PRISHTINË, 19 janar /ATSh/ Komisioni Qendror i Zgjedhjeve i Kosovës ka vendosur që të rinumërohen votat për kandidatë në të gjithë vendin. Po ashtu, KQZ vendosi se përveç rinumërimit edhe në 28 komuna tjera, u është ndërprerë mandati përfaqësuesve të subjekteve politike në Komisionin Komunal të Zgjedhjeve në komunën e Prizrenit.

Ky vendim erdhi pas manipulimit të votave, të cilat janë vërtetuar nga rinumërimi i votave të kandidatëve në 10 komuna të Kosovës.

Në mbledhjen e Këshillit për Operacione Zgjedhore, është rekomanduar rinumërimi i të gjitha vendvotimeve edhe për 28 komunat tjera dhe ndërprerja e mandatit për përfaqësuesit e subjekteve politike në Komisionin Komunal të Zgjedhjeve në komunën e Prizrenit.

Kështu ka thënë kryesuesi i KQZ-së, Kreshnik Radoniqi i cili tha se gjetjet do t’i adresohen Prokurorisë së Shtetit.

“Sot, para mbledhjes së KQZ-së, ky raport është diskutuar në mbledhjen e Këshillit për Operacione Zgjedhore, nga ku kanë dalë dy rekomandime kryesore: Rinumërimi i të gjitha vendvotimeve edhe për 28 komunat tjera; Ndërprerjen e mandatit për përfaqësuesit e subjekteve politike në Komisionin Komunal të Zgjedhjeve në komunën e Prizrenit. Në fund, në emër të KQZ-së, ritheksojmë se gjetjet nga procesi i rinumërimit do t’i adresojmë në Prokurorinë e Shtetit dhe në të njëjtën kohë ofrojmë bashkëpunimin e plotë institucional në procesin hetimor”, u shpreh Radoniqi.

Ai tha se procesi i rinumërimit të votave në 10 komunat është në zhvillim e sipër.

Ndryshimi në numrin e votave të kandidatëve për rinumërimit, Radoniqi tha se tregon se procesi i i numërimit të votave të kandidatëve brenda subjekteve politike ka pasur pasaktësi

“Ndryshimi në numrin e votave të kandidatëve pas rinumërimit tregon se procesi i numërimit të votave të kandidatëve brenda subjekteve politike ka pasur pasaktësi. Analiza numerike e veçon komunën e Prizrenit si rastin më ekstrem. Pas rinumërimit në QNR të komunës së Prizrenit janë zbritur nga rezultati 29 343 vota për kandidatë, të cilat u ishin regjistruar atyre në QKN të Prizrenit. Po ashtu, pas rinumërimit u janë shtuar 16 366 vota kandidatëve, të cilat nuk ishin regjistruar saktë në QKN. Megjithatë, në komunat tjera të rinumëruara nuk vërehen dallime të mëdha në votat e kandidatëve. Ndryshimet përfshijnë gabimet eventuale të regjistrimit të votave të kandidatëve dhe shtimin e votave si rezultat i rivlerësimit të fletëvotimeve të pavlefshme, por në vendvotime të caktuara janë evidente ndryshime të mëdha tek disa kandidatë”, ka shtuar Radoniqi.

Në mbledhjen e sotme të KQZ-së, Radoniqi tha se sot kanë pranuar një raport pas rinumërimit të gjysmës së vendvotimeve.

“Komisioni Qendror i Zgjedhjeve në përmbushje të mandatit të saj kushtetues dhe ligjor mbetet i përkushtuar në mbrojtje të integritetit të procesit zgjedhor, në transparencë dhe në ruajtjen e besimit të publikut në procesin zgjedhor. Për të qenë plotësisht transparent me këtë proces, rezultati i çdo vendvotimi të rinumëruar është pasqyruar në platformën e KQZ-së për rezultate. Siç e theksova në fillim, gjatë ditës së sotme kemi pranuar një raport pas rinumërimit të më shumë se gjysmës  së vendvotimeve sipas vendimit të datës 13 janar. Sipas raportit, kur flasim për votat e subjekteve politike, ndryshimet e verifikuara janë minimale dhe pothuajse të pa përfillshme. Kjo do të thotë se rezultatet e subjekteve politike janë numëruar dhe paraqitur saktë. Për dallim, nga votat për subjektet politike, të dhënat për kandidatët pas rinumërimit paraqesin një shkallë të lartë të pasaktësisë në rinumërim. Sipas raportit nga vendvotimet e rinumëruara në Qendrën e Numërimit dhe Rezultateve, rezulton se pas rinumërimit në QNR janë zbritur nga rezultati 36 007 vota për kandidatë, të cilat u ishin regjistruar atyre në QKN. Po ashtu, pas rinumërimit u janë shtuar 20 978 vota kandidatëve, të cilat nuk ishin regjistruar saktë në QKN”, theksoi Radoniqi.

Me këtë gjetje ka rënë dakord edhe anëtari nga radhët e Lëvizjes Vetëvendosje në KQZ, Sami Kurteshi. Ai tha se duhet të shkarkohet edhe zyrtari komunal zgjedhor.

“Pajtohem edhe me rekomandimin e shkarkimit të komisionit komunal zgjedhor në Prizren, mendoj se aty duhet të përfshihen të gjithë personat që janë pjesë e Komiosionit Komunal, përfshirë edhe zyrtarin komunal që është zyrtari ekzekutiv”, ka thënë Kurteshi.

Me rekomandimet e Këshillit të Operacioneve Zgjedhore ka rënë dakord edhe anëtari Ilir Gashi nga Partia Demokratike të Kosovës.

“Natyrisht se e mbështes propozimin i cili ka dalë nga KOZ, i cili udhëhiqet nga zotëri Elshani, dhe natyrisht që nga ajo çfarë ka dalë në rinumërimin e votave nga komunat në 10 për qind nxit edhe domosdoshmërinë e rinumërimit të votave në gjithë Kosovën, për gjitha vendvotimet, në mënyrë që të pasqyrohet saktë vullneti i qytetarëve të Republikës së Kosovës”, u shpreh ai.

Muharrem Nitaj nga Aleanca për Ardhmërinë e Kosovës (AAK) tha se këto gjetje janë shqetësuese.

“Gjetjet që kanë dalë pas raportit që është prezantuar janë shqetësuese jo vec për KQZ-në, mirëpo edhe për opinionin publik. Është lajm i mirë që dallimet mes partive politike kanë qenë të pa përfillshme dhe një segment i këtyre zgjedhjeve minimalisht ka kaluar mirë. tani, për fat të keq komuna e cila ka quar në ekstrem mospërputhjen e votave mes kandidatëve është komuna e Prizrenit, ku pjesa më e madhe që shpërputhën janë të kësaj komune”, përfundoi ai.

Koordinatorja Kombëtare për zgjedhje, prokurorja Laura Pula, pas evidentimit të mospërputhjeve të votave gjatë numërimit brenda subjekteve politike për deputet në rajone të ndryshme të Republikës së Kosovës, ka kërkuar nga kryeprokurorët e të gjitha prokurorive themelore që, në të gjitha komunat ku ka përfunduar rinumërimi i votave, të fillojnë grumbullimin e informatave të nevojshme dhe sigurimin e provave relevante, që mund të dëshmojnë kryerjen e ndonjë vepre penale që lidhet me procesin zgjedhor.

/KosovaPress//r.e/

The post KQZ vendos rinumërim të votave për kandidatë në të gjithë Kosovën appeared first on Agjencia Telegrafike Shqiptare.

PRISHTINË, 19 janar /ATSh/ Kryetari i PDK-së, Bedri Hamza ka reaguar lidhur me rinumërimin e pjesshëm të votave, duke e cilësuar situatën si “tepër shqetësuese” për shkak të mospërputhjeve të mëdha të zbuluara.

Ai ka vlerësuar se, në rrethanat e krijuara, rinumërimi i plotë i votave në të gjithë Kosovën është hap i domosdoshëm dhe i drejtë, duke kërkuar veprim të menjëhershëm nga institucionet përgjegjëse për të mbrojtur integritetin e procesit zgjedhor.

Sipas Hamzës, çdo vonesë apo hezitim përbën cenim të drejtpërdrejtë të besimit qytetar.

“Në këto rrethana të krijuara, si Kryetar i PDK-së vlerësoj se rinumërimi i plotë i votave në të gjithë Kosovën është hap i domosdoshëm dhe i drejtë. Institucionet përgjegjëse e kanë detyrim kushtetues të veprojnë menjëherë për ta mbrojtur integritetin e procesit zgjedhor. Çdo vonesë apo hezitim është cenim i drejtpërdrejtë i besimit qytetar”, shkruan Hamza në Facebook.

Personat që vërtetohet se kanë cenuar vullnetin e qytetarëve në zgjedhjet e 28 janarit 2025 mund të dënohen nga 3 deri në 5 vjet. Kështu thonë njohësit e çështjeve juridike të cilët theksojnë se falsifikimi i rezultatit zgjedhor përbën vepër të rëndë penale, raporton KosovaPress.  

Hulumtuesi në Institutin e Kosovës për Drejtësi, Gëzim Shala, i ka cilësuar manipulimet me vota si një nga skandalet më të mëdha që ka cenuar integritetin e procesit zgjedhor në Kosovë.

Ndërsa, zëdhënësi i KQZ-së, Valmir Elezi ka deklaruar për KosovaPress se në varësi nga gjetjet gjatë rinumërimit në këto 28 komuna, KQZ mund të marrë vendim të ri për rinumërim të vendvotimeve të tjera.

/KosovaPress//r.e/

The post PDK kërkon rinumërim të votave në të gjithë Kosovën appeared first on Agjencia Telegrafike Shqiptare.

TIRANË, 19 janar /ATSH/ Kreu i grupit parlamentar të Partisë Socialiste, Taulant Balla, deklaroi sot se mazhoranca është e gatshme të bashkëpunojë me opozitën për miratimin e Kodit të ri Zgjedhor dhe realizimin e reformës territoriale.

Gjatë fjalës së tij në Konferencën e Kryetarëve, në prag të nisjes së sesionit të ri parlamentar, Balla i bëri thirrje opozitës që të fokusohet te puna parlamentare për përmbylljen e dy reformave të rëndësishme, duke theksuar se “revolucionet” e shpallura prej saj nuk do të ndodhin.

“Jemi të gatshëm të bashkëpunojmë plotësisht për t’i dhënë Shqipërisë një Kod të ri Zgjedhor sipas standardeve më të mira zgjedhore, një ndarje administrativo-territoriale funksionale dhe gjithçka tjetër që kërkon procesi”, u shpreh Balla.

Duke iu drejtuar deputetëve të opozitës, ai theksoi se reformat nuk mund të bllokohen, duke kujtuar marrëveshjen e arritur në sesionin e kaluar për ngritjen e komisioneve përkatëse.

“Nëse sot tërhiqeni nga komisionet, kjo përbën shkelje të njëanshme të marrëveshjes. Ne do të detyrohemi të vijojmë punën edhe pa ju”, tha Balla.

Ai theksoi se Komisioni i Posaçëm i Reformës Zgjedhore duhet të adresojë rekomandimet e OSBE-ODIHR-it, duke vënë theks të veçantë te depolitizimi i plotë i administratës zgjedhore.

“Duhet të marrë fund kjo qasje e papranueshme për një vend që synon anëtarësimin në BE, ku partitë jo vetëm garojnë, por edhe numërojnë votat”, u shpreh Balla.

Sipas tij, është e domosdoshme që procesi i numërimit dhe shpalljes së rezultateve zgjedhore të përshpejtohet, duke mos përjashtuar mundësinë që numërimi të kryhet drejtpërdrejt në qendrat e votimit.

Balla nënvizoi se koha nuk pret më, si për sa i përket komisioneve zgjedhore partiake, ashtu edhe për vonesat në nxjerrjen e rezultateve, sidomos në funksion të zgjedhjeve vendore të vitit 2027.

Ai kujtoi se reforma zgjedhore kërkon të paktën 84 vota në Kuvend, ndërsa mazhoranca, sipas tij, synon një reformë më të thellë, që përfshin edhe reduktimin e numrit të deputetëve në 100 ose 101.

Në reagim ndaj pretendimeve të opozitës për kufizim të së drejtës së fjalës, Balla theksoi se të dhënat nga sesioni i kaluar tregojnë të kundërtën.

“Opozita ka pasur 48 orë diskutime në seancë plenare, ndërsa shumica bashkë me qeverinë 40 orë”, përfundoi ai.

Nënkryetarja e Kuvendit, Klodiana Spahiu në fjalën e saj në Konferencën e Kryetarëve u ndal te çështjet që lidhen me dezinformimin dhe lajmet e rreme.

“Në fundjavë ishim dëshmitarë të një lajmi plotësisht të pavërtetë dhe pa asnjë fakt, i cili vendosi në shënjestër familjarë të kryetarit të grupit parlamentar të PS. Mediet të cilat i servirën këto lajme, edhe pse u vunë në dijeni të së vërtetës, vazhduan të përhapin shpifjet e hedhura nga Berisha dhe përfaqësues të tjerë të opozitës. Është e paparanueshme ajo që ndodhi. Duhen gjetur mekanizmat që raste të tilla si ky të marrin përgjegjësitë qoftë edhe penale personat që orkestrojnë lajme të rreme të tilla”, tha Spahiu.

/r.e/

The post Balla: Reforma zgjedhore dhe ajo territoriale nuk mund të bllokohen appeared first on Agjencia Telegrafike Shqiptare.

TIRANË, 19 janar /ATSh/ Inspektorati Shtetëror i Mbikëqyrjes së Tregut (IShMT) zhvilloi gjatë vitit 2025 gjithsej 1 959 inspektime për sigurinë e produkteve joushqimore në treg.

Në një njoftim për mediet, Inspektorati pasqyron rezultatet e punës gjatë vitit 2025.

“Gjatë vitit 2025, Inspektorati Shtetëror i Mbikëqyrjes së Tregut ka kryer 1 959 inspektime me fokus garantimin e sigurisë së produkteve joushqimore, në mbrojtje të konsumatorëve dhe në zbatim të kritereve ligjore”, bën të ditur IShMT.

Sipas njoftimit, nga këto inspektime janë realizuar 1 922 inspektime të programuara dhe 451 inspektime mbi bazë ankese, ndërsa janë vendosur 69 masa administrative.

Inspektimet sipas sektorëve ndahen si më poshtë: 171 në sektorin e produkteve mekanike, 827 në sektorin metrologjik, 377 në sektorin kimik dhe 584 në sektorin elektrik. Gjithashtu, janë trajtuar 85 ankesa.

“Siguri në treg, mbrojtje për çdo konsumator”, përfundon njoftimi.

/a.f/

The post Gati 2 mijë inspektime për sigurinë e produkteve joushqimore në vitin 2025 appeared first on Agjencia Telegrafike Shqiptare.

TIRANË, 19 janar /ATSH/ Numri i mjeteve elektrike në vendin tonë u dyfishua gjatë vitit 2025. Konkretisht vitin që sapombyllëm u regjistruan 6 187 mijë mjete “green”, ose 98% më shumë krahasuar me vitin 2024.

Shifrat u publikuan sot nga Drejtoria e Përgjithshme e Shërbimeve të Transportit Rrugor (DPSHTRR).

“Vit pas viti, flota e mjeteve në Shqipëri po bëhet gjithnjë e më shumë ‘GREEN’!”, thuhet në njoftimin për mediet.

“Sipas të dhënave, gjatë vitit 2025 janë regjistruar 6 187 mjete ‘All-Electric’, duke shënuar një rritje prej 98% krahasuar me vitin 2024”, bën të ditur DPSHTRR.

“Më shumë mjete ‘green’ në rrugët tona, për një transport më të pastër, më të qëndrueshëm dhe miqësor me mjedisin!”, përfundon njoftimi.

/a.f/

The post Mbi 6 mijë automjete elektrike u regjistruan në Shqipëri gjatë vitit 2025 appeared first on Agjencia Telegrafike Shqiptare.

TIRANË, 18 janar/ATSh/ Shërbimi Meteorologjik Ushtarak njoftoi se ditën e diel vendi ynë do të ndikohet nga kushte atmosferike të qëndrueshme.

Moti parashikohet i kthjellët në pjesën më të madhe të territorit si dhe me alternime vranësirash mesatare deri të dendura, më të theksuara në zonën veriore e lindore të vendit.

Era pritet të fryjë me drejtim verilindje-juglindje me shpejtësi mesatare 7 m/s, përgjatë vijës bregdetare dhe zonave luginore era me shpejtësi deri në 14 m/s, shoqëruar me valëzimin në det 1-2 ballë./r.e/

The post Moti sot i qëndrueshëm, me vranësira në zonat veriore dhe lindore appeared first on Agjencia Telegrafike Shqiptare.

PRISHTINË, 17 janar/ATSh/ Qytetarët dhe bizneset në Kosovë po përballen me një valë shtrenjtimesh të ujit për periudhën 2026-2028. Drejtori i Departamentit të Tarifave, Refik Ramaj, paralajmëron rritje deri 39 për qind për familjet dhe 29 për qind për konsumatorët jo-shtëpiak, ndërsa për ujërat e ndotura rritja shkon deri 25 për qind. Rritja vjen pas shtrenjtimit të energjisë elektrike.

Ramaj në një intervistë për KosovaPress, thekson se rritja e tarifave është e ndikuar nga disa faktorë kryesorë, siç është shtrenjtimi i energjisë elektrike, zvogëlimi i normës së subvencionimit dhe inflacioni.

“Tarifat e vjetra për konsumatorë shtëpiak kanë qenë 0.38 centë, kurse tani do të ketë një rritje. Për procesin tarifor 2026-2028 do të ketë një rritje prej 39 për qind për amvisëri, ndërkaq 29 për qind për konsumatorët jo shtëpiak. Mesatarja e rritjes konsumatorë shtëpiak dhe jo-shtëpiak është 34 për qind. Tarifat për ujërat e ndotura, sektori shtëpiak 25 për qind, po ashtu edhe ai jo-shtëpiak, mesatarja natyrisht 25 për qind. Çfarë ka ndikuar në këtë rritje prej 34 për qind, së pari ka ndikuar rritja enorme e energjisë elektrike, e cila është 150 për qind apo 2.5 herë është rritur. Siç është e ditur në bazë të kalkulimeve tona, pjesëmarrja e energjisë elektrike në strukturën e shpenzimeve operative është 20 për qind, kur kjo shumëzohet me 150 me këtë rritjen, del 30 për qind. 30 për qind është rritja vetëm për energji elektrike….Faktori i dytë është zvogëlimi i normës ndër subvencionimit…Faktori i tretë është inflacioni”, thekson Ramaj.

Duke folur për tarifat sipas qyteteve, Ramaj tha se në Prishtinë çmimi për ujë ka kaluar nga 0.45 në 0.63 euro, ndërsa për ujërat e ndotura nga 0.08 në 0.12 euro.

“Në Prishtinë ka qenë 0.45 për ujë, tash është 0.63. Për ujerat e ndotura ka qenë 0.08, është bërë 0.12, Prizreni ka qenë 0.40 është bërë 0.56, për ujërat e ndotura  0.15, është bërë 0.19. Peja ka qenë 0.28 për ujë, është bërë 0.39…Gjakova ka qenë 0.39 tash është 0.53…_(Për biznese)për Prizrenin për biznese është 0. 42, nga 0.32, për Pejën ka qenë 0.39, tash 0.51, për Mitrovicën ka qenë 0.55, 0.69, Gjakova ka qenë 0.55 tash 0.67… Kompanitë me aplikacionin tarifor kanë ardhë me kërkesa shumë më të lartë, disa kanë kërkuar 100 për qind rritjen e tarifave, disa më pak, por ne kemi aplikuar norma shkencore, kritere profesionale, kemi ardhe deri tek kjo strukturë”, shprehet ai.

Kryetari i Shoqatës së Konsumatorit, Selatin Kaçaniku thotë se shtrenjetimi i tarifave të ujit do të ketë ndikim të madh tek konsumatoret. Sipas tij, jeta e qytetareve vetëm sa vazhdon të rendohet.

Ndërkaq, kryetari i Odës së Hotelerisë dhe Turizmit të Kosovës, Hysen Sogojeva, paralajmëron se rritja e tarifave rëndon mbi sektorin hotelier dhe turistik, që ende po përpiqet të rimëkëmbet nga pasojat e pandemisë. Madje, nuk përjashton edhe mundësinë e mbylljes se disa bizneseve.

/KosovaPress/

The post Rritje e tarrifave të ujit në Kosovë appeared first on Agjencia Telegrafike Shqiptare.

PRISHTINË, 17 janar/ATSh/ Kryetari i Odës Ekonomike Amerikane në Kosovë, Arian Zeka, kërkon nga qeveria e Kosovës të tregojë seriozitet të plotë në marrëdhëniet me Shtetet e Bashkuara të Amerikës dhe të ndërmarrë masa konkrete për të përmirësuar klimën e biznesit, përndryshe siç thotë ai, vendi rrezikon të humbasë mundësi strategjike dhe ekonomike.

Në një intervistë për KosovaPress, Zeka vlerëson se vendimet e pakoordinuara dhe vonesat në politikë kanë sjellë tensione të brendshme dhe kanë ndikuar negativisht në marrëdhëniet me aleatët strategjikë. Ai thekson se vetëm një qeveri e përkushtuar dhe serioze mund të avancojë dialogun strategjik dhe të përfitojë nga mundësitë për tregti dhe investime.

Por ky seriozitet, sipas tij, ka munguar shumë përgjatë viteve të fundit.

Zeka gjithashtu u ndal tek marrëveshjet tregtare dhe tarifat doganore. Ai vlerëson heqjen e tarifave në gusht të vitit të kaluar, derisa thekson se kjo hap mundësi për rritje të shkëmbimeve tregtare dhe për promovimin e produkteve amerikane në Kosovë.

Zeka, megjithkëtë dyshon se vonesa e këtij vendimi, tash mund t’i kushtojë Kosovës.

Përfaqësuesi i bizneseve amerikane në Kosovë, foli edhe për pasojat e krizave politike dhe mungesës së qeverisë së re në vitin 2025, duke pohuar se kjo ka ndikuar keq në rritjen ekonomike dhe në pasigurinë juridike, nga të cilat janë afektuatr drejtpërdrejt bizneset dhe konsumatorët.

Shqetësimin më të madh, Zeka e ka për raportin negativ midis eksportit dhe importit. Ai përmendi idenë e Odës për mbështetje të ndërmarrjeve prodhuese dhe startup-eve për të zvogëluar deficitin tregtar dhe për të krijuar vende të reja pune, por që sipas tij, nuk u zbatua nga qeveria e kaluar.

Ndërkohë, problem për operimin e bizneseve është edhe shtrenjtimi i tarifave të energjisë elektrike, si edhe nxitimi për liberalizimin e tregut në këtë fushë. .

Zeka e nënvizon sektorin e energjisë, si njërin nga sektorët e anashkaluar nga qeveria, ani se ka potencial të madh për zhvillim.

eka thekson se Kosova duhet të dëshmoj sundim të plotë të ligjit dhe të ofrojë klimë stabile për investitorët. Kjo, duke zatuar ligjet dhe politikat që mbështesin zhvillimin ekonomik dhe investimet strategjike.

/Kosovapress/

The post Zeka: Kosova të tregojë seriozitet për dialogun me SHBA-në, të përmirësojë klimën e biznesit appeared first on Agjencia Telegrafike Shqiptare.

PRISHTINË, 17 janar/ATSh/ Ministria e Punëve të Brendshme njofton se në kuadër të zbatimit të Ligjit për të Huaj dhe Ligjit për Automjete, nga dita e djeshme ka filluar fushata informuese për qytetarët në të gjitha pikat kufitare të Republikës së Kosovës, si dhe në Aeroportin Ndërkombëtar të Prishtinës “Adem Jashari”.

Sipas ministrisë, kjo fushatë synon vetëdijesimin e qytetarëve lidhur me procedurat ligjore që duhet të ndiqen me rastin e hyrjes dhe qëndrimit në Republikën e Kosovës, si dhe me rregullat që ndërlidhen me drejtimin e automjeteve në territorin e vendit tonë.

Fushata do të zgjasë deri më 15 mars 2026.

Ministria e Punëve të Brendshme falënderon zyrtarët policorë për angazhimin dhe profesionalizmin e treguar, si dhe qytetarët për bashkëpunimin.

/KosovaPress/

The post Fushata informuese për dy ligjet e reja në pikat kufitare dhe Aeroport appeared first on Agjencia Telegrafike Shqiptare.

PRISHTINË, 17 janar/ATSh/ Një trend gjithnjë e më shumë po vërehet në basketbollin kosovar, ku klubet elitës së Superligës po anashkalojnë masivisht trajnerët vendas për t’ua besuar drejtimin e skuadrave teknikëve të huaj. Ky fenomen ka ngritur pikëpyetje të mëdha rreth besimit të kapacitetet vendore dhe strategjisë afatgjatë të zhvillimit të basketbollit në vend.

KosovaPress i ka kushtuar një artikull këtij fenomeni. Në shkrimin e publikuar sot, KosovaPress vëren se përveç “Rahovecit 29”, që së fundi ndau rrugët me trajnerin Bujar Loci dhe që ende nuk e ka emëruar pasuesin e tij, shtatë klubet tjera të Superligës së Kosovës në basketboll, drejtohen nga trajnerë të huaj duke dëshmuar kështu që klubet elitare të basketbollit vendor e kanë humbur totalisht besimin te trajnerët kosovarë.

Por pse po ndodh kjo?

Trajneri i basketbollit, Lorik Kllokoqi, vlerëson se në vitet e fundit është krijuar një perceptim i gabuar në mesin e klubeve, pasi trajnerët vendas angazhohen kryesisht në situata kur mungojnë mjetet financiare. Ai nënvizon se ky trend është i padrejtë dhe nuk reflekton realitetin, pasi ka pasur raste konkrete kur trajnerë vendas, edhe me buxhete modeste, kanë arritur rezultate të mëdha dhe kanë mposhtur ekipe me resurse shumëfish më të mëdha.

Ish-kryetari i “KB Prishtinës”, Blerand Stavileci, shprehu mbështetje për trajnerët vendas dhe njëkohësisht kërkon më shumë profesionalizëm dhe vetëkritikë nga vet ata.

Nga ana tjetër, kryetari i Federatës së Basketbollit të Kosovës, Arben Fetahu, ndalet te struktura dhe kushtet në të cilat punojnë trajnerët vendas, duke theksuar se numri i tyre është relativisht i vogël dhe se pjesa më e madhe nuk e ushtrojnë profesionin e trajnerit si punë primare. Sipas tij, kjo gjendje ndikon drejtpërdrejt në nivelin e profesionalizmit dhe në mundësinë që trajnerët të fokusohen plotësisht në zhvillimin e ekipeve dhe lojtarëve.

Në përpjekje për të adresuar këtë problem, Shoqata e Trajnerëve ka propozuar vendosjen e një pagese shtesë për klubet që angazhojnë trajnerë të huaj, si një masë për të stimuluar punësimin e vendasve.

Paralelisht, Federata e Basketbollit të Kosovës ka nisur hapa konkretë për ngritjen profesionale të kuadrove, duke përfunduar procesin e licencimit “FIBA Level One” dhe duke planifikuar fillimin e nivelit të dytë. Përveç kësaj, vetë trajnerët po investojnë individualisht në edukimin e tyre përmes pjesëmarrjes në seminare ndërkombëtare, duke dëshmuar përkushtimin për të qenë konkurrues në tregun modern të basketbollit.

/KosovaPress/

The post Elita e basketbollit në Kosovë i beson vetëm trajnerëve të huaj appeared first on Agjencia Telegrafike Shqiptare.

PRISHTINË, 17 janar/ATSh/ Njëmbëdhjetë aktakuza për krime lufte janë ngritur deri në dhjetorin e vitit të kaluar në Kosovë. Gjatë kësaj periudhë janë akuzuar 36 persona, në mesin e tyre 33 për gjykim në mungesë.

Shifrat i ka bërë të ditur Prokuroria Speciale, ndërsa shton se numri total i aktakuzave në mungesë është 20, ku akuzohen 102 persona.

“Prokuroria Speciale e Republikës së Kosovës, ju njofton se gjatë vitit 2025, konkretisht deri më 01 dhjetor të këtij viti janë ngritur 11 aktakuza për veprën penale “Krim i luftës kundër popullsisë civile. Gjatë kësaj periudhe janë akuzuar 36 persona, prej tyre 33 persona të akuzuar për gjykim në mungesë, ndërsa janë parashtruar 8 kërkesa për caktim te paraburgimit ndaj 10 personave. Ndërsa, numri total  i rasteve me aktakuza është: 74 raste me 80 aktakuza ndaj 216 personave. Numri i aktakuzave të dorëzuara me gjykim në mungesë është: 20 aktakuza për gjykim në mungesë ndaj 102 personave”, thuhet në këtë përgjigje.

Ish-kryetari i Gjykatës Supreme, Fejzullah Hasani flet për vështirësitë që kanë autoritetet vendore për të ndjekur penalisht kriminelët e luftës. Ai thekson se ka kaluar kohë e gjatë dhe se “provat janë lehtësisht të zhdukshme”.

Hasani thotë ndër tjera se është me rëndësi që Kosova të ketë aktgjykime të formës së prerë për krime lufte.

Amer Alija nga Fondi për të Drejtën Humanitare thotë se vitet e fundit kanë dominuar aktakuzat në mungesë për krime lufte.

Qendra Kosovare për Rehabilitimin e të Mbijetuarve të Torturës e konsideron vitin 2025 si vit të drejtësisë. Fatmire Haliti nga kjo organizatë thotë se ka pasur progres në aspektin e qasjes në drejtësi të mbijetuarve të dhunës seksuale gjatë luftës në Kosovë.

Aktgjykimi i parë në mungesë është shpallur gjatë vitit 2024, ku i dënuari është Çedomir Aksiq i cili kreu krime lufte në Reçak, Mulapolc dhe Petrovë – fshatra në komunën e Shtimes.

Në luftën e fundit në Kosovë janë vrarë mbi 13 mijë civilë, mbi 20 mijë gra e burra të dhunuar seksualisht, mbi gjashtë mijë të zhdukur, prej tyre 1.600 vazhdojnë të jetë të pagjetur e më shumë se 800 mijë persona të zhvendosur gjatë viteve 1998-1999. Por Serbia vazhdon t’i mohojë të gjithë këto krime të kryera në Kosovë.

/KosovaPress/

The post Krimet e luftës në Kosovë, 11 aktakuza të ngritura vitin e kaluar appeared first on Agjencia Telegrafike Shqiptare.

TIRANË, 17 janar /ATSH/ Shërbimi Meteorologjik Ushtarak njoftoi se ditën e shtunë do të ketë mot të kthjellët në pjesën më të madhe të territorit. Në relievet malore lindore priten vranësira mesatare deri të dendura, me intervale të herëpashershme dielli.

Mjegull e dendur do të regjistrohet gjatë mëngjesit dhe mbrëmjes në zonat luginore.

Era do të fryjë kryesisht nga verilindja-lindja me shpejtësi mesatare 6 m/s, ndërsa përgjatë vijës bregdetare dhe zonave luginore shpejtësia e erës mund të arrijë deri në 12 m/s, shoqëruar me valëzim në det 1-2 ballë.

/a.f/r.e/

The post Moti sot parashikohet i kthjellët, mjegull në lugina appeared first on Agjencia Telegrafike Shqiptare.

PRISHTINË, 16 janar /ATSH/ Ministria e Punëve të Brendshme ka njoftuar se ka publikuar një dokument udhëzues për shtetasit e huaj që hyjnë në Republikën e Kosovës, me qëllim informimin e tyre për detyrimet ligjore gjatë hyrjes, qëndrimit dhe punësimit në vend.

Sipas njoftimit, çdo shtetas i huaj, me rastin e hyrjes në Kosovë, detyrohet të zotërojë dokument të vlefshëm udhëtimi, vizë ose leje qëndrimi kur kërkohet, të respektojë qëllimin dhe afatin e qëndrimit, si dhe të lajmërojë adresën e qëndrimit brenda tri ditësh nga hyrja në vend. Po ashtu, kërkohet respektimi i ligjeve të Republikës së Kosovës dhe mospërbërja e kërcënimit për sigurinë dhe shëndetin publik.

Ministria ka bërë të ditur se qëndrimi afatshkurtër lejohet deri në 90 ditë brenda një periudhe prej 180 ditësh, pa të drejtë punësimi pa leje pune. Çdo qëndrim mbi këtë afat kërkon aplikim për lejeqëndrim. Për qëllime punësimi, shtetasit e huaj duhet të pajisen me leje qëndrimi të përkohshme dhe leje pune, ndërsa puna pa leje është e ndaluar.

Gjithashtu, për qëndrime për studime, ribashkim familjar, arsye humanitare apo kërkime shkencore, kërkohet pajisja me lejeqëndrim të përkohshëm dhe plotësimi i kritereve ligjore përkatëse. Aplikimet mund të bëhen në misionet diplomatike ose në Departamentin për Shtetësi, Azil dhe Migracion, në rastet kur nuk kërkohet vizë hyrëse.

Ministria paralajmëron se mosrespektimi i këtyre rregullave mund të rezultojë me masa ligjore, përfshirë anulimin e lejeqëndrimit, gjoba, urdhër largimi apo ndalim të hyrjes në Republikën e Kosovës.

Sipas njoftimit, zbatimi i plotë i këtyre rregullave fillon më 15 mars 2026, ndërsa çdo hyrje pas kësaj date që nuk është në përputhje me udhëzuesin do të rezultojë me ndalim hyrjeje në Kosovë.

/KosovaPress//r.e/

The post Rregulla të reja për hyrjen në Kosovë, në fuqi nga 15 marsi appeared first on Agjencia Telegrafike Shqiptare.

PRISHTINË, 16 janar /ATSh/ Kadri Veseli, Rexhep Selimi dhe Jakup Krasniqi, do të qëndrojnë në paraburgim edhe për dy muaj të tjerë, të paktën.

Vendimin për zgjatjen e kësaj mase ndaj tre ish-eporëve të Ushtrisë Çlirimtare të Kosovës që gjykohen bashkë me Hashim Thaçin, e mori Trupi Gjykues i Gjykatës Speciale në çështjen Thaçi.

Përmes një njoftimi kjo gjykatë bën me dije se në rastin në fjalë trupi gjykues ”konstatoi se vazhdojnë të ekzistojnë rreziqet që të akuzuarit mund ta pengojnë ecurinë e procesit ose të kryejnë krime të tjera”.

Gjithashtu, bëhet me dije se vendimi i fundit i rishikimit të paraburgimit të Thaçit u lëshua në dhjetor 2025, dhe rishikimi i ardhshëm pritet në shkurt..

Ky vendim erdhi një ditë pasi, Specialja njoftoi se nga 9 deri më 18 shkurt do të zhvillohen deklaratat përmbyllëse në procesin gjyqësor ndaj ish-katërshes së UÇK-së, të cilët ndodhen në paraburgim për më shumë se pesë vjet.

/KosovaPress//r.e/

The post Zgjatet me dy muaj paraburgimi për Veselin, Selimin e Krasniqin appeared first on Agjencia Telegrafike Shqiptare.

PRISHTINË, 16 janar /ATSH/ Agjencia e Ushqimit dhe Veterinarisë (AUV) Kosovë ka njoftuar se ka bllokuar një produkt ushqimor për fëmijë pas konstatimit të substancës Cereulide në formulën e tij.

Lajmi ka ardhur pas njoftimit të Autoritetit Kombëtar të Ushqimit të Shqipërisë, përmes Sistemit të Paralajmërimit të Shpejtë për Ushqimin dhe Ushqimin për Kafshë (RASFF), referencë 2025.9963.

Sipas AUV-së, subjekti “Rossmann & LALA SH.P.K.” në Shqipëri ka eksportuar 462 copë të këtij produkti në Kosovë për kompaninë “Rossmann Kosova”. Në bashkëpunim me kompaninë, produkti është bllokuar dhe së shpejti do të nisë procesi i asgjësimit, në përputhje me legjislacionin në fuqi.

Agjencia thekson se pavarësisht mungesës së inspektorëve, mbetet e përkushtuar në monitorimin e tregut dhe të zinxhirit ushqimor, për të garantuar që konsumatorët në Kosovë të kenë ushqim të sigurt dhe të shëndetshëm.

/KosovaPress//r.e/

The post Kosova bllokon ushqimin për fëmijë me origjinë nga Holanda appeared first on Agjencia Telegrafike Shqiptare.

PRISHTINË, 16 janar /ATSH/ Edhe pas hyrjes në fuqi të ligjit për automjete, qytetarët kanë hyrë pa “telashe” në Pikën e Kalimii Kufitaë Jarinjë.

Ishin kryesisht serbë ata që hynin në Kosovë, edhe pse prapa kamerave nuk thanë se janë njoftuar me rregullat e reja të ligjit për automjete, i cili ka nisur së zbatuari sot në të gjithë territorin e Republikës së Kosovës.

Qeveria ka njoftuar se kjo është faza e parë e zbatimit, ku vizitorët që hyjnë në vendkalimet kufitare do të pajisen me materiale informuese lidhur me procedurat dhe rregullat specifike që parashihen me këto ligje.

Kjo periudhë e zbatimit njohës do të zgjasë deri më 15 mars. Pas kësaj date, do të nisë zbatimi i plotë i të gjitha procedurave dhe rregullave të përcaktuara me ligj.

Ky ligj parashikon që automjetet me targa të huaja nuk mund të qarkullojnë në vend më shumë se tre muaj ose mbi bazën e autorizimit.

Këto masa do të prekin kryesisht pjesëtarët e komunitetit serb që jetojnë në Kosovë dhe që deri më tani kanë drejtuar automjete me targa të qyteteve në Serbi mbi bazën e autorizimit, ose nuk kanë pasur dokumente të Kosovës.

Zbatimi pa përjashtime i këtij ligji ishte parashikuar të fillonte më 1 nëntor të vitit të kaluar, por Ministria e Punëve të Brendshme e Kosovës e shtyu këtë afat deri në mesnatën e 15 janarit 2026, për të mundësuar zhvillimin e një fushate informuese.

Sipas ushtruesit të detyrës së drejtorit të policisë për veri, Veton Elshani ka thënë se ligji do të zbatohet vetëm për ata që vijnë në Kosovë për turizëm, punë ose studime.

Nga Policia e Kosovës thanë se drejtimi i automjeteve me targa të huaja mbi bazën e autorizimit është në kundërshtim me Ligjin për komunikacionin.

Megjithatë, deri më tani, kjo praktikë është toleruar për t’u dhënë qytetarëve kohë t’i ndërrojnë targat.

Veton Elshani theksoi se, nga 15 janari në mesnatë, policia do ta zbatojë ligjin në terren. Ai shtoi se drejtimi i automjeteve mbi bazën e autorizimit do të lejohet vetëm në raste emergjente, por me paralajmërim.

“Për shembull, nëse dikush shkon në spital, nuk do ta ndalojmë dhe nuk do ta konfiskojmë menjëherë automjetin. Por, nëse i njëjti person ndalohet përsëri në ditët në vazhdim, mund t’i vendoset gjobë deri në 200 euro”, shpjegoi ai.

Kosova ndaloi në fund të vitit 2022 qarkullimin e automjeteve me targa me akronimet e qyteteve të Serbisë.

Kjo masë shkaktoi daljen e disa serbëve nga institucionet e Kosovës dhe rriti tensionet në terren.

Disa nga pjesëtarët e komunitetit serb që jetojnë në Kosovë, i regjistruan më pas automjetet e tyre me targa të Serbisë dhe i përdornin ato mbi bazën e autorizimit.

Në këtë autorizim përfshihen të dhënat e kartës së identitetit të drejtuesit të automjetit, e cila lëshohet nga autoritetet serbe për qytetet në Kosovë, por që Prishtina zyrtare nuk e njeh.

/KosovaPress//r.e/

The post Nis nga zbatimi ligji për automjetet, serbët hyjnë pa probleme në Jarinjë appeared first on Agjencia Telegrafike Shqiptare.

PRISHTINË, 16 janar /ATSH/ Paralajmërimi i Bashkimit Evropian për largimin e tërësishëm të masave ndëshkuese ndaj Kosovës është mirëpritur nga qeveria në detyrë.

Sipas tyre, lirimi i fondeve për Kosovën dhe mbështetja financiare që nga ky fillimvit është një vendim i duhur i BE-së, sado që, siç thonë ata, është i vonuar. Po ashtu, në ekzekutiv presin që këtë vit të ketë edhe hapa të tjerë të rëndësishëm përpara në integrimin evropian dhe avancimin në procese, siç është marrja e statusit të vendit kandidat për anëtarësim në BE.

Bashkimi Evropian të enjten për KosovaPress, konfirmoi se ka nisur heqjen e masave ndaj Kosovës, duke hapur rrugën për lirimin e mbi 400 milionë eurove këtë fillimviti, në mbështetje financiare për vendin.

Bashkimi Evropian (BE) vendosi masa ndëshkuese ndaj Kosovës më 2023. Masat u vendosën si përgjigje për shkak të tensioneve në veriun e Kosovës, të banuar me shumicë serbe, pasi kryetarët shqiptarë të katër komunave në veri morën mandatin.

Klisman Kadiu, këshilltar i zëvendëskryeministrit në detyrë për Integrime Evropiane, Besnik Bislimi, thotë për KosovaPress, se lirimi i mjeteve financiare për Kosovën nga ky fillimviti, është pozitiv për vendin.

Madje, thekson nevojën që BE-ja të ndërmarrë edhe hapa të tjerë të rëndësishëm përpara në integrimin evropian.

Zëdhënësja e Komisionit Evropian, Anitta Hipper, në një përgjigje për KosovaPress, thotë se krahas 216 milionë eurove që janë liruar në dhjetor të vitit 2025, synojnë që shumë shpejt të lirojnë edhe 205 milionë euro në fillim të këtij viti.

Ajo tha se ky vendim është marrë pas transferimit të qetë dhe të rregullt të qeverisjes lokale në veri të Kosovës, pas zgjedhjeve të fundit lokale. Derisa tregoi në detaje edhe se në cilat projekte do të përfitojë Kosova.

Në anën tjetër, hulumtuesja në Grupin për Studime Juridike dhe Politike (GLPS), Arbëreshë Loxha, thotë për KosovaPress, se largimi i masave karshi përfitimit të mjeteve financiare është i rëndësishëm edhe në imazhin e Kosovës në aspektin ndërkombëtar.

Sipas saj, posa të formohen institucionet e reja në vend, duhet të punohet shumë në sanimin e çdo dëmi eventual që masat i kanë bërë Kosovës.

Gjatë së enjtes, edhe Komisioni Evropian (KE) ka konfirmuar se pret heqjen e plotë të masave ndaj Kosovës në javët e ardhshme.

Jan Gert Koopman, drejtor i Drejtorisë për Zgjerim në KE, theksoi se bëhet fjalë për lirimin e më shumë se 400 milionë eurove, përfshirë edhe masat që KE-ja i kishte hequr fillimisht në dhjetor të vitit të kaluar.

Ai shpjegoi se institucionet po punojnë paralelisht në programimin e mjeteve dhe në kontraktimin e projekteve që do të financohen.

/KosovaPress//r.e/

The post Pas heqjes së masave, Kosova kërkon avancim në integrimin evropian appeared first on Agjencia Telegrafike Shqiptare.

TIRANË, 16 janar/ATSh/ Kryetari i Partisë Demokratike, Sali Berisha kërkoi sot angazhim maksimal të strukturave të PD për protestën e 24 janarit.

Gjatë mbledhjes me kryetarët e degëve, Berisha e përkufizoi vitin 2026 si vitin më vendimtar për opozitën dhe për Shqipërinë, duke theksuar se përballja me qeverinë aktuale nuk është më një betejë e zakonshme politike, por një mision historik për rrëzimin e asaj që ai e cilëson si një narko-diktaturë.

Berisha tha se duhet angazhim i çdo strukture për protestën e datës 24 janar. “Ne nisim këtë vit pasi në një betejë të pabarabartë, në një betejë të vështirë, ne ja kemi dalur të paraqesim me sukses para shqiptarëve dhe komunitetit ndërkombëtar të vërtetat dramatike të narkoshtetit, të diktaturës autoritare apo autokracisë elektorale të Edi Ramës.”

Berisha tha se, “nuk vjen kush nga jashtë për ta hequr. Atë duhet ta heqim ne. Ne shqiptarët na kanë votuar për të përmbushur misionin tonë, largimin e tij nga pushteti”.

“Ndaj dhe duhet një dialog intensiv me anëtarët tanë, pasi kjo protestë ka rëndësi të madhe. Shqiptarët e presin nga ne me kohë këtë protestë, sikundër presin zërin tonë të revoltuar, kryengritjen tonë paqësore të përditshme deri në rrëzimin e tij”, tha Berisha.

Ai tha se beteja do bazohet tek guximtarët. “Po të shohësh në aparencë, ne jemi një parti e madhe. Jemi me një elektorat të madh. Por, natyrisht beteja krijon dhe problemet e veta. Ndaj dhe ne do e bazojmë këtë betejë në guximtarë, se vetëm ata do mund të shpëtojnë Shqipërinë. Nuk mundet asnjë nga ne të mendojë asgjë tjetër përveç përmbushjes së misionit tonë, largimit një minutë më parë nga pushteti të kësaj organizate kriminale”, tha Berisha.

/a.f/r.e/

The post Berisha: Angazhim maksimal të strukturave për protestën e 24 janarit appeared first on Agjencia Telegrafike Shqiptare.

TIRANË, 16 janar/ATSH/ Kryeministri, njëherazi kryetari i Partisë Socialiste, Edi Rama tha sot se për herë të parë ndodh që shteti po merr pjesë në sipërmarrje dhe për këtë solli në vëmendje bashkëpunimin me kompaninë italiane të prodhimit të anijeve, “Fincantieri”.

Kryeministri Edi Rama mblodhi këtë të premte në Tiranë grupin parlamentar socialist. Në fjalën e tij në fund të punimeve njoftoi dhe marrëveshjen me “Ficantieri”-n, kompaninë italiane të prodhimit të anijeve. Rama tha se shteti shqiptar është aksionar në nivelin 49% me kompaninë që do të prodhojë anije në bazën e Pashalimanit.

“Shteti po merr pjesë në sipërmarrje, krejt e kundërta e rrugës që çon në abuzim me asetet publike, në abuzim me fondet publike. Kur them abuzim, nuk kam parasysh vetëm atë për qëllime përfitime, por dhe për një qasje largpamëse dhe sot, jo më larg se sot, në ndërkohë që ne flisnim këtu, zhvillohej seanca e fundit e negociatave me një nga ekselencat më të mëdha të botës, “Fincantieri”, kompania e madhe publike italiane që është lider në prodhimin e anijeve të të gjitha përmasave dhe falë KAYO-s, ne kem hyrë në një marrëveshje me “Fincantieri”-n për një kompani të përbashkët, ku 51% do t’i kenë italianët dhe 49% shteti shqiptar”.

Rama tha se “aktiviteti i kompanisë në portin e Pashalimanit do të bëjë që, nga njëra anë, ushtria shqiptare të vazhdojë të ngrejë forcën e vet detare, duke i prodhuar në vend anijet në dispozicion të saj dhe nga ana tjetër, do të realizohet mirëmbajtja e tyre me një kompani ku shtetit shqiptar është aksionar, dhe patjetër që do të krijojë punësim të specializuar me paga të larta”, tha Rama.

“Nga ana tjetër, kjo kompani do të marrë porosi nga vende të tjera, duke ndërtuar anije të kalibrave të ndryshëm nga ato që ndërton “Ficantieri” në kantierin e vet, që do t’i shesë, dhe nga shitja shteti shqiptar, FA do të përfitojnë 49%. Do të bëjë mirëmbajtjen e anijeve të rojave bregdetare të NATO-s në Shqipëri, 49% i merr shteti shqiptar. Kjo linjë do të thotë transferim teknologjie e shumë të tjera më pas. Ky është vetëm një shembull”, u shpreh Rama.

/a.f/r.e/

The post Rama: Shteti shqiptar aksionar 49% në kompaninë për prodhimin e anijeve në Pashaliman appeared first on Agjencia Telegrafike Shqiptare.

TIRANË, 16 janar/ATSH/ Kryeministri Edi Rama, njëherazi kryetar i Partisë Socialiste, u kërkoi ministrave të kenë më shumë dëgjesa në Kuvend, me qëllim informimin e publikut, përkundër “baltës së hedhur nga opozita”, siç i cilësoi ai akuzat e opozitës.

Kryeministri Edi Rama mblodhi këtë të premte në Tiranë grupin parlamentar socialist, në prag të nisjes së sesionit të ri parlamentar, ndërsa kërkoi më shumë angazhim nga ana e të gjithëve.

“Është mirë që këtë temë ta trajtojmë dhe të krijojmë më tepër hapësirë si grup parlamentar për të pasur dëshmi të ministrave dhe të tjerëve për çështje që kanë interes për publikun, pra dëgjesa të parlamentit”, tha Rama.

Sipas tij, numri i dëgjesave është shumë i vogël dhe kjo për shkak se opozita nuk i njeh këto si instrument parlamentar, por kërkon vetëm “teatër” përmes komisioneve parlamentare.

“Ka shumë pak dëgjesa, pasi kemi një çetë që nuk e njeh dëgjesën, por komisionin hetimor, që e thënë ndryshe është ftesë për një teatër balte. Dëgjesat janë një praktikë e konsoliduar parlamentare në vendet normale dhe ne s’mund të presim, se zakonisht i ka për detyrë opozita t’i thërrasë ato, por mund t’i organizojë edhe mazhoranca”, theksoi Rama.

“Na duhen dëgjesat dhe si një instrument institucional për të trajtuar çështjet të një rëndësie të parë për vendin, por që degradojnë në copëza trillimesh dhe historish që hidhen për të helmuar publikun”, u shpreh kryeministri Rama.

/a.f/r.e/

The post Rama: Më shumë dëgjesa në Kuvend nga ministrat për çështjet me interes publik appeared first on Agjencia Telegrafike Shqiptare.