Mallakastër – Vijon puna për shuarjen e Zjarri në Panahor të Mallakastrës, ndërsa situata në këtë zonë paraqitet e qetë.

Në terren janë angazhuar 10 efektivë të MZSH Mallakastër, 30 forca bashkiake, 8 punonjës të Policisë Bashkiake, 3 punonjës të Emergjencave Civile dhe 30 trupa të Forcave të Armatosura.

Ndërkohë, vatra e zjarrit vijon të jetë aktive nën kurorë në krahun verior, në aksin Ndrenie–Lofkënd–Vlosht.

Në këtë pjesë të zonës së përfshirë nga zjarri po vijon monitorimi dhe ndërhyrja nga forcat e MZSH Patos dhe Roskovec, me qëllim mbajtjen nën kontroll të situatës dhe parandalimin e përhapjes së flakëve.

Autoritetet vijojnë të monitorojnë terrenin dhe të ndërhyjnë në zonat ku evidentohen vatra aktive.

Saimir Rosales Rodriguez, 53 vjeç, i njohur si “kimisti” i grupit të Frakullës, I cili u ekstradua nga Kolumbia drejt Shqipërisë, është lënë në qeli nga GJKKO.

Rodriguez, shtetas kolumbian, ishte shpallur në kërkim ndërkombëtar pas largimit nga Shqipëria.

Ai u arrestua nga autoritetet kolumbiane dhe, pas procedurave të ekstradimit, është sjellë në vendin tonë.

Gjykata e Posaçme e dënoi më 30 qershor 2026 me 14 vite burg, pas hetimeve të SPAK për dosjen e laboratorit të kokainës në Frakull të Fierit.

Sipas hetimeve të SPAK, 53-vjeçari kishte një rol të rëndësishëm në grup, duke u cilësuar si personi që do të merrej me përpunimin dhe ndarjen e kokainës në laboratorin e zbuluar në Frakull.

Çështja e Frakullës lidhet me zbulimin e një laboratori ku përpunohej kokaina, ndërsa në kuadër të hetimit u arrestuan edhe persona të tjerë të dyshuar si pjesë e grupit kriminal.

Sipas dosjes hetimore, lënda narkotike ishte fshehur në një ngarkesë me pleh kimik, e cila kishte mbërritur fillimisht në Malin e Zi dhe më pas ishte transportuar drejt Shqipërisë.

Me ekstradimin e tij, “kimisti” i laboratorit të Frakullës ndodhet tashmë në Shqipëri, ku do të vuajë dënimin e dhënë nga GJKKO.

Shtetet e Bashkuara kanë njoftuar synimin për t’i ofruar Kolumbisë një paketë ndihme prej 1 miliard dollarësh, në mbështetje të politikave ekonomike dhe të sigurisë së presidentit të ri, Abelardo de la Espriella, aleat i presidentit amerikan Donald Trump.

“SHBA, në bashkëpunim me Kongresin, synojnë të shpallin një miliard dollarë ndihmë si pjesë e një pakete sigurie për të mbështetur qeverinë e presidentit De la Espriella në zbatimin e objektivave tona të përbashkëta”, deklaroi Departamenti amerikan i Shtetit.

Njoftimi erdhi menjëherë pas betimit të presidentit të ri kolumbian, i cili ka vendosur në qendër të programit të tij forcimin e rendit dhe ligjit, si dhe luftën kundër trafikut të drogës.

Paketa amerikane pritet të forcojë bashkëpunimin mes Uashingtonit dhe Bogotás, veçanërisht në fushën e sigurisë dhe në përpjekjet për goditjen e organizatave të trafikut të narkotikëve.

Senati amerikan ka miratuar me shumicë dërrmuese një projektligj të ri për sanksionet ndaj Rusisë, që synon të godasë të ardhurat e Moskës nga energjia dhe vendet që vazhdojnë të blejnë naftë e gaz rus. Projektligji tani duhet të kalojë në Dhomën e Përfaqësuesve.

Senati i Shteteve të Bashkuara ka bërë një hap të rëndësishëm drejt forcimit të presionit ekonomik ndaj Rusisë, duke miratuar projektligjin e ri të sanksioneve me 86 vota pro dhe 11 kundër.

Projektligji, i emërtuar “Lindsey O. Graham Sanctioning Russia Act of 2026”, parashikon masa të reja kundër zyrtarëve rusë, oligarkëve, kompanive shtetërore dhe subjekteve që ndihmojnë Moskën të financojë luftën në Ukrainë.

Në shënjestër blerësit e mëdhenj të energjisë ruse

Një nga pjesët më të rëndësishme të projektligjit është mundësia që presidenti Donald Trump të vendosë tarifa deri në 100% ndaj importeve nga vendet që janë ndër blerësit më të mëdhenj të naftës dhe gazit rus.

Masa synon veçanërisht pesë blerësit kryesorë të energjisë ruse dhe vendet që ndihmojnë Moskën të anashkalojë sanksionet. Kjo e vendos në qendër të vëmendjes Kinën dhe Indinë, dy nga blerësit kryesorë të energjisë ruse.

Nëse zbatohet, një masë e tillë mund të shkaktojë tensione të reja tregtare mes Uashingtonit, Pekinit dhe Nju Delhit.

Përjashtime për vendet evropiane

Projektligji parashikon gjithashtu përjashtime për vendet që kanë një varësi relativisht të ulët nga gazi rus dhe që ndërmarrin hapa për të reduktuar më tej importet.

Kjo është paraqitur nga mbështetësit e projektligjit si një mënyrë për të shmangur goditjen ndaj aleatëve evropianë, ndërsa presioni përqendrohet te vendet që vazhdojnë të blejnë në mënyrë të konsiderueshme energji ruse.

Zelensky dhe von der Leyen përshëndesin votimin

Presidenti ukrainas Volodymyr Zelensky e përshëndeti vendimin e Senatit, duke e cilësuar presionin e fortë amerikan dhe sanksionet ndaj Rusisë si mjete të rëndësishme për t’i dhënë fund luftës.

Edhe presidentja e Komisionit Evropian, Ursula von der Leyen, e mirëpriti votimin dhe bëri thirrje për presion të përbashkët ndaj Moskës.

Projektligji shkon në Dhomën e Përfaqësuesve

Pavarësisht mbështetjes së gjerë në Senat, projektligji ende nuk është ligj. Ai duhet të miratohet edhe nga Dhoma e Përfaqësuesve dhe më pas të nënshkruhet nga presidenti.

Dhoma e Përfaqësuesve është aktualisht në pushime dhe shqyrtimi i projektligjit pritet të bëhet pas rikthimit të saj në shtator.

Votimi në Senat përfaqëson një sinjal të fortë politik ndaj Moskës, por njëkohësisht mund të hapë një kapitull të ri të tensioneve tregtare me vendet që vazhdojnë të blejnë energji ruse.

Nëse miratohet dhe zbatohet në formën aktuale, paketa do t’i jepte administratës Trump një instrument të fuqishëm për të ushtruar presion jo vetëm mbi Rusinë, por edhe mbi partnerët e saj kryesorë ekonomikë.

Seanca konstituive e Kuvendit të Kosovës do të vazhdojë sot në orën 11:00, një ditë pasi skadoi afati i përcaktuar nga Gjykata Kushtetuese për konstituimin e Legjislaturës së 11-të.

Kryesuesi i seancës konstituive, deputeti i Lëvizjes Vetëvendosje, Avni Dehari, ka vendosur që vazhdimi i seancës të mbahet sot, e shtunë, 8 gusht, nga ora 11:00.

Sipas njoftimit të Kuvendit, në rendin e ditës janë dy pika: zgjedhja e kryetarit të Kuvendit dhe zgjedhja e nënkryetarëve.

“Të shtunën, më 8 gusht 2026, në orën 11:00, vazhdon seanca konstituive e Legjislaturës XI të Kuvendit të Republikës së Kosovës. Rendi i ditës: 3. Zgjedhja e Kryetarit të Kuvendit; 4. Zgjedhja e nënkryetarëve të Kuvendit.”

Afati kushtetues përfundoi në mesnatë

Seanca e Kuvendit u zhvillua deri pas mesnatës, ndërsa deputetët nuk arritën ta përfundojnë procesin e konstituimit brenda afatit.

Sipas aktgjykimit të Gjykatës Kushtetuese, deputetët kishin 30 ditë kohë për ta konstituuar Kuvendin, afat që niste nga certifikimi i rezultateve të zgjedhjeve.

Afati përfundoi mbrëmë në orën 00:00, pa u zgjedhur kryetari dhe nënkryetarët e Kuvendit.

Opozita qëndroi në Kuvend deri në mesnatë

Partitë opozitare qëndruan gjatë mbrëmjes në ambientet e Kuvendit, deri në skadimin e afatit në mesnatë.

Dështimi për ta konstituuar Kuvendin brenda afatit të përcaktuar ka hapur një situatë të re politike dhe institucionale, ndërsa vazhdimi i seancës sot pritet të përcaktojë hapat e mëtejshëm për funksionalizimin e Legjislaturës së 11-të.

Fundjava ka nisur me fluks të lartë qytetarësh dhe automjetesh në pikën kufitare të Morinit, ku mijëra qytetarë të Kosovës po shfrytëzojnë temperaturat e larta të gushtit për të kaluar pushimet në bregdetin shqiptar.

Fluksi më i madh është shënuar në orët e para të mëngjesit. Sipas të dhënave paraprake, vetëm në tre orë kanë hyrë në territorin e Shqipërisë përmes Morinit më shumë se 11 mijë qytetarë, me rreth 7 mijë automjete.

Për përballimin e fluksit, Policia Kufitare ka vënë në dispozicion gjashtë sportele të dedikuara për automjetet me targa të Kosovës dhe Shqipërisë, të cilat, sipas protokollit, nuk i nënshtrohen kontrolleve të plota.

Për herë të parë, një model i inteligjencës artificiale ka projektuar me sukses gjenome të plota virale që më pas janë sintetizuar dhe kanë rezultuar funksionale në laborator. Zbulimi shihet si një pikë kthese për biologjinë, por ngre edhe pyetje të rëndësishme për sigurinë biologjike.

Shkencëtarët e Universitetit të Stanfordit në Shtetet e Bashkuara kanë përdorur inteligjencën artificiale për të projektuar viruse krejtësisht të reja, të cilat më pas janë krijuar dhe testuar me sukses në laborator, raportojnë mediat ndërkombëtare.

Sipas studiuesve, kjo është hera e parë që një model i inteligjencës artificiale arrin të projektojë një gjenom të plotë viral që rezulton funksional.

Viruset e krijuara janë bakteriofagë, një lloj virusi që infekton bakteret dhe nuk infekton njerëzit. Nga 302 dizajne të gjeneruara nga IA, studiuesit sintetizuan në laborator kandidatët më premtues. Sipas rezultateve të studimit, 16 prej tyre rezultuan të aftë të infektonin dhe shkatërronin bakterin E. coli.

IA po mëson “gjuhën e jetës”

Profesori Brian Hie, një nga studiuesit e përfshirë në projekt, e ka cilësuar arritjen si një hap të rëndësishëm në përdorimin e inteligjencës artificiale për biologjinë.

Ndryshe nga modelet gjuhësore që analizojnë fjalët dhe parashikojnë sekuencat e tekstit, modelet **Evo1 dhe Evo2** janë trajnuar për të analizuar sekuenca gjenetike dhe për të parashikuar modelet e tyre.

Këto modele janë trajnuar me të dhëna gjenetike nga viruse, baktere, bimë dhe njerëz, duke u mundësuar studiuesve të eksplorojnë mënyra të reja për projektimin e sekuencave biologjike.

Shpresë për bakteret rezistente ndaj antibiotikëve

Një nga aplikimet më premtuese të kësaj teknologjie mund të jetë lufta kundër rezistencës ndaj antibiotikëve.

Bakteriofagët janë konsideruar prej kohësh një alternativë potenciale për trajtimin e infeksioneve bakteriale, veçanërisht në rastet kur bakteret nuk reagojnë më ndaj antibiotikëve ekzistues.

Studiuesit shpresojnë se projektimi i bakteriofagëve me ndihmën e inteligjencës artificiale mund të përshpejtojë zhvillimin e terapive të reja kundër infeksioneve rezistente.

Arritja ngre edhe shqetësime për sigurinë

Megjithatë, përparimi shkencor shoqërohet edhe me shqetësime serioze për sigurinë biologjike.

Ekspertë nga Qendra për Sigurinë Shëndetësore në Universitetin Johns Hopkins kanë paralajmëruar se aftësia e inteligjencës artificiale për të projektuar gjenome virale ngre pyetje urgjente mbi mënyrën se si këto teknologji mund të përdoren në mënyrë të sigurt dhe si mund të parandalohet keqpërdorimi i tyre.

Studiuesit theksojnë se bakteriofagët e krijuar në këtë projekt nuk paraqesin rrezik për njerëzit. Për më tepër, krijimi i organizmave më kompleksë është shumë më i vështirë.

Gjenomet e bakteriofagëve të projektuar përmbajnë rreth 5 400 çifte bazash, ndërsa edhe organizmat më të thjeshtë të gjallë kanë qindra mijëra çifte bazash.

Një pikë kthese për biologjinë sintetike

Megjithatë, studiuesit pranojnë se zhvillimi i shpejtë i modeleve të inteligjencës artificiale mund të hapë rrugën për projekte shumë më ambicioze në të ardhmen.

Ekspertë të biologjisë sintetike e shohin këtë arritje si një pikë kthese: kompjuterët nuk po përdoren më vetëm për të analizuar sistemet biologjike, por po fillojnë të kontribuojnë drejtpërdrejt në projektimin e tyre.

Në perspektivë, kjo qasje mund të ndihmojë në përshpejtimin e zhvillimit të terapive të reja, enzimave me përdorim mjekësor dhe antitrupave për imunoterapi.

Por krahas mundësive të mëdha, shkencëtarët përballen edhe me një sfidë të re: si të shfrytëzohet fuqia e inteligjencës artificiale në biologji pa krijuar rreziqe të reja për sigurinë shëndetësore dhe biologjike.

Read More...

Të paktën tre persona, përfshirë një fëmijë, janë vrarë dhe tre të tjerë janë plagosur pas sulmeve të reja ruse në zonën e Kievit. Në kryeqytetin ukrainas u dëgjuan më shumë se dhjetë shpërthime.

Sulme të reja ruse u raportuan në orët e para të mëngjesit në zonën e gjerë të Kievit, ndërsa autoritetet ukrainase njoftuan për viktima dhe dëme materiale.

Në kryeqytetin ukrainas u dëgjuan më shumë se dhjetë shpërthime, pasi ishte aktivizuar alarmi për një sulm me raketa.

Kryetari i bashkisë së Kievit, Vitali Klitschko, deklaroi se sulmet shkaktuan zjarre në dy zona të qytetit. Sipas informacioneve të para, nuk janë raportuar viktima në kryeqytet.

Tre të vrarë në Brovary

Situata ishte më e rëndë në Brovary, qytet i vendosur disa kilometra në verilindje të Kievit.

Të paktën tre persona humbën jetën si pasojë e sulmeve, mes tyre edhe një fëmijë. Lajmi u bë i ditur nga kreu i administratës ushtarake të Kievit, Timur Tkachenko.

“Tre persona u vranë, përfshirë një fëmijë”, deklaroi Tkachenko përmes Telegramit.

Tre persona të tjerë u plagosën, ndërsa dëme materiale u raportuan në tre zona të qytetit. Autoritetet ukrainase nuk kanë specifikuar ende nëse sulmet vdekjeprurëse në Brovary u kryen me raketa apo me dronë. Ndërkohë, ekipet e emergjencës vijojnë punën në zonat e prekura, ndërsa autoritetet po vlerësojnë shkallën e dëmeve.

Sulmet ndaj anijeve tregtare, porteve dhe infrastrukturës energjetike po e shndërrojnë Detin e Zi në një front të përhershëm të luftës Rusi–Ukrainë, ndërsa rritja e rrezikut po rëndon mbi sigurimet, transportin dhe çmimet e energjisë.

Deti i Zi po përjeton një përshkallëzim të paprecedentë të rrezikut për transportin tregtar. Anijet, ekuipazhet, portet dhe objektet energjetike janë gjithnjë e më shumë në qendër të një konflikti ku kufiri mes objektivave ushtarake dhe atyre tregtare po bëhet gjithnjë e më i paqartë.

Ndërsa vëmendja ndërkombëtare është përqendruar te tensionet në Ngushticën e Hormuzit, situata në Detin e Zi po përkeqësohet me ritme të shpejta. Sipas të dhënave të cituara për muajin korrik, janë regjistruar të paktën 24 sulme të konfirmuara ndaj anijeve tregtare, shifra më e lartë mujore që nga nisja e pushtimit të plotë rus të Ukrainës në shkurt 2022.

“Transporti detar është aktualisht në një luftë të vazhdueshme. Çdo anije që lëviz nga pala ruse ose ukrainase mund të bëhet shënjestër në një luftë të pafundme, e cila tani është shtrirë edhe në det”, deklaroi për APE-MEPE Manolis Lazaridis, kreu i kompanisë së sigurisë detare Diaplous.

Katër sulme në vetëm gjashtë ditë

Përshkallëzimi ka vijuar edhe në ditët e para të gushtit. Nga 1 deri më 6 gusht janë raportuar të paktën katër sulme të reja me nivel relativisht të lartë besueshmërie, që kanë përfshirë dy anije kontejnerësh, një anije ro-ro ose mallrash të përgjithshme dhe një cisternë.

Në të njëjtën periudhë janë publikuar të dhëna për gjithsej shtatë anije që mund të jenë goditur, mes tyre dy transportues të mallrave të mëdha dhe tre cisterna.

Megjithatë, kjo shifër më e lartë nuk mund të konsiderohet ende e konfirmuar. Për disa prej incidenteve mungojnë emrat e anijeve, numrat IMO, datat e sakta ose të dhëna të mjaftueshme për verifikim të pavarur.

Një vlerësim edhe më alarmues vjen nga shoqata turke e detarëve Deniz Iscileri, e cila pretendon se më shumë se 35 anije tregtare janë goditur gjatë korrikut dhe se deri në 23 marinarë kanë humbur jetën.

Nëse këto të dhëna konfirmohen, korriku 2026 do të rezultonte muaji më vdekjeprurës i luftës për ekuipazhet tregtare.

Por verifikimi i plotë mbetet i vështirë për shkak të mungesës së informacionit të pavarur dhe deklaratave kontradiktore të palëve në konflikt.

Nga anijet ruse te objektivat tregtare ndërkombëtare

Ndryshimi kryesor nuk lidhet vetëm me numrin e sulmeve, por edhe me zgjerimin e gamës së objektivave.

Sulmet nuk po kufizohen më vetëm te portet ukrainase apo te anijet e lidhura drejtpërdrejt me Rusinë. Në shënjestër mund të përfshihen edhe anije me pronësi të huaj ose perëndimore, në varësi të destinacionit, ngarkesës, qëllimit të udhëtimit apo lidhjeve të perceptuara financiare me njërën prej palëve.

Veçanërisht shqetësuese janë raportet për sulme ndaj cisternave në pronësi greke.

Nëse këto incidente konfirmohen, ato do të tregojnë se flamuri i një anijeje nuk është më domosdoshmërisht garanci sigurie. Një anije tregtare mund të konsiderohet objektiv edhe për shkak të misionit të saj tregtar ose lidhjeve financiare që i atribuohen udhëtimit.

“Çdo përballje në tokë transferohet në det”

Sipas Lazaridis, konflikti po shtrihet përtej anijeve dhe po prek gjithnjë e më shumë infrastrukturën portuale, objektet energjetike dhe nyjet kritike të zinxhirit të furnizimit.

“Çdo përballje që fillon në tokë, në nivelin tjetër transferohet në det”, tha ai.

Sipas tij, palët kanë kuptuar se një sulm ndaj transportit tregtar mund të prodhojë ndikim ekonomik dhe mediatik më të madh sesa goditja e një objektivi thjesht ushtarak.

“Goditja e një anijeje tregtare rrit mbulimin e mallrave të luftës dhe të sigurimeve. Ky është një kosto operative që transferohet drejtpërdrejt në çmimin e produkteve, qofshin ato energji apo mallra konsumi”, theksoi Lazaridis.

Sigurimet dhe transporti përballen me kosto më të larta

Përshkallëzimi në Detin e Zi po detyron kompanitë e transportit detar të rishikojnë rrugët e lundrimit, mbulimin e sigurimeve, masat e sigurisë dhe kontratat e çarterit.

Rritja e rrezikut reflektohet në primet e sigurimit të luftës dhe në kostot e transportit. Në fund të zinxhirit, këto shpenzime mund të përkthehen në çmime më të larta për energjinë dhe mallrat që mbërrijnë te konsumatori.

Anijet mbeten të pambrojtura ndaj dronëve dhe raketave

Mbrojtja e anijeve tregtare nga avionët pa pilot, raketat dhe dronët detarë mbetet një nga sfidat më të mëdha.

Sipas kreut të Diaplous, kompanitë private të sigurisë kanë kapacitetet dhe personelin për të rritur nivelin e mbrojtjes së anijeve, përfshirë edhe përdorimin e ekipeve të armatosura të sigurisë.

Por një problem i rëndësishëm është se autoritetet ruse dhe ukrainase nuk lejojnë praninë e personelit të armatosur në anijet që u afrohen porteve të të dyja vendeve.

Kjo kufizon ndjeshëm aftësinë e ekuipazheve dhe operatorëve për të reaguar ndaj një sulmi që mund të ndodhë me pak ose aspak paralajmërim.

Lufta në Detin e Zi prek edhe energjinë

Dimensioni detar i konfliktit është i lidhur ngushtë edhe me tregun evropian të energjisë.

Lazaridis argumenton se kufizimet e vendosura ndaj LNG-së ruse po e shtyjnë Evropën drejt furnizimeve alternative, të cilat në disa raste mund të jenë më të kushtueshme.

“Evropa, me masat që ka marrë ndaj LNG-së ruse, në thelb po përjashton qytetarët evropianë nga tregtia e gazit rus, si rezultat i së cilës ata detyrohen të blejnë LNG më të shtrenjtë, kryesisht nga Shtetet e Bashkuara”, tha ai.

Sipas tij, varësia nga furnizues të jashtëm e kufizon hapësirën e manovrimit të vendeve evropiane në tregun e energjisë.

Në këtë kuadër, paketa e 21-të e sanksioneve të Bashkimit Evropian, e miratuar më 23 korrik 2026, përfshin edhe rregulla për transportin e LNG-së ruse drejt vendeve të treta dhe aktivitetin e transportuesve të LNG-së.

Për kontratat afatgjata parashikohet ndalim importi nga 1 janari 2027, ndërsa për transportin e ngarkesave drejt vendeve të treta parashikohen përjashtime të përkohshme në kushte specifike deri më 25 korrik 2027.

“Flota në hije” dhe një front që po zgjerohet

Ukraina ka pretenduar gjithashtu se gjatë javëve të fundit ka goditur dhjetëra anije të lidhura me të ashtuquajturën “flotë në hije”, e cila dyshohet se përdoret për transportin dhe eksportet ruse.

Këto pretendime nuk janë verifikuar plotësisht nga burime të pavarura të sektorit detar.

Në tërësi, tabloja që po krijohet është ajo e një Deti të Zi ku transporti tregtar po përballet me një nivel rreziku dukshëm më të lartë se në periudhat e mëparshme të konfliktit.

Nga sulmet ndaj anijeve dhe porteve te objektet energjetike, lufta po krijon një front ku aktiviteti ekonomik dhe ai ushtarak ndërthuren gjithnjë e më shumë.

Për ekuipazhet tregtare, rreziku tashmë nuk lidhet vetëm me vendin ku ndodhet anija, por edhe me atë që transporton, ku shkon dhe me cilën palë mund të perceptohet se ka lidhje. Ndërsa kostoja e këtij rreziku nis në Detin e Zi, ajo mund të përfundojë në sigurime, transport, energji dhe çmimet që paguan konsumatori.

Çmimet globale të naftës kanë shënuar një rritje të lehtë, ndërsa investitorët vijojnë të ndjekin me kujdes zhvillimet rreth Ngushticës së Hormuzit dhe mundësinë e një marrëveshjeje për rihapjen e saj.

Nafta e papërpunuar Brent, referenca kryesore për tregun ndërkombëtar, u rrit me rreth 1.2%, duke u tregtuar pranë nivelit të 80 dollarëve për fuçi. Ndërkohë, nafta amerikane WTI fitoi rreth 1%, duke arritur në afërsisht 76 dollarë për fuçi.

Rritja e çmimeve vjen pasi Irani deklaroi se po finalizon një marrëveshje me Omanin për tranzitin e anijeve përmes Ngushticës së Hormuzit. Megjithatë, autoritetet iraniane kanë sqaruar se kjo nuk nënkupton domosdoshmërisht rihapjen e plotë të kësaj rruge strategjike detare.

Ngushtica e Hormuzit konsiderohet një nga korridoret më të rëndësishme të transportit të energjisë në botë. Përpara përshkallëzimit të konfliktit në rajon, përmes saj kalonte rreth 20% e furnizimit global me naftë.

Pasiguria në tregje është shtuar edhe nga zhvillimet në Detin e Kuq. Rebelët Houthi në Jemen morën përgjegjësinë për një sulm ndaj një naftëmbajtëseje saudite në Gjirin e Adenit, pranë Ngushticës Bab al-Mandeb, një tjetër pikë kyçe për tregtinë detare ndërkombëtare.

Dashi

Jeta në çift do të ndikohet pozitivisht nga të gjithë planetët gjatë kësaj dite. Do të merreni vesh për çdo gjë dhe do t’i zgjidhni edhe mosmarrëveshjet e vogla. Beqarët do të kenë disa takime interesante, por që nuk do të mund t’ua ndryshojnë jetën. Me financat duhet të keni kujdes, sepse gabimi më i vogël do t’ju kushtojë shtrenjtë në të ardhmen.

Demi

Ka shumë mundësi që marrëdhënia me partnerin tuaj të përmirësohet ndjeshëm sot. Shfrytëzojeni sa të mundni çdo moment! Beqarët do të kenë nevojë për më shumë siguri para se të fillojnë një lidhje. Prisni edhe pak kohë, sepse do ta gjeni atë që doni. Financat do të jenë shumë të mira dhe do të mund të bëni edhe investimet që kishit menduar prej kohësh. Ditë pozitive!

Binjakët

Yjet do të sjellin harmoni dhe shumë gëzim në jetën tuaj në çift gjatë kësaj dite. Gjithçka do të jetë edhe më e bukur se disa kohë më parë. Beqarët do të takojnë disa persona interesantë dhe do të fillojnë histori dashurie pasionante. Neptuni do t’ju mbështesë mjaft në planin financiar dhe do t’ju bëjë më të qartë për gjendjen në të cilën ndodheni. Do të maten mirë para se të hidhni çdo hap.

Gaforrja

Do t’ju duhet patjetër të merrni disa vendime të rëndësishme sot në jetën tuaj në çift, sepse ka kohë që gjërat nuk po ecin si i kishit menduar. Beqarët nuk do të jenë në humorin e duhur dhe nuk do të kenë durim të kërkojnë personin ideal. Financat do të jenë goxha të mira. Nuk pritet asnjë problem apo vështirësi në këtë sektor, kështu që mund të rrini të qetë.

Luani

Ndikimi i yjeve në jetën tuaj në çift do të jetë shumë kompleks sot. Disa do t’ju nxitin të jeni tolerantë dhe të kuptueshëm, ndërsa disa të tjerë do t’ju nxitin të bëheni kokëfortë. Beqarët do të kenë një takim mbresëlënës, nga i cili mund t’ju ndryshojë jeta përgjithmonë. Në planin financiar nuk duhen ndërmarrë rreziqe, edhe sikur situata të jetë e qëndrueshme.

Virgjëresha

Jeta sentimentale do të jetë prioritet për ata që janë në çift. Do t’i lini mënjanë të gjitha problemet që keni kaluar dhe do të bëni të pamundurën të riktheni harmoninë. Beqarët nuk do të fillojnë histori dashurie, sepse nuk do të ndihen gati. Ftesat nuk do të mungojnë. Me financat do të tregoheni më të organizuar dhe më të arsyeshëm. Shlyeni edhe borxhet.

Peshorja

Do të ndiheni shumë mirë sot pranë atij që dashuroni dhe nuk do të keni çfarë të kërkoni më shumë. Mosmarrëveshjet e së kaluarës i keni lënë pas krahëve. Beqarët do të jenë më të vendosur se kurrë të fillojnë një histori dashurie me personin që ka kohë që i josh. Të ardhurat duhet të menaxhohen me shumë përkujdesje.

Akrepi

Ditë goxha e turbullt për ata që janë në një lidhje. Nuk do të merreni vesh mirë me partnerin dhe kjo mund të shkaktojë debate herë pas here. Beqarët nuk duhet të pranojnë çdo lloj ftese pa qenë të sigurt se ata persona nuk do t’u bëjnë keq. Në planin financiar do të kryeni transaksione të rëndësishme dhe gjendja do të jetë e stabilizuar.

Shigjetari

Përfitoni nga çdo mundësi që do t’ju jepet sot për të bërë disa ndryshime në jetën në çift. Do të mund t’i largoni problemet e mëdha që keni pasur dhe do të ndiheni më të qetë. Beqarët do të kenë sukses dhe kjo do ta shtojë egon e tyre. Personi që do të takoni do të zërë një vend të rëndësishëm në jetën tuaj. Mos e përzieni dashurinë me financat, sepse do t’i humbni të dyja njëherësh.

Bricjapi

Nëse jeni në një lidhje, ka mundësi që të kaloni vështirësi të shumta. Nuk do të kuptoheni mirë me partnerin dhe nuk do të toleroni asnjë çast. Beqarët do të mbeten sërish vetëm, edhe pse do të jenë në kërkim të princit të kaltër. Në planin financiar do të surprizoheni nga një shumë e madhe parash.

Ujori

Do të keni konflikte të njëpasnjëshme me partnerin gjatë kësaj dite dhe do të jeni të brengosur e të mërzitur. Beqarët do të jenë në pritje të princit të kaltër, por qielli i dashurisë nuk premton shumë. Financat do të jenë të qëndrueshme. Mund të keni edhe fat në ndonjë lotari.

Peshqit

Nëse keni nevojë për më shumë liri në jetën tuaj në çift, mjafton t’ia thoni partnerit dhe jo të veproni sipas mendjes suaj. Beqarët do të kenë takime pa fund dhe do të arrijnë të hedhin hapat e parë drejt krijimit të një lidhjeje. Buxhetin do ta menaxhoni me shumë kujdes dhe maturi. Gjendja do të jetë edhe më e mirë sesa ju mendonit.

 Edhe pse afati kushtetues për seancën konstituive të Kuvendit përfundon sonte, vazhdimi i saj është caktuar për të shtunën, më 8 gusht.

Seanca konstituive e Kuvendit të Kosovës do të vazhdojë të shtunën në orën 11:00.

Sipas Kushtetutës së vendit, afati përfundon sot në orën 24:00.

Njoftimi i Kuvendit ka sjellë reagime. Lidhja Demokratike e Kosovës dhe Aleanca për Ardhmërinë e Kosovës i kanë kërkuar Vetëvendosjes që ta thërrasë sonte vijimin e seancës konstituive brenda afatit kushtetues.

Të njëjtën gjë ka kërkuar edhe PDK, por kryeministri në detyrë i ka dërguar një letër ku i ka propozuar që të marrë postin e kryeparlamentarit, ndërsa VV postin e presidentit./abcnews.al

Marash Kumbulla do të vazhdojë të luajë në La Liga, por me një skuadër të re. Ai bashkohet me Rayo Vallecano-n, ku aktivizohet edhe mbrojtësi tjetër kuqezi, Ivan Balliu.

Sipas njoftimit zyrtar të klubit të Romës, qendërmbrojtësi është huazuar deri në fund të sezonit, me klubin spanjoll që ka të drejtën e blerjes.

Futbollisti 26-vjeçar do të luajë për sezonin e tretë radhazi në elitën e futbollit spanjoll.

Sezonin e kaluar ai ishte pjesë e Mallorcës, ku luajti në tetë takime në La Liga, duke regjistruar në total 485 minuta.

Versionin më të mirë të karrierës së tij e shfaqi në sezonin 2024/25 me Espanyolin.

Mbrojtësi shqiptar u aktivizua për 2.976 minuta në La Liga, duke luajtur në 35 ndeshje, 34 prej tyre si titullar, ndërsa realizoi edhe tre gola.

Kumbulla është pjesë e Kombëtares së Shqipërisë që nga viti 2019 dhe numëron mbi 20 paraqitje me fanellën kuqezi. Ai ishte gjithashtu pjesë e ekipit që mori pjesë në Euro 2024./abcnews.al

Volodymyr Zelenskyy thotë se Ukraina është “thellësisht mirënjohëse” për miratimin e një projektligji për sanksione ndaj Rusisë në Senat.

Projektligji – i emëruar dhe i mbështetur nga senatori i ndjerë amerikan Lindsey Graham, një mbështetës i flaktë i Ukrainës – u miratua me një diferencë të madhe votash dypartiake.

Do të vendoste sanksione të reja dhe ndalime vizash për presidentin e Rusisë, Vladimir Putin, dhe komandantët e lartë ushtarakë, si dhe do të vendoste tarifa deri në 500% mbi eksportet e vendit.

“Ukraina vlerëson TË GJITHË mbështetjen që Shtetet e Bashkuara i japin Ukrainës—nga të dyja palët dhe nga i gjithë populli amerikan”, shkroi Zelenskyy në rrjetet sociale.

“Presioni i vërtetë dhe i fortë amerikan dhe sanksionet kundër Rusisë janë ato që do të ndihmojnë më shumë. Diplomacia afrohet me çdo hap presioni ndaj agresorit.”

Spanja do të vendosë kontrolle të reja kufitare për fluturimet dhe anijet nga Italia, ndërsa debati midis të dy vendeve për fluksin e emigrantëve në Ceuta intensifikohet.

Qeveria spanjolle tha se kontrollet e pasaportave, kombësisë dhe vizave do të kryhen për pasagjerët italianë dhe vizitorët nga vende të tjera që mbërrijnë nga Italia nga mesnata e së shtunës deri më 7 shtator.

Vendimi është marrë “mes presionit të vazhdueshëm të migracionit të parregullt” nga Italia, sipas qeverisë.

Kjo vjen pasi Italia zbatoi masat e veta, të cilat tha se ishin të motivuara nga vërshimi masiv i migracionit në enklavën afrikane të Spanjës, Ceuta, më 30 korrik.

Rreth 72,000 njerëz hynë ilegalisht në Ceuta nga Maroku brenda një periudhe 24-orëshe, por shumica dërrmuese janë kthyer që atëherë në vendin e Afrikës së Veriut, sipas vlerësimeve spanjolle.

Read More...

Një gjykatë federale e Apelit në Shtetet e Bashkuara ka urdhëruar administratën e presidentit Donald Trump të ndalojë përkohësisht ndërtimin e sallës së re të vallëzimit me vlerë 400 milionë dollarë në kompleksin e Shtëpisë së Bardhë, duke i dhënë një goditje të rëndësishme projektit dhe duke hapur rrugën për një përballje të mundshme në Gjykatën Supreme.

Vendimi i gjykatës konfirmon një urdhër paraprak të një gjykate më të ulët, i cili ndalon vazhdimin e punimeve mbi sipërfaqe, derisa të ketë miratim nga Kongresi. Sipas shumicës së trupit gjykues, vendimi për ndërtimin e një salle kaq të madhe nuk i takon vetëm presidentit, por është një çështje që duhet të vendoset nga Kongresi.

Padia është ngritur nga organizata National Trust for Historic Preservation, e cila kundërshtoi projektin pasi administrata shembi Krahun Lindor të Shtëpisë së Bardhë për t’i hapur rrugë ndërtimit të ri. Organizata argumenton se ndryshime kaq të mëdha në kompleksin historik nuk mund të realizohen pa autorizimin e Kongresit.

Gjykata theksoi se Kongresi nuk i ka dhënë pushtetit ekzekutiv autoritet të pakufizuar për të ridizenjuar, riformësuar apo rindërtuar Shtëpinë e Bardhë, sipas dëshirave të presidentit në detyrë. Sipas vendimit, ndërtesa është një simbol kombëtar dhe çdo transformim i madh kërkon mbështetje ligjore dhe miratim institucional.

Administrata Trump kishte apeluar vendimet e mëparshme të një gjykatësi federal, i cili kishte bllokuar dy herë ndërtimin mbi tokë, ndërsa kishte lejuar vazhdimin e punimeve në pjesët nëntokësore të projektit. Vendimi më i fundit lë në fuqi këtë kufizim dhe ndalon çdo punim të ri mbi sipërfaqe derisa të ketë një vendim përfundimtar ose miratim nga Kongresi.

Gjykata e Apelit ka pezulluar zbatimin e vendimit për 14 ditë, duke i dhënë administratës mundësinë që ta dërgojë çështjen në Gjykatën Supreme, e cila pritet të vendosë nëse presidenti ka autoritet të ndërmarrë një projekt të tillë pa miratimin e ligjvënësve. Deri tani, Shtëpia e Bardhë nuk ka dhënë një reagim zyrtar lidhur me vendimin e gjykatës.

Presidenti Donald Trump ka mbrojtur vazhdimisht projektin, duke deklaruar se salla e re është e domosdoshme për organizimin e pritjeve shtetërore, vizitave të liderëve të huaj dhe ceremonive të mëdha zyrtare. Ai ka argumentuar gjithashtu se objekti është i rëndësishëm edhe për arsye të sigurisë kombëtare.

Trump e ka përsëritur këtë qëndrim edhe pas atentatit të ndodhur gjatë darkës së Shoqatës së Korrespondentëve të Shtëpisë së Bardhë në muajin prill, duke theksuar se ambientet e reja do të ofronin kushte më të sigurta për zhvillimin e aktiviteteve të nivelit të lartë. Tashmë, fati i projektit pritet të vendoset nga Gjykata Supreme, në një çështje që mund të përcaktojë edhe kufijtë e kompetencave të presidentit për ndryshime të mëdha në pronat federale historike.

Pentagoni publikoi një grumbull të ri dokumentesh dhe imazhesh që lidhen me UFO, të njohura edhe si fenomene anomale të paidentifikuara ose UAP, duke përfshirë kujtimin e një piloti ushtarak për një trekëndësh të madh e të çuditshëm që bllokoi yjet mbi Afganistan në vitin 2002.

41 dosjet e reja, të postuara në faqen e internetit të Pentagonit për UFO, përfshijnë një përzierje dokumentesh, imazhesh dhe videosh.

Të dhënat vijnë nga Pentagoni, FBI-ja, CIA, Departamenti i Shtetit dhe Zyra Ekzekutive e presidentit, me më të vjetrin që është nga viti 1950 dhe më të fundit që është nga ky vit.

Ky zbulim është publikimi i pestë sipas një urdhri ekzekutiv që presidenti Donald Trump nënshkroi në janar duke u udhëzuar ushtrisë dhe agjencive të tjera të prodhojnë më shumë dokumente që lidhen me UFO.

Pjesa më e madhe e publikimit të së premtes përfshin llojin e videove të paqarta që kanë qenë tipar dallues i zbulimeve të kaluara, duke treguar objekte fluturuese të kapura nga sensorë dhe kamera ushtarake.

Gjashtë nga videot tregojnë versione të ndryshme të të njëjtit incident — një përballje mbi Gjirin e Omanit midis forcave të Operacioneve Speciale në një luftanije AC-130J në shtator 2021.

Një klip i paraqitur nga Komanda Qendrore e SHBA-së tregon pamje të kapura nga një avion ushtarak mbi një zonë të populluar në Lindjen e Mesme në vitin 2025.

Videoja tregon atë që duket të jetë një objekt që zmadhohet në ekran. Incidenti gjithashtu mbetet i pazgjidhur.

Një video tjetër tregon pamje të kapura nga një “Agjent Special i Qeverisë Amerikane” në SHBA-në perëndimore këtë vit. Pentagoni tha se videoja “paraqet dy zona kontrasti ‘të nxehta’ që lëvizin ngadalë, të dukshme në imazhet infra të kuqe”.

Publikimi përfshin tetë formularë 302, të cilët FBI-ja i përdor për të regjistruar detajet e intervistave të dëshmitarëve. Të tetë formularët përfshijnë redaktime për të mbrojtur informacionin konfidencial dhe shumica janë të shoqëruara me përpunime artistike nga zyra që tregojnë objektet që përshkruan dëshmitarët. Të tjerë u publikuan së bashku me pamjet video që të intervistuarit kapën, duke treguar ato që duken si sfera dhe burime të tjera drite në qiell.

Një raport i rëndësishëm i 302 regjistron një intervistë me një ish-pilot ushtarak në vitin 2024. Piloti i tha një agjenti se filluan të shihnin drita të çuditshme në qiell midis mesnatës dhe orës 3 të mëngjesit të vitit të kaluar. Piloti tha se i pa për herë të parë dritat gjatë një fluturimi nga Massachusetts në Irlandë në tetor 2023.

Ai gjithashtu i tregoi agjentit për diçka që pa ndërsa shërbente në Afganistan në vitin 2002.

Pentagoni tha se zbulimi i dokumenteve të së premtes nuk do të jetë i fundit sipas urdhrit ekzekutiv të Trumpit, me një zëdhënës që tha se departamenti “do të publikojë dosje shtesë në mënyrë të vazhdueshme”.