TIRANË, 27 janar /ATSH/ Kuvendi mblidhet sot në seancë plenare, ku në rendin e ditës është shqyrtimi dhe votimi i ndryshimeve në Kodin Penal për dekriminalizimin e shpifjes.

Gjatë shqyrtimit të projektligjit në komisionet e përhershme të Kuvendit, kreu i grupit parlamentar të Partisë Socialiste, Taulant Balla u shpreh se ndryshimet e propozuara nga mazhoranca synojnë dekriminalizimin e shpifjes për gazetarët profesionistë, por jo për profesionistët e shpifjes.

Po ashtu, Kuvendi merr në shqyrtim ndryshimet në statusin e gjyqtarëve dhe prokurorëve, nismë e deputetit socialist Olsi Komici.

Deputeti gjatë prezantimit në komisione është shprehur se projektligji është ndërhyrje e domosdoshme për forcimin e themeleve të Reformës në Drejtësi dhe përmbushjen e detyrimeve që burojnë nga procesi i integrimit europian.

Komici vuri në dukje se ndryshimet e propozuara adresojnë problematika të konstatuara gjatë zbatimit të ligjit aktual, veçanërisht mungesën e drejtuesve të përhershëm në gjykata dhe prokurori, nevojën për rritjen e transparencës së vendimmarrjes së Këshillave, si dhe forcimin e mekanizmave të kontrollit të integritetit të kandidatëve për magjistratë.

Ndërkaq, në rendin e ditës është edhe projektligji “Për disa ndryshime në ligjin “Për organet e qeverisjes së sistemit të drejtësisë””.

Kuvendi do të shqyrtojë edhe Aktin Normativ për disa ndryshime dhe shtesa në buxhetin e vitit 2025.

Gjithashtu, parlamenti do të shqyrtojë projektligjet për ratifikimin e marrëveshjes ndërmjet Këshillit të Ministrave dhe qeverisë së Republikës së Italisë për bashkëpunimin strategjik në kujdesin shëndetësor, energjinë, mjedisin, industrinë e sigurisë dhe mbrojtjes, menaxhimin e migracionit, arsimin, inovacionin, diasporën, transformimin ekonomik dhe rritjen inteligjente.

Në seancë do të diskutohet gjithashtu projektligji për aderimin e Shqipërisë në Traktatin për Pronësinë Intelektuale, Burimet Gjenetike dhe Njohuritë Tradicionale të Lidhura me To, si dhe për ratifikimin e vendimeve të Komitetit të Përbashkët të Marrëveshjes së Tregtisë së Lirë të Evropës Qendrore, përkatësisht për aspektet tregtare të të drejtave të pronësisë intelektuale dhe për lehtësimin e tregtisë së shërbimeve të ofruara nga agjencitë e udhëtimit dhe operatorët turistikë.

Për shqyrtim është edhe projektligji për aderimin e Republikës së Shqipërisë në protokollin për ndalimin e tregtisë së paligjshme të produkteve të duhanit, kontrollin e lëndëve narkotike dhe psikotrope, barnat narkotike, parandalimin e dhunës në familje, lobimin, importin dhe eksportin e armëve të zjarrit, konfliktin e interesave në funksionet publike, mbrojtjen nga diskriminimi dhe organizimin e Komisioneve Hetimore të Kuvendit.

/gj.m/j.p/r.e/

The post Kuvendi shqyrton sot dekriminalizimin e shpifjes appeared first on Agjencia Telegrafike Shqiptare.

TIRANË, 26 janar /ATSH-Gjergji Mima/ Ministri i Mbrojtjes, Pirro Vengu deklaroi sot, në një konferencë për shtyp, se Shqipëria do të vijojë rritjen e angazhimit të saj në misionet paqeruajtëse ndërkombëtare të NATO-s, Bashkimit Evropian dhe Kombeve të Bashkuara.

I pyetur nga ATSH lidhur me situatën politike dhe nëse Shqipëria ka në plan të rrisë praninë e trupave në misionet paqeruajtëse të NATO-s, Vengu tha se angazhimi ndërkombëtar i vendit ka ardhur vazhdimisht në rritje.

“Angazhimi ndërkombëtar në të gjitha misionet, qoftë të NATO-s, BE-së apo Kombeve të Bashkuara, ka ardhur në rritje dhe do të vazhdojmë ta rrisim. Kjo lidhet edhe me vlerësimin e NATO-s për misionin në KFOR, ku kërkohen forca shtesë. Si një prej kontribuuesve kryesorë në KFOR, edhe Shqipëria do të shtojë forca, këtë vit konkretisht me komponentin ajror, ndërkohë që tradicionalisht kemi qenë të angazhuar me komponentin tokësor”, u shpreh Vengu.

Ministri theksoi se veprimi i forcave shqiptare realizohet gjithmonë në partneritet me vende shumë herë më të fuqishme, brenda strukturave të të cilave operojnë forcat tona, element që, sipas tij, duhet marrë parasysh.

Po ashtu, Vengu nënvizoi se Shqipëria dislokon forca në ato misione ku mund të sjellë një vlerë të shtuar.

“Forca e Armatosur ka një specialitet specifik, siç është komponenti EOD në Letoni, pasi Shqipëria ka kapacitete të konsoliduara në demontimin, çminimin dhe eliminimin e rrezikut nga mjetet plasëse në fushëbetejë. Këtë kapacitet do të vazhdojmë ta ofrojmë për Aleancën”, tha ai.

Sa i përket rreziqeve biologjike dhe kimike, ministri bëri të ditur se po ndërtohen kapacitete të reja për përballimin e tyre, të cilat do t’i japin Shqipërisë mundësinë të kontribuojë edhe në misione të tjera të NATO-s.

Vengu vuri në dukje se misionet ndërkombëtare janë gjithashtu një teatër i rëndësishëm stërvitor për Forcat e Armatosura.

“Ato janë një instrument diplomatik për vendin, në procesin e linjëzimit me BE-në dhe NATO-n, por njëkohësisht janë edhe mundësi konkrete për rekrutët, ekspertët dhe oficerët tanë që të stërviten në kushte reale, shpeshherë me një shkallë të caktuar rrezikshmërie”, tha ai.

Sipas ministrit, angazhimi në misione sjell një përfitim të dyfishtë, ndaj synimi është që rotacionet të bëhen më të shpeshta, në mënyrë që një numër sa më i madh personeli aktiv të ketë mundësi të ekspozohet, të specializohet dhe të stërvitet në kushte reale operacionale.

Ministri i Mbrojtjes Pirro Vengu në konferencë për shtyp , foto: Andrin Hoxha

1 nga 7

/r.e/

The post Vengu për ATSH: Rritje e angazhimit në misionet paqeruajtëse ndërkombëtare të NATO-s appeared first on Agjencia Telegrafike Shqiptare.

TIRANË, 26 janar /ATSH-Gjergji Mima/ Ministri i Mbrojtjes, Pirro Vengu, deklaroi sot në një konferencë për shtyp se Shqipëria do të marrë sistemin italian të raportimit të emergjencave “112”, si pjesë e përmbushjes së detyrimeve që rrjedhin nga procesi i integrimit evropian dhe në kuadër të bashkëpunimit me Italinë.

I pyetur nga ATSH lidhur me masat konkrete që po ndërmerren për të shmangur situatat e përmbytjeve dhe zjarreve, Vengu u shpreh se kjo nismë është pjesë e marrëveshjeve të nënshkruara gjatë mbledhjes së përbashkët të dy qeverive, si dhe e marrëveshjes mes Agjencisë Kombëtare të Mbrojtjes Civile të Shqipërisë dhe asaj të Italisë.

“Ne do të marrim sistemin italian për numrin e emergjencave 112. Ky është një detyrim që buron edhe nga anëtarësimi në Bashkimin Evropian. Duhet të kemi një numër kombëtar dhe një numër evropian të vetëm, 112, i cili lidhet me një sallë operative ku bashkëveprojnë të gjitha institucionet ligjzbatuese dhe strukturat që menaxhojnë fatkeqësitë natyrore”, tha Vengu.

Sipas ministrit, Agjencia Kombëtare e Mbrojtjes Civile (AKMC) disponon tashmë instrumentin financiar për realizimin e këtij projekti, falë mbështetjes së palës italiane.

Vengu theksoi se vitet e fundit Shqipëria është përballur me përmbytje më intensive dhe reshje më të përqendruara në zona të caktuara, ndërkohë që zjarret nuk janë më një problematikë sezonale, por një rrezik i përhershëm. “Këtu ndikojnë ndryshimet klimatike, por edhe dinamika urbane dhe rurale, dhe Shqipëria nuk bën përjashtim”, u shpreh ai.

Ministri nënvizoi se, ndër vite është krijuar një varësi e theksuar ndaj reagimit të Forcave të Armatosura, ndërsa strategjia e re, e reflektuar edhe në buxhetin e vitit 2026, synon tre drejtime kryesore.

“Së pari, forcimin e kapaciteteve të bashkive përmes investimeve në infrastrukturën parandaluese. Ai solli si shembull ndërhyrjet në infrastrukturën e pritave në Shkodër dhe në kanalet e ujërave të larta në Vlorë, të cilat, sipas tij, kanë ndihmuar në përballimin e reshjeve të fundit. Në këtë kuadër, buxheti për infrastrukturën parandaluese të bashkive është rritur dhe pritet që javën e ardhshme të hapet thirrja për aplikime pranë AKMC-së për ndërtimin e urave, pritave lumore, riparimin e digave dhe kanaleve kulluese, në bashkëpunim me Ministrinë e Bujqësisë”, u shpreh ministri i Mbrojtjes.

Së dyti, strategjia e re synon krijimin e një zinxhiri më të fortë reagimi përmes ngritjes së një niveli të ndërmjetëm me qendra rajonale emergjence, më pranë zonave të rrezikut.

Vengu bëri të ditur se do të ndërtohet një bazë në Bushat për zonën veriperëndimore dhe një tjetër në Kranë të Finiqit, për të mbuluar pellgun e Delvinës, Finiqin, Konispolin dhe një pjesë të Gjirokastrës. “Këto baza do të kenë kapacitete për furnizimin e mjeteve ajrore, për të rritur efikasitetin e ndërhyrjeve”, tha Vengu.

Së treti, ministri theksoi rëndësinë e parandalimit përmes inovacionit, duke përmendur përdorimin e imazheve satelitore, dronëve termikë dhe sistemeve të avancuara teknologjike nga AKMC, të cilat kanë rezultuar efektive në operacionet në terren. Sipas tij, investimet në këtë drejtim do të vijojnë. /j.p/

Ministri i Mbrojtjes Pirro Vengu, konferencë për shtyp foto: Andrin Hoxha

1 nga 9

The post Vengu për ATSH: Shqipëria do të marrë sistemin italian të raportimit të emergjencave “112” appeared first on Agjencia Telegrafike Shqiptare.

TIRANË, 26 janar /ATSH/ Kryetari i Partisë Demokratike, Sali Berisha, ndodhet sot në selinë e Asamblesë Parlamentare të Këshillit të Europës, në Strasburg të Francës, së bashku me deputeten Albana Vokshi.

Në një videomesazh për qytetarët, Berisha deklaroi se opozita po vijon betejën e saj kundër keqqeverisjes.

“Kjo betejë po e çon kauzën e saj në arenën ndërkombëtare dhe në vëmendjen e institucioneve europiane”, u shpreh Berisha.

/gj.m/j.p/

The post Berisha: Kauza e opozitës, në Asamblenë e Përgjithshme të KiE appeared first on Agjencia Telegrafike Shqiptare.

TIRANË, 26 janar /ATSH/ Një 39-vjeçar është kapur dhe arrestuar në Emiratet e Bashkuara Arabe me qëllim ekstradimin në Shqipëri pasi akuzohet si drejtuesi i një grupi kriminal që ka kultivuar bimë narkotike në Krujë.

Policia e Shtetit bëri të ditur sot se, si rezultat i bashkëpunimit të strukturave të Policisë së Shtetit me homologët, në kuadër të operacionit të koduar “The Wanted”, u bë e mundur kapja në Emiratet e Bashkuara Arabe dhe arrestimi me qëllim ekstradimin në Shqipëri, i shtetasit B. S. alias B. X., 39 vjeç.

Ky shtetas ishte shpallur në kërkim nga Interpol Tirana, pasi Gjykata e Posaçme kundër Korrupsionit dhe Krimit të Organizuar në maj 2023, i ka caktuar masën e sigurisë “Arrest në burg”, për veprat penale “Kultivimi i bimëve narkotike”, “Prodhimi dhe shitje e narkotikëve”, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal” dhe “Mbajtja pa leje dhe prodhimi i armëve, armëve shpërthyese dhe i municionit”.

Shtetasi B. S. alias B. X. akuzohet se ka qenë drejtuesi i një grupi kriminal, i cili në vitin 2020 ka kultivuar bimëve narkotike në fshatrat e njësisë administrative Cudhi, Krujë.

Interpol Tirana dhe Interpol Abu Dhabi po bashkëpunojnë për të kryer procedurat e ekstradimit të këtij shtetasi, në Shqipëri.

/gj.m/j.p/

The post Arrestohet në EBA 39-vjeçari shqiptar i akuzuar si drejtues grupi kriminal appeared first on Agjencia Telegrafike Shqiptare.

TIRANË, 25 janar /ATSH/ Kryetari i Partisë Demokratike, Sali Berisha, deklaroi sot në një konferencë se protesta e mbrëmshme u dominua nga të rinjtë, teksa dënoi sjelljen e Policisë së Shtetit ndaj protestuesve

“Protesta pati një risi jashtëzakonisht të rëndësishme dhe themelore. Ajo u dominua nga rinia, nga të rinjtë dhe adoleshentët.”, tha Berisha.

Kreu i PD u shpreh se ky është një ogur i bardhë për shqiptarët.

“Një shpresë e vërtetë, se do jenë të rinjtë dhe gjenerata e tyre, ata të cilët do të përmbysin, do të largojnë nga pushteti këtë organizatë kriminale”, tha Berisha.

Dje policia, vijoi ai, “përdori dhunë të egër ndaj protestuesve. Goditi me të gjitha mjetet, përdori gaz lotsjellës të skaduar, i cili në konventa ndërkombëtare përbën helm luftarak dhe s’mund të përdoret kurrë ndaj protestave”.

“Gazi lotsjellës ishte i skaduar prej tre vitesh. Dhe ai pas skadimit është e njohur se transformohet në helme të tjera, të cilat japin dëmtime të rënda sistemeve, por mund të shkaktojnë dhe humbjen e pamjeve. U përdorën topat e ujit dhe mjete të tjera.  U goditën me shkopi protestues paqësorë dhe u arrestuan, u ndaluan brutalisht në akte të që cilësohen në krime kundër njerëzimit”, vijoi Berisha.

Ai tha se ky akt do të denoncohet në institucionet ndërkombëtare. “Do ta denoncojmë këtë akt si në institucionet ndërkombëtare, ashtu dhe brenda vendit. Është një shkelje flagrante, flagrante e konventave ndërkombëtare:, u shpreh Berisha.

Berisha theksoi se u agresuan qytetarë që s’kishin lidhje me protestën.

“Fëmijë 10 vjeç tek dilte nga xhamia, 10 vjeçar, Romeo dhe s’kishte asnjë lidhje me protestën. Ai kishte ardhur me detyra të ngarkuara nga familjarët e tij. Dhe e morën në mënyrën më të turpshme, më kriminale”, tha Berisha.

“Agresuan, arrestuan qytetarë që nuk ishin fare në protestë. U sollën egërsisht dhe në mënyrë të padenjë ndaj deputetëve. Agresuan disa deputetë, Luçiano Boçin, nënkryetarin e partisë, Xhelal Mziun, Besart Xhaferrin”, tha Berisha.

Me tej Berisha tha se protestat nuk do të ndalen. “Pa dyshim që do ketë protesta. Ne jemi në kilometrin e fundit të fitores. Këtu ne të gjithë potencialin tonë, ne jemi mirënjohës pa fund përgjigjes qytetare.

“Një thirrje kam për çdo qytetar kjo nuk është protestë kjo as për një person, as për një parti. Është protestë e ndërgjegjes qytetare, është protestë e ndërgjegjes kombëtare” tha Berisha.

/gj.m/a.f/

The post Berisha: Gazi lotsjellës i skaduar ndaj protestuesve do të denoncohet në institucionet ndërkombëtare appeared first on Agjencia Telegrafike Shqiptare.

TIRANË, 25 janar /ATSH/ Kryeministri Edi Rama ndau sot përshtypjet e vizitorëve të huaj për stendën e Shqipërisë në Panairin Ndërkombëtar të Turizmit FITUR në Madrid, ku vizitorë nga Spanja, Kina, Porto Rico, Maroku, Italia dhe vende të tjera të botës po zbulojnë pasuritë natyrore dhe kulturore të vendit tonë.

Përmes punimeve artizanale, aromave dhe shijeve autentike të produkteve dhe pijeve tradicionale, Shqipëria prezantohet si një destinacion turistik që përjetohet me të gjitha shqisat.

Vizitorët shprehën interes të madh për të vizituar vendin tonë dhe për të njohur kulturën, artizanatin, muzikën dhe qytetet historike si Berati.

Një vizitor nga Porto Rico vlerësoi stendën shqiptar si “të mrekullueshëm”, duke theksuar se koktejet dhe produktet tradicionale ishin të shkëlqyera, dhe se kishte vizituar Shqipërinë më parë dhe planifikon të kthehet këtë vit.

Një vizitore nga Kina vlerësoi punën e mjeshtërve me leshin dhe ngjyrat e artizanatit shqiptar, duke e cilësuar tërheqëse dhe motivuese për të vizituar vendin. Ajo vlerësoin gjithashtu mikpritjen, ushqimin dhe pijet tradicionale, duke shprehur dëshirën për një vizitë të afërt në Shqipëri.

Një vizitor nga Maroku ndau emocionet e tij për përputhshmërinë e veshjeve kulturore shqiptare me traditat e Marokut, duke theksuar se stenda shqiptare i kishte rikujtuar kulturën, familjen dhe shtëpinë e tij.

Ai shprehu dëshirën për të vizituar Shqipërinë për herë të parë dhe për të njohur artizanatin dhe traditat vendase.

Një turist italian u shpreh se kishte pasur një përvojë shumë pozitive gjatë turit me motoçikleta off-road në jug dhe qendër të vendit, duke kaluar përmes Vlorës, liqenit të Pogradecit dhe Tiranës, dhe kishte vlerësuar terrenin, bregdetet dhe ushqimin fantastik.

Kryeministri Rama nënvizoi se pjesëmarrja e vizitorëve të huaj në stendën e Shqipërisë tregon interesin e madh ndërkombëtar për turizmin, kulturën dhe traditat e vendit, duke promovuar Shqipërinë si një destinacion autentik dhe tërheqës për turistët nga e gjithë bota.

Pjesëmarrja e Shqipërisë në FITUR 2026 vlerësohet si një mundësi e rëndësishme për promovimin e turizmit shqiptar në tregjet ndërkombëtare, për forcimin e bashkëpunimit me operatorë turistikë dhe për rritjen e numrit të vizitorëve të huaj në vend.

Referuar të dhënave të fundit të publikuara nga Instituti i Statistikave (INSTAT) 12,466,038 shtetas të huaj kanë vizituar vendin tonë gjatë vitit që lamë pas.

Kjo shifër shënon një rritje vjetore prej 6.6% krahasuar me vitin 2024, duke dëshmuar se trendi rritës i Shqipërisë si destinacion turistik po konsolidohet.

/gj.m/a.f/

The post Vizitorë nga e gjithë bota zbulojnë pasuritë natyrore e kulturore të Shqipërisë në Panairin e Madridit appeared first on Agjencia Telegrafike Shqiptare.

TIRANË, 25 janar /ATSH/ Kryeministri Edi Rama, do të zhvillojë një vizitë pune në Jeruzalem, Izrael, më 25–27 janar, me rastin e pjesëmarrjes së tij në Konferencën Ndërkombëtare për Luftën kundër Antisemitizmit.

Në këtë vizitë, Kryeministri shoqërohet nga delegacioni shqiptar dhe bashkëshortja e tij, Linda Rama.

Ditën e hënë, më 26 janar, ora 11:00 – 12:30 Kryeministri Rama do të zhvillojë një takim kokë më kokë me Kryeministrin e Izraelit, Benjamin Netanyahu, i cili do të pasohet nga takimimes dy delegacioneve, në përfundim të të cilit do të ketë edhe deklaratë për shtyp.

Paralelisht, znj. Linda Rama, në shoqërinë e znj. Herzog, bashkëshortes së Presidentit të Izraelit, Isaac Herzog, do të zhvillojë një vizitë në Bibliotekën Kombëtare.

Në orën 14:00, Kryeministri Rama, i shoqëruar nga znj. Linda Rama, do të mbërrijë në Knesset “Plaza”, Parlamenti i Izraelit, ku do të pritet me një ceremoni të posaçme shtetërore nga Kryetari i Knessetit. Ceremonia përfshin rojet e nderit, ekzekutimin e himneve kombëtare, si dhe vendosjen e kurorave në monumentin e ushtarëve të rënë dhe në monumentin e viktimave të terrorit.

Më pas, Kryeministri Rama do të firmosë Librin e Përshtypjeve në Hollin Shagall.

Në orën 14:30, Kryeministri Rama dhe delegacioni shqiptar do të zhvillojnë një takim me Kryetarin e Knessetit, Amir Ohana.

Në orën 16:15, do të nisë seanca plenare speciale e Knessetit, e shoqëruar nga hyrja ceremoniale në sallë. Gjatë kësaj seance do të mbajnë fjalën Kryetari i Knessetit, z. Amir Ohana, Kryeministri i Izraelit, Benjamin Netanyahu, Lideri i Opozitës, Yair Lapid, si dhe Kryeministri Edi Rama, i cili do t’i drejtohet Parlamentit të Izraelit me një fjalim historik sipas protokollit të posaçëm që Knesseti u ka rezervuar një numri të kufizuar udhëheqësish të huaj dhe së fundmi Presidentit të SHBA, Donald J. Trump.

Në orën 17:15, do të zhvillohet një pritje zyrtare në nder të Kryeministrit Rama, me pjesëmarrjen e ambasadorëve dhe të ftuarve të posaçëm, në Jerusalem Hall të Knessetit.

Ndërsa, znj. Linda Rama do të ketë një takim të veçantë me gratë parlamentare.

Më 27 janar, Kryeministri Edi Rama do të marrë pjesë në Konferencën Ndërkombëtare për Luftën kundër Antisemitizmit, ku do të mbajë një fjalë, në praninë e Presidentit të Izraelit, Isaac Herzog.

Gjatë qëndrimit në Jeruzalem, Kryeministri Rama do të kryejë gjithashtu vizita simbolike në Western Wall (Muri i Lotëve) dhe në Kishën e Varrit të Krishtit.

/gj.m/a.f/

The post Kryeministri Rama vizitë në Izrael, fjalim historik në Knesset appeared first on Agjencia Telegrafike Shqiptare.

TIRANË, 25 janar /ATSH/ Efektivat e Batalionit të Forcave Speciale të Forcave të Armatosura po zhvillojnë stërvitjen dimërore 72-orëshe “Shigjeta Ilire-26” në kushte ekstreme malore, me dëborë dhe temperatura nën zero.

Shefi i Shtabit të Përgjithshëm, Gjenerallejtnant Arben Kingji, bëri të ditur se stërvitja ka për qëllim forcimin e aftësive fizike dhe psikologjike të trupave në kushte mbijetese, testimin e armatimit dhe pajisjeve të reja, si dhe rritjen e gatishmërisë dhe qëndrueshmërisë operacionale për veprime në mjedise të vështira.

Stërvitja synon përgatitjen e trupave për përmbushjen e çdo misioni me profesionalizëm të lartë, duke garantuar gatishmërinë maksimale në kushte të paparashikueshme dhe të rrezikshme.

/gj.m/a.f/

The post Batalioni i Forcave Speciale, stërvitje dimërore 72-orëshe “Shigjeta Ilire-26” appeared first on Agjencia Telegrafike Shqiptare.

TIRANË, 25 janar /ATSH/ Kryetari i Partisë Demokratike, Sali Berisha, deklaroi sot një konferencë se protesta e mbrëmshme e PD-së ishte protesta e ndërgjegjes.

Berisha theksoi se protestuesit, pjesëmarrës nga Tirana dhe qytete të tjera të vendit, dolën në rrugë për më shumë se tre orë, duke shprehur revoltën e tyre kundër qeverisjes aktuale.

“Dje për tre orë kryengritësit guximtarë morën në dorë Tiranën, bulevardin, sheshet e saj.  Në një protestë të fuqishme qindra mijëra qytetarë nga Tirana dhe mbarë Shqipëria u përballën me guxim të jashtëzakonshëm për më shumë se tre orë”, tha Berisha.

Kreu i PD shprehu nderim të madh të gjithë atyre qytetarëve djemve, vajzave, burrave dhe grave, të moshuar, që nga Tirana dhe mbarë Shqipëria protestuan në mënyrën më të vendosur.

Berisha theksoi se, protesta e tyre nuk kishte lidhje me ndërtesat, as dhe institucionet kushtetuese.

“Dje regjimi u trondit nga themelet. Dje qytetarët triumfuan në rrugë dhe sheshet e Tiranës. U bënë zëri i ndërgjegjes se njerëzve të ndershëm, të cilët nuk pajtohen kurrë me një qeveri me lidhje të tmerrshme me drogën dhe krimin. Nuk pajtohen kurrë me një qeveri që nuk del nga vullneti i tyre, por nga farsa elektorale. Nuk pajtohen kurrë me një qeveri që vjedh 97% të taksave të tyre dhe të çmendurisht të gjitha pasuritë publike”, tha Berisha.

Kreu i PD u shpreh se, dje protestuesit ishin vetë ndërgjegja e kombit në betejë.

“Ata u përcollën mesazh çdo shqiptari se nuk po luftojmë për veten tonë, se nuk po luftojmë për Sali Berishën, se nuk po luftojmë për Partinë Demokratike, as dhe parti të tjera, se po luftojmë për ndërgjegjen e njeriut, për dinjitetin njerëzor, për interesin kombëtar”, theksoi Berisha.

“Po luftojmë dhe për ju që po na ndiqni në televizione, po luftojmë dhe për ju që mund të mos u pëlqejë protesta. Në fakt, po luftojmë dhe do luftojmë për çdo shqiptar. Kjo është veçantia e kësaj proteste.  Kjo është protesta e ndërgjegjes dhe nuk ka asgjë më të fuqishme, nuk ka asgjë më të pathyeshme, nuk ka asgjë më të pamposhtur se sa ajo që buron nga ndërgjegja e njeriut”, tha Berisha.

/gj.m/a.f-

The post Berisha: Protestuesit ishin ndërgjegja e kombit në betejë, regjimi u trondit appeared first on Agjencia Telegrafike Shqiptare.

TIRANË, 25 janar /ATSH/ Kryeministri Edi Rama kishte të ftuara sot në podkastin “FLASIM – Episodi 3, Sezoni 6” dy motra kineaste shqiptare nga Vlora, Vilma dhe Greta, të cilat jetojnë dhe veprojnë në Los Angeles të Shteteve të Bashkuara të Amerikës, ku merren me prodhimin e filmave.

Gjatë bisedës, Rama vlerësoi historinë e tyre si një shembull pozitiv të energjisë krijuese të shqiptarëve jashtë vendit, duke theksuar se ato kanë arritur ta shndërrojnë pasionin për artin dhe filmin në një burim frymëzimi dhe energjie pozitive.

Vilma dhe Greta sipas Kryeministrit, ruajnë me krenari identitetin e tyre kulturor, ndërkohë që janë të integruara dhe aktive në industrinë kinematografike amerikane.

Dy motrat kanë prodhuar deri më tani katër filma dhe bashkëpunojnë me platformën “Amazon Prime” në Shtetet e Bashkuara, duke shënuar një tjetër sukses të diasporës shqiptare në fushën e industrisë kreative dhe kinematografisë. Ato kanë fituar gjithashtu çmime në disa festivale kinematografike ndërkombëtare.

Gjatë podkastit u bë e ditur se Vilma dhe Greta ndodhen aktualisht në Shqipëri për përgatitjen e një filmi artistik mbi jetën e Nënë Terezës.

“Kemi një skenar interesant, të bazuar në jetën e saj. Shumë njerëz mendojnë se Nënë Tereza është nga India apo Italia dhe jo nga Shqipëria. Ne duam të tregojmë se si u formua ajo si Nënë Tereza, duke u fokusuar te fëmijëria dhe rrënjët e saj”, u shprehën ato.

Sipas kineasteve, po shqyrtohen disa lokacione për xhirime, përfshirë Shkupin dhe Shkodrën, duke vlerësuar veçanërisht arkitekturën e vjetër të Shkodrës, e cila ruan ngjashmëri me periudhën e Perandorisë Osmane dhe përmban ende banesa tradicionale të kohës.

Rama theksoi se histori të tilla janë dëshmi e potencialit të shqiptarëve kudo që ndodhen dhe e rolit të rëndësishëm që diaspora luan në promovimin e imazhit të Shqipërisë në botë.

/gj.m/a.f/

The post Fituese të çmimeve në SHBA, dy kineaste shqiptare po përgatisin film për Nënë Terezën appeared first on Agjencia Telegrafike Shqiptare.

TIRANË, 25 janar /ATSH/ Prokuroria pranë Gjykatës së Shkallës së Parë të Juridiksionit të Përgjithshëm Tiranë, përfundoi hetimet dhe dërgon në gjyq 6 shtetas për veprat penale ‘Falsifikim i letërnjoftimeve, pasaportave ose vizave’, ‘Falsifikim i dokumentit’ si dhe ‘Ndihma për kalim të paligjshëm të kufijve’.

Nga hetimet të nisura mbi bazën e materialeve të referuara nga Departamenti i Policisë Kriminale pranë Drejtorisë së Përgjithshme të Policisë së Shtetit dhe Shërbimit Diplomatik/ Zyra për Hetimet kriminale jashtë SHBA-së, rezultoi se shtetasi A.H., së bashku me disa shtetas te tjerë shqiptarë janë kontrabanduar në rajonin e Karaibeve, me qëllim më pas për të kaluar ilegalisht në Shtetet e Bashkuara të Amerikës.

Sipas të dhënave, personi i dyshuar që ka organizuar këtë aktivitet është shtetasi shqiptar H.M. alias A. M., i hetuar më parë me të njëjtin aktivitet të kontrabandës njerëzore.

Të dhënat tregojnë se ky shtetas u ka kërkuar të paktën tre shqiptarëve që për t’i dërguar në Amerikë dhe Kanada të paguajnë çmimin prej 35.000 dollarësh. Intinerari që ndjek ky shtetas për të kontrabanduar njerëz fillon nga Shqipëria ku rekrutohen dhe më pas nga vendet e Europës drejt Republikës Domenikane, e prej andej me dokumente false drejt Kanadasë ose nëpërmjet Porto Rikos duke përdorur dokumente udhëtimi false për në Florida ose në shtete të tjera të ShBA-së.

Nga hetimet, rezultoi e provuar se shtetasi H.M. ka pajisur me dokumenta të falsifikuara disa shtetas shqiptarë për t’u larguar në mënyrë të paligjshme drejt SHBA-së dhe ka konsumuar elementet  e veprës penale të “Falsifikim i letërnjoftimeve, pasaportave ose vizave”, “Falifikim i dokumentit” si dhe “Ndihma për kalim të paligjshëm të kufijve”, e provuar në disa raste. Po ashtu nga interceptimet telefonike është provuar se shtetasi H. M., gjatë kohës që është duke u hetuar me masë sigurie “Arrest në burg” nga ambientet e paraburgimit të Fushë-Krujës ka përdorur dy numra të ndryshëm për të komunikuar me familjarët e tij, duke konsumuar në këtë mënyrë elementët e veprës penale “Futja ose mbajtja e sendeve të ndaluara në institucionin e ekzekutimit të vendimeve me burgim” më shumë se një herë.

Nga veprimet e kryera janë mbledhur prova se edhe shtetasja L.M., është e përfshirë në aktivitetin e bashkëshortit të saj me veprime konkrete si në shoqërimin në udhëtimin e tyre për në Republikën Domenikane si dhe duke përfshirë në bashkëpunim edhe vëllain e saj A.P., në marrjen e porosive nëpërmjet linjave të udhëtimit Tropojë -Tiranë. Ajo ka konsumuar veprën penale të “Falsifikim i letërnjoftimeve, pasaportave ose vizave”, “Falifikim i dokumentit” si dhe “Ndihma për kalim të paligjshëm të kufijve”.

Nga këqyrja e të dhënave telefonike, është provuar se shtetasi E.N. i punësuar pranë agjencisë turistike, ka ndihmuar duke i vënë në dispozicion foto të dokumenteve të dy shtetasve të huaj, me qëllim që shtetasi H.M., ky i fundit të mundësojë kalimin e shtetasve të ndryshëm duke përdorur dokumenta model. Mënyrë kjo, e përdorur në disa raste nga shtetasi H. M.,  janë konsumuar elementët e veprës penale të “Ndihmë për kalim të paligjshëm të kufirit”.

Po kështu shtetasi A.P., në bashkëpunim me të afërmit e tij me veprime konkrete ka marrë dokumenta të falsifikuara që do të mundësonin kalimin në mënyrë të kundërligjshme të një shtetasi duke konsumuar elementët e veprave penale “Falsifikim i letërnjoftimeve, pasaportave ose vizave”, “Falifikim i dokumentit” si dhe “Ndihma për kalim të paligjshëm të kufijve”.

Ndërsa shtetasi C.N., duke qenë shofer automjeti ka mundësuar transportin e dokumentave të falsifikuara duke konsumuar elementët e veprës penale të “Falsifikim i leternjoftimeve, pasaportave ose vizave”, “Falifikim i dokumentit”.

Shtetasi A.M., duke i vënë në dispozicion të hetuarit H. M., të dhënat e pasaportës/pasaportën e tij Britanike si model për të prodhuar dokumenta të tjera të falsifikuara, për të bërë të mundur një mënyrë më të sigurtë kalimi për shtetas të tjerë për të ikur në Kanada dhe me këto veprime ka konsumuar elementët e veprës penale të “Ndihma për kalim të paligjshëm të kufijve”.

Sa më sipër, Prokuroria pranë Gjykatës së Shkallës së Parë të Juridiksionit të Përgjithshëm, Tiranë kërkoi dërgimin në gjyq e të pandehurve: H.M; L.M, A.P, C.N, A.M, dhe E.N.

/gj.m/a.f/

The post Ofronin kalim të paligjshëm drejt SHBA-së kundrejt 35 mijë eurove, Prokuroria dërgon në gjyq 6 persona” appeared first on Agjencia Telegrafike Shqiptare.

TIRANË, 25 janar /ATSH/ Kryeministri Edi Rama deklaroi sot se viti 2026 përbën një moment kyç për negociatat e anëtarësimit të Shqipërisë në Bashkimin Europian, duke e cilësuar këtë periudhë si vendimtare për ecurinë e procesit dhe për të ardhmen europiane të vendit.

Gjatë podkastit “FLASIM – Episodi 3, Sezoni 6”, Rama u shpreh se ky vit kërkon përkushtim maksimal në zbatimin konkret të reformave, përtej miratimit të tyre formal.

“Ky është një vit kyç për negociatat e anëtarësimit në Bashkimin Europian. Është një moment vendimtar për procesin dhe për përparimin e Shqipërisë në rrugën e negociatave”, theksoi Rama.

Në këtë kuadër, Kryeministri bëri të ditur se gjatë kësaj jave është prezantuar një paketë e re me rreth një duzinë nismash ligjore, të orientuara drejt forcimit të shtetit të së drejtës, rritjes së transparencës dhe përafrimit të mëtejshëm të legjislacionit shqiptar me standardet e Bashkimit Europian.

Sipas tij, këto nisma përfshijnë fusha thelbësore si lufta kundër korrupsionit, mbrojtja e të drejtave të njeriut, forcimi i institucioneve dhe garantimi i funksionimit efektiv të shtetit ligjor.

Rama theksoi se reformat nuk duhet të mbeten thjesht detyrime në letër që burojnë nga procesi i negociatave, por duhet të shndërrohen në investime konkrete për rritjen e besimit të qytetarëve dhe për përmirësimin e funksionimit të institucioneve.

“Këtë javë, pikërisht për këtë arsye, është prezantuar edhe paketa e re, me një duzinë nismash ligjore që shkojnë në drejtim të forcimit të shtetit të së drejtës, rritjes së transparencës dhe përafrimit të mëtejshëm të legjislacionit me standardet e Bashkimit Evropian dhe këto janë nisma që përfshijnë fusha thelbësore si; lufta kundër korrupsionit, mbrojtja e të drejtave të njeriut, forcimi i institucioneve, dhe nuk janë thjesht detyrime në letër, që natyrisht janë edhe detyrime në kartën e ligjit që burojnë nga negociatat, por janë dhe një investim i mëtejshëm në besimin e qytetarëve dhe në funksionimin e shtetit ligjor”, u shpreh Rama.

“Ky është një vit kur Shqipëria duhet me patjetër të provojë se është e gatshme, jo vetëm t’i kalojë reformat, por dhe t’i jetësojë ato, duke pasur parasysh që të gjithë çdo ditë, në çdo hap, se ky moment nuk mund të humbet”, theksoi kreu i qeverisë.

/gj.m/a.f/

The post Rama: Viti 2026, vendimtar për të dëshmuar gatishmërinë e Shqipërisë për integrimin në BE appeared first on Agjencia Telegrafike Shqiptare.

TIRANË, 25 janar /ATSH/ Kryeministri Edi Rama deklaroi sot se drejtësia për ngjarjet e 21 janarit nuk mund dhe nuk duhet të harrohet, duke e cilësuar atë si një krim shtetëror që mbetet një plagë e hapur për drejtësinë shqiptare.

Gjatë podkastit “FLASIM – Episodi 3, Sezoni 6”, Rama u shpreh se 15 vite pas vrasjes së katër protestuesve më 21 janar, hija e padrejtësisë vijon të rëndojë mbi shoqërinë dhe institucionet e drejtësisë në Shqipëri.

“Kjo ishte edhe java e trishtë e 21 Janarit, 15 vite pas krimit shtetëror, vrasjes së katër burrave të pafajshëm protestues, tërësisht paqësor, me pushkët e shtetit në bulevard dhe përsëri 21 janari erdhi me hijen përqeshëse të padrejtësisë”, u shpreh Rama.

“Kjo mbeti një plagë e hapur, jo thjesht për familjarët e dëshmorëve të 21 Janarit, por kjo mbeti një plagë e hapur për moralin e drejtësisë në Shqipëri dhe për themelet e drejtësisë së shtetit shqiptar”, tha Kryeministri.

Ai theksoi se përkujtimi i katër Dëshmorëve të Atdheut u zhvillua edhe këtë vit në praninë e familjarëve të tyre, të cilët, sipas tij, vijojnë të presin vendosjen e drejtësisë.

“Ne përsëri u mblodhëm dhe e bëmë ritin e nderimit në kujtim të katër Dëshmorëve të Atdheut në praninë e familjarëve të tyre, të cilët presin, presin, presin drejtësi”, u shpreh Rama.

Rama e cilësoi 21 janarin si një nga ato krime shtetërore për të cilat drejtësia mund të vonojë, por që nuk zhduken as nga kujtesa kolektive dhe as nga përgjegjësia e institucioneve të drejtësisë.

Kryeministri nënvizoi se, “21 janari është në llojin e atyre krimeve që unë i kam thënë qysh krye të herës: Janë krime shtetërore për të cilat drejtësia vonon, por asnjëherë nuk harron. Krimet shtetërore duan kohë të zbardhën, por koha nuk i zhbën dot nga kujtesa. dhe nga tryeza e njerëzve të drejtësisë”.

Në këtë kuadër, Kryeministri shprehu pritshmërinë që Prokuroria e Posaçme (SPAK) të veprojë për zbardhjen e plotë të ngjarjes, duke theksuar se kjo çështje përbën një njollë për drejtësinë shqiptare dhe se mosveprimi do të rëndonte edhe mbi vetë institucionin.

“Uroj, shpresoj që SPAK-u, i cili prej gjashtë vjetësh ka marrë jetë dhe gëzon mbështetjen e padiskutueshme dhe ka pasur gjatë gjithë kohës inkurajimet më të sinqerta për të shkuar përpara, për të luftuar për të vendosur drejtësinë përfundimisht në binarët e rinj të barazisë para ligjit për të gjithë, – të zgjohet dhe të bëjë më në fund punën e vet mbi këtë krim, që është një njollë për drejtësinë shqiptare dhe nuk duhet lejuar që të bëhet njollë, sepse do të jetë e pashlyshme, për vetë SPAK”, theksoi Rama.

/gj.m/a.f/

The post Rama për “21 Janarin”: Njollë për drejtësinë shqiptare, SPAK-u të zgjohet appeared first on Agjencia Telegrafike Shqiptare.

TIRANË, 25 janar /ATSH/ Kryeministri Edi Rama reagoi sot ndaj protestës së mbrëmshme të opozitës, duke e krahasuar atë me forma të dhunës së organizuar që, sipas tij, nuk kanë precedent në Europën demokratike nga koha e partive famëkeqe të shekullit të kaluar.

Në reagimin e tij në rrjetin social X, Rama thekson se në vende të ndryshme europiane ka protesta nga grupe të llojeve të ndryshme, nga ekologjistë e studentë, deri te ekstremistë, por nënvizon se vetëm një parti parlamentare, sipas tij, e ka dhunën si pjesë të pandarë të aktivitetit politik që nga lindja e saj.

“Ka në Europë protestues, anarkistë, ekologjistë, ekstremistë të djathtë a të majtë, studentë, anti-globalistë, tifozë huliganë, grupime lloj-lloj që dalin në rrugë për arsyet e tyre, maskohen, armatosen me molotovë dhe thyejnë e djegin, duke plagosur punonjës policie e shkatërruar prona…”, shkruan Rama

Kryeministri akuzoi organizatorët e protestës për shkatërrim prone, sulme ndaj institucioneve dhe përdorim të personave të maskuar e të rekrutuar për akte dhune, duke i cilësuar protestat si shfaqje dëshpërimi dhe degjenerimi politik.

“Po qysh nga koha e partive famëkëqia të 100 vjetëve më parë në Gjermani e Itali, ka vetëm një parti parlamentare në Europë, që të ketë në programin e aktivitetit të saj si pjesë të pandarë të ekzistencës së vet qysh nga lindja, ushtrimin e dhunës, shkatërrimin e pronës, sulmin ndaj godinave të institucioneve, deri edhe ndaj godinës së vet, mobilizimin e paramilitarëve, të cilët deri dje ishin çeta e liderit shpirtëror, kurse tanimë janë thjesht mercenarë të rekrutuar me lekë nga rrugaçët e lagjeve, që veshin maska apo fshehin fytyrën pas tabelave për të mbaruar punë me hedhjen e molotovëve pa u identifikuar nga kamerat”, thekson Rama.

“Tanimë këto farë protestash me pisllëkun që krijojnë në bulevard, ngjajnë si jashtëderdhja në rrugë e plakut të lajthitur që i organizon… Degjenerim i pandalshëm dhe dëshpërim i pangushëllueshëm”, nënvizon Rama.

Ai shpreh gjithashtu solidaritet me punonjësit e Policisë së Shtetit që mbetën të plagosur gjatë protestës, duke u uruar shërim të shpejtë dhe duke dënuar ashpër dhunën ndaj forcave të rendit.

“Të shkuara punonjësve të policisë që u plagosën e lënduan nga kjo lukuni e verbër”, përfundon reagimin kryeministri Rama.

1 nga 4

/gj.m/a.f/

The post Rama: Protesta e opozitës, degjenerim i pandalshëm dhe dëshpërim i pangushëllueshëm appeared first on Agjencia Telegrafike Shqiptare.

TIRANË, 25 janar /ATSH/ Shoqata Amerikano-Shqiptare e Zbatimit të Ligjit (AALEA) ka shprehur solidaritet dhe mbështetje të plotë për Policinë e Shtetit Shqiptar, duke dënuar ashpër aktet e dhunës ndaj punonjësve të policisë gjatë ngjarjeve të fundit në Tiranë.

Në një reagim zyrtar, AALEA e cilëson sulmin ndaj oficerëve të Policisë si një akt brutal dhe të papranueshëm, duke theksuar se dhuna ndaj atyre që shërbejnë për mbrojtjen e rendit publik dhe sigurisë së komuniteteve duhet të marrë përgjegjësinë e plotë ligjore.

Shoqata shpreh respektin dhe mbështetjen më të thellë për punonjësit e Policisë së Shtetit të lënduar gjatë tubimit, si dhe për familjet e tyre, duke vlerësuar guximin, përkushtimin dhe sakrificën e tyre si burim krenarie për shqiptarët kudo në botë.

AALEA gjithashtu nderon shërbimin e punonjësve të Policisë së Shtetit dhe lutet për shërim të plotë dhe të shpejtë të oficerëve të lënduar, duke ritheksuar mbështetjen e saj të palëkundur ndaj institucioneve të zbatimit të ligjit në Shqipëri.

“Ne nderojmë shërbimin e tyre dhe lutemi për shërimin e tyre të plotë dhe të shpejtë:, thekson AALEA.

“Për Policinë e Shtetit Shqiptar: nuk jeni vetëm. Komuniteti amerikan-shqiptar i zbatimit të ligjit qëndron me ju në solidaritet, sot dhe përherë. Ne do të vazhdojmë të mbështesim misionin tuaj për të mbrojtur dhe shërbyer, dhe kurrë nuk do të harrojmë guximin e atyre që qëndrojnë në vijën e parë të sigurisë publike”, thuhet në reagim.

/gj.m/a.f/

The post Protesta, shoqata Amerikano-Shqiptare e zbatimit të ligjit dënon dhunën ndaj Policisë së Shtetit appeared first on Agjencia Telegrafike Shqiptare.

TIRANË, 23 janar /ATSH/ Ministri i Shtetit për Evropën në Ministrinë e Jashtme Federale, Gunther Krichbaum zhvilloi biseda politike sot në Tiranë.

Ai u takua me kryeministrin Edi Rama, ministren e Shtetit për Administratën Publike dhe Antikorrupsionin, Adea Pirdeni, zv.ministren e Jashtme, Megi Fino, bashkëkryetarët e Këshillit Kombëtar për Integrimin Evropian, Taulant Balla dhe Jorida Tabaku, kryetarin e grupit parlamentar të Partisë Demokratike Gazment Bardhi si dhe me drejtuesin e Prokurorisë së Posaçme SPAK, Klodian Braho.

Në fokus të bisedave të tij ishte procesi i anëtarësimit të Shqipërisë në BE si dhe fuqizimi i shtetit të së drejtës, lufta kundër korrupsionit dhe krimit të organizuar.

Në mbyllje të bisedave ministri i Shtetit, Krichbaum u shpreh se, “për shkak se ne duam ta shohim Shqipërinë në Bashkimin Evropian jemi njëkohësisht mik, mbështetës dhe kritik në rrugën e saj drejt BE-së”.

“Ne shohim potencialin tejet të madh dhe përpjekjet e Shqipërisë për reforma, por edhe sfidat kombëtare, rajonale dhe ndërkombëtare në procesin e anëtarësimit në BE. Edhe për këtë arsye ishte e rëndësishme për mua të zhvilloja biseda të drejtpërdrejta me qeverinë shqiptare, parlamentin dhe drejtësinë”, tha ai.

“Shqipëria gjendet aktualisht në një moment vendimtar: rruga e nisur në drejtim të BE-së  duhet të çohet përpara me vendosmëri, duke zbatuar në këtë kontekst në mënyrë të vendosur reformat e radhës, veçanërisht në fushën e shtetit të së drejtës, dhe  luftën e palëkundur kundër krimit të organizuar dhe korrupsionit”, theksoi Krichbaum.

Për këtë qëllim, vijoi ai, “lipset vijimi i guximshëm i rrugës së reformave, si dhe përfshirja, por edhe bashkëveprimi konstruktiv i të gjithë aktorëve dhe institucioneve në kuadër të përgjegjësive të tyre kushtetuese”.

/gj.m/r.e/a.f/

The post Krichbaum takim me Ramën: Duam ta shohim Shqipërinë në BE appeared first on Agjencia Telegrafike Shqiptare.

TIRANË, 23 janar /ATSH/ Kryetarja e Gjykatës Kushtetuese, Fiona Papajorgji priti sot në një takim zyrtar ambasadorin e Prezencës së OSBE-së në Shqipëri, Michel Tarran.

Gjatë takimit, Papajorgji e falënderoi ambasadorin Tarran për bashkëpunimin shumë të frytshëm dhe të vazhdueshëm ndërmjet Gjykatës Kushtetuese dhe Prezencës së OSBE-së në Shqipëri, duke e vlerësuar këtë të fundit si një partner ndërkombëtar mjaft të rëndësishëm në mbështetje të veprimtarisë dhe strategjisë institucionale të Gjykatës.

Papajorgji theksoi kontributin e çmuar të OSBE-së në forcimin e kapaciteteve, si dhe shprehu vullnetin për thellimin e mëtejshëm të bashkëpunimit, veçanërisht në drejtim të projekteve konkrete dhe iniciativave praktike me interes të përbashkët.

Nga ana e tij, ambasadori Tarran përgëzoi kryetaren Papajorgji për marrjen e kësaj detyre të lartë dhe shprehu vlerësimin e tij për bashkëpunimin me Gjykatën Kushtetuese, si një prej institucioneve më të rendësishme shtetërore.

Ai theksoi rolin thelbësor të Gjykatës Kushtetuese në garantimin e parimeve themelore të shtetit të së drejtës, në mbrojtjen e Kushtetutës dhe të të drejtave themelore të njeriut, si dhe në përparimin e procesit të integrimit të Shqipërisë në Bashkimin Europian.

Ambasadori Tarran riafirmoi angazhimin e Prezencës së OSBE-së në Shqipëri për të vijuar mbështetjen ndaj Gjykatës Kushtetuese, përmes asistencës teknike dhe projekteve të përbashkëta, duke shprehur besim të plotë në forcimin e mëtejshëm të këtij bashkëpunimi në të ardhmen.

1 nga 2

/gj.m/r.e/a.f/

The post Papajorgji pret Tarran: “Kushtetuesja”, bashkëpunim të frytshëm me OSBE-në appeared first on Agjencia Telegrafike Shqiptare.

TIRANË, 23 janar /ATSH/ Ministrja për Evropën dhe Punët e Jashtme, Elisa Spiropali, po merr pjesë në Takimin e Ministrave të Jashtëm të Platformës për Paqe Ballkanike, me ftesë të homologut të saj, Ministrit të Jashtëm të Republikës së Turqisë, Hakan Fidan.

Platforma do të fokusohet në avancimin e bashkëpunimit rajonal për ndërlidhjen, zhvillimin ekonomik, sigurinë energjetike, integrimin europian, paqen rajonale.

Ministrja Spiropali njoftoi se “në cilësinë edhe të Anëtarit të Bordit Ekzekutiv të Paqes, kolegu Fidan prezantoi rëndësinë e këtij mekanizmi të ri të krijuar nga Presidenti Trump për ndërtimin e paqes së qëndrueshme në një kohë sfidash”.

Spiropali shtoi se “Shqipëria është gjithashtu gati për të marrë përgjegjësitë e saj si Anëtar Themelues i Bordit të Paqes”.

Bashkëpunimi me aleatët tanë strategjikë, Shtetet e Bashkuara të Amerikës dhe partnerë të tjerë, sipas Spiropalit, do të çelë një kapitull të ri në historinë e zgjidhjes së konflikteve ndërkombëtare.

Më herët Spiropali zhvilloi një takim me ministrin Fidan, për partneritetin strategjik në rritje mes Shqipërisë dhe Turqisë, që do të marrë një tjetër peshë me takimin e tretë të Këshillit të Nivelit të Lartë për bashkëpunimin ndërsektorial mes dy vendeve tona, përgjatë këtij viti.

/gj.m/a.f/r.e/

The post Spiropali nga Stambolli: Shqipëria gati për të marrë përgjegjësitë si Anëtare Themeluese e Bordit të Paqes appeared first on Agjencia Telegrafike Shqiptare.

TIRANË, 23 janar /ATSH/ Komiteti Olimpik Kombëtar Shqiptar (KOKSh) ka shprehur ngushëllimet për ndarjen nga jeta, në moshën 73-vjeçare, të një prej figurave të shquara të basketbollit shqiptar, Spiro (Pirro) Koleka.

Në një mesazh ngushëllimi, KOKSh vlerëson kontributin e Kolekës si pjesë e “brezit magjik” të ekipit “17 Nëntori” (sot KS Tirana) në vitet ’70, një periudhë e artë për basketbollin shqiptar, ku ai la gjurmë të pashlyeshme me talentin dhe përkushtimin e tij.

Më pas, Spiro Koleka e çoi përvojën dhe pasionin për basketbollin edhe në arenën ndërkombëtare, duke ushtruar me sukses detyrën e trajnerit në kampionatin italian, ku drejtoi skuadrën e njohur Victoria Libertas Pesaro.

Sipas KOKSh-it, kontributi i tij në sport, profesionalizmi dhe dashuria e palëkundur për basketbollin do të mbeten një frymëzim i qëndrueshëm për brezat e rinj të sportistëve shqiptarë.

Komiteti Olimpik Kombëtar Shqiptar i shpreh ngushëllimet më të sinqerta familjes Koleka, miqve dhe gjithë komunitetit sportiv për këtë humbje të madhe.

Spiro (Pirro) Koleka do të kujtohet si një emër i respektuar dhe një mjeshtër i vërtetë i basketbollit shqiptar.

/gj.m/r.e/a.f/

The post Vdes ish-basketbollisti Spiro (Pirro) Koleka, KOKSH: Pjesë e “brezit magjik” të “17 Nëntorit” appeared first on Agjencia Telegrafike Shqiptare.