Maccabi Tel Avivi ka marrë një fitore të thellë me rezultat 5-0 në udhëtim ndaj Maccabi Yafos në kuadër të Kupës së Shtetit.

Me këtë fitore, mysafirët kanë arritur të sigurojnë kalimin tutje në fazën e gjysmëfinales.

Më meritori për këtë triumf të thellë të Maccabi Tel Aviv ishte padyshim futbollisti kosovar Emir Sahiti.

Sahiti ishte autor i dy golave të realizuar në këtë ndeshje, ku që të dytë i realizoi në pjesën e dytë.

27-vjeçari realizoi fillimisht në minutën e 52-të për rezultatin 4-0, teksa golin e dytë e realizoi në minutën e 72-të për epilogun përfundimtar të takimit 5-0.

Kujtojmë se Sahiti u transferua në Izrael në formë huazimi me opsion blerje nga Hamburgu.

Sahiti me shokë do të rikthehen në aksion sërish të hënën, ku do të jenë nikoqir të Maccabi Bney Reine në kuadër javës së 22-të të elitës së futbollit izraelit./Telegrafi/

Barcelona shpreson të jetë sërish brenda kufirit të pagave këtë verë, dhe si rrjedhojë të ketë mundësi të shpenzojë më lirshëm, por aktualisht, drejtori sportiv, Deco, do të punojë sërish me një buxhet të ngushtë.

Ai mund të kërkojë të kursejë disa para nga një prej lojtarëve veteranë të klubit.

Në mes të raportimeve se Barcelona mund t’i ofrojë Robert Lewandowskit një kontratë të re me kushte të reduktuara, Deco po konsideron largimin e njërit prej shokëve më të afërt të tij.

Sipas Sport, Barcelona mund të kërkojë që portieri Wojciech Szczesny të rikthehet në pension këtë verë.

Szczesny aktualisht është portieri i dytë, pasi u rikthye nga pensioni para 18 muajsh për të zëvendësuar Marc-Andre Ter Stegen, pas një dëmtimi të portierit gjerman.

Verën e kaluar, Barcelona arriti një marrëveshje për zgjatje dyvjeçare të kontratës së Szczesnyt, duke e mbajtur atë si zëvendësues të Joan Garcias këtë herë.

Portieri polak u aktivizua në nëntë ndeshje më herët në këtë sezon për shkak të një dëmtimi të meniskut tek Garcia.

Ish-lojtari i Barcelonës shokon me deklaratën: Klubi më detyroi të them se Messi është më i miri

Zgjatja e kontratës përfshinte një klauzolë që i lejon Barcelonës të anulojë në mënyrë të njëanshme marrëveshjen në vitin 2026.

35-vjeçari fiton rreth 2 milionë euro në sezon, por duke pasur parasysh marrëdhëniet e mira mes Szczesnyt dhe klubit, ata me shumë gjasa do të arrinin një marrëveshje të përbashkët nëse Barcelona vendos të ndahen.

Aktualisht, si Ter Stegen ashtu edhe Inaki Pena janë huazuar dhe ata mund të kthehen për të qenë zëvendësues të parë për Joan Garcian./Telegrafi/

Ylli i Real Madridit, Rodrygo Goes, do të humbasë të dyja ndeshjet kundër Benficës në fazën e “play-off”-it të Ligës së Kampionëve, pasi UEFA i ka shqiptuar një pezullim prej dy ndeshjesh për përdorim të gjuhës “në mënyrë abuzive” ndaj gjyqtarit,

Ky vendim disiplinor vjen pas ndeshjes së zhvilluar më 28 janar në Lisbonë, ku madrilenët pësuan një humbje me rezultat 4-2 në fushën e Benficas në fazën e ligës të Ligës së Kampionëve.

Në minutat shtesë të ndeshjes, Rodrygo u ndëshkua me dy kartonë të verdhë radhazi, me të dytin që çoi në karton të kuq direkt për protestë ndaj gjyqtarit, pasi braziliani u frustrua nga taktikat e Benficës për të humbur kohën.

Fitorja 4-2 e Benficës i ndali Real Madridit mundësinë e sigurimit automatik të një vendi në 1/8 e finales në Ligën e Kampionëve përmes fazës së ligës, duke detyruar “Los Blancos” të luajnë në 'play-off 'për kualifikim.

Për pasojë, skuadra madrilene do të përballet pikërisht me Benficën në çiftet e fazës eliminatore, ku Rodrygo do të mungojë në të dyja ndeshjet për shkak të pezullimit.

Pas ndëshkimit, sulmuesi brazilian publikoi edhe një kërkim faljeje në rrjetet sociale, duke pranuar se ra pre e emocioneve në momentin e incidentit.

“U rrëmbeva nga momenti kur u ankova për kohën e humbur. Nuk është mënyra ime e të bërit të gjërave”.

PSG bën gati ofertën e madhe për transferimin e yllit të Real Madridit

“Nuk më kishin përjashtuar kurrë nga fusha duke luajtur me Real Madridin dhe jam i vetëdijshëm për pasojat. U kërkoj ndjesë tifozëve, klubit, shokëve të ekipit dhe trajnerit”, kishte deklaruar Rodrygo.

Ndeshja e parë mes Real Madridit dhe Benficës do të luhet më 17 shkurt në Lisbonë, ndërsa ajo e kthimit një javë më vonë më 25 shkurt në ‘Santiago Bernabeu’./Telegrafi/

Alex Oxlade-Chamberlain po hedh hapa konkretë drejt një karriere trajneriale te Arsenali, me trajnerin Mikel Arteta që është i interesuar ta përfshijë atë në stafin e klubit sapo të tërhiqet nga futbolli aktiv, sipas Daily Mail.

32-vjeçari ka qenë duke përfunduar licencën e trajnerit UEFA B në stadiumin “Emirates” gjatë muajve të fundit.

Si pjesë e përgatitjeve të tij, Oxlade-Chamberlain është stërvitur gjithashtu me ekipin U-21 të Arsenalit, për të ruajtur formën fizike, ndërkohë që po kërkon një klub të ri si lojtar i lirë.

Ish-reprezentuesi i Anglisë është pa ekip që prej largimit nga klubi turk Besiktas në muajin gusht dhe raportohet se është në bisedime të avancuara me Celtic për të vazhduar karrierën e tij si futbollist.

Arteta thuhet se është një admirues i hershëm i Oxlade-Chamberlain, me të cilin ka luajtur së bashku te Arsenali mes viteve 2014 dhe 2016, duke zhvilluar gjithsej 198 paraqitje gjatë periudhës së tij gjashtëvjeçare në klub.

Dyshja raportohet se kanë një lidhje të fortë, e cila ka ndikuar në interesimin e Artetës për ta afruar atë në një rol si trajner.

Aktualisht, licenca UEFA B i mundëson Oxlade-Chamberlainit të drejtojë ekipet U-18 ose U-19 të Arsenalit./Telegrafi/

Kevin-Prince Boateng ka zbuluar se i është dashur “të gënjejë” për dashurinë e tij ndaj Cristiano Ronaldos, vetëm që të bëhej bashkëlojtar i Lionel Messit te Barcelona.

Ish-reprezentuesi i Ganës realizoi një transferim befasues drejt “Camp Nou” në vitin 2019.

Pas finalizimit të këtij kalimi, atij iu bë e qartë se nuk duhej të fliste me tone pozitive për CR7 apo për rivalët e përjetshëm të Barcelonës, Real Madridin.

Kjo ishte veçanërisht e vështirë për Boatengun, pasi ai kishte qenë tifoz i Real Madridit që në fëmijëri.

Me “ngjyrat” e tij të lidhura fort me “Santiago Bernabeu”, Cristiano Ronaldo, fitues i pesë herë i Topit të Artë dhe golashënuesi më i mirë në historinë e klubit, ishte për të një burim frymëzimi.

Duke folur për Unscripted me Josh Mansour, Boateng tregoi për udhëzimet që ia ndalonin çdo simpati ndaj Ronaldos.

“Gjithmonë kam thënë se doja të luaja për Real Madridin”, u shpreh ai.

“Më është dashur të gënjej në një konferencë për shtyp, sepse dy vite më parë, kur luaja te Las Palmas, më pyetën kush ishte lojtari im i preferuar dhe unë thashë Cristiano Ronaldo. Po ashtu thashë se skuadra ime e preferuar ishte Real Madridi”.

“Kur nënshkrova për Barcelonën, më thanë: ‘Skuadra jote e preferuar është Barcelona dhe lojtari më i mirë në botë është Lionel Messi’”.

“Më thanë: ‘Duhet ta thuash, përndryshe është e pamundur të luash këtu’. Unë u ula në konferencën për shtyp dhe pyetja e parë ishte kush është lojtari më i mirë në botë, dhe unë thashë: ‘Lionel Messi’”, deklaroi Boateng./Telegrafi/

UEFA ka raportuar menjëherë për rizgjedhjen e Agim Ademit në postin e presidentit të Federatës së Futbollit të Kosovës (FFK), pas mbajtjes së Kuvendit të Rregullt Zgjedhor.

Në uebfaqen zyrtare të shtëpisë së futbollit evropian thuhet se Ademi është rizgjedhur për mandatin e tretë radhazi në krye të FFK-së, duke marrë mbështetje unanime nga delegatët e Kuvendit, i cili u mbajt të enjten.

Agim Ademi, që udhëheq Federatën e Futbollit të Kosovës që nga viti 2018, ka siguruar kështu një mandat të ri katërvjeçar.

UEFA thekson se kjo rizgjedhje konfirmon besimin ndaj punës së deritanishme dhe vazhdimin e angazhimit për zhvillimin dhe avancimin e futbollit në Kosovë.

Ademi flet pas rizgjedhjes në krye të FFK-së: Vota juaj është vlerësim i punës së bërë

Tutje, UEFA ka përcjellë edhe deklaratën e presidentit Ademi pas rizgjedhjes, ku ai ka vlerësuar mbështetjen e dhënë nga delegatët dhe rëndësinë e këtij besimi për të ardhmen.

“Vota e sotme është besim për mua dhe për ekipin tim, por mbi të gjitha është vlerësim për punën e bërë bashkërisht dhe përkrahje për rrugëtimin që na pret përpara”, ka deklaruar Ademi, cituar nga UEFA.

Me këtë mandat të ri, pritet që FFK të vazhdojë projektet e saj strategjike, me fokus në rritjen e cilësisë së garave, zhvillimin e futbollit të të rinjve dhe forcimin e pozitës së Kosovës në arenën ndërkombëtare./Telegrafi/

Raheem Sterling pritet të ketë arkëtuar një shumë shumë të madhe parash pas marrëveshjes për ndërprerjen e kontratës me Chelsean.

Chelsea dhe Sterling i dhanë fund bashkëpunimit muajin e kaluar, pasi palët ranë dakord me mirëkuptim të ndërpresin kontratën, pas një periudhe zhgënjyese prej tre vitesh e gjysmë në Londrën Perëndimore.

Reprezentuesi anglez iu bashkua “Bluve” në vitin 2022, duke u transferuar nga Manchester City për 50 milionë eurodhe nënshkroi një kontratë pesëvjeçare në “Stamford Bridge”, me një pagë të raportuar prej 325 mijë eurosh në javë.

Megjithatë, ai nuk arriti të përmbushë pritshmëritë, duke realizuar vetëm 19 gola në 81 paraqitje.

I harruar nga të gjithë, ylli i Chelseat ndërpren kontratën dhe largohet nga klubi

Sterling ra nga preferencat nën drejtimin e ish-trajnerit Enzo Maresca dhe u huazua te Arsenali për sezonin 2024/25, ku shënoi vetëm një gol në 28 ndeshje.

Pavarësisht largimit të Marescës nga Chelsea muajin e kaluar, nuk kishte asnjë rrugë rikthimi për Sterlingun. Klubi londinez konfirmoi më 28 janar se ai ishte larguar nga klubi me marrëveshje të ndërsjellë.

Sipas Press Association, Sterling ka hequr dorë nga një pjesë e shumës që i takonte për 18 muajt e mbetur të kontratës, për të siguruar largimin nga klubi.

Megjithatë, ish-drejtori menaxhues i Liverpoolit, Christian Pursloë, i cili kishte mbikëqyrur transferimin e Sterlingut nga QPR gjatë kohës së tij në “Anfield”, beson se sulmuesi ka siguruar gjithsesi një pagesë shumë të madhe si pjesë e marrëveshjes për t’u larguar nga Chelsea.

Duke folur në podcastin The Football Boardroom, ish-drejtori ekzekutiv i Aston Villas, Purslow, u shpreh se për një lojtar që të pranojë të ndërprejë kontratën, ai duhet të fitojë një shumë të madhe parash.

“Ne kemi përmendur shifrën nga 17 deri në 24 milionë euro, kjo është ajo që Raheem i detyrohej. Mua më duket se, nga këndvështrimi i Raheem dhe Chelseat, klubi do të synonte ta mbyllte këtë marrëveshje diku mes 15 dhe 20 milionë eurosh”.

“Dhe të mos harrojmë kontekstin që përmendët për çdo futbollist. Nëse agjenti i tij do të hynte në dhomë dhe do të thoshte: ‘Shikoni, kemi pasur një qasje nga klubi. Gjërat nuk po funksionojnë. Ata duan që ne të shqyrtojmë një ulje të shumës që na takon, në këmbim të pagesës së menjëhershme për ta mbyllur këtë çështje njëherë e përgjithmonë’”.

“Që lojtari të pranojë një gjë të tillë, ai duhet të shohë një mundësi për përfitim nga statusi i lojtarit të lirë”, ka deklaruar Purslow./Telegrafi/

Endrick rikthehet sërish në qendër të tregut evropian. Sulmuesi i ri brazilian, i cili ka kontratë me Real Madridin deri në qershor të vitit 2030, është një nga emrat që po ngjall më shumë interes për afatin kalimtar të verës që po vjen.

Aktualisht, Endrick është i huazuar te Lyoni deri në fund të sezonit. Ndikimi i tij te skuadra franceze ka qenë i menjëhershëm dhe shumë pozitiv.

Ai është shndërruar në një lojtar kyç, me minuta të rregullta në dispozicion dhe një ndjenjë të qartë rritjeje konkurruese.

Lyon është shumë i kënaqur me paraqitjet e tij, aq sa ka lënë të kuptohet mundësia e zgjatjes së huazimit edhe për një sezon tjetër. Sipas tyre, vazhdimi i grumbullimit të minutave do të ishte thelbësor për zhvillimin e lojtarit.

Real Madridi, nga ana e tij, nuk e konsideron një transferim përfundimtar të Endrickut. Klubi madrilen ruan besim të palëkundur në potencialin e tij dhe është i bindur se ai do të ketë sukses në La Liga.

Megjithatë, brenda klubit pranohet se menaxhimi i tij në fillim të sezonit nuk ishte ideal, veçanërisht për shkak të minutazhit të kufizuar nën drejtimin e Xabi Alonsos.

Paris Saint-Germain nuk e ka humbur kurrë nga vëmendja Endrickun. Klubi parisien kishte tentuar ta transferonte atë edhe përpara kalimit të tij te Real Madridi dhe tani sheh një mundësi të re.

PSG e konsideron brazilianin si një përshtatje perfekte për projektin e tyre sportiv. Rinia, talenti dhe aftësia për të pasur ndikim të menjëhershëm janë cilësi shumë të vlerësuara në “Parc des Princes”.

Për këtë arsye, Paris Saint-Germain është i gatshëm të paraqesë një ofertë shumë të fortë financiare verën e ardhshme, një propozim luksoz që mund të vërë në provë vendosmërinë e klubit madrilen.

Në rrethet e PSG-së besohet se dëshira e lojtarit për vazhdimësi dhe minuta të rregullta mund të luajë në favor të tyre në një negociatë të mundshme./Telegrafi/

Klima rreth Cristiano Ronaldos në Arabinë Saudite ka kaluar nga euforia në një tension të hapur, që rrezikon ta çojë marrëdhënien drejt një krisjeje të plotë.

Portugezi, i mësuar me projekte të ndërtuara rreth nevojave të tij, ndjen se drejtimi që ka marrë kampionati dhe vetë klubi i tij nuk po e favorizon më.

Vendimi i fundit i autoriteteve saudite ka qenë pika e fundit që mbushi kupën. Mungesa e yllit portugez në ndeshjen e fundit të Al Nassr nuk ishte as rastësi dhe as pasojë e një problemi fizik, por një gjest i qartë proteste që ka tronditur themelet e futbollit arab.

Cristiano Ronaldo ndodhet në një përplasje të drejtpërdrejtë me Fondin e Investimeve Publike (PIF), institucioni që kontrollon drejtpërdrejt klubet kryesore të vendit.

Sulmuesi beson se fondi nuk vepron në mënyrë neutrale dhe se ekzistojnë preferenca të qarta brenda portofolit të tij të ekipeve, diçka që, sipas këndvështrimit të tij, ka dëmtuar ndjeshëm Al Nassr.

Operacioni që shkaktoi shpërthimin përfundimtar ishte transferimi i Karim Benzemas, i cili u transferua nga Al Ittihad te Al Hilal.

Kjo situatë ka ushqyer zërat për një largim të mundshëm nga Lindja e Mesme. Edhe pse kontrata e tij është një nga më të shtrenjtat në historinë e futbollit, Ronaldo i jep përparësi trashëgimisë sportive dhe ndjesisë së konkurrimit në kushte të barabarta.

Benzema del me deklaratë pas përpjekjeve të Ronaldos për ta bllokuar transferimin e tij te Al-Hilali

Andaj, mundësia e rikthimit të Cristiano Ronaldos në Europë ka ngjallur një pritshmëri të madhe.

Mes destinacioneve të mundshme, emri i Sporting Lisbonës po përmendet për arsye që shkojnë përtej futbollit: Është vendi ku gjithçka nisi, i lidhur drejtpërdrejt me rrënjët e tij dhe me një peshë sentimentale të vështirë për t’u barazuar.

Edhe pse nga ana ekonomike operacioni nuk do të ishte i thjeshtë, simbolika mund të peshojë më shumë se çdo faktor tjetër./Telegrafi/

Marcus Rashford tashmë ka përgatitur një plan rezervë në rast se Barcelona nuk vendos ta blejë në mënyrë permanente këtë verë.

Edhe pse ende i kontraktuar me klubin e tij të fëmijërisë, Rashford nuk ka luajtur për Manchester United që nga dhjetori i vitit 2024, në Ligën e Evropës kundër Viktoria Plzen.

Reprezentuesi i Anglisë u përjashtua nga skuadra nga ish-trajneri Ruben Amorim, duke kaluar gjysmën e dytë të sezonit të kaluar te Aston Villa para se të bashkohej me Barcelonën në verë.

Që nga ardhja në Kataloni, 28-vjeçari ka pasur një sezon produktiv, duke shënuar dhe asistuar mbi dhjetë gola, përfshirë pesë gola në Ligën e Kampionëve këtë sezon.

Huazimi i Rashford te Barcelona përfshinte një opsion blerjeje me një tarifë relativisht konservative prej 26 milionë eurosh, që duket si një marrëveshje e favorshme nga jashtë.

Pavarësisht tarifës së ulët, drejtori sportiv i Barcelonës, Deco, ka konfirmuar se klubi nuk do të aktivizojë klauzolën para verës për shkak të vështirësive financiare.

Sipas The Mirror, Rashford ka bërë shumë të qartë se preferon të qëndrojë te Nou Camp, por ka një plan rezervë në rast se marrëveshja dështon.

Carrick dëshiron ta rikthejë Rashfordin te Man United

Raporti thotë se Rashford nuk ka interes të kthehet në Manchester, pavarësisht përmirësimit të situatës së klubit nën drejtimin e Michael Carrick, dhe është i gatshëm të rinegociojë pagën për të qëndruar në Spanjë.

Nëse një transferim te gjigantët katalanas nuk realizohet, Rashford do të shikojë mundësi të tjera, në vend se të kthehet te klubi i tij i fëmijërisë.

Edhe pse klubi duket i paqartë për angazhimin ndaj Rashford në këtë fazë, trajneri Hansi Flick ka insistuar se është i kënaqur me sulmuesin, por ka pranuar se dëshiron më shumë gola./Telegrafi/

Real Madridi duket se po afrohet gjithnjë e më shumë me idenë e transferimit të një mesfushori këtë verë, pas largimeve të Luka Modric dhe Toni Kroos gjatë dy viteve të fundit.

Fillimisht, “Los Blancos” ishin të vendosur të vazhdonin me talentin që tashmë kishin në skuadër, por dështimi i repartit të mesfushës për të funksionuar siç duhet nën drejtimin e tre trajnerëve radhazi ka ndryshuar perceptimin në Santiago Bernabéu.

Një nga arsyet pse Real Madridi nuk ndërhyri më herët në merkato ishte fakti se nuk është e lehtë të gjendet një mesfushor i nivelit të Modric apo Kroos.

Në fillim të sezonit, klubi u lidh me mesfushorin holandez Kees Smit dhe yllin e Crystal Palace, Adam Wharton, por duket se interesi për këtë të fundit është zbehur.

Ylli i Arsenalit i mbyll derën Real Madridit: Nuk kanë nevojë për dikë si unë

Tashmë, Real Madridi po vlerëson opsionet e tij për verën.

Sipas The Athletic, gjatë kohës së Carlo Ancelottit në krye të ekipit, Real Madridi kishte marrë një përgjigje pozitive nga kampi i Alexis Mac Allister për një transferim të mundshëm.

Trajneri italian kishte kërkuar transferimin e mesfushorit të Liverpoolit, por “Los Blancos” nuk e çuan më tej marrëveshjen.

Mac Allisterit i kanë mbetur edhe dy vite kontratë në ‘Anfield’, dy faktorë që mund të lehtësojnë një transferim të mundshëm.

Sipas të njëjtit burim, mesfushori argjentinas vazhdon të vlerësohet lart në zyrat e Bernabéut.

Nuk është sekret që përforcimi ideal për Real Madridin do të ishte mesfushori i Paris Saint-Germain, Vitinha, ndërsa edhe Enzo Fernández i Chelseat është lidhur vazhdimisht me klubin madrilen.

Megjithatë, klubi beson se, edhe nëse Fernandez do të ishte i hapur ndaj idesë për të luajtur për ta, aspekti financiar i një marrëveshjeje për secilin prej këtyre lojtarëve i bën transferimet e tyre “pothuajse të pamundura”./Telegrafi/

Situata për Cristiano Ronaldon në Arabinë Saudite është përshkallëzuar në një skenë krejtësisht të papritur, që po çon jo vetëm te spekulimet për largim, por edhe ka bërë që tifozët të tallen me të, duke e shpallur si ‘person i humbur’.

Qëllimi i ardhjes së Ronaldos në Arabinë Saudite në vitin 2023 ishte i qartë: Të fuqizojë Al‑Nassr dhe të ndihmojë klubin të fitojë tituj të mëdha.

Dhe për një kohë, ai ia arriti duke shënuar gola dhe duke qenë figura që e popullarizoi më shumë Superligën e Arabisë në mbarë botën.

Por gjërat morën një kthesë këtë sezon. Ronaldo refuzoi të luante në ndeshjen kundër Al Riyadh, dhe jo për arsye fizike apo lodhje, por si një formë proteste ndaj mënyrës se si po menaxhohet klubi dhe ligë në nivel më të gjerë.

Kjo ka shkaktuar reagime edhe në mesin e tifozëve kundërshtar, të cilët kanë filluar talljet brutale me yllin portugez.

"Ky është një 40-vjeçar që po kalon nëpër detyrimin e të qarit shumë dhe familja e tij po e kërkon", shkruhej në posterin i cili e shpalli Ronaldon si 'person të humbur'.

Sipas raportimeve, pesë herë fituesi i Topit të Artë është i pakënaqur me Fondin Publik të Investimeve të Arabisë Saudite (PIF), i cili kontrollon Al‑Nassr, por edhe rivalët e tij kryesorë si Al Hilal, Al Ahli dhe Al Ittihad.

Ish-lojtari i Real Madridit godet me deklaratën: Ja pse Messi është më i mirë se Ronaldo

Ronaldo ndjen se skuadra e tij nuk po merr të njëjtin lloj investimi, duke e bërë Al‑Nassr potencialisht më të dobët në garë krahasuar me rivalët.

Tensionet u përkeqësuan pasi klubi rival Al Hilal bëri goditje të mëdha në afatin kalimtar, duke përfshirë transferimin e Karim Benzemas, një ish‑shok skuadre i Ronaldos.

Me kontratën që vazhdon deri në vitin 2027, por me një klauzolë lirimi rreth 50 milionë euro që mund të aktivizohet këtë verë, Ronaldo po konsideron mundësinë e një largimi, duke hapur derën për një rikthim në futbollin evropian apo MLS./Telegrafi/

Chelsea përdori një taktikë të guximshme dhe të paprecedentë për të ndaluar Arsenalin të shënonte nga kornerët në ndeshjen e dytë të gjysmëfinales së Carabao Cup.

“Blutë” humbën me rezultat të përgjithshëm 4-2 në dy ndeshjet, me Kai Havertz që shënoi në minutën e 97-të kundër ish-klubit të tij në fitoren 1-0 në ndeshjen e dytë në ‘Emirates’.

Qasja e Liam Rosenior, që përfshinte lojën me pesë mbrojtës dhe lënien e Cole Palmer si zëvendësues, ndërsa Liam Delap dhe Enzo Fernandez luanin si krahë, u kritikua gjerësisht nga analistët, të cilët mendonin se Chelsea duhet të kishte rrezikuar më shumë dhe të sulmonte Arsenalin.

Megjithatë, kur erdhi puna te mbrojtja ndaj kërcënimit të madh nga kornerët e Arsenalit, Chelsea gjeti një strategji të zgjuar.

Ylli i Arsenalit i mbyll derën Real Madridit: Nuk kanë nevojë për dikë si unë

Në Ligën Premier, Arsenal ka shënuar 17 gola nga kornerët këtë sezon dhe 53 nga gjuajtjet standarde që nga fillimi i sezonit të kaluar në të gjitha garat.

Cilësia e lojës së tyre nga këto situata ka qenë shumë e vështirë për të tjerët, por Monaco dhe Crystal Palace e kanë neutralizuar kërcënimin duke lënë lojtarë në zonën e kundërshtarit, duke reduktuar numrin e lojtarëve të Arsenalit që sulmojnë zonën.

Chelsea shkoi një hap më tej me planin e tyre. “Blutë” praktikisht bënë të njëjtën gjë, duke lënë tre lojtarë kundër mbrojtësve të Arsenalit, por diferenca ishte se ata i largonin lojtarët jashtë zonës pak çaste para se të ekzekutohej rivënia këndore.

Malo Gusto dhe Liam Delap fillimisht markuan lojtarë të caktuar, por shpejt ndryshuan lëvizjen e tyre duke dalë jashtë zonës.

Si rezultat, kjo bëri që Arsenal të ishte e kujdesshme ndaj mundësisë së një kundërsulmi dhe disa lojtarë u detyruan të ktheheshin në mbrojtje./Telegrafi/

Drejtori ekzekutiv i Al-Hilal, Esteve Calzada, ka konfirmuar se kreu i Superligës së Arabisë, Omar Mugharbel, është i interesuar për transferimit e sulmuesit të Real Madridit, Vinicius Junior.

“Në rastin tonë, nuk ka bisedime, por drejtori ekzekutiv i Superligës së Arabisë, sa herë që pyetet, thotë se nëse ai bëhet i disponueshëm, do të përpiqet ta sjellë”, deklaroi Calzada.

Vinicius është shfaqur si një nga objektivat kryesorë të kampionatit saudit, përpara reformës së madhe që planifikohet të realizohet në verën e vitit 2026.

Situata e kontratës së tij ka nxitur gjithashtu spekulime për të ardhmen.

Marrëveshja e Viniciusit skadon në qershor të vitit 2027, ndërsa lojtari po kërkon një pagë marramendëse për të nënshkruar një rinovim afatgjatë.

Ndërkohë, thuhet se Real Madridi nuk është i gatshëm t’u nënshtrohet kërkesave të tij financiare, megjithatë presidenti Florentino Perez mbetet i vendosur për ta mbajtur Viniciusin në skuadër.

Reprezentuesi brazilian raportohet gjithashtu se anon drejt vazhdimit të karrierës së tij në ‘Santiago Bernabeu’, pavarësisht tensioneve në rritje me tifozët, të cilët në javët e fundit kanë shfaqur hapur armiqësi ndaj tij./Telegrafi/

Shkaqet e dështimit të kontrolleve mjekësore të Jean-Philippe Mateta me gjigantët italianë AC Milan janë zbuluar, pasi transferimi i sulmuesit francez nga Crystal Palace u anulua në fund të afatit kalimtar të janarit.

28-vjeçari ishte i etur të largohej nga Selhurst Park dhe dukej se po i afrohej gjithnjë e më shumë një transferimi në San Siro.

Megjithatë, gjatë kontrolleve mjekësore u evidentuan disa probleme dhe Mateta mbetet ende lojtar i Crystal Palace.

Gjithçka dukej se po shkonte drejt realizimit të transferimit të dëshiruar, pasi të dy klubet kishin rënë dakord për marrëveshjen dhe Mateta kishte kryer vizitat mjekësore me Milanin përpara një kalimi të mundshëm.

Sidoqoftë, “Rossonerët” zbuluan një problem që e bëri transferimin jo tërheqës dhe për rrjedhojë vendosën të tërhiqeshin nga marrëveshja.

Sipas BBC Sport, Crystal Palace kishte informuar Milanin gjatë negociatave për problemet që Mateta ka pasur ndër vite me gjurin e djathtë.

Sulmuesi kishte pësuar këputje të meniskut në vitin 2019, teksa luante për Mainz, dhe iu nënshtrua një ndërhyrjeje kirurgjikale po atë vit, duke munguar për gjashtë muaj.

Milani tërhiqet përfundimisht nga Mateta pas kontrolleve mjekësore

Më pas, Milani vendosi se, në rast se do ta transferonte Matetan, ai do të duhej t’i nënshtrohej një operacioni tjetër për të zgjidhur përfundimisht problemin, çka forcoi edhe më shumë dyshimet e klubit italian për realizimin e marrëveshjes.

Ky zhvillim përbën një goditje serioze për Matetan. Forma e tij e shkëlqyer me Crystal Palace sezonin e kaluar i siguroi ftesën e parë në kombëtaren e Francës, ndërsa ai ka bërë paraqitje pozitive sa herë është aktivizuar nga ‘Gjelat’, duke shënuar dy gola në tri ndeshje me përfaqësuesen.

Ky fillim premtues në arenën ndërkombëtare dukej se kishte rritur ndjeshëm shanset e tij për t’u përfshirë në skuadrën e Didier Deschamps për Kupën e Botës 2026, që do të zhvillohet në Shtetet e Bashkuara të Amerikës, Kanada dhe Meksikë./Telegrafi/

FIFA mund të ketë mundësinë t’ia heqë Shteteve të Bashkuara të drejtën për organizimin e Kupës së Botës 2026, nëse aktivizohet një klauzolë pak e njohur e kontratës përpara fillimit të turneut.

Me Kupën e Botës 2026 që po afron me shpejtësi, organizatorët tashmë janë në terren në të gjitha 16 qytetet pritëse: Atlanta, Boston, Dallas/Arlington, Houston, Kansas City, Los Anxhelos, Miami, New York/New Jersey, Filadelfia, San Francisco Bay Area, Seattle, Toronto, Vancouver, Mexico City, Guadalajara dhe Monterrey.

Megjithatë, ka pasur thirrje nga deputetë, përfaqësues të medias dhe tifozë që SHBA-së t’i hiqet e drejta e organizimit për shkak të klimës aktuale politike nën presidencën e Donald Trump.

Në janar, një grup prej 23 deputetësh britanikë nënshkruan një mocion ku u kërkohej organizatave ndërkombëtare sportive të shqyrtonin përjashtimin e SHBA-së nga garat madhore, përfshirë edhe Kupën e Botës.

Kjo mbetet shumë e pamundur, duke pasur parasysh ndikimin e madh që SHBA ka në botën e sportit, si dhe faktin se është bashkëorganizatorja kryesore e turneut.

Që nga marrja e detyrës në janar 2025, Trump ka shkaktuar polemika si brenda SHBA-së ashtu edhe në arenën ndërkombëtare.

Në janar, dy shtetas amerikanë u qëlluan për vdekje nga agjentë të ICE (Shërbimi i Imigracionit dhe Doganave) në Minneapolis, Minnesota, duke shkaktuar reagime të gjera dhe zemërim publik.

Po ashtu, në janar, Trump i kërkoi Danimarkës t’ia dorëzonte SHBA-së territorin autonom të Groenlandës, për atë që ai e përshkroi si arsye sigurie.

Shqetësimet dhe sugjerimet për heqjen e të drejtës së organizimit nga SHBA pritet të vazhdojnë deri në fillimin e turneut, por a është kjo reale dhe a ka FIFA fuqinë për ta bërë një gjë të tillë?

Teknikisht, po, por një vendim kaq me ndikim të madh, kaq pranë zhvillimit të turneut, nuk do të merrej pa pasoja serioze.

Sipas rregulloreve të Kupës së Botës FIFA 2026, FIFA ka të drejtën të “anulojë, riplanifikojë ose zhvendosë një ose më shumë ndeshje (ose të gjithë Kupën e Botës 2026) për çfarëdo arsye, sipas diskrecionit të saj të vetëm, përfshirë rastet e forcës madhore ose për shkak të shqetësimeve që lidhen me shëndetin, sigurinë apo mbrojtjen”.

Forca madhore përkufizohet si një ngjarje si lufta, krimi apo çdo rrethanë tjetër e paparashikuar që e pengon një individ ose organizatë të përmbushë detyrimet e parashikuara në një marrëveshje ligjore./Telegrafi/

N’Golo Kante i është bashkuar Fenerbahces, njoftoi klubi turk të mërkurën, pas polemikave lidhur me përfundimin e marrëveshjes së transferimit, ndërsa sulmuesi maroken Youssef En-Nesyri është transferuar te Al-Ittihad i Arabisë Saudite.

Reprezentuesi i Francës, i cili fitoi dy tituj të Ligës Premier me Leicester Cityn dhe Chelsean, është rikthyer në Evropë pas dy sezonesh e gjysmë te Al-Ittihad.

Transferimi, i konsideruar si një shkëmbim i drejtpërdrejtë mes dy lojtarëve, rrezikoi të dështonte pasi Fenerbahce deklaroi të martën se Al-Ittihad nuk kishte futur informacionet përkatëse në sistemin e përputhjes së transferimeve të FIFA-s (Transfer Matching System – TMS) për të finalizuar marrëveshjen.

Megjithatë, më vonë Al-Ittihad njoftoi shitjen e Kantes, përpara se të zyrtarizonte nënshkrimin e En-Nesyrit si zëvendësues të Karim Benzemas, i cili u largua nga klubi me marrëveshje të ndërsjellë për t’u transferuar te Al-Hilal të hënën.

“Mirë se erdhe në Fenerbahcen tonë, N’Golo Kante”, shkroi klubi turk në platformën X.

Mesfushori 34-vjeçar pati një rol kyç në fushatën e suksesshme të Francës në Rusi, ku fitoi Kupën e Botës 2018, dhe shpreson ta përsërisë këtë sukses në turneun e vitit 2026, i cili do të zhvillohet në Amerikën e Veriut verën e ardhshme.

Nga ana tjetër, En-Nesyri, 28 vjeç, iu bashkua Fenerbahces në vitin 2024 nga Sevilla dhe shënoi 38 gola në 79 ndeshje në të gjitha garat./Telegrafi/

Nënkryetari i Newell’s Old Boys, Juan Manuel Medina, ka konfirmuar se klubi argjentinas po punon aktivisht për rikthimin e Lionel Messit te skuadra e fëmijërisë së tij në Rosario, me synimin që kjo të ndodhë në gjysmën e parë të vitit 2027.

Duke folur për TN, Medina shpjegoi se bëhet fjalë për një projekt gjithëpërfshirës që përfshin klubin, autoritetet e qytetit, qeverinë rajonale dhe Federatën Argjentinase të Futbollit (AFA), me qëllim përmirësimin e infrastrukturës dhe ndërtimin e një strukture sportive konkurruese që do t’i mundësonte Messit të performojë në nivelin më të lartë në të gjitha garat.

Kjo nismë pasqyron dëshirën e kahershme publike të Messit për të luajtur një ditë për klubin që ka mbështetur që në fëmijëri.

Sulmuesi 38-vjeçar, i cili mbush 39 vjeç në qershor gjatë Kupës së Botës 2026, vazhdon të jetë në formë të jashtëzakonshme te Inter Miami, ku sezonin e kaluar shënoi 29 gola dhe dha 19 asistime në 28 ndeshje të MLS-së, duke udhëhequr skuadrën nga Florida drejt titullit kampion.

Messi ka kontratë me Inter Miami deri në vitin 2028 dhe përfiton rreth 12 milionë euro në vit, pa përfshirë bonuset. Së fundmi, ai refuzoi edhe një ofertë shumë fitimprurëse nga klubi arab Al-Ittihad.

Edhe pse Newell’s Old Boys nuk mund të rivalizojë financiarisht oferta të tilla, një rikthim i mundshëm i Messit do të udhëhiqej kryesisht nga ndjenjat dhe emocioni.

“Po punojmë që Leo të luajë për Newell’s në gjysmën e parë të vitit 2027”, duke nënvizuar se klubi po ndërton në mënyrë aktive kushtet e nevojshme për ta bërë këtë realitet./Telegrafi/

Viktor Gyokeres ka shpjeguar se si lindi festimi i tij ikonë, me një referencë për yllin e DC Comics, Bane, teksa diskutoi fillimin e aventurës së tij në Ligën Premier me Arsenalin.

Reprezentuesi i Suedisë ka pranuar se aventura e tij në Ligën Premier ka qenë sfiduese, por ai është i lumtur që bën pjesë në një garë për titullin e Ligës Premier në Emirates Stadium.

Gyokeres u transferua në verën e vitit 2025 në Londër, në një paketë transferimi me vlerë fillestare 55 milionë euro.

Një klauzolë largimi u aktivizua në kontratën e tij me klubin portugez Sporting, duke bërë që Arsenal të konsiderohet se ka bërë një blerje të shkëlqyer.

Një tjetër transferim galaktik, Real Madridi synon yllin e Arsenalit në verë

27-vjeçari nuk ka pasur fillimin më të lehtë nën dritat e forta, por gjithsesi ka shfaqur festimin e tij të njohur – ku krijon një maskë në fytyrë me duart, 11 herë në të gjitha kompeticionet.

“Isha me miqtë e mi dhe ata më thoshin se gjithmonë po festoja në mënyra të ndryshme, dhe mendoj se ishin pak të lodhur që të shihnin gjithmonë të njëjtën gjë”.

“Më donin që të krijoja një festim timin. Unë gjithashtu mendova se ishte një ide e mirë”.

“Ne u pajtuam dhe dolëm me atë që kam tani. Mendoj se ishte një ide shumë e mirë. Më ka pëlqyer ta bëj dhe ende më pëlqen. Ka qenë e mahnitshme. Nuk jam i sigurt nëse e kam thënë që ishte Bane, por mund të jetë”.

Gyokeres kishte shkruar në një postim në rrjetet sociale në qershor 2024, pranë një fotoje ku festonte: “Askush nuk interesohej derisa vendosa maskën”.

“Kjo është një referencë për Bane, i cili në filmin e Batmanit ‘The Dark Knight Rises’ thotë: ‘Askujt nuk i interesonte se kush isha deri sa vura maskën’”./Telegrafi/

Legjenda e Manchester Unitedit, Wayne Rooney, ka zgjedhur dy transferimet më të mira në Ligën Premier këtë edicion, duke vlerësuar performancat e tyre që nga fillimi i sezonit.

Afati kalimtar dimëror përfundoi të hënën mbrëma dhe disa lojtarë iu bashkuan klubeve të reja, por sipas Rooneyt, dy prej tyre kanë bërë diferencën më të madhe që në nisje të sezonit.

Në emisionin e tij “The Wayne Rooney Show”, Rooney insistoi se Hugo Ekitike dhe Granit Xhaka janë dy transferimet më të mira në Ligën Premier këtë edicion.

Ekitike iu bashkua Liverpoolit nga Eintracht Frankfurt në verën e vitit të kaluar, kurse Xhaka iu bashkua Sunderlandit nga Bayer Leverkuseni.

“Ekitike dhe Granit Xhaka te Sunderlandi kanë qenë ndoshta dy transferimet më të mira në Ligën Premier”, ka deklaruar Rooney.

Si Ekitike ashtu edhe Xhaka kanë lënë përshtypje të mira për klubet e tyre deri më tani këtë edicion, duke kontribuar në mënyrë të rëndësishme në renditjen dhe lojën e skuadrave të tyre.

Xhaka, i cili është kapiten i Sunderlandit, ka shfaqur një nivel të lartë konsistence, ndërsa Ekitike ka qenë një shtyllë e rëndësishme në sulmin e Liverpoolit që nga ardhja e tij.

Ky vlerësim i Rooneyt vjen në një moment kur shumë nga transferimet e mëdha të verës dhe dimrit po analizohen për ndikimin e tyre në skuadrat respektive, por sipas legjendës së United, Ekitike dhe Xhaka janë dy emrat që kanë dalë më së shumti në pah këtë sezon./Telegrafi/