Kryeprokurori i Prokurorisë Themelore në Prishtinë, Zejnullah Gashi, ka konfirmuar për Telegrafin se është lëshuar urdhër për ndalimin 48-orësh të arsimtarit që dyshohet se ka ushtruar dhunë fizike ndaj një nxënësi në shkollën “Pavarësia” në Prishtinë.
“Po, është lëshuar urdhri për ndalim për 48 orë”, ka deklaruar Gashi.
Rasti ka tërhequr vëmendje të madhe publike pas publikimit të pamjeve në rrjete sociale, ku arsimtari shihet duke e goditur nxënësin, ndërsa në një moment vërehet edhe reagimi i nxënësit ndaj tij.
Autoritetet kompetente kanë nisur procedurat hetimore për zbardhjen e plotë të rrethanave të incidentit, ndërsa pritet që ndaj të dyshuarit të ndërmerren veprime të mëtejshme ligjore në përputhje me rezultatet e hetimit. /Telegrafi/
Presidentja e Kosovës, Vjosa Osmani, ka theksuar se pavarësia e Kosovës ishte rezultat i vullnetit të popullit dhe i një sakrifice shekullore, duke kujtuar kontributin e Ushtrisë Çlirimtare të Kosovës dhe viktimat e shumta gjatë luftës.
“Pavarësia e Kosovës ishte vullnet i popullit të Kosovës. Ishte sakrificë shekullore për të cilën dhanë jetën mijëra dëshmorë e civilë të pafajshëm e për të cilën luftuan, me heroizëm dhe me luftë të pastër, Ushtria Çlirimtare e Kosovës”, ka deklaruar Osmani në një postim në Facebook.
Ajo ka theksuar se Serbia ka kryer krime të rënda kundër popullit të Kosovës, duke i cilësuar ato si gjenocid, krime kundër njerëzimit dhe krime lufte.
“Gjatë luftës së fundit në Kosovë, Serbia kishte për qëllim shfarosjen e popullit shqiptar, qëllim të cilin e shpërfaqi nëpërmjet vrasjes dhe masakrimit të mijërave fëmijëve, grave, burrave e të moshuarve, dhunimeve të mijëra grave e burrave, shkatërrimit të qindra mijëra shtëpive, dëbimit të mbi 80% të qytetarëve të Kosovës nga shtëpitë e tyre, spastrimit etnik, zhdukjes me dhunë të mijëra personave dhe krimeve të tjera të llahtarshme”, ka shkruar ajo.
Presidentja Osmani ka kritikuar përpjekjet për të barazuar luftën e UÇK-së me krimet e kryera nga Serbia, duke theksuar se këto përpjekje dëmtojnë drejtësinë dhe paqen afatgjatë.
“Çdo përpjekje që tenton të barazojë luftën çlirimtare të UÇK-së me krimet e agresorit gjenocidal serb e minon besimin në drejtësi dhe e dëmton rëndë paqen afatgjatë” ka theksuar ajo.
Në fund, Osmani ka ritheksuar kërkesën për drejtësi dhe rëndësinë e ruajtjes së së vërtetës historike.
“Kosova dhe qytetarët e saj kërkojnë drejtësi. Lufta e UÇK-së ishte e drejtë dhe e pastër. Kjo e vërtetë nuk ndryshohet me tentime për ta rishkruar historinë dhe për ta njollosur dhe zhvleftësuar betejën e popullit të Kosovës për liri”, ka përfunduar ajo. /Telegrafi/
Instituti Kombëtar i Shëndetësisë Publike të Kosovës (IKShPK) ka njoftuar se nga monitorimet e fundit të cilësisë së ujit të pijshëm në zonën e furnizimit PR03 nga Ujësjellësi i Badocit është vërejtur ulje e dukshme e vlerave të turbullirës.
Sipas IKShPK-së, analizat laboratorike të kryera gjatë tri ditëve të fundit tregojnë se vlerat e turbullirës, si dhe të gjithë parametrat e tjerë bakteriologjikë dhe fiziko-kimikë, janë brenda kritereve të përcaktuara me Udhëzimin Administrativ nr. 10/2021 për cilësinë e ujit të destinuar për konsum nga njeriu.
Bazuar në këto rezultate dhe në përputhje me legjislacionin në fuqi, IKShPK ka bërë të ditur se uji në zonën e furnizimit PR03 nga Liqeni i Badocit është i sigurt për pije.
Instituti ka theksuar se, në bashkëpunim me institucionet përkatëse, do të vazhdojë monitorimin e rregullt dhe të vazhdueshëm të cilësisë së ujit, duke garantuar transparencë dhe informim të saktë për qytetarët lidhur me sigurinë e furnizimit me ujë të pijshëm. /Telegrafi/
Lëvizja Vetëvendosje ka reaguar ndaj kërkesës së Prokurorisë Speciale për dënime maksimale ndaj ish-krerëve të Ushtrisë Çlirimtare të Kosovës, duke e cilësuar këtë si një akt politik dhe jo si kërkim të drejtësisë.
Në një reagim publik, Vetëvendosje ka theksuar se Jugosllavia e Serbisë së Sllobodan Millosheviqit ka kryer gjenocid në Kosovë dhe se UÇK-ja ka luftuar kundër planeve dhe veprimeve gjenocidale, duke mbrojtur popullin shqiptar. Sipas kësaj partie, kërkesa për dënime prej 45 vjetësh për secilin nga ish-krerët e UÇK-së paraqet një ndërhyrje politike në interpretimin e historisë dhe përpjekje për ta zhvendosur vëmendjen nga agresori te viktima.
LVV shton se përpjekjet për ta paraqitur UÇK-në si ndërmarrje kriminale synojnë kriminalizimin e luftës çlirimtare dhe depolitizimin e saj, duke e reduktuar në çështje penale individuale. Sipas tyre, krimet kundër njerëzimit kërkojnë aparat shtetëror dhe mekanizma sistematikë dhune, të cilat UÇK-ja nuk i ka pasur asnjëherë.
Partia ka theksuar se drejtësia ndërkombëtare historikisht ka ndëshkuar aparate shtetërore dhe udhëheqje politike e ushtarake që kanë ushtruar dhunë sistematike, duke përmendur raste nga tribunale dhe gjykata ndërkombëtare. Sipas reagimit, barazimi i luftës çlirimtare me krimet e regjimeve gjenocidale përbën shtrembërim të historisë dhe relativizim të agresionit serb.
Vetëvendosje ka kritikuar gjithashtu Gjykatën Speciale, duke thënë se ajo është produkt i presioneve politike dhe interesave gjeopolitike, dhe se drejtësia nuk mund të jetë selektive dhe e njëanshme. Sipas tyre, një drejtësi e tillë nuk shëron plagët, por i thellon ato.
Në fund, Lëvizja Vetëvendosje ka theksuar se çlirimi nuk është krim dhe se historia e Kosovës nuk mund të rishkruhet përmes aktakuzave që, sipas tyre, i shërbejnë narrativës së agresorit, duke shtuar se drejtësia e vërtetë kërkon njohjen e legjitimitetit të luftës për liri dhe identifikimin e pushtetit të dhunës gjenocidale. /Telegrafi/
Një rast i dhunës fizike brenda ambienteve të shkollës “Pavarësia” në Prishtinë është bërë publik përmes pamjeve që ka siguruar Kallxo.com, ku shihet një mësimdhënës duke goditur një nxënës.
Ndërkohë, drejtori i shkollës “Pavarësia”, Halil Bruhaje, e ka konfirmuar ekzistencën e rastit më 9 shkurt 2026 përmes telefonit, duke theksuar se në momentin e incidentit nuk ka qenë prezent në shkollë.
Lidhur me këtë rast, Telegrafi ka kontaktuar Policinë e Kosovës për Rajonin e Prishtinës dhe është në pritje të një përgjigjeje zyrtare nëse rasti është duke u trajtuar dhe cilat janë veprimet e ndërmarra.
Po ashtu, janë kontaktuar edhe Drejtoria Komunale e Arsimit në Prishtinë dhe Ministria e Arsimit për të marrë qëndrime zyrtare lidhur me rastin, ndërsa përgjigjet e tyre priten.
Telegrafi do t’iu mbajë të informuar për zhvillimet e mëtejshme, sapo të ketë konfirmime zyrtare nga institucionet përkatëse. /Telegrafi/
Komuna e Hanit të Elezit, përmes Drejtorisë Komunale për Arsim, ka shpallur Thirrje Publike për ndarjen e bursave për studentë për vitin akademik 2025/2026.
Të drejtë aplikimi kanë studentët që janë banorë të Komunës së Hanit të Elezit dhe ndjekin studimet në universitetet publike të Kosovës apo në Universitetin Publik të Maqedonisë së Veriut. Aplikimi është i hapur për studentë të rregullt, të regjistruar për herë të parë në vitin akademik, të cilët nuk e kanë përsëritur vitin dhe nuk janë përfitues të bursave nga fakulteti apo nga institucione të tjera.
Prioritet në përfitimin e bursave do t’u jepet studentëve të regjistruar në fakultetet deficitare, si: Fakulteti i Mjekësisë, Ndërtimtarisë dhe Arkitekturës, Inxhinierisë Elektrike dhe Kompjuterike, Edukimit, Inxhinierisë Mekanike, Bujqësisë dhe Veterinarisë, Xehetarisë dhe Metalurgjisë, Shkencave Matematiko-Natyrore, Arteve si dhe Fakultetit Filologjik (Gjuhë Angleze dhe Gjermane).
Aplikantët duhet të dorëzojnë dokumentacionin e kërkuar, i cili përfshin certifikata akademike, dëshmi regjistrimi, dokumente personale, dëshmi të suksesit, si dhe dokumente shtesë për studentët që i përkasin kategorive sociale apo atyre me status të veçantë.
Aplikimet dorëzohen në Qendrën për Shërbim me Qytetarë të Komunës së Hanit të Elezit, çdo ditë pune nga ora 08:00 deri në 16:00. Afati për aplikim është 15 ditë, duke filluar nga 10 shkurt 2026 deri më 24 shkurt 2026.
Komuna njofton se, në rast se nuk plotësohet numri i studentëve sipas kritereve të përcaktuara, bursat do t’u ndahen edhe studentëve të vitit të dytë apo më lartë. Po ashtu, aplikacionet e paplota ose me të dhëna të pasakta nuk do të shqyrtohen nga komisioni vlerësues.
Për më shumë informata, studentët e interesuar mund të drejtohen pranë Drejtorisë Komunale për Arsim në Han të Elezit. /Telegrafi/
Komuna e Pejës ka hapur dy pika të reja të shërbimeve emergjente shëndetësore në Bogë të Rugovës dhe në Vitomiricë, duke zgjeruar rrjetin e kujdesit emergjent dhe duke e afruar ndihmën mjekësore më pranë qytetarëve.
Në ceremoninë e hapjes morën pjesë kryetari i Komunës së Pejës, Gazmend Muhaxheri, dhe drejtori për Shëndetësi, Petrit Loci. Sipas komunës, këto njësi do të kontribuojnë në rritjen e sigurisë shëndetësore dhe përmirësimin e reagimit emergjent në zonat urbane dhe rurale.
Njësia e Urgjencës në Bogë do t’u shërbejë banorëve të zonës së Rugovës dhe fshatrave përreth, duke mundësuar ndërhyrje të shpejtë mjekësore në një rajon me qasje më të vështirë, veçanërisht gjatë sezonit dimëror dhe fluksit turistik. Shërbimet në këtë njësi do të ofrohen shtatë ditë në javë, nga ora 08:00 deri në ora 18:00.
Ndërkohë, pika e Urgjencës në Vitomiricë do të mbulojë një numër të madh vendbanimesh, përfshirë Vitomiricën, Ozdrimin, Dubovën, Novosellën, Jabllanicën, Radavcin, Katundin e Ri, Treboviqin, Nabërgjanin, Ruhotin, Lutogllavën dhe Trestenikun. Kjo njësi do të ofrojë shërbime shtatë ditë në javë, nga ora 07:00 deri në ora 19:00.
Komuna bën të ditur se të dyja njësitë janë të pajisura me staf shëndetësor profesional dhe infrastrukturë adekuate për ofrimin e ndihmës së parë, stabilizimin e pacientëve dhe referimin e tyre në institucionet përkatëse shëndetësore.
Hapja e këtyre pikave të reja të Urgjencës është pjesë e angazhimit të vazhdueshëm të Komunës së Pejës për përmirësimin e shërbimeve publike, me fokus të veçantë në shëndetin dhe sigurinë e qytetarëve. Komuna thekson se do të vazhdojë investimet në shërbime të qëndrueshme dhe cilësore, me synim garantimin e qasjes së barabartë në kujdes shëndetësor për të gjitha komunitetet. /Telegrafi/
Drejtoria për Inspektorat në komunën e Fushë Kosovës njofton se aksioni për lirimin e hapësirave publike po vazhdon në terren, me qëllim garantimin e rendit, sigurisë dhe shfrytëzimit të barabartë të tyre nga të gjithë qytetarët.
Inspektorët komunalë po ndërhyjnë për largimin e pengesave, uzurpimeve dhe vendosjeve pa leje që pengojnë qarkullimin dhe përdorimin normal të hapësirave të përbashkëta.
Sipas Drejtorisë, hapësirat publike janë pronë e përbashkët dhe duhet të jenë të lira, funksionale dhe të qasshme për të gjithë, pa përjashtim.
Drejtoria e Inspektoratit thekson se aksioni do të vazhdojë edhe në ditët e ardhshme, duke vepruar në përputhje me ligjin dhe duke ruajtur interesin e komunitetit.
Njëkohësisht, qytetarët dhe bizneset ftohen të respektojnë rregullat dhe të mos vendosin pengesa apo struktura pa autorizim në hapësirat publike, në mënyrë që të ruhet qarkullimi dhe funksionaliteti i tyre për të gjithë. /Telegrafi/
KRU “Gjakova” ka njoftuar qytetarët se më 10 shkurt 2026 (e martë) do të ketë ndërprerje të përkohshme të furnizimit me ujë të pijshëm në disa fshatra të komunës së Gjakovës.
Fshatrat që do të preken nga ndërprerja janë Palabardhë, Dobrigjë, Novosellë e Ulët, Bitesh, Dujakë dhe Hereq.
Ndërprerja do të zgjasë nga ora 12:00 deri në 15:00 dhe është e nevojshme për shkak të dislokimit të një gypi kryesor të ujësjellësit në fshatin Palabardhë, që kërkon ndërhyrje dhe riparim të menjëhershëm për të siguruar furnizim të vazhdueshëm dhe cilësor me ujë.
KRU “Gjakova” apelon tek të gjithë qytetarët që të planifikojnë përdorimin e ujit gjatë kësaj periudhe dhe të kenë kujdes në menaxhimin e tij.
Kompania siguron se punimet do të kryhen me prioritet dhe se furnizimi me ujë do të rikthehet menjëherë pas përfundimit të riparimeve.
Për më tepër, KRU “Gjakova” falënderon qytetarët për mirëkuptimin dhe durimin dhe rikujton se ndërprerjet e tilla janë të domosdoshme për mirëmbajtjen dhe sigurinë e rrjetit të ujësjellësit.
Qytetarët do të informohen për çdo ndryshim të mundshëm të kohës së ndërprerjes përmes kanaleve zyrtare të komunikimit. /Telegrafi/
Gjatë dy ditëve të fundjavës, si edhe paraditen e së hënës, janë rrënuar dhe larguar 6 barakat që për një kohë të gjatë ishin pengesë dhe imazh i keq për Klinikën e Pulmologjisë në QKUK.
Objektet e montuara që ishin uzurpuar e keqpërdorur ndodheshin pranë spitalit që i trajton sëmundjet e mushkërive.
E për këta pacientë dhe stafin që i trajton, gjendja ishte bërë edhe më e rënduar, meqë një hapësirë e kësaj zone ishte shndërruar në deponi mbeturinash, raporton KosovaPress.
Por, edhe këto të fundit, që ishin rreth 1 mijë metra-kub, u larguan dhe zona u pastrua plotësisht.
Ndërsa gjithë kjo punë u krye në baza vullnetare e falas nga kompania Ego-Elsa sh.p.k.
Njësitet policore kanë identifikuar dhe intervistuar personin që më 4 shkurt 2026 shkaktoi një aksident trafiku në rrugën magjistrale Shtime–Lipjan, në fshatin Davidovc, dhe u largua nga vendi i ngjarjes.
Aksidenti ndodhi rreth orës 18:25, ndërmjet një automjeti dhe një këmbësori, një mashkulli 46-vjeçar, i cili fillimisht mori ndihmë mjekësore në Qendrën e Mjekësisë Familjare në Shtime, më pas u transferua në Qendrën Emergjente në Ferizaj dhe më vonë në Qendrën Klinike Universitare të Kosovës. I lënduari është liruar dhe aktualisht ndodhet jashtë rrezikut për jetë.
Në vendin e ngjarjes menjëherë kanë dalë patrullat e Stacionit Policor Shtime, Njësia e Komunikacionit Rrugor dhe hetuesit e aksidenteve, ndërsa për identifikimin e shoferit janë angazhuar edhe hetuesit nga Sektori Rajonal i Hetimeve.
Pas një pune intensive hetimore dhe analizimit të pamjeve nga kamerat e sigurisë, më 8 shkurt 2026, rreth orës 18:30, u identifikua shoferi dhe automjeti i dyshuar: A.A., 41 vjeç, me automjet VW Golf, ngjyrë e zezë, me targa vendore.
Më 9 shkurt 2026, i dyshuari është intervistuar nga hetuesit policorë dhe me vendim të prokurorit të shtetit është liruar në procedurë të rregullt, ndërkohë që hetimet për veprën penale “Shkaktim i aksidentit të trafikut me lëndime trupore” vazhdojnë. /Telegrafi/
Njësitet e Stacionit Policor Veriu në Prishtinë kanë arrestuar tre persona të dyshuar për vjedhje të rëndë, pas një pune intensive hetimore dhe operacionale.
Rasti kishte ndodhur më 2 shkurt 2026 në fshatin Marec të Prishtinës, ndërsa arrestimi i personave të dyshuar është realizuar më 7 shkurt 2026.
Sipas Policisë së Kosovës, personat e arrestuar janë dërguar në mbajtje me vendim të prokurorit të shtetit, ndërsa hetuesit po vazhdojnë të kryejnë të gjitha veprimet hetimore dhe procedurale të nevojshme për zbardhjen e plotë të rastit. /Telegrafi/
Banorët e lagjes “Kodra e Trimave” në Prishtinë kanë ngritur shqetësimin për mungesën dhe reduktimet e vazhdueshme të ujit të pijshëm, problem që, sipas tyre, po vazhdon prej disa muajsh dhe po vështirëson jetën e përditshme në këtë zonë.
Në disa ankesa që ka pranuar Telegrafi, banorët theksojnë se uji është një nevojë jetike, e domosdoshme për çdo aktivitet ditor, dhe mungesa e tij po ndikon drejtpërdrejt si në familjet rezidente ashtu edhe në bizneset që veprojnë në lagje.
Ata kërkojnë që çështja të trajtohet me prioritet dhe të bëhet rregullimi i furnizimit me ujë të pijshëm, duke siguruar qasje të pandërprerë 24 orë në ditë.
Sipas tyre, ky problem nuk është i izoluar vetëm në “Kodrën e Trimave”, por është i pranishëm edhe në lagje dhe fshatra të tjera të Kryeqytetit.
Lidhur me këtë situatë, Telegrafi ka kontaktuar edhe me zëdhënësen e KRU Prishtina, Arjeta Mjeku, e cila ka sqaruar se aktualisht kompania është duke operuar me kapacitet të reduktuar.
“Për shkak të turbullirave, aktualisht jemi duke operuar me kapacitet minimal. Ekipet tona janë duke monitoruar situatën dhe po punojnë për stabilizimin e saj, me qëllim rikthimin e funksionimit normal në kohën më të shkurtër të mundshme”, tha Mjeku.
Ajo ka shtuar se gjendja është shkaktuar si pasojë e vërshimeve dhe rritjes së shpejtë të nivelit të ujit në liqene.
“Ka ende turbullirë, çka po ndikon drejtpërdrejt në procesin e furnizimit”, ka theksuar zëdhënësja e KRU Prishtina.
Ndërkohë, banorët shprehen në pritje të një zgjidhjeje sa më të shpejtë, duke kërkuar ndërhyrje konkrete për stabilizimin e furnizimit me ujë të pijshëm. /Telegrafi/
KRU “Hidromorava” njofton qytetarët dhe konsumatorët në zonat Berivojcë dhe Lagjja Iliria të qytetit të Kamenicës se furnizimi me ujë të pijshëm është ndërprerë për shkak të mungesës së energjisë elektrike nga KEDS-i.
Sipas njoftimit të KRU “Hidromorava”, ndërprerja është e pamundur të shmanget deri në ripërtëritjen e energjisë elektrike, çka ndikon drejtpërdrejt në punën e pompave të ujit dhe furnizimin normal të qytetarëve.
Kompania apelon tek konsumatorët për mirëkuptim dhe kujdes gjatë kësaj periudhe dhe siguron se do të ndërmerren të gjitha masat e nevojshme për të rikthyer furnizimin me ujë sa më shpejt të jetë e mundur.
Qytetarët do të njoftohen menjëherë pas normalizimit të situatës. /Telegrafi/
Drejtoria për Bujqësi në Rahovec njofton të gjithë fermerët se afati për aplikim për gjashtmujorin e dytë të Programit të Pagesave Direkte (PPD) 2025 është shtyrë deri më 18 shkurt 2026, ora 16:00, duke lënë edhe 7 ditë pune për aplikime.
Në këtë thirrje mund të aplikohen për:
Pagesën Direkte për qumësht sipas kategorive të cilësisë
Pagesën Direkte për therjet e raportuara të gjedhit
Pagesën Direkte për akuakulturë
Pagesën Direkte për viçat për majmëri
Pagesën Direkte për zogj për majmëri (brojlerë)
Ministria e Bujqësisë, Pylltarisë dhe Zhvillimit Rural, përmes Agjencionit për Zhvillimin e Bujqësisë, do të vazhdojë të mbështesë sektorin e blegtorisë përmes këtyre pagesave direkte, sipas Programit të Pagesave Direkte për vitin 2025. /Telegrafi/
Prokuroria Themelore në Prishtinë, përmes Departamentit për Krime të Rënda, njofton se në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsion, ka nisur nga dita e sotme intervistimi i anëtarëve në Qendrën e Numërimit dhe Rezultateve (QNR) për komunën e Drenasit.
Veprimet po kryhen pas autorizimit nga Prokuroria dhe në kuadër të hetimeve intensive, lidhur me dyshimet për keqpërdorime gjatë procesit të numërimit të votave të kandidateve të subjekteve politike.
Prokuroria Themelore në Prishtinë, në koordinim me Policinë e Kosovës, po ndërmerr të gjitha veprimet ligjore dhe hetimore me qëllim të zbardhjes së plotë të rrethanave që lidhen me rastin.
Opinionit publik do t’i bëhet i ditur çdo zhvillim i mëtejshëm në këtë proces nga ana e Prokurorisë. /Telegrafi/
Komandanti i Forcës së Sigurisë së Kosovës, gjenerallejtënant Bashkim Jashari, ka pritur në takim pjesëtarët e Njësisë së Kërkim-Shpëtimit të Regjimentit të Mbrojtjes Civile të Gardës Kombëtare të FSK-së, të cilët kanë qenë të angazhuar në operacionin humanitar të kërkim-shpëtimit në Klos të Republikës së Shqipërisë.
Gjatë takimit, gjenerallejtënant Jashari ka falënderuar pjesëtarët e FSK-së për angazhimin e tyre në këtë mision humanitar, duke vlerësuar profesionalizmin dhe përkushtimin e treguar në kushte të vështira dimërore.
Ai i ka përgëzuar për përfundimin me sukses të operacionit dhe kontributin e dhënë në mbështetje të autoriteteve shqiptare.
Në kuadër të këtij takimi, komandanti i FSK-së ka dekoruar pjesëtarët e angazhuar në operacion me medaljen “Shërbim Vetëmohues”, ndërsa njësia përkatëse është nderuar me mirënjohje institucionale.
Forca e Sigurisë së Kosovës ka ritheksuar përkushtimin e saj për forcimin e bashkëpunimit rajonal dhe për ngritjen e vazhdueshme të kapaciteteve profesionale, duke dëshmuar gatishmëri për angazhim në misione humanitare brenda dhe jashtë territorit të Republikës së Kosovës. /Telegrafi/
Banorë të fshatit Shkozë kanë raportuar përkeqësim të gjendjes mjedisore në lokalitetin e quajtur Karma, i cili, sipas tyre, po shndërrohet gradualisht në një deponi ilegale mbeturinash, raporton Telegrafi.
Sipas reagimit të një banori të fshatit, hedhja e mbeturinave në këtë zonë po ndodh në mënyrë të vazhdueshme, duke cenuar ambientin natyror dhe shëndetin publik.
Ai ka theksuar se një praktikë e tillë nuk ka qenë karakteristike për komunitetin lokal dhe ka rikujtuar se hedhja e mbeturinave në natyrë është e ndaluar me ligjet e Kosovës, ndërsa shkelësit mund të ndëshkohen sipas legjislacionit në fuqi.
Në reagim është shprehur gjithashtu shqetësim për mungesën e reagimit nga Kryesia e fshatit, në veçanti nga kryetari i fshatit, për këtë problematikë.
Banori ka bërë të ditur se gjendja është raportuar edhe te Inspektorati i Komunës së Malishevës dhe se personat që vazhdojnë hedhjen e mbeturinave do të mbahen përgjegjës.
Ai ka apeluar për kujdes të shtuar nga qytetarët dhe për mbrojtjen e mjedisit për hir të brezave të rinj, duke ofruar edhe ndihmë financiare për persona që, për shkak të vështirësive ekonomike, nuk kanë mundësi t’i dërgojnë mbeturinat në vendet e dedikuara.
Rasti tregon nevojën për reagim institucional dhe bashkëpunim të komunitetit lokal për të parandaluar degradimin e mjedisit dhe për të garantuar një ambient të pastër dhe të sigurt për banorët. /Telegrafi/
Kompania Rajonale e Ujësjellësit Mitrovica ka njoftuar se ekipet e mirëmbajtjes do të realizojnë punime të planifikuara në rrjetin e ujësjellësit dhe kanalizimit në disa lokacione të qytetit dhe fshatrave përreth.
Sipas njoftimit, punimet në rrjetin e ujësjellësit do të zhvillohen në rrugët Enver Haliti, Ferki Aliu dhe Nuredin Hajzeri, si dhe në fshatrat Lushtë, Vërnicë dhe Kqiç.
Ndërkohë, punime në rrjetin e kanalizimit do të realizohen në rrugën Isa Boletini, në rrugën Aradha 142 dhe në fshatin Shupkofc.
KRU Mitrovica ka bërë të ditur se gjatë realizimit të punimeve në rrjetin e ujësjellësit, furnizimi me ujë të pijshëm në zonat e përfshira mund të ndërpritet përkohësisht, duke u kërkuar konsumatorëve mirëkuptim dhe bashkëpunim.
Kompania ka falënderuar qytetarët për mirëkuptimin dhe ka theksuar se punimet po realizohen me qëllim të përmirësimit të shërbimeve dhe funksionimit të rrjetit. /Telegrafi/
Policia Rajonale e Ferizajt ka intensifikuar aktivitetet për rritjen e sigurisë në komunikacionin rrugor, duke shqiptuar një numër të konsiderueshëm gjobash dhe duke regjistruar dhjetëra aksidente gjatë javës së kaluar.
Sipas komunikatës për media, gjatë periudhës 2–8 shkurt 2026 janë shqiptuar gjithsej 1.567 gjoba kundërvajtëse, ndërsa 21 patentë shoferë janë pezulluar ndaj drejtuesve të mjeteve që kanë kryer shkelje të rënda në trafik.
Gjatë kësaj periudhe janë regjistruar gjithsej 35 aksidente trafiku, prej të cilave 12 aksidente me lëndime, ku janë lënduar 15 persona, si dhe 23 aksidente me dëme materiale.
Policia Rajonale e Ferizajt ka bërë të ditur se do të vazhdojë me aktivitete të shtuara parandaluese dhe u ka bërë thirrje të gjithë shoferëve që të respektojnë rregullat e komunikacionit dhe të tregojnë kujdes të shtuar gjatë drejtimit të mjeteve.
Po ashtu, qytetarët janë ftuar të bashkëpunojnë me policinë dhe të raportojnë çdo kundërvajtje në trafik përmes stacionit më të afërt policor, aplikacionit digjital Lajmëro policinë dhe numrit kujdestar 192. /Telegrafi/
Login
