PEKIN, 28 dhjetor /ATSH -DPA/ Ministrat e jashtëm të Tajlandës dhe Kamboxhias kanë mbërritur në Kinë për bisedime diplomatike, pasi dy vendet fqinje ranë dakord për një armëpushim pas disa javësh përplasjesh kufitare, njoftuan sot zyrtarët.

Takimet mbahen sot dhe nesër në provincën jugperëndimore kineze Yunnan, nën drejtimin e ministrit të Jashtëm të Kinës, Wang Yi, raportoi agjencia shtetërore e lajmeve “Xinhua” duke cituar Ministrinë e Jashtme kineze.

Në bisedimet dypalëshe me homologun kamboxhian, Prak Sokhonn, Wang Yi u bëri thirrje palëve të punojnë për një armëpushim gjithëpërfshirës dhe afatgjatë, si dhe për rindërtimin e besimit të ndërsjellë.

Nga ana e tij, Sokhonn shprehu shpresën se bisedimet trepalëshe do të kontribuojnë në arritjen e një paqeje të përhershme mes dy vendeve.

Në konsultime pritet të marrin pjesë edhe përfaqësues të forcave të armatosura të Kinës, Tajlandës dhe Kamboxhias, me synimin për të forcuar zbatimin e armëpushimit, për të rifilluar shkëmbimet dhe për të ndërtuar besim politik mes vendeve fqinje.

Ministria e Jashtme kineze theksoi se Pekini synon të ofrojë një platformë dialogu dhe të luajë një rol konstruktiv në stabilizimin e marrëdhënieve dypalëshe.

Ftesa e Kinës vjen një ditë pasi Tajlanda dhe Kamboxhia ranë dakord për një armëpushim të menjëhershëm, i cili u formalizua me nënshkrimin e një deklarate të përbashkët nga ministrat e mbrojtjes të të dyja vendeve.

Sipas Ministrisë së Jashtme të Tajlandës, marrëveshja parashikon që armëpushimi të monitorohet për 72 orë për të garantuar zbatimin e tij, ndërsa raportimet e sotme tregojnë se ai po respektohet. Shumë banorë të zhvendosur nga dhuna tashmë janë kthyer në fshatrat e tyre përgjatë kufirit, raportoi gazeta “Bangkok Post”. /Ad.Ab./

The post FOKUS – Tajlanda dhe Kamboxhia bisedime paqeje në Kinë appeared first on Agjencia Telegrafike Shqiptare.

MOSKË, 28 dhjetor /ATSH – DPA/-Rusia deklaroi se presidenti amerikan Donald Trump ka rënë dakord me presidentin Vladimir Putin se një armëpushim i përkohshëm në Ukrainë vetëm “do të zgjaste” konfliktin dhe “rrezikonte një rinisje të luftimeve”, gjatë një bisedë telefonike midis dy liderëve të zhvilluar sot.

Presidenti ukrainas Volodymyr Zelensky, i cili po zhvillon aktualisht bisedime me Trump në resortin e tij Mar-a-Lago në Florida, kishte propozuar më parë një armëpushim 60-ditor për t’u dhënë ukrainasve mundësinë të votonin për një plan paqeje të mundshëm në një referendum.

Moska ka deklaruar prej kohësh se dëshiron të shkojë direkt te një marrëveshje përfundimtare pa kaluar përmes një armëpushimi paraprak.

Ndërkohë, Putin ka pranuar të vazhdojë bisedimet për gjetjen e një zgjidhjeje për konfliktin si pjesë e grupeve të punës të krijuara për këtë qëllim, sipas këshilltarit të tij për politikën e jashtme, Yuri Ushakov, raporton agjencia shtetërore ruse TASS. /Ad.Ab./

The post MOSKË – Trump dhe Putin: Armëpushimi vetëm do të zgjaste luftën në Ukrainë appeared first on Agjencia Telegrafike Shqiptare.

FLORIDA, 28 dhjetor /ATSH/ – Presidenti ukrainas Volodymyr Zelensky ndodhet në Florida për bisedime me presidentin Donald Trump në rezidencën e tij Mar-a-Lago, sipas BBC.

Dy liderët po diskutojnë një version të përditësuar të planit të paqes, të ndërmjetësuar nga SHBA-ja, i cili ende nuk është mbështetur nga Moska.

“Shumë gjëra mund të vendosen para Vitit të Ri”, tha Zelensky, duke shtuar se Rusia ka kryer mijëra sulme gjatë kësaj jave.

Përpara takimit, Trump ka zhvilluar një bisedë telefonike me presidentin rus Vladimir Putin, të cilën e përshkroi si “shumë produktive”.

Presidenti ukrainas Volodymyr Zelensky falënderoi Donald Trump për pritjen në Florida, duke thënë se shpreson që bisedimet të “sjellin paqen sa më shpejt të jetë e mundur”.

Duke shpjeguar arsyen e takimit në Florida, Zelensky tha se ekipet e tyre kanë punuar prej kohësh mbi një plan paqeje me 20 pika dhe se takimi i sotëm është i përqendruar te diskutimi i strategjive për ta çuar këtë plan përpara.

I pyetur nëse beson se do të ketë lëshime territoriale në kuadër të një marrëveshjeje të mundshme, presidenti ukrainas u tregua i rezervuar, duke theksuar se kjo çështje do të diskutohet gjatë bisedimeve të sotme.

Ndër zyrtarët ukrainas që shoqërojnë Zelenskyn në takimin me Trump ështe edhe ministri i Ekonomisë, Oleksii Sobolev, çka sugjeron se bisedimet do të përqendrohen pjesërisht te rindërtimi i Ukrainës pas luftës.

Trump la të kuptohet se ky proces mund të sjellë përfitime të mëdha ekonomike.“Ka  potencial për fitime të mëdha,” u shpreh Trump.

Vëzhguesit vunë re se një skenar i ngjashëm ishte ndjekur edhe në tetor, gjatë vizitës së fundit të Zelenskyt në SHBA, kur Trump foli fillimisht me Putinin përpara takimit me liderin ukrainas. Pas atij takimi, Trump hezitoi të furnizonte Ukrainën me raketa me rreze të gjatë veprimi dhe shtyu Kievin drejt një marrëveshjeje paqeje.

Këtë herë, Zelensky ka ardhur me një propozim konkret paqeje, që përfshin ide të debatueshme si krijimi i një zone të çmilitarizuar në rajonin e Donetskut dhe ndarja e operimit të centralit bërthamor të Zaporizhas, i cili aktualisht ndodhet nën kontrollin rus, me Shtetet e Bashkuara.

Pas bisedimeve të Trump me Putinin para dhe pas negociatave të sotme, pritet të shihet reagimi i presidentit amerikan ndaj këtyre propozimeve.

Duke iu përgjigjur pyetjeve të gazetarëve përpara takimit, Trump u përpoq të ulë pritshmëritë, duke thënë se lufta ose do të “përfundojë”, ose do të “vazhdojë për një kohë shumë të gjatë” me shumë viktima. Ai e quajti “të pamend” një pyetje mbi garancitë e sigurisë për Ukrainën, por më pas shtoi se do të ketë një marrëveshje të fortë sigurie, me përfshirjen aktive të vendeve evropiane.

Trump tha gjithashtu se nuk ka vendosur asnjë afat për arritjen e një marrëveshjeje paqeje dhe shprehu bindjen se si presidenti rus, ashtu edhe ai ukrainas “duan të bëjnë një marrëveshje”. Zelensky nuk reagoi publikisht ndaj kësaj deklarate. /Ad.Ab./

The post SHBA – Trump dhe Zelensky takohen për bisedime rreth paqes në Ukrainë appeared first on Agjencia Telegrafike Shqiptare.

DAMASK, 28 dhjetor /ATSH-DPA/ – Dhuna shpërtheu sot midis mbështetësve dhe kundërshtarëve të qeverisë siriane, duke lënë disa të vrarë dhe dhjetëra të plagosur, sipas aktivistëve dhe mediave shtetërore.

Dy protestues kundër qeverisë u vranë në provincën bregdetare Latakia, pasi besnikët e qeverisë dhe forcat e sigurisë sulmuan demonstruesit, njoftoi Observatori Sirian për të Drejtat e Njeriut.

Protestat shpërthyen në disa provinca, përfshirë Latakian, e cila kryesisht banohet nga pakica fetare alavite, sipas grupit britanik që monitoron ngjarjet, duke cituar rrjetin e tij të aktivistëve brenda Sirisë.

Demonstrata të ngjashme u raportuan edhe në Tartus, Homs dhe Hama. Dhjetëra protestues antiqeveritarë u plagosën pasi u sulmuan me armë zjarri dhe thika, shtoi grupi.

Sipas aghjencisë shtetërore SANA, autoritetet siriane fajësuan mbështetësit e ish-udhëheqësit të rrëzuar Bashar al-Assad për sulmet ndaj forcave të sigurisë dhe civilëve gjatë trazirave në Latakia, duke shkaktuar tre të vdekur.

Të paktën 60 të tjerë u plagosën në Latakia, sipas raportimeve të autoriteteve shëndetësore. Ministria e Brendshme tha se një anëtar i forcave të sigurisë u vra dhe të tjerë u plagosën gjatë përleshjeve.

Protestat masive u nxitën nga thirrja e udhëheqësit të njohur alavite, Ghazal Ghazal, për të kërkuar të drejtën për vetëvendosje. Që nga rrëzimi i al-Assad vitin e kaluar, Siria është përballur me dhunë sektariane, pavarësisht premtimeve të presidentit të përkohshëm Ahmed al-Sharaa për të mbrojtur pakicat. /Ad.Ab./

The post DAMASK – Disa të vrarë dhe dhjetëra të plagosur gjatë përleshjeve në Siri appeared first on Agjencia Telegrafike Shqiptare.

UASHINGON, 28 dhjetor /ATSH-DPA/ – Presidenti amerikan Donald Trump tha sot se kishte pasur një bisedë telefonike “shumë produktive” me presidentin rus Vladimir Putin, pak para se të priste presidentin ukrainas Volodymyr Zelensky në Florida.

“Sapo kam pasur një bisedë të mirë dhe shumë produktive me presidentin Putin”, shkroi Trump në platformën e tij Truth Social, pa dhënë detaje të mëtejshme.

Zëdhënësi i Kremlinit, Dmitry Peskov, konfirmoi bisedën telefonike kur u pyet nga agjencitë ruse të lajmeve, por refuzoi të tregojë se çfarë u diskutua.

Ky zhvillim vjen ndërsa presidenti amerikan ka planifikuar të zhvillojë takimin me Zelenskyn në resortin e tij Mar-a-Lago në Palm Beach, si pjesë e përpjekjeve të fundit për të përfunduar luftën që nisi Rusia në shkurt 2022.

Administrata Trump në fund të nëntorit paraqiti një plan paqeje me 28 pika, i cili shqetësoi Kievin dhe aleatët e tij duke reflektuar disa pozicione të Kremlinit.

Që atëherë, Zelensky dhe partnerët e tij kanë punuar mbi një kornizë të rishikuar me 20 pika, përfshirë gjatë takimeve të fundit në Berlin dhe Majemi me zyrtarë të lartë të administratës Trump, ndërsa SHBA-ja ka zhvilluar gjithashtu bisedime të veçanta me Moskën. /Ad.Ab./

The post SHBA – Trump: Bisedë produktive me Putinin para takimit me Zelenskyn appeared first on Agjencia Telegrafike Shqiptare.

LONDËR, 28 dhjetor /ATSH/-  Një rishikim i gjerë shkencor sugjeron se, pavarësisht përdorimit gjithnjë e më të madh, ka prova të pamjaftueshme shkencore që kanabisi mjekësor të jetë efektiv për shumicën e gjendjeve për të cilat promovohet. Megjithatë, disa shkencëtarë kanë vënë në pikëpyetje cilësinë e gjetjeve të studimit, sipas “ScienceAlert”.

Studiues në SHBA analizuan 124 studime, të përzgjedhura nga mbi 2 500 punime të publikuara mes janarit 2010 dhe dhjetorit 2025.

Rishikimi konfirmoi se kanabisi mjekësor duket se është efektiv për disa pak gjendje, për të cilat Administrata Amerikane e Ushqimit dhe Barnave (FDA) e ka miratuar tashmë përdorimin.

Këto përfshijnë uljen e të përzierave dhe të vjellave nga kimioterapia, përmirësimin e oreksit te pacientët me HIV, si dhe trajtimin e disa çrregullimeve të rënda të krizave epileptike te fëmijët.

Por, sipas studimit, këto raste janë përjashtim, jo rregull.

“Provat nga provat klinike të randomizuara nuk e mbështesin përdorimin e kanabisit apo kanabinoidëve për shumicën e gjendjeve, për të cilat promovohet, si dhimbja akute dhe pagjumësia, shkruajnë autorët.

Rishikimi thekson gjithashtu rreziqe të mundshme shëndetësore nga përdorimi i shpeshtë i kanabisit të thithur ose me potencë të lartë, përfshirë rritjen e rrezikut për simptoma psikotike, çrregullim të përgjithësuar ankthi dhe sëmundje kardiovaskulare.

“Ndërsa shumë njerëz i drejtohen kanabisit duke kërkuar lehtësim, rishikimi ynë nxjerr në pah hendekë të mëdhenj mes perceptimit publik dhe provave shkencore për efektivitetin e tij në shumicën e gjendjeve mjekësore”, tha autori kryesor Michael Hsu, studiues klinik në Universitetin e Kalifornisë, Los Anxhelos (UCLA).

“Nevojiten kërkime të mëtejshme për të kuptuar më mirë përfitimet dhe rreziqet e kanabisit mjekësor”, theksoi  Hsu.

“Duke mbështetur studime më rigoroze, mund të ofrojmë udhëzime më të qarta dhe të përmirësojmë kujdesin klinik për pacientët”, përfundoi ai. /Ad.Ab./

The post MJEKËSI -Studim: Kanabisi mjekësor nuk funksionon për shumicën e sëmundjeve appeared first on Agjencia Telegrafike Shqiptare.

BERLIN, 28 dhjetor /ATSH/ – Gjermania dhe Britania e Madhe kanë intensifikuar bashkëpunimin ushtarak përmes një kontrate të përbashkët prokurimi me vlerë rreth 72 milionë dollarë (afërsisht 61 milionë euro) për blerjen e sistemeve moderne të artilerisë, raportuan sot mediat, sipas “Euronews”.

Marrëveshja parashikon blerjen e sistemeve të artilerisë “RCH 155”, të montuara mbi mjete të blinduara, të afta të qëllojnë edhe gjatë lëvizjes dhe të godasin objektiva në një distancë mbi 70 kilometra.

Sipas Ministrisë britanike të Mbrojtjes, kontrata do t’i sigurojë fillimisht Ushtrisë Britanike një njësi demonstrimi të sistemit “RCH 155”. Ndërkohë, dy njësi të tjera janë planifikuar për Gjermaninë, ku do të përdoren për testime.

Sistemi “RCH 155” do të prodhohet nga kompania franko-gjermane e mbrojtjes “KNDS”, në bashkëpunim me “Rheinmetall”. Ministria britanike thekson se ky sistem mund të qëllojë deri në tetë predha në minutë dhe operohet nga vetëm dy ushtarë.

Gjithashtu, artileria e re ka një autonomi të konsiderueshme, duke qenë në gjendje të përshkojë deri në 700 kilometra pa nevojë për furnizim me karburant.

Berlini dhe Londra kishin rënë dakord që në muajin maj për një projekt të përbashkët armatimi, duke vendosur të avancojnë zhvillimin e një arme precize me rreze të gjatë veprimi. Ky projekt shihet si një bazë strategjike për bashkëpunimin e mëtejshëm në fushën e armëve moderne.

Qëllimi kryesor është zhvillimi i kapaciteteve për të ashtuquajturat goditje precize në thellësi, të cilat mund të përdoren për të goditur objektiva thellë në territorin e kundërshtarit.

Përveç projektit të armëve me rreze të gjatë, të dy vendet kanë rënë dakord edhe për bashkëpunim më të ngushtë në fushën e luftës kundër nëndetëseve, bazuar në marrëveshjen dypalëshe të njohur si “Trinity House Agreement”.

Ministri gjerman i Mbrojtjes, Boris Pistorius, e përshkroi këtë projekt si një përgjigje ndaj situatës së ndryshuar të sigurisë, gjatë një takimi në Berlin me homologun e tij britanik, John Healey.

Nga ana e tij, Healey theksoi se partneriteti i sigurisë mes dy vendeve është më i ngushtë se kurrë, duke shtuar se bashkëpunimi jo vetëm forcon mbrojtjen, por mund të sjellë edhe nxitje ekonomike, investime dhe vende të reja pune në të dy vendet. /Ad.Ab./

The post GJERMANI – Berlini dhe Londra forcojnë bashkëpunimin ushtarak appeared first on Agjencia Telegrafike Shqiptare.

ROMË, 28 dhjetor/ATSH-AFP/ -Policia italiane njoftoi sot se kishte arrestuar nëntë persona të dyshuar për mbledhjen e miliona eurove për grupin militant palestinez Hamas.

Sipas autoriteteve, nëntë persona në total akuzohen se kanë financuar rreth 7 milionë euro (8 milionë dollarë) për “shoqata me qendër në Gaza, territoret palestineze ose Izrael, të zotëruara, të kontrolluara ose të lidhura me Hamasin”.
Policia ka lëshuar gjithashtu urdhra arresti ndërkombëtar për dy persona të tjerë që ndodhen jashtë Italisë.
Hetimi ka zbuluar se tre shoqata, të cilat zyrtarisht deklaronin se mbështesnin civilët palestinezë, dyshohet se kanë shërbyer si fasadë për financimin e Hamasit, thuhet në deklaratën e policisë.
Edhe pse objektivi zyrtar i këtyre shoqatave ishte mbledhja e donacioneve “për qëllime humanitare për popullin palestinez”, më shumë se 71% e fondeve përfundonin në financim të drejtpërdrejtë të Hamasit ose të entiteteve të lidhura me lëvizjen islamiste, sipas autoriteteve italiane.
Një pjesë e parave, sipas policisë, është përdorur për të mbështetur familjarë të personave të përfshirë në sulme terroriste.
Mes të arrestuarve ndodhet edhe Mohammad Hannoun, president i Shoqatës Palestineze në Itali, raportojnë mediat lokale. /Ad.Ab./

The post ITALI: Nëntë të arrestuar për financim të Hamasit appeared first on Agjencia Telegrafike Shqiptare.

MOSKË, 28 dhjetor /ATSH-DPA/ –  Ukraina ka paralizuar përkohësisht trafikun ajror në kryeqytetin rus përmes sulmeve me dronë ndaj Moskës, duke shkaktuar ndërprerjen e qindra fluturimeve vetëm pak orë përpara nisjes së festave kombëtare, njoftuan autoritetet ruse.

Në aeroportet “Sheremetyevo” dhe “Vnukovo”, për disa orë nuk u lejuan as ngritje dhe as ulje avionësh, bëri të ditur një zëdhënës i autoritetit të aviacionit. Agjencia shtetërore ruse e lajmeve “Ria Novosti” raportoi se gjatë natës më shumë se 300 fluturime u anuluan ose u vonuan, ndërsa rreth 70 avionë u devijuan drejt aeroporteve alternative.

Dy aeroportet e tjera të Moskës, “Domodedovo” dhe “Zhukovsky”, nuk u prekën nga kufizimet.

Kryebashkiaku i Moskës, Sergei Sobyanin, raportoi më herët për neutralizimin e një numri jashtëzakonisht të madh dronësh ukraina, rreth 30 gjithsej. Ministria ruse e Mbrojtjes njoftoi se në mbarë vendin u rrëzuan 273 dronë. Si zakonisht, Ministria nuk dha detaje për dëmet e mundshme.

Kompanitë ajrore njoftuan gjithashtu pasagjerët për ndryshime në oraret e fluturimeve në Shën Petersburg dhe qytete të tjera. Linja ajrore shtetërore “Aeroflot” deklaroi sot në mëngjes se avionët e devijuar drejt aeroporteve alternative pritej të uleshin në Moskë gjatë ditës, duke shtuar se pasagjerët dhe ekuipazhet po trajtoheshin sipas procedurave.

Sipas autoriteteve, oraret e fluturimeve pritej të riktheheshin në normalitet sot me vonë.

Mijëra pasagjerë mbeten shpesh të bllokuar në aeroporte për shkak të kërcënimit nga dronët, veçanërisht gjatë festave ruse, të cilat nisin më 31 dhjetor dhe zgjasin deri më 11 janar./Ad.Ab./

The post RUSI – Dronët ukrainas bllokojnë aeroportet e Moskës appeared first on Agjencia Telegrafike Shqiptare.

ATHINË, 28 dhjetor /ATSH-DPA /- Rreth 830 refugjatë dhe migrantë janë shpëtuar në një seri operacionesh kërkim-shpëtimi në jug të ishullit grek të Kretës ditët e fundit, njoftuan autoritetet.

Vetëm dje, afro 400 persona u shpëtuan nnë det, raportuan mediat greke, në operacione ku u angazhuan anije peshkimi dhe mjete patrullimi të rojës bregdetare greke, si edhe të agjencisë evropiane për mbrojtjen e kufijve, Frontex.

Sipas rojës bregdetare, në varkat e përdorura kishte dhjetëra persona, në disa raste mbi 100, përfshirë edhe të mitur.

Autoritetet thanë se migrantët ishin nisur nga Tobruku në Libi dhe kishin paguar shuma të mëdha parash për udhëtimin e rrezikshëm prej rreth 300 kilometrash në det të hapur. Disa persona janë arrestuar nën dyshimin për përfshirje në trafikimin e qenieve njerëzore.

Kreta ka regjistruar tashmë më shumë se 18 mijë mbërritje refugjatësh gjatë këtij viti, sipas rojës bregdetare, krahasuar me rreth 5 mijë mbërritje në të njëjtën periudhë të vitit të kaluar. /Ad.Ab./

The post GREQI – Valë migrantësh në Kretë: 830 të shpëtuar në ditët e fundit appeared first on Agjencia Telegrafike Shqiptare.

BERLIN, 28 dhjetor /ATSH-DPA/ – Përpara takimit të tij me presidentin amerikan Donald Trump, presidenti i Ukrainës Volodymyr Zelensky ka marrë garanci mbështetjeje nga liderët perëndimorë.

Zelensky zhvilloi mbrëmë një video-konferencë me disa liderë të  vendeve evropiane dhe Kanadaja, si edhe me përfaqësues të lartë të Komisionit Evropian dhe NATO-s.

Një zëdhënës i qeverisë gjermane tha se liderët i dhanë Zelenskyt “mbështetjen e tyre të plotë dhe theksuan angazhimin për të bashkëpunuar ngushtë me SHBA-në për të arritur një paqe të qëndrueshme dhe të drejtë në Ukrainë”.

Sipas zëdhënësit, kancelari gjerman Friedrich Merz e thirri konferencën me kërkesë të Zelenskyt.

Sipas burimeve nga “Pallati Elize”, presidenti francez Emmanuel Macron deklaroi se evropianët duhet të jenë plotësisht të përfshirë në diskutimet për paqe, Macron pritet të organizojë një tjetër takim të “Koalicionit të të Gatshmëve”, një grup vendesh që kanë premtuar mbështetje të fortë për Kievin, në Paris në janar.

Presidentja e Komisionit Evropian, Ursula von der Leyen, e cila gjithashtu mori pjesë në videokonferencë, shkroi në platformën X se të gjitha përpjekjet synojnë “objektivin tonë të përbashkët, një paqe të drejtë dhe të qëndrueshme që ruan sovranitetin dhe integritetin territorial të Ukrainës”.

Evropa po e ndjek me vëmendje zhvillimin, ndërsa Zelensky, i cili u takua  me kryeministrin kanadez Mark Carney në Halifax, po udhëton drejt Floridës për bisedimet me Trump në Palm Beach të dielën.

Shtëpia e Bardhë njoftoi se takimi dypalësh në Mar-a-Lago do të zhvillohet në orën  (19:00 (sipas orës tone) dy orë më herët nga sa ishte planifikuar fillimisht. Arsyeja e ndryshimit të orarit nuk u bë e ditur.  /Ad.Ab./

The post BERLIN – Aleatët e Zelensky mbështetje përpara bisedimeve me Trump në Florida appeared first on Agjencia Telegrafike Shqiptare.

BERLIN, 26 dhjetor /ATSH-DPA/ – Gjermania nuk do të marrë pjesë në një forcë ndërkombëtare stabilizimi (ISF) për zbatimin e planit të paqes për Gazën në të ardhmen e afërt, deklaroi ministri i Jashtëm Johann Wadephul.

Në komentet e publikuara sot, Wadephul  tha ushtarët gjermanë nuk do të jenë pjesë e një force që do të duhej të siguronte mbrojtje konkrete në rast nevoje.

“Shumë njerëz nuk mund ta imagjinojnë praninë e ushtarëve gjermanë në këtë rajon të veçantë”, tha ai.

Gjermania është e gatshme të luajë një rol konstruktiv në strukturat e parashikuara nga një rezolutë e Këshillit të Sigurimit të OKB-së, siç është një këshill paqeje.

Megjithatë, Berlini ende nuk ka marrë një ftesë zyrtare për të marrë pjesë në një strukturë të tillë.

Faza e dytë e planit 20-pikësh të paqes të presidentit amerikan Donald Trump parashikon çarmatimin e grupit militant palestinez Hamas dhe krijimin e një force ndërkombëtare stabilizimi.

Dy muaj pas hyrjes në fuqi të armëpushimit, Hamasi ka refuzuar të dorëzojë armët.

“Pasi të kenë nisur konsultimet fillestare me vendet e mundshme kontribuuese me trupa, është i nevojshëm një kuadër politik, përfshirë një arkitekturë sigurie të garantuar nga ISF dhe forcat palestineze të sigurisë”, tha Wadephul.

“Do të ishte e rëndësishme që e gjithë kjo të nisë sa më shpejt”. theksoi ministri i Jashtëm.

“Ne nuk duhet të lejojmë që ndarja aktuale e Gazës, në një pjesë të kontrolluar nga ushtria izraelite dhe një pjesë gjithnjë e më shumë nën kontrollin e Hamasit, të bëhet e përhershme”, paralajmëroi ai./ /Ad.Ab./ a.jor.

The post BERLIN – Wadephul: Gjermania nuk do t’i bashkohet forcës paqeruajtëse në Gaza appeared first on Agjencia Telegrafike Shqiptare.

SANA’A, 26 dhjetor /ATSH-DPA/- Separatistët në Jemenin e shkatërruar nga lufta thanë se Arabia Saudite ka kryer sot sulme ajrore kundër forcave të tyre në lindje të vendit.

Televizioni “Aden Independent”, i lidhur me Këshillin Tranzitor Jugor (STC), raportoi se avionë sauditë bombarduan sot pozicione të mbajtura nga forca të lidhura me STC-në në provincën e pasur me naftë Hadramaut, në lindje të Jemenit.

STC-ja mbështetet nga Emiratet e Bashkuara Arabe.

Televizioni transmetoi pamje të asaj që e përshkroi si pasojat e sulmeve, por nuk dha detaje për viktima apo dëme materiale.

Nuk pati menjëherë ndonjë reagim nga Arabia Saudite

Sulmet e pretenduara ajrore pasuan përleshje të ashpra mes forcave të STC-së dhe luftëtarëve të Aleancës Fisnore të Hadramautit, një grup rival.

Burime lokale në Hadramaui thanë të paktën dy luftëtarë të lidhur me STC-në janë vrarë dhe 12 të tjerë janë plagosur gjatë përleshjeve.

Arabia Saudite nisi një ndërhyrje ushtarake në Jemen në vitin 2015, në mbështetje të qeverisë së njohur ndërkombëtarisht kundër rebelëve Houthi të mbështetur nga Irani.

Më herët këtë muaj, shpërthyen luftime mes forcave pro-STC-së dhe qeverisë së mbështetur nga Arabia Saudite, duke nxitur frikë për ndarje të mëtejshme në vendin e varfër./ /Ad.Ab./ a.jor.

The post SANA’A – Avionë sauditë bombardojnë pozicionet e separatistëve në Jemen appeared first on Agjencia Telegrafike Shqiptare.

PEKIN, 26 dhjetor /ATSH/ – Kina vendosi sot sanksione ndaj 20 kompanive amerikane, të lidhura me mbrojtjen dhe 10 drejtuesve të tyre, një javë pasi Uashingtoni njoftoi një paketë të madhe shitjeje armësh për Tajvanin, sipas AP.

”Sanksionet përfshijnë ngrirjen e aseteve të kompanive në Kinë dhe ndalimin e individëve dhe organizatave për të bërë biznes me to”, njoftoi Ministria e Jashtme kineze.

Mes kompanive të sanksionuara janë “Northrop Grumman Systems Corporation”, “L3Harris Maritime Services” dhe “Boeing” në St. Louis.

Ndër drejtuesit e sanksionuar është edhe themeluesi i “Anduril Industries , Palmer Luckey, i cili nuk mund të bëjë më biznes në Kinë dhe i është ndaluar hyrja në vend; asetet e tij atje janë ngrirë gjithashtu.

Paketa amerikane e shitjes së armëve, me vlerë mbi 10 miliardë dollarë, ka shkaktuar reagim të ashpër nga Pekini, i cili e konsideron Tajvanin pjesë të territorit të tij dhe këmbëngul se ishulli duhet të vihet nën kontrollin kinez.

Nëse miratohet nga Kongresi amerikan, ajo do të ishte paketa më e madhe ndonjëherë e armëve amerikane për territorin vetëqeverisës.

“Rikujtojmë edhe një herë se çështja e Tajvanit është në thelb të interesave thelbësore të Kinës dhe përbën vijën e parë të kuqe që nuk duhet kaluar në marrëdhëniet Kinë–SHBA”, thuhet në deklaratën e Ministrisë së Jashtme kineze.

“Çdo kompani ose individ që angazhohet në shitje armësh për Tajvanin do të paguajë çmimin për këtë shkelje”, shton deklarata.

Ministria i bëri thirrje gjithashtu SHBA-së të ndalë, siç i quajti ajo, “lëvizjet e rrezikshme të armatosjes së Tajvanit”.

Tajvani mbetet një nga pikat më të nxehta të tensionit në marrëdhëniet SHBA–Kinë, për të cilat analistët paralajmërojnë se mund të përshkallëzohen në konflikt ushtarak mes dy fuqive.

Kina pretendon se shitjet amerikane të armëve për Tajvanin shkelin marrëveshjet diplomatike mes Pekinit dhe Uashingtonit./   /Ad.Ab./

The post FOKUS – Kina sanksionon 20 kompani amerikane për shitje armësh Tajvanit appeared first on Agjencia Telegrafike Shqiptare.

ATHINË, 26 dhjetor /ATSH-ANA/ – Autoritetet greke kanë shpëtuar gjithsej 52 emigrantë në dy operacione të ndryshme në detin Egjé, ndërsa kërkimet vazhdojnë për gjetjen e një djali të huaj të zhdukur pranë ishullit Farmakonissi.

Kërkimet po zhvillohen në ishullin Farmakonissi dhe në zonën detare përreth tij, pas shpëtimit të 13 shtetasve të huaj në ishull.

Farmakonissi ndodhet në lindje të ishujve Patmos dhe Lipsi.

Operacionet po koordinohen nga Qendra e Përbashkët e Koordinimit të Kërkim-Shpëtimit, me ndihmën e dy mjeteve të Rojës Bregdetare dhe një helikopteri të Forcave Ajrore.

Ndërkohë, e njëjta qendër koordinoi edhe shpëtimin e 39 shtetasve të huaj që ndodheshin në një mjet lundrues, 44 milje detare në jug të Kali Limenes, në brigjet jugore të Kretës.

Operacioni u krye nga një anije e Rojës Bregdetare dhe emigrantët u transportuan në portin e Kali Limenes.

Autoritetet nuk kanë dhënë ende detaje shtesë për identitetin e djalit të zhdukur, ndërsa kërkimet vijojnë./   /Ad.Ab./ a.jor.

The post GREQI – Pesëdhjetë e dy emigrantë shpëtohen në Egje appeared first on Agjencia Telegrafike Shqiptare.

BRUKSEL, 26 dhjetor /ATSH-DPA/ – Sekretari i përgjithshëm i NATO-s, Mark Rutte nuk beson se Bashkimi Evropian ka nevojë të bëhet plotësisht i pavarur nga Shtetet e Bashkuara në çështjet e mbrojtjes, pavarësisht kursit aktual të administratës së presidentit amerikan, Donald Trump.

”Shtetet e Bashkuara presin që Evropa të marrë më shumë përgjegjësi dhe të shpenzojë më shumë për mbrojtjen”, tha Rutte në një intervistë.

“Jam absolutisht i bindur se SHBA-ja është plotësisht e angazhuar në NATO. Nuk ka asnjë dyshim. Kishte një pritshmëri të madhe: që ne të shpenzojmë më shumë, që Evropa të marrë më shumë përgjegjësi”, tha Rutte.

Megjithatë, sipas tij, ”bëhet fjalë për ta bërë këtë së bashku me SHBA-në”.

Ish-kryeministri holandez iu referua samitit të NATO-s në qershor në Hagë, ku të gjithë aleatët ranë dakord të rrisin shpenzimet për mbrojtjen në 5% të Prodhimit të Brendshëm Bruto (PBB) deri në vitin 2035.

“Mendoj se kjo mbetet një nga fitoret më të mëdha të politikës së jashtme të presidentit Trump: 5%-shi, angazhimi i qartë për të prodhuar dhe investuar më shumë”, shtoi Rutte.

Manfred Weber, kreu i Partisë Popullore Evropiane (PPE), grupimi më i madh në Parlamentin Evropian, ka bërë thirrje që BE-ja të evoluojë drejt një “NATO-je evropiane”, duke argumentuar se SHBA-ja nuk mund të mbështetet më pa kufizime.

Ndërsa e vlerësoi Weberin, sekretari Rutte tha se ka një këndvështrim tjetër.

“Të mos harrojmë se kur flasim për Evropën dhe NATO-n, ka më shumë se vetëm BE-në”, theksoi ai.

Duke njohur rëndësinë e BE-së, Rutte vuri në dukje se 23 vendet anëtare të BE-së brenda NATO-s përbëjnë vetëm rreth një të katërtën e prodhimit të përgjithshëm ekonomik të aleancës.

“75% janë ende jashtë BE-së”, tha ai, duke iu referuar vendeve anëtare të NATO-s si Britania e Madhe, Norvegjia, Kanadaja dhe SHBA./  /Ad.Ab./ a.jor.

The post BRUKSEL – Rutte: BE nuk duhet të shkëputet nga SHBA për çështjet e  mbrojtjes appeared first on Agjencia Telegrafike Shqiptare.

KIEV, 26 dhjetor  /ATSH-DPA/ – Presidenti ukrainas, Volodymyr Zelensky njoftoi sot se planifikon të udhëtojë në ditët në vijim drejt Shteteve të Bashkuara për t’u takuar me presidentin amerikan Donald Trump, në kuadër të përpjekjeve për t’i dhënë fund luftës në Ukrainë.

“Nuk po humbim asnjë ditë. Kemi rënë dakord për një takim në nivelin më të lartë, me presidentin Trump në të ardhmen e afërt”, shkroi Zelensky në platformën X.

Ai tha se ky njoftim erdhi pasi Rustem Umerov, negociatori kryesor i Ukrainës në bisedimet e paqes për përfundimin e luftës që Rusia nisi gati katër vjet më parë, e informoi mbi kontaktet e tij më të fundit me palën amerikane.

“Shumë gjëra mund të vendosen para Vitit të Ri”, shtoi Zelensky.

“Takimi mund të zhvillohet më 28 dhjetor në rezidencën Mar-a-Lago të presidentit Trump në Florida”,  raportoi gazeta ”Kyiv Post”, duke cituar burime diplomatike./ /Ad.Ab./ a.jor.

The post KIEV – Zelensky: Takim me presidentin Trump për paqen në Ukrainë appeared first on Agjencia Telegrafike Shqiptare.

MOSKË, 26 dhjetor /ATSH-DPA/ – Zëdhënësja e Ministrisë së Jashtme të Rusisë, Maria Zakharova tha gjatë një konference për shtyp se ka përparim të ngadaltë, por të qëndrueshëm në bisedimet me Shtetet e Bashkuara për përfundimin e luftës në Ukrainë.

“Në procesin negociues për zgjidhjen e konfliktit në Ukrainë, ku kam parasysh procesin negociues me Shtetet e Bashkuara, mund të vërehet përparim i ngadaltë, por i sigurt,” u citua të ketë thënë Zakharova.

Vetë Ukraina u përmend pak, pavarësisht se po i reziston pushtimit rus prej gati katër vitesh.

Në vend të kësaj, Zakharova kërkoi të thellojë përçarjen mes Uashingtonit dhe aleatëve të tij evropianë të përfshirë në përpjekjet për paqe.

Ajo u bëri thirrje homologëve amerikanë që “t’i kundërshtojnë në mënyrë aktive përpjekjet e vendeve të Evropës Perëndimore për të sabotuar dhe zhbërë përparimin e arritur në procesin negociues për Ukrainën”.

Pas shpalljes së një plani paqeje me 28 pika, i cili u kritikua gjerësisht si një “listë dëshirash ruse”, udhëheqësit evropianë iu bashkuan Ukrainës në procesin negociues, me synimin për të parandaluar rezultate që mund të minonin rëndë stabilitetin e ardhshëm të Kievit.

Presidenti ukrainas Volodymyr Zelensky ka paraqitur më pas publikisht një kundërpropozim me 20 pika, i cili aktualisht është në diskutim.

Megjithatë, Rusia ende nuk ka paraqitur një qëndrim zyrtar dhe nuk është tërhequr nga kërkesat e saj maksimaliste.

Sa i përket një plani të mundshëm paqeje, Zakharova përsëriti gatishmërinë e pretenduar të Moskës për të negociuar një marrëveshje mossulmimi me një vend evropian ose me NATO-n.

“Rusia është e gatshme të formulojë angazhime përkatëse në formën e një dokumenti të shkruar, juridikisht detyrues”, tha Zakharova.

Presidenti rus Vladimir Putin e kishte ofruar më parë një marrëveshje të tillë dhe kishte hedhur poshtë pretendimet se Rusia mund të sulmonte një vend të NATO-s si “të pakuptimta”./  /Ad.Ab./  a.jor.

The post RUSI – Moska: Përparim i kujdesshëm në negociatat me SHBA-në për Ukrainën appeared first on Agjencia Telegrafike Shqiptare.

BRAZILIA, 26 dhjetor /ATSH-DPA/ – Ish-presidenti i burgosur i Brazilit, Jair Bolsonaro, i është nënshtruar një ndërhyrjeje kirurgjikale për hernie bilaterale, bëri të ditur djali i tij, Flavio Bolsonaro.

“Operacioni, i kryer në një spital në kryeqytetin Brazilia, doli me sukses”, shkroi Flavio Bolsonaro në rrjetin social X.

Sipas portalit informativ “G1”,  Bolsonaro, 70-vjeç, pritet të qëndrojë në spital për rreth një javë.

Bolsonaro ka kaluar disa operacione vitet e fundit, pas një sulmi me thikë gjatë fushatës presidenciale të vitit 2018, ku u plagos rëndë.

Një gjykatës federal autorizoi procedurën e fundit mjekësore.

Ish-presidenti, i cili ishte në detyrë nga viti 2019 deri në 2022, po vuan një dënim me mbi 27 vjet burg që nga fundi i nëntorit, për tentativë për përmbysjen e qeverisë.

Prokurorët e akuzojnë atë se ka planifikuar një grusht shteti kundër qeverisë së pasardhësit të tij, Luiz Inácio Lula da Silva, pasi humbi zgjedhjet.

Megjithatë, gjykatësi hodhi poshtë kërkesën e avokatëve të Bolsonaros që ai ta vuante dënimin në arrest shtëpie për arsye shëndetësore.

Vendimi u justifikua me shkeljet e përsëritura të kushteve dhe përpjekjet për arratisje.

Ndër të tjera, Bolsonaro kishte dëmtuar byzylykun elektronik me një hekur saldimi natën para arrestimit të tij./  /Ad.Ab./ a.jor.

The post BRAZIL – Bolsonaro i nënshtrohet me sukses një operacioni në hernie appeared first on Agjencia Telegrafike Shqiptare.

LONDËR, 25 dhjetor /ATSH/ – Ndërsa shumica e njerëzve i lidhin Krishtlindjet me filma të ngrohtë dhe familjarë, BBC-ja ka zgjedhur 12 tituj alternativë që sfidojnë pritshmëritë dhe sjellin magji, humor dhe emocione të thella festive.

”Eyes Wide Shut” (1999)

Filmi ndjek një mjek nga Nju Jorku që përfshihet në një udhëtim psikologjik pas një rrëfimi tronditës nga bashkëshortja e tij. Ai endet natën në qytet dhe përballet me dëshira, xhelozi dhe tundime të rrezikshme. Ngjarjet marrin një ton gjithnjë e më të errët dhe surreal. Filmi eksploron besimin, seksualitetin dhe pushtetin. Atmosfera është e ftohtë, misterioze dhe shumë simbolike.

”Father Christmas” (1991)

Ky film i animuar tregon historinë e një Babagjyshi të lodhur nga puna e tij e përvitshme. Ai vendos të marrë pushime dhe të udhëtojë në vende të ndryshme të botës. Gjatë udhëtimit, ai përballet me situata komike dhe kulturore të papritura. Filmi ka një ton të ngrohtë dhe humor të qetë britanik. Është një histori e thjeshtë, por shumë simpatike për Krishtlindje.

”Pillion” (2025)

Filmi përqendrohet në një marrëdhënie jo të zakonshme mes dy burrave me karaktere shumë të ndryshme. Ai eksploron temat e pushtetit, intimitetit dhe vetëpranimit. Personazhet përballen me kufijtë personalë dhe shoqërorë. Tregimi është intim dhe emocionalisht i ngarkuar. Filmi synon të sfidojë normat tradicionale të marrëdhënieve.

”Die Hard 2” (1990)

Një polic përpiqet të ndalojë një grup terroristësh që marrin kontrollin e një aeroporti gjatë Krishtlindjeve. Situata bëhet gjithnjë e më e rrezikshme ndërsa avionët mbeten në ajër. Filmi është plot aksion, tension dhe shpërthime. Personazhi kryesor duhet të veprojë i vetëm kundër kohës. Është një vazhdim energjik dhe argëtues.

”Pride” (2014)

Filmi bazohet në ngjarje reale dhe tregon miqësinë mes aktivistëve LGBTQ+ dhe minatorëve britanikë në vitet ’80. Dy grupe shumë të ndryshme bashkohen për një kauzë të përbashkët. Fillimisht ka paragjykime dhe tensione. Me kalimin e kohës, lind respekt dhe solidaritet. Është një film i ngrohtë, politik dhe plot shpresë.

”Wonder Boys” (2000)

Historia ndjek një profesor shkrimi që po kalon një krizë personale dhe profesionale. Jeta e tij komplikohet nga studentë, miq dhe marrëdhënie të paqarta. Ngjarjet zhvillohen gjatë një fundjave kaotike. Filmi ka humor të butë dhe momente melankolike. Ai flet për krijimtarinë, dështimin dhe rritjen personale.

”Merry Christmas, Mr. Lawrence” (1983)

Filmi zhvillohet në një kamp robërish lufte japonez gjatë Luftës së Dytë Botërore. Ai përqendrohet në konfliktin kulturor mes robërve perëndimorë dhe rojeve japoneze. Marrëdhëniet mes personazheve janë komplekse dhe emocionale. Tema kryesore janë nderi, pushteti dhe mirëkuptimi. Filmi është i qetë, por shumë i thellë.

”Live Flesh” (1997)

Ky film spanjoll ndjek jetët e disa personazheve që lidhen nga një ngjarje e dhunshme në të kaluarën. Pasojat e asaj nate ndikojnë në dashuri, xhelozi dhe faj. Historia zhvillohet gjatë disa viteve. Filmi trajton pasionin dhe fatin njerëzor. Tregimi është emocional dhe dramatik.

”Harry Potter and the Prisoner of Azkaban” (2004)

Harry kthehet në Hogwarts për vitin e tretë dhe përballet me një kërcënim të ri misterioz. Një i arratisur nga burgu magjik duket se është i lidhur me të kaluarën e tij. Miqësitë thellohen dhe historia bëhet më e errët. Filmi sjell elemente të reja magjie dhe kohe. Është një pikë kthese më serioze në seri.

”Young Frankenstein” (1974)

Kjo është një komedi që parodizon filmat klasikë horror. Një shkencëtar përpiqet të distancohet nga trashëgimia e familjes së tij. Megjithatë, ai përfshihet në eksperimente absurde. Filmi është plot humor vizual dhe dialog inteligjent. Është një klasik komik shumë i dashur./  /Ad.Ab./ a.jor.

The post KINEMA – Nga Harry Potter tek ”Eyes Wide Shut” filmat alternativë më të mirë për Krishtlindje appeared first on Agjencia Telegrafike Shqiptare.