Sipas raportimeve të fundit, Paris Saint-Germain është i hapur të dëgjojë oferta për mbrojtësin brazilian Lucas Beraldo gjatë afatit kalimtar të janarit, ndërsa Fenerbahçe po ndjek nga afër situatën e tij.

Gjigantët turq synojnë të aplikojnë një formulë të ngjashme me atë të transferimit të ish-mbrojtësit të PSG-së, Milan Skriniar, duke propozuar fillimisht një huazim me opsion blerjeje në verën e ardhshme.

Pavarësisht potencialit të tij të madh dhe pritshmërive të larta që shoqëruan ardhjen e tij, Beraldo nuk ka arritur ende të bindë trajnerin Luis Enrique për të fituar një rol të rëndësishëm në formacionin bazë.

Aktivizimet e kufizuara dhe konkurrenca e fortë në repartin e mbrojtjes kanë ndikuar ndjeshëm në zhvillimin e tij këtë sezon.

Aktualisht, në hierarkinë e mbrojtjes së PSG-së, Beraldo gjendet pas emrave si Illia Zabarnyi, Marquinhos dhe Willian Pacho, çka e bën perspektivën e tij në klubin parisien gjithnjë e më të paqartë.

Në këto rrethana, një largim i mundshëm në janar shihet si një opsion realist, si për lojtarin ashtu edhe për klubin.

Fenerbahçe, nga ana e saj, kërkon të përforcojë mbrojtjen për pjesën e dytë të sezonit dhe e sheh Beraldon si një profil të përshtatshëm për projektin e saj sportiv.

Ditët në vijim pritet të jenë vendimtare për të ardhmen e mbrojtësit brazilian, ndërsa mbetet për t’u parë nëse bisedimet mes palëve do të konkretizohen. /Telegrafi/

Një ndihmës i lartë i presidentit të SHBA-së, Donald Trump, tha se asnjë vend nuk do të sfidonte ushtarakisht SHBA-në për të ardhmen e Grenlandës, një territor vetëqeverisës brenda Mbretërisë së Danimarkës.

Stephen Miller, zëvendës shefi i stafit të Shtëpisë së Bardhë, i bëri këto komente gjatë një interviste me CNN, ku hodhi poshtë idenë se interesi i SHBA-së në Grenlandë do të çonte në konflikt të armatosur.

Kur u pyet drejtpërdrejt nëse veprimi ushtarak kundër Grenlandës ishte jashtë diskutimit, Miller e riformuloi çështjen, duke argumentuar se pyetja nuk kishte të bënte me përballjen me vetë Grenlandën.

"Nuk do të ishte veprim ushtarak kundër Grenlandës. Grenlanda ka një popullsi prej 30.000 banorësh. Pyetja e vërtetë është se me çfarë të drejte Danimarka pohon kontrollin mbi Grenlandën? Cila është baza e pretendimit të tyre territorial? Cila është baza e tyre për ta pasur Grenlandën si koloni të Danimarkës?", tha ai.

Grenlanda është një territor autonom brenda Mbretërisë së Danimarkës, një aleat i SHBA-së në NATO.

Miller e vuri në dyshim atë marrëveshje duke theksuar vlerën strategjike të Grenlandës për interesat e sigurisë së SHBA-së dhe NATO-s në Arktik.

"SHBA-të janë fuqia e NATO-s. Që SHBA-të të sigurojnë rajonin e Arktikut, të mbrojnë dhe të mbrojnë NATO-n dhe interesat e NATO-s, padyshim që Grenlanda duhet të jetë pjesë e SHBA-së, dhe kështu kjo është një bisedë që do ta zhvillojmë si vend", tha ai.

I pyetur përsëri nëse mund të përjashtonte përdorimin e forcës ushtarake amerikane për të pushtuar Grenlandën, Miller nuk pranoi ta formulonte çështjen në terma ushtarakë, duke pohuar se konflikti i armatosur ishte jorealist.

"SHBA-të duhet ta kenë Grenlandën si pjesë të SHBA-së. Nuk ka nevojë as të mendohet ose të flitet për këtë në kontekstin që po kërkoni, për një operacion ushtarak. Askush nuk do të luftojë ushtarakisht SHBA-në për të ardhmen e Grenlandës", tha ai.

Presidenti i SHBA-së, Donald Trump, ka shprehur vazhdimisht dëshirën e tij për të marrë kontrollin e Grenlandës dhe nuk e ka përjashtuar ta bëjë këtë me forcë ushtarake.

Një ditë pas një operacioni ushtarak amerikan në Venezuelë që kapi presidentin Nicolas Maduro, Trump të dielën përsëriti thirrjet e tij për marrjen e Grenlandës nga amerikanët për hir të interesave të sigurisë së SHBA-së.

Kryeministrja e Danimarkës, Mette Frederiksen, i ka kërkuar Trumpit të "ndalojë kërcënimet". /AA/

KRU “Hidrodrini” ka njoftuar se pas reshjeve të fundit atmosferike, janë paraqitur turbullira në disa nga burimet kryesore të ujit, duke përfshirë burimin e Drinit të Bardhë në Radavc, Mbivadën në Istog dhe burimin e Deçanit.

Nga kompania bëhet e ditur se konsumatorët që furnizohen nga këto burime duhet të tregojnë kujdes të shtuar gjatë përdorimit të ujit për pije.

“Si pasojë e reshjeve atmosferike, janë paraqitur turbullirat e para në burimet e ujit. Për këtë arsye, konsumatorët që furnizohen nga këto burime rekomandohen që ujin për pije ta konsumojnë të vluar”, thuhet në njoftimin e KRU “Hidrodrini”.

Kompania ka theksuar se ky rekomandim vlen deri në njoftimin e radhës, duke siguruar se do të informojë qytetarët sapo situata të stabilizohet dhe uji të jetë i përshtatshëm për përdorim të sigurt.

“Rekomandimi do të vlejë deri në njoftimin e ardhshëm nga ne, ndërsa ekipet tona teknike po monitorojnë vazhdimisht gjendjen në terren", thuhet më tej në njoftim. /Telegrafi/

Liam Rosenior ka konfirmuar se është gati të bëhet trajneri i ri i Chelseat, duke njoftuar një marrëveshje me gjigantët e Ligës Premier.

Ish-trajneri 41-vjeçar i Derby County dhe Hull City ka deklaruar tashmë se do të marrë detyrën e re si trajner i Bluve.

"Jam gati të bëhem trajneri i ri i Chelseat, një nga klubet më të mëdha në botë", ka thënë fillimisht Rosenior pasi mori lejen për të folur.

"Më dhanë leje të flas me një nga klubet më të mëdha në botë. Ishte një nder të isha i lidhur me një klub të tillë dhe tani, duket se do të jem trajneri i ardhshëm i atij klubi futbolli”, përfundoi trajneri i ri anglez.

Ndryshe, Rosenior u ngrit shpejt, duke e çuar Hull Cityn në ‘play-off’-et e Championshipit sezonin e kaluar me një stil loje tërheqës përpara se të kalonte te Strasbourg në Ligue 1. /Telegrafi/

Instituti Kombëtar i Shëndetësisë Publike të Kosovës (IKSHPK) ka apeluar tek qytetarët për kujdes të shtuar pas reshjeve të shtuara të shiut në disa zona të vendit, duke theksuar ndikimin e mundshëm të tyre në shëndetin publik.

Sipas njoftimit të IKSHPK-së aktualisht nuk ka të dhëna për ndotje të ujit.

Megjithatë Instituti shprehet se qytetarët që furnizohen me ujë nga bunarë të pambrojtur, për arsye sigurie nga aspekti bakteriologjik, rekomandohet që uji të vlohet para përdorimit ose të shfrytëzohen burime alternative për furnizim me ujë të sigurt.

Instituti gjithashtu paralajmëron për kujdes me ushqimin.

“Ushqimi të ruhet në vende të sigurta dhe të mos konsumohet ushqimi që ka qenë në kontakt me ujin e shiut”, thuhet në njoftim.

Grupet më të ndjeshme, përfshirë fëmijët, të moshuarit dhe personat me sëmundje kronike, duhet të shmangin lëvizjet e panevojshme.

“Rekomandohet që grupet më të ndjeshme të shmangin lëvizjet e panevojshme”, njofton IKPSHK.

IKSHPK fton qytetarët të tregojnë kujdes për shëndetin e tyre dhe të ndjekin këshillat e institucioneve për të parandaluar rreziqet shëndetësore. /Telegrafi/

Kompania Rajonale e Ujësjellësit “Mitrovica” ka njoftuar se ka ndërprerë përkohësisht furnizimin me ujë të pijes, si pasojë e reshjeve të shiut gjatë natës dhe rritjes së nivelit të turbulleshmërisë në kanalin e Ibër-Lepencit.

Sipas njoftimit zyrtar të KRU “Mitrovica”, kjo masë është ndërmarrë për të garantuar sigurinë dhe cilësinë e ujit të pijes, në përputhje me standardet teknike dhe shëndetësore në fuqi.

“Si pasojë e reshjeve të shiut dhe ngritjes së nivelit të turbulleshmërisë në kanalin e Ibër-Lepencit, jemi detyruar të ndërpresim përkohësisht furnizimin me ujë, me qëllim garantimin e sigurisë dhe cilësisë së ujit të pijes,” thuhet në njoftimin e kompanisë.

Nga KRU “Mitrovica” bëhet e ditur se ekipet teknike janë në terren dhe po monitorojnë situatën në mënyrë të vazhdueshme, ndërsa furnizimi me ujë do të rikthehet sapo të normalizohet niveli i turbulleshmërisë dhe të krijohen kushtet e sigurta për distribuim.

Kompania ka kërkuar mirëkuptimin e konsumatorëve për shqetësimet e shkaktuara dhe ka bërë thirrje për durim deri në stabilizimin e plotë të gjendjes. /Telegrafi/

Elijona Binakaj ka bërë haptazi një bisedë me Klodian Mihajn për jetën dhe atë që ka kaluar deri më tani.

Ajo i është qasur humbjes së nënës dhe motrës në vitin 2021 nga një aksident me autobus.

Banorja në një mënyrë tregon se është rritur para kohës për shkak të ngjarjes së rëndë që ka përjetuar.

Foto: Instagram

"Historia më ka bërë kjo që jam, ama dua të vlerësohem për njeriun që jam e jo për t'iu dhimbsur tjerëve. Unë kam qejf të jap shembull, me ia largu njerëzve që kanë nevojë", u shpreh ajo.

Tutje mes lotësh tha: "Ajo është pjesë e jetës time dhe nuk mundem ta mohoj kurrë, ajo më ka bërë kjo që jam sot. Edhe unë kisha pas dëshirë të jem fëmijë me 18 vjet, por jeta më ka bërë".

Elijona ndërkaq po vlerësohet nga publiku për sinqeritetin dhe për lojën që ka zhvilluar deri në këtë pikë.

Ajo po merr përkrahje të madhe nga jashtë për gjithë situatat e krijuara në BBVK. /Telegrafi/

Pasuria e presidentes Vjosa Osmani u raportua se do ti nënshtrohet një verifikimi nga ana e Agjencisë për Parandalimin e Korrupsionit.

Lidhur me këtë nga Presidenca kanë bërë të ditur se nuk kanë informacione për një gjë të tillë.

Këshilltar i presidentes, Bekim Kupina ka deklaruar për Telegrafin se presidentja mirëpret çdo verifikim nga cilido institucion.

“Presidentja Osmani mirëpret çfarëdo verifikimi nga cilido institucion, që është i bazuar në pavarësi, paanshmëri, integritet, ligj dhe fakte të vërteta, por jo në fushata njollosjesh, të cilat dihet mirëfilli pse po ndodhin në këtë fazë”, tha Kupina për Telegrafin.

Nga ana tjetër, Agjencia për Parandalimin e Korrupsionit ka bërë të ditur se në këto momente nuk mund të japin asnjë koment mbi këtë çështje, duke mos e konfirmuar e as mohuar një procedurë të mundshme ndaj presidentes. /Telegrafi/

Sot dhe nesër, për shkak të festës së Epifanisë në Greqi, sipas paralajmërimeve, fermerët grekë nuk do ta bllokojnë pikën kufitare Evzoni dhe pritet që trafiku të zhvillohet pa probleme, siç ishte rasti për Krishtlindje dhe Vitin e Ri, me qëllim lehtësimin e udhëtimit të qytetarëve, njoftoi korrespondenti i AIM-s nga Athina.

Nga ana tjetër, në pikën kufitare Niki (Mexhitlija), siç njoftojnë nga LAMM, trafiku për automjetet e mallrave do të pezullohet nga ora 9:00.

Protestat e fermerëve filluan më 30 nëntor, dhe një ditë më vonë, më 1 dhjetor, fermerët nga Greqia veriore parkuan traktorët e tyre në pikën kufitare Evzoni dhe bllokuan trafikun për në dhe nga vendi ynë për disa orë çdo ditë, me përjashtim të ditëve para dhe pas Krishtlindjeve, Ditës së Vitit të Ri dhe tani për Epifaninë, siç është rasti me të gjitha bllokadat në të gjithë Greqinë./Telegrafi/

Përfundimi i karrierës sportive të Nora Gjakova nuk është thjesht mbyllja e një kapitulli individual, por një dëshmi e fortë se suksesi i xhudos kosovare nuk ka qenë kurrë rastësi. Nora e ka konfirmuar atë që shumëkush e ka kuptuar me kohë: suksesi i Majlinda Kelmendit nuk ishte një përjashtim i rrallë, por rezultat i punës, sistemit dhe mendësisë së ndërtuar me vite.

Nora Gjakova ishte, dhe mbetet, një nga sportistet më strategjike dhe më gjakftohta që ka nxjerrë sporti ynë. Në një mentalitet ballkanik ku shpesh kërkohet fitorja e shpejtë dhe emocioni i menjëhershëm, ajo diti të fitojë aty ku fitoret janë më të vështira: në momentet e fundit, me durim, me kontroll dhe me inteligjencë taktike. Luftërat e saj rrallëherë ishin të lexueshme. Ishte e vështirë të kuptoje se ku po shkonte dhe çfarë po përgatiste - teknikat i nxirrte një nga një, si magjistari truqet nga mëngët.

Paleta e Norës ishte e pasur dhe e plotë: fshirje, hedhje, kontra, kapje dhe kontroll në parter. Pikërisht kjo e bënte të paparashikueshme dhe të rrezikshme për çdo kundërshtare. Nuk ishte sportiste e ndërtuar mbi një teknikë të vetme, por mbi lexim loje, qetësi dhe zgjuarsi - cilësi që dallojnë kampionët e mëdhenj nga fituesit e rastit.

Si shoqëri, të zhytur në politikë, zgjedhje dhe debate të përditshme, nuk ia dolëm ta festonim këtë karrierë ashtu siç e meritonte. Një sportiste e këtij niveli do të duhej të përcillej me një video dinjitoze, me transmetim publik, me një pritje shtetërore dhe me një festë që i flet brezave të rinj për atë se çfarë arrihet me punë. Nora Gjakova nga Peja ishte suksesi i dytë olimpik i xhudos kosovare - dhe ky “i dyti” është pikërisht prova se rezultatet nuk janë aksident, por vazhdimësi.

Po aq domethënëse është edhe mungesa e një nderimi simbolik institucional. Në të njëjtin park ku është nderuar Majlinda Kelmendi, edhe Nora Gjakova e meriton statujën e saj. Jo si akt krahasimi, por si akt vazhdimësie. Monumentet publike nuk janë dekor; ato janë mesazh. Ato u tregojnë brezave se çfarë vlerëson kjo shoqëri. Nëse Majlinda ishte hapja e rrugës, Nora ishte dëshmia se ajo rrugë u shndërrua në traditë.

Krahasimi mes Norës dhe Majlindës është i pashmangshëm, por i drejtë vetëm nëse bëhet me respekt. Dy stile të ndryshme, dy qasje të ndryshme, por i njëjti destinacion: tituj olimpikë, botërorë, evropianë dhe një histori që e tejkalon individin. Majlinda ishte pishtari; Nora ishte vazhdimi i dritës.

Kam pasur fatin të punoj me ekipin dhe ta shoh Norën edhe jashtë tatamit: me buzëqeshje, qetësi, disiplinë dhe intelekt. Këto janë vlera që nuk maten me medalje, por që sot janë ndoshta trashëgimia e saj më e rëndësishme. Janë këto vlera që ajo do t’i shpërndajë tani te gjeneratat e reja - qoftë si trajnere, qoftë si shembull.

Nora Gjakova do t’i mungojë garës, do t’i mungojë xhudos si spektakël, por ajo nuk largohet nga sporti. Ajo largohet nga tatami si kampione dhe mbetet në histori si provë e gjallë se puna prodhon kampionë - jo rastësia.

Sa për kimonon e nënshkruar që ma ka premtuar - ende po e pres. Jo si ankesë, por si kujtim i një raporti njerëzor me një kampione që, edhe në këtë detaj të vogël, mbetet plotësisht njerëzore.

Kompania Rajonale e Ujësjellësit “Prishtina” ka njoftuar se Impianti i Trajtimit të Ujit (ITU) në Shkabaj është aktualisht jashtë funksionit, si pasojë e nivelit shumë të lartë të turbullirave në kanalin Ibër–Lepenc, të shkaktuara nga reshjet e dendura të shiut.

Sipas njoftimit të publikuar nga KRU “Prishtina”, kjo situatë ka ndikuar drejtpërdrejt në furnizimin me ujë të pijes në disa komuna dhe zona të kryeqytetit.

“ITU Shkabaj është jashtë funksionit për shkak të nivelit të lartë të turbullirave në kanalin furnizues Ibër–Lepenc. Për orarin e reduktimeve do t’i njoftojmë konsumatorët në vijim”, thuhet në njoftimin e kompanisë.

Zonat që pritet të preken nga reduktimet e furnizimit me ujë janë Fushë Kosova, Drenasi, Obiliqi, si dhe një pjesë e lagjes Kalabria në Prishtinë. Po ashtu, KRU “Prishtina” paralajmëron se ndikime dhe reduktime të furnizimit mund të ketë edhe në zona të tjera të kryeqytetit.

Nga kompania bëhet e ditur se ekipet teknike janë të angazhuara në terren dhe po monitorojnë situatën në mënyrë të vazhdueshme.

“Furnizimi me ujë do të rikthehet menjëherë sapo të stabilizohen parametrat në kanalin furnizues. Kërkojmë ndjesë qytetarëve për shqetësimet e shkaktuara, të cilat janë pasojë e kushteve natyrore”, thuhet më tej në njoftim.

Ndërkohë, KRU “Prishtina” ka bërë të ditur se impiantet e tjera të trajtimit të ujit, ITU Albanik dhe ITU Badoc, janë duke operuar me kapacitet maksimal për të minimizuar ndikimin në furnizim. /Telegrafi/

Ish-ndihmës trajneri i Real Madridit, Davide Ancelotti, ka përjashtuar veten nga lista e kandidatëve për të zëvendësuar Xabi Alonson, në rast se klubi vendos të shkarkojë trajnerin bask.

Alonso po përballet me një javë vendimtare që mund të përcaktojë drejtimin e projektit të tij, me një gjysmëfinale të Superkupës së Spanjës kundër Atletico Madridit të enjten, si dhe një finale të mundshme ndaj Athletic Club ose Barcelonës.

Sipas burimeve pranë klubit, e ardhmja e Alonsos mund të varet nga paraqitjet dhe rezultatet në këto ndeshje të nivelit të lartë, pavarësisht faktit se Real Madridi mund të duhet t’i përballojë ato pa Kylian Mbappen.

Drejtuesit e klubit kërkojnë që seria aktuale prej katër fitoresh të shoqërohet me performanca bindëse ndaj rivalëve të fortë.

Davide Ancelotti drejt përfshirjes në stafin e Brazilit

Djali i Carlo Ancelottit, trajnerit të sezonit të kaluar të Real Madridit, u pa në stadiumin Santiago Bernabeu gjatë fitores 5-1 ndaj Real Betisit.

Në një intervistë për Marca, Davide Ancelotti sqaroi se ndodhej aty thjesht si tifoz.

“Jam me pushime dhe kam ardhur për të mbështetur Real Madridin. Hajmalia me fat është këtu dhe duhet të fitoni”, tha ai me humor.

“Do t’i jap një dorë babait tim”, shtoi Ancelotti, duke iu referuar planeve të tij të ardhshme, pasi u largua nga posti i parë si trajner kryesor te Botafogo në Brazil pas gjashtë muajsh.

Ancelotti mohon çdo lidhje me zëvendësimin e Alonsos

Davide Ancelotti ka qenë shumë i vlerësuar gjatë kohës së tij në Valdebebas dhe, pavarësisht përfundimit jo ideal të qëndrimit të tij, ai konsiderohej një nga figurat kyçe në punën e përditshme stërvitore.

Atij i janë atribuar gjithashtu disa risi taktike gjatë mandatit të dytë të Carlo Ancelottit në klub.

Megjithatë, ai shprehu respekt maksimal për trajnerin aktual të Real Madridit.

“Xabi është një trajner fantastik dhe një njeri i mrekullueshëm. Kemi ndarë momente shumë të bukura së bashku dhe i uroj atij dhe Real Madridit gjithë të mirat”.

Megjithëse ishte përfolur si një opsion i mundshëm, qoftë edhe i përkohshëm, në rast të largimit të Alonsos, Davide Ancelotti e mohoi qartë këtë mundësi.

“Asgjë e tillë. Jam në një fazë tjetër të karrierës sime profesionale. Jam thjesht tifoz i Real Madridit dhe mik i Xabi Alonsos”, u shpreh ai.

Nëse Real Madridi vendos të ndërpresë bashkëpunimin me Alonson gjatë sezonit, Santiago Solari, drejtor sportiv i klubit, dhe trajneri i Castillas, Alvaro Arbeloa, konsiderohen si alternativat më të mundshme për stolin madrilen. /Telegrafi/

Ruben Amorim u shkarkua nga stoli i Manchester United dje (e hënë), dhe tani drejtuesit e Djajve të Kuq po kërkojnë zëvendësuesin e tij.

Sipas informacioneve fillestare, asnjë nga trajnerët më të mirë në botë nuk po e konsideron të vijë në Old Trafford, dhe çuditërisht, një emër është përmendur.

Gazetari Fabrizio Romano njoftoi se Ole Gunnar Solskjaer është i interesuar për pozicionin vakant në stolin e United dhe se i ka ofruar shërbimet e tij klubit.

Siç theksoi Romano, Solskjaerit nuk i intereson nëse ai merr një kontratë deri në fund të sezonit apo më gjatë, për sa kohë që ai kthehet në Old Trafford.

Si lojtar i United, Solskjaer mori pjesë në fitimin e gjashtë titujve kampionë në Angli dhe shënoi një gol në finalen ikonike të Ligës së Kampionëve në vitin 1999.

Në anën tjetër, si trajner nga dhjetori 2018 deri në shkarkimin e tij në nëntor 2021, norvegjezi e dërgoi ekipin në finalen e Ligës së Evropës. /Telegrafi/

Një mashkull kosovar është gjetur pa shenja jete në oborrin e shtëpisë së tij në Fushë Kosovë.

Vdekjen e tij e ka konstatuar mjeku në vendin e ngjarjes.

Rrethanat e rastit ende nuk janë të qarta, ndërsa me vendim të prokurorit, trupi i pajetë është dërguar në Institutin e Mjekësisë Ligjore për obduksion.

Hetimet për zbardhjen e plotë të shkaqeve të vdekjes janë duke vazhduar. /Telegrafi/

Policia e Kosovës ka sekuestruar një shumë prej rreth 59,055 eurosh në automjetin e një mashkulli kosovar, i cili dyshohet për shpërlarje parash.

Paratë janë sekuestruar me vendim të prokurorit deri sa të provohet origjina e tyre. Rasti ka ndodhur të hënën në Leposaviq rreth orës 20:00.

Gjatë kontrollit në automjetin e të dyshuarit janë marrë edhe certifikata e biznesit nga ARBK dhe ATK, si dhe raporti ditor fiskal, të cilat do të shërbejnë si prova në hetime.

I dyshuari është intervistuar nga policia dhe është liruar, ndërsa hetimet për rastin vazhdojnë sipas procedurave të rregullta. /Telegrafi/

Drejtoria për Siguri dhe Emergjenca në Komunën e Prishtinës ka dalë me një paralajmërim për qytetarët, pas reshjeve të shumta të shiut të regjistruara gjatë 24 orëve të fundit në territorin e kryeqytetit.

Sipas të dhënave zyrtare nga Instituti Hidrometeorologjik i Kosovës, në Prishtinë janë regjistruar mbi 25 milimetra reshje shiu për metër katror, ndërsa parashikimet tregojnë se reshjet do të vazhdojnë edhe gjatë orëve dhe ditëve në vijim, me intensitet dhe intervale të ndryshme.

“Këto kushte atmosferike mund të shkaktojnë vështirësi në qarkullimin rrugor, mbingarkesë të sistemeve të kanalizimit dhe ujërave atmosferike, si dhe grumbullim të ujit në zona të caktuara urbane dhe nënkalime”, thuhet në njoftimin e Drejtorisë për Siguri dhe Emergjenca, raporton Telegrafi.

Po ashtu, sipas këtij paralajmërimi, ekziston rrezik i shtuar për rrëshqitje lokale të dheut në zonat më të ndjeshme të kryeqytetit.

Drejtoria u ka bërë thirrje qytetarëve që të tregojnë kujdes të shtuar gjatë lëvizjes, veçanërisht në zonat ku ka grumbullim të ujit, të shmangin kalimin nëpër nënkalime apo rrugë të përmbytura dhe të raportojnë me kohë çdo problem që mund të paraqesë rrezik për sigurinë publike.

“Institucionet përkatëse të Kryeqytetit janë në gatishmëri të shtuar për monitorimin e situatës dhe për ndërhyrje sipas nevojës,” thuhet më tej në njoftim.

Autoritetet u kanë rekomanduar qytetarëve që për informata të mëtejme të ndjekin njoftimet zyrtare dhe të respektojnë udhëzimet e institucioneve kompetente. /Telegrafi/

Sot, me rastin e festës së madhe të krishterë "Badniku", në territorin e qytetit të Shkupit do të mbahet “Manifestimi i Badnikut”, në kuadër të “Procesioneve të Badnikut”.

Procesioni do të nisë nga përpara ndërtesës komunale të Komunës së Kisella Vodës dhe do të vazhdojë përgjatë rrugës “Boris Trajkovski”, me kthesë majtas në bulevardin “Maqedonia”. Më pas, lëvizja do të vijojë në rrugën “Shën Kirili dhe Metodi”, deri përpara Muzeut të Qytetit të Shkupit, për të vazhduar sërish në rrugën “Maqedonia” dhe përfundimisht në sheshin “Maqedonia”, ku do të mbahet manifestimi qendror.

Për shkak të zhvillimit të ngjarjes, Njësia për Siguri në Trafikun Rrugor pranë Sektorit për Punë të Brendshme Shkup do të ndërmarrë masa për ridrejtimin e trafikut dhe vendosjen e një regjimi të posaçëm të qarkullimit në rrugët ku do të kalojnë procesionet, si dhe në zonat përreth objekteve fetare.

Nga Ministria e Punëve të Brendshme u bëhet thirrje të gjithë pjesëmarrësve në komunikacion që të respektojnë urdhrat dhe udhëzimet e zyrtarëve policorë në terren.

Rap-artistja e njohur shqiptare, Melinda Ademi, ka publikuar së fundmi projektin e ri muzikor.

"Cardi B" mban titullin kënga, në të cilën bën një paraqitje të mrekullueshme edhe në videoklip.

Vija melodike është punuar nga vet artistja në bashkëpunim me Indrit Dode, gjersa ky i fundit u kujdes edhe për 'beat'-in.

Foto: YouTube

Videoja i është besuar produksionit, Imagine.

Të plotë tashmë këngën mund ta gjeni në YouTube, në kanalin zyrtar të Ademit.

Foto: YouTube

Nga shumë përdorues të internetit, Melinda u cilësua si Cardi B shqiptare.

Sidoqoftë, besohet që edhe kjo këngë të pëlqehet e pritet mirë nga publiku. /Telegrafi/

- YouTube www.youtube.com

Rreth 200 personel ushtarak amerikan hynë në kryeqytetin e Venezuelës, Karakas, si pjesë e operacionit për të kapur udhëheqësin e majtë Nicolas Maduro.

Kjo, siç shkruajnë mediat e huaja, përcjell Telegrafi, është bërë e ditur të hënën nga shefi i Pentagonit, Pete Hegseth.

Kujtojmë se forcat amerikane kapën Maduron dhe gruan e tij gjatë fundjavës, duke i dhënë fund 12 viteve të sundimit gjithnjë e më autoritar nga udhëheqësi i krahut të majtë.

Bëhet fjalë për njeriun të cilin Uashingtoni e akuzoi për drejtimin e një karteli droge dhe e shënjestroi me një shpërblim prej 50 milionë dollarësh.

"Gati 200 nga amerikanët tanë më të mirë shkuan në qendër të Karakasit... dhe kapën një individ të akuzuar të kërkuar nga drejtësia amerikane, në mbështetje të zbatimit të ligjit, pa asnjë amerikan të vrarë", tha Hegseth në një fjalim para marinarëve dhe ndërtuesve të anijeve amerikane në Virxhinia.

Kjo ishte hera e parë që një zyrtar amerikan kishte dhënë një shifër për forcat amerikane që hynë me helikopter në Karakas si pjesë e operacionit mahnitës, i cili përfshinte gjithashtu më shumë se 150 fluturake ushtarake në role të ndryshme, duke përfshirë edhe goditjen e mbrojtjes venezueliane.

Maduro, një socialist i vetëshpallur, e udhëhoqi Venezuelën me grusht të hekurt dhe e mbajti pushtetin përmes një sërë zgjedhjesh që u konsideruan gjerësisht si të manipuluara.

Ai dhe gruaja e tij, Cilia Flores, deklaruan të pafajshëm në një gjykatë të Nju Jorkut të hënën. /Telegrafi/

Në një botë të trazuar gjeopolitike, përvoja, kredibiliteti dhe rrjeti diplomatik peshojnë më shumë se kurrë. Në një periudhë kur rendi ndërkombëtar po kalon transformime të thella dhe siguria globale është kthyer në shqetësim qendror, shtetet e vogla, si Kosova, përballen me një sfidë themelore: të sigurojnë përfaqësim të qëndrueshëm, të besueshëm dhe të respektuar në arenën ndërkombëtare. Në këtë kontekst, rizgjedhja e presidentes Vjosa Osmani për një mandat të dytë po shfaqet gjithnjë e më shumë si një domosdoshmëri strategjike, jo thjesht si një opsion politik.

Që nga viti 2024, kur Kosovës iu vendosën padrejtësisht dhe në mënyrë krejt absurde sanksionet nga Bashkimi Evropian, barra kryesore e përfaqësimit ndërkombëtar ka rënë pikërisht mbi presidenten Osmani. Në një moment delikat për pozitën ndërkombëtare të vendit, ajo ka qenë figura që ka përfaqësuar Kosovën në forumet kryesore ndërkombëtare, duke artikuluar qartë qëndrimet shtetërore dhe duke mbrojtur interesat e saj me koherencë dhe profesionalizëm diplomatik.

Paraqitja e parë e Kosovës në Samitin e NATO-s qe u mbajt në Uashington, si dhe prania e vazhdueshme e Osmanit në takime të nivelit të lartë me liderë perëndimorë, kanë ndikuar në forcimin e perceptimit të Kosovës si partner serioz dhe i besueshëm në arkitekturën euroatlantike të sigurisë. Po ashtu, paraqitja e saj e fuqishme dhe e artikuluar në Kombet e Bashkuara, përballë presidentit serb Aleksandar Vuçiq, u vlerësua gjerësisht si një nga momentet më dinjitoze dhe më përfaqësuese të diplomacisë kosovare në vitet e fundit.

Në këtë kuadër duhet përmendur edhe angazhimi i saj në raport me Shtetet e Bashkuara të Amerikës. Presidentja Osmani ka zhvilluar takime, ndonëse të shkurtra, me presidentin Donald Trump, si dhe me zyrtarë të tjerë të lartë të administratës amerikane, duke ruajtur dhe forcuar linjat e komunikimit me aleatin kryesor strategjik të Kosovës në një periudhë të ndjeshme për zhvillimet globale dhe rajonale.

Një tjetër element thelbësor mbetet kapitali diplomatik i ndërtuar nga Osmani: takime të shumta me presidentë, kryeministra dhe drejtues të organizatave ndërkombëtare; krijimi i një rrjeti të gjerë kontaktesh dhe miqësish politike, sigurimi i katër njohjeve të reja për Kosovën në vitin 2025, si dhe rikuperimi i rreth 20 ç’njohjeve, siç është bërë e ditur edhe në intervistat e saj dhe të Radios Evropa e Lirë. Këto janë rezultate që kërkojnë kohë, përvojë dhe vazhdimësi - faktorë që nuk ndërtohen përmes eksperimentimit me figura të reja në momente krize globale.

Elekuenca e saj, rrjedhshmëria në komunikim në gjuhën angleze dhe aftësia për të artikuluar qartë interesat e Kosovës e kanë bërë presidenten Osmani ]përfaqësuese të dalluar në skenën ndërkombëtare. Në një kohë kur diplomacia personale dhe komunikimi direkt me liderët botërorë janë më të rëndësishëm se kurrë, kjo përbën një avantazh konkret për shtetin e Kosovës.

Mandati i presidentes Osmani përfundon në prill 2026. Në rrethana të tjera, debati për një figurë unifikuese mund të ishte legjitim. Por, sot, përballë ndryshimeve të mëdha gjeopolitike dhe sfidave të vazhdueshme ndërkombëtare, për Kosovën prioritet mbeten vazhdimësia, përvoja dhe kredibiliteti ndërkombëtar.

Për këtë arsye, edhe opozita parlamentare duhet ta shohë këtë proces përtej interesave të ngushta partiake dhe inateve eventuale politike, dhe të veprojë në funksion të interesit shtetëror. Votimi pro mandatit të dytë të presidentes Osmani do të ishte një akt përgjegjësie institucionale dhe pjekurie politike, në shërbim të stabilitetit dhe pozitës ndërkombëtare të Kosovës.

Në këtë prizëm, rizgjedhja e presidentes Vjosa Osmani shfaqet si zgjedhja më e arsyeshme dhe më e përgjegjshme për interesin afatgjatë të vendit.