Dhomat e Specializuara kanë thënë se i vetmi autoritet që mund të merret me proceset brenda gjykatës është institucioni i Avokatit të Popullit i Gjykatës Speciale.
Kështu kanë thënë për RTK nga Haga, pasi institucioni i Avokatit të Popullit të Republikës së Kosovës kanë pasur shqetësime lidhur me procesin e gjykimit në Hagë dhe kanë publikuar edhe një raport të një organizate britanike e cila ka vërtetuar shqetësimet.
Nga Gjykata Speciale kanë thënë se nuk e kanë të qartë se cili është statusi i raportit të britanikëve.
“Sipas Kushtetutës së Kosovës, është Avokati i Popullit i Dhomave të Specializuara ka mandat për proceset në Gjykatë dhe jo Avokati i Popullit të Kosovës. Nuk është e qartë se cili është statusi i raportit”, kanë thënë nga Specialja.
Është ndarë nga jeta ish-ushtari i Ushtrisë Çlirimtare të Kosovës, Xhem Rexhepi, në moshën 57-vjeçare.
Rexhepi, i cili njihet si pjesëmarrës në tri luftëra çlirimtare, kishte kohë që po përballej me një sëmundje të rëndë.
Lajmi për vdekjen e tij është konfirmuar nga organizata e veteranëve, të cilët kanë vlerësuar kontributin dhe sakrificën e tij në rrugën e lirisë.
Në njoftim thuhet se Rexhepi do të kujtohet për guximin dhe përkushtimin e tij gjatë periudhës së luftës, ndërsa vepra e tij mbetet e çmuar për bashkëluftëtarët dhe komunitetin e veteranëve.
Ish-kryeministri i Kosovës, Avdullah Hoti, ka reaguar ashpër lidhur me zhvillimet politike në vend, duke deklaruar se zgjedhjet e 7 qershorit po mbahen si pasojë e, sipas tij, tendencave për uzurpim të shtetit.
Përmes një postimi publik, Hoti ka akuzuar kryeministrin në detyrë, Albin Kurti, duke e cilësuar si “autokrat” dhe duke bërë thirrje për mobilizim qytetar.
“Kjo po ndodh për arsyen e thjeshtë: një autokrat dëshiron të uzurpojë shtetin. Kjo nuk mund të ndodhë dhe nuk do të lejojmë të ndodhë”, ka deklaruar ai.
Hoti u ka bërë thirrje qytetarëve që më 7 qershor të dalin në votime dhe të bashkohen, siç tha ai, për mbrojtjen e shtetit të Kosovës.
Ai theksoi se shteti nuk duhet të nëpërkëmbet dhe as të abuzohet, duke shtuar se është koha për reagim të përbashkët qytetar.
Deputeti i Lëvizjes Vetëvendosje, Agim Bahtiri, ka dalë live në TikTok me qytetarë nga diaspora, ku ka diskutuar për buxhetin dhe zhvillimet në disa sektorë shtetërorë.
Në një moment, Bahtiri është ngatërruar gjatë leximit të të dhënave dhe ka pasur vështirësi në artikulimin e shifrave, gjë që është vënë re edhe nga ndjekësit e transmetimit.
“Janë eh…janë eh…marrrrrë, policia, meeh, policia me shtimin e buxhetit. I kemi shtuar 152 milonë”
Pamjet janë shpërndarë menjëherë në rrjete sociale, duke nxitur reagime të ndryshme nga qytetarët.
FC Barcelona pritet të bëjë ndryshime në skuadër gjatë merkatos së verës, ku një nga emrat që mund të largohet është edhe talenti i ri Roony Bardghji.
Sulmuesi anësor 20-vjeçar iu bashkua klubit katalanas verën e kaluar, por nuk ka arritur të sigurojë rol të rregullt në formacion, duke pasur kryesisht minuta nga stoli për shkak të konkurrencës së fortë në repartin ofensiv.
Sipas raportimeve, pakënaqësia e lojtarit për minutazhin ka ndikuar që drejtuesit e Barcelonës të shqyrtojnë mundësinë e një largimi të tij, nëse vjen një ofertë e përshtatshme.
Klubi spanjoll thuhet se ka vendosur një çmim minimal prej rreth 10 milionë eurosh për kartonin e tij, ndërsa vendimi final do të varet edhe nga vetë lojtari dhe zhvillimet në merkato.
Nëse largohet, Barcelona pritet të kërkojë zëvendësim brenda akademisë së saj të njohur La Masia.
Nga një fshat zviceran në zemër të Egjiptit: Giacomo Groppi me dekada ëmbëlsoi elitat e Egjiptit dhe la një trashëgimi të gërshetimit kulinarik dhe kulturor. Në lokalin e tij në zemër të Kajros u zhvillua një pjesë e historisë së Egjiptit.
Rovio është një fshat i vogël zviceran me rreth 750 banorë në kantonin e Tiçinos. Rrugica të ngushta të shtruara me kalldrëm, burime uji, fasada historike, pallate dhe pamje mbi liqenin magjik të Luganos. Kush do të donte të largohej nga këtu? Giacomo Groppi u largua në fund të shekullit të 19-të, sepse atëbotë Zvicra nuk ishte e pasur siç është sot. Para se të merrte rrugën e mërgimit, ai kreu zanatin e pastiçierit në Lugano.
Tiçinezët janë tetovarët e Zvicrës. Groppi u vendos në Aleksandri, ku më 1890 hapi kafenenë e tij të parë. Pasi bëri emër aty me ëmbëlsirat e tij - kroasntë, akullore e çokollata - ai shkoi në Kajro dhe hapi një tjetër pikë. Biznesi po i ecte mjaft mirë. “Maison Groppi” u bë adresa e preferuar e elitës së Egjiptit. Politikanë, pashallarë, tregtarë e ushtarakë britanikë - të gjithë vinin te “Groppi” për çaj, kafe dhe ëmbëlsira. Anëtarët e shtëpisë mbretërore, të cilët, siç dihet, ishin me origjinë shqiptare, i porosisnin ëmbëlsirat te zvicerani i famshëm i Kajros.
Mbreti Faruk i shijoi këto specialitete po aq sa edhe presidentët e mëvonshëm (Naseri, Sadati dhe Mubaraku). Por te “Groppi” nuk prodhoheshin vetëm ëmbëlsira; aty njerëzit thurnin plane për revolucione, grindeshin për politikë, binin në dashuri ose ndaheshin. Në filmin “Pacienti anglez”, çifti i dashuruar ndahet pikërisht në kopshtin e Groppit.
Café Groppi në Sheshin Talaat Harb në Kajro
Ky lokal, pa dëshirën e pronarëve, u bë pjesë edhe e turbullirave politike të Egjiptit. Më 26 janar 1952, turma të mllefosura, të cilat protestonin kundër pranisë britanike dhe përbuznin Mbretin Faruk, sulmuan kafenenë “Groppi” në qendër të Kajros. E plaçkitën dhe e dogjën, sepse e shihnin si simbol të të huajve. Megjithatë, egjiptianët nuk u ndanë nga ëmbëlsirat e familjes Groppi. Kur më 1971 u përurua diga e Asuanit, 1000 mysafirët e ftuar u shërbyen me produktet e Groppit, të cilat transportoheshin me avionë ushtarakë dhe me anije.
Nga shekulli i 19-të, në Egjipt u vendosën shumë zviceranë; disa prej tyre dominuan prodhimin dhe eksportimin e pambukut. Zviceranët madje kishin në Kajro një klub të vetin, të cilin e vizitonte edhe Mbreti Faruk, i cili erdhi në pushtet më 1936. Farukut i pëlqente të luante me birila (bowling).
Më 1952 ai u rrëzua nga froni. Një pjesë e madhe e popullsisë e perceptonte atë si marionetë të Perëndimit dhe u zemërua sidomos për shkak të stilit luksoz të jetës që celebrohej nga Faruku, ndërkohë që varfëria në vend bënte kërdi. Si pothuajse të gjithë despotët, edhe Farukut i pëlqente Zvicra: si vend për të ruajtur paratë dhe St. Moritzi si destinacion turistik për sportet dimërore. Për të kujtuar gjurmët e zviceranëve në Egjipt, ambasada e Zvicrës ka krijuar një aplikacion që të shpie te varri i orientalistit të famshëm Johann Ludwig Burckhardt. Ai njihet si zbuluesi i qytetit antik të Petrës në Jordani (më shumë për Burckhardtin në fund të këtij teksti). Një atraksion tjetër është libraria “Lehnert & Landrock”, ndër më të bukurat e Kajros, për disa dekada në pronësi të zviceranit Kurt Lambelet.
“Maison Groppi” është pjesë e historisë dhe nostalgjisë së shumë njerëzve. Gazeta “Arab News” citon arkitektin Shafik Nakla: “Vinim çdo mëngjes te kopshti i Groppit gjatë viteve 50-të për të ngrënë krosantë të freskët. Ende e mbaj mend shijen. Produktet e Groppit ishin më të mira se ato në Paris në atë kohë. Askush nuk mund të konkurronte me të. Shihnim klasën aristokrate që zbriste nga makinat Rolls-Royce ose Cadillac me kapele dhe kravatat më të mira. Gratë mbanin fustane të jashtëzakonshme.”
Këtu lexonte shtypin edhe shkrimtari Nagip Mahfuz, fitues i çmimit Nobel. Mahfuz i qëndroi besnik metropolit të Egjiptit, rrugicave dhe legjendave të tij. Ai u shqua për angazhimin për tolerancë dhe kritikoi fundamentalizmin, gjë që i kushtoi një sulm me thikë më 1994. Te Groppi, Mahfuz gjente një simbiozë mes Orientit dhe Oksidentit.
Groppi nuk ishte vetëm një kafene. Familja menaxhonte ferma e fabrika; 500 krerë lopë zvicerane kullotnin në një ishull të Nilit. Me qumështin e tyre bëhej ajka që zbukuronte tortat e dasmave me deri në nëntë kate. Në fillim të viteve 1980-të familja Groppi ia shiti biznesin një sipërmarrësi egjiptian.
Johann Ludwig Burckhardt
Siç premtova më lart, në vijim disa të dhëna për Johann Ludwig Burckhardt dhe lidhjet e tij shqiptare. Johann Ludwig Burckhardt (1784-1817) ishte pinjoll i një familjeje fisnike zvicerane nga Baseli. Ai rizbuloi qytetin shkëmbor Petra në Jordani, u konvertua në mysliman duke marrë emrin Sheik Ibrahim, mësoi arabisht dhe u bë shok i Mehmet Ali Pashës, sundimtarit me origjinë shqiptare të Egjiptit. Në veprat e tij Burckhardt veçon dy tipare të shqiptarëve: ndjenjën patriotike vetëm ndaj atdheut të tyre dhe jo ndaj Perandorisë Osmane dhe mungesën e fanatizmit fetar.
Johann Ludwig Burckhardt u lind më 25 nëntor 1784 në Lausanne të Zvicrës. Duke qenë se i ati i tij ishte kundërshtar i Napoleonit, Burckhardt vendosi të vihet në shërbim të African Association for the Discovery of the Interior Parts of Africa, një organizatë britanike. Në Maltë Burckhardt ndërroi emrin dhe veshjen dhe vazhdoi udhën drejt Sirisë. Në qytetin e Halepit përsosi gjuhën arabe. Nga Siria ndërmori udhëtime në vende të ndryshme të botës arabe.
Sipas historianit Muhamed Mufaku, shtegtari, antropologu, historiani, gjeografi dhe udhëpërshkruesi zviceran Johann Ludwig Burckhardt ishte dëshmitar i luftës së ushtarëve të Mehmet Aliut kundër vahabinjve në Arabinë Saudite, të cilët nuk e pranonin autoritetin e Sulltan Mahmutit të II-të, e refuzonin islamin osman dhe ndërprenë shkuarjen e besimtarëve në haxh.
Mes viteve 1812-1818 mijëra ushtarë me origjinë shqiptare, të gjithë nën komandën e Mehmet Aliut dhe djemve të tij Tosunit dhe Ibrahimit si dhe të Ahmet Agës, ushtarak shqiptar i njohur edhe me emrin Ahmet Bonaparti, luftuan vahabinjtë përkundër humbjeve të mëdha. Burckhardt veçon kontributin e shqiptarëve në këtë betejë kundër fanatikëve fetarë sauditë. Nga mesi i nëntorit 1812, për shembull, ushtarët shqiptarë vranë rreth 2000 vahabinj. Me kafkat e tyre Ahmet Bonaparti ndërtoi një kullë, siç dëshmon Burckhardt. Zvicerani i dashuruar në Orient njofton se Mehmet Aliu nuk e fliste mirë arabishten. Me fitoren kundër vahabinjve, Mehmet Aliu u bë një nga komandantët kyç të Perandorisë Osmane.
Gazeta zvicerane “Neue Zürcher Zeitung” shkroi para disa vitesh se Burckhardt ishte 30-vjeçar, kur më 1814 u bë haxhi duke kryer ritet përkatëse në Xhaminë e Madhe të Mekës, në Malin e Arafatit dhe vende të tjera në Mekë. Ishte i veshur si arab dhe nuk binte në sy me atë rast. Emri i tij i ri dhe i plotë ishte: Sheik Ibrahim ibn Abdallah, fort i nderuari Ibrahim, i biri i Abdallahut. Para se të vdiste më 1817, ai ua la të varfërve të Zürichut 1000 piastër nga trashëgimia e tij. Universitetit të Cambridge Burckhardt ia la krejt bibliotekën e tij me dorëshkrime arabe, persiane dhe turke. Burckhardt është i varrosur afër Portës së Qytetit Bab al-Nasr në Kajro./Telegrafi/
Manuel Akanji është pranë kalimit përfundimtar te Interi, me mbrojtësin që pritet të nënshkruajë një kontratë dyvjeçare sapo të mbyllet zyrtarisht largimi i tij nga Manchester City.
Sipas “La Gazzetta dello Sport”, marrëveshja e transferimit të përhershëm ishte e kushtëzuar nga dy klauzola të vendosura në huazimin e verës së kaluar: Akanji duhej të aktivizohej në të paktën 50 për qind të ndeshjeve, ndërsa Interi duhej të fitonte titullin në Serie A.
Qendërmbrojtësi e ka përmbushur tashmë kushtin e parë, ndërkohë që Interit i duhet vetëm një pikë në katër ndeshjet e mbetura për të vulosur matematikisht Scudetton.
Në rast se plotësohet edhe klauzola e dytë, City do të përfitojë rreth 15 milionë euro nga shitja e Akanjit.
Zvicerani kaloi tri sezone në “Etihad” para se të bashkohej me Interin në formë huazimi verën e kaluar.
Ndërkohë, “Neurazzurët” po provojnë edhe afrimin e mbrojtësit tjetër Nathan Ake./Telegrafi/
Eksperti amerikan i mbrojtjes, James Carafano, i cili punon në “Heritage Foundation”, ka folur edhe për synimet e Kosovës për hyrje në NATO, nismat e fundit në SHBA dhe për rrugën e Kosovës drejt BE’së.
Carafano është shprehur skeptik lidhur me procesin e zgjerimit të NATO’s e BE’së, duke sugjeruar që Kosova të merret më shumë me njohjet.
Ai ka thënë se i sugjeron SHBA’së, që të kërkojë veçanërisht nga Greqia, Rumania dhe Qipro, si aleate, ta njohin pavarësinë e Kosovës.
“Nëse jam i sinqertë, nuk mendoj se jemi në një periudhë ku do të shohim shumë zgjerim të NATO-s. Po ashtu, sinqerisht, nuk mendoj se jemi në njëperiudhë ku do të ketë shumë zgjerim të Bashkimit Evropian. Shumë njerëz flasin për Shqipërinë dhe Maqedoninë që të anëtarësohen në NATO. Kjo mund të ndodhë, sepse BE-ja dëshiron të krijojë përshtypjen se po zgjerohet dhe po rritet, por nuk jam i sigurt që kjo është reale”, ka deklaruar ai.
“Prandaj mendoj se ajo që kosovarët duhet të bëjnë është, dhe duhet ta kuptoni këtë: Heritage Foundation, që është think tank ku unë punoj, kur isha zëvendëspresident, ne ishim i pari think tank në Amerikë që e përqafoi dhe mbështeti krijimin e një ushtrie për Kosovën. Ne ishim të parët që promovuam idenë e anëtarësimit të Kosovës në NATO, por bota është ndryshe nga ajo kohë. Së pari, NATO është kryesisht e dizajnuar për të bërë një gjë: të pengojërusët. Kosova është relativisht larg vijave të frontit. Në kuptimin e forcimit të sigurisë në rajon, NATO mund të mos jetë korniza më e mirë për këtë. Ajo nuk është e dizajnuar për të trajtuar konfliktebrenda rajonit, por për të përballuar kërcënime tëjashtme”, ka shtuar tutje Carafano për T7.
“Nuk e di nëse BE-ja do të zgjerohet ndonjëherë. Nuk e di nëse BE-ja do të reformohetndonjëherë. Nuk e di nëse BE-ja do të ofrojëpolitika rregullatore që në të vërtetë i nxisin vendettë rriten. Prandaj mendoj se ka shumë mundësi përKosovën të zhvillohet brenda kontekstit të të qenit fjalë për fjalë në mes të Bashkimit Evropian dheNATO-s. Nuk jam i sigurt nëse anëtarësimi ështërealisht i mundshëm, por nuk jam as i sigurt që është aq relevant dhe i rëndësishëm sa ka qenë 10 vite më parë. Ajo që është shumë më e rëndësishme, sipas meje, është njohja e Kosovës nga të gjithëfqinjët e saj evropianë. Dhe një gjë që do t’iasugjeroja Shteteve të Bashkuara, nëse do mëpyesnin unë nuk jam pjesë e qeverisë amerikanedhe nuk flas në emër të saj por sidomos aleatët e rëndësishëm të SHBA-së si Rumania, Greqia dhe Qiproja, mendoj se këto janë vende që absolutisht duhet ta njohin Kosovën”, potencon Carafano.
Presidenti ukrainas Volodymyr Zelensky njoftoi një reformë të madhe të forcave të armatosura të Ukrainës, e përqendruar në rritjen e pagave për ushtarë dhe ndryshimin e rregullave të rekrutimit dhe shërbimit, me zbatimin që do të fillojë në qershor.
"Viti i pestë i luftës në shkallë të plotë paraqet sfida unike, para së gjithash në menaxhimin e personelit dhe motivimin e ushtarëve tanë", tha Zelensky.
Deklarata vjen në mes të shqyrtimit në rritje të kushteve në vijën e frontit , veçanërisht për trupat e këmbësorisë, pasi mungesa e fuqisë punëtore dhe realitetet e ashpra të fushës së betejës i ekspozojnë trupat ndaj rreziqeve të vazhdueshme nga sulmet me dronë, zjarri i artilerisë dhe minat e vendosura nga distanca.
Kontratat e përditësuara pritet t'u lejojnë ushtarëve të mobilizuar më parë të largohen nga shërbimi, me afate kohore që ende nuk janë përcaktuar, sipas deklaratës së Zelenskyt .
Dmytro Lytvyn, këshilltari i komunikimit i presidentit, tha se Ministria e Mbrojtjes dhe Shtabi i Përgjithshëm do të japin detaje dhe afate kohore mbi shkarkimin e personelit ushtarak, por nuk specifikoi se kur do të ndodhte kjo.
Zelensky tha se i kishte udhëzuar zyrtarët që të rrisnin ndjeshëm pagat, duke i dhënë përparësi drejtësisë bazuar në detyrat luftarake, përvojën dhe efektivitetin.
“Qeveria duhet të tregojë më shumë respekt për udhëheqësit ushtarakë me përvojë: Ukraina duhet të ofrojë stimuj të vërtetë në mënyrë që njerëzit që dinë të udhëheqin trupat drejtpërdrejt në vijën e frontit dhe në luftime të motivohen për të shërbyer në ushtri dhe të ndiejnë se përvoja e tyre vlerësohet”, deklaroi presidenti ukrainas.
Paga minimale për pozicionet në prapavijë duhet të jetë jo më pak se 30,000 Hra (rreth 680 dollarë), ndërsa trupat e këmbësorisë duhet të marrin kompensim dukshëm më të lartë, duke filluar nga 250,000 Hra deri në 400,000 Hra (afërsisht 5,600-9,000 dollarë), varësisht nga detyrat e tyre luftarake, sipas presidentit.
Reforma do të ndryshojë gjithashtu kushtet e rekrutimit dhe të shërbimit, duke synuar zgjerimin e shërbimit të bazuar në kontratë për t'i bërë kushtet e shërbimit më të qarta dhe më të parashikueshme.
Ndryshimet do të përcaktojnë gjithashtu kushte të qarta shërbimi dhe do të krijojnë kushte për lirimin me faza të ushtarëve të mobilizuar më parë duke filluar këtë vit, bazuar në afate kohore të përcaktuara.
"Kjo është çështja më themelore morale", tha Zelensky, duke iu referuar kushteve të shërbimit, një çështje që shqetëson shumë ushtarakë që nuk kanë qenë në gjendje të demobilizohen që nga fillimi i pushtimit në shkallë të plotë për shkak të zgjatjes së ligjit ushtarak. /Telegrafi/
Një recetë e thjeshtë me miell misri, tërshërë dhe fara, që mund të hahet e ngrohtë ose e ftohtë
Ky version i pogaçes sjell një kombinim të miellit të misrit, thekrave të tërshërës dhe farave të ndryshme, prandaj vakti bëhet më i plotë dhe më interesant për ushqimin e përditshëm. Përshtatet lehtë me kos ose qumësht dhe mund të hahet si e ngrohtë, ashtu edhe e ftohtë.
Përbërësit:
▪ 200 g miell misri ▪ 100 g bollgur, i bluar ▪ 2 vezë ▪ 200 ml kos ▪ 100 ml vaj ▪ 1 qese pluhur për pjekje ▪ 1 lugë çaji kripë ▪ 50 g fara kungulli ▪ 50 g fara luledielli ▪ 2 lugë gjelle susam ▪ 50 g boronica të kuqe të thata, sipas dëshirës
Përgatitja:
Ndizeni furrën dhe lëreni të nxehet në 180 gradë. Në një enë më të thellë rrihni vezët me kosin dhe vajin, derisa të përfitoni një masë të njëtrajtshme.
Shtoni miellin e misrit, thekrat e bluara të tërshërës, kripën dhe pluhurin për pjekje, pastaj përziejini lehtë derisa përbërësit të bashkohen.
Shtoni farat dhe boronicat e kuqe të thata, duke i përzier në mënyrë që të shpërndahen njëtrajtshëm në masë.
Lyeni tavën me pak vaj dhe hidhni masën në të, pastaj rrafshojeni sipërfaqen. Sipas dëshirës, sipër mund të shtoni edhe pak fara.
Piqeni rreth 20 minuta në 180 gradë, derisa sipërfaqja të marrë ngjyrë të artë. Nxirreni nga furra dhe lëreni pak të ftohet para se ta prisni.
Në ndeshjen e sotme të Bundesligës gjermane mes Eintracht Frankfurt dhe Hamburg SV, tifozët në tribunat e stadiumit nderuan me homazhe të veçanta të riun kosovar Sofian Podvorica, i cili humbi jetën pak ditë më parë në një aksident komunikacioni në Gjermani.
25-vjeçari nga Podujeva u varros të premten në fshatin Dumosh, në një ceremoni ku morën pjesë qindra qytetarë, familjarë dhe miq. Ndër të pranishmit ishin edhe shumë shokë të tij, të cilët kishin udhëtuar në mënyrë të organizuar nga Gjermania për t’i dhënë lamtumirën e fundit.
Atmosfera në stadium ishte prekëse, teksa tifozët e Frankfurtit – qyteti ku Sofiani kishte lindur dhe ishte rritur – shpalosën një banderolë me mbishkrimin: “Kurrë nuk do të të harrojmë Sofian, prehu në paqe”, duke treguar respektin dhe lidhjen e fortë që ai kishte me komunitetin atje.
Sipas atyre që e njohën, Sofiani kujtohet si një djalë i urtë, i shoqërueshëm dhe shumë i dashur për rrethin e tij. Një pjesë e madhe e familjes së tij kishte emigruar prej vitesh në Gjermani, ku gëzon respekt të madh në komunitetin shqiptar dhe atë gjerman, njësoj si në Kosovë.
Ky gjest i tifozëve gjermanë dëshmon edhe një herë solidaritetin dhe humanizmin që tejkalon kufijtë, duke nderuar kujtimin e një të riu që la gjurmë të thella tek të gjithë ata që e njohën./Telegrafi
Vaksinat vlerësohen si një nga mënyrat më efektive për parandalimin dhe përhapjen e shumë sëmundjeve të rrezikshme. Shkalla e mbulueshmërisë së imunizimit në Kosovë mbetet e lartë, ndërsa vaksinimi vazhdon të jetë mënyra më e sigurt për mbrojtjen e shëndetit të popullatës.
Nga viti 2024, programi i imunizimit në Kosovë vlerësohet se ka shënuar përparime të rëndësishme, përfshirë integrimin e suksesshëm të vaksinave të reja në kalendarin e rregullt të vaksinimit.
“Vaksinimi i fëmijëve mbetet shtylla kryesore e shëndetit publik dhe një ndër ndërhyrjet më efektive për mbrojtjen nga sëmundjet ngjitëse apo sëmundjet për të cilat i kemi vaksinat. Aktualisht, në kalendarin tonë i kemi 13 antigjene që janë në kalendar dhe i vaksinojmë fëmijët në vendin tonë. Është viti i tretë që ne i kemi përfshi edhe tri vaksinat e reja, atë kundër rotavirusit, pneumokokut dhe kundër Human Papilloma Virusit”, tha për RTK, Fetije Fetaj, drejtoreshë e Programit të Imunizimit, IKSHPK.
Edhe në kryeqytet, ky proces mundësohet në shumë njësi të vaksinimit. “Ju e dini që Prishtina i ka 33 njësi, përfshi QKMF-në, mirëpo ne vaksinimin e bëjmë në 15 njësi ose ambulanta të qendrave të mjekësisë familjare, të cilat janë të shpërndara jo vetëm në kryeqytet, por edhe në fshatra. Kurse, sa i përket orarit, sa i përket HPV-së dhe vaksinave të tjera, bëhet nga ora 7 deri në 19:00”, tha Valdet Hashani, drejtor në QKMF-së, Prishtinë.
Megjithatë, sfidë mbetet rënia e mbulueshmërisë me vaksinën kundër fruthit, shtytave dhe rubeolës, e cila rrit rrezikun për shpërthime të sëmundjeve.
Jennifer Lopez, 56 vjeçe, u shfaq në formë të shkëlqyer gjatë një daljeje në Los Angeles, ku tërhoqi vëmendjen me një set sportiv të ngushtë që theksonte barkun e saj të tonifikuar.
Ajo u pa duke dalë nga palestra, e veshur me bluzë me mëngë të gjata dhe geta, të kombinuara me syze dielli dhe atlete.
Kjo dalje vjen menjëherë pasi u publikua traileri i filmit të saj të ri në Netflix, “Office Romance”, ku ajo luan përkrah Brett Goldstein, yllit të “Ted Lasso”.
Filmi është një komedi romantike që ndjek një lidhje sekrete mes dy kolegëve në punë, shkruan DailyMail.
Lopez ka folur me entuziazëm për bashkëpunimin me Goldstein, madje duke e quajtur atë një nga partnerët më të mirë në skenat e puthjes.
Projekti shënon rikthimin e saj në Netflix, pas disa filmave të suksesshëm në platformë. /Telegrafi/
Sasia më e madhe nuk e rrit efektin e produktit, përkundrazi, mund ta rëndojë lëkurën dhe ta bëjë rutinën më pak efektive
Nëse keni një rutinë të rregullt të kujdesit për lëkurën dhe çdo ditë përdorni produkte si krem hidratues, serum, krem me faktor mbrojtës, vaj për fytyrën apo krem për zonën rreth syve, me siguri ndonjëherë keni pyetur veten nëse po vendosni sasinë e duhur.
Shumë njerëz mendojnë se produkti do të veprojë më mirë nëse vendoset në sasi më të madhe, por në të vërtetë nuk është kështu. Përkundrazi, sasia e tepërt mund ta rëndojë lëkurën, ta bëjë më të yndyrshme ose ta pengojë përthithjen e produkteve të tjera.
Ja cilat sasi konsiderohen të mjaftueshme që produktet të kryejnë funksionin e tyre.
Pastruesi i fytyrës
Fytyra, në krahasim me trupin, është sipërfaqe shumë më e vogël e lëkurës, prandaj nuk ka nevojë të mbingarkohet me produkt. Sasia e madhe nuk e rrit efektin e pastrimit.
Nëse përdorni pastrues me pompë, një shtypje e pompës zakonisht është e mjaftueshme. Nëse jo, mjafton një sasi sa madhësia e një monedhe në pëllëmbë. Kur përzihet me ujë, pastruesi zakonisht shkumëzon dhe krijon sasi të mjaftueshme për pastrimin e plotë të fytyrës.
Toniku për fytyrën
Ndonjëherë është e vështirë të përcaktohet sasia e saktë e tonikut që duhet përdorur. Në një pambuk pastrues vendosni disa pika, aq sa të laget lehtë, por jo të jetë i mbingarkuar me lëng.
Serumi
Një sasi e vogël serumi është e mjaftueshme për të mbuluar një sipërfaqe më të madhe të lëkurës. Dermatologët këshillojnë që, përveç fytyrës, të mos harrohen edhe qafa dhe dekolteja.
Edhe këtu mjaftojnë disa pika, zakonisht pesë deri në gjashtë. Për përdorim më të mirë, këshillohet që serumi të shpërndahet në zonat ku dëshironi ta aplikoni, duke pasur kujdes që pipeta të mos e prekë fytyrën.
Mund të vendosni disa pika në ballë, hundë, mjekër dhe faqe, pastaj ta përhapni butësisht derisa të përthithet plotësisht. Serumin mund ta vendosni edhe në pëllëmbë dhe më pas ta shtypni lehtë mbi lëkurë.
Kremi për zonën rreth syve
Zona rreth syve është e vogël, por shumë e rëndësishme, sepse përdorimi i duhur i kremit mund të japë rezultate të mira në kujdesin kundër shenjave të plakjes.
Ky krem nuk vendoset vetëm poshtë syve, por edhe sipër tyre dhe anash, pranë këndit të jashtëm të syrit. Mjafton një sasi sa madhësia e një kokrre bizeleje.
Kremi është më mirë të aplikohet me gishtin e unazës, sepse ky gisht ushtron më pak presion në lëkurë sesa gishti tregues.
Kremi hidratues
Në përgjithësi, ekspertët vlerësojnë se një sasi sa madhësia e një monedhe është e mjaftueshme për hidratimin e plotë të fytyrës.
Megjithatë, rol të rëndësishëm luan edhe tipi i lëkurës, prandaj, varësisht nga nevojat e saj, sasia mund të rritet pak. Po ashtu, i rëndësishëm është edhe mënyra e aplikimit.
Prisni që lëkura të jetë plotësisht e thatë pas serumit dhe që ai të jetë përthithur mirë, në mënyrë që kremi hidratues të mos e "hollojë" efektin e tij. Më pas, aplikojeni kremin me lëvizje të buta rrethore në fytyrë, gjë që ndihmon qarkullimin dhe i jep lëkurës pamje më të freskët.
Kremi me faktor mbrojtës SPF
Pavarësisht stinës dhe temperaturës së jashtme, përdorimi i kremit me faktor mbrojtës është i domosdoshëm, sepse e mbron fytyrën nga rrezet e dëmshme UV.
Shumë njerëz nuk janë të sigurt sa SPF duhet të vendosin në fytyrë. Si udhëzim mund të shërbejë rregulli i dy gishtave: vendosni krem mbrojtës përgjatë gishtit tregues dhe gishtit të mesëm. Kjo sasi zakonisht është e mjaftueshme për fytyrën. Të njëjtën sasi aplikojeni edhe në qafë dhe dekolte.
Vaji për fytyrën
Ashtu si te serumi, edhe për vajin e fytyrës mjafton një sasi shumë e vogël që produkti të jetë efektiv. Dy deri në tri pika janë të mjaftueshme për gjithë fytyrën.
Dermatologët këshillojnë që vaji të përdoret kryesisht në mbrëmje, pas kremit hidratues, sepse në këtë mënyrë ndihmon në "mbylljen" e hidratimit që kremi i ka dhënë lëkurës. /Telegrafi/
Një person është lënduar si pasojë e të shtënave me armë zjarri sot në rrugën “Marin Barleti” në Gjakovë.
Lajmin e ka konfirmuar Vlera Krasniqi, zëdhënëse e Policisë së Kosovës për Rajonin e Gjakovës.
“Sot rreth orës 14:25 kemi pranuar informatën për të shtëna me armë zjarri në rrugën "Marin Barleti" në Gjakovë. Një person mashkull i moshës madhore ka pësuar lëndime të lehta trupore”, tha ajo.
Sipas saj, njesitë relevante të Policisë kanë dalë në vendngjarje dhe janë duke u ndërmarr të gjitha veprimet e nevojshme ligjore për arrestimin e të dyshuarit.
Vendimi i Shteteve të Bashkuara për të tërhequr rreth 5 mijë trupave nga territori gjerman ka shkaktuar tensione të reja diplomatike mes Friedrich Merz dhe Donald Trump.
Përplasja u thellua pas deklaratave të Merz-it lidhur me politikën e SHBA-së ndaj Iranit, të cilat u interpretuan si kritike ndaj strategjisë amerikane në Lindjen e Mesme.
Trump reagoi ashpër përmes rrjeteve sociale, duke e akuzuar liderin gjerman për qëndrime të gabuara dhe duke kritikuar gjendjen politike në Gjermani.
Ky zhvillim vjen në një periudhë tensionesh të shtuara mes SHBA-së dhe disa vendeve evropiane, përfshirë edhe aleatët kryesorë të NATO-s, të cilët kanë shprehur shqetësime për ndryshimet në angazhimin amerikan në Evropë.
Nga ana tjetër, zyrtarët gjermanë kanë theksuar se partneriteti transatlantik mbetet i rëndësishëm, pavarësisht dallimeve të fundit politike.
Të dielën, më 3 maj 2026, në Kosovë pritet të mbajë mot kryesisht me diell dhe vranësira të shpërndara.
Sipas parashikimeve të Institutit Hidrometeorologjik të Kosovës, temperaturat minimale do të sillen nga 0 deri në 3 gradë Celsius, duke sjellë mëngjese të freskëta në pjesën më të madhe të vendit.
Gjatë ditës, temperaturat maksimale pritet të arrijnë nga 15 deri në 17 gradë Celsius, duke krijuar kushte të favorshme për aktivitete në natyrë.
Autoritetet rekomandojnë kujdes në orët e hershme të mëngjesit për shkak të temperaturave të ulëta.
Presidenti serb,Aleksandar Vuçiq ka deklaruar se Serbia është e gatshme të financojë ndërtimin e një autostrade që do të shtrihej deri në veri të Kosovës, përfshirë edhe zonën e Mitrovicës.
Ai ka thënë se projekti përfshin një segment deri në Jarinje dhe se Beogradi është i gatshëm të paguajë të gjitha shpenzimet e ndërtimit.
Vuçiq ka shtuar se pret nga Shtetet e Bashkuara të sigurohen që Kosova të mos paraqesë pengesa për realizimin e këtij projekti infrastrukturor.
Deklaratat e tij kanë nxitur reagime dhe pritet të ketë zhvillime të mëtejshme rreth këtij plani.
Login
