Prokuroria Speciale e Kosovës ka kërkuar masën e paraburgimit ndaj shtatë personave të arrestuar nën dyshimin për korrupsion.

Sipas kërkesës së Prokurorisë, “ekziston dyshimi i bazuar se të pandehurit M.D., J.M., F.I., B.D., Sh.T., N.K. dhe G.L., duke vepruar në bashkëkryerje, nga 20.02.2023 e në vazhdimësi deri më 18.12.2025, kanë ndërmarrë veprime me qëllim përfitimi të kundërligjshëm personal”.

“Sipas Prokurorisë, M.D. dyshohet se, në emër të F.I., në kundërshtim me ligjin, ka parashtruar propozim ankesë për ndryshim të vendimit përfundimtar për shpronësimin e pronës, ndonëse ishte kaluar afati ligjor për më shumë se tetë vjet. Përkundër kësaj, i pandehuri J.M., si dhe kundërpropozuesi Qeveria e Kosovës, e përfaqësuar nga Avokatura Shtetërore, nuk e kanë kundërshtuar këtë rrethanë, por janë kujdesur që ky rast, ashtu si disa raste të tjera, të përfundojë me marrëveshje gjyqësore”, thuhet në njoftim.

Sipas Prokurorisë, dëmi vetëm në rastin e fundit që i është shkaktuar shtetit është mbi 220 mijë euro, ndërsa dëmi në tërësi dyshohet se arrin vlerë milionëshe.

“Në këtë mënyrë, të pandehurit, në bashkëkryerje dhe në vazhdimësi, dyshohet se kanë kryer veprat penale: Keqpërdorimi i pozitës apo autoritetit zyrtar, Marrja e ryshfetit, Dhënia e ryshfetit, Ushtrimi i ndikimit, Deklarimi i rremë”, thuhet në njoftim.

Shtatë të dyshuarit u arrestuan një ditë më herët në një aksion të Policisë me Agjencinë Kosovare për Inteligjencë, me urdhër të Prokurorisë Speciale.

TIRANË, 18 dhjetor /ATSH/ Kryeministri Edi Rama u takua sot me ish-udhëheqësin e UÇK-së, Hashim Thaçi, i cili prej pesë vitesh po mbahet në paraburgimin e Gjykatës Speciale në Hagë.

Pas vizitës, Endrit Thaçi, djali i ish-kryeministrit, reagoi me falënderim dhe mirënjohje ndaj kryeministrit Rama, duke vlerësuar jo vetëm fjalët, por edhe veprimet e tij.

Thaçi i ka konsideruar ato një shembull të atdhedashurisë dhe përparimit.

“Faleminderit shumë Kryeministër Rama nga nana dhe unë. Fjalët por edhe veprat e juaja janë shndërruar në shembull të atdhedashurisë dhe përparimit. Ju na dëshmoni se bashkë jemi ma mirë”, shkruan ai.

Ndërkohë, në një reagim në rrjetet sociale, Rama bëri të ditur se e ka gjetur Thaçin të qetë, edhe pse me ndalime absurde të drejtash minimale.

Kryeministri e cilësoi mbajtjen e Thaçit dhe ish-liderëve të UÇK-së në paraburgim, “padrejtësi ulëritëse në zemër të Europës demokratike, me bekimin e me fondet e taksapaguesve të vendeve demokratike”.

“Nuk di ç’të them më për këtë padrejtësi ulëritëse në zemër të Europës demokratike, me bekimin e me fondet e taksapaguesve të vendeve demokratike, ndaj një populli europian që çliroi vetveten nga një regjim nacional-socialist, po edhe Europën nga një njollë e zezë apartejdi mu në kërthizën e saj për dekada me radhë”, u shpreh Rama.

Lidhur me vizitën ka reaguar dhe i dërguari presidencial për misione speciale të SHBA, Richard Grenell, i cili ka nënvizuar se “kryeministri shqiptar ka të drejtë dhe se Jack Smith është një turp”.

/e.i/r.e/a.f/

The post Takimi i Ramës me Thaçin, djali i ish-presidentit: Shembull i atdhedashurisë appeared first on Agjencia Telegrafike Shqiptare.

Gazetarja e Top Channel Anila Hoxha bën me dije se Shkalla e parë e gjykatës së posaçme ka shuar masën për inceneratorin e Fierit.

Çështja e inceneratorit është kthyer për rigjykim por ende nuk është regjistruar në Apel. Në këtë kuptim i ka përfunduar afati i mbajtjes në paraburgim përderisa nuk ka një vendim të formës së prerë. /Tch/

Gjykata Themelore në Pejë ka caktuar masën e paraburgimit prej një muaji ndaj të pandehurit E.M., pas kërkesës së Prokurorisë Themelore në Pejë.

Masa e paraburgimit është caktuar për shkak të dyshimit të bazuar se i njëjti ka kryer veprat penale të kultivimit të bimëve narkotike dhe blerjes, posedimit dhe shpërndarjes së paautorizuar të narkotikëve, sipas KPRK-së.

“Gjykata vlerëson se caktimi i paraburgimit është i domosdoshëm, pasi ekziston rreziku që i pandehuri, nëse lirohet, mund të ikë apo të arratiset, duke pasur parasysh faktin se E.M. nuk është shtetas i Republikës së Kosovës”, thuhet në njoftim.

Paraburgimi llogaritet nga data 02.12.2025 dhe zgjat deri më 01.01.2026.

Palët kanë të drejtë ankese në afat prej 48 orëve, përmes kësaj Gjykate, pranë Gjykatës së Apelit në Prishtinë. /Telegrafi/

Gjykata Themelore në Ferizaj – Departamenti për të Mitur ka shpallur aktgjykim dënues ndaj të pandehurit F.V., i cili u gjet fajtor për veprën penale “shmangia nga sigurimi i mjeteve për jetesë” sipas nenit 245 paragrafi 3, lidhur me paragrafin 1 dhe nenin 77 të Kodit Penal të Republikës së Kosovës.

Shqyrtimi gjyqësor është mbajtur nga gjyqtari Shabi Idrizi, i cili pas administrimit të provave personale dhe materiale, ka konstatuar se i pandehuri për periudhën nga 3 tetori 2024 e deri më tani, është shmangur nga përmbushja e obligimit ligjor për sigurimin e mjeteve të jetesës për dy fëmijët e tij të mitur.

"Sipas aktgjykimit, F.V. është dënuar me një vit burgim, dënim i cili do të ekzekutohet pas plotfuqishmërisë së këtij aktgjykimi", thuhet në vendimin e gjykatës.

Në këtë rast, gjykata ka theksuar se i pandehuri nuk ka respektuar Aktvendimin e Gjykatës Themelore të Ferizajt të datës 22 qershor 2023, me të cilin ishte obliguar të paguante 700 euro në muaj për mirëmbajtjen e fëmijëve të tij.

“I pandehuri i është shmangur detyrimeve duke mos paguar shumën e përcaktuar të alimentacionit për fëmijët e përbashkët”, përcaktohet në aktgjykim.

Gjykata rikujtoi se ky obligim duhet të përmbushet përmes ish-bashkëshortes së të pandehurit, A.G.V., e cila si kujdestare e fëmijëve është përfituesja ligjore e pagesave.

Në fund, gjykata njofton se palët kanë të drejtë ankese brenda 30 ditëve nga pranimi i aktgjykimit me shkrim. “Ankesa i drejtohet Gjykatës së Apelit në Prishtinë, përmes Gjykatës Themelore në Ferizaj”, sqarohet më tej në njoftimin zyrtar. /Telegrafi/

Gjykata Themelore në Prishtinë ka shpallur aktgjykim dënues ndaj të akuzuarve Atdhe Musliu dhe Labinot Bajrami, lidhur me akuzën për rastin e vrasjes së A.H., më 2023 në Fushë-Kosovë. Musliu u dënua me dënim unik prej 16 vjet e 8 muaj burgim, ndërkaq Bajrami me 11 vjet burgim.

Në këtë rast, Atdhe Musliu dhe Labinot Bajrami akuzoheshin se kanë privuar nga jeta A.H., me ç’rast ngarkoheshin se kanë kryer veprën penale “Vrasje” në bashkëkryerje, ndërsa Musliu akuzohej edhe për armëmbajtje pa leje, raporton “Betimi për Drejtësi“.

Aktgjykimi u shpall të hënën nga kryetari i trupit gjykues, Gent Beka dhe anëtarët Medie Bytyqi dhe Agim Kuçi, pas aprovimit të marrëveshjes për pranim fajësie të arritur mes Prokurorisë dhe dy të akuzuarve.

Gjykatësi Beka tha se dy të akuzuarit shpallen fajtorë sipas marrëveshjes së arritur për pranim fajësie për veprën penale “Vrasje” dhe i akuzuari Musliu edhe për armëmbajtje pa leje.

I akuzuari Musliu për veprën penale “Vrasje” u dënua me 16 vjet burgim, ndërkaq për armëmbajtje pa leje me 10 muaj burgim. Ndaj tij, u shpall dënim unik me 16 vjet e 8 muaj burgim.

Kurse, i akuzuari Bajrami për veprën penale “Vrasje” u dënua me 11 vjet burgim.

Dy të akuzuarve iu vazhdohet masa e paraburgimit, por jo më gjatë sesa dënimi i shqiptuar. Pala e dëmtuar udhëzohet në kontest të rregullt juridiko-civil.

Obligohet secili i akuzuar që në emër të paushallit gjyqësor të paguajnë nga 200 euro dhe 50 euro të tjera për Fondin për kompensimin e viktimave të krimit, në afat prej 15 ditësh nga plotfuqishmëria e aktgjykimt.

Meqenëse kemi dënim të rekomanduar, Gjykata u dha të drejtën e ankesës brenda afatit ligjor.

Të pranishëm në shpallje ishin dy të akuzuarit dhe mbrojtësit e tyre, avokatët Taulant Broqi dhe Fehmije Gashi-Bytyqi.

Paraprakisht, Gjykata në seancën dëgjimore për shqyrtimin e marrëveshjes për pranimin e fajësisë, pas marrjes së mendimit të palëve, mori aktvendim me të cilin aprovoi marrëveshjen për pranimin e fajësisë e lidhur në mes Prokurorisë dhe dy të akuzuarve Atdhe Musliu dhe Labinot Bajrami.

Ndryshe, më 5 shtator 2023 i akuzuari Musliu e kishte pranuar fajësinë, kurse i akuzuari Bajrami ishte deklaruar i pafajshëm. Andaj, ndaj të akuzuarit Musliu ishte veçuar procedura, i cili ishte dënuar me 22 vite burgim, më 2 tetor 2023. Ky aktgjykim ishte vërtetuar edhe nga Gjykata e Apelit përmes aktgjykimit të 6 shkurtit 2024.

Ndërsa, Gjykata Supreme përmes aktgjykimit të 27 majit 2024 e ka anuluar aktgjykimin e Gjykatës Themelore në Prishtinë dhe atë të Gjykatës së Apelit për të akuzuarin Atdhe Musliu, duke e kthyer çështjen në rigjykim.

Në seancën e 20 qershorit 2024, ishte propozuar të bëhet bashkimi i procedurës penale ndaj dy të akuzuarve.

Andaj, më pas, kryetari i trupit gjykues, gjyqtari Gent Beka kishte njoftuar se në këtë çështje penale është bërë bashkimi i procedurës penale ndaj të pandehurit Atdhe Musliu, për të cilin ka qenë duke u vazhduar procedurë e veçantë. Kështu, ndaj dy të pandehurve Labinot Bajrami dhe Atdhe Musliu procedura vazhdon si një.

Sipas aktakuzës së ngritur më 9 gusht 2023, të akuzuarit Atdhe Musliu dhe Labinot Bajrami më 12 shkurt 2023, në rrugën “Pjetër Budi” në Fushë-Kosovë, për shkak të mosmarrëveshjeve të atëçastshme, fillimisht i akuzuari Bajrami e ka sulmuar dhe goditur me grushte e shqelma dhe me sende të forta të dëmtuarin A.H., i cili tenton të ikë t’i shmanget sulmit, por të akuzuarit Atdhe dhe Labinot e ndjekin dhe vazhdojnë përsëri ta godasin me grushte e shqelma dhe me sende të forta, e më pas me qëllim të privimit nga jeta, i akuzuari Musliu e ka goditur me thikë në pjesën e kraharorit – anën e majtë, duke e privuar nga jeta të dëmtuarin- tani të ndjerin A.H.

Me këtë, akuzoheshin se në bashkëkryerje të akuzuarit Musliu dhe Bajrami kanë kryer veprën penale “Vrasje” nga neni 172 lidhur me nenin 31 të KPRK-së.

Sipas dispozitivit të dytë të së njëjtës aktakuzë, i akuzuari Musliu me datë, kohë dhe vend të njëjtë si në dispozitivin e parë, është gjetur se pa autorizim e në kundërshtim me ligjin e zbatueshëm lidhur me armët, ka mbajtur në pronësi armën – thikën, ku me vërtetimin mbi konfiskimin e përkohshëm të gjësendeve i është konfiskuar.

Me këtë, Musliu akuzohej se ka kryer veprën penale “Mbajtje në pronësi kontroll ose posedim të paautorizuar të armëve” nga neni 366, par. 1 të KPRK-së. /BetimipërDrejtësi/

Një shtetas shqiptar i cili u deportua nga Mbretëria e Bashkuar dy herë brenda tre vjetësh është burgosur pasi u kthye ilegalisht për herë të tretë, raporton BBC. Bëhet fjalë për shtetasin Emirjon Gjuta, 34 vjeç, i cili u paraqit në Gjykatën e Kurorës në Leeds ku pranoi se kishte shkelur urdhrin e tij të […]

The post Futet për herë të tretë ilegalisht në Angli, kapet dhe burgoset i riu shqiptar (EMRI) appeared first on BoldNews.al.

BRAZILIA, 22 nntor /ATSH-AFP/ – Ish-presidenti brazilian, Jair Bolsonaro, i dënuar me 27 vjet burg për përpjekje për grusht shteti, u vu sot në paraburgim, sipas avokatit të tij dhe një burimi pranë çështjes.

“Ai është burgosur, por nuk e di pse”, tha Celso Vilardi, një nga avokatët e tij.

Policia federale tha në një deklaratë se ata kishin ekzekutuar një urdhër paraburgimi në përputhje me një vendim të Gjykatës Supreme.

Një burim pranë çështjes tha se i ndaluari ishte Jair Bolsonaro.

Bolsonaro u dënua me më shumë se 27 vjet burg në shtator për një tentativë grushti shteti pas humbjes së tij në zgjedhjet e vitit 2022.

Megjithatë, vendimi nuk është ende përfundimtar.

Vëzhguesit kishin supozuar se ai mund të fillonte të vuante dënimin javën tjetër.

Të premten, djali i Bolsonaros, senatori Flávio Bolsonaro, bëri thirrje që shtëpia e babait të tij të ruhej gjatë natës./ /os/

The post BRAZIL – Ish-presidenti Jair Bolsonaro vendoset në paraburgim appeared first on Agjencia Telegrafike Shqiptare.

Gjykata Themelore e Mitrovicës ka caktuar masën e paraburgimit prej një muaji ndaj pjesëtarit të Policisë së Serbisë, i cili u arrestua në pikën kufitare të Jarinjës, nën dyshimin se transportoi fishekë dhe para të gatshme.

Nga gjykata është konfirmuar se masa ndaj të pandehurit N.U. është caktuar për shkak të dyshimit të bazuar se ka kryer veprën penale “Importi, eksporti, furnizimi, transportimi, prodhimi, këmbimi i armëve apo materialeve plasëse”, sipas nenit 364, paragrafi 1 i Kodit Penal të Republikës së Kosovës.

Ngjarja ndodhi të dielën, më 2 nëntor 2025, kur Policia e Kosovës njoftoi se në vendkalimin kufitar në Jarinjë kishte arrestuar të dyshuarin, pjesëtar të Policisë së Serbisë.

Gjatë kontrollit në automjetin me targa të Beogradit që ai po drejtonte, policia ka gjetur dhe konfiskuar 51 fishekë, 9 mijë e 900 euro dhe 26 mijë dinarë serbë.

Një pjesëtar i policisë së Serbisë është arrestuar të shtunën në Jarinjë për dyshimin se ka kryer veprën penale të “importit, eksportit, furnizimit, transportimit, prodhimit, këmbimit, ndërmjetësimit ose shitjes së paautorizuar të armëve apo materieve plasëse”.

Lidhur me këtë rast, prokurori i rastit ka paraqitur kërkesë për caktimin e masës së paraburgimit.

Kështu ka bërë të ditur për Telegrafin, zëdhënësi i Prokurorisë Themelore në Mitrovicë, Valon Preteni, i cili ka theksuar se seanca lidhur me këtë rast është caktuar të mbahet sot.

Pjesëtari i policisë së Serbisë arrestohet në Jarinjë, kapet me fishekë dhe dinarë

“Një kërkesë për një (1) person është paraqitur për veprën penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse“”, ka thënë Preteni.

Ai ka shtuar se Prokuroria po vijon hetimet lidhur me këtë rast.

Nga i dyshuari janë sekuestruar edhe një sërë dokumentesh zyrtare dhe pajisjesh policore, përfshirë: kartelën e identifikimit dhe distinktivin e policisë së Serbisë, kartelën e sindikatës së policisë serbe, letërnjoftimin e Serbisë dhe të Kosovës, pasaportën serbe, një palë spaleta uniformash, dorëza dhe një USB. /Telegrafi/

Sebi Alla Tetë muaj pas qëndrimit në paraburgim, Erion Veliaj, kryebashkiak i Tiranës, i shkarkuar me vendim të Këshillit të Ministrave, fitoi përkohësisht lirinë e kufizuar, teksa qëndroi në Gjykatën Kushtetuese për shtatë orë e shtatë minuta, nën masa sigurie.

Ai u paraqit si palë për të kundërshtuar shkarkimin e tij nga qeveria dhe dekretin presidencial që shpalli zgjedhjet në Tiranë. Pas dëgjimit të tre palëve në proces, Gjykata Kushtetuese u tërhoq për të marrë vendim, duke saktësuar se data dhe shpallja e vendimit përfundimtar do u njoftohet palëve në vijim, sipas parashikimeve ligjore.

Veliaj u arrestua me kërkesë së Prokurorisë Speciale më 10 shkurt për katër akuza; korrupsion i zyrtarëve të lartë publik, ose të zgjedhurve vendorë, shpërdorim detyre, fshehje të të ardhurave dhe pastrim parash, në 13 episode.

Pasi humbi çdo betejë ligjore për ndryshimin e masës së sigurisë, Veliaj u shkarkua nga detyra më 25 shtator, pas propozimit të Këshillit Bashkiak të Tiranës dhe miratimit nga Këshilli i Ministrave, me motivacionin se nuk është paraqitur në detyrë për më shumë se tre muaj. 

I zhgënjyer…!

Në fjalimin e mbajtur, Veliaj përmendi shpesh fjalët; falje, Zot, fyerje, ligj, Kushtetutë dhe zhgënjim… “Nuk kishin se si të më fyenin më rëndë sesa kaq. Ka qenë fyerja më e rëndë e jetës time publike dhe këtë e thotë dikush që ka dëgjuar fyerje dhe legjenda urbane pa fund. Por kjo është fyerja më e rëndë sepse erdhi nga bashkëpunëtorët e mi, nga njerëz që më njohin më mirë se çdokush tjetër. Dhe që nuk denjuan as të më ftonin, as të më njoftonin dhe as të më dëgjonin. Zoti i faltë. Lutem çdo natë për ta dhe them Zot fali se nuk dinë ç’kanë bërë me atë vendim”, tha Veliaj, i cili këtë herë i referohej “të tijve” (anëtarëve të Këshillit Bashkiak socialistë). Në mënyrë indirekte, Veliaj preku edhe VKM-në e shkarkimit, duke u shprehur se brenda tetë orësh u firmosën tetë akte, nga thirrja e mbledhjes së këshillit bashkiak, propozimi për shkarkim, dërgimi në çështjes në kryeministri, vendimin e Këshillit të Ministrave dhe më pas në Presidencë, e cila u shpreh me dekret.

Megjithatë, në asnjë fjalë përgjatë shtatë orëve e shtatë minutave, Veliaj nuk e përmendi asnjëherë kreun e qeverisë, duke iu referuar shpesh vetëm VKM-së për shkarkimin e tij.

Seanca e gjatë

I shoqëruar nga një numër i madh i punonjësve të policisë, Veliaj zbriti me pranga në duar nga “furgoni burgut” për të kaluar shpejt në shkallët para Gjykatës Kushtetuese dhe më pas në sallën ku po shqyrtohet çështja e tij.

Në praninë e dy avokatëve, Veliaj preferoi se thuajse pas çdo pyetje edhe me karakter mirëfilltas ligjor, të përgjigjej vetë.

Përballë Veliaj kishte dy palë kundërshtare në proces: përfaqësuesin e kryeministrisë dhe atë të presidencës, përkatësisht Irma Qosja dhe Ilir Rusmali.

Kryebashkiaku Veliaj ankimoi si vendimin e Këshillit të Ministrave për shkarkimin e tij, që mban firmën e kryeministrit Rama, ashtu edhe dekretin e Presidentit Bajram Begaj, i cili shpalli zgjedhjet e parakohshme në Tiranë pa u shqyrtuar më parë çështja nga Gjykata Kushtetuese.

Kushtetuesja me një vendim të ndërmjetëm, para shqyrtimit në themel, vendosi të pezullojë dekretin e presidentit.

Pretendimet e qeverisë

Përfaqësuesja e Këshillit të Ministrave, Irma Qosja parashtroi relatimin e saj ligjor mbi argumentin pse Këshilli i Ministrave ka firmosur shkarkimin e Erion Veliajt si kryebashkiak të Tiranës. “Ankimuesi pretendon se shkarkimi i tij nga detyra ka ndodhur për shkak të shkeljes së rëndë të Kushtetutës ose të ligjeve, siç parashikon neni 115 i Kushtetutës, e cila është e vetmja mënyrë që ai të legjitimohet përpara kësaj gjykate. Ndërkohë që shkarkimi i tij nuk është kryer për shkak të kësaj dispozite. Ai nuk është shkarkuar për rrethanë kushtetuese, por ligjore, për shkak se nuk është paraqitur në detyrën e parashikuar nga neni 62 për vetëqeverisjen vendore”, tha përfaqësuesja e qeverisë. Për këtë pretendim Veliaj solli si shembull rastin e kolegut të Tropojës, duke pretenduar se ndaj tij janë ndjekur standarde të tjera.

Pretendimet e presidencës

“Por ju që i lejuat vetes të drejtën për të shqyrtuar një akt administrativ keni gjetur edhe mekanizmat mbrojtës nga kjo rrëshqitje. Fakt është që ju në fund të ditës do të jenë të detyruar të merrni një vendim në raport me dekretin.

Do të përballemi me faktin që ju po merrni në shqyrtim dhe po vendosni fatin e nja akti administrativ, kur Kushtetuta nuk ua lejon këtë”, tha këshilltari juridik i Presidentit, Ilir Rusmali. Nga ana e tij, Veliaj u shpreh se nuk po ndiqet i njëjti standard dhe ndihet jo i barabartë me të tjerët, duke sjellë si analogji kryetarin e bashkisë së Tropojës. “Doja t’ju përmendja një rast në Shqipëri, kryetari i bashkisë së Tropojës ka qenë 11 muaj në arrest shtëpie. Në një masë të përkohshëm. Tani lind pyetja, a janë të gjithë të barabartë? Pse është ndryshe një qytetar i Tiranës me një qytetar të Tropojës. Pse toleranca në Tropojë është 11 muaj, kurse në Tiranë është 2 javë, tre muaj dhe 7 muaj. Këtu kemi një disbalancë totale”, tha Veliaj.

Betejë “për Ogertën por edhe Florin…”

Në qëndrimin e gjatë para anëtarëve të Gjykatës Kushtetuese ndër të tjera Veliaj tha se beteja që ai po bën është për të gjithë pasardhësit e tij teksa shtoi: “Po sikur nesër t’ja bëjnë Ogertës, Florit, apo Arlindit, një masë sigurie (shënim: i referohet kandidatëve që kanë shpallur kandidaturat për kryetarë të Bashkisë Tiranë). Pra, kaosi që kemi tani nuk është asgjë me kaosin nëse kjo do kthehet një standard me kryetarët e bashkive. Kështu që kjo është një betejë edhe për ata që do vijnë pas meje kurdo qoftë ajo ditë”, tha Veliaj.

Në nisje të javës së ardhshme pritet që Gjykata Kushtetuese të shprehet me vendim. Nëse ajo e konsideron të drejtë shkarkimin, atëherë kreu i shtetit ka afat 48 orë kohë që të shprehet me një dekret për shpalljen e zgjedhjeve të parakohshme në Tiranë.

Nëse pranohet kërkesa e Veliajt i cili kërkon shpalljen antikushtetuese të shkarkimit të tij, ai do të qëndrojë de jure në detyrë, edhe pse ndodhet në masën e sigurisë “arrest me burg pa afat”.

The post Veliaj 8 muaj paraburgim dhe 7 orë kundërshtim ndaj qeverisë dhe presidencës appeared first on Faktoje.al.

Erion Veliaj niset drejt paraburgimit në Durrës, pas 7 orësh seancë në Gjykatën Kushtetuese ku kundërshton shkarkimin e tij nga detyra.

Në momentin kur ka dalë nga Gjykata Kushtetuese, Velija është pritur nga mbështetësit.
“Forca kryetar, forca!”, dëgjohen të thonë ata.

Ndërkohë ish- kryebashkiaku është përgjigjur: Ju dua shumë!…

The post “Forca kryetar, forca!”/ Veliaj niset drejt paraburgimit: Ju dua shumë!… appeared first on Albeu.com.

Prokuroria Themelore në Ferizaj bën të ditur se ka kërkuar nga Gjykata Themelore në Ferizaj, caktimin e masës së paraburgimit ndaj të pandehurit F.M për shkak të dyshimit të veprës penale “Dhunimi”.

Sipas kërkesës së parashtruar nga Prokuroria, ekziston dyshimi i bazuar se nga muaji shtator e deri më datën 27 tetor 2025, rreth orës 02:00, në mesnatë, në Ferizaj, saktësisht në banesën e të pandehurit, i njëjti F.M., në vazhdimësi e ka dhunuar- keqpërdorur seksualisht të dëmtuarën - të miturën e moshës 14 vjeçe.

I pandehuri F.M., që nga data 31 Tetor 2025, me vendim të Prokurorit të Shtetit gjendet nën masën e ndalimit 48-orësh për veprën penale të lartëcekur.

Gjykata Themelore në Prishtinë ka aprovuar kërkesën e Prokurorisë Speciale të Republikës së Kosovës (PSRK), duke i caktuar masën e paraburgimit në kohëzgjatje prej 30 ditësh Beqë Shalës, prokuror tashmë i pezulluar në Departamentin e Përgjithshëm të Prokurorisë Themelore në Prizren, nën dyshimin për veprën penale “Marrje ryshfeti”.

Lajmin e ka konfirmuar Mirlinda Gashi, zëdhënëse e Gjykatës Themelore në Prishtinë.

Sipas Gjykatës, masa e paraburgimit iu caktua Shalës pas mbajtjes së seancës dëgjimore.

Në vendimin e saj, gjykata theksoi se paraburgimi është masë adekuate, pasi nëse i pandehuri lihet në liri, ai mund të ndikojë në prova dhe dëshmitarë.

Gjykata vlerësoi se çdo masë tjetër do të ishte e pamjaftueshme për zbatimin e suksesshëm të procedurës penale dhe parandalimin e përsëritjes së veprave penale.

Palët e pakënaqura kanë të drejtë ankese në Gjykatën e Apelit përmes Gjykatës Themelore në Prishtinë.

Ndërkohë, prokurori special Valdet Gashi tha se kërkesën për caktimin e paraburgimit e kanë bazuar në prova të siguruara gjatë fazës së hetimeve.

Ish-presidenti francez Nicolas Sarkozy ka qenë shënjestër e kërcënimeve me vdekje në burg - më pak se një ditë pasi filloi një dënim pesëvjeçar për konspiracion kriminal.

Një video që qarkullon në internet, e cila duket se është filmuar nga një i burgosur, tregon kërcënime verbale që bëhen me mbërritjen e Sarkozy-t në burgun La Sante të Parisit.

Sipas Reuters, zyra e prokurorit të Parisit u njoftua për videon dje, transmeton Telegrafi.

Tre të burgosur u morën në pyetje si pjesë e hetimit dhe dy telefona celularë u sekuestruan gjatë një kontrolli në burg.

Sarkozy, i cili udhëhoqi Francën nga viti 2007 deri në vitin 2012, u burgos të martën pasi u dënua për konspiracion për të mbledhur fonde për fushatën nga Libia.

Lajmi për kërcënimet doli pasi u raportua se ish-presidentit do t'i caktoheshin dy oficerë policie të përhershëm si truproja, të vendosur në qelitë aty pranë gjatë gjithë kohës së tij në burg, për t'u siguruar që ai të mos lëndohej.

Masa shkaktoi ankesa nga sindikatat. Hugo Vitry, një roje në La Sante dhe kreu i degës lokale të sindikatës Force Ouvriere, tha se ata nuk ishin informuar për detajet e sigurisë së Sarkozy-t.

"Ne kemi kontaktuar administratën e burgut dhe Ministrinë e Drejtësisë për të kërkuar shpjegime", shtoi ai.

Megjithatë, ministri i Brendshëm francez Laurent Nunez i tha radios Europe 1 se Sarkozy kishte të drejtë për mbrojtje "për shkak të statusit të tij".

"Padyshim që ekziston një kërcënim kundër tij dhe kjo mbrojtje po mbahet ndërsa ai është në paraburgim", shtoi ai.

Avokatët e Sarkozy-t kanë paraqitur një kërkesë për lirim të parakohshëm, në pritje të gjyqit të tij të apelit, dhe thanë se prisnin që kjo kërkesë të shqyrtohej brenda rreth një muaji.

Ata thanë se shpresonin ta lironin atë me lirim të parakohshëm deri në Krishtlindje.

Sarkozy ka mohuar vazhdimisht shkeljet dhe e ka quajtur çështjen të motivuar politikisht. /Telegrafi/

Gjykata Themelore e Ferizajt ka caktuar një muaj paraburgim për një të mitur të akuzuar për kontrabandim të migrantëve.

Sipas njoftimit të gjykatës, më 21 tetor, i mituri kishte organizuar kalimin e jashtëligjshëm të pesë personave me shtetësi kineze përmes pikëkalimit Kosovë–Maqedoni e Veriut.

Komunikata e gjykatës sqaron se i mituri kishte takuar fillimisht migrantët në Serbi dhe kishte arritur marrëveshje për të marrë 20 euro për secilin person. Pas kësaj, ai ishte përgjegjës për transportin e tyre drejt Kosovës.

Më pas, i mituri siguroi një automjet, i cili u drejtua nga një person ende i panjohur. Në automjet u vendosën të gjithë migrantët dhe u drejtuan drejt Maqedonisë së Veriut. Njësiti patrollues kufitar i vuri re dhe i ndaloi në vijën kufitare Kosovë–Maqedoni e Veriut.

Të gjithë u shoqëruan në stacionin policor kufitar në Rajonin Lindje Kaçanik.

Rasti është duke u hetuar më tej nga autoritetet kompetente.

Një burrë që qëlloi dhe plagosi rëndë kryeministrin sllovak Robert Fico në një sulm vitin e kaluar, është dënuar me 21 vjet burg pasi u shpall fajtor për terrorizëm.

Juraj Cintula, një pensionist 72-vjeçar, qëlloi pesë herë kryeministrin në maj 2024, kur ai ishte në një vizitë në Handlova, rreth 180 km nga kryeqyteti Bratislava, transmeton Telegrafi.

Personi i armatosur qëlloi Ficon nga një distancë shumë e afërt, pikërisht kur ai po i shtrinte dorën - duke menduar se ishte një mbështetës.

Në gjykatë, Cintula mohoi se u përpoq ta vriste kryeministrin, duke thënë se qëllimisht i kishte drejtuar larg organeve të tij jetësore.

Pamjet nga vendi i ngjarjes tregonin një burrë që ngrinte një armë dhe qëllonte drejt kryeministrit përpara se të ‘nutralizohej’ nga truprojat.

Anëtarë të tjerë të ekipit të sigurisë së Ficos e futën kryeministrin me nxitim në makinën e tij. Ai u plagos rëndë në bark dhe u transportua me helikopter në një spital aty pranë për ndërhyrje kirurgjikale, me gjendjen e tij të përshkruar si kërcënuese për jetën.

Sulmuesi, një poet amator në të 70-at, pretendoi se donte vetëm ta plagoste Ficon për të ndaluar politikat që ai besonte se po dëmtonin Sllovakinë.

Kryeministri është përpjekur të fajësojë opozitën për sulmin dhe për nxitjen e urrejtjes, megjithëse ai vetë është i njohur për retorikën thellësisht përçarëse.

Cintula u dënua me akuza për terrorizëm, me gjyqtarin Igor Kralik që deklaroi: "Gjykata e konsideron të provuar se i pandehuri nuk sulmoi një qytetar, por konkretisht kryeministrin".

Avokati i personit të armatosur ishte përpjekur ta ulte akuzën në sulm ndaj një zyrtari publik, i cili ka një dënim më të ulët, por kjo u refuzua nga gjyqtari. /Telegrafi/

Fatmir Sheholli, i arrestuar nën dyshimet për spiunazh, është rikthyer në Qendrën e Paraburgimit në Gjilan pas trajtimit mjekësor në spitalin e këtij qyteti.

Lajmin e ka konfirmuar për Telegrafin zëdhënësi i Shërbimit Korrektues të Kosovës, Florent Gashi.

“Pas disa ekzaminimeve dhe trajtimeve në spitalin e Gjilanit, ai është kthyer në Qendrën e Paraburgimit”, deklaroi Gashi.

Sheholli kishte kërkuar ndihmë mjekësore më 11 tetor dhe u dërgua për hospitalizim.

Aktualisht ndaj tij është në fuqi masa e paraburgimit prej një muaji, e caktuar nga Gjykata Themelore në Prishtinë.

Ndërkohë, Gjykata Themelore në Prishtinë ka caktuar ndaj tij masën e paraburgimit prej 30 ditësh, me kërkesë të Prokurorisë Speciale.

Sipas dosjes së Prokurorisë, Sheholli dyshohet se ka qenë i rekrutuar nga Shërbimi Inteligjent i Serbisë (BIA) dhe ka vepruar nën urdhrat dhe udhëzimet e zyrtarit të BIA-së, Bojan Dimiq.

Në aktakuzë thuhet se ai ka mbledhur informacione mbi pronat e uzurpuara të serbëve në Kosovë dhe i ka përcjellë ato nëpërmjet komunikimeve telefonike te zyrtarët serbë të inteligjencës.

Po ashtu, më 26 shtator 2025, në Mitrovicë të Veriut, Sheholli dyshohet se ka marrë materiale audio dhe transkripte të bisedave të zyrtarëve të Ministrisë për Komunitete dhe Kthim, të cilat dyshohet se janë komprometuese.

Prokuroria thekson se, përmes këtyre veprimeve, Sheholli me vetëdije dhe qëllimisht ka cenuar sigurinë dhe rendin juridik të Republikës së Kosovës, si dhe integritetin e zyrtarëve dhe qytetarëve të saj, duke ndihmuar një shërbim të huaj inteligjent në dëm të interesave shtetërore. /Telegrafi/

Gjykata Themelore e Ferizajt, Departamenti për Krime të Rënda, ka shpallur aktgjykimin dënues në rastin e njohur si “Gropa”, duke dënuar 11 të akuzuar me gjithsej 46 vjet burgim dhe 39 mijë euro gjobë për veprën penale të prodhimit dhe përpunimit të paautorizuar të narkotikëve.

Trupi gjykues, nën drejtimin e Ilir Bytyqit, pas pranimit të marrëveshjes për pranim të fajësisë ndërmjet të akuzuarve dhe Prokurorisë Themelore në Prishtinë, ka shpallur dënimet që variojnë nga 3 deri në 5 vjet e gjysmë burg dhe nga 2 mijë deri në 5 mijë euro gjobë për secilin prej tyre.

Sipas aktgjykimit, të akuzuarit S.Sh. dhe A.D. janë dënuar me nga 5 vjet e 6 muaj burg dhe 5 mijë euro gjobë, ndërsa të tjerët me dënime më të ulëta sipas rolit në organizimin e laboratorit të heroinës.

Hetimet zbuluan se grupi, gjatë prillit e majit të vitit 2022, kishte organizuar transportimin e lëndës bazë për prodhimin e heroinës nga Irani në Kosovë, përmes Turqisë, Greqisë dhe Maqedonisë së Veriut. Laboratori ishte ngritur në një shtëpi në fshatin F. të Shtërpcës, ku prodhohej heroina që më pas transportohej në Ferizaj.

Në bastisjet e policisë më 23 maj 2022, u gjetën 67.5 kilogramë heroinë e përpunuar dhe 25.5 kilogramë lëndë e papërpunuar, ndërsa më pas u zbuluan edhe 25.5 kilogramë morfinë dhe kodeinë në një shtëpi tjetër në fshatin D.

Gjykata i shpalli fajtorë të gjithë të akuzuarit për përfshirje në prodhimin dhe përpunimin e paautorizuar të narkotikëve, si dhe për ndihmë në këtë veprimtari kriminale.

Masat e paraburgimit ndaj disa prej të akuzuarve janë vazhduar deri në hyrjen në fuqi të aktgjykimit.

Dhomat e Specializuara të Kosovës (DhSK) në Hagë, kanë marrë vendim me të cilin ia kanë vazhduar masën e paraburgimit ish-presidentit Hashim Thaçi, në rastin ku bashkë me Kadri Veselin, Rexhep Selimin dhe Jakup Krasniqin, akuzohet për krime lufte dhe krime kundër njerëzimit.

Vendimi është marrë më 10 tetor 2025 nga kryetari i trupit gjykues, Charles Smith III, raporton “Betimi për Drejtësi“.

Trupi gjykues ka konstatuar se ka mungesë të informacioneve që do të justifikonin konstatimet se Thaçi mund t’i arratiset drejtësisë në rast që lirohet. Por, trupi gjykues është bindur se i akuzuari mund të pengojë procedurat e DhSK-së dhe të kryejë krime ndaj atyre që perceptohen kundërshtarë të UÇK-së, duke përfshirë edhe dëshmitarët që kanë dhënë ose mund të japin dëshmi edhe në procedura paralele.

Po ashtu, paneli ka konstatuar se asnjë prej kushteve të tjera alternative nuk mund t’i zbusë mjaftueshëm këto rreziqe.

Si rrjedhojë, u konstatua se paraburgimi ndaj Thaçit edhe për dy muaj të tjerë është i nevojshëm dhe i arsyeshëm.

Mbrojtja ka filluar me paraqitjen e provave të saj më 15 shtator 2025, ku për tri ditë me radhë u dëgjua ish-ndihmësi i sekretarit amerikan të shtetit, James Rubin.

Ndërsa, pas tij u thirr ish-këshilltari ligjor i delegacionit shqiptar në Rambuje, Paul Williams. Kurse, ish-këshilltari politik i komandantit të lartë të NATO-s, Wesley Clark, John Stewart Duncan filloi dëshminë më 22 shtator dhe e mbaroi më 23 shtator 2025.

Kurse, më 30 shtator nisi dëshminë James Peter Covey, ish-zëvendës i përfaqësuesit të OKB-së në Kosovë, Bernard Kouchner. Covey e përfundoi dëshminë më 2 tetor.

Më 14 shtator 2025, në Hagë u mbajt një protestë masive në përkrahje të ish-krerëve të UÇK-së, ku morën pjesë qytetarë nga të gjitha trojet shqiptare e mërgimtarë të shumtë.

DhSK-ja ka bërë të ditur se 14 nëntori 2025 është caktuar si datë për përfundimin e çështjes së mbrojtjes në këtë rast, kurse parashtresat përfundimtare të procesit dhe deklaratat mbi ndikimin e krimeve të pretenduara tek viktimave që marrin pjesë në procedurë planifikohen të paraqiten deri më 22 dhjetor 2025.

Ndërkohë, më 15 prill 2025, Prokuroria ka njoftuar se ka përfunduar paraqitjen e provave në këtë rast.

Ndërsa, mbrojtja kishte bërë kërkesë sipas Rregullës 130, e cila parasheh kërkesën për rrëzimin e ndonjë akuze apo akuzave në tërësi në aktakuzë. Vendimi mbi këtë kërkesë ishte marrë më 16 korrik 2025. Sipas kryetarit të trupit gjykues, Charles Smith III, ajo që kishte kërkuar mbrojtja ishte mosmbështetja në pretendime për krime lufte që kanë të bëjnë me incidente që kanë ndodhur para majit të 1998-ës dhe pas 20 qershorit të 1999-ës.

“Trupi gjykues vëren se incidentet dhe ngjarjet që kanë ndodhur në kohën që kundërshtohen prej mbrojtjes nuk janë akuza brenda kuptimit të Rregullës 130”, tha kryetari i trupit gjykues, Charles Smith III.

Si rrjedhojë, ishte rrëzuar ky mocion me arsyetimin se trupi gjykues s’e ka autoritetin për të rrëzuar materiale që përbëjnë akuzat që kanë të bëjnë me shkaqe kohore. Ndërsa, po të njëjtën ditë, mbrojtja e viktimave kishte paraqitur provat e veta duke thirrur dy dëshmitare eksperte për të dëshmuar njëkohësisht.

Përveç që dëshmuan më 16 korrik 2025, dëshmia e këtyre dy dëshmitareve vazhdoi edhe më 17 korrik 2025, duke përfunduar kështu edhe marrja e dëshmive të dëshmitarëve të mbrojtjes së viktimave.

Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi/