TIRANË, 5 shkurt /ATSh/ Deputeti i Partisë Socialiste, njëherësh kryetar i Komisionit për Çështjet Ligjore dhe Administratën Publike, Ulsi Manja, tha sot se ndryshimet ligjore nuk kanë cenuar pagën e magjistratëve.

Gjatë një interviste televizive në “Top Story”, i pyetur në lidhje me debatin për pagat e gjyqtarëve, çështje e cila po shqyrtohet në Gjykatën Kushtetuese, Manja tha se në një shtet demokratik sistemi i pagave nuk mund të jetë një listë dëshirash.

“Nuk është debat që zhvillohet në distancë mes gjyqtarëve dhe ekzekutivit, sepse flasim për një vendim kushtetues ku qeveria është palë e interesuar. Debati në rastin konkret po zhvillohet mes dy palëve të interesuara. Në një shtet demokratik sistemi i pagave nuk mund të jetë një listë dëshirash. Sistemi i pagave është pasqyra e funksionimit politik, demokratik dhe social të një shteti”, u shpreh Manja.

Deputeti socialist argumentoi normën ligjore që përcakton pagat e sistemit të drejtësisë sot.

Sipas tij, ligji për statusin e prokurorëve që u miratua në 2016, ishte ndër ligjet e rëndësishme sepse statuset për kategori të caktuara të funksioneve publike janë sa privilegje, por dhe lidhen me përgjegjësinë e funksionit të tyre publik.

Sipas tij, ligji parashikonte një sërë kriteresh që përbënin statusin e magjistratit, nga shkalla e funksionit dhe vjetërsia në punë, te kompetenca, pozicionet drejtuese, shtesat për kualifikim dhe trajtimet financiare shtesë.

“Parimi kryesor që kishte ligji sa i takon caktimit të pagës, ishte respektimi i dinjitetit të profesionit. Kriteri i dytë ishte vjetërsia në punë, i treti kompetenca ku e ushtron funksionin, kriter tjetër paga për pozicion drejtues, shtesa për kualifikime. Statusi nuk mbaronte këtu sepse ishte dhe trajtimi i veçantë financiar, kompensimi për raste transferimi, për kur përfshiheshin në skemë delegimi jashtë qendrës së banimit, pensioni suplementar, sigurimi i jetës dhe familjarëve dhe shtesa për vështirësisë profesioni. Ishin një sërë kriteresh që përbënin statusin e magjistratit”, tha Manja.

Manja tha se debati për pagën referuese nisi në vitin 2017 dhe u thellua në vitin 2021, kur Ministria e Financave kërkoi saktësim të terminologjisë ligjore. Pas ndryshimeve, sipas Manjës, paga referuese u lidh me pagën e një drejtori në Kryeministri, por kjo u kundërshtua nga shoqatat e magjistratëve dhe u çua në Gjykatën Kushtetuese.

Manja u shpreh se debati tani është për pagën referuese.

“Debati i parë lindi në 2017. Në 2021, Ministria e Financave ngriti një shqetësim dhe tha neni 12 pika 5, kur flet për pagën referuese, pagë për funksion. I kemi pyetur a e cenon në vlerë nominale saktësimi i kësaj terminologjie? Jo. Kemi bërë ndryshime dhe kemi bërë që paga referohet me pagën e një drejtori në kryeministri”, shpjegoi ish-ministri i Drejtësisë.

“Sapo hyri në fuqi ky ndryshim, shoqata i atakoi dhe e çoi në Kushtuese, dhe kjo e fundit urdhëroi: paga referuese bazë nuk do jetë drejtor i Kryeministrisë, por kategoria B që i korrespondon Sekretarit të Përgjithshëm, dhe do ketë pagën referuese plus pagën e grupit, jo për përfitime të tjera”, tha Manja.

Manja shtoi se vendimi i Gjykatës Kushtetuese ishte i qartë. Manja shpjegoi se në vitin 2023, Kuvendi e përktheu vendimin e Kushtetueses në ligj, duke e lidhur pagën referuese të magjistratëve me atë të Presidentit të Republikës.

“Përcaktimi i pagës referuese, e reja është përcaktuar nga vendimi i Kushtetuese. Nuk duhet të prekni pagën e fituar deri tani nga magjistratët tha Kushtetuesja. Çfarë ndodhi pas këtij vendimi? Duke qenë se norma u shfuqizua, Ministria e Financave tha të fillojë zbatimi nga 1 janari i 2019, pra të merrnin diferencën. Gjyqtarët nuk pritën dhe iu drejtua gjykatës administrative”, u shpreh ai.

Duke iu përgjigjur kritikave të gjyqtarëve se rritja e pagave në administratën publike krijoi diferenca në dëm të magjistratëve, Manja theksoi se neni 138 i Kushtetutës flet vetëm për ndalimin e uljes së pagës.

“Kur u rritën pagat në shërbimin civil dhe administratën publike, magjistratët thanë do shkojmë në Kushtetuese se ju na keni cenuar pagën dhe keni shkelur nenin 138, sepse nëse do na kishit lënë me referencë të Sekretari i Përgjithshëm, paga e tyre është rritur me 30%, në vlerë paga bazë plus pagën e grupit, shkon 237 mijë lekë të reja për Sekretarin e Përgjithshëm”, informoi Manja.

“Neni 138 thotë mos e ul pagën e magjistratit. Ne nuk e ulëm, por e rritëm, por ama nuk do të thotë ulje page nëse një formulë e përllogaritje e re të jep një përfitim më të vogël, është në shkelje të nenit, dhe një formulë që të jep përfitim më të madh qenka në zbatim të nenit. Nuk di të ketë vlerësim më të madh sesa të të referojmë pagën me atë të Presidentit”, tha Manja.

/m.q/j.p/

The post Manja: Sistemi i pagave jo listë dëshirash, nuk ka cenim të magjistratëve appeared first on Agjencia Telegrafike Shqiptare.

TIRANË, 5 shkurt /ATSh/ Kryetari i Partisë Demeokratike, Sali Berisha zhvilloi pasditen e sotme takim me degën 7 të kësaj partie në kryeqytet në kuadër të turit të Foltores. Gjatë fjalës së tij, Berisha tha se opozita nuk mund të pranojë më këtë qeveri dhe se vendi duhet të shkojë drejt krijimit të një qeverie teknike dhe zhvillimit të zgjedhjeve të lira.

“Ne tani kemi një armik përpara, i cili me qëndrimet e tij nuk krijon zgjedhje. Të krijojmë një qeveri teknike, të shkojmë drejt zgjedhjeve, se përndryshe ne këtë qeveri nuk mund ta pranojmë kurrë”, u shpreh Berisha gjatë takimit me demokratët.

Sipas tij, përveç farsës elektorale, një arsye po aq e rëndësishme për të protestuar, është ajo që ai e cilëson si plaçkitje të qytetarëve.

“Çdo qeveri që vjedh qytetarët humbet legjitimitetin. Le të ketë dalë nga zgjedhje të lira e të ndershme, po vodhi qytetarët, humbet legjitimitetin”, theksoi Berisha.

Berisha deklaroi se opozita ndodhet në një “fushëbetejë” për demokracinë.

Kreu i PD-së u ndal edhe te protestat e organizuara nga opozita, të cilat, sipas tij janë pritur pozitivisht nga qytetarët.

Berisha tha se protestat janë mirëpritur sepse qytetarët e dinë se zgjedhjet janë vjedhur dhe se po bëhet grusht shteti duke bllokuar drejtësinë.

“Për këtë kemi mbështetjen në mbarë botën dhe për këtë do t’u provojmë shqiptarëve dhe botës se nuk rrimë”, tha ai.

Në fund të fjalës së tij, Berisha bëri thirrje për mobilizim për protestën e 10 shkurtit, duke e cilësuar këtë datë si ditën e “kryengritjes paqësore” kundër qeverisë.

“Data 10 shkurt është dita jonë. Është dita e kryengritjes sonë paqësore, është dita që do t’i dridhen themelet Edi Ramës gjer në largimin e tij nga pushteti”, tha Berisha.

Berisha bëri thirrje për bashkim të opozitës dhe qytetarëve kundër qeverisë.

“Të bashkohemi me çdo qytetar të ndershëm që beson që është i gatshëm të ngrihet për të shpëtuar Shqipërinë. Askush tjetër përveç nesh, njerëz që mbrojmë të vërtetën, njerëz që i kemi qëndruar besnikë, pavarësisht nga sakrificat, idealeve tona, nuk do të shpëtojë Shqipërinë”, tha Berisha. /m.q/j.p/

The post Berisha: 10 shkurti, dita e kryengritjes sonë paqësore appeared first on Agjencia Telegrafike Shqiptare.

TIRANË, 5 shkurt /ATSh/ Ministrja për Punët e Brendshme, Albana Koçiu, i cilësoi sot si të pavërteta, lajmet për rikthimin e qarkullimit të monopatinave në qytet.

Koçiu theksoi se udhëzimi për ndalimin e qarkullimit me monopatina mbetet në fuqi dhe se nuk ka asnjë vendim për heqjen e masës së ndalimit të përkohshëm.

Ministrja bëri me dije se Policia e Shtetit vijon angazhimin e përditshëm në terren për garantimin e zbatimit të plotë të këtij udhëzimi, në përputhje me njoftimet zyrtare të bëra më herët.

Koçiu shprehu mirënjohje për qytetarët për bashkëpunimin dhe mirëkuptimin në respektimin e kësaj mase, e cila sipas saj synon mbrojtjen e sigurisë dhe jetës, në veçanti të të rinjve.

Sipas saj, të dhënat zyrtare tregojnë një efekt pozitiv të ndalimit.

“Të dhënat e Policisë së Shtetit dhe të shërbimeve të traumës konfirmojnë një rënie të ndjeshme të numrit të aksidenteve gjatë periudhës së zbatimit të saj”, tha ministrja.

Në fund, Koçiu theksoi se situata po vlerësohet në mënyrë të vazhdueshme.

“Ministria e Punëve të Brendshme, në bashkëpunim me institucionet përgjegjëse, po vijon vlerësimin e situatës për të përcaktuar vendimmarrjen më të drejtë, duke vendosur në qendër sigurinë dhe jetën e çdo qytetari”, përfundoi ajo.

/m.q/j.p/

The post Koçiu: Ndalimi i qarkullimit me monopatina mbetet në fuqi, rënie e ndjeshme e aksidenteve appeared first on Agjencia Telegrafike Shqiptare.

TIRANË, 5 shkurt /ATSh/ Kryetari i grupit parlamentar të Partisë Demokratike, Gazment Bardhi, kryetari i Partisë Republikane, Fatmir Mediu, kryetarja e Komisionit të të Drejtave të Njeriut Jorida Tabaku dhe deputetja Albana Vokshi, gjate vizitës në Uashington, u takuan me kongresmenin Michael R. Turner, i cili ka drejtuar për një kohë të gjatë Komitetit e Inteligjencës në Kongres.

Deputetët e opozitës theksuan nevojën e forcimit të partneritetit mes Shqipërisë dhe Shteteve të Bashkuara të Amerikës.

“Shqipëria është e nderuar të ketë aleat strategjik SHBA dhe e ka jetike që të përkushtohet në prioritetin e Presidentit Trump për luftë pa kompromis ndaj krimit të organizuar, karteleve të drogës dhe bashkëpunëtorëve të tyre”, shkruan Bardhi.

Gjithashtu, deputetët e opozitës ndanë me kongresmenim Turner shqetësimin në raport me këtë prioritet strategjik dhe pasojat që ka, sipas tyre, bashkëqeverisja me krimin e organizuar në aleancën strategjike me SHBA.

/m.q/j.p/

The post Deputetët e opozitës takojnë kongresmenin Turner: Shqipëria e ka jetike të përkushtohet në prioritetet e Trump appeared first on Agjencia Telegrafike Shqiptare.

TIRANË, 5 shkurt /ATSh/ Në zonat e Burrelit dhe të Klosit vijojnë kërkimet për 30-vjeçarin, Jurgen Karaj, i cili dyshohet se u mor nga rrjedha e përroit të Darsit më 10 janar pas një aksidenti.

Ministri i Mbrojtjes, Pirro Vengu, ishte sot pranë familjarëve, në ditën e 27-të të operacionit të kërkim-shpëtimit në zonat e Burrelit dhe Klosit. I pranishëm ishte edhe ministri i Mbrojtjes së Kosovës, Ejup Maqedonci.

Vengu bëri të ditur se “efektivë nga Shqipëria dhe Kosova janë shpërndarë në terren, duke mbuluar të gjithë basenin e lumit Mat, në një angazhim të pandërprerë dhe të koordinuar”.

“Forcat e Armatosura po kryejnë detyrën e tyre me përgjegjësi të plotë, pa më shumë e pa më pak se ç’kërkon misioni, ndërsa vlerësojmë dhe falënderojmë posaçërisht ndihmën dhe kontributin e efektivëve të FSK-së, në një frymë solidariteti dhe bashkëpunimi vëllazëror”, nënvizoi Vengu.

Në një prononcim për mediet, Vengu bëri të ditur se “janë përqendruar 82 forca në këto momente dhe mjete teknologjike”.

1 nga 12

/m.q/j.p/

The post 30-vjeçari u mor nga rrjedha pas aksidentit, FA dhe FSK vijojnë kërkimet rreth lumit Mat appeared first on Agjencia Telegrafike Shqiptare.

TIRANË, 5 shkurt /ATSh/ Drejtori i Përgjithshëm i Policisë së Shtetit, Ilir Proda, vlerësoi me Certifikatë për Shërbime të Dalluara, për arritjet, sfidat dhe përkushtimin në detyrë, Komisare Enkela Deraj, shefe e Seksionit të Burimeve Njerëzore dhe Trajnimeve në Njësinë për Kufirin dhe Migracionin “Delta Forcë” Vlorë.

Enkela, me një karrierë të gjatë në Polici që prej vitit 2005, e sprovuar me sfida e vështirësi në disa fusha të shërbimit në Polici, është kthyer në një shembull të mirë dhe frymëzues për të gjitha gratë dhe vajzat në Policinë e Shtetit.

Pjesë e Shoqatës së Grave në Policinë Shqiptare, ajo kontribuon në mënyrë të vazhdueshme për mbështetjen dhe inkurajimin e kolegeve. /j.p/

1 nga 2

The post Pjesë e Policisë prej 2005, komisarja Enkela Deraj vlerësohet me Certifikatën e Karrierës appeared first on Agjencia Telegrafike Shqiptare.

TIRANË, 5 shkurt /ATSH/ Ministrja për Evropën dhe Punët e Jashtme, Elisa Spiropali mori pjesë sot në Mëngjesin e Lutjeve në Uashington, me praninë e Presidentit amerikan Donald Trump, udhëheqësve politikë, shoqërorë e fetarë.

Përmes një publikimi në mediet sociale, ministrja e cilësoi pjesëmarrjen në Mëngjesin e Lutjeve si një “moment solemn që na kujton se besimi është themeli i forcës së shoqërisë njerëzore”.

Gjatë vizitës në Uashington, Spiropali zhvilloi disa takime në Senatin Amerikan, me fokus bashkëpunimin dhe koordinimin për çështje me interes të përbashkët mes Shqipërisë dhe SHBA.

Gjithashtu Spiropali u prit sot në Kongresin Amerikan edhe nga Kongresmeni Keith Self, Kryetar i Nënkomisionit për Evropën dhe iniciues i “Projektligjit për Vlerësimin e Diskriminimit në Luginën e Preshevës”.

Vizita e Spiropalit në Uashington do të vijojë me takimet në Departamentin Amerikan të Shtetit dhe në disa organizata think-tank të mendimit politik me fokus zhvillimet e fundit globale.

/m.q/j.p/

The post Spiropali merr pjesë në Mëngjesin e Lutjeve në Uashington appeared first on Agjencia Telegrafike Shqiptare.

TIRANË, 5 shkurt /ATSH/ Shqipëria dhe Sllovenia kanë përmbyllur me sukses raundin e dytë dhe të fundit të negociatave për marrëveshjen në fushën e punësimit dhe sigurimeve shoqërore. Negociatat u zhvilluan në Tiranë, në datat 2-4 shkurt.

Zëvendësministrja e Ekonomisë dhe Inovacionit, Olta Manjani, e cila kryesoi delegacionin shqiptar, bëri të ditur se “në bashkëpunim të ngushtë me palën sllovene të kryesuar nga Mojca Pršina Kumar, bënë të mundur parafirmosjen e kësaj marrëveshjeje të rëndësishme”.

Manjani theksoi se marrëveshja synon forcimin e bashkëpunimit dypalësh në fushën e punësimit dhe sigurimeve shoqërore, duke garantuar mbrojtjen e të drejtave të qytetarëve dhe zbatimin e praktikave bashkëkohore në përputhje me legjislacionin e Bashkimit Evropian.

“Qytetarët do të përfitojnë nga bashkimi i periudhave kontributive, duke siguruar që vitet e punës të mos humbasin. Gjithashtu, në fushën e punësimit, marrëveshja krijon akses më të lehtë dhe të drejta të barabarta në tregun e punës të të dyja vendeve”, shkruan Manjani.

Nga viti 2005 e deri më sot Shqipëria ka nënshkruar rreth 28 marrëveshje në fushën e sigurimeve shoqërore mes të cilave; me Turqinë, Belgjikën, Hungarinë, Luksemburgun, Çekinë, Maqedoninë e Veriut, Gjermaninë, Austrinë, Bullgarinë, Kanadanë, Rumaninë, Kosovën, me Konfederatën e Zvicrës dhe me Kroacinë. Sakaq në fuqi pritet të hyjnë edhe marrëveshjet me Malin e Zi e Bullgarinë.

Prej 1 qershorit 2025 ka nisur zbatimi i marrëveshjes për pensionet mes Shqipërisë dhe Italisë, e cila garanton të drejtat e pensioneve për rreth gjysmë milioni shqiptarë dhe 4 mijë italianë.

Në proces ende janë marrëveshjet me Poloninë e Serbinë, ndërsa me Francën procesi është drejt arritjes së një dakordësie për fillimin e negociatave.

Vende si Spanja, Danimarka, Moldavia dhe Emiratet e Bashkuara Arabe, Izraeli dhe Letonia kanë dhënë dakordësinë për fillimin e negociatave.

Procesi më i gjatë dhe më i vështirë për palën shqiptare është ai me Greqinë.

1 nga 2

/m.q/j.p/

The post Parafirmoset marrëveshja për njohjen e pensioneve me Slloveninë appeared first on Agjencia Telegrafike Shqiptare.

TIRANË, 4 shkurt /ATSh/ Kryetarja e Gjykatës Kushtetuese, Fiona Papajorgji, priti sot në një takim kortezie ambasadorin e Mbretërisë së Spanjës në vendin tonë, Gabriel Cremades Ventura.

Ambasadori Cremades e uroi Papajorgjin për marrjen e kësaj detyre të rëndësishme dhe rikonfirmoi mbështetjen e vazhdueshme të Ambasadës së Mbretërisë së Spanjës, veçanërisht në drejtim të forcimit të sistemit të drejtësisë në Shqipëri dhe procesit të integrimit europian të vendit.

Gjatë takimit u evidentuan marrëdhëniet shumë të mira ndërmjet Gjykatave Kushtetuese respektive dhe u shpreh gatishmëria për thellimin e mëtejshëm të bashkëpunimit në fusha me interes të përbashkët, në funksion të konsolidimit të shtetit të së drejtës dhe rritjes së kapaciteteve institucionale.

Po ashtu, Papajorgji shprehu vlerësimin dhe mirënjohjen për mbështetjen e Ambasadës së Mbretërisë së Spanjës në organizimin e Kongresit Botëror të Ligjit, si dhe zgjedhjen e Shqipërisë si vendi pritës i këtij Kongresi në vitin 2027, çka reflekton progresin e dukshëm të reformave të ndërmarra në sistemin e drejtësisë në Shqipëri dhe ofron një platformë unike për shkëmbimin e përvojave, forcimin e bashkëpunimit ndërkombëtar dhe promovimin e vlerave demokratike që qëndrojnë në themel të shtetit të së drejtës.

/m.q/r.e/a.f/

The post Papajorgji pret ambasadorin e Spanjës, në fokus organizimi i Kongresit Botëror i Ligjit në Tiranë appeared first on Agjencia Telegrafike Shqiptare.

TIRANË, 4 shkurt /ATSh/ Kryetari i Partisë Demokratike, Sali Berisha në konferencën e sotme me mediet, e cilësoi situatën aktuale në Gjykatën Kushtetuese si “degradimin më të thellë institucional që ka njohur vendi”.

Berisha tha në Gjykatën Kushtetuese se ka humbur çdo rol kushtetues dhe moral, duke vepruar, sipas tij, si instrument politik i Kryeministrit. Ai theksoi se me vendimet e fundit, kjo gjykatë ka kryer një akt të hapur vetëposhtërimi.

“Dita e djeshme faktoi para secilit prej jush, para të gjithë shqiptarëve, para komunitetit ndërkombëtar dhe mbarë botës se Gjykata Kushtetuese e Shqipërisë është strofulla e fundit e hajdutëve tuaj. Në një akt ekstrem vetëposhtërimi, ata të cilët Kushtetuta i përcakton si garantë të saj dhe i ka vendosur në piedestalin më të lartë të piramidës së pushtetit gjyqësor, ata po faktojnë para syve tuaj se janë strofulla e fundit e hajdutëve të narkoshtetit.

“Ata zotërinj dhe zonja, natyrisht jo të gjithë, se këtu nuk mund të mos vlerësoj qëndrime korrekte të ndonjërit prej tyre, dëshmojnë se janë të gatshëm jo të mbrojnë ligjin, Kushtetutën dhe interesat tuaja, por të shkelmojnë mbi ligjin, Kushtetutën dhe dinjitetin, moralin e vet”, tha Berisha.

Në fjalën e tij, Berisha e vendosi veprimtarinë e Gjykatës Kushtetuese në kontrast të drejtpërdrejtë me interesin e qytetarëve dhe krizën sociale në vend.

”Ajo gjykatë dëshmoi se para ligjit, para interesit të një populli të tërë, para interesit të qindra mijëra fëmijëve shqiptarë, që sipas të gjitha statistikave nuk ushqehen dot si duhet, para interesit të miliona shqiptarëve që braktisin vendin e tyre, sepse u shkatërrohen vendet e punës, para interesit të mijëra të sëmurëve që nuk marrin dot ilaçet e tyre, sepse u vidhen paratë e ilaçeve nga zyrtarët që këta mbrojnë, por edhe para dinjitetit të vendit, këta janë turpi i vendit, turpi i kombit. Këta e bëjnë Shqipërinë hore para gjithë botës me gjithë këto qëndrime. Këta e bëjnë Shqipërinë një shtet hor, zuzar, që nuk ka as ligj dhe as Kushtetutë, dhe e bëjnë vetëm për interesa personale. Kemi të bëjmë me një degradim të shkallës më të thellë që mund të ekzistojë. Me ambiguitetin e tyre tregojnë se sa të pakarakter dhe të pafytyrë janë”, tha Berisha.

Berisha u shpreh se, Gjykata Kushtetuese nuk ka qenë gjithmonë pa probleme, por theksoi se kurrë më parë nuk ka arritur këtë nivel degradimi.

“Edhe atëherë kur ka dhënë 37 vendime kundër qeverisë time, nuk ka qenë e tillë. Edhe atëherë kur në gjykatë ishin anëtarë të kryesisë së PS, nuk ka qenë e tillë. Sot ajo është në gjendjen më të turpshme, më të mjeruar. Me njerëzit më pa dinjitet që mund të bëhen”, tha Berisha.

Gjatë fjalës së tij Berisha dha edhe një mesazh drejtuar qytetarëve duke i cilësuar si forca dhe shpresa e vetme përballë këtij realiteti, ndërsa i ftoi qytetarët të vazhdojnë rezistencën politike dhe morale deri në “triumfin e të drejtës dhe dinjitetit”.

I pyetur për protestën e 10 shkurtit dhe mundësinë e një proteste të pandërprerë, kryetari i Partisë Demokratike, Sali Berisha deklaroi se kjo kërkesë po vjen gjithnjë e më shumë nga vetë qytetarët.

“Tani kemi një objektiv, largimin e këtij armiku të egër të qenies së shqiptarëve”, tha Berisha.

/m.q/r.e/a.f/

The post Berisha: Gjykata Kushtetuese po vepron si instrument politik i Kryeministrit appeared first on Agjencia Telegrafike Shqiptare.

TIRANË, 4 shkurt /ATSh/ Kreu i Partisë Demokratike, Sali Berisha akuzoi sot qeverinë për përmbysje të piramidës së pagave, duke deklaruar se kjo situatë ka cenuar hierarkinë institucionale dhe ka krijuar pabarazi në sistemin e drejtësisë.

Gjatë një konference për mediet, teksa u pyet në lidhje me debatin ndërmjet kryeministrit Edi Rama dhe Shoqatës së Gjyqtarëve për pagat e gjyqtarëve, Berisha tha se ndërtimi i piramidës së pagave është një kompetencë ekskluzive e ekzekutivit dhe një proces me përgjegjësi të lartë shtetërore.

Sipas Berishës, sot raporti i pagave në sistemin e drejtësisë është i deformuar. Berisha u shpreh se kërkesat e gjyqtarëve janë të drejta dhe të mbështetura në Kushtetutë.

“Çështja e pagave, unë e kam sqaruar, pagat dhe piramida e pagave janë e drejtë absolute ekskluzive për të gjithë shtetin dhe institucionet e tij e ekzekutivit, përveç ndërmarrjeve publike, që funksionojnë me mekanizëm tjetër. Ndërtimi i piramidës së pagave është një detyrë me shumë përgjegjësi dhe jashtëzakonisht e rëndësishme. Ndërtuesi i saj, në piramidën e pagave pasqyron përparësitë që ka kombi në rrugën e zhvillimit.

“Çdo gjykatës sot ka 100 për qind të drejtë të mos pranojë piramidën ekzistuese. Nuk është këtu çështja e niveleve. Është çështja sepse ky një prokurori në prokurorinë speciale i jep një rrogë dy herë më të madhe se gjykatësit kushtetues. Shteti është i detyruar t’i qëndrojë hierarkisë. Dhe kjo hierarki përcakton rrogën më të lartë në Republikën e Shqipërisë, atë të Presidentit të Republikës.

“Ata kanë të drejtën e Zotit, kanë të drejtën e Kushtetutës, kanë të drejtën e ligjit në pretendimin e tyre. Nuk do mbështesja unë kurrë, por unë mbështes të drejtën. E drejta është që piramida është përmbysur dhe është përmbysur vetëm e vetëm për të paguar një grup mercenarësh për qëllime politike”, tha Berisha.

Ai tha se kryeministri Rama ka votuar vetë ndryshimet ligjore që, sipas tij, kanë përmbysur piramidën e pagave.

“Ky e ka përmbysur piramidën. Ky është përgjegjësi kryesor. Nuk luhet me piramidën e rrogave”, tha Berisha.

Berisha tha se qeveria ka përmbysur hierarkinë shtetërore për interesa politike.

/m.q/a.f/r.e/

The post Berisha: Piramidën e pagave e përmbysi Rama, gjyqtarët kanë të drejtë kushtetuese appeared first on Agjencia Telegrafike Shqiptare.

TIRANË, 4 shkurt /ATSh/ Në komisionin për Nismat Qytetare, Bashkëpunimin dhe Mbikëqyrjen Institucionale u zhvillua sot seancë dëgjimore në lidhje me sigurinë në gjykata me përfaqësues të Prokurorisë së Përgjithshme.

Sekretari i Përgjithshëm i Prokurorisë së Përgjithshme, Luan Abazi, theksoi se “kërkohen masa shtesë dhe masat shtesë kanë një faturë financiare. Me fondet që kemi në dispozicion do të përpiqemi t’i plotësojmë këto kërkesa maksimalisht aq sa na lejojnë mundësitë”.

Sipas tij “në disa prokurori, nuk na jepet mundësia për shkak të godinave ekzistuese të vjetra për të garantuar në masën 100% masat e sigurisë. E kemi të pamundur për hyrje të veçantë për punonjësit, për të mbrojtur territorin në mënyrën më të mirë të mundshëm për shkak të kushteve që ndodhen këto godina”.

“Vetëm Shkodra, Korça dhe Elbasani plotësojnë standardet e miratuara, ndërsa në të gjitha prokurorit e tjera e kemi në pamundësi për të plotësuar kërkesat e legjislacionit. Nuk mundemi që tek prokuroria e Tiranës të garantojmë në masën 100% sigurinë. Pozicionet urbanistike të godinës janë të tilla që nuk na japin mundësinë për të çuar masat e sigurisë në atë nivel”, nënvizoi Abazi.

Abazi theksoi se ka godina ekzistuese të vjetra, siç është prokuroria e Lezhës, që këtë vit po ndërhyjnë të vendosim parametrat e kërkuara të sigurisë.

“Jemi në fazën e miratimit të projektit. Po kështu dhe në Berat do të ndërhyjmë ta sjellim sipas parametrave të kërkuara”, tha ai.

Abazi kërkoi që prokuroritë të cilësohen objekte të rëndësie së veçantë dhe të ruhen nga Policia e Shtetit.

“Sa i përket masave të sigurisë bashkë me KLGJ, i qëndrojmë mendimit që prokurorit të cilësohen objekte të rëndësisë së veçantë. Nëse do të konsiderohen objekte të cilësisë së veçantë atëherë ruajta do të behet nga policia e shteti. Ilyrian Guard ka kontratë me ne sot, nuk kemi problem, por punonjësit e saj në këndvështrimin tonë janë vetëm lajmëtar. Ata nuk kanë asnjë mjet për të ndërhyrë në situata që mund të paraqiten situate të rrezikshme për jetën e prokurorë të oficerëve. Janë qytetarë me një telefon celular ose radio që nëse ndodh një situatë e tillë njoftojnë “hajdeni”, por nuk kanë mundësitë për të ndërhyrë në situata të rrezikshme. Ne nuk duam ruajte me polici brenda godinës, por perimetrin e jashtëm të godinës”, tha ai.

Edhe kryetari i Komisionit Fatmir Xhafaj tha se në prokuroritë e vendit është konstatuar nga anëtarët e komisionit “një gjendje jo serioze në raport me misionin, përgjegjësinë dhe specifikat e punës së këtij institucioni, nga pikëpamja e infrastrukturës fizikë, Tirana, Lezha, Fieri aq sa ne kemi mundur të shohim dhe kjo ka qenë një sinjal alarmi dhe për ne e cila na ka vënë para një përgjegjësi për të luajtur rolin që ka Kuvendi në gjithë këtë proces”.

Xhafaj tha se sa i përket ndryshimeve ligjore për të rritur sigurinë, “jemi të angazhuar të shohim mundësinë se ku do të ndërhyhet për t shfrytëzuar një atribut, për të ndërmarrë nisma ligjore përmirësuese”.

/m.q/a.f/

The post Abazi: Prokuroritë të cilësohen objekt i rëndësisë së veçantë, të ruhen nga Policia e Shtetit appeared first on Agjencia Telegrafike Shqiptare.

TIRANË, 4 shkurt /ATSh/ Kryeministri Edi Rama reagoi sot në lidhje me debatin për pagat e gjyqtarëve, në një moment kur Gjykata Kushtetuese ndodhet në fazën përfundimtare të shqyrtimit të çështjes së statusit financiar të magjistratëve.

Kryeministri hodhi poshtë pretendimet e gjyqtarëve se Këshilli i Ministrave ka suprimuar qëllimisht referencën e pagës, duke suprimuar pozicionin e Drejtorit të Përgjithshëm në Këshillin e Ministrave.

Rama shtoi se, arsyetimi pa prova dhe pa fakte, vë në pikëpyetje serioze mënyrën se si merren vendime që prekin interesin publik dhe fatet e qytetarëve.

“Ju jeni atje lart për të dhënë drejtësi dhe për të garantuar barazinë para ligjit dhe jo këtu poshtë ku jemi ne të tjerët, që përditë jemi në beteja të tilla dhe për t’u futur dhe ju në këtë përleshje me një gjuhë të papranueshme, të pajustifikueshme, që shkel çdo etikë të gjykatësit dhe ndërkohë të thoni se Këshilli i Ministrave kishte suprimuar qëllimisht dhe me keqbesim sipas jush referencën e pagës duke suprimuar vendin.

“Ju jeni dhe të painformuar, sepse nuk ka patur asnjëlloj suprimimi nga Këshillit të Ministrave, të ndonjë pozicioni të quajtur Drejtor i Përgjithshëm se nuk ka pasur Drejtor të Përgjithshëm në Këshillin e Ministrave, si funksion. Mos flisni dokrra në sytë e popullit shqiptar, sepse gjithë këto dokrra që ju keni folur këtu ngrenë një pikëpyetje shumë të madhe nga mënyra sesi ju arsyetoni dhe nga mënyra juan e arsyetimit varen fate njerëzish, varet interesi publik e kombëtar, varen gjithfarë lloj familjesh. Ju nuk mund të arsyetoni pa prova, pa fakte dhe ju nuk mund të arsyetoni, duke marrë dhe shkelmuar faktet dhe provat, apo duke i marrë të mirëqena kur ato nuk ekzistojnë dhe ky është fiks një nga rastet kur flisni për një Drejtor të Përgjithshëm që qenka suprimuar në organigramën e Këshillit të Ministrave, kur Këshilli i Ministrave nuk ka pasur asnjëherë Drejtor të Përgjithshëm”, tha Rama.

Në lidhje me pretendimet për ulje pagash dhe përkeqësim të pozitës financiare, Rama tha se gjyqtarët duhet të paraqesin dokumente konkrete. Rama shtoi se pagat e gjyqtarëve shqiptarë janë të krahasueshme me ato të gjyqtarëve në Greqi dhe se kërkesat për rritje të mëtejshme janë të pajustifikuara.

“E pesta, ju thoni se për të ndrequr pakushtetutshmërinë. Kush jeni u që e përcaktoni këtë gjë kështu? Ju nuk jeni parti politike. Partitë politike, mund të flasin duke dhënë opinione të tilla në publik, ju jeni gjykatës, nuk jeni interlokutorë të publikut në arenën e pluralizmit politik. Si mund të flisni me këtë gjuhë, si mund të hidhni baltë mbi qeverinë me këtë lloj retorike dhe për më tepër flisni për zbritje fiktive në kategori më poshtë të pagës referuese të bëra nga ana e Këshillit të Ministrave. E vërteta është se flisni dhe për ulje pagash. Juve ju është përkeqësuar pozicioni financiar, sipas jush. Nxirrni një dokument të vetëm të përkeqësimit tuaj financiar”, tha Rama.

Rama theksoi se qeveria është garantja e pavarësisë së gjyqësorit dhe se ndryshimet e viteve të fundit kanë rritur ndjeshëm pavarësinë profesionale dhe personale të gjyqtarëve.

“I keni pagat njësoj si gjykatësit në Greqi sot, dhe doni t’i rrisni prap me nga 2000-3000 euro në muaj. Thoni që ne ua paskemi përkeqësuar pozicionin financiar juve?! Këto janë dokrra! Nxirrni një dokument të përkeqësimit të pozicionit financiar, se nuk jeni parti politike, për të bërë deklarata publike. Askush këtu sa më takon mua nuk ju cenon juve pozicion, kjo qeveri është garantja e pavarësisë suaj. Ju e shikoni vetë ndryshimin e madh që ka ndodhur dhe në jetën tuaj familjare, dhe në jetën tuaj profesionale, sepse jeni totalisht të pavarur. Jo të dilni në publik dhe të bëni fletërrufe”, tha Rama.

/m.q/r.e/a.f/

The post Rama: Gjyqtarëve nuk u është përkeqësuar pozicioni financiar, pagat si në Greqi appeared first on Agjencia Telegrafike Shqiptare.

TIRANË, 3 shkurt /ATSh/ Komisioni Shtetëror i Zgjedhjeve, në seancë publike vendosi sot shpërndarjen e fondeve vjetore partive politike në formën e ndihmës financiare vjetor për vitin 2026.

Buxheti i shtetit ka parashikuar fondin prej 345 600 000 (treqind e dyzet e pesë milionë e gjashtëqind mijë) lekë, si mbështetje financiare për partitë politike për vitin 2026.

Në total përfitojnë gjithsej 17 parti politike dhe ndarja realizohet sipas rezultatit zgjedhor të 11 majit 2025, ku PS qëndron e para me 166 067 986 lekë, ndjekur më pas nga PD, e cila do të marrë 81 187 402 lekë.

E treta është Partia e Lirisë, së cilës KQZ do t’i japë mbi 10 985 978 lekë, ndjekur nga Partia Socialdemokrate e Tom Doshit që merr 10 327 314 lekë.

Partitë e reja në Parlament, Mundësia e Agron Shehajt merr 8 580 010 lekë, ndërsa Shqipëria Bëhet e Adriatik Lapajt merr mbi 7 178 306 lekë.

Lëvizja Bashkë e Arlind Qorrit merr 6 324 674 lekë, ndërsa PDIU e Shpëtim Idrizit merr 5,795,906 lekë, PBDNJ merr 5 795 906 lekë, Partia Republikane e Fatmir Mediut si dhe Partia Ambientaliste Agrare do të përfitojnë 5 795 906 lekë secila.

Po ashtu rreth 5 795 906 lekë marrin edhe partitë PDK, PLL, FRD, PBKD, ndërsa KEA do të marrë 5 451 162 lekë.

Gjithashtu, në seancën e sotme publike u plotësuan vakancate krijuara në këshillat bashkiak: Këshilli i Bashkisë Vlorë me kandidatin e “Partisë Socialiste të Shqipërisë”, Valter Hasanaj; Këshilli i Bashkisë Bulqizë me kandidatin e Koalicionit “Bashkë Fitojmë” Fllanxa Losha; Këshilli i Bashkisë Shijak me kandidatin e “Partisë Socialiste të Shqipërisë”, Mentor Jamaku; Këshilli i Bashkisë Vau Dejës me kandidatin e “Partisë Socialdemokrate”, Elton Frashnaj.

/m.q/a.f/

The post KQZ shpërndan 3.57 milionë euro fonde vjetore për partitë politike appeared first on Agjencia Telegrafike Shqiptare.

TIRANË, 3 shkurt /ATSh/ Policia Rrugore e Tiranës njoftoi sot se si rezultat i kontrolleve të shtuara dhe përdorimit të pajisjeve logjistike bashkëkohore, gjatë 72 orët e fundit janë konstatuar shkelje të ndryshme të Kodit Rrugor, për të cilat janë vendosur masat administrative.

Konkretisht sipas policisë për përdorimin e celularit gjatë drejtimit të mjetit janë vendosur 101 masa, për mosvendosje e rripit të sigurimit janë 80 masa dhe për mosrepektimi të radhës në trafik janë vendosur 63 masa.

Gjithashtu, për shkelje të rënda të Kodit Rrugor dhe për vepra penale në fushën e qarkullimit rrugor: janë arrestuar/proceduar penalisht 23 shtetas si dhe janë ngritur me karrotrec 19 automjete.

Policia Rrugore apelon për të gjithë drejtuesit e mjeteve dhe përdoruesit e tjerë të rrugës që të respektojnë rregullat e qarkullimit rrugor, duke kontribuar në mënyrë të drejtpërdrejtë në parandalimin e aksidenteve dhe në mbrojtjen e jetës dhe shëndetit të qytetarëve.

/m.q/a.f/

The post Shkelën rregullat e qarkullimit, gjobiten 244 shoferë në Tiranë appeared first on Agjencia Telegrafike Shqiptare.

TIRANË, 3 shkurt/ATSh/ Kryetari i grupit parlamentar të Partisë Demokratike, Gazment Bardhi, kryetari i Partisë Republikane Fatmir Mediu, kryetarja e Komisionit të të Drejtave të Njeriut Jorida Tabaku, deputetët Albana Vokshi, Belind Këlliçi dhe Ivi Kaso po zhvillojnë një vizitë zyrtare në ShBA, ku janë takuar me drejtorin e Institutit Republikan Amerikan (IRI) Daniel Twining dhe presidenten e Institutit Demokratik Kombëtar (NDI) Tamara Cofman Wittes.

Përfaqësuesit e opozitës kanë shkëmbyer informacionet e tyre mbi zhvillimet më të fundit në Shqipëri dhe regresin që po bën vendi në drejtim të demokracisë dhe të drejtave të njeriut. Lufta kundër korrupsionit dhe krimit të organizuar, zgjedhjet e lira dhe funksionimi demokratik i institucioneve kanë qenë tema e diskutimit në këto dy takime.

Deputetët e opozitës kërkuan mbështetjen e IRI dhe NDI për opozitën dhe proceset demokratike në Shqipëri.

“Lufta kundër korrupsionit dhe krimit të organizuar, zgjedhjet e lira dhe funksionimi demokratik i institucioneve janë çështje me interes të përbashkët. Shqipëria e ka jetike partneritetin me ShBA dhe mbështetjen për të sjellë standardet evropiane në qeverisje.

“IRI dhe NDI kanë ndihmuar ndër vite që Shqipëria të bëjë proges në standardet ndërkombëtare të qeverisjes së mirë dhe jam i lumtur të dëgjojë që do të vazhdojnë të kontribuojnë në këtë drejtim. Në emër të opozitës i falenderuam për bashkëpunimin e deritanishëm dhe për të gjithë mbështetjen që kanë dhënë ndër vite”, shkruan Bardhi.

1 nga 2

/m.q/r.e/a.f/

The post Deputetë të opozitës takojnë presidentin e IRI dhe NDI në ShBA appeared first on Agjencia Telegrafike Shqiptare.

TIRANË, 3 shkurt/ATSh/ Samiti IV i Diasporës Shqiptare do të zhvillohet më 14–15 prill në Tiranë. Samiti duke synon forcimin e bashkëpunimit mes diasporës shqiptare dhe institucioneve në vend, si dhe ndërtimin e partneriteteve strategjike për zhvillimin afatgjatë të Shqipërisë.

Ministria për Evropën dhe Punët e Jashtme bëri të ditur se ky samit vjen si një hap i radhës në procesin e angazhimit të vazhdueshëm të diasporës, duke e çuar bashkëpunimin në një fazë më të strukturuar dhe të orientuar drejt rezultateve konkrete.

Sipas MEPJ-së, Samiti IV i Diasporës synon të krijojë një hapësirë të thelluar dialogu dhe bashkëpunimi, ku përvoja ndërkombëtare e diasporës do të ndërthuret me prioritetet kombëtare të zhvillimit.

“Ky samit krijon një hapësirë të thelluar dialogu dhe bashkëpunimi, ku përvoja ndërkombëtare e diasporës ndërthuret me prioritetet kombëtare të zhvillimit. Fokus i veçantë do t’i kushtohet ideve, projekteve dhe iniciativave që lidhin ekonominë, inovacionin, kulturën, teknologjinë, arsimin dhe sipërmarrjen me vizionin për Shqipërinë 2030″, njoftoi MEPJ.

I ndërtuar si një platformë bashkëkrijimi, sipas MEPJ-së “samiti synon të forcojë lidhjen mes diasporës, institucioneve qendrore dhe aktorëve vendorë, duke kontribuar në politika gjithëpërfshirëse, partneritete funksionale dhe bashkëpunime të qëndrueshme ndërkombëtare. Pjesëmarrja në këtë proces nuk është simbolike, ajo është pjesë e mënyrës se si formulohen zgjidhjet dhe orientohen prioritetet për të ardhmen”.

Samiti IV i Diasporës fton profesionistë, sipërmarrës, krijues dhe ekspertë nga e gjithë bota të bëhen pjesë e këtij dialogu, të ndajnë përvojën e tyre dhe të kontribuojnë në ndërtimin e urave të reja të bashkëpunimit.

“Bëhuni pjesë e Samitit IV të Diasporës. Një hapësirë ku rrënjët na bashkojnë, dhe vizioni i përbashkët na çon përpara”, njoftoi MEPJ.

Linku i regjistrimit

/m.q/r.e/a.f/

The post Samiti IV i Diasporës në Tiranë, MEPJ: Bëhuni pjesë, hapësirë ku rrënjët na bashkojnë appeared first on Agjencia Telegrafike Shqiptare.

TIRANË, 3 shkurt/ATSh/ Kryetari i Partisë Demokratike, Sali Berisha, gjatë fjalës së tij sot në Kuvend, akuzoi mazhorancën për shkelje të Kushtetutës dhe për mbrojtje të hapur të korrupsionit, teksa iu referua shtyrjes së mbledhjes së Këshillit të Mandateve për të miratuar kërkesën e Prokurorisë për heqjen e imunitetit të zëvendëskryeministres Belinda Balluku.

Nga foltorja e Kuvendit, Berisha u shpreh ky vendim përbën një akt grushti shteti dhe e kthen Kuvendin në mburojë të krimit dhe të vjedhjes së fondeve publike.

Kryetari i PD, Sali Berisha iu referua konceptit të “banalitetit të së keqes” të filozofes Hannah Arendt, duke akuzuar deputetët e mazhorancës se po veprojnë pa përgjegjësi morale dhe si zbatues të verbër të urdhrave të kryeministrit Edi Rama.

“E keni të shkruar secili prej jush në ballë. Ja, po të lexoj unë në ballet tuaja, lexoj: e keqja banale, me të cilën ju në mënyrë të verbër mbështesni korrupsionin, bëheni shtylla të sistemit të gjakpirjes së qytetarëve. Njerëz që nuk mendojnë. Automatë që nuk mendojnë. Nuk ndjejnë përgjegjësi. Ju kërkoj të lexoni sa të dilni nga kjo seancë “Banaliteti i së keqes” dhe të shihni se si jeni prototipi i saj”, tha Berisha.

Berisha deklaroi se përdorimi i imunitetit parlamentar për të mbrojtur korrupsionin po rrit revoltën qytetare dhe në përfundim u bëri thirrje shqiptarëve të reagojnë kundër qeverisë.

“A e kuptoni ju se ç’do të thotë të bllokoni imunitetin e një njeriu? A e kuptoni se ç’do të thotë të përdorni imunitetin si mburojë për vjedhjen e shqiptarëve? A mendoni ju se çfarë zemërimi dhe revolte të jashtëzakonshme krijoni tek qytetarët që mezi mbyllin ditën për kafshatën e gojës, që mezi mbyllin muajin, që nuk blejnë dot ilaçet e tyre, që vdesin spitaleve?

“Nuk duhet të vini si automatë këtu. Ky është një akt depersonalizimi. Njerëz që nuk mbani asnjë përgjegjësi ndaj shqiptarëve, ndaj vetes tuaj, ndaj familjeve tuaja. Shqiptarët kërkojnë të zhbllokohet sistemi i drejtësisë”, tha Berisha.

/m.q/r.e/a.f/

The post Imuniteti i Ballukut, Berisha: Kuvendi është kthyer në mburojë të krimit appeared first on Agjencia Telegrafike Shqiptare.

TIRANË, 3 shkurt /ATSh/ Kuvendi po zhvillon sot seancën plenare të radhës. Punimet nisën në orën 10:00. Në fokus të seancës plenare është kërkesa e deputetëve të Partisë Socialiste për disa ndryshime në përbërjen e Komisionit të Posaçëm për Reformën e Territoriales, si dhe interpelanca me ministrin e Drejtësisë, Besfort Lamallari, e kërkuar nga deputeti i Partisë së Lirisë, Tedi Blushi.

Lidhur me ndryshimet e propozuara nga mazhoranca, opozita kërkoi mos kalimin e tyre në seancë plenare. 

Në nisje të seancës plenare, deputetja e Partisë Demokratike, Ina Zhupa u shpreh se në Konferencën e Kryetarëve nuk është marrë një vendim për përfshirjen e këtij vendimi në seancën e sotme plenare.

“Diçka e pavotuar në Konferencën e Kryetarëve nuk mund të futet për votim në seancën plenare”, tha Zhupa.

Zhupa siguroi se PD ka qenë gjithmonë e gatshme për t’i qëndruar vendimit që ka votuar në Kuvend për të bërë bashkërisht reformën territoriale, ndërsa kërkoi edhe nga mazhoranca që t’i qëndrojë këtij vendimi.

Duke marrë fjalën në seancë, bashkëkryetari demokrat i komisionit të posaçëm të reformës administrativo-territoriale, Luçiano Boçi u shpreh se “nuk ka pasur marrëveshje në Konferencën e Kryetarëve”.

“Është dhënë vetëm një ultimatum për një mbledhje të thirrur nga komisioni i reformës territoriale. Kur ka një kryetar, sipas rregullores mbledhja thirret përmes dakordësisë së kryesisë së komisionit”, u shpreh Boçi, duke kërkuar që ndryshimet e propozuara të mos votohen gjatë seancës plenare në Kuvend.

Lidhur me pretendimet e opozitës, Kryetari i grupit parlamentar të Partisë Socialiste, Taulant Balla u shpreh se opozita nuk është ende e qartë lidhur me pjesëmarrjen ose jo në komisionin e posaçëm të reformës administrativo-territoriale.

Duke iu përgjigjur deputetëve të opozitës, Balla tha se mazhoranca është e gatshme të presë deri në mbrëmje, kur edhe do të votohet, për një vendim nëse do të marrin apo jo pjesë rregullisht në mbledhjet e komisionit.

Balla kërkoi qartësi dhe përgjegjësi institucionale nga opozita, ndërsa u shpreh se shumë vendime të opozitës i kanë mësuar përmes medies.

Sipas tij, opozita ka ndryshuar qëndrim brenda një dite, duke lënë të paqartë nëse është tërhequr apo jo nga bojkoti i komisionit.

Sa i takon rendit të ditës, gjatë seancë do të shqyrtohen disa projektligje, përfshirë ratifikimin e marrëveshjes së financimit ndërmjet Republikës së Shqipërisë, Francës dhe Komisionit Evropian, për programin e bashkëpunimit (Interreg VI-C) Interreg Europe 2021-2027.

Pritet shqyrtimi i projektligjit për ratifikimin e marrëveshjes ndërmjet Shqipërisë, Kosovës dhe Komisionit Evropian për programin e bashkëpunimit ndërkufitar Shqipëri-Kosovë, 2021-2027, projektligjit për ratifikimin e marrëveshjes së financimit ndërmjet Shqipërisë, Malit të Zi dhe Komisionit Evropian për programin IPA të bashkëpunimit ndërkufitar Mali i Zi – Shqipëri 2021–2027.

Gjithashtu do të shqyrtohet projektligji për ratifikimin e marrëveshjes ndërmjet Shqipërisë, Republikës së Maqedonisë së Veriut dhe Komisionit Evropian, për programin IPA të bashkëpunimit ndërkufitar Maqedonia e Veriut – Shqipëri, 2021-2027.

Në rendin e ditës është parashikuar që të diskutohet edhe projektligji në fushat e barnave narkotike dhe lëndëve psikotrope, projektligji për mbrojtjen nga diskriminimi dhe projektligji parandalimit të konfliktit të interesave në funksionet publike.

Gjatë seancës do të diskutohet edhe projektvendimi i propozuar nga Partia Socialiste për ndryshimin në Komisionin për Reformën Administrativo-Territoriale.

Gjithashtu do të diskutohet dhe projektvendimi “Për ngritjen e Nënkomisionit për Zhvillim të Qëndrueshëm në përbërje të Komisionit të Përhershëm Parlamentar për Burimet Natyrore, Infrastrukturën dhe Zhvillimin e Qëndrueshëm”.

Kuvendi në seancë plenare - Foto: Andrin Hoxha

1 nga 3

vijon…

/m.q/j.p/r.e/

The post PD-PS përplasje për “Territorialen” në Kuvend, nis interpelanca me ministrin e Drejtësisë appeared first on Agjencia Telegrafike Shqiptare.

TIRANË, 2 shkurt /ATSh/ Zëvendëspresidentja e Partisë së Lirisë, Erisa Xhixho tha sot se mbi 11 mijë mësuesve u është ulur paga nga 2 mijë deri në 6 mijë lekë.

Përmes një deklarate për mediet, deputetja e PL-së theksoi se “11 172 mësues shqiptarë janë përballur me uljen e pagës”, pasi “janë penalizuar nga Vendimi i Këshillit të Ministrave i datës 26 qershor 2024”.

“Kjo VKM dhe në mënyrë të veçantë Lidhja nr. 4, e cila përcakton shtesën e nivelit të kualifikimit, cenon disa të drejta të punonjësve të përcaktuara në Kushtetutën e Republikës së Shqipërisë, Kodin e Punës dhe Kontratën Kolektive.

“Mësuesit e prekur janë trajtuar për vite me radhë në mënyrë të barabartë dhe në përputhje me ligjin, ndërsa ndryshimi i njëanshëm i kësaj trajtese përkeqëson kushtet e tyre të punës dhe cenon paga të fituara ligjërisht”, tha ajo.

Në lidhje me këtë çështje, Xhixho ka kërkuar një seancë pyetje-përgjigje me ministren e Arsimit Mirela Kumbaro.

“Duke reflektuar shqetësimin e qindra mësuesve dhe të Sindikatës së Bashkuar të Mësuesve, i jam drejtuar Kuvendit me një kërkesë për një seancë pyetje-përgjigje me Ministren e Arsimit. Në mbështetje të kërkesave të tyre të drejta, sindikatat dhe punonjësit e arsimit kërkojnë rishikimin e menjëhershëm të këtij vendimi dhe hapjen e një dialogu institucional serioz, që garanton trajtim të barabartë, respektim të të drejtave të fituara dhe dinjitet për mësuesit”, tha Xhixho.

/m.q/r.e/a.f/

The post Xhixho kërkon seancë pyetje-përgjigje me Kumbaron: Mbi 11 mijë mësuesve u është ulur paga appeared first on Agjencia Telegrafike Shqiptare.