TIRANNË, 22 janar/ATSH/ Autoriteti Kombëtar për Sigurinë Kibernetike (AKSK) informoi sot se nuk ka asnjë incident kibernetik të konfirmuar që të ketë cenuar funksionimin, sigurinë apo integritetin e sistemeve shtetërore.

Në një deklaratë për shtyp AKSK reagoi ndaj disa informacioneve të pavërteta të shpërndara ditët e fundit në rrjetet sociale apo media lidhur me pretendime për sulme kibernetike ndaj institucioneve të vendit.

“AKSK, në bashkëpunim të vazhdueshëm me institucionet publike dhe strukturat përgjegjëse, monitoron në mënyrë të pandërprerë hapësirën kibernetike dhe ka në funksion mekanizmat e nevojshëm për identifikimin dhe reagimin ndaj incidenteve kibernetike”, thuhet në deklaratën për shtyp.

AKSK i bën thirrje publikut dhe medieve që të referohen vetëm te burimet zyrtare dhe të shmangin përhapjen e informacioneve të pakonfirmuara, të cilat mund të krijojnë paqartësi dhe panik të panevojshëm.

AKSK do të vijojë të informojë në mënyrë transparente për çdo zhvillim të rëndësishëm që lidhet me sigurinë kibernetike në vend.

/k.s/j.p/

The post AKSK: Nuk ka asnjë incident kibernetik të konfirmuar që të ketë cenuar sistemet shtetërore appeared first on Agjencia Telegrafike Shqiptare.

TIRANË, 22 janar/ATSH/ Stenda e Shqipërisë në panairin ndërkombëtar të turizmit Fitur në Madrid mirëpriti sot përfaqësues të medieve dhe platformave kryesore spanjolle, si Mallorca Diario, La Razón dhe Forbes Travel Spanjë.

I pranishëm gjatë takimeve me mediet spanjolle ishte edhe ministri i Turizmit, Kulturës dhe Sportit, Blendi Gonxhja dhe Presidenti i Forbes, Clemente Corona.

Pjesëmarrja e Shqipërisë në Panairin Ndërkombëtar të Turizmit në Spanjë është tashmë një traditë e konsoliduar. Agjencia Kombëtare e Turizmit prezantohet me moton “Albania All Senses”, duke promovuar në stendën shqiptare destinacionet turistike, produktet autentike dhe ofertën e plotë të shërbimeve turistike të vendit.

Ky panair mbledh 161 vende nga e gjithë bota, më shumë se 10,000 kompani dhe mirëpret profesionistë të sektorit të turizmit, autoritete vendimmarrëse, si dhe vizitorë të interesuar për të mësuar më shumë rreth destinacioneve dhe ofertave turistike ndërkombëtare.

/k.s/j.p/

The post Gonxhja: Vëmendje në rritje për Shqipërinë në panairin e turizmit në Madrid appeared first on Agjencia Telegrafike Shqiptare.

TIRANË, 22 janar/ATSH/ Qeveria në bashkëpunim me bashkitë e vendit po përgatit një plan të përbashkët kundër ndotjes nga plastika në territor.

Plani i paralajmaëruar edhe nga Kryeministri Edi Rama vjen si përgjigje ndaj fenomenit të ndotjes së ujërave nga plastika që rëndoi problematikat e shkaktuara nga reshjet intensive të fillimjanarit.

Kështu, sipas ministrit të Mjedisit, Sofjan Jaupaj i cili preku këtë temë gjatë aktivitetit të organizuar në kuadër të projektit “EU4Rivers”, dy ditë më parë, plani ka qasje 360° që nis nga edukimi deri te masat më të forta ndaj çdo abuzimi me mjedisin.

“Qeveria shqiptare po përgatit një ofensivë të përbashkët me pushtetin vendor përmes një plani me tre faza që synon të vendosë në kontroll këtë fenomen kaq të papërshtatshëm për vendin tonë”, tha Jaupaj.

Një nga kompenentët e rëndësishëm të planit është edukimi dhe ndërgjegjësimi i brezit të ri dhe i popullatës vendase për të shkuar deri deri në ashpërsimin e mëtejshëm të masave ndaj çdo abuzimi me mjedisin.

Sipas planit, pritet të ngrihet një taskforcë e përbashkët qeveri–bashki për luftën kundër ndotjes plastike, duke e cilësuar atë një faktor kyç që përkeqëson përmbytjet dhe dëmton mjedisin.

/k.s/j.p/

The post Jaupaj: Plan me tre faza për vendosjen në kontroll të ndotjes nga plastika appeared first on Agjencia Telegrafike Shqiptare.

TIRANË, 22 janar/ATSH/ E ngarkuara me punë e Shteteve të Bashkuara të Amerikës në Tiranë, Nancy VanHorn, zhvilloi një vizitë në Akademinë Amerikane të Teknologjisë në Tiranë, e cila prej një viti ofron programet e diplomave të Rochester Institute of Technology (RIT) në Shqipëri.

Ambasada e SHBA-së në Tiranë përcolli në rrjetet sociale momente nga vizita e VanHorn në Institutin Rochester të Teknologjisë duke vënë në dukje se përsosmëria amerikane në arsim vazhdon të formësojë të ardhmen e teknologjisë dhe inovacionit në mbarë botën.

“Hapja e Rochester Institute of Technology në Tiranë shënon një kapitull të ri në partneritetin SHBA–Shqipëri, duke fuqizuar brezin e ardhshëm të udhëheqësve të teknologjisë me arsim të nivelit botëror, sipas modelit amerikan”, nënvizoi ambasada amerikane.

Po ashtu, ambasada shpreh mbështetjen për RIT Tirana teksa ndërton një fuqi punëtore të talentuar dhe forcon lidhjet mes vendeve tona.

RIT Tirana nisi aktivitetin vjeshtën e kaluar në vitin akademik 2025-2026 duke ofruar programet e diplomave të Rochester Institute of Technology (RIT) në Shqipëri. me standard të ri në arsimin e lartë teknologjik në vend.

 Kampusi i ri i RIT po krijohet në bashkëpunim me Institutin “Harry Fultz” në Tiranë dhe ofron bachelor of science në Teknologji Informacioni (Computing and Information Technology) dhe Inxhinieri Elektrike (Electrical Engineering Technology).

RIT Tirana ofron një diplomë të akredituar nga SHBA, të lëshuar direkt nga RIT New York.

/k.s/j.p/

The post Rochester Institute of Technology në Tiranë, kapitull i ri në partneritetin SHBA–Shqipëri appeared first on Agjencia Telegrafike Shqiptare.

TIRANË, 21 janar/ATSH/ Këshilli i Ministrave miratoi sot vendimin për përcaktimin e organizimit të brendshëm, të organeve drejtuese e të mënyrës së funksionimit të Agjencisë Kombëtare të Ekonomisë së Mbetjeve (AKEM).

Sipas vendimit të qeverisë, AKEM është shoqëri aksionare me kapital 100% shtetëror, e themeluar me qëllim përmbushjen e objektivave të përcaktuar në ligjin  “Për menaxhimin e integruar të mbetjeve”.

Autoriteti publik, që përfaqëson shtetin si pronar të 100% të aksioneve të shoqërisë aksionare, është ministria përgjegjëse për mjedisin.

AKEM ofron kundrejt pagesës, shërbimin e trajtimit fundor të mbetjeve dhe çdo shërbim tjetër, në përputhje me qëllimin e krijimit dhe statutin e saj.

Kapitali fillestar për krijimin e AKEM është 20 milionë lekë.

Ministria e Mjedisit, brenda 30 ditëve nga hyrja në fuqi e këtij vendimi, ndjek procedurat e nevojshme ligjore për themelimin dhe miratimin e statutit të shoqërisë aksionare, regjistrimin e AKEM në Qendrën Kombëtare të Biznesit.

Organet drejtuese të AKEM janë: Asambleja e Përgjithshme e Aksionarit; Këshilli Mbikëqyrës dhe Administratori.

Efektet financiare për zbatimin e këtij vendimi për krijimin e kapitalit fillestar të shoqërisë, në vlerën 20 milionë lekë përballohen nga buxheti i Agjencisë Kombëtare të Ekonomisë së Mbetjeve.

Për zbatimin e këtij vendimi ngarkohen Ministria e Mjedisit, Ministria e Financave, ministri i Shtetit për Pushtetin Vendor dhe Agjencia Kombëtare e Ekonomisë së Mbetjeve.

Ky vendim hyn në fuqi pas botimit në “Fletoren zyrtare”.

/k.s/j.p/

The post Miratohet krijimi i Agjencisë Kombëtare të Ekonomisë së Mbetjeve appeared first on Agjencia Telegrafike Shqiptare.

TIRANË, 21 janar/ATSH/ Këshilli i Ministrave miratoi sot kriteret dhe procedurat për shpërndarjen e granteve shtetërore për organizatat sportive, përfshirë Komitetin Olimpik dhe Paralimpik, Organizatën Kombëtare Antidoping, federatat sportive olimpike, fondacionet sportive dhe Këshillin e Arbitrazhit Sportiv.

Sipas vendimit të qeverisë organizatat sportive përfitojnë nga granti i buxhetit të shtetit kur plotësojnë kriteret e përgjithshme, shoqëruar me dokumentacionin përkatës për regjistrimin si person juridik, sipas legjislacionit në fuqi.

Komiteti Olimpik Kombëtar Shqiptar, Komiteti Paralimpik Kombëtar Shqiptar, Organizata Kombëtare Antidoping, fondacionet sportive, me themelues institucionet publike përgjegjëse në fushën e sportit, dhe Këshilli i Arbitrazhit Sportiv financohen në bazë të programeve vjetore e të planeve të zhvillimit përkatës dhe nuk i nënshtrohen sistemit të pikëzimit.

Organizatat sportive për të përfituar prej grantit nga buxheti i shtetit, dorëzojnë në ministrinë përgjegjëse për sportin dokumentacionin dhe pas marrjes së kërkesës, struktura përgjegjëse pranë ministrisë, brenda 7 ditëve nga data e regjistrimit të kërkesës, nëse konstatohen të meta, i cakton kërkuesit një afat prej 7 ditësh për plotësimin e të metave.

Për vlerësimin e aplikimeve të paraqitura në ministrinë përgjegjëse për sportin, ngrihet një komision ad hoc vlerësimi, i përbërë nga 5 anëtarë, i cili mblidhet brenda 10  ditëve nga data e fundit për paraqitjen e kërkesës.

Fondet alokohen në llogaritë bankare të nivelit të dytë të përfituesve nga ministria përgjegjëse për sportin. Fondet buxhetore, që do t’i akordohen fondacioneve nga ministria përgjegjëse për sportin, duhet t’i nënshtrohen rregullave të menaxhimit financiar dhe kontrollit, në përputhje me legjislacionin në fuqi për menaxhimin financiar dhe kontrollin.

Përjashtimisht për vitin 2026, kërkesa për mbështetje financiare do të paraqitet brenda 10 ditëve nga hyrja në fuqi e vendimit.

Ngarkohen Ministria e Turizmit, Kulturës dhe Sportit, Komiteti Olimpik Kombëtar Shqiptar, Komiteti Paralimpik Kombëtar Shqiptar, Organizata Kombëtare Antidoping, federatat sportive olimpike, fondacionet sportive, me themelues institucionet publike përgjegjëse në fushën e sportit, dhe Këshilli i Arbitrazhit Sportiv për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

/k.s/j.p/

The post Miratohen kriteret dhe procedurat e shpërndarjes së grantit nga buxheti i shtetit për organizatat sportive appeared first on Agjencia Telegrafike Shqiptare.

TIRANË, 21 janar/ATSH/ Në mbledhjen e sotme Këshilli i Ministrave miratoi financimin e shërbimeve shëndetësore spitalore nga skema e detyrueshme e sigurimeve të kujdesit shëndetësor për vitin 2026.

Vendimi parashikon financimin nga skema e detyrueshme e sigurimeve shëndetësore të paketës së shërbimeve të ofruara në spitalet publike.

Sipas këtij vendimi, Fondi i Sigurimit të Detyrueshëm të Kujdesit Shëndetësor lidh kontratat me spitalet për financimin e paketave të shërbimeve shëndetësore të ofruara prej tyre, në përputhje me indikatorët e performancës spitalore.

Rishpërndarja e buxhetit ndërmjet spitaleve bëhet brenda një kufiri prej 3 (tre) % të buxhetit të spitaleve, me vendim të Këshillit Administrativ të Fondit të Sigurimit të Detyrueshëm të Kujdesit Shëndetësor.

Një fond jo më i madh se 30 % e buxhetit vjetor, i planifikuar për shërbimet spitalore, mbahet nga Fondi i Sigurimit të Detyrueshëm të Kujdesit Shëndetësor për ta shpërndarë gjatë vitit, me vendim të Këshillit Administrativ të Fondit të Sigurimit të Detyrueshëm të Kujdesit Shëndetësor.

Shpenzimet kapitale për investimet në spitale mbulohen nga Ministria e Shëndetësisë dhe Mirëqenies Sociale. Spitalet paraqesin kërkesën për investime në Ministrinë e Shëndetësisë dhe Mirëqenies Sociale.

Sipas vendimit, burime të tjera financimi për spitalet janë fondet e krijuara nga të ardhurat e realizuara gjatë veprimtarisë së tyre dhe nga dhurimet, të cilat përdoren tërësisht nga vetë spitali.

Përdorimi i të ardhurave dytësore miratohet nga bordi drejtues i spitaleve për spitalet që kanë përfituar autonominë menaxheriale. Për spitalet e tjera, përdorimi i të ardhurave bëhet bazuar në procedurat e miratuara nga Ministria e Shëndetësisë dhe Mirëqenies Sociale. Këto të ardhura vlerësohen si të ardhura jashtë limitit, të cilat mbarten në vitin buxhetor pasardhës.

Spitali zbaton sistemin e referimit dhe tarifat për shërbimet me pagesë, të miratuara nga ministri i Shëndetësisë dhe Mirëqenies Sociale, me përjashtim të spitaleve që kanë përfituar autonominë financiare.

Numri i përgjithshëm i punonjësve të spitaleve, që financohen nga Fondi i Sigurimit të Detyrueshëm të Kujdesit Shëndetësor, është 13 200 persona.

Për raste të veçanta të mungesës së mjekut specialist në shërbime të ndryshme të spitaleve rajonale, bashkiake, ministri i Shëndetësisë dhe Mirëqenies Sociale, brenda numrit të përgjithshëm të personelit spitalor, urdhëron kontraktimin, për një periudhë të caktuar, të mjekëve specialistë.

Mjekët e përcaktuar në këtë pikë, përveç pagës, trajtohen financiarisht me një bonus deri në 250 000 lekë në muaj. Vlera e bonusit përcaktohet, rast pas rasti, nga ministri i Shëndetësisë dhe Mirëqenies Sociale, bazuar në vlerësimin e komisionit përkatës.

Për spitalet rajonale, bashkiake, që nuk plotësojnë nevojat me personel mjek të strukturës në shërbimin e urgjencës, ministri i Shëndetësisë dhe Mirëqenies Sociale urdhëron kontraktimin e mjekëve të përgjithshëm dhe kryerjen e shërbimit nga mjekë të qendrave shëndetësore të shërbimit parësor.

Numri i pedagogëve me kontratë shërbimi për spitalet universitare miratohet çdo vit nga ministri i Shëndetësisë dhe Mirëqenies Sociale.

Masa e shpërblimit mujor të mjekëve pedagogë të Universitetit të Mjekësisë, Tiranë, bazohet në aktivitetin mjekësor e në kohën e angazhimit në strukturat shëndetësore universitare dhe nuk mund të jetë më e lartë se masa e shpërblimit mujor të drejtuesit të shërbimit me gradën “Doktor i shkencave”. Pagesa e tyre bëhet nga buxheti për shërbimet e spitalit.

Ky vendim hyn në fuqi menjëherë, botohet në “Fletoren zyrtare“ dhe i fillon efektet nga data 1 janar 2026.

/k.s/j.p/

The post Miratohet financimi i shërbimeve shëndetësore spitalore nga skema e detyrueshme e sigurimeve për 2026 appeared first on Agjencia Telegrafike Shqiptare.

TIRANË, 20 janar /ATSH/ Kryetari i bashkisë së Tiranës, Erion Veliaj ka depozituar sot një kallëzim penal pranë Prokurorisë së Juridiksionit të Përgjithshëm në Tiranë, për veprën penale të “Falsifikimit të dokumenteve”, parashikuar nga neni 186 i Kodit Penal.

Ky kallëzim lidhet me një dëftesë njoftimi gjyqësore, e administruar në dosjen e Gjykatës së Posaçme të Apelit për Korrupsionin dhe Krimin e Organizuar, në të cilën figuron një nënshkrim në emrin e Erion Veliajt, sikur ai të kishte marrë dijeni personalisht për një vendim gjyqësor.

Sipas kallëzimit penal, ky nënshkrim nuk është firma e tij, ndërsa verifikimet zyrtare tregojnë se vendimi i Apelit nuk ka mbërritur asnjëherë në Institucionin e Ekzekutimit të Vendimeve Penale Durrës, ku Veliaj ndodhet i paraburgosur.

“Ky fakt është konfirmuar zyrtarisht me shkresë nga vetë IEVP Durrës. Në kallëzim thuhet se mungesa absolute e njoftimit real dhe ekzistenca e një dëftese me nënshkrim jo autentik përbëjnë provë të drejtpërdrejtë të falsifikimit të aktit të komunikimit, me qëllim aktivizimin fiktiv të afateve procedurale për ushtrimin e rekursit në Gjykatën e Lartë”, theksohet në njoftimin për shtyp të Veliajt.

Sipas Veliajt, ky veprim cenon rëndë të drejtën kushtetuese për ankim, sigurinë juridike dhe parimin e procesit të rregullt ligjor, duke synuar realisht humbjen e së drejtës së rekursit përmes përdorimit të një akti zyrtar të rremë.

Në kallëzim kërkohet regjistrimi i menjëhershëm i procedimit penal, ekspertim grafik i nënshkrimit, hetimi i zinxhirit të plotë të personave që kanë hartuar, administruar apo përdorur këtë dokument, si dhe hetimi i çdo vepre tjetër penale që mund të rezultojë gjatë hetimit, përfshirë shpërdorimin e detyrës.

Një kopje e kallëzimit penal i është depozituar gjithashtu Gjykatës së Lartë, si provë se afatet procedurale për ushtrimin e rekursit nuk kanë filluar kurrë ligjërisht, për shkak të mungesës së një njoftimi të vlefshëm.

/k.s/r.e/a.f/

The post Veliaj depoziton kallëzim penal për falsifikim dokumentesh gjyqësore appeared first on Agjencia Telegrafike Shqiptare.

TIRANË, 20 janar/ATSH/ Shefi i shërbimit të Reanimacionit në Qendrën Spitalore Universitare “Nënë Tereza”, Krenar Lilaj deklaroi sot se ndërprerja e energjisë elektrike mbrëmjen e kaluar në Godinën A2 të QSUNT nuk ka cenuar aspak trajtimin e pacientëve.

Në një deklaratë për mediet, Lilaj theksoi se “pacientët që kanë qenë të shtruar në reanimacionin kirurgjikal, vazhduan ta merrnin trajtimin aty pa vështirësi dhe nuk ka komplikacion të situatës për sa i përket këtyre pacientëve”.

“Momenti më delikat është trajtimi i të sëmurëve që kanë nevojë për asistencën respiratore. Këto pacientë, në kushte të ndërprerjes së energjisë elektrike janë me pajisje back up që siguron funksionimin e tyre të potë më energji të akumuluar që janë të inkorporuar në këto aparate. Trajtim i i këtyre të sëmurëve vazhdoi normalisht, pasi këta të sëmurë e marrin mjekimin nëpërmjet aparateve që janë me back up”.

“Ndërprerja e energjisë elektrike zgjati disa minuta. Nga informacionet që morëm bëhej fjalë për një defekt të rëndë dhe rikthimi i energjisë ishte i pakonfirmuar. Në këto kushte, për të shmangur mosfunksionimin e njëkohshëm të aparateve respiratore, vendosëm kalimin e të sëmurëve në godinën tjetër të spitalit apo në njësinë e terapisë intensive të godinës ngjitur. Zhvendosja u bë vetëm 20 metra më larg, duke siguruar vazhdimin e trajtimit edhe në kushtet e reja të reanimacionit tjetër. Vendosëm që të transportojmë vetëm 10 të sëmurë, 9 prej të cilëve ishin në respiracion të drejtuar, domethënë që frymëmarrja e tyre sigurohej nëpërmjet aparateve respiratore”, theksoi Lilaj.

Lilaj vuri në dukje se “ne kemi mjetet që transporti i tyre të realizohet më respiratorë portativë, pa u cenuar shërbimi. Transporti ishte i shkurtër. Trajtim i të sëmurëve, i cili u krye të mënyrë të kontrolluar, vazhdoi në reanimacionin e kardiologjisë për rreth 30 minuta. Në 20:18 ikën dritat dhe në 20:43 filluam transportin e të sëmurëve, teksa rreth orës 21:10 përfundoi transporti i të sëmurëve. Pas disa minutash u rikthye energjia elektrike dhe pasi morëm siguri, pacientët u rikthyen përsëri në njësinë e terapisë intensive”.

“Pasi morëm njoftimin për rikthimin e energjisë pacientët rikthehen në orën 22:00 në mënyrë të kontrolluar, pa komplikacione. E them me përgjegjësi të plotë, nga pikëpamja funksionale, ndërprerja e energjisë, nuk ka cenuar aspak trajtimin e pacientëve. Ata që kanë qenë në reanimacionin kirurgjikal vazhduan ta merrnin trajtimin aty pa vështirësi dhe nuk ka komplikacion të situatës për sa i përket këtyre pacientëve”, nënvizoi Lilaj.

I pyetur nga gazetarët nëse është normale ndërprerja e energjisë elektrike, Lilaj tha se “si të them që është normale ndërprerja e energjisë elektrike në njësinë e terapisë intensive?!  Detyra ime është të mbroj jetën e të sëmurëve. Në çfarëdolloj situate ne jemi të gatshëm për të mbrojtur jetën. Kjo pyetje nuk më përket mua”.

Pyetjes për humbjen e jetës të një të sëmuri të dënuar, Lilaj iu përgjigj se “i sëmuri po trajtohej në njësinë e terapisë intensive kirurgjikale. Gjendja e tij ishte e rëndë që në ardhje ditën që është shtruar, të dielën pasdite. Ka pasur ceroza hepatike dhe ka pasur hemorragji masive për të cilën është trajtuar kirurgjikalisht. Saktësisht, i sëmuri është ndarë nga jeta në orën 04:18 minuta të mëngjesit”.

Më tej Lilaj tha se “vendimi që morëm ne për transferimin e pacientëve në reanimacionin kardiologjik, ishte për të shmangur rënien e njëkohshme të këtyre pajisjeve, gjë që do të shkaktonte probleme në transportin e pacientëve. Them me siguri që aparatet e reja sigurojnë energji për 5-6 orë. Incidente të tilla kemi pasur rëndom shumë vite më parë. Një ngjarje e ngjashme ndodhi dhe përpara 1-2 vitesh, e cila u kalua me sukses nga ana jonë, ashtu si dhe mbrëmjen e kaluar”.

/k.s/r.e/a.f/

The post Lilaj: Jeta e pacientëve nuk u cenua nga ndërprerja e energjisë në QSUT appeared first on Agjencia Telegrafike Shqiptare.

TIRANË, 20 janar/ATSH/ Ministrja e Shtetit dhe Kryenegociatorja, Majlinda Dhuka prezantoi sot paketën prej 12 nismash ligjore, të cilat i ka në shqyrtim Kuvendi i Shqipërisë.

“Këto nisma lidhen me forcimin e shtetit të së drejtës, sundimin e ligjit, luftën kundër krimit dhe krimit të organizuar, zbatimin më të mirë të reformës në drejtësi dhe në fund dhe jo për nga rëndësia, mbrojtjen nga diskriminimi, mbështetjen për familjen, gratë, për të miturit etj., ndryshe, të drejtat e njeriut dhe drejtësia shoqërore. Duke provuar që vendi e ka vullnetin social politik dhe aftësinë institucionale për t’i mbrojtur shtetasit e vet, për t’i ofruar shërbime më të mira të standardit europian gjithnjë e më të krahasueshme me ato të qytetarëve të një vendi anëtar të BE-së”, theksoi Dhuka, në një konferencë të përbashkët për shtyp me Adea Pirdenin, ministre Shteti për Administratën Publike dhe Antikorrupsionin dhe Toni Gogun, ministër Shteti për Marrëdhëniet me Parlamentin.

Sipas saj, kjo paketë prej 12 nismash ligjore të rëndësishme ka në përmbajtjen e saj 6 projektligje, të cilat i janë propozuar Kuvendit nga Këshilli i Ministrave dhe 6 projektligje të cilat janë iniciuar nga Kuvendi i Shqipërisë.

Kryenegociatorja Dhuka vuri në dukje se “e veçanta e kësaj pakete është se ajo garanton progres në lidhje me standardin europian dhe praktikën më të mirë të vendeve anëtare në 3 grupe çështjesh të rëndësishme. Së pari, në luftën krimit dhe krimit të organizuar; së dyti, në lidhje me barazinë dhe drejtësinë sociale, mbrojtjen e familjes, të nënës dhe të të miturve; së treti, në masat për parandalimin e korrupsionit”.

Më tej Dhuka u shpreh se “së bashku me dy kolegët e mi ne do t’i prezantojmë më me hollësi këto nisma të rëndësishme të transformimit europian. Kjo paketë në zemrën e saj ka një numër përafrimesh me ligjin europian të ligjit shqiptar, duke filluar nga shtatë direktiva në ndryshimet e Kodit Penal, në dy direktiva në projektligjin “Për mbrojtjen nga dhuna”, apo në rregulloren e përafruar plotësisht në projektligjin “Për importin dhe eksportin e armëve”, që garanton parandalimin e trafikut të armëve në Shqipëri”.

“Kjo paketë sjell një numër risish. Për herë të parë përmes kësaj pakete Shqipëria do të dekriminalizojë plotësisht veprën penale të shpifjes ndaj gazetarëve, duke rritur mbrojtjen ndaj gazetarëve në misionin e tyre të rëndësishëm për fjalën e lirë dhe për lirinë e shprehjes në Shqipëri, duke u garantuar në të njëjtën kohë një mbrojtje të re nga kanosja për shkak të detyrës”, tha Dhuka.

“Një numër vendesh të BE e kanë ende të kriminalizuar shpifjen, përfshirë edhe gazetarët për shkak se ekzistojnë edhe sfida të mëdha në lidhje me dezinformimin për shkak të epokës digjitale në të cilën jetojmë. Por Shqipëria mendon se realizimi i këtij ndryshimi është një investim i rëndësishëm në demokraci dhe lirinë e shprehjes dhe në forcimin e rolit të madh që kanë gazetarët në këtë drejtim”, theksoi Dhuka.

Kryenegociatorja Dhuka u shpreh se “një risi tjetër e rëndësishme është që pas shumë vitesh Shqipëria më në fund do të ketë një ligj që rregullon aktivitetin e lobimit, për të rregulluar me kujdes ndërhyrjet në vendimmarrjen publike”.

Sipas saj, pas 31 vitesh, Shqipëria do të ketë një ligj të ri për donacionet dhe sponsorizimin.

“Ligji ekzistues për sponsorizimin është i vitit 1994. Me ligjin e ri afrojmë praktikën pranë praktikës dhe standardit europian. Njëherësh do të krijohet një regjistër për lobimin, ku gazetarët, qytetarët, të interesuarit kanë informacion dhe njëkohësisht një regjistër për sponsorizimin dhe donacionet si përpjekje e jona për të rritur dimensionet e nismës “Shqipëria transparente” – që ministrja për antikorrupsionin e ka prezantuar edhe më herët – dhe për të treguar se nisma është e gjallë dhe përmirësime të vazhduara i bëhen përpjekjes sonë për transparencë”, tha Dhuka.

Dhuka shprehu falënderime për gazetarët pasi sipas saj një sondazh ka treguar se 70% e qytetarëve shqiptarë janë të informuar për çështjet e negociatave me BE, në sajë të detyrës së gazetarëve.

/k.s/r.e/a.f/

The post Dhuka: 12 nisma ligjore për përafrimin e legjislacionit shqiptar me atë të BE-së appeared first on Agjencia Telegrafike Shqiptare.

TIRANË, 20 janar/ATSH/ Ministrja e Shtetit dhe Kryenegociatorja, Majlinda Dhuka deklaroi sot se në vitin 2027 Shqipëria duhet t’i ketë plotësuar të gjitha kushtet për mbylljen e negociatave me Bashkimin Europian.

Në një konferencë të përbashkët për shtyp me Adea Pirdenin, ministre Shteti për Administratën Publike dhe Antikorrupsionin dhe Toni Gogun, ministër Shteti për Marrëdhëniet me Parlamentin, lidhur me fazën e re të negociatave me Bashkimin Europian dhe angazhimin politik e qytetar për t’ia dalë mbanë, Dhuka tha se “në këtë bashkëbisedim do t’i informojmë qytetarët shqiptarë mbi çfarë pret Shqipëria në 2026 sa i përket aspiratës europiane, negociatave dhe përgatitjes për anëtarësim në BE”.

“Në 2025-ën Shqipëria i çeli negociatat për 33 kapituj. Në 17 nëntor çelëm negociatat për 5-së kapitujt e fundit. Viti 2026 është veçanërisht i rëndësishëm dhe një gur kilometrik në rrugën e vendit drejt anëtarësimit në BE. Në 2026 Shqipëria do të kalojë, dhe po punon intensivisht për këtë, për t’u futur në fazën e mbylljes së negociatave për anëtarësim me një numër të mirë fushash nga këto 33 kapituj dhe me aspiratën e madhe që në vitin 2027 t’i kemi arritur të gjitha përgatitjet ose siç njihet në gjuhën e negociatave, kushtet për mbylljen e negociatave”, nënvizoi Dhuka.

Kryenegociatorja Dhuka theksoi se “kjo është një punë jashtëzakonisht komplekse, por edhe shumë pozitive sa i përket transformimit europian të vendit që nga shteti, ekonomia, shërbimet për qytetarët, heqja e barrierave midis Shqipërisë dhe BE-së siç bëmë gjatë 2025 ku Shqipëria u fut në zonën e pagesave euro, e njohur si SEPA, që na mundësoi të bëjmë veprime bankare nga Shqipëria drejt vendeve të BE-së me tarifa shumë të reduktuara dhe në një kohë të shkurtër”.

Midis çeljes së negociatave dhe mbylljes, vijoi Dhuka, Shqipëria duhet të japë një test aftësie si në pikëpamje të vullnetit politik për reforma europiane, ashtu edhe të aftësisë së institucioneve të veta, aftësisë teknike dhe zbatuese të standardit europian praktikisht në shërbime dhe jetën e qytetarëve.

“Për këtë Shqipëria duhet të përgatitet me një numër reformash dhe përmirësimesh që ka në zemër standardin europian që buron si nga ligji europian i njohur si acquis i BE-së, ashtu edhe nga praktikat më të mira të vendeve anëtare apo udhëzimet e gjykatave europiane. Ky test aftësie në gjuhën e negociatave njihet si përmbushja e kushteve të ndërmjetme, atij progresi që qëndron midis çeljes së negociatave dhe mbylljes së tyre”, tha Dhuka.

Dhuka u shpreh se “fusha në të cilën Shqipëria duhet të japë këtë test aftësie në zemër të të cilit është edhe aftësia e institucioneve, por edhe vullneti politik i të gjitha forcave politike në Shqipëri është shteti i së drejtës dhe sundimi i ligjit”.

/k.s/r.e/

The post Dhuka: Kushtet për mbylljen e negociatave duhet të plotësohen deri në fund të 2027-ës appeared first on Agjencia Telegrafike Shqiptare.

TIRANË, 19 janar/ATSH/ Kryetari i Partisë Demokratike, Sali Berisha e cilësoi sot të paligjshëm projektin Smart City teksa theksoi se “ky projekt përbën asgjësimin e plotë të privatësisë së qytetarëve”.

Në një konferencë për shtyp, Berisha tha se “ky projekt synon survejimin e plotë të lëvizjeve të çdo qytetari. Në qoftë se një vit më parë u vendosën në të gjitha kompanitë e telefonave aparaturat e regjistrimit të plotë të internetit dhe telefonave të celularëve me pretekstin e ndërprerjes së TikTokut, tani me Smart City, Edi Rama kompleton survejimin më të paligjshëm dhe më total të qytetarëve shqiptarë, të çdo lëvizje të tyre”.

“Ky projekt vendos qytetarët shqiptarë në kontroll të plotë, automjetet dhe lëvizjet e tyre.
Dhe në këtë aspekt, aq sa të dhënat e një individi janë private, ato bëhen shtetërore.
Aq sa të dhënat e një shoqërie janë shtetërore, ato eksportohen në duart e kujtdo”, tha Berisha.

Berisha u shpreh se “tani çdo organizatë kriminale nuk ka më nevojë përveçse të fusë kthetrat në kamera dhe të marrë vesh se ku e ka gjahun e vet për ta marrë peng, për ta vrarë, për ta ekzekutuar, etj”.

/k.s/a.f/

The post Berisha: Projekti Smart City, survejim të paligjshëm qytetarëve appeared first on Agjencia Telegrafike Shqiptare.

The post Ministria e Jashtme në kontakt me Spanjën nëse ka shqiptarë të prekur nga aksidenti hekurudhor appeared first on Agjencia Telegrafike Shqiptare.

TIRANË, 19 janar/ATSH/ Liria është e panegociueshme, por ajo nuk mund të ekzistojë pa themelin e fortë të përgjegjësisë.

Ky është mesazhi që përcolli bashkëshortja e kryeministrit Edi Rama, Linda Rama, e ftuar në emisionin “Aromë gruaje” në RTSH. Ajo u shpreh se hyrja në godinën e RTSH-së nuk është thjesht një intervistë e radhës, por një udhëtim pas në kohë.

Ajo kujtoi daljen e saj të fundit në këtë ekran në vitin 1995, një periudhë tranzicioni të vrullshëm për Shqipërinë.

“Unë futem në RTSH pas 3 dekadash. Kam qenë në vitin 1995 për të shpjeguar skemën  e privatizimit masiv që drejtohej nga unë me gazetarin e ekonomisë dhe ishim live. Kjo godinë është e mbushur me emocione. Prezenca e RTSH-së në jetën time është shumë e hershme për shkak të xhaxhait tim Hasan Basha, pjesë e teknikëve të parë të televizionit. Isha e emocionuar kur shkela”, u shpreh Linda Rama në nisje të intervistës.

Ekspertja Rama vijoi se “liria e vërtetë, ajo e mendimit dhe e fjalës. Fitohet vetëm kur individi respekton kodet e shoqërisë – qofshin ato të punës, familjes apo ligjit. Lirinë nuk e negocioj me asgjë mund të mos e shikoj tek vetja ime, por nuk resht së thëni atë që dua, mendoj e ëndërroj”.

“E shoh këtë te vajza ime dhe jam e lumtur”, tha Linda Rama, duke nënvizuar se liria e të menduarit dhe të folurit mbetet një vlerë e shenjtë në familjen e tyre.

“Babai më ushqeu që e vogël që liria është e panegociueshme. Ai kishte intuitë për të kuptuar vullnetin tim të fortë për të qenë një njeri i mirë dhe se unë nuk do abuzoja me lirinë”, rrëfeu Linda duke shprehur mirënjohje të thellë për këtë besim.

Më tej, Linda Rama bëri një ndarje të qartë mes filozofisë, që kërkon kohë dhe jep ligjshmëri, dhe politikës, që është arti i të përditshmes dhe veprimit.

“Dinamika e politikës është tjetër nga ajo filozofike. Aq i larmishëm sa është realiteti, aq të larmishme janë edhe vendimmarrjet apo mënyrat që politika gjen për t’iu përgjigjur nevojave. Filozofia ka kohën e vet dhe sfidat e veta. Duhet ta vendosim në pamundësi politikën kur filozofia mendon se ka shmangie nga ligjësitë që koha i ka provuar. Dhe ky është roli i filozofëve”, tha Linda Rama duke shtuar se filozofët janë shumë ndriçues.

“Është si puna ime një filozof unë jam me një politikan vendimmarrës, por unë nuk marr dot vendime në vend të tij, mendoj se disa gjëra mund t’i bëja ndryshe, por nuk kam gjë në dorë. Është kollaj të kritikosh nga jashtë”, tha Linda Rama.

Më tej Linda Rama tha se “jeta pranë Edit kryeministër dhe politikan më ka mësuar gradualisht se vërtet nuk i di të gjitha, kjo është shumë e rëndësishme. Një njeri duhet t’i japë mundësi vetes të mendojë që të mos e çojë diskutimin deri në ekstrem, gjykimin deri në ekstrem se ke nevojë të dëgjosh edhe tjetrin Pastaj diskutimi mund të bëhet më cilësor, më realist dhe më i dobishëm. Thjesht e kam mësuar: ti nuk i di të gjitha. Tani e kam bërë timen. Gjykimi i padrejtë është ngarkesë negative“.

Linda Rama u shpreh se “kam parë filozofë që kanë hyrë në politikë, por që janë zhveshur si filozofë. Ata pranojnë deformimin për hir të politikës. Personalisht nuk e justifikoj këtë qasje as për një të mirë të madhe”.

Gjatë kësaj interviste, Linda Rama prekur edhe një nga temat më të ndjeshme të ekzistencës njerëzore: humbjen e njerëzve të dashur dhe mënyrën se si ata vazhdojnë të jenë pjesë e jetës sonë.

“Një njeri i madh është produkt i një babai dhe nëne të madhe”, tha ajo, duke theksuar se prindërit vazhdojnë të jetojnë përmes pasqyrimit te fëmijët e tyre.

Rama rrëfeu mbi raportin e ngushtë që kishte ndërtuar me vjehrrën e saj, të ndjerën Aneta Rama, nënën e Edi Ramës duke theksuar se raporti mes tyre ka qenë i veçantë dhe intensiv në dimensione të ndryshme.

“Me mamanë e Edit gjithkush tjetër bëhej i tepërt kur ishim ne të dyja. Koha dhe momenti ishte për ne të dyja”, tha ajo, duke shtuar se largimi i saj ishte një dhimbje e madhe, pas së cilës u desh të përcaktohej një rutinë e re jetësore.

“Kishim një raport intensiv; një kohë e jetuar me biseda, mendime, emocione dhe kujdes. Kur isha me mamanë e Edit, ndonëse ajo i donte të gjithë, çdokush tjetër bëhej i tepërt. Ai moment dhe ajo kohë ishin vetëm për ne të dyja. Kur e humbet një njeri të tillë, dhimbja është e madhe. E them këtë për herë të parë. Ishte dhimbje e madhe largimi i një njeriu, pas të cilit do të duhej të vendosej një rutinë e re. Ishte një humbje e madhe edhe për Edin. Dhimbja fillimisht e zëvendëson mungesën, por më pas nis e ndihet mungesa. Mua më mungon mamaja e Edit në mënyrë të pazëvendësueshme, por përpiqem ta sjell në përditshmërinë time në çdo lloj forme”, tha ajo.

Duke u ndalur tek shoqëria civile Linda Rama tha se “ka nevojë për aleat, pushteti është i fuqishëm është shoqëri civile në nevojë. Ajo është ndjeshmëri e shtuar për kauza të përgjithshme. Kurse pushteti është i veshur nga egoja. Shoqëria civile nuk i ka këto ego, ajo është një zile që duhet ta dëgjojë pushteti. Ata mund të bashkëjetojnë duke u dëgjuar njëri me tjetrin”.

“Nuk mund ta them këtë për median. Media, si pushtet, nuk është e zhveshur nga egoja. Media e ka raportin me të vërtetën. Por janë edhe përgjegjësitë, si kodi në raport me ligjin, mjedisin, lirinë; dhe nëse ti i ke plotësuar këto, liria ka kuptim”, tha Linda Rama.

/k.s/ /a.g/

The post Linda Rama: Liria e panegociueshme, mbetet një vlerë e shenjtë appeared first on Agjencia Telegrafike Shqiptare.

TIRANË, 17 janar/ATSH/ Ministri i Turizmit, Kulturës dhe Sportit Blendi Gonxhja deklaroi sot se viti 2025 falë punës, bashkëpunimit dhe politikave të mirëqeverisjes u mbyll me rekorde tejet pozitive në fushën e turizmit.

Gjatë takimit me kryetarët e bashkive, ku ishte i pranishëm edhe kryeministri Edi Rama, ministri Gonxhja paraqiti  shifrat më të përditësuara të vitit 2025, duke sjellë një panoramë të qartë mbi ecurinë e turizmit dhe mbi trendet që e kanë ndikuar dhe karakterizuar këtë periudhë”.

“Sipas të dhënave, numri i vizitorëve të huaj në vitin 2025 ka arritur në 12,466,038, duke reflektuar një rritje prej rreth 6.6%, ose +769,960 vizitorë të huaj më shumë se gjatë vitit 2024. Kjo rritje është një tregues shumë rezultativ për sektorin dhe për ekonominë e vendit në tërësi”, informoi ministri Gonxhja.

Në të njëjtën kohë, sipas tij, është e rëndësishme të theksohet se rritja e këtyre shifrave i vendos përpara një përgjegjësie edhe më të madhe: për të garantuar jo vetëm vazhdimësinë, por mbi të gjitha për të siguruar që kjo rritje të përkthehet në të ardhura reale nga turistë që konsumojnë më shumë, që frekuentojnë ekonomi formale dhe shërbime cilësore, me standarde më të larta, organizim më të mirë dhe me menaxhim të qëndrueshëm të destinacioneve tona, për t’u rikthyer e për të ndjerë tërheqje më të fortë nga eksperienca e vizitës në Shqipëri

Gonxhja bëri të ditur se për 9-mujorin 2025 hynë 4.4 miliardë euro nga turizmi, 14,5% rritje e të ardhurave në krahasim me të njëjtën periudhë të vitit 2024.

Më tej, Gonxhja u ndal tek plazhet publike, ku theksoi se “gjatë 2025 kishte rritje të konsiderueshme të plazheve publike me 17.4% krahasuar me 2024, ku plazhet publike janë shtuar me mbi 1.1 milionë metër”.

Duke u ndalur tek fluturimet, Gonxhja tha se “Aeroporti Ndërkombëtar i Tiranës ka shënuar një rritje të ndjeshme të flukseve turistike, me 3,589,137 vizitorë të huaj të regjistruar, ndërsa në periudhën janar–shtator2025 janë përpunuar mbi 9 milionë pasagjerë, duke konfirmuar një trend rritës gjatë gjithë vitit dhe muaj kulmorë me mbi 1 milion pasagjerë në muaj”.

Sipas tij, ky zhvillim mbështetet edhe nga operimi i 30 linjave ajrore në TIA dhe zgjerimi i rrjetit të fluturimeve me 70–80 destinacione direkte në 20 shtete, ku tregjet kryesore mbeten Italia, Mbretëria e Bashkuar, Gjermania, Benelux, Europa Qendrore dhe ajo Nordike.

“Po ashtu, zhvillime të rëndësishme priten me Ryanair, e cila do të hapë bazë në Tiranë nga prilli 2026 me 3 avionë të bazuar dhe 10 linja të reja, duke çuar në rreth 33 linja totale, ndërkohë që Wizz Air vijon të mbetet operatori kryesor me zgjerim të vazhdueshëm të frekuencave. Një hap historik është edhe njoftimi i linjës direkte Tiranë–Toronto, si linja e parë direkte transoqeanike, e planifikuar për sezonin veror 2026, që do të sjellë diversifikim tregjesh dhe turizëm me vlerë të lartë”, tha Gonxhja.

Sa i përket vizitorëve në sitet kulturore, Gonxhja tha se “1,523,587 vizitorë vizituan sitet e trashëgimisë kulturore si muze, kala, parqe arkeologjike”.

“Këto shifra kaq pozitive janë një arritje e rëndësishme dhe një tregues i qartë i besimit në rritje ndaj Shqipërisë si destinacion turistik, çka paralelisht ngre imazhin tonë ndërkombëtarisht, ndihmon perceptimin globalisht. Njëkohësisht, rekordet janë edhe një sinjal shumë i fortë se turizmi sot kërkon më shumë kapacitet menaxhues, profesionistë, edukim të tregut të punës, optimizim, sinergji dhe bashkëveprim”, tha Gonxhja.

/k.s/j.p/

The post Gonxhja: Rritje e të ardhurave nga turizmi, ta përkthejmë me menaxhim të qëndrueshëm të destinacioneve tona appeared first on Agjencia Telegrafike Shqiptare.

TIRANË, 17 janar/ATSH/ Kryeministri Edi Rama gjatë takimit me kryebashkiakët për sfidat e bashkive u ndal tek niveli i rezistencës së infrastrukturës mbrojtëse si kanalet e kullimit,  argjinaturat dhe hidrovoret duke theksuar se “nga Emiratet e Bashkuara është siguruar një fond prej 20 milionë euro në mbështetje të zhvillimit rural”.

Në fjalën e tij, Rama theksoi se “niveli i rezistencës së infrastrukturës është rritur në mënyrë domethënëse në 10 vitet e fundit, por analiza e bërë edhe nga kjo emergjencë tregon që ka pika ku rezistenca është më e dobët dhe për këtë arsye duhet të vendosim me shumë saktësi piketat për të forcuar më tej infrastrukturë mbrojtëse dhe nga ana tjetër për të adresuar të gjitha ato aspekte që kanë të bëjnë me fuqizimin e ndërveprimit mes pushtetit vendor dhe institucioneve qendrore”.

“Një nga gjërat që ka propozuar ministri Demo dhe ka gjetur mbështetjen tonë është që me një fond të siguruar nga miqtë tanë të çmuar të Emirateve të Bashkuara prej 20 milionë euro në mbështetje të zhvillimit rural të blejmë një sasi domethënëse mjetesh që të vendosen në shërbim të kullimit, pastrimit të gjithë kanaleve kulluese kryesore dhe të funksionojnë sipas nevojave të bashkive”, theksoi Rama.

Kreu i qeverisë përmendi si eksperiencë pozitive, projektin pilot të Fondit të Zhvillimit në qarkun e Dibrës ku është krijuar një shoqëri e përbashkët dhe ku është vënë në funksion një flotë e dedikuar qoftë për pastrimin e kanaleve kulluese qoftë për mirëmbajtjen e infrastrukturës rurale dhe shtrimin e rrugëve të bardha.

“Ka funksionuar më së miri dhe tani është koha që me këtë fond ne ta rrisim kapacitetin dhe të krijojmë një logjistikë që të jetë në dispozicion të bashkive sipas qarqeve”, vijoi Rama.

Kjo flotë, vijoi Kreu i Ekzekutivit, mund të përqendrojë më shumë forca diku ku ka një situatë emergjence dhe në këtë mënyrë bashkitë do të ndjehen më të gatshme për ta përballuar emergjencën.

“Në ditët e punës normale do të jetë një forcë e shtuar për të gjitha bashkitë sipas sasisë së kanaleve për tu pastruar e mirëmbajtur sipas nevojës për të adresuar edhe problemin e argjinaturave”, tha Rama.

Kryeministri Rama informoi se “është ministri Demo që do ta çojë përpara këtë projekt duke bashkëpunuar ngushtësisht me FSHZH dhe duke bërë një shpërndarje racionale të këtyre mjeteve që të jenë të stacionuara në të gjitha qarqet sipas nevojave dhe në kohën e emergjencave të mund të rialokohen aty ku është fronti më i vështirë”.

/k.s/j.p/

The post Rama: Flotë mjetesh për pastrimin e kanaleve kulluese, 20 milionë euro nga Emiratet e Bashkuara appeared first on Agjencia Telegrafike Shqiptare.

TIRANË, 17 janar/ATSH/ Specialistët e Zonave të Mbrojtura në të gjithë vendin kanë nisur sot punën për censin Ndërkombëtar të Shpendëve Ujorë Dimërues.

Për realizimin e censit janë angazhuar 102 specialistë të Agjencisë Kombëtare të Zonave të Mbrojtura (AKZM), si dhe 17 ekspertë të fushës, të cilët po marrin pjesë në monitorimin e shpendëve ujorë në 34 vendnumërime në të gjithë territorin e vendit.

Shqipëria i bashkohet edhe këtë vit këtij monitorimi ndërkombëtar, i cili zhvillohet më 17-18 janar, me qëllim mbledhjen dhe raportimin e të dhënave të sakta mbi popullatat e shpendëve ujorë dhe gjendjen e ekosistemeve ujore.

Të dhënat e mbledhura gjatë censusit shërbejnë si bazë shkencore për hartimin e politikave të mbrojtjes së natyrës dhe menaxhimin e qëndrueshëm të zonave ujore dhe ligatinore në vend.

Censi Ndërkombëtar i Shpendëve Ujorë është një ndër proceset më cilësore për monitorimin e shpendëve. Ai paraqet informacion zyrtar thelbësor, i cili kontribuon në mbrojtjen dhe konservimin e shpendëve ujor dhe të habitateve ligatinore ku ata jetojnë.

Sot, censi realizohet në Shqipëri përgjatë 34 zonave, të cilat jo të gjitha janë pjesë e rrjetit të zonave të mbrojtura. Procesi i zgjedhjes së tyre realizohet nëpërmjet monitorimit dhe studimit të zonave dhe nënzonave, ku ka prezencë të ndjeshme të shpendëve.

Vitin e kaluar gjatë censit u numëruan 61 specie të shpendëve të ujit, me një numër të përgjithshëm prej 112 516 individësh. Censi 2025 regjistroi përafërsisht 13 mijë shpendë uji më shumë krahasuar me Censin 2024. Si edhe 5 specie më shumë të identifikuara.

Shqipëria i është bashkuar Censit Ndërkombëtar të Shpendëve të Ujit që në vitin 1993, ku fillimisht ky cens u zhvillua në habitatet bregdetare dhe liqenin e Shkodrës. Në nivel ndërkombëtar censi ka filluar që në vitin 1967.

/k.s/j.p/

The post Nis censi ndërkombëtar i shpendëve ujorë dimërues në 34 vendnumërime appeared first on Agjencia Telegrafike Shqiptare.

TIRANË, 17 janar/ATSH/ Loris Qose, nxënës i shkollës “7 Marsi” në Cërrik fitoi vendin e parë në  matematikë në olimpiadën “Neo Science Olympiad” organizuar në Orlando të SHBA dhe i vendit të tretë në lëndën e kimisë.

Kryeministri Edi Rama duke sjellë në vëmendje këtë arritje të djaloshit shqiptar, u shpreh në rrjetet sociale se “talenti, pasioni dhe puna e Lorisit, bashkë me përkushtimin e mësuese Flutura Hoxholli, u shpërblyen me dy medalje që na bëjnë të gjithëve krenarë për nxënësit tanë”.

Rama theksoi se “në të gjithë vendin në shkollat vijojnë olimpiadat e matematikës, fizikës, kimisë, biologjisë, e plot të tjera ku dalin në pah talente si Lorisi”.

Loris Qose, nxënës i klasës së 9-të në shkollën “7 Marsi” Cërrik i talentuar në shkencat e natyrës, me arritje të rëndësishme, sidomos në lëndën e Matematikës përfaqësoi denjësisht shkollën “7 Marsi”, ZVAP Cërrik, DRAP Korçë, pjesëmarrës dhe fitues në olimpiadën botërore të Neo Science Olympiad, organizuar në Orlando të SHBA -së.

Me mbështetjen e shkollës, ZVAP Cërrik dhe në veçanti të mësueses Flutura Hoxholli u bë e mundur kjo arritje e rëndësishme për Lorisin dhe për gjithë komunitetin arsimdashës të Cërrikut.

1 nga 3

/k.s/j.p/

The post Loris Qose, fitues i medaljes së artë në “Neo Science Olympiad” në SHBA appeared first on Agjencia Telegrafike Shqiptare.

TIRANË, 17 janar/ATSH/ Ministri i Turizmit, Kulturës dhe Sportit, Blendi Gonxhja zhvilloi një takim me drejtuesit kryesorë të strukturave në varësi të MTKS-së ku diskutuan për  prioritetet strategjike për 2026.

Gjatë takimit fokus të veçantë iu kushtua objektivave dhe ndërtimit të politikave sektoriale të qëndrueshme 2026-2030.

Gjatë fjalës së tij, Gonxhja theksoi se zhvillimi i turizmit të qëndrueshëm, përmirësimi i menaxhimit të sezonit turistik veror, frekuentimi gjithëvjetor i destinacioneve tona, rritja e cilësisë së shërbimeve të mikpritjes dhe strukturave të akomodimit, si dhe garantimi i një eksperience konkurruese dhe cilësore për vizitorët, promovimi digjital dhe formalizimi, janë ndër prioritetet kryesore të kësaj fushe jetike për ekonominë shqiptare.

Po ashtu, në portofolin e kulturës vëmendja u përqendrua te mbështetja e artistëve dhe profesionistëve të kulturës, pasurimi i kalendarit kulturor, ndjekja e ecurisë së kantiereve kulturore, proceset e rijetëzimit, konservimit dhe mbrojtjes së trashëgimisë kulturore,   risitë ligjore e reformimi institucional, si dhe fuqizimi i industrisë dhe ekonomisë kreative.

Sipas ministrit Gonxhja, sporti mbetet një prioritet i rëndësishëm.

“Zhvillimi i sportit elitar dhe sjellja e eventeve sportive ndërkombëtare në Shqipëri, si instrument për promovimin e vendit, rritjen e turizmit sportiv dhe forcimin e imazhit ndërkombëtar janë ndër prioritet kryesore në këtë fushë”, tha Gonxhja.

Ministri Gonxhja u shpreh se “koordinimi i skuadrës së re të MTKS, ndjekja prioritare e vizionit të qeverisë, ecuria ndërinstitucionale, mes ndarjes së qartë të përgjegjësive e afateve, garanton angazhim e ritëm maksimal për zbatim cilësor të synimeve, mirëqeverisjes, rritjes së vlerës ekonomike dhe forcimit të misionit për identitet kulturor, rini aktive e zhvillim”.

Për këtë vit MTKS ka një buxhet prej 7.4 mld lekë, ku kultura ka pjesën më të madhe  me 4.95 mld lekë, turizmi 919 milionë lekë dhe sporti  834.6 milionë lekë.

Ky buxhet paraqet një vizion të qartë për forcimin e turizmit të qëndrueshëm, mbrojtjen e trashëgimisë kulturore dhe rritjen e kapaciteteve krijuese e sportive në vend.

/k.s/j.p/

The post Gonxhja: Turizmi i qëndrueshëm, kultura dhe sporti në fokus të prioriteteve 2026 appeared first on Agjencia Telegrafike Shqiptare.

TIRANË, 16 janar/ATSH/ Në ambientet e Pallatit të Sportit “Farie Hoti” në Tiranë, u zhvillua ceremonia hapëse e kampionatit universitar në volejboll, organizuar nga Federata Shqiptare e Sportit Universitar (FSHSU).

Në aktivitet u mblodhën qindra studentë nga universitete të ndryshme të vendit.

Ministri i Turizmit, Kulturës dhe Sportit, Blendi Gonxhja tha se në kampionat marrin pjesë 30 universitete nga e gjithë Shqipëria, me rreth 800 studentë pjesëmarrës, të angazhuar në ekipet respektive.

Sipas tij, kjo garë promovon talentin e studentëve, fair-play dhe bashkëpunimin ndëruniversitar.

Ndeshjet hapëse u karakterizuan nga garë e fortë, respekt dhe pasion për sportin.

Ky kampionat synon promovimin e jetesës aktive tek të rinjtë, forcimin e marrëdhënieve ndëruniversitare dhe fuqizimin e sportit si një komponent i rëndësishëm i edukimit universitar.

/k.s/

The post Gonxhja: Rreth 800 studentë pjesëmarrës në kampionatin universitar të volejbollit për meshkuj appeared first on Agjencia Telegrafike Shqiptare.