BERLIN, 27 korrik /ATSH-DPA/ – Gjermania pritet të përballet me një valë të fortë të nxehti gjatë ditëve në vijim, me temperatura që mund të arrijnë deri në 39 gradë Celsius, sipas Shërbimit Meteorologjik Gjerman (DWD).

Meteorologët parashikojnë se nesër pjesa jugperëndimore e vendit do të regjistrojë temperatura deri në 33 gradë Celsius, ndërsa veriu do të mbetet më i freskët, me rreth 22 gradë Celsius dhe më shumë vranësira.

Nga e mërkura, moti do të jetë kryesisht me diell në të gjithë vendin, ndërsa në jugperëndim temperaturat do të ngjiten deri në 37°C.

Kulmi i valës së të nxehtit pritet të jetë të enjten, kur në rajonin e Rinit të Sipërm dhe në Bavari termometri mund të shënojë 39 gradë Celsius.

Edhe zonat bregdetare do të përjetojnë temperatura të larta, deri në 31 gradë Celsius.

Megjithatë, moti i nxehtë do të shoqërohet edhe me rrezik për stuhi të forta.

Të premten priten reshje intensive shiu, breshër dhe erëra të fuqishme, veçanërisht në jug të vendit, ndërsa Bavarisë mund t’i rikthehen sërish temperatura deri në 37 gradë Celsius.

Sipas meteorologëve, moti shumë i ngrohtë pritet të vazhdojë edhe pas fundjavës. /Ad.Ab./ a.jor.

The post METEO – Gjermania në pritje të 39 gradëve Celsius appeared first on Agjencia Telegrafike Shqiptare.

ATHINË, 27 korrik /ATSH-DPA/ – Sekretari i përgjithshëm i OKB-së, Antonio Guterres, pritet të mbërrijë sonte në Qipro për një vizitë treditore, e para e një kreu të OKB-së në ishull që nga viti 2010.

Vizita synon t’i japë një shtysë të re përpjekjeve për rifillimin e bisedimeve mes komunitetit grekoqipriot dhe atij turkoqipriot, të cilat prej vitesh kanë mbetur në ngërç.

Kjo mund të jetë përpjekja e fundit e Guterres për të ndërmjetësuar një zgjidhje, pasi mandati i tij si Sekretar i Përgjithshëm i OKB-së përfundon në fund të këtij viti.

Ai pritet të zhvillojë takime me udhëheqësit e të dyja palëve dhe të nxisë dialogun për të gjetur një rrugëdalje nga konflikti i gjatë.

Qiproja mbetet e ndarë që nga viti 1974, kur një grusht shteti i nacionalistëve grekoqipriotë u pasua nga ndërhyrja ushtarake e Turqisë.

Ndarja çoi në krijimin e Republikës Turke të Qipros Veriore në vitin 1983, e cila njihet zyrtarisht vetëm nga Turqia.

Edhe pse Bashkimi Evropian e pranoi të gjithë ishullin si shtet anëtar në vitin 2004, legjislacioni i BE-së zbatohet vetëm në pjesën jugore të kontrolluar nga Republika e Qipros. Kryeqyteti Nikozia vazhdon të jetë i vetmi kryeqytet i ndarë në Evropë, me një zonë tampon të mbikëqyrur nga paqeruajtësit e OKB-së. /Ad.Ab./ a.jor.

The post QIPRO – Guterres në vizitën e parë që nga viti 2010 appeared first on Agjencia Telegrafike Shqiptare.

TIRANË, 27 korrik /ATSH/ Deputetja e Partisë Demokratike, Jorida Tabaku, përshëndeti marrëveshjen e vendeve të Ballkanit Perëndimor me Shtetet e Bashkuara të Amerikës për forcimin e kapaciteteve ushtarake dhe të sigurisë në rajon, duke e cilësuar një hap të rëndësishëm në kushtet e sfidave të reja globale.

Përmes një reagimi në rrjetet sociale, Tabaku u shpreh se Shqipëria përballet me një realitet të ri sigurie, ku kërcënimet hibride, sulmet kibernetike, teknologjitë e reja ushtarake dhe cenueshmëria e infrastrukturës kritike kërkojnë rritje të kapaciteteve kombëtare dhe një NATO më të aftë për të vepruar.

Ajo theksoi rëndësinë e anëtarësimit në NATO si një garanci për sigurinë e vendit, por nënvizoi se Shqipëria duhet të marrë më shumë përgjegjësi si aleate dhe të investojë në kapacitete reale mbrojtëse.

“Anëtarësimi në NATO ka qenë dhe mbetet një nga objektivat jetikë të Shqipërisë dhe një garanci e pazëvendësueshme për sigurinë e shqiptarëve. Por Aleanca po ndryshon dhe bashkë me të duhet të ndryshojë edhe mënyra se si ne i kuptojmë dhe i përmbushim përgjegjësitë tona”, tha ajo.

“Çdo hap që forcon partneritetin strategjik me Shtetet e Bashkuara dhe kapacitetet tona brenda NATO-s meriton mbështetje. Detyra e opozitës është të mbështesë drejtimin strategjik, por njëkohësisht të kërkojë seriozitet, përgjegjësi, transparencë dhe rezultate në zbatimin e tij. Shqipëria nuk duhet ta shohë NATO-n vetëm si një garanci që të tjerët i japin vendit tonë. Ne duhet të jemi një aleat që kontribuon, përmbush detyrimet dhe ndërton kapacitete që i shërbejnë sigurisë së përbashkët”, shkruan ajo.

Sipas saj, investimet në mbrojtje duhet të përqendrohen në fusha strategjike si siguria kibernetike, mbrojtja ajrore, kapacitetet detare, sistemet pa pilot, inteligjenca dhe infrastruktura strategjike.

Tabaku kërkoi që përdorimi i fondeve për mbrojtjen të shoqërohet me transparencë dhe kontroll institucional, duke theksuar se konfidencialiteti për çështjet operacionale nuk duhet të kthehet në mungesë llogaridhënieje për përdorimin e parave publike.

Tabaku kërkoi që fondet të drejtohen te partnerë të besueshëm dhe investime që lidhen me nevojat reale të Forcave të Armatosura dhe standardet e NATO-s.

“Parlamenti dhe institucionet përgjegjëse duhet të kenë mundësi të ushtrojnë kontroll real mbi zbatimin financiar dhe institucional të marrëveshjes. Shqiptarët kanë të drejtë të dinë se cilat janë objektivat e përgjithshme, çfarë kapacitetesh synohen të ndërtohen dhe si ndikojnë këto angazhime në sigurinë e vendit.

“Fondet për mbrojtjen duhet të shkojnë te partnerë seriozë, të besueshëm dhe me standarde të provuara. Në këtë sektor nuk ka vend për improvizim, klientelizëm apo interesa të ngushta. Çdo kontratë dhe çdo investim duhet të udhëhiqet nga nevojat reale të Forcave të Armatosura, ndërveprueshmëria me NATO-n dhe interesi kombëtar”, theksoi Tabaku.

Tabaku u ndal edhe te sfidat e reja të Aleancës, duke theksuar se Shqipëria duhet të përshtatet me një NATO më kërkuese dhe të ndërtojë projekte konkrete me rezultate të matshme.

“Në këtë realitet të ri, Shqipëria duhet të përshtatet dhe të forcohet për një NATO të re, me projekte konkrete dhe rezultate të matshme. Asambleja e NATO-s në Ankara dëshmoi se sfidat e Aleancës janë bërë më të vështira. Për Shqipërinë, ato janë dyfishuar nga mungesa e investimeve serioze dhe nga keqmenaxhimi i sektorit të mbrojtjes. Kjo nis nga modernizimi i Forcave të Armatosura dhe mbrojtja kibernetike, por përfshin edhe infrastrukturën strategjike rrugore, hekurudhore, portuale dhe detare, e cila është lënë pas dore ose është dëmtuar nga projekte korruptive”, tha ajo.

Sipas saj, një Shqipëri më e fortë brenda NATO-s është edhe një garanci më e madhe për stabilitetin e Ballkanit Perëndimor, për sigurinë e Kosovës dhe për orientimin euroatlantik të rajonit.

“Angazhimi ynë ndaj NATO-s nuk është një detyrim formal. Por është në interesin jetik të Shqipërisë, të shqiptarëve dhe të gjithë rajonit”, shkruan Tabaku.

/m.q/

The post Tabaku: Përdorimi i fondeve për mbrojtjen të shoqërohet me transparencë appeared first on Agjencia Telegrafike Shqiptare.

BERLIN, 27 korrik /ATSH-AFP/ – Qeveria gjermane ka premtuar masa më të ashpra sigurie pas sulmit vdekjeprurës të së shtunës pranë Paradës së Krenarisë në Berlin, ku një 21-vjeçar i njohur nga autoritetet për lidhje me ekstremizmin islamik vrau një grua 65-vjeçare dhe plagosi 29 persona.

Sipas hetimeve, autori, Abdul Ballout, fillimisht përplasi një minibus me turmën dhe më pas sulmoi kalimtarët me një hanxhar.

Ai u vra nga policia një ditë më vonë gjatë një operacioni në Berlin, pasi iu afrua efektivëve i armatosur me një armë të ftohtë.

Ministri i Brendshëm Alexander Dobrindt njoftoi se qeveria do të forcojë legjislacionin, duke zgjeruar përdorimin e byzylykëve elektronikë dhe paraburgimin parandalues për personat që konsiderohen kërcënim për sigurinë.

Ai kërkoi gjithashtu  ndryshime në ligjin për të miturit, duke argumentuar se nuk duhet të zbatohet për persona të rritur që paraqesin rrezik të lartë.

Rasti ka shkaktuar debat të fortë në Gjermani, pasi Ballout kishte qenë i dënuar më parë për dhunë, grabitje dhe përpjekje për t’iu bashkuar grupit terrorist Shteti Islamik (ISIS), por ishte liruar me kusht.

Ekspertët e sigurisë dhe sindikatat e policisë e kanë cilësuar lirimin e tij si një gabim të rëndë, duke kërkuar mbikëqyrje shumë më të rreptë për individët e radikalizuar.

Sulmi ka rritur edhe tensionet politike në prag të zgjedhjeve në Berlin, me partitë opozitare që kërkojnë masa më të forta kundër ekstremizmit dhe dhunës.

Kancelari Friedrich Merz deklaroi se autoritetet duhet të shpjegojnë se si një person me një profil të tillë arriti të afrohej pa pengesa pranë një aktiviteti me pjesëmarrje masive. /Ad.Ab./  a.jor.

The post BERLIN – Gjermania ashpërson ligjet e sigurisë pas sulmit terrorist appeared first on Agjencia Telegrafike Shqiptare.

UASHINGTON, 27 korrik /ATSH/ Presidenti amerikan Donald Trump, deklaroi se Uashingtoni është në “bisedime shumë të thella” me Iranin, por paralajmëroi se është i gatshëm të ndërmarrë veprime të forta ushtarake nëse përpjekjet diplomatike nuk japin rezultat, sipas Reuters.

Në një intervistë për “Axios”, Trump tha se koha për arritjen e një marrëveshjeje është e kufizuar.

“Nuk ka shumë kohë. Ose ecën shpejt, ose nuk ecën fare”, u shpreh ai, duke lënë të kuptohet se administrata amerikane nuk është e gatshme për negociata të zgjatura.

Deklaratat vijnë në një moment tensionesh të larta mes SHBA-së dhe Iranit, ndërsa përpjekjet diplomatike për të zbutur krizën vazhdojnë.

Presidenti Trump nuk dha detaje mbi afatin e bisedimeve apo mbi natyrën e mundshme të veprimit ushtarak, por theksoi se të gjitha opsionet mbeten në tryezë. /Ad.Ab./ a.jor.

The post SHBA – Trump: Veprime ushtarake nëse dështojnë bisedimet me Iranin appeared first on Agjencia Telegrafike Shqiptare.

TIRANË, 27 korrik /ATSH/ Kuvendi ratifikoi sot marrëveshjen e huasë me Shtetet e Bashkuara të Amerikës në kuadër të programit Foreign Military Financing (FMF), duke i hapur rrugë një investimi prej 302 milionë dollarësh për modernizimin e Forcave të Armatosura shqiptare.

Kështu bëri të ditur ministri i Financave, Petrit Malaj, i cili theksoi se marrëveshja përbën një hap të rëndësishëm për sigurinë kombëtare dhe forcimin e partneritetit strategjik mes Shqipërisë dhe SHBA-së.

Malaj tha se procedura e përshpejtuar ishte e lidhur me natyrën e ndjeshme të dokumentit dhe detyrimet që burojnë nga bashkëpunimi me SHBA-në dhe NATO-n. Ai deklaroi se dokumentacioni i plotë i marrëveshjes ishte i aksesueshëm vetëm për deputetët që pranuan të respektonin rregullat e konfidencialitetit.

“Edhe pse gjatë seancës pati debate mbi procedurën e shqyrtimit, askush nuk e vuri në diskutim rëndësinë e kësaj marrëveshjeje për sigurinë kombëtare. Procedura e përshpejtuar u diktua nga natyra e ndjeshme e marrëveshjes dhe detyrimet që burojnë nga partneriteti ynë strategjik me Shtetet e Bashkuara dhe Aleanca e NATO-s. Për këtë arsye, dokumentacioni i plotë ishte i aksesueshëm vetëm për deputetët që pranuan të respektonin rregullat e konfidencialitetit”, tha ai.

Sipas tij, marrëveshja është negociuar me kushte që synojnë një administrim të kontrolluar të financave publike.

“Si Ministri e Financave, kemi negociuar një marrëveshje me kushte që garantojnë administrim të kujdesshëm të financave publike: disbursim vetëm sipas nevojave konkrete të Ministrisë së Mbrojtjes, fleksibilitet në administrimin e huasë dhe monitorim të plotë nga autoritetet amerikane”, shkruan Malaj.

Malaj shtoi se “siguria nuk është çështje retorike. Është përgjegjësi. Sot Shqipëria hodhi një tjetër hap të rëndësishëm që forcon partneritetin strategjik me aleatin tonë më të madh, SHBA-në, dhe konfirmon besimin që partnerët tanë kanë tek Shqipëria si një faktor stabiliteti dhe një aleate e denjë në NATO”.

/m.q/

The post Malaj: Marrëveshja me SHBA-në, me kushte që garantojnë administrim të kujdesshëm të financave publike appeared first on Agjencia Telegrafike Shqiptare.

PARIS, 27 korrik /ATSH-AFP/ – Grupi Canal+ do të investojë gati një miliard euro midis viteve 2028 dhe 2032 në kinemanë franceze dhe evropiane, njoftoi sot në rrjetin social X, CEO i tij Maxime Saada, pas një marrëveshjeje me organizatat e industrisë.

”Kjo është një marrëveshje e re historike”, deklaroi ai duke vënë në dukje se çështja e financimit kishte shkaktuar polemika të konsiderueshme gjatë Festivalit të Filmit në Kanë në maj.

Në atë kohë, Saada kishte deklaruar se grupi i tij nuk dëshironte më të financonte filma nga nënshkruesit e një letre të hapur që denonconte “ndikimin në rritje të së djathtës ekstreme” në kinema, duke synuar konkretisht miliarderin konservator Vincent Bolloré, një aksionar kryesor në grupin e tij.

Më vonë ai mohoi çdo qëllim për të krijuar një “listë të zezë”.

Me vlerë 980 milionë euro, marrëveshja e njoftuar të hënën “do t’i lejojë Canal+ të vazhdojë t’u ofrojë abonentëve të tij filmat më të mëdhenj francezë, evropianë dhe ndërkombëtarë vetëm gjashtë muaj pas publikimit të tyre në kinema”, deklaroi kompania në një njoftim për shtyp.

Maxime Saada pohoi se Canal+ është “partneri kryesor i kinemasë franceze dhe evropiane për një kohë të gjatë”.

Kinemaja franceze “meriton të mbështetet, financohet dhe të kultivohet” dhe “kjo është ajo që ne kemi bërë për më shumë se 40 vjet”, theksoi ai./  a.jor.

The post KINEMA – Canal+ një miliard euro për kinemanë franceze dhe evropiane appeared first on Agjencia Telegrafike Shqiptare.

TIRANË, 27 korrik /ATSH/ Agroturizmet po shndërrohen gjithnjë e më shumë në qendra të rëndësishme të zhvillimit ekonomik dhe social në rajone të ndryshme të vendit, duke kontribuar në rritjen e punësimit dhe forcimin e ekonomisë rurale.

Kryeministri Edi Rama, ndau sot pamje nga agroturizmi “Hani i Qerosit”, në Kuçovë, Berat, i cili po kthehet në një pikë tërheqëse për vizitorët që kërkojnë një përvojë të lidhur me natyrën, traditat dhe jetën në fermë.

Rama thekson se agroturizmi ofron një përvojë të veçantë për të gjithë ata që duan të njihen më nga afër me mikpritjen dhe traditat shqiptare.

“Agroturizëm “Hani i Qerosit”, në Kuçovë, Berat, ku çdo vizitor ka mundësinë të bëhet pjesë e jetës në fermë përmes aktiviteteve të ndryshme, si kalërimi, ushqyerja e kafshëve dhe përgatitja e recetave tradicionale me produkte të freskëta të zones. Një përvojë e veçantë që të afron me natyrën, traditat dhe mikpritjen shqiptare”, shkruan Rama.

Sipas Ramës, investimi në agroturizmin “Hani i Qerosit” është realizuar me mbështetjen e Programit IPARD, duke krijuar një destinacion turistik dhe promovimi të turizmit rural.

/m.q/j.p/

The post Agroturizmi “Hani i Qerosit” në Kuçovë, destinacion i ri për turizmin rural appeared first on Agjencia Telegrafike Shqiptare.

PARIS, 27 korrik /ATSH-AFP/ – Presidenti Emmanuel Macron bëri thirrje sot për unitet dhe një përpjekje të përbashkët për të fituar betejën kundër zjarreve, duke pranuar nevojën për përulësi dhe duke pranuar se javët e ardhshme do të jenë të vështira.

“Ne nuk i zbatojmë mësimet e nxjerra nga beteja me vapën. Ne duhet të qëndrojmë të bashkuar dhe të luftojmë për të fituar betejën kudo”, deklaroi presidenti nga dhoma e krizës e Qendrës së Operacioneve të Zjarrfikësve dhe Shpëtimit të Departamentit të Bordeaux (CODIS).

“Ne do të jemi atje, do ta fitojmë këtë betejë së bashku dhe do të jemi atje për një kohë të gjatë”, shtoi ai, ndërsa zjarri masiv në rajonin e Gironde shkatërroi 42 000 hektarë.

Ai paralajmëroi gjithashtu se javët e ardhshme do të jenë të vështira dhe vuri në dukje se këto zjarre janë më të këqijat në Francë që nga fundi i Luftës së Dytë Botërore./  a.jor.

The post FRANCË – Macron kërkon unitet për të fituar betejën kundër zjarreve më të këqija që nga LIIB appeared first on Agjencia Telegrafike Shqiptare.

TIRANË, 27 korrik /ATSH/ Qytetarët janë mbledhur sërish sot për të protestuar në ditën e 58-të të tubimit, i cili nisi kundër investimit në zonën e Zvërnecit.

Aktivistë të shoqërisë civile dhe qytetarë u mblodhën fillimisht në sheshin “Skënderbej”, ku mbajtën pankarta dhe parulla me kërkesa politike, përfshirë thirrje për largimin e kryeministrit Edi Rama dhe ndryshime në sistemin politik.

Më pas, protestuesit nisën marshimin drejt godinës së Kryeministrisë, ku vijuan tubimin.

Kërkesat e tyre vijojnë të mbeten të njëjta, duke kërkuar ndryshimin e ligjit zgjedhor, si dhe shfuqizimin e igjit për investitorët strategjikë, Paketës së Maleve, si dhe ndryshimeve për zonat e mbrojtura dhe trashëgiminë kulturore.

Një protestues tha se policia kishte blinduar sot  zonën pranë Parlamentit gjatë protestës së paradites së sotme, duke e cilësuar praninë e madhe të efektivëve të policisë si një shenjë frike të deputetëve nga vezët që do i hidhnin qytetarët.

Duke folur para Kryeministrisë, qytetari tha se autoritetet kishin mobilizuar efektivë nga disa qarqe të vendit për të siguruar godinën e Kuvendit.

“Sot është dita e 58-të e qëndresës sonë. E nisëm si në çdo seancë parlamentare, duke parë se si ishte rrethuar “nusja” dhe shtetrrethimi, se po xhirohej filmi atje te Parlamenti sot. Dhe sa të trembur ishin nga vezët tona, sa kishin sjellë mbi 1 mijë policë nga të gjitha rrethet”, tha ai.

Aktivisti Arben Kola reagoi pas protestës së sotme para Parlementit, teksa theksoi se mazhoranca po përdor policinë kundër qytetarëve, ndërsa e cilësoi reagimin e tyre si një shenjë frike.

“Siç e patë edhe sot, qeveria e krimit, narkoshteti, ishin të tmerruar nga vezët dhe qytetarët shqiptarë. Ata po mundohen me çdo mjet të sulmojnë aktivistët, protestuesit, përmes shantazheve, mafies e të tjerë, por nuk do ia dalin. Ju duhet ta vazhdoni këtë revolucion deri në rrëzimin e kësaj palo qeverie. Nuk mund të lejojmë shitjen e Shqipërisë, nuk i dorëzohet Shqipëria tradhtarëve. Shqipëria do të lirohet njëherë e mirë nga klika komuniste bolshevike e Tiranës”, tha ai.

Pas fjalimeve të rastit, protestuesit zhvilluan marshimin e tyre të përnatshme nëpër rrugët e Tiranës, duke kërkuar largimin e qeverisë.

Protesta e 58 për Zvërnecin në Tiranë, foto: Florian Abazaj

1 nga 11

/j.p/

The post Protesta për Zvërnecin në ditën e 58-të appeared first on Agjencia Telegrafike Shqiptare.

TIRANË, 27 korrik /ATSH/ Kryeministri Edi Rama, reagoi sot pasi kryetari i partisë “Mundësia”, deputeti Agron Shehaj, mori pa leje nga ambientet e Kuvendit, një kopje të marrëveshjes së huasë me Shtetet e Bashkuara të Amerikës, të klasifikuar si sekrete, duke e cilësuar veprimin si “vjedhje të një dokumenti të klasifikuar”.

Rama publikoi një video teksa shihet një punonjëse e Kuvendit duke ndjekur deputetin, e cila rrëzohet nga shkallët.

Kryeministri u shpreh se pret që prokuroria të zbatojë ligjin për rastin, ndërsa shprehu keqardhje për punonjësen e administratës që u përfshi në situatë gjatë incidentit.

“Ky tipi që vjedh një dokument të klasifikuar dhe ia fut vrapit, është një ballist që ngre dhe ul hajdut kë i del përpara, por siç e shihni sot tentoi të ikte me vrap njësoj si ballistët pasi hynin në kotec për të grabitur pula, duke na dëshmuar botërisht se vesi del me shpirtin”, u shpreh Rama.

“Uroj po nuk shpresoj që prokuroria t’i tregojë vendin e përcaktuar nga ligji për grabitësit e dokumenteve të klasifikuar këtij personazhi të mbushur me urrejtje, ndërkohë që i shpreh keqardhje vajzës së pafajshme duke falenderuar Zotin që shpëtoi pa dëme serioze nga rendja në panik pas hajdutit”, shkruan Rama.

/m.q/j.p/

The post Shehaj mori kopjen e marrëveshjes me SHBA-në, Rama: Vodhi dokument të klasifikuar, prokuroria t’i tregojë vendin appeared first on Agjencia Telegrafike Shqiptare.

SHTUTGART, 27 korrik /ATSH-DPA/ – Prodhuesi i njohur gjerman i makinave sportive “Porsche” ka njoftuar se do të shkurtojë edhe 5 000 vende pune në Gjermani deri në fund të vitit 2035, si pjesë e një plani ristrukturimi me vlerë 2,1 miliardë euro për të rikthyer fitimet e kompanisë.

Megjithatë, kompania garanton se nuk do të ketë pushime të detyruara nga puna gjatë kësaj periudhe.

Shkurtimet do të prekin kryesisht fabrikën kryesore në Stuttgart-Zuffenhausen dhe qendrën e kërkimit dhe zhvillimit në Weissach.

Sipas “Porsche”, reduktimi i stafit do të realizohet përmes daljes natyrore në pension, skemave të pensionit të parakohshëm dhe largimeve vullnetare, në marrëveshje me sindikatat dhe përfaqësuesit e punëtorëve.

Paketa e re parashikon gjithashtu masa kursimi për punonjësit, duke përfshirë shtyrjen e një pjese të rritjes së pagave deri në vitin 2035, uljen e shpërblimeve të fundvitit dhe lidhjen më të ngushtë të bonuseve me rezultatet financiare të kompanisë.

Ndërkohë, menaxherët nuk do të kenë rritje të pagës bazë në vitet 2027 dhe 2028, ndërsa puna nga shtëpia do të kufizohet në tetë ditë në muaj.

“Porsche” po përballet me rënie të ndjeshme të fitimeve për shkak të kostove në rritje, konkurrencës së fortë në tregun kinez, tarifave amerikane dhe kërkesës më të ulët se parashikimet për automjetet elektrike.

Në vitin 2025, fitimi neto i kompanisë ra me 91%, në 310 milionë euro, ndërsa shitjet globale u ulën me 10%, duke arritur në rreth 279 mijë automjete, niveli më i ulët që nga pandemia e COVID-19./  /Ad.Ab./  a.jor.

The post GJERMANI – “Porsche” shkurton edhe 5 000 vende të tjera pune appeared first on Agjencia Telegrafike Shqiptare.

TIRANË, 27 korrik /ATSH/ Ministri i Punëve të Jashtme dhe Evropiane i Kroacisë, Gordan Grlić Radman, vlerësoi rolin e Shqipërisë si një partner të rëndësishëm dhe të besueshëm ekonomik, duke theksuar nevojën për thellimin e mëtejshëm të bashkëpunimit mes dy vendeve.

Gjatë një deklarate të përbashkët për shtyp me ministrin për Evropën dhe Punët e Jashtme, Ferit hoxha, Radman u shpreh se ekziston një potencial i madh për avancimin e marrëdhënieve ekonomike, veçanërisht në fushat e transportit, infrastrukturës, energjisë dhe mbrojtjes.

Radman theksoi edhe nevojën për përmirësimin e lidhjeve direkte mes dy vendeve.

“Shqipëria mbetet partneri i rëndësishëm dhe i besueshëm ekonomik i Kroacisë. Jemi të bindur se ekziston një hapësirë e konsiderueshme për avancimin e mëtejshëm të bashkëpunimit tonë ekonomik, veçanërisht përmes përmirësimit të lidhjeve të transportit dhe bashkëpunimit më të ngushtë në fushat e infrastrukturës, energjisë dhe mbrojtjes.

“Me ministrin Hoxha biseduam për të sqaruar sesi dje isha në Dubrovnik dhe Dubrovniku nga Tirana është vetëm 270 km larg. Por për të arritur në Tiranë më duheshin 6 orë. Shpesh më është dashur që për të arritur në Tiranë të shkoj në Vjenë dhe më pas të marr avionin për të arritur në Tiranë. Mendoj se duhet të punojmë rreth lidhjeve direkte. Mund të takoheshim me shpesh nëse do të ishim më mirë të lidhur. Për fat të keq ne kishim hapur një kompani e cila për arsye të ndryshme shkoi drejt mbylljes”, tha ai.

Ministri kroat bëri të ditur se një vëmendje e veçantë do t’i kushtohet bashkëpunimit në fushën e mbrojtjes dhe ruajtjes së detit Adriatik. Ai theksoi gjithashtu mbështetjen e Kroacisë për zhvillimin e Korridorit Adriatiko-Jonian dhe projekteve energjetike, përfshirë gazsjellësin Adriatiko-Jonian, të cilat sipas tij do të forcojnë ndërlidhjen rajonale, sigurinë energjetike dhe zhvillimin ekonomik.

Gjatë bisedimeve u diskutua edhe për bashkëpunimin në fushën e sigurisë dhe mbrojtjes, përfshirë partneritetin trepalësh mes Kroacisë, Shqipërisë dhe Kosovës, si dhe bashkëpunimin policor, menaxhimin e migracionit dhe mbrojtjen e kufijve.

“Një rëndësi të veçantë do t’i kushtojmë mbrojtjes dhe vazhdimit të bashkëpunimit për mbrojtjen e detit Adriatik. Gjithashtu Kroacia është e përkushtuar ndaj zhvillimit të korridorit Adriatiko-Jonian dhe mbështet projekte si gazsjellësi Adriatiko-Jonian të cilat do të kontribuojnë në forcimin e ndërlidhjes rajonale, sigurisë energjetike dhe rritje ekonomike. Biseduam dhe për bashkëpunimin në fushën e mbrojtjes duke përfshirë partneritetin trepalësh ndërmjet Koracisë, Shqipërisë dhe Kosovës si dhe për bashkëpunimin e shkëlqyer policor, menaxhimin e migracionit dhe mbrojtjen e kufijve”, tha ai.

Radman falënderoi Shqipërinë për pjesëmarrjen aktive në nismën “Tri Detet”, duke vlerësuar praninë e presidentit Bajram Begaj dhe të kompanive shqiptare në forumin e biznesit të zhvilluar në Dubrovnik. Sipas tij, kjo dëshmon angazhimin në rritje të Shqipërisë në drejtim të ndërlidhjes rajonale, investimeve dhe bashkëpunimit ekonomik.

“Dua të falënderoj Shqipërinë për pjesëmarrjen aktive në nismën e Tri Deteve në Dubrovnik. Pjesëmarrje e presidentit të RSH-së, Bajram Begajt, si dhe një numër kompanish shqiptare në forumin e biznesit tregoi qartë angazhimin gjithnjë e më të madh të Shqipërisë në fushën ndërlidhjes rajonale, investimeve dhe bashkëpunimit ekonomik”, tha ministri.

Ministri kroat u ndal edhe te zhvillimet rajonale dhe globale, duke theksuar mbështetjen e Kroacisë për perspektivën evropiane të vendeve të Ballkanit Perëndimor, bazuar në parimin e meritës dhe përparimit individual të secilit shtet.

“Bisedimet e sotme u përqendruan dhe në zhvillimet rajonale dhe globale, duke përfshirë krizat aktual ndërkombëtare si dhe rolin transformues të zgjerimit të Bashkimit Evropian. Kroacia mbështet fuqishëm vazhdimin e perspektivës evropiane të vendeve të Ballkanit Perëndimor, por duke u bazuar në parimin e arritjeve individuale dhe përparimin e secilit shtet. I gëzohem bashkëpunimit me Hoxhën dhe jam i bindur se në periudhën e ardhshme do të kemi mundësinë që të intensifikojmë marrëdhëniet tona dhe të vazhdojmë të zhvillojmë partneritetin ndërmjet Kroacisë dhe Shqipërisë”, tha Radman.

/m.q/j.p/

The post Radman: Potencial për avancimin e marrëdhënieve ekonomike, të punojmë për lidhje direkte Shqipëri-Kroaci appeared first on Agjencia Telegrafike Shqiptare.

SANAA, 27 korrik /ATSH-AFP/ – Rebelët Houthi të Jemenit, të mbështetur nga Irani, kanë deklaruar se kanë kryer sot sulme të reja me dronë kundër infrastrukturës naftësjellëse të Arabisë Saudite.

Sipas tyre, sulmet janë një kundërpërgjigje ndaj inkursioneve me dronë që, sipas rebelëve  Houthi, janë kryer nga mbretëria saudite.

Zëdhënësi ushtarak i Houthive, Yahya Saree, tha se janë goditur “disa objektiva të ndjeshme” dhe pika të përfshira në transportin e naftës bruto nga lindja e Arabisë Saudite drejt portit të Yanbu, në brigjet e Detit të Kuq.

Ky qytet është pika fundore e tubacionit strategjik Lindje–Perëndim, i cili shërben për eksportin e naftës saudite.

Deri tani nuk ka konfirmim të pavarur nga autoritetet saudite për sulmet apo për dëmet e mundshme. Incidenti vjen në një periudhë tensionesh të vazhdueshme në rajon, ku objektet energjetike saudite kanë qenë shpesh në shënjestër të sulmeve me raketa dhe dronë nga rebelët Houthi./  /Ad.Ab./ a.jor.

The post JEMEN – Rebelët Houthi pretendojnë sulme të reja me dronë ndaj infrastrukturës saudite të naftës appeared first on Agjencia Telegrafike Shqiptare.

TIRANË, 27 korrik/ATSH/ Zhvillimet në rajon ishin ndër çështjet e diskutuara në takimin mes ministrit për Evropën dhe Punët e Jashtme, Ferit Hoxha dhe homologut të tij kroat, Gordan Grlić Radman gjatë një takimi në Tiranë.

Në daljen e përbashkët për mediet, Hoxha u shpreh se me ministrin kroat ndanë vlerësimin e përbashkët se perspektiva evropiane e të gjitha vendeve të Ballkanit Perëndimor, e bazuar në meritë dhe në përmbushjen e standardeve evropiane, përbën një investim strategjik për të ardhmen tonë të përbashkët evropiane.

“Theksuam rëndësinë e veçantë të dialogut ndërmjet Kosovës dhe Serbisë, si një proces i domosdoshëm për normalizimin e marrëdhënieve, konsolidimin e paqes dhe përmbylljen e një kapitulli të vështirë të së kaluarës, në interes të qytetarëve dhe të perspektivës evropiane të gjithë rajonit”, deklaroi Hoxha.

Kryediplomati shqiptar deklaroi se ku proces nuk mund të ndërtohet mbi revizionizmin historik, mohimin e fakteve, lartësimin e kriminelëve të luftës apo përmes retorikave nacionaliste, përçarëse dhe deklaratave të papranueshme që relativizojnë, justifikojnë ose u japin jehonë krimeve të luftës dhe politikave të dënuara si nga drejtësia ndërkombëtare, ashtu edhe nga ndërgjegjja njerëzore.

“Një qasje e tillë nuk ka asgjë të përbashkët me vlerat evropiane, me frymën e bashkëpunimit rajonal dhe me përpjekjet për pajtim të vërtetë. E ardhmja e përbashkët evropiane e Ballkanit Perëndimor nuk mund të ndërtohet duke u kthyer pas në konfliktet e së kaluarës, por duke u përballur me historinë me përgjegjësi dhe duke ndërtuar marrëdhënie të reja mbi bazën e respektit, besimit dhe bashkëpunimit”, theksoi ai duke shtuar se pajtimi është një akt i guximshëm dhe fisnik që kërkon forcë politike, vizion, përgjegjësi dhe përkushtim për të tejkaluar trashëgiminë e dhimbshme të së kaluarës.

“Si dy vende anëtare të NATO-s, Shqipëria dhe Kroacia kanë përgjegjësi dhe kontribuojnë në mënyrë aktive për paqen e stabilitetin rajonal, si dhe atë ndërkombëtar, duke përfshirë pjesëmarrjen në KFOR në Kosovë dhe EUFOR ALTHEA në Bosnjë-Hercegovinë”, vijoi më tej Hoxha

“Prandaj çdo angazhim i yni, koordinim dypalësh, tripalësh apo më shumë nuk duhet të shqetësojë askënd e as të përdoret nga askush, në rajon apo jashtë tij, për të justifikuar militarizimin e vendit e shoqërisë e aq më pak për t’i fryrë zjarreve të rrezikshme të luftërave dhe për të rikthyer thirrjet arkaike për fitore e përkatësi territoriale”, theksoi Hoxha.

“Kushdo që ëndërron një kthim pas në histori duhet të kuptojë se në të vërtetë ka mbetur pas në kohë dhe në mendësi. Asnjë përpjekje për të ringjallur ndasitë e së kaluarës, për të ushqyer tensione apo për të penguar proceset e pajtimit dhe bashkëpunimit nuk do të mund ta tërheqë zvarrë rajonin dhe as të cenojë të ardhmen tonë të përbashkët evropiane”, shtoi ai

Shqipëria, sipas tij, do të vazhdojë të investojë me vendosmëri, vullnet politik dhe angazhim konkret për ta orientuar bashkëpunimin rajonal, si atë dypalësh ashtu edhe atë shumëpalësh, drejt mekanizmave që forcojnë dialogun e hapur dhe të sinqertë, mirëbesimin ndërmjet vendeve dhe ndërtimin e një hapësire të përbashkët zhvillimi.

“Përmes Tregut të Përbashkët Rajonal synojmë të krijojmë më shumë mundësi për qytetarët dhe bizneset tona, të integrojmë ekonomitë tona me njëra-tjetrën dhe t’i afrojmë ato gjithnjë e më shumë me Tregun e Përbashkët Evropian, duke përshpejtuar rrugëtimin tonë drejt BE”, tha Hoxha.

“Shqipëria do të mbetet e angazhuar për një Ballkan Perëndimor të paqes, stabilitetit dhe zhvillimit, tërësisht të orientuar drejt familjes evropiane ku i takon.
Në këtë rrugë, Kroacia, si vend anëtar i BE-së, mbetet një partnere aktive, e besueshme dhe domosdoshme jo vetëm për Shqipërinë, por për të gjitha vendet e rajonit”, përfundoi Hoxha.

The post Hoxha: Bashkëpunimi i Shqipërisë dhe Kroacisë për sigurinë rajonale nuk duhet të shqetësojë askënd appeared first on Agjencia Telegrafike Shqiptare.

TIRANË, 27 korrik /ATSH/ Ministri i Punëve të Jashtme dhe Evropiane të Kroacisë, Gordan Grlić Radman, vlerësoi përparimin e Shqipërisë në procesin e integrimit evropian, duke deklaruar se vendi ka pritur mjaftueshëm dhe se tashmë është koha të bëhet pjesë e Bashkimit Evropian.

Në një deklaratë për mediet, së bashku me ministrin për Evropën dhe Punët e Jashtme, Ferit Hoxha, Radman tha se Kroacia dhe Shqipëria gëzojnë marrëdhënie tradicionalisht të afërta dhe miqësore, të ndërtuara mbi besimin reciprok, vlerat e përbashkëta dhe aleancën në kuadër të NATO-s.

Ai theksoi se takimet e shpeshta në nivel të lartë dëshmojnë nivelin e shkëlqyer të bashkëpunimit mes dy vendeve në planin dypalësh, rajonal dhe ndërkombëtar.

“Kroacia dhe Shqipëria kultivojnë marrëdhënie tradicionalisht të afërta dhe miqësore, të ndërthurura mbi besimin e ndërsjellët, vlerat e përbashkëta dhe aleancën tonë të fortë në kaudër të anëtarësimit të përbashkët në NATO. Takimet tona të shpeshta dypalëshe në nivel të lartë janë pasqyrim i gjendjes së shkëlqyer të marrëdhënieve dhe bashkëpunimit tonë në planin dypalësh rajonal dhe global. Zakonisht vij në Tiranë me lajme të mira dhe besoj se do të jem ai që do të marr lajmin që Shqipëria do të jetë vend anëtarë i Evropës. Shqipëria ka pritur gjatë për të qenë pjesë e BE-së dhe mendojmë se tashmë është koha. Vitin e ardhshëm shënojmë 35 vjetorin e marrëdhënieve tona diplomatike mes Shqipërisë dhe Kroacisë dhe besoj se kjo është një mundësi e shkëlqyer për ta thelluar më tej partneritetin tonë dhe për ta forcuar më tej miqësinë ndërmjet shteteve dhe popujve tanë”, tha ai.

Ministri kroat përgëzoi Shqipërinë për përparimin në negociatat e anëtarësimit, duke e cilësuar mbylljen e përkohshme të kapitujve 25, 26 dhe 30 si një moment të rëndësishëm që konfirmon përkushtimin e vendit ndaj objektivit strategjik të anëtarësimit në BE.

“Më lejoni të përgëzoj Shqipërinë për përparimin e jashtëzakonshëm që ka arritur në rrugën e saj Evropiane. Mbyllja e përkohshme e kapitujve 25, 26 dhe 30 është një moment i rëndësishëm që konfirmon përkushtimin tuaj të vazhdueshëm për arritjen e objektivit tuaj strategjik dhe ai është anëtarësimi në BE. Gjithashtu e kemi vlerësuar dhe vlerësojmë harmonizimin e plotë të Shqipërisë me politikën e jashtme të përbashkët evropiane dhe të sigurimit të BE-së”, tha ai.

Radman inkurajoi autoritetet shqiptare të vijojnë me të njëjtin ritëm reformash, duke garantuar se Kroacia do të vazhdojë të mbështesë Shqipërinë gjatë gjithë procesit të anëtarësimit.

Sipas tij, Shqipëria jep shembull me arritjet e saj.

“Ajo dëshmon se procesi i zgjerimit të BE-së është i besueshëm vetëm kur një shtet respekton detyrimit e tij dhe arrin rezultate konkrete vetëm duke përmbushur kriteret e përcaktuara siç bëri dhe Kroacia. Kjo është rruga e vetme dhe e drejtë për të ecur përpara dhe Shqipëria ka arritur përparim mbresëlënës në këtë rrugë. Shqipëria po ecën me ritëm të mirë duke i tejkaluar dhe vendet e tjera kandidate dhe kjo vetëm falë meritave dhe arritjeve të saj. Ju inkurajoj të vazhdoni në këtë rrugë dhe do të keni mbështetjen tonë të plotë.

“Kroacia mbetet e gatshme dhe në vazhdim që t’i ofrojë ndihmë Shqipërisë gjatë procesit të saj të anëtarësimit duke ndarë përvojën tonë, duke forcuar kapacitetin e institucioneve dhe duke ofruar ndihmë teknikë sa herë që të jetë e nevojshme. Inkurajojmë Shqipërinë që të ruajë ritmin aktual të reformave dhe të arrijë rezultate të prekshme. Jam i sigurt që mundi juaj do të kurorëzohet”, tha Radman.

1 nga 5

/m.q/j.p/

The post Radman: Shqipëria përparim të jashtëzakonshëm në negociatat e anëtarësimit në BE, Kroacia do të vijojë mbështetjen appeared first on Agjencia Telegrafike Shqiptare.

TIRANË, 27 korrik /ATSH/  Ministri për Evropën dhe Punët e Jashtme, Ferit Hoxha, deklaroi se Shqipëria dhe Kroacia do të intensifikojnë bashkëpunimin strategjik në fusha kyçe si integrimi evropian, ekonomia, energjia, turizmi dhe infrastruktura.

Në një deklaratë të përbashkët për mediet me ministrin e Punëve të Jashtme dhe Evropiane të Kroacisë, Gordan Grlić Radman, Hoxha bëri të ditur se bisedimet u fokusuan te marrëdhëniet dypalëshe, hapat për zbatimin e partneritetit strategjik dhe çështje të tjera me interes të përbashkët.

Hoxha kujtoi se që nga viti 2018 Shqipëria dhe Kroacia i kanë ngritur marrëdhëniet në nivelin e partneritetit strategjik, duke theksuar se ato pasqyrojnë orientimin euroatlantik dhe vizionin e përbashkët për një rajon të bazuar në paqe, pajtim dhe integrim evropian.

Sipas Hoxhës, dy vendet po shqyrtojnë mundësinë e zhvillimit të mbledhjes së parë të përbashkët të dy qeverive.

Hoxha falënderoi Kroacinë për mbështetjen politike dhe ekspertizën teknike që ka ofruar gjatë negociatave, duke e cilësuar përvojën kroate një model frymëzues për Shqipërinë.

“Biseduam për mori të çështjes që kanë të bëjnë me marrëdhëniet tona dypalëshe, hapjen e rrugës përpara dhe për çështje të tjera me interes. Prej vitit 2018 Shqipëria dhe Kroacia kanë ngritur marrëdhëniet në nivelin e partneritetit strategjik. Mund të them me gojën plot se marrëdhëniet që gëzojmë sot mes dy vendeve janë një pasqyrë e vlerave në te cilat presojnë dy vendet tona dhe veçanërisht e një mendësisë në orientimin tonë të palëkundur euroatlantik si dhe te vizioni europianizues për rajonin që mbështet paqen, pajtimin, gjithëpërfshirjen dhe rrugën e përbashkët drejt Bashkimit Europian.

“Diskutuam për hapat e ardhshëm për zbatimin e planit të veprimit të partneritetit strategjik mes vendeve tona dhe në këtë kuadër edhe mundësinë e zhvillimit të një takimi të parë në dy qeverive i cili do t’i japë bashkëpunimit tonë një dimension të ri energjizues dhe të integruar. U ndalëm gjerësisht në procesin e anëtarësimit në Bashkimin Evropian të Shqipërisë dhe ndihmesën e vyer që Kroacia vijon te japë prej ditësh në këtë proces. Gjej rastin ta falënderoj publikisht homologun Rdaman për mbështetjen e zëshme dhe të fuqishme që Kroacia ka dhënë jo vetëm politikisht, por dhe praktikisht me ekspertizën e saj të gjatë në procesin teknik të negociatave”, tha Hoxha.

Ai nënvizoi se, pas mbylljes së tre kapitujve të parë të negociatave, qeveria shqiptare mbetet e angazhuar për të përmbushur të gjitha reformat, me objektivin që procesi teknik i negociatave të përfundojë brenda vitit 2027 dhe Shqipëria të bëhet pjesë e Bashkimit Evropian brenda kësaj dekade.

“Ajo çka Kroacia ka arritur vetëm në një dekadë pas anëtarësimit në BE është një shembull frymëzues për ne se kryerja e reformave, arritja e standardeve, shpërblehen dhe shndërrohen në një histori suksesi për të gjithë qytetarët pa përjashtim. E sigurova homologun tim kroat se pas mbylljes së tre kapitujve të parë 13 ditë më parë në Bruksel, qeveria shqiptare vazhdon të punojë me përkushtim dhe angazhim të dorës së parë për të përmbushur të gjitha detyrimet, që ne fakt janë angazhimet tona, se reformat e kërkuara me qëllim realizimin e objektivit që i kemi vënë vetes për të përmbyllur procesin teknik të negocimit brenda vitit 2027, për të bërë të mundur që Shqipëria të anëtarësohet në përputhje me ambicien tonë në përputhje me planin e punës ne Bashkimin Evropian brenda kësaj dekade. Në këtë proces nuk ka as pauzë, as pushim. Ne mbetemi tërësisht të vendosur të ruajmë këtë ritëm dhe të sigurojmë që reformat që ndërmarrin të sjellin përfitime afatgjata për qytetarët tanë dhe te forcojnë gjithashtu besueshmërinë e rinisë shqiptare e shoqërisë shqiptare, në këtë proces”, tha ai.

Ministri bëri të ditur se Shqipëria dhe Kroacia ranë dakord të rrisin bashkëpunimin ekonomik përmes nxitjes së investimeve dhe projekteve të përbashkëta në energji, turizëm dhe infrastrukturë. Ai njoftoi gjithashtu se në tetor do të zhvillohet në Tiranë sesioni i gjashtë i Komisionit të Përbashkët për Bashkëpunimin Ekonomik.

“Vlerësuam rritjen e shkëmbimeve tregtare dhe ramë dakord të intensifikojmë përpjekjet për të nxitur investimet dhe projekte të përbashkëta në energji, turizëm dhe infrastrukturë. Gjatë muajit tetor ne do të ndërpresim në Tiranë sesionin e gjashtë të komisionit të përbashkët të bashkëpunimit ekonomik i cili nuk është ngritur prej kohësh. Ramë dakord për të thelluar më tej bashkëpunimin në fushën e turizmit, se Shqipëria ka shumë për të mësuar nga Kroacia në këtë fushë. Përmirësimin e lidhjeve të transportit, një aspekt themelor. Së bashku do të nxisim mundësitë për lidhje direkte ajrore dhe për zhvillimin e lidhjeve direkte detare kurdo ku është e mundur dhe ekonomikisht përfituese”, tha Hoxha.

Në fushën e transportit, Hoxha tha se synojnë përmirësimin e lidhjeve ajrore dhe detare, si dhe avancimin e projekteve strategjike si Korridori Blu, Korridori VIII dhe gazsjellësi Adriatiko-Jonian, i cili do të lidhet me gazsjellësin TAP dhe do të kontribuojë në gazifikimin e vendeve të rajonit.

“Zhvillimi i Korridorit Blu, Korridorit VIII, Nisma e Tre Deteve dhe integrimi i tyre me korridoret e tjera panevropiane do të kontribuojë jo vetëm në përmirësimin e infrastrukturës rrugore, hekurudhore e ujore, por edhe në forcimin e kapaciteteve të lëvizshmërisë ushtarake, një aspekt i rëndësishëm i bashkëpunimit në fushën e sigurisë si dy vende anëtare të NATO-s”, tha Hoxha.

Hoxha vlerësoi edhe rolin e diasporës shqiptare në Kroaci, duke e cilësuar atë një urë të rëndësishme miqësie mes dy vendeve. Ai njoftoi gjithashtu se gjuha kroate do të përfshihet për herë të parë si gjuhë e huaj me zgjedhje në Fakultetin e Gjuhëve të Huaja, duke nisur nga viti akademik 2026-2027.

“Përmendëm diasporën shqiptare në Kroaci e cila mbetet një aset i çmuar i marrëdhënieve tona, një urë miqësie që kontribuon në jetën sociale dhe ekonomike të Kroacisë, ndërsa Kroacia ka qenë dhe mbetet një shembull i trajtimit dinjitoz dhe integrimit efektiv të pakicave. Ndava me homologun tim lajmin e mirë se gjuha kroate për herë të parë do të përfshihet në programin mësimor si gjuhë e huaj me zgjedhje në vitin akademik 2026-2027 në fakultetin e Gjuhëve të Huaja”, tha ministri.

Ministri i Jashtëm Ferit Hoxha me homologun kroat, foto: Florian Abazaj

1 nga 5

/m.q/j.p/

The post Hoxha: Synojmë përfundimin e negociatave me BE-në brenda 2027-ës, Kroacia frymëzim se reformat shpërblehen appeared first on Agjencia Telegrafike Shqiptare.

PARIS, 27 korrik /ATSH-AFP/ – Franca do të përjetojë një tjetër valë të nxehti duke filluar nga e marta dhe duke ngritur shqetësime në lidhje me kushtet e pafavorshme për luftën kundër zjarreve dhe një ngarkesë të mëtejshme me pacientë në spitale.

“Vala e të nxehtit do të vendoset mbi një pjesë të madhe të vendit të martën, më 28 korrik, me një intensitet kulmor të mërkurën, më 29 korrik”, paralajmëroi ”Météo-France” në një informim, duke konfirmuar mbërritjen e këtij episodi të ri, i cili ishte konsideruar i mundshëm ditët e fundit.

”Të mërkurën, temperaturat do të vazhdojnë të rriten me një kulm të nxehtësisë intensive në një pjesë të madhe të Francës perëndimore. Temperaturat pritet të arrijnë 38°C në Paris dhe Tours, 36°C në Lyon dhe Grenoble, dhe kulme prej 40°C në jugperëndim, një rajon i prekur nga zjarret në Gironde dhe Landes”, sipas shërbimit publik të motit.

Thibault Corouge, një parashikues moti në ”Météo-France”, tha gjithashtu se era do të jetë “më pak e fortë në ditët në vijim”, edhe pse “ajri do të jetë pak më i thatë”.

– “Jini shumë të kujdesshëm” –

Ministri i Brendshëm, Laurent Nunez deklaroi sot se zjarri në Gironde, i cili ka shkatërruar rreth 42 000 hektarë që nga e mërkura, ishte “i stabilizuar”, por “jo i përmbajtur”.

Ai i nxiti të gjithë të “mbeten shumë të kujdesshëm” për shkak të rikthimit të nxehtësisë intensive.

Shqetësimet shtrihen edhe në sistemin e kujdesit shëndetësor.

“Spitalet do të vuajnë në mënyrë të pashmangshme përsëri; ato do të duhet të përshtaten edhe një herë, qoftë në Bordeaux apo në të gjithë vendin”, deklaroi Arnaud Robinet, kreu i organizatës që përfaqëson spitalet publike franceze, në TF1.

“Është e qartë se objektet tona nuk janë përshtatur me ndryshimet klimatike”, vazhdoi ai, duke kujtuar se kishte “dhënë alarmin disa vite më parë duke bërë thirrje për një fond të gjelbër për spitalet, të ngjashëm me atë që u bë për komunat”.

Ndërsa “disa salla operacioni dhe reparte materniteti” kanë ajër të kondicionuar, përshtatja e ambienteve “përfaqëson afërsisht dy miliardë euro në vit” në investime, specifikoi presidenti i Federatës Franceze të Spitaleve (FHF).

– Nxehtësi gjatë gjithë javës –

Për ditët në vijim, ”Météo-France” parashikon një zhvendosje të temperaturave të larta drejt lindjes të enjten, por “temperaturat megjithatë duhet të mbeten të larta gjatë gjithë javës”.

Kohëzgjatja e valës së nxehtësisë ende nuk është përcaktuar.

Kjo do të jetë periudha e katërt e nxehtësisë ekstreme këtë verë dhe vala e 54-t e nxehtësisë në të gjithë vendin që nga viti 1947.

Një valë nxehtësie përkufizohet si një periudhë gjatë së cilës temperaturat janë anormalisht të larta për disa ditë.

Për ta përcaktuar atë, ”Météo-France” mbështetet në Treguesin Kombëtar Termik (ITN), një mesatare e matjeve ditore të temperaturës së ajrit nga 30 stacione meteorologjike në të gjithë vendin.

ITN duhet të arrijë ose të tejkalojë 25,3°C për një ditë të vetme dhe të mbetet në ose mbi 23,4°C për të paktën tre ditë radhazi.

Ndryshimi i klimës i shkaktuar nga emetimet e gazrave serrë të shkaktuara nga njeriu – veçanërisht përdorimi masiv i lëndëve djegëse fosile – po i bën këto valë të nxehti më të shpeshta, më të gjata dhe më intensive. Ato mund të ndodhin edhe më herët ose më vonë gjatë sezonit.

Qeveria pret një ngrohje mesatare prej +4°C deri në fund të shekullit në Francë, me 10 herë më shumë ditë valësh të nxehti (krahasuar me vitet 1976-2005). Deri atëherë, Lille do të ketë klimën e Bilbaos sot, dhe Parisi atë të Montpellier./ a.jor.

The post KOMENT – Zjarret dhe spitalet shqetësimi kryesor i francezëve në prag të valës së ardhshme të të nxehtit appeared first on Agjencia Telegrafike Shqiptare.

TIRANË, 27 korrik /ATSH/ Deputeti i Partisë Demokratike, Klevis Balliu, reagoi sot pas protestës së zhvilluar këtë të hënë para parlamentit, ku theksoi se ndaj protestuesve u ushtrua dhunë dhe se policia u përdor ndaj kundërshtarëve politikë të Kryeministrit.

Sipas Balliut, arrestimet dhe shoqërimet e qytetarëve kanë nisur që përpara fillimit të protestës, ndërsa shprehet se disa të rinj janë tërhequr zvarrë nga efektivë policie.

Balliu tha se, disa qytetarë kanë përfunduar në spital, ndërsa të tjerë janë shoqëruar në komisariate, vetëm sepse, sipas tij, tentuan të hedhin vezë në shenjë proteste ndaj qeverisë.

“Shoqërimet dhe arrestimet filluan që përpara protestës, të rinjtë u tërhoqën zvarrë nga mercenarë partie, që ditën vishen si policë dhe natën veshin mantelin e patronazhistit. Disa qytetarë janë dërguar sërish në spital, të tjerë në qelitë e paraburgimit. Edhe më i turpshëm është fakti që, gjatë gjithë kësaj kohe që qytetarët janë dhunuar, institucionet ligjzbatuese nuk kanë ndërmarrë asnjë hap për të mbrojtur protestuesit. Ku është Prokuroria? Ku është drejtësia? Si ka mundësi që qytetarët dhunohen në mes të ditës dhe nuk arrestohen as urdhëruesit, as ekzekutuesit?”, tha Balliu.

Balliu theksoi se “Partia Demokratike dënon këto akte kriminale, çnjerëzore dhe barbare të këtij pushteti, tashmë të degraduar dhe në grahmat e fundit”.

“Ne u garantojmë qytetarëve se do të bëjmë gjithçka për t’i vendosur para drejtësisë këta narkopushtetarë, të cilët kanë dhunuar qytetarët e lirë të këtij vendi me skema të denja për diktaturën hoxhiste. Nuk është e largët dita kur të gjithë këta narkoterroristë të pushtetit do të përballen me ligjin, me drejtësinë dhe me qytetarët”, tha ai.

/m.q/j.p/

The post Balliu: PD dënon dhunën ndaj protestuesve para parlamentit appeared first on Agjencia Telegrafike Shqiptare.

TIRANË, 27 korrik /ATSH/ Kreu i grupit parlamentar të Partisë Socialiste, Taulant Balla mbrojti procedurën e ndjekur për miratimin e marrëveshjes me Shtetet e Bashkuara për financimin e pajisjeve ushtarake, duke theksuar se interesi kombëtar dhe siguria e vendit justifikonin shqyrtimin e përshpejtuar në Kuvend.

I pyetur për akuzat e opozitës se ishin shkelur afatet parlamentare, Balla tha se Kushtetuta përcakton qartë rastet kur nuk lejohet procedura e përshpejtuar dhe se, në këtë rast, institucionet shqiptare vepruan me seriozitet maksimal.

Sipas tij, marrëveshja prej 302 milionë dollarësh është mbështetja më e madhe që Shtetet e Bashkuara i kanë dhënë Shqipërisë në dekadat e fundit dhe do të forcojë kapacitetet mbrojtëse të vendit në kuadër të angazhimeve në NATO.

Balla tha se procedura u përshpejtua për të mos vonuar hyrjen në fuqi të marrëveshjes dhe nisjen e disbursimit të fondeve, që sipas tij pritet të fillojë në fillim të muajit shtator. Ai shtoi se norma e interesit nuk mund të bëhet publike, pasi është pjesë e informacionit konfidencial të dakordësuar mes dy vendeve.

“Kushtetuta e vendit ka parashikuar ligjet për të cilat nuk lejohet procedura e përshpejtuar, por mendoj që interesat e vendit, dhe kur flas për interesat e vendit, janë edhe interesat e sigurisë kombëtare në kushtet e një bote të trazuar, për herë të parë në Europë që nga Lufta e Dytë Botërore ka një luftë. Mendoj që interesi kombëtar është i tillë që një marrëveshje që forcon kapacitetet mbrojtëse të Shqipërisë, për të cilat ne synojmë që, që në shtator të fillojnë lëvrimet e para, gjithçka që na duhet për të forcuar mbrojtjen tonë, për të respektuar edhe elementët e sekretit, pra, për të cilën kemi pasur gjithë diskutimin. Ka qenë e nevojshme që të gjitha institucionet e përfshira në shqyrtimin e saj…

“Gjej rastin të përgëzoj qeverinë shqiptare, Kryeministrin, ministrin e Financave, ministrin e Mbrojtjes, të gjithë ata të përfshirë në negocimin e kësaj marrëveshjeje. Janë 302 milionë dollarë. Nëse do të bënim një bilanc historik të 35 viteve. Të paktën 35 vite në 104 vite marrëdhënie diplomatike me Shtetet e Bashkuara të Amerikës. Kjo është edhe mbështetja më e madhe që Shtetet e Bashkuara të Amerikës i japin Shqipërisë”, tha ai.

Duke komentuar bojkotin e opozitës, Balla deklaroi se Partia Demokratike nuk mungoi për shkak të procedurave, por për arsye politike, duke e cilësuar marrëveshjen si historike për sigurinë kombëtare të Shqipërisë.

“Duhet të kuptoni që arsyeja pse Partia Demokratike bojkotoi sot seancën e votimit të saj marrëveshjeje. Nuk ka të bëjë fare me procedurat. Janë e njëjta parti politike që bojkotoi edhe pjesëmarrjen e Shqipërisë në Bordin e Paqes. Janë e njëjta parti politike që bojkoton sot votimin në Kuvend të kësaj marrëveshjeje historike. Nuk hezitoj ta quaj marrëveshje historike, sepse është e rëndësishme aq sa mund të lejohet, për shkak të disponimit dhe certifikatës të sigurisë dhe të firmosjes së deklaratës së konfidencialitetit”, tha ai.

Në prononcimin për gazetarët, Balla u ndal edhe te Reforma Administrativo-Territoriale, duke bërë të ditur se puna e Komisionit të Posaçëm po vijon sipas planit dhe se në sesionin e ardhshëm parlamentar do të paraqiten propozimet përfundimtare.

Ai theksoi se reforma nuk do të kufizohet vetëm te ndarja e re administrativo-territoriale, por do të përfshijë edhe masa për përmirësimin e shërbimeve publike, me synimin që qytetarët, si në zonat urbane ashtu edhe në ato rurale, të kenë akses më të mirë në arsim, shëndetësi, infrastrukturë dhe shërbime administrative. Sipas Ballës, do të parashikohen edhe zgjidhje për qytetarët që nuk përdorin shërbimet online, përmes zyrave të posaçme në çdo njësi vendore.

“Në sesionin tjetër, përveç kësaj pjese, do të keni edhe propozime që lidhen me përmirësimin e shërbimeve. Fokusi ynë është që të garantojmë që çdo shtetasi të Shqipërisë, pavarësisht se jeton në qendër të Tiranës apo në fshatin më të thellë të Shqipërisë, të ketë infrastrukturë arsimore të mirë, infrastrukturë shëndetësore të mirë, infrastrukturë rrugore të mirë, shërbime. Jo pa qëllim kemi investuar përmes e-Albania-s në përmirësimin e shërbimeve dhe ofrimin e shërbimeve online.

“Për këto shërbime online duhet të ofrohen në mënyrë të atillë që edhe moshat e treta apo të tjerë që nuk i aksesojnë dot shërbimet, t’i kenë në zyrat e posaçme në çdo fshat, në çdo qendër komune, në mënyrë që ne të kemi, flas për zonën rurale, të garantojmë shërbime”, tha ai.

Kreu i grupit parlamentar PS, Taulant Balla, foto: Andrin Hoxha

1 nga 2

/m.q/

The post Balla: Marrëveshja 302 milionë dollarëshe me SHBA u përshpejtua për interesin kombëtar appeared first on Agjencia Telegrafike Shqiptare.