Presidentja e Komisionit Evropian, Ursula von der Leyen, premtoi mbështetjen e plotë të Evropës për rimëkëmbjen dhe rindërtimin e Sirisë, ndërsa u takua me udhëheqjen siriane gjatë vizitës së saj në Damask.

“Pas dekadash frike dhe heshtjeje, sirianët filluan një udhëtim të gjatë drejt shpresës dhe ripërtëritjes. Evropa do të bëjë gjithçka që mundet për të mbështetur rimëkëmbjen dhe rindërtimin e Sirisë”, shkroi von der Leyen në platformën sociale të kompanisë amerikane X.

Presidenti i Këshillit të BE-së, Antonio Costa, i cili shoqëroi von der Leyen, u takua me zyrtarë sirianë, përfshirë presidentin Ahmed al-Sharaa, duke thënë se vizita e BE-së tregon “mbështetje të vazhdueshme për popullin sirian”.

“Pas shumë vitesh lufte dhe vuajtjesh, rënia e regjimit të Asadit më në fund i ofroi pak shpresë popullit sirian… Ka ende një rrugë të gjatë përpara, por ju tashmë keni ndërmarrë hapat e parë”, tha ai në rrjetet sociale.

Vizita vjen pas angazhimit në rritje të BE-së me udhëheqjen e re të Sirisë. Në qershor 2025, Komisionerja Evropiane për Mesdheun, Dubravka Suica, vizitoi Sirinë dhe tha se blloku dëshironte ta shihte vendin të bëhej i qëndrueshëm dhe i begatë.

Në maj, shefja e politikës së jashtme të BE-së, Kaja Kallas, njoftoi gjithashtu heqjen e sanksioneve ekonomike të vendosura nga regjimi i mëparshëm.

Bashar Asad, udhëheqësi i Sirisë për gati 25 vjet, u largua n

Pritej “El Clasico” dhe “El Clasico” do të jetë. Real Madrid dhe Barcelona do të përballen në finalen e Superkupës së Spanjës në një tjetër shfaqe të futbollit.

Skuadra madrilene iu përgjigj nga distanca rivalëve të përjetshëm, duke fituar 2-1 derbin kundër Atletico në gjysmëfinalen e dytë për trofeun që edhe një herë do të jepet të dielën në Arabinë Saudite.

“Los Blancos” e vendosën menjëherë sfidën në rrugën e duhur, pasi pa u plotësuar dy minutat e para, kaluan në epërsi me Federico Valverde.

Pavarësisht rasteve të shumta, goli i uruguajanit mbeti në fuqi deri në fundin e pjesës së parë.

Pas pushimit, Real Madrid dyfishoi shpejt shifrat.

Në minutën e 55-të, Rodrygo ndali topin në rrjetë, ndërsa realizimi i sulmuesit brazilian do të rezultonte vendimtar.

Kjo pasi vetëm tre minuta më pas, Sorloth rihapi ndeshjen, duke ngushtuar shifrat për Atletico.

Gjithsesi, për skuadrën e “Cholo” Simeone nuk mjaftuan përpjekjet më vijim të futbollistëve në fushë dhe teknikut në pankinë, që ndezi sfidën duke shtuar tensionin në maksimum.

Në fund e gjithë festa ishte për Real Madrid, që të dielën në mbrëmje do të kërkojë trofeun e parë sezonal në një tjetër kapitull të sfidës së përjetshme të futbollin spanjoll.

E ftuar në studion e “ABC e Mëngjesit”, Blerina Matraku u rikthye me një histori frymëzuese për rrugëtimin e saj mes muzikës, punës dhe zgjedhjeve personale. Ajo tregoi se këngën e ka nisur që e vogël, në koncertet modeste që zhvilloheshin në Krujë. Studimet e larta i ka kryer në Elbasan, ku hodhi edhe hapat e parë në skenën e Teatrit “Skampa”.

Pas ardhjes në Tiranë, nevoja për një punë të qëndrueshme e çoi drejt profesionit të stjuardesës. Blerina rrëfeu se kënga ka qenë gjithmonë profesioni i saj i parë, por për ta mbështetur ka bërë edhe punë të dyta. Për katër vite ajo punoi si stjuardesë, një eksperiencë të vështirë, por që e ka dashur shumë. Paralelisht, ajo u formua si përkthyese e gjuhës franceze, profesion për të cilin ka përfunduar studimet. Edhe pse ka kënduar në frëngjisht, ajo pranon se vetvetja e saj artistike është në gjuhën shqipe. Duke folur për jetën personale, Blerina u shpreh se është mirë me veten e saj dhe nuk e sheh beqarinë si problem.

Pas 14 vitesh pauzë nga garat muzikore, ajo u rikthye në “Kënga Magjike” me këngën “Mama”. Vendimi për pjesëmarrjen erdhi falë mbështetjes së familjes dhe veçanërisht vëllait të saj. Ky rikthim, sipas saj, ishte një revolucion personal dhe artistik.

Blerina pranoi se ishte stilisti Joni Peçi ai që e ndihmoi të guxojë më shumë edhe në pamje. Ajo u tërhoq për vite me radhë nga skena, sepse ndjente se po përsëriste veten dhe kishte nevojë të kuptonte çfarë mund të sillte ndryshe. Rikthimi i saj sot vjen si një kapitull i ri, më i pjekur dhe më i sinqertë se kurrë.

I madh me të mëdhenjtë, por i vogël me të vegjëlit. Milan vazhdon të vuajë nga kjo sindromë në këtë sezon të Serie A, duke zhgënjyer edhe një herë pritshmëritë e 70 mijë tifozëve që kishin mbushur “San Siro” për të festuar një fitore të sigurtë në letër kundër Genoa.

Por kuqezinjtë nuk shkuan më shumë se barazimi 1-1. Gjithsesi duhet të jenë të kënaqur, pasi mund të kishte shkuar më keq në një ndeshje të mbyllur me një dramë të vërtetë.

Miqtë surprizuan në minutën e 28-të, kur kaluan në epërsi me një ish si Kolombo. “Djali I shtëpisë” ndëshkoi Milan dhe vendosi fatin e pjesës së parë.

Ashtu siç pritej, pas pushimit të besuarit e Allegri provuan me çdo mënyrë për të kthyer sfidën, madje edhe me mënyra të palejueshme si Pulisic, goli i të cilit u anulua për një prjekje me dorë.

Përpjekjet e kuqezinjve do të shpërbleheshin vetëm në minutën e dytë shtesë. Rafael Leao shënoi golin e barazimit.

Por në minutën e nëntë shtesë, Genoa fitoi një 11 metërsh. Nga pika e penalltisë, Stancu shpërdoroi shansin e fundit për triumf të skuadrës së tij, duke lënë në fuqi barazimin 1-1.

Një tjetër ndalesë për Milan, që i lejon kryesusëve të Inter të thellojnë në tre pikë diferencën. Nuk është ndonjë distancë e madhe, por mund të thellohet më tej, nëse Masimilliano Allegri dhe të besuarit e tij nuk largojnë frikën nga të vegjëlit, që i ka hequr 11 pikë mes Cremonese, Pisa, Sassuolo, Parma dhe në fund Genoa./abcnews.al

Çdo fillim e ka një fund, madje edhe për “Mbretërit” siç është LeBron James për NBA.

Në moshën 41 vjeçare ylli i basketbollit vijon të luajë në nivele të larta dhe të vendosë rekorde, por gjithsesi po përgatitet të lëshojë fronin.

Madje, një abdikim mund të vijë shumë shpejt, pasi basketbollisti i Lakers rrezikon të mbetet jashtë “All Star Games” për herë të parë pas 21 vitesh.

Shkak për këtë janë mungesat e shumta si pasojë e problemeve fizike, që në këtë edicion janë shtuar.

LeBron ka humbur 17 sfida nga 35 të luajtura gjithsej nga skuadra kaliforniane në këtë sezon të rregullt të NBA.

Kjo do të thotë se ai është vetëm një mungesë larg limitit të vendosur nga Liga Amerikane e Basketbollit, në përzgjedhjen e lojtarëve për ndeshjen e “Yjeve”.

Kjo do të ishte goditja e parë e rëndë që paralajmëron fundin e karrierës spektakolare të LeBron James.

Sipas mediave amerikane, ai do të provojë ta evitojë këtë me një program të veçantë sa i përket minutave që duhet të luajë në çdo ndeshje, por ky duket një mision i pamundur./abcnews.al

Për momentin është vetëm një sondazh, një interesim për të kuptuar kushtet e transferimit, por duke parë situatën, mbetet gjithesi një lajm i mirë për Kristjan Asllanin dhe kombëtaren e Shqipërisë.

I shkakrkuar nga Torino, që nuk e ka grumbulluar në dy ndeshjet e fundit dhe kërkon të prishë përpara kohe formulën e huazimit dhe jashtë projektit tek Inter, për mesfushorin kuqezi hapet një pistë e re në karrierën e tij.

Bëhet fjalë për Girona dhe një transferim të mundshëm në La Liga. Mediat spajolle kanë zbuluar interesimin e skuadrës nga Katalonja, që ka kërkuar informacion për Asllanin.

Më parë edhe skuadra si Sassuolo dhe Fiorentina ishin afruar me futbollistin 23 vjeçar, që duhet të gjejë një sistemim të shpejtë në merkaton e janarit.

Girona dhe La Liga mund të jenë një zgjidhje e mirë për të ardhmen e Kristjan Asllanit, por edhe një revansh përsonal për lojtarin, pas eksperiencës së fundit negative te Torino.

Po ashtu, edhe Inter kërkon të transferojë sa më shpejt futbollistin, në mënyrë që mos ulet vlera e tij në merkato.

Klubi zikaltër pretendon të fitojë të paktën 15 milion euro nga kartoni i shqiptarit, shifër kjo e njëjte me marrëveshjen që kishte me Torinon.

Në të njëjtën linjë janë edhe interesat e kombëtares së Shqipërisë. Asllani është një titullar i padiskutueshëm i skuadrës kuqezi dhe një nga pikat kryesore në zgjedhjet taktike të Silvinjos, që shpreson të ketë në formë të gjithë futbollistët për sfidën historike në play off e “Botërorit 2026” kundër Polonisë në fund të muajit mars.

Në një kampionat të gjatë dhe garë të fortë për titullin kampion, një barazim mund të qëndrojë. Aq më tepër ndaj një rivali të madh. Por Arsenal vazhdon të jetë pretendent kryesor në këtë sezon të Premier League.

Konfirmimi për këtë erdhi në sfidën e fundit kundër kampionëve në fuqi të Liverpool, të sigluar në shifrat 0-0. Pavarësisht rezultatit, “Topçinjtë” treguan edhe një herë forcën e tyre.

Mbi të gjitha në pjesën e parë, ku dominuan në të gjithë komponentët e lojës, nga kontrrolli i topit, te rastet për shënim dhe goditjet në portën e rivalëve.

Frkasioni i dytë ishte ndryshe, ndërsa frika për të mos humbur bëri që të besuarit e Mikel Arteta të tërhiqeshin duke i lënë më shumë hapësirë Liverpool. Por edhe të kuqtë nuk arritën të shfrytëzojnë rastet e tyre, duke ndarë pikët me Arsenal.

Një frenim që nuk ka efekte negative për “Topçinjtë”, që nuk arrijnë të arratisen, por që ruajnë gjithsesi vendin e parë me një distancë sigurie prej 6 pikësh ndaj ndjekësve më të afërt të Manchester City./abcnews.al

Presidenti amerikan Donald Trump deklaroi se ka anuluar një “valë të dytë” sulmesh ndaj Venezuelës, për shkak të bashkëpunimit të treguar nga autoritetet e vendit me Shtetet e Bashkuara.

Në një postim në platformën Truth Social, Trump tha se vendimi erdhi pas lirimit të një numri të madh të të burgosurve politikë nga ana e Venezuelës, duke e cilësuar këtë veprim si një “gjest të rëndësishëm për paqe”.

Trump shtoi se Uashingtoni dhe Karakasi po bashkëpunojnë ngushtë për rindërtimin dhe modernizimin e infrastrukturës së naftës dhe gazit. “Për shkak të këtij bashkëpunimi, vala e dytë e sulmeve nuk do të jetë e nevojshme”, shkroi ai, duke sqaruar se forcat detare amerikane do të mbeten në pozicion për arsye sigurie.

“Venezuela po liron një numër të madh të burgosurish politikë si shenjë e “Kërkimit të Paqes”. Ky është një gjest shumë i rëndësishëm dhe i zgjuar. SHBA-të dhe Venezuela po punojnë mirë së bashku, veçanërisht për sa i përket rindërtimit, në një formë shumë më të madhe, më të mirë dhe më moderne, të infrastrukturës së tyre të naftës dhe gazit. Për shkak të këtij bashkëpunimi, unë kam anuluar valën e dytë të sulmeve të pritura më parë, e cila duket se nuk do të jetë e nevojshme, megjithatë, të gjitha anijet do të qëndrojnë në vend për qëllime sigurie. Të paktën 100 miliardë dollarë do të investohen nga BIG OIL, me të cilët do të takohem sot në Shtëpinë e Bardhë. Faleminderit për vëmendjen tuaj ndaj kësaj çështjeje! “- shkruan Trump.

Deklarata vjen rreth një javë pasi SHBA-ja ndërmori një operacion ushtarak për rrëzimin e ish-presidentit Nicolás Maduro, i cili ndodhet aktualisht në paraburgim në SHBA së bashku me bashkëshorten e tij, Cilia Flores.

Presidenti amerikan pritet të takohet të premten në Shtëpinë e Bardhë me drejtues të kompanive të mëdha të naftës, për t’i nxitur ato të rrisin prodhimin dhe investimet në Venezuelë. Ai ka pretenduar se investimet mund të arrijnë deri në 100 miliardë dollarë, megjithëse industria e naftës ka shprehur skepticizëm për realizimin e një angazhimi të tillë financiar.

I ftuar në studion e “ABC e Mëngjesit”, Ilir Ciko fotograf i botës së egër dhe ekspert ekonomie, prezantoi një projekt të veçantë që i dedikohet zogjve të rrallë mbi qiellin shqiptar.

Ai ka përgatitur një kalendar për vitin 2026 me fotografi të shkrepura ekskluzivisht në Shqipëri, në mbështetje të Shoqatës Mjedisore për Shpendët. Të gjitha të ardhurat nga kalendari, kanë shkuar për AOS, ndërsa shpenzimet i ka mbuluar vetë autori.

Ciko tregoi se fotografimi i shpendëve në fluturim është një nga teknikat më të vështira, por edhe më emocionueset. Sipas tij, shpendët e tërheqin sepse janë jetikë, lëvizin vazhdimisht dhe kanë një botë komplekse familjare. Ai shpjegoi se muajt mars dhe prill janë një “korridor” migrimi, ku shumë shpendë kalojnë nëpër Shqipëri. Shumë prej fotografive janë realizuar pranë Liqenit Artificial të Tiranës, një zonë që fsheh surpriza të mëdha natyrore. Ciko pranoi se nuk i njeh gjithmonë të gjitha speciet në momentin e fotografimit, por i studion më pas.

Miqtë e tij shpesh habiten kur mësojnë se shpendët më të bukur “pozojnë” në zemër të Tiranës. Përveç fotografisë së botës së egër, ai ndan pasionin edhe për wind surfing. Në kërkim të erës dhe dallgës perfekte, Ilir Ciko eksploron edhe detet shqiptare, duke e kthyer natyrën në burim frymëzimi të vazhdueshëm.

Lind ChatGPT Shëndet, funksioni i ri i inteligjencës artificiale që do t’u lejojë përdoruesve të ngarkojnë kartelën e tyre klinike dhe të dialogojnë mbi gjendjen shëndetësore me AI. OpenAI, megjithatë, nxitoi të sqarojë: “Nuk do të zëvendësojë mjekët dhe nuk do të bëjë diagnoza”. “Gjatë dy viteve të fundit kemi bashkëpunuar me mbi 260 mjekë aktivë në 60 vende dhe në dhjetëra specialitete, për të kuptuar se çfarë e bën një përgjigje shëndetësore të dobishme ose potencialisht të dëmshme”, shpjegon OpenAI.

Privatësi dhe siguri të përforcuara

Çdo javë, miliona përdorues i drejtohen ChatGPT-së duke ndarë detaje mbi gjendjen e tyre fizike. Pikërisht kjo ka ngritur shqetësime edhe nga autoritetet e mbrojtjes së të dhënave personale, përfshirë garantët e privatësisë. Për këtë arsye, OpenAI siguron se ChatGPT Shëndet mbështetet në “kontrolle të forta të privatësisë, sigurisë dhe menaxhimit të të dhënave”, me nivele shtesë mbrojtjeje të dedikuara për shëndetin. Këto përfshijnë sisteme të posaçme kriptimi dhe mekanizma izolimi për të mbajtur bisedat shëndetësore private dhe të ndara.

Në bashkëpunim me mjekët, jo në vend të tyre

“E projektuar në bashkëpunim të ngushtë me mjekët, ChatGPT Shëndet luan një rol më aktiv në kuptimin dhe menaxhimin e shëndetit dhe mirëqenies, duke mbështetur kujdesin e profesionistëve shëndetësorë pa i zëvendësuar ata”, thekson OpenAI. Kjo deklaratë vjen si përgjigje ndaj shqetësimeve të ngritura edhe nga mjekët në Itali dhe vende të tjera, për rrezikun e përhapjes së informacionit të pasaktë apo potencialisht të rrezikshëm.

“ChatGPT Shëndet është projektuar për të mbështetur asistencën mjekësore, jo për ta zëvendësuar atë. Nuk është i destinuar për diagnozë apo trajtim. Përkundrazi, ndihmon përdoruesit të orientohen në pyetjet e përditshme dhe të kuptojnë tendencat me kalimin e kohës, jo vetëm momentet e izoluara të sëmundjes, duke i përgatitur më mirë për bisedat e rëndësishme me mjekët”, sqaron kompania.

Risitë e platformës

Qëllimi i portalit të ri është të bashkojë në një vend të gjitha informacionet shëndetësore të përdoruesve. “Sot, të dhënat shëndetësore janë shpesh të fragmentuara mes portaleve, aplikacioneve, pajisjeve të veshshme, PDF-ve dhe shënimeve mjekësore. Kjo e bën të vështirë krijimin e një pasqyre të plotë dhe i detyron njerëzit të orientohen vetë në një sistem shëndetësor kompleks”, shpjegon OpenAI.

Me ChatGPT Shëndet do të jetë e mundur lidhja e sigurt e kartelave elektronike shëndetësore dhe aplikacioneve të mirëqenies, si Apple Health, Function dhe MyFitnessPal. Kjo do t’i lejojë ChatGPT-së të ndihmojë në kuptimin e rezultateve të fundit të analizave, përgatitjen për vizitat mjekësore, marrjen e këshillave mbi ushqimin dhe aktivitetin fizik, apo vlerësimin e alternativave të ndryshme të sigurimeve shëndetësore.

Kur do të jetë i disponueshëm

Aktualisht, funksionaliteti i ri nuk është ende i aksesueshëm për të gjithë. “Po fillojmë me një grup të vogël përdoruesish për të mbledhur komente dhe për të përmirësuar më tej përvojën”, bën të ditur OpenAI. Me shtimin e përmirësimeve të tjera, kompania parashikon zgjerimin gradual të aksesit, duke e bërë ChatGPT Shëndet të disponueshëm për të gjithë përdoruesit në web dhe iOS në javët në vijim. Ata që dëshirojnë qasje të hershme, mund të regjistrohen në listën e pritjes.

LEZHË- Finalizohet operacioni antidrogë, i koduar “Terreni”. Gjatë aksionit janë goditur nga Forca e Posaçme “Shqiponja”, 2 raste të tjera të shitjes së lëndës narkotike Cannabis Sativa, në sasi dhe në doza.

Ndërsa në pranga janë vënë 2 shtetas. Këta persona u arrestuan në zonën e kalasë dhe në fshatin Manati.

Si rezultat i kontrolleve dhe punës informative, të kryera me objektiv evidentimin dhe goditjen e rasteve të veprimtarive kriminale në fushën e narkotikëve, shërbimet e Forcës së Posaçme “Shqiponja” finalizuan operacionin e koduar “Terreni”, në kuadër të të cilit u konstatuan 2 raste të tjera të posedimit të Cannabis Sativës, me qëllim shitjen në sasi dhe në doza. Konkretisht, në bashkëpunim me specialistët e Seksionit për Hetimin e Narkotikëve, u arrestuan në flagrancë: -në fshatin Manati, duke lëvizur me automjet, për të shitur doza Cannabisi, shtetasi 22 vjeç, banues në Lezhë dhe në zonën e kalasë së Lezhës, shtetasi 27 vjeç, banues në Kurbin, i cili kishte me vete një sasi Cannabisi, dyshohet me qëllim shitjen”, njofton policia.

Materialet procedurale iu referuan Prokurorisë së Lezhës, për veprime të mëtejshme.

/abcnews.al/

Pas mbledhjes së Komitetit Ndërqeveritar, lidhur me situatën e përmbytjeve, kryeministri Edi Rama po zhvillon një takim me kabinetin qeveritar, i pari për këtë vit.

Në këtë takim pune, ministrat do të raportojnë mbi prioritetet dhe objektivat e çdo dikasteri për këtë vit për të planifikuar mënyrat me efektive për zbatimin e politikave publike.
Ndërsa një javë me vonë, të premten e 16 janarit, Rama do të presë në Pallatin e Brigadave grupin parlamentar të partisë socialiste.

Ky takim i cili mbahet tre ditë para nisjes së sesionit të ri parlamentar, i planifikuar për më 19 janar, ka për qëllim të koordinojë punën e deputetëve në parlament, si dhe të diskutojë mbi projektligjet dhe iniciativat e qeverisë përgjatë këtij sesioni./abcnews.al

FIER- Dalja nga shtrati i Lumit Vjosa ka shkaktuar pasoja të shumta në fshatin Ferras në Fier.

Banorët thonë se uji ka depërtuar brenda banesave, ndërsa lartësia e tij brenda tyre ka arritur në nivelin 1.5 metra.

Një prej banorëve i tha ABC News se kanë humbur gjithçka nga vërshimet e ujit dhe në këto kushte janë të detyruar ta kalojnë natën në makina.

Ai u shpreh se në Ferras janë afërsisht 23 banesa, të cilat janë prekur nga përmbytjet.

“Niveli i ujit ka arritur në 1.5 metra. Shtëpitë ndodhen nën ujë. Natën do ta kalojmë në makinë. Banesat kanë marrë lagështirë. Nuk kemi shtresa dhe as rroba. Rreth 23 banesa të prekura nga përmbytja në Ferras. “, tha ai./abcnews.al

Në aksin rrugor Leskovik – Përmet, në zonën e fshatit Petran si pasojë e çedimit të shtratit të rrugës qarkullimi i mjeteve është plotësisht i pamundur.

Për arsye sigurie, njoftohet se ky aks rrugor do të mbetet i bllokuar deri në një njoftim të dytë.

Ndërkohë vendi është përfshirë prej katër ditësh nga reshje ë dendura të shiut. Si pasojë, përmbytje masive janë regjistruar në gjithë territorin e vendit duke shkaktuar dëme në banesa e biznese. Në Durrës një ditë më parë u raportua edhe një viktimë nga moti i keq.

Gjithashtu ka pasur bllokime në disa akse në vend si pasojë e rrëshqitjes së dherave si edhe inerteve të rëna në rrugë.

Këtë të premte u zhvillua edhe mbledhja e Emergjencave Civile, drejtuar nga kryeministri Edi Rama ku shpalosën të gjitha problematikat si edhe masat për t’u ardhur në ndihmë banorëve të prekur nga përmbytjet.

Është arrestuar një 19-vjeçar për plagosje. Sipas policisë, njoftohet se 19-vjeçari goditi me thikë një 18-vjeçar, gjatë një konflikti për motive të dobëta.

“Shërbimet e Komisariatit të Policisë Nr. 2, në vijim të punës për parandalimin dhe goditjen e veprimtarive kriminale, si dhe për kapjen e shtetasve në kërkim, në bazë të informacioneve të siguruara, kanë organizuar punën dhe në kuadër të operacionit të koduar “Catch”, kanë kapur dhe ndaluar shtetasin E. R., 19 vjeç.”, thuhet në njoftim.

Ky shtetas ishte shpallur në kërkim pasi dyshohet se më datë 23.11.2025, gjatë një konflikti për motive të dobëta, ka plagosur me mjet prerës një 18-vjeçar.

Materialet procedurale i kaluan Prokurorisë, për veprime të mëtejshme.

Protestues të shumtë kanë marshuar nëpër kryeqytetin e Iranit dhe qytete të tjera.

Protestuesit bënë thirrje për rrëzimin e udhëheqësit suprem të Iranit, Ajatollah Ali Khamenei, dhe kthimin e Reza Pahlavi.

Ishte dita e 12-të radhazi e trazirave që janë shkaktuar nga pakënaqësia për rënien e monedhës iraniane përballë dollarit dhe janë përhapur në më shumë se 100 qytete dhe qyteza në të 31 provincat e Iranit, sipas grupeve të të drejtave të njeriut.

Agjencia e Lajmeve të Aktivistëve të të Drejtave të Njeriut me seli në SHBA ka thënë se të paktën 34 protestues – pesë prej tyre fëmijë – dhe tetë personel sigurie janë vrarë, dhe se 2,270 protestues të tjerë janë arrestuar.

Në qarkun e Korçës raportohet se ekipet e OSHEE janë në terren për të bërë të mundur rikthimin e energjisë në zonat ku ka problematika. Raportohet se situata prek drejtoritë rajonale Korçë, Maliq, Pogradec dhe Ersekë, ndërsa Bilishti nuk raporton problematika.

Si pasojë e reshjeve të shiut, argjinatura e lumit Devoll vijon të jetë e çarë, duke bërë që rreth 3,600 ha tokë bujqësore në fushën e Maliqit të jenë nën prezencën e ujit.

Gjithashtu edhe argjinatura e lumit Devoll vijon të jetë e çarë, duke bërë që rreth 3,600 ha tokë bujqësore në fushën e Maliqit të jenë nën prezencën e ujit.

Ndërsa nga reshjet e borës nuk raportohen problematika.

Në përgjithësi, akset rrugore janë të hapura.

Aksi Qafë Plloçë – Qukës, vijon puna për pastrimin e inerteve aksi mbetet ende i bllokuar.

Në rrugën e fshatit Dardhas bashkia po punon për krijimin e një bypass-i.

Rruga në fshatin Denas vijon e bllokuar do të ndërhyhet nga bashkia sapo të ulet niveli i ujit.

Njoftimi i plotë

ARRSH – Drejtoria Qendër-Lindje

Ersekë – Leskovik puna ka vijuar gjatë natës është kryer kriposja për shkak të ngricave. Qarkullimi lejohet me goma dimërore dhe zinxhirë.

Maliq – kufiri me Gramshin situata paraqitet pa probleme ka vijuar kontraktori me kriposje qarkullimi normal.

Korçë – Ersekë (km 3) dhe Zëmblak – Goricë e Bilisht – Miras (km 6) është vijuar me kriposje qarkullimi vijon me goma dimërore.

Boboshticë – Dardhë, gjatë natës janë regjistruar temperatura të ulëta është kryer kriposja në të gjithë segmentin.

Informacione nga bashkitë

Bashkia Pogradec:

Vijon problematika e rrugës së Dardhasit, ku po punohet për ta bërë të kalueshme. Në njësitë Sterkanj, Dardushë, Nicë, Osnat dhe Lekas raportohen ndërprerje të energjisë elektrike. Në fshatin Dardhas, si pasojë e rrëshqitjes së një masivi dheu, është dëmtuar një banesë, e cila për momentin është e pabanueshme.

Bashkia Devoll: Në fshatrat Maçurisht, Progër dhe Cangonj, uji është tërhequr plotësisht situata është normalizuar dhe nuk raportohen probleme të tjera.

Bashkia Kolonjë: Ka ngrirje të rrugëve strukturat e bashkisë po punojnë në terren. Procesi mësimor ka filluar normalisht në shkollat e qyteteve Ersekë dhe Leskovik, ndërsa nuk ka filluar në fshatrat Shtikë, Starje, Mesiçkë dhe Qafëzez. Janë marrë masa për sigurimin e ngrohjes. Nuk ka probleme me furnizimin me ujë dhe energji elektrike.

Bashkia Maliq

Në territorin e Njësisë Administrative Gorë janë konstatuar problematika:

Në fshatin Velçan janë shkaktuar përmbytje të tokave bujqësore.

Rruga e fshatit Senisht është dëmtuar një segment i saj është i batisur dhe aktualisht i pakalueshëm për mjetet.

Në fshatin Dolan janë shënuar rrëshqitje dherash, si pasojë e të cilave rruga është e bllokuar. Gjithashtu, është dëmtuar rrjeti i ujësjellësit.

Probleme në qarkullim janë konstatuar edhe në rrugët e fshatrave Strelcë, Zvarisht dhe Lozhan Lartë, ku ka prani të dëborës dhe kalimi i mjeteve kryhet me vështirësi.

Situata po monitorohet në mënyrë të vazhdueshme nga strukturat përgjegjëse për ndërhyrje deri në normalizimin e gjendjes, garantimin e qarkullimit rrugor dhe rikthimin e shërbimeve bazë.

Është dëmtuar argjinatura e kanalit kryesor në fshatin Leminot, si dhe është shkatërruar plotësisht një urë.

Gjithashtu, është dëmtuar segmenti rrugor Kakaç – Vërçun, ku për shkak të rrëshqitjeve të tokës është dëmtuar edhe ushqyesi i rezervuarit Vërçun – Podgorie.

Strukturat e e mbrojtjes civile dhe shërbimet rrugore u bëjnë thirrje drejtuesve të mjeteve të qarkullojnë vetëm me goma dimërore ose zinxhirë, për shkak të ngricave të pranishme në disa segmente rrugore.

Kryeministri Edi Rama në mbledhjen e emergjencave civile, ndërsa foli për situatën e përmbytjeve duke renditur të gjitha masat e marra për këtë situatë dha edhe një mesazh për deputetët.

Rama tha se të gjithë deputetët duhet të jenë të pranishëm në zonat e tyre në mbështetje të qytetarëve, kudo ku ka problematika.

“Në bashkëpunimi me mbrojtjen, infrastrukturën apo ministrinë e Bujqësisë do të bëjmë që çfarë është programuar për vitin 2026 të riprogramohet edhe për të adresuar këto pika ku kanë ndodhur ndërtimet. Do të çojmë deri në fund të gjithë procesin e kësaj infrastrukture. Mjafton të shikosh të gjithë hektarët e mbuluar nga uji sot dhe në të kaluar për të kuptuar ndryshimin e pakrahasueshëm. Një cikël i dytë ndërveprimi do bëhet përmes autoriteteve të pranishëm dhe kryetarëve të bashkive. Deputetët të jenë të pranishëm në të gjithë zonat e tyre ndaj përkujdesjes ndaj njerëzve, jo zgjedhëseve. Të bëjmë të mundur që gjithë procesi i zhdëmtimit të jetë sa më i plotë , i drejtë dhe sa më efikas”, tha ai.

TIRANË- Ministri i Financave, Petrit Malaj, bëri të ditur se qeveria ka në dispozicion mbi 50 milionë euro për përballimin e situatës së krijuar nga emergjencat civile dhe dëmet e shkaktuara nga fatkeqësitë natyrore.

Sipas Malajt, në kuadër të programit të emergjencave civile janë parashikuar 30 milionë euro si shpenzime kapitale, të dedikuara për financimin e objekteve dhe projekteve që lidhen me parandalimin e fatkeqësive natyrore.

Ai sqaroi se fondi i kushtëzuar për emergjencat civile, i menaxhuar nga Mbrojtja, kap vlerën rreth 10 milionë euro.

Gjithashtu, Malaj u shpreh se në dispozicion është edhe fondi rezervë i Këshillit të Ministrave, me një vlerë prej 25 milionë euro, i cili do të aktivizohet në bazë të vlerësimeve të dëmeve në terren.

Ministri Malaj bëri me dije se ekziston edhe një fond i posaçëm për digat dhe rezervuarët, me vlerë rreth 5 milionë euro.

“Në programin e emergjencave civile kemi parashikuar 30 milionë euro, që janë shpenzime kapitale për programin e emergjencave civile dhe ka të bëjë me financimin e objekteve dhe projekte, të cilat lidhen me parandalimin e fatkeqësive natyrore.

Vlera që kemi alokuar për këtë program është 15 milionë euro. Kemi planifikuar fondin e kushtëzuar për emergjencat civile që  është rreth 10 milionë euro, menaxhohet nga Mbrojtja.

Kemi dhe fondin rezervë të Këshillit të Ministrave, në vlerën 25 milionë euro, e cila do vendoset në dispozicion në varësi të vlerësimeve që do të bëhen në varësi të dëmeve të shkaktuara. Kemi fondin për digat dhe rezervuarëve.

Ky fond është rreth 5 milionë euro. Në total, nëse do të bënim një vlerësim të fondeve që kemi në dispozicion vlera shkon mbi 50 milionë euro, që janë të disponueshme për situatën e krijuar aktualisht”, tha ai./abcnews.al

Për shkak të situatës së krijuar nga përkeqësimi i kushteve atmosferike, ministrja e Arsimit Mirela Kumbaro u shpreh se mësimi është ndërprerë përkohësisht në 54 shkolla të vendit, kryesisht në zonat malore.

Kumbaro garantoi se studentët në universitetin e Durrësit do të rikthehen në auditore ditën e hënë, ndërsa shtoi se janë në kontakt me drejtues të shkollave në të gjithë vendin lidhur me situatën.

“Kemi qenë në kontakt cdo orë me cdo drejtor shkolle, mësues, në 1510 shkollat e Shqipërisë në sistemin parauniversitar. Në raportimin e fundit sot, në të gjithë qarkun mësimi ka nisur rregullisht në të gjitha shkollat, kemi në Durrës një ndërprerje të përkohshme këto tre ditë në 12 shkolla. Të hënën nis mësimi normalisht në universitetin e Durrës.

Në Vlorë, Gjirokastër kemi ndërprerë të pjessshme të kontrolluar, kryesisht në shkollat në zona të thella.  Edhe në bashkinë Gjirokastër, ku kemi patur ndërprerje për arsye sigurie ndërpremë dje procesin mësimor. Në Korcë, Berat dhe Elbasan janë rreth 32 zona në zonat malore të thella ku për shkak të ngricës kemi menduar të mos rrezikojmë mësuesit dhe nxënesit. 54 kanë ndërprerje të mësimit sot.” tha Kumbaro./ abcnews.al