Po mbahet sot në kryeqytet dita e 27-të e protestës qytetare.

Qytetarët nisën marshimin në bulevard, për t’iu bashkuar pjesës tjetër para Kryeministrisë, aty ku përsëritën 5 kërkesat e tyre dhe me pankarta kanë kujtuar 82-vjetorin i gjenocidit ndaj shqiptarëve të Çamërisë.

Pas disa orësh para Kryeministrisë ata kanë vijuar me marshimin nëpër akset kryesore të qytetit.

Kërkesat:

1.Dorëheqjen e panegociueshme të Kryeministrit dhe të qeverisë.

2.Krijimin e një qeverie teknike tranzitore, jopartiake, me mandat 12-mujor.

3.Ndryshime Kushtetuese, ku të gjithë shtetasit shqiptarë të jenë të barabartë para ligjit, si dhe miratimin e saj me referendum popullor, duke përfshirë ndër të tjera:

Ndryshimin e Kodit Zgjedhor;

Ndryshimin e ligjit për financimin e partive politike dhe organizatave të ndryshme;

Kufizimin e ushtrimit të detyrës së Kryeministrit në jo më shumë se dy mandate, të plota ose të pjesshme, gjatë gjithë jetës politike të një individi.

4.Paralelisht, kërkojmë:

Anulimin e ndryshimeve të bëra në ligjin për “Zonat e Mbrojtura”;

Anulimin e ndryshimeve të bëra në ligjin për “Trashëgiminë kulturore”;

Shfuqizimin e paketës ligjore të njohur si “Paketa e Maleve”;

Shfuqizimin e statusit dhe të kuadrit ligjor për “Investimet Strategjike”.

5.Kontrata e re sociale mes qytetarëve dhe shtetit do të përpilohet pas konsultimit me intelektualë, ekspertë teknikë dhe qytetarë apartiakë, të propozuar nga sheshi i protestës.

Një pjesë e qytetarëve u grumbulluar në sheshin ‘Skënderbej’, ndërsa disa protestues të tjerë ishin të stacionuar para Kryeministrisë, aty ku do të mbahen fjalimet.

Disa prej tyre e kanë shtrirë tubimi e tyre deri në orët e para të mëngjesit duke mos u larguar nga Kryeministria.

Gjatë fjalës së tij në shesh, nismëtari Kola ka kujtuar edhe çështjen Çame, duke brohoritur ‘Rama n’burg, Berisha n’burg’.

Regjimi islamik i Iranit nisi të paktën katër dronë sulmues me një drejtim kundër anijeve që lundronin nëpër Ngushticën e Hormuzit, sipas deklaratës së bërë nga Presidenti i SHBA-së Donald Trump në një mesazh në mediat sociale.

Në këtë kontekst, ai foli për një “shkelje të marrëveshjes së armëpushimit”.

Siç theksoi ai, një nga dronët goditi me forcë kuvertën e sipërme të një anijeje mallrash të madhe dhe shumë të shtrenjtë.

“Pati dëme, por anija arriti të vazhdonte kursin e saj. Ne i rrëzuam tre dronët e tjerë”, tha presidenti amerikan.

Bashkëthemeluesi i Microsoft, Bill Gates, ka pranuar gjatë një dëshmie para një komisioni të Kongresit amerikan se ka pasur tre lidhje jashtëmartesore me gra që, sipas dokumenteve të publikuara, kishin gjithashtu lidhje me financierin famëkeq Jeffrey Epstein.

Sipas dëshmisë, Gates identifikoi si partnere Mila Antonova, lojtare profesioniste e bridge-it, Karima Nigmatulina, fizikane bërthamore, si dhe mjeken dhe sipërmarrësen Alice Jacobs Nesselrodt. Ai deklaroi se marrëdhënia me Nesselrodt kishte nisur para vitit 2010, ndërsa lidhjet me dy gratë e tjera u zhvilluan disa vite më vonë, kur ato ishin në të 20-at dhe të 30-at.

Miliarderi 70-vjeçar tha se ia kishte pranuar ish-bashkëshortes së tij, Melinda French Gates, lidhjen me Nesselrodt shumë vite më parë, ndërsa për marrëdhëniet me Antonovën dhe Nigmatulinën kishte folur në pranverën e vitit 2013. I pyetur nëse besonte se këto tradhti kishin ndikuar në vendimin e Melindës për t’u divorcuar në vitin 2021, Gates u përgjigj se kjo ishte e mundur.

Në dëshminë e tij, Gates deklaroi gjithashtu se Jeffrey Epstein kishte marrë dijeni për marrëdhëniet e tij me dy gratë dhe kishte lënë të kuptohej se mund ta shantazhonte. Sipas Gates, Epstein kishte shkëmbyer e-maile që sugjeronin se po shqyrtonte një mundësi të tillë, megjithëse ai këmbënguli se nuk ishte shantazhuar kurrë.

Gates pranoi se kishte pasur edhe marrëdhënie të tjera jashtëmartesore gjatë martesës së tij, por theksoi se ato nuk kishin asnjë lidhje me Epstein. Ai hodhi poshtë gjithashtu pretendimet e përfshira në dokumente të publikuara nga Departamenti amerikan i Drejtësisë, sipas të cilave njëra prej grave i kishte transmetuar një sëmundje seksualisht të transmetueshme ose se ai kishte kërkuar ndihmën e Epstein për të siguruar antibiotikë.

Në të njëjtën dëshmi, Gates tha se mund të ketë qenë në prani të disa prej viktimave të Epstein gjatë takimeve që kishte zhvilluar me të, por mohoi kategorikisht çdo sjellje të papërshtatshme ose përfshirje në veprimtari të paligjshme. Përfaqësuesit e tij kanë deklaruar edhe më herët se takimet me Epstein ishin një “gabim”, duke mohuar çdo lidhje të Gates me aktivitetet kriminale të financierit.

Publikimi i dëshmisë ka rikthyer në qendër të vëmendjes raportimet e viteve të fundit mbi jetën private të Gates. Në vitin 2021, gjatë një interviste për CBS, Melinda French Gates tha se marrëdhënia e ish-bashkëshortit të saj me Jeffrey Epstein kishte qenë një nga faktorët që ndikuan në fundin e martesës së tyre 27-vjeçare. Kur u pyet për akuzat se Gates kishte qenë vazhdimisht i pabesë, ajo u përgjigj se ishte ai që duhej t’u përgjigjej këtyre pyetjeve.

Raportime të ndryshme mediatike kanë pretenduar gjithashtu se Gates kishte pasur marrëdhënie me punonjëse të Microsoft dhe të Fondacionit Gates. Në vitin 2019, bordi i Microsoft nisi një hetim pasi një inxhiniere raportoi një marrëdhënie me Gates që kishte ndodhur vite më parë. Në vitin 2020 ai u largua nga bordi drejtues i kompanisë, ndërsa zëdhënësi i tij deklaroi se marrëdhënia kishte përfunduar në mënyrë miqësore dhe nuk kishte lidhje me vendimin për largimin.

Sipas raportimeve të The Wall Street Journal, Gates kishte njohur Mila Antonovën rreth vitit 2010 gjatë një turneu bridge-i. Më vonë, Antonova krijoi kontakte edhe me Jeffrey Epstein, i cili financoi studimet e saj në programim kompjuterik dhe më pas kërkoi që Gates t’ia rimbursonte këto shpenzime. Ky episod është përmendur si një nga arsyet pse u ngritën dyshime se Epstein mund të përpiqej të ushtronte presion ndaj miliarderit.

Në media janë publikuar edhe pretendime për një marrëdhënie mes Gates dhe neurokirurges Melanie Walker, e cila kishte punuar për Fondacionin Gates dhe njëkohësisht kishte qenë për vite me radhë e afërt me Epstein. Avokati i Walker e ka përshkruar atë si një të mbijetuar të abuzimeve të Epstein, ndërsa përfaqësuesit e Gates kanë pranuar se marrëdhënia mes tyre ishte konsensuale, duke mohuar çdo element të paligjshëm.

Për vite me radhë, Bill Gates është identifikuar si një nga sipërmarrësit dhe filantropët më të njohur në botë përmes Fondacionit Gates, i cili ka investuar miliarda dollarë në luftën kundër varfërisë dhe sëmundjeve infektive. Megjithatë, publikimi i dëshmisë dhe dokumenteve të reja ka rikthyer në qendër të debatit publik jetën e tij personale, marrëdhëniet jashtëmartesore dhe kontaktet me Jeffrey Epstein, çështje që vazhdojnë të ndikojnë në reputacionin e tij.

Qytetarët janë mbledhur në ditën e 27-të të protestës në sheshin “Skëndërbej”, për të marshuar më pas drejt Kryeministrisë ku edhe mbahen fjalimet.

Prej disa ditësh, kërkesat e artikuluara nga grupi koordinues janë dorëheqje e panegociueshme e kryeministrit Edi Rama, krijimi i një qeverie teknike 12 mujore dhe ndërhyrje të rëndësishme kushtetuese.

Mes të tjerash, ata kanë kërkuar ndryshimin e Kodit Zgjedhor, ndryshimin e ligjit për financimin e partive politike dhe kufizimin e ushtrimit të detyrës së kryeministrit në jo më shumë se 2 mandate.

Vala ekstreme e të nxehtit që ka përfshirë Spanjë ka shkaktuar të paktën 327 viktima që nga 21 qershori, ndërsa vendi ka regjistruar disa nga temperaturat më të larta të muajit qershor në histori.

Sipas agjencisë kombëtare meteorologjike spanjolle, vala e të nxehtit përfundoi të enjten, por pasojat e saj kanë qenë dramatike. Bazuar në të dhënat që datojnë që nga viti 1950, 23 qershori u regjistrua si dita më e nxehtë e qershorit e regjistruar ndonjëherë në vend.

Temperaturat më ekstreme u shënuan në veri të Spanjës, ku Aeroporti i Bilbaos vendosi rekorde të reja si për temperaturat maksimale gjatë ditës, ashtu edhe për ato minimale gjatë natës.

Që nga fillimi i sezonit të monitorimit të temperaturave të larta në mesin e muajit maj, autoritetet shëndetësore spanjolle kanë regjistruar gjithsej 611 vdekje të lidhura me nxehtësinë ekstreme.

Ndërkohë, vala e të nxehtit ka goditur edhe pjesë të tjera të Evropës. Francë regjistroi ditën e saj më të nxehtë më 24 qershor, me temperaturën mesatare që tejkaloi 30 gradë Celsius për herë të parë gjatë 24 orëve, ndërsa gjatë javës së fundit janë raportuar edhe 40 viktima nga mbytja.

Tensionet në Ngushticën e Hormuzit janë rikthyer, duke vënë në pikëpyetje marrëveshjen paraprake për armëpushim mes Iranit dhe Shteteve të Bashkuara.

Organizata Ndërkombëtare Detare e OKB-së pezulloi përkohësisht operacionin e shoqërimit të anijeve, pasi një anije tregtare raportoi se ishte sulmuar pranë brigjeve të Omanit. Kompania tajvaneze Evergreen Marine bëri të ditur se një prej anijeve të saj u godit nga një objekt i panjohur, ndërsa dy zyrtarë amerikanë thanë për Reuters se sulmi ishte kryer nga Irani.

Nga ana tjetër, autoritetet iraniane deklaruan se nuk do të garantojnë sigurinë e anijeve që lundrojnë jashtë korridoreve detare të miratuara nga Teherani, ndërsa Garda Revolucionare paralajmëroi se do të ndërmarrë masa ndaj atyre që nuk respektojnë udhëzimet.

Çdo anije që lundron jashtë korridoreve detare të përcaktuara nga Autoriteti i Ngushticës së Gjirit Persik nuk do të përfitojë nga garancia për kalim të sigurt dhe nuk do të mbulohet nga sigurimi apo detyrimet përkatëse. Ngushtica e Hormuzit, përmes së cilës kalon rreth një e pesta e naftës dhe gazit të lëngshëm në botë, mbetet një pikë kyçe e tensioneve.

Megjithatë, ka shenja të rikthimit gradual të aktivitetit, pasi Arabia Saudite ka rifilluar ngarkimin e naftës në terminalin Ras Tanura dhe gjithnjë e më shumë anije po largohen nga zona. Ndërkohë, Sekretari amerikan i Shtetit, Marco Rubio, paralajmëroi se çdo përpjekje e Iranit për të bllokuar lundrimin në ngushticë do të kishte pasoja.

Mosmarrëveshjet për kontrollin e Hormuzit, programin bërthamor të Iranit dhe çështje të tjera vazhdojnë të sfidojnë marrëveshjen e armëpushimit, e cila parashikon 60 ditë negociata për zgjidhjen e tyre.

Një argjendar nga Dubai ka transformuar një trofe të Kupës së Botës me Lego të montuar nga djali i tij në një copëz arti të zbukuruar me diamante.

Me një vlerë prej gati 300,000 dirhamësh (81,688 dollarë), Hemant Karamchandani shtoi 900 copë diamante, të vendosura në ar 18 karatësh në trofeun Lego, në një projekt që ai tha se i mori 35 ditë për ta përfunduar.

“Nuk po kërkojmë ta shesim”, tha autori i veprës, i cili zotëron një dyqan bizhuterish në Dubai. “Mund të shkojë për bamirësi ose ndoshta do të përfundojë në Muzeun e së Ardhmes së Dubait”, shtoi ai. Karamchandani tha se fillimisht shtoi një pllakë me emrin e Kupës së Botës FIFA të zbukuruar me diamante, përpara se të vendoste të përfshinte më shumë diamante në dizajn. “Mund ta kisha mbushur (trofeun) me diamante”, tha argjendari 48-vjeçar.

“Nuk dua ta bëj shumë të shtrenjtë, e dini, kështu që arsyeja pse zgjodha copa shumë delikate është se dua ende elementin e trofeut”, shtoi ai.

Kupa e Botës është duke u zhvilluar në Shtetet e Bashkuara, Kanada dhe Meksikë.

Ministri i Turizmit, Kulturës dhe Sportit, Blendi Gonxhja, ka folur ditën e sotme pas mbledhjes së Qeverisë, për plazhet publike me pagesë.

Gonxhja tha se disa prej plazheve publike janë tarifuar deri në 1000 lekë të reja. Kjo pasi sipas ministrit Gonxhja, mirëmbajtja e plazheve në Ksamil dhe zona të tjera në jug të vendit ka kosto më të larta.

“Numri i vizitorëve në vendin tonë është në nivele rekorde që nuk i kemi parë më parë. Kemi një risi të rëndësishme sivjet, përsa i takon menaxhimit të stacioneve të plazheve, për të bërë të mundur që të kemi një rregullator në treg përsa i takon çmimeve dhe tarifave. Dhe duke shtuar një tipologji të re që është tipologjia e plazheve publike të menaxhuara nga njësitë e vetë-qeverisjes vendore. Krahas plazhit të virgjër, kemi edhe tipologjinë e plazheve, që disa bashki i kanë vendosur të gjitha shërbimet, edhe çadra, edhe shezlonge, apo dushe, i cili në disa prej bashkive është tarifuar në 700 lekë apo 1000 lekë. Kjo në varësi të plazheve.

Sepse kur shkojmë drejt jugut, drejt Ksamilit, natyrisht që kostot e mirëmbajtjes së këtyre plazheve, apo kostot që janë jashtë periudhës jashtë sezonit, për të mbajtur rërën, për të ruajtur plazhet nga erozioni, nga ndikimi i detit gjatë dimrit, etj, kostot që këto brigje kanë, janë shumë më të lartë. Për këtë arsye edhe kërkesa është më e lartë. Ka disa tarifa që janë pak më të larta. Tipologjitë e plazheve, kanë bërë që edhe plazhet private të ruajnë tavanet e çmimeve, për shkak të konkurrencës nga këto plazhe publike”, tha mes të tjerash Gonxhja.

Ditën e sotme u mbajt mbledhja e radhës e qeverisë dhe një prej tyre ishte edhe miratimi i 300 kuotave për kreditë e buta për punonjësit e administratës. Miratimin e ligjit e njoftoi ministrja e Ekonomisë, Delina Ibrahimaj.

“Morëm vendim për administratën publike, miratuam kuotat e rreth 300 kredive të buta me normë interesi zero. Policia e Shtetit, ajo e burgjeve, arsimtarëve, mjekëve dhe ushtarakëve, që do të kenë nga 70 kuota. Miratuam dy ligje që vlejnë për rrugëtimin në BE.

Kemi miratuar projektligjin për emëtuesit e titujve, i përafruar me direktivat europiane. Me Ministrinë e Arsimit kemi miratuar një projekt vendim për rritjen e masave të bursave për shkollat profesionale si dhe për ushqimin në shkolla”, u shpreh Ministrja.

Shpërthime të fuqishme u dëgjuan në Kiev, pak minuta pasi autoritetet ukrainase lëshuan alarmin për raketa ruse që po drejtoheshin drejt kryeqytetit.

Kreu i administratës ushtarake të Kievit, Timur Tkachenko, njoftoi se Rusia kishte lëshuar raketa balistike drejt qytetit, ndërsa u bëri thirrje qytetarëve të strehoheshin menjëherë.

Edhe kryebashkiaku i Kievit, Vitali Klitschko, konfirmoi se sistemet e mbrojtjes ajrore ishin aktivizuar për të neutralizuar sulmin dhe u kërkoi banorëve të qëndronin në strehimore deri në përfundimin e alarmit.

Sipas Klitschkos, mbeturinat e një rakete të rrëzuar shkaktuan një zjarr në lagjen Darnitsky të kryeqytetit. Deri më tani nuk ka informacione zyrtare për viktima apo të plagosur, ndërsa autoritetet vijojnë vlerësimin e situatës.

Sulmi vjen në një kohë kur Rusia ka intensifikuar goditjet ajrore ndaj qyteteve ukrainase, duke mbajtur nën presion kryeqytetin dhe infrastrukturën strategjike të vendit.

Në Kukës kanë nisur punimet për ndërtimin e Institucionit të ri të Ekzekutimit të Vendimeve Penale, një investim me vlerë 6.4 milionë euro që synon modernizimin e sistemit penitenciar në vend.

Në ceremoninë e zhvilluar me këtë rast ishte i pranishëm ministri i Drejtësisë, Toni Gogu, i cili e cilësoi projektin si një hap të rëndësishëm në vijimin e reformës në drejtësi dhe përmirësimin e kushteve në sistemin e vuajtjes së dënimit.

Sipas ministrit Gogu, objekti i ri do të ndërtohet në territorin e ish-batalioneve ushtarake dhe do të ketë një kapacitet për 150 persona të privuar nga liria. Ai shtoi se institucioni do të ndihmojë gjithashtu në akomodimin e rreth 40 shtetasve të Kosovës që vuajnë dënimin në Shqipëri, duke i afruar më pranë familjeve të tyre.

Projekti parashikon gjithashtu krijimin e rreth 140 vendeve të reja pune për komunitetin lokal, duke dhënë një ndikim ekonomik në zonë.

Duke folur për reformën në drejtësi, ministri theksoi se ajo nuk përfundon me vendimin e gjykatës, por vazhdon edhe me mënyrën se si shteti administron ekzekutimin e dënimeve.

“Reforma në drejtësi nuk përfundon te gjykata. Ajo vazhdon edhe në mënyrën se si shteti administron vuajtjen e dënimit,” u shpreh Gogu.

Ai nënvizoi gjithashtu se sistemi penitenciar duhet të garantojë njëkohësisht sigurinë dhe respektimin e të drejtave të njeriut, duke e konsideruar këtë si një nga objektivat kryesore të reformës.

Ministri i Bujqësisë, Andis Salla, deklaroi se institucionet përgjegjëse kanë marrë të gjitha masat për izolimin dhe bllokimin e ambienteve në Akademinë e Sigurisë, pas helmimit të 64 kursantëve që dyshohet se u shkaktua nga ushqimi i konsumuar në institucion.

Në një deklaratë për mediat, Salla bëri të ditur se hetimet po zhvillohen në bashkëpunim me Policinë e Shtetit dhe organet e tjera ligjzbatuese, me qëllim identifikimin dhe vënien para përgjegjësisë të personave përgjegjës.

“Kemi marrë të gjitha masat për të izoluar dhe bllokuar ambientet në Akademi, ndërsa Policia e Shtetit dhe institucionet e tjera po vijojnë hetimet për të zbardhur ngjarjen dhe për të vendosur para drejtësisë përgjegjësit,” u shpreh ministri.

Salla kujtoi gjithashtu se në rastin e parë të raportuar në Akademinë e Sigurisë, analizat treguan se shkaku nuk lidhej me ushqimin, por me mungesën e higjienës.

“Në helmimin e parë nuk rezultoi helmim nga ushqimet, por problematika lidhej me higjienën. Do të presim rezultatet e analizave që pritet të dalin sot për të përcaktuar shkakun e këtij rasti dhe për të identifikuar problematikën që duhet parandaluar përmes Autoritetit Kombëtar të Ushqimit (AKU),” tha ai.

Kryeministri Edi Rama ka mirëpritur në Tiranë ish-presidentin e Francës, François Hollande, të cilin e ka nderuar me Medaljen e Artë të Mirënjohjes Publike për kontributin e tij në forcimin e marrëdhënieve mes Shqipërisë dhe Francës.

Përmes një postimi në Facebook, Rama e cilësoi vizitën e Hollande si një kënaqësi dhe privilegj, duke vlerësuar mbështetjen e tij të vazhdueshme për Shqipërinë.

“Në shenjë mirënjohjeje për miqësinë, mbështetjen dhe kontributin e tij në forcimin e marrëdhënieve mes Shqipërisë dhe Francës, pata nderin t’i akordoj Medaljen e Artë të Mirënjohjes Publike”, shkroi kryeministri Rama.

Rama vlerësoi gjithashtu rolin e ish-presidentit francez në promovimin e Shqipërisë në arenën ndërkombëtare, mbështetjen për integrimin europian të vendit dhe besimin e tij se Shqipëria ka një rol gjithnjë e më të rëndësishëm në një Evropë të bashkuar.

Reagimi i plotë;

Kënaqësi dhe privilegj të mirëprisja Presidentin e Francës, François Hollande

Në shenjë mirënjohjeje për miqësinë, mbështetjen dhe kontributin e tij në forcimin e marrëdhënieve mes Shqipërisë dhe Francës, pata nderin t’i akordoj Medaljen e Artë të Mirënjohjes Publike

Vlerësim edhe për mbështetjen e tij të vazhdueshme në promovimin e Shqipërisë në arenën ndërkombëtare, për inkurajimin e rrugëtimit tonë europian dhe për besimin se vendi ynë ka një rol gjithnjë e më të rëndësishëm në një Evropë të bashkuar.

55 persona humbën jetën në Francë nga nxehtësia rekord, tha ministrja e Sportit, Marina Ferrari për transmetuesin Franceinfo. Qeveria ka frikë se ky numër mund të rritet në ditët në vijim, pasi 61 departamente franceze janë nën alarm të kuq të nxehtësisë dhe 25 të tjera nën alarm portokalli të premten, sipas transmetuesit.

Autoritetet presin që 11 departamente të ulen nga alarmi i kuq në portokalli të premten në mbrëmje ndërsa 13 të tjerë do të hiqen nga lista e alarmit të kuq të shtunën në mëngjes.

Sipas “Meteo-France”, temperaturat pritet të lëvizin midis 36 dhe 41 gradë Celsius në pjesë të ndryshme të vendit të premten.

Ministrja e Shëndetësisë, Stephanie Rist paralajmëroi të enjten se spitalet mund të përballen me një fund të vështirë të javës pasi vizitat e departamentit të urgjencës dhe thirrjet në shërbimet e urgjencës u rritën për shkak të valës së të nxehtit, sipas BFMTV.

Prefekti i Policisë së Parisit, Patrice Faure tha se spitalet në Paris dhe rajonin përreth ishin tashmë të mbingarkuar.

Kryeministri Sebastien Lecornu njoftoi të enjten aktivizimin e planit të urgjencës shëndetësore të nivelit të tretë ORSAN, për të cilin ai tha se përfaqëson “nivelin më të lartë të mobilizimit të kujdesit shëndetësor”.

Autoritetet e Parisit njoftuan ndalimin e konsumit të alkoolit në publik nga mesdita e së premtes si pjesë e masave për të menaxhuar efektet e valës së të nxehtit.

Në një intervistë ekskluzive për gazetaren Anna La Rosa të agjencisë italiane Italpress, kryeministri Edi Rama foli për temat kryesore që dominojnë debatin politik në Shqipëri dhe marrëdhëniet me Evropën, nga procesi i integrimit në Bashkimin Evropian dhe marrëveshja me Italinë për emigrantët, deri te polemikat për projektin turistik në jug të vendit, që po kundërshtohet nga lëvizja “Revolucioni i Flamingove”.

Duke folur për rrugëtimin evropian të Shqipërisë, Rama u shpreh se procesi i integrimit është i pakthyeshëm.

“Siç thoshte Churchill, nuk duhet humbur kurrë një krizë e mirë. Besoj se ka gjëra nga të cilat duhet të mësojmë dhe për të cilat duhet të reflektojmë, por ndërkohë askush nuk mund ta ndalë rrugën e Shqipërisë drejt Bashkimit Evropian”, tha ai.

Kryeministri u ndal edhe te marrëveshja mes Shqipërisë dhe Italisë për emigrantët, e cila muajt e fundit ka qenë në qendër të debateve të forta politike.

“Është bërë shumë zhurmë për diçka që, në fund të fundit, nuk ishte gjë tjetër veçse një përpjekje e bërë me mirëbesim për të gjetur një zgjidhje. Fakti që sot kjo qasje është pranuar nuk përbën ndonjë fitore, por është një tjetër dëshmi e kohës së humbur në beteja që shpesh nuk janë as beteja të vërteta, por thjesht përplasje të kota në debatin publik”, u shpreh Rama.

Sipas tij, “Koha e humbur para se të arrihet në një qëndrim të përbashkët është problemi i vërtetë që duhet të adresojmë”.

Rama u ndal gjerësisht edhe te protestat e lëvizjes “Revolucioni i Flamingove” kundër projektit të resortit në jug të vendit. Ai hodhi poshtë akuzat e ngritura ndaj tij, duke i cilësuar ato si të pabazuara dhe duke thënë se po dëmtojnë imazhin e Shqipërisë.

“Prej vitesh më kanë akuzuar për gjithçka. Nuk e di nëse ka mbetur ende ndonjë gjë që nuk ma kanë faturuar”, tha Rama.

Sipas tij, kjo situatë “më dhemb thellësisht, sepse në atë moment nuk bëhet më fjalë vetëm për mua, por për Shqipërinë”.

Sipas kryeministrit, rreth kësaj çështjeje është ndërtuar një narrativë e pabazuar.

“Si mund t’u përgjigjesh këtyre akuzave? Kemi arritur në një pikë ku duket se është përmbysur një parim themelor: janë ata që akuzojnë ata që duhet të sjellin prova, jo i akuzuari të detyrohet vazhdimisht të provojë pafajësinë e tij. Ky i ashtuquajtur ‘Revolucion i Flamingove’ në fillim dukej thuajse si subjekt filmi. Sot më duket se protesta ka marrë një drejtim tjetër dhe është zhvendosur në çështje të tjera. Nëse më akuzojnë se kam dhënë këto toka apo se kam dëmtuar një pjesë të mrekullueshme të bregdetit shqiptar, atëherë le të sjellin provat. Deri më sot nuk është paraqitur asnjë provë. Askush nuk ka vërtetuar asgjë. Dhe nuk mund të ketë prova, sepse procesi është ende në zhvillim”, deklaroi Rama.

Ai shtoi se “ende nuk është nënshkruar asnjë marrëveshje, pasi negociatat nuk kanë përfunduar”.

Sa i takon zhvillimit tjetër që parashikohet në një pronë private, Rama theksoi se shteti nuk ka asnjë rol në këtë proces.

“Shteti dhe qeveria nuk kanë asnjë lidhje me të. Ende nuk ka një leje ndërtimi dhe procedurat janë ende në zhvillim. Kemi arritur vërtet në një situatë paradoksale”, u shpreh ai.

Megjithatë, Rama tha se i kupton arsyet e qytetarëve që dolën në protestë, por kritikoi mënyrën se si, sipas tij, çështja është shndërruar në një debat ndërkombëtar.

“Dua ta them qartë se i kuptoj plotësisht ata që protestuan. E kam thënë edhe publikisht: po të isha në vendin e tyre dhe të dëgjoja gjithçka që është thënë, ndoshta do të ndjeja të njëjtën pakënaqësi dhe të njëjtin indinjim. Por nëse më pas do të dëgjoja edhe palën tjetër, në këtë rast qeverinë, që të më thoshte: ‘Eja të të tregoj se asgjë nga ato që të kanë thënë nuk është e vërtetë, nuk ka prova’, do të isha qetësuar dhe do të isha kthyer në shtëpi”, tha Rama.

Sipas tij, sot debati ka kaluar përtej çështjes së flamingove.

“Fatkeqësisht, sot nuk flitet më as për flamingot. Flamingot janë bërë një simbol i dobishëm për ata që duan ta çojnë këtë çështje në arenën ndërkombëtare. Në planin lokal kemi të bëjmë me një konflikt që përfshin grupe të ndryshme të shoqërisë, përfshirë edhe opozitën. Por në arenën ndërkombëtare ai është shndërruar në një betejë kundër Donald Trump”, përfundoi kryeministri. /Italpress

Gjykata e Posaçme ka dënuar me burgim të përjetshëm Plaurent Dervishajn për atentatin ndaj ish-prokurorit Arjan Ndoja ku mbeti i vrarë shoferi Andi Maloku dhe u plagos ish-prokurori dhe Aleksandër Laho, i njohur si “Rrumi”. Për Julian Meçen gjykata vendosi 35 vite burgim.

Edhe SPAK kishte kërkuar të njëjtin dënim duke e akuzuar Dervishajn, pjesë e bandës së Durrësit, se për atentatin e 7 viteve më parë ka vepruar në bashkëpunim jo vetëm me Julian Meçajn, por dhe me personazhe të tjerë si Bledar Polovina, Amar Shkëmbi (alias Dritan), Ramazan Rraja, Endrit Sinani, Genti Nderjaku, Bashkim Haxhija dhe Julian Pjetri. Këta të fundit po gjykohen veçmas.

Të dy të akuzuarit u arrestuan në Dubai, dhe në gusht të vitit 2024 u ekstraduan për tu përballur me akuzat: Dervishaj si organizatori i atentatit ndërsa Meçaj si një nga autorët që qëlloi në drejtim të tij.

Atentati ndaj ish-prokurorit Ndoja, sot deputet i Partisë Demokratike u zbardh plotësisht nga transkriptimi i bisedave në aplikacionin e koduar SKY/ECC, që përdorej masivisht nga elementë të krimit të organizuar në vendin tonë .

Atentati ndodhi me 1 nëntor të vitit 2019, ndërsa Ndoja dhe shoferi i tij po udhëtonin në shoqërinë e Aleksandër Lahos, një personazh i krimit të organizuar, i shpallur në kërkim dhe i njohur përmes nofkës së tij “Rrumi”.

Ndoja ka mohuar të ketë patur kontakte të mëhershme me personazhin e botës së krimit Aleksandër Laho dhe ka dëshmuar se ai njihte vëllain e tij, kurse qenia në një makinë me të ditën e atentatit ishte vetëm rastësi.

Me vendim të formës së prerë për atentatin e 1 nëntorit të 2019, janë dënuar më herët Redjan Rraja me burgim përjetë, Arjol Halilaj me 35 vite, Ramazan Rraja me 6 vite burg, 5.4 vite është dënuar Genti Ndërjaku, me 4.8 Bashkim Haxhia dhe Endrit Sinani si dhe me 4 vite e 4 muaj Julian Pjetri.

Udhëheqësi i Hezbollahut, Sheikh Naim Qassem, ka deklaruar se Izraeli duhet të tërhiqet nga territori libanez “pa kushte”, duke e akuzuar atë se synon ta “gëlltisë dhe pushtojë” Libanin.

Deklaratat e tij u bënë në një fjalim të transmetuar publikisht në një kohë kur tensionet në rajon mbeten të larta.

Qassem u bëri thirrje autoriteteve libaneze të “bashkojnë radhët kundër armikut” dhe të mos ndjekin, sipas tij, “urdhrat e fuqive të huaja”, duke iu referuar Shteteve të Bashkuara dhe Izraelit.

Ai theksoi se rezistenca libaneze do të qëndrojë pranë qeverisë nëse ajo ndjek rrugën e sovranitetit të vendit, por paralajmëroi se qeveria nuk duhet të antagonizojë një pjesë të madhe të popullsisë.

Carlo Ancelotti ka lojtarë shumë të ndryshëm midis sulmuesve të tij, dhe për secilin prej tyre ai ka zgjedhur një qasje të ndryshme.

Në privatësinë e kampit stërvitor të Morristown, gjërat janë të menaxhuara sa më mirë të jetë e mundur. Ky është Brazili, gjithçka zmadhohet, duhet të komunikosh dhe të komentosh. Njerëzit flasin, kërkojnë, gjykojnë. Dhe linja e zgjedhur nga Ancelotti me stafin e tij është e qartë si kristali.

Vinicius i zhbllokuar – Për muaj të tërë, trajneri i Brazilit na ka thënë se kjo do të jetë Kupa e Botës e Vinicius, dhe kështu është. Sulmuesi i fishkëllyer nga tifozët e Realit në Bernabeu ka qenë i përfshirë në të gjashtë golat e Brazilit në këtë Kupë Bote: katër prej tyre janë të tijët, plus një asist dhe një gjuajtje e devijuar nga Matheus Cunha.

“Carlo më kërkon të bëj lëvizje të caktuara dhe po funksionon. Ai padyshim e kupton futbollin,” tha Vini disa ditë më parë para mediave. Dhe mbrëmë, duke komentuar për golin e tij të parë me kokë në dy vite, u shpreh: “Carlo më tha se do të më jepte një dhuratë nëse shënoja me kokë”.

Ancelotti e “përkëdhel” Vinin, duke e ditur se ai është ylli i tij i vetëm i madh (Neymar është një temë më vete), se gjithçka varet prej tij. Ai i tregoi besim të verbër kur lojtari i Real Madridit kishte shifra të këqija në ekipin kombëtar, 8 gola në 49 ndeshje. Ancelotti e kishte zhbllokuar Vinin kur ai mbërriti në Madrid, dhe bëri të njëjtën gjë për Brazilin.

“Vini është shumë i mirë,” tha trajneri italian mbrëmë, shkruan A2.

Qendërsulmuesi – Trajneri Ancelotti filloi Botërorin me Igor Thiago sepse donte të provonte qendërsulmuesin klasik. Nuk funksionoi, kështu që ai vendosi për Matheus Cunha, qendërsulmuesin e United: 3 gola në 2 ndeshje.

Të rinjtë – Carlo Ancelotti ka dy lojtarë të lindur në vitin 2006. Endrick, shumë të vlerësuar, dhe Rayan e panjohur, i cili luan për Bournemouth. Të gjithë duan të parin, por në vend të tij luan i dyti. Ai u zgjodh si zëvendësues për Raphinha e dëmtuar dhe mbrëmë u bë titullari i parë i Brazilit nën 20 vjeç në një Kupë Bote që nga viti 1970.

Ironi kundër tensionit – Me Endrick-un, të cilin Ancelotti e kishte tashmë te Real Madridi, por rrallë e përdorte, trajtimi është i ndryshëm: “Endrick është një talent i jashtëzakonshëm dhe ka një cilësi të shkëlqyer: durimin. Edhe familja e tij e ka këtë cilësi. Ai do të jetë një lojtar kyç në Kupën e Botës të ardhshme dhe do të ketë vend edhe në këtë.” Shkurt, Ancelotti ka qetësuar një atmosferë shumë të nxehtë mbi këtë temë. Në Brazil mendojnë se Endrick është një fenomen. Për fat të mirë për Carlon, marrëdhënia e tij me djaloshin e Madridit është bërë meme, ironia ka mbizotëruar mbi tensionin dhe një galeri qesharake me skica sureale është krijuar në mediat sociale, me temën “çfarë duhet të bëjë Endrick për të luajtur?”, me trajnerin që bën gjithçka për të shmangur përdorimin e tij.

Kryeministri izraelit Benjamin Netanyahu dhe Ministri izraelit i Mbrojtjes, Israel Katz, thanë se forcat izraelite do të mbajnë një prani të pacaktuar në zonat e sigurisë të vendosura në të gjithë Libanin jugor, Sirinë dhe Rripin e Gazës.

Kryeministri gjithashtu foli për fërkimet me aleatët ndërkombëtarë, duke treguar konkretisht një ndalesë të përkohshme të dërgesave të municioneve nga Shtetet e Bashkuara gjatë konfliktit.

“Ne dominojmë Libanin jugor nga maja e Beaufort dhe do të qëndrojmë për aq kohë sa të jetë e nevojshme në zonën e sigurisë në Libanin jugor. Nuk kemi ndërmend të tërhiqemi prej saj.”

“Presionet nga jashtë përfshinin një ndalim të furnizimit me municione gjatë luftës, dhe ju, më shumë se të gjithë, e dini sa e rëndësishme është kjo. Dhe më është dashur t’u them miqve tanë amerikanë – ata më pyetën se si do të luftonim – dhe unë u thashë atyre: nëse do të na duhet, do të luftojmë me thonjtë tanë.”

“Sa i përket regjimit të së keqes në Iran, do të them vetëm këtë: me ose pa marrëveshje, për sa kohë që unë jam Kryeministër i Izraelit, Irani nuk do të ketë armë bërthamore. Në asnjë rrethanë nuk do ta lejojmë Iranin të zhvillojë bomba bërthamore.”

“IDF do të mbetet në zonat e sigurisë në Liban, në Siri dhe në Gaza pa asnjë kufizim kohor.“

Sezoni turistik vjen me masa të shtuara sigurie, tha kryepolici Hita nga Durrësi. Ato më të rëndësishme lidhen me sigurinë detare pasi këtë sezon, monitorimi do të bëhet edhe me dronë. Gjithashtu, mjetet detare që u përkasin shtetasve të huaj do të verifikohen në kohë reale. Në njësinë detare, janë në dispozicion rreth 35 motorë uji dhe personel i trajnuar.

“Ne po aplikojmë me sukses praninë e efektivëve me biçikleta në pedonale dhe vijën bregdetare. Kjo rrit efikasitetin dhe komunikimin e drejtpërdrejtë me qytetarët. Vëmendje e veçantë i kushtohet sigurisë detare dhe Njësia Policore Detare është në gatishmëri të plotë 24/7. Patrullimet shtrihen përgjatë gjithë vijës bregdetare.

Këtë sezon, njësia policore detare do të mbështetet edhe nga ajri, përmes dronëve. Nuk do të tolerohet asnjë shkelje me mjetet lundruese që rrezikojnë jetën e pushuesve. Shërbimet tona do të kryejnë verifikimet dhe regjistrimet e mjeteve lundruese të huaja duke verifikuar në TIMS”, tha Hita.

Një nga kërkesat kryesore të Hitës ishte edhe vigjilenca e shtuar e efektivëve dhe trajtimi i qytetarëve me etikë e humanizëm, teksa nxiti edhe bashkëpunimin e këtyre të fundit me policinë.

Ministri i Brendshëm, Besfort Lamallari, tha se sezoni turistik është sprova e shërbimit të Policisë së Shtetit.

“Policia e Shtetit ka barrën kryesore në këto muaj me fluks të lartë. Sezoni veror është sprova më e madhe e shërbimit tuaj. Ne kemi detyrimin të dëshmojmë se jemi gati me të gjitha kapacitetet tona. Kemi marrë masat e nevojshme për të garantuar një sezon të qetë e të sigurt”, tha ministri duke shtuar: “Puna juaj matet me jetë të shpëtuara, rendin e garantuar dhe besimin e qytetarëve.”

Lamallari mënvizoi objektivin për një sezon turistik me standarde sa më të larta sigurie.

“Le të punojmë së bashku që sezoni turistik 2026 të jetë sezoni më i sigurt që Shqipëria ka njohur ndonjëherë, që çdo vizitor të largohet me kujtime të bukura dhe Shqipëria të vazhdojë të jetë një histori suksesi që frymëzon dhe tërheq botën”, përfundoi ministri.