Dy fëmijë kanë ndërruar jetë dhe një tjetër ndodhet në gjendje të rëndë në Spitalin e Traumës, pasi u përplasën nga një automjet në zonën e ish-Kënetës në Durrës.

Të miturit kanë qenë duke luajtur në trotuarin pranë banesës, ndërsa janë përplasur nga mjeti i drejtuar nga Nikoll Radaçi. Ky i fundit është larguar nga vendngjarja, por është ndaluar më pas nga policia, ndërsa në testin e alkoolit ka rezultuar me nivele të larta. Sipas banorëve, Radaçi njihet si person që në zonën e ish-Kënetës, ku dhe banonte vetë, drejtonte mjetin me shpejtësi tepër të lartë.

Kryetari Partisë Demokratike, Sali Berisha, ka reaguar ndaj deklaratave të fundit të Edi Ramës, duke i cilësuar ato si pjesë e “ritualit të zakonshëm të monologut të mashtrimeve”.

Në një videomesazh të shpërndarë në rrjetet sociale,  Berisha thekson se PD mbështet plotësisht investimet amerikane në Shqipëri, pavarësisht se, sipas tij, opozita nuk ka asnjë njohuri për marrëveshjet e firmosura.

Megjithatë, Berisha i cilësoi si fantazi premtimet e kryeministrit për ndërtimin e anijeve luftarake për eksport në Pashaliman.

“Sot në ritualin e zakonshëm të monologut të mashtrimeve të së dielës, Edi Rama foli për sigurinë energjetike.
Me këtë rast, unë dua të deklaroj se Partia Demokratike mbështet plotësisht investimet amerikane në Shqipëri, ndonëse ajo nuk ka asnjë njohuri për marrëveshjet e firmosura. Sikundër, kjo parti mbështet përpjekjet e qeverisë së Shteteve të Bashkuara për diversifikimin e furnizimit me gaz në Europën Juglindore, në Europë dhe më gjerë Por në këtë monolog, Edi Rama u deklaroi shqiptarëve se nga Pash Alimani do të ndërtohen anije luftarake për eksport për vende të tjera. Një gjë e njëjtë lloji me fantazinë e tij se samiti i NATO-s sipas tij do mbahet në 2027-ën në Shqipëri dhe po sipas tij, ky samit do të garantohet dhe sigurohet nga dronë Made in Albania. Domethënë, Shqipëria do prodhojë dronët më të sofistikuar“, tha Berisha. 

“Së fundi, Edi Rama bëri fjalë dhe për një arritje tjetër të madhe, sepse një NGO ka vendosur të mbajë në Shqipëri kongresin e saj vitin e ardhshëm. Në fakt, sipas tij, kjo është Shoqata Botërore e Juristëve dhe që kongresi do të jetë, do t’i kushtohet ligjit dhe shtetit ligjor. Një lloj kjo me çmimin e ushqimit që mori Sofo Llazri në një kohë kur shqiptarët ishin bark bosh, xhep bosh dhe dyqane bosh. Në fakt, në Shqipëri ata vijnë në një vend ku shteti ligjor është zëvendësuar me kodin e mafies, ku prokuroria është bllokuar tërësisht në përpjekjet e veta në luftën kundër korrupsionit“, vijoi kryedemokrati.

Një ngjarje e rëndë ka ndodhur mesditën e sotme në zonën e ish-Kënetës, në Durrës ku një automjet ka përplasur tre fëmijë, të moshës rreth 10–13 vjeç.

Bëhet me dije se dy prej djemve të mitur kanë ndërruar jetë si pasojë e plagëve të marra, ndërsa një tjetër ndodhet në spital në gjendje të rëndë shëndetësore.

Ndërkohë autori i aksidentit është ndaluar nga policia ndërsa vendngjarje kanë mbërritur shërbimet e emergjencës dhe autoritetet që po punojnë për sqarimin e rrethanave të aksidentit.

Nuk ka vonuar përgjigjja e Ervin Salianjit pas deklaratave dhe sulmeve të bëra sot në Dibër nga Sali Berisha.

Ndërsa Berisha tha se Salianji s’merr dot pjesë në garën për kreun e PD sepse nuk është pjesë e PD, ish-deputeti shprehet se arsyeja e vërtetë është se ai ka frikë nga gara pasi e di se demokratët e kanë braktisur.

Salianji thotë se “Sali ‘brava’, është sot i vetmi politikan në Partinë Demokratike i faktuar nga një gjykatë perëndimore si i lidhur me krimin e organizuar dhe si politikan që i ka përdorur këto lidhje për influencë politike”, duke iu përgjigjur akuzave të bëra prej tij se kohën kur ishte në burg, drekonte me të dënuar që Berisha i sulmonte pasi ishin “në krahun e PS”.

Në postimin e bërë në Facebook Salianji ka publikuar edhe disa dokumente ku sipas tij shihen faktet që e lidhin Berishën me korrupsionin. “Sot nis publikimin e fakteve”, paralajmëron ai.

Më tej Salianji thotë se kreu i PD Saliu sot është i “refuzuar nga ndërkombëtarët, nga shoqëria dhe gjithnjë e më shumë nga vetë demokratët”, një tjetër arsye për të cilën ai thotë se ka frikë të bëjë garë brenda partisë.

Reagimi i plotë i Ervin Salianjit:

Sali “kolltuku” i damkosur, jo i akuzuar kot!

Sali “kolltuku”, alias Sali “brava”, është sot i vetmi politikan në Partinë Demokratike i faktuar nga një gjykatë perëndimore si i lidhur me krimin e organizuar dhe si politikan që i ka përdorur këto lidhje për influencë politike.

Jo nga gjykatat e kapura të regjimit në Shqipëri.

Por nga qeveri të djathta perëndimore dhe nga gjykata britanike.

Ky është fakt. Jo propagandë.

Shfaqja e sotme në Dibër ishte tabloja më e qartë e rënies dhe tregoi pse ky uzurpator nuk bën garë!

Një sallë që nuk mbush dot as dy kate me 200 persona, megjithëse ishte mbledhur i gjithë qarku.

Një lider i braktisur nga demokratët.

Dhe një monolog i mbushur me mashtrime të vjetra.

Kur të lë populli, të mbetet vetëm zëri… dhe ai kthehet në zhurmë!

I njëjti model, i njëjti mentalitet

Lulzim Basha ishte “familjari i dashur” i Saliut:

e promovoi, e përdori dhe e mbrojti.

Sot, edhe pasi u largua Basha, modeli mbeti po ai:

* i njëjti ekip

* të njëjtat vese

* e njëjta mënyrë përzgjedhjeje deputetësh

* e njëjta “opozitë” që ulet në gjunjë për leje, tendera dhe pazare me Ramën

Ka vetëm një ndryshim:

Saliu sot është i refuzuar nga ndërkombëtarët, nga shoqëria dhe gjithnjë e më shumë nga vetë demokratët.

Prandaj nuk bën garë.

Prandaj ka uzurpuar PD-në si frikacak.

Sepse gara e nxjerr zbuluar dhe humb privilegjet dhe paratë per te cilat shet shpirtin!

Sot nis publikimin e fakteve.

Poshtë është një fakt i zi mbi të bardhë:

Vendimi i gjykatës britanike konfirmon se nuk bëhet fjalë për thashetheme, por për prova të mjaftueshme që lidhin Sali Berishën me korrupsion dhe krim të organizuar.

E vërteta e hidhur;

Ndërkohë që demokratët kërkojnë alternativë dhe fitore,

ata mbahen peng nga një figurë që është shpallur problem sigurie nga aleatët strategjikë të Shqipërisë.

Kjo është drama reale e Partisë Demokratike:

jo përballja me kundërshtarin se atë e mundim, por pengmarrja nga e shkuara

Koha e alibive ka mbaruar.

Ose PD ndahet nga e shkuara e korruptuar,

ose mbetet peng i saj.

Shtetasi kinez qe humbi jeetën si pasojë e një aksidenti në aksin Elbasan-Librazhd më 26 Prill, ishte në fakt një biznesmen i rëndësshëm në vendin e tij. Mediat e huaja raportojnë se bëhet fjalë për 60 vjeçarin Li Jianhong, president dhe kryetar i kompanisë “Xinjiang Grand Scape Group” dhe themelues i resortit të skive “Silkroad Mountain Resort” në Urumqi të Kinës.

Li ishte gjithashtu i njohur si sportist ekstrem dhe alpinist. Ai kishte përfunduar ngjitjen e shtatë majave më të larta në botë dhe kishte arritur në të dy polet e Tokës, duke u bërë një nga pak alpinistët kinezë që e kanë përfunduar këtë sfidë. Në vitin 2018 kishte ngjitur malin Everest dhe më pas K2, në vargmalin Karakoram, brenda një periudhe të shkurtër kohe.

Edhe pse i raportuar si turist, mësohet që 60-vjeçari kishte ardhur në Shqipëri për një takim pune.

Biznesmeni ndërroi jetë pasi automjeti i tij u  përplas me një tjetër automjet,  që drejtohej nga një 26 vjeçar shqiptar, i cili më pas ra  në pranga për  “shkelje të rregullave të qarkullimit rrugor”.

Nga Berlini ku ndodhet për të çelur ekspozitën e tij të re, kryeministri Edi Rama njoftoi nënshkrimin e një marrëveshjeje strategjike me Shtetet e Bashkuara të Amerikës për zhvillimin e Qendrës Energjetike të Vlorës dhe furnizimin me gaz të lëngshëm natyror për 20 vitet e ardhshme.

Projekti përfshin transformimin e TEC-it të Vlorës nga naftë në gaz, duke rritur prodhimin e energjisë dhe sigurinë energjetike të vendit.

“Pas investimit domethënës për plotësimin dhe transformimin e TEC-it të Vlorës, një strukturë e cila ka nevojë të plotësohet me komponent tjetër, por që ishte ndërtuar të punonte me naftë dhe do të punojë në fakt me gaz, Shqipëria do të furnizohet me gazin e lëngshëm amerikan për një periudhë 20 vjeçare dhe përmes TEC-it të Vlorës do të prodhojë energji elektrike, duke krijuar një bazë të qëndrueshme për portofolin e diversifikuar të sovranitetit të saj energjetik”, u shpreh Rama.

Sipas tij, kjo nismë do të sjellë investime të reja dhe do të rrisë kapacitetet për sektorë si qendrat e të dhënave dhe inteligjenca artificiale.

“Bashkë me këtë burim energjie do të rritet ndjeshëm edhe volumi i investimeve të reja, si edhe kapaciteti i Shqipërisë për të ushqyer me energji qendrat kompjuterike të të dhënave apo programet e inteligjencës artificiale, që do të përcaktojnë dekadën e ardhshme”, theksoi kryeministri.

Rama theksoi se Vlora do të bëhet një nyje e rëndësishme për shpërndarjen dhe eksportin e gazit përmes lidhjes me gazsjellësin Trans Adriatic Pipeline.

“Vlora do të kthehet kësisoj në një nyje të rëndësishme, qoftë për shfrytëzimin, por qoftë edhe për eksportin e gazit përmes Tap-it, sepse pjesë e kësaj marrëveshje është dhe investimi për lidhjen me tubacion të Vlorës me Fierin ku ndodhet dhe gazsjellësi Transadriatik”.

Një shpërthim ka ndodhur në orët e para të mëngjesit në Tiranë në zonën e njohur si Porcelani.

Mësohet se shpërthimi dyshohet të ketë ndodhur në katin e dytë të një pallati.

Si pasojë janë shkaktuar dëme materiale, ndërsa nuk raportohet për persona të lënduar.

Australia po shkon drejt një arritjeje historike në shëndetësi, duke synuar të bëhet vendi i parë në botë që eliminon kancerin e qafës së mitrës si problem publik deri në vitin 2035, madje ndoshta edhe më herët.

Suksesi i Australisë bazohet në një strategji të fuqishme të shëndetit publik. Që nga viti 2007, vendi ka zbatuar një program kombëtar vaksinimi me vaksinën Gardasil, e zhvilluar nga shkencëtarë australianë, ndërsa që nga viti 2013 vaksinimi përfshin edhe djemtë. Paralelisht, sistemi i avancuar i depistimit ka kaluar nga testi tradicional Pap në testimin më të saktë për HPV, i cili kryhet çdo pesë vjet.

Rezultatet janë të dukshme: që nga viti 1982, rastet dhe vdekshmëria nga ky kancer janë përgjysmuar.  Qe prej vitit 2021 nuk eshte rregjistruar asnje rast kanceri I qafes se mitres tek grate nen 25 vjec. Aktualisht, Australia ka rreth 6.3 raste të reja për 100 mijë gra, duke iu afruar objektivit të eliminimit – më pak se katër raste për 100 mijë banorë.

Megjithatë, sfidat mbeten. Gratë indigjene përballen me norma dyfish më të larta të sëmundjes dhe trefish më shumë rrezik për vdekje, për shkak të aksesit më të kufizuar në shërbime shëndetësore. Po ashtu, hezitimi ndaj vaksinave pas pandemisë Covid-19 dhe kostot në rritje të kujdesit shëndetësor mund të ngadalësojnë progresin.

Në nivel global, Australia po shërben si model. Vende si Suedia dhe Ruanda kanë vendosur objektiva ambicioze për eliminimin e këtij kanceri deri në vitin 2027, ndërsa Mbretëria e Bashkuar synon vitin 2040. Megjithatë, ulja e financimeve ndërkombëtare për vaksinat, sidomos për vendet me të ardhura të ulëta, mbetet një pengesë serioze. Ekspertët e konsiderojnë këtë një moment historik: për herë të parë në nivel botëror, ekziston një plan konkret për eliminimin e një forme kanceri.

Shtetet e Bashkuara të Amerikës po ndjekin nga afër zhvillimet e fundit në Kosovë, ndërsa shprehin shqetësim për vazhdimin e bllokadës politike në vend.

Një zëdhënës i Departamentit amerikan të Shtetit tha për Radion Evropa e Lirë se “bllokimi i vazhdueshëm politik dëmton besimin në institucionet e Kosovës”.

“Ne po i ndjekim nga afër zhvillimet. Do të donim t’i shihnim të gjitha grupet politike të bashkëpunojnë për interesat më të mira të popullit të Kosovës”, tha zëdhënësi.

Kosova do të mbajë zgjedhjet e parakohshme parlamentare më 7 qershor. Ato u shpallën pasi Kuvendi u shpërnda automatikisht këtë javë, për shkak të dështimit për të zgjedhur presidentin e ri brenda afatit kushtetues.

Partia në pushtet, Lëvizja Vetëvendosje, e akuzoi opozitën për bojkotim të qëllimshëm të seancave, ndërsa partitë opozitare e fajësuan pushtetin për mungesë bashkëpunimi dhe për tentim të përqendrimit të pushtetit në një dorë të vetme.

Legjislatura e dhjetë, e dalë nga zgjedhjet e parakohshme të 28 dhjetorit, zgjati më pak se tre muaj.

Ato zgjedhje u mbajtën pas një krize të zgjatur politike që nisi pas zgjedhjeve të rregullta të 9 shkurtit 2025, kur Kuvendi nuk arriti të konstituohej për muaj të tërë dhe përpjekjet për formimin e Qeverisë përfunduan pa sukses.

Analistët paralajmërojnë se Kosova rrezikon të përballet me një skenar të ngjashëm me atë të Bullgarisë, e cila në pesë vjetët e fundit ka kaluar nëpër shtatë cikle zgjedhjesh të njëpasnjëshme, pa arritur stabilitet institucional.

Ata shtojnë se kriza ndikon edhe në ritmin e vendimmarrjes shtetërore dhe sjell barrë të konsiderueshme financiare për buxhetin e shtetit.

Më 2 maj, Komisioni Qendror i Zgjedhjeve njoftoi se ka nisur afati për partitë politike për t’u deklaruar për pjesëmarrje në zgjedhjet e 7 qershorit, si dhe për formimin e koalicioneve, i cili do të zgjasë deri më 7 maj.

Sipas planit të aktiviteteve të miratuar nga KQZ-ja, më 2 maj ka nisur edhe afati për certifikimin e partive të reja dhe dorëzimin e listave të kandidatëve për deputetë. Afati për partitë e reja përfundon më 10 maj, ndërsa për listat e kandidatëve më 12 maj.

Një ditë më parë, KQZ-ja miratoi edhe planin e aktiviteteve dhe buxhetin për zgjedhjet e parakohshme, të cilat do të kushtojnë 10 milionë e 887 mijë euro.

Fushata zgjedhore do të zgjasë 10 ditë, nga 28 maji deri më 7 qershor në orën 07:00, kur hapen vendvotimet.

Votimi me postë do të zhvillohet nga 25 maji deri më 6 qershor, ndërsa një ditë para zgjedhjeve do të organizohet votimi në përfaqësitë diplomatike.

Regjistrimi për votim nga jashtë vendit do të bëhet nga 6 deri më 17 maj.

Në zgjedhjet e 28 dhjetorit, mbi 2 milionë qytetarë të Kosovës, brenda dhe jashtë vendit, kishin të drejtë vote – një shifër që pritet të mbetet e ngjashme edhe në zgjedhjet e ardhshme.

Pjesëmarrja ishte rreth 45 për qind./ REL

13 persona, përfshirë gra dhe një fëmijë, janë vrarë nga sulmet ajrore izraelite në jug të Libanit, sipas Ministrisë së Shëndetësisë së Libanit, ndërsa dhjetëra të tjerë janë plagosur.

Sipas autoriteteve, tetë persona, mes tyre dy gra dhe një fëmijë u vranë. Katër të tjerë humbën jetën në Zrarieh, ndërsa një viktimë u raportua Tyre. Në total, 32 persona u plagosën gjatë sulmeve.

Përshkallëzimi i dhunës vjen pavarësisht një armëpushimi të zgjatur tre-javor midis Izraelit dhe grupit militant Hezbollah.

Ky i fundit tha të shtunën se kishte shënjestruar forcat dhe mjetet ushtarake izraelite në jug të Libanit.

Ushtria izraelite konfirmoi se një ushtar i saj u vra në përleshjet e fundit, duke e çuar në 17 numrin e viktimave ushtarake që nga fillimi i marsit.

Presidenti amerikan Donald Trump ka ndërmjetësuar zgjatjen e armëpushimit pas bisedimeve mes zyrtarëve izraelitë dhe libanezë në Uashington, takime të rralla mes dy vendeve që nuk kanë marrëdhënie diplomatike.

Megjithatë, armëpushimi ka ndalur kryesisht sulmet në kryeqytetin Beirut, ndërsa luftimet në jug kanë vazhduar me intensitet, përfshirë bombardime ajrore dhe urdhra të përsëritura për evakuim.

Ervin Salianji iu kundërpërgjigj Sali Berishës, duke e akuzuar atë si njeriun që po mban në këmbë pushtetin e Edi Ramës.

Salianji ka deklaruar se teksa ai vetë u përball me burgun dhe heqjen e mandatit, Berisha gëzon mbrojtje ligjore dhe ekonomike nga kryeministri.

“Sali “kolltuku”, plaku i lumtur në azilin e Ramës! Unë bëj burg, ti Sali bën lek nga regjimi i Ramës!  O zoti fosile, Ballukun dhe Agasin nuk i bashkoi dot Rama, jo unë. I vetmi që i ke bashkuar në një formë je ti, se paguheshe nga të dy, edhe nga Agasi, edhe nga Balluku. Prandaj nuk i nxjerr dot dosjet e të dyve. Publikoji të plota, frikacak. Bashkë me Ramën; dhe për të përfituar këto, nuk ke asnjë merak të legenosesh”, lexohet në postimin e Salianjit.

Hapi i radhës për Salianjin është një përballje pa kthim për të rrëzuar atë që ai e quan binomi Rama-Berisha: “Të mban Rama në azil luksi, duke të dhënë garanci që ti nuk prekesh nga ligji; prandaj nuk lejon garë. Por, do çmontohesh Sali, do çmontohesh si kambalec i Edi Ramës, do çmontohesh si segmenti i keqpërdorur dhe i blerë nga Edi Rama”.

Një aksident me pasojë vdekjen e një personi ka ndodhur pasditen e së shtunës në Shkodër.

Sipas policisë, aksidenti i rëndë ka ndodhur në aksin Shkodër–Koplik.

Tre makina janë përfshirë në këtë aksident, ku ka humbur jetën pasagjeri i njërës prej tyre.

Shkodër / Informacion paraprak

Rreth orës 16:25, në aksin rrugor Shkodër–Koplik, në fshatin Grizhë, automjeti me drejtues shtetasin A. M. është përplasur me automjetin me drejtues shtetasin V. X. dhe më pas me automjetin me drejtues shtetasin E. Gj.

Si pasojë e aksidentit, ka humur jetën në Spitalin Rajonal Shkodër shtetasi Z. M., pasagjer në automjetin me drejtues shtetasin A.M., dhe janë dëmtuar lehtë dy drejtuesit e automjeteve dhe pasagjerja shtetasja Gj. M., të cilët ndodhen në Spitalin Rajonal Shkodër, jashtë rrezikut për jetën.

Grupi hetimor, nën drejtimin e Prokurorisë, po punon për sqarimin e rrethanave të aksidentit.

Dalja e Emirateve të Bashkuara Arabe nga OPEC-u ka hyrë zyrtarisht në fuqi dhe po shihet nga ekspertët si një sinjal i mundshëm i afrimit më të madh të vendit me interesat e Shteteve të Bashkuara të Amerikës.

Sipas analistëve të energjisë, ky zhvillim mund të ndikojë në dobësimin e fuqisë së kartelit të naftës për të kontrolluar çmimet në tregjet globale.

Ekspertët theksojnë se ky vendim nuk është plotësisht i papritur, pasi prej kohësh Emiratet kanë shprehur pakënaqësi me kuotat e prodhimit të vendosura nga OPEC-u, të cilat kufizojnë sasinë e naftës që vendet anëtare mund të nxjerrin dhe të shesin në treg. Emiratet kanë investuar për rritjen e kapaciteteve të tyre prodhuese, por shpesh nuk kanë mundur t’i shfrytëzojnë plotësisht, për shkak të kufizimeve të organizatës.

Në një kohë kur tregjet globale po përballen me kërkesë të lartë për naftë dhe pasiguri të madhe për furnizimin, veçanërisht për shkak të tensioneve në rajonet kyçe të transportit të energjisë, ky vendim mund të ketë ndikim të rëndësishëm në çmimet ndërkombëtare të naftës. Disa analistë vlerësojnë se rritja e prodhimit nga Emiratet, kur kushtet të stabilizohen, mund të shtojë miliona fuçi naftë në ditë në treg, duke ulur presionin mbi çmimet.

Nga ana tjetër, Shtetet e Bashkuara pritet ta shohin pozitivisht këtë zhvillim, pasi një dobësim i ndikimit të OPEC-ut do të thotë më pak aftësi për të kontrolluar çmimet globale të naftës. Kjo është veçanërisht e rëndësishme në një periudhë kur çmimet e larta të energjisë po ndikojnë në inflacion dhe në ekonominë amerikane.

Analistët gjithashtu theksojnë se SHBA-të, si një nga prodhuesit më të mëdhenj të naftës në botë, mund të përfitojë nga ky ndryshim në ekuilibrat e tregut global të energjisë. Ndërkohë, disa ekspertë paralajmërojnë se ky hap mund të nxisë më shumë konkurrencë midis vendeve prodhuese të naftës në Lindjen e Mesme dhe të ndryshojë mënyrën sesi menaxhohen tregjet globale të energjisë.

Sipas tyre, ekziston edhe mundësia që vendet e tjera anëtare të OPEC-ut të ndjekin shembullin e Emirateve, gjë që do të dobësonte më tej organizatën. Megjithatë, shumica e ekspertëve mendojnë se OPEC-u do të vazhdojë të ekzistojë, por me ndikim më të kufizuar dhe rol më pak dominues në tregjet globale.

Një zyrtar i lartë i ushtrisë iraniane ka paralajmëruar se ekziston mundësia e rifillimit të konfliktit mes Shtetet e Bashkuara dhe Iranit.

Mohammad Jafar Asadi deklaroi se veprimet e fundit tregojnë se SHBA-të nuk respektojnë marrëveshjet dhe premtimet ndërkombëtare.

Ai theksoi se zhvillimet aktuale rrisin tensionet dhe mund të çojnë në përshkallëzim të ri. Deklaratat e tij u publikuan nga agjencia iraniane Fars News Agency.

Një 17-vjeçar është arrestuar në Tiranë pasi ka grabitur disa varëse floriri me vlerë 12 mijë euro në një argjendari.

Blutë bëjnë me dije se i riu i vodhi varëset në një argjendari të një qendre tregtare në rrugën “Abdi Toptani”.

Njoftimi i Policisë:

Tiranë/Finalizohet operacioni policor i koduar “Golds”.

Vodhi varëse floriri me vlerë rreth 12 000 euro në një argjendari në një qendër tregtare, identifikohet, kapet dhe vihet në pranga 17-vjeçari.

Sekuestrohen në cilësinë e provës materiale varëset e vjedhura.

Si rezultat i veprimeve të shpejta hetimore dhe procedurale, të kryera në kuadër të operacionit policor të koduar “Golds”, pas njoftimit për një vjedhje në një argjendari në rrugën “Abdi Toptani”, shërbimet e Komisariatit të Policisë Nr. 1 organizuan menjëherë punën për identifikimin dhe kapjen e autorit.

Si rezultat i veprimeve të shpejta, u bë e mundur kapja dhe arrestimi në flagrancë i shtetasit të mitur 17 vjeç, banues në Tiranë.

Nga veprimet hetimore dyshohet se ky shtetas, ditën e djeshme, ka vjedhur varëse floriri në një argjendari në një qendër tregtare në rrugën “Abdi Toptani”, dhe më pas është larguar me vrap nga vendi i ngjarjes.

Gjatë kontrollit, u sekuestruan në cilësinë e provës materiale varëset e vjedhura.

Materialet procedurale i kaluan Prokurorisë, për veprime të mëtejshme.

Policia e Elbasanit ka dalë me një njoftim zyrtar sa i takon operacionit antidrogë, që është zhvilluar këtë të shtunë, 2 maj, në qytetin e Elbasanit, Librazhdit e Prrenjasit.

Sipas njoftimit të policisë Prokuroria Elbasan janë lëshuar gjithsej 24 urdhra ndalimi.

Ekzekutohen 16 urdhra ndalimi, (8 urdhra ndalimi janë ekzekutuar gjatë operacionit të sotëm dhe 8 urdhra ndalimi janë ekzekutuar gjatë periudhës hetimore njëvjeçare).

Ndërkohë, gjatë operacionit të zhvilluar ditën e sotme, është kapur edhe 1 shtetas i shpallur në kërkim dhe është arrestuar në flagrancë një shtetas tjetër për veprimtari kriminale në fushën e narkotikëve.

Janë sekuestruar 9 kg lëndë e dyshuar narkotike kanabis, një pjesë e ndarë në doza gati për shitje, rreth 100 gram kokainë, një pjesë gati për shitje, 5 peshore elektronike, 7 automjete dhe 17 aparate celularë.

“Gjatë operacionit të zhvilluar mëngjesin e sotëm, u bë e mundur ekzekutimi i 8 urdhrave të ndalimit për shtetasit I. Sh., 38 vjeç; R. Z., 52 vjeç; G. Ç., 23 vjeç; A. B., 49 vjeç; N. S., 39 vjeç; L. F., 33 vjeç; J. I., 31 vjeç dhe M. Ç., 32 vjeç.

Gjithashtu, gjatë operacionit u bë arrestimi në flagrancë i shtetasit R. H., 39 vjeç, si dhe u kap shtetasi në kërkim P. Q., 54 vjeç, i shpallur në kërkim nga Gjykata e Shkallës së Parë e Juridiksionit të Përgjithshëm Durrës për veprën penale “Menaxhimi i mbetjeve”, kryer në bashkëpunim.

Gjithashtu, u ekzekutuan 27 vendime të Gjykatës për kontrolle banesash dhe ambientesh të ndryshme”, njofton policia.

Strukturat e Hetimit të DVP Elbasan, nën drejtimin e Prokurorisë Elbasan, vijojnë punën për dokumentimin e plotë ligjor të kësaj veprimtarie kriminale, si dhe për kapjen e shtetasve të shpallur në kërkim.

Bordi i Transparencës u mblodh ditën e sotme për të caktuar çmimet e reja të karburanteve, që kanë pasuar një ulje të lehtë. Nafta nga 208 lekë që shitej më parë, do të shitet dy lekë më pak.
Sa i përket benzinës, deri më sot shitej 185 lekë, ndërsa me vendimin e radhës pëson një ulje të lehtë me vetëm një lek.

Bordi i Transparencës në datë 2 Maj 2026, në mbledhjen e radhës vendosi:

Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 206 lekë/litri, ndërsa i shitjes me shumicë jo më shumë se 194 lekë/litër.

Çmimi i shitjes me pakicë i nënproduktit benzinë e standardit SSH EN  të  jetë jo më shumë se 184 lekë/litri,ndërsa i shitjes me shumicë jo më shumë se 172 lekë/litër.

Çmimet e caktuara nga Bordi do të hynë në fuqi sot datë 2 ora  16.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.

Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtëj vendimi.

Në rast të shkeljeve të konstatuara nga operatorë të ndryshëm do të vendoset pezullimi i aktivitetit.

Ministria e Ekonomisë dhe Inovacionit sëbashku me Ministrinë e Financave dhe Ministirinë e Infrastrukturës dhe Energjisë  janë angazhuar të mbrojnë interesat e konsumatorëve shqiptarw dhe ruajtjes së parimeve të konkurencës së ndershme në treg.

Kryetari i Partisë Demokratike, Sali Berisha, ka akuzuar Ervin Salianjin se teksa vuante dënimin në burg është shitur te krimi i organizuar.

“PD është parti e hapur, nuk mund ta marrë kush. U përpoqën për ta marrë. Këtë parti, Edi Rama nuk mund ta marrë kush me kandidatura të shtira. Ervin Salianji, e kam shpjeguar dhe e shpjegoj përsëri, u shpall i burgosur politik sepse ishte për kohën që qëndroi në burg, por në burg e shiti veten”, tha Berisha në një bashkëbisedim të drejtpërdrejtë në rrejtet sociale me ndjekësit e tij.

“Tani nuk do përsëris problemet e tij se i kam thënë. Në burg, ai u birësua nga Pëllumb Gjoka dhe Oltion Bistri. Sapo doli, ai ishte në shoqërinë e vazhdueshme të Ergys Agasit. Pikërisht momentin kur plasi skandali Balluku, ky filloi xhiron për të sfumuar zhurmën, për të krijuar një vatër tjetër debati. Dhe njëherë, ata që kanë mbajtur qëndrim, ata që përfaqësojnë pushtetin, lidhjet me pushtetin, ata të cilët kanë qenë kundër PD në fushatë elektorale, ata nuk kanë dhe nuk do kenë vend ndonjëherë në PD.

Nuk e kam këtu për zonjën Sela, nuk e di se nuk e njoh, është hera e parë që ia kisha dëgjuar emrin, dhe natyrisht gara ka disa kritere. Gara për kryetar të PD, kudo në botë, ka kritere dhe në Shqipëri ka kritere”.

Pasi Presidenti Amerikan Donald Trump deklaroi se nuk ishte i kënaqur me propozimin e ri Iranian për paqe, Wall Street Journal ka raportuar detaje të reja nga plani që Teherani i dorëzoi Pakistanit për t’u rikthyer në tryezën e bisedimeve me Washingtonin.

Sipas detajeve të bëra publike nga burime diplomatike, propozimi i ri iranian parashikon që diskutimet për kushtet e Teheranit për hapjen e Ngushticës së Hormuzit të zhvillohen paralelisht me garancitë amerikane për ndërprerjen e sulmeve dhe heqjen e bllokadës ndaj porteve iraniane. Më herët, Irani kishte kërkuar heqjen e bllokadës si kusht paraprak për nisjen e bisedimeve.

Propozimi gjithashtu sugjeron që çështjet që lidhen me programin bërthamor të trajtohen në këmbim të lehtësimit të sanksioneve amerikane.

Irani ka sinjalizuar përmes ndërmjetësve se është i gatshëm të ulet në tryezën e bisedimeve në Pakistan në fillim të javës së ardhshme, nëse Uashingtoni tregohet i hapur ndaj këtij propozimi.

Pas dorëzimit të propozimit Iranian në Pakistan, vend i cili po negocion mes Teheranit dhe Washingtonit, dy vendet duket se janë më pranë rinisjes së luftës sesa arritjes së një marrëveshjeje paqeje.

Presidenti Amerikan Donald Trump është informuar tashmë mbi opsionet ushtarake që Shtetet e Bashkuara kanë për të kryer sulme precize ndaj infrastrukturës kritike të Iranit, ndërsa Teherani, sipas asaj që raportojnë mediat ndërkombëtare, ka nisur mbledhjen e municioneve për një tjetër përballje ushtarake. Irani ka refuzuar të marrë pjesë në raundin e dytë të bisedimeve në Pakistan javën e kaluar, ndërsa Shtetet e Bashkuara kanë vijuar presionin e tyre ekonomik maksimal me bllokimin e porteve iraniane nga aksesi i tyre në ngushticën e Hormuzit. Teherani ka bërë të qartë se nuk është i gatshëm të bëjë lëshime të mëdha në programin e tij bërthamor, ndërsa Amerika kërkon që Irani të ndalojë pasurimin e uraniumit deri në 20 vite dhe të dorëzojë rezervat që zotëron, kërkesë kjo e cila është kundërshtuar nga Teherani.

Seksioni për Hetimin e Trafiqeve, në bashkëpunim me shërbimet operacionale të DVP Durrës, pas një hetimi 2-javor me metoda proaktive, finalizoi fazën e 19-të të operacionit policor të koduar “Storm”.

Si rezultat i operacionit, u arrestua në flagrancë shtetasja Sh. S., 24 vjeçe, lindur dhe banuese në Brazil.

Në vijim të veprimeve procedurale, u proceduan në gjendje të lirë për veprën penale “Prostitucioni” edhe 3 shtetas shqiptarë.

Gjatë operacionit, në cilësinë e provës materiale, u sekuestruan 1 pasaportë e shtetases së huaj, shuma parash të dyshuara të përfituara nga prostitucioni dhe 2 aparate celularë.

Nga veprimet hetimore rezultoi se shtetasja braziliane, në lagjen nr. 4, Durrës, kishte marrë një ambient me qira, të cilin e kishte përshtatur me qëllim ushtrimin e aktivitetit të prostitucionit dhe përfitimin e vlerave monetare nga kjo veprimtari.

Gjatë ndërhyrjes së shërbimeve të Policisë, shtetasja Sh. S. ka refuzuar të hapte derën e ambientit ku ndodhej, e cila u hap më pas me ndihmën e shërbimit zjarrfikës.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.