TIRANË, 28 janar/ATSH/ Ministrja e Punëve të Brendshme, Albana Koçiu po zhvillon vizitë zyrtare në Shkup, ku u takua me ministrin e Punëve të Brendshme të Maqedonisë së Veriut, Pançe Toshkovski.

Takimi zhvillohet në kuadër të forcimit të mëtejshëm të bashkëpunimit dypalësh dhe u pasua nga një deklaratë e përbashkët për shtyp.

Ministrja Koçiu theksoi se Shqipëria dhe Maqedonia e Veriut janë dy vende partnere, të lidhura nga një hapësirë e përbashkët gjeografike, interesa të përbashkëta dhe aspirata të njëjta europiane, si vende kandidate për anëtarësim në Bashkimin Europian.

Koçiu nënvizoi se lehtësimi i burokracive dhe procedurave për qytetarët dhe biznesin është një hap i domosdoshëm dhe praktik në funksion të së ardhmes së përbashkët europiane.

Dy homologët diskutuan shndërrimin e pikës ekzistuese të kontaktit, në një Qendër të plotë të Bashkëpunimit Policor dhe Doganor, e cila do të funksionojë 24/7 dhe do të mundësojë koordinim në kohë reale mes strukturave përkatëse.

“Një qendër e tillë do të rrisë ndjeshëm sigurinë, duke forcuar kapacitetet kundër migracionit të paligjshëm, kriminalitetit dhe kontrabandës, si dhe do të shkurtojë burokracitë dhe kohën e pritjes në kufi”, tha Koçiu.

Ministrja bëri me dije se vetëm gjatë një viti janë regjistruar rreth 5 milionë kalime dhe rreth 1.8 milionë automjete në kufirin mes dy vendeve, çka e bën edhe më të domosdoshëm përmirësimin e procedurave dhe infrastrukturës kufitare.

Një tjetër temë e rëndësishme e diskutuar ishte replikimi i modelit të suksesshëm “One Stop Shop” për kontrollin e unifikuar kufitar në të gjitha pikat e kalimit, para sezonit veror, si dhe lehtësimi i procedurave gjatë sezonit turistik.

Po ashtu, u diskutua rritja e patrullimeve të përbashkëta në Liqenin e Ohrit dhe zhvillimi i projekteve të tjera të përbashkëta në fushën e sigurisë.

Në përfundim, ministrja Koçiu vlerësoi gatishmërinë e plotë të palës maqedonase për të forcuar më tej partneritetin dypalësh, duke falënderuar ministrin Toshkovski dhe duke e ftuar për një vizitë të afërt në Tiranë.

Koçiu shprehu gjithashtu mirënjohjen për ekipet e OSBE-së, për mbështetjen e vazhdueshme në shndërrimin e ideve në mekanizma konkretë bashkëpunimi dhe në përafrimin me standardet më të mira europiane në fushën e sigurisë.

/k.s/j.p/

The post Koçiu me homologun maqedonas: Forcim i bashkëpunimit policor, lehtësi për kalimet kufitare appeared first on Agjencia Telegrafike Shqiptare.

TIRANË, 28 janar/ATSH/ Për shkak të motit të keq Kapiteneria e Portit të Vlorës ka ndaluar pajisjen me leje nisjeje të mjeteve të vogla lundruese dhe të atyre të peshkimit për 24 orë.

Sipas njoftimit për shtyp, në bazë të parashikimit për situatën hidrometeorologjike detare moti do të përkeqësohet brenda dhe jashtë gjirit të Vlorës, ku era do të fryjë në drejtimin jug-juglindje në forcën deri 6-7bft me shpejtësi ere deri në 15-25m/s dhe lartësi dallge nga 1.50 deri 2.50 metra.

Kapiteneria e Portit Vlorë ka ndaluar pajisjen me leje-nisje të mjeteve të vogla lundruese dhe ato të peshkimit, të cilat duan të operojnë brenda gjirit të Vlorës dhe në det të hapur sot dhe nesër.

Me qëllim parandalimin e çdo situate të papritur për shkak të kushteve atmosferike, Kaiteneria e Vlorës kërkon bashkëpunimin e të gjithë subjekteve dhe institucioneve që ushtrojnë veprimtari në fushën e detarisë për të marrë të gjitha masat e nevojshme për sigurimin e mjeteve në port dhe rritje e gatishmërisë së ekuipazhit në mjetet lundruese.

Anijet e transportit ndërkombëtar detar do të vazhdojnë të operojnë normalisht sipas destinacioneve përkatëse.

Përmirësimi i situatës hidrometeorologjike të përkeqësuar të parashikuar për mjetet e vogla lundruese dhe ato të peshkimit do të jetë më 29 janar mbas orës 06:00.

/k.s/j.p/

The post Moti i keq në Vlorë, pezullohet lundrimi i mjeteve të vogla appeared first on Agjencia Telegrafike Shqiptare.

TIRANË, 28 janar/ATSH/ Ministri i Shtetit për Pushtetin Vendor, Ervin Demo tha sot se procesi i integrimit sjell shumë sfida edhe për bashkitë.

Në një konferencë për shtyp lidhur me politikat konkrete, investimet strategjike dhe nismat ligjore, nga Paketa e Maleve dhe Granti i Performancës te digjitalizimi për bashki më transparente dhe më pranë qytetarëve, Demo u ndal tek procesi i negociatave dhe sfidat që paraqet për njësitë e pushtetit vendor.

“Agjenda ambicioze që ne kemi që deri në 2027 do të përmbyllim kapitujt në vetvete do të sjellë një dallgë të madhe rregullative, e cila duhet përkthyer në standarde të reja në nivel vendor dhe patjetër me përgjegjësi të reja”, u shpreh Demo.

Ministri Demo vuri në dukje se “qeveria qendrore është këtu për të mbështetur bashkitë aty ku duhet edhe me financat, të cilat janë të domosdoshme për të arritur këto standarde”.

Por, vijoi Demo, Akademia e Pushtetit Lokal dhe nisma të tjera janë pararojë një përgatitje që ne po bëjmë që kur kjo dallgë të vijë bashkitë të jenë gati që të ballafaqohen me këto sfida dhe patjetër të arrijnë që të përthithin jo thjesht përgjegjësitë, por të jenë gati nesër që të jenë konkurruese sa i përket financimit që do të vijë momentin që ne jemi pjesë e BE-së.

Demo u shpreh se “kemi nxjerrë mësime të qarta nga të gjitha vendet që kanë aderuar në BE në vitet e para qartazi është konstatuar një mungesë kapaciteti sidomos në nivel vendor të përthithjes së fondeve që vijnë nga mbështetja financuar nga fondet e kohezionit që është kapitulli 22 nga BE”.

Kjo, vijoi Demo, përgjithësisht ka të bëjë me parapërgatitjen që këto institucione duhet të kenë.

“Duket sikur ka shumë kohë përpara, por më besoni procesi është shumë kompleks, vetvetiu bashkitë kanë karakteristikat e tyre, të cilat e bëjnë ndonjëherë procesin edhe më kompleks. Sfidat e burimeve njerëzore janë aty, ne jemi të gjithë të ndërgjegjshëm ndaj mundohemi që me instrumentet e rinj që kemi duke garantuar nëpërmjet Akademisë së Pushtetit Lokal, fuqizimin e burimeve njerëzore dhe përgatitjet e tyre më të mira për sfidat siç mund të jetë procesi i integrimit dhe jo vetëm, por patjetër granti i performancës do të bëjë të mundur transformmin institucional që bashkitë të jenë gati për atë çfarë ne presim”, tha Demo.

/k.s/j.p/

The post Demo: Përgatitje bashkive për sfidat e negociatave me BE-në appeared first on Agjencia Telegrafike Shqiptare.

TIRANË, 27 janar/ATSH/ Kryetari i grupit parlamentar të Partisë Socialiste, Taulant Balla, reagoi ashpër ndaj kritikave të opozitës për ndryshimet e propozuara në Kodin Penal, duke i cilësuar ato si keqinterpretime dhe dezinformim të qëllimshëm.

Balla theksoi se procesi i hartimit të këtyre ndryshimeve ka qenë i gjatë dhe gjithëpërfshirës, i mbështetur në punën e ekspertëve të Kuvendit dhe të qeverisë, dhe se çdo dispozitë është dakordësuar germë për germë me Bashkimin Evropian.

Duke u ndalur te çështja e shpifjes dhe marrëdhënia e saj me mediet, Balla hodhi poshtë akuzat se ligji synon të mbrojë politikanët, duke theksuar se nuk bëhet fjalë për amnisti personale apo politike, por për një qasje parimore që ndan qartë përgjegjësitë mes politikanëve dhe gazetarëve.

Balla akuzoi opozitën se po kërkon të përdorë ligjin për të zgjidhur konfliktet e saj të brendshme dhe personale, duke folur hapur për konflikt interesi dhe hipokrizi politike.

Në të njëjtën kohë, kryetari i grupit parlamentar të PS u ndal edhe te debati për parkimin e dyfishtë, duke theksuar se nuk bëhet fjalë për ndëshkim arbitrar të qytetarëve, por për masa që synojnë mbrojtjen e jetës dhe sigurinë publike, veçanërisht në rastet kur bllokohen ambulancat dhe mjetet zjarrfikëse.

“Më mirë paguan 10 000 lekë gjobë për parkim dyfish sesa ta çosh ta parkosh makinën në vendparking. Madje është në modë që po e ke makinën nga këto të shtrenjtat, duhet ta vësh tresh që të bjerë në sy. Jetohet edhe pa parkim dyfish, por jeta e atyre njerëzve që rrezikohet nëse vonohet ambulanca, nëse vonohet makina zjarrfikëse, ajo nuk kthehet dot mbrapsht. Prandaj është ardhur me një propozim që t’u bëhet e qartë të gjithëve, kapadainjve, që nëse ti e parkon dyfish dhe ky “Benz”-i jot, ky “Ferrari” jot, i zë rrugën ambulancës, i zë rrugën makinës zjarrfikëse, bëje mend mirë, dëgjoje mirë”, theksoi Balla.

Në fund të fjalës së tij, Balla theksoi se ndryshimet në Kodin Penal janë pjesë e një pakete më të gjerë ligjore për forcimin e luftës kundër krimit të organizuar, pastrimit të parave, terrorizmit, trafikut të qenieve njerëzore dhe abuzimit seksual të fëmijëve, duke paralajmëruar se çdo votë kundër këtyre ndryshimeve përbën një qëndrim të qartë politik ndaj këtyre fenomeneve.

/a.f/r.e/

The post Balla: Njerëzit jetojnë edhe pa shpifjen dhe parkimin dysh, jeta nuk kthehet mbrapsht appeared first on Agjencia Telegrafike Shqiptare.

TIRANË, 27 janar/ATSH/ Me rastin e 90-vjetorit të lindjes së gjeniut të letrave shqipe Ismail Kadare, Akademia Franceze do të organizojë një aktivitet në nderim të tij.

Ky aktivitet vjen si një bashkëpunim midis Akademisë Franceze dhe Ambasadës shqiptare në Francë, i cili do të zhvillohet në Institutin e Francës, Paris, më 29 janar.

Organizatorët e këtij eventi janë Xavier Darcos, kancelari i Institutit të Francës; Bernard Stirn, sekretar i Akademisë së Shkencave Morale dhe Politike; Amin Maalouf, shkrimtar, njëherazi dhe sekretar i Akademisë Franceze, si dhe Dritan Tola, ambasador i Shqipërisë në Francë, lexohet në një shkrim në TvKlan.

Ky aktivitet do të bëjë bashkë disa nga personalitetet më të mëdha të kulturës franceze si Costa Gavras, Angelin Preljocaj, Jacques Attali, Tedi Papavrami. Në aktivitet do të marrë pjesë edhe familja e Ismail Kadaresë.

Kjo nuk është hera e parë që Franca nderon kujtimin e Ismail Kadaresë.

Në tetor të vitit 2025, këshilli bashkiak i Parisit miratoi propozimin që të vendoset një pllakë përkujtimore në ndërtesën ku ka jetuar Kadareja.

Pllaka u vendos në adresën 63 boulevard Saint-Michel në Paris, vendi ku ai dhe familja e tij jetuan për shumë vite dhe ku autori shkroi disa nga faqet më të bukura të letërsisë së tij.

Kolosi i letërsisë shqiptare, Ismail Kadare u nda nga jeta më 1 korrik 2024 në moshën 88-vjeçare.

Ismail Kadare është personalitet qendror i kulturës shqiptare të gjysmës së dytë të shek. XX. Fillimet e tij letrare janë kryesisht në poezi: “Frymëzime Djaloshare”, “Përse mendohen këto male” etj.

Në fushën e prozës, Kadareja lëvroi tregimin, novelën dhe romanin. “Gjenerali i ushtrisë së vdekur” (1963) përbën veprën e konfirmimit të talentit të tij.

“Kronikë në gur”, “Prilli i thyer”, “Kamarja e turpit”, “Pashallëqet e mëdha”, “Kush e solli Doruntinën” etj., janë disa nga veprat e tij më të rëndësishme të krijimtarisë së tij letrare.

Veprat e Ismail Kadaresë janë përkthyer e botuar në mbi 45 gjuhë të huaja dhe është shkrimtari shqiptar më i njohur në botë. Në vitin 1994 ai u bë anëtar korrespondent i Akademisë së Shkencave Morale dhe Politike të Francës. Laureati i shumë çmimeve, në 2005-ën, u nderua me “The Booker Prize Man”.

Ismail Kadare është dekoruar me urdhrin “Nderi i Kombit” dhe nga shteti francez me urdhrin “Kryqi i Legjionit të Nderit”, si dhe me çmime e nderime të tjera.

/k.s/a.f/r.e/

The post Akademia Franceze homazh në nderim të 90-vjetorit të lindjes së Ismail Kadaresë appeared first on Agjencia Telegrafike Shqiptare.

TIRANË, 27 janar/ATSH/ Ministri i Drejtësisë, Besfort Lamallari tha sot se ndryshimet në Kodin Penal që vijnë për diskutim dhe votim në Kuvend janë ndërhyrje të domosdoshme, të fokusuara dhe strategjike, të diktuara nga nevoja reale të sigurisë publike, nga praktika e zbatimit dhe nga detyrimet ndërkombëtare të Shqipërisë.

Gjatë prezantimit në Kuvend të projektligjit “Për disa shtesa dhe ndryshime në ligjin “Kodi Penal i Republikës së Shqipërisë”, i ndryshuar, Lamallari tha se “kjo paketë është një hap i matur, por i vendosur, drejt forcimit të shtetit të së drejtës dhe rritjes së besimit të qytetarëve te drejtësia”.

“Një nga shtyllat kryesore të kësaj pakete është përafrimi i legjislacionit penal shqiptar me Acquis Communautaire, në kuadër të Kapitullit 24 të negociatave “Drejtësia, Liria dhe Siguria”. Projektligji adreson drejtpërdrejt piketat e ndërmjetme të përcaktuara nga Bashkimi Evropian dhe synon të mbyllë boshllëqe të evidentuara prej vitesh në transpozimin korrekt të instrumenteve evropiane”, tha Lamallari.

Në këtë kuadër, vijoi ministri, Kodi Penal përafrohet plotësisht me shtatë instrumente kyçe të Bashkimit Evropian, që lidhen me luftën kundër: pastrimit të parave, trafikimit të drogës, trafikimit të qenieve njerëzore, shfrytëzimit dhe abuzimit seksual të fëmijëve, terrorizmit, si dhe mbrojtjen e interesave financiare dhe sigurisë së Bashkimit Evropian.

Sipas tij, këto nuk janë ndryshime formale që forcojnë realisht kapacitetin e shtetit për të ndjekur penalisht krimin e organizuar dhe kriminalitetin ndërkufitar, duke zgjeruar juridiksionin penal të Republikës së Shqipërisë edhe për vepra të kryera jashtë territorit të vendit, duke hequr, në raste të caktuara, kushtin e dënueshmërisë së dyfishtë dhe duke lehtësuar provën për origjinën kriminale të pasurive.

Një vëmendje e veçantë, tha Lamallari, i është kushtuar mbrojtjes së fëmijëve dhe grupeve më të cenueshme.

“Kjo paketë modernizon dhe ashpërson veprat penale me natyrë seksuale, rrit ndjeshëm dënimet, zgjeron afatet e parashkrimit dhe parashikon ndalimin e ushtrimit të profesioneve që përfshijnë kontakt të drejtpërdrejtë me fëmijë”, shtoi ai.

Në luftën kundër trafikimit të qenieve njerëzore, tha Lamallari, projektligji sjell një qasje të qartë zero tolerancë. Ai përjashton çdo efekt justifikues të pëlqimit të viktimës, zgjeron përkufizimin e shfrytëzimit dhe kriminalizon përdorimin e shërbimeve të ofruara nga viktimat e trafikimit.

Sipas tij, ky është një mesazh i fortë se dinjiteti njerëzor nuk mund të relativizohet dhe nuk mund të negociohet.

Ministri Lamallari u shpreh se “kjo paketë adreson gjithashtu problematika konkrete që kanë cenuar rëndë interesin publik, territorin dhe mjedisin. Ashpërsohet ndjeshëm trajtimi penal për zënien e paligjshme të tokës, ndërtimin dhe shfrytëzimin pa titull ligjor, veçanërisht kur këto vepra kryhen në zona të mbrojtura, parqe natyrore, objekte të trashëgimisë kulturore apo infrastrukturë kritike”.

“Dënimet bëhen edhe më të rënda kur autorët janë persona që ushtrojnë funksione publike, duke reflektuar qartë një qasje pa kompromis ndaj abuzimit me detyrën. Po ashtu, forcohet ndëshkimi për zjarrvënien në pyje dhe mjedise natyrore, sidomos kur rrezikohen zona të banuara, pasuri kulturore apo infrastruktura jetike, ose kur zjarrvënia përdoret si mjet për ndryshimin e destinacionit të tokës”, theksoi Lamallari.

Ministri Lamallari vuri në dukje se “një ndërhyrje e matur, por domethënëse, bëhet edhe në një fenomen të përditshëm që ka pasoja serioze për jetën e qytetarëve: parkimi në rresht të dytë, i cili trajtohet si vepër penale vetëm në rastet kur pengon seriozisht qarkullimin dhe lëvizjen e mjeteve të emergjencës”.

Një tjetër element i rëndësishëm i kësaj pakete është forcimi i mbrojtjes së gazetarëve dhe lirisë së medias.

“Projektligji vendos një ekuilibër të drejtë mes mbrojtjes së reputacionit dhe lirisë së shprehjes, duke përjashtuar përgjegjësinë penale për gazetarët që veprojnë me mirëbesim dhe në interes publik, ndërkohë që ashpërson ndëshkimet për dhunën dhe kërcënimet ndaj tyre për shkak të detyrës. Kjo është një njohje e rolit thelbësor të medias në një shoqëri demokratike”, tha Lamallari.

Ai i ftoi deputetët ta mbështesin këtë paketë jo si një akt formal, por si një investim në sigurinë, drejtësinë dhe të ardhmen evropiane të Shqipërisë.

Fjala e plotë e ministrit të Drejtësisë:

Sot kemi sjell në Kuvend një paketë të mirëmenduar ndryshimesh në Kodin Penal, paketë e cila nuk synon dhe as nuk pretendon të jetë një rishkrim i plotë i këtij kodi themelor. Procesi i reformimit tërësor të Kodit Penal është një proces i thellë, kompleks dhe ende duke u zhvilluar. Ndryshimet që sot vijnë për diskutim dhe votim në Kuvend janë ndërhyrje të domosdoshme, të fokusuara dhe strategjike, të diktuara nga nevoja reale të sigurisë publike, nga praktika e zbatimit dhe nga detyrimet ndërkombëtare të Shqipërisë.

Kjo paketë përfaqëson një politikë penale më të qartë, më koherente dhe më evropiane, e ndërtuar mbi analiza konkrete, konsultime institucionale dhe mbi përvojën e vendeve të Bashkimit Evropian. Ajo është një hap i matur, por i vendosur, drejt forcimit të shtetit të së drejtës dhe rritjes së besimit të qytetarëve te drejtësia.

Një nga shtyllat kryesore të kësaj pakete është përafrimi i legjislacionit penal shqiptar me Acquis Communautaire, në kuadër të Kapitullit 24 të negociatave “Drejtësia, Liria dhe Siguria”. Projektligji adreson drejtpërdrejt piketat e ndërmjetme të përcaktuara nga Bashkimi Evropian dhe synon të mbyllë boshllëqe të evidentuara prej vitesh në transpozimin korrekt të instrumenteve evropiane.

Në këtë kuadër, Kodi Penal përafrohet plotësisht me shtatë instrumente kyçe të Bashkimit Evropian, që lidhen me luftën kundër: pastrimit të parave, trafikimit të drogës, trafikimit të qenieve njerëzore, shfrytëzimit dhe abuzimit seksual të fëmijëve, terrorizmit, si dhe mbrojtjen e interesave financiare dhe sigurisë së Bashkimit Evropian.

Këto nuk janë ndryshime formale. Ato forcojnë realisht kapacitetin e shtetit për të ndjekur penalisht krimin e organizuar dhe kriminalitetin ndërkufitar, duke zgjeruar juridiksionin penal të Republikës së Shqipërisë edhe për vepra të kryera jashtë territorit të vendit, duke hequr, në raste të caktuara, kushtin e dënueshmërisë së dyfishtë dhe duke lehtësuar provën për origjinën kriminale të pasurive.

Një vëmendje e veçantë i është kushtuar mbrojtjes së fëmijëve dhe grupeve më të cenueshme. Kjo paketë modernizon dhe ashpërson veprat penale me natyrë seksuale, rrit ndjeshëm dënimet, zgjeron afatet e parashkrimit dhe parashikon ndalimin e ushtrimit të profesioneve që përfshijnë kontakt të drejtpërdrejtë me fëmijë. Një parim themelor që forcohet është ai që viktimat e mitura nuk mund dhe nuk duhet të trajtohen si autorë, por si subjekte që meritojnë mbrojtje maksimale dhe trajtim dinjitoz, në përputhje me standardet më të larta ndërkombëtare.

Në luftën kundër trafikimit të qenieve njerëzore, projektligji sjell një qasje të qartë zero tolerancë. Ai përjashton çdo efekt justifikues të pëlqimit të viktimës, zgjeron përkufizimin e shfrytëzimit dhe kriminalizon përdorimin e shërbimeve të ofruara nga viktimat e trafikimit. Ky është një mesazh i fortë se dinjiteti njerëzor nuk mund të relativizohet dhe nuk mund të negociohet.

Të nderuar deputetë, kjo paketë adreson gjithashtu problemika konkrete që kanë cenuar rëndë interesin publik, territorin dhe mjedisin. Ashpërsohet ndjeshëm trajtimi penal për zënien e paligjshme të tokës, ndërtimin dhe shfrytëzimin pa titull ligjor, veçanërisht kur këto vepra kryhen në zona të mbrojtura, parqe natyrore, objekte të trashëgimisë kulturore apo infrastrukturë kritike. Dënimet bëhen edhe më të rënda kur autorët janë persona që ushtrojnë funksione publike, duke reflektuar qartë një qasje pa kompromis ndaj abuzimit me detyrën.

Po ashtu, forcohet ndëshkimi për zjarrvënien në pyje dhe mjedise natyrore, sidomos kur rrezikohen zona të banuara, pasuri kulturore apo infrastruktura jetike, ose kur zjarrvënia përdoret si mjet për ndryshimin e destinacionit të tokës.

Një ndërhyrje e matur, por domethënëse, bëhet edhe në një fenomen të përditshëm që ka pasoja serioze për jetën e qytetarëve: parkimi në rresht të dytë, i cili trajtohet si vepër penale vetëm në rastet kur pengon seriozisht qarkullimin dhe lëvizjen e mjeteve të emergjencës. Kjo nuk është një qasje ndëshkuese pa kriter, por një vendosje e sigurisë publike dhe jetës së njeriut në plan të parë.

Një tjetër element i rëndësishëm i kësaj pakete është forcimi i mbrojtjes së gazetarëve dhe lirisë së medias. Projektligji vendos një ekuilibër të drejtë mes mbrojtjes së reputacionit dhe lirisë së shprehjes, duke përjashtuar përgjegjësinë penale për gazetarët që veprojnë me mirëbesim dhe në interes publik, ndërkohë që ashpërson ndëshkimet për dhunën dhe kërcënimet ndaj tyre për shkak të detyrës. Kjo është një njohje e rolit thelbësor të medias në një shoqëri demokratike.

Të nderuar deputetë, në tërësi, kjo paketë ndryshimesh përfaqëson një politikë penale më të qartë, më të drejtë dhe më efikase. Ajo synon jo vetëm ndëshkimin e krimit, por parandalimin e tij, mbrojtjen e viktimave dhe garantimin e sigurisë për qytetarët. Është një hap konkret drejt një sistemi penal modern, funksional dhe plotësisht të përputhshëm me standardet evropiane. Ju ftoj ta mbështesni këtë paketë jo si një akt formal, por si një investim në sigurinë, drejtësinë dhe të ardhmen evropiane të Shqipërisë.

/k.s/a.f/r.e/

The post Lamallari për Kodin e ri Penal: Dekriminalizojmë shpifjen për gazetarët, forcojmë mbrojtjen ndaj familjes appeared first on Agjencia Telegrafike Shqiptare.

TIRANË, 27 janar/ATSH/ Nxënësit e shkollës “Qamil Guranjaku” në Elbasan po zhvillojnë talentet e tyre përmes programit “Art dhe Zeje”.

Kryeministri Edi Rama ndau sot në rrjetet sociale momente nga orët mësimore që zhvillojnë nxënësit gjatë këtij programi.

“Një orkestër simpatike dhe një trupë teatri plot talente. Nxënësit e shkollës “Qamil Guranjaku” në Elbasan i kanë të gjitha këto mundësi për të zbuluar dhe zhvilluar talentet e tyre përmes programit “Art dhe Zeje”, që me infrastrukturën e duhur kultivon pasione, nxit krijimtarinë dhe i jep hapësirë çdo fëmije të shprehet dhe të rritet përmes artit”, theksoi Rama.

Ky program tashmë zbatohet me sukses në mbi 200 shkolla në të gjithë Shqipërinë. Ai ka për qëllim inkurajimin e mësimit të punimeve të artit dhe atyre artizanale përmes veprimtarive praktike, nxitjen e aftësive sipërmarrëse të nxënësve në perspektivën e ruajtjes dhe të promovimit të vlerave të komunitetit ku jetojnë, si dhe të trashëgimisë sonë kulturore në pikturë, vegla muzikore, zeje, teatër, sport, teknologji, etj.

1 nga 5

/k.s/r.e/a.f/

The post Programi “Art dhe Zeje”, nxit talentet artistike dhe artizanale të nxënësve appeared first on Agjencia Telegrafike Shqiptare.

TIRANË, 27 janar/ATSH/ Kryetari i grupit parlamentar të Partisë Socialiste dhe drejtuesi politik i PS-së për Diasporën, Taulant Balla, gjatë fjalës së tij në Kuvend i kushtoi një pjesë rëndësisë që ka diaspora shqiptare, duke theksuar nevojën për një ndryshim thelbësor në mënyrën se si institucionet e shtetit shqiptar e trajtojnë atë.

Gjatë diskutimeve në Kuvend për projektligjin për ratifikimin e marrëveshjes, ndërmjet  Shqipërisë dhe Italisë në disa fusha, Balla tha se kjo është një marrëveshje historike, si sa i takon pikave që ajo prek, por edhe sa i përket nivelit më të lartë të marrëdhënieve bilaterale mes dy vendeve tona.

Balla tha se “nuk ngurojmë as ne majtas e as ju djathtas të jemi mirënjohës qeverive ndër vite të Republikës italiane, që nga viti 1991, kur populli italian, qeveria italiane, policia italiane, të gjitha strukturat e shtetit italian në mars e pas marsit, në fakt, duke filluar që nga korriku i vitit 1990, me shqiptarët e parë që ikën përmes ambasadave, treguan gatishmërinë, por edhe dashurinë e popullit italian për të mikpritur vëllezërit e motrat tanë në ato vite të vështira për vendin tonë”.

Më tej, kreu i grupit parlamentar të Partisë Socialiste u shpreh se marrëveshja forcon edhe partneritetin me diasporën, për të cilën Balla tha se “ajo nuk duhet të jetë objekt vëmendjeje vetëm në momente zgjedhore, por një partner i vazhdueshëm në jetën politike, institucionale dhe shoqërore të vendit”.

Kuvendi i Shqipërisë, vijoi Balla, ka përgjegjësi të drejtpërdrejtë për ndërtimin e një qasjeje të re dhe afatgjatë ndaj shqiptarëve që jetojnë jashtë vendit, duke përfshirë jo vetëm diasporën në Itali, e cila përbën komunitetin më të madh, por edhe shqiptarët në Greqi, Gjermani, Britaninë e Madhe, Shtetet e Bashkuara të Amerikës, Kanada dhe në të gjitha vendet ku ata jetojnë dhe kontribuojnë.

Në këtë kontekst, Balla kërkoi bashkëpunim politik dhe institucional, duke iu drejtuar edhe grupit parlamentar të Partisë Demokratike për ndërtimin e një plani të përbashkët.

“Samiti i Diasporës i planifikuar për datat 14–15 prill nuk është vetëm një nismë e qeverisë, por edhe një angazhim i Kuvendit, ku deputetët e mazhorancës dhe opozitës duhet të kenë rol aktiv në forcimin e lidhjes së shtetit shqiptar me diasporën”, theksoi Balla.

/k.s/a.f/r.e/

The post Balla: Diaspora, jo vetëm vëmendje zgjedhore, por partner strategjik appeared first on Agjencia Telegrafike Shqiptare.

TIRANË, 27 janar/ATSH/ Këshilli i qarkut Elbasan organizoi sot një ceremoni zyrtare për të nderuar ambasadorin e Mbretërisë së Arabisë Saudite në Shqipëri, Faisal Ghazi Al-Hafthi, duke i akorduar Titullin e Mirënjohjes, në vlerësim të kontributit të tij humanitar, diplomatik dhe ndërkulturor.

Ceremonia u zhvillua në praninë e kryetares së këshillit të qarkut Elbasan, Ermira Urupi, si dhe kryetarit të Komunitetit Mysliman të Shqipërisë, Bujar Spahiu, kryebashkiakut Gledjan Llatja, ambasadorit të Shtetit të Katarit, Jaber Ali Al-Dosari, zv.kryetarit të këshillit të qarkut, Lutfi Lala, rektorit të Universitetit të Elbasanit, prof. dr. Elvira Fetahu, nënkryetarit të Partisë Demokratike në Elbasan, Zamir Muzahqi, përfaqësuesve të institucioneve akademike dhe fetare, si dhe personaliteteve të tjera intelektuale dhe publike të Qarkut Elbasan.

Në fjalën e saj, kryetarja e këshillit të qarkut Ermira Urupi, vlerësoi mbështetjen e vazhdueshme të Ambasadës së Mbretërisë së Arabisë Saudite për komunitetin lokal, veçanërisht ndihmën e dhënë për fëmijët me aftësi të kufizuara, fëmijët jetimë, si dhe kontributin e saj në ndërtimin e urave të dialogut dhe kulturës mes dy popujve.

Urupi theksoi gjithashtu rëndësinë e projekteve të financuara nga Fondi Saudit për Zhvillim, të cilat po zbatohen në qarkun e Elbasanit dhe kanë ndikim të drejtpërdrejtë në përmirësimin e infrastrukturës dhe mirëqenies së qytetarëve.

Më pas, kryetari i Komunitetit Mysliman të Shqipërisë, Bujar Spahiu, tha se “ky nderim përfaqëson një vazhdimësi të vlerësimit të Komunitetit Mysliman të Shqipërisë për Faisal Ghazi Al-Hafthi, në njohje të kontributit të tij të çmuar në forcimin e urave të komunikimit mes kulturave dhe popujve miqësorë”.

Nga ana e tij, kryetari i bashkisë Elbasan, Gledjan Llatja, u shpreh se ky titull mirënjohjeje nuk përfaqëson vetëm bashkinë e Elbasanit, por të shtatë bashkitë e qarkut Elbasan.

Ai theksoi gjithashtu vizionin mbresëlënës të Ambasadorit dhe të gjithë stafit të Ambasadës së Mbretërisë së Arabisë Saudite në sjelljen në vëmendjen e publikut të urave të miqësisë që lidhin dy popujt, duke forcuar kështu bashkëpunimin dhe mirëkuptimin reciprok.

Në këtë kontekst, u theksua edhe roli i Myftinisë së Elbasanit, e cila, në bashkëpunim me Qendrën për Bashkëpunim Ndërfetar dhe në koordinim me institucionet vendore, ishte propozuesja zyrtare për dhënien e këtij titulli mirënjohjeje. Ky propozim u bë në vlerësim të rolit të Ambasadës në mbështetjen e grupeve në nevojë, forcimin e dialogut ndërfetar dhe ndërtimin e urave të miqësisë dhe komunikimit mes kulturave dhe popujve miqësorë.

Gjatë ceremonisë, ambasadori Faisal Ghazi Al-Hafthi shprehu mirënjohjen e tij për këtë nderim, duke theksuar se ky vlerësim nuk është vetëm personal, por një dëshmi e marrëdhënieve të forta të miqësisë dhe bashkëpunimit mes Mbretërisë së Arabisë Saudite dhe Shqipërisë.

Ai vuri në dukje rëndësinë e dialogut kulturor dhe ndërfetar si bazë për paqen, stabilitetin dhe zhvillimin e qëndrueshëm.

Në përfundim, këshilli i qarkut Elbasan theksoi se “ky vlerësim pasqyron angazhimin e tij institucional për forcimin e bashkëpunimit ndërkombëtar dhe për nderimin e kontributeve diplomatike që ndërtojnë ura mirëkuptimi dhe solidariteti mes popujve”.

/k.s/a.f/r.e/

The post Këshilli i qarkut Elbasan nderon ambasadorin e Arabisë Saudite për kontributin e tij humanitar appeared first on Agjencia Telegrafike Shqiptare.

TIRANË. 27 janar/ATSH/ Ministrja e Shëndetësisë dhe Mbrojtjes Sociale, Evis Sala gjatë vizitës në Vjenë, Austri, zhvilloi një takim në Agjencinë Ndërkombëtare të Energjisë Bërthamore.

“Shqipëria ka një vizion të qartë, shfrytëzimin e shkencës për të forcuar kujdesin ndaj kancerit, mjekësinë bërthamore dhe sigurinë nga rrezatimi”, tha Sala në një postim në rrjetet sociale.

Ministrja Sala u shpreh se “po forcojmë programin kombëtar të radioterapisë si pjesë e ngritjes së Institutit të Onkologjisë dhe Rrjetit Kombëtar të Kancerit”.

“Në partneritet me Agjencinë, ne po investojmë te njerëzit dhe te inovacioni i sigurt, duke udhëhequr me përgjegjësi dhe duke vendosur standarde për përdorimin paqësor të teknologjive bërthamore”, tha Sala.

/k.s/a.f/

The post Sala në Agjencinë Ndërkombëtare të Energjisë Bërthamore: Shfrytëzimi i shkencës në forcimin e kujdesit ndaj kancerit appeared first on Agjencia Telegrafike Shqiptare.

TIRANË, 26 janar/ATSH/ Ministri  Mbrojtjes, Pirro Vengu deklaroi sot se nuk ka asnjë ndryshim të marrëveshjes me Turqinë për bazën e Pashalimanit.

Duke iu përgjigjur interesit të gazetarëve lidhur me bazën e Pashalimanit dhe deklaratave të ministrit të Mbrojtjes së Turqisë, Yaşar Güler, Vengu theksoi se “ne kemi një marrëveshje prej vitit 1992 e ratifikuar, e rinovuar sërish në 1998 që parashikon pjesëmarrje të forcave detare turke të stacionuara me rotacion në Pashaliman”.

“Është e dobishme për forcat detare t’i qëndrojmë kësaj marrëveshje, nuk ka asnjë ndryshim sa i përket kësaj marrëveshje ndaj me të drejtë edhe homologu turk ka dhënë përgjigjen që ka dhënë sa i përket qëndrimit të forcave me rotacion në Pashaliman”.

Vengu u shpreh se marrëveshja midis kompanisë shtetërore “Kajo” me kompaninë italiane të prodhimit të anijeve “Fincantieri” ka të bëjë me veprimtarinë e prodhimit në Pashaliman.

“Ne po krijojmë një kompani të përbashkët ku shteti shqiptar do të ketë 49% të pronësisë të bashkëpronësisë dhe pala italiane do të jetë mazhoritare me përgjegjësi  përkatëse sa i takon investimeve në infrastrukturë, që mbeten prona jonë dhe linjës së prodhimit dhe të rinovimit sepse kemi nevojë për linjë mirëmbajtje të flotës sonë”, informoi Vengu.

“Pra, janë dy çështje të ndryshme nga njëra anë bashkëpunimi operacional dhe ushtarak stërvitor me Turqinë prej vitesh dhe nga ana tjetër veprimtaria prodhuese”, sqaroi Vengu.

/k.s/j.p/

The post Vengu: Për Pashalimanin i qëndrojmë marrëveshjes me Turqinë që prej vitit 1992  appeared first on Agjencia Telegrafike Shqiptare.

TIRANË, 26 janar/ATSH/ Ministri i Mbrojtjes, Pirro Vengu tha sot se Shqipëria është duke përgatitur edhe rishikimin strategjik të mbrojtjes.

Në një konferencë për shtyp mbi punën për rritjen e kapaciteteve të Forcave të Armatosura, emergjencave civile dhe industrisë së mbrojtjes, si prioritete të buxhetit të Mbrojtjes 2026, Vengu tha se aktualiteti në të cilën jetojmë dikton qartë se mbrojtja dhe siguria nuk janë më koncepte abstrakte, as tema të nivelit të dytë.

“Në debate ato janë kthyer në terma të një rëndësie parësore dhe në thelbin e sovranitetit dhe dinjitetit të një kombi”, u shpreh ministri i Mbrojtjes ndërsa vuri në dukje se zhvillimet gjeopolitike, tensionet rajonale, kërcënimet hibride dëshmojnë çdo ditë se paqja e stabilitetit nuk janë të dhëna njëherë e përgjithmonë, por përkundrazi këkojnë inevstime përgatitje të vazhdueshme dhe të përditshme.

Dinamikat ndërkombëtare, vijoi Vengu, nuk premtojnë paqe të qëndrueshme, por përballje të menaxhuar midis fuqive të mëdha.

“Shqipëria është duke përgatitur edhe rishikimin strategjik të mbrojtjes. Në tërësi të gjitha këto rishikime evidentojnë një fragmentim të rendit ndërkombëtar dhe konkurrencën e përhershme që strukturon një lloj lufte të re të ftohtë. E përmend këtë sepse Europa juglindore pavarësisht se nuk është epiqendra e rivalitetit të ri global nuk është as një periferi e padukshme. Është një teatër dytësor jo për tanke, por për narrativa, dezinformim dhe ndërhyrje hibride. Nuk mund të mos jetë një fushëbetejë tankesh, por është fushëbeteje perceptimesh, influencash konkurruese nga palë të treta dhe në një rajon ku kemi ende plagë të pambyllura padyshim që përbën një problematikë të re”, tha Vengu.

Ministri Vengu u shpreh se “mbrojtja civile, kibernetike, veprimtaria prodhuese, infrastruktura kritike, zinxhirët e furnizimit, komunikimi strategjik janë pjesë e sigurisë kombëtare dhe në këtë kontekst Shqipëria ndërton sot politikën e saj të mbrojtjes”.

Më tej, Vengu u ndal në disa elemente sfida e shtylla të aktiviteteve në 2026 duke nisur me elementet buxhetorë që sipas tij, “vijnë si përgjigje ndaj këtij realiteti të ri”.

Vengu tha se buxheti 2026 nuk është një buxhet rutinë në shumë aspekte është një mekanizëm për të ndërtuar kapacitete reale për të zhvilluar industrinë për të forcuar sovranitetin digjital dhe për të garantuar një Shqipëri si një aleate e qëndrueshme në NATO.

“Këtë vit buxheti arrin vlerën 2.12 të PBB-së dhe nëse e krahasojmë me 2025 kemi një rritje domethënëse prej 12%”, theksoi ai.

Ministri Vengu theksoi se “shtylla e parë e artikulimit të kësaj përpjekjeje të madhe buxhetore, të cilën e kemi kërkuar pranë sovranit është kapitali njerëzor si themeli i forcës tonë. Është themeli i çdo ushtrie moderne dhe për këtë arsye do të vijojmë politikën afatgjatë të rritjes së pagave në mënyrë të qenësishme me synim që deri në vitin 2029 të arrijmë mesataren e NATO-s. Rritja parashikon një rritje progresive 60-70% për pagat bazë dhe 30% për nivelet më të lartë të komandimit”.

“Paralelisht me këtë përpjekje në kuadër të rritjes së pagave synojmë gjithashtu rritjen me 30% të komponentit aktiv më shumë forca aktive, më shumë forca profesionale”, tha Vengu.

Ministri i Mbrojtjes Pirro Vengu konferencë për shtyp, foto: Andrin Hoxha

1 nga 9

/k.s/j.p/

The post Vengu: Rishikim i strategjisë së Mbrojtjes, paga sa mesatarja e NATO-s deri në 2029-ën appeared first on Agjencia Telegrafike Shqiptare.

TIRANË, 26 janar/ATSH/ “Drejtësia nuk është thjesht një pushtet, është garancia që i jep kuptim shtetit në jetën e qytetarit”.

Me këtë mesazh e nisi Presidenti Bajram Begaj, fjalën drejtuar përfaqësuesve të institucioneve të drejtësisë në ceremoninë e hapjes së vitit gjyqësor.

Kreu i Shtetit përforcoi qëndrimin e tij në mbështetje të institucioneve te reja të dala nga reforma në drejtësi, e cila nisi 10 vite më parë.

“Dhjetë vjet më pas, rezultatet janë të dukshme. Shumica e qytetarëve besojnë se epoka e pandëshkueshmërisë ka filluar të marrë fund. Raportet ndërkombëtare, mediat dhe publiku, me të drejtë, i kushtojnë vëmendje aktivitetit dhe sukseseve të SPAK-ut dhe GJKKO-së, por në sistemin tonë të drejtësisë kemi edhe struktura të tjera, gjyqtarë e prokurorë, të cilët, po me kaq përkushtim, profesionalizëm, dinjitet dhe përgjegjësi kanë arritur të japin drejtësi”, deklaroi Begaj, i cili duke nënvizuar kulturën e re juridike dhe demokratike të përftuar si rrjedhojë e kësaj reforme, theksoi nevojën e respektimit të vendimeve gjyqësore nga të gjithë.

“Drejtësia funksionon kur respektohet, jo vetëm kur deklarohet”,  u shpreh Kreu i Shtetit.

Presidenti Begaj bëri thirrje për një drejtësi të pavarur, funksionale dhe me integritet, që garanton barazinë para ligjit dhe e çon përpara procesin e integrimit të Shqipërisë në BE.

“Vetëm duke dhënë drejtësi, duke fituar besim te qytetarët, duke garantuar shtetin e së drejtës, sundimin e ligjit, të drejtat e njeriut dhe forcuar institucionet do të kemi progres të qëndrueshëm edhe në rrugën tonë drejt anëtarësimit në Bashkimin Evropian. Kjo është zgjidhja e vetme që kemi dhe sfida më e rëndësishme për institucionet që ndodhen sot në këtë sallë, si dhe të gjithë ata që flasin, veprojnë dhe vendosin në emër të Kushtetutës dhe ligjit”, tha Begaj.

Presidenti Begaj deklaroi, gjithashtu, se ky vit gjyqësor duhet të sjellë një drejtësi funksionale e të qëndrueshme.

“Gjykata Kushtetuese dhe Gjykata e Lartë kanë rol thelbësor për të krijuar norma, praktika unifikuese dhe garantim të sigurisë juridike. Strukturat e qeverisjes së sistemit: Këshilli i Lartë Gjyqësor, Këshilli i Lartë i Prokurorisë, Inspektori i Lartë i Drejtësisë, Këshilli i Emërimeve në Drejtësi dhe Shkolla e Magjistraturës mbeten thelbësore në funksionalitetin e sistemit të drejtësisë për vetëmenaxhim, transparencë dhe llogaridhënie”,  deklaroi Kreu i Shtetit, i cili  nënvizoi rëndësinë e bashkërendimit dhe bashkëpunim ndërinstitucional për adresimin e problematikave dhe suksesin e reformës në drejtësi.

Ndërsa u ndal të pavarësia e gjyqësorit, të cilin e vlerësoi si boshtin themelor të reformës në drejtësi, Presidenti theksoi se gjyqtarët duhet të japin vendime pa presione apo ndërhyrje, duke garantuar një drejtësi efektive, të paanshme dhe në përputhje me standardet evropiane.

Njëherazi, Begaj theksoi rëndësinë e llogaridhënies në ushtrimin e  kësaj pavarësisë.

“Sot, gjyqësori është juaji. Sistemi i drejtësisë ka fituar autonomi të plotë. Kjo pavarësi është arritje madhore, por pavarësia shkon domosdoshmërisht krah për krah me përgjegjësinë. Edhe funksionimi, integriteti dhe besueshmëria e sistemit të drejtësisë janë, në radhë të parë, përgjegjësia juaj.  Pavarësia e sistemit të drejtësisë është gur themeli i patjetërsueshëm i rendit tonë kushtetues dhe funksionimit të shtetit të së drejtës”, tha Begaj.

Krahas respektimit të pavarësisë, Presidenti Begaj, gjatë fjalës së tij, përmendi sfidat më të cilat përballen institucionet e drejtësisë.

Duke u shprehur se i mirëkupton ato, Kreu i Shtetit solli në vëmendje rëndësinë e besimit publik të drejtësia.

Ai theksoi se eficienca e sistemit, rezultatet në luftën kundër krimit të organizuar dhe korrupsionit, shmangia e arbitraritetit, forcimi i standardeve dhe suksesi i mekanizmave të vetëkontrollit përbëjnë elemente thelbësore që garantojnë besueshmërinë e qytetarëve të drejtësia.

Duke renditur problematikat e zvarritjeve të çështjeve dhe perceptimin te qytetarët e një impakti negativ për jetën, të drejtat, pronën, Presidenti i Republikës inkurajoi gjyqtarët t’u japin fund këtyre praktikave. “Në institucionet e së drejtës nuk ka vend për tranzicion”,  u shpreh Begaj.

E drejta nuk negociohet, tha Begaj, duke shtuar se “dhënia e drejtësisë është sa përgjegjësi dhe profesionalizëm, aq edhe akt i lartë shtetarie”.

Në fund të fjalës së tij, Kreu i Shtetit garantoi mbështetje për institucionet e drejtësisë dhe avokati  ndaj qytetarëve që presin drejtësi funksionale, të ndershme e të barabartë për të gjithë.

“Si President i Republikës do të vijoj të mbështes fuqimisht forcimin e pavarësisë dhe funksionalitetit të sistemit të drejtësisë, të mbështes çdo nismë që shkon në drejtim të forcimit të institucioneve të drejtësisë dhe ruajtjes së integritetit të tyre, por gjithmonë do të mbetem edhe një zë  ne mbrojtje të  qartë të interesit  të qytetarëve që presin drejtësi funksionale, të ndershme dhe të barabartë për të gjithë”, theksoi Begaj.

/k.s/j.p/

The post Begaj: Drejtësia funksionon kur respektohet, jo vetëm kur deklarohet appeared first on Agjencia Telegrafike Shqiptare.

TIRANË, 26 janar/ATSH/ Ministri i Drejtësisë, Besfor Lamallari mori pjesë sot në ceremoninë e hapjes së vitit të ri gjyqësor ku gjatë fjalës së mbajtur vuri theksin te hendeku mes pritshmërive të qytetarëve pas Reformës në Drejtësi dhe funksionimit aktual të sistemit, veçanërisht në aspektin e llogaridhënies dhe disiplinës së magjistratëve.

Teksa uroi institucionet e drejtësisë për një vit të ri gjyqësor me vendimmarrje të drejta dhe të pavarura, Lamallari theksoi se pavarësia dhe llogaridhënia janë “dy anë të së njëjtës medalje” dhe se besimi publik nuk mund të ndërtohet pa një balancë reale mes tyre.

Në fokus të kritikave të ministrit ishte Inspektoriati i Lartë i Drejtësisë, për të cilin ai deklaroi se nuk po përmbush siç duhet misionin kushtetues për garantimin e standardeve të larta profesionale dhe disiplinore në sistem.

“Pavarësia e drejtësisë nuk mund dhe nuk duhet të keqpërdoret si alibi për mosveprim, për zvarritje apo për mungesë përgjegjshmërie”, u shpreh Lamallari, duke nënvizuar se ILD është krijuar pikërisht për të ushtruar kontroll dhe për të garantuar disiplinë, jo për të funksionuar si filtër bllokues ndaj ankesave të qytetarëve.

Ministri solli të dhëna konkrete që, sipas tij, tregojnë një situatë jo të mirë teksa tha se, gjatë viteve 2023–2025 janë regjistruar 1.374 ankesa pranë ILD-së, ndërsa vetëm 23 vendime për çelje hetimi disiplinor janë marrë për 25 magjistratë.

Kjo do të thotë se më pak se 2% e ankesave të qytetarëve kalojnë filtrin fillestar për hetim disiplinor.

Edhe kërkesat e përcjella nga vetë Ministria e Drejtësisë, sipas Lamallarit, kanë hasur në të njëjtën qasje: nga 12 kërkesa zyrtare për verifikim ose hetim disiplinor gjatë dy viteve të fundit, vetëm një rast ka çuar në fillimin e procedimit disiplinor, dhe kjo mbi bazën e një ankese të paraqitur nga një përfaqësi diplomatike e huaj në Shqipëri.

“Përtej vështirësive në plotësimin e vakancave, nuk ka asnjë arsye bindëse që të justifikojë një numër kaq të ulët procedimesh disiplinore dhe mungesën e inspektimeve proaktive”, theksoi ministri, duke e cilësuar rolin e ILD-së si të pazëvendësueshëm për besueshmërinë e sistemit të drejtësisë.

Lamallari paralajmëroi se mungesa e reflektimit dhe veprimit real nga institucionet e përgjegjshme për disiplinën rrezikon të kthejë pavarësinë e drejtësisë në një koncept formal, të shkëputur nga përgjegjësia ndaj qytetarëve.

Në përfundim, ministri siguroi se Ministria e Drejtësisë do të vijojë të referojë çdo rast shkeljeje të afateve dhe standardeve ligjore pranë ILD-së, duke theksuar se pas një dekade Reformë në Drejtësi, sistemi ndodhet tashmë në fazën e llogaridhënies dhe konsolidimit, ku retorika duhet t’i lërë vendin rezultateve konkrete.

“Pavarësia e drejtësisë merr forcë dhe legjitimohet vetëm nga besimi i publikut”, përfundoi Lamallari, duke e cilësuar vitin e ri gjyqësor si një test maturie dhe përgjegjshmërie për të gjithë sistemin.

Lidhur me stokun e dosjeve, Ministri i Drejtësisë veçoi veçanërisht si problematike situatën në gjykatat e apelit të juridiksionit të përgjithshëm.

“Nëse për Gjykatën e Lartë konstatojmë progres, e njëjta gjë nuk mund të thuhet për pjesën tjetër të sistemit. Në shumë segmente, veçanërisht në gjykatat e apelit, normat e përfundimit të çështjeve janë minimale dhe numri i çështjeve të prapambetura paraqitet alarmant. Në disa raste, më pak se një e dhjeta e çështjeve përfundojnë brenda vitit, çka nuk është vetëm problem kapaciteti, por çështje menaxhimi, prioritetesh dhe vullneti institucional. Nuk mund të flasim për besim publik kur qytetari humbet shpresën për të marrë një vendim brenda një afati të arsyeshëm”, tha Lamallari.

Ministri i Drejtësisë u shpreh se “në gjykatat e apelit të juridiksionit të përgjithshëm, përqindja e përfundimit të çështjeve penale ra ndjeshëm gjatë 9 muajve të parë të vitit që lamë pas. Për çdo 100 dosje në shqyrtim, vetëm 12 prej tyre u përmbyllën, ndërsa stoku total po shenjon shifrën rreth 19.000! Në çështjet civile dhe administrative, norma e përfundimit në disa gjykata zbret në 5%, duke e kthyer apelimin në një pritje të pafund për qytetarin. Kjo nuk është thjesht statistikë. Është praktikisht mohim i drejtësisë përmes vonesës. Prirja rritëse e stokut shfaqet gjithashtu tek çështjet ende në hetim. Pavarësisht përmirësimeve të pjesshme në përfundimin e çështjeve, ngarkesa strukturore e sistemit të hetimit penal mbetet e lartë, me 23.623 çështje në vitin 2024. Qartësisht, edhe në këtë rast nevojiten masa të qëndrueshme për rritjen e efikasitetit dhe përshpejtimin e procedimeve”.

Ai foli gjithashtu edhe për nivelin e lartë të paraburgimit në vend.

“Paraburgimi duhet të jetë përjashtim dhe jo rregull. Kur ai zëvendëson gjykimin e shpejtë dhe të drejtë, kemi një problem serioz me standardet demokratike. Ky fenomen nuk përputhet me aspiratat e një vendi që synon anëtarësimin në Bashkimin Evropian dhe kërkon ndërhyrje të menjëhershme. Është koha për të ndryshuar kulturën ndëshkuese dhe represive, ku masa e arrestit me burg shihet si zgjidhja më e shpejtë”, tha Lamallari.

Hapja e vitit të ri gjyqësor, foto: Florian Abazaj

1 nga 15

/k.s/j.p/

The post Lamallari: Pavarësia e gjyqësorit nuk mund të jetë alibi për mosveprim dhe mungesë llogaridhënieje appeared first on Agjencia Telegrafike Shqiptare.

TIRANË, 26 janar/ATSH/ Ministri i Turizmit, Kulturës dhe Sportit, Blendi Gonxhja gjatë panairit ndërkombëtar të turizmit në Madrid, Fitur 2026 zhvilloi një takim me Marga Prohens, Presidente e Ishujve Baleare.

Gonxhja dhe Prohens shkëmbyen eksperienca mbi politikat e zhvillimit të qëndrueshëm të turizmit, menaxhimin e destinacioneve dhe promovimin kulturor, në kuadër të forcimit të bashkëpunimit ndërinstitucional dhe shkëmbimit të praktikave më të mira.

Gjithashtu, gjatë ditëve të panairit u zhvilluan një seri takimesh zyrtare dhe dypalëshe në stendën e Shqipërisë me përfaqësues të nivelit të lartë institucional dhe drejtues të kompanive kryesore ndërkombëtare të turizmit dhe investimeve.

“Paralelisht, zhvilluam takime profesionale me përfaqësues të KPMG, LeadPro Advisors, Transat, IMC, Grupo Piñero dhe THB Hotels, të fokusuara në mundësitë e investimeve strategjike, strukturimin e projekteve turistike, partneritete afatgjata dhe interesin konkret për tregun shqiptar”, u shpreh Gonxhja në rrjetet sociale.

Në Panairin Ndërkombëtar të Turizmit në Madrid, stenda shqiptare tërhoqi interes të jashtëzakonshëm nga vizitorët dhe profesionistët e industrisë.

Vizitorët u njohën nga afër me ofertën turistike të vendit përmes prezantimeve inovative që përfshijnë përvoja virtuale (VR), degustime të produkteve tradicionale, performanca artistike live, artizanat dhe elemente të traditës shqiptare të mikpritjes.

Në këtë panair, Shqipëria u promovua si një destinacion turistik gjithëvjetor, autentik dhe gjithëpërfshirës, duke synuar zgjerimin e pranisë së saj në tregjet ndërkombëtare dhe forcimin e imazhit si një destinacion me potencial të lartë turistik.

/k.s/j.p/r.e/

The post Gonxhja në FITUR 2026, takim me Presidenten e Ishujve Baleare appeared first on Agjencia Telegrafike Shqiptare.

TIRANË, 26 janar/ATSH/ Prej 3 vitesh në shkollat e vendit po zhvillohet Programi i Edukimit Mjedisor, si një ndër mënyrat më të mira për t’i rritur fëmijët me dashurinë për natyrën.

Sot në Ditën Ndërkombëtare të Edukimit Mjedisor, ministri i Mjedisit, Sofjan Jaupaj tha se gjatë vitit 2025, përmes këtij programi të Ministrisë së Mjedisit, kemi qenë të pranishëm në 325 shkolla dhe kemi bashkëbiseduar me mbi 6,000 nxënës, duke forcuar ndërgjegjësimin për mbrojtjen e natyrës dhe pyjeve.

“Ky program do të vijojë edhe në vitin 2026, ndërsa me zgjerimin e mëtejshëm dhe me përdorimin e teknologjive inteligjente për pyjet, e bëjmë edhe më konkret pasionin e të rinjve për natyrën”, theksoi Jaupaj.

Edukimi mjedisor natyror i ndihmon nxënësit të njihen me çështje të rëndësishme dhe jetike mjedisore si: ujin, ajrin, tokën, natyrën, biodiversitetin.

Përgjatë tyre nxënësit përfshihen emocionalisht dhe fizikisht; ata mësojnë për zgjidhjen e shqetësimeve dhe problematikave të ndotjes, mbetjeve, energjisë, ekonomisë qarkulluese dhe mbrojtjen e dashurinë për natyrën.

Gjatë orëve të mësimit nxënësit informohen nga ekspertët e zonave të mbrojtura dhe kultivojnë dashurinë për ekosistemet, biodiversitetin, lagunat, parqet dhe përkujdesjen ndaj tyre.

Dita Botërore e Edukimit Mjedisor, që prej 10 vjetësh mbahet çdo 14 tetor. UNESCO thotë se, kjo datë shënon një pikë fillimi dhe jo një pikë mbërritjeje, duke ftuar të gjithë të marrin pjesë në iniciativë.

Data 14 tetor shënon hapjen e punimeve të Konferencës Ndërqeveritare të UNESCO-s për Edukimin Mjedisor, e cila u zhvillua në Tbilisi të Gjeorgjisë, në vitin 1977 dhe ishte një shenjë e interesit të shtuar shqetësimit që shoqëria civile dhe institucionet filluan të ndjenin në ato vite. Për herë të parë çështjet mjedisore dhe edukimi mbi ndjeshmërinë mjedisore u mirëpritën dhe u njohën në nivel institucional, pas Konferencës së OKB-së për mjedisin njerëzor të mbajtur në Stokholm në 1972.

/k.s/j.p/

The post Dita Ndërkombëtare të Edukimit Mjedisor, Jaupaj: Takime në mbi 325 shkolla për mbrojtjen e natyrës appeared first on Agjencia Telegrafike Shqiptare.

TIRANË, 25 janar/ATSH/ Në Katedralen “Ngjallja e Krishtit” u përkutjua sot 1-vjetori i ndarjes nga jeta të Kryepeshkopit Anastas Janullatos.

Në këtë ditë përkujtimore morën pjesë krerë të komuniteteve fetare, ambasadorë, përfaqësues të lartë të Këshillit Botëror të Kishave, të Komunitetit të Sant’Egidios, të Qendrës së Krishterë Misionare në Amerikë, si dhe besimtarë të shumtë.

Në fjalën e tij, Kryepeshkopi i Tiranës, Durrësit dhe gjithë Shqipërisë, Fortlumturia e tij imzot Joani, theksoi se përkujtimi vjetor i Kryepeshkopit Anastas është një nevojë shpirtërore për reflektim, falënderim dhe forcim në hirin e Perëndisë Triadik.

Ai vuri në dukje se largimi i njerëzve të mëdhenj lë gjithmonë trishtim dhe boshllëk, por besimi në Ngjalljen e Krishtit dhe përjetësinë e shpirtit sjell ngushëllim dhe shpresë.

“Përkujtimi i Kryepeshkopit të lumur Anastas nuk është thjesht një kthim nostalgjik në të kaluarën, është zgjedhja e vetëdijshme për të mbajtur të gjallë trashëgiminë që ai na la. Jo si eksponat muzeu, por si udhërrëfyes për të sotmen dhe për të ardhmen dhe si një mundësi për meditim të brendshëm dhe për orientimin e jetës sonë. Fjalët e Shën Joan Gojartit: Ata që i duam dhe i humbasim, nuk janë aty ku ishin më parë,, ata janë tani kudo ku jemi ne, – i përshtaten plotësisht Kryepeshkopit Anastas. Ne besojmë dhe e ndiejmë praninë e tij dhe kjo na jep shpresë, kurajë dhe lehtësim”, tha Kryepeshkopi Joan.

Ai tha se “Kryepeshkopi i lumtur na la mësime dhe fjalë të cilat vazhdojnë të ndriçojnë jetën tonë. Do të citoj disa nga këto mësime dhe fjalë të çmuara”.

“Lutemi që Perëndia të na japë forcë e urtësi për të vazhduar rrugën e ndritshme të Kryepeshkopit të lumur Anastas, sepse nderimi më i madh që mund t’i bëjmë atij është të ecim të bashkuar në atë rrugë dhe me të njëjtën frymë”, tha Kryepeshkopi Joan.

Kryepeshkopi Janullatos ndërroi jetë pas një beteje të gjatë shëndetësore më 25 janar të 2025.

Kryepeshkopi Anastas, ishte rindërtuesi dhe rivitalizuesi i Kishës Ortodokse Autoqefale të Shqipërisë, të cilën e ngriti tërësisht nga rrënojat pas rënies së regjimit ateist. Me vizionin e tij hyjnor dhe punën e palodhur, ai rindërtoi jetën kishtare nga themelet, ndërtoi qindra kisha, themeloi institucione arsimore dhe bamirëse dhe formoi një brez të ri klerikësh, duke ofruar shërbim të pafund dhe sakrificë për më shumë se 33 vjet.

/k.s/a.f/

The post Kryepeshkop Joani: Të mbajmë të gjallë trashëgiminë që na la Janullatos appeared first on Agjencia Telegrafike Shqiptare.

TIRANË, 25 janar/ATSH/ Fshati turistik i Gjinarit, 22 km larg Elbasanit ofron në këto ditë dimri peizazhe mahnitëse, të mbuluara nga dëbora dhe qetësia karakteristike e zonave malore.

I njohur për bukurinë natyrore, pyjet e dendura dhe freskinë e ajrit malor, Gjinari po shndërrohet gjithnjë e më shumë në një nga pikat më të preferuara të turizmit në qarkun e Elbasanit, veçanërisht gjatë fundjavave dhe sezonit dimëror.

Kryeministri Edi Rama në kuadër të rubrikës “Shqipëria e bukur” ndau sot në rrjetet sociale pamje nga Gjinari, që këto ditë fund janari po preferohet nga vizitorët të tërhequr nga bukuria e natyrës dhe aktivitetet në ajër të pastër.

Pamjet e publikuara nga Rama ofrojnë një panoramë mbresëlënëse të Gjinarit turistik, ku bie në sy edhe një kolonë mjetesh të të njëjtit tip, të cilat kanë zhvilluar një guidë turistike mes natyrës së mbuluar nga dëbora, duke përshkuar rrugët malore dhe shtigjet piktoreske të zonës.

Rrugët malore, pyjet e bardha dhe ajri i pastër dimëror kanë krijuar një atmosferë magjike, duke e kthyer këtë udhëtim në një eksperiencë të veçantë për pjesëmarrësit.

Kjo panoramë tregon edhe një herë bukurinë natyrore dhe potencialin turistik që ofron zona malore e Elbasan, veçanërisht gjatë sezonit dimëror, ku Gjinari mbetet një nga destinacionet më të frekuentuara për guida turistike, aktivitete në grup dhe dashamirës të natyrës, ndërsa me dëborën e parë të sezonit zona ka qenë e mbushur plot me vizitorë.

1 nga 3

/k.s/a.f/

The post Gjinari destinacioni i preferuar dimëror i vizitorëve appeared first on Agjencia Telegrafike Shqiptare.

TIRANË, 25 janar/ATSH/ Kampionati i Përvitshëm i Shahut për nxënësit e shkollave 9-vjeçare në Elbasan tashmë është kthyer në traditë dhe që synon të nxisë zhvillimin intelektual dhe kulturën sportive te fëmijët.

Ky kampionat u zhvillua në ambientet e Qendrës Kulturore të Fëmijëve (QKF) në Elbasan, ku fitues të këtij edicioni u shpallën Erdet Alla nga shkolla “Sule Harri” dhe Arsa Çekani nga shkolla “Jorgji Dilo”, të cilët u dalluan për përqendrimin, strategjinë dhe aftësitë e tyre logjike.

Organizatorët i uruan kampionët për suksesin dhe i inkurajuan të vijojnë rrugën e sportit të mendjes.

Këtë vit, kursi i shahut është përfshirë si pjesë e rregullt e kurseve që QKF ofron, pas kërkesave të shumta nga nxënësit dhe prindërit. Pjesëmarrja e lartë në kampionat dëshmon interesin gjithnjë e në rritje të fëmijëve për aktivitete që zhvillojnë mendimin kritik, përqendrimin dhe disiplinën.

Qendra Kulturore e Fëmijëve në Elbasan ofron një sërë kursesh artistike, kulturore dhe sportive, me qëllim edukimin, argëtimin cilësor dhe largimin e fëmijëve nga përdorimi i tepruar i mjeteve teknologjike. Kjo qendër përbën një shembull pozitiv të investimit në formimin e brezit të ri, duke krijuar hapësira ku talenti dhe vlerat edukative kultivohen çdo ditë.

/k.s/a.f/

The post Kampionati i Shahut në Elbasan, nismë që edukon dhe formon fëmijët appeared first on Agjencia Telegrafike Shqiptare.

TIRANË, 25 janar/ATSH/ Një mbrëmje e jashtëzakonshme muzike, elegance dhe kulturë evropiane solli Galanë e Operetës Rumune në skenën e Teatrit “Skampa”, duke shënuar hapjen zyrtare të sezonit artistik në qytet.

Në këtë event festiv u zhvillua një performancë unike nga artistë të Teatrit Kombëtar të Operetës dhe Muzikalit “Ion Dacian” i Bukureshtit, të shoqëruar me këngëtaren e dashur për publikun, Eli Fara, e cila solli interpretime të fuqishme me gjurmë arumune dhe shpirt shqiptari.

Programi përfshiu arie, duete dhe vepra të njohura që sollën emocione të thella dhe duartrokitje të gjata nga publiku i pranishëm.

Ky aktivitet jo vetëm që shënoi një fillim dinjitoz për sezonin e ri artistik, por edhe forcoi marrëdhëniet kulturore mes Shqipërisë dhe Rumanisë, një nismë e rëndësishme për bashkëpunime të mëtejshme artistike mes dy vendeve tona.

Ndër të ftuarit e nderit ishte edhe dirigjenti i njohur Zhani Ciko.

Ky event u prit me entuziazëm nga qytetarët, duke shënuar nisjen e një sezoni plot art, kulturë dhe emocione në Teatrin “Skampa”.

/k.s/a.f/

The post Teatri “Skampa” i Elbasanit çel sezonit artistik me Galanë e Operetës Rumune appeared first on Agjencia Telegrafike Shqiptare.