TIRANË, 25 dhjetor/ATSH/ Besimtarët katolikë morën pjesë në meshën e Krishtlindjes në mesnatë, në katedralen e “Shën Palit”.

Mesha u drejtua nga kreu i Kryedioqezës Mitropolitane Tiranë-Durrës, Arjan Dodaj.

“Netët e mbara të historisë së njerëzimit nuk janë një dritë e fortë që imponon, por një dritë e butë që ndriçon rrugën e çdo njeriu. Ajo përshkon shekujt dhe arrin tek ne, këtu, sonte. Ecim me gëzim dhe shpresë përballë çdo zhgënjimi njerëzor, sikurse kemi shtegtuar në këtë vit jubilear të shpresës, sepse për ne ka lindur Shpëtimtari. Jezusi mbetet për ne gjithmonë Zoti ynë, por edhe vëllai ynë. Leximet e kësaj nate, që sapo kemi dëgjuar, na ndihmojnë të kuptojmë se Krishtlindja nuk është thjesht premtimi i një përkujtimi të një ngjarjeje të kaluar. Sot shumë njerëz përjetojnë errësirën, siç dëgjojmë dhe shohim në luftë”, tha Imzot Arjan Dodaj.

Në meshë ishin të shumtë besimtarët katolikë të pranishëm, të cilët pritën mes lutjesh mbërritjen e mesnatës së 25 dhjetorit, lindjen e Jezusit.

Krishtlindja është nga festat më të rëndësishme në kalendarin e besimtarëve katolikë, por edhe atyre ortodoksë, të cilët meshën e festës e mbajnë në mëngjesin e 25 dhjetorit.

Festa e Krishtlindjes quhet dhe Lindja në Mish e Zotit dhe Perëndisë dhe Shpëtimtarit tonë Jezu Krisht. Në Krishtlindje kremtohet lindja si njeri e Birit të Perëndisë, të atij që së bashku me Atin dhe Shpirtin e Shenjtë është me të vërtetë Perëndi në jetë të jetëve.

Prandaj në Kishë këndohet: Virgjëresha lindi sot të përmbiqenshmen Fjalë, edhe dheu i blaton të paafruarit shpellën; Engjëjt, me barinjtë po lavdërojnë, Magët pra, bashkë me yllin po udhëtojnë; se për ne ka lindur Krishti, si djalë foshnjë, i parëjetshmi Zot.

Festa e Krishtlindjes është kremtimi i shpëtimit të botës nëpërmjet Birit të Perëndisë, i cili u bë njeri për ne, që me anën e tij, ne të mund të bëhemi hyjnorë, bij të Perëndisë Atë, me anë të banimin ndër ne të Shpirtit të Shenjtë.

Mesha në mesnatë janë mbajtur edhe në kisha e tjera katolike, të shpërndara në 6 dioqezat e vendit.

Mesha e Krishtlindjes në katedralen e “Shën Palit”, foto: Andrin Hoxha

1 nga 32

/k.s/j.p/

The post Besimtarët katolikë në meshën e Krishtlindjes, Imzot Dodaj: Ecim me gëzim dhe shpresë përballë çdo zhgënjimi njerëzor appeared first on Agjencia Telegrafike Shqiptare.

VATIKAN, 25 dhjetor /ATSH-ANSA/ – Papa Leone XIV ka mbajtur Meshën e tij të parë të Krishtlindjeve.

“Ndërsa një ekonomi e shtrembëruar na bën të trajtojmë njerëzit si mallra, Zoti bëhet si ne, duke zbuluar dinjitetin e pafund të çdo personi. Ndërsa njeriu dëshiron të bëhet Zot për të dominuar të afërmin e tij, Zoti dëshiron të bëhet njeri për të na çliruar nga çdo skllavëri. A do të jetë e mjaftueshme kjo dashuri për të ndryshuar historinë tonë?” theksoi Papa.

LeoneXIV na fton të “admirojmë urtësinë e Krishtlindjeve”: “Përballë dhunës dhe shtypjes, në Jezusin fëmijë, Zoti i jep botës një jetë të re: të tijën, për të gjithë”

Gati 250 kardinalë, peshkopë dhe priftërinj bashkohen në liturgjinë solemne me Papën në Altarin Qendror të Rrëfimit.

Kori i Kapelës Sistine shoqëron hyrjen me këngën “Noel”.

Sipas Zyrës së Shtypit të Selisë së Shenjtë, “rreth 6,000 besimtarë morën pjesë në Meshë në Bazilikë, përveç afërsisht 5 000 të mbledhurve jashtë në shesh në shi.

Papa doli çuditërisht në shesh para Meshës, në shi, për të përshëndetur të pranishmit: “Faleminderit që erdhët edhe në shi! Urimet më të mira të gjithëve!” tha ai.

“Duam ta festojmë festën e Krishtlindjeve së bashku. Jezu Krishti, i cili lindi për ne, na sjell paqe, na sjell dashurinë e Zotit. Urimet më të mira të gjithëve ju. Zoti ju mbroftë dhe ju bekoftë të gjitha familjet tuaja”, shtoi ai. /os/

The post VATIKAN – Leone XIV: Ekonomia që trajton njeriun si mall është e shtrembër appeared first on Agjencia Telegrafike Shqiptare.

TIRANË, 24 dhjetor /ATSH/ Rreth 100 fëmijë nga familje që trajtohen me ndihmë ekonomike në qarkun e Elbasanit, apo që rriten nga nëna kryefamiljare, patën mundësinë që këtë fund vit të gëzojnë dhe të presin dhuratat e babagjyshit si të gjithë fëmijët e tjerë.
Në aktivitetin e organizuar me rastin e festave të fundvitit, jo vetëm si një mundësi për të gëzuar fëmijët, por edhe për të biseduar me gratë kryefamiljare, deputetja Sara Mila tha se do të jetë pranë këtyre familjeve për çdo lloj mbështetje që ata kanë nevojë, sidomos për të dalë nga skema e ndihmës ekonomike.

“Ne do të jemi gjithmonë pranë për t’iu ndihmuar. Edhe sot pavarësisht festës, ne do të kemi një mundësi që të ulemi dhe të shikojmë të gjitha mundësitë që zyra e punës ofron për të gjitha ju qoftë për punësim qoftë për trajnime të mundshme që pastaj të shkoni drejt punësimit. Nuk jam thjesht përfaqësuesja juaj në Parlamentin e Shqipërisë, jam njëra nga ju. Jam një mami që kalon shumë pak kohë me vajzën time në mënyrë të atillë që të mundem që nëpërmjet shembullit që jap ta bëj atë që të jetë e pavarur nesër sepse pa diskutim nuk mund të varemi më në krahët e njëri – tjetrit. Duhet të varemi te krahët dhe shpatullat tona”, u shpreh deputetja Mila.

Drejtuesja e zyrës së punës në Elbasan, Marsida Hyseni, e pranishme në këtë takim u njoh me raste konkrete, të cilat kërkonin vëmendje më imediate për situatat specifike. Gjithashtu ajo dhe stafi i zyrës së punës ofruan informacion mbi të gjitha programet e mbështetjes dhe mekanizmat se si këto familje të munden të përfitojnë.

“Ju përfitoni programe të nxitjes së punësimit të cilat zyra e punës i ofron. Nxitja punësimit është për ju që keni kujdesin për fëmijët apo kujdesin për moshat e teta apo që keni prindër në shtëpi, të afërm që mund të kujdeseni dhe e keni të pamundur që të punoni me kohë të zgjatura. Ne kemi disa programe të cilat ndihmojnë për një vit që ju të paktën të filloni të dilni nga shtëpia. Mbi të gjitha do vijë një moment që do na vijë dhe pensioni dhe në momentin që nuk keni kontribute do të thotë që ne nuk do të arrijmë dot të sigurojmë një pension”, u shpreh ajo.

“Atëherë pse të lodhemi kaq gjatë dhe të rrimë në pritje kur ne mund të punojmë sot, të integrojmë veten tonë. Zyra e punës ofron programe të nxitjes së punësimit, formim profesional për secilin prej jush që ka dëshirën e mirë të formohet nga ana profesionale sepse tipologjia e qytetit të Elbasanit patjetër që është nj qytete industrial dhe e ka fokusin te kjo fushë, por jo vetëm. kemi dhe punë të tjera, të cilat janë dhe në fushën e ekonomisë, dikush që ka mbaruar studimet apo fëmijët tuaj që kanë mbaruar një studim akademik apo fëmijët tuaj që anë mbaruar një formim profesional në shkollat e formimit profesional duhet të afrohen pranë zyrave të punës që të bëjmë regjistrimet, ti orientojmë drejt formimit profesional. Mund të trajnoheni nga zyra e punës në qendrën e formimit profesional dhe ky trajnim është falas në momentin që ti bëhesh pjesë e zyrës së punës dhe behësh pjesë e një pune të denjë”, theksoi ajo.

Deputetja Mila vuri theksin te ndihma e mëtejshme për fëmijët që kalojnë moshën 18 vjeç duke u ndalur te prioritetet që ata kanë si në aplikimin e kredive të buta ashtu edhe në banesat sociale që ofrohen nga bashkia apo qoftë dhe nga institucione vendore që kanë bashkëpunim me bashkinë.

1 nga 8

/m.q/j.p/

The post Mila: Pranë grave kryefamiljare, të ndërtojmë së bashku të ardhme më të sigurt për fëmijët appeared first on Agjencia Telegrafike Shqiptare.

TIRANË, 24 dhjetor /ATSH/ Agjencia e Mbikëqyrjes Policore (Rajoni Tiranë) arrestoi sot në flagrancë punonjësin e policisë Inspektor M. K., me detyrë Patrullë e Përgjithshme pranë DVP Tiranë, i dyshuar për kryerjen e veprës penale “Shkelje e rregullave të qarkullimit rrugor”.

Sipas AMP-së, arrestimi i tij u krye pasi ditën e sotme rreth orës 17:30, gjatë drejtimit të motomjetit në bulevardin “Bajram Curri” ka aksidentuar shtetasin P. F., 65 vjeç, i cili është dërguar menjëherë në spitalin “Shefqet Ndroqi” në gjendje të rëndë dhe si pasojë e dëmtimeve ka ndërruar jetë rreth orës 21:00. I dëmtuar ka mbetur gjithashtu edhe punonjësi i policisë.

Materialet proceduriale u referuan në Prokurorinë Pranë Gjykatës së Shkallës së Parë të Juridiksionit të Përgjithshëm Tiranë.

/m.q/j.p/

The post AMP arreston efektivin e policisë në Tiranë appeared first on Agjencia Telegrafike Shqiptare.

BERLIN, 24 dhjetor /ATSH-DPA/- Më shumë se një duzinë vendesh, kryesisht nga Evropa, kritikuan ashpër miratimin e kabinetit izraelit për ndërtimin e 19 vendbanimeve të reja në Bregun Perëndimor – duke i bërë thirrje Izraelit të anulonte vendimin.

Grupi i vendeve përfshin Gjermaninë, Belgjikën, Kanadanë, Danimarkën, Francën, Italinë, Islandën, Irlandën, Japoninë, Maltën, Holandën, Norvegjinë, Spanjën dhe Britaninë e Madhe.

“Ata dënuan veprimet e Izraelit, duke thënë se ato jo vetëm që shkelnin të drejtën ndërkombëtare, por edhe rrezikonin të nxisnin paqëndrueshmëri”, thuhet në një deklaratë të përbashkët të postuar në faqen e internetit të Ministrisë së Jashtme Gjermane.

“Miratimi i vendbanimeve të reja rrezikon gjithashtu të minojë planin e paqes në Gaza dhe dëmton perspektivat për paqe dhe siguri afatgjatë në të gjithë rajonin”, sipas deklaratës.

Bregu Perëndimor i pushtuar nga Izraeli në vitin 1967

Izraeli miratoi këtë javë, krijimin e 19 vendbanimeve të reja në Bregun Perëndimor të pushtuar.

Në vitin 1967, Izraeli mori kontrollin e Bregut Perëndimor dhe Jerusalemit Lindor, ku sot jetojnë më shumë se 700 000 kolonë midis rreth 3 milionë palestinezëve. //a.i/

The post FOKUS – Vendet evropiane thirrje Izraelit të anulojë planet për vendbanime të reja në Bregun Perëndimor appeared first on Agjencia Telegrafike Shqiptare.

ROMË, 24 dhjetor /ATSH/- Në portin e Gioia Tauro në jug të Italisë është sekuestruar më shumë se 435 kilogramë kokainë e pastër, sipas “La Stampa”.

Një “pako” e bukur Krishtlindjesh u kap nga Guardia di Finanza (Policia Financiare Italiane), e cila sekuestroi një tjetër ngarkesë të konsiderueshme me kokainë që kalonte në portin e Gioia Tauro në prag të Krishtlindjeve.

Pakoja me 435 kilogramë kokainë të pastër, një nga ngarkesat më të mëdha të viteve të fundit, e fshehur në një ngarkesë prej afërsisht 1,000 qesesh me kikirikë të dërguara nga Amerika Latine dhe të destinuara, të paktën sipas dokumenteve tregtare që shoqëronin produktin, për në Evropën Lindore.

“Kjo është një goditje e rëndësishme ndaj të ardhurave të organizatave kriminale, pasi porti vazhdon të jetë një pikë “kyçe” për trafikimin ndërkombëtar të drogës në Evropë”, tha policia.

Nëse do të dilte në treg, kokaina e sekuestruar do t’u kishte sjellë organizatave kriminale mbi 70 milionë euro.

Sekuestrimi vjen në kuadër të inspektimeve të intensifikuara të fundvitit në një nga portet më të ngarkuara të Evropës dhe përbën një nga rastet më të bujshme vitet e fundit në Gioia Tauro. //a.i/

The post ITALI – Policia sekuestron 435 kilogramë kokainë të fshehur në qese me kikirikë appeared first on Agjencia Telegrafike Shqiptare.

BRUKSEL, 24 dhjetor /ATSH/ – Duartrokitjet u ndalën dhe shefi i NATO-s, Mark Rutte, i radhiti me kujdes letrat e tij në podium. Atij iu deshën 62 sekonda për të arritur te thelbi.

“Forcat e errëta shtypëse po marshojnë sërish”, tha ai. “Ne jemi objektivi i radhës i Rusisë”.

Fjalimi i Ruttes në Berlin më 11 dhjetor ishte i fundit në një seri paralajmërimesh të paprecedentë për një konflikt të drejtpërdrejtë me Rusinë që u bënë më 2025 nga zyrtarë të lartë evropianë dhe agjenci të inteligjencës.

Në shkurt, inteligjenca daneze tha se “Rusia e sheh veten në konflikt me Perëndimin dhe po përgatitet për një luftë kundër NATO-s”. Në qershor, gjenerali kryesor i Gjermanisë tha se një sulm mund të ndodhë brenda katër vjetësh, e në nëntor, fjalëve të tij u bëri jehonë homologu polak – dy ditë pasi ministri gjerman i Mbrojtjes, Boris Pistorius, tha se “disa historinë ushtarakë madje besojmë se ne jemi në verën e fundit të paqes”.

Këto nuk janë paralajmërimet e vetme. Por, Rutte ka bërë më së shpeshti paralajmërime të tilla.

Në janar, ai i bëri thirrje shteteve të NATO-s që të rrisin shpenzimet ose të ndjekin kurse të gjuhës ruse, ndërkaq në qershor tha se një sulm mund të koordinohet me një sulm të Kinës ndaj Tajvanit.

Fjalimi i tij i 11 dhjetorit ishte kambana më e fortë e alarmit deri më tani. Ai foli për “përmasat e luftës që kanë përjetuar gjyshërit apo stërgjyshërit tanë” me “një mobilizim masiv dhe miliona njerëz të zhvendosur”.

Çfarë qëndron pas këtyre paralajmërimeve?

Këto deklarime të shpeshta janë bërë kryetituj në mediat kryesore dhe kanë ngritur pikëpyetje, sidomos në një kohë kur Shtetet e Bashkuara po tregojnë rënie të interesit për të ruajtur nivelin e mbështetjes së sigurisë që u kanë dhënë Evropës në të kaluarën.

“Kjo është diçka që e kam menduar veçmas duke parë se nuk ka asnjë dëshmi që Rusia mund ose dëshiron ta sulmojë NATO-n”, tha për Radion Evropa e Lirë, John Foreman, ish-atasheu ushtarak i Britanisë në Moskë dhe Kiev.

“Mendoj se një numër politikanësh dhe figura ushtarake po përdorin kërcënimin rus për arsye më prozaike: Rutte po inkurajon vendet e NATO-s që të përmbushin zotimet e tyre për shpenzime. Polakët për të sjellë më shumë prani të NATO-s në territorin e tyre”, shtoi ai.

Skeptikët e tjerë vënë thonë se gati pas katër vjetësh luftë, Rusia nuk ka qenë në gjendje ta nënshtrojë Ukrainën, edhe pse këtë vit ka bërë përparime me kosto të jashtëzakonshme në humbje njerëzore dhe në pajisje.

Teemu Tammikko, nga Instituti finlandez për Çështje Ndërkombëtare, tha po ashtu se Rusia nuk duket e “gatshme dhe e aftë që ta sulmojë NATO-n, për momentin”.

Por, ai i tha Shërbimit rus të REL-it se mbajtja e pushtetit nga presidenti rus, Vladimir Putin, “varet nga një kërcënim i jashtëm”, që do të thotë “në terma afatgjatë, është i mundshëm ndonjë provokim i drejtpërdrejt ushtarak, sidomos nëse lufta në Ukrainë bllokohet”.

Disa argumentojnë se kjo veçse po ndodh, sikurse me dronët rusë dhe inkursionet në hapësirën ajrore të NATO-s. Por, paralajmërimet e bëra këtë vit sugjerojnë skenarë edhe më të errët.

Sulmi ndaj Estonisë

Një raport i publikuar nga Këshilli Evropian për Marrëdhëniet e Jashtme (ECFR) më 18 dhjetor përqendrohet te frika e një sulmi të drejtpërdrejtë ndaj Estonisë, për të testuar gatishmërinë e SHBA-së dhe aleatëve të tjerë të NATO-s për të luftuar.

“Në Evropë, ky ankth ndodhet mbi një frikë më të thellë: se Qeveria amerikane, e shpërqendruar nga politika e brendshme dhe e tunduar nga shkurtimi, mund të reduktojë së shpejti praninë e saj ose t’i vendosë kushte rolit të saj në mbrojtjen e Evropës”, thuhet aty.

Duke e përshkruar Estoninë si “të vogël, tokë të sheshtë dhe të ekspozuar”, raporti thotë se një stërvitje ushtarake e vitit 2016 parashikoi se forcat ruse mund ta pushtonin kryeqytetin brenda 60 orësh gjatë një pushtimi.

Por, raporti gjithashtu thekson se Rusia do të ketë nevojë për 5-10 vjet pas përfundimit të luftës në Ukrainë “për t’u riorganizuar dhe riarmatosur për një sulm të tillë”, që është një periudhë shumë më e gjatë se ajo e parashikuar nga Rutte, Pistorius dhe të tjerët.

“Luftënxitësit”

Zyrtarët e Kremlinit i kanë cilësuar udhëheqësit evropianë si “luftënxitës” dhe kanë mohuar se kanë dëshirë të kryejnë ndonjë sulm. Ata kishin bërë deklarime të ngjashme për Ukrainën në prag të pushtimit të plotë në shkurt të vitit 2022, edhe pse kjo nuk do të thotë automatikisht se ekzistojnë plane për agresion të mëtejmë.

“Rusia nuk po ndjek qëllimet ushtarake që i atribuohen vendit tonë”, tha zëvendësministri i Jashtëm, Sergei Ryabkov, më 22 dhjetor. “Siç ka thënë tashmë presidenti i Rusisë, ne madje jemi të gatshëm që të garantojmë këtë ligjërisht si pjesë e një zgjidhjeje të luftës në Ukrainë”, shtoi ai.

Por, çdo angazhim i tillë ka pak të ngjarë të merret seriozisht nga shumë në Perëndim. Rusia po ashtu ka nënshkruar dhe më pas nuk kanë mbajtur premtimet për të respektuar kufijtë e Ukrainës në Memorandumin e Budapestit të vitit 1994, shkruan REL.   /os/

The post KOMENT – Pse shumë udhëheqës po paralajmërojnë luftë me Rusinë? appeared first on Agjencia Telegrafike Shqiptare.

TIRANË, 24 dhjetor/ATSH/ Në mbyllje të këtij viti dhe në vigjilje të festës së Krishtlindjes, siç është kthyer në traditë tashmë, Kryeministri Edi Rama, i shoqëruar nga ministrja e Shëndetësisë dhe Mirëqenies Sociale Evis Sala vizitoi Qendrën Spitalore Universitare “Nënë Tereza” në kryeqytet, për t’u përshëndetur me mjekë, dhe infermierë, por jo vetëm.

Pacientët e vegjël që trajtohen në shërbimin e Pediatrisë ishin të parët që u vizituan nga Kryeministri Rama, i cili shpërndau për ta dhurata me rastin e festave të fundvitit, duke iu uruar shërim të shpejtë dhe kthim sa më parë në shtëpi.

“Ne e bëjmë këtë çdo vit, kështu që kemi ardhur të sjellim dhuratat për ju që ta kaloni gëzuar Vitin e Ri bashkë me mamat dhe me babat, edhe që të shëroheni sa më shpejt që të ktheheni në shtëpi dhe në shkollë”, uroi Kryeministri vogëlushët që shoqëroheshin nga prindërit në mjediset spitalore.

Më tej, Kryeministri Rama, vijoi vizitën në Spitalin Onkologjik, i cili në muajt e fundit ka përmirësuar ndjeshëm infrastrukturën dhe ka rritur kapacitetet pritëse.

Drejtuesja e QSUNT Anxhela Paparizo, e cila shoqëronte Kryeministrin në këtë vizitë, informoi se është realizuar rikonstruksioni i një sërë ambienteve, mes të cilave sallat e kemioterapisë ditore, që janë pajisur edhe me aparatura të teknologjisë moderne.

Ndërsa Ministrja e Shëndetësisë dhe Mirëqenies Sociale Evis Sala shtoi se është realizuar edhe rregullimi i fashave orare, duke i dhënë përparësi pacientëve të ardhur nga rrethet për kemioterapinë ditore, për të cilën është hapur dhe një sallë e dytë me kapacitet më të madh, me poltrone dhe sistem monitorimi bashkëkohor.

Nga ana e tij, kryeministri Rama u shpreh se synimi është që shërbimi i kemioterapisë të ofrohet edhe nëpër rrethe, në mënyrë që të shmanget fluksi i shtuar në QSUNT.

Në vijim, Kryeministri Rama zhvilloi një takim të zgjeruar me personelin mjekësor, mjekë, infermierë, ekipe të urgjencës mjekësore dhe specializantë.

1 nga 6

/k.s/j.p/

The post Rama në QSUNT: Shërbimi i kemioterapisë të ofrohet edhe në rrethe appeared first on Agjencia Telegrafike Shqiptare.

TIRANË, 24 dhjetor/ATSH/ Drejtuesi i ri i SPAK, Klodjan Braho do të ketë prioritet të punës së tij në krye të institucionit të drejtësisë të garantojë që askush të mos jetë mbi ligjin dhe që të gjithë të jenë të barabartë para tij.

I pyetur nga BIRN, Braho i cili mori detyrën e kryeprokurorit të SPAK më 19 dhjetor, u shpreh se “do të përqendrohemi në çështjet aktuale dhe do të vijojmë hetimet e thelluara, përfshirë analizën e pasurive të përfituara në mënyrë të paligjshme dhe konfiskimin e tyre”.

Klodjan Braho u përzgjodh këtë muaj si drejtuesi i ri i Prokurorisë së Posaçme Kundër Korrupsionit dhe Krimit të Organizuar për një mandate trevjeçar duke zëvendësuar Altin Dumanin.

Prokuroria e Posaçme kundër Korrupsionit dhe Krimit të Organizuar është institucion i dalë nga reforma në drejtësi.

Braho renditi si kusht të rëndësishëm për funksionimin e duhur të SPAK-ut forcimin e pavarësisë dhe profesionalizmit të prokurorëve dhe hetuesve.

“Do të punojmë gjithashtu për forcimin institucional të SPAK-ut dhe rritjen e kapaciteteve për mbledhjen dhe analizën e informacionit”, vuri në dukje ai.

“Qëllimi ynë është të rrisim besimin e publikut te drejtësia dhe këtë mund ta arrijmë vetëm duke vendosur standarde të larta në luftën kundër korrupsionit dhe krimit të organizuar”, përfundoi Braho.

The post Braho: Prioritet i SPAK, askush të mos jetë mbi ligjin appeared first on Agjencia Telegrafike Shqiptare.

TIRANË, 24 dhjetor/ATSH/ Drejtuesi i Operatorit të Shpërndarjes së Energjisë Elektrike (OSHEE), Enea Karakaçi, sqaroi sot në një intervistë televizive se nuk ka sanksione nga Komuniteti i Energjisë i BE-së ndaj Shqipërisë.

Ai vuri në dukje se Komuniteti i Energjisë i Bashkimit Europian ka qëllim jo të sanksionojë shtetet, ai është ndërtuar mbi baza vullnetare nga shtetet, të cilat kanë dëshirë të futen në BE.

Karakaçi informoi po ashtu edhe në lidhje me funksionimin e komunitetit. “Për t’u futur në BE ke nevojë të marrësh disa masa ligjore, nënligjore vepruese dhe kjo është krejtësisht normale. Çdo vit Sekretariati i Energjisë jep masa komanduese për shtetet sepse edhe direktivat e BE-së miratohen në mënyrë të vazhdueshme”, u shpreh ai.

“Ne kemi qenë në përputhje me kuadrin rregullator të BE-së deri para një viti sepse ligji jonë ishte në përputhje me direktivën e shkuar, tani ka dalë një direktivë e re dhe na kërkohet që të aprovohet një direktivë e re”, tha Karakaçi.

I pyetur se kur pritet të miratohet pr/ligji i ri “Për sektorin e energjisë elektrike”, zv/ministri tha se brenda 31 korrikut 2026 ligji është i miratuar.

Karakaçi theksoi se projektligji është publikuar në faqen e konsultimit publik, që është detyrim ligjor. “Pr/ligji është në formën përfundimtare dhe shumë shpejt do të fillojë procedura e miratimit në qeveri dhe shumë shpejt në parlament”, saktësoi drejtuesi i OSHEE.

Sipas relacionit të projektligjit, qëllimi kryesor i këtyre ndryshimeve është harmonizimi i legjislacionit shqiptar me Paketën e Energjisë së Pastër të Bashkimit Evropian, duke përfshirë dispozitat e rëndësishme që lidhen me tregun e energjisë elektrike.

Kjo nismë vjen si pjesë e angazhimeve të Shqipërisë si palë kontraktuese e Komunitetit të Energjisë dhe në përputhje me detyrimet nga Marrëveshja e Stabilizim-Asociimit me BE-në, e cila kërkon përafrimin dhe zbatimin efektiv të legjislacionit europian.

Karakaçi foli edhe për çmimin e energjisë elektrike duke theksuar se nuk do të ketë rritje të saj në vitin 2026.

“Çmimi vazhdon të jetë i ulur, patjetër që nuk do të ketë rritje çmimi në vitin 2026, pra do jetë i njëjti çmim i miratuar me ulje në vitin 2025. E theksoj faktin se ne bëmë një ulje çmimi me 10.5 % në vitin 2025, që do vazhdojë të jetë i aplikueshëm edhe në vitin 2026″, tha Karakaçi.

/k.s/j.p/

The post Karakaçi: Nuk ka asnjë sanksion nga Komuniteti i Energjisë i BE për Shqipërinë appeared first on Agjencia Telegrafike Shqiptare.

TAJVAN, 24 dhjetor /ATSH-AA/ – Një tërmet me magnitudë 6 ballë goditi Tajvanin të mërkurën, sipas Shërbimit Gjeologjik të SHBA-së (USGS).

Tërmeti me epiqendër në një thellësi prej 10 kilometrash (6.2 milje) u shënua në orën 17:47 sipas orës lokale.

Administrata Qendrore e Motit lokale e regjistroi tërmetin me magnitudë 6,1 ballë në Qarkun Taitung në juglindje të Tajvanit, sipas faqes së lajmeve Focus Taiwan.

Ndërkohë, nuk ka pasur raportime të menjëhershme për dëme.   /os/

The post TAJVAN – Një tërmet me magnitudë 6 ballë godet ishullin appeared first on Agjencia Telegrafike Shqiptare.

NJU JORK, 24 dhjetor /ATSH/- Venezuela ka akuzuar Shtetet e Bashkuara të Amerikës për “zhvatje” në një seancë emergjente të Këshillit të Sigurimit të OKB-së në Nju Jork, sipas BBC.

“Kapja e dy cisternave të naftës venezueliane nga Uashingtoni ishte “më e keqe se pirateria”, tha ambasadori venezuelan në OKB.

Mbledhja emergjente e Këshillit të Sigurimit u thirr për të diskutuar sekuestrimin e anijeve cisternë, i cili u zhvillua në brigjet e Venezuelës në fillim të këtij muaji.

SHBA-ja ka thënë gjithashtu se po ndiqte një anije cisternë të tretë venezueliane.

Presidenti amerikan, Donald Trump ka akuzuar presidentin e Venezuelës, Nicolas Maduro, se drejton një kartel droge dhe se bandat kishin vepruar pa u ndëshkuar për një kohë shumë të gjatë.

Më 16 dhjetor, Trump urdhëroi një bllokadë detare të të gjitha cisternave të naftës të sanksionuara që hyjnë dhe dalin nga Venezuela.

Presidenti amerikan tha se SHBA-ja do ta mbante ose do ta shiste naftën bruto që ishte sekuestruar, si dhe vetë anijet.

SHBA-ja ka rritur praninë ushtarake në Detin Paqësor dhe Karaibe në muajt e fundit, duke dërguar 15 000 trupa dhe një sërë transportuesish aeroplanësh dhe anijesh luftarake në zonë.

Ky është dislokimi më i madh në rajon që kur SHBA-ja pushtoi Panamanë në vitin 1989, dhe qëllimi i deklaruar ishte të ndalonte rrjedhën e fentanilit dhe kokainës në SHBA.

SHBA-ja ka kryer sulme ndaj atyre që i quajnë anije venezueliane për kontrabandën e drogës, duke synuar më shumë se 20 anije dhe duke vrarë të paktën 100 persona.

Disa ekspertë thonë se sulmet mund të shkelin ligjet që rregullojnë konfliktin e armatosur.

I dërguari i Venezuelës në OKB tha se SHBA-ja po e nënshtron vendin e tij ndaj “shantazhit më të madh” në historinë e saj.

“Jemi në prani të një fuqie që vepron jashtë ligjit ndërkombëtar”, tha Samuel Moncada duke folur në takimin e Këshillit të Sigurimit të OKB-së.

Lidhur me sekuestrimin e naftës venezueliane nga SHBA-ja, ai e quajti atë një plaçkitje, grabitje dhe rikolonizim të Venezuelës.

“Qeveria e Shteteve të Bashkuara të Amerikës nuk ka juridiksion në Karaibe”, shtoi ai.

“Çfarë lidhje ka kjo me drogën?”, tha Moncada duke iu referuar industrisë së naftës venezueliane.

Në përgjigje, ambasadori i SHBA-së në OKB, Michael Waltz, i tha Këshillit të Sigurimit se SHBA-ja nuk e njihte Maduro si udhëheqësin legjitim të Venezuelës.

“Aftësia e Maduro për të shitur naftën e Venezuelës i mundëson pretendimet e tij mashtruese për pushtet dhe aktivitetet e tij narko-terroriste”, tha Waltz.

Gjatë një vizite në një panair tregtar në Karakas, presidenti Maduro tha se Këshilli i Sigurimit po i jepte mbështetje të madhe Venezuelës.

Rusia dhe Kina akuzuan SHBA-në për intimidim dhe agresion.

“SHBA-ja po shkatërron në mënyrë të paligjshme anijet civile në Detin e Karaibeve”, tha ambasadori rus në OKB, Vassily Nebenzia, në takimin e OKB-së.

“Veprimet e SHBA-së kundër anijeve venezueliane, janë një model për akte të ardhshme force kundër shteteve të Amerikës Latine”, shtoi ai.

Ndërkohë, i dërguari i Kinës në OKB, Sun Lei, i bëri thirrje SHBA-së që të ndalonte menjëherë veprimet dhe të shmangte përshkallëzimin e mëtejshëm të tensioneve. //a.i/

The post NJU JORK – Venezuela akuzon SHBA-në për “zhvatje” pas sekuestrimit të cisternave të naftës appeared first on Agjencia Telegrafike Shqiptare.

TIRANË, 24 dhjetor/ATSH/ Administrata e Kuvendit, në bashkëpunim me Prezencën e OSBE-së në Shqipëri, zhvilloi takimin vjetor koordinues të fundvitit, me pjesëmarrjen e përfaqësuesve të të gjitha shërbimeve të Kuvendit.

Takimi u fokusua në analizën e arritjeve dhe sfidave të vitit 2025, përcaktimin e prioriteteve strategjike për planifikimin e punës gjatë vitit 2026.

Në fjalën përshëndetëse, Sekretari i Përgjithshëm i Kuvendit, Genci Gjonçaj, vuri theksin te rëndësia e forcimit të koordinimit institucional në kushtet e fillimit të legjislaturës së re.

Takimi vijoi me një analizë të zhvillimeve dhe sfidave kryesore në fillimin e legjislaturës së re, riorganizimin e punës sipas strukturës së re të komisioneve parlamentare, orientimin e deputetëve të rinj dhe forcimin e koordinimit të brendshëm ndërmjet shërbimeve të Kuvendit.

Takimi u zhvillua në disa sesione tematike, ku fillimisht diskutimet u fokusuan në prezantimin e gjetjeve, arritjeve dhe sfidave të vitit 2025 nga Shërbimi Legjislativ, Shërbimi i Monitorimit, Instituti Parlamentar dhe Marrëdhëniet me Jashtë. Sesioni i radhës u fokusua në prezantimet e shërbimeve të: Integrimit Evropian, Dokumentacionit dhe Informacionit dhe Shërbimi Administrativ, duke evidentuar progresin, problematikat e hasura dhe masat e ndërmarra për të mbështetur më mirë punën e ligjvënësve.

Pjesa përmbyllëse e takimit iu kushtua diskutimit mbi prioritetet dhe objektivat në kuadër të Planit të ri Strategjik të Administratës së Kuvendit 2026–2030, si dhe bashkërendimit të planit të masave për vitin 2026, me synimin rritjen e cilësisë së shërbimeve dhe forcimin e kapaciteteve institucionale.

Në diskutimet përfundimtare morën pjesë edhe përfaqësues të stafit politik dhe të zyrave koordinuese të deputetëve, ku u theksua se bashkëpunimi gjithëpërfshirës ndërmjet shërbimeve të Kuvendit dhe strukturave mbështetëse të deputetëve mbetet thelbësor për garantimin e një mbështetjeje më efektive të punës parlamentare gjatë vitit 2026.

1 nga 4

/j.p/

The post Kuvendi, takim vjetor koordinues me Prezencën e OSBE-së appeared first on Agjencia Telegrafike Shqiptare.

VARSHAVË, 24 dhjetor /ATSH/ – Polonia e ka liruar ambasadorin e saj në Francë nga detyrat e tij pas ndalimit të tij nga zyrtarët e antikorrupsionit si pjesë e një hetimi të vazhdueshëm për një skandal masiv të falsifikimit të diplomave në një universitet privat, shkruan trtworld.com.

Vendimi, i njoftuar nga ministria e Jashtme, pasoi raportimet në shtyp se agjencia polake kundër korrupsionit CBA kishte arrestuar diplomatin – i identifikuar vetëm si Jan R. sipas ligjeve polake të privatësisë – për përfshirjen e tij të dyshuar në një skandal që përfshinte universitetin privat të njohur më parë si Collegium Humanum.

Institucioni ka qenë në qendër të një hetimi të madh për ofrimin e programeve të përshpejtuara MBA që dyshohet se u lejonin të diplomuarve të siguronin vende në bordin mbikëqyrës dhe pozicione të larta në kompanitë shtetërore pa përfunduar studimet e tyre.

Portali polak Goniec.pl raportoi se ‘’Jan R. kishte marrë një diplomë MBA nga instituti pavarësisht se nuk kishte përfunduar asnjë studim dhe se më vonë e përdori dokumentin për punësim në kompani shtetërore, duke përfshirë një pozicion të nivelit të lartë në Bank Pocztowy, një degë e kompanisë postare shtetërore Poczta Polska’’.   /os/

The post VARSHAVË – Polonia pezullon ambasadorin në Francë pas skandalit të falsifikimit të diplomave appeared first on Agjencia Telegrafike Shqiptare.

TIRANË, 24 dhjetor /ATSH/ Është mbyllur java e 18-të dhe e fundit për këtë vit në kampionatin “Abissnet Superiore”.

Vllaznia u rikthye te fitorja në kampionat, pasi mposhti Flamurtarin në stadiumin “Loro Boriçi” me rezultatin 3-2.

Ndeshja mes AF Elbasanit dhe Tiranës, e luajtur në “Elbasan Arena”, u mbyll në barazim 1-1.

Vora triumfoi ndaj Bylisit në “Selman Stërmasi” me rezultatin e thellë 4-1.

Dinamo City fitoi ndaj Partizanit në transfertë me shifrat 3-1. Po në transfertë triumfoi edhe Egnatia, që mposhti Teutën me rezultatin minimal 1-0.

Për kampionët e Shqipërisë kjo ishte fitorja e katërt radhazi dhe e mbyllin fazën e dytë të kampionatit në krye të renditjes me 37 pikë.

AF Elbasani renditet në vendin e dytë me 33 pikë, ndërsa Dinamo City mban vendin e tretë me 32 pikë. Vllaznia pozicionohet në vendin e katërt me 30 pikë.

/m.q/j.p/

The post Mbyllet java e 18-të e “Abissnet Superiore”, Vllaznia rikthehet te fitorja appeared first on Agjencia Telegrafike Shqiptare.

ROMË, 24 dhjetor /ATSH/- Këtë vit, Papa Leone XIV do të udhëheqë festimet e Krishtlindjeve në Vatikan për herë të parë. Por, traditat popullore të Krishtlindjeve në zemër të Kishës Katolike Romake mbeten të pandryshuara, sipas DW.

Kur fillojnë festimet?

Për katolikët, sezoni i Adventit (sezoni i parë i vitit kishtar, që çon në Krishtlindje dhe përfshin katër të dielat paraprirëse) filloi më 30 nëntor të këtij viti – dhe bashkë me të, edhe emocioni për Krishtlindje.

Në Vatikan, festimet fillojnë me ndezjen zyrtare të pemës së Krishtlindjeve dhe përurimin e skenës së Lindjes në Sheshin e Shën Pjetrit, të cilat të dyja u zhvilluan më 15 dhjetor të këtij viti.

Çfarë lloj peme Krishtlindjesh është vendosur në Vatikan?

Çdo vit një komunitet i kishës katolike i dhuron Vatikanit pemën e Krishtlindjes, gjë që konsiderohet si një nder i veçantë. Këtë herë u zgjodh një bredh nga provinca e Bolzanos në Tirolin e Jugut, i cili është 27 metra e lartë dhe peshon rreth tetë tonë.

“Shpresoj që kjo mrekulli para Krijimit të nxitet edhe nga pema jonë e Krishtlindjeve dhe se të frymëzojë reflektim”, tha peshkopi Ivo Muser i Bolcano-Bressanone tha në një intervistë.

Ai gjithashtu u bëri thirrje njerëzve të jenë të vëmendshëm, të respektueshëm dhe të gatshëm për të përqafuar stile jetese të qëndrueshme dhe modeste.

Nëse kjo është e mundur, duke marrë parasysh dekorimet luksoze dhe dritat festive që ndizen me ngjyra që ndryshojnë vazhdimisht, mbetet për t’u parë.

Për herë të pestë radhazi, pema e Krishtlindjeve është nga Italia. Deri më tani, janë dhuruar gjithsej katër pemë Krishtlindjesh nga vende në Gjermani, dhe në vitin 2028, Deggendorf në Bavari do të dhurojë pemën e pestë gjermane të Krishtlindjeve.

Festimet pompoze të Krishtlindjeve kanë ndodhur në Vatikan për të paktën 500 vjet, por tradita e vendosjes së një peme Krishtlindjesh në Sheshin e Shën Pjetrit filloi në vitin 1982 gjatë drejtimit të Papa Gjon Palit II.

Skena të Lindjes së Krishtit nga e gjithë bota

Skena e Lindjes së Krishtit u projektua dhe u krijua nga dioqeza e Nocera Inferiore-Sarno, e vendosur në provincën e Salernos në Kampania, Italia jugore.

Skena paraqet figura në madhësi reale dhe përfshin elementë arkitekturorë tipikë të rajonit përreth Nocerës.

Në përurimin e skenës së Lindjes së Krishtit, peshkopi Giuseppe Giudice e quajti atë “një mundësi të shkëlqyer për ungjillëzimin dhe rindërtimin e të gjithë rajonit”.

Ekspozita “100 Skena të Lindjes së Krishtit në Vatikan”, e mbajtur për herë të tetë, është gjithashtu në shfaqje nën kolonadën e majtë të Sheshit të Shën Pjetrit.

Ekspozita paraqet skena të lindjes së Krishtit të dizajnuara nga artistë nga 23 vende.

Edicioni i këtij viti është pjesë e serisë së ngjarjeve kulturore “Jubileu është Kulturë”.

Sipas “Vatican News”, ekspozita shërben si një shprehje mirënjohjeje për Vitin Jubilar të Shpresës 2025. //a.i/

The post Si festohen Krishtlindjet në Vatikan? appeared first on Agjencia Telegrafike Shqiptare.

MOSKË, 24 dhjetor /ATSH/- Rusia planifikon të ndërtojë një central në Hënë brenda dekadës së ardhshme – për të mbështetur ambiciet e saj dhe një bazë të përbashkët kërkimore me Kinën, ndërsa fuqitë e mëdha botërore intensifikojnë përpjekjet për të krijuar një prani afatgjatë në satelitin e vetëm natyror të Tokës, sipas “Reuters”.

Kompania shtetërore hapësinore e Rusisë, “Roscosmos”, tha këtë javë se synon të përfundojë ndërtimin e objektit të energjisë hënore deri në vitin 2036.

“Roscosmos” ka nënshkruar një kontratë me “Shoqatën Lavochkin”, një kompani e madhe ruse e hapësirës ajrore, për të realizuar projektin.

Ndërsa “Roscosmos” nuk e përshkroi në mënyrë të qartë objektin si bërthamor, tha se përpjekja përfshin “Rosatom”, kompaninë shtetërore bërthamore të Rusisë dhe “Institutin Kurchatov”, qendrën kryesore të kërkimit bërthamor të vendit.

“Roscosmos” tha se centrali do të furnizonte energji për programin hënor të Rusisë, duke përfshirë roverë robotikë, një observator shkencor dhe infrastrukturë për një Stacion të përbashkët Ndërkombëtar Kërkimor Hënor Ruso-Kinez.

Agjencia e përshkroi projektin si një zhvendosje nga misionet afatshkurtra drejt një pranie të përhershme shkencore në Hënë.

“Projekti është një hap i rëndësishëm drejt krijimit të një stacioni shkencor hënor që vepron vazhdimisht dhe kalon nga misionet e njëhershme në një program eksplorimi afatgjatë”, tha “Roscosmos” në një deklaratë.

Njoftimi vjen ndërsa Rusia kërkon të rikonfirmojë veten si një fuqi e madhe hapësinore pas një sërë pengesash.

Dikur një lidere globale në eksplorimin e hapësirës pas fluturimit historik të kozmonautit sovjetik Yuri Gagarin në vitin 1961, Rusia ka mbetur pas Shteteve të Bashkuara të Amerikës dhe, gjithnjë e më shumë, Kinës në dekadat e fundit.

Ambiciet e saj pësuan një goditje të madhe në gusht 2023 kur anija kozmike “Luna-25” pa pilot u rrëzua ndërsa përpiqej të ulej në Hënë.

Shefi i “Roscosmos”, Dmitry Bakanov, tha në qershor se vendosja e një centrali bërthamor në Hënë ishte një nga qëllimet strategjike të agjencisë, së bashku me eksplorimin e rinovuar të Venusit, i cili shpesh quhet “planeti motër” i Tokës.

Distanca e Hënës nga Toka – rreth 384,400 kilometra – dhe mjedisi i saj i ashpër e bëjnë gjenerimin e besueshëm të energjisë një sfidë qendrore për aktivitetin afatgjatë njerëzor ose robotik.

Energjia bërthamore është parë gjithnjë e më shumë nga agjencitë hapësinore si një zgjidhje praktike, veçanërisht në rajonet ku rrezet e diellit janë të kufizuara ose me ndërprerje.

Rusia nuk është e vetmja në ndjekjen e planeve të tilla. NASA njoftoi në gusht se synon të vendosë një reaktor bërthamor në Hënë deri në tremujorin e parë të vitit 2030.

Zyrtarët amerikanë e kanë cilësuar këtë përpjekje si pjesë të një konkurrence më të gjerë strategjike me Kinën.

“Jemi në një garë për në Hënë,” tha në atë kohë sekretari amerikan i Transportit, Sean Duffy.

“Dhe për të pasur një bazë në Hënë, na duhet energji. Energjia e qëndrueshme do të ishte gjithashtu thelbësore për misionet e ardhshme njerëzore në Mars”, shtoi ai.

Marrëveshjet ndërkombëtare ndalojnë vendosjen e armëve bërthamore në hapësirë, por lejojnë përdorimin e burimeve të energjisë bërthamore, me kusht që ato të përputhen me standardet e përcaktuara të sigurisë dhe rregullatore.

Interesi për Hënën është rritur ndërsa shkencëtarët dhe qeveritë shqyrtojnë burimet e saj të mundshme.

NASA vlerëson se sipërfaqja hënore mund të përmbajë deri në një milion ton metrikë helium-3, një izotop i rrallë në Tokë që mund të përdoret në teknologjitë e ardhshme të energjisë.

Studimet kanë identifikuar gjithashtu elementë të rrallë të tokës në Hënë, duke përfshirë skandiumin, itriumin dhe lantanidet, të cilat janë të rëndësishme për elektronikën moderne dhe prodhimin e avancuar.

Ndërsa konkurrenca përshpejtohet, analistët thonë se nxitja drejt infrastrukturës hënore mund të shënojë fillimin e një epoke të re rivaliteti gjeopolitik dhe ekonomik përtej Tokës. //a.i/

The post Rusia planifikon të ndërtojë central bërthamor në Hënë appeared first on Agjencia Telegrafike Shqiptare.

KIEV, 24 dhjetor /ATSH/- Draft-marrëveshja për t’i dhënë fund luftës ruso-ukrainase nuk parashikon heqjen e sanksioneve kundër Moskës nga Shtetet e Bashkuara të Amerikës, por Uashingtoni synon t’i heqë ato gradualisht pasi të mbarojë lufta, u tha sot gazetarëve, presidenti ukrainas Volodymyr Zelensky, sipas “Interfax Ukraine”.

“Ne nuk e shohim heqjen e sanksioneve në marrëveshjen midis Ukrainës dhe Shteteve të Bashkuara të Amerikës – por e kuptojmë se SHBA-ja do të lëvizi drejt heqjes sistematike të sanksioneve pasi të mbarojë lufta”, tha Zelensky.

“Dhe këtu pyetja është se sa të fortë mund të jenë evropianët”, shtoi ai.

“Sanksionet amerikane janë sanksione amerikane. Ka edhe sanksione evropiane. Ka sanksione nga vende të tjera në botë. Kjo është një histori shumëpalëshe për sanksionet dhe do të ishte mjaft e çuditshme nëse dikush premtonte diçka për të tjerët. Për më tepër, ne ende nuk e kuptojmë sa seriozisht rusët e marrin këtë apo atë dokument, deri në fund të luftës”, theksoi Zelensky.

Ai tha gjithashtu se Shtetet e Bashkuara të Amerikës duan të kenë një barazi të caktuar me Rusinë nëse i ofrojnë tregti të lirë Ukrainës, domethënë, po flasin për një marrëveshje të tregtisë së lirë me Ukrainën dhe Rusisë”, shtoi ai.

“Qëndrimi i Amerikës – meqenëse ky është një dokument katërpalësh – mbi tregtinë e lirë, nëse i ofrojnë tregti të lirë Ukrainës, ata duan të kenë një barazi të caktuar me rusët. Domethënë, ata po flasin për një marrëveshje të tregtisë së lirë me Ukrainën dhe një marrëveshje të tregtisë së lirë me Rusinë”, tha ai.

“Por, kjo është ajo që po thonë ata. Ne po flasim për veten tonë – për këtë mundësi të tregtisë së lirë midis Ukrainës dhe SHBA-së”, tha Zelensky, duke komentuar pikën e dhjetë të planit të paqes, e cila parashikon që pas përfundimit të marrëveshjes, Ukraina do të duhet të përshpejtojë procesin e përfundimit të marrëveshjes së tregtisë së lirë me Shtetet e Bashkuara të Amerikës. //a.i/

The post KIEV – Zelensky: SHBA do të heqë gradualisht sanksionet ndaj Moskës, pas përfundimit të luftës appeared first on Agjencia Telegrafike Shqiptare.

MOSKË, 24 dhjetor /ATSH/- Presidenti rus Vladimir Putin legalizoi me një dekret, këtë muaj – në mënyrë efektive – marrjen e pronave në territoret e pushtuara të Ukrainës, sipas “Kyiv Independent”.

Ligji i ri u lejon autoriteteve pushtuese të sekuestrojnë ambientet e banimit që tregojnë shenja të mungesës së pronarëve.

Në realitet, pronarët zakonisht janë larguar ose janë vrarë nga pushtimi rus në shkallë të plotë.

Në një veprim të mëtejshëm të projektuar për të forcuar kontrollin e Moskës mbi territoret ukrainase që i ka aneksuar në mënyrë të paligjshme dhe për të “rusifikuar” popullsinë që mbetet, dekreti i ri thotë gjithashtu, se prona që u përket ukrainasve pa dokumentacion “të vlefshëm” mund të konfiskohet.

Por, vërtetimi i pronësisë duhet të bëhet personalisht dhe dokumentet pranohen vetëm së bashku me një pasaportë ruse.

Petro Andriushchenko, kreu i Qendrës për Studimin e Pushtimit tha se ligji i ri legalizon zyrtarisht procesin, duke thënë se u jep autoriteteve të pushtimit fuqinë për të sekuestruar pronën e kujtdo sipas gjykimit të tyre, thjesht duke refuzuar të pranojnë dokumentet e pronësisë.

Ai shtoi se 5 000 apartamente janë marrë tashmë nga rusët në qytet, me numrin që rritet me 100-200 në javë.

Kush e merr pronën e sekuestruar?

Sipas ligjit, banesat e sekuestruara mund t’u rishpërndahen banorëve vendas që kanë humbur shtëpitë ose qiramarrësit e tyre.

Ai gjithashtu lejon përdorimin e këtyre pronave për të akomoduar zyrtarë të emëruar nga Rusia dhe stafin e administratës së pushtimit.

Andriushchenko deklaroi se pronat “pa pronar” fillimisht u ndahen forcave të sigurisë, të ndjekura nga punonjësit e sektorit publik. Të sapoardhurit nga Rusia gjithashtu po përfitojnë nga prona të tilla.

Disa raporte nga lëvizja e rezistencës “Yellow Ribbon”, një rrjet rezistence civile ukrainase aktive në zonat e pushtuara, thonë se ushtrisë ruse po i jepen gjithashtu prona të sekuestruara.

Yuliia Boklah, bashkë-drejtoreshë ekzekutive e “Helping to Leave”, një organizatë vullnetare që ndihmon personat që duan të largohen nga pushtimi rus, tha se ka raporte famëkeqe nga Mariupol, ku agjentët e pasurive të paluajtshme ruse shitën apartamente të banorëve vendas te rusët ‘me çmime të volitshme'”. //a.i/

The post RUSI – Putini lëshon dekret, tani mijëra ukrainas përballen me humbjen e shtëpive të tyre appeared first on Agjencia Telegrafike Shqiptare.

NJU JORK, 24 dhjetor /ATSH-AA/ – Ari ka arritur nivel rekord prej 4.525, 96 dollarësh për ons, duke shënuar rritje rreth 1 për qind mes shqetësimeve për përshkallëzimin e tensioneve mes SHBA-së dhe Venezuelës si dhe pritjeve për ulje të mëtejshme të normave të interesit në SHBA.

Pas arritjes në nivelin më të lartë historik, çmimi i arit mëngjesin e sotëm ishte rreth 4.495,9 dollarë për ons, duke shënuar rritje vjetore prej rreth 72 për qind. Çmimet e argjendit gjithashtu u rritën me më shumë se 1 për qind, duke arritur në 72,7 dollarë, përkatësisht në nivelin historik të lartë. Norma e rritjes ka qenë rreth 144 për qind gjatë 12 muajve të fundit.

Kërkesa për aktive të sigurta u rrit për shkak të shqetësimeve mbi ngadalësimin e ritmit të rritjes ekonomike globale, si dhe bastet për ulje shtesë të normave të interesit në SHBA në vitin 2026, veçanërisht pas rritjes ekonomike më të fortë se sa që pritej në SHBA gjatë tremujorit të tretë të këtij viti.

Tensionet mes Washingtonit dhe Karakasit janë rritur pasi SHBA-ja ka shtuar mbikëqyrjen dhe masat e zbatimit ndaj dërgesave të naftës të lidhura me Venezuelën, duke ngritur shqetësime të reja për ndërprerje të mundshme të flukseve globale të naftës bruto dhe duke shtuar paparashikueshmërinë gjeopolitike në botë.

Presidenti amerikan, Donald Trump pretendon se vendi përdor të ardhurat nga nafta për të financuar emigracionin e paligjshëm dhe dërgesat e drogës drejt SHBA-së. Një arsye tjetër e rëndësishme për këtë rritje është blerja e arit nga bankat qendrore për të forcuar rezervat e tyre.   /os/

The post NJU JORK – Ari për herë të parë tejkalon vlerën prej 4.500 dollarë për ons appeared first on Agjencia Telegrafike Shqiptare.