Policia në rajonin e Stokholmit ka vërejtur se gjatë muajve të verës statistikat e pushimeve mjekësore janë rritur ndjeshëm, gjë që i ka shtyrë autoritetet të hetojnë shkaqet e këtij fenomeni.

Gjatë hetimeve, është zbuluar një rast i veçantë ku një hetuese policore ishte raportuar si e sëmurë tre vite radhazi, pikërisht menjëherë pas përfundimit të pushimeve vjetore, raporton media suedeze.

Sipas materialeve të hetimit, në të tri rastet, hetuesja kishte qenë me pushime në Ballkan (Prizren). Ajo kishte aplikuar për pushim në datat përkatëse, por kërkesa nuk i ishte aprovuar. Megjithatë, në të njëjtat data, ajo ishte paraqitur si e sëmurë.

Në deklarimin e saj para policisë, ajo ka mohuar akuzat për mashtrim, duke theksuar se ka pasur probleme shëndetësore psikike të lidhura me kthimin në punë.

“E konsideroj për të ardhur keq, sepse kam moral shumë të lartë pune. Gjatë gjithë vitit pothuajse nuk marr kurrë pushim mjekësor,” ka deklaruar ajo, duke shtuar se sipas saj, kishte të drejtë të ishte e sëmurë pavarësisht vendndodhjes.

“Secili ka të drejtë të jetë i sëmurë, kudo që ndodhet. Nëse jam e sëmurë, atëherë jam e sëmurë,” ka thënë ajo.

Megjithatë, hetimet kanë zbuluar se biletat e kthimit me avion nga pushimet në vitet 2023, 2024 dhe 2025 ishin rezervuar për data pas ditës kur ajo duhej të ishte kthyer në punë. Për ditët e raportuara si pushim mjekësor, ajo ka përfituar mbi 17 mijë korona suedeze (rreth 1,500euro) në pagesa për sëmundje.

Tani, hetuesja policore është akuzuar për mashtrim të rëndë dhe deklarim të rremë. Në aktakuzë thuhet se ajo ka abuzuar me besimin publik, duke kryer veprime të lidhura ngushtë në kohë, vend dhe qëllim, në cilësinë e saj si punonjëse e policisë.

Për veprën penale të mashtrimit të rëndë, ligji suedez parasheh dënim nga gjashtë muaj deri në gjashtë vjet burg./Telegrafi/

Komisioni Qendror i Zgjedhjeve (KQZ), bën të ditur se të premten (nesër) do të nis numërimi i mbi 27 mijë fletëvotimeve nga diaspora, respektivisht të fletëvotimeve nga votimi përmes postës, të cilat janë tërhequr nga dy kutitë postare në jashtë Kosovës.

Zëdhënësi i KQZ-së, Valmir Elezi thekson për Telegrafin se të premten, më 2 janar nga ora 10:00 në Qendrën e Numërimit dhe Rezultateve do të fillojë numërimi i fletëvotimeve nga votimi jashtë Kosovës, respektivisht i fletëvotimeve nga votimi përmes postës që deri më tani janë tërhequr nga dy kutitë postare jashtë Kosovës.

“Nga votimi me postë, siç e kemi treguar më herët, numri i shtetasve të regjistruar ka qenë rreth 58 mijë. Ende nuk është përmbyllur procesi i tërheqjes së fletëvotimeve nga kutitë postare, andaj në këtë fazë nuk e dijmë se sa prej këtyre votuesve të regjistruar kanë ushtruar të drejtën e votës. Tërheqjet e fundit të zarfeve me fletëvotime do të bëhen më 2 dhe 5 janar 2026”, thekson Elezi.

Sipas tij, deri më tani, nga dy kutitë postare, Berlin dhe Bernë, janë tërhequr më shumë se 28 mijë e 500 pako me fletëvotime që i takojnë votimit përmes postës dhe të cilat janë vlerësuar dhe verifikuar nga shërbimi votues i KQZ-së.

“Nga numri i përgjithshëm i pakove me fletëvotime të supozuara që deri më tani kemi pranuar, pra nga më shumë se 28 mijë, pas vlerësimit dhe verifikimit janë aprovuar 27,600, ndërkaq janë refuzuar më shumë se 950. Arsyeja më e shprehur te zaret e refuzuara është sepse në pakon me fletëvotim mungon dëftesa e regjistrimit të votuesit”, tha ai.

Në fund ai tha se nga votimi jashtë Kosovës, respektivisht nga votimi në 29 përfaqësi diplomatike, nga 19,187 shtetasit e regjistruar, kanë votuar 16,165 prej tyre apo 84.24%./Telegrafi/

TIRANË, 31 dhjetor /ATSH/ Kryetari i grupit parlamentar të Partisë Socialiste dhe drejtues politik për diasporën, Taulant Balla ka përcjellë sot një urim me video për shqiptarët kudo që ndodhen, nga sheshi “Skënderbej” në Tiranë, vetëm pak orë para ndërrimit të viteve.

Në mesazhin e tij, Balla uroi Gëzuar Vitin e Ri 2026 për shqiptarët në Shqipëri, në trojet etnike dhe veçanërisht për bashkatdhetarët në diasporë, duke theksuar rolin historik të votës së emigrantëve gjatë vitit 2025.

“U takon vëllezërve e motrave tanë në diasporë një urim i veçantë, edhe për shkak se gjatë vitit 2025 ata patën mundësinë për herë të parë në këto 35 vite demokraci të shprehen me votë për drejtimin që ata duan të ecë Shqipëria. Vota e bashkatdhetarëve në diasporë në vitin 2025 ishte pa dyshim një moment historik për Shqipërinë”, tha ai.

Sipas Ballës, gjatë vitit 2026 do të intensifikohen kontaktet me diasporën, si dhe angazhimet për ruajtjen e gjuhës dhe identitetit kombëtar.

“Ne dimë ta lexojmë shumë mirë votën e tyre dhe padyshim që gjatë vitit 2026 do të vazhdojmë të intensifikojmë kontaktet tona me gjithë shqiptarët që jetojnë në diasporë dhe të sigurojmë që çdo fëmijë shqiptar që lind në diasporë të ketë mundësinë të mësojë gjuhën shqipe”, u shpreh Balla.

Mesazhi u shoqërua me përqafime vëllazërore dhe mirënjohje në prag të Vitit të Ri nga sheshi “Skënderbej”, simboli i unitetit kombëtar.

“Dua që shqiptarëve në Itali, në Greqi, në Gjermani, në Britaninë e Madhe, në Shtetet e Bashkuara të Amerikës, në Kanada, apo kudo gjetkë nëpër botë, t’i uroj: Gëzuar Festat e Fundvitit, me mirënjohjen më të thellë dhe me përqafime vëllazërore nga sheshi i shqiptarëve, sheshi ‘Skënderbej’!”, theksoi Balla.

/gj.m/r.e/a.f/

The post Balla: Gjatë 2026-ës intensifikim i kontakteve me diasporën appeared first on Agjencia Telegrafike Shqiptare.

Komisioni Qendror i Zgjedhjeve ka bërë të ditur se deri më tash ka përfunduar votimi në 25 përfaqësitë diplomatike të Kosovës dhe se dalja e qytetarëve për të votuar është 15.597 ose 81.29 për qind nga gjithsej 19.187 votues të regjistruar, raporton KosovaPress.

Kryesuesi i KQZ-së Kreshnik Radoniqi në konferencën e tretë për media, tha se gjatë gjithë ditës së sotme kanë qenë në kontakt të vazhdueshëm me përfaqësitë diplomatike dhe se procesi i votimit në përgjithësi ka qenë i qetë.

“Deri në këtë kohë ka përfunduar votimi në 25 përfaqësitë diplomatike në shtetet, si: Turqi, Gjermani, Zvicër, Francë, Belgjikë, Norvegji, Austri, Suedi, Slloveni, Danimarkë, Itali, Kroaci, Holandë, Republikë Çeke, Hungari dhe në Mbretërinë e Bashkuar. Sipas kohës lokale në Kosovë, në orën 01:00 pas mesnatës, do të përfundojë votimi në 4 përfaqësitë tjera, në SHBA dhe Kanada...Sipas të dhënave nga 25 përfaqësi diplomatike ku është mbyllur votimi, por edhe nga të dhënat e orës 13:00 nga votimi në ShBA dhe Kanada, nga 19.187 votues të regjistruar, kanë votuar 81.29 për qind apo 15,597 votues. Sipas procedurave, këto fletëvotime nuk do të numërohen në përfaqësi diplomatike, por gjatë ditëve në vazhdim do të sillen në Kosovë dhe numërimi i tyre do të bëhet në vendin tonë”, ka thënë Radoniqi.

Radoniqi ka pasur edhe një porosi për ditën e nesërme të procesit zgjedhor në Republikën e Kosovës.

“Për nesër bëj apel për të gjithë këshillat e vendvotimeve dhe këshillave komunal që të jenë në nivel detyre dhe të respektojnë rregullin dhe ligjin zgjedhore të KQZ-së. Na pret një ditë e gjatë nesër, një ditë ku do t’iu ofrojmë qytetarëve të drejtën e votës, andaj shpresojmë që të gjithë janë në nivel të këtyre dhe të respektojnë rendin dhe ligjin”, tha Radoniqi.

PRISHTINË, 27 dhjetor/ATSH/- Komisioni Qendror i Zgjedhjeve ka bërë të ditur në orët e mbrëmjes se ka përfunduar votimi në 25 përfaqësitë diplomatike të Kosovës dhe se dalja e qytetarëve për të votuar është 15.597 ose  81.29 % nga 19.187 votues të regjistruar.

Kryesuesi i KQZ-së, Kreshnik Radoniqi në konferencën e tretë për media, tha se gjatë gjithë ditës së sotme kanë qenë në kontakt të vazhdueshëm me përfaqësitë diplomatike dhe se procesi i votimit në përgjithësi ka qenë i qetë. “Sipas kohës lokale në Kosovë, në orën 01:00 pas mesnatës, do të përfundojë votimi në 4 përfaqësitë tjera, në SHBA dhe Kanada…Sipas të dhënave nga 25 përfaqësi diplomatike ku është mbyllur votimi, por edhe nga të dhënat e orës 13:00 nga votimi në ShBA dhe Kanada, nga 19.187 votues të regjistruar, kanë votuar 81.29 për qind apo 15,597 votues. Sipas procedurave, këto fletëvotime nuk do të numërohen në përfaqësi diplomatike, por gjatë ditëve në vazhdim do të sillen në Kosovë dhe numërimi i tyre do të bëhet në vendin tonë”, ka thënë Radoniqi.

Radoniqi u ka bërë thirrje të gjithë këshillave të vendvotimeve dhe këshillave komunal që të jenë në nivel detyre dhe të respektojnë rregullin dhe ligjin zgjedhore të KQZ-së gjatë procesit të votimit ditën e nesërme.

“Na pret një ditë e gjatë nesër, një ditë ku do t’iu ofrojmë qytetarëve të drejtën e votës, andaj shpresojmë që të gjithë janë në nivel të këtyre dhe të respektojnë rendin dhe ligjin”, apeloi ai. /KosovaPress/

The post KQZ: Votat e diasporës do të numërohen në Kosovë appeared first on Agjencia Telegrafike Shqiptare.

Komisioni Qendror i Zgjedhjeve ka bërë të ditur se deri në ora 19:00 ka përfunduar procesi i votimit në 25 përfaqësi diplomatike të Kosovës, ndërkohë në orën 01:00 pas mesnatës, sipas kohës lokale në Kosovë, do të përfundojë votimi në 4 përfaqësitë tjera, në Shtetet e Bashkuara të Amerikës dhe Kanada.

“Ju njoftojmë se deri në këtë kohë ka përfunduar votimi në 25 përfaqësitë diplomatike në shtetet, si: Turqi, Gjermani, Zvicër, Francë, Belgjikë, Norvegji, Austri, Suedi, Slloveni, Danimarkë, Itali, Kroaci, Holandë, Republikë Çeke, Hungari dhe në Mbretërinë e Bashkuar. Sipas kohës lokale në Kosovë, në orën 01:00 pas mesnatës, do të përfundojë votimi në 4 përfaqësitë tjera, në Shtetet e Bashkuara të Amerikës dhe Kanada”, ka thënë Radoniqi, kryetar i KQZ-së.

Ai tregoi se gjatë gjithë ditës së sotme, KQZ ka qenë në kontakt të vazhdueshëm me përfaqësitë diplomatike dhe nga zyrtarët e shërbimit votues u janë ofruar udhëzimet e nevojshme për zhvillimin e votimit sipas ligjit dhe procedurave.

“Në përgjithësi, nga komunikimi i vazhdueshëm, procesi i votimit është zhvilluar pa ndonjë pengesë. Në emër të KQZ-së, falënderojmë shefat dhe stafin e misioneve diplomatike dhe anëtarët e Këshillave të Vendvotimit për angazhimin e tyre gjatë ditës së sotme”, theksoi ai.

Sipas të dhënave nga 25 përfaqësi diplomatike ku është mbyllur votimi, por edhe nga të dhënat e orës 13:00 nga votimi në ShBA dhe Kanada, KQZ-ja thotë se nga 19,187 votues të regjistruar, kanë votuar 81.29% apo 15,597 votues.

Radoniqi tha se, sipas procedurave, këto fletëvotime nuk do të numërohen në përfaqësi diplomatike, por gjatë ditëve në vazhdim do të sillen në Kosovë dhe numërimi i tyre do të bëhet në vendin tonë.

Kryesuesi i KQZ-së e mbylli konferencën e sotme me një apel lidhur me procesin votues të së dielës në Kosovë.

“Apel për të gjithë Këshillat e Vendvotimeve, Komisioneve Komunale që të jenë në nivel detyre, të respektojnë ligjin rregullat zgjedhore të KQZ. Na pret një ditë e gjatë nesër, ku duhet të iu ofrojmë qytetarëve të drejtën e votës, andaj shpresojmë që të gjithë jemi në nivel detyre e të respektojmë rregullat e ligjin. U urojmë të gjithëve një ditë të mbarë”, tha Radoniqi.

Sot është duke u zhvilluar procesi i votimit për shtetasit e Kosovës në përfaqësitë diplomatike jashtë vendit.

Gjatë ditës së sotme, 19,187 shtetas të Kosovës, të cilët janë regjistruar paraprakisht për të votuar fizikisht, kanë të drejtë vote në 16 ambasada dhe 13 konsullata të Republikës së Kosovës.

Sipas të dhënave të prezantuara në konferencë për media nga KQZ, nga 24 përfaqësi diplomatike, deri në orën 13:00, nga gjithsej 19,187 votues të regjistruar, kanë votuar 36.89 për qind, apo 7,079 votues.

Nga këto të dhëna më së shumti votues kanë votuar në Konsullatën e Kosovës në Dyseldorf të Gjermanisë (2,231 votues) e pasur nga Ambasada e Kosovës në Cyrih të Zvicrës (2,114 votues). E treat është Konsullata e Kosovës në Shtutgart ku kanë votuar 1,631 votues.

Sipas njoftimit zyrtar, në orën 17:00, sipas kohës lokale në Kosovë, do të përfundojë votimi në konsullatën e Kosovës në Stamboll. Ndërkaq, në orën 19:00, qendrat e votimit do të mbyllen në disa shtete evropiane, përfshirë: Gjermaninë, Zvicrën, Francën, Belgjikën, Norvegjinë, Austrinë, Suedinë, Slloveninë, Danimarkën, Italinë, Kroacinë, Holandën, Republikën Çeke dhe Hungarinë.

Votimi në ambasadën e Kosovës në Londër do të përfundojë në orën 20:00, ndërsa në orën 01:00 të ditës pasuese, gjithnjë sipas kohës lokale në Kosovë, procesi i votimit do të përmbyllet në katër përfaqësi diplomatike në Shtetet e Bashkuara të Amerikës dhe Kanada./Telegrafi/

Evidencat e Sistemit të Menaxhimit të Integruar, flasin për rreth 500 mijë hyrje të qytetarëve të Kosovës përmes pikëkalimeve kufitare tokësore dhe ajrore. Ndërkohë një fluks i shtuar shihet në Aeroportin Ndërkombëtar të Prishtinës.

Bazuar në të dhënat zyrtare të Policisë, të nxjerra nga Sistemi i Menaxhimit të Integruar dhe raportimet nga rajonet përkatëse, gjatë javës së kaluar janë regjistruar rreth 500 mijë hyrje të qytetarëve të Kosovës përmes pikëkalimeve kufitare tokësore dhe ajrore.

Zyrtar për informim në ANP ” Adem Jashari ” në Prishtinë bëjnë të ditur që festat e fund vitit janë duke i sjellur shumë bashkëkombës tonë, ndërkohë që linjat tona me vende tjerë të BE-ë janë ato të cilat po krijohen që të ketë qarkullim sa më të lirë e të mundshëm për qytetar të vendit tonë.

Kulmi i hyrjeve është shënuar gjatë fundjavës, ndërkohë krahasuar me vitin e kaluar është regjistruar një rritje prej 8 për qind në udhëtimet ajrore.

“Që nga 1 dhjetori deri më tani kemi procesuar rreth 270 mijë qytetarë. Nëse marrim totalin e udhëtarëve për vitin 2025, shohim një trend të vazhdueshëm rritjeje, me rreth 8% më shumë udhëtarë krahasuar me vitin 2024”, tha Valentina Gara, zyrtare për komunikim me publikun në ANP.

Aeroporti ka realizuar edhe avancime teknologjike për përmirësimin e shërbimeve.

“Shërbimet e reja, të mundësuara nga digjitalizimi dhe avancimet teknologjike, i lejojnë udhëtarët të kryejnë proceset e tyre, përfshirë regjistrimin e valixheve, pa pritur gjatë në radhë”, tha Gara për televizionin publik.

Investimet në teknologji bashkëkohore, shtimi i stafit dhe linjat e reja ndërkombëtare po mundësojnë kursimin e kohës dhe afrimin e bashkëkombësve me atdheun, duke mbështetur lëvizjen e lirë të qytetarëve.

Avokati Arianit Koci ka bërë thirrje publike që qytetarët e Kosovës dhe bashkatdhetarët të shmangin kalimin tranzit nëpër Serbi me emblema apo ngjitëse me shkronjat UÇK në veturat e tyre, duke paralajmëruar rrezik për veprime arbitrare nga autoritetet serbe.

Sipas Kocit, një bashkatdhetar është arrestuar së fundmi nga autoritetet serbe vetëm për shkak se në veturë i ishte vërejtur një emblemë e Ushtrisë Çlirimtare të Kosovës. Ai e ka cilësuar këtë veprim si arbitrar dhe juridikisht të pajustifikueshëm.

“Mos kaloni nëpër Serbi me emblema apo ngjitëse me shkronjat UÇK në veturë. Sapo më erdhi informacioni se një bashkatdhetar ynë është arrestuar, pasi autoritetet serbe i kanë vërejtur emblemën e UÇK-së në veturë. Ky veprim është arbitrar dhe juridikisht i pajustifikueshëm”, ka deklaruar Koci.

Ai ka theksuar se shprehja e identitetit politik apo historik nuk përbën vepër penale sipas standardeve evropiane për të drejtat e njeriut, duke shtuar se raste të tilla po përdoren si mjete presioni politik.

“Raportet ndërmjet shteteve janë të tensionuara dhe çmimin po e paguajnë qytetarët e zakonshëm, të cilët mbesin të ekspozuar ndaj veprimeve arbitrare. Informimi i ndërsjellë dhe kujdesi mes nesh për momentin janë mburoja e vetme reale”, ka shkruar Koci./Telegrafi/

Qendra Kombëtare për Menaxhim Kufitar ka publikuar të dhënat e përditësuara lidhur me gjendjen dhe pritjet në pikat e kalimit kufitar, sipas përditësimit të bërë më 21 dhjetor 2025, në ora 19:03.

Sipas këtyre të dhënave, në shumicën e pikave kufitare qarkullimi po zhvillohet pa vonesa të theksuara, ndërsa fluks më i madh vërehet në disa kalime, kryesisht në hyrje të territorit të Kosovës.

Në pikën kufitare Dheu i Bardhë, pritjet në hyrje për automjete arrijnë nga 30 deri në 40 minuta, me kolona deri në 150 metra, ndërsa në dalje nuk raportohet pritje.

Edhe në pikën Jarinje ka fluks më të theksuar, ku pritjet në hyrje janë 20–30 minuta, ndërsa në dalje 10–15 minuta, me kolona që shkojnë deri në 200 metra në hyrje dhe 50 metra në dalje.

Në pikën Merdarë, pritjet në hyrje janë 15–20 minuta, ndërsa në dalje nga 3 deri në 5 minuta, pa kolona të evidentuara. Situatë e ngjashme raportohet edhe në Mutivodë, ku pritjet në hyrje janë 15–20 minuta, ndërsa në dalje minimale.

Në pikat e tjera kufitare si Bërnjak, Kullë, Vërmicë, Qafë e Morinës, Qafë e Prushit, Muçibabë, Hani i Elezit, Glloboqicë dhe Stançiq, qarkullimi zhvillohet pothuajse normal, me pritje të shkurtra prej disa minutash dhe pa kolona të konsiderueshme./Telegrafi/

Komisioni Qendror i Zgjedhjeve ka njoftuar se si duhet të votoni përmes postës.

Votimi përmes postës

Nëse jeni regjistruar me sukses për të votuar jashtë Kosovës, KQZ do t’ju dërgojë fletëvotimet dhe materialet e nevojshme për votim në adresën tuaj të banimit (të cilën e keni dhënë gjatë regjistrimit).

Periudha e votimit përmes postës

12 Dhjetor – 27 Dhjetor 2025

Si të votoni përmes postës?

Çka duhet të bëni pasi ta pranoni zarfin me fletëvotim?

Në anën e majtë të fletëvotimit janë të renditura subjektet politike. Ju duhet të votoni vetëm një (1) subjekt politik.

Në anën e djathtë të fletëvotimit mund të votoni deri në dhjetë (10) kandidatë.

Për të parë broshurën e kandidatëve, klikoni këtu.

Pas votimit, paloseni fletëvotimin, vendoseni në zarfin e vogël (zarfi i fshehtësisë) dhe mbylleni atë.

Kujdes: Në këtë zarf nuk duhet të shënoni asgjë.

Si ta dërgoni fletëvotimin?

Shkarkoni dëftesën e regjistrimit, të cilën e keni pranuar përmes emailit.

Në zarfin kryesor vendosni:

Zarfin e fshehtësisë me fletëvotimin (zarfi i vogël), dhe

Dëftesën e regjistrimit.

Në zarfin kryesor shënoni adresën e kutisë postare të KQZ-së për shtetin përkatës.

Lista e adresave gjendet këtu.

Vendosni pullën postare përkatëse.

Dërgoni zarfin përmes postës më të afërt nga vendi ku jetoni.

Vëmendje

Çdo dërgesë duhet të jetë individuale. Brenda një zarfi nuk lejohet të dërgohen fletëvotime për anëtarë të familjes ose për persona të tjerë.

Zarfin duhet ta dërgoni sa më herët që të jetë e mundur, pasi gjatë festave të fundvitit procesimi postar mund të zgjasë më shumë dhe dërgesa mund të vonohet në mbërritje në kutinë postare.

Për ndihmë apo më shumë informata, mund të na kontaktoni në:

WhatsApp ose Viber: +383 46 61 00 61

Telefon: +383 38 213 100

Për ta verifikuar se a jeni regjistruar si votues jashtë Kosovës, ju duhet të klikoni në vegzën e mëposhtme.

Gjatë vitit 2024, remitencat e diasporës kanë vijuar të jenë një burim kyç financiar për vendet e Ballkanit, duke u llogaritur në miliarda euro dhe duke pasur një ndikim të drejtpërdrejtë në ekonomitë kombëtare.

Të dhënat e publikuara nga Eurostat tregojnë se shumë vende të rajonit mbeten të varura nga paratë e dërguara nga mërgimtarët, si për konsumin familjar ashtu edhe për stabilitetin ekonomik.

Në mesin e vendeve të rajonit, Kroacia renditet ndër të parat për nga vlera absolute e remitencave, me rreth 2.27 miliardë euro të dërguara gjatë vitit të kaluar, që përfaqësojnë rreth 2.6 për qind të Prodhimit të Brendshëm Bruto.

Bosnje dhe Hercegovina vijon të mbetet ndër ekonomitë më të varura nga remitencat, me rreth 1.99 miliardë euro nga diaspora, ose 7.6 për qind të PBB-së.

Shqipëria ka përfituar rreth 1.28 miliardë euro nga emigrantët e saj gjatë vitit 2024, një shumë që llogaritet në rreth 5.1 për qind të ekonomisë kombëtare.

Ndërkohë, Kosova shënon nivelin më të lartë të varësisë nga remitencat në rajon, me rreth 1.32 miliardë euro të dërguara nga diaspora, që përfaqësojnë afërsisht 12.7 për qind të PBB-së.

Në fund të listës qëndrojnë Mali i Zi dhe Maqedonia e Veriut. Mali i Zi ka regjistruar rreth 345 milionë euro remitenca, ose 4.5 për qind të PBB-së, ndërsa Maqedonia e Veriut rreth 310 milionë euro, që përbëjnë rreth 2 për qind të ekonomisë së saj.

Ekspertët theksojnë se remitencat mbeten jetike për mbulimin e shpenzimeve bazë, ruajtjen e stabilitetit social dhe mbështetjen e ekonomive familjare në rajon, megjithëse ndikimi i tyre afatgjatë në zhvillimin ekonomik varet nga orientimi i këtyre mjeteve drejt investimeve prodhuese dhe qëndrueshmërisë ekonomike./Telegrafi/

TIRANË, 10 dhjetor /ATSH/ Seleksionimet e futbollistëve të rinj shqiptarë që jetojnë jashtë vendit vijuan këtë të mërkurë me ditën e tretë në “Shtëpinë e Futbollit”.

Pjesëmarrës në këtë seleksionim ishin rreth 100 futbollistë të vitlindjes 2010, të cilët u vëzhguan nga afër nga të gjithë trajnerët e moshave të ekipeve Kombëtare së bashku me stafet e tyre përkatëse si edhe stafi i Drejtorisë Teknike.

Këto seleksionime po i ndjek nga afër edhe zëvendëstrajneri i ekipit kombëtar A, Ervin Bulku. Në një prononcim për fshf.org, trajneri Bulku vlerëson pjesëmarrjen e futbollistëve të vegjël nga e gjithë bota si mjaft të kënaqshme ndërsa nënvizon edhe rëndësinë e këtyre ditëve seleksionimi.

“Sot është dita e tretë e seleksionimeve. Duke e marrë nga dita e parë dhe deri më sot, kemi një pjesëmarrje shumë të kënaqshme të lojtarëve që kanë ardhur nga e gjithë bota, jo vetëm nga Europa. Ne në fakt kemi organizuar edhe seleksionime në Amerikë, i fundit në muajin qershor. Këto seleksionime janë shumë të rëndësishme për të gjitha grupmoshat, pasi i shërbejnë të gjitha ekipeve kombëtare të moshave dhe trajnerëve që të kenë një ide sa më të qartë duke i parë dhe duke i ndjekur të gjithë lojtarët shqiptarë që aktivizohen në kampionate dhe ekipe të ndryshme”, tha Bulku.

Sipas tij, kjo është një mundësi e artë për të gjithë fëmijët, futbollistët që kanë ëndërr të veshin fanellën e ekipit kombëtar, pasi kanë mundësinë të tregojnë cilësitë e tyre sot këtu.

Të hënën, të martën dhe sot u zhvilluan seleksionimet për lojtarët e vitlindjeve 2009, 2010, 2011 ndërsa më 16 dhjetor do të zhvillohet seleksionimi me lojtarët e vitlindjes 2012. /j.p/

The post Open Stage, dita e tretë, FSHF: Talente nga e gjitha bota appeared first on Agjencia Telegrafike Shqiptare.

PRISHTINË, 7 dhjetor /ATSH/ Komisioni Qendror i Zgjedhjeve (KQZ) në Kosovë ka miratuar mbi 70 mijë aplikime për regjistrimin e votuesve jashtë Kosovës për zgjedhjet e parakohshme parlamentare të 28 dhjetorit.

Lajmin e ka konfirmuar për Radion Evropa e Lirë, zëdhënësi i KQZ-së, Valmir Elezi.

“Sipas të dhënave preliminare, gjatë periudhës 11-ditore (26 nëntor – 6 dhjetor) përmes platformës elektronike të KQZ-së, janë pranuar mbi 84.700 aplikime për regjistrim për votim jashtë Kosovës, prej të cilave janë aprovuar rreth 71.900 ndërkaq janë refuzuar rreth 6.700. Në vlerësim e sipër janë rreth 5.900 aplikime”, ka thënë Elezi në disa përgjigje me shkrim.

Ai ka bërë të ditur se pjesa më e madhe e votuesve janë regjistruar për të votuar përmes postës, mbi 51.000 prej tyre, për të dërguar pakon me fletëvotim në ndonjërën nga adresat e kutive postare jashtë Kosovës dhe rreth 2.500 të tjerë janë regjistruar për të dërguar pakon me fletëvotim në kutinë postare të KQZ-së në Kosovë.

“Rreth 18.000 shtetas janë regjistruar për të votuar fizikisht në ndonjërën nga përfaqësitë diplomatike”, ka thënë mes të tjerash Elezi.

Në zgjedhjet parlamentare të 9 shkurtit të këtij viti, KQZ-ja pati regjistruar afro 105 mijë qytetarë në diasporë për të votuar në atë proces.

Në ato zgjedhje, Kosova e ka organizuar për herë të parë votimin fizik nëpër përfaqësitë diplomatike, përkatësisht në 16 ambasada dhe 14 konsullata në 19 shtete të ndryshme të botës.

Zgjedhjet e parakohshme mbahen pasi për partitë politike të Kosovës ishte e pamundshme që të arrinin konsensus për të ecur përpara, pas rezultatit të zgjedhjeve të 9 shkurtit, meqë asnjëra parti nuk arriti t’i siguronte numrat e nevojshëm për të qeverisur e vetme.

Lëvizja Vetëvendosje doli e para dhe fitoi 48 ulëse në Kuvend, duke i lënë prapa Partinë Demokratike të Kosovës me 24 ulëse, Lidhjen Demokratike të Kosovës me 20, Listën Serbe me nëntë dhe koalicionin mes Aleancës për Ardhmërinë e Kosovës dhe Nismës Socialdemokrate, me tetë të tilla.

Ulëset e tjera ishin të rezervuara për pakicat.

Disa parti në Kosovë kanë qenë në favor të caktimit të 28 dhjetorit si datë për zgjedhje, me arsyetimin se shumë shtetas të Kosovës nga diaspora kthehen në vendlindje në kohën e festave.

Në mesin e tyre ka qenë Lëvizja Vetëvendosje, e cila i ka fituar shumicën e votave të diasporës më 9 shkurt.

Disa parti tjera kanë përmendur problemet eventuale që mund të dalin me monitorimin e procesit më 28 dhjetor, pasi një pjesë e vëzhguesve ndërkombëtarë mund të mos jenë të angazhuar, marrë parasysh që një pjesë e madhe e botës është në periudhë pushimesh.

Megjithatë, presidentja e Kosovës, Vjosa Osmani e ka arsyetuar vendimin e saj, duke thënë se KQZ-së i është dashur kohë për t’u përgatitur, meqë vendi i ka mbajtur edhe dy procese tjera zgjedhore në tetor dhe nëntor – dy raunde të zgjedhjeve lokale. /REL/

The post KQZ: Mbi 70 mijë votues të regjistruar nga diaspora për zgjedhjet e 28 dhjetorit në Kosovë appeared first on Agjencia Telegrafike Shqiptare.

Komisioni Qendror Zgjedhor (KQZ) ka bërë të ditur se deri më tani kanë aplikuar për regjistrim 63 mijë e 997 qytetarë nga diaspora për zgjedhjet e jashtëzakonshme parlamentare.

Në një njoftim për media, KQZ-ja përkujton bashkatdhetarët se ka mbetur edhe një ditë afat për aplikim për të votuar jashtë Kosovës.

“Mos e humb mundësinë tënde që zëri yt të dëgjohet”, thuhet në një njoftim të KQZ-së në Facebook.

Adresa për aplikim online është https://diaspora.kqz-ks.org/sq/, ose përmes postës në kutinë postare të KQZ-së.

Për detaje rreth regjistrimit, mërgata mund të njoftohet përmes postës: https://kqz-ks.org/regjistrimi-per-votim-jashte-kosoves/

Mbi 48 mijë e 600 aplikime për regjistrim për votim jashtë Kosovës janë aprovuar, ndërkaq mbi 6 mijë e 400 janë refuzuar nga Komisioni Qendror Zgjedhor.

KQZ ka njoftuar se nga 26 nëntori deri më 4 dhjetor janë pranuar më shumë se 55,600 aplikime.

“Nga numri i përgjithshëm i aplikuesve të aprovuar, pjesa më e madhe janë regjistruar për të votuar përmes postës, rreth 35,000 prej tyre, për të dërguar pakon me fletëvotim në ndonjërën nga adresat e kutive postare jashtë Kosovës dhe më shumë se 1,600 të tjerë për të dërguar pakon me fletëvotim në kutinë postare të KQZ-së në Kosovë. Ndërkaq, mbi 12,000 shtetas janë regjistruar për të votuar fizikisht në ndonjërën nga përfaqësitë diplomatike”, njofton KQZ.

Ndryshe, Kosova do të mbajë zgjedhje të parakohshme këtë muaj sepse Lëvizja Vetëvendosje, nuk arriti në dy përpjekje ta marrë mbështetjen e Kuvendit për një mandat të ri.

Ajo doli e para në zgjedhjet e 9 shkurtit, por 48 ulëse në Kuvend ishin të pamjaftueshme për të qeverisur e vetme dhe ajo nuk gjeti një partner për të formuar qoftë edhe një qeveri të pakicës prej 61 ulësesh në Kuvend.

TIRANË, 3 dhjetor /ATSH/ Komisioni për Evropën dhe Punët e Jashtme shqyrtoi sot projektligjin “Për disa ndryshime dhe shtesa në ligjin nr.16/2018, “Për diasporën”, i ndryshuar”.

E pranishme në komision për të prezantuar projektligjin ishte zv.ministrja për Evropën dhe Punët e Jashtme, Vilma Prendi, e cila u shpreh se ai vjen si nevojë për të modernizuar kornizën ligjore që trajton çështjet e diasporës, për ta bërë atë më funksionale, më gjithëpërfshirëse dhe në përputhje me realitetin institucional aktual si dhe me sugjerimet e vetë diasporës, të artikuluara veçanërisht gjatë Samitit të 3-të të Diasporës në nëntor të vitit 2023.

“Ky pr/ligj do të rregullojë qartë marrëdhëniet e bashkëpunimit dhe ndërveprimit midis autoriteteve shtetërore dhe të diasporës do të garantojë ruajtjen dhe kultivimin e identitetit kombëtar, gjuhësor, kulturor dhe arsimor të diasporës, do të forcojë rolin koordinues të ministrit përgjegjës për diasporën dhe instrumenteve në varësi të tij”, tha Prendi.

Prendi theksoi se, konkretisht një nga ndryshimet që do të vijë në ligj do të jetë, ridimensionimi i rolit të MEPJ-së si autoritet kryesor i politikave për diasporën.

Po ashtu, theksoi Prendi, synohet, “forcimi i rolit strategjik të Këshillit të Ministrave në mbështetjen e gjuhës shqipe dhe arbëreshe, duke përqendruar funksionin e tij në drejtim politikash dhe harmonizim institucional”.

Gjithashtu parashikohet rregullimi ligjor i Agjencisë së Diasporës.

Prendi theksoi se, parashikohet edhe krijimi i qendrave kulturore për diasporën.

Gjithashtu synohet zgjerimi i rolit dhe funksioneve të Këshillit Koordinues të Diasporës si dhe do të synohet forcimi i kapaciteteve të tij dhe rritja e numrit të anëtarëve nga 15 në 21 anëtarë.

/gj.m/j.p/

The post Prendi: Krijim i qendrave kulturore për diasporën appeared first on Agjencia Telegrafike Shqiptare.

Ish-kryetari i Prishtinës, Shpend Ahmeti, ka reaguar pas tentativës së Lëvizjes Vetëvendosje për të mundësuar që diaspora të votojë edhe jashtë ambasadave dhe konsullatave – kërkesë e cila u refuzua nga Paneli për Ankesa dhe Parashtresa (PZAP).

Në një postim në Facebook, Ahmeti tha se e drejta e votës për diasporën është e padiskutueshme, por mënyra e organizimit të votimit është e përcaktuar qartë në ligjin që është miratuar gjatë qeverisjes së Albin Kurtit.

“E drejta e votës është e garantuar për çdo shtetas të Republikës së Kosovës të moshës madhore – kudo që jeton. E drejta ndryshon nga mundësia që përcaktohet edhe nga kredibiliteti i procesit”, shkroi Ahmeti.

Ai theksoi se qëllimi i çdo rregullimi zgjedhor është të sigurojë një proces të besueshëm dhe të menaxhuar mirë.

“Askush s’mundet me ma mohu të drejtën e votës, por është në interesin e secilit që vota ime apo e juaja të shkojë aty ku e keni pas njet,” tha ai, duke shtuar se votimi në pika të organizuara me komisionerë, vëzhgues dhe procedura të qarta garanton integritetin e procesit.

Ahmeti kujtoi se Kuvendi gjatë qeverisë Kurti ka miratuar ligjin që mundëson votimin fizik të diasporës në ambasada dhe konsullata – për ta lehtësuar procesin, por edhe për ta bërë atë më të sigurt.

“Me këtë ligj po hyjmë në këtë zgjedhje dhe s’ka mundësi ndryshimi – NUK KA. Për zgjedhjet tjera mund të bëjmë diskutim e ndryshime,” shkroi ai.

Sipas Ahmetit, të gjitha diskutimet e partive për “dashurinë ndaj diasporës” janë thjesht pjesë e fushatës elektorale.

“Çfarëdo diskutimi se kush e don ma shumë diasporën është veç fushatë dhe s’ka kurrfarë baze në mundësi ligjore e në dashni,” ka theksuar ai.

Në fund, ai u bëri thirrje partive politike që të flasin për mënyrën se si do të qeverisin pas zgjedhjeve dhe si do t’ua lehtësojnë jetën qytetarëve, përfshirë diasporën.

“E tash – a po tregoni se si keni me formu qeveri e si keni me përmirësu jetën qytetarëve? Shumë e dhimbshme në çka po synohet me fitu vota,” shkroi Ahmeti./Telegrafi/

Ka mbetur edhe një javë që qytetarët që jetojnë jashtë Kosovës të kenë mundësi të regjistrohen për të votuar në zgjedhjet e parakohshme të 28 dhjetorit. Platforma për t’u regjistruar, e hapur që nga 26 nëntori, do të jetë funksionale deri më 6 dhjetor, ndërkohë që votuesit jashtë vendit kanë mundësi të zgjedhin njërën nga tri format e votimit.

Ata mund të votojnë fizikisht në përfaqësitë diplomatike të Kosovës nëpër botë, mund të dërgojnë fletëvotimin përmes postës në kutinë postare të Komisionit Qendror Zgjedhor apo në ndonjërën prej kutive postare të KQZ-së që është hapur jashtë vendit.

Megjithatë, bashkatdhetarët duhet të kenë kujdes një gjë: votimi fizik në Kosovë, pra në vendbanimet e tyre në Kosovë, nuk do të jetë i mundur nëse paraprakisht regjistrohen për të votuar njërën prej formave të përmendura më lart.

Thirrje në adresë të bashkatdhetarëve përçojnë të gjitha partitë politike, në forma të ndryshme. Ish-kryeparlamentari Dimal Basha, kohën e mbajtjes së zgjedhjeve e sheh si mundësi për një mobilizim më të madh.

Edhe pse lëvizjet nga Diaspora për momentin mbeten brenda normales, vlerësohet se pjesëmarrja e mërgatës mund të ketë rol të rëndësishëm në rezultatin e zgjedhjeve. Me afatin e regjistrimit që po i afrohet fundit dhe sezonin e festave që zakonisht rrit qarkullimin, ditët në vijim pritet të tregojnë nëse thirrjet për mobilizim do të sjellin një angazhim më të madh drejt 28 dhjetorit.

Ndërkohë, agjencitë turistike që veprojnë në vend, nuk vënë në pah ndonjë lëvizje për interes të shtuar për rezervim biletash aeroplani, krahasuar me vitin e kaluar, pavarësisht se fundviti zakonisht shënon kërkesa më të mëdha.

“Nuk kemi diçka ndonjë fluks të shtuar sa i përket pjesës së zgjedhjeve. Natyrisht mërgimtarët kanë filluar të vijnë për festat e fundvitit, por deri në këto momente diçka ndonjë fluks më të shtuar për shkak konkretisht të zgjedhjeve nuk kemi pasur. Janë festat e fundvitit që çdo vit në kësi kohe fillojnë të vijnë bashkatdhetarët”, tha për RTK-në Melisa Statovci, agjente e shitjes së biletave të aviokompanive.

“Të hënën hyjmë në muajin dhjetor, ata zakonisht i kanë pushimet nga 23-24 sepse janë kërshëndellat dhe besoj se do të rritet numri, për momentin është numër shumë i vogël”, tha Shyhrete Shaqiri, një tjetër agjente e shitjes së biletave të aviokompanive.

Agjentë turistikë nënvizojnë edhe faktin se përgjatë festive të fundvitit, edhe çmimet e larta mund të jenë pengesë për lëvizje të shtuar. Megjithëkëtë lëvizjet e mërgatës nuk maten me vijat ajrore sepse një pjesë e madhe e tyre lëvizin udhëve tokësore.

Ndonëse nuk dihen shifrat e sakta për numrin e bashkatdhetarëve që vijnë në Kosovë gjatë fundvitit, organizatat që i monitorojnë fushatat dhe proceset zgjedhore vlerësojnë se ndikimi i tyre në rezultat ka qenë i rëndësishëm. Sipas vendimit të Komisionit Qendror të Zgjedhjeve, mërgata do të ketë mundësi të votojë në 10 qendra të reja votimi, pesë nga to në Gjermani, tri në Zvicër, një në Mbretërinë e Bashkuar dhe një në Shtetet e Bashkuara të Amerikës, me gjithsej 43 vendvotime dhe kapacitet deri në rreth 50 mijë votues.

Shoqatat që përfaqësojnë diasporën shqiptare në Turqi kanë organizuar aktivitete festive për nder të 28 Nëntorit, duke marshuar në lagje e rrugë të ndryshme të Stambollit me festë.

Me flamurin kuqezi në duar dhe të shoqëruar nga këngë patriotike, dhjetëra pjesëtarë të komunitetit shqiptar kanë defiluar nëpër qytet për të shënuar Ditën e Flamurit dhe të Pavarësisë së Shqipërisë.

“E festuam me krenari 28 Nëntorin! Sot u mblodhëm sepse kjo ditë është simbol i rrënjëve tona, historisë sonë dhe lirisë sonë”, thuhet në njoftimin e shoqatave shqiptare në Turqi.

Organizatorët theksojnë se festa e 28 Nëntorit mbetet një moment i veçantë për komunitetin shqiptar në Stamboll, duke i bashkuar ata rreth identitetit, traditës dhe krenarisë kombëtare./Telegrafi/