Presidenti i Turqisë, Recep Tayyip Erdogan, dhe ministrat e jashtëm të vendeve të Ballkanit diskutuan të premten marrëdhëniet dypalëshe dhe çështjet rajonale në një takim të mbajtur në Stamboll.
Në njoftimin e publikuar nga Presidenca turke në platformën X bëhet e ditur se në takim morën pjesë ministrja e Jashtme e Shqipërisë, Elisa Spiropali, ministrja e Jashtme e Kosovës, Donika Gërvalla-Schwarz, ministri i Jashtëm i Maqedonisë së Veriut, Timço Mucunski, ministri i Jashtëm i Malit të Zi, Ervin Ibrahimoviq, ministri i Jashtëm i Bosnjë e Hercegovinës, Elmedin Konakoviq, si dhe zëvendësministrja e Jashtme e Serbisë, Nevena Jovanoviq, njoftoi Drejtoria e Komunikimeve e Turqisë.
Duke shprehur kënaqësinë për mbajtjen e takimit të dytë të Platformës së Paqes në Ballkan në Stamboll, Erdogan falënderoi përfaqësuesit e vendeve për kontributet e tyre.
Erdogan theksoi rëndësinë e trajtimit të çështjeve si siguria kufitare, energjia, teknologjia dhe transporti.
Ndryshe, në ditë më parë ministrja Donika Gërvalla bëri të ditur se me ftesë të Ministrit të Punëve të Jashtme të Republikës së Turqisë, Hakan Fidan po qëndron në Stamboll në kuadër të takimit të dytë të Platformës së Paqes për Ballkanin. /Telegrafi/
Turqia, si shtet mik dhe aleat i ngushtë i Republikës së Kosovës, mbetet një partner i rëndësishëm në promovimin e paqes, stabilitetit dhe bashkëpunimit rajonal, kështu ka thënë ministrja në detyrë e Punëve të Jashtme, Donika Gërvalla përmes një postimi në rrjetin social në Facebook.
Gërvalla bëri të ditur se me ftesë të Ministrit të Punëve të Jashtme të Republikës së Turqisë, Hakan Fidan, në Stamboll kanë zhvillua një takim bilateral në kuadër të takimit të dytë të Platformës së Paqes për Ballkanin.
"Gjatë takimit me Ministrin Fidan theksova se Republika e Kosovës, përmes angazhimit të saj në këtë platformë, riafirmon orientimin strategjik drejt integrimit euroatlantik, përfshirë anëtarësimin në Bashkimin Evropian dhe NATO, si dhe përkushtimin ndaj paqes së qëndrueshme, fqinjësisë së mirë dhe stabilitetit rajonal. Po ashtu, vura në dukje rëndësinë e thellimit të bashkëpunimit në fushën e sigurisë dhe të përpjekjeve të përbashkëta për një rajon më të sigurt", ka shkruar ajo.
Tutje ministrja në detyrë u shpreh se: "Falënderova Ministrin Fidan për ftesën dhe mikpritjen, duke ritheksuar marrëdhëniet e shkëlqyera dhe partneritetin e qëndrueshëm ndërmjet Republikës së Kosovës dhe Republikës së Turqisë, si dhe rolin e saj në avancimin e dialogut, paqes dhe stabilitetit në rajon dhe më gjerë". /Telegrafi/
Kosova dhe Bahamet kanë nënshkruar një marrëveshje për heqjen reciproke të vizave, duke mundësuar lëvizjen e lirë të qytetarëve të të dy vendeve.
Kjo u bë e ditur nga Presidentja e Kosovës, Vjosa Osmani përmes një postimi në Facebook.
Ajo theksoi se pas njohjes së Kosovës nga Bahamet dhe vendosjes së marrëdhënieve diplomatike në dhjetor, ky ishte hapi i radhës për forcimin e partneritetit ndërmjet dy shteteve.
“Marrëveshja dëshmon përkushtimin e përbashkët për forcimin e lidhjeve ndërmjet qytetarëve tanë, duke i afruar ata edhe më shumë me njëri-tjetrin”, tha Osmani.
Marrëveshja do të mundësojë lëvizjen e lirë të qytetarëve të Kosovës dhe Bahamasit, duke përforcuar lidhjet ekonomike, kulturore dhe diplomatike mes dy vendeve.
Bahamet - vendi ishullor i Oqeanit Atlantik – u bënë vendi 121-të i botës që e njeh Kosovën.
Ky vend në Karaibe deri tani ka qenë në mesin e 106 vendeve të botës ku kosovarët detyrohen të pajisen me vizë para se të udhëtojnë për ta vizituar.
Tani, Bahamet janë vendi i 53-të në botë ku kosovarë mund të udhëtojnë lirshëm./Telegrafi.
Donika Gërvalla, tani ministre në detyrë e Punëve të Jashtme, më 20 prill të vitit 2016, në emisionin Info Box në RTV Dukagjini, kishte deklaruar se posedon dëshmi që lidhin drejtpërdrejt Hashim Thaçin dhe Kadri Veselin dhe SHIK-un me krimin.
“Unë kam dëshmi madje me shkrim në zarfe të mbyllura, të cilat i janë paraqitur organeve të ndryshme, i kam personalisht në shtëpinë time në Bon”.
”I kam dërgu dikun, jam juriste me profesion, aty ku unë e kam pa të arsyeshme që duhet dërguar” kishte thënë ajo derisa ishte pyetur nga Rama se a janë dërguar në Kosovë apo diku tjetër Gërvalla ishte përgjigjur:diku tjetër.
Rama kishte inistuar se ku i ka dërguar këto dokumente derisa kishte pyetur direkt Gërvallën se mos i kishte dërguar në Gjykatën Speciale ku kjo e fundit kishte pohuar se kishte dërguar aty.
”Po”, kishte thënë Gërvalla duke shtuar se ”disa prej tyre po”.
”Jo nuk kam dërguar, nuk kam mundësi ti dërgoj dokumentet, jo jo, ka disa tema të ndara, Gjykata Speciale është tem shumë e freskët, unë flas për dëshmi të cilat në vazhdimësi gjatë këtyre viteve, Gjykata Speciale është një temë që ka rrjedh gjatë muajëve të fundit, ka institucione ndërkombëtare të cilat në vazhdimsi, institucione të cilat ndër të tjera e financojnë EULEX-in, të cilat janë lajmëruar, janë njoftuar dhe është kërkuar ndihma e tyre në hetimin e vrasjeve që SHIK-u ka bërë ndaj aktivistëve të LDK-së”.
Ajo, gjatë asaj interviste, përballë Ermal Pandurit dhe Fidan Ramës, kishte thënë se ato dëshmi i kishte deponuar diku.
“Janë një sërë argumentesh të cilat Hashim Thaçin, i cili edhe kur ishte në opozitë, por sidomos pasi u bë kryetar i shtetit, dhe atëherë filloi degradimi total i Kosovës, Hashim Thaçi e ktheu këtë vend në një qerdhe të krimit të organizuar dhe të korrupsionit dhe nuk është e habitshme pastaj që gjërat rrodhën dhe erdhën ashtu siç erdhën… kemi Kadri Veselin, shefin e SHIK-ut, gjithkush në botë e di se kush është Kadri. Kadri Veseli është ish-koka e një organizate që ka kryer krime të rënda ndaj kundërshtarëve politikë”, kishte thënë Gërvalla.
Mirëpo, së voni ajo ka thënë në një paraqitje televizive se intervista e saj ishte prerë dhe shkëputur nga konteksti.
Për këtë, Ermal Panduri, autor i emisionit Debat Plus, ia ka shfaqur intervistën e plotë, duke komentuar hap pas hapi deklarimin e saj të asokohe.
Asokohe, deklarimet e saj ishin pak kohë pas themelimit të Gjykatës Speciale dhe kishin bërë bujë, por bujë po bëjnë edhe tani, pasi që ajo pretendon se videoja është e manipuluar dhe e nxjerrë nga konteksti.
“Dua ta bëj të qartë që në fillim se ajo video që po qarkullon nëpër rrjete sociale asnjëherë, madje as edhe një herë, nuk është prerë nga Televizioni Dukagjini”, ka thënë Panduri.
“Të mos ta lënë këtë çështje në errësirë, por videon e prerë ta lëshojnë deri në fund, është shkëputur”, ka thënë Gërvalla në emisionin Politiko në Kanal 10.
Ministrja e Punëve të Jashtme dhe Diasporës në detyrë, Donika Gërvalla, ka reaguar ndaj deklaratave të fundit të presidentit të Serbisë, Aleksandar Vuçiq, duke theksuar se për të kuptuar synimet e Rusisë në rajon, mjafton të vëzhgohen veprimet e Serbisë.
Sipas Gërvallës, Serbia nuk ka një politikë të jashtme të pavarur nga Moska dhe veprimet e saj shpesh shërbejnë si reflektim i interesave ruse në Ballkanin Perëndimor.
Ajo ka përmendur deklaratën e Vuçiqit se “rendi botëror ka vdekur” dhe paralajmërimin për dyfishimin e ushtrisë serbe, duke i cilësuar si mesazhe të qarta politike që vijnë nga dhe i drejtohen Rusisë.
“Fakti është se askush nuk po e kërcënon Serbinë. Kërcënimi i vërtetë qëndron te udhëheqja e saj, e cila, në vend se të ndërtojë një shtet normal europian të fokusuar në reforma të BE-së dhe demokraci, ëndërron një perandori rajonale – një mentalitet rus në miniaturë”, ka theksuar Gërvalla.
Ajo ka paralajmëruar se retorika e tillë dhe orientimi militarist përbëjnë rrezik serioz për stabilitetin rajonal dhe për sigurinë europiane, duke rikujtuar se historia ka dëshmuar se politikat destabilizuese të Serbisë kanë pasur pasoja të rënda për kontinentin.
Gërvalla ka bërë thirrje që Bashkimi Europian dhe partnerët ndërkombëtarë të jenë vigjilentë ndaj zhvillimeve në Serbi dhe të mos injorojnë sinjalet që, sipas saj, tregojnë një afrim gjithnjë e më të thellë të Beogradit me Moskën.
History has taught us that to understand Russia’s intentions in our region, one should watch Serbia’s actions. Serbia doesn’t have a foreign policy different than Moscow's. Yesterday, Serbia’s president declared the world order dead and said they will double the army. The message… — Donika Gërvalla-Schwarz (@gervallaschwarz) January 5, 2026
Qeveria në detyrë e Kosovës ka vendosur regjimin e vizave për qytetarët e Republikës së Fixhit.
Ky vendim u mor gjatë mbledhjes së sotme të Ekzekutivit dhe është pjesë e harmonizimit të politikës së vizave të Kosovës me Bashkimin Evropian.
“Kosova ka regjim pa viza me 17 shtete që ndodhen në listën e vendeve të BE-së. Për të siguruar një menaxhim të rregullt të emigracionit, Republika e Kosovës synon harmonizimin e plotë të politikës së saj me atë të BE-së, duke filluar nga viti 2025”, tha Ministrja e Punëve të Jashtme, Donika Gërvalla.
Vendosja e regjimit të vizave është pjesë e përpjekjeve për të siguruar kontroll të rregullt të emigracionit dhe për të ruajtur standardet e Bashkimit Evropian në këtë fushë. /Telegrafi/
Ministrja në detyrë e Punëve të Jashtme dhe Diasporës, Donika Gërvalla, ka bërë të ditur se ndihma humanitare e ndarë nga Qeveria e Republikës së Kosovës për popullin e Gazës ka mbërritur në destinacion dhe ka filluar menjëherë shpërndarja e saj.
“Dje pasdite morëm konfirmimin se ndihma humanitare e ndarë nga Qeveria e Republikës së Kosovës, e dedikuar për popullin e Gazës ka mbërritur në Gaza dhe menjëherë ka nisur shpërndarja për familjet në nevojë, përmes partnerëve humanitarë në terren”, ka shkruar Gërvalla.
Sipas saj, dërgesa humanitare është në vlerë prej 500 mijë euro dhe përfshin tenda, pako ushqimore, batanije si dhe 158 mijë racione të ushqimit të ngrohtë.
“E dimë që asgjë nuk e zëvendëson humbjen dhe dhimbjen atje. Por shpresojmë që kjo ndihmë modeste t’u japë sadopak mbështetje e lehtësim familjeve, sidomos fëmijëve dhe të moshuarve, në ditë kur edhe gjërat më bazike mungojnë”, ka theksuar ajo.
Gërvalla ka shprehur gjithashtu mirënjohje për bashkëpunimin ndërkombëtar që e bëri të mundur këtë operacion humanitar.
“Shpreh mirënjohjen time të sinqertë për Republikën e Turqisë dhe Gjysmëhënën e Kuqe Turke për bashkëpunimin dhe mbështetjen që e bënë të mundur këtë operacion humanitar”, ka përfunduar Gërvalla. /Telegrafi/
Kryetarja e partisë Guxo, Donika Gërvalla ka uruar Rifat Jasharin me rastin e ditëlindjes së tij të 79-të.
Në një postim në Facebook, Gërvalla ka shprehur mirënjohje për vëllain e komandantit legjendar Adem Jashari, për sakrificën që familja Jashari dha për Kosovën.
“I dashur Baci Rifat, sot, në ditëlindjen tënde, dua të të falënderoj për shumëçka, për një jetë të tërë, që ti dhe familja e madhe Jashari, gjithmonë ia kushtoni Kosovës, por sidomos të të falënderoj që dhimbja e sakrifica, por edhe barra e rëndë që mban mbi supet e tua, nuk të ligështon e as të thyen asnjë herë. Ne jemi me fat që të kemi. Të fortë dhe të qëndrueshëm si një lis që nuk e lëkund era e as shtrëngata sepse i ka rrënjët thellë në zemër të Kosovës dhe lirisë së saj!”, ka shkruar Gërvalla.
Ajo ka uruar që Rifat Jashari të jetoj edhe për shumë vite të tjera.
“Të paçim edhe për shumë vite, kështu të fortë, të pathyeshëm nga sfidat, nga vitet e nga vështirësitë, të cilat ende nuk kanë pushuar për Kosovën. E përjetshme është mirënjohja për Ty dhe për të gjithë familjen Jashari, që është jo vetëm krenari, por edhe simbol i Kosovës”, ka shkruar Gërvalla. /Telegrafi/
Asambleja Nacionale e Republikës së Sllovenisë ka miratuar sot ligjin që zyrtarisht njeh patentë-shoferët e Republikës së Kosovës.
Lajmin e ka bërë të ditur ministrja në detyrë e Punëve të Jashtme dhe Diasporës, Donika Gërvalla, e cila e ka vlerësuar këtë si një hap të rëndësishëm për qytetarët kosovarë që jetojnë dhe punojnë në Slloveni.
“Lajm i mirë për qytetarët tanë dhe mërgatën në Slloveni. Urime!”, ka shkruar Gërvalla, duke shprehur mirënjohje për bashkëpunimin mes dy shteteve.
Me këtë vendim, kosovarët që posedojnë patentë-shofer të lëshuar nga institucionet e Kosovës do të mund ta përdorin atë zyrtarisht në territorin e Sllovenisë, pa pasur nevojë për procedura shtesë të njohjes apo konvertimit.
Ky hap pritet të lehtësojë lëvizjen dhe punësimin e mijëra qytetarëve nga Kosova që jetojnë në këtë shtet të BE-së. /Telegrafi/
Zëvendëskryeministrja dhe ministrja në detyrë e Punëve të Jashtme dhe Diasporës, Donika Gërvalla, ka udhëtuar për në Romë për të marrë pjesë në Konferencën e parë Ndërkombëtare të Italofonisë, e cila zhvillohet më 17 dhe 18 nëntor 2025.
Sipas MPJD-së, konferenca organizohet nga Ministria e Punëve të Jashtme e Italisë në bashkëpunim me Shoqatën “Dante Alighieri” dhe ka për qëllim promovimin e gjuhës italiane si mjet bashkëpunimi kulturor ndërkombëtar.
Në fokus të këtij evenimenti janë temat e identitetit të përbashkët, dialogut ndërkulturor, paqes, zhvillimit ekonomik dhe diplomacisë kulturore.
“Italofonia do të prezantohet si platformë për zhvillim dhe rritje ekonomike, duke forcuar marrëdhëniet mes shoqërive civile, institucioneve dhe bashkësive që flasin gjuhën italiane anembanë botës”, thuhet në njoftim.
Pjesëmarrja e ministres Gërvalla pasqyron marrëdhëniet e forta kulturore mes Kosovës dhe Italisë, ndërsa ajo do të theksojë rolin e mërgatës shqiptare në Itali si urë lidhëse për bashkëpunim kulturor dhe ekonomik./Telegrafi/
Përplasjet ndërmjet ministres Gërvalla dhe atij të Serbisë, Gjuriq në mbledhjen e KS-së së OKB-së dhe
Gërvalla në OKB: “Kosovo Metohija” është shprehje e ambicieve hegjemoniste, Serbia është kërcënim real për rajonin
Një përplasje e ashpër verbale ishte në mbledhjen e Këshillit të Sigurimit të Organizatës së Kombeve të Bashkuara ndërmjet ministres së Punëve të Jashtme të Republikës së Kosovës, Donika Gërvalla dhe ministrit të Punëve të Jashtme të Serbisë, Marko Gjuriq.
Gërvalla, ka mbajtur një fjalim të ashpër në mbledhjen e KS-së së OKB-së, ku ka theksuar se termi “Kosovo Metohije” është një mbetje e gjuhës hegjemoniste serbe dhe një simbol i pretendimeve të Serbisë mbi Kosovën.
“Më lejoni ta sqaroj se nuk ka ‘Kosovë Metohi’. Nuk ekziston, zonja dhe zotërinj. Kosova Metohi është një shprehje e qartë e ambicieve hegjemoniste të Serbisë mbi Kosovën. Është gjuha e vjetër e Slobodan Milosheviqit dhe e atyre që ende e ndjekin”, u shpreh Gërvalla.
Ajo tutje potencoi se Kosova është vendi më pro NATO-s dhe më pro SHBA-së në botë.
“Ne jemi vendi më pro-NATO dhe më pro-SHBA në botë. Rreth 13 mijë njerëz u vranë nga mizoritë serbe të nxitura nga Milosheviqi – dhe presidenti i tij gjatë atij gjenocidi ishte Z. Vuçiq, i cili sot është president i Serbisë”, ka shtuar ajo.
Gërvalla ka paralajmëruar se Serbia vazhdon të paraqesë një kërcënim real për rajonin, përmes propagandës së gjerë shtetërore dhe përgatitjeve të mundshme për agresion.
“Ne shohim çdo ditë makinerinë e pamëshirshme të propagandës në mediat e kontrolluara nga Vuçiq, që helmon shoqërinë serbe dhe përhap urrejtje. Në të gjithë Serbinë mund të shihni murale e grafite që thërrasin ‘kur ushtria kthehet në Kosovë’ – jo ‘nëse’, por ‘kur’. Ata nuk i fshehin qëllimet e tyre”, ka theksuar ajo.
Në fund të fjalës së saj, ministrja ka bërë thirrje për dialog të vërtetë me Serbinë, duke kritikuar sjelljen e presidentit Vuçiq si të bazuar në “mashtrim, tradhti ndaj BE-së dhe luftë hibride ndaj fqinjëve”.
“Ne kemi nevojë për një dialog real, jo për mashtrime. Strategjia e Vuçiqit ndaj BE-së është tradhti, ndërsa ndaj fqinjëve – luftë hibride deri në agresion paramilitar”, ka përfunduar Gërvalla.
Gjuriq me propagandë në OKB
Ndërkaq, ministri i Punëve të Jashtme të Serbisë, Marko Gjuriq, ka paraqitur ankesën e tij në Këshillin e Sigurimit të OKB-së lidhur me mbylljen e strukturave paralele serbe në Kosovë dhe situatën e të drejtave të komunitetit serb.
Gjatë shqyrtimit të raportit periodik për Kosovën, Gjuriq deklaroi se qeveria e kryeministrit Albin Kurti ka shkatërruar 128 institucione që ai i konsideron jetike në komunat me shumicë serbe, duke përfshirë mbrojtjen sociale, postën, pensionet dhe punësimin. Sipas tij, këto veprime po dëmtojnë trashëgiminë e paqes që presidenti i SHBA-së, Donald Trump, arriti gjatë mandatit të tij të parë për normalizimin e marrëdhënieve Serbi-Kosovë
“Të drejtat themelore të serbëve jo vetëm që po injorohen, por po gërryhen sistematikisht. Kjo është një betejë për siguri dhe mbijetesë”, tha Gjuriq.
Ministri serb gjithashtu u fokusua te zgjedhjet lokale të 12 tetorit, duke theksuar se Lista Serbe ka fituar në nëntë nga dhjetë komunat me shumicë serbe dhe se fryma serbe në Kosovë vazhdon të jetë e pathyeshme. Ai pretendoi se kjo qëndrueshmëri është një formë mosbindjeje ndaj presionit dhe frikësimit.
Gjuriq ngriti shqetësime edhe për praninë e dronëve luftarakë kamikazë të tipit Skydagger në Aeroportin Ndërkombëtar të Prishtinës “Adem Jashari”, duke e konsideruar këtë një kërcënim për ambientin e sigurisë. Ai akuzoi përshpejtimin e militarizimit të territorit nga FSK dhe blerjen e pajisjeve të armatosura si rreziqe për stabilitetin lokal.
Në përfundim, Gjuriq përsëriti kërkesën e Serbisë për themelimin e Asociacionit të komunave me shumicë serbe në Kosovë, një strukturë që sipas tij do të mbrojë të drejtat e serbëve në vend.
SHBA dhe Mbretëria e Bashkuar në OKB: Kosova pa krizë sigurie, UNMIK-u duhet të përfundojë
Përfaqësuesi i Shteteve të Bashkuara të Amerikës në Këshillin e Sigurimit të OKB-së, Jeff Bartos, dhe përfaqësuesja e Mbretërisë së Bashkuar, Jennifer MacNaughtan, kanë dhënë mesazhe të njëzëshme për situatën në Kosovë, duke theksuar se vendi nuk ka krizë sigurie dhe se UNMIK-u duhet të përfundojë.
Bartos deklaroi se UNMIK-u ka humbur funksionin e tij fillestar dhe tashmë është bërë “një mision paqeruajtës pa paqeruajtës”.
Ai shtoi se mbi 80 për qind e buxhetit të misionit shkon për pagat e stafit, për funksione që mund të kryhen nga organizata të tjera, dhe se takimet periodike për Kosovën në Këshillin e Sigurimit janë të panevojshme.
Përfaqësuesi amerikan bëri thirrje që Kosova dhe Serbia të përmbahen nga veprimet që mund të përshkallëzojnë tensionet dhe të ndërtojnë paqen dhe stabilitetin me njohjen e ndërsjellë si qëllim përfundimtar.
Nga ana e saj, përfaqësuesja britanike Jennifer MacNaughtan theksoi se Mbretëria e Bashkuar mbetet përkrahëse e palëkundur e zhvillimit demokratik të Kosovës dhe të rrugës së saj euroatlantike.
“Si ndër vendet e para që e kanë njohur pavarësinë e Kosovës, u bëjmë thirrje shteteve anëtare që ende nuk e kanë bërë këtë, t’i bashkohen shumicës. Njohja është esenciale për stabilitet afatgjatë dhe për zhbllokimin e potencialit të plotë të Kosovës,” deklaroi ajo.
MacNaughtan gjithashtu komentoi sulmin terrorist në Banjskë, duke thënë se llogaridhënia për këtë incident dhe për sulmet ndaj KFOR-it është pritur shumë gjatë.
Ajo inkurajoi progres të shpejtë drejt formimit të qeverisë në Kosovë dhe përgëzoi mbajtjen e qetë dhe demokratike të procesit zgjedhor lokal.
Përfaqësuesja britanike theksoi se rishikimi strategjik i UNMIK-ut është i nevojshëm dhe është pritur shumë gjatë.
Britania dhe Franca në OKB: Kosova duhet njohur ndërkombëtarisht, kriminelët e Banjskës të gjykohen
Britania e Madhe ka bërë thirrje ndaj shteteve anëtare të Kombeve të Bashkuara që ende nuk e kanë njohur pavarësinë e Kosovës, duke theksuar se njohja është thelbësore për stabilitetin afatgjatë në rajon dhe zhvillimin e plotë të vendit.
Përfaqësuesja britanike në Këshillin e Sigurimit të OKB-së deklaroi se Mbretëria e Bashkuar mbetet përkrahëse e palëkundur e zhvillimit demokratik të Kosovës dhe të rrugës së saj euroatlantike.
“Si ndër vendet e para që e kanë njohur pavarësinë e Kosovës, u bëjmë thirrje shteteve anëtare që ende nuk e kanë bërë këtë, t’i bashkohen shumicës. Njohja është esenciale për stabilitet afatgjatë dhe për zhbllokimin e potencialit të plotë të Kosovës,” tha ajo.
Britania gjithashtu bëri thirrje që Serbia të dorëzojë Milan Radoiçiqin dhe kritikoi sulmet ndaj Gjykatës Kushtetuese të Kosovës. Përfaqësuesja britanike inkurajoi progres të shpejtë drejt formimit të qeverisë dhe përgëzoi “mbajtjen e qetë dhe demokratike” të procesit zgjedhor lokal.
Nga ana tjetër, përfaqësuesi i Francës në OKB, Jay Dharmadhikari, kërkoi që kryesit e sulmit terrorist në Banjskë të sillen para drejtësisë.
“Është e papranueshme që kryesit e sulmit në Banjskë të mbesin në liri më shumë se dy vjet pas këtyre ngjarjeve. Është kritike që të gjithë kryesit të mbahen përgjegjës dhe të sillen para drejtësisë,” tha Dharmadhikari. /Telegrafi/
Ministrja e Punëve të Jashtme në detyrë, Donika Gërvalla, ka mbajtur një fjalim të ashpër në mbledhjen e Këshillit të Sigurimit të OKB-së, ku ka theksuar se termi “Kosovo Metohije” është një mbetje e gjuhës hegjemoniste serbe dhe një simbol i pretendimeve të Serbisë mbi Kosovën.
“Më lejoni ta sqaroj se nuk ka ‘Kosovë Metohi’. Nuk ekziston, zonja dhe zotërinj. Kosova Metohi është një shprehje e qartë e ambicieve hegjemoniste të Serbisë mbi Kosovën. Është gjuha e vjetër e Slobodan Milosheviqit dhe e atyre që ende e ndjekin”, ka deklaruar Gërvalla.
Ajo ka theksuar se Kosova është një demokraci e vërtetë perëndimore në Ballkan, me një mbështetje të jashtëzakonshme ndaj NATO-s dhe Shteteve të Bashkuara.
“Ne jemi vendi më pro-NATO dhe më pro-SHBA në botë. Rreth 13 mijë njerëz u vranë nga mizoritë serbe të nxitura nga Milosheviqi – dhe presidenti i tij gjatë atij gjenocidi ishte Z. Vuçiq, i cili sot është president i Serbisë”, ka shtuar ajo.
Gërvalla ka paralajmëruar se Serbia vazhdon të paraqesë një kërcënim real për rajonin, përmes propagandës së gjerë shtetërore dhe përgatitjeve të mundshme për agresion.
“Ne shohim çdo ditë makinerinë e pamëshirshme të propagandës në mediat e kontrolluara nga Vuçiq, që helmon shoqërinë serbe dhe përhap urrejtje. Në të gjithë Serbinë mund të shihni murale e grafite që thërrasin ‘kur ushtria kthehet në Kosovë’ – jo ‘nëse’, por ‘kur’. Ata nuk i fshehin qëllimet e tyre”, ka theksuar ajo.
Në fund të fjalës së saj, ministrja ka bërë thirrje për dialog të vërtetë me Serbinë, duke kritikuar sjelljen e presidentit Vuçiq si të bazuar në “mashtrim, tradhti ndaj BE-së dhe luftë hibride ndaj fqinjëve”.
“Ne kemi nevojë për një dialog real, jo për mashtrime. Strategjia e Vuçiqit ndaj BE-së është tradhti, ndërsa ndaj fqinjëve – luftë hibride deri në agresion paramilitar”, ka përfunduar Gërvalla.
Zëvendëskryeministrja dhe Ministrja në detyrë e Punëve të Jashtme dhe Diasporës, Donika Gërvalla, ka udhëtuar për në Nju Jork për të marrë pjesë në seancën e Këshillit të Sigurimit të OKB-së që do të mbahet sot, më 21 tetor 2025, në orën 10:00 sipas kohës lokale në Nju Jork (16:00 në Kosovë).
Në këtë seancë do të shqyrtohet raporti periodik i Sekretarit të Përgjithshëm të OKB-së, António Guterres, për zhvillimet në Kosovë.
Ministrja Gërvalla do të raportojë për punën e mirë të institucioneve të Republikës së Kosovës, për rezultatet, sfidat dhe prioritetet e reformave gjithëpërfshirëse, sidomos në sundimin e ligjit, performancën ekonomike dhe fuqizimin institucional. /Telegrafi/
Partia Guxo ka shprehur shqetësim të thellë lidhur me atë që e cilëson si “ndërhyrje të dyshuara dhe manipulime të qëllimshme” gjatë ditës së zgjedhjeve lokale të mbajtura më 12 tetor në Komunën e Mitrovicës.
Në një reagim publik, Guxo e ka cilësuar situatën si rast të paprecedent dhe ka kërkuar hetim të plotë nga institucionet përkatëse.
“Publikimi i lajmeve dhe rezultateve të rreme, para përfundimit të procesit të votimit, dhe shpërndarja e exit-polleve me dallime skandaloze prej mbi gjashtëmbëdhjetë përqind nga më shumë se një organizatë dhe për të njëjtën komunë, përbëjnë një rast të paprecedent që cenon drejtpërdrejt integritetin e procesit zgjedhor,” thuhet në reagim.
Partia vlerëson se këto veprime nuk janë rezultat i gabimeve të rastësishme, por përbëjnë një përpjekje të organizuar për të ndikuar në procesin zgjedhor.
“Këto veprime nuk janë thjesht pasojë e ndonjë gabimi teknik apo “huqjeje” të rastësishme, por tregojnë për një inxhiniering të mirëfilltë të ndërhyrjes në zgjedhje, me synim ndikimin në perceptimin publik dhe në rezultatin përfundimtar”, thuhet në reagimin e Guxo-s
Për këtë arsye, Guxo u ka bërë thirrje institucioneve të drejtësisë dhe të sigurisë që të ndërmarrin veprime të menjëhershme.
“Partia Guxo u bën thirrje institucioneve të drejtësisë dhe të sigurisë që të hetojnë në mënyrë të plotë dhe të paanshme këtë çështje, për të zbardhur përgjegjësitë individuale dhe institucionale”, thuhet në reagimin e partisë Guxo.
Në fund, partia ka rikonfirmuar përkushtimin e saj për të mbrojtur proceset demokratike dhe votën e qytetarëve.
“Ruajtja e besimit qytetar në proceset zgjedhore është shtylla themelore e demokracisë dhe çdo tentativë për ta cenuar atë duhet të trajtohet me seriozitetin më të lartë”. /Telegrafi/
Për çdo vend, politika e jashtme është karta kryesore e ndikimit dhe sigurisë. Për Kosovën, kjo kartë po luhet në kushte të vështira: sanksione nga Bashkimi Evropian, pasiguri në marrëdhëniet me Shtetet e Bashkuara dhe sfida të pazgjidhura në dialogun me Serbinë.
Sikur këto të mos mjaftonin, situata komplikohet edhe më nga mungesa e dukshme e koordinimit mes institucioneve dhe paqartësia në përcaktimin e qëndrimeve para partnerëve ndërkombëtarë.
Ish-diplomati Albert Prenkaj thotë se Kosova nuk ka një politikë të jashtme të ndërtuar mbi strategji të qartë dhe aleanca të konsoliduara. Sipas tij, vendit i mungon konvergjenca, bashkëpunimi dhe sinergjia me SHBA-në dhe BE-në.
“Kosova është duke përjetuar një asfiksim, një vetëmbyllje dhe ka humbur relevancën në arenën ndërkombëtare. Ka një mungesë totale koordinimi, një kakofoni në politikën e jashtme, që, për pasojë, ka sjellë sanksione”, thotë Prenkaj për programin Expose të Radios Evropa e Lirë.
Për më shumë se dy vjet, Kosova është nën sanksione të BE-së për shkak të vendimeve të Qeverisë që janë perceptuar si të njëanshme dhe në dëm të komunitetit serb. Së fundmi, edhe SHBA-ja ka pezulluar nisjen e Dialogut Strategjik me Kosovën - të krijuar për forcimin e marrëdhënieve dypalëshe - duke shtuar pasigurinë dhe izolimin ndërkombëtar të vendit.
Kryeministri në detyrë, Albin Kurti, ka pranuar ekzistencën e disa dallimeve me SHBA-në, por ka theksuar se Kosova nuk i ka prishur marrëdhëniet me të. Presidentja Vjosa Osmani, në anën tjetër, ka shprehur keqardhje për pezullimin e Dialogut Strategjik dhe ka nënvizuar rëndësinë e ruajtjes së lidhjeve të forta me SHBA-në.
Në fund të muajit të kaluar, të dy këta udhëheqës dhe shefja në detyrë e diplomacisë kosovare, Donika Gërvalla, qëndruan në Shtetet e Bashkuara, derisa zhvilloi punimet Asambleja e Përgjithshme e OKB-së, por të tre me agjenda të ndara prej njëri-tejtrit.
Nga takimet e realizuara, Osmani publikoi fotografi me presidentin amerikan, Donald Trump, dhe me sekretarin amerikan të Shtetit, Marco Rubio.
Gërvalla mori pjesë në një forum të ministreve të Jashtme gra dhe zhvilloi takime të ndara me homologet nga Shqipëria dhe Andorra, ndërsa Kurti shpërndau pamje nga takimet me kongresistë, me studentë, me shqiptaro-amerikanë e të tjerë.
Njoftime për ndonjë takim të Kurtit apo Gërvallës me përfaqësues të Departamentit amerikan të Shtetit nuk ka pasur. Ngjashëm as për ndonjë takim të përbashkët të udhëheqësve kosovarë me udhëheqës të SHBA-së apo shteteve të tjera.Me Kushtetuten e Kosovës, nenin 84, politika e jashtme është kompetencë e Presidencës. Por, kjo përgjegjësi shpesh ka shkaktuar edhe tensione me Qeverinë.
Dy udhëheqësit e tanishëm - Osmani dhe Kurti - janë bashkuar në një listë zgjedhore në vitin 2021, duke premtuar një vizion të përbashkët politik.
“Kemi bërë marrëveshjen e parimeve dhe synimeve politike, të cilën sapo e nënshkruam para jush - marrëveshje kjo për një shtet me drejtësi dhe pa korrupsion, për një shoqëri me shëndet, punësim e arsim për të gjithë qytetarët, pa dallime, diskriminime e favorizime”, ka deklaruar Kurti në janar të vitit 2021.
Por, rruga e tyre nuk ka qenë gjithmonë e njëjta. Dallimet janë shfaqur në raportet me aleatët, në debatin për Asociacionin e komunave me shumicë serbe, për tarifën ndaj mallrave të SHBA-së e për çështje të tjera. Ndonjëherë kanë qenë të hapura, e ndonjëherë më të tërthorta.
Për Donika Eminin, nga Grupi Këshillëdhënës në Evropë për Politika të Ballkanit, këto përplasje në politikën e jashtme nuk janë të reja. Ajo kujton rastin e ish-presidentit Hashim Thaçi dhe ish-kryeministrit Ramush Haradinaj, kur janë përplasur rreth idesë së ndryshimit të kufijve Kosovë-Serbi në vitin 2018. Sipas saj, qasjet e tilla të pakoordinuara e paraqesin Kosovën si shtet të paqëndrueshëm dhe joserioz në sytë e ndërkombëtarëve.
“Për shembull, moskoordinimi i mirëfilltë në kohën kur masat e BE-së janë vënë për Kosovën, sepse ka qenë një periudhë gjashtëmujore prej masave që nuk kanë qenë vendim i Këshillit [të BE-së] e derisa janë bërë... për gjashtë muaj kanë mundur të koordinohen me një diplomaci më të mirëfilltë, në mënyrë që të çoheshin mesazhe të qarta në Bruksel... por të dy, edhe Kurti, edhe Osmani e kanë neglizhuar këtë punë”, thotë Emini.
Radio Evropa e Lirë i është drejtuar Zyrës së Presidentes, Qeverisë dhe Ministrisë së Punëve të Jashtme për të mësuar mbi prioritetet e politikës së jashtme dhe mënyrat e koordinimit mes tyre, por nuk ka marrë asnjë përgjigje.
Sipas Prenkajt, fërkimet mes liderëve nuk janë thjesht dallime mendimesh, por një “luftë për dominancë egosh” që e vështirëson ndërtimin e një vizioni të përbashkët. Edhe Emini e sheh këtë si garë të dëmshme për protagonizëm.
“Ne funksionojmë me politikë të jashtme, e cila formohet në mënyrë ‘ad hock’, në baza ditore politike, për konsum të brendshëm dhe jo për kalkulime të jashtme. Domethënë, është agjendë personale politike e personave të caktuar në Kosovë, është kalkulim politik dhe ego”, thotë ajo.
Prenkaj është i bindur se rruga për rikthimin e Kosovës në skenën ndërkombëtare kalon përmes përmbushjes së përgjegjësive të marra në dialogun për normalizimin e marrëdhënieve me Serbinë. Sipas tij, Kosova duhet të tregojë se është e gatshme t’i zbatojë marrëveshjet.
“Në këtë rast bëhet fjalë për [themelimin e] Asociacionit të komunave me shumicë serbe. E, pastaj, mund të kërkojmë heqjen e masave [të BE-së], fillimin e procesit të anëtarësimit në Këshillin e Evropës, njohjen në pako të pesë vendeve të BE-së, e kështu me radhë”, thotë ish-ambasadori i Kosovës në Itali.
Prenkaj nënvizon se politika e jashtme duhet të përfaqësojë interesat e të gjithë qytetarëve të Kosovës - përfshirë komunitetin serb. Çdo qasje konfliktuoze ndaj këtij komuniteti vetëm se do ta thellonte izolimin e vendit, sipas tij.
Kosova ka nënshkruar një marrëveshje me Serbinë për themelimin e Asociacionit të komunave me shumicë serbe që në vitin 2013, por asnjë qeveri deri më sot nuk e ka zbatuar, nga frika se mund të cenojë funksionalitetin e shtetit.
Trysnia nga BE-ja dhe SHBA-ja ka qenë e vazhdueshme, ndonëse kohët e fundit është zbehur, si pasojë e krizave ndërkombëtare dhe faktit se Kosova funksionon me Qeveri në detyrë që pas zgjedhjeve të 9 shkurtit.
Sipas Eminit, Kosova ka bërë një lëshim të rëndë duke mos ndërtuar asnjë kanal të qëndrueshëm komunikimi me Qeverinë e kancelarit gjerman, Friedrich Merz, marrë parasysh rolin kyç që ka Berlini brenda BE-së. Kjo, sipas saj, i ka kufizuar dukshëm mundësitë e vendit për të avancuar në agjendën evropiane.
Mungesa e strategjisë vërehet, po ashtu, edhe në Uashington. Që nga viti i kaluar, Kosova nuk ka asnjë kontratë lobimi aktive në Shtetet e Bashkuara. Në faqen zyrtare të Aktit të Regjistrimit të Agjentëve të Huaj të Departamentit amerikan të Drejtësisë nuk figuron asnjë marrëveshje e tillë aktive, për dallim prej Serbisë për shembull, e cila i ka gjashtë kontrata aktive lobimi - një avantazh i dukshëm në garën diplomatike.
Për të ilustruar se si duhet të funksionojë një shtet i vogël dhe i kufizuar në arenën ndërkombëtare, Emini sjell shembullin e Tajvanit. Ky vend, megjithëse i pambështetur nga shumë shtete dhe jashtë organizatave të rëndësishme ndërkombëtare për shkak të presionit të Kinës, ka arritur të ndërtojë një politikë të jashtme koherente, falë demokracisë funksionale dhe koordinimit të ngushtë me partnerët strategjikë.
Edhe Prenkaj kujton se shtetet nuk maten me retorikë, por me elemente të prekshme të forcës dhe kapacitetit.
“Me Traktatin e Vestfalisë, që është baza e diplomacisë dhe e së drejtës ndërkombëtare, shtetet janë përcaktuar në bazë të katër prerogativave: territori, demografia, siguria dhe ekonomia. Kosova i ka të gjitha këto, por në masë të vogël krahasuar me vendet e tjera; ndaj, konform këtyre prerogativave, duhet ta marrë rolin e saj në politikën e jashtme dhe në arenën ndërkombëtare”, thotë Prenkaj.
Kështu, të dy ekspertët bien dakord se Kosovës i duhet një politikë e jashtme që i tejkalon rivalitetet e brendshme dhe e vendos interesin shtetëror mbi egot personale.
Me fjalët e Eminit, Kosova duhet të nisë duke rregulluar gabimet e veta dhe duke bërë çmos për heqjen e masave ndëshkuese të BE-së, që kanë bllokuar miliona euro dhe takime të rëndësishme. Sipas saj, nuk ka më mbrojtës që ta mbajnë Kosovën mbi supe - çdo energji e huaj ka mbaruar. /REL/
Ministrja në detyrë e Punëve të Jashtme dhe Diasporës të Kosovës, Donika Gërvalla, ka zhvilluar një takim miqësor dhe pune me homologen e saj nga Republika e Shqipërisë, ministren Elisa Spiropali.
Përmes një postimi në rrjetet sociale, ministrja Gërvalla ka ndarë disa fotografi nga ky takim, duke theksuar rëndësinë e bashkëpunimit të ngushtë ndërmjet dy vendeve tona.
Ajo ka përcjellë një mesazh të shkurtër "Bashkë përherë, krah për krah"./Telegrafi/
TIRANË, 26 shtator /ATSH/ Ministrja për Europën dhe Punët e Jashtme, Elisa Spiropali, zhvilloi një takim në Nju Jork me zëvendëskryeministren dhe ministren e Punëve të Jashtme dhe Diasporës të Kosovës, Donika Gërvalla.
“Takim miqësor pune me Donika Gërvallën, ku jo vetëm rastësia na veshi kuqezi”, shkroi Spiropali në një postim në rrjetet sociale.
Spiropali ndodhet në Nju-Jork, si pjesë e delegacionit të nivelit të lartë të kryesuar nga Presidenti Bajram Begaj, që po merr pjesë në punimet e Asamblesë së Përgjithshme të OKB-së.
Me ftesë të presidentes së Asamblesë së Përgjithshme të OKB, Annalena Baerbock, Spiropali do të marrë pjesë edhe në takimin vjetor të Platformës për Gratë Lidere të Asamblesë së OKB.
Spiropali gjithashtu përfaqëson Shqipërinë në disa takime të rëndësishme shumëpalëshe e dypalëshe, ku në qendër të diskutimeve janë çështjet e sigurisë ndërkombëtare, zhvillimit të qëndrueshëm dhe të drejtave të njeriut.
Ministrat e Punëve të Jashtme të Procesit të Bashkëpunimit të Evropës Juglindore (SEECP) u mblodhën për takimin vjetor, zhvilluar në kuadër të Sesionit të Asamblesë së Përgjithshme të Kombeve të Bashkuara në Nju Jork dje, i bashkëorganizuar nga Këshilli i Bashkëpunimit Rajonal (RCC) dhe Kryesimi i SEECP nga Bullgaria.
Sipas një njoftimi për media takimi i bashkëkryesuar nga Sekretari i Përgjithshëm i RCC, Amer Kapetanoviq, dhe Ministri i Punëve të Jashtme të Bullgarisë, Georg Georgiev, shënoi 30-vjetorin e SEECP nën moton “30 Vite të SEECP: Drejt së ardhmes përmes stabilitetit rajonal, sigurisë dhe transformimit të qëndrueshëm”.
Agjenda e diskutimit në Nju Jork pasqyroi këtë fokus drejt së ardhmes, me synimin për të përkthyer prioritetet e përbashkëta në arritje konkrete rajonale. RCC theksoi evolimin tre-dekadësh të SEECP në forumin politik më gjithëpërfshirës të rajonit dhe përsëriti mbështetjen e tij si krahu operacional i procesit, duke ndërtuar ura mes dialogut dhe zbatimit konkret përmes tri shtyllave: smart (digjital dhe inovativ), aftësimi (i orientuar drejt njerëzve) dhe qëndrueshmëria (tranzicioni i gjelbër).
“Pas tridhjetë vitesh, SEECP mbetet platforma jonë politike më përfaqësuese, dhe RCC është këtu për ta kthyer frymën e bashkëpunimit në arritje të prekshme për njerëzit. Kjo do të thotë përforcim i zbatimit praktik: ndërlidhje më të mençura, aftësi më të forta dhe rritje më të gjelbërt, të mbështetura nga besimi dhe siguria. Qytetarët tanë duan prova, jo premtime. Me unitetin e treguar sot në Nju Jork, jam i bindur se mund të shndërrojmë ambicien në veprim dhe ta bëjmë dekadën e ardhshme të bashkëpunimit rajonal me më ndikim deri më tani”, deklaroi Sekretari i Përgjithshëm i RCC, Amer Kapetanoviq.
Ministrat e SEECP përgëzuan punën e RCC dhe riafirmuan mbështetjen e tyre të plotë për agjendat rajonale në vazhdim. Për më tepër, ata shkëmbyen mendime për forcimin e stabilitetit dhe sigurisë rajonale, përshpejtimin e transformimit të gjelbër dhe digjital, si dhe kthimin e prioriteteve të përbashkëta në arritje konkrete për qytetarët, fushat e përafruara me Strategjinë e re dhe Programin e Punës të RCC 2026–2028, ndërtuar mbi tri shtyllat: I Mençur (Smart), i Aftë dhe i Qëndrueshëm.
Gjatë vizitës së tij në Shtetet e Bashkuara, sekretari i Përgjithshëm i RCC, Amer Kapetanoviq, nënshkroi një Letër Bashkëpunimi me Ivana Zivkoviq, Ndihmës Sekretare e Përgjithshme e OKB-së dhe Drejtore Rajonale e PNUD për Europën dhe CIS, duke përcaktuar një kornizë për forcimin dhe strukturimin e bashkëpunimit në mbështetje të qeverisjes, zhvillimit të qëndrueshëm dhe rezistencës në gjithë Evropën Juglindore.
Ai gjithashtu mori pjesë në takimin e Ministrave të Jashtëm të Nismës Adriatiko-Joniane. Vizita e tij në SHBA do të vazhdojë në Uashington. /Telegrafi/
TIRANË, 20 shtator /ATSH/ Ministrja e Jashtme e Kosovës, Donika Gërvalla uroi ministren Elisa Spiropali për detyrën e re si ministre për Evropën dhe Punët e Jashtme në Shqipëri.
Përmes një postimi në rrjetet sociale, Gervalla shprehu bindjen se “bashkëpunimi ynë i përditshëm do të forcojë edhe më shumë marrëdhëniet tona dhe do të shërbejë për të çuar përpara qëllimet e përbashkëta të dy shteteve tona motra dhe të mbarë kombit tonë”.
‘Njëherazi, falënderim i sinqertë për Igli Hasanin për bashkëpunimin e mirë dhe kontributin e çmuar gjatë gjithë rrugëtimit në këtë detyrë”, shkruan Gërvalla.
Ministrja Spiropali falënderoi Gërvallën për urimin e përcjellë. Spiropali shkruan se është “thellësisht mirënjohëse për bashkëpunimin e deritanishëm dhe për vizionin që ndajmë për forcimin e marrëdhënieve mes dy shteteve tona motra dhe për mbarë kombin tonë”.
“Si gjithmonë, do të jemi krah për krah për të çuar përpara qëllimet tona të përbashkëta, interesin tonë kombëtar, duke i shërbyer me përkushtim ndërtimit të një hapësire ku fjala ka peshë, ku besimi ndërton ura dhe ku dinjiteti kombëtar shndërrohet në energji zhvillimi për rajonin dhe më gjerë”, shkroi Spiropali.
Kryetarja e Guxo, njëherësh ministrja në detyrë e punëve të jashtme dhe diasporës, Donika Gërvalla ka thënë se “vulën” e bllokadës institucionale ia dha Gjykata Kushtetuese me masën e përkohshme me kërkesën e Listës Serbe.
Këto komente Gërvalla i bëri në prezantimin e kandidatëve të partisë Guxo për zgjedhjet lokale të 12 tetorit.
Gërvalla ftoi Gjykatën Kushtetuese dhe paritë tjera politike që të heqin dorë, sipas saj, nga bllokada e panevojshme dhe sa më para të formohet Qeveria e Republikës së Kosovës.
“Jemi përballur gjatë ditëve të fundit me një bllokadë të jashtëzakonshme institucionale, të cilës vulën ia ka dhënë Gjykata Kushtetuese me masën e përkohshme me kërkesën e Listës Serbe. Jemi përballur me një opozitë që nuk është e gatshme ta pranojë rezultatin e 9 shkurtit 2025… Prandaj ftojmë Gjykatën Kushtetuese dhe partitë tjera opozitare që të heqin dorë nga bllokada e panevojshme dhe të formohet qeveria. Mospranimi i rezultatit shpërfaq vetëm dobësinë e skajshme të partive opozitare në Kosovë”, tha ai.
Gjykata Kushtetuese e Kosovës ka marrë vendim për caktimin e masës së përkohshme që ndalon çdo veprim nga deputetët e zgjedhur të Kuvendit të Kosovës, si dhe çdo procedurë për formimin e Qeverisë pas ankesës së Listës Serbe.
Po ashtu, Kushtetuesja ka vendosur që masa e përkohshme të hyjë në fuqi më 5 shtator deri më 30 shtator 2025.
Përndryshe, analistët politikë kanë vlerësuar se koalicioni LVV, Guxo dhe Alternativa nuk i kanë numrat për kromimin e Kuvendit dhe Qeverisë. Ky koalicion për muaj të tërë nuk i kishte votat për ta zgjedhur Albulena Haxhiun si kryetare të Kuvendit. /kp/
Login
