TIRANË, 8 janar /ATSH/ Policia Rrugore apeloi sot të gjithë drejtuesit e automjeteve që të përdorin goma dimërore dhe pajisje antirrëshqitëse ndërsa në mjaft zona temperaturat kanë rënë nën zero dhe ka reshje dëbore.

Drejtori i Policisë Rrugore, Perlat Vatoci, gjatë pasdites së sotme inspektoi shërbimet e Policisë Rrugore në Rrugën e Arbrit, për të parë nga afër situatën dhe për të komunikuar me punonjësit e Policisë që janë të angazhuar në këtë aks rrugor dhe, nëpërmjet tyre, për t’iu përcjellë një mesazh të gjithë drejtuesve të automjeteve që qarkullojnë në zona malore ku ka prezencë të reshjeve të dëborës.

“Të gjithë drejtuesit e automjeteve të përdorin mjetet antirrëshqitëse (zinxhirë) dhe goma dimërore, pasi Policia Rrugore ka marrë detyrë dhe urdhër të prerë që të ndëshkojë çdo drejtues automjeti që nuk zbaton me rigorozitet rregullat e qarkullimit në raste të tilla”, tha Vatoci.

Vatoci apeloi për zbatimin me rigorozitet të rregullave të qarkullimit dhe që, për çdo rast nevoje, të telefonojnë në 112 dhe të kontaktojnë me shërbimet e Policisë në terren.

Ndërkohë, ai nënvizoi po bashkëpunohet me firmat kontraktore për mirëmbajtjen e akseve rrugore, me qëllim pastrimin në kohë dhe hedhjen e kripës.

Si pasojë e motit të keq, shërbimet e Policisë Rrugore janë 100% në detyrë, krahas shërbimeve të tjera të Patrullave të Përgjithshme, Forcës së Posaçme “Shqiponja” dhe Forcës Kombëtare të Sigurisë, të cilat vijojnë punën për t’iu shkuar në ndihmë qytetarëve në zona që kanë problematika për shkak të motit të keq me reshje shiu dhe dëbore, si dhe për të menaxhuar trafikun rrugor, me qëllim parandalimin e aksidenteve rrugore.

/gj.m/j.p/

The post Policia Rrugore: Gomat dimërore dhe zinxhirët të detyrueshme në zonat malore appeared first on Agjencia Telegrafike Shqiptare.

TIRANË, 8 janar /ATSH/ Në çdo cep të qarkut të Gjirokastrës, ekipet e bashkisë dhe emergjencave civile po punojnë me të gjitha mjetet dhe kapacitetet njerëzore për të rikthyer normalitetin në këto orë të vështira për qytetin pas reshjeve të dendura që sollën daljen e përroit nga shtrati.

Kryeministri Edi Rama ndau sot pamje nga puna që po kryhet në qytet për minimizimin e pasojave ndërsa në terren ishin edhe ministrja e Arsimit, njëherësh drejtuese politike e Partisë Socialiste në këtë qark, Mirela Kumbaro si dhe kryebashkiaku i Gjirokastrës, Flamur Golemi.

Qarku i Gjirokastrës u përball ditët e fundit me problematika të shumta si pasojë e motit të keq dhe reshjeve intensive të shiut. Gjatë mbrëmjes të së martës përroi i Ficos në qytetin e Gjirokastrës doli nga shtrati, duke shkaktuar përmbytje dhe sjellje të sasive të mëdha të inerteve në rrugë dhe zona të ndryshme të qytetit

/gj.m/j.p/

The post Rama: Punohet me të gjitha kapacitetet njerëzore për të rikthyer normalitetin në Gjirokastër appeared first on Agjencia Telegrafike Shqiptare.

TIRANË, 8 janar /ATSH/ E Ngarkuara me Punë në Shtetet e Bashkuara të Amerikës, Nancy VanHorn zhvilloi sot një takim me kryeprokurorin e Posaçëm të SPAK, Klodjan Braho dhe kreun e BKH, Joni Keta.

Ambasada e SHBA bëri të ditur se Van Horn përgëzoi kryeprokurorin e Posaçëm të SPAK Klodjan Braho, dhe kreun e BKH, Joni Keta për rolet e tyre të reja drejtuese, duke ritheksuar mbështetjen e Shteteve të Bashkuara për përpjekjet e SPAK në luftën kundër krimit të organizuar dhe trafikut të narkotikëve.

Ambasada amerikane në Tiranë citoi Sekretarin Rubio sipas të cilit “ne do të përballemi me kartelet e drogës kudo që ndodhen dhe kudo që veprojnë kundër interesave të Shteteve të Bashkuara. Detyrimi kryesor i presidentit është të sigurojë interesin kombëtar dhe sigurinë kombëtare të popullit tonë”.

Ambasada nënvizon se SHBA dhe Shqipëria së bashku qëndrojnë të bashkuar në luftën kundër krimit ndërkombëtar.

/gj.m/j.p/

The post Van Horn takon Brahon dhe Ketën: Mbështetje SPAK në luftën kundër krimit të organizuar dhe trafikut të narkotikëve appeared first on Agjencia Telegrafike Shqiptare.

TIRANË, 8 janar /ATSH/ Delegacioni i Bashkimit Evropian në Tiranë bëri të ditur sot se po ndjek me shqetësim situatën e përmbytjeve në disa zona të Shqipërisë.

Sipas delegacionit të BE, Drejtoria e Përgjithshme e BE-së për Mbrojtjen Civile dhe Ndihmën Humanitare (DG ECHO) është në kontakt të ngushtë me autoritetet shqiptare dhe po ndan informacionin dhe pamjet përkatëse nga sateliti Copernicus.

Delegacioni shton se, së bashku me shtetet anëtare, Bashkimi Evropian është i gatshëm të mbështesë popullin shqiptar për përballimin e kushteve ekstreme atmosferike, përfshirë edhe përmes Mekanizmit të Mbrojtjes Civile të BE-së.

/gj.m/j.p/

The post BE, i gatshëm të mbështesë popullin shqiptar për përballimin e kushteve ekstreme atmosferike appeared first on Agjencia Telegrafike Shqiptare.

TIRANË, 8 janar /ATSH/ Pas mbledhjes së Shtabit të Emergjencave Civile në Prefekturën e Durrësit, ministrja e Punëve të Brendshme, Albana Koçiu, deklaroi se, situata në qark është agravuar gjatë 24 orëve të fundit si pasojë e reshjeve të dendura, ndërsa të gjitha strukturat shtetërore ndodhen në terren dhe në gatishmëri të plotë.

Sipas ministres, zonat më problematike aktualisht janë njësitë administrative Vadardhë, Sukth dhe Katundi i Ri, ku është aktivizuar plani i evakuimit parandalues.

Operacioni po zbatohet nga Forcat e Armatosura dhe strukturat e Emergjencave Civile, në bashkëpunim me Policinë e Shtetit dhe institucionet vendore.

“Të gjitha strukturat janë në terren dhe në gatishmëri të plotë për menaxhimin e situatës nga reshjet e dendura. Në disa zona ka nisur evakuimi parandalues i banorëve. Situata po monitorohet vazhdimisht dhe po mbahet nën kontroll, ndërsa prioritet absolut mbetet jeta dhe siguria e qytetarëve. Institucionet do të vijojnë të jenë pranë tyre”, tha Koçiu.

Ministrja theksoi se, si rezultat i reshjeve të dendura të ditëve të fundit, në qarkun e Durrësit, në përgjithësi ka një situatë, e cila është agravuar 24-orëshin e fundit.

“Dy nga zonat më të nxehta janë në njësitë administrative Vadardhë, Sukth dhe në Katundin e Ri. Janë dy zona ku është instaluar plani i evakuimit dhe po zbatohet nga Forcat e Armatosura dhe Emergjencat Civile, në bashkëpunim me Policinë e Shtetit e të gjitha struktura që janë në gatishmëri e po koordinojnë evakuimin e banorëve”, u shpreh ministrja.

Koçiu bëri një thirrje për të gjithë qytetarët e këtyre zonave të ndjekin udhëzimet e ekipeve të emergjencës, të institucioneve që të mos ketë rrezik të jetës së vetë njerëzve, por patjetër dhe të gjësë së gjallë në shtëpitë e tyre.

Ministrja nënvizoi se, do të vijohet më pas me një evidentim të dëmeve, ashtu sikundër bashkia e Durrësit e ka filluar një evidentim e vlerësim të dëmeve të shkaktuara si rezultat i reshjeve.

Por, shtoi ajo, “në këtë moment, ajo që është më e rëndësishmja, e këtu do të kërkoja bashkëpunimin jo vetëm të qytetarëve por edhe të mediave, të cilat për hir të së vërtetës kanë qenë gjithë kohën në terren duke raportuar, që të sensibilizojmë sa më shumë, sepse tashmë në këto momente, e rëndësishme është jeta e njerëzve”.

“Duhet të shpëtojmë e të mos kemi asnjë incident të tillë e më pas do të shkohet me një plan vlerësimi e një plan zhdëmtimi”, tha Koçiu.

Sa i përket personave të evakuuar ministrja Koçiu u shpreh se janë rreth 20 familje të cilat janë evakuuar në Katund të Ri dhe Vadardhë, ndërkohë që situata është dinamike.

“Aktualisht strukturat e Forcave të Armatosura janë aty e po evakuojnë çdo banesë që shihet si rrezik edhe paraqet rrezik për banorët”, tha ajo.

Patjetër, shtoi Koçiu, “e rëndësishme është që duhet t’u besojnë autoriteteve shtetërore dhe të mos ndërmarrin masa vetë për të dalë, për të lënë banesën apo për të gjetur një mënyrë tjetër apo zgjidhje tjetër, pasi vetë strukturat dhe autoritetet përgjegjëse janë kompetente dhe e dinë zhvendosjen nga shtëpia e banimit për t’u akomoduar në një vend të sigurt”.

Koçiu theksoi se, aktualisht ka struktura hoteliere, por ndërkohë janë edhe dy struktura të Konvaleshencës së Ministrisë së Brendshme dhe ajo e Ministrisë së Mbrojtjes, që janë vënë në dispozicion dhe po suportohen nga Rezervat Materiale të Shtetit për të plotësuar të gjithë instrumentin, apo mekanizmin e emergjencave civile që ngrihet në këto raste.

Ministrja u shpreh se, strukturat shtetërore janë të gjitha të angazhuara, janë në këmbë për të përballuar dhe për të ndihmuar çdo qytet dhe çdo familje që ka nevojë.

/gj.m/j.p/

The post Koçiu: Evakuime parandaluese në Vadardhë, Sukth dhe Katundi i Ri appeared first on Agjencia Telegrafike Shqiptare.

TIRANË, 8 janar /ATSH/ Ambasada e Shteteve të Bashkuara në Tiranë u ka bërë sot thirrje të gjithë shtetasve amerikanë të tregojnë kujdes në zonat e rrezikuara nga përmbytjet, të cilat, shton ambasada, po përkeqësohen.

Ambasada njofton se vazhdon të monitorojë përmbytjet në të gjithë vendin, teksa shton se, disa zona në të gjithë vendin janë nën urdhër evakuimi.

“Përmbytjet mund të ndodhin pa paralajmërim, ndërsa reshjet e shiut mund të shkaktojnë mbylljen e rrugëve për shkak të përmbytjeve ose rrëshqitjeve të dheut”, nënvizon ambasada.

Qytetarët amerikanë në Shqipëri që kanë nevojë për ndihmë mund të kontaktojnë Ambasadën e SHBA-së me telefon në 4224-7285 (duke telefonuar nga Shqipëria) ose +355-4224-7285 (duke telefonuar nga jashtë Shqipërisë), ose me email në: ACSTirana@state.gov.

Sa i takon veprimeve që duhen ndërmarrë, ambasada thekson se qytetarët amerikanë duhet të shmangin zonat e prekura, veçanërisht ato nën urdhër evakuimi, dhe të ndjekin udhëzimet e policisë në lidhje me mbylljen e rrugëve ose ndërprerjet e trafikut.

Ambasada këshillon qytetarët që të monitorojnë lajmet lokale për përditësime mbi kushtet e përmbytjeve dhe të planifikojnë rrugët në përputhje me rrethanat.

Google Maps gjithashtu mund të ofrojë informacion në kohë reale mbi mbylljen e rrugëve dhe përmbytjet, thekson amabsada, teksa këshillon qytetarët që të mos të përpiqen të kalojnë nëpër zona që janë prekur nga përmbytjet dhe të kërkojnë një rrugë alternative ose të marrin në konsideratë shtyrjen e udhëtimit nëse një rrugë alternative nuk është e disponueshme.

Ambasada inkurajon fuqimisht qytetarët amerikanë në zonat e prekura që janë të sigurt të monitorojnë lajmet lokale dhe të kontaktojnë drejtpërdrejt të dashurit e tyre dhe/ose të përditësojnë statusin e tyre në mediat sociale.

Nëse kanë një emergjencë të menjëhershme ose kërcënuese për jetën, qytetarët janë të lutur të telefonojnë në 127 për një ambulancë, në 112 për policinë ose në 128 për zjarrfikësit. Gjithashtu mund të kontaktojnë Emergjencën Kombëtare në info@urgjenca.gov.al (http://urgjenca.gov.al/).

/gj.m/j.p/

The post Ambasada e SHBA, thirrje shtetasve amerikanë për kujdes në zonat e rrezikuara nga përmbytjet appeared first on Agjencia Telegrafike Shqiptare.

TIRANË, 7 janar /ATSH/ Kreu i Partisë Demokratike, Sali Berisha kërkoi sot shpalljen e gjendjes së fatkeqësisë natyrore për sa i takon përmbytjeve të shkaktuara nga reshjet e ditëve të fundit në vend.

Nga selia blu, gjatë një konference për median, Berisha u shpreh se “mijëra e mijëra familje shqiptare kanë pësuar pasoja shumë të rënda nga përmbytjet”.

Sipas tij, “vetëm në rrethin e Durrësit përllogariten rreth 4 mijë banesa, biznese dhe objekte të tjera. Dëmet janë jashtëzakonisht të mëdha”.

Berisha tha se përmbytjet nuk kanë prekur vetëm Durrësin, por edhe qytete të tjera.

Ai tha se “nga Gjirokastra e deri në Shkodër janë mijëra e mijëra familje të tjera, biznese, fabrika, të cilat kanë pësuar dëme të parikuperueshme. Partia Demokratike kërkon menjëherë shpalljen e gjendjes së fatkeqësisë natyrore në këtë zonë”.

Berisha akuzoi kryeministrin Edi Rama, si përgjegjës për situatën.

“Edi Rama që bën sehir, nuk shpall gjendjen e fatkeqësisë natyrore në Durrës dhe në Lezhë, apo Shkodër dhe qarqet e tjera, vetëm e vetëm se ligji e detyron atë në këtë gjendje t’u përgjigjet një për një dëmeve të krijuara nga fatkeqësia natyrore. Ky qëndrim indiferent, cinik është një lloj krimi në vetvete.

Kësaj katastrofe natyrore, me përmasa të papara ndonjëherë, Edi Rama ndaj saj reagon me një cinizëm ekstrem. Ai në postimin e tij fajëson opozitën e cila nuk po e akuzon atë për shirat e rrëmbyera që kanë rënë. Ky qëndrim cinik, tallës ndaj qytetarëve, turpëron çdo njeri që ka cipë”, tha Berisha.

Berisha theksoi se, taksapaguesit shqiptarë kanë paguar për mbrojtjen e qarkut të Durrësit, Porto Romanos dhe zonat e tjera, 42 milionë euro investim.

Por, theksoi ai, “korrupsioni ka bërë që hidrovori i Porto Romanos, kolektorin ta ketë në kuotën mbi 70 centimetra”.

“Kurse hidrovori i Hamallajt prej 8 muajsh i ka pompat jashtë funksionit. Përveç kësaj, Durrësi, territori i përmbytur, ka një sistem kanalizimesh shumë të studiuar dhe mirëprojektuar”, u shpreh ai.

/gj.m/r.e/a.f/

The post Berisha: Të shpallet gjendja e fatkeqësisë natyrore appeared first on Agjencia Telegrafike Shqiptare.

TIRANË, 7 janar /ATSH/ Java e 18-të e Kategorisë Superiore ishte e fundit për vitin 2025, ndërsa kampionati do të rikthehet të mërkurën, më 14 janar, me ndeshjet e javës së 19-të.

Kampionatin e kryeson Egnatia me 37 pikë, por skuadra me sulmin më të mirë deri në këtë fazë është Dinamo City, e cila ka realizuar 27 gola, tre më shumë se Vllaznia dhe katër më shumë se Egnatia.

Dejvi Bregu është golashënuesi më i mirë i Dinamo City, me shtatë gola të realizuar deri tani, duke qenë një nga pikat kyçe të repartit ofensiv të bluve.

Sa i përket mbrojtjes, Egnatia dhe AF Elbasani janë dy skuadrat që kanë pësuar më pak gola në 18 javët e para të kampionatit, vetëm 11 secila. Pas tyre renditet Dinamo City, me 12 gola të pësuar.

Në 18 ndeshjet e zhvilluara deri më tani, Egnatia ka regjistruar 11 fitore, katër barazime dhe vetëm tri humbje, duke qenë skuadra me më shumë fitore në kampionat. Ndërkohë, Dinamo City është skuadra që ka regjistruar fitoren më të thellë të këtij sezoni, 6-2 ndaj Tiranës.

/gj.m/r.e/a.f/

The post Superliga në statistika, Dinamo City ekipi me sulmin më të mirë appeared first on Agjencia Telegrafike Shqiptare.

TIRANË, 7 janar /ATSH/ Juventusi po shqyrton seriozisht mundësinë e transferimit të portierit të Ipswich Town, Aro Muriç, sipas raportimeve të fundit nga mediet italiane.

Portieri i Kosovës ka rikthyer vëmendjen e klubeve të mëdha evropiane pas paraqitjeve bindëse në Serie A, me fanellën e Sassuolos.

Ipswich Town e bleu Muriçin nga Burnley për 8 milionë paund në verën e vitit 2024, pas rikthimit të klubit në Premier League.

Megjithatë, sezoni i parë i 27-vjeçarit në elitën angleze u shoqërua me disa gabime, çka bëri që ai të humbte vendin e titullarit dhe të huazohej te Sassuolo gjatë verës së kaluar.

Huazimi në Itali ka rezultuar pozitiv për Muriçin. Ish-portieri i akademisë së Manchester City-t ka qenë një nga lojtarët më të qëndrueshëm të Sassuolo-s, që aktualisht mban vendin e 10-të në tabelën e Serie A. Klubi italian ka në dispozicion një opsion blerjeje prej 10 milionë eurosh në fund të sezonit.

Sipas gazetës “Tuttosport”, Juventusi po ndjek nga afër jo vetëm progresin e Muricit, por edhe të bashkëlojtarit të tij te Sassuolo, mbrojtësit qendror Tarik Muharemovic, përfaqësues i Bosnjë-Hercegovinës.

Kontrata e Muriçit me Ipswich Town është e vlefshme deri në vitin 2028, ndërsa klubi anglez aktualisht ka në përbërje portierët Christian Walton, Alex Palmer dhe David Button.

Megjithatë, interesimi i Juventusit mund të ndikojë në të ardhmen e portierit, i cili po shihet gjithnjë e më shumë si një alternativë serioze për një klub të madh të Serie A.

Paraqitjet e vazhdueshme në nivel të lartë në Itali mund ta vendosin Aro Muriçin përballë një hapi të rëndësishëm në karrierën e tij gjatë afatit të ardhshëm kalimtar.

/gj.m/r.e/a.f/

The post Paraqitjet me Sassuolon vënë Aro Muriç në radarët e Juventusit appeared first on Agjencia Telegrafike Shqiptare.

TIRANË, 7 janar /ATSH/ Shërbimet e Policisë Rrugore dhe ato të Rendit në Policinë e Shtetit janë në gatishmëri të përforcuar që prej ditës së djeshme për shkak të situatës së vështirë të krijuar nga reshjet e dendura.

Në mesditën e sotme, situata në akset rrugore nacionale ka shënuar një përmirësim të ndjeshëm.

Megjithatë, zonat e prekura nga rrëshqitjet e dheut, ose ku ka prani uji, monitorohen vazhdimisht nga shërbimet policore.

Policia e Shtetit apelon për drejtuesit e mjeteve që të tregojnë kujdes të shtuar, të reduktojnë shpejtësinë për shkak të lagështisë në rrugë dhe të pajisen me goma dimërore dhe zinxhirë kur udhëtojnë drejt zonave malore ku ka prezencë dëbore.

Drejtuesit e mjeteve duhet të respektojnë sinjalistikën dhe udhëzimet e policisë për të garantuar sigurinë e tyre dhe të qytetarëve të tjerë.

1 nga 2

/gj.m/r.e/a.f/

The post Policia e Shtetit apel për kujdes të shtuar nga drejtuesit e automjeteve appeared first on Agjencia Telegrafike Shqiptare.

TIRANË, 7 janar /ATSH/ Instituti i Gjeoshkencave (IGJEO) bëri me dije se sot pasdite dhe gjatë ditës së nesërme priten reshje intensive në të gjithë vendin, duke rritur rrezikun për përmbytje dhe rrëshqitje dherash në disa zona.

Sipas parashikimeve, sot pasdite dhe nesër priten reshje intensive në të gjithë vendin.

Në qarqet Shkodër, Dibër, Lezhë, Durrës, Tiranë, Elbasan, Fier, Korçë, Vlorë dhe Gjirokastër mund të ketë vërshime të shpejta të lumenjve të vegjël malorë dhe rrëshkitje të dherave.

Në zonat urbane, në këto qarqe mund të shfaqen probleme me përmbytje të lokalizuara, në varësi të gjëndjes së kanalizimeve.

Sipas llogaritjeve hidrologjike të IGJEO-s, si rezultat i reshjeve me intensitet të lartë të rëna gjatë ditëve të kaluara, të cilat do të vazhdojnë deri ditën e enjte do të ketë rritje të prurjeve dhe niveleve në lumenjtë Mat, Ishëm, Erzen, Shkumbin.

Rrezik të shtuar për përmbytje në vazhdim të ditës së sotme dhe të nesërme do të ketë lumi Vjosë, lumi Drin-Buna dhe liqeni i Shkodrës.

Sa i përket reshjeve sot pasdite dhe nesër në qarqet Shkodër, Dibër, Lezhë, Durrës, Tiranë, Elbasan, Fier, Berat, Korçë, Vlorë dhe Gjirokastër priten reshje intensive, ndërsa në qarkun Kukës priten reshje mesatare deri lokalisht intensive.

Reshjet priten të shoqërohen me shtrëngata. Në Veri, Lindje dhe Juglindje në lartësitë mbi 500 m nga niveli i detit reshjet do të jenë në formë dëbore.

Sa i përket temperaturave nesër temperaturat minimale dhe maksimale të ajrit pritet të arrijnë në bregdet: 5 / 10 °C, në vendet e ulëta: 0 / 9 °C, në vendet malore: -5 / 4 °C

Era sot pasdite dhe nesër pritet të fryjë mesatare deri e fortë në bregdet dhe në zonat malore.

Autoritetet bëjnë apel për qytetarët që të jenë të kujdesshëm, të shmangin lëvizjet e panevojshme në zonat e përmbytura dhe të ndjekin udhëzimet e emergjencave lokale.

1 nga 3

/gj.m/a.f/r.e/

The post IGJEO: Rrezik i lartë për përmbytje dhe rrëshqitje dherash në disa qarqe të Shqipërisë appeared first on Agjencia Telegrafike Shqiptare.

TIRANË, 7 janar /ATSH/ Presidenti i Republikës Bajram Begaj pranoi sot Letrat Kredenciale të Ambasadorit të Jashtëzakonshëm dhe Fuqiplotë të Republikës Demokratike Popullore të Laosit, Khamphon Vongsanty.

Kreu i Shtetit vlerësoi marrëdhëniet miqësore mes dy vendeve, të bazuara në respektin dhe bashkëpunimin e ndërsjellë.

Presidenti Begaj u shpreh se ka mundësi për thellim të këtij bashkëpunimi për të patur rezultate konkrete, veçanërisht në fushat e ekonomisë, turizmit dhe kulturës.

“Shqipëria, – theksoi Presidenti i Republikës, – i kushton një rëndësi të veçantë bashkëpunimit ndërkombëtar në mbështetje të paqes dhe stabilitetit.”

Në këtë kuadër, Kreu i Shtetit vlerëson se njohja e Kosovës, mbështetja e anëtarësimit të saj në organizata ndërkombëtare nga ana e Republikës Demokratike Popullore të Laosit është një kontribut për paqen dhe stabilitetin në rajonin e Ballkanit Perëndimor.

1 nga 2

/gj.m/r.e/

The post Begaj pret ambasadorin e Laosit: Thellim i bashkëpunimit mes dy vendeve appeared first on Agjencia Telegrafike Shqiptare.

TIRANË, 7 janar /ATSH/ FK Vora vijon të përforcojë organikën në prag të objektivave të sezonit, duke zyrtarizuar afrimin e Renaldo Torrajt.

Mesfushori i talentuar është lojtar i Vorës pas largimit nga Teuta e Durrësit.

Torraj është produkt i akademisë së Tottenham Hotspur, ndërsa karriera e tij ka vijuar në Angli me Derby County U21 dhe Burnley U21. Së fundmi, ai ka qenë pjesë e KF Teuta, ku është aktivizuar në Abissnet Superiore.

Me eksperiencë në arenën ndërkombëtare, Renaldo Torraj ka veshur fanellën e Kombëtares shqiptare U16, U17, U19 dhe U21, duke u konsideruar si një nga elementët me perspektivë të futbollit shqiptar.

Afrimi i tij pritet t’i japë më shumë cilësi dhe alternativa repartit të mesfushës së Vorës, ndërsa klubi vazhdon të ndërtojë një skuadër konkurruese për objektivat e saj.

/gj.m/a.f/

The post Renaldo Torraj firmos me Vorën appeared first on Agjencia Telegrafike Shqiptare.

TIRANË, 7 janar /ATSH/ Agjencia e Mbikëqyrjes Policore (Rajoni Fier–Berat) ka ekzekutuar vendimin e Gjykatës së Shkallës së Parë të Juridiksionit të Përgjithshëm Berat, e cila ka caktuar masën e sigurimit personal “Pezullim i ushtrimit të një detyre a shërbimi publik” ndaj katër punonjësve të Policisë së Shtetit.

Masat janë marrë në kuadër të një procedimi penal për veprën “Shpërdorim i detyrës”.

Punonjësit e pezulluar janë: A.S., inspektor, trupë shërbimi në Seksionin e Trafikut Urban dhe Interurban, DVP Berat. M.D., inspektor, trupë shërbimi në Seksionin e Trafikut Urban dhe Interurban, DVP Berat. A.Q., inspektor, trupë shërbimi në Seksionin e Trafikut Urban dhe Interurban, DVP Berat. K.G., inspektor, oficer i Patrullës së Përgjithshme në Komisariatin e Policisë Berat.

Sipas AMP-së, masat e sigurisë u caktuan pas veprimeve hetimore proaktive të zhvilluara në bashkëpunim me Prokurorinë e Juridiksionit të Përgjithshëm Berat.

Nga hetimet ka rezultuar se punonjësit e dyshuar, gjatë ushtrimit të detyrës, me veprime dhe mosveprime në kundërshtim me ligjin, kanë favorizuar ose penalizuar drejtues mjetesh, të konstatuar në shkelje apo jo të Kodit Rrugor.

Agjencia e Mbikëqyrjes Policore thekson se mbetet e angazhuar në luftën kundër abuzimeve dhe fton qytetarët të denoncojnë çdo rast shkeljeje apo sjelljeje të paligjshme nga punonjësit e strukturave policore.

/gj.m/a.f/

The post AMP ekzekuton masat e sigurisë për 4 punonjës policie në Berat appeared first on Agjencia Telegrafike Shqiptare.

TIRANË, 7 janar /ATSH/ KF Teuta ka njoftuar zyrtarisht përfundimin e bashkëpunimit me futbollistin Renaldo Torraj.

Sipas klubit durrsak, vendimi është marrë me marrëveshje të ndërsjellë mes palëve dhe hyn në fuqi menjëherë.

Në komunikatën e publikuar, KF Teuta ka shprehur falënderimet për profesionalizmin dhe angazhimin e treguar nga Torraj gjatë periudhës së tij në skuadër, duke i uruar suksese në vazhdim të karrierës sportive.

“Faleminderit Renaldo”, shkruan klubi, duke mbyllur kështu një kapitull të rëndësishëm bashkëpunimi.

Largimi i Torraj vjen në një moment riorganizimi për Teutën, ndërsa klubi pritet të vijojë me lëvizje të tjera në merkato.

/gj.m/a.f/

The post Renaldo Torraj largohet nga KF Teuta appeared first on Agjencia Telegrafike Shqiptare.

TIRANË, 7 janar /ATSH/ Ministri i Mbrojtjes, Pirro Vengu ka ndjekur nga afër situatën e përmbytjeve në qytetin e Durrësit, ku reshjet e dendura të ditëve të fundit kanë shkaktuar dëme të konsiderueshme.

Vengu ka qenë i pranishëm në zonën e Unazës së Durrësit, një nga pikat më problematike, ku vijon puna intensive e mjeteve dhe efektivëve të Komandës Mbështetëse të Forcave të Armatosura për menaxhimin e situatës.

Gjatë inspektimit, ministri kërkoi që bashkia të angazhojë skuadra për të kryer konstatimin e dëmeve edhe në banesat e qytetarëve që ndodhen në emigracion, ose me pushime dhe nuk janë aktualisht të pranishëm në shtëpitë e tyre.

Një ditë më parë, Vengu theksoi se situata në Durrës mbetet problematike, duke bërë me dije se rreth 800 banesa janë përmbytur si pasojë e reshjeve, ndërsa 180 banorë janë evakuar për arsye sigurie. Ata janë akomoduar pranë dy konvaleshencave në qytet, ku po u ofrohet ushqim dhe shërbim mjekësor.

Autoritetet po vijojnë monitorimin e situatës dhe po bashkëpunojnë për të garantuar sigurinë e qytetarëve dhe rikthimin sa më të shpejtë të normalitetit në zonat e prekura.

/gj.m/a.f/r.e/

The post Vengu: Të konstatohen dëmet edhe në banesat e qytetarëve në emigracion appeared first on Agjencia Telegrafike Shqiptare.

TIRANË, 6 janar /ATSH/ Ministri i Mbrojtjes, Pirro Vengu mblodhi sot në mjediset e Agjencisë Kombëtare të Mbrojtjes Civile, Komitetin Ndërministror të Emergjencave Civile, ku u diskutua situata e krijuar nga reshjet intensive të shiut gjatë 24 orëve të fundit, në vend.

Gjatë takimit u bë një analizë e detajuar e situatës në terren, me fokus zonat më të prekura nga përmbytjet, rrëshqitjet e dherave dhe problematikat në infrastrukturë.

Strukturat përgjegjëse raportuan mbi masat e marra deri tani, ndërhyrjet emergjente dhe nevojat për mbështetje shtesë.

Ministri Vengu kërkoi gatishmëri të plotë të të gjitha institucioneve, koordinim të vazhdueshëm mes strukturave qendrore dhe vendore si dhe monitorim të pandërprerë të situatës, për të garantuar sigurinë e qytetarëve dhe minimizimin e dëmeve.

Gjatë 24 orëve të fundit, pjesa më e madhe e territorit të vendit është përfshirë nga reshje intensive shiu, të cilat në disa qarqe kanë shkaktuar problematika, pa pasoja serioze për jetën e qytetarëve.

Situata po monitorohet me prioritet në qarqet Lezhë dhe Durrës, ku janë evidentuar prani uji në disa akse rrugore dhe rritje të ndjeshme e niveleve të lumenjve.

Sipas IGJEO-s, reshjet intensive pritet të vijojnë deri më 8 janar.

Strukturat e mbrojtjes civile në nivel qendror dhe vendor, nën koordinimin e Agjencisë Kombëtare të Mbrojtjes Civile, janë në gatishmëri të plotë.

Qytetarëve u rekomandohet të shmangin zonat me risk dhe të kërkojnë ndihmën e autoriteteve në rast nevoje.

1 nga 7

/gj.m/r.e/a.f/

The post Mblidhet Komiteti i Emergjencave Civile, Vengu: Institucionet në gatishmëri të plotë appeared first on Agjencia Telegrafike Shqiptare.

TIRANË, 6 janar /ATSH/ Presidenti i Republikës, Bajram Begaj dekretoi sot shpalljen e 3 ligjeve, të rivlerësimit të pasurive të paluajtshme, ligjin për gjuetinë dhe ligjin për  ratifikimin e Traktatit të Riadit për Disenjot dhe të rregulloreve sipas këtij Traktati, bërë në Riad më 22 nëntor 2024.

Ligji “Për rivlerësimin e pasurisë së paluajtshme” krijon një kuadër ligjor për rivlerësimin e pasurive të individëve dhe personave juridikë, duke përshtatur vlerën e pronave me çmimet aktuale të tregut.

Norma e rivlerësimit do të jetë 5% dhe do të zbatohet përgjatë gjithë vitit 2026.

Sa i përket ligjit për gjuetinë, ligji vjen pas një dekade moratoriumi, i vendosur për mbrojtjen e biodiversitetit dhe rikuperimin e popullatave të faunës së egër.

Ligji synon të vendosë rregulla të qarta për organizimin dhe ushtrimin e gjuetisë, duke garantuar ruajtjen e diversitetit biologjik dhe ekuilibrin e habitateve të florës dhe faunës së egër.

Eksperienca e vendeve evropiane tregon se gjuetia mund të kthehet në burim të ardhurash për zonat rurale, duke hapur vende të reja pune dhe përmirësuar infrastrukturën. Ndryshimi kryesor është kalimi i kompetencës nga strukturat qendrore te bashkitë, duke i dhënë përgjegjësi njësive të qeverisjes vendore për gjuetinë.

Ligji për ratifikimin e Traktatit të Riadit për Disenjot dhe të rregulloreve sipas këtij Traktati, bërë në Riad më 22 nëntor 2024, synon ratifikimin e traktatit, i cili garanton lirinë e shteteve anëtare për të përcaktuar kërkesat ligjore për disenjot industriale.

Traktati përforcon zhvillimin e inovacionit dhe krijimtarisë, mbrojtjen e pronësisë intelektuale dhe përmirësimin e cilësisë së produkteve, duke ndihmuar në rritjen e konkurrencës në tregjet ndërkombëtare.

/gj.m/r.e/a.f/

The post Begaj dekreton ligjin për rivlerësimin e pasurive të paluajtshme, për gjuetinë dhe traktatin e Riadit appeared first on Agjencia Telegrafike Shqiptare.

TIRANË, 6 janar /ATSH/ Instituti i Gjeoshkencave bëri të ditur sot se reshje intensive shiu pritet të përfshijnë vendin gjatë pasdites së sotme dhe ditës së nesërme, duke rritur ndjeshëm rrezikun për përmbytje, kryesisht në veri dhe jug.

Në qarqet Shkodër, Kukës, Dibër, Lezhë, Durrës, Elbasan, Vlorë dhe Gjirokastër parashikohen vërshime të shpejta të lumenjve të vegjël malorë, si dhe rrëshqitje dherash.

Në zonat urbane mund të shfaqen përmbytje të lokalizuara, në varësi të gjendjes së sistemeve të kanalizimeve.

Sipas llogaritjeve hidrologjike të Institutit të Gjeoshkencave (IGJEO), reshjet me intensitet të lartë të rëna ditët e fundit, të cilat pritet të vazhdojnë deri ditën e enjte, datë 08 janar, do të sjellin rritje të rrezikshme të prurjeve dhe niveleve ujore në lumenjtë Drin-Buna, Mat, Shkumbin dhe Vjosë, si dhe në liqenin e Shkodrës.

Lumenjtë Drin e Buna dhe liqeni i Shkodrës paraqesin rrezik të shtuar për përmbytje gjatë ditës së sotme dhe të nesërme.

Parashikimi meteorologjik tregon se në qarqet Vlorë dhe Gjirokastër priten reshje intensive deri lokalisht shumë intensive, ndërsa në Shkodër dhe Lezhë reshjet do të jenë intensive.

Në qarqet e tjera të vendit reshjet do të jenë mesatare deri lokalisht intensive dhe do të shoqërohen me shtrëngata.

Në zonat veriore, lindore dhe juglindore, në lartësitë mbi 1000 metra mbi nivelin e detit, reshjet do të jenë në formë dëbore.

Për ditën e mërkurë, temperaturat e ajrit pritet të variojnë nga 9 deri në 16 gradë Celsius në bregdet dhe zonat e ulëta, ndërsa në zonat malore nga 3 deri në 12 gradë Celsius. Era do të fryjë mesatare deri e fortë në zonat bregdetare gjatë pasdites së sotme dhe ditës së nesërme.

Autoritetet u bëjnë thirrje qytetarëve të tregojnë kujdes të shtuar dhe të ndjekin njoftimet zyrtare, ndërsa strukturat vendore janë në gatishmëri për përballimin e situatës së krijuar nga moti i keq.

1 nga 3

/gj.m/r.e/a.f/

The post IGJEO: Situata problematike nga reshjet deri të enjten appeared first on Agjencia Telegrafike Shqiptare.

TIRANË, 6 janar /ATSH/ Kryetari i Partisë Demokratike, Sali Berisha deklaroi sot se për opozitën përparësi absolute mbetet përgatitja e një procesi zgjedhor të drejtë dhe garantimi i funksionimit të drejtësisë, duke theksuar se pa një qeveri teknike vendi nuk mund të shkojë në zgjedhje të lira.

Në një konferencë për shtyp nga selia blu, Berisha u shpreh se me kryeministrin Edi Rama në detyrë, zgjedhjet janë të pamundura, duke e cilësuar këtë si një fakt tashmë të provuar jo vetëm nga opozita, por edhe nga vëzhguesit ndërkombëtarë të proceseve zgjedhore.

“Pa qeveri teknike për të përgatitur zgjedhjet, në zgjedhje nuk shkohet. Me Edi Ramën nuk ka zgjedhje. Ne e kemi deklaruar këtë dhe kjo është një e vërtetë e faktuar tashmë. E faktuar jo vetëm nga ne, por dhe nga komuniteti ndërkombëtar, vëzhguesit e zgjedhjeve. Ndaj dhe PD dhe opozita, kërkon largimin e Edi Ramës, kërkon një qeveri teknike e cila të përgatisë një proces zgjedhor të drejtë. Kjo është kërkesa jonë”, tha Berisha.

Ai theksoi se, në kohën e duhur, opozita do të japë qëndrimet e saj edhe për përbërjen e qeverisë teknike, por nënvizoi se dy janë kushtet themelore: zgjedhje të ndershme dhe mosbllokim i drejtësisë.

Sipas Berishës, çdo qeveri që pengon drejtësinë cenon ndarjen e pushteteve dhe Kushtetutën.

“Drejtësia nuk mund të bllokohet. Është kushti i të gjitha kushteve që të funksionojë ndarja e pushteteve, jo si sot që të gjitha pushtetet janë përqendruar në një dorë”, u shpreh ai.

Kreu i PD-së foli edhe për strategjinë opozitare, duke konfirmuar se protesta mbetet mjeti kryesor i reagimit politik.

Berisha bëri të ditur se data e protestës ende nuk është përcaktuar, por ka gjasa që ajo të zhvillohet përpara datës 20 shkurt, ndërsa konsultimet mes forcave opozitare kanë nisur.

“Sot fillojnë konsultimet. Do ketë patjetër protestë. Ne nuk heqim dorë”, theksoi ai.

Berisha njoftoi se të gjitha partitë opozitare, pa përjashtim, do të ftohen në tryezë për krijimin e një fronti të gjerë opozitar kundër asaj që ai e cilësoi “narko-regjim”.

“Është koha për një front të gjerë opozitar, që me përgjegjësi të lartë të bashkërendojmë të gjitha përpjekjet për t’i dhënë goditjen përfundimtare këtij regjimi”, deklaroi Berisha.

Duke iu përgjigjur pyetjeve mbi organizimin e protestave, Berisha tha se simbolet dhe flamujt e partive nuk janë pengesë për bashkimin, përkundrazi, sipas tij, ato janë frymëzim për mbështetësit.

“E rëndësishme është vërtetësia si opozitë e vërtetë. Të gjitha partitë të vijnë me simbolet e tyre, kjo nuk përbën problem”, u shpreh kreu i PD-së.

/gj.m/r.e/a.f/

The post Berisha: Pa qeveri teknike nuk ka zgjedhje të lira, front opozitar kundër qeverisë appeared first on Agjencia Telegrafike Shqiptare.