TIRANË, 1 janar /ATSH/ Në shumë vende, viti i ri fillon më 1 janar. Megjithatë, nuk ka qenë gjithmonë kështu. Në fakt, për shekuj me radhë, data të tjera shënonin fillimin e kalendarit, duke përfshirë 25 marsin dhe 25 dhjetorin.

Caktimi i 1 janarit si Dita e Vitit të Ri erdhi falë mbretit romak Numa Pompilius. Gjatë mbretërimit të tij (715–673 para Krishtit) Numa e rishikoi kalendarin republikan romak në mënyrë që janari të zëvendësonte marsin si muajin e parë. Ishte një zgjedhje e përshtatshme, pasi janari u emërua sipas Janusit, perëndisë romake të të gjitha fillimeve; ndërsa muaji mars ishte në nder të perëndisë së luftës, Marsit. Por 1 janari nuk u bë fillimi zyrtar i vitit romak deri në vitin 153 para Krishtit.

Në vitin 46 p.K Jul Cezari prezantoi më shumë ndryshime, megjithëse kalendari Julian, siç u bë i njohur, e mbajti 1 janarin si datën e nisjes së vitit. Me zgjerimin e Perandorisë Romake u përhap gjithashtu edhe përdorimi i kalendarit Julian.

Në vitin 1582, përveç zgjidhjes së problemit me vitet e brishta, kalendari Gregorian rivendosi 1 janarin si fillimin e Vitit të Ri. Ndërsa Italia, Franca dhe Spanja ishin ndër vendet që pranuan menjëherë kalendarin e ri, kombet protestante dhe ortodokse ishin të ngadalta në miratimin e tij. Britania e Madhe dhe kolonitë e saj amerikane nuk filluan të ndiqnin kalendarin Gregorian deri në vitin 1752. Përpara kësaj, ata festonin Ditën e Vitit të Ri më 25 mars.

Me kalimin e kohës, vendet jo të krishtera gjithashtu filluan të përdorin kalendarin Gregorian. Kina (1912) është një shembull i shquar, megjithëse vazhdoi të festonte Vitin e Ri Kinez sipas një kalendari hënor. Në fakt, shumë vende që ndjekin kalendarin Gregorian kanë edhe kalendarë të tjerë tradicionalë ose fetarë. Disa kombe nuk e përvetësuan kurrë kalendarin Gregorian dhe kështu e fillojnë vitin në data të tjera përveç 1 janarit. Etiopia, për shembull, feston Vitin e Ri (i njohur si Enkutatash) në shtator.

/j.p/r.e/

The post Si u bë 1 janari dita e parë e vitit appeared first on Agjencia Telegrafike Shqiptare.

TIRANË, 1 janar /ATSH-Gjergji Mima/ Shqipëria ka hyrë në një fazë të re dhe më intensive të procesit të anëtarësimit në Bashkimin Evropian, pas nisjes zyrtare të negociatave dhe hapjes së të gjithë grup-kapitujve.

Në një intervistë për Agjencinë Telegrafike Shqiptare, drejtori ekzekutiv i Institutit Europian të Shqipërisë (EMA), Gledis Gjipali, thekson se ky zhvillim përfaqëson një sinjal të fortë politik nga Bashkimi Evropian dhe një moment vendimtar për vendin, ku pritshmëritë janë rritur ndjeshëm, por bashkë me to edhe sfidat.

Sipas Gjipalit, Shqipëria ka kaluar nga faza e përgatitjes, në atë të zbatimit konkret të standardeve evropiane.

Procesi i mbylljes së kapitujve ka nisur paralelisht, por mbetet provizor deri në momentin e anëtarësimit të plotë.

“Kjo fazë kërkon jo vetëm angazhim politik, por edhe kapacitete reale administrative dhe qëndrueshmëri në reforma”, thekson ai.

Duke folur për sfidat kryesore që ndikojnë ritmin e negociatave, Gjipali nënvizon se ato janë si të brendshme, ashtu edhe të jashtme.

Në planin e brendshëm, problematikat lidhen me lodhjen nga reformat, mungesën e qëndrueshmërisë në zbatim, polarizimin politik dhe mungesën e dialogut konstruktiv, elementë që janë vërejtur edhe nga institucionet evropiane. Administrata publike mbetet një faktor kyç, pasi kapacitetet e saj do të përcaktojnë drejtpërdrejt ritmin real të negociatave. Ndërkohë, në planin e jashtëm, mekanizmi i vendimmarrjes së BE-së dhe mundësia e përdorimit të vetos nga shtetet anëtare mbeten rreziqe potenciale për vonesa, shprehet Gjipali për ATSH.

Sa i përket pritshmërive për përparim të shpejtë, Gjipali vlerëson se objektivi për mbylljen e negociatave deri në vitin 2027 është ambicioz, por jo i pamundur.

Ai thekson se historikisht asnjë vend nuk i ka përfunduar negociatat në një periudhë kaq të shkurtër, por konteksti aktual gjeopolitik, mbështetja e shtuar nga Bashkimi Evropian dhe disa reforma tashmë të konsoliduara e bëjnë këtë synim potencialisht të arritshëm, nëse rritet ritmi i zbatimit dhe forcohet bashkëpunimi politik e institucional.

Një rol të rëndësishëm në këtë proces luan edhe konteksti gjeopolitik evropian.

Sipas Gjipalit, zgjerimi po shihet gjithnjë e më shumë si një instrument strategjik për sigurinë dhe stabilitetin e kontinentit, veçanërisht në Ballkanin Perëndimor.

Kjo ka rritur gatishmërinë e BE-së për të përshpejtuar procedurat dhe për të dhënë sinjale të qarta politike mbështetëse, për sa kohë vendet kandidate përmbushin kushtet dhe janë në linjë me politikën e jashtme dhe të sigurisë së Unionit.

Sa i përket kapitujve më problematikë, Gjipali thekson se më sfiduesit mbeten ata që lidhen me sundimin e ligjit: drejtësia, lufta kundër korrupsionit dhe krimit të organizuar, administrata publike dhe funksionimi i institucioneve demokratike.

Këta kapituj kërkojnë jo vetëm ndryshime ligjore, por rezultate konkrete dhe të qëndrueshme në praktikë, duke qenë se monitorohen vazhdimisht deri në anëtarësim dhe mund të rihapen në rast se vendi bën hapa pas në këtë drejtim.

Po ashtu, kapitujt që lidhen me mjedisin, sigurinë ushqimore dhe tregun kërkojnë investime të mëdha financiare dhe kapacitete të forta administrative për zbatimin e standardeve të reja evropiane.

Në këtë kontekst, Gjipali nënvizon se suksesi i Shqipërisë në rrugën drejt Bashkimit Evropian do të varet nga serioziteti në zbatim, bashkëpunimi politik dhe aftësia për ta kthyer procesin e integrimit në një projekt të përbashkët kombëtar. /r.e/

The post Gjipali për ATSH: Shqipëria në fazën më intensive të negociatave me BE-në appeared first on Agjencia Telegrafike Shqiptare.

BRUKSEL, 1 janar /ATSH/ – Qiproja merr sot zyrtarisht Presidencën e Këshillit të BE-së për herë të dytë që nga anëtarësimi në Bashkimin Evropian, në vitin 2004.

Presidenca e Qipros do të fillojë mes sfidave në rritje për Evropën si paqëndrueshmëria në Lindjen e Mesme, lufta e Rusisë kundër Ukrainës që po i afrohet vitit të katërt, kërcënimet ndaj sigurisë në rritje, uniteti transatlantik nën presion dhe një BE që synon të forcojë konkurrencën në një mjedis gjeo-ekonomik gjithnjë e më kërkues.

Duke u bazuar në punën e presidencës daneze në largim dhe duke iu përgjigjur këtyre presioneve, siguria dhe mbrojtja pritet të mbeten lart në agjendën e BE-së.

Avancimi i zgjerimit, arritja e konsensusit mbi politikën e migracionit dhe drejtimi i negociatave të vështira mbi Kornizën e ardhshme Financiare Shumëvjeçare (MFF) do të kërkojnë gjithashtu vëmendje të madhe, veçanërisht ndërsa kushtet fiskale të Evropës po përkeqësohen dhe modeli evropian po vihet nën presion nga fragmentimi i tregtisë globale./ a.jor.

The post FOKUS – Qiproja merr presidencën e radhës të BE-së appeared first on Agjencia Telegrafike Shqiptare.

PARIS, 1 janar /ATSH-AFP/ – Nga papa Françesku te Robert Redford, përfshirë Claudia Cardinale, Jane Goodall dhe Giorgio Armani, ja disa nga figurat e shquara që vdiqën në  vitin 2025:

JANAR

– 1: David LODGE, 89 vjeç, mjeshtri britanik i romanit akademik me një sens humori sarkastik

– 5: Costas SIMITIS, 88 vjeç, luftëtar i rezistencës kundër “juntës së kolonelëve” dhe kryeministri grek (1996-2004) i cili e udhëhoqi Greqinë në Eurozonë

– 7: Jean-Marie LE PEN, 96 vjeç, figurë e së djathtës ekstreme franceze dhe themelues i Frontit Kombëtar (FN)

– 13: Oliviero Toscani, 82 vjeç, fotograf italian

– 16: David Lynch, 78 vjeç, regjisor amerikan i “The Elephant Man”, “Mulholland Drive” dhe serialit kult “Twin Peaks”

– 30: Marianne Faithfull, 78 vjeç, këngëtare ikonike e ”Swinging London” dhe më vonë e skenës punk të Nju Jorkut

SHKURT

– 4: Karim Aga Khan IV, 88 vjeç, filantrop dhe udhëheqës shpirtëror i myslimanëve shiitë Nizari Ismaili

– 8: Sam Nujoma, 95 vjeç, presidenti i parë dhe babai i pavarësisë së Namibisë nga Afrika e Jugut në vitin 1990

– 18: Gene Hackman, 95 vjeç, aktor amerikan dhe figurë e New Hollywood, fitues i çmimit Oscar për “The French Connection” dhe “Ruthless”

PRILL

– 1: Val Kilmer, 65 vjeç, aktor amerikan, armiku i betuar i Tom Cruise në “Top” “Gun”

– 4: Amadou Bagayoko, 70 vjeç, këngëtar malian i cili, me gruan e tij Mariam, formoi një dyshe muzikore të verbër me sukses në mbarë botën (“A Sunday in Bamako”)

– 13: Mario Vargas Llosa, 89 vjeç, shkrimtar spanjollo-peruan, çmimi Nobel në Letërsi në 2010

– 21: Jorge Mario Bergoglio, 88 vjeç, papa Françesku, i zgjedhur në 2013, argjentinas dhe papa i parë jezuit, një reformator i njohur për sinqeritetin e tij që vendosi të margjinalizuarit në qendër të mesazhit të tij pa reformuar doktrinën tradicionale katolike

MAJ

– 13: José “Pepe” Mujica, 89 vjeç, president i Uruguait (2010-2015), ish-luftëtar guerilas i së majtës latino-amerikane, i njohur me nofkën “presidenti më i varfër në botë”

– 23: Sebastiao Salgado, 81 vjeç, fotograf franko-brazilian, i njohur për fotografitë e tij të tragjedive njerëzore dhe planetit

– 23: Mohamed Lakhdar Hamina, 95 vjeç, regjisor filmash algjerian. i vetmi regjisor arab dhe afrikan që fitoi Palmën e Artë në Kanë për “Kronikën e Viteve të Prushit” (1975)

– 30: Étienne-Émile Baulieu, 98 vjeç, shpikësi i pilulës së abortit

QERSHOR

– 3: Edmund White, 85 vjeç, romancier amerikan, një figurë kryesore në letërsinë LGBT+

– 9: Frederick Forsyth, 86 vjeç, mjeshtër i romanit britanik të spiunazhit, autor i “Dita e Çakallit” (1971)

– 11: Brian Wilson, 82 vjeç, muzikant amerikan, themelues i ”Beach Boys”

– 23: Lea Massari, 91 vjeç, aktore italiane e njohur për filma të tillë si “L’Avventura” dhe “Murmur of the Heart”

– 26: Lalo Schifrin, 93 vjeç, kompozitor i muzikës së shumë filmave, përfshirë atë të “Mission: Impossible”

KORRIK

– 22: Ozzy Osbourne, 76 vjeç, këngëtar britanik i ”Black Sabbath”, një nga grupet pioniere të hard rock-ut

– 24: Hulk Hogan, 71 vjeç, legjendë dhe aktor amerikan i catch-it

– 31: Bob Wilson, 83 vjeç, regjisor amerikan i njohur për krijimet e tij origjinale në teatër dhe opera

GUSHT

– 6: Eddie Palmieri, 88 vjeç, pianist amerikan dhe muzikant legjendar i salsës që revolucionarizoi muzikën latine

– 7: Jim Lovell, 97 vjeç, astronaut amerikan dhe komandant i misionit ”Apollo 13” që pothuajse përfundoi në katastrofë në vitin 1970

– 17: Terence Stamp, 87 vjeç, aktor britanik, ikonë e “Vitet Sixties”

SHTATOR

– 4: Giorgio Armani, 91 vjeç, stilist italian i modës, ikonë mode dhe ndërtues i një perandorie mallrash luksoze

– 6: Rosa Roisinblit, 106 vjeçe, figurë emblematike kundër diktaturës argjentinase

– 6: Rick Davies, 81 vjeç, këngëtar britanik, bashkëthemelues i grupit rock ”Supertramp”

– 10: Charlie Kirk, 31 vjeç, influencues amerikan dhe aktivist konservator, aleat i Donald Trump, u qëllua për vdekje

– 16: Robert Redford, 89 vjeç, aktor kryesor amerikan i filmit, i përkushtuar ndaj të majtës dhe një kumbar i vërtetë i kinemasë së pavarur në Shtetet e Bashkuara

– 23: Claudia Cardinale, 87 vjeç, aktore italiane e cila u bë shtetase franceze e natyralizuar, ikonë e kinemasë italiane dhe muzë e disa prej regjisorëve më të mëdhenj

TETOR

– 1: Jane Goodall, 91 vjeç, primatologe britanike, figurë emblematike e kauzës mjedisore dhe ambasadore për shimpanzetë

– 11: Diane Keaton, 79 vjeç, aktore amerikane, e njohur për filmat e saj me Woody Allen dhe rolin e saj në “Kumbari”

NËNTOR

– 3: Dick Cheney, 84 vjeç, ish-nënpresident nën George W. Bush (2001-2009), i konsideruar si një nga nënpresidentët më të fuqishëm amerikanë

– 6: James Watson, 97 vjeç, bashkëzbulues i strukturës së ADN-së dhe laureat i çmimit Nobel në Mjekësi, i njohur gjithashtu për vërejtjet e tij seksiste dhe raciste

– 24: Jimmy Cliff, 81 vjeç, këngëtar xhamajkan dhe legjendë e reggae.

– 29: Tom Stoppard, 88 vjeç, dramaturg britanik, i vlerësuar veçanërisht për “Shakespeare in Love”

DHJETOR

– 5: Frank Gehry, 96 vjeç, arkitekt amerikano-kanadez, veçanërisht përgjegjës për muzeun ”Guggenheim” në Bilbao

– 6: Martin Parr, 73 vjeç, fotograf dokumentarësh britanik

– 14: Rob Reiner, 78 vjeç, regjisor amerikan filmash, regjisor i “When Harry Met Sall”, dhe gruaja e tij, fotografja Michele Singer, 68 vjeç, u gjetën të vrarë në shtëpinë e tyre.

– 28: Brigitte Bardot, 91 vjeçe, aktorja franceze, e njohur për rolet e saj në “Dhe Zoti krijoi gruan” dhe “Përçmim”, vdiq në rezidencën e saj të famshme, ”La Madrague”, në Saint-Tropez, në jug të Francës./  a.jor.

The post RETROSPEKTIVË 2025 – Të humburit e mëdhenj të vitit appeared first on Agjencia Telegrafike Shqiptare.

LONDËR, 1 janar /ATSH-DPA/ – Ka qenë një tjetër vit me drama sportive, nga kulmet e triumfit të Anglisë në Euro 2025 për femra deri te finalja e tensionuar e F1.

Momentet më të mira 

• McIlroy vulos Grand Slam-in e tij

Rory McIlroy përfundoi Grand Slam-in e karrierës në prill, duke mposhtur Justin Rose në një play-off dramatik në The Masters. McIlroy kishte humbur një epërsi prej dy goditjesh gjatë natës me një double bogey në vrimën e parë të raundit të tij të fundit, e rikuperoi dhe më pas lejoi një epërsi prej katër goditjesh gjatë gjashtë vrimave të fundit ndërsa Rose e detyroi të kalonte në play-off. Por McIlroy më pas shënoi në të 18-tin për të fituar titullin e tij të pestë të madh, dhe të parin që nga viti 2014.

• Littler bën historinë në darts

Luke Littler u bë fituesi më i ri i Kampionatit Botëror PDC në janar me një fitore dominuese 7-3 ndaj Michael van Gerwen, ende tre javë para ditëlindjes së tij të 18-të. Një vit pasi humbi finalen e eventit ndaj Luke Humphries, Littler mundi fituesin e mëparshëm më të ri – Van Gerwen u bë kampion në moshën 24 vjeç në 2014 – me një mesatare prej 102 dhe 12 180.

• Skuadra e Evropës vazhdon

Dita e fundit e Kupës së 45-të Ryder ishte një për të gjithë. Përballë turmave frikësuese të Nju Jorkut, ekipi i Evropës mbajti një avantazh prej 11.5-4.5 – epërsia më e madhe në historinë evropiane – përpara se Ekipi Amerika të eliminohej për të kërcënuar rikthimin më të madh ndonjëherë në Kupën Ryder. Por goditja e Shane Lowry në vrimën e fundit e bëri atë të përgjysmohej me Russell Henley dhe Ekipi i Evropës mori fitoren e tyre të parë jashtë fushe në Kupën Ryder që nga viti 2012, 15-13.

• Një finale e tensionuar e F1

Për herë të parë që nga viti 2010, sezoni i Formula 1 pa më shumë se dy pilotë ende në garë për titullin botëror duke shkuar në Çmimin e Madh të fundit. Max Verstappen kishte qenë 104 pikë prapa në gusht, por shkoi në Abu Dhabi vetëm 12 pikë prapa Lando Norris, me Oscar Piastri pak prapa. Gara e fundit ishte në fund të fundit e drejtpërdrejtë – me vendin e tretë të mjaftueshëm për Norris edhe pse Verstappen fitoi – por tensioni shkoi deri në xhiron e fundit.

• Chloe Kelly siguron fitoren e Anglisë

Chloe Kelly goditi penalltinë fituese ndërsa Anglia mundi kampionët e botës Spanjën në penallti për të fituar Euro 2025 dhe për të mbrojtur kurorën e tyre. Ishte veçanërisht e veçantë për Kelly pas një sezoni të vështirë personalisht, por e gjithë skuadra e Anglisë shkëlqeu. Hannah Hampton bëri pritje kyçe në ndeshje dhe pastaj përsëri gjatë penalltive.

Momentet më të këqija

• Vdekja e Diogo Jota

Më 3 korrik, Diogo Jota po udhëtonte në veri përmes Spanjës me vëllanë e tij Andre Silva në kthimin e tij në Liverpool për stërvitje para sezonit. Por ”Lamborghini” i tyre pësoi një shpërthim gome duke shkaktuar një aksident që vrau të dy burrat. Jota, 28 vjeç dhe baba i tre fëmijëve, ishte martuar me partneren e tij prej kohësh Rute Cardoso vetëm 11 ditë më parë. Disa javë para kësaj, ai kishte ndihmuar Portugalinë të ngrinte Ligën e Kombeve, shumë shpejt pasi festoi titullin e Premier League të Liverpoolit.

• Ricky Hatton gjendet i vdekur

Boksi humbi një nga personazhet e tij më të mëdhenj në shtator kur Ricky Hatton u gjet i vdekur në moshën vetëm 46 vjeç. I ashtuquajturi ”vrasësi me pagesë” kishte fituar titullin botëror të peshave të lehta në qytetin e tij të lindjes, Mançester, në qershor 2005 me fitoren ndaj Kostya Tszyu, dhe vazhdoi të kishte beteja të paharrueshme me Floyd Mayweather dhe Manny Pacquiao, por jashtë ringut ai ishte gjithashtu i hapur për luftimet që pati me problemet e shëndetit mendor.

• Jess Carter u abuzua në mënyrë raciste

Para gëzimit të fitores së Anglisë me penallti ndaj Spanjës në finale, Euro 2025 u njollos nga një anë më e shëmtuar e lojës, pasi mbrojtësi i Anglisë, Jess Carter, iu nënshtrua abuzimit racist në internet, duke e bërë atë kohë 27-vjeçar të tërhiqej nga mediat sociale. Një burrë u arrestua në gusht në lidhje me abuzimin drejtuar Carter./  a.jor.

The post RETROSPEKTIVË 2025 – Momentet më të mira dhe më të këqija sportive të globit appeared first on Agjencia Telegrafike Shqiptare.

BOTË – Dita e Vitit të Ri.

NJU JORK (Shtetet e Bashkuara) – Zohran Mamdani merr detyrën si kryetar bashkie i Nju Jorkut.

BOTA – Publikimi i episodit të fundit të serialit të famshëm të Netflix “Stranger Things”.

PHENIAN (Koreja e Veriut) – Fjalimi i Vitit të Ri nga udhëheqësi i Koresë së Veriut Kim Jong Un.

NIKOZIA (Qipro) – Qiproja merr presidencën e radhës të Këshillit të BE-së.

SOFJE (Bullgari) – Bullgaria bëhet vendi i 21-të në Eurozonë.

BRUKSEL (Belgjikë) – Mekanizmi i Rregullimit të Kufijve të Karbonit i BE-së (CBAM), i cili takson importet ndotëse, hyn në fazën e tij përfundimtare.

OSLO (Norvegji) – Kërkesë për zero emetime për anijet turistike nën 10 000 tonë, që lundrojnë në fjorde të mbrojtura.

VATIKAN (Selia e Shenjtë) – Papa Leone XIV feston Ditën Botërore të Paqes në Bazilikën e Shën Pjetrit.

BERLIN (Gjermani) – Fjalimi i Vitit të Ri nga kancelari Friedrich Merz.

DAMASK (Siri) – Banka Qendrore lançon një monedhë kombëtare të re, të ridizajnuar.

BRAZILIA (Brazil) – Ish-presidenti Jair Bolsonaro pritet të lirohet nga spitali dhe të kthehet në paraburgim./  a.jor.

The post AXHENDA NDËRKOMBËTARE 01/01/2026 appeared first on Agjencia Telegrafike Shqiptare.

TIRANË, 1 janar/ATSH/ Shërbimi Meteorologjik Ushtarak njoftoi se viti i ri do të nisë me mot me diell, ndërsa temperaturat do të jenë në rënie.

Sipas njoftimit, dita e enjte do të karakterizohet nga kushte atmosferike të qëndrueshme në të gjithë vendin. Moti parashikohet i kthjellët, me vranësira të pakta kalimtare, kryesisht në relievet malore lindore. Në akset rrugore malore parashikohen ngrica, ndërsa në zonat luginore do të ketë mjegull të dendur në orët e mëngjesit dhe të mbrëmjes.

Era do të fryjë kryesisht nga verilindja – juglindja me shpejtësi mesatare 5 m/s, ndërsa në vijën bregdetare dhe zonat luginore era mund të arrijë deri në 9 m/s, shoqëruar me valëzim në dete të forcës 1-2 ballë.

Temperaturat parashikohen:
Shkodër: -3/6°C, diell
Kukës: -6/5°C, diell
Lezhë: -2/6°C, diell
Dibër: -7/2°C, diell
Durrës: -2/11°C, diell
Tiranë: -3/10°C, diell
Elbasan: -2/9°C, diell
Berat: -5/11°C, diell
Vlorë: 0/12°C, diell
Korçë: -6/6°C, diell
Gjirokastër: -2/6°C, diell
Sarandë: 2/13°C, diell

/r.e/

The post Viti i Ri 2026 nis me diell dhe temperatura të ulëta appeared first on Agjencia Telegrafike Shqiptare.

TIRANË, 1 janar/ATSH/Drejtori i Përgjithshëm i Policisë së Shtetit, Ilir Proda, së bashku me Drejtorin e Drejtorisë Vendore të Policisë Tiranë, takuan shërbimet e Policisë Rrugore të planifikuara në shërbim gjatë natës së ndërrimit të viteve, si dhe të Sallës së Komandimit të DVP Tiranë.

Gjatë takimit me punonjësit e Policisë Rrugore, Drejtori Proda i uroi Gëzuar Vitin e Ri dhe, nëpërmjet tyre, të gjithë punonjësit e Policisë së Shtetit, në veçanti ata që janë në shërbim, duke i falënderuar për përkushtimin dhe sakrificën e treguar në shërbim të sigurisë së qytetarëve.

Drejtori Proda theksoi se nuk do të ketë asnjë tolerancë për drejtimin e mjeteve nën efektin e alkoolit, duke nënvizuar se çdo kontroll ka për qëllim shpëtimin e jetëve. Ai kërkoi profesionalizëm, korrektësi, komunikim me etikë dhe kujdes maksimal për veten dhe për njëri-tjetrin.

Në momentin e ndërrimit të viteve, Drejtori i Përgjithshëm inspektoi Sallën e Komandimit të DVP Tiranë, ku vlerësoi rolin kyç të kësaj strukture në menaxhimin e situatave operative.

Ai theksoi se çdo telefonatë dhe çdo informacion duhet të vlerësohet me seriozitet maksimal, pasi reagimi në kohë dhe koordinimi i saktë me patrullat në terren janë vendimtarë për parandalimin e ngjarjeve.

Gjatë festimeve për ndërrimin e viteve, si pasojë e hedhjes së fishekzjarrëve, deri në orën 01:30 të datës 01.01.2026, në rang vendi janë raportuar 20 shtetas të lënduar, pa rrezik për jetën, si dhe një e mitur 13-vjeçare, e cila ka pësuar gërvishtje në parakrah, dyshohet nga një plumb qorr, në Vaqarr (16 raste në Tiranë, 2 në Durrës, 1 në Lezhë, 1 në Fushë-Arrëz dhe 1 në Korçë)

Shërbimet e Policisë në të gjithë vendin janë në gatishmëri të plotë dhe vijojnë monitorimin e qarkullimit rrugor, të ambienteve ku zhvillohen festime dhe të gjithë territorit.

Policia e Shtetit ju uron Gëzuar Vitin e Ri 2026!
Me besim dhe bashkëpunim për më shumë siguri.

/a.f/

The post 20 të lënduar nga fishekzjarrët gjatë ndërrimit të viteve, pa rrezik për jetën appeared first on Agjencia Telegrafike Shqiptare.

PRISHTINË, 1 janar/ATSH/ Qytetarë të shumtë të kryeqytetit zgjodhën që festën e ndërrimit të viteve ta kalojnë në sheshin e Prishtinës. Në atmosferë festive qytetarët u shprehën optimistë për vitin e ri duke rrëfyer të mirat dhe sfidat e vitit që lamë pas, transmeton KosovaPress.

Qytetari, Rexhep Takaj tha se shpreson që në vitin tjetër të ketë më shumë dashuri dhe respekt mes njëri-tjetrit.

“Viti i kaluar ishte mirë, ishalla ky vit të ri edhe më mirë veç shumë suksese e shumë shëndet. Ishalla populli ia nis me falenderuar gjithkënd dhe me dashtë njëri-tjetrin, kemi ndryshuar sepse parja na ka prish të gjithëve, shumë keq”, tha ai.

Një qytetar nga Zvicra i cili atmosferën e vitit të ri zgjodhi ta festojë në mesin e bashkëatdhetarëve tha se atmosfera festive ishte e mirë. “Kemi ardhur nga Zvicra, shumë mirë kemi kaluar”, tha një qytetar tjetër nën atmosferën festive të kryeqytetit.

Qytetari, Genc Gashi tha se në vitin 2026 pret që gjërat të jenë më mirë se në vitin që lamë pas. “Po kalojmë shumë mirë, po presim më mirë në vitin e ri”, tha Genc Gashi.

Në mesin e qytetarëve që kishin zgjedhur të festonin në Prishtinë ishte edhe Adis Veseli nga Maqedonia e Veriut, i cili tha se atmosfera ishte shumë e mirë, teksa nga viti i ri pret më shumë punë. “Mirë super, viti i kaluar ishte mirë nuk ishte keq. Presim me punuar me i marr sendet me ren”, Adis Veseli nga Maqedonia.

/Kosovapress/

The post Atmosferë festive në sheshin e Prishtinës, qytetarët optimistë për Vitin e Ri appeared first on Agjencia Telegrafike Shqiptare.

TIRANË, 1 janar /ATSH/ Shqipëria ka lënë pas vitin 2025, duke hyrë zyrtarisht në Vitin e Ri 2026.

Festa kulmoi në sheshin “Skënderbej” në kryeqytet ku Viti i Ri u prit me një koncert madhështor i cili nisi në orën 22:00 dhe vijoi deri në orët e vona pas mesnate.

Qytetarë tê shuntë u mblodhën për të festuar bashkë momentin magjik të ndërrimit të viteve.

Atmosfera festive u ndez nga performancat e artistëve të njohur, duke i dhuruar publikut një mbrëmje të paharrueshme mes muzikës, dritave dhe fishekzjarrëve.

E pranishme ne sheshin “Skënderbej” ishte dhe kryetarja e komanduar e Bashkisë së Tiranës Anuela Ristani.

Ajo theksoi se “këtë vit kemi vendosur që privilegjin t’ia japim atyre që kanë punuar më shumë jo vetëm për qytetin, por për të ardhmen e të gjithë gjithë Shqipërisë, ndaj ju lutem bashkohuni me mua që të mirëpres këtu në skenë për të numëruar mbrapsht Vitin e Ri të gjithë maturantët e shkëlqyer të qytetit të Tiranës, fytyra më e bukur e qytetit Iva, Ajla, Dea”.

“Ka një arsye pse ky qytet nderon ata që përpiqen më shumë dhe këta çuna dhe goca që po futen në jetën e të rriturve sot do të numërojnë mbrapsht për Tiranën, për Shqipërinë dhe për të ardhmen tonë”, u shpreh Ristani.

Një spektakël fishekzjarrësh ndriçoi Tiranën gjatë momentit të ndërrimit të viteve.

Viti i Ri 2026 u prit me spektakël fishekzjarresh edhe në qytete të tjera të vendit.

Agjencia Telegrafike Shqiptare uron të gjithë shqiptarët kudo që ndodhen, për një vit sa më të mbarë e të begatë.

1 nga 6

/gj.m/a.f/

The post Viti i Ri mirëpritet me spektakël fishekzjarresh në Shqipëri. ATSH ju uron Gëzuar 2026-ën! appeared first on Agjencia Telegrafike Shqiptare.

TIRANË, 1 janar /ATSH/  Dy vajza janë bebet e para që erdhën në jetë në orët e para të vitit 2026 në kryeqytet.

Njëra prej tyre lindi në maternitetin “Mbretëresha Geraldinë”, ndërsa tjetra në maternitetin “Koço Gliozheni”.

Kryeministri Edi Rama u uroi mirëseardhjen foshnjeve të para të vitit 2026,

/gj.m/

The post Dy vajza, bebet e para të lindura në 2026-ën appeared first on Agjencia Telegrafike Shqiptare.

STAMBOLL, 31 dhjetor /ATSH-AA/ – Presidenti turk, Recep Tayyip Erdogan, deklaroi se Turqia nuk do ta tolerojë dhunën, piraterinë apo kërcënimet ndaj interesave të saj dhe të popullit turk qipriot në Mesdheun Lindor.

Në një mesazh të Vitit të Ri, ai theksoi se Ankaraja monitoron nga afër çdo provokim dhe do të veprojë për të mbrojtur atdheun blu të saj.

Erdogan u shpreh optimist për zhvillimet ekonomike, duke vënë në dukje përparimin në procesin e dezinflacionit, forcimin e rezervave të Bankës Qendrore dhe rritjen e prodhimit, investimeve, punësimit dhe eksportit.

Ai gjithashtu përmendi projektin e madh të banesave sociale, që synon të ndihmojë qytetarët me të ardhura të ulëta dhe të ulë çmimet e banesave.

Presidenti kujtoi gjithashtu dëmet nga tërmetet e 6 shkurtit 2023 dhe përparimin e bërë në rindërtimin e qyteteve të goditura, duke falënderuar punëtorët dhe bamirësit që kontribuan në këtë proces.

Në aspektin rajonal, Erdogan nënvizoi mbështetjen e Turqisë për Sirinë dhe Gazën, duke theksuar kthimet vullnetare të sirianëve dhe përpjekjet për ndihmë humanitare në Gaza, si dhe rolin e Ankarasë në ruajtjen e armëpushimit dhe fillimin e rindërtimit.

Ai gjithashtu foli për përparimin e procesit të “Turqisë pa terror” dhe për bashkëpunimin e Aleancës Popullore, duke theksuar se qeveria do të bëjë gjithçka për të siguruar suksesin e këtij procesi.

Erdogan përfundoi mesazhin me një falënderim për qytetarët dhe mbështetësit e vizionit të Shekullit të Turqisë, duke uruar një Vit të Ri të begatë për vendin, rajonin dhe gjithë njerëzimin./  /Ad.Ab./ a.jor.

The post TURQI – Erdogan: Nuk do të tolerojmë provokime dhe kërcënime në Mesdheun Lindor appeared first on Agjencia Telegrafike Shqiptare.

VILNIUS, 31 dhjetor /ATSH-DPA/ –  Lituania planifikon të blejë sisteme portative të mbrojtjes ajrore “RBS 70 NG” me vlerë mbi 320 milionë euro (375 milionë dollarë), për të forcuar kapacitetet e saj mbrojtëse, njoftoi sot Ministria e Mbrojtjes.

Sipas deklaratave të ministrisë dhe kompanisë suedeze “Saab”, me të cilën është nënshkruar kontrata, marrëveshja, së bashku me kontrata të mëparshme, garanton furnizim të vazhdueshëm të Forcave të Armatosura të Lituanisë me këtë armatim për periudhën 2026–2032.

“Forcimi i mbrojtjes ajrore është një nga prioritetet tona kryesore”, deklaroi ministri i Mbrojtjes, Robertas Kaunas.

Lituania tashmë disponon sisteme “RBS 70”, një sistem i mbrojtjes ajrore me rreze të shkurtër veprimi, i cili lejon goditje efektive të objektivave ajrore si ditën ashtu edhe natën.

Sipas ministrisë, ky sistem u zgjodh për shkak të mirëmbajtjes së lehtë, lëvizshmërisë së lartë dhe avantazheve të tjera teknike.

Qeveria kishte njoftuar para Krishtlindjeve se planifikonte të blinte gjithashtu municione antitank dhe granatahedhës njëpërdorimësh, po ashtu nga kompania “Saab”.

Lituania, e cila kufizohet me enklavën ruse të Kaliningradit dhe me Bjellorusinë, aleate të Rusisë, e sheh luftën e Kremlinit në Ukrainë si një kërcënim të drejtpërdrejtë.

Që nga nisja e pushtimit të plotë rus të Ukrainës në vitin 2022, Vilniusi dhe kryeqytetet e tjera baltike kanë rritur ndjeshëm kapacitetet e tyre mbrojtëse.

Lituania pritet të shpenzojë vitin e ardhshëm 5,38% të prodhimit të brendshëm bruto për mbrojtjen./  /Ad.Ab./ a.jor.

The post VILNIUS – Lituania blen raketa suedeze për mbrojtje ajrore appeared first on Agjencia Telegrafike Shqiptare.

KIEV, 31 dhjetor /ATSH-DPA/ – Dronë ukrainas kanë goditur dhe i kanë vënë flakën një depoje të madhe karburanti në rajonin Yaroslavl në verilindje të Moskës, thanë sot zyrtarët e shërbimit sekret në Kiev.

”Terminali ‘Temp’ në qytetin e Rybinskut është pjesë e rezervave strategjike të Rusisë dhe sulmi kishte në shënjestër asetet thelbësore për pushtimin e Ukrainës nga Moska”, tha shërbimi sekret SBU.

“SBU vazhdon të prishë zinxhirët e furnizimit të produkteve ruse të naftës si jashtë vendit ashtu edhe për trupat që sulmojnë Ukrainën me saktësi kirurgjikale”, citoi agjencia e lajmeve Ukrinform një zyrtar të paidentifikuar.

Agjencia publikoi një video që tregonte një zjarr të madh pas shtëpive të mbuluara me borë, megjithëse vendndodhja e saktë nuk mund të identifikohej.

Nuk pati asnjë koment nga pala ruse mbi raportin ukrainas. Yaroslavl ndodhet rreth 280 kilometra në verilindje të Moskës dhe më shumë se 800 kilometra nga Ukraina.

Dronët ukrainas sulmuan gjithashtu sot objektiva të tjerë brenda Rusisë.

”Në rajonin jugor të Krasnodarit, një zjarr shpërtheu në rafinerinë e naftës në portin Tuapse të Detit të Zi, sipas stafit operativ lokal. Zjarri u shua”, thanë zyrtarët./ /Ad.Ab./ a.jor.

The post KIEV – Ukraina sulmon me dronë terminalin e naftës në veri të Moskës appeared first on Agjencia Telegrafike Shqiptare.

UASHINGTON, 31 dhjetor /ATSH-AFP/ – Shtetet e Bashkuara i kanë dhënë një licencë të përkohshme kompanisë serbe të naftës NIS, e kontrolluar nga kompanitë ruse dhe subjekt i sanksioneve të SHBA-së, duke i lejuar asaj të rifillojë prodhimin deri më 23 janar, njoftoi sot ministrja serbe e Energjisë, Dubravka Djedoviç Handanoviç.

“NIS ka marrë një licencë nga OFAC (Zyra e Kontrollit të Aseteve të Huaja të Thesarit të SHBA-së) e cila i lejon asaj të vazhdojë operacionet deri më 23 janar. Kjo do të thotë që rafineria e Pançevos do të jetë në gjendje të rifillojë operacionet pas 36 ditësh”, deklaroi ministrja serbe në Instagram.

Pas nëntë muajsh shtyrjesh të njëpasnjëshme, Uashingtoni vendosi sanksione ndaj NIS më 9 tetor.

NIS është 56% në pronësi të kompanive ruse ”Gazprom Neft” dhe ”Intelligence”.

Rafineria e saj në Pançevo, pranë Beogradit, e cila furnizon afërsisht 80% të tregut serb, u detyrua të ndalonte prodhimin në fillim të dhjetorit./  a.jor.

The post FOKUS – SHBA i jep licencë të përkohshme kompanisë serbe të naftës NIS, të kontrolluar nga Rusia appeared first on Agjencia Telegrafike Shqiptare.

ATHINË, 31 dhjetor /ATSH-ANA/ – Një takim mbarëkombëtar i fermerëve të sektorit parësor do të mbahet të dielën, më 4 janar, në orën 12:00, në Malgara, për të vendosur hapat e radhës të mobilizimeve të tyre.

Lajmin e bëri të ditur Kostas Rouzios, përfaqësues i një shoqate fermerësh në Selanik.

Takimi do të zhvillohet në ambientet e Qendrës Kulturore të Malgaras.

Ndërkohë, fermerët vazhdojnë të qëndrojnë në bllokadat në Thesalinë perëndimore, ndërsa në rrjetin rrugor kombëtar janë vendosur devijime të qarkullimit për të lehtësuar lëvizjen e udhëtarëve gjatë festave.

Policia greke publikoi një njoftim lidhur me bllokadat e fermerëve, duke informuar për devijimet e trafikut dhe duke sugjeruar rrugë alternative për qytetarët që udhëtojnë në aksin Athinë–Selanik. Gjithashtu, Policia ka publikuar edhe një video nga autostrada Athinë–Lamia, ku shfaqet bllokada e fermerëve në zonën e Kastro-Beotisë. /Ad.Ab./ a.jor.

The post GREQI – Fermerët protestues në takim mbarëkombëtar appeared first on Agjencia Telegrafike Shqiptare.

BANGKOK, 31 dhjetor /ATSH-AFP/ – Një mace me kokë të sheshtë, një specie shumë e rrallë felini e konsideruar si “ndoshta e zhdukur” në Tajlandë, është filmuar nga kamera-kurth në një sanktuar të jetës së egër në jug të vendit, gati tri dekada pas shikimit të fundit.

Lajmi u bë i ditur të  nga autoritetet e zonave të mbrojtura dhe nga organizata joqeveritare për ruajtjen e felinëve, “Panthera”.

Macet me kokë të sheshtë, që kanë madhësinë e një maceje shtëpiake, renditen ndër felinët e egër më të rrallë dhe më të rrezikuar në botë.

Kjo specie, e përhapur në Azinë Juglindore, kërcënohet seriozisht nga humbja e habitatit natyror.

Sipas Departamentit tajlandez të Parqeve Kombëtare, Jetës së Egër dhe Bimësisë, si dhe organizatës “Panthera”, një studim ekologjik i nisur në vitin 2024 ka regjistruar 29 vëzhgime përmes kamerave-kurth.

“Ky rizbulim është njëkohësisht emocionues dhe shqetësues”, tha Kaset Sutasha, veteriner dhe studiues në Universitetin Kasetsart, duke theksuar se fragmentimi i habitatit e ka bërë këtë specie gjithnjë e më të “izoluar”.

Ende nuk është e mundur të përcaktohet numri i saktë i individëve, pasi kjo specie nuk ka shenja dalluese të qarta, gjë që e vështirëson numërimin.

”Megjithatë, vëzhgimet sugjerojnë një përqendrim relativisht të lartë të maceve me kokë të sheshtë”, deklaroi Rattapan Pattanarangsan, përgjegjës i programit të ruajtjes në Panthera.

Pamjet tregojnë një femër me kotelen e saj – një shenjë e rrallë dhe inkurajuese për këtë specie, e cila zakonisht lind vetëm një kotele në çdo herë.

Sipas Unionit Ndërkombëtar për Ruajtjen e Natyrës (IUCN), në mbarë botën kanë mbetur rreth 2 500 mace me kokë të sheshtë.

Në Tajlandë, kjo specie ishte klasifikuar si e zhdukur./  /Ad.Ab./  a.jor.

The post Rizbulim i rrallë në Tajlandë i një maceje kokësheshtë, e konsideruar e zhdukur appeared first on Agjencia Telegrafike Shqiptare.

KIEV, 31 dhjetor /ATSH-DPA/ – Presidenti ukrainas, Volodymyr Zelensky theksoi besimin e tij për paqen në Ukrainë, në mesazhin e tij të Vitit të Ri.

”Viti i kaluar u karakterizua nga besnikëria dhe vendosmëria, parimet dhe puna e përditshme e ukrainasve”, tha ai në Facebook dhe X.

“Ky vit ishte i mundur falë mbrojtësve tanë”, tha ai, duke falënderuar ata që luftuan jo vetëm në emër të Ukrainës, por për të gjithë ata që vlerësojnë lirinë dhe dinjitetin.

”Ukrainasit po ecnin përpara së bashku me atë që na mban të bashkuar: përvoja dhe kujtesa, gjuha jonë amtare, shpresa dhe besimi”, tha Zelensky në postimet, të shoqëruara me një fotografi të tij duke qëndruar së bashku me gruan e tij Olena para një peme të dekoruar.

“Ne besojmë në paqe, do të luftojmë për të dhe do të punojmë për të”, tha ai.

Toni i fjalimit ishte në kontrast me atë të presidentit rus Vladimir Putin, i cili shprehu besim në fitoren në luftën e Ukrainës në mesazhin e tij të Vitit të Ri.

“I përgëzoj luftëtarët dhe komandantët tanë për fillimin e Vitit të Ri! Ne besojmë tek ata dhe në fitoren tonë”, tha Putin./  a.jor.

The post KIEV – Zelensky: Shpresë dhe besim në fitore për Vitin e Ri appeared first on Agjencia Telegrafike Shqiptare.

TIRANË, 31 dhjetor /ATSH/ Kryeministri Edi Rama iu drejtua sot qytetarëve me mesazhin e fundvitit, duke reflektuar mbi arritjet e Shqipërisë gjatë vitit që po mbyllet dhe përgjatë dekadës së fundit.

Në fjalën e tij drejtuar bashkëqytetarëve kudo ku ndodhen, Rama theksoi transformimin e vendit në shumë sektorë kyç, nga integrimi europian dhe infrastruktura, te digjitalizimi, energjia dhe turizmi, ndërsa nënvizoi se e ardhmja e Shqipërisë është më e sigurt dhe më premtuese se kurrë më parë.

Mesazhi i Kryeministrit Edi Rama për Vitin e Ri 2026 

Të dashur bashkëqytetarë e bashkëqytetare, kudo ku jeni,

Ja edhe një vit tjetër mbërriti tek dera për të dalë, duke e lënë Shqipërinë më lart, se në ditën kur hyri.

Gjatë rrugëtimit të këtij viti, shumica prej jush, në Shqipëri, Europë, gjetkë nëpër botë, e bekoi përpjekjen e përbashkët të dekadës së fundit, duke i dhënë qeverisë sonë, fuqinë e jashtëzakonshme të 83 mandateve.

Faleminderit edhe njëherë nga unë sot, për atë fuqi me të cilën falë jush, unë dhe të zgjedhurit tuaj do të bëjmë për Shqipërinë, në katër vitet e ardhshme, gjithçka duhet që ta ngremë flamurin tonë kombëtar, në oborrin e Shtëpisë së Bashkimit Europian.

Në një dekadë kemi bërë çfarë nuk imagjinohej kur nisi numërimi i viteve tona në qeverisje.

Kemi bërë realitet një Shqipëri tjetër, ku këtë vit u mblodhën krejt udhëheqësit e Europës Demokratike, nga Parisi në Ankara, dhe nga Kievi në Londër për të diskutuar të nesërmen e kontinentit tonë.

Një Shqipëri tjetër, ku për 18 muaj do të mblidhen të gjithë udhëheqësit e NATO-s, për Samitin vjetor të Aleancës, që plot vende të tjera, të cilat kanë hyrë në NATO, kohë përpara nesh, ende s’e kanë patur privilegjin ta mikpresin.

Një Shqipëri tjetër, e cila ndryshe nga jo shumë vite më parë, nuk ia ul më kokën asnjë shqiptari kur del jashtë kufijve të saj, prej ku tanimë vërshojnë drejt këtij vendi miliona e miliona turistë.

Një Shqiperi tjetër, më e prekshme se kurrë në çdo skaj të saj, me Dibrën e kthyer në zgjatim të Tiranës, falë rrugës së Arbrit; me Vermoshin, Thethin e Valbonën, të kthyera në destinacione turistike, falë kthimit të shtigjeve të vjetra të dhive në akse me standarte europiane; me Shkodrën e rilindur, falë kthimit të shpresës dhe rikthimit të turizmit si burim ekonomie i tharë qysh prej viteve ’30; me Lezhën, Beratin, Korçën, Pogradecin, Gjirokastrën, Përmetin, Tepelenën, Kolonjën, e me radhë, të kthyera në qytete të rilindura e fshatra rrotull tyre, ku vejevijnë njerëz nga Shqipëria e mbarë bota dhe hapen për t’i mikpritur, dyer pas dyersh, e ku numrat e turistëve, kanë arritur në shifra që nuk imagjinoheshin kur nisi kjo dekadë; me luginën e Lumit të Vlorës, të kthyer në një aks panoramik i Shqipërisë tjetër, ku të tjera e të tjera akse të reja, autostradash, rrugësh, tunelesh të hapur në veri e në jug, me standarde europiane e ritëm të pandalur gjatë këtyre viteve, i kanë dhënë kësaj Shqipërie, jo thjesht infrastrukturë më të mirë, po energjinë ripërtëritëse të një vendi në ngjitje.

Të gjithë këtë transformim, që vazhdon e do të vazhdojë pa ndalim, me kantiere të hapura e projekte të reja, drejt Shqipërisë 2030 në Bashkimin Europian, nuk e solli koha siç thonë disa, nuk e sollën as alienët apo bandat siç bërtasin disa të fantaksur të tjerë, po e solli forca jonë qeverisëse, besimi juaj tek ne dhe besimi ynë i përbashkët tek Shqiperia, e solli puna pa orar e mijëra e mijëra njerëzve, e ministrisë, agjencive shtetërore dhe kompanive private, përpjekja e madhe në shumë frontet e betejës për Shqipërinë Europiane, ku të metat, dobësitë, gabimet apo edhe rrëshqitjet ose mëkatet e disave brenda nesh, nuk e zvogëlojnë dot kurrsesi përmasën historike të një transformimi të tillë.

Kjo është një Shqipëri tjetër, edhe falë kthimit të infrastrukturës digjitale nga një dorë kioskash me internet, në një shtyllë qeverisëse me maturitet të lartë, siç e vlerësojnë organizmat më prestigjozë ndërkombëtarë të fushës.

Një Shqipëri që tre vitet e fundit ka ngjitur plot 54 vende, duke u renditur e 14-ta ndër 197 vende të botës për qeverisjen digjitale dhe duke vendosur në dispozicion të qytetarëve, një platformë shërbimesh publike në kohë reale, falas nga çdo cep i globit.

E-Albania u ka kursyer shqiptarëve 620 milione euro dhe 7500 vjet radha nëpër sportele, ose e thënë ndryshe, një radhë të gjatë sa 25 mijë rrotullime rreth tokës.

Kjo është një Shqipëri tjetër, e cila pas sulmit terrorist kibernetik mbi pikërisht këtë infrastrukturë moderne digjitale, ngriti një nga muret më të fortë të mbrojtjes kibernetike në Europë, ku deri më sot kanë dështuar të gjitha sulmet e vazhdueshme që kanë ardhur e vazhdojnë të vijnë më pas e askush nuk flet për to.

Një Shqipëri tjetër, e shërbyer në këto vite transformimi me dijen dhe përkushtimin e skuadrave të AKSHI-t e të AKCESK-ut, ku vajza e djem të talentuar, e kanë rritur vit pas viti aftësinë e këtij shteti për t’u shërbyer njerëzve dhe vendit, duke e bërë Shqipërinë një histori suksesi edhe ndërkombëtarisht.

Kjo është një Shqipëri tjetër, e dalë nga errësirat kronike të ikjes së dritave, falë vizionit, projekteve e punës këmbëngulëse të mbështetur nga investime të vazhdueshme, që kanë transformuar krejt panoramën e sektorit, duke rritur kapacitetet prodhuese, diversifikuar burimet e energjisë së rinovueshme, ulur çmimin për konsumatorët familjarë, e duke u ngjitur vit pas viti drejt majës së sovranitetit energjetik, të cilën do ta mbërrijmë brenda këtij mandati për të mos harxhuar më asnjë qindarkë për të importuar energji nga jashtë.

Kjo Shqipëri tjetër, nuk ka asnjë lidhje me Shqipërinë e pikënisjes së kësaj dekade, kur ishim të shpërfillurit e damkosur të Europës.

Ky vit mbyllet për Shqipërinë, jo vetëm me negociatat e anëtarësimit të hapura në çdo kapitull, po edhe me ngjitjen e Shqipërisë në pozicionin e të ashtuquajturit front-runner, pararendës, i procesit të integrimit të Ballkanit Perëndimor në Bashkimin Europian.

As këtë rezultat shembullor, fantastik për emrin e vendit tonë dhe për dinjitetin e kombit tonë, nuk e solli koha, por përkushtimi i ekipit kombëtar të negociatave dhe dija, puna, këmbëngulja e më shumë se 1000 patriotëve publikë në ministritë e në institucionet e pavarura të shtetit shqiptar.

Dekada e fundit ka qenë për Shqipërinë dhe shqiptarët, një kohë me një shpejtësi të re shqiptare, një përpjekje e madhe për të fituar kohën e humbur të një tranzicioni të çartur përplasjesh me muret e prapambetjes, një projekt kombëtar reformash transformuese për të hapur rrugën e të vërtetës sonë si popull europian, që meriton të ulet në sofrën e përbashkët europiane.

Nuk është sot gjëkundi koha për një nga ato fjalimet e mia të gjata. Ky është momenti për mua qe t’ju siguroj se kohën e re të Shqipërisë nuk e kthen dot më mbrapsht askush dhe se më e mira është e gjitha përpara për Shqipërinë dhe shqiptarët; që t’ju garantoj se viti i ardhshëm e ata pas tij, do të sjellin edhe me shumë frute se sa ka sjellë deri më sot puna transformuese e kësaj dekade dhe që t’ju uroj gëzuar, kudo ku jeni, me këdo që keni pranë, e me shëndet dhe mbarësi në vitin që po hyn në derë.

Gëzuar!

/gj.m/a.f/r.e/

The post Rama uron Vitin e Ri 2026: Pa ndalim drejt Shqipërisë në BE në 2030-ën appeared first on Agjencia Telegrafike Shqiptare.

TIRANË, 31 dhjetor /ATSH/ Kryetari i grupit parlamentar të Partisë Socialiste dhe drejtues politik për diasporën, Taulant Balla ka përcjellë sot një urim me video për shqiptarët kudo që ndodhen, nga sheshi “Skënderbej” në Tiranë, vetëm pak orë para ndërrimit të viteve.

Në mesazhin e tij, Balla uroi Gëzuar Vitin e Ri 2026 për shqiptarët në Shqipëri, në trojet etnike dhe veçanërisht për bashkatdhetarët në diasporë, duke theksuar rolin historik të votës së emigrantëve gjatë vitit 2025.

“U takon vëllezërve e motrave tanë në diasporë një urim i veçantë, edhe për shkak se gjatë vitit 2025 ata patën mundësinë për herë të parë në këto 35 vite demokraci të shprehen me votë për drejtimin që ata duan të ecë Shqipëria. Vota e bashkatdhetarëve në diasporë në vitin 2025 ishte pa dyshim një moment historik për Shqipërinë”, tha ai.

Sipas Ballës, gjatë vitit 2026 do të intensifikohen kontaktet me diasporën, si dhe angazhimet për ruajtjen e gjuhës dhe identitetit kombëtar.

“Ne dimë ta lexojmë shumë mirë votën e tyre dhe padyshim që gjatë vitit 2026 do të vazhdojmë të intensifikojmë kontaktet tona me gjithë shqiptarët që jetojnë në diasporë dhe të sigurojmë që çdo fëmijë shqiptar që lind në diasporë të ketë mundësinë të mësojë gjuhën shqipe”, u shpreh Balla.

Mesazhi u shoqërua me përqafime vëllazërore dhe mirënjohje në prag të Vitit të Ri nga sheshi “Skënderbej”, simboli i unitetit kombëtar.

“Dua që shqiptarëve në Itali, në Greqi, në Gjermani, në Britaninë e Madhe, në Shtetet e Bashkuara të Amerikës, në Kanada, apo kudo gjetkë nëpër botë, t’i uroj: Gëzuar Festat e Fundvitit, me mirënjohjen më të thellë dhe me përqafime vëllazërore nga sheshi i shqiptarëve, sheshi ‘Skënderbej’!”, theksoi Balla.

/gj.m/r.e/a.f/

The post Balla: Gjatë 2026-ës intensifikim i kontakteve me diasporën appeared first on Agjencia Telegrafike Shqiptare.