PRISHTINË, 9 janar /ATSH/ Drejtori i Shërbimit Korrektues të Kosovës, Ismail Dibrani thotë se në vjeshtën e vitit 2027 do të pranohen të burgosurit e parë nga shteti danez.

Ai njofton se ka filluar trajnimi i grupit të parë të stafit me rregulla të sistemit të burgjeve në Danimarkë. Në intervistën për KosovaPress, ai thekson se nuk kanë interes për marrëveshje me shtete të tjera për transferimin e të burgosurve në Kosovë. Ai gjithashtu flet për rastet e parandalimit të kontrabandës brenda burgjeve, por edhe përfshirjen e zyrtarëve korrektues në këto raste.

Në këtë intervistë, drejtori Ismail Dibrani thekson se drejtor i burgut në Gjilan do të jetë Rasim Selmani, po ashtu njofton se është zgjedhur edhe guvernatori nga shteti danez.

“Është vjeshta e vitit 2027 kur do të pranohen të burgosurit e parë nga shteti danez. Kështu që atje janë duke bashkëpunuar ngushtë grupet teknike të dy shteteve, sepse janë të themeluara dy komitete drejtuese nga shteti i Kosovës dhe shteti i Danimarkës, të cilët janë duke hartuar planet se si do të funksionojë ky burg. Ka filluar trajnimi i stafit, sepse ju e dini që atje do të respektohet rendi shtëpiak danez, ka filluar trajnimi i grupit të parë… Shumica e stafit që do të punojnë në këtë burg do të trajnohet në Danimarkë sipas rregullave dhe sistemit danez të burgjeve. Përveç aspektit të përfitimit të praktikave më të mira të sistemit danez, ne do të kemi mundësi që këto praktika t’i implementojmë edhe në burgje të tjera, ato praktika që janë edhe në përputhje me legjislacionin tonë”, deklaron ai.

Dibrani thotë se në këtë burg nuk do të vendosen të burgosur me rrezikshmëri shumë të lartë, persona të dënuar për terrorizëm apo të burgosur me probleme të rënda të shëndetit mendor.

KosovaPress mëson se edhe Belgjika, Franca dhe Britania e Madhe kanë bërë kërkesë për marrëveshje për transferimin e të burgosurve në Kosovë.

Megjithatë, Dibrani shpreh kundërshtinë e tij, duke thënë se “nuk do të ishte e rrugës që në këtë situatë ta ngarkojmë vetën”.

“Si Shërbim Korrektues nuk kemi interes që të lidhim marrëveshje të tjera për shumë arsye. Po, ka pasur shumë kërkesa prej shumë shteteve të Bashkimit Evropian, por që rekomandimi i Shërbimit Korrektues të Kosovës do të jetë jo marrëveshje të reja sepse kemi mjaft punë për të bërë me këto institucione, me këta të burgosur që kemi të shtetasve tanë. Dhe nuk do të ishte e rrugës që në këtë situatë ta ngarkojmë vetën edhe me të burgosur të shteteve të tjera”, shton ai.

Buxheti i vitit të ardhshëm parasheh rreth tetë milionë euro për investime kapitale për Shërbim Korrektues të Kosovës.

Drejtori i ShKK-së, Ismail Dibrani thotë se kanë planifikuar ndërtimin e burgut të Lipjanit dhe Qendrës Korrektuese në Prizren.

Në anën tjetër, Dibrani bën të ditur se gjatë tri viteve të fundit janë regjistruar mbi 600 raste të parandalimit të kontrabandës brenda institucioneve korrektuese.

Të burgosurit përdorin metoda të ndryshme për futjen e kontrabandës, përfshirë përmes familjarëve, trupit, ushqimit, por edhe mjeteve më të sofistikuara si dronët.

Në disa raste ndihmohen edhe nga zyrtarë korrektues, por sipas Dibranit këto raste janë në ulje.

Shërbimi Korrektues i Kosovës gjatë vitit të kaluar është vlerësuar me Çmimin Ndërkombëtar të Ekselencës nga Organizata Ndërkombëtare e Burgjeve dhe Shërbimeve Korrektuese (ICPA), për projektin “Rehabilitimi Gjithëpërfshirës dhe Kujdesi Shëndetësor”.

Dibrani thotë se të burgosurit po përfshihen në programe rehabilituese, të cilat ndikojnë risocializimin e tyre.

Në gjitha qendrat korrektuese në Kosovë janë mbi 1750 të burgosur, prej tyre janë 1100 të dënuar dhe 600 të paraburgosur. Ndërkaq, kapaciteti në të gjitha burgjet e Kosovës është 2200 shtretër.

/Kosovapress/

The post Marrëveshja Danimarkë – Kosovë për të burgosurit, transferimet e para në 2027 appeared first on Agjencia Telegrafike Shqiptare.

TIRANË, 9 janar/ATSH/ Kryeministri Edi Rama njoftoi sot se niveli i ujit në lumin Vjosë ka rënë ndjeshëm.

Pas përmbytjeve të një dite më parë, që prekën zonat përreth lumit Vjosë, Rama bëri të ditur se ka nisur edhe procesi i verifikimit të dëmeve.

“Ka filluar procesi i verifikimit të dëmeve në të gjithë zonën, ndërsa strukturat përkatëse mbeten në gatishmëri dhe në shërbim të plotë të të gjithë banorëve për çdo nevojë apo emergjencë”, theksoi Rama.

Lidhur me situatën, Kreu i qeverisë ka thirrur mbledhjen e Komitetit Ndërministror të Emergjencave Civile, me qëllim adresimin e problematikës së përmbytjeve në mbarë vendin. Pjesë e kësaj mbledhjeje do të jenë ministritë e linjës, përgjegjëse për menaxhimin e situatës.

Prej disa ditësh, vendi është përfshirë nga reshje intensive shiu, të cilat kanë shkaktuar problematika në disa qarqe, ku më të prekurat janë Shkodra, Lezha, Durrësi, Fieri dhe Vlora.
Një ditë më parë, Ministria e Mbrojtjes urdhëroi evakuimin e disa fshatrave në qarqet Durrës, Fier dhe Vlorë.

/a.f/

The post Rama: Bie niveli i Vjosës, nis verifikimi i dëmeve appeared first on Agjencia Telegrafike Shqiptare.

PRISHTINË, 9 janar/ATSH/ Në Qendrën e Numërimit dhe Rezultateve është përmbyllur numërimi i pjesës së fundit të fletëvotimeve nga votimi me postë, jashtë Kosovës, ka bërë të ditur zëdhënësi i Komisionit Qendror të Zgjedhjeve, Valmir Elezi.

“Numërimi i këtyre fletëvotimeve shënon përfundimin e procesit të numërimit të të gjitha fletëvotimeve nga zgjedhjet e parakohshme për Kuvendin e Republikës së Kosovës, të mbajtura më 28 dhjetor 2025”, ka thënë Elezi për KosovaPress.

Sipas tij, KQZ është e gatshme për të shpallë rezultatin përfundimtar, por duhet pritur nëse do të ketë ndonjë ankesë në PZAP.

“Me përfundimin e numërimit të këtyre fletëvotimeve, KQZ është e gatshme për të shpallur rezultatin përfundimtar të zgjedhjeve të parakohshme të mbajtura më 28 dhjetor. Por, sipas Ligjit për Zgjedhjet e Përgjithshme, palët mund të parashtrojnë ndonjë ankesë në PZAP lidhur me administrimin e numërimit në QNR brenda 48 orëve nga ndodhja e shkeljes së supozuar”, tha Elezi.

Në zgjedhjet e parakohshme për Kuvendin e Kosovës, Lëvizja Vetëvendosje mori 51.11 për qind të votave dhe do të ketë 57 vende në Kuvendin e Kosovës, PDK 20.19 për qind dhe do të ketë 22 vende, LDK 13.23 për qind (15 vende) dhe AAK 5.5 për qind (6 vende). Ndërkaq, partitë minoritare i kanë 20 vende në Kuvendin e Kosovës.

/KosovaPress/

The post Përfundon numërimi i të gjitha votave në Kosovë appeared first on Agjencia Telegrafike Shqiptare.

PRISHTINË, 8 janar /ATSH/ Reshjet e borës që kanë përfshirë Kosovën, kanë vështirësuar qarkullimin rrugor, ndërsa autoritetet përgjegjëse sigurojnë se rrugët nacionale dhe rajonale po mirëmbahen dhe mbeten të kalueshme.

Megjithatë, ekspertët e komunikacionit vlerësojnë se kapacitetet institucionale ende nuk arrijnë të mbulojnë të gjitha rrugët, veçanërisht ato të kategorive më të ulëta.

Ushtruesi i detyrës së ministrit të Infrastrukturës, Hysen Durmishi, deklaron për KosovaPress, se pastrimi i rrugëve nacionale, rajonale dhe autostradave po bëhet vazhdimisht nga operatorët ekonomikë të angazhuar, ndërsa ka sqaruar se trotuaret nuk janë përgjegjësi e nivelit qendror.

Sipas tij, aktualisht janë të angazhuar 19 operatorë ekonomikë që po veprojnë në të gjithë territorin e Kosovës, duke pastruar borën dhe duke hedhur kripë për të siguruar qarkullim të sigurt.

“Trotuaret nuk janë punë e jona, punë e jona janë rrugët. Rrugët jemi duke i pastruar, i kemi 19 operatorë ekonomikë që janë në të gjitha rrugët rajonale, në të gjitha rrugët nacionale, autostradë, duke pastruar, duke hedhur kripë e gjëra tjera, vazhdimisht 24 orë pandërprerë janë në terren. Është e pamundur mos me i taku në rrugë, në cilëndo rrugë që shkon në Kosovë, përveç rrugëve lokale që është përgjegjësi e komunave”, thotë Durmishi.

Ndërsa, eksperti i komunikacionit, Visar Baxhuku thekson se reshjet e mëdha dhe ulja e temperaturave kanë rritur vështirësitë në qarkullim për automjete dhe këmbësorë.

Mirëpo, siç thotë ai, “kapacitetet institucionale nuk po arrijnë që të gjitha rrugët, dhe kategoritë e rrugëve edhe më të ulëta”.

“Me ndryshimet klimatike të paraqitura që para dy dite me reshje të mëdha, e sidomos me uljen e temperaturave në ditën e sotme janë rritur vështirësitë në qarkullim për automjete dhe këmbësore ne pjesën e lëvizjeve në trotuar. Gjithë drejtuesit që kanë mundësi të shmangin udhëtimet në këto situata është e rekomandueshme të minimizojnë këto udhëtime. Por, në raste kur nuk mund të minimizojnë kujdesi duhet të jetë në nivel shumë të lartë.

Këto janë vështirësi periodike që paraqiten që çdo periudhe të viteve, por sërish kapacitetet institucionale nuk po arrijnë që të gjitha rrugët, dhe kategoritë e rrugëve edhe më të ulëta, përveç autostradave dhe nacionale të jenë në nivel të kënaqshëm të mirëmbajtës me qëllim të zhvillimit të trafikut të sigurte”, thotë Buxhuku.

Sot në vendin tonë po mban mot i ftohtë dhe me mundësi për reshje bore.

Sipas Institutit Hidrometeorologjik të Kosovës (IHMK) temperaturat minimale do të lëvizin nda -5 deri -2 gradë Celsius, ndërsa maksimalet mes -1 dhe 1 gradë Celsius.

E rënia e temperaturave, veçanërisht pas reshjeve të mëdha të shiut ditët e fundit, ka bërë që institucionet të apelojnë qytetarët për kujdes.

Thirrje për kujdes të shtuar në trafik ka bërë Policia e Kosovës, për shkak të rrezikut të ngricave të mundshme në rrugë.

/KosovaPress/

The post Bora vështirëson qarkullimin në Kosovë, akset kryesore po mirëmbahen appeared first on Agjencia Telegrafike Shqiptare.

PRISHTINË, 8 janar /ATSH/ Nga ora 2 e mesnatës deri më tani janë evakuuar gjithsej 15 familje nga lagjja “2 Korriku” në Mitrovicë, ka bërë të ditur Komandanti i Brigadës së Zjarrfikësve në Mitrovicë të Jugut, Burim Ibishi.

Ibishi ka bërë të ditur për KososvaPress se, si pasojë e përmbytjeve situata në këtë pjesë të qytetit nuk është e mirë, pasi uji ka përfshirë pothuajse tërë zonën.

Sipas Ibishit, ekipet në terren po përballen edhe me vështirësi shtesë, pasi disa banorë po refuzojnë evakuimin.

“Disa banorë po dalin, disa jo. Kjo po na krijon problem dhe po kërkon organizim të kujdestarisë. Gjendja nuk është e mirë, por nuk mund të them se është diçka jashtëzakonisht alarmante”, tha Ibishi.

Ai ka shtuar se për momentin ujërat janë ende brenda shtretërve të tyre dhe nuk kanë dalë jashtë, por lagjet “2 Korriku” dhe “Lisica” mbeten më problematiket, ku zjarrfikësit po përballen me më së shumti telashe dhe po qëndrojnë në gatishmëri të vazhdueshme.

/Kosovapress/

The post Evakuohen 15 familje në Mitrovicë appeared first on Agjencia Telegrafike Shqiptare.

PRISHTINË, 8 janar /ATSH/ Policia, ekipet e shpëtimit dhe emergjencat Civile në Mitrovicë kanë shpëtuar sot në mëngjes dy familje që kishin mbetur të ngujuara për shkak të përmbytjeve në lagjen “2 Korriku”.

Sipas raportimeve të KosovaPress, në vijim po vazhdon puna për shpëtimin edhe të një familjeje tjetër, teksa gjatë natës strukturat e emergjencave u erdhën nëndihmë edhe dy familjeve të tjera, të cilat janë dërguar në një vend të sigurt.

Operacionin e shpëtimit të tyre mëngjesin e sotëm e ka ndjekur nga afër edhe kryetari i komunës, Faton Peci.

/Kosovapress/

The post Evakuohen pesë familje të ngujuara nga përmbytjet në Mitrovicë appeared first on Agjencia Telegrafike Shqiptare.

PRISHTINË, 7 janar /ATSH/ Për herë të parë gjatë vitit 2025, në Klinikën e Onkologjisë në Qendrën Klinike Universitare të Kosovës (QKUK) janë identifikuar shtatë meshkuj të prekur nga kanceri i gjirit, duke shënuar një rritje krahasuar me vitin 2024, kur ishin regjistruar vetëm dy raste të tilla. Ndërsa në total gjatë vitit që lamë pas, janë regjistruar rreth 2 mijë e 100 raste të reja të kancerit tek të rriturit, numër pothuajse i njëjtë me vitin 2024, çka sipas drejtuesve të Klinikës së Onkologjisë konsiderohet si trend i qëndrueshëm.

Drejtori i Klinikës së Onkologjisë në QKUK, Ilir Kurtishi, në intervistën për KosovaPress tregon se kanceri i gjirit vazhdon të mbetet lokalizimi më i shpeshtë, me mbi 460 raste te femrat, përveç rasteve të evidentuara te meshkujt.

Sipas tij, edhe gjatë vitit 2025 vazhdojnë të dominojnë tumoret e mushkërive, veçanërisht te meshkujt, të cilat kanë prekur mbi 270 pacientë. Po ashtu, numër i konsiderueshëm i rasteve vazhdon të regjistrohet edhe te tumoret e traktit digjestiv, ku përfshihen kanceri i ezofagut, lukthit, pankreasit, mëlçisë dhe zorrëve, me theks të veçantë në kancerin e zorrës së trashë, që në total kapin mbi 450 pacientë.

Ndërkaq, bën të ditur se fluksi i pacientëve mbetet i lartë çdo ditë.

“Vitin 2025 ne kemi evidentuar dhe regjistruar si raste të reja, në klinikën tonë, në kancer regjistri spitalor, përafërsisht numër të njëjtë të rasteve me vitin 2024, që është një shenjë e mirë. Deri tani kemi deri në 2100 raste të reja të të rriturve dhe me lokalizimet më të shpeshta sikurse 2024 me dominim të kancerit të gjirit, i cili ka atakuar më shumë se 460 femra dhe për herë të parë këtë vit e identifikojmë shtatë burra me kancer të gjirit, në 2024 dallim së paku dy persona.

Lokalizimet tjera mbesin në përqindje të njëjtë, me dominim të tumoreve të mushkërisë me nëngrupet e veta te meshkujt, e cila atakon më shumë se 270 pacientë, tumoret e tubit digjestiv ku përfshihen tumoret e ezofagut, lukthit, pankreasit, mëlçisë, zorrëve të holla të trasha dhe me dominim të zorrës së trashë me numrin më të madh të këtyre rasteve dhe në total kapin më shumë se 450 pacientë… Çdo ditë në Klinikën e Onkologjisë bëhen trajtime ekzaminime dhe takime grupore. Një ditë e zakonshme, Onkologjinë e gjen me së paku 250 shërbime. Në shërbimin në radioterapi 130 pacientë dhe tre deri katër rrezatohen.”

Klinika e Onkologjisë aktualisht nuk ka listë pritjeje për shërbimet që ofron, thekson ndër të tjera Ilir Kurtishi.

Në klinikë janë angazhuar tre specialistë të rinj të onkologjisë, të cilët pritet të lehtësojnë ngarkesën e punës, ndërsa mungesa e infermierëve vazhdon të mbetet një nga sfidat kryesore.

Pohon se gjatë vitit 2025 ka pasur mungesa të vogla dhe të përkohshme, të cilat sipas tij kanë qenë kryesisht pasojë e problemeve me operatorët ekonomikë dhe procedurat e tenderimit.

Sfidë, sipas tij, mbetet furnizimi me disa barna të imunoterapisë që duhet të sigurohen nga shteti.

“Gjatë vitit 2025 në krahasim me 2024 kur furnizimi ka qenë gati maksimal, këtë vit ka pasur periudha ku kemi pasur mungesa të vogla…”, thotë Kurtishi.

Në Klinikën e Onkologjisë ofrohet edhe shërbimi psikologjik për pacientët, ndonëse kapacitetet janë të kufizuara për shkak të fluksit të madh të rasteve.

Sipas Kurtishit, diagnostikimi i hershëm, skriningu i rregullt dhe rritja e vetëdijes së qytetarëve mbeten faktorë kyç në përmirësimin e mbijetesës dhe cilësisë së jetës së pacientëve me kancer, derisa nevojitet mbështetje e vazhdueshme institucionale për sigurimin e barnave inovative dhe shërbimeve mbështetëse, përfshirë edhe ato psikologjike.

/KosovaPress//r.e/

The post Shtatë meshkuj me kancer gjiri në Kosovë, mbi 2 mijë raste të reja në Onkologji gjatë 2025 appeared first on Agjencia Telegrafike Shqiptare.

TIRANË, 6 janar/ATSH/ Kryetari i Partisë Demokratike, Sali Berisha publikoi sot pamje nga Durrësi, ku reshjet e shiut kanë shkaktuar problematika në zona të banuara dhe akset kryesore rrugore.

Duke iu referuar situatës, Berisha shkruan: “Durrësi i Betonit apo Gjushit dhe Ramaduros!”, duke e cilësuar gjendjen si pasojë të drejtpërdrejtë të “betonizimit pa kriter dhe keqmenaxhimit të qytetit”.

Sipas Berishës, përmbytjet janë rezultat i politikave të dështuara urbanistike dhe mungesës së investimeve në infrastrukturë dhe sistemin e kanalizimeve, përgjegjësi që i atribuohen qeverisë dhe pushtetit lokal. Pamjet dëshmojnë edhe një herë se çdo episod reshjesh e kthen Durrësin në emergjencë, ndërsa qytetarët përballen me pasoja të përsëritura nga neglizhenca institucionale.

Berisha thekson se situata tregon nevojën për ndërhyrje emergjente në Durrës, që situata të tilla të mos përsëriten.

/a.f/r.e/

The post Berisha për situatën në Durrës: Pasojë e betonizimit nga Dako dhe Rama appeared first on Agjencia Telegrafike Shqiptare.

PRISHTINË, 6 janar /ATSH/ Komuna e Prishtinës ka paralajmëruar qytetarët për rrezik nga përmbytjet duke apeluar për kujdes të shtuar, pas reshjeve të shumta të shiut të regjistruara gjatë 24 orëve të fundit në kryeqytet.

Në njoftimin e Komunës së Prishtinës thuhet se si pasojë e reshjeve, qytetarët mund të hasin në vështirësi në qarkullimin rrugor, mbipopullim të kanalizimeve dhe ujërave atmosferikë, grumbullim të ujit në zona urbane dhe nënkalime, si dhe rrezik për rrëshqitje të ujit në zona urbane dhe nënkalime.

Bazuar në të dhënat e fundit nga Instituti Hidrometeorologjik i Kosovës, gjatë 24 orëve të fundit në kryeqytet janë regjistruar mbi 25 mm reshje shiu, ndërsa pritet që reshjet të vazhdojnë edhe në ditët në vijim me intensitet të ndryshueshëm.

“Institucionet përkatëse të kryeqytetit janë në gatishmëri të plotë për monitorimin e situatës dhe ndërhyrje sipas nevojës”, thuhet në komunikatë.

/KosovaPress//r.e/

The post ​Rreziku nga përmbytjet, Komuna e Prishtinës: Qytetarët të kenë kujdes të shtuar appeared first on Agjencia Telegrafike Shqiptare.

PRISHTINË, 5 janar /ATSH/ Dialogu ndërmjet Kosovës dhe Serbisë gjatë vitit 2025 ka mbetur i bllokuar, pa ndonjë progres të dukshëm, siç thonë njohësit e këtij procesi, për shkak të zhvillimeve të brendshme politike në të dyja vendet dhe mungesës së një angazhimi më të fuqishëm nga Bashkimi Evropian.

Mungesa e formimit të institucioneve në Kosovë dhe trazirat politike në Serbi, sipas tyre, kanë bërë që ky proces të ngecë. Ndërkohë i kërkohet Bashkimit Evropian që të adresojë disa parakushte ndaj Serbisë, si për përgjegjësit e saj për sulmin terrorist në Banjskë, e po ashtu lobimin intensiv kundër anëtarësimit të Kosovës në organizata ndërkombëtare.

Megjithatë, dialogu në nivel të kryenegociatorëve është zhvilluar, ku Besnik Bislimi dhe homologu i tij serb, Petar Petkoviç, janë takuar dy herë në Bruksel gjatë këtij viti, por pa u dakorduar për hapat konkret drejt zbatimit të Marrëveshjes Bazë të Brukselit dhe aneksit të Ohrit të arritur mes palëve në vitin 2023.

Ndërkohë i kërkohet Bashkimit Evropian që të adresojë disa parakushte ndaj Serbisë, si për përgjegjësit e saj për sulmin terrorist në Banjskë, e po ashtu lobimin intensiv kundër anëtarësimit të Kosovës në organizata ndërkombëtare.

Ish-kryenegociatori i Kosovës në dialog, Avni Arifi, thotë për KosovaPress se progres në dialog s’ka mundur të ketë gjatë vitit 2025. Kjo, sipas tij, vjen për shkak se qeveria që ka qenë në detyrë, s’ka pasur legjitimitet.

“Kur s’ke qeveri, s’ka legjitimitet me marrë pjesë dikush në dialog, prandaj s’ka pasur dialog. Problemi kryesor që e kam është se fajësia pse s’ka pasur dialog ka qenë Kosova. Domethënë, arsyeja pse s’ka pasur dialog është sepse Kosova ka qenë e paaftë t’i krijojë institucionet. Këto takimet që kanë qenë, takime sociale, me mbajtur shpirtin gjallë Sorensen-i në mandatin e tij, me biseduar me palët çka mendojnë, qysh është vizioni i tyre. Po tërësisht, domethënë, takime të papërfillshme. Sorensen-i edhe Kaja Kallas nuk e kanë provuar veten në dialogun Kosovë-Serbi. Domethënë, kjo iu pamundësua për shkak të zhvillimeve tona të brendshme”, thotë ai.

Ndërkaq, hulumtuesja në GLPS, Arbëreshe Loxha, thotë për KosovaPress se Bashkimi Evropian duhet t’i analizojë mirë sjelljet e Serbisë për të pasur progres në dialog. Ajo përmend qasjen refuzuese të Serbisë dhe lobimin e saj kundër anëtarësimit të Kosovës në organizata ndërkombëtare, si dhe sulmin terrorist në Banjskë si shkelje e marrëveshjes së Ohrit.

“Nuk mund të shohim ndonjë progres në kuptimin e hapave të rinj në kuadër të dialogut Kosovë-Serbi për faktin që nuk kemi pasur një qeveri e cila ka mandat të plotë, por kemi pasur një qeveri në detyrë. Në anën tjetër, trazirat politike në Serbi kanë qenë të vazhdueshme dhe nuk kanë lejuar vëmendje nga qeveria e Serbisë në procese siç është dialogu.

“Konsideroj se edhe BE-ja për këto dy arsye kryesore nuk është se ka ndërmarrë përpjekje për të pasur diçka konkrete në kuptim të dialogut… Ajo çka është e rëndësishme të bëhet në kuptim të dialogut Kosovë-Serbi është të kemi implementim të plotë të marrëveshjeve të kaluara. Gjithashtu të kemi zbardhje të plotë edhe vënien para drejtësisë për të gjithë ata që kanë qenë përgjegjës për sulmin terrorist në Banjskë. Marrëveshja e Ohrit është shkelur fillimisht me lobimin e Serbisë kundër anëtarësimit të Kosovës në organizata ndërkombëtare dhe pastaj me sulmin terrorist në Banjskë. Për të njëjtin nuk kemi vënë para drejtësisë ose ndihmesë për vënien e tyre para drejtësisë as nga pala serbe”, thekson ajo.

Ndërkohë dje, kryeministri në detyrë Albin Kurti tha gjatë një interviste për KosovaPress se për të vazhduar dialogu duhet që kryeterroristi Milan Radoiçiç t’u dorëzohet organeve të sigurisë në Kosovë.

“Për të vazhduar dialogu, ne duhet t’i zbatojmë marrëveshjet. Por për të vazhduar dialogu, natyrisht, ne kemi nevojë që Milan Radoiçiç, kryeterroristi që na e vrau rreshterin policor, heroin e Kosovës, Afrim Bunjakun, t’u dorëzohet organeve të sigurisë në Kosovë, meqenëse ka aktakuzë me 160 faqe nga Prokuroria Speciale, së bashku me 44 paramilitarë të tjerë, të cilët deshën që në Banjskë të Zveçanit ta fillojnë një konflikt të përmasave të gjera, nga i cili ata shpresonin se do të mund të provokohej ndërhyrja e Serbisë për ta aneksuar veriun e Kosovës. Dështuan. Dështuan edhe me hedhjen në erë më pas të kanalit Ibër-Lepenc, për të cilin po ashtu ka aktakuzë, dhe do të dështojnë secilën herë. Veçse, marrëveshja për fqinjësi të mirë, evropiane, bazuar në marrëveshjen bazë të Brukselit dhe në aneksin e zbatimit nga Ohri, nuk mund të ecë përpara përderisa Milan Radojçiç, sot që po flasim, është më i afërt me presidentin Vuçiç sesa edhe mbrojtja e tij e afërt”, thekson ai.

KosovaPress ka dërguar pyetje edhe Bashkimin Evropian për të ardhmen e dialogut, mirëpo nuk ka marrë përgjigje.

Kosova ka mbajtur zgjedhjet e parakohshme parlamentare më 28 dhjetor. Në bazë të rezultateve preliminare, Lëvizja Vetëvendosje ka fituar mbi 49 për qind dhe e njëjta pritet të formojë qeveri në koalicion vetëm me komunitet joshumicë.

Kosova dhe Serbia kanë rritur dakordësimin për marrëveshjen e Brukselit dhe Aneksin e Ohrit në vitin 2023, por deri më tani kjo marrëveshjeje nuk ka gjetur zbatim.

Gjatë mandatit të Qeverisë Kurti, Kosova dhe Serbia zhvilluan një sërë takimesh në nivel të liderëve si dhe në atë të kryenegociatorëve, mirëpo palët nuk u pajtuan për zbatimin e marrëveshjes.

Pjesë e kësaj marrëveshjeje është edhe themelimi i Asociacionit të Komunave me Shumicë Serbe, por Qeveria e Kosovës ende nuk ka bërë ndonjë hap për zbatimin e tij. Me gjithë kërkesën e faktorit ndërkombëtar që drafti i BE-së të dërgohet në Gjykatë Kushtetuese, Qeveria ka thënë se ai draft është një dokument “non paper” dhe si i tillë nuk do të dërgohet në Kushtetuese.

/KosovaPress//r.e/

The post Dialogu Kosovë-Serbi në ngërç: Pse viti 2025 kaloi pa progres? appeared first on Agjencia Telegrafike Shqiptare.

PRISHTINË, 5 janar /ATSH/ Mjekimi Intensiv Qendror në Qendrën Klinike Universitare të Kosovës po përballet me mungesë të theksuar të anestezistëve dhe infermierëve. Kjo njësi e Klinikës së Anesteziologjisë, e cila pothuajse gjithmonë funksionon me kapacitet të plotë, vitin e kaluar trajtoi rreth 500 pacientë në gjendje të rënduar.

Shefi i Mjekimit Intensiv Qendror në QKUK, Shaqir Uka, deklaron për KosovaPress se nëntori 2025 ka qenë sfidues, pasi numri i pacientëve të pranuar ka shënuar rritje të trefishtë. Njësia, e cila ka në dispozicion vetëm 21 shtretër, gjatë gjithë periudhës së vitit paraprak ka funksionuar me shfrytëzim prej 99 për qind.

“Mjekimi Intensiv Qendror në Qendrën Klinike Universitare disponon me 21 shtretër aktiv, të cilët në 99 për qind të kohës janë gjithmonë të zënë. Ne gjatë këtij viti, nga janari deri në këtë moment kur jemi duke biseduar, kemi pasur 495 pacientë të pranuar dhe të trajtuar në njësinë e Mjekimit Intensiv Qendror… Gjatë nëntorit të këtij viti, befasishëm kemi pasur 62 pacientë të pranuar në mjekimin intensiv, çka është trefishi i kapaciteteve tona. Në këto raste është shumë e vështirë të menaxhohen, pasi ata pacientë kanë nevojë për trajtim. Neve na është dashur të bëjmë një menaxhim të situatës me pacientët të cilët i kemi pasur… Kjo pastaj rëndohet edhe më tepër, kur kemi parasysh numrin e paktë të anesteziologëve që e disponon klinika jonë”, thotë Uka.

Sipas tij, numri i pacientëve të referuar në këtë klinikë mbetet pothuajse i pandryshuar nga viti në vit, ndërsa veçanti e vitit 2025 është gjendja e rënduar e pacientëve për trajtim.

Në Mjekimin Intensiv Qendror në QKUK nga janari deri në mesin e dhjetorit të vitit të kaluar rreth 120 pacientë kanë vdekur, kryesisht nga lëndime të rënda në aksidente trafiku dhe rrëzime në vendin e punës, ndërsa rastet e vdekjeve nga arma e zjarrit shënuan rënie.

“Kanë qenë pacientë të cilët kanë pasur sëmundje të cilat kanë qenë të pamundshme me u menaxhuar nga aspekti mjekësor, lëndime shumë të rënda, dëmtime shumë të rënda, qoftë të indit trunor, shumica e tyre, lëndime në aksidentet e komunikacionit. Kemi pasur shumë këtë vit rrëzime nga lartësia të punëtorëve të cilët kanë humbur jetën për shkak të lëndimit që e kanë marrë në vendet e tyre të punës. Pastaj, janë lëndimet me armë zjarri, me lëndimet me armë të ftohta, të cilat fatmirësisht, po them fatmirësisht, janë në zvogëlim e sipër për çdo vit”, thotë Uka.

Ai thotë se për një funksion më të mirë në mjekimin intensiv nevojitet trefishim i numrit të stafit.

“Për momentin ne disponojmë me gjashtë ekipe, nga dy anesteziologë, të cilët kryejnë punën në mjekimin intensiv, gjegjësisht, mbajnë kujdestaritë 24-orësh në mjekimin intensiv. Kjo vështirësohet edhe më tepër, domethënë na mbetet neve që kujdestaritë t’i mbajmë në çdo të gjashtën ditë… Kjo, përveç lodhjes fizike, jashtëzakonisht shumë ka reperkusione të mëdha në aspektin emocional, psikik e të tjera… Tashmë jemi në fazën kur kolegët e rinj janë në përfundim të specializimit. Pritet së shpejti të bëhet publik edhe konkursi për pranimin e tyre, dhe kjo sadopak do ta zbusë situatën përgjithësisht të rënduar në Klinikën e Anesteziologjisë dhe mjekimit intensiv. Mirëpo, edhe me këtë numër të cilët do të pranohen tash, kjo mund ta zbusë pak situatën, por për të qenë plotësisht komod dhe për të kryer punë normale ishte dashur që numri i anesteziologëve të trefishohet nga numri të cilin ne e kemi tash për tash… Tani janë diku në Qendrën Klinike janë diku rreth 45-47 anestezistë në total. Këtu te ne janë 12, janë gjashtë ekipe me nga dy anesteziologë”, thotë Uka.

Duke i konsideruar si heronj e kësaj klinike, Uka thotë se Mjekimi Intensiv Qendror lëngon edhe nga mungesa e infermierëve të cilët nuk janë të mjaftueshëm. Ai thotë se kërkesat për shtimin e stafit infermieror janë vazhdimisht për 20-25 infermierë, por që zakonisht pranohen vetëm 4-5.

“Problematikë kronike, e cila vazhdon me vite të tëra, e pazgjidhur edhe më tutje, është mungesa e stafit të mesëm, po edhe stafit ndihmës, posaçërisht stafit të mesëm. Në standarde ish dashur që një infermier për shembull të ketë aktivitetin e vet punues me dy pacientë më së shumti, ose dy infermierë me tre pacientë. E neve shumicën e kohës një infermier  duhet të kryejë punën e vet me tre pacientë, nganjëherë edhe me katër pacientë”, thekson Uka për KosovaPress.

Shefi i Mjekimit Intensiv Qendror në QKUK, konsideron se nuk është e nevojshme rritja e kapaciteteve në këtë klinikë, por funksionalizimi i njësive të kujdesit intensiv në klinikat e tjera. Sipas Ukës, mbi 30 për qind e pacientëve janë trajtuar në këtë klinikë për shkak të mungesës së njësive të tjera intensive.

“Realisht, nuk ishte dashur që kapacitetet tona të shtohen më tepër. Ishte dashur të aktivizohen njësitë intensive nëpër klinikat e tjera, në mënyrë që edhe Klinika e Neurologjisë të ketë mundësi t’i trajtojë pacientët të cilët marrin frymë me ventilator. Klinika e Infektives ka një njësi intensive, por ka pak shtretër, edhe ata hezitojnë të marrin një pacient i cili ka nevojë për trajtim me ventilator. Klinika Interne nuk ka asnjë njësi intensive dhe ne kemi shumë pacientë, diku rreth 18% pacientëve që ne i trajtojmë këtu janë pacientë të tyre, të cilët ishte dashur të marrin trajtim atje. Kështu, në përpjekjet tona në nivel të drejtorisë qendrore, nga ana e drejtorisë së Klinikës së Anesteziologjisë, janë të drejtuar në atë kuptim që të mund të funksionalizohen intensivet e tyre”, deklaron Uka.

Nga Mjekimi Intensiv Qendror thonë se janë të pajisur me aparatura mjekësore bashkëkohore, përfshirë ventilatorë dhe pajisje për monitorim, të cilat janë fjala e fundit e teknologjisë mjekësore. Edhe sa i takon furnizimit me barna dhe materiale mjekësore gjatë vitit 2025 kjo klinikë qëndroi mirë, ndonëse u theksuan se kishte mungesa të herëpashershme.

/KosovaPress//r.e/

The post Mungesa e anestezistëve dhe infermierëve, problem kronik në mjekimin intensiv appeared first on Agjencia Telegrafike Shqiptare.

TIRANË, 5 janar/ATSH/ Deputetja e Partisë Demokratike, Jorida Tabaku e cila njëkohësisht drejton edhe Komisionin për të Drejtat e Njeriut dhe Mjetet e Informimit Publik, e cilësoi si të dhunshëm reagimin e Policisë së Shtetit ndaj protestuesve të lëvizjes “Shqipëria bëhet”, të drejtuar nga Adriatik Lapaj.

Tabaku tha se protesta nuk është krim, por një e drejtë kushtetuese.

Sipas saj, “qytetarët që protestojnë paqësisht përpara Kryeministrisë nuk kanë kërcënuar askënd. Nuk kanë dhunuar askënd. Nuk kanë shkelur ligjin. Shteti ishte ai që reagoi me dhunë. Jo sepse u provokua, por sepse u tremb. Në Europë, policia mbron protestën. Këtu, policia u përdor kundër qytetarëve. Kjo nuk është Europë”.

Tabaku shtoi se “kur pushteti godet qytetarët që flasin, shteti ligjor pushon së ekzistuari. Ajo që mbetet është një regjim i dobët, i frikësuar, i kapur nga korrupsioni. Një pushtet që rreh qytetarët nuk është i fortë. Është i dëshpëruar”.

Reagimi i Tabakut vjen pas ngjarjeve të ndodhura një ditë më parë, kur efektivë të Policisë së Shtetit kanë ndërhyrë për largimin e çadrave të ngritura para Kryeministrisë nga kryetari i lëvizjes “Shqipëria Bëhet”, Adriatik Lapaj dhe mbështetës të tij. Gjatë këtij veprimi, ata janë përplasur me punonjësit e policisë, duke kundërshtuar vendimin për largimin e çadrave.

Lëvizja “Shqipëria Bëhet” po proteston pa ndërprerje që prej datës 8 dhjetor përpara godinës së Kryeministrisë.

/a.f/r.e/

The post Tabaku: Protesta nuk është krim, por një e drejtë kushtetuese appeared first on Agjencia Telegrafike Shqiptare.

PRISHTINË, 4 janar/ATSH/ Me rastin e 27-vjetorit të themelimit të Agjencisë së Lajmeve KosovaPress, kryeministri në detyrë i Kosovës, Albin Kurti, ka vizituar ambientet e reja të agjencisë, ku realizoi edhe një intervistë ekskluzive për KosovaPress.

Gjatë vizitës, Kurti u prit nga drejtoresha e përgjithshme e KosovaPress, Suzana Rakovica, dhe stafi i agjencisë, me të cilët diskutoi për zhvillimet aktuale në vend, sfidat e medias dhe rëndësinë e raportimit të saktë dhe të pavarur.

Në intervistën ekskluzive për KosovaPress, Kurti flet për çështje kyçe politike, rezultatin e zgjedhjeve të 28 dhjetorit, formimin e institucioneve të reja, partnerët eventualë qeverisës, prioritetet e ekzekutivit të ri, zgjedhjen e presidentit të ri dhe raportet me aleatët.

Kurti vlerësoi lart rolin e KosovaPress-it në informimin e publikut dhe në forcimin e gazetarisë profesionale në Kosovë.

Agjencia e Lajmeve KosovaPress sot shënon 27-vjetorin e themelimit dhe fillimit të punës. Kjo ditëlindje e gjen Agjencinë në hapësira të reja, moderne dhe funksionale, të cilat përmbushin të gjitha kushtet për veprimtarinë e një mediumi bashkëkohor.

Ky zhvillim përfaqëson një hap të rëndësishëm përpara në misionin e KosovaPress-it, për informim të saktë, të shpejtë dhe objektiv, si dhe një investim në cilësinë e gazetarisë dhe komunikimit medial në Kosovë.

/KosovaPress/

The post Kurti viziton KosovaPress-in në 27-vjetorin e themelimit appeared first on Agjencia Telegrafike Shqiptare.

PRISHTINË, 4 janar/ATSH/ Kosova po përgatitet për një cikël të gjerë investimesh infrastrukturore në funksion të Lojërave Mesdhetare 2030, të cilat pritet të shënojnë një kthesë të rëndësishme për sportin në vend. Institucionet përgjegjëse kanë prezantuar planet dhe dinamikën e realizimit të projekteve kryesore, të cilat përfshijnë objekte të reja sportive, rindërtim dhe modernizim të kapaciteteve ekzistuese, si dhe krijimin e kushteve për organizimin e një ngjarjeje të nivelit të lartë ndërkombëtar.

Duke folur për vlerën dhe shtrirjen e investimeve, Sekretari i Përgjithshëm i MKRS-së, Bislim Bislimi, ka zbuluar për KosovaPress pikat kyçe infrastrukturore në të cilat do të investohet gjatë vitit 2026.

Në anën tjetër, Kryetari i Komitetit Olimpik të Kosovës, Ismet Krasniqi, ka vlerësuar se koha është faktori kyç dhe se viti 2026 duhet të shënojë fillimin konkret të ndërtimit të infrastrukturës sportive.

“Është obligative që 2026-ta të fillon, sepse nuk kemi kohë më…Objektet sportive duhet kohë, të bëhet projekti i tyre, të ndërtohet, edhe të vjen në funksion. Kjo kërkon kohë. Ne nuk kemi kohë të humbim. 2026-ta duhet të jetë vit vendimtar i nisjes të objekteve të reja të cilat janë paraparë të bëhen, por edhe ato të cilat duhet të përmirësohen apo rindërtohen, ato ekzistuese po flas”, thotë Krasniqi.

Ndërkohë, Kryetari i Federatës së Sporteve Universitare, Musa Selimi, ka theksuar se procesi i deritanishëm dhe mbështetja ndërkombëtare dëshmojnë se Kosova është në rrugën e duhur. Ai ka nënvizuar se organizimi i Lojërave Mesdhetare do të jetë moment historik për sportin kosovar.

Lojërat Mesdhetare përfaqësojnë një nga ngjarjet më të mëdha multisportive në botë, që bashkojnë vende nga Evropa, Afrika dhe Azia përgjatë pellgut të Mesdheut, duke u organizuar çdo katër vjet nën ombrellën e Komitetit Ndërkombëtar të Lojërave Mesdhetare. Për Kosovën, edicioni i vitit 2030 nuk është vetëm një ngjarje sportive, por një projekt strategjik shtetëror që synon zhvillimin afatgjatë të infrastrukturës, rritjen e kapaciteteve organizative dhe forcimin e imazhit ndërkombëtar të vendit, duke lënë trashëgimi të qëndrueshme për sportistët dhe komunitetin sportiv edhe shumë vite pas përfundimit të garave.

/Kosovapress/

The post Kërkohet përshpejtim i ritmit për përgatitjet për Lojërat Mesdhestare appeared first on Agjencia Telegrafike Shqiptare.

PRISHTINË, 4 janar/ATSH/ 27-vjetori i themelimit e gjen KosovaPress-in në objekt të ri Agjencia e Lajmeve KosovaPress sot shënon 27-vjetorin e themelimit dhe fillimit të punës. Kjo ditëlindje e gjen Agjencinë në objekt të ri, modern dhe funksional, i cili përmbush të gjitha kushtet për veprimtarinë e një mediumi bashkëkohor.

Ky zhvillim përfaqëson një hap të rëndësishëm përpara në misionin e KosovaPress-it për informim të saktë, të shpejtë dhe objektiv, si dhe një investim në cilësinë e gazetarisë dhe komunikimit medial në Kosovë.

Objekti i ri i KosovaPress-it është i pajisur me studio televizive, sallë konferencash, hapësira redaksionale dhe infrastrukturë teknike bashkëkohore, duke krijuar kushte optimale për prodhim dhe shpërndarje të informacionit profesional dhe të besueshëm.

Me 27 vjet përvojë në shërbim të publikut, KosovaPress vazhdon të mbetet një nga shtyllat kryesore të informimit, duke u përshtatur me trendet moderne dhe nevojat e kohës.

KosovaPress u themelua më 4 janar 1999, duke dhënë kontribut të madh në informimin e opinionit vendor dhe ndërkombëtar për luftën çlirimtare.

Gjatë periudhës së luftës, KosovaPress publikoi lajme në gjuhën shqipe, angleze, gjermane dhe frënge.

Me shuarjen e Qeverisë së Përkohshme, në janar të vitit 2000 dhe krijimin e Këshillit të Përkohshëm Administrativ, në shtator të po këtij viti, KosovaPress nisi rrugëtimin e saj si Agjenci e Pavarur e Lajmeve.

Fillimi ishte i vështirë dhe luftohej për mbijetesë (në shkurt 2002 mediat dëbohen nga ish-ndërtesa e Rilindjes), ndërsa më pas, falë punës dhe këmbënguljes, nisi edhe periudha e zhvillimit dhe, vit pas viti, edhe zgjerimit të produkteve.

Një kronologji e shkurtër:

Në vitin 2002, KosovaPress kaloi në sistemin me parapagim, fillimisht në gjuhën shqipe, e prej vitit 2005 rifilloi publikimet edhe në gjuhën angleze, ndërsa, në 2007 edhe në gjuhën serbe dhe turke.

Në dhjetëvjetorin e themelimit (2009), KosovaPress solli në tregun medial të vendit, produktet më të reja: video-lajmin dhe audio-lajmin.

KosovaPress, në përvjetorin e 17 të punës (2016), prezantoi produktin e vet më të ri e që ishte transmetimi i drejtpërdrejt i ngjarjeve. Transmetimet e drejtpërdrejta u realizuan me teknologjinë më të re, përmes kamerave 4K.

Investimi i vazhdueshëm në teknologji i lejon sot KosovaPress-it të bëjë deri në 10 transmetime “live” në të njëjtën kohë, si dhe me regji.

Kur KosovaPress kremtoi dy dekada punë, u prezantua edhe Departamenti i Produksionit, i cili kujdeset për realizimin e emisioneve edukativo-argëtuese, siç është emisioni.

Në vitin 2017, KosovaPress, pas nje lobimi disavjeçarë anëtarësohet me të drejta të plota në rrjetin e Agjencive të Lajmeve të Vendeve të Ballkanit dhe të Evropës Juglindore (ABNA-SE www.abnase.com). KosovaPress, që prej anëtarësimit, është duke dhënë një kontribut të vlefshëm në promovimin e vlerave nacionale në rrjetin e lajmeve që editohen në platformat e ABNA-SE.

Në shtator të 2021, KosovaPress pasi organizoi suksesshëm Asamblenë e Përgjithshme të ABNA-SE, mori  presidencën për një vit.

Pas presidencës 2021-2022, KosovaPress vazhdon të jetë për tri vjet radhazi, pjesë e bordit të ABNA-SE (https://abnase.com/contacts/).

Lobimi dhe përpjekjet për të qenë pjesë edhe e rrjeteve tjera të agjencive të lajmeve nuk u ndalën.

Në shtator të 2022-ës, në Asamblenë Gjenerale, KosovaPress pranohet zyrtarisht si anëtare me të drejta të plota në Aleancën Evropiane të Agjencive të Lajmeve (EANA), dhe me ketë anëtarësim KosovaPress-it iu hapën edhe më shumë rrugët për të bashkëpunuar me të gjitha agjencitë e lajmeve të Evropës duke sjell produktet që i ofrojnë këto agjenci (https://www.newsalliance.org/news/the-european-alliance-of-news-agencies-we

Me këtë KosovaPress-it iu hapën edhe me shumë dyert e bashkëpunimit me të gjitha këto agjenci dhe rritjes së lajmeve nga këto vende dhe në këto vende për klientët e ndërsjellët.

Ne shkurt të vitit 2024 në Prishtinë, KosovaPress organizoi konferencën ndërkombëtare “Kufijtë e Lirisë së Fjalës”, për nder të 25-vjetorit të themelimit. Në Prishtinë u bashkuan më shumë se 20 agjenci botërore të lajmeve nga e gjithë Evropa dhe Ballkani.

Falë përkushtimit, përgjegjësisë dhe saktësisë, mediumet më të mëdha e më të rëndësishme në Kosovë, Shqipëri, Maqedoninë e Veriut si dhe vende të tjera të rajonit e me gjerë i besojnë Agjencisë së Lajmeve KosovaPress, duke bashkëpunuar ngushtë çdo ditë, tashmë për vite me radhë.

Agjencia e Lajmeve KosovaPress vijon të sjellë për lexuesin dhe klientin gjithë çfarë ndodhë në jetën e përditshme politike, ekonomike e sociale të Kosovës, regjionit, Evropës dhe botës, por edhe duke ngritur çështje të rëndësishme përmes gjinive të tjera gazetareske si intervista, dokumentarë, reportazhe e të tjera.

KosovaPress është një burim i besuar i lajmit si dhe një kontribuues i madh i rritjes së lirisë së të shprehurit.

Vitin e kaluar i është bashkuar Clive Marshall, ish-shef ekzekutiv i Agjencisë së Lajmeve PA Media Group në Mbretërinë e Bashkuar, si President jo-ekzekutiv i KosovaPress-it.

Zyrat e KosovaPress

1 nga 14

The post KosovaPress me zyra të reja në 27-vjetorin e themelimit appeared first on Agjencia Telegrafike Shqiptare.

TIRANË, 1 janar/ATSH/ Shërbimi Meteorologjik Ushtarak njoftoi se viti i ri do të nisë me mot me diell, ndërsa temperaturat do të jenë në rënie.

Sipas njoftimit, dita e enjte do të karakterizohet nga kushte atmosferike të qëndrueshme në të gjithë vendin. Moti parashikohet i kthjellët, me vranësira të pakta kalimtare, kryesisht në relievet malore lindore. Në akset rrugore malore parashikohen ngrica, ndërsa në zonat luginore do të ketë mjegull të dendur në orët e mëngjesit dhe të mbrëmjes.

Era do të fryjë kryesisht nga verilindja – juglindja me shpejtësi mesatare 5 m/s, ndërsa në vijën bregdetare dhe zonat luginore era mund të arrijë deri në 9 m/s, shoqëruar me valëzim në dete të forcës 1-2 ballë.

Temperaturat parashikohen:
Shkodër: -3/6°C, diell
Kukës: -6/5°C, diell
Lezhë: -2/6°C, diell
Dibër: -7/2°C, diell
Durrës: -2/11°C, diell
Tiranë: -3/10°C, diell
Elbasan: -2/9°C, diell
Berat: -5/11°C, diell
Vlorë: 0/12°C, diell
Korçë: -6/6°C, diell
Gjirokastër: -2/6°C, diell
Sarandë: 2/13°C, diell

/r.e/

The post Viti i Ri 2026 nis me diell dhe temperatura të ulëta appeared first on Agjencia Telegrafike Shqiptare.

TIRANË, 1 janar/ATSH/Drejtori i Përgjithshëm i Policisë së Shtetit, Ilir Proda, së bashku me Drejtorin e Drejtorisë Vendore të Policisë Tiranë, takuan shërbimet e Policisë Rrugore të planifikuara në shërbim gjatë natës së ndërrimit të viteve, si dhe të Sallës së Komandimit të DVP Tiranë.

Gjatë takimit me punonjësit e Policisë Rrugore, Drejtori Proda i uroi Gëzuar Vitin e Ri dhe, nëpërmjet tyre, të gjithë punonjësit e Policisë së Shtetit, në veçanti ata që janë në shërbim, duke i falënderuar për përkushtimin dhe sakrificën e treguar në shërbim të sigurisë së qytetarëve.

Drejtori Proda theksoi se nuk do të ketë asnjë tolerancë për drejtimin e mjeteve nën efektin e alkoolit, duke nënvizuar se çdo kontroll ka për qëllim shpëtimin e jetëve. Ai kërkoi profesionalizëm, korrektësi, komunikim me etikë dhe kujdes maksimal për veten dhe për njëri-tjetrin.

Në momentin e ndërrimit të viteve, Drejtori i Përgjithshëm inspektoi Sallën e Komandimit të DVP Tiranë, ku vlerësoi rolin kyç të kësaj strukture në menaxhimin e situatave operative.

Ai theksoi se çdo telefonatë dhe çdo informacion duhet të vlerësohet me seriozitet maksimal, pasi reagimi në kohë dhe koordinimi i saktë me patrullat në terren janë vendimtarë për parandalimin e ngjarjeve.

Gjatë festimeve për ndërrimin e viteve, si pasojë e hedhjes së fishekzjarrëve, deri në orën 01:30 të datës 01.01.2026, në rang vendi janë raportuar 20 shtetas të lënduar, pa rrezik për jetën, si dhe një e mitur 13-vjeçare, e cila ka pësuar gërvishtje në parakrah, dyshohet nga një plumb qorr, në Vaqarr (16 raste në Tiranë, 2 në Durrës, 1 në Lezhë, 1 në Fushë-Arrëz dhe 1 në Korçë)

Shërbimet e Policisë në të gjithë vendin janë në gatishmëri të plotë dhe vijojnë monitorimin e qarkullimit rrugor, të ambienteve ku zhvillohen festime dhe të gjithë territorit.

Policia e Shtetit ju uron Gëzuar Vitin e Ri 2026!
Me besim dhe bashkëpunim për më shumë siguri.

/a.f/

The post 20 të lënduar nga fishekzjarrët gjatë ndërrimit të viteve, pa rrezik për jetën appeared first on Agjencia Telegrafike Shqiptare.

PRISHTINË, 1 janar/ATSH/ Qytetarë të shumtë të kryeqytetit zgjodhën që festën e ndërrimit të viteve ta kalojnë në sheshin e Prishtinës. Në atmosferë festive qytetarët u shprehën optimistë për vitin e ri duke rrëfyer të mirat dhe sfidat e vitit që lamë pas, transmeton KosovaPress.

Qytetari, Rexhep Takaj tha se shpreson që në vitin tjetër të ketë më shumë dashuri dhe respekt mes njëri-tjetrit.

“Viti i kaluar ishte mirë, ishalla ky vit të ri edhe më mirë veç shumë suksese e shumë shëndet. Ishalla populli ia nis me falenderuar gjithkënd dhe me dashtë njëri-tjetrin, kemi ndryshuar sepse parja na ka prish të gjithëve, shumë keq”, tha ai.

Një qytetar nga Zvicra i cili atmosferën e vitit të ri zgjodhi ta festojë në mesin e bashkëatdhetarëve tha se atmosfera festive ishte e mirë. “Kemi ardhur nga Zvicra, shumë mirë kemi kaluar”, tha një qytetar tjetër nën atmosferën festive të kryeqytetit.

Qytetari, Genc Gashi tha se në vitin 2026 pret që gjërat të jenë më mirë se në vitin që lamë pas. “Po kalojmë shumë mirë, po presim më mirë në vitin e ri”, tha Genc Gashi.

Në mesin e qytetarëve që kishin zgjedhur të festonin në Prishtinë ishte edhe Adis Veseli nga Maqedonia e Veriut, i cili tha se atmosfera ishte shumë e mirë, teksa nga viti i ri pret më shumë punë. “Mirë super, viti i kaluar ishte mirë nuk ishte keq. Presim me punuar me i marr sendet me ren”, Adis Veseli nga Maqedonia.

/Kosovapress/

The post Atmosferë festive në sheshin e Prishtinës, qytetarët optimistë për Vitin e Ri appeared first on Agjencia Telegrafike Shqiptare.

TIRANË, 1 janar /ATSH/ Shqipëria ka lënë pas vitin 2025, duke hyrë zyrtarisht në Vitin e Ri 2026.

Festa kulmoi në sheshin “Skënderbej” në kryeqytet ku Viti i Ri u prit me një koncert madhështor i cili nisi në orën 22:00 dhe vijoi deri në orët e vona pas mesnate.

Qytetarë tê shuntë u mblodhën për të festuar bashkë momentin magjik të ndërrimit të viteve.

Atmosfera festive u ndez nga performancat e artistëve të njohur, duke i dhuruar publikut një mbrëmje të paharrueshme mes muzikës, dritave dhe fishekzjarrëve.

E pranishme ne sheshin “Skënderbej” ishte dhe kryetarja e komanduar e Bashkisë së Tiranës Anuela Ristani.

Ajo theksoi se “këtë vit kemi vendosur që privilegjin t’ia japim atyre që kanë punuar më shumë jo vetëm për qytetin, por për të ardhmen e të gjithë gjithë Shqipërisë, ndaj ju lutem bashkohuni me mua që të mirëpres këtu në skenë për të numëruar mbrapsht Vitin e Ri të gjithë maturantët e shkëlqyer të qytetit të Tiranës, fytyra më e bukur e qytetit Iva, Ajla, Dea”.

“Ka një arsye pse ky qytet nderon ata që përpiqen më shumë dhe këta çuna dhe goca që po futen në jetën e të rriturve sot do të numërojnë mbrapsht për Tiranën, për Shqipërinë dhe për të ardhmen tonë”, u shpreh Ristani.

Një spektakël fishekzjarrësh ndriçoi Tiranën gjatë momentit të ndërrimit të viteve.

Viti i Ri 2026 u prit me spektakël fishekzjarresh edhe në qytete të tjera të vendit.

Agjencia Telegrafike Shqiptare uron të gjithë shqiptarët kudo që ndodhen, për një vit sa më të mbarë e të begatë.

1 nga 6

/gj.m/a.f/

The post Viti i Ri mirëpritet me spektakël fishekzjarresh në Shqipëri. ATSH ju uron Gëzuar 2026-ën! appeared first on Agjencia Telegrafike Shqiptare.

PRISHTINË, 31 dhjetor/ATSH/ Presidentja e Kosovës, Vjosa Osmani ka uruar qytetarët për Vitin e Ri 2026. Osmani në një videomesazh thekson se viti që po lëmë pas ka dëshmuar se Kosova ecën përpara kur vepron me vendosmëri, me vlera dhe me unitet.

“Viti që po e lëmë pas ka dëshmuar se Kosova ecën përpara kur vepron me vendosmëri, me vlera dhe me unitet. Ka qenë një vit në të cilin kemi forcuar edhe më shumë pozitën ndërkombëtare të vendit tonë, kemi mbrojtur rendin kushtetues e interesin shtetëror, si dhe një vit në të cilin kemi vazhduar punën për t’i forcuar aleancat tona me partnerët tanë strategjikë. Kosova ka treguar se është e pranishme, e dëgjuar dhe e respektuar në tryezat ndërkombëtare, si faktor paqeje, stabiliteti dhe besueshmërie”, thekson Osmani.

Sipas saj, Kosova qëndroi e palëkundur ndaj çdo përpjekjeje destabilizuese, ndërsa brenda vendit vazhdon të ndërtojë një shoqëri më të drejtë, ku të drejtat e njeriut, barazia dhe dinjiteti janë themeli ynë i përbashkët.

Ajo tha po ashtu se sot, Kosova përmbylli një vit jo të lehtë, por një vit në të cilin zëri i saj u dëgjua fuqishëm dhe qëndrimi ynë në arenën ndërkombëtare ishte parimor dhe i palëkundur. Ishte një vit sfidues, sidomos me vonesat në themelimin e institucioneve, por ishte po ashtu vit që na ka forcuar dhe na ka përgatitur të ecim përpara me më shumë besim dhe me më shumë përgjegjësi.

Në urimin e saj ajo thekso po ashtu se Viti 2026 që po vjen “na gjen me përgjegjësi të reja dhe me synime të qarta”.

“Synimi ynë mbetet një Kosovë akoma më e sigurt, akoma më e drejtë, akoma më e integruar dhe akoma më e zhvilluar. Një Kosovë ku ligji zbatohet njësoj për të gjithë, ku institucionet janë gjithnjë në shërbim të qytetarëve dhe ku çdo i ri dhe e re ka perspektivë për të ndërtuar të ardhmen me dinjitet në vendin e vet”, tha ajo.

Në këtë natë të veçantë, Ajo ka uruar qytetarët për shëndet, paqe dhe begati.

“Le të jetë viti 2026 një vit bashkëpunimi, përgjegjësie dhe suksesi për secilin prej jush dhe për Republikën. Le ta nisim vitin e ri me besim në vete, në njëri-tjetrin dhe në Kosovën tonë. Gëzuar Vitin e Ri 2026 me shëndet e plot momente gëzimi e feste, për ju dhe për Republikën e Kosovës!”, tha ajo.

/KosovaPress//r.e/

The post Urimi i Osmanit për Vitin e Ri: 2026-ta na gjen me përgjegjësi të reja dhe synime të qarta appeared first on Agjencia Telegrafike Shqiptare.