Barcelona ka arritur të sigurojë vazhdimësinë e një prej talenteve të rinj më premtues, pasi Roony Bardghji ka vendosur të qëndrojë në klub dhe të luftojë për një vend në ekipin e parë, pavarësisht interesimit konkret nga disa klube të Ligës Premier.

Në një periudhë kur afati kalimtar është veçanërisht aktiv, anësori ka qenë i qartë në qëndrimin e tij dhe nuk ka pranuar të dëgjojë oferta që do ta largonin nga objektivi kryesor: të ketë sukses me fanellën e Barcelonës.

Lojtari beson se ky është momenti i duhur për të bërë hapin e radhës në karrierë brenda Camp Nou, duke konkurruar në nivelin më të lartë dhe duke u zhvilluar çdo ditë përmes punës dhe disiplinës.

Gjatë javëve të fundit, Bardghji ka marrë oferta nga disa klube angleze, mes tyre Crystal Palace, Everton, Nottingham Forest dhe Sunderland, të cilat i garantonin më shumë minuta dhe një rol të rëndësishëm afatshkurtër.

Nga ana e Barcelonës, vendimi i lojtarit është pritur shumë pozitivisht.

Drejtoria sportive dhe stafi teknik e konsiderojnë thelbësore që talentet e rinj të besojnë te projekti i klubit dhe të mos kërkojnë largime të parakohshme përballë ofertave të para të mëdha.

Qëndrimi i Bardghjit përputhet plotësisht me strategjinë e klubit për të ndërtuar të ardhmen mbi zhvillimin e brendshëm të lojtarëve të rinj.

Në këtë fazë, transferimi nuk është pjesë e planeve të futbollistit dhe as të rrethit të tij, të cilët kanë bërë të qartë se prioritet mbetet konkurrimi brenda Barcelonës.

Klubi do të vazhdojë të ndjekë nga afër progresin e tij, me performancën, përshtatjen taktike dhe qëndrimin profesional që do të jenë faktorët vendimtarë për rolin e tij gjatë sezonit.

Vendimi i Roony Bardghjit për të qëndruar dërgon një mesazh të fortë në treg: Barcelona vazhdon të jetë një destinacion shumë tërheqës për talentet e rinj, edhe përballë ofertave të rëndësishme nga jashtë.

Për momentin, e ardhmja e tij e afërt mbetet e lidhur me Camp Nou, ku synon të fitojë hap pas hapi vendin e tij dhe të ndërtojë karrierën në një nga klubet më të mëdha në botë. /Telegrafi/

Mbrojtësi i Newcastle United, Dan Burn (33), do të mungojë për një periudhë të gjatë pas lëndimit të pësuar në humbjen 1-0 ndaj Sunderland.

Burn pësoi një brinjë të thyer dhe një shpim në mushkëri gjatë një përplasjeje me mbrojtësin e Sunderland, Nordi Mukiele, në pjesën e parë të ndeshjes.

Mukiele u ndëshkua me karton të verdhë për ndërhyrjen ndaj Burn, ndërsa të dy lojtarët rrëshqitën gjatë përpjekjes për topin.

Edhe pse Burn tentoi të vazhdonte lojën pas goditjes së parë, ai u zëvendësua disa minuta më vonë nga Fabian Schar.

Trajneri i Newcastle, Eddie Howe, konfirmoi më vonë se mbrojtësi anglez ishte dërguar në spital për shkak të vështirësive në frymëmarrje.

Sipas Daily Mail, Dan Burn mund të mungojë deri në gjashtë javë, duke humbur rreth 10 ndeshje.

Lëndimi i tij krijon probleme shtesë për Howe, i cili tashmë ka qenë pa Sven Botman, Kieran Trippier, Jamaal Lascelles dhe Emil Krafth për arsye të ndryshme. Aktualisht, Newcastle ka vetëm katër mbrojtës të gatshëm për ndeshjet e ardhshme.

“Ne kemi disa lëndime dhe situata është e vështirë. Për momentin, nuk është ideale”, tha Howe.

Newcastle United aktualisht ndodhet në vendin e 12-të me 22 pikë, ndërsa Arsenali kryeson tabelën me 36 pikë. /Telegrafi/

Momenti më emocionues pas derbit Tyne-Wear u pa kur tifozët e Sunderlandit nisën të këndonin me zë të lartë: “Ne e kemi Granit Xhakën, ne e kemi Granit Xhakën.”

Kapiteni i ekipit, 33-vjeçari u këndua nga tifozët pas ndeshjes dhe u bë figura qendrore e fitores 1-0, që erdhi falë autogolit të Nick Woltemade në pjesën e dytë.

Atmosfera në Stadium e Dritave ishte elektrizuese, ndërsa shpirti i luftëtarit i Xhakës u reflektua në çdo duel të fituar në fushë, duke i dhënë fansave arsye për të festuar.

“Ne e kemi Granit Xhakën, ne e kemi Granit Xhakën”, ishin vargjet e këngës që këndohej me zë të lartë nga shkallët e stadiumit.

Pas ndeshjes, Xhaka ndau emocionet e tij, pas kësaj fitoreje, që e mban Sunerlandin në pjesën e epërme të renditjes.

“Para së gjithash, kjo fitore i dedikohet tifozëve tanë. Është një privilegj të jem pjesë e këtij klubi futbolli, të luaj në këtë derbi. Ka shumë rëndësi. E ndjemë gjatë gjithë javës, kjo javë ishte speciale. Donim t’u japim tifozëve diçka nga sot dhe jemi të lumtur që morëm tre pikët dhe treguam një ndeshje të shkëlqyer. Shpirti ishte i mrekullueshëm”, deklaroi kapiteni Xhaka.

"Uau" – analistët e njohur lavdërojnë Granit Xhakën si "luftëtar absolut" pas fitores së Sunderlandit kundër Newcastle në derbi

Xhaka, i cili ka luajtur te Arsenal dhe Bayer Leverkusen në karrierën e tij, theksoi rëndësinë e derbit dhe ndjenjat pas ndeshjes.

“Me përvojën time, kam luajtur shumë derbi, por kjo javë ishte kaq speciale. Nuk mund të përshkruhet me fjalë. Derbit janë për t’u fituar. Tifozët kanë nevojë gjithashtu. Është e dhimbshme çdo derbi që humb, por ky ishte special. Jam krenar për këtë ekip dhe krenar për lojën që luajtëm. Nuk ishte ndeshja më e bukur e futbollit, por karakteri që sollëm sot ishte i mrekullueshëm”, nënvizoi ai.

Sunderland shënoi një fitore të rëndësishme në këtë derbi, dhe Granit Xhaka tregoi se përvoja, karakteri dhe lidershipi i tij janë të pazëvendësueshme për ekipin dhe tifozët. /Telegrafi/

Sunderland arriti një fitore historike 1-0 ndaj Newcastle United në derbin Tyne-Wear, ndeshja e tyre e parë në Ligën Premier kundër rivalëve që nga viti 2016.

Gol i vetëm u shënua nga një autogol i Nick Woltemade në pjesën e dytë, duke sjellë festë të madhe për “Macet e Zeza” në Stadiumin e Dritës.

Skuadra e trajnerit Regis Le Bris vazhdon të tregojë formë të jashtëzakonshme pas rikthimit në elitë, duke u larguar katër pikë mbi Newcastle pas kësaj fitoreje të merituar.

Mbrojtja e Sunderlandit luajti një rol kyç, duke kufizuar xG e Newcastle vetëm në 0.26, pa lejuar asnjë mundësi të madhe gjatë gjithë ndeshjes.

Xhaka – ylli i ndeshjes

Ish-lojtari i Manchester Cityt, Micah Richards, nuk ngurroi ta lavdëronte Granit Xhakën pas takimit derbi.

“Ky njeri ishte përsëri i shkëlqyer, luftëtar absolut në mesfushë. Ai ka qenë transferimi i sezonit deri tani. Uau”, deklaroi ai.

Xhaka ka qenë i domosdoshëm për Le Bris këtë sezon, duke qenë titullar në të gjitha 15 ndeshjet e Ligës Premier dhe duke kontribuar me pesë gola deri tani.

Ai është një kombinim i shkëlqyeshëm i cilësive mbrojtëse dhe aftësive organizative, duke dhënë një ndikim të madh në çdo ndeshje.

Një nënshkrim i suksesshëm

Sunderland po korr frytet e nënshkrimit të ish-lojtarit të Bayer Leverkusen. Jamie Carragher e përshkroi Xhakën si “fantastik” dhe “lojtarin më me ndikim për ekipin e Ligës Premier këtë sezon”.

Me këtë performancë, Sunderland tregon ambicie serioze për kualifikimin në Evropë, dhe Granit Xhaka pritet të mbetet një lojtar kyç për suksesin e skuadrës.

Sunderland festoi në derbin e parë "Tyne-Wear" pas nëntë vitesh telegrafi.com

Le Bris do të shpresojë për një tjetër paraqitje të fuqishme kur ekipi viziton Brighton në ndeshjen e tyre të parafundit për vitin 2025 këtë fundjavë.

Tifozët si zakonisht pas ndeshjes, edhe pse ai nuk donte, të gjithë në kor e kënduan emrin e tij, një tjetër moment që tregon dashurin e fituar në Sunderland. /Telegrafi/

Pas nëntë vitesh pritjeje u rikthye derbi i famshëm "Tyne-Wear", një nga rivalitetet më të mëdha dhe më të ashpra në futbollin botëror, përballje mes Sunderlandit dhe Newcastle United.

Dy klubet e mëdha nga veriu i Anglisë nuk kanë qenë pjesë e së njëjtës ligë që nga viti 2016. Në vitet pasuese, Newcastle kaloi periudha në nivele të ndryshme, ndërsa Sunderland u përball me vështirësi serioze, duke rënë deri në nivelin e tretë të futbollit anglez.

Megjithatë, këtë sezon “Macet e Zeza” u rikthyen në elitë, duke e bërë të mundur rikthimin e derbit historik.

Jo vetëm që tifozët e Sunderlandit patën mundësinë të shohin sërish përballjen me rivalin e tyre më të urryer, por ekipi vendas arriti edhe ta fitojë derbin me rezultat minimal 1-0.

Atmosfera në "Stadium e Dritave" ishte elektrizuese që nga minuta e parë, ndërsa goli i vetëm i takimit erdhi në fillim të pjesës së dytë. Ai u shënua pas një autogoli të Nick Woltemade, i cili në përpjekje për të larguar topin, e dërgoi atë me kokë në portën e tij.

Granit Xhaka luajti gjithë ndeshjen, duke qenë prej më të mirëve në fushë, ndërsa SofaScore mori notën 7.4.

Ky ishte derbi i 157-të Tyne-Wear, një përballje me histori të pasur dhe me ndikim të madh në zhvillimin e futbollit anglez.

Emri “Tyne-Wear” vjen nga lumenjtë Tyne dhe Wear, pranë të cilëve ndodhen dy qytetet fqinje në veri të Anglisë. /Telegrafi/

Manchester City ka shënuar fitore bindëse në shtëpi ndaj Sunderlandit, për t’iu afruar në vetëm dy pikë Arsenalit.

“Qytetarët” zhvilluan një paraqitje të shkëlqyer për të triumfuar me rezultat 3-0.

Sunderland faktikisht e nisi më mirë pasi kishte dy raste me Le Fee dhe Isidor, por nuk i finalizuan.

Ishte Ruben Dias që përfitoi nga rivendja këndore e Cherkit për ta zhbllokuar epërsinë (31’).

Vetëm katër minuta më vonë, Josko Gvardiol realizoi me kokë për ta dyfishuar epërsinë (35’).

Sunderland ishte afër të kthehej në lojë, por mesfushori shqiptar Granit Xhaka goditi shtyllën e djathtë.

Sidoqoftë, Phil Foden me një gol të bukur pas asistimit të Cherkit e vulosi fitoren (65’).

City pas kësaj fitore mbledh 31 pikë, dy më pka se Arsenali ndërsa Sunderland bie në pozitën e shtatë me 23 sosh./Telegrafi/

Mohamed Salah u la përsëri jashtë formacionit titullar të Liverpoolit. Trajneri Arne Slot e la yllin egjiptian në bankinë kundër Sunderlandit, ndeshja e dytë radhazi në Ligën Premier që Salah e ka nisur nga stoli.

Shumë e interpretuan këtë si një shenjë se statusi i tij në sezonin e tij të nëntë në Anfield kishte filluar të dobësohej, dhe një foto e Salah të kamufluar në stol gjatë ndeshjes kundër Sunderland u bë një hit në rrjetet sociale.

Salah hyri në lojë në pushimin pas pjesës së parë dhe nuk arriti të shënonte në barazimin 1-1 në Anfield. Në ndeshjen e mëparshme, një fitore 2-0 kundër West Ham, ai u mbajt jashtë loje, hera e parë që nuk ka filluar në një ndeshje lige që kur Slott mori drejtimin e ekipit në vitin 2024 dhe fitoi titullin, kryesisht falë 29 golave të Salah atë sezon.

Slot konfirmoi se Salah nuk ishte i lumtur që u la jashtë ndeshjes kundër West Ham, por theksoi se ai u soll në mënyrë profesionale.

Megjithatë, kjo nuk mjaftoi për t’u rikthyer në formacionin titullar tre ditë më vonë. Trajneri holandez vendosi për Dominik Szoboszlain në krahun e djathtë, kryesisht për shkak të kontributit të tij në mbrojtje.

"Në pjesën e parë, luajtëm me Szoboszlain në të djathtë për të qenë më të fortë në mbrojtje dhe për të mos pësuar aq shumë gola sa në javët e fundit", tha Slot.

Liverpooli pret edhe tre ndeshje të tjera përpara se Salah të niset për Kupën e Kombeve të Afrikës (AFC). Dy në Ligën Premier dhe një në Ligën e Kampionëve, të cilat mund të jenë një rrethanë lehtësuese për të dyja ekipet dhe një mundësi për Salah që të rifitojë formën e tij të vërtetë me fanellën e ekipit kombëtar.

Slot nuk do të zbulonte nëse Salah do të fillojë ndeshjen e ardhshme kundër Leeds të shtunën.

"Nuk kam menduar ende për mënyrën se si do të luajmë kundër Leeds. Kam një ide se kush do të fillojë, por nuk do ta them”, deklaroi trajneri i Reds.

Ndryshe, Salah ka shënuar katër gola në Ligën Premier këtë sezon. /Telegrafi/

Liverpooli ka luajtur baras me rezultat 1-1 në shtëpi ndaj Sunderlandit në kuadër të javës së 14-të në Ligën Premier.

Sunderland rrezikoi i pari në minutën e 32-të, kur Trai Hume goditi fuqishëm drejt trekëndëshit, por Alisson reagoi në mënyrë fantastike duke devijuar topin në traversë.

Liverpooli iu afrua golit në minutën e 44-të, por goditja me kokë e Alexis Mac Allister u ndal në shtyllën e majtë.

Sunderland kaloi në epërsi në minutën e 67-të, kur një gjuajtje nga distanca e Chemsdine Talbi u devijua dhe përfundoi në rrjetë duke befasuar Alissonin.

Pak çaste më vonë, Omar Alderete pati mundësinë të dyfishonte rezultatin, por goditja e tij me kokë u përplas në shtyllë.

Liverpooli u rikthye në lojë në minutën e 81-të. Florian Wirtz, pas një depërtimi të shkëlqyer mes mbrojtësve, goditi nga brenda zonës dhe topi u devijua, duke e mposhtur portierin Roefs për 1-1.

Në minutën e 91-të, sulmuesi mysafir Wilson Isidor u gjend i vetëm përballë Alisson, por goditjen e tij e largoi nga vija fatale Federico Chiesa.

Pavarësisht tentimeve nga të dyja skuadrat, asnjëra nga to nuk arriti të gjejë golin e fitores, duke ndarë kështu nga një pikë në një përballje tejet të luftuar.

Pas këtij barazimi Liverpooli shkon në kuotën e 22 pikëve dhe mban pozitën e tetë në tabelë, ndërsa Sunderlandi me një pikë më shumë renditet në vendin e gjashtë./Telegrafi/

Mesfushori Granit Xhaka ka dhuruar një tjetër asistim në Ligën Premier, këtë herë në ndeshjen ndaj Bournemouth.

Ylli shqiptar asistoi te goli i dytë për Bertrand Traore, i cili shënoi brenda zonës për ta barazuar rezultatin.

Xhaka për mrekulli e gjeti Traore, i cili pastaj me një finalizim të saktë e la të shtangur portierin mysafir (46’).

Për Xhakën ky është asistimi i katërt në kampionatin anglez, ndërsa ka edhe një gol në proces./Telegrafi/

Gazeta e madhe zvicerane “Blick” e nis një analizë të gjerë për Granit Xhakën me një deklaratë të fortë: mund të ketë futbollistë individualisht më të mirë, por askush aktualisht nuk ka aq shumë ndikim sa ai – as te Zvicra, as te Sunderlandi.

Sipas tyre, Xhaka është shndërruar në një figurë me peshë të jashtëzakonshme në futbollin botëror.

“Ai vendos standardin çdo ditë” – Sunderland s’i rezistoi dot Xhakës

Trajneri i Sunderlandit, Regis Le Bris, nuk hezitoi ta vlerësonte që në ditën e parë.

“Ai vendos standardin çdo ditë”, tha ai pas mbërritjes së Xhakës në Anglinë veriore.

Dhe vendimi ishte i menjëhershëm: shiritin e kapitenit e mori menjëherë.

Edhe te Zvicra, Xhaka është kapiten që nga fundi i Kupës së Botës 2018, edhe pse – siç shkruan Blick – Xherdan Shaqiri mund ta kishte imagjinuar lehtësisht shiritin në krahun e tij muskuloz.

“Por ishte e qartë që nga fillimi. Nëse Shaqiri ishte realizues brilant, Xhaka ishte gjithmonë dirigjenti i orkestrës”, shkruan Blick.

Lider i lindur: nga Parisi 2004 te Wembley 2011

Gazeta zvicerane e përshkruan Xhakën si lider të lindur, një karakter që dallonte qysh në fëmijëri.

– Në vitin 2004, me U13 të Baselit, humbi finalen e “Danone Nations Cup” para 20 mijë shikuesve në Paris.

– Në vitin 2009, fitoi Kupën e Botës U17 me Zvicrën.

– Në moshën 18-vjeçare debutoi me ekipin A kundër Anglisë në “Wembley”, në një barazim 2:2.

Blick shton: “Këto paraqitje tregojnë vetëm klasin e Xhakës si futbollist. Dhe vetëbesimin e tij të palëkundur. Por për t’u bërë lideri i sotëm, ai duhej të kalonte momente të vështira. Dhe sa herë dukej se po dështonte, ai përdorte vështirësitë për t’u bërë edhe më i fortë”.

“Fola shumë dhe nuk bëra mjaftueshëm” – mësimi i madh te Gladbachu

Kur u transferua nga Baseli te Borussia Monchengladbach në moshën 19-vjeçare, Xhaka bëri një gabim tipik të një lojtari të ri plot ambicie.

“Fola shumë dhe nuk bëra mjaftueshëm”, kishte thënë ai më vonë.

Në ditën e parë u tha shokëve se objektivi ishte Liga e Kampionëve – premisë për të cilën duhej punë e madhe.

Tre edicione më vonë, ai u bë kapiten i Gladbachut.

Arsenali, 45 milionë franga dhe dy të kuqe që ndezën Londrën

Në vitin 2016 Arsenali pagoi rreth 45 milionë franga për ta marrë Xhakën. Fillimi? I trazuar.

Ai la gjurmë menjëherë – me dy kartonë të kuq për ndërhyrje të pakuptimta, duke u kritikuar dhe vërshëllyer nga tifozët.

Por sot, shkruan Blick, Xhaka është ndër mesfushorët më të mirë të Premier Leagues për ndërhyrje të suksesshme.

Nga ndeshjet me Serbinë te qetësia e sotme: një transformim i plotë

Blick kujton edhe momentet e ndjeshme të Kupës së Botës 2018 dhe 2022 kundër Serbisë, përfshirë incidentet, duke thënë se:

“Për një kohë të gjatë, Xhaka dukej lider i lindur në ekipin kombëtar, por jo gjithmonë lojtari ideal. Shpesh vendoste veten dhe emocionet e tij në qendër të vëmendjes”.

Por sot Xhaka ka ndryshuar. Tani, sipas Blick, ai edhe sakrifikon, është më i qetë dhe ka evoluar si brenda ashtu edhe jashtë fushës.

“33 vjeç dhe në versionin më të mirë të karrierës”

“Kualifikimi bindës për Kupën e Botës 2026 është shpërblimi i punës”, shkruan Blick, duke shtuar: “Duket sikur ai ka fituar një copë tjetër të enigmës nga çdo konflikt, çdo humbje, çdo pengesë, duke u bërë në moshën 33-vjeçare, Granit Xhaka më i mirë i karrierës së tij”.

Hapi i radhës? Karriera si trajner

Sipas Murat Yakinit, Xhaka po formohet qysh tani për rolin e trajnerit. Përzgjedhësi i Zvicrës tha në Prishtinë: “Ai po e udhëheq Zvicrën si trajner në fushë. Ai ka një të ardhme të ndritur”./Telegrafi

Granit Xhaka është lidhur me një transferim te Juventusi në janar, por reprezentuesi zviceran është i lumtur te Sunderland dhe Bianconerët do të ngurrojnë të bëjnë një investim të madh për një lojtar që është mbi 30 vjeç.

Juventusi po monitoron tregun e transferimeve dhe mund të nënshkruajë një mesfushor qendror në afatin kalimtar të janarit.

Disa lojtarë janë lidhur me një transferim në Allianz Stadium, përfshirë Xhakën, por eksperti i transferimeve të Football Italia, Alfredo Pedulla, paralajmëron se 33-vjeçari është një përforcim i pamundur për Bianconerët.

“Xhaka është i lumtur te Sunderland dhe nuk jam i sigurt nëse Juventusi mund të investojë kaq shumë para në një lojtar që nuk është më i ri”.

“Juventusi do të vendosë më vonë se çfarë të bëjë. Ata duhet të punësojnë një drejtor të ri sportiv; ka ende pak konfuzion”, ka thënë Pedulla në videon e tij të fundit në YouTube për Football Italia.

- YouTube www.youtube.com

Juventusi ka fituar një ndeshje dhe ka barazuar dy herë në tre ndeshjet e para të Luciano Spallettit në krye të skuadrës.

“Zonja e Vjetër” do të vizitojë Fiorentinën në xhiron tjetër të Serie A. /Telegrafi/

Raportet në Itali pretendojnë se Juventusi është i etur të rikthehet në idenë e nënshkrimit të Granit Xhakës gjatë afatit kalimtar të janarit, vetëm gjashtë muaj pas rikthimit të tij në Ligën Premier me Sunderlandin.

Sipas gazetës italiane Tuttosport, Juventusi është i etur të shtojë forcë në departamentin e mesfushës, i cili është bërë tepër i varur nga Khephren Thuram dhe Manuel Locatelli, dhe se Bianconerët janë të etur për idenë e nënshkrimit përsëri të Xhakës.

Reprezentuesi zviceran kishte qenë një opsion për Zonjën e Vjetër gjatë afatit kalimtar të verës, kur ai ishte i disponueshëm për një tarifë prej 15 milionë eurosh.

Sipas raportit të ditës së sotme (e martë), Xhaka nuk i plotësoi të gjitha kërkesat e Juventusit gjatë verës, shqetësimi i dukshëm ishte mosha e tij, pasi mbushi 33 vjeç në shtator.

Megjithatë, Juventusi tani është i vetëdijshëm për faktin se ka nevojë për opsione të reja në mesfushë 'me çdo kusht' dhe beson se Xhaka u ofron atyre vlerën më të mirë për paratë, edhe nëse është vetëm disa muaj në qëndrimin e tij me Sunderland.

Sipas Tuttosport, Juventusi është i vetëdijshëm se do të kushtojë më shumë se 15 milionë euro plus bonuset që Sunderland i pagoi Bayer Leverkusen gjatë verës nëse do të përpiqen të arrijnë një marrëveshje gjatë afatit kalimtar të janarit. /Telegrafi/

Ish-kapiteni i Kombëtares së Shqipërisë, Lorik Cana ka folur për faqen zyrtare të Sunderlandin, ku theks të veçantë ka pasur pyetja për yllin tjetër nga Kosova, Granit Xhaka, i cili po shkëlqen këtë sezon si kapiten i klubit të Ligës Premier.

Xhaka u transferua këtë verë nga Bayer Leverkuseni te Sunderlandi për rreth 20 milionë euro dhe menjëherë u bë lider i klubit anglez.

Trajneri dhe drejtuesit e “Maceve të Zeza” ia dhanë shiritin djaloshit nga Kosova dhe Xhaka shpejt u bë lider i ekipit në fushë duke frymëzuar me paraqitje dhe duke udhëhequr Sunderland drejt pjesës së epërme të tabelës.

Megjithatë, para Xhakës një tjetër shqiptar bëri karrierë te Sunderland. Bëhet fjalë për Canën, i cili gjithashtu ishte kapiten i ekipit anglez.

Së fundmi, ish-kapiteni i Shqipërisë është pyetur për Xhakën nga faqja zyrtare e Sunderland dhe nuk ka hezituar të tregojë që njihen moti, pasi të dy familjet kanë të njëjtën prejardhje.

Cana gjithashtu e ka lavdëruar Granitin si person dhe si lojtar, teksa ka zbuluar se kanë biseduar para transferimit të Xhakës dhe ishte ky njëri nga ta që ia ‘mbushi’ mendjen.

“E njoh familjen e Granitit për më shumë se 30 vjet. Unë dhe Graniti kemi të njëjtën prejardhje. Familjet tona janë nga Kosova. Ai është bujar në fushë dhe është i njëjti djalë jashtë saj”, ka thënë fillimisht ish-mbrojtësi shqiptar.

“Siç mund ta shohin të gjithë, ai është një lojtar i mrekullueshëm. Përpara se të vinte në Sunderland, biseduam. I thashë se te Sunderland do të zbulonte se pasioni është një nga më të mirët që kishte përjetuar ndonjëherë”, përfundoi Cana. /Telegrafi/

Afati kalimtar i verës solli një valë të madhe lëvizjesh në tregun evropian të futbollit. Klube nga pesë ligat kryesore u treguan jashtëzakonisht aktive, duke bërë investime të mëdha për të përforcuar skuadrat.

Por, si gjithmonë, jo çdo transferim rezulton sukses — disa dështojnë, ndërsa disa shndërrohen në goditje të plota.

Sot sjellim pesë transferimet që kanë rezultuar ndër më të mirat e verës, duke kombinuar vizionin e drejtuesve me performancën e menjëhershme në fushë.

1/ Luis Díaz – nga Liverpool te Bayern Munich (70 milionë euro)

Kur Bayern Munich vendosi të shpenzojë 70 milionë euro për Luis Díaz, shumë e panë këtë si rrezik të madh financiar. Por kolumbiani ka provuar se çdo cent ka qenë i merituar. Me shpejtësinë dhe depërtimet e tij nga krahu i majtë, ai ka bërë diferencën në çdo kompeticion.

Deri tani ka shënuar 11 gola në 16 ndeshje, përfshirë gola në Bundesligë, Ligën e Kampionëve, Kupë dhe Superkupë. Díaz është bërë shpejt një nga liderët e rinj të Bayernit dhe simbol i ambicies për të fituar çdo trofe.

“Qëllimi im është të fitoj gjithçka që mundemi, dhe do të punojmë çdo ditë për këtë,” tha ai pas transferimit në Bavari.

2/ Yan Diomande – nga Leganés te RB Leipzig (20 milionë euro)

Vetëm 18 vjeç dhe me më pak se dhjetë ndeshje profesionale para verës, Yan Diomande ishte një bast i madh për Leipzigun. Por basti ka rezultuar fitimtar.

I ardhur nga Bregu i Fildishtë, anësori që është formuar në SHBA ka mahnitur me shpejtësinë dhe driblimet e tij.

Në dhjetë paraqitje ka shënuar tre gola dhe dhënë tre asiste, duke fituar besimin e trajnerit Ole Werner. Ai është një shembull i qartë i filozofisë së Leipzigut për të investuar te të rinjtë me potencial të jashtëzakonshëm.

3/ Granit Xhaka – nga Bayer Leverkusen te Sunderland (15 milionë euro)

Në moshën 33-vjeçare, Granit Xhaka u kthye në një figurë kyçe për Sunderlandin, skuadrën që u rikthye në Ligën Premier pas shumë vitesh. Me përvojën e tij, mesfushori shqiptar ka sjellë stabilitet dhe lidership në një ekip plot energji të re.

Trajneri Regis Le Bris e ka quajtur Xhakën “standardin e disiplinës dhe profesionalizmit”, ndërsa statistikat e tij e konfirmojnë këtë: është ndër më të mirët e skuadrës në çdo aspekt, dhe së fundmi ka shënuar edhe golin e parë sezonal kundër Evertonit.

4/ Marcus Rashford – nga Manchester United te Barcelona (huazim me mundësi blerjeje)

Pas një periudhe të vështirë në Manchester United, Marcus Rashford gjeti ringjalljen te Barcelona. Fillimisht u përfol se pagat e tij do ta bënin marrëveshjen të pamundur, por pas negociatave të gjata, palët gjetën një zgjidhje.

Rezultati? Rashford është bërë një element kyç në sulmin katalanas, me 6 gola dhe 7 asiste në 15 ndeshje, duke rigjetur besimin dhe formën e dikurshme. Barça tashmë po shqyrton blerjen e plotë të kartonit për rreth 30 milionë euro në fund të sezonit.

5/ Luka Modrić – nga Real Madrid te Milan (pa kompensim)

Kur Luka Modrić u largua nga Real Madridi në moshën 40-vjeçare, shumë menduan se ishte fundi i epokës së tij. Por kroati i jashtëzakonshëm zgjodhi të mos tërhiqet — dhe firmosi me Milanin.

Pasi drejtori sportiv Igli Tare udhëtoi personalisht në Kroaci për ta bindur, Modrić pranoi sfidën. Me përvojën, vizionin dhe qetësinë e tij, ai ka transformuar mesfushën e Milanit, që tashmë po lufton për kreun e Serie A.

“Milani nuk mund të kënaqet me mediokritet. Duhet të synojë gjithmonë majat,” deklaroi Modrić në prezantim.

Sot, tifozët kuqezi janë të bindur se ardhja e tij ka qenë një nga lëvizjet më të mençura të verës. /Telegrafi/

Ish-sulmuesi i Manchester United dhe legjenda e kombëtares angleze, Wayne Rooney, ka lavdëruar kapitenin e Sunderlandit, Granit Xhaka, duke e cilësuar si “ndoshta transferimin më të mirë të sezonit” në Ligën Premier.

Sunderland ka impresionuar në rikthimin e tij në elitën e futbollit anglez dhe aktualisht renditet në vendin e katërt pas 11 ndeshjeve me 19 pikë, duke qenë në rrugën e duhur për të siguruar mbijetesën dhe ndoshta më shumë.

Në këtë sukses, kontributi i Xhakës ka qenë vendimtar. Ish-mesfushori i Arsenalit ka luajtur çdo minutë të çdo ndeshjeje, duke shënuar një gol dhe dhënë tre asistime, ndërkohë që ka sjellë stabilitet dhe lidership në mesfushë.

Duke folur në emisionin e tij The Wayne Rooney Show, ish-ylli i “Djajve të Kuq”, ish-sulmuesi anglez tha se fillimisht kishte dyshime nëse Xhaka do t'ia dilte.

“Kur u kthye Xhaka në Ligën Premier, e pyesja veten nëse do ia dilte. Sidomos me një ekip të sapo-promovuar, çfarë ndikimi mund të kishte? Por ai ndoshta ka qenë transferimi i sezonit. Ka qenë i jashtëzakonshëm", tha Rooney.

Xhaka zhvilloi 297 ndeshje me Arsenalin, duke fituar dy Kupa të Anglisë, por shpesh ishte një figurë e diskutueshme për shkak të temperamentit. Ai u përjashtua pesë herë me karton të kuq, dhe gjatë kohës që mbante shiritin e kapitenit në vitin 2019, pati një përplasje të hapur me tifozët, gjë që çoi në heqjen e kapitenisë.

Megjithatë, nën drejtimin e Mikel Artetas, Xhaka arriti të rigjejë formën e tij më të mirë dhe u bë një nga lojtarët më të rëndësishëm të “Topçinjve” përpara se të transferohej në Leverkusen, ku ndihmoi klubin gjerman të fitonte titullin e parë të Bundesligës pas më shumë se një dekade.

telegrafi.com

Rooney shtoi se Xhaka është një futbollist me karakter të madh.

“Kur pati atë situatë me Arsenalin dhe u përplas me tifozët, ai tregoi karakter të madh duke u rikthyer e duke luajtur sërish për klubin. Ta kalosh një periudhë të tillë dhe të performosh siç bëri, pastaj të shkosh te Leverkuseni dhe të ndihmosh për të mposhtur Bayern Munichun pas më shumë se 10 vitesh, tregon se çfarë lojtari i madh është".

"Sunderland ka një skuadër shumë të re. Ai është si një figurë prindërore dhe do të jetë ndihmë e madhe për trajnerin, si kapiten që lidh lojtarët me stafin. Me gjithë transferimet që bënë këtë verë, ai është një shtyllë për ekipin dhe një shembull për lojtarët e rinj", tha Rooney. /Telegrafi/

Arsenali ka lëshuar dy pikë në përballjen ndaj Sunderland, duke pësuar gol në minutat shtesë.

“Topçinjtë” ishin në epërsi me rezultat 1-2, megjithatë një eurogol në stilin gërshërë i Brobbey ia solli një pikë Sunderlandit, me epilogun përfundimtar që doli të jetë 2-2.

Sunderland e nisi më mirë ku pas një aksioni mahnitës Daniel Ballard me një goditje të fuqishme nisi festën në stadium, për ta marrë epërsinë (36’).

Arsenali tentoi deri në fund të barazojë rezultatin por që assesi s’i finalizuan aksionet, kësisoj vendasit e mbyllën me epërsi pjesën e parë.

Ishte Mikel Merino që dhuroi një asistim fantastik te Bukayo Saka, i cili me një goditje të saktë e mposhti portierin mysafir për ta barazuar rezultatin (54’).

Ndërsa, ishte Leandro Trossard që realizoi një eurogol për ta përmbysur epërsinë (74’).

Kur mendohej se Arsenali i mori sërish pikët e plota, në skenë doli Brobbey që pas asistimit të Ballard, me një goditje gërshërë i la të shtangur mbrojtësin Gabriel dhe portierin Raya (90+4’).

Arsenali kësisoj vazhdon si lider i vetëm me 26 pikë në Ligën Premier, kurse Sunderland renditet në pozitën e tretë me 19 sosh./Telegrafi/

Që prej kalimit në Ligën Premier, mesfushori Granit Xhaka ka qenë padyshim dominues në kampionatin anglez.

Përpos golave dhe asisteve që kanë ndikuar që Sunerland të jetë në pjesën e epërme të tabelës, Xhaka edhe statistikisht është mbi secilin lojtar të Ligës Premier.

“beIN Sports” ka publikuar statistikat e jashtëzakonshme të Xhakës që prej kalimit te Sunderland, ku është i pari për asistime (tre sosh), më së shumti prekje të topit (717), pasime të kompletuara (459), pasimi i tretë final (184), duele të fituara (62), posedimi i topit i fituar (49), si dhe ka krijuar plot 16 shanse.

Ndër të tjera, Xhaka është treguar edhe atlet i lartë me 112.8 kilometra të kryer deri më tani në fushë.

Kjo padyshim e dëshmon dallimin e madh që ylli shqiptar po e bën në kampionatin anglez, si dhe po e vendos Sunderlandin në një pozitë për të ëndërruar një vend që të dërgon në Evropë./Telegrafi/

Mikel Arteta ka folur me ngrohtësi për marrëdhënien e tij me ish-mesfushorin e Arsenalit, Granit Xhaka, duke e përshkruar kohën e tyre së bashku si transformuese si për lojtarin ashtu edhe për klubin.

Përpara udhëtimit të Arsenalit për t'u përballur me Sunderland të shtunën, më 8 nëntor, Arteta kujtoi ndikimin e Xhakës gjatë qëndrimit të tij shtatëvjeçar në Emirates.

"E adhuroja çdo minutë që kaluam së bashku. Kur u bashkova, ai ishte në një moment të veçantë në jetën dhe karrierën e tij, dhe të gjithë ne u përpoqëm ta udhëzonim, t'i jepnim një perspektivë të ndryshme dhe ta bënim të ndihej i dashur dhe i vlerësuar, dhe ai u përgjigj në një mënyrë të jashtëzakonshme", ka thënë fillimisht Arteta.

Përgjigja e Xhakës, sipas Artetës, jo vetëm që e rriti performancën e tij, por luajti edhe një rol vendimtar në zhvillimin e Arsenalit.

“Ai më bëri një trajner më të mirë, na ndihmoi të zhvillohemi dhe të përmirësohemi shumë si ekip futbolli dhe si klub, dhe do të jem përjetësisht mirënjohës sepse kam kujtime të mrekullueshme me të".

Komentet e Artetës vijnë në një kohë kur Xhaka, tani 33 vjeç, është kapiten i Sunderlandit, ekip që është i katërti në Ligën Premier.

Xhaka u largua nga Arsenali në vitin 2023 për t'u rikthyer në Gjermani me Bayer Leverkusen, një veprim që Arteta e kuptoi dhe e mbështeti.

“E bëra tashmë një herë dhe ne ia zgjatëm kontratën dhe kur ai erdhi dhe shpjegoi arsyet, duhet ta kuptosh qenien njerëzore, duhet të jesh mirënjohës”.

“Ishte një mundësi unike për të që të kthehej në Gjermani te familja e tij, dhe kishte edhe disa gjëra që ai donte t'i përjetonte gjithashtu”.

“Unë besoj se ishte momenti i duhur, ai ishte shumë i ndershëm dhe i drejtpërdrejtë siç është gjithmonë, dhe ne gjetëm një mënyrë për të gjetur një zgjidhje të mirë për të gjithë ne”, përfundoi trajneri i Arsenalit. /Telegrafi/

Pak pas orës nëntë të mbrëmjes së së hënës, Granit Xhaka shënoi golin e tij të parë me fanellën e Sunderlandit dhe e festoi me një rrëshqitje në gjunjë përpara tribunave të mbushura të “Stadium of Light”.

Të nesërmen në mëngjes, Xhaka ishte sërish në qendrën stërvitore duke folur për atë gol që i dha Sunderlandit një barazim ndaj Evertonit dhe e ngjiti skuadrën në vendin e katërt të Ligës Premier.

“Jam gjithmonë me kohë – është diçka që më karakterizon”.

Sunderland, skuadër e sapo ngjitur në elitë, ka befasuar Anglinë me 18 pikë në 10 ndeshje. Tani e pret sfida më e veçantë: përballja e së shtunës ndaj Arsenalit.

Për Xhakën, kjo ndeshje është më shumë se thjesht futboll. Ai e pranon me sinqeritet: “Të gjithë e dinë që Arsenali është në zemrën time. Të jesh shtatë vjet pjesë e atij klubi është diçka e veçantë”.

Në një intervistë të qetë te “Academy of Light”, mes hyrjeve të lojtarëve që vinin për stërvitje, ai tregoi se momenti i tij më i preferuar në Sunderland nuk ishte goli, por dita e parë që hyri në klub.

Granit Xhaka

“E ndjeva menjëherë energjinë pozitive. Këtu duhet të ndihesh si në shtëpi – e ndjeva që në fillim”.

Xhaka foli me respekt të madh për Mikel Artetën, trajnerin që i ndryshoi rrjedhën e karrierës kur gjithçka dukej se kishte marrë fund te Arsenali pas incidentit me tifozët në vitin 2019.

“Valixhet i kisha gati. Doja të largohesha. Por Mikel më foli hapur dhe më bindi të qëndroja. Çdo fjalë që më tha atë ditë, më pas e ktheu në realitet. Ai më ndryshoi si njeri dhe si lojtar”.

“Ishte dita më e keqe e karrierës sime, por në të njëjtën kohë më e mira. Sepse më mësoi shumë për njerëzit, për veten, për jetën”.

Granit Xhaka

Nëse nuk do të kishte ardhur Arteta, historia mund të ishte ndryshe. Por Xhaka qëndroi, fitoi dy FA Cup, më vonë u transferua te Bayer Leverkusen ku udhëhoqi klubin drejt titullit të parë në Bundesliga dhe sot është kapiten i Sunderlandit, me 141 ndeshje për Zvicrën dhe një vend mes 20 më të mirëve në Top 20 të Topit të Artë 2024.

Sot, ai është figurë udhëheqëse në skuadrën e re. Trajneri Regis Le Bris e ka cilësuar “trurin e ekipit në fushë”, ndërsa shokët e quajnë “trajneri i dytë”. Vetë Xhaka ka marrë tashmë licencat UEFA B dhe A, dhe është në rrugën drejt licencës Pro.

“Por ende dua të jem lojtar. Të gjithë trajnerët të thonë: qëndro në fushë sa më gjatë që mundesh”.

Në statistika, Xhaka renditet në vendet e para për kilometra të përshkuara, pasime përpara dhe ndërprerje aksionesh. Por përtej numrave, është prania e tij që ndjehet.

Granit Xhaka dhe Olivier Giroud

“Pas 10 ndeshjesh, askush nuk ka fituar apo humbur asgjë. Të shohim ku do të jemi pas 38 javësh”.

“Të jesh lider do të thotë të jesh vetvetja, jo të tregosh se je kapiten. Sjellja jote në fushë dhe në dhomën e zhveshjes tregon gjithçka.”

Të shtunën, kur Arsenali të rikthehet në “Stadium of Light” për herë të parë që nga viti 2016, përballë do ta ketë sërish një figurë të njohur – por tashmë në një fanellë tjetër./Telegrafi

Kapiteni i Sunderlandit, Granit Xhaka, ka shprehur kënaqësinë e tij që shënoi golin e tij të parë për “Macet e Zeza” në barazimin e së hënës mbrëma me Evertonin në Ligën Premier.

Të besuarit e David Moyes kishin marrë epërsinë në minutën e 15-të me anë të golit të Iliman Ndiaye përpara se ylli shqiptar të rivendoste barazimin për vendasit në “Stadiumin e Dritave”.

Ndërsa shpreh gëzimin e tij për suksesin e tij personal, ai ndihet pak i zhgënjyer që ekipi i tij nuk mundi të merrte pikët maksimale nga kjo përballje.

Granit Xhaka shënon golin e parë për Sunderlandin - çmend atmosferën në 'Stadiumin e Dritave'

“Është gjithmonë mirë të shënosh golin e parë për klubin e ri”, ka thënë fillimisht Xhaka për mediat pas ndeshjes.

“Të gjithë e dinë që jam shumë i lumtur këtu dhe po përpiqem të jap më të mirën time. Ditë pas dite, në çdo ndeshje”.

“Është për të ardhur keq që nuk morëm tre pikët, por jam gjithmonë i lumtur ta ndihmoj ekipin”.

“Është mirë kur shënon kaq afër fillimit të pjesës së dytë sepse ke edhe 45 minuta të tjera. Me pak fat, mund të kishim shënuar golin e dytë, por patëm fat që nuk e pësuam golin e dytë në 25 minutat e para”.

“Jemi gjysmë të zhgënjyer dhe gjysmë të lumtur, por e marrim pikën dhe ecim përpara”, përfundoi mesfushori shqiptar. /Telegrafi/