KIEV, 9 janar /ATSH-DPA/- Presidenti ukrainas Volodymyr Zelensky ka akuzuar Rusinë se kërkon të shkatërrojë qytetet e Ukrainës përmes sulmeve të saj të pamëshirshme ajrore.

“Rusët po shfrytëzojnë motin – valën e të ftohtit – dhe po përpiqen të godasin sa më shumë nga objektet tona energjetike”, tha sot Zelensky.

Kohët e fundit, Rusia sulmoi kryeqytetin Kiev, Dnipron, Zaporizhian, Krivyi Rih dhe Odesën.

“Taktika kryesore e Rusisë është të përpiqet të shkatërrojë plotësisht qytetet”, tha Zelensky.

Ai kërkoi që të gjitha administratat e qytetit të ishin të përgatitura dhe të mbronin qytetarët e tyre.

“Në qytetet nën sulm, furnizimet me energji elektrike, ujë dhe ngrohje kanë dështuar. Sulmet treguan se Moskës nuk i intereson diplomacia dhe përpjekjet paqësore të Shteteve të Bashkuara të Amerikës”, tha Zelensky.

“Përdorimi i raketës me rreze të mesme veprimi “Oreshnik” në Ukrainën perëndimore, në kufirin e jashtëm të BE-së dhe NATO-s, ishte një sfidë po aq e madhe për Varshavën, Bukureshtin, Budapestin dhe shumë kryeqytete të tjera”, shtoi ai.

Dje në mbrëmje, ushtria ruse lëshoi raketën “Oreshnik” me kapacitet bërthamor në një objektiv në rajonin e Lvivit.

Kjo është hera e dytë që forcat ruse përdorin këtë armë, e cila ka një rreze veprimi që mund të arrijë Evropën Perëndimore, në luftën e Ukrainës. //a.i/

The post KIEV – Zelensky: Rusia kërkon të shkatërrojë qytetet e Ukrainës appeared first on Agjencia Telegrafike Shqiptare.

KARAKAS, 9 janar /ATSH-AA/ – Qeveria e Venezuelës ka bërë të ditur se do të fillojë një “proces eksplorues” për të rivendosur lidhjet diplomatike me SHBA-në pas kapjes së presidentit Nicolas Maduro.

Karakasi vazhdoi të kritikojë ashpër “agresionin kriminal, jolegjitim dhe të paligjshëm” që çoi në nxjerrjen jashtë vendit të presidentit Maduro dhe bashkëshortes së tij, Cilia Flores, nga forcat amerikane në mëngjesin e 3 janarit, duke theksuar se operacioni amerikan ka shkaktuar mbi 100 vdekje civile dhe ushtarake dhe se ka shkelur ligjin ndërkombëtar.

“Me qëllim adresimin e kësaj situate brenda kornizës së ligjit ndërkombëtar dhe në respektim të rreptë të parimeve të sovranitetit kombëtar dhe Diplomacisë Bolivariane të Paqes, Qeveria Bolivariane e Venezuelës ka vendosur të fillojë një proces eksplorues me natyrë diplomatike me Qeverinë e SHBA-së”, tha qeveria venezuelase.

Përpjeka, theksoi qeveria, do të “synojë rivendosjen e misioneve diplomatike në të dy vendet, me qëllim adresimin e pasojave që rrjedhin nga agresioni dhe rrëmbimi i Presidentit të Republikës dhe Zonjës së Parë, si dhe adresimin e një agjende pune me interes të ndërsjellë”.

Maduro dhe Flores u kapën një një operacion nga forcat amerikane herët në mëngjesin e 3 janarit dhe më pas u nxorën nga vendi dhe u drejtuan për në New York, ku u gjykuan në një seancë fillestare gjyqësore mbi akuzat për drogë dhe armë. Të hënën, ata mohuan të gjitha akuzat ndaj tyre.  /os/

The post KARAKAS – Venezuela kërkon të rivendosë lidhjet diplomatike me SHBA-në pas kapjes së Maduros appeared first on Agjencia Telegrafike Shqiptare.

LONDËR, 9 janar /ATSH-DPA/- Udhëheqësit e Britanisë së Madhe, Gjermanisë dhe Francës kanë dënuar vrasjen e protestuesve në Iran dhe i kanë kërkuar Teheranit të ushtrojë vetëpërmbajtje mes shtypjes së demonstratave kundër regjimit.

Të paktën 62 persona raportohet të jenë vrarë dhe 2 300 të tjerë janë arrestuar gjatë javëve të protestave të nxitura fillimisht nga ekonomia e dobët të vendit.

Udhëheqësit e Iranit kanë mbyllur gjithashtu aksesin në internet dhe thirrjet telefonike ndërkombëtare në përgjigje të protestave.

Në një deklaratë të përbashkët, kryeministri britanik Keir Starmer, kancelari gjerman Friedrich Merz dhe presidenti francez Emmanuel Macron thanë se ishin thellësisht të shqetësuar për raportet e dhunës nga forcat iraniane të sigurisë dhe dënuan fuqimisht vrasjen e protestuesve.

“Autoritetet iraniane kanë përgjegjësinë për të mbrojtur popullsinë e tyre dhe duhet të lejojnë lirinë e shprehjes dhe protestat paqësore pa frikën e hakmarrjes”, thanë udhëheqësit.

“Ne i nxisim autoritetet iraniane të ushtrojnë vetëpërmbajtje nga dhuna dhe të mbështesin të drejtat themelore të qytetarëve të Iranit”, sipas deklaratës.

Protestat në Iran filluan më 28 dhjetor dhe janë shndërruar në sfidën më të rëndësishme ndaj regjimit për disa vite.

Demonstratat kanë ripërtërirë gjithashtu konfrontimin midis Iranit dhe SHBA-së, ndersa presidenti amerikan, Donald Trump ka paralajmëruar se Teherani do ta paguante shtrenjtë nëse autoritetet vrisnin protestuesit. //a.i/

The post FOKUS – Udhëheqësit e BM-së, Gjermanisë dhe Francës dënojnë vrasjen e protestuesve iranianë appeared first on Agjencia Telegrafike Shqiptare.

TIRANË, 9 janar/ATSH/ Strukturat e Policisë së Shtetit janë gatishmëri të shtuar në terren për shkak të motit të keq.

Policia njofton se vijojnë patrullimet, monitorimi i zonave urbane dhe rurale për t’u ardhur në ndihmë përdoruesve të rrugës dhe qytetarëve në rast nevoje, si dhe për parandalimin e paligjshmërive dhe rritjen e sigurisë rrugore.

Rreth 5500 punonjës të Policisë së Shtetit kanë qenë të angazhuar në territor duke mbështetur të gjitha strukturat për shkak të motit të keq. Ndërsa, janë 700 mjete të Policisë së Shtetit të cilat janë vendosur në dispozicion për të mbështetur dhe ndihmuar qytetarët në të gjithë vendin.

Për shkak të motit të keq dhe fushëpamjes së kufizuar gjatë natës, Policia e Shtetit apelon për drejtuesit e mjeteve të tregojnë kujdes të shtuar, të moderojnë shpejtësinë dhe të telefonojnë në 112 në rast nevoje.

/e.i/r.e/

The post Moti i keq, shërbimet e Policisë në gatishmëri të shtuar në terren appeared first on Agjencia Telegrafike Shqiptare.

UASHINGTON, 9 janar /ATSH-ANSA/ – Kina dhe Rusia mund të blejnë naftë nga Shtetet e Bashkuara, deklaroi presidenti amerikan Donald Trump gjatë takimit të tij me kompanitë e naftës në Shtëpinë e Bardhë.

Donald Trump u tha drejtuesve të naftës të mbledhur në Shtëpinë e Bardhë se “Shtetet e Bashkuara do të vendosin se cilat kompani mund të punojnë në Venezuelë”.

“Tani keni siguri të plotë në Venezuelë”, shtoi Trump gjatë takimit të tij me drejtuesit ekzekutivë të kompanive kryesore të naftës në botë, përfshirë atë italiane Eni. /os/.

The post SHBA – Trump: Kina dhe Rusia mund të blejnë naftë nga SHBA-të appeared first on Agjencia Telegrafike Shqiptare.

ROMË, 9 janar /ATSH/ – Ne e dimë se kur bëhet fjalë për alkoolin nuk presim përfitime, por disa pije alkoolike janë veçanërisht problematike, shkruan salute.eu.

Ky është rasti me pirjen e tepërt, të ashtuquajturin pirje të tepërt alkooli, në të cilën konsumohen sasi të mëdha alkooli brenda pak orësh.

Kjo paraqet rreziqe të konsiderueshme për shëndetin.

Sot, ne i kuptojmë gjithnjë e më mirë rreziqet e konsumit të tepërt dhe të përqendruar të alkoolit, falë pjesërisht studimeve të botuara.

Studimet nxjerrin në pah rreziqet e pirjes së tepërt për zorrët.

Dëmi gastrointestinal i shkaktuar nga pirja e tepërt është tashmë pjesërisht i njohur.

Siç theksojnë autorët, konsumi i tepërt i alkoolit prish barrierën gastrointestinale dhe kështu funksionin e saj mbrojtës kundër baktereve dhe substancave potencialisht të dëmshme.   /os/

The post FOKUS – Konsumi i tepërt i alkoolit shkatërron mukozën e zorrëve appeared first on Agjencia Telegrafike Shqiptare.

ROMË, 9 janar /ATSH-DPA/ – Kryeministrja italiane Giorgia Meloni mbështeti mbajtjen e bisedimeve midis Evropës dhe Rusisë mes përpjekjeve ndërkombëtare për t’i dhënë fund luftës në Ukrainë.

“Unë besoj se ka ardhur koha që Evropa dhe Rusia të flasin”, tha ajo në konferencën e saj vjetore për shtyp në Romë.

“Sepse, nëse Evropa vendos të marrë pjesë në këtë fazë negociatash, por flet vetëm me njërën nga palët në konflikt, kam frikë se kontributi pozitiv që ajo mund të japë në fund do të jetë i kufizuar”, theksoi ajo.

Disa javë më parë, presidenti francez Emmanuel Macron tha se ‘’mund të ishte e arsyeshme dhe e dobishme për Evropën dhe Ukrainën të flisnin me Presidentin rus Vladimir Putin në mënyrë që të përfshiheshin drejtpërdrejt në diskutim’’.

Në komentet e saj, Meloni iu referua fjalëve të Macron dhe tha se ‘’mendonte se ai kishte të drejtë në këtë pikë’’.   /os/

The post ITALI – Meloni: Evropa duhet të flasë përsëri me Rusinë për luftën në Ukrainë appeared first on Agjencia Telegrafike Shqiptare.

TIRANË, 9 janar/ATSH/ Kryetari i bashkisë së Shijakut, Elton Arbana bëri të ditur sot se të gjitha strukturat e bashkisë janë të angazhuara për të menaxhuar situatën pas reshjeve të fundit dhe për të mbështetur banorët e prekur nga përmbytjet.

“Bashkia është në terren dhe po punon pa ndërprerje për të garantuar sigurinë e qytetarëve dhe për të ofruar ndihmë të menjëhershme familjeve të prekura”, deklaroi ai.

Arbana informoi se tashmë është punuar për pastrimin dhe sistemimin e rrugëve dhe kanaleve kulluese, për të siguruar qarkullimin e lirë dhe sigurinë e qytetarëve. Po ashtu, është bërë kontroll dhe pastrim i pusetave, për parandalimin e përmbytjeve dhe funksionimin normal të rrjetit kullues.

Nga ana tjetër, Arbana tha se është bërë edhe shpërndarja e pakove ushqimore dhe ndihmave për familjet e prekura. Ndërkohë ka nisur edhe puna për vlerësimin dhe dokumentimin e dëmeve në banesa, biznese dhe infrastrukturë.

Ai u bëri thirrje qytetarëve të raportojnë çdo problematikë pranë strukturave përgjegjëse.

“Bëni vetëdeklarimin e dëmeve nëse nuk jeni kontaktuar ende nga grupet e terrenit”, apeloi Arbana.

1 nga 3

/r.e/

The post Arbana: Strukturat në terren, mbështetje banorëve të prekur nga përmbytjet appeared first on Agjencia Telegrafike Shqiptare.

TIRANË, 9 janar/ATSH/ Këshilli i Lartë i Prokurorisë emëroi sot prokurorin Arens Çela në drejtimin e Prokurorisë Tiranë për një mandat 3-vjeçar, që përfundon në vitin 2029.

Gjithashtu, Këshilli miratoi kërkesën e prokurorit Altin Dumani për të marrë pjesë si folës dhe ekspert kryesor në trajnimin për prokurorë, hetues dhe gjyqtarë nga Kosova, të organizuar nga ambasada britanike në Prishtinë.

Në vijim, Këshilli nisi procedurat e verifikimit të pasurisë dhe figurës për kandidatin për drejtues në Prokurorinë e Lezhës, Arben Nika, dhe për kandidatin për riemërim në drejtimin e Prokurorisë Fier, Elion Mustafaj.

Po ashtu, u miratua pezullimi i procedimit disiplinor ndaj magjistratit Dritan Gripshi, prokuror në Prokurorinë pranë Gjykatës së Shkallës së Parë Berat.

/r.e/

The post Arens Çela emërohet drejtues i Prokurorisë Tiranë, Altin Dumani do të ofrojë ekspertizë në Kosovë appeared first on Agjencia Telegrafike Shqiptare.

ZVICËR, 9 janar /ATSH-DPA/-  Prokurorët zviceranë kanë kërkuar paraburgim për pronarin e barit të resortit të skive Crans-Montana – ku 40 persona vdiqën për shkak të një zjarri gjatë festës së Vitit të Ri, duke përmendur rrezikun që ai të mund të arratisej.

“Bazuar në deklaratat e tij, historikun e tij të mëparshëm të punës dhe situatën e tij personale në Zvicër dhe jashtë vendit, zyra e prokurorit e konsideroi rrezikun e arratisjes si konkret”, tha zyra e prokurorit në Valais.

“Bashkëshortja e pronarit, e cila gjithashtu drejtonte lokalin, nuk konsiderohet si rrezik për arratisje dhe nuk do të vendoset në paraburgim”, thanë prokurorët.

Zjarri shpërtheu në orët e para të 1 janarit në barin “Le Constellation” në qytetin e Crans-Montana. Përveç viktimave, gati 120 persona u plagosën, shumica prej tyre rëndë.

Hetuesit besojnë se katastrofa u shkaktua nga një fishekzjarr i bashkangjitur në një shishe që i vuri flakën tavanit. //a.i/

The post ZVICËR – Prokurorët urdhërojnë arrestimin e pronarit të barit në resortin Crans-Montana appeared first on Agjencia Telegrafike Shqiptare.

TEHERAN, 9 janar /ATSH-AA/ – Udhëheqësi Suprem i Iranit, Ali Khamenei, paralajmëroi sot protestuesit kundër “bashkëpunimit me të huajt”, duke dënuar presidentin amerikan Donald Trump për, siç tha, shfrytëzimin e pakënaqësive publike.

“Nuk mund ta toleroj bashkëpunimin me të huajt”, tha Khamenei në një fjalim publik.

“Nëse jeni agjent që bashkëpunon me të huajt, do të refuzoheni menjëherë nga populli iranian dhe regjimi iranian”, shtoi ai.

“Duart e tij janë të njollosura me gjakun e iranianëve. E megjithatë, pretendon se është në anën e popullit iranian. Ai është i papërgjegjshëm. Nuk i interesojnë civilët”, shtoi ai duke sulmuar Trumpin.

“Ata, protestuesit, mund ta besojnë atë. Ata djegin koshat e mbeturinave vetëm për t’ia bërë qejfin atij”, theksoi Khamenei.

Ai tha se presidenti amerikan duhet të përqendrohet te problemet në vendin e tij.

Këto deklarata vijnë në një kohë tensionesh të vazhdueshme në Iran, teksa protestat për shkak të pakënaqësive ekonomike dhe sociale kanë vazhduar në pjesë të ndryshme të vendit.   /os/

The post IRAN – Khamenei: Nuk mund ta toleroj bashkëpunimin me të huajt appeared first on Agjencia Telegrafike Shqiptare.

PRISHTINË, 9 janar /ATSH/ Paneli Zgjedhor për Ankesa dhe Parashtresa (PZAP) njoftoi të premten vonë se e ka hedhur poshtë si jashtë afatit kërkesën e Partisë Demokratike të Kosovës (PDK) për shfuqizimin e rreth 20.000 votave të dërguara në vend përmes postës nga mërgata për zgjedhjet e parakohshme parlamentare të 28 dhjetorit.

PDK – e cila doli e dyta në zgjedhje – kërkoi nga PZAP-ja të enjten t’i shpallë të pavlefshme votat në fjalë, duke thënë se ato ishin dërguar me postë nga jashtë vendit me vonesë, pas afatit të lejuar ligjor.

Në një njoftim të premten, PZAP-ja tha se partia e udhëhequr nga Bedri Hamza bëri ankesë pas afatit të paraparë ligjor prej 48 orësh për paraqitjen e ankesës, prandaj paneli nuk do ta shqyrtojë atë.

“Paneli ka vlerësuar se ankesa është parashtruar pas afatit ligjor për paraqitjen e ankesës, sipas nenit 119, paragrafi 1 të LZP-së, ku afati për dorëzimin e ankesës është 48 orë nga ndodhja e shkeljes së supozuar, dhe se ankesa është dorëzuar në PZAP më datë 08.01.2026, ndërsa shkelja e supozuar sipas ankuesit ka ndodhur me datën 02.01.2026 dhe 05.01.2026”, thuhet në njoftim.

PDK-ja u ankua se Komisioni Qendror i Zgjedhjeve (KQZ) i pranoi rreth 20.000 fletëvotime më 2 dhe 5 janar, pra disa ditë pas afatit të lejuar ligjor për pranimin e votave të dërguara me postë nga jashtë vendit për zgjedhjet e 28 dhjetorit.

Sipas Ligjit të Kosovës për Zgjedhjet, fletëvotimet e dërguara me postë nga jashtë vendit mund të pranohen nga KQZ-ja jo më larg se deri të nesërmen e ditës së zgjedhjeve në orën 16:00.

Ditë më parë, zëdhënësi i KQZ-së, Valmir Elezi, tregoi për Radion Evropa e Lirë se komisioni – i cili mbikëqyr procesin zgjedhor në vend – i kishte pranuar rreth 20.000 fletëvotime të dërguara me postë nga diapora më 2 dhe 5 janar.

Rreth 51.000 qytetarë të Kosovës në diasporë ishin regjistruar për të votuar përmes postës në këto zgjedhje.

Vetëvendosja e kryeministrit në detyrë, Albin Kurti, fitoi shumicën dërrmuese të votave me postë, 33.556, duke e lënë PDK-në mbrapa me vetëm 4.611 vota të fituara.

Para fillimit të numërimit të votave me postë, PDK-ja ishte në rrugë për t’i fituar 23 vende në Kuvendin e Kosovës, por tani ajo ka humbur një vend.

Vetëvendosja, ndërkohë, ka fituar 57 vende dhe Kurti pritet të themelojë qeverinë e re të vendit sapo të verifikohen rezultatet e zgjedhjeve.

KQZ-ja njoftoi të premten se ka përfunduar numërimi i të gjitha votave dhe tani ajo pritet të shpallë rezultatin përfundimtar.

The post Rrëzohet kërkesa e PDK-së për shfuqizimin e votave me postë appeared first on Agjencia Telegrafike Shqiptare.

UASHINGTON, 9 janar /ATSH-DPA/ – Forcat amerikane kanë sekuestruar përsëri një anije në Karaibe, me marinsat dhe marinarët që morën kontrollin e cisternës së naftës Olina, theksoi Komanda Jugore e ushtrisë amerikane.

Komanda tha se personeli nga Taskforca e Përbashkët Southern Spear, në bashkëpunim me Departamentin e Sigurisë Kombëtare, u nis nga transportuesi i avionëve USS Gerald R Ford dhe sekuestroi anijen në Detin e Karaibeve pa incidente.

Ashtu si me dy sekuestrime të tjera anijesh më parë këtë javë, ushtria tha se operacioni u krye për të mbrojtur sigurinë në Hemisferën Perëndimore.

Wall Street Journal raportoi se Olina më parë ishte njohur me një emër tjetër dhe ishte sanksionuar nga SHBA-të për transportimin e naftës ruse.

Uashingtoni akuzon anijet se veprojnë si pjesë e një flote të ashtuquajtur “fantazmë” ose “hije” që përdoret për të lëvizur naftë të paligjshme dhe për të shmangur sanksionet.

Të mërkurën, forcat amerikane sekuestruan një anije mallrash me flamur rus në Veri. /os/

The post SHBA – Forcat amerikane kapin një tjetër anije cisternë nafte në Karaibe appeared first on Agjencia Telegrafike Shqiptare.

BRUKSEL, 9 janar /ATSH-DPA/- Masat e ashpra të udhëheqjes iraniane ndaj protestuesve ekspozon një regjim që ka frikë nga populli i vet, tha sot shefja e politikës së jashtme të BE-së, Kaja Kallas.

“Populli iranian po lufton për të ardhmen e tij. Duke injoruar kërkesat e tyre të ligjshme, regjimi tregon fytyrën e tij të vërtetë”, shkroi Kallas në X.

“Çdo dhunë kundër demonstruesve paqësorë është e papranueshme. Mbyllja e internetit, ndërkohë që shtypen me dhunë protestat, ekspozon një regjim që ka frikë nga populli i vet”, tha ajo.

Kallas akuzoi forcat e sigurisë se kanë përdorur taktika joproporcionale dhe të rënda kundër demonstruesve.

Protestat për përkeqësimin e kushteve ekonomike shpërthyen më 28 dhjetor në Teheran dhe u përhapën shpejt në pjesë të tjera të vendit. //a.i/

The post BRUKSEL – Kallas: Masat e ashpra në Iran tregojnë një regjim që ka frikë nga populli i vet appeared first on Agjencia Telegrafike Shqiptare.

TIRANË, 9 janar/ATSH/ Aktori dhe regjisori i mirënjohur shkodran, Edmond Mëhilli, një figurë e njohur e skenës dhe kulturës shqiptare ndërroi jetë sot, në moshën 79-vjeçare.

Edmond Mëhilli lindi më 23 gusht 1947 në Shkodër. Në vitin 1970 përfundoi Institutin e Lartë të Arteve dhe filloi karrierën si regjisor në Pukë (1970-1974), më pas në Estradën e Shkodrës për 15 vite (1974-1989). Ai ka punuar gjithashtu në Radio Shkodra dhe në Shtëpinë e Kulturës së rrethit të Shkodrës, ndërsa pas vitit 2003 u angazhua në Teatrin “Migjeni”.

Si regjisor, Mëhilli u dallua për trajtimin e hollësishëm të gjestit, fjalës dhe situatave komike, duke i dhënë publikut karaktere të besueshme dhe mizanskena të balancuara.

Në vitin 1980 cilësohet si regjisori më i mirë në Festivalin e Estradave Profesioniste të vendit.

Seria e shfaqjeve “Ditë buzëqeshjesh” në vitet 1983-1984 fitoi çmimin e parë, ndërsa sezonin 1985-1986 u vlerësua si ndër më të mirët në takimet e humorit mes estradave profesioniste të Shkodrës.

Edmond Mëhilli ka vënë në skenë komedinë “Gomari i Baba Tasit” të Gjergj Fishtës (1992) së bashku me trupën e aktorëve të Teatrit “Migjeni”.

Përveç regjisurës, Mhilli ka shkruar disa pjesë skenike, ku spikat drama “Një histori e thjeshtë”. Ndër shfaqjet e tij të njohura pas vitit 2000 është edhe “Ylli i mëngjesit”.

Kontributi i tij ka lënë një gjurmë të rëndësishme në teatrin dhe humorin shqiptar, duke e bërë emrin Edmond Mëhilli një referencë për gjeneratat e reja të artistëve.

Gjithashtu ka luajtur në një rol të vogël në filmin “Militanti”.

Homazhet për Edmond Mëhillin do të zhvillohen më 10 janar, nga ora 09:00 deri në 12:00, në hollin e Teatrit “Migjeni”.

Në një reagim zyrtar, Teatri shpreh ngushëllimet më të sinqerta për familjen dhe komunitetin e artistëve.

/r.e/

The post Ndahet nga jeta regjisori i njohur i Teatrit “Migjeni”, Edmond Mëhilli appeared first on Agjencia Telegrafike Shqiptare.

TIRANË, 9 janar /ATSH/ Kryeministri Edi Rama garantoi sot mbështetje të plotë për qytetarët e prekur nga situata e përmbytjeve, duke theksuar se qeveria do të përmbushë çdo detyrim ndaj tyre, si për banesat ashtu edhe për gjënë e gjallë.

Rama kujtoi se kur qeveria aktuale mori detyrën, trashëgoi borxhe të shumta nga përmbytjet, veçanërisht në zonën e Shkodrës, të cilat sipas tij janë shlyer një e nga një. Sipas tij, përmirësimi i infrastrukturës mbrojtëse ka ndikuar që dëmet nga përmbytjet të jenë më të pakta, pavarësisht përkeqësimit të sfidave klimatike.

“Kur ne erdhëm në qeveri, në malin e borxheve që na lanë trashëgimia aleatët e shiut ishte edhe një pjesë të tërë borxhesh nga përmbytjet zonës së Shkodrës. Në i shlyem një më një ato borxhe dhe nuk kemi hyrë më në asnjë borxh të kësaj natyre me njerëzit, përkundrazi kemi përballuar me dinjitet njerëzor, shtetëror dhe politik jo vetëm detyrimet nga përmbytjet, që edhe pse sfidat e klimës janë bërë më të mprehta, kanë qenë sidoqoftë shumë më pak pikërisht sepse ne kemi rritur ndjeshëm aftësinë mbrojtëse të infrastrukturës sonë, apo detyrimet nga zjarret që janë një sfidë e rritur e viteve të fundit, por edhe detyrime marramendëse nga fatkeqësi si pandemia apo tërmeti, duke dalë më të fortë se para fatkeqësive e më të ditur për të përballura sfidat e së nesërme.

“Sot dua t’i siguroj edhe të dëmtuarit e kësaj herë se ne do t’i qëndrojmë me të njëjtin dinjitet njerëzor shtetëror dhe politik çdo detyrimi ndaj tyre qoftë për banesat, qoftë për gjënë e gjallë”, tha Rama.

Gjatë mbledhjes së Komitetin Ndërministror të Emergjencave Civile për të adresuar situatën e krijuar nga përmbytjet e ditëve të fundit, si pasojë e reshjeve intensive të shiut, Rama theksoi se puna intensive dhe mobilizimi në gjithë territorin do të vijojë pa u ndalur.

“Dua të theksoj se puna intensive dhe mobilizimi i pandalur 24 orë në të gjithë territorin ku është nevoja e të gjithash strukturave të shtetit si edhe bashkive, do të vazhdojë e pandërprerë deri në kapërcimin e kësaj situate të rënduar meteorologjike”, tha Rama.

Në fund, Rama u bëri thirrje deputetëve të shumicës qeverisëse që të jenë të pranishëm pranë qytetarëve edhe pas kalimit të situatës së vështirë.

“Nga ana tjetër dua t’u them të gjithë deputetëve të shumicës qeverisës të pranishëm në këtë mbledhje përmes zoom-it që të jenë të angazhuar edhe sot edhe nesër, edhe pasi momenti i vështirë të jetë kapërcyer pranë njerëzve me njerëzit dhe për njerëzit”, tha Rama.

/m.q/a.f/

The post Rama: Qeveria do të përmbushë çdo detyrim ndaj qytetarëve appeared first on Agjencia Telegrafike Shqiptare.

TEHERAN, 9 janar /ATSH-DPA/- Sipas aktivistëve, 51 demonstrues janë vrarë në gati dy javë protesta mbarëkombëtare në Iran.

“Qindra njerëz të tjerë raportohet se janë plagosur në përleshjet me forcat e sigurisë”, sipas organizatës “Iran Human Rights” (IHRNGO), me qendër në Oslo.

Organizata po heton gjithashtu raportet për dhjetëra demonstrues të vrarë në qytetet kryesore të Teheranit, Mashhadit dhe Hamadanit, të cilat ende nuk janë përfshirë në shifrat aktuale.

“Rreziku i një përshkallëzimi të dhunës dhe vrasjeve masive të demonstruesve pas mbylljes së internetit është shumë serioz”, paralajmëroi drejtori i organizatës, Mahmood Amiry-Moghaddam.

Dje në mbrëmje, Irani përjetoi demonstratat më të mëdha që nga fillimi i valës aktuale të protestave.

Këto protesta shpërthyen në fund të vitit të kaluar, të shkaktuara nga një tronditje në kursin e këmbimit valutor.

Në përgjigje të protestave dje në mbrëmje, autoritetet pezulluan aksesin në internet.

Burime të pakonfirmuara kane raportuar shumë njerëz të vrarë pasi forcat e sigurisë hapën zjarr ndaj demonstruesve. //a.i/

The post IRAN – Mbi 50 protestues të vrarë në mbarë vendin appeared first on Agjencia Telegrafike Shqiptare.

TIRANË, 9 janar /ATSH/ Dhjetëra qytetarë të prekur nga përmbytjet kanë dalë sot sërish në protestë përpara bashkisë së Durrësit.

Me pankarta dhe megafonë në duar ata kanë kërkuar që të merren masa konkrete për të përmirësuar situatën në qytetin bregdetar.

Qytetarët kanë shprehur revoltim ndaj institucioneve pas përmbytjeve masive që kanë goditur zonat urbane dhe periferike të qytetit këtë javë. Reshjet masive të këtyre ditëve kanë shkaktuar dëme në banesa, toka bujqësore dhe infrastrukturë, ndërsa qytetarët në protestë përsëritën sot thirrjet për llogaridhënie dhe zgjidhje të situatës.

Në tubimin e ditës së sotme, të pranishëm ishin edhe eksponentë të Partisë Demokratike dhe Lëvizjes “Shqipëria Bëhet”.

Gjithashtu, në protestë morën pjesë banorë të zonës së ish-Kënetës dhe të tjera zona të përmbytura të Durrësit, të cilët vijojnë të përballen me pasojat në banesa, biznese dhe toka bujqësore.

Qytetarët kërkuan veprime më konkrete dhe të menjëhershme nga institucionet për të parandaluar dëmet në banesa dhe biznese.

Protestuesit kërkuan vlerësimin e saktë dhe të plotë të dëmeve që u janë shkaktuar nga përmbytjet dhe menjëherë pas këtij procesi, shpërndarjen e dëmshpërblimit të merituar. Shumë prej tyre pretenduan se nuk kanë marrë ende dëmshpërblimet e humbjeve të shkaktuara nga moti i keq vitin e kaluar, por edhe më parë.

Ditën e djeshme gjatë qëndrimit para bashkisë Durrës, ka pasur edhe tensione me forcat e policisë, ndërsa qytetarët tentuan të hyjnë në ndërtesë për të kërkuar përgjegjësi direkte nga zyrtarët e këtij institucioni.

/e.i/r.e/

The post Qytetarët e prekur nga përmbytjet protestojnë sërish në Durrës appeared first on Agjencia Telegrafike Shqiptare.

BOGOTA, 9 janar /ATSH-DPA/- Presidenti kolumbian, Gustavo Petro tha se kishte frikë nga një veprim i mundshëm ushtarak amerikan kundër vendit të tij – pas një bisede telefonike me presidentin e SHBA-se, Donald Trump, mes tensioneve midis Bogotës dhe Uashingtonit.

Në një intervistë per gazetën “El País”, Petro tha se presidenti i SHBA-së Donald Trump i kishte thënë gjatë një bisede telefonike se po mendonte të ndërmerrte operacione të këqija në Kolumbi.

Udhëheqësi i krahut të majtë tha se mesazhi i sugjeronte se përgatitjet për një veprim ushtarak ishin tashmë në proces, megjithëse nuk e dinte se çfarë veprimi specifik mund të ishte planifikuar.

“Treguesi ishte se ata tashmë po përgatiten për diçka, një operacion ushtarak”, tha Petro.

Petro tha se ngjarjet në Venezuelë e kishin bërë të shqetësohej se ai vetë do të prekej personalisht.

Kur u pyet nëse kishte frikë se mos vuante një fat të ngjashëm me atë të udhëheqësit venezuelian Nicolás Maduro, i cili u arrestua nga ushtarët amerikanë dhe u dërgua në SHBA, Petro u përgjigj: “Pa dyshim”.

Megjithatë, pas një bisede telefonike njëorëshe të mërkurën me Trump, situata është qetësuar për momentin.

Gjatë bisedës, Petro tha se ishte në gjendje të shpjegonte qëndrimet e tij, veçanërisht në luftën kundër drogës. Pas telefonatës, Trump njoftoi një takim në Shtëpinë e Bardhë, pa specifikuar një datë.

Trump e ka paralajmëruar më herët Kolumbinë – pas veprimeve ushtarake në Venezuelë.

Duke folur me gazetarët menjëherë pas operacionit kundër Maduros, Trump e përshkroi Kolumbinë si “shumë të sëmurë” dhe tha se drejtohej nga një “njeri i sëmurë që i pëlqen të prodhojë kokainë dhe ta shesë atë në Shtetet e Bashkuara të Amerikës.

Kolumbia, një fqinj i Venezuelës, konsiderohet një qendër e madhe prodhimi për kokainën. //a.i/

The post BOGOTA – Petro: Është i mundur një operacion ushtarak amerikan kundër Kolumbisë appeared first on Agjencia Telegrafike Shqiptare.

TIRANË, 9 janar/ATSH/ Ministri i Bujqësisë dhe Zhvillimit Rural, Andis Salla bëri të ditur sot se ka përfunduar mbyllja e argjinaturës së lumit të Drojës, duke garantuar funksionimin e plotë të infrastrukturës dhe sigurinë e zonës përreth.

Salla theksoi se ndërhyrja u realizua nga ekipi i Drejtorisë së Ujitjes dhe Kullimit Durrës, i cili punoi pa ndërprerje në terren, pavarësisht kushteve atmosferike jo të favorshme, me përdorimin e dy ekskavatorëve krahëgjatë.

“Falë ndërhyrjes në kohë dhe angazhimit maksimal të strukturave përgjegjëse, u shmangën rreziqe të mëtejshme për përmbytje, duke garantuar mbrojtjen e tokave bujqësore dhe të banesave në zone”, tha ai.

Salla siguroi se strukturat e Ministrisë së Bujqësisë dhe Zhvillimit Rural vijojnë monitorimin e situatës, në koordinim me institucionet përkatëse.

/r.e/

The post Salla: Riparohet argjinatura e Drojës appeared first on Agjencia Telegrafike Shqiptare.