TIRANË, 16 dhjetor/ATSH/ Në të gjithë vendin po vijon puna për lirimin e hapësirave publike të zaptuara nga subjektet private.
Kryeministri Edi Rama publikoi sërish sot pamje nga ndërhyrjet në terren.
“Puna për të liruar hapësirat publike të zaptuara vijon”, deklaroi Rama.
Nisma është pjesë e programit “Rilindja Urbane 2.0” dhe synon rritjen e cilësisë së shërbimeve, funksionalitetit urban dhe respektimin e standardeve të mikpritjes në çdo qytet të Shqipërisë.
E nisur në muajin korrik, kjo nismë është konceptuar si ndërhyrje e përhershme dhe mbetet prioritet i pushtetit vendor dhe qendror.
Qeveria ka forcuar kontrollet mbi territorin dhe ka ashpërsuar masat në Kodin e ri Penal për goditjen e ndërtimeve pa leje. Gjithashtu, pritet miratimi i Rregullores së re Kombëtare, e cila do të përcaktojë qartë hapësirat që bizneset mund të përdorin ligjërisht.
Përmes portalit “Hapësira ime publike”, qytetarët kanë raportuar deri tani 16 891 raste shkeljesh. Nga këto, 12 948 janë zgjidhur, ndërsa 3 943 raste janë në proces shqyrtimi.
Prokuroria e Shkodrës njoftoi të premten më 12 dhjetor përfundimin e hetimeve dhe dërgimin për gjykim të një punonjësi të Policisë së Shtetit, kryeinspektorit të Inspektoratit të Mbrojtjes së Territorit, IMT dhe dy inspektorë, të cilët akuzohet se favorizuan ndërtimet pa leje në Vaun e Dejës. Ata akuzohen nga prokuroria për veprat penale “Shpërdorim detyre” […]
TIRANË, 11 dhjetor /ATSH/ Ministrja e Brendshme, Albana Koçiu deklaroi sot në një interpelancë në Kuvend se, ka zero selektivizëm në prishjen e ndërtimeve pa leje
Ministrja e Brendshme, Albana Koçiu në përgjigje të interpelancës me deputetin e partisë Mundësia, Agron Shehaj tha se, ndërtimet pa leje janë një plagë e shoqërisë.
“Nuk ka të madh dhe të vogël që nuk e di se kush e ka hapur, ndërtimet e paligjshme, ndërtimet pa kriter vend e pavend dhe duke i bërë kështu Shqipërisë një “dhuratë” shumë të shëmtuar në çdo pëllëmbë të saj”, tha Koçiu.
“Territori është ai që mbase më mirë se çdo gjë tjetër ndan dy vizione diametralisht të ndryshme për Shqipërinë. Një vizion që trashëguam, ai i ndërtimeve pa kriter pa hesap, me mandat për të shkatërruar dhe zaptuar çdo tokë”, tha Koçiu.
Ministrja nënvizoi se, “është vizioni i kësaj mazhorance ai që u vu në zbatim që në ditën e parë të qeverisjes, duke nisur nga Rilindja Urbane e çdo qyteti që i ka dhënë frymë dhe jetë vendit, duke vazhduar me Gjirokastrën me Korçën, me Beratin, me Krujën, me Lungomaren e Vlorës, me Alpet, me Tiranën. Është vizioni i kësaj mazhorance ai i turizmit dhe zhvillimit të qëndrueshëm”.
Koçiu tha se, “në kushtet e sotme ne nuk mund të tolerojmë që zonat më tërheqëse ato që janë një pasuri e përbashkët e të gjithë shqiptarëve, të shfrytëzohen për pasurimin e disa individëve në kurriz të shumicës së qytetarëve”.
Duke dhënë shifra të operacionit, Koçiu tha se, në zonën e Thethit u vendosën 46 masa administrative me gjobë, 49 masa pezullim punimesh dhe 57 të tjera për prishjen e objekteve të kundërligjshme.
Në zonën e Valbonës u ndërhy me 50 vendime prishje, u vendosën 15 masa administrative, 12 urdhra pezullimi.
Në zonat bregdetare u morën 42 vendime për prishje për një total prej 102 objektesh, 38 vendime pezullimi, 42 masa administrative me gjobë.
Në zonat lumore u morën vendime për prishjen e 50 objekteve. Në zonën aeroportuale të Rinasit ishin 10 vendime për prishje me 10 masa administrative.
Koçiu shtoi se, “është ndërhyrë dhe në sigurinë rrugore në shumë akse, duke çliruar rrugët nga çibanët e mbirë pa kriter”.
Sa i përket rrugëve janë evidentuar në total mbi 2 mijë struktura, rreth 240 prej tyre janë prishur, pjesa tjetër janë prishur vullnetarisht.
Paralelisht, theksoi Koçiu, “po zhvillohet pa u ndalur dhe aksioni më i madh për lirimin e hapësirave publike nga tendat, muret, bodrumet, gardhet, telat, rrjeta, bordura, pengesa, çdo gjë tjetër që përbën në fakt një sfidë të jashtëzakonshme për hapësirën e përbashkët për qytetarët në zonat urbane”.
Koçiu nënvizoi se, “të gjitha objektet e kundërligjshme fillimisht janë vendosur nga strukturat e posaçme, sipas ligjit në fuqi, cilat duhen prishur. E dyta, të gjitha objektet e kundërligjshme për të cilat ka pasur vendim prishje janë informuar në kohën e duhur të gjithë qytetarët. E treta, ka pasur zero selektivizëm apo subjektivizëm në këtë proces. 100% e atyre ndërtesave që janë gjykuar në shkelje si raste flagrante të ndërtimit, si në rastin e oborrit të kishës në Theth, janë prishur dhe toleranca ka qenë zero”.
Ministrja e Punëve të Brendshme, Albana Koçiu u rikthye këtë të hënë në Farkë, një nga zonat ku prej tre javësh po zhvillohet operacioni i gjerë për verifikimin e lejeve të ndërtimit dhe standardeve të sigurisë në terren. Ajo deklaroi se ky një është proces i strukturuar, afatgjatë, që po jep një panoramë të qartë të situatës ndërtimore. Sipas të dhënave të deritanishme…
TIRANË, 24 nëntor/ATSH/ Operacioni kundër paligjshmërisë në ndërtime vijon pa u ndalur në të gjithë territorin.
Në vijim të operacionit kombëtar për vendosjen e ligjshmërisë në territor për ata që ndërtojnë pa leje apo për qëllime fitimi, ministrja e Punëve të Brendshme, Albana Koçiu bëri sot një bilanc të operacionit të përqendruar në zonën e Farkës prej datës 3 nëntor.
Ministrja Koçiu tha se nga operacioni në zonën e Farkës janë inspektuar deri tani 423 objekte, ku janë konstatuar 3 324 m² ndërtime pa leje.
Sipas ministres, për shkeljet e evidentuara janë vendosur masa administrative me gjobë në vlerën 2 milionë euro.
“IKMT të mbështetur dhe nga Policia e Shtetit janë çdo ditë në terren për të verifikuar dhe ndëshkuar çdo abuzim të lejes së miratuar. Ligji do të zbatohet deri në fund”, siguroi Koçiu.
Gjatë procesit të verifikimit, situata në terren ballafaqohet me dokumentacionin që vendos në dispozicion bashkia Tiranë, për të vërtetuar nëse lejet e dhëna po respektohen nga ndërtuesit.
Ky operacion synon t’i japë fund abuzimeve me ndërtimet pa leje, duke përfshirë edhe ndëshkimin e autoriteteve që mbyllin sytë ose implikohen në paligjshmëri.
IKMT, Inspektorati i Mbrojtjes së Territorit dhe Policia Bashkiake kanë zhvilluar sërish një aksion në zonën e Lungomares, për të vijuar operacionin e nisur gjatë muajve korrik dhe gusht për lirimin e hapësirave publike. Pas një periudhe intensive gjatë sezonit veror, ky aksion rikthehet për shkak të konstatimit të rasteve të reja të zënies së hapësirave publike, kryesisht me struktura të…
TIRANË, 14 nëntor /ATSH/ Ministrja e Punëve të Brendshme, Albana Koçiu, ishte sërish sot në Farkë, në kuadër të operacionit që po zhvillohet në terren kundër ndërtimeve të paligjshme dhe abuzimeve me lejet e ndërtimit. Koçiu ishte e shoqëruar nga nënkryetari i Bashkisë së Tiranës, Blendi Sula si dhe drejtuesja e Inspektoratit Kombëtar të Mbrojtjes së Territorit (IKMT), Dallëndyshe Bici.
Sipas Koçiut ky është një operacion i pandalshëm për t’i dhënë fund kaosit në territor. Koçiu theksoi se shkelësit futen në listën e zezë, objektet pa leje prishen me kosto për vetë shkelësit dhe, kur e parashikon ligji, konfiskohen.
“Jemi sërish në zonën e Farkës duke theksuar se operacioni që kemi nisur më 3 nëntor vijon intensive çdo ditë. Nuk do të ndalemi deri ditën e fundit për të verifikuar çdo leje ndërtimi nëse është në respekt të rregullave.
“Ndërtuesit, projektuesit dhe çdo palë e përfshirë kanë detyrimin e vetëm zbatimin e ligjit. Deri tani nga inspektimet janë konstatuar një sërë shkeljesh, duke nisur nga mungesa e dokumentacionit teknik në kantier, mungesa e akteve të kontrollit sipas fazave të punimeve, moszbatim i planeve të organizmit të kantiereve, mungesë e masave të sigurimit teknik dhe shkelje të kushteve të lejeve të ndërtimit që kanë sjellë shtesa në sipërfaqet ndërtimore.
“Për të gjitha këto raste masat janë të qarta dhe të menjëhershme. Kush shkel rregullat futet në listë të zezë dhe nuk ka të drejtë që të aplikojë për leje ndërtimit. Së dyti shpenzimet e prishjes i mban subjekti që ka kryer shkeljen. Në rastet e përcaktuara nga ligji objekti konfiskohet për interes publik ose strehim sociale”, tha Koçiu.
Nënkryetari i bashkisë së Tiranë, Blendi Sula theksoi se “ajo që shikohet ëshët se lejet e ndërtimit në shumicën e rasteve nuk janë zbatuar siç duhet të bazë të rregullave dhe kushteve urbanistike. Ne si bashki Tiranë kemi marrë të gjitha lejet e ndërtimit që janë në gjithë zonën e Farkës, Lundrës, Bathores duke ja vënë në dispozicion IKMT-së që më pas të bëhen të gjitha verifikimet a e kanë zbatuar apo jo lejen e ndërtimit ashtu siç duhet”.
Drejtuesja e IKMT-së, Dallëndyshe Bici theksoi se “IKMT në bashkëpunim me Policinë e Shtetit dhe bashkinë Tiranë ka vazhduar operacionin në terren duke verifikuar çdo kantier ndërtimi.
“Dokumentacioni i terrenit është ballafaquar me dokumentacionin që na ka vënë në dispozicion bashkia Tiranë. Ky proces do të vijojë çdo ditë për të vërtetuar nëse lejet e dhëna po respektohet nga ndërtuesit”.
Koçiu nënvizoi se ky operacion është për t’i dhënë fund abuzimeve me ndërtimet pa leje, duke përfshirë edhe ndëshkimin e autoriteteve që mbyllin sytë ose implikohen në paligjshmëri.
TIRANË, 12 nëntor/ATSH-Maela Marini/ Kryeministri Edi Rama foli sot për fenomenin e shkeljeve të lejeve të ndërtimit, ndërsa paralajmëroi se aty ku do të jetë mundësia do të konfiskohen vila dhe do të bëhen kopshte, çerdhe apo qendër shëndetësore.
Gjatë një bashkëbisedimi me banorët e njësisë nr. 5 në Tiranë, Rama theksoi se do të merren masa për ndërtuesit që marrin leje dhe pastaj dalin nga leja duke shtuar metra ndërtimi apo duke mos respektuar kushtet e kantierit.
“Jemi aktualisht duke goditur të gjithë paligjshmëritë në zonën e vilave më të shtrenjta në Tiranë, në zonën matanë TEG-ut, dhe nuk kemi për të falur asnjë metër katror. Aty ku do të jetë mundësia, do të konfiskojmë vila, do të bëjmë kopsht, çerdhe, qendër shëndetësore. Aty ku nuk është mundësia, do kthehen andej nga kanë ardhur”, tha Rama.
Kryeministri theksoi se shteti i njeh gjithë të drejtën ndërtuesve të zhvillojnë pronën por jo në babëzi.
“Kur flasim për ndërtues, do të kemi parasysh që nuk janë thjesht ata, janë dhe pronarët, të cilët kanë pjesën e tyre, etj,etj. I kanë të gjitha të drejtat, ua njohim, t’i marrin lejet, t’i ndërtojnë, t’i gëzojnë, po asnjë metër mbi atë që i takon me ligj dhe me zakon”, tha Rama.
Rama tha se veçanërisht në Tiranë është shumë i madh problemi i trojeve publike. “Është bërë një çmenduri me letra, kthime, njohje, histori, AMTP-ra, të dhëna edhe në tokë urbane, si tokë bujqësore dhe nuk ka shumë territore, ka pak, ky është problemi kryesor”, shtoi ai.
Në këtë drejtim, Rama theksoi se me Agjencinë Kombëtare të Planifikimit dhe të Strehimit po ndërtohen disa formula në mënyrë që të bashkëpunohet me ndërtuesit dhe t’iu imponojmë që të japin hapësirë për të sistemuar një çerdhe apo një kopsht.
“Nevoja për çerdhe dhe për kopshte bëhet çdo vit e më e madhe dhe për më tepër, Bashkia e Tiranës ka krijuar një reputacion pozitiv për çerdhet dhe ka gjithmonë e më shumë prindër që duan ta çojnë fëmijën në çerdhe”, shtoi Rama. /j.p/
TIRANË, 7 nëntor /ATSH/ Operacioni kombëtar për vendosjen e ligjshmërisë në territor për ata që ndërtojnë pa leje, përtej lejes, apo për qëllime fitimi, ka nisur e po shtrihet në zonat rreth Tiranës, ku ndërtuesit, mbikqyrësit, inspektorët, që kanë shkelur kushtet e lejeve për vila e godina të shtrenjta, do të përballen me masat administrative e penale, që parasheh legjislacioni në fuqi.
Ministrja për Punët e Brendshme, Albana Koçiu ishte sërish sot në Farkë, ku theksoi se çdo ndërtim pa leje apo tejkalim i saj do të ndëshkohet me gjobë, kallëzim penal dhe prishje të menjëhershme.
Koçiu theksoi se “kontrollet kanë treguar se abuzimet me territorin, nuk janë vetëm çështje individësh që ndërtojnë pa leje por shpesh lidhen edhe me mospërmbushje të detyrës nga ana e punonjësve publike”.
“Askush nuk do të mbrohet nga pozicioni që mban kur bëhet fjalë për zbatimin e ligjit. Prandaj masat po shtrihen në çdo nivel përgjegjësie”, nënvizoi ministrja.
Sipas ministres “në këtë proces ndërtuesit duhet të jenë të parët që tregojnë kujdes”.
“Shfrytëzimi i çdo metri katror më shumë nga ajo që është lejuar do të penalizohet rëndë me gjobë, ndjekje penale dhe prishje të menjëhershme”, tha Koçiu.
Në të njëjtën kohë, ministrja u bëri thirrje qytetarëve që të jenë të kujdesshëm kur blejnë një pronë, të verifikojnë dokumentacionin dhe statusin ligjor të objektit, duke shmangur kështu çdo mashtrim apo abuzim.
“Të gjitha këto masa po zbatohen mbi bazën e paketës ligjore të miratuara në fillim të muajit tetor e cila ka forcuar më tej mekanizmat e kontrollit të territorit dhe sanksionet ndaj çdo shkelje”, tha ministrja.
Koçiu theksoi se mbrojtja e territorit nuk ka kthim pas.
TIRANË, 5 nëntor /ATSH/ Policia e Tiranës arrestoi sot pesë inspektorë të Inspektoratit të Mbrojtjes së Territorit në Tiranë dhe një tjetër u vu nën hetim, pasi duke shpërdoruar detyrën, lejuan ndërtimin pa leje të tri objekteve në një zonë rezidenciale në Sauk.
Arrestimi i tyre u krye në kuadër të operacionit policor të koduar “Wrong Project”, si rezultat i aksionit policor me objektiv konstatimin dhe goditjen e rasteve të ndërtimeve të paligjshme.
Konkretisht sipas policisë “u ndaluan me iniciativë shtetasit Gj. M., 38 vjeç, K. R., 48 vjeç, A. D., 35 vjeç, O. C., 41 vjeç dhe E. D., 32 vjeç; u procedua në gjendje të lirë shtetasja E. D., 35 vjeçe, si dhe u shpallën në kërkim shtetasit Xh. M., 32 vjeç, K. D., 37 vjeç dhe A. N., 46 vjeç, të gjithë me detyrën Inspektor i IMT Tiranë, pasi dyshohet se me mosveprimet/veprimet e kryera duke shpërdoruar detyrën, kanë lejuar ndërtimin pa leje, të 3 banesave, në zonën rezidenciale. Veprimet operacionale për këta shtetas u kryen për veprën penale “Shpërdorimi i detyrës”.
Gjithashtu në pranga të policisë u arrestuan edhe dy persona dhe u shpallën në kërkim 3 të tjerë (administratorë të subjektit ndërtues dhe zbatues të projektit për ndërtimin e tri objekteve).
“U ndaluan shtetasit B. Xh., 35 vjeçe dhe R. Gj., 36 vjeç, me detyra përkatëse drejtuese teknike dhe inxhinier i subjektit për llogari të të cilit janë ndërtuar tri objektet, si dhe u shpallën në kërkim shtetasit E. K., 55 vjeçe dhe S. S., 67 vjeç, bashkadministratorë të subjektit ndërtues, dhe shtetasja E. Sh.(Ç.), 45 vjeçe, arkitekte në këtë subjekt. Veprimet operacionale për këta shtetas u kryen për veprën penale “Ndërtimi i paligjshëm””, njoftoi policia.
Policia bëri të ditur se vijon puna për kapjen e 6 shtetasve të shpallur në kërkim. Gjithashtu, sipas policisë vijojnë hetimet për të dokumentuar përgjegjësinë penale individuale të 14 shtetasve të implikuar në këtë rast.
Ndërkaq, kontrollet dhe verifikimet në kuadër të planit operacional mbarëkombëtar të koduar “Hapësira publike”, vijojnë.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
Forca të shumta të Inspektoratit të Mbrojtjes së Territorit (IMT) dhe Policisë Bashkiake rrethuan më 3 nëntor një kantier ndërtimi me objekte 2-3 katëshe, që rezultonte në shkelje flagrante të lejes së ndërtimit në zonën e Farkës. Burime të Boldnews.al raportuan pak ditë më parë se vilat po ndërtoheshin nga Vladimir Kosta, ish-deputet i Partisë […]
Prokuroria e Lezhës ka sekuestruar mbi katër objekte ndërtimi, të ndërtuara pa leje dhe të legalizuara në kundërshtim me ligjin në zonën “Rana e Hedhun”, Shëngjin, Lezhë si dhe lëshoi masa sigurimi ndaj nëntë personave për veprat penale ‘Shpërdorim detyre’ dhe ‘Ndërtim i paligjshëm’. Deri në këtë fazë të hetimeve, Prokuroria ka paraqitur pranë Gjykatës […]
Prokuroria e Lezhës ka finalizuar të mërkurën një hetim për veprat penale “Shpërdorim detyre” dhe “Ndërtim pa leje”, duke çuar në caktimin e nëntë masave të sigurisë për zyrtarë, ish-zyrtarë dhe një përfitues të dyshuar. Hetimet, të drejtuara nga prokurorja Iva Harka, janë fokusuar në zonën e Ranës së Hedhun në Shëngjin. Dyshimet janë se […]
TIRANË, 26 tetor/ATSH/ Në të gjithë territorin e vendit vijon puna për lirimin e hapësirave publike nga ndërtimet e paligjshme, pjesë e vizionit të qeverisë “Rilindja Urbane 2.0”.
E konceptuar si një ndërhyrje sistematike në terren dhe jo një aksion i përkohshëm, kjo nismë po vijon me shembjen e mureve dhe strukturave të betonit në territor, të cilat cenojnë hapësirën publike.
Kryeministri Edi Rama publikoi sot në rrjetet sociale pamje nga ndërhyrjet që po kryhen në qytetin bregdetar të Vlorës.
“S’ka pushim”, shkruan Rama teksa ndan pamje nga shembja e mureve rrethues pranë rrugëve të qytetit që pret mijëra turistë, sidomos gjatë sezonit veror.
Për goditjen e fenomenit të ndërtimeve pa leje, në Kodin e ri Penal, i cili është hedhur për diskutim publik, parashikohen ndëshkime më të ashpra.
Ndërkohë, një tjetër mekanizëm që do të jetë në funksion të subjekteve private do të jetë Rregullorja e re Kombëtare, ku do të përcaktohen me ligj hapësirat që mund të shfrytëzojnë bizneset.
Në dispozicion të qytetarëve të cilët duan të denoncojnë rastet abuzive është vënë në dispozicion edhe Portali “Hapësiraimepublike.gov.al”. Deri më sot në këtë portal janë raportuar 14 471 raste, nga të cilat janë zgjidhur 10 709 raste, ndërsa 3 762 të tjera janë aktualisht në proces shqyrtimi.
Grupi Kastrati nisi dhe vazhdoi zgjerimin e ish-hotelit Sheraton pa leje. Citizens.al dëshmon se autoritetet mbyllën sytë përballë punimeve që nisën në vitin 2019, ndërkohë që lejet e ndërtimit u miratuan në periudhën 2021-2022.
Një histori aspak transparente
Zyrtarisht, më datë 8 nëntor 2019, grupi Kastrati siguroi nga qeveria leje zhvillimi për të zgjeruar godinën e hotelit MAK Albania (ish-Sheratoni).
Por leja e zhvillimit nuk të jep të drejtë të ndërtosh. Ajo vetëm përcakton në parim se sa dhe si mund të ndërtohet në një truall: intensiteti, volumetria maksimale, numri i kateve dhe distancat nga kufijtë.
E drejta për të ndërtuar mundësohet vetëm nga leja e ndërtimit, e cila në këtë rast – sipas procedurave të deleguara nga qeveria – do të jepej nga Bashkia Tiranë.
Leja e ndërtimit miraton projektin teknik, arkitekturën dhe zbatimin konkret brenda kushteve të lejes së zhvillimit. Ajo i jepet ndërtuesve vetëm pas pagesës së taksës së ndikimit mbi infrastrukturë.
Por, pamjet satelitore dhe evidentimet në terren tregojnë se vinçi ishte ngritur në anë të ish-hotelit Sheraton (2019), ndërsa kantieri për tre nga katër zonat e zhvillimit (Zona B, C dhe D) ishte hapur shumë më përpara se bashkia të jepte lejet.
Citizens.al ka mësuar se zyrtarisht grupi Kastrati aplikoi për leje më 6 maj 2021 dhe Bashkia Tiranë ia miratoi atë më 6 korrik 2021 (për Zonat A, B, pati rishikim leje më 10 nëntor 2022) dhe 20 qershor 2022 (për Zonat C, D).
Kjo mospërputhje kohore mes punimeve faktike dhe lejeve të dhëna mund të jetë një nga arsyet se përse grupi Kastrati nuk vendosi në asnjë moment tabelë njoftuese për punimet në kantier.
Ndërtimi i nisur me një leje zhvillimi të dhënë nga Këshilli Kombëtar i Territorit në nëntor 2019, parashikonte kompleks të integruar për hoteleri, rezidenca dhe zyra.
Por në qershor 2021 ndryshimet e projektit rritën ndjeshëm sipërfaqen e ndërtimit mbi tokë – nga 69,665 m² në 108,827 m² – dhe numrin e kateve nga maksimalisht 13 në 15.
Rritja e intensitetit të ndërtimit u shoqërua me një mungesë të theksuar transparence.
Kështu në lejen e rishikuar parashikohej edhe thellimi me nga një kat nën tokë, deri në 5 kate. Por, në periudhën e rishikimeve, grupi Kastrati kishte përparuar ndjeshëm me ndërtimin.
Pamjet me dron të periudhës shkurt-dhjetor 2021 tregojnë se në zonat B, C dhe D puna kishte ecur deri në plotësimin e strukturës karabina duke dalë deri në 14 kate mbi tokë.
Në të njëjtën periudhë kur ndërtimi po niste, apo po vijonte pa leje, grupi Kastrati shpallte publikisht marrëveshje me emra të mëdhenj ndërkombëtar të fushës së hotelerisë si Hyatt (dhjetor 2018) dhe Hilton (shkurt 2021), duke e reklamuar projektin si një zhvillim me rëndësi strategjike për imazhin urban dhe turistik të Tiranës.
Sipas raportimeve zyrtare, brenda vitit 2019, Hyatt thuhej se do të hapte filial të sajin në një nga gjashtë kullat që grupi Kastrati po projektonte anash MAK Albanias. Ngjashëm, parashikonte Hilton brenda vitit 2023.
Ndërhyrjet në terren sipas zonave të zhvillimit, imazh GIF/Citizens.al
Por, asnjë nga këto hotele nuk është hapur ende, edhe pse afatet e premtuara kanë kaluar me disa vite. Hyatt, së fundmi figuron me vit të përditësuar (2026 në uebfaqen e grupit Kastrati), ndërsa për Hilton nuk ka data zyrtare.
Citizens.al iu drejtua për koment zyrave qendrore të markave në fjalë, por nuk mori përgjigje.
Këto vonesa me shtrirje të gjata në kohë ngrenë pikëpyetje mbi seriozitetin e marrëveshjeve dhe i japin peshë dyshimit se ato mund të jenë përdorur më shumë për imazh, influencë apo dhe mbulesë legjitimuese për “tolerancën” nga autoritetet publike në ndërtimin pa leje.
Citizens.al iu drejtua edhe studiove të arkitekturës Archea dhe X-Plan për të mësuar nëse ato vijojnë të jenë të përfshira në projekt, por nuk mori përgjigje.
Taksat e infrastrukturës dhe mungesa e kontrollit
Një tjetër aspekt i errët në këtë çështje është pagesa e taksave për infrastrukturën.
Grupit Kastrati rezulton t’i jenë caktuar dy taksa me vlerë totale rreth 183 milionë lekë (rreth 1.6 milionë euro) – një prej 138 milionë lekësh në lejen e vitit 2021 dhe një tjetër prej 45 milionë lekësh në lejen e vitit 2022.
Bashkia Tiranë refuzoi të sqaronte kur është bërë pagesa e kësaj takse dhe sa ishte taksa për lejen e zonave C dhe D.
Ndërkohë, edhe pse bashkia miratoi lejet vetëm pas aplikimeve formale në 2021-22, Inspektorati i Mbrojtjes së Territorit (IMT) nuk ka ndërmarrë asnjë kontroll apo procedim për ndërtim pa leje në dy vite të punimeve.
Në një përgjigje për Citizens.al, IMT u justifikua se për projektin e MAK Albanias “nuk ka pasur asnjë ankesë apo kallëzim penal”, duke lënë të kuptohet se pa presion publik apo denoncime formale, ndërtimet mund të rrëshqasin jashtë kontrollit ligjor, sidomos kur pas tyre janë grupe të mëdha ekonomike.
Pas ish-Hotel Sheratonit, që dikur i përkiste grupit të investitorëve kuvajtianë, MAK Albania, në lojë u përfshinë një sërë kompanish të lidhura me Kastratin: Kastrati Residences, Kastrati Hotels & Tower dhe Kastrati Construction.
Kastrati Residences, dhjetor 2021/Pamje me dron Gogla.al
Në projektin fillestar u përfshi edhe Mak Elite Offices, një kompani nën grupin Balfin, që u pezullua dhe çregjistrua pak përpara se të sigurohej leja e dytë e zhvillimit.
Por, kullat e Kastratit te ish-Hotel Sheraton nuk janë vetëm një histori betoni dhe xhami. Ato janë shembull i qartë i investimeve që bëhen në mungesë llogaridhënie dhe kontrolli: ndërtohet pa leje dhe me ndryshime projekti ku shumëfishohet sipërfaqja, e gjitha “nën hundën” e institucioneve që nuk bëjnë detyrën.
Përkundër këtij rasti, qytetarë të thjeshtë apo dhe sipërmarrës të vegjël, kanë ndjerë vazhdimisht “dorën e hekurt” të autoriteteve në luftën e deklaruar ndaj “ndërtimeve informale”. Ky rast tregon se politika ka qenë dhe mbetet me dy standarde.
Citizens.al iu drejtua zyrtarisht grupit për koment mbi nisjen e ndërtimit përpara marrjes së lejeve përkatëse, mungesës së tabelës njoftuese si dhe çështjet e tjera të diskutueshme rreth projektit.
Pyetjet iu përcollën si në adresat zyrtare, ashtu edhe direkt te drejtuesja e PR dhe Marketingut. Por, deri në momentin e publikimit, nuk kemi pasur përgjigje.
TIRANË, 4 tetor/ATSH/ Në Parkun Kombëtar të Thethit po vijon ndërhyrja për prishjen e ndërtimeve të paligjshme dhe rikthimin e kësaj zone të mbrojtur në gjendjen e saj natyrore.
Kryeministri Edi Rama ndau sot pamje nga shembja me shpërthim të kontrolluar të një godine, ndërsa ritheksoi vendosmërinë e qeverisë kundër ndërtimeve pa leje.
“Kush ndërton më pa leje, investon vetëm për belanë e vet. Theth përsëri dhe kudo përsëri e përsëri, deri në fund, për Shqipërinë 2030 në Bashkimin Europian”, u shpreh Rama, krahas pamjeve.
Inspektorati Kombëtar për Mbrojtjen e Territorit (IKMT) rinisi sot prishjen e ndërtimeve pa leje në Parkun Kombëtar të Thethit, ku ishin evidentuar 13 objekte me konstruksione betonarme dhe dru.
Në fazën e parë të aksionit, në Theth u shembën rreth 100 objekte.
Lirimi i hapësirave publike nga ndërtimet e paligjshme vijon në të gjithë vendin.
Ky operacion i paraprin zbatimit të programit “Rilindja Urbane 2.0”, i cili synon të kthejë ligjshmërinë në territor duke sjellë zhvillim për komunitetet.
Ditën e djeshme kryeministri Rama publikoi edhe masat e reja ligjore që synojnë forcimin e kontrollit mbi territorin, mbrojtjen e hapësirave publike, zbatimin cilësor të lejeve të ndërtimit si edhe ndëshkimin e ndërtimtarisë së paligjshme.
TIRANË, 4 tetor /ATSH/ Inspektorati Kombëtar për Mbrojtjen e Territorit (IKMT), rinisi sot prishjen e ndërtimeve pa leje në Parkun Kombëtar të Thethit.
IKMT njoftoi se janë evidentuar 13 objekte me konstruksione betonarme dhe dru.
IKMT bëri të ditur se “pavarësisht aksionit të fundit në këtë zonë pak muaj më parë, konstatojmë se ka akoma individë që refuzojnë të pranojnë se lufta ndaj ndërtimeve të paligjshme është pa kthim!”.
“U bëjmë thirrje subjekteve dhe qytetarëve: Zbatimi i ligjshmërisë, mbrojtja e natyrës dhe e mjedisit duhet të jetë detyrim!”, njoftoi IKMT.
Aksioni po vijon duke synuar goditjen e ndërtimeve të paligjshme dhe rikthimin e kësaj zone të mbrojtur në gjendjen e saj natyrore.
Në fazën e parë të aksionit, në Theth u shembën rreth 100 objekte.
TIRANË, 3 tetor /ATSH/ Lirimi i hapësirave publike nga ndërtimet e paligjshme vijon në të gjithë vendin.
Ky operacion i paraprin zbatimit të programit “Rilindja Urbane 2.0”, i cili synon të kthejë ligjshmërinë në territor duke sjellë zhvillim për komunitetet.
“Vijojmë”, shkroi kryeministri Edi Rama në rrjetet sociale, teksa ndau sot pamje nga këto ndërhyrje.
E konceptuar si një ndërhyrje sistematike në terren dhe jo një aksion i përkohshëm, kjo nismë, e cila ka nisur nga zbatimi në muajin korrik, po vijon me prioritet në gjithë territorin e vendit.
Për goditjen e fenomenit të ndërtimeve pa leje, në Kodin e ri Penal parashikohen ndëshkime më të ashpra.
Ndërkohë, një tjetër mekanizëm, që do të jetë në funksion të subjekteve private, do të jetë Rregullorja e re Kombëtare, ku do të përcaktohen me ligj hapësirat që mund të shfrytëzojnë bizneset.
Po ashtu, në dispozicion të qytetarëve të cilët duan të denoncojnë rastet abuzive është vënë në dispozicion Portali “Hapësiraimepublike.gov.al”.
Deri më sot në këtë portal janë raportuar 12 750 raste, nga të cilat janë zgjidhur 9 373 raste, ndërsa 3 377 të tjera janë aktualisht në proces shqyrtimi.
TIRANË, 3 tetor/ATSH-Maela Marini/ Kryeministri Edi Rama i konsideroi sot të patolerueshme vendimet e disa gjyqtarëve në raport me ndërtimet pa leje.
I pyetur nga gazetarët nëse reagimet e tij në këto raste mund të quhen shkelje e pavarësisë së gjyqësorit, Rama tha se “i kemi dhënë gjyqësorit pavarësinë që nuk e ka pasur që nga viti 1912”.
“Unë jam marrë me ta dhe do të merrem prapë me ta për një çështje të interesit publik, jo për një çështje të lidhur me ndonjë individ. Është një çështje edhe personale, sepse ata të Unionit janë ata që shkojnë në Gjykatë Kushtetuese dhe kërkojnë rritje pagash në mënyrë të vazhdueshme. Prapë kanë kërkuar, sepse u bë rritje pagash dhe u tejkalua skema natyrale e çdo shteti, e piramidës së pagave vetëm për një arsye, për t’i dhënë fuqi gjykatësve dhe prokurorëve në funksion të reformës në drejtësi”, tha Rama.
Rama tha se kjo u bë që gjyqtarët e prokurorët të ndiheshin të mbështetur dhe të pavarur.
“Janë më të mirëpaguarit në rajon, por kjo nuk do të thotë që në historinë e këtij vendi ata do të vazhdojnë të jenë mbi Presidentin e Republikës”, tha Rama.
Duke sjellë në vëmendje një rast konkret, Rama tha se qytetarët kanë denoncuar pasi masa e sigurisë e marrë nga gjykatësi ishte për një godinë ku familjet kalonin përmes lokalit që të çonin fëmijët në shkollë.
“Çfarë t’i them unë atyre familjeve? T’i them se nuk e keni nga unë dhe qeveria këtë gjë, ndërkohë që qytetarët që ma dhanë mua votën për 83 mandate të vazhdojnë të rrinë me atë zaptuesin atje që gjykatësi pa asnjë lloj lidhje merr masë sigurie në orën 8 të mëngjesit për një ndërtim pa leje. Çfarë do të gjykojë gjykata për ndërtim pa leje?”, tha Rama.
Kryeministri sqaroi se arsyeja e vetme e reagimit të tij në këtë rast është se jo vetëm është për interesin publik, por është edhe personale në raport me qytetarët dhe dinjitetin e qeverisë.
“Qytetarët duhet ta dinë se aty ku nuk hiqet ndërtimi pa leje nuk është qeveria, nuk është bashkia, inspektorati, por është ky (gjykatësi) me emër dhe mbiemër. Nuk është normale, por është e vetmja mënyrë që unë kam gjetur. Çfarë të pres, Inspektoratin e Lartë të Drejtësisë që amniston në tavolinë Gjelin e Thethit, gjënë më flagrante?! Shpall mosfillimin e çështjes pa i hyrë fare akteve”, tha Rama.
Kryeministri siguroi se do të reagojë sa herë që shkelin popullin. “Jo politikanët, pasi kam rezerva për shumë gjëra që bëjnë këta dhe nuk flas. Dalin e shkelin popullin. I paguan ky popull ata si frëngu pulën. I kemi dhënë pavarësinë që nuk e kanë pasur që nga viti 1912. Nëse kjo që bëj unë nuk është normale, ajo tjetra që bëjnë ata është kriminale”, shtoi Rama.
Edi Rama, mes shumë paralajmërimeve që bëri sot në një konferencë për mediat, deklaroi se të gjithë ata punonjës që kanë për detyrë që të kontrollojë hapësirat publike dhe evidentimin e ndërtimeve pa leje, do të përballen me një seri masash. Ai tha se këta punonjës do të përballen me shkarkime apo dhe procedime. Rama […]
Login
