PRISHTINË, 4 janar/ATSH/ Me rastin e 27-vjetorit të themelimit të Agjencisë së Lajmeve KosovaPress, kryeministri në detyrë i Kosovës, Albin Kurti, ka vizituar ambientet e reja të agjencisë, ku realizoi edhe një intervistë ekskluzive për KosovaPress.

Gjatë vizitës, Kurti u prit nga drejtoresha e përgjithshme e KosovaPress, Suzana Rakovica, dhe stafi i agjencisë, me të cilët diskutoi për zhvillimet aktuale në vend, sfidat e medias dhe rëndësinë e raportimit të saktë dhe të pavarur.

Në intervistën ekskluzive për KosovaPress, Kurti flet për çështje kyçe politike, rezultatin e zgjedhjeve të 28 dhjetorit, formimin e institucioneve të reja, partnerët eventualë qeverisës, prioritetet e ekzekutivit të ri, zgjedhjen e presidentit të ri dhe raportet me aleatët.

Kurti vlerësoi lart rolin e KosovaPress-it në informimin e publikut dhe në forcimin e gazetarisë profesionale në Kosovë.

Agjencia e Lajmeve KosovaPress sot shënon 27-vjetorin e themelimit dhe fillimit të punës. Kjo ditëlindje e gjen Agjencinë në hapësira të reja, moderne dhe funksionale, të cilat përmbushin të gjitha kushtet për veprimtarinë e një mediumi bashkëkohor.

Ky zhvillim përfaqëson një hap të rëndësishëm përpara në misionin e KosovaPress-it, për informim të saktë, të shpejtë dhe objektiv, si dhe një investim në cilësinë e gazetarisë dhe komunikimit medial në Kosovë.

/KosovaPress/

The post Kurti viziton KosovaPress-in në 27-vjetorin e themelimit appeared first on Agjencia Telegrafike Shqiptare.

PRISHTINË, 4 janar/ATSH/ Kosova po përgatitet për një cikël të gjerë investimesh infrastrukturore në funksion të Lojërave Mesdhetare 2030, të cilat pritet të shënojnë një kthesë të rëndësishme për sportin në vend. Institucionet përgjegjëse kanë prezantuar planet dhe dinamikën e realizimit të projekteve kryesore, të cilat përfshijnë objekte të reja sportive, rindërtim dhe modernizim të kapaciteteve ekzistuese, si dhe krijimin e kushteve për organizimin e një ngjarjeje të nivelit të lartë ndërkombëtar.

Duke folur për vlerën dhe shtrirjen e investimeve, Sekretari i Përgjithshëm i MKRS-së, Bislim Bislimi, ka zbuluar për KosovaPress pikat kyçe infrastrukturore në të cilat do të investohet gjatë vitit 2026.

Në anën tjetër, Kryetari i Komitetit Olimpik të Kosovës, Ismet Krasniqi, ka vlerësuar se koha është faktori kyç dhe se viti 2026 duhet të shënojë fillimin konkret të ndërtimit të infrastrukturës sportive.

“Është obligative që 2026-ta të fillon, sepse nuk kemi kohë më…Objektet sportive duhet kohë, të bëhet projekti i tyre, të ndërtohet, edhe të vjen në funksion. Kjo kërkon kohë. Ne nuk kemi kohë të humbim. 2026-ta duhet të jetë vit vendimtar i nisjes të objekteve të reja të cilat janë paraparë të bëhen, por edhe ato të cilat duhet të përmirësohen apo rindërtohen, ato ekzistuese po flas”, thotë Krasniqi.

Ndërkohë, Kryetari i Federatës së Sporteve Universitare, Musa Selimi, ka theksuar se procesi i deritanishëm dhe mbështetja ndërkombëtare dëshmojnë se Kosova është në rrugën e duhur. Ai ka nënvizuar se organizimi i Lojërave Mesdhetare do të jetë moment historik për sportin kosovar.

Lojërat Mesdhetare përfaqësojnë një nga ngjarjet më të mëdha multisportive në botë, që bashkojnë vende nga Evropa, Afrika dhe Azia përgjatë pellgut të Mesdheut, duke u organizuar çdo katër vjet nën ombrellën e Komitetit Ndërkombëtar të Lojërave Mesdhetare. Për Kosovën, edicioni i vitit 2030 nuk është vetëm një ngjarje sportive, por një projekt strategjik shtetëror që synon zhvillimin afatgjatë të infrastrukturës, rritjen e kapaciteteve organizative dhe forcimin e imazhit ndërkombëtar të vendit, duke lënë trashëgimi të qëndrueshme për sportistët dhe komunitetin sportiv edhe shumë vite pas përfundimit të garave.

/Kosovapress/

The post Kërkohet përshpejtim i ritmit për përgatitjet për Lojërat Mesdhestare appeared first on Agjencia Telegrafike Shqiptare.

PRISHTINË, 4 janar/ATSH/ 27-vjetori i themelimit e gjen KosovaPress-in në objekt të ri Agjencia e Lajmeve KosovaPress sot shënon 27-vjetorin e themelimit dhe fillimit të punës. Kjo ditëlindje e gjen Agjencinë në objekt të ri, modern dhe funksional, i cili përmbush të gjitha kushtet për veprimtarinë e një mediumi bashkëkohor.

Ky zhvillim përfaqëson një hap të rëndësishëm përpara në misionin e KosovaPress-it për informim të saktë, të shpejtë dhe objektiv, si dhe një investim në cilësinë e gazetarisë dhe komunikimit medial në Kosovë.

Objekti i ri i KosovaPress-it është i pajisur me studio televizive, sallë konferencash, hapësira redaksionale dhe infrastrukturë teknike bashkëkohore, duke krijuar kushte optimale për prodhim dhe shpërndarje të informacionit profesional dhe të besueshëm.

Me 27 vjet përvojë në shërbim të publikut, KosovaPress vazhdon të mbetet një nga shtyllat kryesore të informimit, duke u përshtatur me trendet moderne dhe nevojat e kohës.

KosovaPress u themelua më 4 janar 1999, duke dhënë kontribut të madh në informimin e opinionit vendor dhe ndërkombëtar për luftën çlirimtare.

Gjatë periudhës së luftës, KosovaPress publikoi lajme në gjuhën shqipe, angleze, gjermane dhe frënge.

Me shuarjen e Qeverisë së Përkohshme, në janar të vitit 2000 dhe krijimin e Këshillit të Përkohshëm Administrativ, në shtator të po këtij viti, KosovaPress nisi rrugëtimin e saj si Agjenci e Pavarur e Lajmeve.

Fillimi ishte i vështirë dhe luftohej për mbijetesë (në shkurt 2002 mediat dëbohen nga ish-ndërtesa e Rilindjes), ndërsa më pas, falë punës dhe këmbënguljes, nisi edhe periudha e zhvillimit dhe, vit pas viti, edhe zgjerimit të produkteve.

Një kronologji e shkurtër:

Në vitin 2002, KosovaPress kaloi në sistemin me parapagim, fillimisht në gjuhën shqipe, e prej vitit 2005 rifilloi publikimet edhe në gjuhën angleze, ndërsa, në 2007 edhe në gjuhën serbe dhe turke.

Në dhjetëvjetorin e themelimit (2009), KosovaPress solli në tregun medial të vendit, produktet më të reja: video-lajmin dhe audio-lajmin.

KosovaPress, në përvjetorin e 17 të punës (2016), prezantoi produktin e vet më të ri e që ishte transmetimi i drejtpërdrejt i ngjarjeve. Transmetimet e drejtpërdrejta u realizuan me teknologjinë më të re, përmes kamerave 4K.

Investimi i vazhdueshëm në teknologji i lejon sot KosovaPress-it të bëjë deri në 10 transmetime “live” në të njëjtën kohë, si dhe me regji.

Kur KosovaPress kremtoi dy dekada punë, u prezantua edhe Departamenti i Produksionit, i cili kujdeset për realizimin e emisioneve edukativo-argëtuese, siç është emisioni.

Në vitin 2017, KosovaPress, pas nje lobimi disavjeçarë anëtarësohet me të drejta të plota në rrjetin e Agjencive të Lajmeve të Vendeve të Ballkanit dhe të Evropës Juglindore (ABNA-SE www.abnase.com). KosovaPress, që prej anëtarësimit, është duke dhënë një kontribut të vlefshëm në promovimin e vlerave nacionale në rrjetin e lajmeve që editohen në platformat e ABNA-SE.

Në shtator të 2021, KosovaPress pasi organizoi suksesshëm Asamblenë e Përgjithshme të ABNA-SE, mori  presidencën për një vit.

Pas presidencës 2021-2022, KosovaPress vazhdon të jetë për tri vjet radhazi, pjesë e bordit të ABNA-SE (https://abnase.com/contacts/).

Lobimi dhe përpjekjet për të qenë pjesë edhe e rrjeteve tjera të agjencive të lajmeve nuk u ndalën.

Në shtator të 2022-ës, në Asamblenë Gjenerale, KosovaPress pranohet zyrtarisht si anëtare me të drejta të plota në Aleancën Evropiane të Agjencive të Lajmeve (EANA), dhe me ketë anëtarësim KosovaPress-it iu hapën edhe më shumë rrugët për të bashkëpunuar me të gjitha agjencitë e lajmeve të Evropës duke sjell produktet që i ofrojnë këto agjenci (https://www.newsalliance.org/news/the-european-alliance-of-news-agencies-we

Me këtë KosovaPress-it iu hapën edhe me shumë dyert e bashkëpunimit me të gjitha këto agjenci dhe rritjes së lajmeve nga këto vende dhe në këto vende për klientët e ndërsjellët.

Ne shkurt të vitit 2024 në Prishtinë, KosovaPress organizoi konferencën ndërkombëtare “Kufijtë e Lirisë së Fjalës”, për nder të 25-vjetorit të themelimit. Në Prishtinë u bashkuan më shumë se 20 agjenci botërore të lajmeve nga e gjithë Evropa dhe Ballkani.

Falë përkushtimit, përgjegjësisë dhe saktësisë, mediumet më të mëdha e më të rëndësishme në Kosovë, Shqipëri, Maqedoninë e Veriut si dhe vende të tjera të rajonit e me gjerë i besojnë Agjencisë së Lajmeve KosovaPress, duke bashkëpunuar ngushtë çdo ditë, tashmë për vite me radhë.

Agjencia e Lajmeve KosovaPress vijon të sjellë për lexuesin dhe klientin gjithë çfarë ndodhë në jetën e përditshme politike, ekonomike e sociale të Kosovës, regjionit, Evropës dhe botës, por edhe duke ngritur çështje të rëndësishme përmes gjinive të tjera gazetareske si intervista, dokumentarë, reportazhe e të tjera.

KosovaPress është një burim i besuar i lajmit si dhe një kontribuues i madh i rritjes së lirisë së të shprehurit.

Vitin e kaluar i është bashkuar Clive Marshall, ish-shef ekzekutiv i Agjencisë së Lajmeve PA Media Group në Mbretërinë e Bashkuar, si President jo-ekzekutiv i KosovaPress-it.

Zyrat e KosovaPress

1 nga 14

The post KosovaPress me zyra të reja në 27-vjetorin e themelimit appeared first on Agjencia Telegrafike Shqiptare.

TIRANË, 1 janar/ATSH/ Shërbimi Meteorologjik Ushtarak njoftoi se viti i ri do të nisë me mot me diell, ndërsa temperaturat do të jenë në rënie.

Sipas njoftimit, dita e enjte do të karakterizohet nga kushte atmosferike të qëndrueshme në të gjithë vendin. Moti parashikohet i kthjellët, me vranësira të pakta kalimtare, kryesisht në relievet malore lindore. Në akset rrugore malore parashikohen ngrica, ndërsa në zonat luginore do të ketë mjegull të dendur në orët e mëngjesit dhe të mbrëmjes.

Era do të fryjë kryesisht nga verilindja – juglindja me shpejtësi mesatare 5 m/s, ndërsa në vijën bregdetare dhe zonat luginore era mund të arrijë deri në 9 m/s, shoqëruar me valëzim në dete të forcës 1-2 ballë.

Temperaturat parashikohen:
Shkodër: -3/6°C, diell
Kukës: -6/5°C, diell
Lezhë: -2/6°C, diell
Dibër: -7/2°C, diell
Durrës: -2/11°C, diell
Tiranë: -3/10°C, diell
Elbasan: -2/9°C, diell
Berat: -5/11°C, diell
Vlorë: 0/12°C, diell
Korçë: -6/6°C, diell
Gjirokastër: -2/6°C, diell
Sarandë: 2/13°C, diell

/r.e/

The post Viti i Ri 2026 nis me diell dhe temperatura të ulëta appeared first on Agjencia Telegrafike Shqiptare.

TIRANË, 1 janar/ATSH/Drejtori i Përgjithshëm i Policisë së Shtetit, Ilir Proda, së bashku me Drejtorin e Drejtorisë Vendore të Policisë Tiranë, takuan shërbimet e Policisë Rrugore të planifikuara në shërbim gjatë natës së ndërrimit të viteve, si dhe të Sallës së Komandimit të DVP Tiranë.

Gjatë takimit me punonjësit e Policisë Rrugore, Drejtori Proda i uroi Gëzuar Vitin e Ri dhe, nëpërmjet tyre, të gjithë punonjësit e Policisë së Shtetit, në veçanti ata që janë në shërbim, duke i falënderuar për përkushtimin dhe sakrificën e treguar në shërbim të sigurisë së qytetarëve.

Drejtori Proda theksoi se nuk do të ketë asnjë tolerancë për drejtimin e mjeteve nën efektin e alkoolit, duke nënvizuar se çdo kontroll ka për qëllim shpëtimin e jetëve. Ai kërkoi profesionalizëm, korrektësi, komunikim me etikë dhe kujdes maksimal për veten dhe për njëri-tjetrin.

Në momentin e ndërrimit të viteve, Drejtori i Përgjithshëm inspektoi Sallën e Komandimit të DVP Tiranë, ku vlerësoi rolin kyç të kësaj strukture në menaxhimin e situatave operative.

Ai theksoi se çdo telefonatë dhe çdo informacion duhet të vlerësohet me seriozitet maksimal, pasi reagimi në kohë dhe koordinimi i saktë me patrullat në terren janë vendimtarë për parandalimin e ngjarjeve.

Gjatë festimeve për ndërrimin e viteve, si pasojë e hedhjes së fishekzjarrëve, deri në orën 01:30 të datës 01.01.2026, në rang vendi janë raportuar 20 shtetas të lënduar, pa rrezik për jetën, si dhe një e mitur 13-vjeçare, e cila ka pësuar gërvishtje në parakrah, dyshohet nga një plumb qorr, në Vaqarr (16 raste në Tiranë, 2 në Durrës, 1 në Lezhë, 1 në Fushë-Arrëz dhe 1 në Korçë)

Shërbimet e Policisë në të gjithë vendin janë në gatishmëri të plotë dhe vijojnë monitorimin e qarkullimit rrugor, të ambienteve ku zhvillohen festime dhe të gjithë territorit.

Policia e Shtetit ju uron Gëzuar Vitin e Ri 2026!
Me besim dhe bashkëpunim për më shumë siguri.

/a.f/

The post 20 të lënduar nga fishekzjarrët gjatë ndërrimit të viteve, pa rrezik për jetën appeared first on Agjencia Telegrafike Shqiptare.

PRISHTINË, 1 janar/ATSH/ Qytetarë të shumtë të kryeqytetit zgjodhën që festën e ndërrimit të viteve ta kalojnë në sheshin e Prishtinës. Në atmosferë festive qytetarët u shprehën optimistë për vitin e ri duke rrëfyer të mirat dhe sfidat e vitit që lamë pas, transmeton KosovaPress.

Qytetari, Rexhep Takaj tha se shpreson që në vitin tjetër të ketë më shumë dashuri dhe respekt mes njëri-tjetrit.

“Viti i kaluar ishte mirë, ishalla ky vit të ri edhe më mirë veç shumë suksese e shumë shëndet. Ishalla populli ia nis me falenderuar gjithkënd dhe me dashtë njëri-tjetrin, kemi ndryshuar sepse parja na ka prish të gjithëve, shumë keq”, tha ai.

Një qytetar nga Zvicra i cili atmosferën e vitit të ri zgjodhi ta festojë në mesin e bashkëatdhetarëve tha se atmosfera festive ishte e mirë. “Kemi ardhur nga Zvicra, shumë mirë kemi kaluar”, tha një qytetar tjetër nën atmosferën festive të kryeqytetit.

Qytetari, Genc Gashi tha se në vitin 2026 pret që gjërat të jenë më mirë se në vitin që lamë pas. “Po kalojmë shumë mirë, po presim më mirë në vitin e ri”, tha Genc Gashi.

Në mesin e qytetarëve që kishin zgjedhur të festonin në Prishtinë ishte edhe Adis Veseli nga Maqedonia e Veriut, i cili tha se atmosfera ishte shumë e mirë, teksa nga viti i ri pret më shumë punë. “Mirë super, viti i kaluar ishte mirë nuk ishte keq. Presim me punuar me i marr sendet me ren”, Adis Veseli nga Maqedonia.

/Kosovapress/

The post Atmosferë festive në sheshin e Prishtinës, qytetarët optimistë për Vitin e Ri appeared first on Agjencia Telegrafike Shqiptare.

TIRANË, 1 janar /ATSH/ Shqipëria ka lënë pas vitin 2025, duke hyrë zyrtarisht në Vitin e Ri 2026.

Festa kulmoi në sheshin “Skënderbej” në kryeqytet ku Viti i Ri u prit me një koncert madhështor i cili nisi në orën 22:00 dhe vijoi deri në orët e vona pas mesnate.

Qytetarë tê shuntë u mblodhën për të festuar bashkë momentin magjik të ndërrimit të viteve.

Atmosfera festive u ndez nga performancat e artistëve të njohur, duke i dhuruar publikut një mbrëmje të paharrueshme mes muzikës, dritave dhe fishekzjarrëve.

E pranishme ne sheshin “Skënderbej” ishte dhe kryetarja e komanduar e Bashkisë së Tiranës Anuela Ristani.

Ajo theksoi se “këtë vit kemi vendosur që privilegjin t’ia japim atyre që kanë punuar më shumë jo vetëm për qytetin, por për të ardhmen e të gjithë gjithë Shqipërisë, ndaj ju lutem bashkohuni me mua që të mirëpres këtu në skenë për të numëruar mbrapsht Vitin e Ri të gjithë maturantët e shkëlqyer të qytetit të Tiranës, fytyra më e bukur e qytetit Iva, Ajla, Dea”.

“Ka një arsye pse ky qytet nderon ata që përpiqen më shumë dhe këta çuna dhe goca që po futen në jetën e të rriturve sot do të numërojnë mbrapsht për Tiranën, për Shqipërinë dhe për të ardhmen tonë”, u shpreh Ristani.

Një spektakël fishekzjarrësh ndriçoi Tiranën gjatë momentit të ndërrimit të viteve.

Viti i Ri 2026 u prit me spektakël fishekzjarresh edhe në qytete të tjera të vendit.

Agjencia Telegrafike Shqiptare uron të gjithë shqiptarët kudo që ndodhen, për një vit sa më të mbarë e të begatë.

1 nga 6

/gj.m/a.f/

The post Viti i Ri mirëpritet me spektakël fishekzjarresh në Shqipëri. ATSH ju uron Gëzuar 2026-ën! appeared first on Agjencia Telegrafike Shqiptare.

PRISHTINË, 31 dhjetor/ATSH/ Presidentja e Kosovës, Vjosa Osmani ka uruar qytetarët për Vitin e Ri 2026. Osmani në një videomesazh thekson se viti që po lëmë pas ka dëshmuar se Kosova ecën përpara kur vepron me vendosmëri, me vlera dhe me unitet.

“Viti që po e lëmë pas ka dëshmuar se Kosova ecën përpara kur vepron me vendosmëri, me vlera dhe me unitet. Ka qenë një vit në të cilin kemi forcuar edhe më shumë pozitën ndërkombëtare të vendit tonë, kemi mbrojtur rendin kushtetues e interesin shtetëror, si dhe një vit në të cilin kemi vazhduar punën për t’i forcuar aleancat tona me partnerët tanë strategjikë. Kosova ka treguar se është e pranishme, e dëgjuar dhe e respektuar në tryezat ndërkombëtare, si faktor paqeje, stabiliteti dhe besueshmërie”, thekson Osmani.

Sipas saj, Kosova qëndroi e palëkundur ndaj çdo përpjekjeje destabilizuese, ndërsa brenda vendit vazhdon të ndërtojë një shoqëri më të drejtë, ku të drejtat e njeriut, barazia dhe dinjiteti janë themeli ynë i përbashkët.

Ajo tha po ashtu se sot, Kosova përmbylli një vit jo të lehtë, por një vit në të cilin zëri i saj u dëgjua fuqishëm dhe qëndrimi ynë në arenën ndërkombëtare ishte parimor dhe i palëkundur. Ishte një vit sfidues, sidomos me vonesat në themelimin e institucioneve, por ishte po ashtu vit që na ka forcuar dhe na ka përgatitur të ecim përpara me më shumë besim dhe me më shumë përgjegjësi.

Në urimin e saj ajo thekso po ashtu se Viti 2026 që po vjen “na gjen me përgjegjësi të reja dhe me synime të qarta”.

“Synimi ynë mbetet një Kosovë akoma më e sigurt, akoma më e drejtë, akoma më e integruar dhe akoma më e zhvilluar. Një Kosovë ku ligji zbatohet njësoj për të gjithë, ku institucionet janë gjithnjë në shërbim të qytetarëve dhe ku çdo i ri dhe e re ka perspektivë për të ndërtuar të ardhmen me dinjitet në vendin e vet”, tha ajo.

Në këtë natë të veçantë, Ajo ka uruar qytetarët për shëndet, paqe dhe begati.

“Le të jetë viti 2026 një vit bashkëpunimi, përgjegjësie dhe suksesi për secilin prej jush dhe për Republikën. Le ta nisim vitin e ri me besim në vete, në njëri-tjetrin dhe në Kosovën tonë. Gëzuar Vitin e Ri 2026 me shëndet e plot momente gëzimi e feste, për ju dhe për Republikën e Kosovës!”, tha ajo.

/KosovaPress//r.e/

The post Urimi i Osmanit për Vitin e Ri: 2026-ta na gjen me përgjegjësi të reja dhe synime të qarta appeared first on Agjencia Telegrafike Shqiptare.

PRISHTINË, 31 dhjetor/ATSH/ Kryeministri në detyrë, Albin Kurti ka deklaruar se nuk do të ketë ndryshime të mëdha në përbërjen e qeverisë së re.

Gjatë vizitës së tij në KEK, i pyetur për emrat e ri në qeverinë e re, tha se i nevojitet një konfirmim nga Kryesia e Vetëvendosjes se a do të jenë i njëjtë si në legjislaturën e nëntë.

“Na duhet të presim certifikimin e plotë të rezultateve. Na duhet një mbledhje në Kryesi të Vetëvendosjes, sepse qartazi propozimet tona i kemi pasur për legjislaturën e nëntë tash të dhjetën kur t’i marrim rezultatet nuk ndryshon programi dhe orientimi. Do të jetë përbërja identike nuk mund ta them dot tash. Edhe nëse është e kërkon një rikonfirmim. Nuk besoj që mund të ketë ndryshime të mëdha”,  tha Kurti.

Sa i përket zgjedhjes së presidentit apo presidentes në prill të vitit 2026, Kurti tha se do të takohet në ditët në vijim me presidenten aktuale  Vjosa Osmani që të diskutohen mundësitë, duke theksuar se duhen 80 deputetë të jenë të pranishëm në sallën e Kuvendit të Kosovës.

“Sa i përket çështjes së zgjedhjes së presidentit apo presidentes është hapi i tretë. Një herë është konstituimi i Kuvendit, formimi, pastaj vjen dhe ajo. Por para se të bëjmë çfarëdo, besoj se do të kemi një takim me presidenten aktuale Vjosa Osmani dhe do diskutojmë cilat janë shanset dhe mundësitë përpara, sepse na duhet të qëndrojmë 80 veta në sallë. Mund të duket më e lehtë pas rezultatit të 28 dhjetorit”, tha Kurti.

Në zgjedhjet e 28 dhjetorit, në bazë të rezultateve preliminare të KQZ-së, Lëvizja Vetëvendosje ka fituar 49.41 për qind dhe pritet t’i ketë 56 deputetë (pa votat e diasporës dhe me kusht).

The post Kurti flet për kabinetin e ri qeveritar dhe procesin e zgjedhjes së presidentit appeared first on Agjencia Telegrafike Shqiptare.

PRISHTINË, 31 dhjetor/ATSH/ Ambasada e Shteteve të Bashkuara të Amerikës në Prishtinë (SHBA) ka uruar Vitin e Ri 2026 me një mesazh drejtuar qytetarëve në Kosovë, miqve dhe partnerëve, duke veçuar rëndësinë e bashkëpunimit dhe vlerat e përbashkëta mes dy vendeve mike.

Kjo ambasadë në urimin e saj shprehu  shpresën që viti i ardhshëm të sjellë zhvillim, paqe dhe progres për të gjithë.

“Ndërsa mirëpresim vitin 2026, u dërgojmë urimet tona më të ngrohta të gjithë miqve dhe partnerëve tanë në Kosovë. Urojmë që viti që vjen të sjellë paqe, prosperitet dhe progres të përbashkët. Gëzuar Vitin e Ri nga të gjithë ne në Ambasadën e SHBA-së në Prishtinë”, thuhet në mesazhin e publikuar nga Ambasada e SHBA-së në Kosovë.

Ndërkaq, përmes një videomesazhi të realizuar nga stafi i Ambasadës së SHBA-së në Prishtinë, u përmend bashkëpunimi i ngushtë i zhvilluar gjatë vitit që po mbyllet, veçanërisht në fushën e zhvillimit ekonomik dhe fuqizimit të sektorit privat në Kosovë. Në këtë kontekst, u theksua edhe roli i kompanive amerikane që kanë investuar në Kosovë.

Micah Savidge, shef i njësitit ekonomik në Ambasadën e Amerikës, theksoi se këto partneritete kanë kontribuar drejtpërdrejt në zgjerimin e mundësive ekonomike.

Ndërsa, Kevin Miles drejtor për Çështjet Ndërkombëtare të Narkotikëve dhe Zbatimit të Ligjit, theksoi progresin e arritur në fushën e sigurisë, duke përmendur bashkëpunimin me institucionet përkatëse të Kosovës.

Ndryshe, guvernatori i Bankës Qendrore të Kosovës (BQK), Ahmet Ismaili, të hënën ka bërë të ditur se ekonomia e Kosovës pritet ta mbyllë vitin me rritje prej 3,9 për qind.

Këtu mund të ndiqni videomesazhin e plotë të Ambasadës së SHBA-së:

/KosovaPress//r.e/

The post Ambasada e SHBA në Kosovë uron Vitin e Ri, liston bashkëpunimet që rritën ekonominë appeared first on Agjencia Telegrafike Shqiptare.

PRISHTINË, 31 dhjetor/ATSH/ Kryeministri në detyrë, Albin Kurti, ka thënë se sapo konstituohet Kuvendi dhe të formohet qeveria e re, do të miratojmë Ligjin për Buxhetin 2026 dhe do të marrin vendim për pagën e trembëdhjetë për punëtorët e sektorit publik.

Kurti tha se paga e trembëdhjetë nuk merret në dhjetorin e vitit 2026, por në fillim të vitit pasues. Ai përmendi edhe procedurat ligjore për miratimin e buxhetit, meqë nevojitet që ai të miratohet në dy lexime në Kuvend.

“Për të gjithë punëtorët e administratës publike, me Ligjin e Buxhetit për vitin 2026 që ne e kaluam një herë në mbledhje të qeverisë, por të cilin tash me legjislaturën e dhjetë do ta kalojmë në dy lexime, kam thënë se në këtë ligj të buxhetit parashihet paga e 13-të. Kush punon 12 muaj në administratën shtetërore i ka 13 paga. Por paga e 13-të nuk merret në fund të vitit, në dhjetorin e vitit 2026, por në vitin që nis nesër do të merret në fillim të vitit. Varësisht se kur konstituohet Kuvendi dhe do të formojmë qeverinë, por në mbledhjen e parë, përveç me vendimin për Ligjin e Buxhetit, do ta kemi edhe vendimin që pagën e 13-të ta japin në fillim të vitit”, tha ai.

Paga e 13-të ishte përfshirë në Projekt-buxhetin e vitit 2026, mirëpo i njëjti, për shkak të dështimit të formimit të qeverisë së re, nuk u dërgua në Kuvend.

Ky zotim ka qenë edhe gjatë fushatës zgjedhore të 28 dhjetorit. Kurti këto komente bëri të mërkurën pas vizitës në Telekomin e Kosovës.

/KosovaPress/

The post Kurti premton pagë të 13-të për sektorin publik appeared first on Agjencia Telegrafike Shqiptare.

TIRANË, 31 dhjetor /ATSH/ Shërbimi Meteorologjik Ushtarak bën të ditur se vendi ynë sot, në ditën e fundit të vitit 2025, do të ndikohet nga kushte atmosferike relativisht të paqëndrueshme.

Sipas parashikimit, moti do të jetë kryesisht i kthjellët, me vranësira të pakta deri mesatare, kryesisht në formën e reve të mesme dhe të larta transparente në juglindje, në pjesën e parë të ditës.

Parashikohet prezencë e ngricave në akset rrugore, veçanërisht në zonat malore, si dhe mjegull e dendur dhe mjegullinë në orët e mëngjesit dhe të mbrëmjes, kryesisht në zonat luginore të vendit.

Era do të fryjë me drejtim nga kuadrati i veriut, me shpejtësi mesatare 8 m/s, ndërsa përgjatë vijës bregdetare dhe zonave luginore do të arrijë shpejtësi deri në 17 m/s. Deti parashikohet me valëzim të forcës 3–4 ballë.

Temperaturat do të luhaten nga -8 gradë Celsius minimumi në zonat verilindore, deri në 11 gradë Celsius maksimumi në zonat bregdetare dhe të Ultësirës Perëndimore.

Temperaturat e parashikuara në qytete:
Shkodër: -2 / 6°C – diell
Kukës: -8 / 5°C – diell
Lezhë: -2 / 6°C – diell me pak re
Dibër: -8 / 2°C – diell
Durrës: 1 / 11°C – diell me pak re
Tiranë: 1 / 10°C – diell me pak re
Elbasan: 0 / 9°C – diell
Berat: -2 / 10°C – diell me pak re
Vlorë: 2 / 11°C – diell
Korçë: -4 / 6°C – diell, vranësira dhe reshje bore lokale
Gjirokastër: -5 / 5°C – diell
Sarandë: 4 / 9°C – diell

/r.e/

The post Moti në ditën e fundit të vitit: kthjellime, vranësira të pakta dhe borë në Korçë appeared first on Agjencia Telegrafike Shqiptare.

TIRANË, 30 dhjetor /ATSH/ Këshilli i Ministrave ka miratuar një shtesë në vendimin nr. 684, datë 6 nëntor 2024, për krijimin e shoqërisë aksionare “Enti Kombëtar i Operimit Rrugor” (EKORR), sh.a., një institucion i ri rregullator për menaxhimin dhe operimin e rrugëve në vend.

Sipas vendimit të qeverisë, Ministrisë së Infrastrukturës dhe Energjisë i shtohet fondi prej 50 milionë lekësh në programin “Transporti rrugor”, i cili do të përdoret për rritjen e kapitalit të EKORR, sh.a., me qëllim mbulimin e veprimtarisë operative të entit. Ky fond do të përballohet nga fondi rezervë i buxhetit për vitin 2025.

Për zbatimin e vendimit ngarkohen Ministria e Infrastrukturës dhe Energjisë dhe Ministria e Financave. Vendimi hyn në fuqi pas botimit në “Fletoren Zyrtare”.

/a.f/r.e/

The post Qeveria rrit kapitalin e Entit Kombëtar të Operimit Rrugor me 50 milionë lekë appeared first on Agjencia Telegrafike Shqiptare.

PRISHTINË, 30 dhjetor /ATSH/Në një deklaratë të përbashkët, përfaqësuesja e Lartë e Komisionit Evropian, Kaja Kallas dhe komisionerja për Zgjerim, Marta Kos, kanë dhënë qëndrim pas përfundimit të zgjedhjeve parlamentare të 28 dhjetorit.

Ato përcjellin thirrjen e Bashkimit Evropian për një formim të shpejtë të institucioneve, ndërsa vlerësojnë se procesi zgjedhor reflektoi demokracinë në vend.

“Pas bllokadës politike pas zgjedhjeve të shkurtit 2025, presim formimin e shpejtë të Kuvendit dhe Qeverisë së re dhe vazhdimin e angazhimit tonë me autoritetet. Qeveria e re duhet të shtojë përpjekjet për reformat e domosdoshme lidhur me BE-në. Bashkimi Evropian vlerëson pjesëmarrjen aktive të të gjitha komuniteteve dhe partive të tyre politike në zgjedhje. Procesi zgjedhor tregoi një angazhim të fortë ndaj parimeve demokratike”.

Ndërsa për marrëdhëniet Kosovë-Serbi, Bashkimi Evropian cilëson se mbetet një proces që duhet çuar drejt normalizimit.

“Normalizimi i marrëdhënieve midis Kosovës dhe Serbisë, i facilituar nga BE-ja, vazhdon të jetë mënyra e vetme që të dyja vendet të bëjnë përparim në rrugët e tyre evropiane. Presim që të gjitha detyrimet që rrjedhin nga Marrëveshja për Rrugën drejt Normalizimit, si dhe të gjitha marrëveshjet e mëparshme të Dialogut, të zbatohen pa vonesa apo kushte të mëtejshme. BE-ja është gati të organizojë një takim në nivel të lartë sapo kushtet e lejojnë”.

Bashkimi Evropian, sipas deklaratës, ka dërguar një Mision Ekspert Zgjedhor (EEM) i cili do të qëndrojë në Kosovë për të ndjekur procedurat paszgjedhore.

“Ne i bëjmë thirrje Kuvendit, sapo të formohet, të ratifikojë marrëveshjet lidhur me Planin e Rritjes. Plani i Rritjes për Ballkanin Perëndimor është një instrument i kohëzuar i miratuar për periudhën 2024-2027 dhe është në interes të Kosovës që ratifikimi të bëhet sa më shpejt për të përfituar të gjitha mundësitë nën Planin e Rritjes, për të mirën e popullsisë së saj”, shkruan deklarata”.

BE rikujton se heqja e masave ndaj Kosovës ka filluar ndërsa vazhdon synimi për lirimin e mëtutjeshëm të fondeve.

“Për të kujtuar, BE-ja po ecën përpara për të hequr masat ndaj Kosovës. 216 milionë EUR ndihmë financiare janë liruar tashmë pas transferimit të rregullt të pushtetit lokal pas zgjedhjeve lokale të fundit. Ne gjithashtu synojmë të lirojmë 205 milionë EUR shtesë në fillim të vitit të ardhshëm”.

/Kosovapress/

The post BE “pret” nga Kosova formim të shpejtë të institucioneve appeared first on Agjencia Telegrafike Shqiptare.

TIRANË, 29 dhjetor/ATSH/ Kreu i grupit parlamentar të Partisë Socialiste, Taulant Balla ka reaguar pas protestës së radhë të mbajtur nga Partia Demokratike.

Balla duke publikuar foto nga protesta thekson se, “krushqit nuk erdhën fare, vetëm hyzmeqarët ishin”.

“Edhe unë mendova mos ta nxjerr sot e lënë vetëm, por me kërkesë të publikut duhet transparencë”, përfundoi Balla.

Kujtojmë se ciklin e komenteve ironike me “krushq” Balla e nisi në protestën e parë të zhvilluar nga opozita më 17 nëntor para Kryeministrisë, ku kreu i grupit parlamentar të PS iu referua batutës së aktorit Besnik Çinari: “Kaq në Shkodër i çojmë krushq në dasmë!”.

/a.f/r.e/

The post Balla për protestën e opozitës: Krushqit nuk erdhën fare appeared first on Agjencia Telegrafike Shqiptare.

TIRANË, 28 dhjetor/ATSH/ Shërbimi Meteorologjik Ushtarak njofton se vendi ynë ditën e diel do të ndikohet nga kushte atmosferike të qëndrueshme, si pasojë e masave ajrore të thata me origjinë veriore.

Moti parashikohet i kthjellët në pjesën më të madhe të territorit, me vranësira të pakta kalimtare në relievet malore të lindjes.

Mjegull e dendur dhe mjegullinë pritet të ketë kryesisht në zonat luginore, veçanërisht në orët e mëngjesit dhe të mbrëmjes.

Era do të fryjë nga verilindja në veriperëndim me shpejtësi mesatare 10 m/s, ndërsa në bregdet dhe në lugina pritet të arrijë deri në 18 m/s, e shoqëruar me valëzim në det të forcës 3–4 ballë.

The post Moti me diell dhe temperatura në minus appeared first on Agjencia Telegrafike Shqiptare.

TIRANË, 27 dhjetor/ATSH/ Kryetari i Partisë Demokratike, Sali Berisha, u ndal sot në Elbasan gjatë rrugës për në ‘Foltoren’ e Korçës.

Gjatë ndalesës, ai zhvilloi një takim me strukturat dhe mbështetësit e Partisë Demokratike në Elbasan, në kuadër të festave të fundvitit.

Në fjalën e tij, Berisha vlerësoi qëndresën e demokratëve gjatë 12 viteve të fundit, duke theksuar se përpjekjet për të asgjësuar opozitën kanë dështuar falë përkushtimit dhe sakrificës së qytetarëve.

Ai deklaroi se Partia Demokratike ka mbetur e palëkundur në mbrojtje të vlerave demokratike, të votës së lirë dhe të dinjitetit njerëzor.

Kryetari i PD-së akuzoi qeverinë për kapje të institucioneve, korrupsion dhe shndërrimin e Shqipërisë në një shtet të drejtuar nga krimi i organizuar.

Sipas Berishës, opozita ka arritur të faktojë para opinionit publik vendas dhe ndërkombëtar se proceset zgjedhore në vend janë të manipuluara dhe se pushteti aktual nuk buron nga vullneti i lirë i qytetarëve, shtoi ai.

Berisha theksoi se opozita nuk do të njohë asnjë pushtet të dalë nga manipulimi i votës dhe paralajmëroi intensifikimin e aksionit politik, përfshirë protesta të vazhdueshme qytetare, si mjet demokratik për rikthimin e shtetit ligjor dhe të standardeve demokratike.

Në përmbyllje të fjalës së tij, lideri historik u shpreh se Partia Demokratike do të vijojë betejën politike deri në rikthimin e demokracisë, duke theksuar se qëndresa qytetare është forca më e madhe përballë çdo përpjekjeje për autoritarizëm.

“U thamë shqiptarëve se, me Edi Ramën nuk ka zgjedhje dhe ia faktuam, jo vetëm shqiptarëve, por edhe botës. Por iu thamë shqiptarëve do mbrojmë votën dhe njëlloj, të dashur miq si në 2001-shin ne damkosëm me fakte që u mblodhën, me qendrimet tuaja, i përmbasëm ato zgjedhje. Të njëjtën gjë bëmë tani. Ne ia dolëm t’i faktojmë mbarë botës se Edi Rama nuk zhvillon zgjedhje, zhvillon farsë elektorale”, tha Berisha.

“Projekti ishte që të zhdukeshim, dështoi ai. Projekti ishte të na i grabisnin zgjedhjet duke përdorur miliarda e miliarda. Ua zumë në fyt. I kapëm me presh në dorë. Tani dalin aferat e tyre të paimagjinueshme dhe thonë: jo, nuk pranojmë heqje imuniteti. Jo, nuk do të shkojmë para gjykatësit. Atëherë, ose gjykatësin e ligjit, ose gjykatësin popull, njërin nga të dy, Edi Rama shpresë nuk ke më.

“Askush të mos mendojë se protesta e vazhdueshme nuk do ketë rezultatin e vet. Jo, do ketë rezultat të shkëlqyer. Dhe ju garantoj unë ju, prova jonë, testi ynë është të fillojmë kë kohën e duhur protestën e përnatshme në sheshin e Tiranës dhe ata do ia mbathin si minj. Asgjë nuk i reziston dot qëndresës qytetare, forcës së opozitës”, përfundoi Berisha.

/a.f/

The post Berisha: Projekti për të zhdukur opozitën dështoi, protesta të pandalshme appeared first on Agjencia Telegrafike Shqiptare.

TIRANË, 27 dhjetor/ATSH/ Pas një vendi të tretë në zbritjen e parë të Slalomit Gjigant, në pistën e Semmeringut në Austri, Lara Colturi nuk arriti të marrë pikë në zbritjen e dytë, pasi nuk e përfundoi garën.

Në ndalesën e radhës të këtij sezoni në Semmering, italo-shqiptarja e mbylli lëshimin e parë në vendin e tretë me kohën 57 sekonda e 28 të qindtat, ndërsa në lëshimin e dytë nuk arriti ta përfundojë garën për shkak të një gabimi që në nisje.

Lara Colturi do të rikthehet sërish nesër në këtë pistë, por në disiplinën e Slalomit Special, ku synon podiumin për herë të katërt këtë sezon. Më herët, skiatorja kuqezi është ngjitur në podium në Levi, Gurgl dhe Copper Mountain.

Sa i përket garës së sotme, vendin e parë e zuri austriakja Julia Scheib, e ndjekur nga zvicerania Camille Rast dhe suedezja Sara Hector.

The post Ski, Colturi e mbyll pa pikë zbritjen e dytë në Austri appeared first on Agjencia Telegrafike Shqiptare.

PRISHTINË, 27 dhjetor/ATSH/ Komisioni Qendror i Zgjedhjeve ka bërë të ditur se  votimi në përfaqësitë diplomatike të Kosovës për zgjedhjet e 28 dhjetorit po kalon kryesisht i qetë.

Zëdhënësi i KQZ-së Valmir Elezi, tha se me fillimin e votimit në përfaqësitë diplomatike në SHBA dhe Kanada, në orën 13:00 sipas kohës lokale në Kosovë, tashmë procesi i votimit është duke vazhduar në 29 përfaqësitë diplomatike të Kosovës, të vendosura në 18 shtete të ndryshme të botës.  

“Sipas të dhënave nga 24 përfaqësi diplomatike, deri në orën 13:00 nga 19,187 votues të regjistruar, kanë votuar 36.89% apo 7.079 votues”, tha Elezi.

Identifikimi në vendvotimin e përfaqësisë diplomatike mund të bëhet përmes njërit nga tri dokumentet e Kosovës: letërnjoftim, pasaportë apo leje e vozitjes.

/Kosovapress/

The post Kosovë, votimet e diasporës deri në orën 13:00 appeared first on Agjencia Telegrafike Shqiptare.

PRISHTINË, 27 dhjetor/ATSH/ Të dielën e 28 dhjetorit, mbi 2 milionë qytetarë me të drejtë vote, janë ftuar të votojnë për herë të katërt brenda vitit.

Viti 2025 nisi me votime më 9 shkurt për Kuvendin e Kosovës, vazhdoi në vjeshtë me votimin për zgjedhjet lokale të 12 tetorit dhe 9 nëntorit dhe do të mbyllet me votimin e 28 dhjetorit.

Komisioni Qendror i Zgjedhjeve, të shtunën në mëngjes ka shpërndarë materialin zgjedhor, përfshirë fletëvotimet për në 38 komunat e Republikës së Kosovës.

24 subjekte politike me 1,180 kandidatë janë në garë për ulëse në legjislaturën e nëntë të Kuvendit të Kosovës, prej të cilave 8 janë subjekte shqiptare me 624 kandidatë, ndërkaq pjesa tjetër janë subjekte nga radhët e komuniteteve pakicë që garojnë për 20 ulëse të garantuara.

Zëdhënësi i këtij institucioni, Valmir Elezi ka treguar për hapat e fundit që KQZ është duke ndërmarrë para fillimit të votimit, të dielën, në orën 07:00 të mëngjesit.

“Sipas planifikimeve, materialet zgjedhore që janë vendosur në Qendrat Komunale të Numërimit do të shpërndahen, si zakonisht, në orët e hershme të mëngjesit të së dielës për në qendrat e votimit. Numri i qendrave të votimit që do të hapen më 28 dhjetor është 948, prej të cilave 910 për votimin e rregullt me 2,557 vendvotime. Po ashtu, do të hapen edhe 38 qendra të votimit me gjithsej 57 vendvotime për të mundësuar votimin me kusht”, njoftoi Elezi.

Më tej, Elezi ka treguar se pas përfundimit të votimit, në vendvotime do të fillojë numërimi i pjesës së fletëvotimit ku qytetarët kanë përzgjedhur subjektet politike dhe se janë bërë përgatitjet që të dielën në mbrëmje të transmetohen rezultatet preliminare për subjektet politike. Sipas tij, rezultatet e para pritet të vijnë nga vendvotimet që kanë numër të vogël votuesish, të cilat përfundojnë numërimin në kohë më të shpejt.

“Sipas Ligjit për Zgjedhjet e Përgjithshme, numërimi i fletëvotimeve të subjekteve politike në zgjedhjet për Kuvendin e Kosovës bëhet në vendvotim, pasi të përfundojë procesi i votimit, ndërkaq, numërimi i votave të kandidatëve për deputetë të Kuvendnit të Kosovës bëhet në Qendra Komunale të Numërimit, duke filluar nga dita e hënë. KQZ ka bërë përgatitjet që më 28 dhjetor të publikohen rezultatet preliminare të subjekteve politike nga zgjedhjet për Kuvendin e Kosovës. Rezultatet nga vendvotimet e para, do të fillojnë të publikohen duke filluar para orës 20:00 dhe ato do të përditësohen vendvotim pas vendvotimi. Pra, brenda një kohe të shkurtër pasi numërohen fletëvotimet e një vendvotimi, do të publikohen të dhënat në platformën e rezultateve”, tha ai.

Përveç rezultateve, KQZ do të publikojë edhe të dhëna për pjesëmarrjen e votuesve në pesë orare të ndryshme, 09:00, 11:00, 13:00, 15:00, 17:00 dhe 19:00.

Sipas të dhënave të KQZ-së, numri i qytetarëve me të drejtë vote për të votuar brenda Kosovës është 1,999,204 votues, ndërkaq, në këtë listë nuk janë të përfshirë 77,086 shtetasit e Kosovës që janë regjistruar për të votuar nga jashtë vendit përmes postës apo në përfaqësitë diplomatike.

/Kosovapress/

The post Kosova voton për herë të katërt brenda vitit, KQZ është gati appeared first on Agjencia Telegrafike Shqiptare.