Faqe anonime në Facebook dhe Instagram të quajtura “Zall Gjoçaj” dhe të hapura së fundmi, kanë nisur publikimin e një serie me materiale që synojnë të diskreditojnë, Dhimitër Kolecin dhe Jorgj Locajn, aktivistë nga Zall-Gjoçaj dhe fshati Lufaj të njohur për kundërshtimin e projekteve të hidrocentraleve të kompanisë “Seka Hydropower”.

Faqet u aktivizuan më 2 dhe 5 shkurt 2026 dhe deri më tani kanë botuar të paktën tre video të montuara, të cilat marrin pjesë nga intervistat dhe postimet e Kolecit dhe Locajt dhe shoqërohen me mbishkrime dhe “kundër-argumente”, të cilat synojnë t’i portretizojnë aktivistët si “mashtrues” dhe “gjobaxhinjë”.

Pavarësisht se faqja në Facebook (link) ka vetëm katër ndjekës dhe ajo në Instagram asnjë (link), videot kanë arritur shikueshmëri nga 9 mijë deri në 30 mijë shikime, çka lë të nënkuptohet se personat pas këtij linçimi mund ta kenë sponsorizuar përmbajtjen (të paktën videot në Facebook), për ta shpërndarë më shumë në rrjet.

Në komente vërehen reagime skeptike nga qytetarë që kërkojnë shpjegime për motivet e publikimeve.

Citizens.al vuri re se faqja “Zall-Gjoçaj” ndërvepronte ngushtë me dy faqe të tjera anonime: “Bukuritë Zall-Gjoçaj” (link) dhe “Alisa Interact” (link).

E para shpërndante të njëjtat video, ndërsa e dyta nuk kishte postime, por dukej se shërbente si profil mbështetës në komentet dhe përgjigjet ndaj qytetarëve.

Këto faqe nuk kanë transparencë mbi administratorët apo qëllimin e tyre teksa struktura e ndërveprimit sugjeron një veprimtari të koordinuar për të linçuar aktivistët në fjalë.

“Presion për të na heshtur”

I pyetur nga Citizens.al, Dhimitër Koleci hodhi dyshimin se pas sulmeve mund të qëndrojë kompania “Seka Hydropower”, ose persona të lidhur me të. Kompania në fjalë ka ndërtuar hidrocentralin në Zall-Gjoçaj.

“Dalin me profile false, i ndryshojnë herë pas here, njëherë nxjerrin bukuritë e Zall-Gjoçajt, njëherë një emër tjetër, nuk dimë se kush janë,” tha Koleci, “Është presion i hapur për të na dëmtuar si aktivistë.”

Citizens.al kontaktoi administratorin e “Seka Hydropower”, Bardhyl Muçeku, për të pyetur nëse kishte dijeni të situatës, por ai mohoi diçka të tillë, duke u shprehur se ishte kundër kësaj fushate linçimi.

Nga ana tjetër, Koleci theksoi se nuk ka pasur asgjë personale me drejtuesit apo njerëzit pas kompanisë “Seka Hydropower”, dhe e gjithë kjo fushatë po ndodh me qëllim dëmtimin e figurës së tij publike dhe demoralizimi i komunitetit që ka kundërshtuar hidrocentralet.

“Ky nuk është më vetëm problem personal. Kam familje dhe reputacion në shoqëri,” shtoi ai.

Aktivistë të angazhuar në mbrojtjen e Zall-Gjoçajt thanë për Citizens.al se sulmet në rrjetet sociale nisën menjëherë pas vendimit të Gjykatës së Lezhës, e cila më 28 janar pushoi çështjen penale për shpifje dhe fyerje, të ngritur nga “Seka Hydropower” ndaj Dhimitër Kolecit, Jorgji Locajt dhe Adem Xhokolës, që të tre banorë të zonës.

Sipas aktivistëve, ky zhvillim shënoi një zhvendosje të presionit nga gjykata drejt rrjeteve sociale.

“Pas vendimit, u aktivizua një faqe në Facebook, që publikon materiale të përsëritura, video, fotografike dhe me shkrime duke akuzuar publikisht aktivistët për mashtrim dhe shpifje,” thanë aktivistët e Zall-Gjoçajt për Citizens.al.

Padia e kompanisë kishte të bënte me deklaratat publike të tre banorëve gjatë protestave, ku ata ngrinin shqetësime për ndikimin e hidrocentraleve në lumenjtë Flim dhe Urakë.

Pas shqyrtimit të fushatës linçuese, Dhimitër Koleci dhe aktivistë të tjerë të Zall-Gjoçajt depozituan një ankesë pranë Komisionerit për Mbrojtjen e të Dhënave Personale.

Ankesa ka të bëjë me përpunim të paligjshëm të të dhënave, cenim të privatësisë dhe dëmtim të reputacionit.

Sipas ankesës, materialet filmike janë nxjerrë jashtë kontekstit dhe janë ripërdorur në mënyrë selektive për të ndërtuar një narrativë diskredituese. Aktivistët kanë kërkuar fshirjen e përmbajtjeve, gjetjen dhe marrjen e masave administrative ndaj personave përgjegjës.

“Unë do ta vazhdoj betejën, nuk do të ndalem, ata nuk do ta arrijnë atë që duan të arrijnë. Unë jam me zë, me figurë, ata janë të fshehur!” theksoi Koleci.

Lexoni gjithashtu:

• “Seka Hydropower” s’u paraqit, pushohet padia ndaj banorëve të Zall-Gjoçajt
• Aktivistët e Zall-Gjoçajt në gjyq me “Seka Hydropower”: “Fjala e lirë nuk është krim!”
• “Seka Hydropower” padit për shpifje dhe fyerje banorët e prekur nga hidrocentralet

The post Faqe anonime linçojnë aktivistët e Zall-Gjoçajt appeared first on Citizens.al.

Një grua ka humbur jetën ditën e sotme pasi është përplasur nga makina.

Bëhet me dije se 65-vjeçarja Sh.Sh ka ndërruar jetë në spital, pasi ishte përplasur me makinë në Bathore e drejtuar nga 40-vjeçari E.B

“Më datë 05.02.2026, rreth orës 16:30, në Bathore, automjeti me drejtues shtetasin E. B., rreth 40 vjeç, ka përplasur këmbësoren shtetasen Sh. Sh., rreth 65 vjeçe, e cila për pasojë ka humbur jetën në spital.

Drejtuesi i automjetit u shoqërua në Komisariat për veprime të metejshme procedurale.

Grupi hetimor vijon punën për sqarimin e rrethanave të aksidentit”, thuhet në njoftim.

Prej ditës së djeshme ish-presidenti i vendit Alfred Moisiu ndodhet i shtruar në spitalin Nënë Tereza, në reaniamacion, pasi është paraqitur me probleme në frymëmarrje.

Gjendja e ish-kreu të vendit paraqitet e qëndrueshme, ndërsa mjekët e ekipit të aritmologjisë, pas konsultës ditën e sotme kanë vendosur që një pacemaker me dy dhoma.

Pacemaker është një pajisje mjekësore që ndihmon zemrën të rrahë rregullisht, kur ritmi i saj është shumë i ngadalshëm ose i çrregullt.

Moisiu vuan nga rrahjet e ngadalta, ose bllok atrioventrikular, që lidhet me moshën. Aktualisht gjendja e tij është e qëndrueshme dhe në përmirësim.

Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtorë mesditën e sotme tre persona të akuzuar për përfshirje në shitblerje votash dhe korrupsion zgjedhor.

Trupa gjykuese e përbërë nga gjyqtarët Flora Hajredinaj, Etleva Deda dhe Rudina Palloj ka dënuar të pandehurit Gersi Kaçorri, Besnik Uka dhe Artur Jahja, por ka vendosur pezullimin e dënimit të tyre me burg, duke i lënë në liri me kusht.

Sipas vendimit të GJKKO-së, Gersi Kaçorri u shpall fajtor për veprën penale “Korrupsioni aktiv në zgjedhje”. Ai u dënuar fillimisht me 1 vit burgim, por për shkak të gjykimit të shkurtuar, dënimi i zbriti në 8 muaj burgim.

Dy të pandehurit e tjerë, Besnik Uka dhe Artur Jahja, u gjetën fajtorë për “Korrupsion pasiv në zgjedhje” kryer në bashkëpunim. Edhe për ta, gjykata dha të njëjtën masë: 1 vit burgim, i cili pas aplikimit të gjykimit të shkurtuar u reduktua në 8 muaj burgim.

Liria me kusht

Pavarësisht dënimit me burg, asnjë nga të pandehurit nuk do të shkojë në qeli. Gjykata ka urdhëruar pezullimin e ekzekutimit të dënimit dhe vënien e tyre në shërbim prove për një periudhë prej 1 viti e 6 muajsh.

Gjatë kësaj kohe, ata duhet të mbajnë kontakte të rregullta me Shërbimin e Provës dhe u ndalohet kategorikisht shoqërimi me persona të dënuar për vepra penale. Nëse ata kryejnë një vepër tjetër penale gjatë kësaj periudhe, dënimi me burg rikthehet në fuqi.

Sekuestrimi i telefonave

Si pjesë e provave materiale dhe ndëshkimit, gjykata ka vendosur konfiskimin e telefonave celularë të të tre të pandehurve (Samsung dhe iPhone), të cilët dyshohet se janë përdorur për komunikimet që lidhen me veprën penale.

Drejtori i Projekteve në Ministrinë e Bujqësisë, Ervin Hajdaraga, ka bërë të ditur përfundimet e turit kombëtar të dëgjesave me fermerët, i cili u përmbyll dje në Fier.

Në një intervistë për emisionin “Tema e Ditës” në RTSH, ai theksoi se për herë të parë, para hartimit të Skemës Kombëtare 2026, u vendos që të dëgjohen drejtpërdrejt fermerët për të ndërtuar një skemë sipas nevojave të tyre.

“Ne kemi qenë në 24 takime në të gjithë qarqet e vendit. Dje ishte takimi i fundit në qarkun e Fierit. Është një sektor që ka ecur shumë dhe nevojat e tyre kanë evoluar. Nevojat e blegtorëve ishin të shumta dhe sektori i blegtorisë ka nevoja të rëndësishme,” u shpreh Hajdaraga.

Ai nënvizoi se një nga çështjet më të diskutuara ishte skema e naftës, e cila do të rishikohet për shkak të problematikave që fermerët kanë hasur me dokumentacionin për të aplikuar.

“Gjatë takimeve, për skemën e naftës është kërkuar të ndryshohet sepse ka patur disa problematika për fitimin e naftës nga fermerët, çështje dokumentacionesh që nuk i lejonin ata të përfitonin. Ne do ulemi dhe skemën e naftës do ta ribëjmë”, theksoi ai.

Një tjetër element i rëndësishëm i Skemës Kombëtare 2026 është përfitimi i 10% të faturës së shitjes për çdo fermer apo blegtor të regjistruar me NIPT.

“Kemi diskutuar edhe për përfitimin e 10% të faturës së shitjes. Një skemë që këtë vit do të jetë shumë lehtësuese për fermerët. Çdo fermer apo blegtor që ka një sasi të caktuar që do ta tregtojë, pikat e grumbullimit do t’i japin një faturë që duhet ta dorëzojnë te Tatimet për të përfituar 10% të vlerës së shitur. Të gjithë fermerët duhet të jenë të regjistruar të kenë NIPT-in e fermerit në mënyrë që të përfitojnë. Ne i bëjmë këto skema në mënyrë që edhe fermerët t’i formalizojmë sepse të gjitha skemat janë për fermerët e formalizuar”, tha ai.

Ministrja e Jashtme, Elisa Spiropali, ndodhet Uashington ku mori pjesë në Mëngjesin e Lutjeve, një aktivitet tradicional me prezencën e Presidentit të Shteteve të Bashkuara, Donald Trump, si dhe udhëheqësve politikë, shoqërorë e fetarë nga mbarë bota.

Në një postim në rrjetet sociale, ku ka publikuar edhe foto nga aktiviteti, Spiropali e cilësoi këtë moment si solemn dhe frymëzues, duke theksuar se besimi është themeli mbi të cilin ndërtohet forca e shoqërisë njerëzore.

“Në Mëngjesin e Lutjeve, me prezencën e Presidentit Trump, udhëheqësve politikë, shoqërorë e fetarë. Moment solemn që na kujton se besimi është themeli i forcës së shoqërisë njerëzore“, shkruan Spiropali.

Ministrja Spiropali ndodhet në një vizitë në Uashington prej disa ditësh, ku ka zhvilluar disa takime në Senatin Amerikan, me fokus bashkëpunimin dhe koordinimin për çështje me interes të përbashkët mes Shqipërisë dhe SHBA.

Ditën e premte vendi ynë do të vijojë të ndikohet nga kushte atmosferike të paqëndrueshme.  Moti parashikohet me vranësira mesatare e të dendura.

Reshjet e shiut priten të jenë prezente që në orët e para të 24-orëshit përgjatë vijës bregdetare dhe ultësirës perëndimore me intensitet të ulët.

Gradualisht pas orëve të mëngjesit reshjet e shiut shtrihen në të gjithë vendin me intensitet të ulët deri mesatar. Hera-herës shtrëngata afatshkurtra.

Në zonën e veriperëndimit, qendërs nga orët e mesditës dhe deri në orët e vona të mbrëmje reshje shiu të herëpashershme me intensitet mesatar deri të lartë, në intervale të shkurtra kohore reshje shiu në formën e shtrëngatave shoqëruar me shkarkesa elektrike.

Temperaturat maksimale pritet të arrijnë deri në 15 gradë celcius, ndërsa ato minimale në 2 gradë celcius.

Era do të fryjë me drejtim kryesor juglindje-jugperëndim me shpejtësi mesatare deri në 9m/s, e cila hera-herës pritet të fitoi shpejtësi deri në 18m/s, kryesisht përgjatë vijës bregdetare si dhe në momentin e zhvillimit të vranësirave.

Valëzimi në detet Jon dhe Adriatik do të jetë i forcës 2-4 ballë.

Sipas Agjencisë për Media dhe Informim, hapja e rrjetit social TikTok erdhi pas një rivlerësimi dhe adresimi të shqetësimeve që lidhen me sigurinë publike, sociale dhe digjitale.

MIA sqaron përmes një njoftimi zyrtar se koha e ndërprerjes së përdorimit të këtij rrjeti ndihmoi në vendosjen e bazave për mekanizma të rinj sigurie.

“Sot, autoritetet shqiptare janë në partneritet me përfaqësuesit e TikTok, për filtrat mbrojtës përmes fjalëve kyçe, kontrollet e përmbajtjes dhe modalitetet më efikase të raportimit dhe trajtimit të shkeljeve”.

Hapja e TikTok shënon një fazë të dytë, nga ajo kufizuese te monitorimi aktiv.

“Po punohet për hartimin e një plani të mirëfilltë komunikimi dhe ndërgjegjësimi, të fokusuar te fëmijët, të rinjtë, prindërit dhe mësuesit, për përdorimin e sigurt dhe të përgjegjshëm të platformave online. Qëllimi është i qartë dhe i orientuar drejt edukimit digjital, mbrojtjes reale dhe ndërtimit të një kulture sigurie në hapësirën online”.

Qeveria shqiptare bllokoi aksesin në rrjetin social TikTok në mars të 2025, pas disa shfaqjeve dhe ngjarjeve të dhunshme të ndodhura mes të rinjve, të lidhura shpesh me përmbajtjen e gjetur në të.

Gjykata e Posaçme kundër Korrupsionit dhe Krimit të Organizuar (GJKKO) ka shpallur mesditën e sotme vendimin për tre të pandehurit Musa Gjikola, Erjon Dani dhe Vilson Roçi, të akuzuar nga SPAK për vepra korruptive.

Trupa gjykuese e përbërë nga gjyqtarët Rudina Palloj, Atalanta Zeqiraj dhe Flojera Davidhi i ka gjetur fajtorë të tre të pandehurit për veprën penale të “Ushtrimit të ndikimit të paligjshëm ndaj personave që ushtrojnë funksione publike”.

Dënimet e dhëna

Dënimi më i rëndë është dhënë për të pandehurin Erjon Dani. GJKKO e dënoi atë fillimisht me 3 vite burgim për dy episode të ushtrimit të ndikimit të paligjshëm. Megjithatë, Dani u shpall i pafajshëm për akuzën e “Shpërdorimit të detyrës”, pasi gjykata vlerësoi se fakti nuk përbën vepër penale. Për shkak të aplikimit të gjykimit të shkurtuar, dënimi i tij përfundimtar zbret në 2 (dy) vite burgim.

Të pandehurit e tjerë, Musa Gjikola dhe Vilson Roçi, janë dënuar përfundimisht me nga 1 (një) vit burgim secili.

Gjikola u dënuar fillimisht me 1 vit e 6 muaj, por përfitoi uljen e 1/3-ës së dënimit nga gjykimi i shkurtuar.

E njëjta logjikë u ndoq edhe për Roçin, i cili u gjet fajtor për dy episode bashkëpunimi, duke u dënuar përfundimisht me 1 vit pas zbritjes procedurale.

Vuajtja e dënimit

Gjykata ka urdhëruar që vuajtja e dënimit të fillojë të llogaritet nga momenti i arrestimit të tyre, më datë 11 korrik 2025. Të dënuarit do ta vuajnë dënimin në një burg të sigurisë së zakonshme.

Gjithashtu, të tre të pandehurit janë ngarkuar solidarisht me pagimin e shpenzimeve procedurale hetimore dhe gjyqësore. Palët kanë të drejtë të ankimojnë vendimin në Gjykatën e Apelit të GJKKO-së brenda 15 ditëve.

Akuzat

Nga hetimet e kryera ka rezultuar se gjatë vitit 2020, të pandehurit janë përfshirë në tre episode të veçanta, ku kanë kërkuar dhe përfituar shuma monetare që varionin nga 4 000 deri në 7 500 euro, me pretendimin se kishin aftësinë për të ushtruar ndikim të paligjshëm ndaj funksionarëve të drejtësisë, me qëllim ndikimin në masa sigurimi personal dhe favorizim në dhënie dënimi  ndaj disa të arrestuarve.

Hetimet kanë dokumentuar se të pandehurit kanë bashkëpunuar dhe koordinuar veprimet përmes komunikimeve në platformën e enkriptuar “Sky EÇ”, të cilat janë administruar nga autoritetet franceze të drejtësisë në kuadër të ndihmës së ndërsjellë juridike ndërkombëtare.

Në 28 janar, në ditën e 90-vjetorit të lindjes së Ismail Kadaresë, në Tiranë u përurua shtatorja e shkrimtarit të njohur,  vepër e skulptorit Henri Mimani, i cili e solli këtë vepër në nder të trashëgimisë letrare dhe intelektuale të shkrimtarit. Ceremonia, e cila u drejtua nga mjeku Skënder Brataj nxiti një debat publik mes botuesit të Kadaresë, Bujar Hudhri, dhe Bratajt.

Hudhri u ndal te momenti i ceremonisë dhe veçanërisht te një deklaratë e bërë nga Brataj, sipas së cilës Kadareja kishte lënë amanetin: “Më mbroni kur të mos jem”. Hudhri shpreh dyshime për këtë formulim dhe e interpreton më shumë si metaforë.

“Ndërsa dëgjova këtë kinse amanet, vetiu në kokë më erdhi mendimi se, pikërisht në mesnatën e diktaturës, kur të ikte koka, Kadareja kishte guxuar të ishte aq trim sa të shkruante dhe të arrinte të botonte ‘Pallatin e ëndrrave’. Dhe ishte krejt i vetëm, i pambrojtur. Talentin dhe veprën e tij e ktheu në pjesë të trashëgimisë botërore.”

Deklaratat e Hudhrit nxitën reagimin e doktor Skënder Bratajt. I ftuar në “Living Day” në Vizion Plus nën moderimin e Brunilda, Brataj sqaroi se roli i tij gjatë ceremonisë ishte thjesht organizativ dhe se deklarata e tij u interpretua gabim.

“Duke qenë se ishte një gjë private e bërë nga miqtë e tij dhe listën e miqve e bëri vetë familja, ne për mos ta bërë të ndihej keq, thamë ‘nuk po përmendim as kush financoi, as çfarë bëri, as çfarë nuk bëri’, por thamë që botuesit i takon që të jetë. Duke qenë se askush nuk donte të fliste, ma lanë si detyrë mua. Unë përgatita një material dhe thamë ‘meqë botuesi po vjen, le të flasë, të thotë çfarë të dojë.’ U njoftua dy ditë para që do të fliste, nuk u njoftua në moment. Të nesërmen shoh artikullin që kinse unë kisha thënë që më la Kadareja amanet. Kadareja nuk ia la doktor Bratajt, ia la intelektualëve shqiptarë. Lufta kundër figurave kombëtare ka filluar që në vitet 2000.”

Shumë njerëz të botës së krimit po punonësojnë dedektivë privatë dhe këtë e provon edhe rasti më i fundit.

Bëhet fjalë për Erjon Llapushin, një nga personat më të kërkuar nga drejtësia dhe i dënuar me 17 vite burg për vrasje me dashje të kamarierit Gazment Kurmaku, ngjarje e ndodhur 2 Tetor 2021 në një lokal në Labinot-Fushë të Elbasanit.

Llapushi, jo vetëm që endej i lirë, por kishte punësuar dedektivë privat për parë nëse kishte përgjues në banesën e tij. Në dosjen e siguruar nga Anila Hoxha, është zbardhur dëshmia e dedektives 45-vjeçare, e cila nga Tirana shkoi në Pogradec për të mbikëqyrur banesën e të shumëkërkuarit.

Më 31 janar, rreth orës 09:00 ajo është nisur nga shtëpia nga qyteti i Tiranës për në qytetin e Pogradecit. Sapo ka mbërritur në qytetin e Pogradecit rreth orës 11:50 ka takuar një person emrin e të cilit nuk e di. Sapo e ka takuar, e ka ndjekur me makinën e saj dhe më pas janë ngjitur në këmbë të dy në katin e tretë të një banese private, ku çelsat e shtëpisë i kishte vetë personi, ka hapur derën dhe kanë hyrë në ambientet e shtëpisë për të bërë kontroll të këtij kati.
Siç tregon shtetasja I.Kipi, ambienti kishte dy dhoma gjumi, një guzhinë, sallon dhe një sallon afer derës së daljes. Ka marrë një dedektor që shërben për njohjen e kartave sim ose pajisjet përgjuse dhe ka filluar të bëjë kontrollin e ambientit. Ka filluar me dhomën e gjumit bashkshortore, dhomën e fëmijve, kuzhinën më pas tek holli i jashtëm.

Siç thuhet në dosjen e siguruar nga Anila Hoxha, njëra nga prizat që ishte e lidhur me banjën, në momentin që e hapi ka konstatuar paisjen përgjuese. Pajisjen nuk e ka hequr ,e ka vendosur përsëri mbrapa telave ku ishte dhe e ka vendosur në vend fazën e prizës që jepte masë, për mos e zënë korenti dhe ka mbyllur përsëri prizën. Në këtë kohë djali që ndodhej me të i ka thënë që ka ardhur policia.
Dedektivja deklaron se nuk njeh Erion Llapushin dhe ishte hera e parë që shkonte në atë banesë. Për shërbimin që ajo do kryente do paguhej në shumën 50,000 (pesëdhjetë mijë) lekë të reja, ku përfshihet shërbimi sëbashku me rrugën, gjë të cilën është e përcaktuar në tarifë nga kompania.

45-vjeçarja është marrë nën hetim për veprën penale “Veprime që pengojnë zbulimin e së vërtetës” dhe “Fshehja e të ardhurave”.
Përveç detektives, Policia ka vënë në hetim edhe një të afërm të Erjon Llapushit, i cili është personi që ka kontaktuar detektiven me qëllim që të gjendej një përgjues që dyshohet se ishte vënë në banesën e tij.

Top Channel

Në një klimë qetësie, elegance dhe diskrecioni aristokratik, Princ Leka dhe Blerta Celibashi po hyjnë në një kapitull të ri të historisë së tyre personale, një hap që e afron çiftin me kurorëzimin e dashurisë së tyre. Pas një viti fejese, burime pranë rrethit të tyre konfirmojnë se përgatitjet për martesë kanë nisur. Pa zhurmë, […]

Ukraina dhe Rusia do të shkëmbejnë 314 të burgosur. Lajmi është konfirmuar nga Steve Witkoff.

“Sot delegacionet e SHBA-së, Ukrainës dhe Rusisë ranë dakord për shkëmbimin e 314 të burgosurve -i pari i këtij lloji në pesë muaj”, tha Witkoff.

Gjithashtu u shpreh se ky rezultat u arrit pas bisedimeve të shumta që rezultuan pozitive.

“Ky rezultat u arrit nëpërmjet bisedimeve të thella dhe produktive për paqe. Ndërsa mbetet ende punë e rëndësishme për t’u bërë, përparime të tilla tregojnë se angazhimi i vazhdueshëm diplomatik po prodhon rezultate konkrete dhe po kontribuon në përpjekjet për t’i dhënë fund luftës në Ukrainë”, siguroi ai.

Witkov shtoi se bisedimet do të vazhdojnë dhe se pritet përparim shtesë në javët në vijim.

TIRANË, 5 shkurt /ATSh/ Drejtori i Përgjithshëm i Policisë së Shtetit, Ilir Proda, vlerësoi me Certifikatë për Shërbime të Dalluara, për arritjet, sfidat dhe përkushtimin në detyrë, Komisare Enkela Deraj, shefe e Seksionit të Burimeve Njerëzore dhe Trajnimeve në Njësinë për Kufirin dhe Migracionin “Delta Forcë” Vlorë.

Enkela, me një karrierë të gjatë në Polici që prej vitit 2005, e sprovuar me sfida e vështirësi në disa fusha të shërbimit në Polici, është kthyer në një shembull të mirë dhe frymëzues për të gjitha gratë dhe vajzat në Policinë e Shtetit.

Pjesë e Shoqatës së Grave në Policinë Shqiptare, ajo kontribuon në mënyrë të vazhdueshme për mbështetjen dhe inkurajimin e kolegeve. /j.p/

The post Pjesë e Policisë prej 2005, komisarja Enkela Deraj vlerësohet me Certifikatën e Karrierës appeared first on Agjencia Telegrafike Shqiptare.

TIRANË, 5 shkurt /ATSH/ Ministrja për Evropën dhe Punët e Jashtme, Elisa Spiropali mori pjesë sot në Mëngjesin e Lutjeve në Uashington, me praninë e Presidentit amerikan Donald Trump, udhëheqësve politikë, shoqërorë e fetarë.

Përmes një publikimi në mediet sociale, ministrja e cilësoi pjesëmarrjen në Mëngjesin e Lutjeve si një “moment solemn që na kujton se besimi është themeli i forcës së shoqërisë njerëzore”.

Gjatë vizitës në Uashington, Spiropali zhvilloi disa takime në Senatin Amerikan, me fokus bashkëpunimin dhe koordinimin për çështje me interes të përbashkët mes Shqipërisë dhe SHBA.

Gjithashtu Spiropali u prit sot në Kongresin Amerikan edhe nga Kongresmeni Keith Self, Kryetar i Nënkomisionit për Evropën dhe iniciues i “Projektligjit për Vlerësimin e Diskriminimit në Luginën e Preshevës”.

Vizita e Spiropalit në Uashington do të vijojë me takimet në Departamentin Amerikan të Shtetit dhe në disa organizata think-tank të mendimit politik me fokus zhvillimet e fundit globale.

/m.q/j.p/

The post Spiropali merr pjesë në Mëngjesin e Lutjeve në Uashington appeared first on Agjencia Telegrafike Shqiptare.

TIRANË, 5 shkurt /ATSH/ Në Forumin e Biznesit dhe Ekonomisë Shqipëri–Slloveni, i mbajtur ditën e sotme në Tiranë, u nënshkrua një Memorandum Mirëkuptimi për forcimin e bashkëpunimit ekonomik mes dy vendeve.

Forumi i Biznesit Shqipëri-Slloveni u organizua nga Agjencia Shqiptare e Zhvillimit të Investimeve (AIDA), në bashkëpunim me SPIRIT Slovenia, Institute for Strategic Solutions (ISR) dhe ambasadën e Republikës së Sllovenisë në Tiranë, me fokus të veçantë në sektorët e ndërtimit, teknologjisë së informacionit dhe komunikimit (ICT), industrisë ushqimore dhe të pijeve, inovacionit në bujqësi dhe turizmit.

Ky forum është një platformë kyçe për forcimin e bashkëpunimit ekonomik dhe krijimin e partneriteteve të reja mes dy vendeve.

Sipas AIDA-s, Memorandumi i Mirëkuptimit i nënshkruar mes këtij institucioni dhe Spirit Slovenia ka si qëllim forcimin e bashkëpunimit në drejtim të shkëmbimit të informacioneve, organizimit të aktiviteteve të përbashkëta dhe rritjes së investimeve në vendet respektive.

Gjatë forumit u mbajtën fjalime dhe prezantime nga zëvendësministri i Ekonomisë dhe Inovacionit, Enkelejd Musabelliu, i cili ftoi bizneset sllovene të investojnë në Shqipëri, duke theksuar stabilitetin makroekonomik.

Drejtoresha Ekzekutive e AIDA-s, Laura Saro, prezantoi potencialin e investimeve dhe rolin e agjencisë si partner i investitorëve gjatë gjithë procesit, me procedura të digjitalizuara dhe mbështetje institucionale të vazhdueshme.

Ambasadori i Sllovenisë Jakob Štunf dhe Tine Kračun, CEO i Institute for Strategic Solutions, theksuan rëndësinë e momentit për marrëdhëniet ekonomike dypalëshe.

Ndërsa, Nataša Kos, përfaqësuese e SPIRIT Slovenia, gjatë fjalës së saj vendosi një fokus të veçantë te ekonomia sllovene, eksportet dhe inovacioni.

Forumi përfshiu dy panele diskutimi, “Më të Fortë së Bashku” dhe “Kur Tregjet Bashkohen”, shndërrim i sfidave globale në mundësi zhvillimi, me fokus te financat, sigurimet, logjistika, inovacioni dhe Inteligjenca Artificiale.

Forumi theksoi rëndësinë e bashkëpunimit ekonomik Shqipëri–Slloveni dhe mundësitë për zgjerim dhe investime afatgjata.

Në event morën pjesë përfaqësues institucionalë, liderë biznesi dhe investitorë nga Shqipëria dhe Sllovenia.

/e.i/j.p/

The post Rritja respektive e investimeve, AIDA memorandum mirëkuptimi me Spirit Slovenia appeared first on Agjencia Telegrafike Shqiptare.

NJU JORK, 5 shkurt /ATSH-AA/ – Sekretari i Përgjithshëm i OKB-së, Antonio Guterres, paralajmëroi të mërkurën se skadimi i marrëveshjes së fundit të mbetur për kontrollin e armëve bërthamore midis SHBA-së dhe Rusisë përfaqëson një “moment të rëndë për paqen dhe sigurinë ndërkombëtare”, duke i dhënë fund dekadave të kufizimeve ligjërisht të detyrueshme për dy arsenalet më të mëdha bërthamore në botë.

“Skadimi i Traktatit të Ri START, që nga mesnata e sotme, shënon një moment të rëndë për paqen dhe sigurinë ndërkombëtare”, tha Guterres në një deklaratë që shënonte skadimin e traktatit më 5 shkurt.

Ai theksoi se “për herë të parë në më shumë se gjysmë shekulli, përballemi me një botë pa asnjë kufizim detyrues për arsenalet strategjike bërthamore të Federatës Ruse dhe Shteteve të Bashkuara të Amerikës, dy shtetet që zotërojnë shumicën dërrmuese të rezervave globale të armëve bërthamore”.

Guterres tha se kontrolli i armëve bërthamore midis dy vendeve ka shërbyer prej kohësh si një forcë stabilizuese, duke ndihmuar në parandalimin e një katastrofe dhe në uljen e rrezikut të gabimeve shkatërruese.

Nga Bisedimet për Kufizimin e Armëve Strategjike (SALT) deri te New START, vuri në dukje ai, marrëveshjet dypalëshe çuan në reduktimin e mijëra armëve bërthamore dhe përmirësuan sigurinë globale.

“Kjo shpërbërje e dekadave të arritjeve nuk mund të vinte në një kohë më të keqe”, paralajmëroi ai, duke theksuar se “rreziku i përdorimit të një arme bërthamore është më i larti në dekada”.

Ai paralajmëroi se mungesa e kufijve të verifikueshëm mbi arsenalet strategjike rrit pasigurinë globale mes tensioneve gjeopolitike në rritje dhe ndryshimeve të shpejta teknologjike.

Megjithatë, Guterres vuri në dukje se momenti duhet të shihet edhe si një mundësi për të rivendosur përpjekjet për kontrollin e armëve.

“Bota tani shikon nga Federata Ruse dhe Shtetet e Bashkuara për të përkthyer fjalët në veprime”, tha ai, duke i nxitur të dyja palët të kthehen në negociata pa vonesë dhe të bien dakord për një kornizë pasardhëse që “rivendos kufijtë e verifikueshëm, zvogëlon rreziqet dhe forcon sigurinë tonë kolektive”.

Traktati i Ri për Reduktimin e Armëve Strategjike (New START) u nënshkrua më 8 prill 2010 në Pragë nga SHBA-ja dhe Rusia dhe hyri në fuqi më 5 shkurt 2011. Ai zëvendësoi traktatin START I të vitit 1991, i cili skadoi në dhjetor 2009, dhe zëvendësoi Traktatin e Reduktimit të Armëve Strategjike (SORT) të vitit 2002, i cili përfundoi kur START i Ri hyri në fuqi, sipas Shoqatës së Kontrollit të Armëve me seli në SHBA.   /os/

The post FOKUS – Guterres: Skadimi i traktatit bërthamor SHBA-Rusi shënon një moment të rëndë appeared first on Agjencia Telegrafike Shqiptare.

TIRANË, 5 shkurt /ATSH/ Shqipëria dhe Sllovenia kanë përmbyllur me sukses raundin e dytë dhe të fundit të negociatave për marrëveshjen në fushën e punësimit dhe sigurimeve shoqërore. Negociatat u zhvilluan në Tiranë, në datat 2-4 shkurt.

Zëvendësministrja e Ekonomisë dhe Inovacionit, Olta Manjani, e cila kryesoi delegacionin shqiptar, bëri të ditur se “në bashkëpunim të ngushtë me palën sllovene të kryesuar nga Mojca Pršina Kumar, bënë të mundur parafirmosjen e kësaj marrëveshjeje të rëndësishme”.

Manjani theksoi se marrëveshja synon forcimin e bashkëpunimit dypalësh në fushën e punësimit dhe sigurimeve shoqërore, duke garantuar mbrojtjen e të drejtave të qytetarëve dhe zbatimin e praktikave bashkëkohore në përputhje me legjislacionin e Bashkimit Evropian.

“Qytetarët do të përfitojnë nga bashkimi i periudhave kontributive, duke siguruar që vitet e punës të mos humbasin. Gjithashtu, në fushën e punësimit, marrëveshja krijon akses më të lehtë dhe të drejta të barabarta në tregun e punës të të dyja vendeve”, shkruan Manjani.

Nga viti 2005 e deri më sot Shqipëria ka nënshkruar rreth 28 marrëveshje në fushën e sigurimeve shoqërore mes të cilave; me Turqinë, Belgjikën, Hungarinë, Luksemburgun, Çekinë, Maqedoninë e Veriut, Gjermaninë, Austrinë, Bullgarinë, Kanadanë, Rumaninë, Kosovën, me Konfederatën e Zvicrës dhe me Kroacinë. Sakaq në fuqi pritet të hyjnë edhe marrëveshjet me Malin e Zi e Bullgarinë.

Prej 1 qershorit 2025 ka nisur zbatimi i marrëveshjes për pensionet mes Shqipërisë dhe Italisë, e cila garanton të drejtat e pensioneve për rreth gjysmë milioni shqiptarë dhe 4 mijë italianë.

Në proces ende janë marrëveshjet me Poloninë e Serbinë, ndërsa me Francën procesi është drejt arritjes së një dakordësie për fillimin e negociatave.

Vende si Spanja, Danimarka, Moldavia dhe Emiratet e Bashkuara Arabe, Izraeli dhe Letonia kanë dhënë dakordësinë për fillimin e negociatave.

Procesi më i gjatë dhe më i vështirë për palën shqiptare është ai me Greqinë.

/m.q/j.p/

The post Parafirmoset marrëveshja për njohjen e pensioneve me Slloveninë appeared first on Agjencia Telegrafike Shqiptare.

TIRANË, 5 shkurt /ATSH/ Prej datës 9 deri në 15 shkurt, Shkodra pritet të kthehet në kryeqendrën e festimeve të Karnavaleve, që tashmë janë kthyer në një traditë të përvitshme artistike.

Kryetari i bashkisë Shkodër, Benet Beci zhvilloi sot në bashki një takim me strukturat organizative të këtij aktiviteti, ku u diskutua programi i zgjeruar i organizimeve artistike dhe kulturore.

“Po hyjmë në javën e fundit të përgatitjeve për një festë që e tejkalon të zakonshmen, një javë e tërë magjie, ngjyrash dhe fantazie, ku Shkodra vishet me shpirtin e karnavaleve dhe pulson ndryshe”, tha Beci.

Beci shtoi se do të ketë “butafori artistike, karro alegorike, parada plot energji, personazhe groteske dhe të animuara që dalin nga imagjinata, video mapping që e shndërrojnë qytetin në skenë, koncerte, performanca dhe shumë surpriza të tjera që do ta mbajnë publikun në lëvizje, ditë e natë”.

Karnavalet synojnë të tërheqin jo vetëm banorët e qytetit, por edhe vizitorë nga e gjithë Shqipëria dhe rajoni.

Ky organizim ruan traditën e hershme të karnavaleve shkodrane, duke i dhënë qytetit një dimension më modern dhe spektakolar, me synimin për ta kthyer Shkodrën në një destinacion të rëndësishëm kulturor dhe turistik gjatë kësaj periudhe.

Aktivitetet pritet të zhvillohen gjatë ditëve deri në mbrëmje, duke e vendosur qytetin në qendër të atmosferës festive për një javë.

/e.i/j.p/

The post Shkodra bëhet gati për Karnavalet nga 9-15 shkurt appeared first on Agjencia Telegrafike Shqiptare.

UASHINGTON/MOSKË, 5 shkurt /ATSH-DPA/- Shtetet e Bashkuara të Amerikës dhe Rusia kanë rënë dakord të rivendosin kontaktet ushtarake të nivelit të lartë – për herë të parë që nga viti 2021, tha sot Komanda Evropiane e SHBA-së.

Marrëveshja u arrit gjatë bisedimeve tripalëshe të paqes në Abu Dabi që synonin zgjidhjen e luftës në Ukrainë.

Kanali i komunikimit midis përfaqësuesve të lartë ushtarakë amerikanë dhe rusë u ndërpre në fund të vitit 2021, përpara se presidenti rus Vladimir Putin të urdhëronte pushtimin e Ukrainës në shkurt të vitit 2022.

“Ruajtja e dialogut midis ushtrive është një faktor i rëndësishëm në stabilitetin dhe paqen globale, e cila mund të arrihet vetëm përmes forcës dhe ofron një mjet për rritjen e transparencës dhe shmangien e përshkallëzimit”, tha Komanda Evropiane e SHBA-së. //a.i/

The post FOKUS – SHBA-ja dhe Rusia bien dakord të rivendosin dialogun ushtarak të nivelit të lartë appeared first on Agjencia Telegrafike Shqiptare.