KIEV, 14 janar /ATSH/ – Sigurisht që dua që e gjithë kjo të përfundojë sa më shpejt, por… më duket se do të vazhdojë edhe për një kohë. deklaroi një ushtar ukrainas, pranë një pozicioni afër frontit, majin e kaluar, i cili dha vetëm emrin e tij, Petro.

“Nuk do të ketë armëpushim… Gjithçka tregon se lufta do të vazhdojë”, tha një tjetër pjesëtar i njësisë së tij, Oleksandr. Ai shtoi se, të paktën, Rusia dukej e vendosur të merrte pjesën e rajonit ukrainas të Donjeckut, që mbetet nën kontrollin e Kievit.

Tetë muaj më vonë, nuk ka armëpushim, e lëre më një paqe të qëndrueshme. Rusia, pavarësisht luftimeve intensive dhe vdekjeprurëse, nuk ka arritur ta pushtojë Donjeckun në tërësi — një nga objektivat e saj themelore — dhe analistët thonë se konflikti më i madh në Evropë që nga Lufta e Dytë Botërore ka pak gjasa të përfundojë në vitin 2026.

“Asnjë nga kushtet për një zgjidhje përfundimtare të konfliktit nuk është në vend”, i tha REL-it Ruth Deyermond, pedagoge e lartë në Departamentin e Studimeve të Luftës në King’s College London. “As Ukraina dhe as Rusia nuk duken në një pozitë për të arritur një fitore përfundimtare në fushëbetejë dhe, megjithëse të dyja janë nën presion të konsiderueshëm, asnjëra nuk duket se ka gjasa të shembet”.

Presidenti rus, Vladimir Putin, nisi pushtimin e plotë të Ukrainës më 24 shkurt 2022, me pritjen që Ukraina do të nënshtrohej shpejt. Gati katër vjet më vonë, forcat ruse mbajnë më pak territor ukrainas sesa në javët e para të sulmit.

Në këmbë, me motorë dhe madje edhe me kuaj kur balta pengon mjetet, ato po përparojnë ngadalë dhe me një kosto të jashtëzakonshme në viktima — por Kievi ende kontrollon pjesë të mëdha të Donjeckut, Zaporizhias dhe Hersonit, tre nga pesë rajonet ukrainase që Moska pretendon pa bazë se tani janë ruse.

Në të dyja palët së bashku, lufta ka vrarë ose plagosur më shumë se 1.5 milion luftëtarë, sipas vlerësimeve të inteligjencës perëndimore. Sulmet ajrore të pandërprera ruse në mbarë Ukrainën kanë vrarë ose plagosur dhjetëra mijëra civilë dhe kanë shkatërruar infrastrukturën energjetike dhe elektrike të vendit.

Pengesa kryesore për paqen në vitin 2026 është Rusia, e cila “duket se nuk ka asnjë interes për t’i dhënë fund luftimeve, e lëre më luftës”, tha Deyermond.

Presidenti amerikan, Donald Trump, e nisi mandatin e tij të dytë në janar të vitit të kaluar duke e pasur ndërmjetësimin për t’i dhënë fund luftës lart në agjendën e tij. Në një vorbull diplomacie gjatë muajve të fundit, Ukraina, mbështetësit e saj evropianë dhe Shtetet e Bashkuara janë afruar drejt një marrëveshjeje për një plan paqeje.

Qëndrime të ashpra

Megjithatë, shanset për sukses janë errësuar vazhdimisht nga pyetja nëse Rusia do të bënte ndonjë lëshim në çështje kyçe si territori — veçanërisht në Donbas, por edhe gjetkë — dhe qëndrimi i saj ndaj garancive të sigurisë për Kievin, veçanërisht kur bëhet fjalë për praninë e mundshme të ushtarëve perëndimorë në terren në Ukrainë. Mosmarrëveshjet për centralin bërthamor të Zaporizhias, të pushtuar nga Rusia, janë një tjetër pikë ngecjeje.

Javët në vijim mund të sjellin më shumë qartësi “teksa negociatat e paqes stabilizohen. Duket se SHBA-ja, Ukraina dhe Evropa mund të gjejnë gjuhë të përbashkët, por Rusia nuk është e gatshme të bëjë lëshime”, i tha REL-it Mark Cancian, ekspert ushtarak në Qendrën për Studime Strategjike dhe Ndërkombëtare në Uashington. “Qëllimet e tyre të deklaruara janë krejtësisht të papranueshme për cilëndo nga palët e tjera. Këmbëngulja e tyre buron nga besimi se po fitojnë”.

Mes raportimeve për përparim në bisedimet e fundit që përfshijnë Ukrainën dhe Perëndimin, Rusia, nëse ka sinjalizuar diçka, ka treguar një vijë edhe më të ashpër.

Në fakt, zëdhënësi i Kremlinit, Dmitry Peskov, deklaroi hapur se Moska do ta “ashpërsojë [pozicionin e saj] negociues” pasi Rusia akuzoi Ukrainën për nisjen e një sulmi të madh me dronë ndaj një prej rezidencave të Putinit. Kievi e mohoi këtë, dhe Trump — pasi fillimisht sugjeroi se e besonte kur Putini ia tha këtë në një bisedë telefonike — më vonë përsëriti përfundimin e CIA-s se as presidenti rus dhe as rezidenca e tij nuk ishin shënjestruar.

Putini përdori një konferencë për shtyp më 19 dhjetor, një fjalim të Vitit të Ri dhe një paraqitje gjatë Krishtlindjeve Ortodokse për të sinjalizuar se Rusia është e përqendruar te fitorja, jo te paqja. Ai lavdëroi ushtarët rusë në fjalimet e tij më 31 dhjetor dhe më 7 janar, kur tha se ata ishin në një “mision të shenjtë”, si ai i Jezu Krishtit. Ai nuk përmendi paqen.

“Pozicioni parazgjedhor i Putinit mbetet vazhdimi i luftës, bazuar në operacionet në terren dhe udhëzimet për komandantët e tij, të cilët mbeten të përkushtuar ndaj operacioneve sulmuese kundër të katër rajoneve ukrainase [që Rusia pretendon përveç Krimesë] — Luhansk, Donjeck, Zaporizhia, Herson — në vitin 2026”, tha Dara Massicot, bashkëpunëtore e lartë në Carnegie Endowment for International Peace dhe eksperte për ushtrinë ruse.

“Putini vazhdon të pretendojë ‘Donbasin dhe Novorossiyan’”, tha ajo, duke vënë në dukje se ai përdori një term polemik që i referohet sundimit të Rusisë perandorake mbi pjesë të mëdha të Ukrainës lindore dhe jugore.

Sigurisht, Putini njihet për retorikë të ashpër dhe nuk është i panjohur për përdorimin e fjalëve bombastike publike për të fshehur një qasje më pragmatike ose të nuancuar, shkruan REL.  /os/

The post KOMENT – A ka gjasa të përfundojë këtë vit lufta Rusi-Ukrainë? appeared first on Agjencia Telegrafike Shqiptare.

BRUKSEL, 14 janar /ATSH-DPA/-  Në një intervistë për “Euronews”, presidentja e Parlamentit Evropian Metsola tha se BE-ja nuk duhet të presë që Trump të ndërmarrë veprime të shpejta kundër regjimit iranian – nga sanksionet deri te përcaktimi i Gardës Revolucionare si terroriste.

“Regjimi është në prag të fundit të jetës së tij”, theksoi Metsola.

“Udhëheqësit e BE-së duhet të rrisin presionin mbi regjimin iranian ndërsa ai shtyp protestuesit”, tha Metsola.

Sipas saj, BE është e tronditur nga ajo që po ndodh në Iran dhe nuk mund të rrijë duarkryq kur shohin se regjimi po përdor dhunën dhe shtypjen.

Presidentja e Parlamentit Evropian, Roberta Metsola, u bëri thirrje udhëheqësve të BE-së të rrisin presionin mbi regjimin iranian, duke shtuar se ditët e diktatorëve do të merrnin fund në vitin 2026.

“Jemi të tmerruar nga ajo që po ndodh në Iran dhe nuk mund të qëndrojmë duarkryq kur shohim se regjimi po përdor dhunë, represion dhe abuzim për të shtypur ato që ne i besojmë të jenë liri themelore”, tha ajo.

Këtë javë, shefja e Parlamentit Evropian ndaloi diplomatëT iranianë të hynin në ambientet e parlamentit.

Ajo gjithashtu i ka bërë thirrje BE-së të zbatojë një përgjigje të shpejtë ndaj shtypjes së dhunshme të protestuesve në Iran, të cilën unioni ndërkombëtar, e quajti një vijë të kuqe.

Grupet civile kanë raportuar më shumë se 2 000 të vrarë. //a.i/

The post BRUKSEL – Metsola bën thirrje për masa të shpejta kundër regjimit iranian appeared first on Agjencia Telegrafike Shqiptare.

TIRANË, 14 janar /ATSH/ Tirana e ka nisur vitin 2026 me fitore në kampionatin e Kategorisë Superiore.

Bardheblutë triumfuan 0-1 në transfertë ndaj Bylisit, në ndeshjen e vlefshme për javën e 19-të, të zhvilluar në stadiumin “Adush Muça”.

Takimi u karakterizua nga lojë e luftuar, me raste për të dyja skuadrat, por pjesa e parë u mbyll pa gola. Në fraksionin e dytë, Tirana gjeti avantazhin pas një penalltie të fituar nga Redon Xhixha. Nga pika e bardhë, Rafael u tregua i saktë, duke shënuar golin e vetëm të takimit.

Skuadra kryeqytetase administroi avantazhin deri në fund, duke siguruar tre pikë të rëndësishme. Kjo ishte fitorja e parë për trajnerin Ardian Nuhiu në drejtimin e Tiranës.

Pas këtij suksesi, Tirana mbetet në vendin e fundit të renditjes me 13 pikë, duke vijuar luftën për mbijetesë. Bylisi, me pesë pikë më shumë, renditet në vendin e tetë të klasifikimit.

/gj.m/j.p/

The post Tirana fiton në Ballsh ndaj Bylisit, Nuhiu merr suksesin e parë appeared first on Agjencia Telegrafike Shqiptare.

GJENEVË, 14 janar /ATSH-ANSA/ – Taksa deri në 50% deri në vitin 2035. Është kjo kërkesa e Organizatës Botërore e Shëndetësisë e cila vazhdon të kërkojë taksa më të larta mbi alkoolin, pijet me sheqer dhe duhanin, tre produkte të dëmshme për shëndetin, shkruan salute.eu.

Sipas OBSH ritja e taksave zvogëlon konsumin, pasuron arkën qeveritare dhe i dekurajon të rinjtë që të fillojnë.

Megjithatë, çmimet e alkoolit dhe pijeve me sheqer po bien, pjesërisht për shkak të politikave në shumë vende të cilat theksojnë se përdorimi i tyre çon në sëmundje: diabeti i tipit 2, sëmundjet kardiovaskulare, obeziteti dhe kanceri.

Rritja e taksave për të rritur koston e këtyre produkteve është mënyra e duhur për të ulur shpejt konsumin dhe për të ndaluar përhapjen e sëmundjeve në zhvillim – sëmundje që mund të shmangen me stile jetese të shëndetshme.

Lidhja midis pijeve me sheqer dhe diabetit mund të varet nga mikrobioma e zorrëve.

Kjo është arsyeja pse OBSH po propozon taksa deri në 50% deri në vitin 2035.

Dy Raportet Globale të publikuara së fundmi, të paraqitura nga Drejtori i Përgjithshëm i OBSH-së Tedros Adhanom Ghebreyesus, flasin qartë: Taksat duhet të përshtaten me kontekstin e secilit vend, ato janë e vetmja mënyrë e zbatueshme për të ulur kostot njerëzore të sëmundjeve të parandalueshme duke ulur ndjeshëm, nëse jo duke i eliminuar, këto tre produkte nga jeta e banorëve të planetit.

“Taksat janë një nga mjetet më me ndikim që kemi për të promovuar shëndetin dhe për të parandaluar sëmundjet”, theksoi Ghebreyesus.

‘’Duke i rritur ato në produkte si duhani, alkooli dhe pijet me sheqer, qeveritë jo vetëm që mund të zvogëlojnë konsumin e pashëndetshëm, por edhe të zhbllokojnë fonde për shërbimet thelbësore shëndetësore. Nuk është një zgjidhje e lehtë, por është rruga më efektive’’, shton ai.  /os/

The post FOKUS – OBSH: Rritni taksat mbi alkoolin, duhanin dhe pijet me sheqer appeared first on Agjencia Telegrafike Shqiptare.

BANGKOK, 14 janar /ATSH-DPA/- Të paktën 30 persona u vranë dhe dhjetëra të tjerë u plagosën sot, pasi një tren pasagjerësh doli nga shinat në Tajlandën verilindore, kur një vinç i madh çeliku u shemb gjatë punimeve hekurudhore, thanë shërbimet e shpëtimit dhe autoritetet.

Shkaku i saktë i aksidentit mbeti i paqartë disa orë pas incidentit.

Raportet fillestare thanë se vinçi kishte rënë mbi shina, disa sekonda përpara se të mbërrinte treni, duke shkaktuar një përplasje me shpejtësi.

Raportet e mëvonshme sugjeruan se vinçi mund të ishte shembur direkt mbi trenin në lëvizje.

Raportet e medias tajlandeze thanë se treni po udhëtonte me rreth 120 kilometra në orë kur vinçi u shemb.

Treni, që mbante gati 200 persona, po udhëtonte në qarkun Sikhio të provincës Nakhon Ratchasima, rreth 230 kilometra në verilindje të Bangkokut, rreth orës 9:00 të mëngjesit.

Operatori shtetëror hekurudhor në Tajlandë, SRT tha se të paktën 195 pasagjerë dhe personel ishin në bord.

Portali lokal i lajmeve “Thaiger” raportoi se shumë nga pasagjerët ishin studentë dhe udhëtarë.

Aksidenti ndodhi pranë punimeve të ndërtimit në një urë hekurudhore, pjesë e projektit hekurudhor me shpejtësi të lartë Tajlando-Kinë, i cili synon të lidhë Tajlandën me Kinën nëpërmjet Laosit dhe është pjesë e iniciativës infrastrukturore “Një Brez, një Rrugë” të Pekinit.

Raportet e medias tajlandeze thanë se materiale të tjera të rënda ndërtimi ranë gjithashtu mbi vagonët.

Disa vagona dolën nga shinat dhe të paktën një prej tyre u përfshi nga flakët.

Sipas vlerësimeve, numri i të plagosurve varion nga 55 në 80, disa prej të cilëve në gjendje të rëndë. //a.i/

The post TAJLANDË – Treni del nga shinat, të paktën 30 të vdekur appeared first on Agjencia Telegrafike Shqiptare.

TIRANË, 14 janar/ATSH/ Konferenca Ipeshkvore e Shqipërisë njoftoi se, Ati i Shenjtë, Papa Leoni XIV, emëroi sot Nuncin e ri Apostolik për Shqipërinë.

Ai është imzot Mirosław Adamczyk, Arqipeshkëv titullar i Otrikolit. Adamczyk ka shërbyer deri tani si Nunc Apostolik në Argjentinë. Mirosław Adamczyk është i datëlindjes 16 korrik 1962 (63 vjeç), dhe ka lindur në Danzica të Polonisë.

Pas marrjes së lajmit për caktimin e tij në Shqipëri, dioqezat në vend uruan nuncin dhe dhanë mesazhe mirëseardhjeje.

Nunci Apostolik është diplomati më i lartë i Selisë së Shenjtë në një vend, që përfaqëson Papën, i krahasueshëm me një ambasador. Ai menaxhon marrëdhëniet me qeverinë dhe kishën lokale. Nunci Apostolik zakonisht është një kryepeshkop titullar që kryeson Nunciaturën Apostolike, selinë diplomatike të Vatikanit.

Si ndërlidhës midis Papës dhe hierarkisë katolike lokale, ai trajton gjithashtu emërimet episkopale. Nunci Apostolik gëzon statusin diplomatik të ambasadorit, siç përcaktohet nga e drejta ndërkombëtare, kryen detyra diplomatike por edhe baritore brenda kishës. /j.p/

The post Papa Leoni XIV emëroi Nuncin e ri Apostolik për Shqipërinë appeared first on Agjencia Telegrafike Shqiptare.

TIRANË, 14 janar /ATSh/  Bashkia Berat vijon të promovojë menaxhimin e qëndrueshëm të mbetjeve përmes projektit të riciklimit, i cili ka një ndikim të drejtpërdrejtë në ekonominë lokale dhe ndërgjegjësimin qytetar.

Projekti synon të rrisë ndarjen e mbetjeve në burim, të mbështesë ekonominë qarkulluese dhe të ulet sasia e mbetjeve të depozituara në landfill, duke përfshirë qytetarët dhe bizneset në procesin e riciklimit dhe duke krijuar mundësi të reja për tregun lokal të materialeve të ricikluara.

Në kuadër të këtij projekti, u zhvillua me sukses ankandi i parë i shitjes së plastikës, ku u shiten 8,3 tonë mbetje plastike të ndara nga qytetarët dhe bizneset. Po ashtu, gjatë ankandit u shiten rreth 80 tonë karton dhe letër, duke dëshmuar funksionimin e procesit të ndarjes së mbetjeve dhe aktivitetin e ekonomisë qarkulluese.

Kryetari i Bashkisë Berat, Ervin Ceca, u shpreh se, rezultatet e këtij ankandi tregojnë se ndarja e mbetjeve në burim po funksionon; uljen e sasisë së mbetjeve në landfill dhe mbështetjen e ekonomisë qarkulluese dhe ndërgjegjësimin për riciklimin.

Sipas tij, bashkia synon që procesi të vazhdojë dhe të zgjerohet për të përfshirë më shumë qytetarë dhe biznese, duke forcuar mbrojtjen e mjedisit dhe promovuar praktika të qëndrueshme në menaxhimin e mbetjeve. /j.p/

The post Berat, shiten 8,3 tonë plastikë dhe 80 tonë karton e letër në ankandin e parë të riciklimit appeared first on Agjencia Telegrafike Shqiptare.

DOHA, 14 janar /ATSH-ANSA/ – Shtetet e Bashkuara të Amerikës i kanë  kërkuar personelit amerikan të largohen nga Baza Ajrore Amerikane al-Udeid në Katar.

Baza e Katarit është baza më e madhe amerikane në Lindjen e Mesme dhe strehon 10 000 trupa.

Në pritje të sulmeve të SHBA-së ndaj Iranit në qershor, disa personel u transferuan nga bazat amerikane në Lindjen e Mesme.   /os/

The post DOHA – SHBA transferon një pjesë të personelit të bazës në Katar appeared first on Agjencia Telegrafike Shqiptare.

TIRANË, 14 janar /ATSh/ Banka Botërore vlerëson se ekonomia shqiptare do të vijojë trendin pozitiv edhe në vitin 2026, me një rritje prej 3,5%, duke konfirmuar projeksionin e saj të mëparshëm dhe duke e pozicionuar Shqipërinë mbi mesataren e vendeve të Ballkanit Perëndimor.

Në raportin “Global Economic Prospects”, Banka Botërore parashikon se i njëjti nivel rritjeje, 3,5%, do të ruhet edhe gjatë vitit 2027, duke reflektuar qëndrueshmëri makroekonomike dhe ecuri pozitive të sektorëve kryesorë të ekonomisë.

Sipas institucionit financiar ndërkombëtar, mesatarja e rritjes ekonomike për Ballkanin Perëndimor në vitin 2026 parashikohet në 3,1%, pas një performance më të moderuar në vitin 2025. Në këtë kontekst, Shqipëria renditet ndër ekonomitë me rritje më të lartë në rajon.

Raporti evidenton se edhe Kosova pritet të regjistrojë normën më të lartë të rritjes, me 3,8% në vitin 2026 dhe 3,9% në vitin 2027. Ndërkohë, ekonomia e Serbisë, Maqedonisë së Veriut dhe Bosnje-Hercegovinës parashikohet të rritet me rreth 3%, ajo e Malit të Zi me 3,2%, ndërsa Kroacia me 2,9%.

Vlerësimet e Bankës Botërore pasqyrojnë pritshmëri pozitive për zhvillimin ekonomik të Shqipërisë, në një mjedis rajonal dhe global të karakterizuar nga pasiguri dhe ritme të moderuara rritjeje. /j.p/

The post BB: Ekonomia e Shqipërisë, rritje 3,5% në 2026 appeared first on Agjencia Telegrafike Shqiptare.

TIRANË, 14 janar /ATSh/ Drejtori i burgut të Durrësit, Indrit Cerloj është shkarkuar nga detyra nga ministri i Drejtësisë, Besfort Lamallari, pas arratisjes së të paraburgosurit Altin Ndoci, nga spitali Rajonal i Durrësit.

Gjithashtu në vijim të ngjarjes së një dite më parë, pas një analize nga Drejtoria e Përgjithshme e Burgjeve, me urdhër të Drejtorit të Përgjithshëm të Burgjeve është shkarkuar i gjithë zinxhiri komandues në IEVP Durrës.

Për këtë ngjarje, janë arrestuar edhe tetë punonjës të Policisë së Burgjeve në Durrës.

Ndaj Altin Ndocit, Gjykata e Posaçme e Shkallës së Parë për Korrupsionin dhe Krimin e Organizuar, ka caktuar masa e sigurimit “arrest me burg” për veprat penale: vrasje në rrethana cilësuese kundër dy ose më shumë personave, armëmbajtje pa leje, organizatë kriminale, kryerja e veprave penale nga organizata kriminale dhe grup i strukturuar kriminal. Ai u arratis pasi kreu një konsultë mjekësore në spitalin Rajonal të Durrësit.

/m.q/j.p/

The post Arratisja e Ndocit, shkarkohet drejtori dhe zinxhiri komandues në burgun e Durrësit appeared first on Agjencia Telegrafike Shqiptare.

TIRANË, 14 janar /ATSh/ Tetë punonjës të Policisë së Burgjeve në Durrës janë arrestuar pas arratisjes së të paraburgosurit Altin Ndoci, një ditë më parë nga Spitali Rajonal në Durrës.

Drejtoria e Përgjithshme e Burgjeve njoftoi se në bashkëpunim me Shërbimin e Kontrollit të Brendshëm në Sistemin e Burgjeve, nën drejtimin Prokurorisë pranë Gjykatës së Shkallës së Parë të Juridiksionit të Përgjithshëm Durrës, është vendosur ndalimi i shtetasve të mëposhtëm: komisar Dezdemon Pazaj, punonjës i Policisë së Burgjeve; Komisar Violeta Uka, punonjëse e Policisë së Burgjeve; kryeinspektor Dorjan Saraçi, punonjës i Policisë së Burgjeve; inspektor Sali Ferrollari, punonjës i Policisë së Burgjeve; inspektor Fatjon Braçi, punonjës i Policisë së Burgjeve; inspektor Preng Marvataj, punonjës i Policisë së Burgjeve; Kryeinspektor Aranit Çela, punonjës i Policisë së Burgjeve; kryeinfermier Aulon Quku, punonjës i IEVP Durrës.

Gjithashtu, është bërë edhe pezullimi i tyre nga detyra. Po ashtu janë pezulluar me qëllim garantimin e një procesi të rregullt ligjor dhe administrativ drejtori i IEVP-së Durrës Indrit Cerloj, Afrim Zeqiraj, shef i Policisë; Ylfete Sema, shefe e Shërbimit të Kujdesit Shëndetësor; Idajet Calamaj, punonjës i Policisë së Burgjeve.

Sipas Drejtorisë së Burgjeve rezulton se nuk janë respektuar procedurat standarde për shoqërimin e të paraburgosurve dhe të dënuarve.

Shtetasi Altin Ndoci ka qenë i akomoduar në IEVP Durrës që prej datës 20.05.2020, me masë sigurimi “arrest me burg”, pasi ndaj tij Gjykata e Posaçme e Shkallës së Parë për Korrupsionin dhe Krimin e Organizuar, ka caktuar masa e sigurimit “arrest me burg” për veprat penale: vrasje në rrethana cilësuese kundër dy ose më shumë personave, armëmbajtje pa leje, organizatë kriminale, kryerja e veprave penale nga organizata kriminale dhe grup i strukturuar kriminal.

“Më datë 13.01.2026, i paraburgosuri ka kryer konsultë mjekësore me mjekun e institucionit të vuajtjes së dënimit, i cili ka rekomanduar konsultë me mjek kirurg. Në vijim, nga strukturat përkatëse të IEVP Durrës (shërbimi shëndetësor, policia e burgjeve, sektori social dhe ai ligjor) janë hartuar aktet përkatëse dhe është planifikuar shoqërimi për vizitë mjekësore në Spitalin Rajonal Durrës, sipas itinerarit: IEVP Durrës – Spital Rajonal Durrës – kthim në IEVP, brenda së njëjtës ditë”, njoftoi drejtoria e Burgjeve.

Drejtoria e Burgjeve informoi më tej se “i paraburgosuri është paraqitur në pavijonin infektiv për marrjen e trajtimit mjekësor. Pas vizitës mjekësore nga mjeku kardiolog në Spitalin Rajonal Durrës, është rekomanduar mjekim dhe rikontroll pas 2 orësh. Gjatë kohës që ka qenë duke marrë trajtim mjekësor, shtetasi Altin Ndoci ka kërkuar të shkojë në tualet. Ai është shoqëruar nga punonjësit e Policisë së Burgjeve, por gjatë këtij momenti ka kundërshtuar dhe goditur punonjësit, duke arritur të arratiset”.

“Nga verifikimet paraprake rezulton se, për shoqërimin e planifikuar, IEVP Durrës nuk ka informuar Drejtorinë e Përgjithshme të Burgjeve dhe Komisariatin e Policisë Durrës, si dhe nuk ka raportuar në Drejtorinë e Përgjithshme të Burgjeve as planifikimin dhe as realizimin e vizitës mjekësore, në kundërshtim me aktet nënligjore në fuqi. Gjithashtu, rezulton se nuk janë respektuar procedurat standarde për shoqërimin e të paraburgosurve dhe të dënuarve”, njoftoi drejtoria e Burgjeve.

Drejtoria e Përgjithshme e Burgjeve nënvizoi se po vijon me marrjen e të gjitha masave të nevojshme ligjore dhe administrative, si dhe me forcimin e protokolleve të sigurisë në institucionet e ekzekutimit të vendimeve penale.

/m.q/j.p/

The post 8 policë të arrestuar në Durrës, nuk respektuan procedurat standarde të shoqërimit të Ndocit appeared first on Agjencia Telegrafike Shqiptare.

PARIS, 14 janar /ATSH-ANSA/ – Një shkelje e sovranitetit të Groenlandës do të kishte pasoja të pashembullta, paralajmëroi presidenti francez Emmanuel Macron, para takimit të Këshillit të Ministrave në Pallatin Elysee.

“Ne nuk i nënvlerësojmë deklaratat e Trump për Groenlandën, por nëse shkelet sovraniteti i një vendi evropian dhe aleat, pasojat do të ishin të pashembullta”, shtoi ai.

‘’Franca po e ndjek situatën me vëmendjen më të madhe dhe veprimi i saj do të jetë në solidaritet të plotë me Danimarkën dhe sovranitetin e saj”, shtoi presidenti.   /os/

The post PARIS – Macron: Pasoja të papara nëse shkelet sovraniteti i Grenlandës appeared first on Agjencia Telegrafike Shqiptare.

TIRANË, 14 janar/ATSH/ Porti i Durrësit ka ruajtur edhe gjatë vitit 2025 rolin e tij si qendër kryesore e transportit detar të pasagjerëve në Shqipëri.

Gjatë periudhës janar-dhjetor të vitit që lamë pas janë përpunuar gjithsej 792,023 udhëtarë.

Nga ky total, 389,543 pasagjerë mbërritën në port, ndërsa 402,480 nisën udhëtimin drejt destinacioneve të ndryshme.

Sipas Autoritet Portual të Durrësit, fluksi i pasagjerëve shënoi rritje të dukshme gjatë sezonit turistik veror, sidomos në linjat ndërkombëtare drejt Italisë.

Autoritetet e portit theksojnë se këto shifra konfirmojnë rëndësinë e Portit të Durrësit në mbështetje të lëvizjes së qytetarëve, zhvillimit të turizmit dhe forcimit të lidhjeve detare rajonale. /j.p/

1 nga 5

The post Porti i Durrësit, mbi 790 mijë udhëtarë gjatë 2025-ës appeared first on Agjencia Telegrafike Shqiptare.

TIRANË, 14 janar/ATSH/ Lezha përkujtoi sot 323-vjetorin e Kuvendit të Arbrit, një nga ngjarjet më të rëndësishme të historisë sonë kombëtare.

Bashkia Lezhë organizoi një ceremoni me këtë rast, në kishën mesjetare të Shën Gjon Pagëzorit në Mërqi, pikërisht aty ku u mbajt ky kuvend, duke e parë këtë si një moment të rëndësishëm reflektimi dhe nderimi për historinë, identitetin dhe trashëgiminë kombëtare.

Kuvendi i vitit 1703 shënoi një moment kyç në ruajtjen e identitetit, gjuhës dhe trashëgimisë kulturore shqiptare, e njëkohësisht e rikonfirmoi Lezhën si simbol qëndrese, uniteti dhe vlerash.

Kuvendi i Arbrit u mbajt 323 vjet më parë me kërkesë të Papa Klementit XI Albani, papë me origjinë shqiptare. Mes vendimeve që u miratuan nga ky kuvend  ishte edhe hapja e shkollave dhe organizimi i botimeve në gjuhën shqipe, të cilat u zbatuan përgjatë shekujve të XVIII dhe XIX.

Kisha e Shën Gjon Pagëzorit në Mërqi pati degraduar dhe me ardhjen e demokracisë, meshtarëve iu desh të merreshin edhe me rimëkëmbjen e këtij objekti kulti. Restaurimi u bë në vitin 1996, nën mbikëqyrjen e famullitarit të atëhershëm dom Dodë Gjergji. /j.p/

1 nga 12

The post Kuvendi i Arbrit, mbrojtësi i identitetit, gjuhës dhe trashëgimisë kulturore shqiptare appeared first on Agjencia Telegrafike Shqiptare.

UASHINGTON, 14 janar /ATSH-DPA/- Ministri i Jashtëm danez, Lars Løkke Rasmussen do të takohet sot me zëvendëspresidentin e SHBA-së, JD Vance dhe sekretarin amerikan të Shtetit, Marco Rubio në Uashington , për të diskutuar kërcënimet e SHBA-së për të marrë kontrollin e Groenlandës.

Ministrja e Punëve të Jashtme e Groenlandës, Vivian Motzfeldt, pritet gjithashtu të marrë pjesë në takimin e Shtëpisë së Bardhë, i cili fillimisht ishte planifikuar në nivelin e ministrave të Jashtëm, përpara se Vance të vendoste në një njoftim të shkurtër, për t’ju bashkuar bisedimeve.

Duke folur në një konferencë të përbashkët për shtyp me kryeministrin e Groenlandës Jens-Frederik Nielsen dje në Kopenhagë, Frederiksen tha se Danimarka dhe Groenlanda do ta bënin të qartë se Shtetet e Bashkuara të Amerikës nuk kishin të drejtë të kontrollonin Groenlandën dhe se territori i saj nuk ishte në shitje.

“Nëse duhet të zgjedhim midis SHBA-së dhe Danimarkës, atëherë ne zgjedhim Danimarkën”, tha Nielsen.

Presidenti i SHBA-së, Donald Trump, kohët e fundit ka shprehur interes për ishullin e madh Arktik, i cili ka qenë pjesë e Mbretërisë Daneze për më shumë se 300 vjet. Trump nuk e ka përjashtuar përdorimin e forcës për ta marrë atë.

Trump tha se SHBA-ja kishte nevojë për Groenlandën për arsye sigurie kombëtare, duke përmendur rëndësinë e saj strategjike në Arktik, burimet e saj minerale dhe aktivitetin në rritje rus dhe kinez në rajon.

Groenlanda, me një popullsi prej rreth 57,000 banorësh, shtrihet midis Amerikës së Veriut dhe Evropës dhe në Rrethin Arktik.

Groenlanda kontrollon shumicën e çështjeve të brendshme, megjithatë mbrojtja dhe politika e jashtme janë kryesisht në kompetencë të Danimarkës.

Frederiksen tha se Danimarka po përballet me presion krejtësisht të papranueshëm nga aleatët më të ngushtë, duke paralajmëruar se faza më e vështirë e mosmarrëveshjes mund të ishte në vijim.

Në bisedime, Danimarka planifikon të ofrojë bashkëpunim më të ngushtë me SHBA-në për sigurinë e Arktikut brenda kornizës së NATO-s dhe përkrah aleatëve evropianë.

Një opsion i diskutuar javët e fundit midis anëtarëve të NATO-s është një prani më e fortë e aleancës në Arktik, duke përfshirë potencialisht misione të reja mbikëqyrjeje, për të adresuar shqetësimet e SHBA-së në lidhje me sigurinë në rajon pa ndryshuar statusin politik të Groenlandës.

Trump ka argumentuar se Danimarka nuk është në gjendje ta mbrojë në mënyrë të mjaftueshme Groenlandën dhe nuk e ka përjashtuar përdorimin e presionit ekonomik ose ushtarak.

Qeveritë evropiane kanë shprehur alarm për një retorikë të tillë, duke paralajmëruar se kjo mund të minojë besueshmërinë e NATO-s nëse një anëtar kryesor do të kërcënonte një aleat tjetër.

Shtetet e Bashkuara të Amerikës operojnë Bazën Hapësinore “Pituffik” në Groenlandë, sipas marrëveshjeve ekzistuese të mbrojtjes me Danimarkën.

Zyrtarët danezë thanë se janë të hapur për një prani të vazhdueshme ose të zgjeruar ushtarake amerikane në ishull, por vetëm brenda aleancave dhe marrëveshjeve ekzistuese.

Bisedimet në Uashington vijnë mes shqetësimeve më të gjera në Evropë se një mosmarrëveshje e zgjatur mbi Groenlandën mund të tendosë më tej marrëdhëniet transatlantike në një kohë tensioni të shtuar gjeopolitik, duke pasur parasysh luftën e Rusisë në Ukrainë dhe ndikimin global në rritje të Kinës. //a.i/

The post KOMENT – Groenlanda vë në provë lidhjet SHBA-Danimarkë appeared first on Agjencia Telegrafike Shqiptare.

TIRANË, 14 janar/ATSH/ Kryetari i grupit parlamentar të Partisë Socialiste, Taulant Balla, njëherësh drejtues politik i PS për Diasporën priti sot në një takim në ambientet e Kuvendit, Enkelejda Dajçin (Beqon), përfaqësuese e diasporës shqiptare në Landin e Bavarisë, Gjermani.

Balla vlerësoi lehtësimin e procedurave për lejet e qëndrimit dhe punësimit në Gjermani, duke i konsideruar ato si faktorë kyç për integrimin dhe suksesin e shqiptarëve që jetojnë e punojnë atje.

“Në Bavari jetojnë e punojnë rreth 18 mijë shtetas shqiptarë, ndaj vlerësojmë lehtësimin e procedurave për lejet e qëndrimit, punësimit. Gjithashtu në universitetet e Bavarisë studiojnë afro 800 studentë shqiptarë”, u shpreh Balla.

Takimi u konsiderua një dëshmi e rëndësisë që institucionet shqiptare i kushtojnë diasporës dhe forcimit të lidhjeve me komunitetet shqiptare jashtë vendit.

/m.m/j.p/

The post Balla pret në Kuvend përfaqësuesen e diasporës shqiptare në Bavari appeared first on Agjencia Telegrafike Shqiptare.

TIRANË, 14 janar/ATSH/ Kryeministri Edi Rama reagoi sërish sot ndaj deklaratave të gazetarit Blendi Fevziu, lidhur me udhëtimet private të ministrave të kabinetit qeveritar gjatë fundjavave.

Rama tha se “Fevziu reagoi prapë duke e pohuar përsëri faktin që ka fabrikuar një shpifje”.

“Ai refuzon t’i japë llogari publikut të vet, një herë të vetme, për një gënjeshtër me shtatë bishta dhe kapet si i mbyturi pas fijes së barit tek video-inspektimet e anëtarëve të qeverisë, për të cilat thotë se janë praktikë unike në botë, jashtë çdo standardi demokratik”, u shpreh Rama.

Më herët, gazetari Blendi Fevziu ka deklaruar se ka fakte që të paktën 7 ministra janë në udhëtime private jashtë shtetit të shtunave e të dielave, dhe lënë kasetat me inspektime nëpër televizione sikur janë në punë.

Kjo deklaratë ka sjellë reagimin e kryeministrit Rama, i cili i ka hedhur poshtë këto pretendime, ndërsa ka deklaruar se ministrat e kabinetit qeveritar edhe kur dalin për arsye personale jashtë vendit e bëjnë këtë me një kërkesë për leje dhe vetëm me miratim.

Më poshtë reagimi i plotë i kryeministrit Rama:

Fevziu reagoi prapë duke e pohuar përsëri faktin që ka fabrikuar një akuzë, më shqip një shpifje, për të cilën as ka çfarë thotë e vjen vërdallë me muhabete kafeneje, duke përmendur si në jerm dy a tre raste sporadike, për të cilat përsëri s’ka asnjë provë se janë të lidhura me udhëtime private të ministrave në fundjavë, e duke i ikur përsëri me një turravrap konfuz të vetmes gjë që duhet të bënte në këtë rast: Ndjesës ndaj shikuesve të tij.

Ndryshe nga më parë, Fevziu deklaron se nuk do përgjigjet më për këtë çështje. Normal, e kupton edhe vetë që s’ka si ia bën ndryshe, përderisa nuk mendon se shikuesit e tij meritojnë aq respekt sa ai t’u kërkojë ndjesë.

Pra Fevziu kërkon llogari edhe për gjëra që nuk i di ose që nganjëherë edhe i shpik, ndërkohë që fton rregullisht në sallonin e tij njerëz të armatosur me gjysmë të vërteta, të cilat janë edhe gënjeshtrat më të mëdha. Por ama ai refuzon t’i japë llogari publikut të vet, një herë të vetme, për një gënjeshtër me shtatë bishta dhe kapet si i mbyturi pas fijes së barit tek video-inspektimet e anëtarëve të qeverisë, për të cilat thotë se janë praktikë unike në botë, jashtë çdo standardi demokratik.

Dakord, atëherë po kaloj tek standardet dhe po i them Blendit, i cili padyshim e ka parë botën shumë më tepër se unë, që të na tregojë një rast të vetëm në botë ku debatet politike janë kacafytje për të marrë fjalën, në një sfond britmash të pandërprera, ku nuk e merr vesh i pari të dytin, e ku mikpritësi me një shkop në dorë nxit palët të zihen, pa vënë ose pa dashur të vendosë as qetësi, as rregulla në debat, as kufi etikë në komunikim, e pa kultivuar as sensin më të vakët të drejtësisë në trajtimin e të ftuarve, të cilëve u ndërpritet fjala rregullisht pa bërë dot 3 fjali bashkë!

Pra le të themi se po, e vërtetë, nuk është normale që anëtarët e qeverisë t’i shmangin daljet në sallonet mediatike (në fakt, në rastin tonë ne nuk shmangim daljet me gazetarë, po vetëm daljet me udhëheqësit barisalifallistë), por nëse Fevziu nuk e nis nga vetja, bashkë me sivëllezërit e simotrat e 700 tenxhereve, e të vendosi standardet demokratike në sallonin e tij të madh, atëherë s’ka si t’i kërkojë llogari ministrave pse nuk hidhen me kokë në tenxheren e Opinionit a në cilëndo tenxhere, ku bubullon e gërrgëron molla e përhershme e sherrit dhe ku shikuesit në vend se të informohen, abuzohen dhe helmohen me politikën!

/m.m/j.p/

The post Rama: Fevziu pohoi faktin që ka fabrikuar një shpifje appeared first on Agjencia Telegrafike Shqiptare.

TIRANË, 14 janar /ATSh/ Mbrojtësit ligjorë të presidentit të Partisë së Lirisë, Ilir Meta, deklaruan sot në një konferencë për mediet, se Meta po mbahet në paraburgim, duke tejkaluar çdo standard ligjor, kushtetues dhe human.

Avokati Kujtim Cakrani theksoi se hetimet ndaj Metës kanë përfunduar më 4 gusht 2025, ndërsa që prej 28 gushtit 2025 çështja ndodhet në seancë paraprake.

“Kjo do të thotë që një seancë e tillë ligjërisht duhet të përfundojë brenda një muaji dhe pastaj çështja ose duhet të pushohet, ose të kthehet në hetim ose duhet të kalojë në gjykim themeli”, sqaroi ai.

Sipas avokatit, kanë kaluar mbi katër muaj e gjysmë pa nisur shqyrtimi paraprak, duke e cilësuar këtë si shkelje të rëndë të Kodit të Procedurës Penale dhe të Kushtetutës.

“Kjo e ka rënduar pozitën e kësaj drejtësie që është kthyer në një drejtësi inkuzitore”, tha ai.

Cakrani theksoi se kanë kërkuar zëvendësimin e masës së sigurisë, por përsëri gjyqtarja Irena Gjoka, e cila sipas tij është e “shantazhueshme”, nuk e pranoi kërkesën dhe e ka rrëzuar.

Avokati shtoi se ndaj Metës ka pasur sulme të vazhdueshme politike dhe personale.

“Ai është tashmë në izolim total, izolim i paprecedentë. Presidentit të Partisë së Lirisë, numrit dy të opozitës, nuk i jepet mundësia të komunikojë me qytetarët, kolegët, bashkëpunëtorët e ata që duhet të komunikojë”, tha ai.

Sa i përket pasurisë së Ilir Metës, Cakrani mohoi akuzat për përfitime të paligjshme, duke deklaruar se analizat financiare të kryera nga mbrojtja tregojnë se Meta nuk ka pasuri të luajtshme apo të paluajtshme.

Cakrani tha se nga viti 1995 deri në vitin 2023, të ardhurat e Metës nga funksionet publike kanë qenë rreth 87.5 milionë lekë, ndërsa shpenzimet e deklaruara janë ndjeshëm më të ulëta, duke pretenduar se kursimet e tij kanë qenë të justifikuara dhe të ligjshme.

“Pasuria e Metës, është zero, qoftë e luajtshme, qoftë e paluajtshme, sepse ka punuar me dinjitet, ka punuar me pastërti. Prokuroria e ka nisur analizën në vitin 2002, thua se Meta para 2002-shit nuk ka ekzistuar. Ne kemi bërë analizën financiare, të ardhurat dhe shpenzimet normale prej 1995-2023. Në 1995 ne disponojmë dokumentacionin  e vënë në dispozicion nga Kuvendi. Kjo është arsyeja pse e kemi nisur në 1995. Meta aktivitetin politik e ka nisur në 1992″, tha Cakrani.

“Prej 1995 deri në 2023, të gjitha të ardhurat e Metës nga puna si deputet, si ministër, si zv.kryeministër, si kryeministër, si kryetar kuvendi dhe në fund president i Republikës, kanë qenë 87,385,031 lekë. Ndërkohë që shpenzimet e tij, janë në shumën 39,448,575 lekë. Meta ka në bilancin e tij 530, 146 lekë. I ka pasur këto kursime. Nuk i ka më edhe këto kursime sepse ka pasur shpenzime”, vijoi avokati.

“Akuza e prokurorisë është se Meta paska fituar 200 mijë euro nuk e di ku e ka shpikur organi i procedurës këtë, për të fshehur veprimet arbitrare që ka bërë. Shpenzimet dhe të ardhurat janë tashmë publike dhe ne prandaj e kemi thënë gjithmonë: nuk ka as pasuri të luajtshme dhe as të paluajtshme Meta”, tha Cakrani.

/m.q/j.p/

The post Avokati Cakrani: Ilir Meta, zero pasuri të luajtshme apo të paluajtshme appeared first on Agjencia Telegrafike Shqiptare.

TIRANË, 14 janar /ATSh/ Në Bashkinë Maliq ka nisur puna e komisionit për evidentimin e dëmeve të shkaktuara në sektorin e bujqësisë nga reshjet intensive të shiut që përfshinë vendin tonë gjatë ditëve të fundit.

Drejtori i Drejtorisë Rajonale për Bujqësinë në qarkun Korçë, Vullnet Gjolla, informoi për ATSH se procesi i vlerësimit po zhvillohet në terren dhe po ndiqet nga afër nga strukturat përkatëse.

Sipas Gjollës, zonat më të prekura në qarkun Korçë janë fusha e Maliqit, e cila paraqet problematika të përsëritura për shkak të strukturës së tokës torfike, e cila mban ujë në sipërfaqe gjatë reshjeve intensive.

Ai sqaroi se dëmet janë evidentuar në disa njësi administrative, përfshirë Pojanin, Pirgun, Vreshtasin dhe bashkinë Maliq.

“Dëmet janë konstatuar kryesisht në të mbjellat bujqësore, veçanërisht në drithërat e mbjella gjatë muajit nëntor, të cilat janë dëmtuar si pasojë e reshjeve të rëna gjatë këtij muaji” bëri të ditur Gjolla.

Sa i përket sektorit të blegtorisë, drejtori i Drejtorisë Rajonale për qarkun Korçë theksoi se nuk janë konstatuar dëme.

Procesi i evidentimit të dëmeve vijon dhe të dhënat përfundimtare do të përpilohen pas përfundimit të verifikimeve në terren, në bashkëpunim me strukturat vendore dhe ato të emergjencave civile. e.xh/j.p/

The post Nis evidentimi i pasojave të përmbytjeve në Maliq, dëme në të mbjellat e drithërave appeared first on Agjencia Telegrafike Shqiptare.

TIRANË, 14 janar /ATSh/ Në tregun e këmbimit valutor vendas, të mërkurën dollari amerikan forcoi pozitat në raport me lekun, krahasuar me një ditë më parë, ndërsa euroja shënoi rënie.

Sipas kursit zyrtar të Bankës së Shqipërisë, dollari amerikan këmbehet me 82,81 lekë ose 0,06 lekë më shumë ndërsa euroja zbriti me 0,02 lekë, duke u kuotuar në vlerën e 96,53 lekëve.

Paundi britanik këmbehet me 111,42 lekë, ose 0,04 lekë më pak se ditën e martë dhe franga zvicerane zbrit me 0,24 lekë duke u këmbyer sot me 103,43 lekë. /j.p/

The post Forcohet dollari, bie lehtë euroja appeared first on Agjencia Telegrafike Shqiptare.