

Edhe pse Dro ende nuk ka vendosur se cilën ofertë do të pranojë, ai i ka bërë të ditur klubit se do të largohet./Telegrafi/

Paris Saint-Germain ka shënuar fitore me rezultat 3-0 në shtëpi ndaj Lille në kuadër të javës së 18-të në Ligue 1.

Lille e nisi takimin më guximshëm dhe ishte pranë golit që në minutat e para.

Në minutën e dytë, Olivier Giroud provoi nga distanca, por topi u ndal nga traversa, ndërsa pak çaste më vonë Ethan Mbappé përfitoi nga një top i kthyer në zonë, por u ndal nga pritja vendimtare e portierit Lucas Chevalier.

PSG reagoi dhe në minutën e 13-të kaloi në epërsi. Pas një pasimi të saktë nga Vitinha, Dembele kontrolloi topin në skajin e zonës dhe me një goditje precize e dërgoi topin në cepin e poshtëm të portës, duke kaluar edhe përmes shtyllës për rezultatin 1-0.

Në pjesën e dytë, parisienët vazhduan të kontrollojnë lojën. Në minutën e 57-të, Nuno Mendes shënoi, por goli u anulua për pozitë jashtë loje.

Vetëm pak minuta më pas, PSG dyfishoi epërsinë.

Në minutën e 64-të, Dembele realizoi golin e dytë personal dhe të ndeshjes, duke përfituar nga një pasim brenda zonës dhe duke e lobuar mjeshtërisht portierin Berke Ozer, i cili kishte dalë nga vija e tij për rezultatin 2-0.

Deri në fund, vendasit realizuan edhe njëherë tjetër, kësaj radhe me anë të Bradley Barcola që realizoi për rezultatin përfundimtar 3-0.

Kampioni në fuqi i Evropës tani ka 42 pikë dhe aktualisht është lidere e tabelës me dy pikë më shumë se Lens që ka 40 sosh, por me një ndeshje më pak të luajtur./Telegrafi/

Mesfushori i Barcelonës, Marc Casado, po konsideron largimin nga klubi për shkak të mungesës së minutave këtë sezon.

22-vjeçari ishte një nga lojtarët kyç në sezonin e parë të Hansi Flick, por gjatë vitit të fundit ka zbritur në hierarkinë e skuadrës.

Casado ishte një nga zbulimet e sezonit të kaluar nën drejtimin e Flick, duke u bërë titullar i rregullt në gjysmën e parë të sezonit, dhe madje duke bërë debutimin e tij me Spanjën.

Megjithatë, që nga rikuperimi i formës dhe rikthimi i Frenkie De Jong, Casado ka kaluar shumicën e kohës në stol.

Këtë sezon ai ka regjistruar 19 paraqitje, duke grumbulluar 871 minuta dhe dhënë një asistim. Nga këto paraqitje, 10 kanë qenë si titullar, ndërsa në dy raste është zëvendësuar në pjesën e parë të ndeshjes.

Gjatë verës u bë e qartë se Barcelona ishte e hapur për ta shitur Casadon për çmimin e duhur, me spekulime për një transferim prej 30 milionë eurosh te West Ham , që u intensifikuan drejt fundit të gushtit.

Megjithatë, Flick i bëri klubit të ditur se dëshironte ta mbante Casadon, dhe mesfushori vendosi të qëndrojë.

Sipas Marca, Casado tani dëshiron të luajë më rregullisht dhe po konsideron mundësinë e largimit.

Një pjesë e këtij vendimi lidhet me dëshirën për të hyrë në planet e Luis De La Fuente për Spanjën para Kupës së Botës dhe ekziston mundësia që ai të jetë titullar i rregullt edhe për skuadrën e Diego Simeone./Telegrafi/

Liverpooli ka tre alternativa ideale ndaj objektivit kryesor të afatit kalimtar, Marc Guehi, pasi Manchester City siguroi nënshkrimin me yllin anglez.

Në fund të një afati kalimtar veror tashmë shumë të bujshëm për Liverpoolin e Arne Slotit, dolën lidhje me kapitenin e Crystal Palace, Marc Guehi.

Raportet në ditën e fundit të afatit kalimtar pretendonin se mbrojtësi qendror kishte kryer vizitat mjekësore përpara transferimit të propozuar, por marrëveshja dështoi në orët e fundit.

Tani meqenëse Guehi ka arritur marrëveshje për t’u transferuar tek Manchester City, këto janë tri alternativat që klubi anglez po i shqyrton për ta përforcuar fazën defanzive.

Nico Schlotterbeck – Borussia Dortmund

Me kontratën e Ibrahima Konate që pritet të skadojë në verë, Liverpooli mund të detyrohet të marrë në konsideratë afrimin e një mbrojtësi qendror të gatshëm për të hyrë menjëherë në formacionin titullar.

Në këtë rast, Schlotterbeck i Dortmundit mund të ishte një përputhje ideale, pasi 26-vjeçari është në gjendje të ofrojë të njëjtën prezencë fizike si Konate.

Me gjatësi 1.91 metra, Schlotterbeck kontribuon si në mbrojtje ashtu edhe në sulm, duke shënuar tetë gola për Borussia Dortmund.

Alessandro Bastoni – Inter

Një tjetër opsion elitar që mund të integrohej menjëherë në formacionin e Liverpoolit është mbrojtësi qendror i Interit, Alessandro Bastoni.

26-vjeçari është përshkruar nga legjenda italiane Giorgio Chiellini si “një nga mbrojtësit më të mirë” në futboll, dhe arsyet janë të qarta.

Bastoni ka fituar dy herë Serie A-n me Interin, së bashku me disa trofe të Kupës së Italisë dhe Superkupës, si dhe Kampionatin Evropian 2020 me Italinë.

Marcos Senesi – Bournemouth

Pas dështimit për të siguruar objektivin ideal Guehin, drejtori sportiv i Liverpoolit, Richard Hughes, mund t’i drejtohet ish-klubit të tij, Bournemouth, për të plotësuar nevojën për një mbrojtës qendror.

Nëse Hughes vendos të rikthehet te Bournemouth, atëherë Senesi është pa dyshim opsioni më i spikatur, duke pasur parasysh paraqitjet e tij këtë sezon dhe situatën e kontratës.

Kontrata aktuale e 28-vjeçarit skadon në qershor të këtij viti dhe raportohet se ai është i etur të bëjë hapin e radhës në karrierë, ndaj ka refuzuar çdo propozim për rinovim./Telegrafi/

Futbollisti i talentuar Endrit Morina, është bërë shpejtë me skuadër të re pas përfundimit të bashkëpunimit të tij me Dritën.

Sot (e premte) gjatë ditës, klubi gjilanas kishte bërë me dije se kanë ndërperë bashkëpunimin me Morinën, i cili ishte bërë pjesë e tyre nga Feronikeli ’74.

Sidoqoftë, ai nuk është vonuar për të gjetur një ambient të ri dhe tashmë ka gjetur ‘folenë’ e re.

Sipas burimeve të Telegrafit, Morina ka arritur marrëveshje me Prishtinën e Re dhe pritet që aty ta vazhdojë karrierën.

Prishtina e Re së fundmi ka ndarë rrugët me disa futbollistë dhe tashëm Morina pritet të jetë goditja e tyre e janarit.

24-vjeçari më parë ka luajtur edhe në Zvicër, ku ka veshur fanellat e Xamax dhe Biel-Bienne

Pas 19 xhirove të zhvilluara deri më tani në elitën e futbollit kosovar, Prishtina e Re renditet e fundit me 15 pikë të grumbulluara./Telegrafi/

Erling Haaland tashmë ka dhënë mendimin e tij rreth mundësisë së transferimit te Real Madrid, ndërsa mediat e lidhin sulmuesin me një lëvizje rekord botëror prej 500 milionë eurosh drejt gjigantit të La Ligës.

Haaland është një nga sulmuesit më efektivë në Evropë, duke regjistruar 287 gola në 362 paraqitje profesionale gjatë karrierës së tij me klubet Molde, Bryne, Red Bull Salzburg, Borussia Dortmund dhe Manchester City.

Forma e tij e jashtëzakonshme i siguroi një kontratë të majme te City, me raporte që flasin për 500,000 paund në javë para bonuseve, të cilën e nënshkroi në janar të 2024 dhe e mban atë në ‘Etihad’ deri në qershor 2034.

Deri atëherë, Haaland do të jetë 34 vjeç dhe me shumë mundësi jashtë kulmit të tij. Shumë tifozë të Cityt shpresojnë që sulmuesi norvegjez ta përfundojë kontratën e tij të gjatë.

Por sipas Sky Germany, presidenti i Real Madrid, Florentino Perez, është i interesuar që ta sjellë Haaland në ‘Santiago Bernabeu’, në një marrëveshje që do të thyejë çdo rekord botëror.

Në mars të 2024, para ndeshjes së Manchester City ndaj Copenhagen në 1/8-at e Ligës së Kampionëve, Haaland u pyet rreth një transferimi të mundshëm në kryeqytetin spanjoll.

“Real Madrid? Nuk e di se çfarë mund të sjellë e ardhmja”, ka thënë fillimisht Haaland.

Më pas, në janar të 2025, ai u pyet përsëri për të njëjtën temë, pas deklaratës së babait të tij, Alf Inge, i cili sugjeroi se dëshironte ta shihte djalin e tij të luante në të gjitha ligat kryesore evropiane për dy ose tre vjet kur Erling iu bashkua City në 2022.

“Sapo nënshkrova një kontratë nëntë-vjeçare e gjysmë, çfarë doni të them?”.

“Jam shumë i lumtur me zgjedhjen time dhe mezi pres të kaloj shumë vite në Manchester dhe kaq është”, përfundoi ai./Telegrafi/

Jurgen Klopp është rishfaqur fuqishëm në ambientin e Real Madridit pas shkarkimit të Xabi Alonsos.

Nuk është hera e parë që trajneri gjerman lidhet me stolin madrilen, por këtë herë spekulimet janë shumë më të forta.

Gjatë sezoneve të fundit, disa media e kanë vendosur Kloppin në orbitën e Real Madridit. Megjithatë, asnjëherë nuk ka pasur një ofertë konkrete apo një lëvizje zyrtare nga gjiganti spanjoll.

Situata aktuale është ndryshe. Real Madridi po e vlerëson seriozisht drejtimin e projektit të ardhshëm dhe emri i Jürgen Klopp përputhet me profilin e kërkuar, përvojën dhe aftësinë për të udhëhequr një rindërtim të thellë të skuadrës.

Klopp po e konsideron seriozisht të marrë drejtimin e Real Madridit

Sipas raportimeve të Football365, Klopp do të ishte i gatshëm ta pranonte sfidën te Real Madridi, por ai nuk do të vinte duarbosh. Trajneri gjerman do të kishte një kërkesë prioritare për repartin e mesfushës.

Zgjedhja e tij do të ishte Bruno Guimaraes, mesfushori aktual i Newcastle United. Klopp e konsideron atë një pjesë kyçe për stilin e tij të lojës dhe një shtyllë mbi të cilën mund të ndërtohet projekti i ri.

Kjo zgjedhje ka befasuar shumëkënd, pasi Bruno Guimaraes nuk i ngjan profilit klasik të Luka Modric apo Toni Kroosit, referenca historike të mesfushës së Real Madridit.

Megjithatë, Klopp sheh te braziliani një mesfushor me lidership, energji dhe aftësi për të mbështetur një ekip intensiv dhe vertikal.

Për më tepër, ardhja e tij do të sillte një problem shtesë për Real Madridin. Guimaraes do të zinte një vend jo-BE, një burim shumë i kufizuar në planifikimin e ardhshëm të klubit.

Për këtë arsye, brenda klubit ekziston skepticizëm ndaj kësaj mundësie. Në të kaluarën ka pasur bisedime rreth brazilianit, por Real Madridi nuk kishte ndërmarrë asnjë veprim konkret./Telegrafi/

Komisioni i Garave i Federatës së Basketbollit të Kosovës (FBK) ka vendosur gjoba dhe masa disiplinore pas incidenteve të ndodhura në xhirot e fundit të Superligës.

Skuadra e Vëllaznimit të Gjakovës është gjobitur me 2200 euro për sjellje të pahijshme të tifozëve gjatë ndeshjes ndaj Bashkimit të Prizrenit.

Në fund të çerekut të dytë, disa tifozë vendas sulmuan disa shikues mysafirë që ndodheshin në ballkonin përballë tribunës kryesore.

Një nga tifozët vendas hodhi një shishe që goditi ndihmës-trajnerin e Bashkimit, Bledar Gjeqaj.

Përveç gjobës, komisioni ka vendosur që Vëllaznimi të mos ketë shikues në ballkonin nga i cili u hodh shishja, si masë shtesë parandaluese.

Ndërkohë, Sigal Prishtina është gjobitur me 1400 euro për incidentet që ndodhën gjatë ndeshjes së së enjtes ndaj Yllit, ndërsa Trepça ka marrë një gjobë prej 700 eurosh për fyerje të tifozëve ndaj lojtarëve të Pejës.

FBK rikujton se masat e tilla synojnë të rrisin sigurinë dhe disiplinën në stadiume, duke mbrojtur lojtarët, stafet dhe tifozët, dhe paralajmëron se përsëritja e incidenteve do të sjellë sanksione më të rënda./Telegrafi/

Futbollisti i Sunderlandit, Luke O’Nien, ka folur hapur për përvojën e tij duke punuar krah për krah me Granit Xhakën te Sunderland, duke pranuar se kjo eksperiencë ka pasur një ndikim të thellë tek ai, si lojtar ashtu edhe si lider.

Duke folur pas fitores së Sunderlandit ndaj Evertonit në FA Cup, O’Nien u ndal te përgjegjësia që ka mbajtur këtë sezon dhe te ndikimi që Xhaka ka pasur prapa skenave, veçanërisht pas momenteve si përballja e fundit në Ligën Premier ndaj Newcastle United, ku O’Nien iu drejtua skuadrës para ndeshjes, ndërsa Xhaka qëllimisht u tërhoq një hap mbrapa.

“Të jem i sinqertë, kjo do të thoshte gjithçka për mua”, tha O’Nien kur u pyet për gjestin e Xhakës para ndeshjes kundër Newcastle United në ‘Stadium of Light’, të cilën Sunderlandi e fitoi 1-0 falë një autogoli spektakolar të Nick Woltemade.

“Ai është një nga, në mos lideri më i mirë në futboll dhe ai ma dha mua këtë nder. Sinqerisht, nuk do të mund ta përshkruaj me fjalë se sa shumë do të thotë kjo për mua”.

“Ai është një lojtar i veçantë. Ndonjëherë e gjej veten duke mos besuar që është ende këtu dhe që po e çon klubin përpara në kaq shumë mënyra”.

“Bisedat që bën, mënyra se si sillet, edhe para ndeshjes së sotme, më tregonte çfarë është e rëndësishme, çfarë të kërkoj dhe çfarë të bëj”.

“Është një person shumë i lehtë për t’u komunikuar, qoftë për futbollin, familjen, të kaluarën apo të ardhmen. Ai është thjesht një njeri shumë i mirë”.

Mesfushori i Sunderlandit theksoi se ambienti i krijuar nga figurat me përvojë si Granit Xhaka po rrit standardet brenda skuadrës, pavarësisht minutave individuale të secilit lojtar në fushë./Telegrafi/

Ish-trajneri i Real Madridit, Zinedine Zidane, ka dhënë disa mendime rreth suksesit të tij me “Los Blancos”.

Francezi fitoi tre herë Ligën e Kampionëve gjatë periudhës së tij në krye të skuadrës në 'Santiago Bernabeu', si dhe dy tituj të La Ligës.

Real Madridi aktualisht ndodhet në mes të një sezoni të vështirë, pasi shkarkoi Xabi Alonson në mes të sezonit të tij të parë si trajner dhe e zëvendësoi atë me Alvaro Arbeloan.

Zidane pati dy periudha në krye të Real Madridit dhe solli shumë trofe në ‘Santiago Bernabeu’.

Tani ai ka folur për kohën e tij te Real Madridi në kanalin YouTube të Hamidou Msaidie, një prej anëtarëve të stafit të tij në Madrid, duke zbuluar se çfarë nevojitet për të qenë i suksesshëm.

“Te Real Madridi, ne ishim në dispozicion të lojtarëve. Për mua, kjo është ajo që e bën diçka të fortë; je aty për lojtarin. Nëse nuk e kupton këtë, nuk mund të zgjasësh në këtë profesion”.

“Ne jemi aty për t’i mbështetur; duhet të tregosh se je pranë tyre. Që dhoma e zhveshjes ta pranojë atë që dëshiron të zbatosh, ata duhet të na pëlqejnë”.

“Nëse lojtarët nuk bien dakord me gjithçka që vendos, stërvitjen, të gjitha këto… gjithmonë do të mungojë diçka”.

“Me ne, mendoj se ata u kënaqën vërtet në të gjitha aspektet. Ne u dhamë shumë vetëbesim lojtarëve”.

“Ata kishin kaluar një periudhë disi të vështirë dhe kishin nevojë të rifitonin besimin, formën fizike, gjithçka. Ne vendosëm një strukturë që t’i ndihmonte t’i rikthenin të gjitha këto”.

“Kur një lojtar është konkurrues, i lumtur të stërvitet dhe të dalë në fushë për të luajtur ndeshje, atëherë je i destinuar të fitosh të tre Ligat e Kampionëve”, ka thënë Alonso./Telegrafi/

Kapiteni i Real Madridit, Dani Carvajal, ka deklaruar se skuadra e tij ka arritur pikën më të ulët, pas eliminimit të papritur nga Kupa e Mbretit nga Albacete të mërkurën në mbrëmje.

Dy herë ‘Los Blancos’ arritën të barazonin rezultatin, duke shënuar nga goditjet standarde, por pësuan golin e fitores në minutën e fundit të ndeshjes nga Jefte Betancour.

Pas ndeshjes, fjalën për mediat e mori Carvajal.

“Ne kemi arritur pikën më të ulët në mënyrë spektakolare. Duhet të përballemi me realitetin edhe kur humbasim, dhe pikërisht kjo është ajo që duhet të bëjmë tani. Ne, lojtarët, jemi përgjegjës në fund të fundit. Ka pak më shumë që mund të them”.

Kur u pyet se çfarë i mungoi Real Madridit në këtë ndeshje, Carvajal nuk dha një diagnozë të qartë.

“Nëse do e dija, nuk do kishim humbur. Nuk duhet të jesh gjeni për ta kuptuar këtë. Kemi arritur pikën më të ulët; u eliminuam nga një skuadër e kategorisë së dytë. Urime atyre”.

“Që nga nesër, është koha për vetëkritikë. Kemi dy gara fantastike dhe do të luftojmë për gjithçka”.

“Mesazhi është… se skuadra nuk është në nivelin e saj më të mirë, padyshim; duhet të punojmë shumë dhe të japim shumë më tepër. Kjo është realiteti. Dhe ky është mesazhi. Luftojmë për gjithçka”.

“Ne kërkojmë falje tifozëve. As ne, përfshirë edhe mua, nuk po përmbushim pritshmëritë e këtij klubi dhe do të japim gjithçka në muajt e ardhshëm për ta kthyer situatën”, ka deklaruar ai./Telegrafi/

Ndërsa një pjesë e madhe e vëmendjes është përqendruar te kriza që po zhvillohet te Real Madridi, i cili është eliminuar nga gara për dy trofe brenda vetëm katër ditësh, si dhe te ndryshimet në pankinë, Albacete meriton merita të mëdha për rolin e tij në një prej befasive më të mëdha të Kupës së Mbretit.

Skuadra e kategorisë së dytë bëri histori kundër Los Blancos në stadiumin “Carlos Belmonte”, në një mënyrë dramatike, duke shënuar golin e fitores pothuajse me goditjen e fundit të ndeshjes.

Dy skuadrat nuk ishin përballur me njëra-tjetrën që nga viti 2005, kur Real Madridi kishte fituar 2-1, ndërsa ndeshja e zhvilluar në vitin 2004 në “Bernabeu” kishte përfunduar me fitoren 6-1 për Los Blancos.

Ajo skuadër përfshinte emra të mëdhenj si Luis Figo, Ronaldo Nazario, Michael Oëen dhe Raul Gonzalez.

Në total, dy ekipet ishin përballur 14 herë, me Real Madridin që kishte fituar 11 ndeshje dhe tre kishin përfunduar në barazim.

Albacete kishte shënuar vetëm tre gola në të gjitha këto përballje, një shifër që e dyfishoi të mërkurën në mbrëmje.

Pamje të publikuara nga Federata Spanjolle e Futbollit (RFEF) nga dhomat e zhveshjes së Albacetes para ndeshjes zbuluan se trajneri Alberto Gonzalez kishte parashikuar fitoren.

“Zotërinj. Kurrë në historinë e Albacetes nuk ka pasur fitore ndaj Real Madridit. Dhe do t’ju kujtoj pse: sepse ajo ditë ishte e rezervuar për sot. Për ne”, i kishte thënë Gonzalez lojtarëve të tij./Telegrafi/

Ministria e Kulturës, Rinisë dhe Sporteve (MKRS) ka reaguar lidhur me zhvillimet e fundit te Sigal Prishtina, pas zgjedhjes së Bekë Berishës në një pozitë udhëheqëse në klub, në Kuvendin e mbajtur më 14 janar 2026.

MKRS ka bërë të ditur se është njoftuar zyrtarisht për këtë vendim dhe ka rikujtuar detyrimin për respektimin e Ligjit Nr. 06/L-011 për Parandalimin e Konfliktit të Interesit, duke pasur parasysh se Berisha është deputet i zgjedhur i Kuvendit të Kosovës pas zgjedhjeve të 28 dhjetorit 2025.

Sipas këtij ligji, zyrtarët e lartë publikë mund të jenë anëtarë të organeve drejtuese të organizatave joqeveritare nga fusha e sportit, por nuk mund të ushtrojnë funksione menaxheriale, përfaqësuese apo mbikëqyrëse në persona juridikë privatë fitimprurës, as të jenë bartës të funksioneve drejtuese, siç përcaktohet në nenet 13 dhe 14 të ligjit në fjalë.

Po ashtu, ligji obligon që çdo situatë e konfliktit të interesit të parandalohet ose të zgjidhet brenda afatit prej 30 ditësh nga marrja e detyrës.

Në këtë kontekst, MKRS ka kërkuar që, pas betimit dhe marrjes së mandatit në legjislaturën e re, Bekë Berisha të ndërmarrë të gjitha masat e nevojshme brenda afateve ligjore për të shmangur çdo konflikt të interesit, në përputhje me legjislacionin në fuqi.

Ministria ka theksuar se do ta përcjellë nga afër këtë situatë dhe do të bashkëpunojë me institucionet relevante, përfshirë Agjencinë për Parandalimin e Korrupsionit, me qëllim të ruajtjes së integritetit në sport dhe respektimit të standardeve të qeverisjes së mirë./Telegrafi/

Transferimi rekord i Florian Wirtz nga Bayer Leverkusen te Liverpool për 140 milionë euro verën e kaluar mbetet një nga lëvizjet më të përfolura në historinë e fundit të Bundesligës.

Por, para se reprezentuesi gjerman të vendoste të transferohej në Ligën Premier, pati një përpjekje për t’ia ndryshuar mendjen dhe ajo erdhi nga brenda vetë skuadrës së tij.

Në podcastin Playmaker të 360Media, kapiteni i Leverkusenit, Robert Andrich, ka pranuar se personalisht e kishte këshilluar Wirtzin të mos transferohej te Bayern Munich, i cili në atë kohë konsiderohej favorit për ta nënshkruar.

“I thashë: të lutem, mos e bëj! Mos na e bëj këtë”, kujton Andrich t’i ketë thënë yllit gjerman.

Andrich, i cili në rininë e tij kishte qenë tifoz i Bayernit, tha se nuk mund ta imagjinonte bashkëlojtarin e tij duke forcuar rivalin më të madh të Leverkusenit.

“Doja që ai të shkonte jashtë vendit. Madje këtë ua thashë edhe njerëzve të Bayernit”, shtoi ai.

Robert Andrich dhe Florian Wirtz

Dëshira e Andrich u bë realitet. Pas muajsh negociatash, Wirtz zgjodhi Liverpoolin, ndërsa bisedimet me Bayernin u kufizuan në vetëm një takim në fund të sezonit, në një moment kur lojtari tashmë e kishte marrë vendimin.

Thuhet se 22-vjeçari e shihte Ligën Premier si një sfidë më të madhe personale.

Pas fitimit të dy trofeve me Leverkusenin në vitin 2024, vendimi i Wirtzit për t’u larguar nga Gjermania erdhi si surprizë, madje edhe për kapitenin e tij.

“Isha i lumtur për të. Nuk e mendoja se do të vendoste të largohej jashtë vendit kaq shpejt”, përfundoi ai./Telegrafi/