TIRANË, 29 nëntor/ATSH/- Në kuadër të Festave të Nëntorit, Orkestra Simfonike, Kori dhe Kori i Zërave të Bardhë të TKOBAP-së, në bashkëpunim me Orkestrën Simfonike të RTSH-së nën dirigjimin e Gridi Krajës sollën një mbrëmje të magjishme nën tingujt e jashtëzakonshëm të filmave shqiptarë.

Artëdashësit të cilët mbushin çdo herë sallat e TKOBAP-së, u përfshinë nga emocionet e forta që rikthyen në skenë kryevepra të kinematografisë në një udhëtim të paharruar në historinë e filmit shqiptar.

Për rreth 2 orë, muzika e kolonave zanore i ktheu pas në kohë të pranishmit në sallën e TKOBAP-së, drejt kujtimeve të fëmijërisë, momenteve ikonike të filmit shqiptar dhe historisë sonë kulturore.

Momente solistike erdhën nga klarineta e parë e TKOBAP-së, Elton Katroshi dhe vokalistja Kamela Islamaj, të cilët plotësuan bukur këtë mozaik që ju dhurua artdashësve nga dy orkestrat më të mëdha shqiptare.

Publiku udhëtoi në atmosferën melodike të Kujtim Laros, Çesk Zadese, Aleksander Lalos, Limos Dizdarit, Hajg Zaharian me muzikën e tyre që i dhanë jetë filmit shqiptar.

The post “Nëntori i Dytë”, kolonat zanore të filmave shqiptarë nga Orkestra e TKOB dhe RTSH-së appeared first on Agjencia Telegrafike Shqiptare.

TIRANË, 27 nëntor/ATSH/ Teatri Kombëtar i Operas e Baletit po përgatitet të rikthejë në skenën shqiptare operën e Giuseppe Verdi-t, “Il Trovatore”, me një produksion të ri, nën drejtimin e regjisorit të mirënjohur Roberto Catalani.

“Il Trovatore” do të rikthejë në TKOB, tenorin Josif Gjipali pas 24 vitesh interpretime në skenat prestigjioze të botës. TKOB bën të ditur se ky produksion operistik do të sjellë në Shqipëri për herë të parë mezzosoprano-n shqiptare me famë ndërkombëtare Enkeleida Shkoza, në rolin dramatik të Azucenës.

Roli i Conte di Luna do të interpretohet nga baritoni Ankhbayar Enkhbold dhe baritoni i teatrit tonë, Armando Likaj.

Rolin e Leonorës do ta ndajnë sopranoja Eva Golemi në kastin e parë dhe në kastin e dytë, sopranoja Ramona Tullumani.

Rolin e Azucenës në kastin e dytë e luan mezzosopranoja e TKOB, Ivana Hoxha ndërsa roli i Manricos vjen në kastin e dytë nga tenori Amadi Lagha.

Bledar Domi do të ngjitet në skenë si Ferrandos ndërsa Ines interpretohet nga Suada Gjergji dhe Greis Shametaj. Roli i Ruiz ndahet mes Matias Xhelit dhe Redon Sinellës.

Orkestra Simfonike dhe Kori i TKOBAP-së do të dirigjohen nga Andrea Solinas dhe Dritan Lumshi, duke kompletuar këtë vizion artistik, për një përvojë të paharrueshme ku muzika, drama dhe pasioni verdian bashkohen në një nga veprat monumentale të repertorit klasik botëror. /j.p/

The post “Il Trovatore” rikthen në skenën e TKOB yjet shqiptarë të operistikës appeared first on Agjencia Telegrafike Shqiptare.

TIRANË, 21 nëntor/ATSH/ Orkestra Simfonike e Teatrit Kombëtar të Operas dhe Baletit solli sonte për publikun shqiptar koncertin “Mozart & Beethoven”, një mbrëmje ku u përjetua fuqia e dy gjenive të muzikës klasike.

Repertori i mbrëmjes nisi me veprat e ndriçuara dhe elegante të Wolfgang Amadeus Mozart dhe përfundoi me harmonitë e qeta pastorale të Ludwig van Beethoven.

Nën dirigjimin e maestro Peter Michael Garst, skena e Teatrit u shndërrua në një hapësirë ku u bashkuan dy epoka, dy stile dhe dy vizione të mëdha muzikore.

Interpretimi i tij solli një ekuilibër të veçantë midis delikatesës së Mozartit dhe fuqisë lirike të Beethoven-it, duke e bërë mbrëmjen një përvojë të paharrueshme për publikun.

Audienca u zhyt në tingujt e muzikës, duke ndjerë delikatesën e Mozartit dhe qetësinë e harmonive të Beethoven-it. Çdo notë dukej se fliste drejtpërdrejt në zemrat e të pranishmëve, dhe duartrokitjet e gjata pas secilës pjesë shprehën emocionin e përbashkët që mbizotëroi në sallë.

Dirigjenti Peter Michael Garst u lind në Worms, Gjermani, dhe ka shërbyer si dirigjent kori, dirigjent skenik dhe drejtor kori në Teatrin e Operës së Zyrihut.

Më pas, ka qenë drejtor muzikor i operave, operetave dhe muzikaleve në Stadttheater Winterthur, Zvicër.

Karriera e tij përfshin koncerte në qytete të ndryshme të Zvicrës (Berne, Solothurn, Aarau, Lucerne, Burgdorf, Konstanz), si dhe shfaqje dhe opera simfonike në teatro të njohura të Gjermanisë, Austrisë, Italisë dhe Spanjës.

Repertori i tij përfshin muzikën klasike, operën, simfonitë, operetat, muzikalet dhe baletin, duke interpretuar kompozitorë që nga Lasso, Monteverdi dhe Handel, deri te Verdi, Strauss, Mahler, Bartok dhe Schönberg.

Koncerti “Mozart & Beethoven” në TKOB- Foto: Andrin Hoxha

1 nga 17

/a.f/r.e/

The post Simfoni e dy epokave, TKOB sjell dialogun e gjenive Mozart dhe Beethoven appeared first on Agjencia Telegrafike Shqiptare.

TIRANË, 22 tetor /ATSH/ Arti është ajo fije e padukshme që ndan realitetin nga imagjinata dhe na çon në një udhëtim mes këtyre dy botëve.

“Alegorias” është shfaqja që u ngjit sot në skenën e Teatrit të Operas dhe Baletit duke sjellë ritmet e flamenkos dhe muzikës së Andaluzisë.

Kjo shfaqje është një mishërim i çastit kur fantazia i jep formë të padukshmes, duke e kthyer ndjenjën në lëvizje dhe mendimin në trup.

Në këtë hapësirë ku kufijtë treten, Julia Cambra dhe Paula Comitre takohen për herë të parë në skenë. Dy artiste që flasin gjuhë të ndryshme, por lëvizin në të njëjtin univers.

Në skenën e TKOB-it sot u ngjit një takim ku heshtja u bë ritëm, trupi fjalë dhe arti u bë ura që lidh botët.

“Kjo është arsyeja pse sjellim në tryezë koncepte që janë kaq të kundërta, por kaq plotësuese: vallëzimi bashkëkohor dhe flamenko, muzika bashkëkohore dhe muzika tradicionale flamenko”, thanë artistet Cambra dhe Comitre në një intervistë televizive.

Paula Comitre është vlerësuar si një nga talentet më të spikatura të flamenkos të gjeneratës së saj, duke shndërruar trashëgiminë multikulturore në një dialog artistik.

Shfaqja është pjesë e kalendarit artistik të Festivalit Ndërkombëtar të Kërcimit në Tiranë, i cili ka parashikuar edhe një klasë kërcimi flamenko për të gjithë ata që e duan këtë disiplinë.

/e.i/r.e/a.f/

The post “Alegorias”, në skenën e Teatrit Kombëtar të Operas dhe Baletit appeared first on Agjencia Telegrafike Shqiptare.

TIRANË, 13 tetor/ATSH/ Publiku i Teatrit të Operas e Baletit pati fatin të ndjekë në fundjavë tre botë të ndryshme të kërcimit, brenda së njëjtës shfaqje.

“Falling Angels”, i mjeshtrit Jirí Kylián, solli në skenë tensionin mes disiplinës dhe lirisë, një udhëtim përmes lëvizjeve minimaliste dhe ritmeve të fuqishme që pasqyruan thelbin e njeriut.

Jiří Kylián është një koreograf çek me famë botërore i cili ka krijuar rreth 100 vepra, duke përfshirë baletet e famshme si “Petite Mort” dhe “Sinfonietta”, që interpretohen nga kompani kërcimi në mbarë botën. Koreografia e tij është e njohur për përzierjen e baletit klasik me lëvizjen moderne dhe eksplorimin e emocioneve dhe marrëdhënieve njerëzore.

“Troy Game” erdhi nën koreografinë e Robert North, i cili ndezi energjinë e sallës me humor, atletikë dhe ritme braziliane, duke sfiduar me elegancë konceptet tradicionale të maskilizmit.

Ndërsa “Radiant 40°” i Edi Blloshmit e mbylli mbrëmjen me një poezi të vërtetë skenike, ku kujtesa, lidhjet e padukshme dhe transformimi u shkrinë në një gjuhë të re vallëzimi.

Ministri i Turizmit, Kulturës dhe Sportit, Blendi Gonxhja, e cilësoi këtë mbrëmje si të paharrueshme, ku arti i kërcimit u bë pasaportë për të udhëtuar mes kulturave, ndjenjave dhe botëve që flasin përtej fjalëve.

Kjo shfaqje ishte pjesë e Festivalit Ndërkombëtar të Dancit të Tiranës (IDFT), aktivitetet e të cilit kanë gjallëruar jetën kulturore në kryeqytet dhe do vijojnë deri më 25 tetor. Më shumë se një festival, IDFT është një platformë për lidhje, kreativitet dhe shkëmbim.

International Dance Festival of Tirana. Fotot nga Florian Abazaj

1 nga 9

The post IDFT, 3 koreografë të shquar brenda së njëjtës natë në TKOB appeared first on Agjencia Telegrafike Shqiptare.

TIRANË, 10 tetor/ATSH/ Giuseppe Gibboni, një nga violinistët më të spikatur të panoramës ndërkombëtare muzikore, fitues i çmimit Paganini, dha koncert mbrëmë në skenën e Teatrit Kombëtare të Operas e Baletit, me violinën e tij Stradivari të 1734-ës.

Gibboni mrekulloi të pranishmit në TKOB duke luajtur Rimskij Korsakov, Paganini, Rachmaninov e Stravinskij.

Kjo mbrëmje e mrekullueshme artistike në Tiranë, erdhi fill pas pjesëmarrjes së Gibboni-t në dy koncerte me Orkestrën Filarmonike të Teatrit “La Scala” të Milanos. Gibboni solli virtuozitetin e tij duke interpretuar nën shoqërimin e Orkestrës Simfonike të TKOBAP-së në bashkëpunim me Orkestrën Simfonike të Forcave të Armatosura, të drejtuar nga dirigjenti i mirënjohur Sergio Alapont.

Giuseppe Gibboni është një nga violinistët më të jashtëzakonshëm të brezit të tij. Ai vlerësohet për teknikën brilante, ndjeshmërinë interpretuese dhe pjekurinë artistike që rrallë gjendet në një moshë kaq të re.

Fitues i Çmimit të Parë në Konkursin Ndërkombëtar “Premio Paganini” 2021, ai u bë violinisti i parë italian pas 24 vitesh që fitoi këtë çmim prestigjioz, duke marrë gjithashtu dhe çmimin e publikut dhe dy çmime speciale për interpretimet më të mira të veprave të Paganinit.

Me një virtuozitet që ndërthur pasionin me perfeksionin teknik, Gibboni ka performuar në disa nga skenat më të njohura evropiane, duke u konsideruar si një fenomen i violinës moderne /j.p/

1 nga 3

The post Violinisti me famë ndërkombëtare Giuseppe Gibboni, koncert në TKOB appeared first on Agjencia Telegrafike Shqiptare.

TIRANË, 7 tetor /ATSH/ Në kuadër të Javës së Kulturës Gjermane 2025 dhe edicionit të 13-të të festivalit “Violinistic Greetings” u mbajt mbrëmjen e sotme sot në hollin koncertor të Teatrit Kombëtar të Operas, Baletit dhe Ansamblit Popullor një mbrëmje unike muzikore me violinisten e njohur gjermane Caroline Adomeit dhe pianisten shqiptare Fatma Spahiu.

Programi i mbrëmjes “From Bach to Blues’ (Nga Bach tek Blues) solli një udhëtim nga tingujt e pavdekshëm të Johann Sebastian Bach, tek ngjyrimet impresioniste të Ravel, arranxhime të vetë artistes Adomeit, vepra të Kosturit si edhe muzikë shqiptare për violinë.

Publiku shijoi një mbrëmje plot energji, virtuozitet dhe emocione të forta, që shkrin stilet klasike me ato moderne, nga Bach deri tek Blues.

Caroline Adomeit, me mbi 275.000 ndjekës në rrjete sociale, është e njohur ndërkombëtarisht për interpretimet e saj inovative dhe qasjen “muzikë pa pengesa”.

Ajo ka publikuar CD të suksesshme, ka performuar në skena të mëdha evropiane dhe është pedagoge në Akademie für Tonkunst Darmstadt.

Fatma Spahiu, pedagoge në Universitetin e Arteve në Tiranë, solli mjeshtërinë dhe ndjeshmërinë e saj të veçantë në piano, duke e bërë këtë recital një eksperiencë të paharrueshme.

Në kuadër të vizitës së saj, Caroline Adomeit do të mbajë gjithashtu një masterclass për studentët e violinës, në bashkëpunim me Fakultetin e Muzikës në Universitetin e Arteve.

Koncert Recilat “Violinistic Greeting, Java Gjermane e Kulturës - Foto: Andrin Hoxha

1 nga 8

/gj.m//a.f//r.e/

The post Java e Kulturës Gjermane, mbahet në TKOB mbrëmja muzikore “Nga Bach tek Blues” appeared first on Agjencia Telegrafike Shqiptare.

Teatri Kombëtar i Operës, Baletit dhe Ansamblit Popullor (TKOB) ka reaguar pas incidentit që ndodhi gjatë natës së parë të shfaqjes së operës La Traviata, ku sopranoja Eva Golemi u rrëzua në skenë dhe u transportua në spital. Përmes një komunikate për mediat, TKOB bën me dije se sopranoja ndodhet aktualisht në proces rikuperimi dhe […]

The post Sopranoja Eva Golemi u rrëzua në skenë, reagon TKOB: Nuk ka pasoja serioze  appeared first on BoldNews.al.

TIRANË, 28 shtator /ATSH/ Një incident ndodhi mbrëmjen e 26 shtatorit, në premierën e “La Traviatës” në Teatrin Kombëtar të Operas dhe Baletit, (TKOB) kur sopranoja Eva Golemi u rrëzua në skenë.

Teatri Kombëtar i Operës, Baletit dhe Ansamblit Popullor informon publikun se gjatë natës së parë të shfaqjes së operës La Traviata, sopranoja e mirënjohur Eva Golemi pati një incident në skenë, në momentet e fundit të shfaqjes.

Sipas njoftimit, falë reagimit të menjëhershëm të stafit artistik dhe administrativ, situata u menaxhua me kujdes dhe profesionalizëm. Znj. Golemi ndodhet aktualisht në proces rikuperimi dhe fatmirësisht gjendja e saj shëndetësore është e qëndrueshme, pa pasoja serioze.

TKOBAP shpreh mirënjohje për publikun, i cili me duartrokitjet dhe mbështetjen e tij tregoi respekt dhe dashuri për artistët tanë.

Shfaqjet tona do të vijojnë sipas programit të parashikuar. I urojmë znj. Eva Golemi shërim të shpejtë dhe rikthim të shëndetshëm e sa më të afërt në skenë.

Në një intervistë për Top Channel, Golemi u shpreh se është në gjendje të mirë shëndetësore, ndërsa mjekët i kanë sugjeruar 10 ditë pushim për t’u rikuperuar plotësisht.

“Kam 25 vite që luaj këtë rol jo vetëm këtu, por në të gjithë botën, një incident i tillë nuk më kishte ndodhur kurrë më parë. Ngjarja mund të kishte qenë më e rëndë nëse do të dëmtoja kokën. Jam ende e tronditur nga ngjarje”, tha sopranoja.

Prej gati tre dekadash, Eva Golemi është soprano e parë e Operës dhe Baletit, ku ka interpretuar qindra role, por Violetta e “La Traviatta-s” ishte ndër rolet e preferuara të saj, të cilin e ka sjellë mbi 70 herë në skenë.

“La Traviata” e Verdit është një nga operat më të famshme në botë. Ajo është krijuar mbi bazën e veprës “Zonja me kamelie” të Aleksandër Dymasë. Bëhet fjalë për një histori të një kurtizaneje, e cila dashurohet me një fisnik, por i ati i djalit e pengon dashurinë e tyre.

/m.q/a.f/

The post Incident në TKOB, sopranoja Eva Golemi rrëzohet në skenë appeared first on Agjencia Telegrafike Shqiptare.

TIRANË, 26 shtator /ATSH/ U shfaq mbrëmjen e sotme në skenën e Teatrit Kombëtar të Operas e Baletit, në një sallë të mbushur plot e përplot me spektatorë, premiera e “La Traviata”-s, e kompozitorit të shquar italian Xhuzepe Verdi.

Historia e dashurisë e Violetës, nën vizionin artistik të Hugo de Ana-s dhe mjeshtërisë muzikore të Francesco Ommassini-t, mori jetë sonte në TKOB përmes një skenografie monumentale dhe një gjuhe vizuale që tejkaloi kohët, duke e sjellë këtë kryevepër deri në ditët tona.

Violeta shkëlqeu nën interpretimin e sopranos Eva Golemi, rol të cilin ajo e ka intrepretuar 70 herë gjatë karrierës së saj artistike.

“La Traviata” e Verdit është një nga operat më të famshme në botë. Ajo është krijuar mbi bazën e veprës “Zonja me kamelie” të Aleksandër Dymasë. Bëhet fjalë për një histori të një kurtizaneje, e cila dashurohet me një fisnik, por i ati i djalit e pengon dashurinë e tyre.

Natën e dytë, rolin e Violeta Valery do ta interpretojë sopranoja Zuzana Marková, një nga zërat më të kërkuar të repertorit belkanto.

Natën e tretë të shfaqjes (28 shtator) do të jetë Nina Muho, soprano e TKOBAP-së, e cilësuar si një zë dhe performuese bindëse për një repertor të gjerë operistik, që do të interpretojë rolin e Violetës, në operan “La Traviata”.

Produksioni i ri i kryeveprës së “belcanto”-s italiane do të shfaqet për 4 net rresht (26, 27, 28 dhe 29 shtator) në sallën e TOKB. Sipas organizatorëve, biletat për datat 28 dhe 29 janë të gjitha të shitura.

1 nga 17

The post “La Traviata”, shfaqet në TKOB premiera e produksionit të ri appeared first on Agjencia Telegrafike Shqiptare.

TIRANË, 25 shtator/ATSH/ “La Traviata” e Verdit, një histori dashurie që sfidon kohën, vjen në një produksion të jashtëzakonshëm që mban firmën e mjeshtrit Hugo de Ana dhe mjeshtërinë muzikore të Francesco Ommassini.

Premiera e këtij produksioni të ri të operës, do të jetë nesër në mbrëmje, në skenën e Teatrit Kombëtar të Operas e Baletit. Për 4 netë rresht, publiku do të mund ta ndjekë këtë kryevepër të “belcanto-s” italiane.

Ministri i Turizmit, Kulturës dhe Sportit, Blendi Gonxhja, ftoi artdashësit ta ndjekin këtë produksion, i ardhur nga Teatri i Zagrebit, e që pritet të jetë një shfaqje e jashtëzakonshme për publikun shqiptar, duke e vendosur TKOBAP-në në të njëjtin nivel me teatrot prestigjiozë që kanë pasur privilegjin të bashkëpunojnë me mjeshtrin Hugo de Ana.

Historia e Violetës, nën vizionin artistik të Hugo de Ana-s, merr jetë përmes një skenografie monumentale dhe një gjuhe vizuale që tejkalon kohët, duke e sjellë këtë kryevepër deri në ditët tona.

1 nga 4

The post Produksion i ri i kryeveprës së Verdit “La Traviata”, në Teatrin e Operas e Baletit appeared first on Agjencia Telegrafike Shqiptare.

TIRANË, 22 shtator/ATSH/ Një atmosferë e hareshme u krijua dje në Hollin Koncertor të Teatrit Kombëtar të Operas e Baletit, kur salla u mbush nga dhjetëra fëmijë.

Të shoqëruar edhe nga prindërit, fëmijët kaluan një të diel në Opera, duke zbuluar nga afër magjinë e artit operistik, nën drejtimin e maestro Dritan Lumshi. Përveç Korit të TKOB, kënduan edhe fëmijët e Korit të Zërave të Bardhë, të përgatitur nga Sonila Baboçi dhe të shoqëruar nga pianistja Ingrid Pulizo.

Kori i Teatrit Kombëtar të Operës dhe Baletit solli një program krejt të veçantë për miqtë e vegjël të operës, duke u ofruar atyre një të diel ndryshe, plot art, dije dhe emocione.

Kjo nuk është hera e parë që TKOB organizon të tilla aktivitete. Si pjesë e projektit “Edukim përmes artit”, herë pas here në këtë institucion ka pas aktivitete të menduara enkas për fëmijët, duke u nxitur atyre kureshtjen për këtë zhanër të artit. /j.p/

1 nga 3

The post “E diela në Opera”, programi i TKOB-së kushtuar fëmijëve appeared first on Agjencia Telegrafike Shqiptare.

Në Shqipëri, është gjithnjë e mirëpritur nga publiku i saj, i cili në daljen e fundit e duartrokiti në skenë për rreth 15 minuta, në koncertin e saj në skenën e Teatrit Kombëtar të Operas dhe Baletit në Tiranë, titulluar “Kur ndjenjat marrin zë”. Sopranoja me famë botërore, rrëfen për Pas Mesnatë, emocionet e shfaqjes dhe rikthimin në Atdhe.

“Detyra e një artisti është të japë në mënyrë totale, të mos mbajë asgjë për veten e vet. Efekti që duhet të ketë arti, muzika është një efekt katarsisi. Kështu është krijuar, ky ka qenë qëllimi. Nëse unë kam arritur të shihemi në pasqyrë shpirtrat njëri tjetrit, qoftë edhe me një person mendoj se kam bërë detyrën time si artiste.

Dhe kur sheh atë lloj rezonimi me publikun, më bën të lumtur por edhe mendoj është detyra e artistit. Artisti duhet të arrijë në atë pikë. Në vendin tënd, edhe një qime floku pasqyrohet. Ne e shohim, publiku yt të sheh me atë lupën magjike, të sheh cdo lëvizje frymë marrje. Nuk i kalon pa e vënë re, isha aq ngjitur duket sikur po këndoja me publikun. Kur kthehet në vendin tënd ka një vlerë tjetër sepse unë këtu u rrita, u formova dhe më pas u perfeksionova jashtë Shqipërisë. Është një lloj përgjegjësie tjetër edhe për brezin e ri. Dy orë në skenë një sfidë me veten por edhe një mesazh për brezin e ri, cfarë do të thotë të jesh artist sot. Rezultati nuk do ishte ai që ishte, nëse unë nuk do kisha mbështetjen e orkestrës, korit, dirigjentit, e të gjithë stafit pas skene. Jam ndjerë e përkëdhelur në shtëpi” thotë sopranoja, ndërsa rrëfen emocionet para nisjes së shfaqjes.

“Unë kam 32 vite në skenë si këngëtare operistike profesioniste, plus shumë vite të tjera si këngëtare e vogël në Pallatin e Pionerëve, por emocioni sa më shumë kalon mosha apo eksperienca është edhe më i madh. Kur je fëmijë këndon do të argëtohesh, me kalimin e kohës ke një zë, sepse po të dëgjojnë filizat e rinj që duan të bëjnë si ty. Edhe për mua si artiste, dua të sfidoj veten time. Para koncertit bëj 500 hedhje me litar, për të lëvizur, muskujt, vokalica mbi 2-3 orë përpara, është një filozofi e imja që nuk e ndryshoj prej ditës së parë.”/abcnews.al

TIRANË, 13 shtator /ATSH/ Turistët e huaj po shfaqin çdo ditë e më shumë interes për trashëgiminë kulturore dhe artistike të vendit tonë. Ata duan të mësojnë më shumë për artin dhe kulturën shqiptare.

Një grup turistësh nga Austria vizituan ambientet e Teatrit Kombëtar të Operas dhe Baletit, për t’u njohur nga afër me historikun 72-vjeçar të teatrit.

Turistët austriakë, të cilët udhëtuan enkas drejt Shqipërisë për të përjetuar magjinë e artit elitar në zemër të Tiranës u mikpritën nga një përfaqësi e TKOB.

Ata u njohën me historikun e zhvillimit të TKOB, produksionet skenike, prapaskenat dhe pasurinë e artit shqiptar ndër dekada, me emocionet që ky institucion përcjell brez pas brezi.

Sipas njoftimit të TKOB, vizita u mbyll me një performancë të shkurtër nga vepra “Mullixhesha e bukur” e kompozitorit austriak Franc Shubert (Franz Schubert).

Këto vizita janë dëshmi se turizmi kulturor është një formë strategjike që forcon identitetin kombëtar, hap dyer të reja bashkëpunimi dhe e vendos Shqipërinë në hartën kulturore evropiane.

Turizmi kulturor në vendin tonë, vijon të njohë zhvillim të qëndrueshëm, duke reflektuar rritje të ndjeshme të numrit të turistëve, duke e kthyer atë në një turizëm gjithëvjetor.

/e.i//r.e/

The post Turistë nga Austria në Tiranë për të përjetuar magjinë e artit elitar në Teatrin e Operas dhe Baletit appeared first on Agjencia Telegrafike Shqiptare.

TIRANË, 27 qershor/ATSH/ Një nga kryeveprat më të ndjera të periudhës së romantizmit vjen për herë të parë në skenën shqiptare.

Këtë fundjavë publiku artdashës do të mund të ndjekë në Teatrin Kombëtar të Operas dhe Baletit, shfaqjen “Mullixhesha e Bukur” (Die schöne Müllerin) të kompozitorit austriak Franc Shubert (Franz Schubert).

“Mullixhesha e Bukur” është një cikël këngësh nga Shuberti, i kompozuar në vitin 1823, bazuar në 20 poezi të Vilhelm Myler (Wilhelm Müller).

Shfaqja shpalos një histori dashurie të pafat, me një thellësi emocionale që prek çdo shpirt. Cikli tregon historinë e një nxënësi të ri të mullirit, i cili bie në dashuri me vajzën e mullixhiut, dashuri e cila do të ketë fund tragjik. Shpresa, xhelozia dhe dëshpërimi ndërthuren në një cikël liedesh me poezitë e Vilhelm Mylerit, që sjellin një tregim të ndjerë poetik, nga baritoni Artur Vera dhe pianistja Etrita Ibrahimi.

Koncerti do të shfaqet ditën e shtunë, në ora 20:00, në Hollin Koncertor të TKOB-së.

/a.f//r.e/

The post Kryevepra romantike e Shubertit, për herë të parë në TKOB appeared first on Agjencia Telegrafike Shqiptare.

Me solistë të mirënjohur, korin dhe orkestrën Simfonike, vepra e Carl Orff, “Carmina Burana” rikthehet në Teatrit Kombëtar të Operas e Baletit.

Nën drejtimin e dirigjentit, Sergio Alapont, kryevepra botërore e kompozitorit gjerman, erdhi për publikun shqiptar edhe me interpretimin e Korit të Zërave të Bardhë i cili u bashkohet profesionistëve, për të krijuar një natë të mbushur me emocione dhe energji.

Sopranoja Nina Muho, e cila ka interpretuar më parë në këtë vepër, rikthehet me një përvojë të shtuar dhe një lidhje të thellë emocionale me rolin.

“Është një personazh shumë delikat roli i sopranos që unë performoj në këtë vepër, në një nga pjesët e saj flet për dashurinë e një vajze, për epshet që ajo përmban, për dashurinë që ajo përjeton. Një ndër veprat më të thjeshta që unë mund të performoj dhe pse kërkon një interpretim stilistik të vokalit ashtu si vetë jetë, kontrastet”, tha sopranoja.

Baritoni Armando Likaj, i njohur për interpretimet e tij dramatike, e konsideron këtë vepër si një nga sfidat më të mëdha të repertorit baritor.

“Është një vepër komplekse, ka një vokal shumë kompleks. Është një rol sfidues. Qëndron një ironi e fortë ndaj asaj ca thuhet dhe çfarë ka të nënkuptuar”,  u shpreh ai.

Carmina Burana është një kantatë e kompozuar në 1935 dhe 1936, bazuar në 24 poezi nga një koleksion mesjetar poemash të shkruara në latinisht dhe gjuhë të tjera të Mesjetës.

LEXONI GJITHASHTU:

• Muse anulon koncertin në Stamboll pas presionit të protestuesve antiqeveritar
• Shakira shtrohet në spital, anulon koncertin

The post Kryevepra botërore “Carmina Burana” rikthehet në skenën e TKOB appeared first on Euronews Albania.

TIRANË, 15 qershor/ATSH/ “On the Road” titullohej koncerti i pianistit Robert Bisha i shfaqur mbrëmjen e djeshme në Teatrin e Operës dhe Baletit në Tiranë.

I rikthyer pas 16 vitesh në skenën e TKOB, Bisha solli për të pranishmit një udhëtim muzikor i mbushur me energji eksperimentuese, intimitet dhe vizione që përshkojnë peizazhe mistike dhe metafizike.

Në koncert ishte i pranishëm edhe ministri i Ekonomisë, Kulturës dhe Inovacionit, Blendi Gonxhja, i cili në një postim në rrjetet sociale ndau momente nga ky koncert si dhe nga takimi me dirigjentin Peter Michael Garst.

“Me Peter Michael Garst dhe Martha Garst pas shfaqjes Piano Solo të Robert Bisha në TKOB, ku në nëntor do kemi një koncert të dirigjuar nga miku i Shqipërisë, drejtuesi i një aktiviteti humanitar në ndihmë të shkollave tona rurale në vitet e vështira 1993 – 2009, dirigjenti prej mbi gjysëm shekulli, Peter Michael Garst (në skena të disa vendeve si: Gjermani, Zvicër, Austri, Francë, Itali, Spanjë, Hollandë), për t’u detajuar si program me drejtorin Aulon Naçi dhe në një format mirënjohjeje e shenjë nderimi për familjen Garst që ndjehet shqiptare në zemër”, tha Gonxhja.

Pianisti Robert Bisha përcolli me virtuozitet një vizion unik i të bërit muzikë, i pasur në përvojë dhe poezi.

Zgjedhja e një blues‑i të lashtë mesdhetar, ritmet shqiptare, ballkanike dhe të Lindjes së Mesme, tema nordike, harmonitë nga lashtësia e muzikës tradicionale evropiane deri tek kërkimet për traditat avangarde dhe natyrisht stilemat origjinale ishin pjesë e koncertit të pianistit Robert Bisha.

Robert Bisha është një virtuoz i pianos, i vlerësuar nga kritika. Lindi në 1984, në Vaun e Dejës, dhe kreu studimet në Itali, kur megjithëse diplomohet për piano, mund të konsiderohet poli-instrumentist e gjithashtu kompozitor. Zakonisht në koncertet e tij, ai luan në disa vegla muzikore. Robert Bisha ka kompozuar edhe për kinematografinë italiane, duke arritur të marrë vlerësime si çmimi i parë “Premio Pertini” si dhe çmimin më të rëndësishëm italian “David di Donatello”, për kolonën zanore të filmit “Anija”, i Roland Sejkos.

1 nga 6

/k.s/ /a.g/

The post “On the Road”, pianisti Robert Bisha koncert në TKOB appeared first on Agjencia Telegrafike Shqiptare.

Etno-muzikali “Zare”, një nga shfaqjet më të bukura të repertorit artistik të Ansamblit Kombëtar të Këngëve dhe Valleve Popullore, rikthehet në skenën e Teatrit Kombëtar të Operas dhe Baletit.

“Zare” nuk është thjesht një shfaqje e zakonshme, por një muzikal i plotë ku ndërthuren muzika, vallja, kënga dhe aktrimi.

Këtë herë, etno-muzikali vjen i konceptuar ndryshe, duke përfshirë valle nga jugu, veriu dhe Shqipëria e Mesme, ndërsa nuk mungojnë edhe risitë.

“Zare vjen i konceptuar si muzikalisht ashtu edhe në aspektin koreografik. Nuk do të ketë këngëtarë të ftuar, por do të jenë artistët dhe solistët e ansamblit, së bashku me grupin vokal. Pjesa koreografike do të interpretohet nga valltarët e ansamblit kombëtar, dhe në këtë rast është shtuar edhe një grup i ri. Sa herë përmendet ‘Zare’, publikut i vjen në mendje personazhi i famshëm. Libreti lidhet me historinë e dashurisë mes dy të rinjve. Gjithë shfaqja është ndërtuar me numra artistikë muzikorë dhe koreografikë, që përfshijnë valle nga jugu, Shqipëria Mesme dhe veriu”, thotë Sokol Marsi, drejtor i Ansamblit të Këngëve dhe Valleve.

“Zare” është një etno-muzikal që ngjitet në skenë me gjithë fuqinë e këngës, valles dhe traditës, duke sjellë një histori dashurie mes dy të rinjve që na kthen në kohët kur dashuria shprehej në gjeste të vogla dhe këngë të mëdha.

“Etno-muzikali ‘Zare’ është një histori dashurie mes dy të rinjve, ku Zarja është nga jugu dhe Arberi nga veriu. Kjo histori pasqyron edhe thyerjet e konceptimeve që akoma ekzistojnë në shoqërinë tonë, për shkak të babait dhe vëllait të Zares. Në brendësi të shfaqjes përfshihen valle dhe këngë popullore shumë të përpunuara bukur, që ruajnë identitetin tonë kombëtar. Nuk është një modernizim, por një formë e re e paraqitjes së folklorit tonë. Kjo është një rikthim, pasi ka evoluar dhe janë përfshirë artistë të rinj. Përfshihen tre zona kryesore: veriu, Shqipëria e Mesme dhe jugu. Ngjarjet fillimisht zhvillohen në Tiranë, pastaj në Përmet dhe në Shkodër”, thotë koreografi Andrea Kokeri.

Një udhëtim i paharrueshëm mes motiveve popullore, kostumeve autentike dhe emocioneve që vetëm folklori ynë di të zgjojë, etno-muzikali “Zare” do të ngjitet në skenë mbrëmjen e 10 qershorit, si pjesë e programit artistik të këtij muaji.

LEXONI GJITHASHTU:

• “Kaleidoscope” dhe “Suitë në Re”, dy balete premierë për publikun shqiptar në TKOB
• “Opera Gala”, 150 artistë sjellin magjinë e muzikës klasike në TKOB

The post Dashuria dhe tradita në skenë, etno-muzikali “Zare” vjen sërish në TKOB appeared first on Euronews Albania.

Këtë fundjavë Teatri Kombëtar i Operas dhe Baletit do të sjellë “Portret koncert”.

Mbrëmja e së shtunës premton më shumë se një mbrëmje muzikore, por një reflektim të dy portreteve artistike që ngjiten në skenë këtë 31 maj në TKOB.

Nga njëra anë, Dejon Bendaj, violinist që nga fëmijëria, i rritur me skenën dhe çmimet ndërkombëtare, vjen me një teknikë që digjet nga pasioni. Dhe nga ana tjetër, Zamir Kabo, pianist i formuar në akademitë më prestigjioze të Evropës, vjen me një interpretim që flet plot ndjeshmëri dhe forcë.

Dy artistët bashkohen për të sjellë në jetë veprat e Mozart, Prokofiev dhe Bartok, duke krijuar një mbrëmje që jo vetëm dëgjohet por edhe ndjehet. Dejon Bendaj dhe Zamir Kabo do të rikthejnë muzikën e dhomës në qendër të emocioneve.

Kjo mbrëmje muzikore do të pasohet nga një tjetër aktivitet në TKOB, ku kësaj here pianisti Kabo do të shoqërojë soprano Ana Naqe në koncertin “Përtej kufijve”.

“Përtej kufijve” është një udhëtim që nis me hijeshinë e romancës gjermane dhe përfundon në kulmet dramatike të operës italiane. Nga ndjeshmëria e Strauss dhe Korngold, tek forca shprehëse e Verdit, Bellinit e Cilea-s./ KultPlus.com

Baletet “Kaleidoscope” dhe “Suitë në Re” do të ngjiten premierë në skenën e Teatrit Kombëtar të Operës dhe Baletit, për tre netë me radhë, më 26, 27 dhe 28 maj.

Publiku do të përjetojë dy botë të ndryshme të baletit që bashkëjetojnë mbi të njëjtën skenë, duke sjellë emocione, estetikë dhe reflektim përmes lëvizjes.

Koreografi kanadez Peter Quanz, i njohur ndërkombëtarisht për krijimtarinë e tij të sofistikuar, sjell për herë të parë në Shqipëri veprën “Kaleidoscope”, një koreografi që magjeps me shpërthimin e ngjyrave, formave dhe energjisë.

Kjo vepër, e krijuar fillimisht për American Ballet Theatre në vitin 2005, është një manifestim i shpirtit që transformohet në çdo sekuencë, duke sjellë një realitet të ri koreografik sa herë që skena merr frymë.

“Është hera e parë që vij në Shqipëri. Baleti që do të sjellim në skenë është krijuar në vitin 2005 për Teatrin Amerikan të Baletit, dhe sot, pas kaq shumë vitesh, mbetet po aq aktual. Kjo është hera e parë që vihet në skenën shqiptare dhe jam shumë i lumtur që sjell një frymë të tillë. Vepra vjen si premierë me skenografi të përshtatur për teatrin tuaj dhe kostumografi tërësisht të re. Si një kaleidoskop i vërtetë, çdo lëvizje sjell një pamje të re; çdo sekuencë, një bukuri që zhduket e lind sërish”, thotë koreografi Peter Quanz:

Pas këtij udhëtimi vizionar me “Kaleidoscope”, publiku zhytet në një univers krejtësisht ndryshe me “Suitë në Re”, një krijim origjinal nga koreografi Alvaro Dule.

“Jam këtu për herë të parë për një krijim të ri në trupën e Teatrit të Baletit të Shqipërisë. Vepra koreografike ‘Suitë në Re’ është frymëzuar nga muzika, e cila është e harmonizuar në një tonalitet. Kjo kërkon një simetri dhe një dialog me muzikën. Vepra ndërtohet përmes solove, duke treguar një dialektikë mes akademizmit të kërcimtarëve dhe strukturës baroke, të sjellë sot me një frymë të re. Kemi në skenë muzikë live”, thotë koreografi Alvaro Dule.

Bazuar në muzikën baroke të Handel-it, ky balet ndërthur klasiken me bashkëkohoren, përmes një ndjeshmërie elegante dhe një ndërtimi koreografik që lëviz nga solo të thella në duete të ndjera, e deri te harmonia e një kuinteti.

Pesë balerinë të trupës së TKOB-së i japin jetë një vepre ku trupi flet, ndjen dhe rrëfen, duke lidhur epokat përmes bukurisë së baletit./KultPlus.com