PRISHTINË, 5 gusht/ATSH/ Takimi i dytë i zhvilluar këtë të mërkurë mes kreut të Lëvizjes Vetëvendosje, Albin Kurti, dhe kryetarit të Lidhjes Demokratike të Kosovës (LDK), Lumir Abdixhiku, përfundoi pa marrëveshje.

Takimi, i cili nisi në orët e drekës, përfundoi rreth orës 17:35, ndërsa kreu i LVV-së, njëkohësisht kryeministër në detyrë, Albin Kurti, konfirmoi se ende nuk ka një marrëveshje mes palëve.

“Nuk kemi lajme, pasi nuk kemi marrëveshje. Kur të kemi marrëveshje, flasim”, tha Kurti pas takimit me Abdixhikun.

Takimi i parë mes Kurtit dhe Abdixhikut u zhvillua të martën në mbrëmje, por edhe ai përfundoi pa rezultat.

Pas takimit, Albin Kurti tha se biseda me kryetarin e LDK-së, Lumir Abdixhiku, nënkryetarin e kësaj partie, Lutfi Haziri, dhe ish-presidenten Vjosa Osmani, nuk ka rezultuar me marrëveshje politike, por ka shërbyer për diskutimin e zhvillimeve aktuale dhe mundësive për bashkëpunim, raporton KosovaPress.

Kurti ka bërë përpjekje për të mbajtur bisedime me të gjitha partitë opozitare shqiptare, por Partia Demokratike e Kosovës (PDK) dhe Aleanca kanë zgjedhur të qëndrojnë në opozitë, duke hedhur poshtë ofertat për takime me të.

Tani, Kurti ka vetëm LDK-në për ta arritur një marrëveshje medoemos, për të nxjerrë vendin nga kriza pothuajse dyvjeçare politike e institucionale.

LVV-ja e tij i siguroi 53 vende në Kuvend dhe, duke e pasur parasysh bashkëpunimin e deritanishëm të tij me partitë e pakicave joserbe – që gëzojnë 10 vende – Kurti pritet t’i ketë votat e nevojshme prej të paktën 61 deputetëve për ta konstituuar Kuvendin dhe për ta formuar Qeverinë e re.

Por, që votimi për presidentin e ri të Kosovës të jetë i vlefshëm nevojitet prania e 80 deputetëve në Kuvendin me 120 vende.

Me një marrëveshje të mundshme me LDK-në, e cila i fitoi 18 vende, atëherë do të arriheshin të paktën 81 vota, mjaftueshëm për votimin e presidentit të ri, nëse të paktën 80 deputetë do të qëndronin në sallën e Kuvendit.

Seanca për konstituimin e Kuvendit të ri do të mbahet të enjten paradite, dhe partia në pushtet nuk pritet të përballet me telashe për ta përmbyllur me sukses këtë proces. Por, çështja është nëse po soset koha për një marrëveshje të gjerë edhe për postin e presidentit.

/a.f/

The post Përfundon takimi, Kurti: S’ka marrëveshje me LDK-në appeared first on Agjencia Telegrafike Shqiptare.

PARIS, 5 gusht /ATSH-AFP-DPA/ – Presidenti francez, Emmanuel Macron e përshkroi sot si të papranueshme politikën e terrorit të kryer nga Rusia pas një sulmi vdekjeprurës në Kiev dhe rajonin përreth.

Macron pohoi se Ukraina dhe aleatët e saj nuk do t’i nënshtrohen lodhjes apo frikësimit.

“Çdo sulm i ri përforcon një të vërtetë të qartë. Rusia duhet të paguajë çmimin për agresionin e saj dhe të përgjigjet për krimet e saj”, shkroi Macron në X.

“Bashkimi Evropian dhe partnerët e tij do të vazhdojnë të rrisin presionin ndaj Rusisë, veçanërisht përmes sanksioneve të reja, duke forcuar njëkohësisht mbështetjen ushtarake për Ukrainën”, shtoi ai.

Të paktën 15 persona u vranë dhe dhjetëra të tjerë u plagosën pasi Rusia nisi një sulm me raketa gjatë natës në Kiev dhe rajonin përreth, thanë zyrtarët lokalë.

Shërbimi Shtetëror i Emergjencave i Ukrainës tha se 14 civilë ishin vrarë në rajonin më të gjerë të Kievit, ndërsa një person vdiq në kryeqytet.

Administrata ushtarake e qytetit tha se dëme ishin raportuar në të paktën shtatë lagje në të gjithë Kievin.

Ministria ruse e Mbrojtjes i përshkroi sulmet si një sulm në shkallë të gjerë duke përdorur armë precize kundër qendrave të logjistikës dhe shpërndarjes për furnizime ushtarake.

Rusia kishte sulmuar gjithashtu Kievin me raketa balistike gjatë natës deri të shtunën, duke vrarë të paktën nëntë persona dhe duke plagosur më shumë se 30.

Ukraina thotë se nuk ka më raketa të mjaftueshme për t’u mbrojtur nga sulmet ruse me raketa balistike./ /os/

The post FRANCË – Macron: E papranueshme politika ruse e terrorit appeared first on Agjencia Telegrafike Shqiptare.

TIRANË, 5 gusht /ATSH/- Shumë njerëz ndihen të lodhur pas një dite në plazh, edhe kur nuk kanë bërë aktivitet fizik intensiv.

Sipas revistës italiane “Focus”, kjo nuk është vetëm një ndjesi subjektive, por lidhet me mënyrën se si organizmi reagon ndaj kushteve të ndryshme mjedisore.

Sipas studimeve të ndryshme shkencore dhe njohurive të bazuara në fiziologjinë njerëzore, një nga mekanizmat kryesorë është vazodilatacioni (zgjerimi i enëve të gjakut).

Ky është një fakt i mirëdokumentuar shkencërisht.

Kur temperaturat janë të larta, enët e gjakut zgjerohen për të ndihmuar në shpërndarjen e nxehtësisë dhe uljen e temperaturës së trupit.

Në të njëjtën kohë rritet djersitja, e cila shkakton humbje të ujit dhe elektroliteve, si natriumi, kaliumi dhe magnezi.

Edhe ky është një proces i provuar shkencërisht, ndërsa dehidratimi që pason mund të shkaktojë lodhje, dobësi dhe ulje të përqendrimit.

Ekspozimi në diell, nxit prodhimin e melaninës, pigmentit që mbron lëkurën nga rrezatimi ultraviolet.

Ky është një mekanizëm biologjik i konfirmuar, megjithëse nuk ka prova të forta se vetëm prodhimi i melaninës është një shkak i rëndësishëm i lodhjes që ndiejnë njerëzit, pas një dite në plazh.

Edhe lëvizja në ujë kërkon më shumë energji sesa lëvizja në tokë.

Ky fakt mbështetet nga studimet e fiziologjisë së ushtrimeve, pasi rezistenca e ujit e detyron trupin të punojë më shumë, edhe kur aktiviteti duket i lehtë.

Qëndrimi pranë detit shoqërohet gjithashtu me përfitime të mirëqenies psikologjike.

Studime të shumta kanë treguar se mjediset bregdetare, mund të ulin stresin, të përmirësojnë humorin dhe të rrisin ndjenjën e relaksimit.

Megjithatë, pretendimi se deti rrit drejtpërdrejt nivelet e serotoninës dhe endorfinave, nuk është vërtetuar plotësisht te njerëzit dhe kërkon më shumë prova shkencore.

Ekspertët rekomandojnë hidratim të vazhdueshëm gjatë qëndrimit në plazh.

Ky është një rekomandim i bazuar në prova shkencore, pasi konsumimi i ujit, si edhe i frutave dhe perimeve të pasura me lëngje dhe minerale, ndihmon në zëvendësimin e lëngjeve dhe elektroliteve të humbura, duke reduktuar ndjesinë e lodhjes dhe rrezikun e dehidratimit. //a.i/

The post “Focus”: Pse na lodh deti? Shkenca shpjegon çfarë ndodh me organizmin appeared first on Agjencia Telegrafike Shqiptare.

Zhegrova smashed it against Chelsea fucking hell pic.twitter.com/MrfzLo0h7x

— (@04Hoti) August 5, 2026

TIRANË, 5 gusht /ATSH/ Sulmuesi anësor i Juventusit, Edon Zhegrova, shënoi të mërkurën golin e fitores në suksesin 1-0 të bardhezinjve ndaj Chelseat, në një miqësore prestigjioze të zhvilluar në Hong-Kong.

Ky ishte goli i parë i Zhegrovës me fanellën e Juventusit, edhe pse futbollisti i Kombëtares së Kosovës është pjesë e klubit torinez prej një viti.

Juventusi triumfoi 1-0 në stadiumin “Kai Tak”, në miqësoren e parë verore të zhvilluar në tokën aziatike.

Pas një pjese të parë të mbyllur në barazim pa gola, trajneri Luciano Spalletti hodhi në fushë Edon Zhegrovën dhe disa lojtarë të tjerë nga stoli, të cilët ndryshuan ritmin e lojës së bardhezinjve.

Goli vendimtar erdhi pas një aksioni të shpejtë, kur Kenan Yıldız shërbeu në hyrje të zonës për Zhegrovën. Futbollisti i Kosovës goditi me saktësi, duke e dërguar topin në këndin e sipërm të portës së mbrojtur nga portieri i Chelseat, Mike Penders, për t’i dhënë Juventusit fitoren në testin e luksit ndaj londinezëve.

/a.f/r.e/

The post Goli i parë i Zhegrovës me Juventusin i jep fitoren ndaj Chelseat në miqësore appeared first on Agjencia Telegrafike Shqiptare.

TIRANË, 5 gusht /ATSH/ Ambasada e Gjermanisë në Shqipëri ka shprehur sot mirënjohjen për Drejtorinë Vendore të Policisë Vlorë, forcat lokale të shpëtimit, si dhe vullnetarët e Shpëtimit Alpin dhe Speleologjik për shpëtimin e katër shtetasve gjermanë në dy raste të ndryshme në jug të vendit.

Përmes një postimi në rrjetet sociale, Ambasada i falënderoi ata për reagimin e shpejtë dhe angazhimin gjatë operacioneve.

“Falë reagimit të tyre të shpejtë dhe angazhimit të palodhur, katër shtetas gjermanë u shpëtuan me sukses gjatë dy operacioneve të ndryshme shpëtimi në ditët e fundit. Pavarësisht terrenit të vështirë, errësirës dhe temperaturave të larta, ekipet e shpëtimit arritën të lokalizonin dhe të shpëtonin të dy grupet e alpinistëve”, thuhet në postimin e Ambasadës.

Ambasada e Gjermanisë vlerësoi profesionalizmin dhe guximin e të gjitha strukturave të angazhuara në këto operacione.

Në të njëjtën kohë, Ambasada u bëri thirrje të gjithë turistëve dhe adhuruesve të ecjeve në natyrë që të tregojnë kujdes gjatë planifikimit të udhëtimeve në zonat malore të Shqipërisë.

“Planifikoni udhëtimin tuaj me kujdes, informohuni për kushtet e motit, vishni rroba të përshtatshme dhe merrni gjithmonë ujë të mjaftueshëm dhe mbrojtje nga dielli. Një sistem i besueshëm GPS dhe një telefon celular i karikuar mund të jenë jetikë në rast emergjence”, thekson Ambasada gjermane.

Ambasada e Gjermanisë i uron të gjithë vizitorëve udhëtime të sigurta dhe momente të paharrueshme në natyrën e Shqipërisë.

1 nga 2

/k.s/a.f/r.e/

The post Ambasada gjermane falënderon ekipet shqiptare për shpëtimin e katër turistëve appeared first on Agjencia Telegrafike Shqiptare.

TIRANË, 5 gusht/ATSH/ Saranda vijon të jetë një nga destinacionet më të kërkuara të turistëve vendas dhe të huaj gjatë sezonit veror, duke tërhequr çdo ditë mijëra vizitorë që zgjedhin Rivierën Shqiptare për pushimet e tyre.

Plazhet me ujëra të kristalta, peizazhet natyrore, oferta e pasur gastronomike dhe mundësitë e shumta për aktivitete rekreative e kanë bërë qytetin një nga pikat më të preferuara të turizmit në vend.

Krahas pushimeve në plazh, turistët zgjedhin të eksplorojnë edhe atraksionet natyrore të zonës, si Syri i Kaltër, Ksamili dhe gjiri i Kakomesë, si edhe të marrin pjesë në ture me varkë përgjatë bregdetit të Jonit.

Kryeministri Edi Rama ndau në rrjetet sociale përshtypjet e turistëve të huaj që kanë vizituar Sarandën këtë sezon turistik.

Vizitorët e huaj shprehen se Saranda u ka lënë mbresa të veçanta, jo vetëm për bukuritë natyrore, por edhe për mikpritjen dhe raportin e mirë mes cilësisë së shërbimeve dhe çmimeve.

Raffaele, një turist që po kalon pushimet në Sarandë së bashku me të dashurën e tij, tha se kanë kaluar tetë ditë në qytetin bregdetar dhe janë shumë të kënaqur me përvojën e tyre.

“Kemi qenë tetë ditë këtu në Sarandë bashkë me të dashurën time. Është një qytet shumë i bukur. Kemi vizituar shumë plazhe, uji është vërtet i mrekullueshëm dhe deti shumë i pastër. Ushqimi është shumë i mirë dhe me çmime të përballueshme. Edhe njerëzit këtu janë shumë mikpritës, sidomos me turistët”, u shpreh ai.

Përshtypje pozitive ndau edhe një turist i ri nga Gjermania, i cili ndodhet prej tre ditësh në Sarandë dhe ka planifikuar të vizitojë disa nga atraksionet më të njohura të jugut.

“Deri tani kemi përjetuar gjëra shumë të bukura. Kemi bërë një tur me varkë përgjatë bregdetit, me ndalesa për të notuar dhe aktivitete të tjera. Ushqimi këtu është shumë i mirë dhe me çmime të arsyeshme. Kemi ende shumë plane për ditët në vijim, përfshirë një tur me kuad në Syrin e Kaltër dhe disa ture të tjera me varkë”, tha ai.

Rritja e interesit të turistëve për Sarandën po reflektohet edhe në aktivitetin e bizneseve të sektorit të turizmit, ku hotelet, restorantet dhe operatorët turistikë raportojnë fluks të lartë vizitorësh gjatë muajve të verës.

Krahas pushimeve tradicionale në plazh, gjithnjë e më shumë turistë po zgjedhin eksperienca të organizuara, si ture detare, sporte ujore dhe vizita në monumentet kulturore e natyrore të zonës.

Saranda mbetet një nga destinacionet kryesore të turizmit shqiptar, duke ofruar një kombinim të natyrës, historisë, gastronomisë dhe mikpritjes, elemente që, sipas vetë turistëve, e bëjnë këtë qytet një vend ku ia vlen të rikthehesh.

/k.s/a.f/r.e/

The post Saranda vijon të tërheqë mijëra turistë, vlerësohet deti, mikpritja dhe çmimet appeared first on Agjencia Telegrafike Shqiptare.

Nufi: “Partneriteti, investim i rëndësishëm në zhvillimin e industrisë detare shqiptare”

TIRANË, 5 gusht /ATSH/ Në Gjenova të Italisë, në Divizionin e Anijeve Detare të kompanisë “FINCANTIERI”, u hodh një hap i rëndësishëm drejt forcimit të bashkëpunimit strategjik mes Shqipërisë dhe Italisë, me nënshkrimin e Aktit të Themelimit dhe Statutit të shoqërisë “Fincantieri Albania”.

Përmes një publikimi në rrjetin e tij social, ministri i Mbrojtjes, Ermal Nufi nënvizon se, “ky partneritet përfaqëson një investim të rëndësishëm në zhvillimin e industrisë detare shqiptare, transferimin e teknologjisë, krijimin e vendeve të reja të punës dhe rritjen e kapaciteteve prodhuese në vend.”

Ndër të tjera, ministri Nufi u shpreh se, “Shqipëria vijon të ndërtojë partneritete të qëndrueshme me liderët ndërkombëtarë të industrisë, duke krijuar vlerë të shtuar për ekonominë dhe duke kontribuar në forcimin e sigurisë kombëtare.”

Shoqëria “Fincantieri Albania” do të angazhohet në menaxhimin e kantierit detar të Pashalimanit pas modernizimit të tij, si dhe do të mbikëqyrë ndërtimin e anijeve me gjatësi deri në 82 metra dhe me zhvendosje deri në 700 tonë, të destinuara si për tregun vendas, ashtu edhe për atë ndërkombëtar.

1 nga 4

/a.f/r.e/

The post Themelohet “Fincantieri Albania”, Nufi: Investim për zhvillimin e industrisë detare appeared first on Agjencia Telegrafike Shqiptare.

TIRANË, 5 gusht/ATSH/ Drejtori i Portit të Durrësit, Liburn Aliu u mor sot në pyetje nga Prokuroria Speciale e Kosovës në kuadër të hetimeve për shpërdorim detyre që lidhet me kohën kur drejtonte Ministrinë e Mjedisit, Planifikimit Hapësinor dhe Infrastrukturës.

Në një deklaratë për mediet pas daljes nga Prokuroria Speciale e Kosovës, Aliu tha se “vitet e fundit kam qenë vazhdimisht objekt i sulmeve degraduese dhe pretendimeve të pavërteta. Përgjatë këtyre dy viteve kam zgjedhur heshtjen. Sot pata mundësinë të sqaroj se, si në procesin në fjalë, ashtu edhe gjatë gjithë periudhës sa kam shërbyer si Ministër i Mjedisit, Planifikimit Hapësinor dhe Infrastrukturës, çdo vendim dhe çdo veprim imi ka qenë në përputhje të plotë me ligjin. Kjo ka qenë dhe mbetet e vërteta, pavarësisht përpjekjeve për ta shtrembëruar atë”, theksoi Aliu.

Ai u shpreh se “është lehtësim që pas dy vitesh heshtje pata mundësinë për të sqaruar situatën para Prokurorisë për gjithë atë sulm dhe pretendim të vazhdueshëm ndaj meje, i cili ka degraduar aq shumë, por unë jam përgjigjur me heshtjen”.

Aliu tha se ka për gjithë periudhën që ka qenë ministër ka punuar në përputhje me ligjin dhe ka epruar sipas rekomandimeve të zyrës kombëtare të auditimit.

“Nuk ka asnjë vendim i cili mundet të më ndërlidhë mua me këtë proces. Po ashtu për pretendimin për mosveprim të rastit ka qenë i audituar nga Zyra Kombëtare e Auditimit dhe ka pasur rekomandime dhe është vepruar në bazë të rekomandimeve”, theksoi Aliu.

Aliu tha se “ka pasur auditim të brendshëm, ka pasur edhe hetim i cili e qartëson shumë qartë pozitën e ministrit si staf politik karshi punës në administratë”.

/k.s/r.e/a.f/

The post Aliu dëshmon në Prokurorinë Speciale të Kosovës: Çdo vendim i imi ka qenë në përputhje me ligjin appeared first on Agjencia Telegrafike Shqiptare.

TIRANË, 5 gusht /ATSH/ Këshilli Mbikëqyrës i Bankës së Shqipërisë vendosi këtë të mërkurë të mbajë të pandryshuar normën bazë të interesit në nivelin 2,5%, duke vlerësuar se qëndrimi aktual i politikës monetare mbetet i përshtatshëm për ruajtjen e stabilitetit të çmimeve dhe mbështetjen e rritjes ekonomike.

Vendimi u mor pas shqyrtimit dhe miratimit të Raportit Tremujor të Politikës Monetare, ndërsa guvernatori Gent Sejko deklaroi se ekonomia shqiptare ka vijuar të ruajë një trend pozitiv zhvillimi edhe gjatë tremujorit të dytë të vitit, pavarësisht një mjedisi të jashtëm që mbetet sfidues.

Sipas Sejkos, aktiviteti ekonomik ka vijuar të zgjerohet me ritme solide, ndonëse disi më të ulëta se në tremujorin e parë, ndërsa inflacioni është rritur si pasojë e rritjes së çmimeve të naftës dhe produkteve energjetike në tregjet ndërkombëtare, si edhe e kërkesës së qëndrueshme të brendshme. Megjithatë, ai theksoi se inflacioni mbetet i kontrolluar dhe pranë objektivit të Bankës së Shqipërisë.

Të dhënat e Bankës së Shqipërisë tregojnë se inflacioni mesatar i çmimeve të konsumit arriti në 3% gjatë tremujorit të dytë, ndërsa ekonomia shqiptare vijoi të mbështetet nga konsumi, investimet, eksportet, të ardhurat nga turizmi dhe kushtet e favorshme monetare e financiare.

Guvernatori nënvizoi se sektori bankar mbetet i qëndrueshëm, tregjet financiare karakterizohen nga likuiditet i bollshëm dhe norma të ulëta interesi, ndërsa kreditimi i sektorit privat vijoi të rritet me ritme të shpejta. Portofoli i kredisë u zgjerua me 14% në bazë vjetore gjatë tremujorit të dytë, i orientuar kryesisht drejt financimit të investimeve të bizneseve dhe blerjes së banesave nga familjet.

Në vlerësimin e Bankës së Shqipërisë, perspektiva e ekonomisë mbetet pozitive. Parashikimet tregojnë se aktiviteti ekonomik do të vijojë të rritet pranë potencialit, ndërsa inflacioni pritet të mbetet lehtësisht mbi objektiv në afatin e shkurtër dhe të rikthehet gradualisht drejt tij në periudhën afatmesme.

Megjithatë, Banka e Shqipërisë vlerëson se tensionet gjeopolitike në Lindjen e Mesme mbeten një burim pasigurie për ekonominë globale dhe atë shqiptare, duke mbajtur të larta rreziqet për inflacionin dhe duke ushtruar presion mbi perspektivën e rritjes ekonomike.

Përveç normës bazë të interesit, Këshilli Mbikëqyrës vendosi të mbajë të pandryshuar edhe normën e interesit të depozitës njëditore në nivelin 1,5% dhe normën e interesit të kredisë njëditore në nivelin 3,5%.

Banka e Shqipërisë theksoi se do të vijojë të monitorojë me kujdes zhvillimet ekonomike dhe inflacionin, duke u shprehur e gatshme të ndërhyjë me instrumentet e politikës monetare, nëse do të jetë e nevojshme, për të garantuar stabilitetin e çmimeve.

/a.f/r.e/

The post Banka e Shqipërisë mban të pandryshuar normën bazë të interesit në 2,5% appeared first on Agjencia Telegrafike Shqiptare.

LISBONË, 5 gusht /ATSH-AFP/ – Rreth pesë tonë kokainë u sekuestruan në një anije kontejnerësh të ndaluar në brigjet e Lisbonës gjatë një operacioni të përbashkët nga policia, marina dhe forcat ajrore portugeze, i cili çoi në arrestimin e tre shtetasve të huaj.

Anija, që vinte nga një vend i Amerikës Latine, u vu re rreth 640 milje detare nga kryeqyteti portugez, në kushte jashtëzakonisht të vështira.

Gjatë këtij operacioni, u bë e mundur të “shkatërrohej një grup kriminal i dedikuar për kontrabandën e sasive të mëdha të drogës në kontinentin evropian”, theksoi policia.

Hetuesit sekuestruan disa sende dhe arrestuan dy pasagjerë dhe një anëtar të ekuipazhit, “të dyshuar për përfshirje në skemën kriminale”.
Të dyshuarit janë shtetas të huaj, kombësitë e të cilëve nuk janë zbuluar.

Anija kontejner, që mbante drogën dhe tre të dyshuarit, u shoqërua nga marina portugeze në portin e Sines.

Operacioni, i koduar “Skydrop”, u krye nga Njësia Kombëtare Kundër Narkotikëve e Policisë Gjyqësore, me pjesëmarrjen e Marinës dhe Forcave Ajrore Portugeze.

Hetimi, i nisur në fillim të muajit, u krye në bashkëpunim me autoritetet britanike dhe spanjolle./ /os/

The post PORTUGALI – Policia sekuestron pesë tonë kokainë appeared first on Agjencia Telegrafike Shqiptare.

BERLIN, 5 gusht /ATSH-DPA/- Zëvendëskancelari gjerman, Lars Klingbeil, ka mbështetur shqyrtimin e mundësisë për ndalimin e partisë së ekstremit të djathtë ”Alternativa për Gjermaninë” (AfD), duke argumentuar se kjo çështje duhet të trajtohet me seriozitet për mbrojtjen e rendit kushtetues.

Në një artikull të botuar në të përjavshmen “Die Zeit“, Klingbeil, i cili është edhe bashkëkryetar i Partisë Social-demokrate (SPD), riafirmoi gjithashtu mbështetjen për të ashtuquajturin “mur mbrojtës” politik ndaj AfD-së, që synon ta mbajë partinë jashtë qeverisjes në të gjitha nivelet.

“Ky mur synon të pengojë armiqtë e Kushtetutës të marrin pushtetin politik. Ai mbron dinjitetin e çdo individi dhe, bashkë me të, demokracinë tonë liberale. Për mua dhe partinë time, kjo nuk është e negociueshme”, shkroi Klingbeil.

AfD, e cila po hetohet nga shërbimet gjermane të zbulimit për dyshime mbi prirje ekstremiste, është aktualisht partia më e madhe e opozitës, pasi u rendit e dyta në zgjedhjet parlamentare të vitit të kaluar.

Debati për ndalimin e saj është rindezur pas publikimit të një opinioni juridik të porositur nga organizata “Society for Civil Rights”, (”Shoqëria për të drejtat civile”) ku tetë ekspertë të së drejtës arrijnë në përfundimin se AfD-ja  është “qartësisht antikushtetuese”.

Sipas tyre, partia cenon parimet demokratike dhe garancinë kushtetuese për dinjitetin njerëzor.

Mbi 1 000 juristë dhe avokatë kanë mbështetur gjithashtu një thirrje publike për ndalimin e saj.

Klingbeil theksoi se studiues të pavarur kanë treguar se AfD “po punon në mënyrë sistematike për të shkatërruar demokracinë dhe shtetin e së drejtës”.

Sipas Kushtetutës gjermane, kërkesa për ndalimin e një partie politike mund t’i paraqitet Gjykatës Kushtetuese nga Bundestagu, Bundesrati ose qeveria federale.

Deklaratat e Klingbeil vijnë në një kohë kur sondazhet e fundit e rendisin AfD-në në vendin e parë me rreth 27% të mbështetjes, përpara aleancës konservatore CDU/CSU të kancelarit Friedrich Merz me rreth 23%, ndërsa SPD-ja e Klingbeil llogaritet të ketë rreth 12% të mbështetjes. /Ad.Ab./ a.jor.

The post GJERMANI – Klingbeil: Të shqyrtohet seriozisht ndalimi i AfD-së appeared first on Agjencia Telegrafike Shqiptare.

TIRANË, 5 gusht /ATSH/ Agjencia për Zhvillim Bujqësor dhe Rural (AZHBR) u bën thirrje fermerëve të shpallur përfitues të Skemës Kombëtare të Mbështetjes 2026 të respektojnë afatet për plotësimin e dokumentacionit dhe përmbushjen e kushteve të përfitueshmërisë, duke paralajmëruar se dokumentet e dorëzuara pas afatit nuk do të merren në shqyrtim.

Sipas njoftimit të AZHBR-së, listat e përfituesve për masat 1 deri në 4 janë publikuar më 21 korrik 2026 dhe afati 20-ditor kalendarik për plotësimin e dokumentacionit përfundon më 10 gusht 2026.

Ndërkohë, për masat 5 deri në 7, si edhe për masën 9, listat janë shpallur më 24 korrik 2026, ndërsa afati për përmbushjen e kushteve të përfitueshmërisë përfundon më 13 gusht 2026.

AZHBR thekson se, në zbatim të Udhëzimit përkatës, të gjithë aplikantët e shpallur fitues duhet të dorëzojnë dokumentacionin përkatës dhe të plotësojnë të gjitha kushtet e kërkuara brenda afateve të përcaktuara.

Agjencia nënvizon se dokumentacioni i paraqitur pas përfundimit të afatit nuk do të merret në shqyrtim, ndërsa aplikantët që nuk përmbushin kushtet e përfitueshmërisë brenda afatit do të skualifikohen nga skema mbështetëse.

Për të verifikuar afatet dhe informacionin e detajuar për secilën masë, fermerët mund të konsultojnë njoftimin e publikuar në faqen zyrtare të AZHBR-së: https://azhbr.gov.al/njoftime-per-fermeret/

Sipas AZHBR-së, për masat 1-4 janë kualifikuar gjithsej 21 179 aplikime, të cilat përfitojnë mbështetje për zhvillimin e tufave të matrikulluara, bletarisë dhe mbarështimit të derrave. Ndqrsa për masat mbështetëse 5-9, që synojnë zhvillimin e bujqësisë së qëndrueshme, rritjen e standardeve të prodhimit dhe mbështetjen e sektorit të peshkimit, janë kualifikuar 20 636 aplikime.

Në total 42 728 fermerë aplikuan për të përfituar nga skema kombëtare e mbështetjes në bujqësi për vitin 2026, vlera e kërkesave të tyre shënoi 7 miliardë lekë, nga 5,2 miliardë lekë që është fondi i vënë në dispozicion nga qeveria.

Skema përfshin 12 masa mbështetëse, të ndara në 9 masa me pagesa direkte dhe 3 masa investimesh.

Aplikimet për fermerët u hapën më 25 maj 2026 dhe u mbyllën më 6 korrik 2026, pasi afati fillestar i parashikuar deri më 26 qershor u shty për t’u dhënë më shumë kohë aplikantëve.

/e.xh/

The post AZHBR apel fermerëve: Plotësimi i dokumentacionit për përfituesit e Skemës Kombëtare deri më 13 gusht appeared first on Agjencia Telegrafike Shqiptare.

LONDËR, 5 gusht /ATSH-DPA/ – Presidenti i FIFA-s, Gianni Infantino, ka thirrur një mbledhje urgjente të drejtuesve të organizatës në Rabat të Marokut, ndërsa përballet me presion në rritje pas dështimit të planit për të tërhequr investitorë privatë në menaxhimin e Kupës së Botës.

Sipas PA, mbledhja u vendos pas komenteve të drejtorit të Zhvillimit Global të Futbollit në FIFA, Arsene Wenger, i cili deklaroi se nuk kishte qenë i përfshirë në projektin për krijimin e kompanisë “FIFA Forward Enterprise” (FFE).

Wenger theksoi se vendimi për ta tërhequr këtë plan ishte “absolutisht i domosdoshëm dhe i padiskutueshëm”.

Në takim pritet të marrin pjesë edhe sekretari i përgjithshëm Mattias Grafstrom dhe bordi drejtues i FIFA-s.

Grafstrom u ka dërguar një mesazh punonjësve të organizatës, duke e cilësuar javën e fundit si një “seri ngjarjesh të trishtueshme dhe të dënueshme”, ndërsa mirëpriti faktin që projekti u braktis përfundimisht.

Plani për krijimin e FFE-së parashikonte që një kompani e re të administronte aspektet komerciale dhe operative të turneve të FIFA-s, me idenë për të shitur 20% të aksioneve te investitorë privatë.

Ky propozim hasi në kundërshtim të fortë nga UEFA, CONCACAF dhe Konfederata Aziatike e Futbollit (AFC).

UEFA madje kërcënoi me bojkot të garave të FIFA-s, përfshirë Kupën e Botës, nëse projekti nuk tërhiqej.

Edhe pse FIFA e anuloi planin të shtunën, UEFA deklaroi se kishte “humbur besimin” te Infantino. Federatat e futbollit të Anglisë dhe Uellsit kanë tërhequr zyrtarisht mbështetjen për presidentin e FIFA-s, ndërsa edhe Federata Skoceze raportohet se është në të njëjtën linjë me UEFA-n.

Ndërkohë, anëtarë të Këshillit të FIFA-s po përpiqen të sigurojnë shumicën e nevojshme prej 19 votash për të kërkuar një mbledhje ku Infantino të japë llogari, si për këtë projekt ashtu edhe për mënyrën se si është trajtuar çështja e futbollistit Folarin Balogun.

Nëse kjo shumicë nuk arrihet ose Infantino refuzon kërkesën, kundërshtarët e tij paralajmërojnë një “bojkot të qeverisjes”, që sipas tyre do ta bënte FIFA-n praktikisht të paaftë për të funksionuar. /Ad.Ab./ a.jor.

The post KOMENT – Infantino mbledh urgjentisht FIFA-n mes rritjes së presionit ndaj presidentit appeared first on Agjencia Telegrafike Shqiptare.

PRISHTINË, 5 gusht/ATSH/ Deputetë të zgjedhur të Lidhjes Demokratike të Kosovës kanë shprehur qëndrimin se kërkesa e partisë së tyre është që të kenë postin e presidentit.

The post LDK kërkon postin e presidentit appeared first on Agjencia Telegrafike Shqiptare.

TIRANË, 5 gusht /ATSH/ Komiteti Olimpik Kombëtar Shqiptar (KOKSH) ishte pjesë e mbledhjes solemne për konstituimin e Komitetit Organizator të Lojërave Mesdhetare “Prishtina 2030”, të zhvilluar në Prishtinë nën drejtimin e Kryeministrit të Kosovës, Albin Kurti.

Takimi shënoi nisjen zyrtare të përgatitjeve për organizimin e një prej ngjarjeve më të mëdha shumëdisiplinore sportive në rajon, që do të bashkojë institucionet, lëvizjen olimpike dhe partnerët ndërkombëtarë në një vizion të përbashkët.

Presidenti i KOKSH, Fidel Ylli, i shoqëruar nga zëvendësministri i Turizmit, Kulturës dhe Sportit, Endrit Hoxha, rikonfirmoi mbështetjen e plotë të KOKSH për Komitetin Olimpik të Kosovës dhe institucionet e Kosovës gjatë të gjitha fazave të përgatitjeve për Lojërat Mesdhetare.

Në fjalën e tij, Ylli vlerësoi rëndësinë historike të organizimit të Lojërave Mesdhetare në Kosovë, duke theksuar se Shqipëria do të jetë një partner i palëkundur në këtë projekt.

Një rol të veçantë do të ketë edhe Shqipëria në organizimin e garave të sporteve ujore, të cilat do të zhvillohen në Durrës, duke e kthyer qytetin bregdetar në një nga qendrat pritëse të aktivitetit.

Në mbledhje morën pjesë edhe kryetari i bashkisë së Prishtinës, Përparim Rama, ministri i Administrimit të Pushtetit Lokal, Elbert Krasniqi, Ministri i Kulturës, Rinisë dhe Sportit, Blerim Gashani, Presidenti i Komitetit Olimpik të Kosovës, Ismet Krasniqi, Sekretari i Përgjithshëm Besim Aliti, si dhe nënkryetarët Milaim Kelmendi dhe Arben Fetahu.

Lojërat Mesdhetare “Prishtina 2030” konsiderohen një moment me rëndësi për sportin shqiptar dhe kosovar, duke krijuar mundësi për forcimin e bashkëpunimit mes dy vendeve, promovimin e sportit dhe rritjen e kapaciteteve organizative.

Përfshirja e Shqipërisë, veçanërisht përmes zhvillimit të garave të sporteve ujore në Durrës, pritet të kontribuojë edhe në promovimin e qytetit dhe potencialeve të tij sportive e turistike.

KOKSH theksoi se Shqipëria do të vijojë të jetë partnere e Kosovës në këtë rrugëtim, me synim që Lojërat Mesdhetare “Prishtina 2030” të shndërrohen në një sukses të përbashkët të sportit shqiptar dhe kosovar.

/gj.m/j.p/

The post KOKSH: Shqipëria mbështet Lojërat Mesdhetare “Prishtina 2030” appeared first on Agjencia Telegrafike Shqiptare.

TIRANË, 5 gusht /ATSH/ Policia e Lezhës njoftoi sot se shërbimet e Stacionit të Policisë Shëngjin, në bashkëpunim me Forcën e Posaçme Operacionale “Shqiponja”, bazuar në hartëzimin e zonave me risk për ndotje akustike dhe në ankesat e qytetarëve, kanë vijuar kontrollet në terren.

Në kuadër të këtyre kontrolleve, janë testuar me matës të zhurmës disa ambiente dhe subjekte, të hapura dhe të mbyllura, në zonat turistike, për verifikimin e respektimit të nivelit kufi të lejuar të zhurmës.

Sipas policisë, nga matjet e kryera sipas procedurës standarde, është konstatuar tejkalim i nivelit të lejuar të zhurmës në një lokal në Shëngjin.

Për këtë shkelje, policia bëri me dije se administratorja e lokalit, shtetasja E. P., 37 vjeçe, u ndëshkua me masë administrative 200 000 lekë të rinj.

Krahas matjes së nivelit të zhurmës, strukturat përgjegjëse kanë ushtruar kontrolle edhe për respektimin e orarit të lejuar për gjenerimin e muzikës në ambiente të hapura, në zona apo qendra të banuara, i cili është nga ora 11:00 deri në orën 24:00.

Njëkohësisht, vijon zbatimi intensiv i detyrave të parashikuara në planin e masave për garantimin e sigurisë publike gjatë sezonit turistik veror.

/m.q/j.p/

The post Muzikë mbi nivelin e lejuar, gjobitet administratorja e një lokali në Shëngjin appeared first on Agjencia Telegrafike Shqiptare.

TIRANË, 5 gusht /ATSH/ Kryetari i Partisë Demokratike, Sali Berisha, dënoi sot shpalljen “non grata” të gazetarit shqiptar nga Maqedonia e Veriut, Valon Bele, duke e konsideruar këtë një akt të rëndë kundër lirisë së shprehjes dhe medias.

Gjatë një konference për mediet, Berisha e vlerësoi Belen si një gazetar të njohur dhe ish-luftëtar të UÇK-së, duke theksuar se ai ka denoncuar publikisht veprimtarinë e kryeministrit Edi Rama dhe marrëdhëniet e tij me presidentin serb Aleksandër Vuçiç.

“Dua të dënoj me forcën më të madhe, shpalljen non-grata të gazetarit të shquar nga Maqedonia e Veriut, Valon Bele. Valon Bele është nga ata luftëtarë të lirisë, i cili nuk ka ndarë për idealet e lirisë, penën nga pushka. Është një gazetar i njohur, është gjithashtu një ish-luftëtar i UÇK-së”, tha Berisha.

Sipas tij, Valon Bele është një atdhetar i vërtetë dhe  të shpallësh një gazetar non grata se ai nuk pajtohet me qëndrimet antikombëtare, bën një atentat të rëndë kundër fjalës së lirë, kundër lirisë, mendimit dhe shprehjes së tij.

Berisha tha gjithashtu se organizatat shqiptare për mbrojtjen e gazetarit duhet të kishin reaguar.

“Është në turpin, në turpin e organizatave shqiptare të mbrojtjes së gazetarëve që nuk kanë ende asnjë prononcim. Në turpin e tyre tregon varësinë dhe kontrollin qeveritar. Ai është një gazetar shqiptar nga Maqedonia e Veriut, por dhe maqedonas po të ishte, i çdo kombësie po të ishte, t’i ndalosh hyrjen në Shqipëri pse kritikon kryeministrin, asnjë gazetar, asnjë shoqatë gazetarësh nuk mund dhe nuk duhet të pajtohet me këtë. U bëj thirrje organizatave ndërkombëtare të gazetarëve të ngrenë zërin e tyre kundër këtij akti antidemokratik, të dënueshëm, të kreut të narkoshtetit shqiptar”, tha Berisha.

Berisha komentoi edhe rastin e ndalimit të hyrjes në Shqipëri të imamit Bekir Halimin, duke u shprehur se nuk pajtohet me deklaratat e tij për rolin e grave në shoqëri, por shtoi se mendimet e shprehura nuk duhet të jenë shkak për ndalimin e hyrjes në vend.

“Dënoj gjithashtu edhe ndalimin e imamit, për faj, se paska thënë një fjalë që absolutisht nuk duhet ta thoshte. Por mendësia e tij nuk mund të jetë kurrë shkak për të ndaluar hyrjen në një vend ku vrasjet e grave janë më të shumta se në të gjithë Evropën të marra së bashku”, tha ai.

/m.q/j.p/

The post Berisha: Dënoj shpalljen “non grata” të gazetarit shqiptar nga Maqedonia e Veriut appeared first on Agjencia Telegrafike Shqiptare.

TIRANË, 5 gusht/ATSH/ Teatri Kombëtar i Operës, Baletit dhe Ansamblit Popullor, nis gjatë muajit gusht një udhëtim artistik nëpër qytetet e Shqipërisë me festivalin “Fest Folk 2026”.

Ansambli Kombëtar i Këngëve dhe Valleve do të ngjitet në skena të ndryshme, duke përcjellë pasurinë e folklorit shqiptar përmes këngëve, valleve dhe kostumeve tradicionale.

Kalendari artistik nis më 8 gusht në sheshin e Limanit, në Sarandë dhe vijon në Laç, Durrës, Gjirokastër, Vlorë, Vajzë, Berat dhe Fier, duke sjellë për publikun një atmosferë të veçantë me ritmet dhe traditat e trashëgimisë sonë kulturore. Përmes këtij aktiviteti, TKOBAP synon të afrojë artin popullor me komunitetet në të gjithë vendin dhe të promovojë vlerat e folklorit shqiptar.

Vallet virtuoze, këngët që mbartin kujtesën e brezave dhe kostumet tradicionale nga të gjitha trevat shqiptare do të bashkohen në një spektakël që feston identitetin dhe pasurinë e trashëgimisë sonë kulturore. /j.p/

1 nga 2

The post “Fest Folk 2026”, tradita shqiptare udhëton nëpër qytete appeared first on Agjencia Telegrafike Shqiptare.

VARSHAVË, 5 gusht /ATSH-DPA/ – Polonia ka shpallur nivelin më të lartë të alarmit meteorologjik, ndërsa vendi po përballet me një valë të fortë dhe të zgjatur të të nxehtit.

Shërbimi Kombëtar Meteorologjik paralajmëroi se temperaturat do të arrijnë nivele ekstreme, veçanërisht në juglindje të vendit, ku pritet të shkojnë deri në 40 gradë Celsius.

Në kryeqytetin Varshavë, temperatura maksimale e parashikuar është 38 gradë.

Sipas Institutit të Meteorologjisë dhe Menaxhimit të Ujërave, edhe nata mes të mërkurës dhe të enjtes do të jetë tropikale, me temperatura që nuk do të zbresin nën 20 gradë Celsius, duke e bërë më të vështirë rikuperimin e organizmit nga i nxehti.

Për të lehtësuar situatën, në disa pika të Varshavës janë vendosur stacione që spërkasin ujë në formë mjegulle, duke u ofruar qytetarëve mundësinë të freskohen gjatë temperaturave përvëluese.

Kryeqyteti polak ka rreth 1,9 milion banorë, ndërsa zona metropolitane numëron afro tre milionë.

Kryeministri Donald Tusk u bëri thirrje kompanive dhe punëdhënësve të kujdesen për punonjësit e tyre.

Në një mesazh të publikuar në rrjetin social X, ai i nxiti të përdorin sistemet e kondicionimit të ajrit dhe, kur është e mundur, t’u lejojnë punonjësve të punojnë nga shtëpia.

Ai theksoi gjithashtu se, nëse vapa bëhet e padurueshme, është e rëndësishme të bëhen pushime nga puna.

Ndryshe nga Hungaria fqinje, ku centrali bërthamor i Paksit rrezikoi të ndalonte për shkak të nivelit të ulët të ujit në lumin Danub, Polonia nuk ka hasur deri tani probleme në furnizimin me energji elektrike.

Vendi nuk disponon centrale bërthamore dhe mbështetet kryesisht në termocentralet me qymyr për të përballuar kërkesën e lartë për energji gjatë ditëve të nxehta.

Meteorologët kanë paralajmëruar gjithashtu se në mbrëmje priten stuhi të forta në pjesën perëndimore të Polonisë, të shoqëruara me reshje intensive shiu dhe breshër.

Rënia e ndjeshme e temperaturave pritet të nisë vetëm nga dita e premte./  /Ad.Ab./ a.jor.

The post METEO – Polonia në alarm maksimal, me temperatura deri në 40 gradë Celsius appeared first on Agjencia Telegrafike Shqiptare.

TIRANË, 5 gusht /ATSH/ Kryetari i Partisë Demokratike, Sali Berisha, tha sot se vendimet e Gjykatës Kushtetuese duhet të zbatohen, duke e cilësuar këtë si një kusht themelor për funksionimin e shtetit ligjor.

Gjatë një konference për mediet, i pyetur lidhur me pagat e gjyqtarëve dhe prokurorëve, pas kërkesës së Shoqatës së Magjistratëve për zbatimin e vendimit të Gjykatës Kushtetuese, Berisha tha se përgjegjësia për deformimin e sistemit të pagave nuk i takon Gjykatës Kushtetuese, por qeverisë.

Berisha tha se qeveria ka vendosur paga më të larta për prokurorët e SPAK-ut sesa për anëtarët e Gjykatës Kushtetuese.

“Qëndrimi i Partisë Demokratike është shumë i qartë. Zbatimi, vendimi i Gjykatës Kushtetuese, kusht themelor për funksionimin e shtetit ligjor. Zbatimi i vendimit të Gjykatës Kushtetuese. Nuk është Gjykata Kushtetuese me vendimin e saj që ka përmbysur piramidën e pagave në Shqipëri. Është Edi Rama me politikat e tij pengmarrëse që e ka përmbysur atë. Është Edi Rama që përcaktoi rroga për prokurorët e SPAK-it më të larta se për anëtarët e gjykatave kushtetuese edhe kryetarët e gjykatave kushtetuese të të gjithë rajonit”, tha Berisha.

Berisha bëri edhe një krahasim mes rezultateve të task-forcës kundër korrupsionit dhe Prokurorisë së Krimeve të Rënda gjatë viteve 2006–2013 me punën e SPAK-ut, teksa shtoi se strukturat e mëparshme kanë pasur rezultate më të larta në luftën kundër korrupsionit dhe krimit të organizuar.

Në vijim, ai kritikoi edhe gjendjen e Prokurorisë së Përgjithshme, duke thënë se institucioni është “zhveshur nga çdo funksion” dhe është “plotësisht i paralizuar”.

/m.q/j.p/

The post Berisha: Vendimet e Gjykatës Kushtetuese për pagat e gjyqtarëve duhet të zbatohen appeared first on Agjencia Telegrafike Shqiptare.